<a href="https://kyzylorda-news.kz/">Kyzylorda-news.kz.</a> Келесі жылдан бастап ақылы бөлімге түсетіндер үшін Ұлттық бірыңғай тестілеуді тапсыру құны екі есе қымбаттайды.
Тестілеуді мектеп бітірушілер 2022 жылдың 10 қаңтары мен 10 ақпаны аралығында тапсыра алады. Ол үшін 5640 теңге төлеуі қажет. Он жылдан бері 2242 теңге болған еді.
Бірақ бұл жоғары оқу орнының ақылы бөліміне тапсыратын түлектер үшін ғана. Ал мемлекеттік грант конкурсының тағдырын шешетін сынақ жылдағы дәстүр бойынша тегін болып қала бермек, деп хабарлады&nbsp;<a href="https://www.ktk.kz/kz/news/video/2021/12/27/199367/">КТК.</a>
Ұлтық тестілеу орталығының директоры Руслан Емелбаев тестілеу бағасының қымбаттауын ақпараттық қауіпсіздікті қамтамасыз ету деп түсіндірді.
Тест сұрақтарының сапасын арттыру мақсатында оны құрастырушылардың жалақысы көтерілетінін мәлімдеді. Түскен қаражаттың тағы бір бөлігі тестілеу пункттерін жалға алуға, компьютер, бейнебақылау камера сияқты керек жабдықтарға жұмсалады дейді.

ҰБТ тапсыру құны екі есе қымбаттайды

<a href="https://kyzylorda-news.kz/">Kyzylorda-news.kz.</a> Қызылорда облысында Ел Тәуелсіздігінің 30 жылдығы аясында табысты жетістіктерді саралап, үздіктерді марапаттау үшін білім және ғылым қызметкерлерінің кәсіподағымен бірлесе жылдың қорытынды кеші өтті.
Салтанатты шараға облыстық білім басқармасының басшысы Ақзира Қасымова, білім саласының майталман ардагер ұстаздары мен білім жанашырлары, педагогтар қатысты.
Жылдың қорытынды кешінің алғы сөзін Ақзира Бақтыбайқызы ашып, келе жатқан жаңа жыл мерекесімен құттықтады. Сондай-ақ, басқарма басшысы жыл бойы атқарылған ауқымды жұмыстар мен жеткен жетістіктерді атап өтіп, біршама білім саласының қызметкерлеріне төсбелгі мен алғыс хаттар табыстады.
<blockquote>
 «Аймағымыздың білім саласы жылды табысты қорытындылап отыр. Тың жоба, серпінді бағдарлама, ілкімді істердің барлығы – зияткер ұрпақ тәрбиелеудегі нақты қадам. Саннан сапаға, сөзден іске, жоспардан әрекетке көшіп, өздеріңізбен бірталай жетістікке қол жеткіздік. Жаңа жыл жарқын жетістіктерге, толайым табыстарға толы болсын», – деді Ақзира Бақтыбайқызы.
</blockquote>
Жиында ҚР Білім және ғылым министрлігінің «Ы.Алтынсарин» төсбелгісімен – Ғани Серікбаев, Райхан Айтимова марапатталса, Жанна Құрмантайқызына ҚР Білім және ғылым министрлігінің «Білім беру ісінің құрметті қызметкері» төсбелгісі табысталды.
Сонымен қоса, ҚР Кәсіподақтар Федерациясының «Кәсіподақ ардагері» төсбелгісі, «Білім және ғылым қызметкерлерінің кәсіподағына сіңірген айрықша еңбегі үшін» белгісі,&nbsp;«Қызылорда облысының білім беру саласын дамытудағы еңбегі үшін жергілікті ерекшелік белгісі» мен Құрмет грамоталары табыс етілді.
Басқарма басшысы Ақзира Бақтыбайқызы мен комитет төрағасы Гүлнар Бабабекқызы аймағымыздың абыройын асқақтатып жүрген республикалық байқау жүлдегерлеріне арналған «Жыл үздігі» және жыл қорытындысы бойынша тынымсыз еңбек еткен қызметкерлер мен білім жанашырларына «Жыл жаңалығы», «Қуатты қалам», «Жаңалық жаршысы», «Ақпарат үздігі», «Білім шыңы», «Зерделі зейін», «Білім жанашыры» атты арнайы номинацияларын табыс етті.
Сонымен қатар, жыл көлемінде табысты жұмыс жасап, жетістіктерге жеткен үздік білім ошақтарына Үздік әлеуметтік әріптес, Үздік идеялар жаршысы, Үздік ұйымшыл ұйым номинацияларымен директорлар марапатталды.
Шара соңында ардагер ұстаздарға құрмет көрсетіліп, мерекелік концерттік бағдарламамен жалғасын тапты.
<img src="https://kyzylorda-news.kz/wp-content/uploads/2021/12/1-1.jpeg" alt="" />
<img src="https://kyzylorda-news.kz/wp-content/uploads/2021/12/3.jpeg" alt="" />
<img src="https://kyzylorda-news.kz/wp-content/uploads/2021/12/4.jpeg" alt="" />
<img src="https://kyzylorda-news.kz/wp-content/uploads/2021/12/5.jpeg" alt="" />

Қызылордада білім саласының қызметкерлері жылды қорытындылады

<a href="https://kyzylorda-news.kz/">Kyzylorda-news.kz.</a>&nbsp;ҚР Білім және ғылым министрі Асхат Аймағамбетов педагогтерді жұмысқа қабылдау қағидаларына қатысты өзгерістер енгізілгенін айтты. Министр бұл туралы <a href="https://www.facebook.com/askhat.aimagambetov">Facebook</a>&nbsp;парақшасында хабарлады.
Енді мұғалімдерді жұмысқа қабылдау жаңа форматта: конкурс және нақты белгіленген критерийлер арқылы жүзеге асырылады.
Аймағамбетовтің сөзінше, бұған дейін нақты ережелер болмаған, яғни мектеп директоры кімді және қандай көрсеткіштер бойынша жұмысқа қабылдау керектігі туралы өзі шешетін.
<blockquote>
 «Бірқатар аймақта сағаттар санын дұрыс бөлмей, үш-төрт мұғалім бір ставкаға қабылданған жағдайлар тіркелді. Мұндай жағдайлар қандай себептерге байланысты орын алатынын болжау қиын емес. Бұдан былай білім беру ұйымдары барлық бос немесе уақытша бос лауазымдарға конкурс өткізетін болады. Бұл шағын жинақты мектептерге қатысты емес», – деп жазды ол.
</blockquote>
Байқауға біліктілік сипаттамаларына сәйкес келетін мұғалімдер қатысады. 
Жұмысқа қабылдау тәртібі мынадай:
– Жұмысқа орналасу кезінде үміткер конкурсқа қатысу туралы өтініш береді. Өтініш беруші өзінің бағалау парағын қоса ұсынады. Онда барлық жетістігі, нәтижелері, еңбек өтілі, әкімшілік немесе әдістемелік қызмет тәжірибесі, курстық дайындық және басқа да ақпарат көрсетіледі.&nbsp;
– Әрбір бағыт бойынша кандидат белгіленген критерийлер арқылы бағалау шкаласына сәйкес өз балдарын дербес қояды.
– Конкурстық комиссия өтініш берушінің өзі қойған балдардың, оларды растайтын құжаттардың сәйкестігін тексеріп, қорытынды ұпай шығарады. Нәтижесінде бос орынға ең көп балл жинаған үміткер қабылданады. Субъективизм деңгейі барынша төмендейді.
Нәтижесінде бос орынға ең көп ұпай жинаған үміткер ие болады.
<blockquote>
 «Ұйымдар үміткердің қандай да бір бұзушылықтарға, оның ішінде педагогикалық этика бойынша бұзушылықтарға жол берді ме, жоқ па, сол туралы ақпаратты ескере алады. Мұндай фактілер анықталса, педагог кез келген кезеңде конкурстан шеттетіледі. Ережеде үміткердің біліктілік санатының міндетті түрде болуы қарастырылған», – деп мәлімдеді министр.
</blockquote>
Ол сондай-ақ ережеде үміткерге міндетті біліктілік санаты қарастырылғанын қосып өтті.
<blockquote>
 «Енді жоғары оқу орындары мен колледж түлектеріне жұмысқа қабылдану үшін дипломның болуы жеткіліксіз екенін атап өткен жөн. Олар Ұлттық біліктілік тестілеуден өтіп, одан әрі мектепте «педагог» бірінші санатын алуға міндетті», – деді Асхат Аймағамбетов.
</blockquote>
Министр сонымен бірге педагог қызметін негізгі жұмысымен қоса атқаратын мұғалімдерді бір пән бойынша 8 сағаттан аспайтын жүктемемен конкурссыз жұмысқа қабылдауға рұқсат етілетінін айта кеткен жөн. Сондай-ақ осы білім беру ұйымының мұғалімдері арасында жүктемесі 8 сағаттан аз бос орындарды үлестіруге болады. Бұл ретте бір пән бойынша бос 9 немесе одан да көп сағатты жасанды түрде бөлшектеуге жол берілмейтінін жеткізді.
Аймағамбетов аталған шаралар сыбайлас жемқорлық тәуекелдерін жоюға және педагог лауазымына үміткерлерді сапалы іріктеуге бағытталғанын атап өтті.

Мұғалімдерді жұмысқа қабылдау ережесі өзгерді

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің орынбасары Бектас Нуридинов қала жастарының форумына қатысып, «Самғау» жастар сыйлығының иегерлерін марапаттады.
Шара барысында қала әкімінің орынбасары Бектас Балғабайұлы «Самғау» жастар сыйлығының иегерлерін құттықтап, алдағы уақытта да еліміздің жарқын болашағына бағытталған іргелі істерімен толағай жетістіктерге жете берулеріне тілектестік білдірді. Жастардың ұсыныстарын назарға алып, қаламызды өркендетуге бағытталған жобаларды қала әкімдігі бірлесе жүзеге асыратындығын жеткізді.
«Самғау» жастар сыйлығы белсенді жастардың одан әрі шығармашылығын шыңдап, саяси-мәдени, рухани байлығын арттыруға қолдау көрсету, көтермелеу мақсатында жыл сайын дәстүрлі түрде жалғасын тауып келеді. 
Сыйлыққа үміткер ретінде 14 пен 28 жас аралығындағы Қызылорда қаласының белсенді жастары қатысып, үміткерлер 10 номинация бойынша таңдалды. Сондай-ақ, Ел Тәуелсіздігінің 30 жылдық мерейтойына орай арнайы номинация тағайындалды.
Конкурсқа білім және ғылым, журналистика, спорт, медицина, мәдениет, IT, өндіріс, әлеуметтік салаларында табысты еңбек етіп, өз саласы бойынша жоғары көрсеткіштерге жетіп жүрген жастар қатысты.
Әр номинация бойынша үздік шыққан 11 жасқа Қызылорда қаласы әкімінің «Самғау» жастар сыйлығы мен 100 мың теңге көлеміндегі сыйақысы табысталды.
Сонымен қатар, салтанатты жиында өңірдегі жастар саясатының дамуына үлес қосып, Қызылорда қаласы жастарының дамуына ерекше қолдау көреткен әріптестер мен қоғамдық жұмыстарға белсене араласып, білімге, өнерге, ғылымға, спортқа жаны құмар, азаматтық қоғамды қалыптастыруда өзіндік үлес қосып жүрген бірқатар жастар қосымша арнаулы номинацияларға ие болды.
Айта кету керек, салтанатты шара «Қоғам дамуындағы жастардың рөлі» қала жастарының форумынан бастау алды. Тәжірибе алмасу алаңында «Қазақстанның 100 есімі» жобасының жеңімпазы, халықаралық деңгейдегі психолог, тренер С. Абдрахманова, Жамбыл облыстық жастар ресурстық орталығы басшысының орынбасары А. Абдуалиева спикер ретінде сөз сөйледі.
<img src="https://kyzylorda-news.kz/wp-content/uploads/2021/12/samgaw3.jpg" alt="" />
<img src="https://kyzylorda-news.kz/wp-content/uploads/2021/12/samgaw6.jpg" alt="" />

Қызылордада «Самғау» жастар сыйлығының иегерлері марапатталды

<a href="https://kyzylorda-news.kz/">Kyzylorda-news.kz.</a> Үкімет Нұр-Сұлтан қаласының кейбір білім беру ұйымдарына танымал тұлғалардың атын беру туралы қаулы әзірледі, деп хабарлайды Sputnik Қазақстан.
“Ашық НҚА” сайтында жарияланған құжатқа сәйкес, 8 мектепке қоғам және саяси қайраткерлердің есімін беру жоспарланып отыр. Олар:
№ 11 мектеп-лицейге – Өзбекәлі Жәнібеков; 
№ 49 орта мектепке – Қошке Кемеңгерұлы; 
№ 69 мектеп-гимназиясына – Кемел Ақышев; 
№ 2 балалар музыка мектебіне – Роза Бағланова; 
№ 3 балалар музыка мектебіне – Ермек Серкебаев; 
№ 66 мектеп-лицейге – Дінмұхамед Қонаев; 
№ 77 мектеп-гимназиясына – Фариза Оңғарсынова; 
№ 83 мектеп-гимназиясына – Ыбырай Алтынсарин. 
Қаулының жобасы 23 желтоқсанға дейін қоғамдық талқылауға шығарылып отыр. Ал қол қойылғаннан кейін заңды күшіне енеді.

Музыка мектебіне Роза Бағланованың аты берілмек

<a href="https://kyzylorda-news.kz/">Kyzylorda-news.kz.</a> Білім және ғылым министрлігі мектеп оқушыларының қысқы демалыс мерзімі қанша уақытқа созылатынын жариялады.&nbsp;
<blockquote>
 “Қысқы каникул кезінде оқушылар 2021 жылғы 30 желтоқсан мен 2022 жылғы 9 қаңтар аралығында 11 күн демалады.&nbsp;Бірінші сынып оқушылары үшін 2022 жылғы 7-13 ақпан аралығында қосымша 7 күн каникул беріледі”, –&nbsp;делінді министрлік баспасөз хабарламасында.&nbsp;
</blockquote>
Айта кетейік, Қазақстанда балаларды ковидке қарсы вакцинациялау жүргізіліп жатыр. Денсаулық сақтау саласының экс министрі Алексей Цой бұған дейін вакцина егу&nbsp;тек ата-аналардың жазбаша келісімімен жүргізілетінін мәлімдеген болатын.

Мектеп оқушылары қыста қанша күн демалады?

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығына орай бүгін бірқатар білім саласының қызметкерлері марапатталды. Асқар Тоқмағамбетов атындағы мәдениет үйінде өткен салтанатты жиынға облыс әкімі аппаратының басшысы Ерлан Райғаниев, облыстық білім басқармасының басшысы Ақзира Қасымова және аймағымыздағы үздік педагогтар мен білім беру саласының қызметкерлері қатысты.
Мерекелік жиынға қатысқан Ерлан Телманұлы аймақ ұстаздарын мерейлі мерекемен құттықтап, Сыр өңірінің жан-жақты дамуында Сыр ұстаздарының да үлесі мол екендігін тілге тиек етті.
Салтанатты шарада өз ісімен дараланған 40-тан астам білім саласының қызметкерлеріне ҚР Білім және ғылым министрінің құрмет грамотасы мен мерекелік төсбелгі табыстап, облыс әкімінің алғыс хаттарымен марапаттады.
Ұстаздар құрметіне арналған салтанатты шарада құрметті қонақтар ұйымға жаңадан қабылданған “жасұландықтарға” галстук тағып, шара соңы концерттік бағдарламаға ұласты.
<img src="https://kyzylorda-news.kz/wp-content/uploads/2021/12/266366667_1257194278117108_4844942956685354639_n-1.jpg" alt="" />
<img src="https://kyzylorda-news.kz/wp-content/uploads/2021/12/266268702_1257194321450437_2514151105380662875_n.jpg" alt="" />
<img src="https://kyzylorda-news.kz/wp-content/uploads/2021/12/266075272_1257194398117096_3446503055490119344_n.jpg" alt="" />
<img src="https://kyzylorda-news.kz/wp-content/uploads/2021/12/266375240_1257194354783767_7021149075852888454_n.jpg" alt="" />

Тәуелсіздік күні қарсаңында қызылордалық ұстаздар марапатталды

<a href="https://kyzylorda-news.kz/">Kyzylorda-news.kz.</a>&nbsp;Сырбойлық ұстаздар білім берумен қатар өздерін дамытуға да баса назар аударады. Тәуелсіздіктің 30 жылдық мерекесіне орай ұйымдастырылған қос бірдей конкурстан жалағаштық 2 ұстаздың мерейі үстем болды. Өңірлік коммуникациялар қызметінде өткен баспасөз конференциясына қатысып, жетістіктерімен бөлісті.
<blockquote>
 «Биыл Егемендігімізді алып, өзге елдермен иық тірескенімізге – 30 жыл толды. Қазіргі таңда білім саласы үлкен жетістіктерге жетіп, арамызда жас ғалымдар көбейді. Өздеріңіз білетіндей, бүгінде жас ұрпақтың білім алуына үлкен мүмкіндіктер жасалған. Облысымызда он жыл ішінде халықаралық және республиалық олимпиадалар мен ғылыми жобаларда 500-ге жуық оқушы оқ бойы оза шауып, аймақ абыройын асқақтатып, жүлделі орындардан көрінді. Еркін қалықтаған Тәуелсіздік перзенттері бүгінде әлемнің ең ақылды жастары деп айтуымызға болады. Төл тарихымызбен ұлттық құндылықтарымызды дәріптеуге негізделген білім беру жүйесі жеткіншектеріміз бен ұстаздарымыздың биік белесті бағындыруына ықпал жасап келеді», – деді облыстық білім басқармасының басшысы Ақзира Қасымова.
</blockquote>
Жалағаш ауданы Темірбек Жүргенов атындағы №123 мектеп-лицейінің ағылшын тілі пәні мұғалімі Айсана Намурадин «Медиа» – жаңа медиа-жобаларды іске асыру бағыты бойынша 3 млн. теңге көлеміндегі гранттың жеңімпазы атанды. Ал №33 мектебінің мұғалімі Сымбат Жәнібай «Үздік өзін-өзі тану мұғалімі» республикалық байқауында топ жарды.
<blockquote>
 «Тәуелсіздік жылдарында мемлекетіміз жастарды қолдауға басымдық беріп, осы бағытта көптеген шараны жүзеге асырды. Соңғы уақытта ел жастарына көңіл бөлу, оларды барынша жан-жақты қолдау ісі ерекше қарқын алды. «Тәуелсіздік ұрпақтары» гранты мен секілді жас буынды қолдау ісін ілгерілетіп қана қоймай, алдағы уақытта игі қадамдарға кеңінен жол ашатынына сенімім мол», – деді Айсана Намурадин.
</blockquote>
Байқаудың мақсаты – өзін өзі тану идеяларын жүзеге асыру бойынша озық педагогикалық тәжірибені анықтау болды. Байқау 3 кезеңнен және 9 турдан тұрды. Нәтижесінде, «Үздік өзін өзі тану мұғалімі» құрметті атағын иелендім. Бұл жетістік тек өзімнің емес мектебімнің, ауданның, облыстың жетістігі деп білемін, – деді Сымбат Жәнібай.
Басқарма басшысы осындай талантты ұстаздарды қолдау бағытындағы жұмыстар жалғаса беретіндігін жеткізді.

Ақзира Қасымова: Талантты ұстаздарды қолдау бағытындағы жұмыстар жалғасады

<a href="https://kyzylorda-news.kz/">Kyzylorda-news.kz.</a> Бүгін ҚР Премьер-Министрінің орынбасары Роман Скляр мен РФ Үкіметі төрағасының орынбасары Юрий Борисовтың төрағалығымен өткен пленарлық отырыста «Байқоңыр» кешені бойынша 7 үкіметаралық комиссия жұмысының қорытындысы шығарылды.
Келіссөздер барысында тараптар Қазақстан-Ресей ынтымақтастығының “Байқоңыр” кешенін бірлесіп пайдалану перспективалары мен одан әрі дамытуға, сондай-ақ Байқоңыр қаласының әлеуметтік жағдайын жақсартуға қатысты өзекті бағыттардағы мәселелерді талқылады.
Оның ішінде, Байқоңыр қаласындағы РФ орта мектептерінде міндетті пәндер ретінде «Қазақстан тарихы», «Қазақ тілі мен әдебиеті» пәндерін енгізу туралы мәселе қаралып, Үкіметаралық комиссияның шешімімен РФ Білім министрлігі мен ҚР Білім және ғылым министрлігіне Байқоңыр қаласындағы РФ орта мектептерінде «Қазақстан тарихы» және «Қазақ тілі мен әдебиеті» пәндерін енгізу туралы мәселені пысықтау жөнінде хаттамалық тапсырма берілді.
Комиссия отырысында Қызылорда облысының әкімі Гүлшара Әбдіқалықова баяндама жасап, бірлескен жұмыс нәтижесінде Байқоңыр қаласы бойынша бірқатар мәселелердің оң шешімін тапқанын мәлімдеді.
<blockquote>
 «Байқоңыр қаласында жұмыс істейтін Ресей мектептерінде “Қазақ тілі мен әдебиеті”, “Қазақстан тарихы” пәндерін оқытуға қатысты Қазақстан тарапының бастамасын қолдағаны үшін Ресейлік әріптестерімізге ризашылығымды білдіргім келеді. Өз кезегінде Қызылорда облысының әкімдігі мектептерді тиісті біліктіліктегі қажетті педагогикалық құраммен және оқу-әдістемелік кешендермен қамтамасыз етуге көмек көрсетуге дайын. 
 «Байқоңыр» кешені жөніндегі Үкіметаралық комиссияның жалпы үйлестіруімен ҚР мен РФ мемлекеттік органдарының бірлескен іс-қимылдарының арқасында қаланың әлеуметтік-экономикалық ахуалын жақсарту жөніндегі іс-шаралар кешені іске асырылып жатқанын атап өткім келеді. Бүгінде бізде Байқоңыр қаласы тұрғындарының өмір сүру деңгейін жақсарту және “Байқоңыр”кешенінің одан әрі табысты жұмыс істеуі үшін бар мәселелерді бірлесіп шешуге мүмкіндік бар», – деді аймақ басшысы.
</blockquote>
Екіжақты келісім арқылы Байқоңыр қаласындағы РФ орта мектептерінде білім алатын ҚР азаматтарына өздерінің мемлекеттік тілін дамытуына, патриоттық және рухани-адамгершілікке тәрбиелеу, ҚР заңнамасына сәйкес мемлекеттік білім гранттарын алуға тең қолжетімділікті қамтамасыз ету үшін жағдай жасалатын болады.
Сондай-ақ, комиссия отырысында «Байқоңыр» кешеніндегі пайдаланылмай тұрған нысандарды жалға беруден шығару, есептен шығару және кәдеге жарату, Байқоңыр қаласының жылу электр станциясына табиғи газды жеткізу мәселелері бойынша екіжақты тараптардың ұстанымына қарай ортақ шешім қабылданатын болады.
Еске салайық, қазіргі таңда, Байқоңыр қаласында 12 мектеп жұмыс істейді, оның ішінде 5 мектеп ҚР Білім беру стандарттары бойынша және 7 – РФ Білім беру стандарттары бойынша оқытуда. Мұнда барлығы 9 232 оқушы білім алады.

Байқоңыр қаласындағы Ресей мектептерінде «Қазақстан тарихы» мен «Қазақ тілі мен әдебиеті» пәндері оқытылады

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығы мерекесіне орай Атырау облысында жалпы білім беру ұйымдарының басшылары арасында алғашқы рет І республикалық дебат турнирі өтті.
Мектеп директорларының басын қосқан турнир дебаттың Американдық парламенттік форматына сәйкес офлайн форматында өткізілді.
Республикалық турнирге аймақ атынан облыстық кезеңінен жеңімпаз атанған Қызылорда қаласы №101 мектеп-лицей директоры Айгүл Өткелбаева және №4 ІТ мектеп-лицей директоры Алмат Рахметов қатысып, бақ сынасты.
Сайыстың қорытындысы бойынша Қызылорда облысының намысын қорғаған «Ұшқыр жебе» фракциясы жүлделі 3 орынды иеленіп, Сыр ұстаздарының мерейін үстем етті.

Қызылордалық мектеп директорлары республикалық дебат сайысында топ жарды

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы Мырзабек Дүйсенов атындағы №15 мектеп-лицейінде Тәуелсіздігіміздің 30 жылдығына орай «Рухани құндылық» шығармашылық орталығы ашылды. Орталықтың ашылу салтанатына облыстық білім басқармасының басшысы Ақзира Қасымова, қалалық білім бөлімінің басшысы Динара Баймурзаева қатысып, лентасын қиды.
Ұлттық тұрғыда халқымыздың әдет – ғұрпын сақтайтын, салт – дәстүрін қадірлейтін, ұлтжанды, отансүйгіштік білім алушыларды шығармашылықа баулитын орталықта «Оқуға құштар мектеп» жобасы, «Балалар және театр» жобасы, «Ұшқыр ой алаңы» дебат қозғалысы, «Қош келдіңіздер» кіші медиа студиясы жұмыс жасайтын болады.
Шара барысында «Құндылық. Инновация. Білім» тақырыбында облыстық іс-тәжірибе алаңы өткізілді. Іс-тәжірибе алаңында мектеп жылыжайындағы «Green land» ғылыми-эксперименттік алаңының ашылуы өткізіліп, «Gmart garden» жылыжайды автоматтандыру тәжірибелік-эксперимент жобасы көрсетілді. Сонымен қатар, ізденіс және зерттеу ғылыми шығармашылық жобалар көрмесі ұйымдастырылып, информатика пәнінен олимпиадалық есептерді С/С++ бағдарламалау тілінде шешу тақырыбында жұмыстар көрсетілді.
Жиында Ақзира Бақтыбайқызы іс-тәжірибе алаңында көрсеткен олимпиадалық есептерді бағдарламалауды барлық білім беру ұйымдарына магнитті түрде тарату қажеттігін атап өтті.
Іс-тәжірибе алаңының соңында оқушы үні жобасы аясында оқушылар «Армандар орындалады» тақырыбымен тілек-армандарымен бөлісті. Сонымен қоса, балалар және театр мектебі аясында сахналық қойылым көрсетіліп, «Қош келдің!» медиа жобасы негізінде кері байланыс жүргізілді.
<img src="https://kyzylorda-news.kz/wp-content/uploads/2021/12/264801499_1254053835097819_4795894034502686615_n.jpg" alt="" />
<img src="https://kyzylorda-news.kz/wp-content/uploads/2021/12/265874020_1254053488431187_4957594999079092407_n.jpg" alt="" />

«Рухани құндылық» шығармашылық орталығы ашылды

<a href="https://kyzylorda-news.kz/">Kyzylorda-news.kz.</a> Қазақстан Республикасы Тәуелсіздігінің 30 жылдығына орай 5-6 желтоқсан күндері «QORQYT АTA CUP» студенттер арасында республикалық пікірсайыс турнирі өтті. Шешендік пен ұтқыр ой сыналатын сайысқа еліміздің барлық аймағынан 18 команда қатысты.
Дебат – жастардың логикалық және сыни ойлау қабілетін ұштайтын интеллектуалды ойын. Қоғамның өзекті мәселелерін көтеріп, тәуелсіз шешім қабылдауға бейімдейді.
<blockquote>
 «Бүгінгідей ақпараттар алмасқан заманда жастардың жаңалықты саралап, өз ұстанымын дәлелді түрде қорғай алуы маңызды. Бүгінгі республикалық ауқымды пікірсайыс турнирі Қазақстан Республикасы Білім және ғылым министрлігі Жоғары және жоғары оқу орнынан кейінгі білім департаментінің қолдауымен Республикалық қосымша білім беру оқу-әдістемелік орталығы және Қорқыт ата атындағы Қызылорда университетінің ұйымдастыруымен өткізілуде», – деді ректордың міндетін атқарушы Абайбек Жүнісов.
</blockquote>
Пікірсайыс турнирі американдық парламенттік және Линкольн-Дуглас форматында өтті. Турнирге еліміздің іргелі жоғары оқу орнының білім алушылары қатысты. Атап айтсақ, Абай атындағы қазақ ұлттық педагогикалық университеті, Қазақ Ұлттық Қыздар Педагогикалық университеті, Қожа Ахмет Ясауи атындағы Халықаралық қазақ-түрік университеті, Мұхтар Әуезов атындағы Оңтүстік Қазақстан университеті, М.Х.Дулати атындағы Тараз өңірлік университеті, М.Өтемісов атындағы Батыс Қазақстан университеті, Ш.Уәлиханов атындағы Көкшетау университеті, Халықаралық туризм және мейман достық университеті, Оңтүстік Қазақстан медицина академиясы, «Болашақ» университеті, Қорқыт Ата атындағы Қызылорда университеті.
Екі күндік сайыстың қорытындысы бойынша I орын (300 мың теңге) Қожа Ахмет Ясауи атындағы Халықаралық қазақ-түрік университетінің «Бекзат Саттарханов» фракциясына, II орын (150 мың теңге) Қазақ Ұлттық Қыздар Педагогикалық университетінің «Терең дем ал» фракциясына және жүлделі III орын (100 мың теңге) Абай атындағы қазақ ұлттық педагогикалық университетінің «Цицерон» фракциясына табысталды. Республикалық пікірсайыс турнирінің «Үздік спикер» (30 мың теңге) номинациясын М.Х.Дулати атындағы Тараз өңірлік университетінің студенті Алима Калисаева иеленді. Ал «Үздік төреші» (30 мың теңге) номинациясымен аймағымыздың тәжірибелі пікірсайысшысы Маржан Ердібек марапатталды.
<blockquote>
 «Пікірсайыс арқылы жастар логикалық ойлауға, өз ұстанымын білдіруге тәрбиеленеді. Сондай-ақ, әртүрлі жағдайда оны талдап, өзіндік көзқарасын қалыптастыруға бейімделеді. Бүгінгі турнирде қатысушылар тәуелсіздік жылдарында еліміздің жеткен жетістіктерін насихаттап, қоғамдағы өзекті мәселелерді өз деңгейінде көтере білді. Бұл жастардың сыни ойлау қабілетін дамытып, демократиялық қоғам өміріне жас ұрпақтың араласуына жол ашады. Осындай шаралар арқылы жастар бір-бірімен тәжірибе алмасып, өзара достық қарым-қатынастары нығая түседі деп санаймын»,- деді турнирдің бас төрешісі Айжан Орынбасар.
</blockquote>
Турнирдің бас демеушісі ретінде қолдау көрсеткен Жаңақорған ауданының Құрметті азаматы, медицина саласының Құрметті қызметкері Нурылда Талипов болса, шараның өтуіне «Қазақстан Астық компаниясы» ЖШС атқарушы директоры, «Қазақстан астық одағы» ЗТБ ресми өкілі Қазбек Омаров атсалысты.
Айта кетейік, университетте 2004 жылдан бастап «АҚИҚАТ» саяси пікірсайыс клубы жұмыс істейді. Университеттің барлық институттарында бөлімшелер ашылған. Сондай-ақ, қаладағы 27 мектепте клубтың филиалы бар.
<img src="https://kyzylorda-news.kz/wp-content/uploads/2021/12/02.jpg" alt="" />
<img src="https://kyzylorda-news.kz/wp-content/uploads/2021/12/06.jpg" alt="" />
<img src="https://kyzylorda-news.kz/wp-content/uploads/2021/12/08.jpg" alt="" />

Қазақстан және Қызылорда облысының жаңалықтары: Білім