<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің оқушылары өңірдегі Ұлы Отан соғысының ардагері Любовь Колесникпен кездесіп, зерттеу жұмысына қажетті ақпарат жинақтады.&nbsp;
Любовь Колесник небәрі 19 жасында майданға аттанған еді. Кеңес Одағының маршалы Георгий Жуковтың қолбасшылығымен Беларусь майданына жақын жерде орналасқан әскери госпитальде медбике ретінде қызмет етті.&nbsp; Соғыстың ізімен өткен Любовь әжей Берлинде Жеңісті қарсы алды.
<blockquote>
 «Госпитальге жеңіл және ауыр жағдайдағы жараланған көптеген әскерилер келіп, оларға алғашқы медициналық көмек көрсетті, қажетті ем-домдарын жасады.&nbsp; Анамның айтуынша кей кездері солдаттарды аман алып қалу үшін оталарды ашық аспан астында жасауға тура келді», &nbsp;– деп бөлісті анасының естеліктерімен ардагердің қызы Татьяна Червоненко.
</blockquote>
Жеңіс күнін жариялағаннан кейін бірнеше ай емделушілерге көмек көрсетуге госпитальде жұмыс жасады. Үйге 1945 жылдың тамыз айында оралып, зейнет жасқа дейін медицина саласында еңбек атқарды.
Кездесу барысында оқушылар сұрапыл соғыстың қиын кезеңдері туралы көптеген құнды ақпарат алды. Алдағы уақытта жас зияткерлер майдан даласында болған батырлар туралы Уикипедияға мазмұнды мақалалар жазып, олардың ерліктерін дәріптеу арқылы өскелең ұрпақтың білімдерін байытуды мақсат етеді.&nbsp;&nbsp;
<blockquote>
 «Әлемде ешқашан соғыс болмасың. Елімізге бейбітшілік пен тыныштық тілеймін», – деп тілегін жеткізген Любовь Сергеевна оқушыларға оқуда сәттілік тіледі. &nbsp;
</blockquote>
Биыл 95 жасқа толатын қарт ана балалардың қамқорлығы мен немере-шөберелердің махаббаты оған күш пен денсаулық беретінін айтады.
Жылдан жылға шежіренің бұл батырлық-қайғылы парақшасы алыс тарих болып барады. Бірақ&nbsp; сол ауыр жылдарды ұмытпау және майдан даласының батырларын ерліктерін естен шығармау біздің ардагерлер алдындағы борышымыз. &nbsp;
<img src="https://kyzylorda-news.kz/wp-content/uploads/2020/02/21veteran2.jpg" alt="" />
<img src="https://kyzylorda-news.kz/wp-content/uploads/2020/02/21veteran3.jpg" alt="" />

Қызылордалық оқушылар соғыс ардагерімен кездесті

<a href="https://kyzylorda-news.kz/">Kyzylorda-news.kz.</a> Бүгін Қызылорда облысы әкімінің орынбасары Бақыт Жаханов Парламенттік тыңдауда Сыр өңірінің әлеуметтік-экономикалық дамуы туралы айтты.
Соңғы 5 жыл ішінде өңір экономикасына 1,5 трлн. теңге инвестиция тартылды, 3 млн. шаршы метрден астам тұрғын үй пайдалануға берілді, өңдеу өнеркәсібінде 600 млрд. теңгенің, ал, ауыл шаруашылығында 500 млрд. теңгенің өнімі өндірілді. Құрылыс саласында 500 млрд. теңгенің жұмыстары атқарылды. Осы кезең ішінде 65 мыңнан астам жаңа жұмыс орны ашылды, оның 55 мыңға жуығы – тұрақты жұмыс орындары.
Бақыт Дүйсенұлы баяндамасында Қызылорда облысының экономика, агроөнеркәсіп кешені мен шағын бизнес, құрылыс, тұрғын-үй коммуналдық шаруашылығы, көлік, білім беру, денсаулық, әлеуметтік қамсыздандыру бағытындағы атқарылған жұмыстарға тоқталды.
<blockquote>
 “Индустрия саласында соңғы 5 жыл ішінде 90 жуық өндіріс орындары ашылып, 1 мың 800-ден астам жаңа жұмыс орындары құрылды. Нәтижесінде, өңірімізде аммоний метаванадаты, тампонажды цемент, әк тас, шыны пластикалық құбырлар, жер асты су құбырлары және резеңке ұнтақтар, мақсары майы, жүгері шырыны, ерлер жейдесі, қарулы күштерге арнайы киімдер сияқты жаңа өнім түрлері игеру қолға алынды”,- деді Қызылорда облысы әкімінің орынбасары Бақыт Жаханов.
</blockquote>
Ағымдағы жылы тау кен өндірісін дамыту мақсатында “Талап” қорғасын-мырыш кен орнын және “Ақ еспе” титан – цирконий кен орнын барлау жұмыстары басталатын болады. Сонымен қатар, әлемдегі ең ірі кен орындарының бірі «Шалқия» қорғасын-мырыш кен орнының жұмысы қайта жанданады деп жоспарлануда. “Шалқия” 6,5 млн. тонна мырыш қоры бар көлеміне қарай әлемдегі 5-ші кен орны болып табылады. Бұл кен орнын игеру компания үшін мырыш нарығында ірі қатысушыға айналуына, сондай-ақ, кең көлемде қорғасын өндіруге мүмкіндік бермек.
Бақыт Жаханов индустриалды-инновациялық дамудың мемлекеттік бағдарламасының жүзеге асырылуы өңірдің өңдеуші өнеркәсібінің дамуына жаңа серпін бергендігін айтты. Нәтижесінде, аталған бағдарлама аясында 26 өндіріс іске қосылған.
Ал, 2018 жылдың желтоқсан айында іске қосылған тампонажды цемент өндіретін зауыты бүгінде цементтің 6 түрін шығаруда, 2019 жылдың шілдесінен бері экспортталуда. 2020 жылы құны 408 млрд.теңгеден асатын тағы 10 ірі жобаны жүзеге асыру жоспарлануда. Олардың қатарында Шыны зауыты да бар.
<blockquote>
 “Шыны зауыты бойынша жұмыстар ерекше бақылауда. Мердігер компания ” Чайна триумф” ағымдағы жылдың мамыр айында құрылыс-монтаж жұмыстарын аяқтауға, маусымда пешті қыздыруды, ал, шілдеде – зауытты іске қосуға жұмыс істеуде”,- деді облыс әкімінің орынбасары Бақыт Дүйсенұлы.
</blockquote>
Ағымдағы жылы кварц құмын байыту бойынша тау кен комбинатының бірінші желісін, сонымен қатар, жылына 1500 тонна құс етін өндіретін құс фабрикасын іске қосуды және ет комбинатының құрылысын аяқтау жоспарлануда. Одан бөлек, түйе сүтінен жасалған құрғақ ұнтақ шығару және жоғары қысымды шыны пластикалық желілік және сорғы компрессорлық құбырлар өндірістері құрылыстары басталатын болады. Айта кету керек, сондай-ақ, биыл Арал қаласында жылына 120 мың тонна ас тұзын өндіретін үшінші испан цехының және еліміздегі алғашқы кальцийленген сода өндіру зауытының құрылыстары басталатын болады.
Парламенттік тыңдауда Агроөнеркәсіп кешенін дамыту туралы айтылды. Ауылшаруашылық саласына соңғы 5 жылдың өзінде тартылған инвестициялар көлемі 19 млн. долларға дейін өскен. Аймақта жоспарға сәйкес 2022 жылға қарай ауыл шаруашылығының жалпы өнімінің көлемі 1,6 есе, ал, оның экспортын 2,5 есеге арттыру қарастырылуда.
Шағын бизнес, тариф, тұрғын-үй коммуналдық шаруашылығы мен әлеуметтік салалар туралы да сөз болды.
Бүгінде аймақта білім саласында 3-пен 6 жас аралығындағы балалар мектепке дейінгі тәрбиемен 100 пайыз қамтылған. Апаттық жағдайдағы және үш ауысымда оқитын мектептердің мәселесі толық шешілген. Сондай-ақ, өңірде денсаулық сақтау саласындағы апаттық жағдайдағы ірі нысандардың мәселесі де толық шешімін тауып келеді. Айта кету керек, осы саланың дамуы арқасында 3 жыл ішінде облыс халқының өмір сүру ұзақтығы 1 жылға ұлғайды. Ал, кадрлар тапшылығы мәселесін шешу мақсатында соңғы 3 жылдың ішінде өңірге 399 маман (дәрігер) тартылып, оның 49 пайызы бастапқы медициналық санитарлық көмек көрсету ұйымдарына жіберілді. Осылайша, дәрігерлермен қамту деңгейі 82 пайызды құрап отыр.
Әлеуметтік сала мен қоса Бақыт Дүйсенұлы спорт, мәдениет, цифрландыру, қауіпсіздік, мемлекеттік-жекешелік әріптестік аясында атқарылған жұмыстар туралы да баяндады.
Облыс әкімінің орынбасары Бақыт Жаханов тағы бір алға қойған мақсатымыз – тіршілік етуге қажетті барлық саланы онлайн-сервистермен қамтамасыз ету екенін айтты.
<blockquote>
 “Жоғары технологияларды жедел ендіру мақсатында 2018 жылдан бері экономиканың түрлі салаларын цифрландыру бойынша 47 жоба жүзеге асырылды, 11 жоба бойынша жұмыс жалғасуда. «Бірыңғай кезекшілік диспетчерлік қызметі» жобасы іске қосылды. Енді барлық жедел қызмет (101, 102, 103, 112) түрлері “112” бірыңғай номерімен көрсетіледі”,- деді облыс әкімінің орынбасары Бақыт Дүйсенұлы.
</blockquote>
Айта кету керек, осы күн аясында Сыр өңірінде өндірілетін өнімдер мен ауыл шаруашылығы тауарларының, сондай-ақ “Рухани жаңғыру” бағдарламасы бойынша аймақта табылған экспонаттардың және цифраландыру саласындағы жаңа технологиялар көрмесі ұйымдастырылды.
<img src="https://kyzylorda-news.kz/wp-content/uploads/2020/02/21asenat2.jpg" alt="" />
<img src="https://kyzylorda-news.kz/wp-content/uploads/2020/02/21asenat3.jpg" alt="" />
<img src="https://kyzylorda-news.kz/wp-content/uploads/2020/02/21asenat4.jpg" alt="" />

Парламент Сенатында алғаш рет Қызылорда облысының күні өтті

<a href="https://kyzylorda-news.kz/">Kyzylorda-news.kz.</a> Бүгін Қарағанды облысының қылмыстық істер бойынша мамандандырылған ауданаралық сотында қорықшы Ерлан Нұрғалиевті өлтіргендерге қатысты сот үкімі шықты.
Ерлан Нұрғалиевті өлтіру әрекетіне қатысты сот тыңдауы Қарағандыда 2019 жылдың тамыз айында басталды. Қылмыстық іс 40 томнан тұрады, тыңдауға 80-нен астам куәгер қатысты. Сотталушылар орындығында Берік Ахметов, Нұрлан Шүкілдіков және Қайрат Ақшанов отырды.
Осыған дейінгі сот тыңдауында прокурор барлық үш айыпталушыға өмір бойына бас бостандығынан айыру жазасы берілсін, оны айыпкерлер қауіпсіздігі ерекше колонияда өтесін деп сұраған болатын.
Қылмыстық істер жөніндегі мамандандырылған ауданаралық сотының судьясы Қайрат Қасымов прокурордың талап-арызын қанағаттандырып, сот үкімімен Берік Ахметов, Қайрат Ақшанов және Нұрлан Шүкілдікұлының өмір бойы бас бостандығынан айыру жазасына кесілгендігін айтты.
Осы іске қатысы бар тағы төрт азамат: Берден Базаров, Батырбек Қайырбеков, Жарасхан Мырзабаев және Айдос Әкімовке қатысты қылмыстық істі сотқа дейінгі тергеу органдары тоқтатқан болатын. Алайда Ерлан Нұрғалиевтің баласының адвокаты екіжақты пікірталас барысында бұл шешіммен келіспейтінін, осыған байланысты жеке қаулы шығарып, қылмысты жасыру мен ол туралы құзырлы органдарға дер кезінде хабар бермеу бабы бойынша қылмыстық тергеуді қайта бастауды сұраған болатын.
Осылайша, жоғарыда аталған 4 азамат 6 жылға бас бостандығынан айырылды. Олар жазасын қылмыстық атқару жүйесінің қауіпсіздігі орташа мекемесінде өтейтін болады.
Осыған дейінгі отырыста жәбірленуші тарапының қорғаушысы 20 млн. теңге моральдық шығын және 9 миллион 137 мың 600 теңге көлемінде материалдық шығын келтірілгенін атап өтті. Сонымен қатар, сотталушы 17 ақбөкен үшін өтемақы төлеуге тура келеді – бұл 89 миллион теңге.
Сот үкімі оқылып болған соң 7 азаматтың барлығын сот залынан алып кетті.
Естеріңізге сала кетейік, 13 қаңтарда Теңіз көлінен оңтүстік-батыс бағытта орналасқан «Ақ қошқар» бөгетінің маңында «Охотзоопром» мемлекеттік кәсіпорнының инспекторлары Ницык пен Нұрғалиев бес ақбөкенді өлтірген браконьерлердің ізіне түскен болатын. Көп ұзамай олар мемлекеттік нөмірі жоқ екі жол талғамайтын көлікті қуып жеткен.
Іздеріне түскенін байқаған көліктегілер жасырынуға тырысқан, бірақ олардың біреуі тоқтауға мәжбүр болған. Браконьерлер инспекторларға шабуыл жасап, оның соңы төбелеске ұласқан. Оқиға салдарынан Ерлан Нұрғалиев оқтан жараланып, ауыр бас сүйек-ми жарақатын алған – <a href="https://oldkaz.kyzylorda-news.kz/news/kogam/25572-oryshyny-ltrd-degen-kdktn-kes-halytan-keshrm-srady.html">қорықшы қайтыс болды</a>. Шабуылдаушылар оның әріптесі Петр Ницыктің жағын сындырып, бірнеше пышақ жарақатын салған. Қылмыскерлер қашып үлгерген.
Айта кетейік, осы іске қатысы бар, қылмысты жасыру мен ол туралы құзырлы органдарға дер кезінде хабар бермеу бабы бойынша 6 жылға бас бостандығынан айырылып, жазасын қылмыстық атқару жүйесінің қауіпсіздігі орташа мекемесінде өтейтіндердің бірі Жарасхан Мырзабаевтың бұрын <a href="https://oldkaz.kyzylorda-news.kz/news/kogam/31514-oryshy-lm-sottalushylardy-br-yzylordaly-eks-policey-bolyp-shyty.html">Қызылорда облыстық жол полициясының аға инспекторы болып жұмыс істегенін</a> бұған дейін хабарлаған болатынбыз.
<img src="https://kyzylorda-news.kz/wp-content/uploads/2020/02/21korykshyny2.jpg" alt="" />

Қорықшыны өлтіргендер өмір бойына бас бостандығынан айырылды: сотталушылардың бірі – қызылордалық экс-полицей

<a href="https://kyzylorda-news.kz/">Kyzylorda-news.kz.</a> Қызылорда облысы «Рухани жаңғыру» бағдарламасын ақпараттық қамтамасыз ету бойынша ең жоғары көрсеткішпен үздік өңірлер қатарынан көрінді. Бұл туралы өңірлік коммуникациялар орталығында өткен баспасөз мәслихатында облыс әкімінің орынбасары Наурызбай Байқадамов мәлімдеді.
БАҚ өкілдерімен кездескен Наурызбай Сейтқалиұлы аталған бағдарламаның аймақта орындалу барысын таныстырды. Сонымен қатар биылғы жылғы жоспарымен бөлісті.
Өткен жылы өңірде «Жыр мұра», «Ұлы Дала елі», «Өз жеріңді танып біл», «Жақаев ізбасарлары» жобалары, «Қорқыт және Ұлы дала сазы» түркітілдес елдердің халықаралық музыкалық фестивалі, «Жырласа жастар жырласын» дәстүрлі әндерді орындаушы жас әншілердің республикалық фестивалі, «Латын графикасы: әлемдік тәжірибе және ұлт руханияты» атты республикалық оқу семинары, «Жаңа емле: құрылымы мен мазмұны» республикалық семинары, «Ұлы дала жәдігерлері» атты кітап көрмесі, «Менің Отаным – Қазақстан» жас өлкетанушылар слеті, «Ақкербез» республикалық фестивалі, «Алтын белбеу» қазақша күрестен облыстық турнирі, «Парасатты поэзия» халықаралық фестивалі секілді маңызды жобалар мен іс-шаралар жүзеге асырылды.
<blockquote>
 «Елбасының «Болашаққа бағдар: рухани жаңғыру» және «Ұлы даланың жеті қыры» атты бағдарламалық мақалаларының идеялары бойынша «Рухани жаңғыру» қазақстандық қоғамдық даму институты 2019 жылы іске асырылған «Сәтті жобалар жинағын» шығарған болатын. Аталмыш жинаққа біздің облыстан «Қорқыт ата мұрасын жас ұрпаққа насихаттау мақсатында 3 тілде шығарылған «Қорқыт атаның даналық сөздері» кітабы мен «Ізденіс» жасыл академиясының жастарды бау-бақша өнімдерін өсіру арқылы еңбекке баулу жобалары енгізілді. Сондай-ақ «Ауыл ел бесігі» арнайы жобасы аясында жастардың ауыл өміріне араласуына, еңбекке баулу мақсатында «Өзекті ауыл өмірі, қарбалас қала тірлігі» және «Village Life» жобалары жүзеге асырылды. Ұлы даланың ұлы есімдері жобасы бойынша 38 шара ұйымдастырылып, 5000-ға жуық адам қамтылды. Оның ішінде, «Қорқыттың даналық сөздері» кітабы 3 тілде шығарылды», – деді Н. Сейітқалиұлы брифингте.
</blockquote>
Қорқыт Ата мұралары ЮНЕСКО-ның материалдық емес мәдени мұралар тізіміне енгізілуіне орай Қорқыт есімін әлемдік деңгейде насихаттаудың бес жылдық кешенді жоспарына сәйкес, оның күйлерін кеңінен насихаттау мақсатында Қызылорда облыстық филармониясы жанынан «Қобызшылар ансамблі» құрылды. Сондай-ақ «100 жаңа есім» республикалық жобасының аймақтық жеңімпаздарын насихаттау мақсатында (журналист Назгүл Кенжетай, кәсіпкер Айдос Сайлығараев) Қызылорда қаласында және барлық аудандарда 16 тақырыптық баннер ілініп, бірнеше басқосулар, шеберлік сабақтары өткізілген.
2019 жылы «Рухани жаңғыру» қазақстандық қоғамдық даму институты жүргізген мониторингке сәйкес, Бағдарламаны ақпараттық қамтамасыз ету бойынша Қызылорда облысы соңғы үш айда ең жоғары көрсеткішпен үздік өңірлер қатарынан табылды. Бүгінгі күні Қызылорда облысында «Рухани Жаңғыру» бағдарламасын іске асыру жөніндегі 2020 жылға арналған кешенді іс-шаралар жоспары «Рухани жаңғыру» қазақстандық қоғамдық даму институты ұсынған жаңа талаптарға сәйкес әзірленіп, Ақпарат және қоғамдық даму министрлігімен келісілген.
Биыл Қызылордада «Адал ұл ер боп туса – ел тірегі» атты әкелі-балалы жұптар сайысы, оқушылар арасында «Әкеме хат» шығармалар байқауы ұйымдастырылады.
<blockquote>
 «Бұл бастама әкенің қоғамдағы ролін арттыру, беделін көтеру мақсатында қолға алынып отыр. Нарықтың қиын-қыстау кезеңінде әйел-аналарымыз ала дорба асынып, базарға шығып, ауыртпалық жүгін арқалаған еді. Енді бұл міндетті әкелер мойнына алып, олар отбасы тәрбиесіне оралуы тиіс», – деді облыс әкімінің орынбасары.
</blockquote>
Одан бөлек, «Ұлы дала fest» тақырыбында ұлттық дәстүрлер фестивалін, демалыс орындарында «Көне аспаптар сыр шертеді» жобасын, «Ертегі – тәрбие берудегі ізгілік бастауы» атты ертегі айтушы әжелер байқауын өткізу жоспарланып отыр.
«Отандастар» республикалық АҚ және бірнеше облыстың қатысуымен «Алпамыс батыр ізімен…» тақырыбында Өзбекстанға біріккен экспедиция, Ресей, Өзбекстан және Қырғызстанның қазақтар тығыз қоныстанған аймақтарына жас жыраулардың шығармашылық іссапары ұйымдастырылады. Ал «Тал бесіктен – жер бесікке дейін» прагматикалық жобасы азаматтардың ысырапшылдық деңгейін төмендетуге бағытталған.
<img src="https://kyzylorda-news.kz/wp-content/uploads/2020/02/20brifrukhani2.jpg" alt="" />

«Рухани жаңғыру»: Қызылорда облысы үздіктер қатарында

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов Н. Бекежанов атындағы облыстық қазақ музыкалық драма театрында өтіп жатқан халыққа есеп беру жиынында денсаулық сақтау саласындағы оң өзгерістерді баяндады.
Аймақ басшысының айтуынша денсаулық сақтау саласында «2019-2025 жылдарға арналған денсаулық сақтау нысандарының өңірлік перспективалық даму жоспары» бекітілген.
<blockquote>
 «Облыстық бюджеттен 2,7 млрд теңге бөлініп, медициналық ұйымдардың материалдық-техникалық қамтылуы 85,3 пайызға жеткізілді. Былтыр апаттық жағдайдағы денсаулық сақтау нысандарының орнына Шиелі ауданаралық ауруханасы пайдалануға берілді. Апаттық жағдайдағы соңғы нысан Жалағаш ауданында жаңа аурухана құрылысы жүргізілуде. Сонымен бірге, мемлекеттік-жекешелік әріптестік шеңберінде жеті дәрігерлік амбулатория қолданысқа берілсе, облыстық көпбейінді аурухана мен Қазалы ауданаралық ауруханасына ангиографиялық қондырғы орнатылды», – дейді облыс әкімі.
</blockquote>
Оның айтуынша былтыр 95 дәрігер қабылданып,&nbsp; қамту көрсеткіші 82 пайызға жеткенімен бұл салаға әлі 159 маман жетіспейді. Сондықтан, маман тапшылығын шешу мақсатында 20 маманды резидентураға және 30 маманды бакалавриатураға оқыту үшін облыс әкімдігінің гранты бөлінген.
<blockquote>
 «Сырдария өзенінің сол жағалауына онкологиялық бөлімі бар 500 төсек-орындық көпбейінді облыстық аурухана құрылысы республикалық жобалар тізіміне енгізілді. Заманауиқұралдармен жабдықталған аурухананы Үкіметтің кепілдігімен Еуразиялық даму банкінің қаржысына салу жоспарлануда. Сонымен бірге, биыл 8 дәрігерлік амбулатория пайдалануға берілетін болады», – дейді Қуанышбек Досмайылұлы.
</blockquote>

Қызылорда облысында биыл 8 дәрігерлік амбулатория пайдалануға беріледі

<a href="https://kyzylorda-news.kz/">Kyzylorda-news.kz.</a> «Қызылорда облысында жұмыс істеп тұрған кәсіпкерлік субъектілерінің саны, кәсіпкерлікпен айналысатын халықтың саны да артқан. Шағын және орта бизнестен түсетін салық көлемі де былтырдың өзінде 11 пайызға өсіп отыр», деп мәлімдеді аймақ басшысы халыққа есеп беру жиынында.&nbsp;
Облыс әкімі Қуанышбек Ысқақовтың айтуынша жұмыс істеп тұрған 46 мың кәсіпкерлік субъектісінің 22 пайызы ғана жылына 2 млн. теңгеден артық табыс түсірген.
<blockquote>
 «Президенттің тапсырмасына сәйкес, шағын және орта бизнестің өңірдегі өндірілген өнімдегі үлесін 2025 жылға 35 пайызға жеткізуіміз керек. Ал, бізде,өткен жылдың 9 айы бойынша 16,5 пайыз ғана. Өңірде жалпы көлемі – 910 гектарды құрайтын 6 индустриалдық аймақ жұмыс жасауда. Оның ішінде 54 жоба (193,7 млрд.теңге) орналасып, 237,5 гектар жер телімі ғана игеріліп тұр. 636 гектар учаскесі бос. Сондықтан, біз осы индустриалдық аймақтардың мүмкіндігін барынша пайдалануымыз қажет»,&nbsp; – деді ол.
</blockquote>
Аймақ басшысы «Еңбек» және «Қарапайым заттар экономикасы» бағдарламаларының мүмкіндіктерін барынша тиімді пайдалануға шақырды.&nbsp;
<blockquote>
 «Енді халық тұтынатын қарапайым тауарлар шығаруға бағытталуымыз қажет. Бұрында біздегі тігін фабрикасы, аяқ киім фабрикасы қандай сапалы өнім шығарғаны естеріңізде болар. Табиғи теріден жасалған балалар аяқ киімі тіпті алыс шетелдерге де экспортқа шығарылған болатын. Неге, біз төсек-орын жабдығын өзімізде шығаруға мүмкіндік бола тұра бүгінде шетелден әкелеміз?! Бізде қаражат та, шикізат та, жұмыс күші де бар», – дейді Қуанышбек Досмайылұлы.
</blockquote>

Қызылорда облысында 46 мың кәсіпкерлік субъектісі жұмыс жасайды

<a href="https://kyzylorda-news.kz/">Kyzylorda-news.kz.</a> Н. Бекежанов атындағы облыстық қазақ музыкалық драма театрында Қызылорда облысының әкімі Қуанышбек Ысқақовтың облыстың 2019 жылғы әлеуметтік-экономикалық даму қорытындылары туралы тұрғындар алдындағы есепті кездесуі басталды.
Аймақ басшысы тұрғындармен кездесуінде облыс әкімі ретіндегі алғаш рет есеп бергелі тұрғандығын ерекше атап өтті.
<blockquote>
 «Бүгін облыс әкімі ретінде Сіздердің алдарыңызда алғаш рет есеп бергелі отырмын. Өткен жыл еліміз үшін толағай табыстарға, тарихи оқиғаларға толы болғанын жақсы білесіздер. Тәуелсіз еліміздің негізін қалаушы, Қазақстанның Тұңғыш Президенті – Елбасы Нұрсұлтан Әбішұлы Назарбаев өз өкілеттігін тоқтатты. Маусым айында өткен бәсекелі сайлауда Мемлекет басшысы Қасым-Жомарт Кемелұлы Тоқаев жеңіске жетті.
 Мамыр айында Президентіміз Қасым-Жомарт Тоқаев Қызылорда облысына жасаған алғашқы жұмыс сапарында Сыр өңірінде атқарылып жатқан істерге өз ризашылығын білдіріп, өңірдің әлеуметтік-экономикалық даму динамикасына оң бағасын беріп кеткені белгілі.
 Өздеріңіз білетіндей, жыл басында өткен жылдың қорытындысын шығарып, алда атқарылар жұмыстардың жоспарымен таныстырып, есеп беру әкімдердің міндетіне айналды. Тірліктің күші бірлікте екенін тағы бір дәлелдеп, 2019 жылды табысты аяқтадық», – деді облыс әкімі Қ. Ысқақов.
</blockquote>
Облыс әкімі Қ. Ысқақовтың халық алдындағы есебін мына <a href="https://www.youtube.com/watch?v=AHqVZKdVtWQ&feature=youtu.be&fbclid=IwAR3vtG2mAjiqunpMQj6yeWtvlN2AROF4mJjsU4gW7SrSAs7PoXdleg4BDYM">сілтеме</a> арқылы тікелей эфирден көруге болады.

Қызылорда облысы әкімінің халық алдындағы есепті кездесуі басталды

<a href="https://kyzylorda-news.kz/">Kyzylorda-news.kz.</a> Тұңғыш рет Қызылордада облыстық мәдениет, архивтер және құжаттама басқармасының ұйымдастыруымен Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейінің «Абай – дана, Абай – дара қазақта» атты жылжымалы көрмесі өтеді.
Мәдени шараның мақсаты Абай Құнанбайұлының 175 жылдығына орай хәкім Абайдың бай мұрасын насихаттау, облыс жұртшылығына таныстыру.
Сыр халқы көрмеден Ұлы тұлғаның өмірі мен шығармашығлығына қатысты тарихи құжаттармен, архивтік деректермен, құнды қолжазбаларымен, Абайдың әкесі туралы жазған өлеңдерінің үзінділерімен, Абай оқыған Семей қаласындағы Ахмет Риза медресесі туралы деректермен, ақынның тұрмыста қолданған заттарымен таныса алады.
Көрменің ашылуы 2020 жылғы 21 ақпан күні сағат 11.00-де С.Айтбаев атындағы көркемсурет галереясында болады.
Айта кетейік, көрме 1 наурызға дейін жалғасады.

Қызылордалықтар Абай музейін тамашалай алады

<a href="https://kyzylorda-news.kz/">Kyzylorda-news.kz.</a> Ташкент қаласында ауыр атлетикадан өтіп жатқан Азия чемпионатында жерлесіміз Рахат Бекболат Азия чемпионы атанды.
Сыр елінің зілтеміршісі Рахат 17 жасқа дейінгі жасөспірімдер жəне 20 жасқа дейінгі жастар арасында 102 келі салмақ дəрежесінде өнер көрсетіп, қоссайыс нəтижесінде 356 келіні (158+198) бағындырды.
Ол серпе көтеру жаттығу бойынша Əлем рекордын жаңартты.
Айта кетейік, былтырғы жылы Солтүстік Кореяның Пхеньян қаласында өткен Азия чемпионатында жəне Лас-Вегаста өткен Əлем чемпионатында алтын медальдарды иеленген болатын. Спортшының бапкері Нұржан Смаханов.

Қызылордалық спортшы əлем рекордын жаңартты

<a href="https://kyzylorda-news.kz/">Kyzylorda-news.kz.</a> Ташкентте ауыр атлетикадан өтіп жатқан Азия чемпионатында жерлесіміз Айсамал Сансызбаева алтыннан алқа тағынып, ел абыройын асқақтатты.
Ол 81 келіден жоғары салмақ дəрежесінде жасөспірімдер жəне жастар арасында сынға түсіп, жұлқа көтеру – 109, серпе көтеру – 140, қоссайыс нəтижесінде 249 келіні бағындырды.
Ол жасөспірімдер жəне жастар арасында 2 алтын медаль алды.
Айта кетейік, ол былтырғы жылы Солтүстік Кореяның Пхеньян қаласында өткен Азия чемпионатында 2 мəрте күміс жүлдені иеленген болатын.
А.Сансызбаева Шиелі ауданының тумасы, қазіргі таңда Ж.Баһадүр атындағы олимпиадалық резервтің облыстық мамандандырылған мектеп-интернат-колледжде оқиды. Жаттықтырушылары: Арман Абдраев жəне Нұрсұлтан Бахрадин.
<img src="https://kyzylorda-news.kz/wp-content/uploads/2020/02/18aisamal2.jpg" alt="" />

Қызылордалық спортшы Азия чемпионы атанды

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласында өткен республикалық ақындар айтысы мәреге жетіп, жеңімпаздар мен жүлдегерлер анықталды.&nbsp;
Сөз аламанының бас жүлдесін Рүстем Қайыртай еншілесе, І орын жерлесіміз Ержеңіс Әбдиевке бұйырды. Қалған екі орынды Дидар Қамиев пен Бекарыс Шойбеков өзара бөлісті.&nbsp;
Республикалық шара Алтын Орданың 750 жылдығына және ұлы ақын Абай Құнанбайұлының 175 жылдық мерейтойына арналды, бас ұйымдастырушы – Қызылорда қаласының әкімдігі.
<img src="https://kyzylorda-news.kz/wp-content/uploads/2020/02/86972041_854989558660337_1584918935965270016_o-1.jpg" alt="" />
<img src="https://kyzylorda-news.kz/wp-content/uploads/2020/02/86831266_854989535327006_6931266712465571840_o.jpg" alt="" />
<img src="https://kyzylorda-news.kz/wp-content/uploads/2020/02/86810834_854989611993665_7130589397279309824_o.jpg" alt="" />

Қызылордадағы айтыстың бас жүлдесін Рүстем Қайыртай еншіледі

<a href="https://kyzylorda-news.kz/">Kyzylorda-news.kz.</a> 14-16 ақпан аралығында «Мұз айдыны» спорт кешенінде мемлекет және қоғам қайраткері Дінмұхамед Қонаевты еске алуға арналған волейболдан ардагерлер арасында он бірінші халықаралық турнир өтті.
Облыста алғашқы мәрте ұйымдастырылған жарысқа Өзбекстан, Қырғызстан мемлекеттерінен, Нұр-Сұлтан, Алматы, Байқоңыр қалаларынан және Алматы, Жамбыл, Түркістан, Шығыс Қазақстан, Маңғыстау, Қызылорда облыстарынан 12 команда, 50 жастан жоғары 150-дей ардагер қатысты.
Үш күнге созылған жарыстың нəтижесінде Алматы қаласының “КАЗНАУ” командасы І орынды жеңіп алды. ІІ орынды Байқоңыр қаласының командасы иеленді. Шығыс Қазақстан жəне Түркістан облыстары ІІІ орынға табан тіреді.
<img src="https://kyzylorda-news.kz/wp-content/uploads/2020/02/17turnirzhenimpaz2.jpg" alt="" />
<img src="https://kyzylorda-news.kz/wp-content/uploads/2020/02/17turnirzhenimpaz3.jpg" alt="" />
<img src="https://kyzylorda-news.kz/wp-content/uploads/2020/02/17turnirzhenimpaz4.jpg" alt="" />

Қазақстан және Қызылорда облысының жаңалықтары: Басты жаңалықтар old