<a href="https://kyzylorda-news.kz/">Kyzylorda-news.kz.</a>&nbsp;Бүгін 1 қыркүйек – Білім күніне байланысты білім беру мекемелерінде алғашқы қоңырау соғылды. Осы ретте Қызылорда облысының қоғамдық даму басқармасының басшысы Мира Қазбекова қаладағы Байзақ Момынбаев атындағы №278 ІТ мектеп-лицейіндегі салтанатты шараға қатысып, білім күнімен құттықтады.
<blockquote>
 «Облыс көлемінде оқушылар саны өткен жылмен салыстырғанда бес мыңға артып, 18 мыңға жуық бүлдіршін алғаш мектеп табалдырығын аттап отыр. Ел Президентінің тапсырмасына сәйкес 2025 жылға дейін республика бойынша апатты және үш ауысымды мектептерді жою мақсатында 1000 мектеп салынады. Өңірде жалпы 2023-2025 жылдары бекітілген жоспар бойынша, 20 мемлекеттік, 12 жеке мектеп салу жоспарлануда. Бүгін – ұстаздар мен оқушылар үшін қуанышты күн. Балаларымыздың болашағы зор болсын! Осы мектептен түлеп ұшқан түлектер Сыр өңірінің атын әлемге танытатын азамат болып, білім шаңырағында бәсекеге қабілетті жас ұрпақ тәрбиелене берсін деген тілек білдіреміз. Жаңа оқу жылы құтты болсын», – деді басқарма басшысы Мира Жомартқызы.
</blockquote>
<img src="https://kyzylorda-news.kz/wp-content/uploads/2022/09/738e5f12-f9cd-4da8-84c2-6bdd8c712017.jpg" alt="" />
<img src="https://kyzylorda-news.kz/wp-content/uploads/2022/09/4159490d-e132-4e03-aae2-921f95d4fd12.jpg" alt="" />

Қызылорда: Алғашқы қоңырау соғылды

<a href="https://kyzylorda-news.kz/">Kyzylorda-news.kz.</a> Бүгін еліміздің мектептері мен оқу орындарында жаңа оқу жылы басталды. Дәстүрге сай 1 қыркүйек елімізде алғашқы қоңырау салтанатты шарасы ретінде аталып өтіледі.
Жаңа оқу жылында Қызылорда облысы бойынша 18 мыңға жуық бала бірінші сыныптың табалдырығын аттады. Осы ретте қазақ тілінде оқытатын мектептерде бірінші сынып оқушылары қазақ тілінде, орыс тілінде оқытатын мектептерде – қазақ және орыс тілдерінде оқытылатын болады. Қазақ мектептерінде орыс тілі пәні 2 сыныптан бастап оқытылатын болса, ағылшын тілі 3 сыныптан бастап оқу жоспарына енгізілмек. Сонымен қатар, қаладағы үш ауысымда оқытатын 6 мектептен басқа барлық білім беру ұйымдары 5 күндік оқу аптасына ауыстырылды.
Сонымен қатар биыл өңірдегі 30 колледжде 20 мыңға жуық студент білім алады деп күтілуде. Қазіргі уақытта техникалық және кәсіптік білім беру ұйымдарына оқуға түсу үшін өтініштерді қабылдау аяқталды. Нәтижесінде, оқуға түсу үшін 6198 өтініш түссе, оның 4989-ы мемлекеттік білім грантына болса, 1209-ы ақылы негізде білім алуға құжат тапсырған.
Айта кетейік, Қызылорда облысында жаңа оқу жылының қарсаңында 3 жаңа мектеп ашылады. Ал жыл соңына дейін 5 мемлекеттік және 1 жеке мектепті пайдалануға беру жоспарланып отыр.

Білім күні: Қызылордада 3 жаңа мектеп ашылды

<a href="https://kyzylorda-news.kz/">Kyzylorda-news.kz.</a>&nbsp;2022-2023 жаңа оқу жылында аймақтағы 295 мемлекеттік және 16 жекеменшік мектептерде 182 мың оқушы білім алады деп жоспарлануда. Бұл көрсеткіш өткен жылмен салыстырғанда бес мың оқушыға артқанын білдіреді. Сондай-ақ, биылғы оқу жылының ұзақтығы 36 оқу аптасы болып бекітілді. Тиісінше, сабақ жоспарының уақыты ұзартылып, оқушылар күніне 5-6 пәннен оқитын болады. Бұл туралы Өңірлік коммуникациялар қызметінде өткен брифингте облыстық білім басқармасының басшысы Мейрамбек Шермағанбет хабарлады.
Басқарма басшысының айтуынша, қазіргі оқу бағдарламасында бірқатар түзетулер енгізіліп, бірінші сынып оқушыларына «Шетел тілі» және «Орыс тілі пәндері» оқытылмайды. Ал барлық сыныптарда «Өзін-өзі тану» пәні үлгілік оқу жоспарының инвариантты компонентінен алынып тасталынды.
<blockquote>
 «Жаңа оқу жылында облыс бойынша 18 мыңға жуық бала бірінші сыныптың табалдырығын аттамақшы. Осы ретте қазақ тілінде оқытатын мектептерде бірінші сынып оқушылары қазақ тілінде, орыс тілінде оқытатын мектептерде – қазақ және орыс тілдерінде оқытылатын болады. Қазақ мектептерінде орыс тілі пәні 2 сыныптан бастап оқытылатын болса, ағылшын тілі 3 сыныптан бастап оқу жоспарына енгізілмек. Ал оқушылардың білімін бағалау көрсеткішінде өзгеріс болмайды. Сонымен қатар, қаладағы үш ауысымда оқытатын 6 мектептен басқа барлық білім беру ұйымдары 5 күндік оқу аптасына ауыстырылды. Жалпы оқулық және оқу-әдістемелік кешендермен толық қамту бойынша 13 баспамен 86 келісім-шарт жасалынған болатын. Осыған сәйкес, 637 313 дана жаңа оқулық алынып, екінші сынып кітаптары толығымен жаңартылды. Ал қалған сыныптың оқулықтары 20 пайызға толықтырылды. Сондай-ақ, «Мектепке жол» акциясы шеңберінде демеушілер есебінен 7 105 балаға қаржылай көмек көрсетілсе, жергілікті бюджеттен 33 268 балаға – 37 389 теңгеден қаржылай көмек берілді. Айта кетейін, «Жалпыға міндетті білім беру» қорынан атаулы әлеуметтік көмек алатын отбасылардың балаларына, сондай-ақ АӘК алмайтын, бірақ жан басына шаққандағы орташа табысы ең төменгі күнкөріс деңгейінен төмен отбасылардың балаларына, жетім балаларға және ата-анасының қамқорлығынсыз қалған балалар, төтенше жағдайға тап болған оқушыларға қаржылай көмек көрсетілді», – деді облыстық білім басқармасының басшысы Мейрамбек Шермағанбет.
</blockquote>
Брифинг барысында басқарма басшысы орта оқу орындарындағы дайындық барысына тоқталып өтті. Биыл өңірдегі 30 колледжде 20 мыңға жуық студент білім алады деп күтілуде.
<blockquote>
 «Орта оқу орындарындағы сабақтар дәстүрлі форматта басталады. Қазіргі уақытта техникалық және кәсіптік білім беру ұйымдарына оқуға түсу үшін өтініштерді қабылдау аяқталды. Нәтижесінде, оқуға түсу үшін 6198 өтініш түссе, оның 4989-ы мемлекеттік білім грантына болса, 1209-ы ақылы негізде білім алуға құжат тапсырған. Биыл колледждерге бөлінген грант саны – 4708-і құрап отыр», – деді Мейрамбек Зинабдинұлы.
</blockquote>
<img src="https://kyzylorda-news.kz/wp-content/uploads/2022/08/303596848_1608075476254625_6136340705807368963_n.jpg" alt="" />

Ертең 1 қыркүйек: Облыстың бас ұстазы не дейді?

Kyzylorda_news.kz. Қазақстан Республикасының оқу-ағарту вице-министрі Ғани Бектайұлы Бейсембаев жұмыс сапарымен Қызылорда облысына келді. Ол ең алдымен өңірдегі «Білімді ұлт: терең білім, еңбекқорлық және отаншылдық қасиет» педагогикалық тамыз кеңесі пленарлық мәжілісіне қатысты.
Вице-министр Ғани Бектайұлы жұмыс сапары барысында Қызылорда облысы әкімінің орынбасары Нұрымбет Сақтағанов, облыстық білім басқармасының басшысы Мейрамбек Шермағанбетпен бiрге облыстық мамандандырылған сәбилер үйінің жұмысымен танысты.
Қызылорда облыстық денсаулық сақтау басқармасының басшысы Сабит Бексейітұлы Пазылов мекемені аралатып, жұмыс барысын көрсетті.
Сәбилер үйін аралау кезінде вице-министр мекемеде тәрбиеленіп жатқан бүлдіршіндермен жүздесті. Сонымен қатар сәбилер үйіндегі сенсорлық кабинет, емдік дене шынықтыру, монтессори, ән-күй кабинеттерінің және 2022 жылдың ақпан айында «Балалар жылына» арнайы ашылған «Тұзды шахта» бөлмесінің жұмысымен танысып шықты.
Аралау барысында вице-министр сәби үйі ұжымының жұмысына оң бағасын беріп, қызметкерлерге жасап жатқан еңбектері үшін алғысын білдірді.
<img src="https://kyzylorda-news.kz/wp-content/uploads/2022/08/img-20220827-wa0101.jpg" alt="" />
<img src="https://kyzylorda-news.kz/wp-content/uploads/2022/08/img-20220827-wa0099.jpg" alt="" />

Оқу-ағарту вице-министрі Қызылорда облысындағы сәбилер үйіне барды

<a href="https://kyzylorda-news.kz/">Kyzylorda-news.kz.</a> «Білімді ұлт: терең білім, еңбекқорлық және отаншылдық қасиет» педагогикалық тамыз кеңесінде Қызылорда облысының әкімі Нұрлыбек Нәлібаев мұғалімдерді әлеуметтік қолдаудың нақты қадамын атап өтті.&nbsp;
<blockquote>
 «Соңғы жылдары мұғалім мәртебесін көтерудің барлық алғышарттары жасалып, материалдық ынталандыру аясы кеңейіп келеді. 2020 жылдан ұстаздарға қажетті үстемақы төленуде, биыл бұл мақсатқа републикалық бюджеттен – 52,4 млрд. теңге қаржы бөлінді. Келесі жылы педагогтер жалақысы тағы 25 пайызға көбейеді. Бұл – мұғалімдерді әлеуметтік қолдаудың нақты бір қадамы. Біз де қоғам алдында ұстаздардың беделін арттыруға ынталымыз», – деді Нұрлыбек Нәлібаев.
</blockquote>
Ұстаздар жиынында аймақ басшысы он жылдан аса уақыттан бері бір мектепті басқарып келе жатқан директорлар туралы да айтып өтті.
<blockquote>
 «Білім беру жүйесіне ротациялау тәртібін енгізу уақыт талабынан туындаған міндет. Ашығын айтқанда, бізде бір орында 10-15 жыл және одан да көп қызмет атқарып жүрген директорлар аз емес. Әрине, олардың арасында өз жұмысын жетік білетін, білім беру ұйымдарының дамуына елеулі үлес қосып жүрген басшылар да бар. Әлеуметтанушылардың пікірінше, мекемені ұзақ жылдар басқару адамның бастамашыл идеясы мен жұмысқа деген ынтасын төмендетеді. Сәйкесінше, басшыларды ротациялау сала дамуына жаңаша леп, тың серпін береді», – деді облыс әкімі.
</blockquote>
Аталған мәселеге қатысты аймақ басшысы облыстық білім басқармасына заң шеңберінде ротациялау рәсімдерін 1 қазанға дейін аяқтауды тапсырған.
<blockquote>
 «Білім саласы қай кезде де ашықтықты қажет етеді. Соған сәйкес, сыбайлас жемқорлықты болдырмау және оның алдын алу-баршамыздың міндетіміз. Өйткені бір ғана сыбайластық фактісі біздің жасап жатқан жұмысымыздың нәтижесін жоққа шығарады. Сондықтан, білім беру ұйымдарының басшылары кадр мәселесіне келгенде, азаматтық ұстаным мен адалдық принципін ұстануы керек. Облыстық білім басқармасына сыбайлас жемқорлыққа жол бермеу және оның алдын алу бойынша мүдделі органдармен бірлескен тиімді жұмыстарды жүргізуді және мұғалімдерді конкурс тәртібімен жұмысқа қабылдауды тапсырамын», – деді Нұрлыбек Мәшбекұлы.
</blockquote>
Облыс әкімі білім берудің үздік тәжірибесін лайықты жалғастыра келе, ұлттық құндылықтар мен тұлғатану институтын қалыптастыру қажет екенін жеткізді.
<blockquote>
 «Бұл – бүгінгі буынның біліміне жауапты ұстаздарды ғана емес, бауыр еті баласы үшін барын беретін ата-аналарды да алаңдатуы қажет. Сондықтан құндылықтарға негізделген білім арқылы парасат биігіне жетеміз. Бұл ретте, биыл еліміз бойынша кең ауқымдағы аталып өтіп жатқан Ахмет Байтұрсыновтың, Мұхтар Әуезовтің, Ғани Мұратбаевтың мерейтойлық шаралар балалардың рухани танымын тереңдетуге жол ашады», – деді аймақ басшысы.
</blockquote>
<img src="https://kyzylorda-news.kz/wp-content/uploads/2022/08/whatsapp-image-2022-08-26-at-15.49.20.jpeg" alt="" />

Аймақ басшысы: Ротациялау рәсімдері 1 қазанға дейін аяқталуы тиіс

<a href="https://kyzylorda-news.kz/ru/">Kyzylorda-news.kz</a>. Жаңа мектеп салу, апатты және үш ауысымды жою – білім саласындағы басым бағыттардың бірі. Бүгінде аймақтағы 6 мектептің үш ауысымға өту қаупі бар, ал 4 апатты деп танылған 3 мектептің мәселесі биыл шешімін тапты. Оның екеуі қыркүйекте табысталады. Бұл туралы Қызылорда облысының әкімі Нұрлыбек Нәлібаев «Білімді ұлт: терең білім, еңбекқорлық және отаншылдық қасиет» педагогикалық тамыз кеңесінің пленарлық мәжілісінде мәлімдеді.
<blockquote>
 «Арал ауданы Тоқабай ауылындағы апатты мектеп әкімдіктің ұйымдастыруымен жеке инвестор есебінен салынуда. Қазалы ауданындағы №94 мектептің жоба-сметалық құжаттары әзірленуде. Аймақтағы демографиялық өсімді ескере келе, алдағы 3 жылда аймақта 20 мемлекеттік мектептің іргетасын қалаймыз. Бүгінгі күні демеушілердің өз қаражатына салынған жеке мектептердің желісі 20-ға жетті. Алдағы жылдары инвестор есебінен тағы 12 мектеп салынатын болады.&nbsp;
 Ал, биылдың өзінде облыста 6 жаңа мектеп бой көтереді,оның 2-еуін келер айда, қалған 4-еуін жыл соңына дейін пайдалануға береміз. Бұған қоса 6 мектепке күрделі жөндеу жүргізілуде, бұл мақсатқа облыстық бюджеттен – 2,1 млрд.теңге қаралды. Әрбір нысан уақытылы әрі сапалы аяқталуына мердігерлер мен мектеп директорлары мүдделі болуы тиіс!», – деді аймақ басшысы.
</blockquote>
Жыл сайын мектептерде орын тапшылығы туындайтыны жасырын емес.
Нұрлыбек Мәшбекұлының айтуынша жыл аяғына дейін қаладағы Абай мектебіне 550, №101 мектепке 375 орынға лайықталған қосымша құрылыс салынбақ. Осы арқылы көп жылдардан бері шешімін таппаған бұл мектептегі үш ауысымға ауысу қаупіндегі мәселе түбегейлі шешіледі.
<blockquote>
 «Ал, келесі жылы облыс орталығындағы бала саны көп №3 лицейге 300, №264 мектепке 600 орындық қосымша ғимарат құрылысын бастаймыз. Бұған облыстық бюджеттен жоба-сметалық құжаттарды әзірлеуге қажет қаржы бөлдік.
 Жерлестеріміз үшін тағы бір жағымды жаңалық, 2024 жылы Арай, СПМК-70 мөлтек аудандары мен Сырдарияның сол жағалауында жаңа мектептер бой көтеретін болады» – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2021/05/shkola.jpg" alt="" />

Қызылорда: Алдағы 3 жылда 32 мектептің іргетасы қаланады

<a href="https://kyzylorda-news.kz/">Kyzylorda-news.kz.</a> Қазалы ауданында жаңа оқу жылына дайындық жұмыстары пысықталды.
Аз ғана уақыттан соң кезекті жаңа оқу жылы басталады. Сондықтан да оқушылардың сапалы білім алуына қолайлы жағдай жасау үшін білім беру ұйымдарының жоғары дайындықта болуы өте маңызды.
Бұл маңызды мәселе бүгін аудан әкімі Мұхтар Оразбаевтың төрағалығымен өткен әкімдік мәжілісінде қаралып, дайындық жұмыстары пысықталды.
Мұхтар Әуесұлы күн тәртібіндегі мәселенің маңызды екенін атап өтіп, бұл мәселе Қазақстан Республикасы Үкіметі мен аймақ басшысының ұдайы назарында екенін жеткізді.
Күн тәртібіндегі мәселеге байланысты аудандық білім бөлімінің басшысы Әділхан Жөлекешов баяндама жасап, атқарылып жатқан жұмыстарды тілге тиек етті.
Аудан әкімі Мұхтар Әуесұлы қазіргі таңда бірнеше мектеп пен балабақшалардың басшысыз отырғандығын сынға алды.
<blockquote>
 «Жаңа оқу жылында ауданда 3 мектеп директорының орны бос. Бұл мәселе – өте өзекті. Басшысыз мекемеде жұмыстың сапасы мен қызметкерлердің жауапкершілігінің төмендейді. Сондықтан бос тұрған орындарға тезірек басшыларды тағайындау қажет», – деді аудан басшысы.
</blockquote>
Сондай-ақ, білім ошақтарының қысқы жылу беру маусымына дайындықты күшейтуді тапсырды. 
Басқосу мұнан соң аппарат мәжілісіне ұласып, мұнда да маңызды мәселелер талқыланды.
Бірінші мәселе бойынша аудандық жұмыспен қамту, әлеуметтік бағдарламалар және азаматтардың хал актілерін тіркеу бөлімінің басшысы Совет Бабанаев баяндама жасап, ауданда «2021-2025 жылдарға арналған кәсіпкерлікті дамыту жөніндегі» ұлттық жобаның жүзеге асырылу барысы туралы егжей-тегжейлі айтып берді.
Екінші мәселе – 2022-2023 жылдар аралығындағы жылу беру маусымы кезеңіне әлеуметтік-мәдени нысандардың дайындығы жайлы аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтанов хабарлама жасады.
Үшінші мәселе 2022 жылдың 8 айындағы және жылдық қаржы игеру болжамы туралы аудандық қаржы бөлімінің басшысы Әліби Әбиев, төртінші мәселе аудандағы міндетті әлеуметтік медициналық сақтандыру мәселесі жайлы Қазалы ауданаралық ауруханасының бас дәрігері Бақытгүл Әлішева баяндады.
Күн тәртібіндегі мәселелер жан-жақты талқыланғаннан кейін аудан әкімі Мұхтар Оразбаев аудан әкімінің орынбасарлары мен тиісті сала басшыларына нақты тапсырмалар берді.
<img src="https://kyzylorda-news.kz/wp-content/uploads/2022/08/00-1.jpg" alt="" />
<img src="https://kyzylorda-news.kz/wp-content/uploads/2022/08/04.jpg" alt="" />

Қазалыда жаңа оқу жылына дайындық жұмыстары пысықталды

<a href="https://kyzylorda-news.kz/">Kyzylorda-news.kz.</a> Биылғы тестілеу нәтижесі бойынша жоғары оқу орындарына 5439 бітіруші түлек құжат тапсырып, оның 4082-сі мемлекеттік білім беру грантына қол жеткізді. Жаңа 2022-2023 оқу жылына Қорқыт ата атындағы Қызылорда университетіне мемлекеттік грант бойынша оқуға қабылданған талапкерлер саны 949-ды құрап отыр. Бұл туралы Өңірлік коммуникациялар қызметінде өткен баспасөз конференциясында айтылды.
Мемлекеттік гранттың басым бөлігі қай бағытқа бөлінді? Қоғамның қай санаттағы өкілдеріне жеңілдіктер қарастырылған? Осы және өзге де сауалдарға Қорқыт ата атындағы Қызылорда университетінің ректоры – Басқарма Төрағасы Бейбіткүл Кәрімова жауап берді.
<blockquote>
 «Биылғы оқу жылына бөлінген 949 мемлекеттік гранттың 448-і – педагогикалық, 255-і инженерлік бағытқа бөлінген. Бұл – біздің ұжым үшін үлкен мақтаныш. Өйткені бұған дейінгі жылдарда көп көлемде грант мөлшері қарастырылмаған. Айта кетейік, оқу орнына мемлекеттік грант бойынша оқуға түскендер 2021 жылы 795 болса, биыл бұл көрсеткіш 19,37 пайызға артып отыр. Бұдан бөлек, өңірге қажетті мамандықтар бойынша 2022 жылға облыс әкімінің 42 гранты бөлінді. Ауылдық жерлердегі жағдайы төмен отбасылардан шыққан талапкерлерге, жетім бала санатына жататын және кәмелеттік жасқа дейін ата-анасының қамқорлығынсыз қалған және мүмкіндіктері шектеулі, соның ішінде мүгедектігі бар талапкерлерге «Қазақстан халқына» қоғамдық қорынан 10 грант берілді», – деді Бейбіткүл Сәрсемханқызы.
</blockquote>
Сондай-ақ, магистратура бойынша 621 талапкер Қорқыт ата атындағы Қызылорда университетін таңдаса, докторантураға 21 үміткер өтініш білдірген.
<img src="https://kyzylorda-news.kz/wp-content/uploads/2022/08/bejbitkwl.jpg" alt="" />

Қорқыт ата атындағы Қызылорда университетіне мемлекеттік грантпен 949 талапкер оқуға түсті

Kyzylorda-news.kz. Қазақстан Республикасы Президентінің жанындағы Мемлекеттік басқару академиясына 2022-2023 оқу жылына мемлекеттік тапсырыс негізінде Қызылорда облысының жергілікті атқарушы органдары бойынша 9 мемлекеттік әкімшілік қызметші магистрант мен докторант тізіміне қабылданды.
Нақты айтсақ, алғаш рет облыс әкімі аппаратының бас инспекторы Альбина Прниязоваға ҚР Президентінің жанындағы Мемлекеттік басқару академиясына докторант гранты тағайындалса, 8 мемлекеттік қызметші магистратура тізімінде.
Ал, магистранттар қатарында облыстық мемлекеттік сатып алу басқармасы басшысының орынбасары Алтынай Қуандық, облыстық қоғамдық даму басқармасы басшысының орынбасары Руслан Қаюпов, облыстық қоғамдық даму басқармасы басшысының орынбасары Қуаныш Әбілдаев, Арал ауданы әкімінің орынбасары Бектемір Жұмағұлов, Қазалы ауданы әкімі аппаратының ұйымдастыру және инспекторлық жұмысы бөлімінің басшысы Жәнібек Алиев, облыстық экономика және қаржы басқармасының коммуналдық мүліктің есебіндегі нысандарды жалға беру және жекешеленліру рәсімдерін жүргізу жөніндегі бөлімінің басшысы Нұрланбек Ердигаликов, облыстық энергетика және тұрғын үй-коммуналдық шаруашылық басқармасының электр энергетиканы дамыту бөлімінің басшысы Тұрарбек Бадаев, облыстық энергетика және тұрғын үй-коммуналдық шаруашылық басқармасының әкімшілік-құқықтық жұмыстар бөлімінің басшысы Руслан Тәуекелов бар. 
Нәтижесінде республика бойынша өңіріміз үздік үштікте.
Айрықша атап өтетін жайт, Мемлекеттік басқару академиясына биыл түскен түлектердің 90 пайызы басқарушы қызметте жұмыс жасайтын мемлекеттік қызметшілер болып табылады.

Қызылорда облысы республика бойынша үздік үштікте

<a href="https://kyzylorda-news.kz/">Kyzylorda-news.kz.</a>&nbsp;Оқу-ағарту министрі Асхат Аймағамбетов Қазақстанда онлайн мектеп мен колледждер бойынша норма заңды түрде бекітілуі мүмкін екенін айтты. Сонымен қатар алдағы уақытта онлайн білім беруге арналған біліктілік шарттары да жасалуы мүмкін, деп хабарлайды&nbsp;<a href="https://stan.kz/">Stan.kz</a>.
<blockquote>
 «Пандемия барлығымыз үшін үлкен сын болды. Жүйені бір сілкінтіп алды. Әрине, онлайн білім беруге әр түрлі көзқарас болуы мүмкін, дегенмен мұның шындыққа айналғанын түсінуіміз керек. Біз онлай мектептер мен онлайн колледждер бойынша норманы заңды негізде бекіту үшін шара қабылдағымыз келеді», – деді ол тамыз конференциясында.&nbsp;
</blockquote>
Асхат Аймағамбетов бұл мәселенің алдын ала талқылаудан өтетінін&nbsp;айтып өтті.&nbsp;
<blockquote>
 «Қазір ғаламтордың шекарасы жоқ. Егер балалар біздің елде белгілі бағыттар бойынша онлайн колледжде білім ала алмаса, мұны өзге елдердің онлайн колледждерінде оқи алады. Сондықтан бізге мәселенің жоқ екенін айтудан гөрі, мәселені шешім, заңдастыру керек», – деп қосты ол.&nbsp;
</blockquote>
Министр мысал ретінде шетелдік тәжірибені келтірді. Мысалы, Ресейдегі Фоксфорд онлайн мектебі 1-сыныптан 11-сыныпқа дейін білім беріп, мемлекеттік үлгідегі аттестат ұсынады. Ал оқыту бағдарламасына барлық пәндер қосылған. Білім беру ақылы негізде жүргізіледі.&nbsp;
Ұлыбританияда онлайн мектептер тіркеле алады. Мұнда мұғалімдер онлайн режимде сабақ береді. Тек химия пәні ғана зертханалық тәжірибе жасалғандықтан онлайн режимінде өтпейді.

Қазақстанда онлайн мектептер мен колледждер пайда болуы мүмкін

<a href="https://kyzylorda-news.kz/">Kyzylorda-news.kz.</a>&nbsp;1 қыркүйек – Білім күніне небәрі екі апта уақыт қалды. Аймақта биыл 182 мың оқушы білім алмақ. Қызылорда облысының әкімі Нұрлыбек Нәлібаев жаңа оқу жылында балалар еш кедергісіз білім алуы қажет екенін алға тартты. Әсіресе, мектептердегі күрделі жөңдеу жұмыстарының уақытылы аяқталуын қатаң бақылауға алды. Бүгін аймақ басшысы бірқатар нысандарды аралап, атқарылған жұмыстарды көзбен көрді.
Биыл өңірдегі 6 мектепте күрделі жөңдеу жұмыстары жүруде. Бұл үшін бюджеттен 2,1 млрд. теңге қаржы бөлінген. №10 Ы.Алтынсарин атындағы мектепке барған облыс әкімі білім ордасының оқу процесіне әзірлігін бақылады. Аймақ басшысы жыл сайын апатты мектептерді жойып, жаңа мектептердің желісі көбейтуге басымдық берілетінін айтты.
<blockquote>
 «Оқушылардың қуанышына ештеңе жетпейді. Мектепке қомақты қаржы бөлінгендіктен, күрделі жөндеу жұмыстары өте сапалы орындалуы керек. Себебі оқу жылына білім беру нысандарының дайындығы Үкімет басшысының тікелей назарында. Демографиялық өсімнің нәтижесінде қалада ықшам аудандар көбейіп, мектептерде орын тапшылығы мәселесі туындағаны жасырын емес. Бұл ретте апатты жағдайдағы 4 мектептің екеуінің ғимаратын жаңа оқу жылында табыстаймыз. Тоқабай ауылындағы бір апатты мектеп мәселесін жеке инвестор арқылы шештік. Жерлесіміз, меценат азамат өз қаражаты есебінен 550 млн.теңгені құрайтын 100 орындық мектеп құрылысын бастады. Мұнан өзге, Қазалы ауданындағы тағы бір мектептің жобалық-сметалық құжаттары әзірленуде. Сондай-ақ, қала мектептеріндегі орын тапшылығын жою үшін 4 мектептің жанынан қосымша ғимарат салуға шешім қабылданды. Себебі жаңа мектеп салу қымбатқа түседі. Қазіргі таңда 600 және 375 орындық 2 мектептің жоба-сметалық құжаттары аяқталып, мердігер компаниялар бекітілуде. Ал, қалған 2 білім ұясының жобалық-сметалық құжаттамасы әзірленуде», – деді Нұрлыбек Нәлібаев.
</blockquote>
Өңір басшысы балалар жылына тарту ретінде демеушілер есебінен өңірде 80 спорттық ойын алаңы салынатынын жеткізді. Яғни Қызылорда қаласында 1 млрд. теңгеге 50-ге тарта, аудандарда 600 млн. теңгеге 30-дан астам спорттық-ойын алаңы бой көтереді. Мұнан бөлек, демеушілердің қолдауымен аймақта 45 млрд. теңгеге 391 жоба әзірленді. Ең бірінші кезекте ауыз су, электр жарығы, жол сапасы мен елді мекендерді газдандыру жұмыстары жүргізіледі. Бұл жобалар келесі жылдан бастап іске асырылады.
Әрі қарай облыс әкімі аймақтағы ірі өндіріс орны шыны зауытына да барды. Өткен жылдың желтоқсан айында зауыттың күйдіру пеші техникалық іске қосылған. Алайда, пешті қосу-реттеу барысында ақаулар анықталып, қажетті күйдіру қондырғысына тапсырыс беріліп, жеткізілді.
Аймақ басшысы Нұрлыбек Нәлібаевтың тапсырмасы негізінде зауытты іске қосу үшін биылғы жылдың 25 шілдесінде арнайы Штаб құрылғанын жеткізді. Мұндағы мақсат – зауытты іске қосу кезінде туындаған мәселелерді шұғыл түрде шешу.
Әкімдік өз құзыреті шегінде инженерлік инфрақұрылымды жеткізіп беруге жауапты. Осы ретте, зауытқа қажетті электрэнергия, байланыс желісі, автомобиль жолы, су және кәріз жүйелері жеткізілді. Сыртқы темір жол тұйығы құрылысы аяқталды. Енді кезекте екінші тараптар техникалық және авторлық бақылау өкілдерінің берген ескертулерін жою жұмыстарын жеделдетуі керек. Себебі газ келгеннен кейін, пешті қайта іске қосып, жағу үшін қабылдау актісін рәсімдеп, бітіруі қажет.
Өңір басшысы сала мамандарымен пікірлесіп, ауқымды зауытты іске қосу үшін қажетті шараларды жылдам қабылдау керек екендігін жеткізді.
<blockquote>
 «Шынын айтқанда, зауытты іске қосу процесі тым ұзап кетті. Бар мүмкіндікті пайдаланып, зауытты іске қосуымыз қажет. Бұған дейін уәде көп берілгенімен, нәтиже болмады. Халық асыға күтіп отыр. Сондықтан қалайда өндірісті аяқтауға тиіспіз. Аптасына екі рет штаб өткізіп, өзекті мәселелерді талқылау қажет. Бәрі де менің тікелей бақылауымда болады», – деді Нұрлыбек Нәлібаев.
</blockquote>
Айта кетейік, жоспар бойынша шыны зауытының бірінші өнімі қазан айында шығарылмақ.
<img src="https://kyzylorda-news.kz/wp-content/uploads/2022/08/img-20220816-wa0030.jpg" alt="" />
<img src="https://kyzylorda-news.kz/wp-content/uploads/2022/08/img-20220816-wa0070-1.jpg" alt="" />
<img src="https://kyzylorda-news.kz/wp-content/uploads/2022/08/img-20220816-wa0072-1.jpg" alt="" />
<img src="https://kyzylorda-news.kz/wp-content/uploads/2022/08/img-20220816-wa0071-1.jpg" alt="" />

Нұрлыбек Нәлібаев: Мектептердің күрделі жөндеу жұмыстары сапалы аяқталуы керек

*<a href="https://kyzylorda-news.kz/">Kyzylorda-news.kz.</a> Бүгін Премьер Министр Әлихан Смайловтың төрағалығымен Үкімет отырысы өтіп, оқу жылына дайындық барысы сараланды. Үкімет басшысы жаңа оқу жылына дайындық жұмыстары жоспарға сай жүргізілу қажет екенін айтты.*
Жиынға бірқатар министрлер мен онлайн режимде барлық өңірдің әкімдері қатысты.
Үкімет отырысынан кейін облыс әкімі Нұрлыбек Нәлібаев күн тәртібіндегі мәселе бойынша сала басшыларына арнайы тапсырмалар берді.
Аймақтағы 295 мемлекеттік, 16 жекеменшік мектепте 182 мың оқушы білім алмақ. Осы ретте, екі апатты мектептің (Арал №71, Жаңақорған №169) ғимараты жаңа оқу жылына тапсырылады. Биыл 1-сыныпқа 17 898 бала мектеп табалдырығын аттайды деп күтілуде.Аймақ басшысы жаңа оқу жылын бастауда еш кедергі болмау қажет екенін ескетті.
<blockquote>
 «Қала, аудан әкімдеріне жергілікті жердегі барлық мәселеге жауапты екендіктеріңізді тағы да бір еске саламын. Сабақ процесі еш кедергісіз басталуы керек.Көмекке мұқтаж отбасының балаларына қажетті барлық қолдау шараларын жүзеге асырыңыздар! Бұл тек басқарманың ғана емес, қала, аудан әкімдерінің де тікелей міндеті», – деді Нұрлыбек Нәлібаев.
</blockquote>
Сондай-ақ, білім саласындағы тағы бір көтерілген мәселе – оқулықтардың жеткізілуі. Нұрлыбек Машбекұлы бұл мәселеде мектеп оқушыларына тиісті берілетін кітаптарды үлестіру жұмыстарын ерте ұйымдастыруды тапсырды.
Сонымен қатар, биылғы жылы жалпыға міндетті оқу қоры аясында ҚР Үкіметінің қаулысына сәйкес тиісті көмек түрлерін алатын арнайы санаттағы 31 322 бала анықталды. Бұған жергілікті бюджеттен қажетті қаржы бөлінген.
<img src="https://kyzylorda-news.kz/wp-content/uploads/2022/08/fb_img_1660654237262.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660654239787.jpg" alt="" />

Қазақстан және Қызылорда облысының жаңалықтары: Білім