<a href="https://kyzylorda-news.kz/">Kyzylorda-news.kz.</a> Қызылорда облысының Сексеуіл кентінде Президенттің тапсырмасына орай жаңа мектеп салынатын болды, деп хабарлайды <a href="https://24.kz/kz/zha-aly-tar/o-am/item/396725-yzylorda-oblysy-sekseuil-kentinde-300-bala-a-sha-tal-an-mektep-salynady">«Хабар 24»</a>.
Қазіргі таңда Сексеуіл кентінде 3 мектеп, 2 жарым мың оқушы бар. Сол білім ұяларының екеуінде орын тапшы. Оның үстіне бұл оқу ошақтары темір жолдың тек бір жақ бетіне орналасқан.
Сексеуілдің 600-ден астам оқушысы темір жолдың арғы бетінен мектепке қатынайды. Жол қысқартқысы келгендері қаз-қатар жатқан 15 рельсті аттап, вагондардың астымен өтуге мәжбүр. Бұл әрине кішкентайлардың өмірі үшін аса қауіпті. Ақпарат құралдары арқылы айтулы мәселеге қаныққан Президент пәрмен беріп, жаңа мектеп құрылысы бірер күнде басталатын болды. Қаржысы толық шешілген. Құны 730 млн теңгеден асады.
<blockquote>
 «Кенттегі 3 мектеп темір жолдың бір жақ беткейінде орналасқан, ал қазіргі бөлініп отырған жер қарсы жақ бетінде темір жол өткелінің және балаларға, ата-аналарға мектепке қатынауға қолайлы орын деп табылып отыр», – дейді Арал аудандық білім бөлімінің басшысы Санира Жанназарова.
</blockquote>
Тоғыз жолдың торабында тұрған Сексеуіл кентінде аурухана мәселесі де көптен өзекті болып келді. Көне ғимаратының тозығы жетіп, таршылық етті. Тұрғындар тілегі ескеріліп, жаңа аурухана салынып жатыр.&nbsp;
<blockquote>
 «Жалпы құрылыстың құны 782 млн теңге болады. 2019 жылы құрылыс жұмыстарын бастауға облыстық бюджеттен 50 млн теңге бөлінген еді. Енді биыл құрылыс жұмыстарын жалғастыруға 200 млн теңге қаржы бөлінді. Бұл қаржыға тиісті жұмыстар жалғастырылатын болады. Құрылыстың ұзақтығы нормативке сәйкес 21 ай», – дейді облыстық құрылыс, сәулет және қала құрылысы басқармасы басшысының міндетін атқарушы Арнұр Нұрмағанбетов.
</blockquote>
Облыс әкімі 11 мың тұрғыны бар елді мекендегі мектеп құрылысын жаңа оқу жылына дейін аяқтауда тапсырды. Ал аурухана құрылысының қалған қаржысы уақытылы бөлінсе, жыл соңына дейін пайдалануға беруге мүмкіндігіміз бар дейді мамандар.

Сексеуіл кентінде 300 балаға шақталған мектеп салынады

<a href="https://kyzylorda-news.kz/">Kyzylorda-news.kz.</a> Бүгін Қызылорда облысындағы мешіттер арнайы санитарлық талаптарды сақтай отырып жұмыс жасай бастады. Мешітте жеке құлшылық жасауға, Құран оқытуға және неке қидыруға рұқсат етілген. Бұл туралы Өңірлік коммуникациялар қызметінің ақпарат алаңында өткен брифингте ҚМДБ-ның Қызылорда облысы бойынша бас имамы Болатбек Абуов баяндады.
<blockquote>
 «Өңірдегі карантин ережелерін сақтай отырып, мешітте жекелеген түрде намаз оқуға рұқсат етілді. Жамағатпен намаздар оқылмайды. Сондай-ақ, мешітте 15 минуттар артық болуға болмайды. Әр 3 сағат сайын залдар залалсыздандырылып отырады. Ал Құран оқыту бөлмесіне 10 адамнан артық кіргізілмейді. Кіріп-шығу есіктері бөлек болады. Тағы ескере кететіні, неке қидыруға келуші мұсылмандармен тек куәгерлер ғана болуы шарт. Биыл Рамазанның қасиетті Қадыр түні 19-нан 20-на қараған түнге сәйкес келіп отыр. Осыған орай, қасиетті Қадыр кешін үйде өткізуге шақырамыз», – деді бас имам.
</blockquote>
Мешітке келушілер міндетті түрде бетперде тағуы қажет. Антисептік құралдарын пайдаланып, 1,5 метр арақашықтықты сақтау міндеттеледі. Сақтық ережелеріне байланысты қол амандасу құпталмайды. Барлық мешіттер таңғы 7.00-ден кешкі 20.00-ге дейін жұмыс жасайды.
<img src="https://kyzylorda-news.kz/wp-content/uploads/2020/05/qyzylordada-meshitter-ashyldy1-1.jpg" alt="" />

Қызылордада мешіттер ашылды

<a href="https://kyzylorda-news.kz/">Kyzylorda-news.kz.</a> Қазақстан Республикасы Экология, геология және табиғи ресурстар министрі Мағзұм Мырзағалиев пен Қызылорда облысының әкімі Гүлшара Әбдіқалықова жұмыс сапарымен Арал ауданына барды.
Министр әуелі алдымен Көкарал бөгетінің жұмысымен танысып, «Сырдария өзенінің арнасын реттеу мен Арал теңізінің солтүстік бөлігін сақтау» (САРАТС) жобасының ІІ фазасын іске асыру мәселесін талқылады. Сапар барысында Мағзұм Мырзағалиев бөгеттің жұмысына қатысты бірқатар тапсырмалар берді.
<blockquote>
 «Өздеріңіз білесіздер, 2005 жылы Көкарал бөгеті салынды. Дегенмен оның қазір біраз мәселелері бар. Бір жағын су шайып жатыр. Сондықтан бөгеттің жұмысын қалыпқа келтіріп, қуаттылығын арттыруымыз қажет. Биыл министрлік тарапынан жобалық сметалық құжаттарын әзірлеуге қажетті қаражат бөлінді, жоба дайын болғаннан кейін құрылыс жұмыстарын бастаймыз», – деді Мағзұм Мырзағалиев.
</blockquote>
Сондай-ақ, Экология, геология және табиғи ресурстар министрі САРАТС жобасына да тоқталды.
<blockquote>
 «Нақты қабылданатын шараларды анықтадық. Енді тиісті жұмыстарды атқаратын боламыз. Бұл жобаның маңыздылығы Көкарал бөгетіне келетін суды жинақтау болып табылады. Сондай-ақ, екінші фазада су көлемі көбейіп, сәйкесінше балық шаруашылығы да дамыйтын болады. Бүгінгі күні республика көлемінде су қоймаларының жағдайына зерттеу жұмыстары жүргізілуде. Соған сәйкес, әр аймақтан нақты ұсыныстар берілу керек», – деді министр.
</blockquote>
Көкарал бөгетінің арқасында бүгінде балық аулау көлемі 0,4 мың тоннадан 6 мың тоннаға дейін артқан және су маржанының жергілікті түрлері, оның ішінде, бекіре тұқымдас балықтарды өсіруге қолайлы жағдай жасалған. Сондай-ақ, теңіздегі судың көлемі 15,6 млн. текше метрден 27,1 млн. текше метрге дейін ұлғайған.
Арал ауданындағы негізгі кәсіптің бірі – балық шаруашылығы. Министр Мағзұм Мырзағалиев пен облыс әкімі Гүлшара Әбдіқалықова «Арал сервистік дайындау орталығы» ЖШС және Арал балық өңдеу зауытында да болып, жұмысымен танысты.
Қазір теңіздің белгіленген бір аумағына шығуға әр қайсысында екі балықшысы бар 20 қайыққа ғана рұқсат етілгін. Балықшылар министрге жергілікті тұрғындарды жұмыспен қамтамасыз ету үшін қойылған лимитті ұлғайту туралы өтініш білдірді.
Мағзұм Мырзағалиев балықшыларға бұл мәселені қарастыруға уәде берді.

Экология, геология және табиғи ресурстар министрі Мағзұм Мырзағалиев Арал ауданында болды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 232 адамға жетті. Соңғы тәулікте жаңадан анықталған 1 жағдай туралы бүгін облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте баяндады.
<blockquote>
 «Қазіргі таңда Қызылорда облысында коронавирустық инфекцияны жұқтырған 232 жағдай тіркелді. Соңғы тәулікте жаңадан 1 жағдай анықталды. Аталған науқас – Жаңақорған ауданынан. Ол Батыс Еуропа – Батыс Қытай халықаралық тасжолында орналасқан қоғамдық тамақтану орнында жұмыс жасаған», – деді Жақсылық Абдусаметов.
</blockquote>
Оның айтуынша, COVID-19 індетін жұқтырған өңірдегі 232 науқаспен байланыста болғандардың жалпы саны – 3270.&nbsp;Оның ішінде, жақын қарым-қатынаста болғандар саны – 1798, ықтимал байланыста болғандар – 1472 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 53, правизорлық стационарда – 16, карантиндік стационарда – 93 адам бақылауда.
Брифингте Жақсылық Әбілқасымұлы мәлімдегендей, өткен тәулікте облысымызда коронавирустық инфекцияға байланысты 583 тест сынамасы жасалыпты.
<blockquote>
 «Соңғы тәулікте 583 тест сынамасы жасалды. Оның 582 – теріс мәнді болып шықты. Біреуі оң нәтиже берді», – деді ол.
</blockquote>
Сондай-ақ, басқарма басшысы облыс тұрғындарына таза ауада көбірек жүруге кеңес берді.
<blockquote>
 «Коронавирустық инфекциядан сақтанудың қарапайым жолдарының бірі – таза ауада көбірек жүру. Ол – иммунитетті күшейтіп, вирустық инфекцияға қарсы төзімділікті қамтамасыз етеді. Сондықтан, үйде, жұмыс орнында, қоғамдық және көпшілік орындарды тұрақты және жиі желдетіп тұру керек», – деді Ж. Әбілқасымұлы.
</blockquote>
Айта кетейік, кеше Жаңақорған ауданында осы уақытқа дейін тіркелген <a href="https://kyzylorda-news.kz/densawlyq/covid-19-zhangaqorghan-awdanyndaghy-barlyq-nawqas-zhazylyp-shyqty-61727/">31 науқастың барлығы</a> қауіпті дерттен жазылып шыққанын хабарлаған болатынбыз.

COVID-19: Барлық науқас жазылған Жаңақорған ауданында қайтадан індет анықталды

<a href="https://kyzylorda-news.kz/">Kyzylorda-news.kz.</a> ҚР ИИДМ жолаушылар пойыздарының жүруін қайта бастау туралы ақпарат таратты.
<blockquote>
 «2020 жылғы 13 мамырда коронавирустық инфекцияның таралуына жол бермеу жөніндегі ведомствоаралық комиссияның отырысында ел ішінде жолаушылар пойыздарының жүруін қайта бастау туралы шешім қабылданды. Жолаушылар пойыздары халықтың сұранысын ескере отырып, 2020 жылғы 1 маусымнан бастап кезең-кезеңімен және өңірлердегі эпидемиологиялық жағдайға байланысты жүзеге асырыла бастайды. Атап айтқанда, бастапқы кезеңде 54 пойыз іске қосылады», – деп хабарлайды көлік комитетінен.
</blockquote>
Оның ішінде:
– Нұр-Сұлтан – Алматы, Маңғыстау, Өскемен, Сарыағаш, Семей, Арқалық, Павлодар, Петропавл/Қызыл Ту, Орал, Жезқазған, Қызылорда;
– Алматы – Шымкент, Павлодар, Ақтөбе, Маңғыстау, Сарыағаш, Өскемен, Жезқазған, Орал, Петропавл;
– Қызылорда – Семей;
– Қостанай – Қарағанды, Арқалық, Алматы;
– Қарағанды – Жезқазған;
– Қызылорда – Көкшетау, Петропавл және қала маңы қатынастары бағыттары іске қосылады.
Жол жүру билеттерін сату 2020 жылғы 15 мамырдан басталады.
Жолаушыларды және пойыз бригадасын барынша қорғау үшін тасымалдау Көліктегі бас мемлекеттік санитар дәрігердің ұсынымдарына сәйкес, сондай-ақ келесі шараларды сақтай отырып жүзеге асырылады:
1) дене температурасын өлшей отырып, пойыз бригадалары қызметкерлерін рейс алдында медициналық тексеру;
2) жолсеріктердің және жолаушылардың жол жүру жолында міндетті түрде бетперде киюі;
3) отырғызу және түсіру кезінде қашықтықты сақтау;
4) жүру жолында вагондардың ішінде ылғалды тазалау жиілігін арттыру және қалыптастыру пунктерінде дезинфекциялау;
5) жолаушылардың пойыз құрамы вагондарының арасында жүруіне және объективті себепсіз купеден шығуына тыйым салу.
Еске сала кетсек, бүгін Үкімет экономика салаларын қалпына келтіруге және халықты жұмыспен қамтуға бағытталған бірқатар нақты шешімдер қабылдады. Ол бойынша 1 маусымнан бастап ел ішінде&nbsp;пойыз жүре бастайды.

1 маусымнан бастап пойыздар қай қалаларға қатынайды?

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 181 адамға жетті.
13 мамыр 14:45-тегі&nbsp;мәлімет бойынша Қызылорда облысында тағы 1 адам қауіпті індеттен жазылып шыққан.
Індеттен айыққандардың қатарына соңғы қосылған науқас – Жаңақорған ауданының тұрғыны.
Ерекше атап өтерлігі – Жаңақорған ауданындағы осы індетке шалдыққан 31 науқастың барлығы жазылып, үйлеріне шықты.
Осылайша коронавирустық инфекциядан жазылғандар саны өңірде 181 адамға жетіп отыр.
Аталған науқастан 2 реттен сынама тест алынып, бәрі теріс мәнді нәтиже көрсеткен.
Олар алдағы 14 күнде дәрігерлердің бақылауында болады.

COVID-19: Жаңақорған ауданындағы барлық науқас жазылып шықты

<a href="https://kyzylorda-news.kz/">Kyzylorda-news.kz.</a> Еліміздің әр аймағында карантин режимі қашан аяқталатыны белгілі болды. Бұл туралы&nbsp;<a href="https://web.telegram.org/#/im?p=@coronavirus2020_kz">coronavirus2020_kz</a>&nbsp;Telegram парақшасында жарияланды.
Маңғыстау, Атырау, Батыс Қазақстан, Түркістан облыстары мен Шымкент қаласында карантин режимі 25 мамырға дейін ұзартылған.
Ал Қызылорда, Алматы, Ақтөбе, Павлодар, Қостанай облыстары мен Алматы, Нұр-Сұлтан қаласында эпидемиологиялық жағдай тұрақталғанша карантин режимі сақтала береді.
Сондай-ақ, Ақмола, Қарағанды, Жамбыл облыстарында карантин эпидемиологиялық жағдайға байланысты біртіндеп алынады.
Солтүстік Қазақстан облысында карантин ерекше шарттармен ұзартылса, Шығыс Қазақстан облысында 1 маусымға дейін созылады.

Еліміздің әр өңірінде карантин режимі қашан аяқталатыны белгілі болды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 231 адамға жетті. Соңғы тәулікте жаңадан анықталған 1 жағдай туралы бүгін облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте баяндады.
<blockquote>
 «Қазіргі таңда Қызылорда облысында коронавирустық инфекцияны жұқтырған 231 жағдай тіркелді. Соңғы тәулікте жаңадан 1 жағдай анықталды. Аталған науқас – Қызылорда қаласынан. Ол кеше анықталған науқастың отбасы мүшесі, 2 жасар бала. Осылайша, Қызылорда қаласында инфекция жұқтырған науқастар саны 94 тұрғынға жетті», – деді Жақсылық Абдусаметов.
</blockquote>
Оның айтуынша, COVID-19 індетін жұқтырған өңірдегі 231 науқаспен байланыста болғандардың жалпы саны – 3270.&nbsp;Оның ішінде, жақын қарым-қатынаста болғандар саны – 1798, ықтимал байланыста болғандар – 1472 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 71, правизорлық стационарда – 18, карантиндік стационарда – 131 адам бақылауда.
Брифингте Жақсылық Әбілқасымұлы мәлімдегендей, өткен тәулікте облысымызда коронавирустық инфекцияға байланысты 813 тест сынамасы жасалыпты.
<blockquote>
 «Соңғы тәулікте 813 тест сынамасы жасалды. Оның 805 – теріс мәнді болып шықты. Біреуі оң нәтиже берді. Ал, 7 – әлі тексерілу үстінде. Бүгінде облысымызда 4300 тест сынамасының қоры қалды», – деді ол.
</blockquote>
Сондай-ақ, басқарма басшысы облыс тұрғындарын әлеуметтік арақашықтықты сақтауға шақырды.
<blockquote>
 «Өңірде коронавирустық инфекцияның таралуының алдын алу үшін бірнеше сақтық шараларын күнделікті дағдыға айналдыруымыз керек. Соның бірі – әлеуметтік арақашықтық. Бұл дегеніміз – қоғамдық орындарда, көшеде және тағы да басқа жерлерде басқа адамдармен 1 метр арақашықтықты сақтау. Қауіпті індетті жұқтырған адам түшкіргенде, одан жан-жағына майда ауа тамшылары таралады. Осылайша, ауаға инфекция таралады. Ал, жанындағы адам дем алғанда вирус жұқтырып алуы мүмкін», – деді Ж. Әбілқасымұлы.
</blockquote>
Айта кетейік, бүған дейін Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/densawlyq/qyzylorda-oblysyndaghy-koronovirws-infekcijasyn-229-adam-zhuqtyrdy-61193/">229 адамға жеткенін</a>&nbsp;хабарлаған болатынбыз.

COVID-19: Қызылордада 2 жастағы сәбиден коронавирус анықталды

Kyzylorda-news.kz. 11 мамыр күні Мемлекет басшысы Қасым-Жомарт Тоқаев Төтенше жағдай режимін қамтамасыз ету жөніндегі мемлекеттік комиссияның отырысын өткізеді.
<blockquote>
 «Ертең, яғни 11 мамыр күні Қазақстан Президенті Қасым-Жомарт Тоқаев Төтенше жағдай режимін қамтамасыз ету жөніндегі мемлекеттік комиссияның отырысын өткізеді. Жиын барысында Мемлекет басшысы коронавирустың қазіргі ахуалын саралап, Төтенше жағдай режимі аяқталғаннан кейінгі Үкімет пен басқа да мемлекеттік органдардың алдағы стратегиялық іс-әрекетін айқындайтын мәлімдеме жасауды жоспарлап отыр», – деп жазды Мемлекет басшысының баспасөз хатшысы Берік Уәли <a href="https://m.facebook.com/story.php?story_fbid=2808676019255812&id=100003403233694">Facebook</a>-те.
</blockquote>

Президент төтенше жағдайдан кейінгі меморгандардың іс-әрекеті бойынша мәлімдеме жасайды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова Ұлы Отан соғысының ардагері Бөрібай Құлмановты Жеңістің 75 жылдығымен құттықтады.
Бөрібай Құлманұлы 1920 жылы 6 маусымда Қызылорда облысы Сырдария ауданында дүниеге келген. Ол Ржевск пен Приволжьені азат етуге қатысқан. Ерлік пен батырлық танытып, Жеңіске үлес қосқаны үшін майдангер «Қызыл жұлдыз» және «Отан соғысы» ордендерімен марапатталған.
Елге оралғаннан кейін де ардагер мемлекеттік қызметте еңбек етіп, өңірдің әлеуметтік-экономикалық дамуына зор үлес қосты. Отан оның еңбегін жоғары бағалап, «Еңбек Қызыл Ту» және «Құрмет Белгісі», «Құрмет» ордендерімен, сондай-ақ Қазақ КСР Жоғарғы Кеңесінің Құрмет грамотасымен марапатталған.
Бүгін өңір басшысы Гүлшара Әбдіқалықова майдангерге Ел Президенті Қасым-Жомарт Кемелұлы Тоқаевтың құттықтауын жеткізіп, бейбітшілік пен жарқын болашақты құруға мүмкіндік бергені үшін алғысын айтты.
Өз кезегінде майдан қаҺарманы Бөрібай Құлманов Мемлекет басшысына үнемі көрсетіп отырған қамқорлығы мен қолдауы үшін зор ризашылығын білдірді.
Өңірдегі 16 Ұлы Отан соғысы ардагерінің 8-і Қызылорда қаласында, 1-уі Арал ауданында, 3-уі Қазалы ауданында, 2-уі Сырдария ауданында, 1-уі Шиелі ауданында, 1-уі Жаңақорған ауданында тұрады.
Бүгін облыстағы барлық майдангерлерді өңір басшысы мен қала, аудан әкімдері құттықтап, Қазақстан Республикасы Президентінің құттықтауын тапсырды.
Биыл өңірдегі 16 майдангердің барлығына 1 млн. 111 мың&nbsp;теңгеден берілді. Жалпы соғыс ардагерлері мен тыл еңбеккерлеріне материалдық және әлеуметтік көмек көрсетуге 437 млн.теңге бөлінді.
<img src="https://kyzylorda-news.kz/wp-content/uploads/2020/05/bek_1642-scaled.jpg" alt="" />

Гүлшара Әбдіқалықова майдангер Бөрібай Құлмановты құттықтады

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова сырбойылықтарды 9 мамыр – Жеңіс Күнімен құттықтады.
Құрметті қызылордалықтар!
Сіздерді 9 мамыр мемлекеттік мерекесімен шын жүректен құттықтаймын!
Ұлы Жеңіс – аға ұрпақтың ерлігін мәңгілік ел есінде сақтауға арналған ең қастерлі мереке. 
Сіздер сұрапыл соғыстың соқпағынан өтіп, Отан деп от пен суға түсіп, кең байтақ жерді қорғадыңыздар. Батырларымыздың бейбіт күн үшін жасаған өлшеусіз ерліктері мәңгі ұмытылмайды. Бұл мереке – бүкіл соғысқа қатысушылар және тыл еңбеккерлерінің қажымас қайраты мен қайсар рухының жеңісі.
Майдан даласында 150 мың сырбойылық азаматтар қайсарлықтың үлгісін көрсетті.
Өкінішке орай, олардың 30 мыңнан астамы елге оралмады. Десекте, облыстан 22 Кеңес Одағының Батыры, 1 Даңқ орденінің толық кавалері шығып, 20 мыңнан астам қызылордалық жауынгер орден, медальдармен марапатталды.
Осынау қасиетті мереке күні біз өз өмірлерін құрбандыққа шалып, шейіт болған ерлердің рухы алдында бас иеміз!
Сондай-ақ «Бәрі де майдан үшін, бәрі де жеңіс үшін» деген ұранмен жұмыс жасаған тылдағы азаматтардың еңбегі мәңгі есімізде.
Жыл өткен сайын соғыс ардагерлерінің қатары сиреп барады. Бұл біздің жүрегімізді шымырлатса да, сұм соғыстың салқыны алыстай бермек.
Мерекеге орай, өңіріміздегі 16 соғыс ардагеріне 1 млн. 111 мың теңгеден төленуде. 
Сондай-ақ, 4 319 Ұлы Отан cоғысының ардагерлеріне теңестірілген азаматтарға біржолғы материалдық көмек көрсетуге 437 млн.теңге бөлінді.
Қарт жауынгерлерімізді ардақтау бағытындағы жұмыстарымыз жалғаса бермек.
Қадірлі соғыс және тыл ардагерлері!
Бүгінгі өскелең ұрпақты береке-бірлікке, тату-тәтті тірлікке тәрбиелеу ісіне белсенді ат салысып ортамызда аман-есен жүре беріңіздер. Біз «Ешкім де ешқашан да ұмытылмайды», – деген ұранды ұстанған елміз.
Сіздерге зор денсаулық, мол бақыт, отбастарыңызға амандық тілеймін! 
Еліміз еңселі, Тәуелсіздігіміз тұғырлы болсын! 
Ұлы Жеңістің 75 жылдығы құтты болсын!
Біз Біргеміз!

Гүлшара Әбдіқалықова қызылордалықтарды Жеңіс күнімен құттықтады

<a href="https://kyzylorda-news.kz/">Kyzylorda-news.kz.</a> Әлемнің 60-тан астам мемлекетін шарпып, 70 миллионнан астам адамның өмірін қиып кеткен Екінші дүниежүзілік соғыстың аяқталғанына бүгін тура 75 жыл толып отыр.
Неміс әскерінің Совет Одағына шабуылы 1941 жылдың 22 маусымында таңсәріде басталды. Бірінші Дүниежүзілік соғыста оңбай жеңілген Германия әскері араға ширек ғасыр салып есін жиып, қайта әлемге айбар шеккен қатерлі күшке айналады. Фашистер 1939 жылы қол қойылған кеңес-герман шартын бұзып, СССР шекарасына лап берген еді. А дегенде айтарлықтай кері шегінген Совет Одағы жүздеген ұлттан құралған жауынгер әскерінің арқасында жерін қорғап қалды. Жеңісті жақындатуға Қазақ КСР-ның зор үлесі барын атап өткен жөн.
Соғыс жүрген 1418 күнде майдан алаңына Қазақ КСР-нан 1,2 миллионнан астам сарбаз барған. Шайқасқа аттанған қазақстандықтардың жартысы елге оралған жоқ. Ерліктері үшін 499 қазақстандық марапатталса, олардың ішінде 99-ы Кеңес Одағының Батыры, Халық Қаһарманы атағын алды. Сондай-ақ қазақтың қос батыр қызы – Мәншүк Мәметова мен Әлия Молдағұлова да шайқаста ажал құшып, оларға ең жоғарғы – Кеңес Одағының Батыры атағы берілді. 142 қазақстандық Даңқ орденінің толық иегері атанды.
Екінші дүниежүзілік соғыс көзсіз ерліктерімен аты аңызға айналған қазақ жауынгерлерін тарих сахнасына шығарды. Әсіресе, Мәскеу түбіндегі шайқаста генерал И.Панфилов басқарған 316-атқыштар дивизиясының құрамында Бауыржан Момышұлы басқарған 1073-гвардияшыл атқыштар полкі жау шабуылына ерлікпен тойтарыс берді. Қазақстандық әскери құрамалардың үштен бірі 1941 жылғы 9 қыркүйектен бастап Ленинградты қорғауға қатысты. Қазақстандық жауынгерлер Курск шайқасында, Балтық бойы республикаларын, Украина мен Беларусьты, Шығыс Еуропаны азат етуге және Берлин операциясын жүзеге асыруға қатысты. Соғыстың барлық бағыттарында қазақтар жасындай жарқылдады. Бұл ретте батыр бабалардың партизан соғысына да белсене қатысқанын айта кеткен жөн. Қ.Қайсенов, Ғ.Ахмедияров, Б.Жангелдин, Ә.Шәріпов, Н.Байсейітова мен Т.Жұмабаева, Ж.Саин, Ғ.Омаров сияқты қазақтың ұл-қыздарының аты ерліктің нағыз үлгісін көрсетті.
Қазақстандықтарды күні кеше Жеңістің 75 жылдығымен&nbsp;<a href="https://kyzylorda-news.kz/kogam/elbasy-nursultan-nazarbaev-qazaqstandyqtardy-zhengis-kuenimen-quttyqtady-60978/">Елбасы Нұрсұлтан Назарбаев</a>&nbsp;пен <a href="https://kyzylorda-news.kz/kogam/memleket-basshysy-qazaqstandyqtardy-zhengisting-75-zhyldyghymen-quttyqtady-60894/">Мемлекет басшысы Қасым-Жомарт Тоқаев</a> құттықтады. Елбасы өз сөзінде «келер ұрпақтың бақытты әрі берекелі ғұмыры үшін миллиондаған адам фашизмді жеңу жолында жанын пида еткенін» мәлім етсе, Президент «ержүрек аға буынның алдында мәңгі қарыздар екенімізді» жеткізді.
Қазақстанда қазіргі таңда сол сұрапыл соғысты басып өткен 1 025 ардагер бар. Олардың бәріне биыл 1 миллион теңгеден берілді. Ленинград қоршауында қалған тұрғындар мен концлагерьлерге кәмелетке толмай түскен тұтқындарға 50 мың теңгеден, ал ҰОС-ның қайтыс болған ардагерлерінің жұбайларына, соғыс жылдары еңбек еткен тыл еңбеккерлеріне 30 мың теңгеден табысталды.

Қазақстан және Қызылорда облысының жаңалықтары: Басты жаңалықтар old