<a href="https://kyzylorda-news.kz/">Kyzylorda-news.kz.</a>&nbsp;Қызылорда облыстық филармонияның ұйымдастыруымен 2020 жылы барлығы 178 шара өткізілді. Бұл туралы Қызылорда облыстық мәдениет, архивтер және құжаттама басқармасының басшысы Мира Әбуова мәлімдеді.
Әлемде болып жатқан пандемияға орай, елімізде вирустың таралуына жол бермеу және алдын алу мақсатында 2020 жылдың наурыз айынан бастап халықтың көп шоғырлануы көзделген мәдени-бұқаралық іс-шараларды өткізуге шектеу қойылуына орай&nbsp;шаралар онлайн форматта өткізіліп, әлеуметтік желіде кеңінен насихатталды.
Өткен жылы елімізде тұңғыш рет ұйымдастырылған онлайн форматтағы«Сәлем, Елорда!» І республикалық өнер фестиваліне облыстық филармонияның өнер ұжымдары қатысты. Сонымен қатар аймақта тұңғыш рет Абай Құнанбайұлының 175 жылдық мерейтойына орай «Абай» операсы сахналанды. Тағы бір жағымды жаңалық облыста Қорқыт ата мұраларының ЮНЕСКО-ның материалдық емес мәдени мұралар тізіміне енгізілуіне орай филармония жанынан қобызшылар ансамблі құрылды.
Брифинг барысында былтыр облыстық филармония өнер ұжымдарының дайындық залына арналған қосымша 785,56 шаршы метр қосалқы ғимарат салынып, пайдалануға берілгені айтылды.
<blockquote>
 “Жаңа ғимаратта дайындық залы, тігін цехы, асхана және киім қоймасы орналасқан. Ғимарат кең ең бастысы жарық, әртістердің шығармашылықпен айналысуына қолайлы. Биыл карантиндік талаптарды сақтай отыра жаңа маусымды 11 қаңтарда басталды,- деді облыстық филармония директоры Талғат Мақашов.
</blockquote>
Сонымен қатар филармония жанындағы «Әдемі» балалар музыкалық театр-студиясы – Мәскеу қаласындағы «Шығармашыл жастарды қолдау жөніндегі іс-шараларды ұйымдастыру» әлеуметтік жобасына онлайн түрде, Г.Остердің «Мазасыз тиын» қойылымымен қатысты.
Классикалық орындаушы Сымбат Тасбергенова – КСРО халық артисі Н.Тілендиевтың 95 жылдығына арналған «Әлқисса» фестивалінің аясында өткен республикалық онлайн-конкурстан, «Ақмешіт» фольклорлық ансамблінің әртісі, домбырашы Алмаз Әлжанов – М.Сыдықовтың 80 жылдығына арналған «Домбыра –жүрек жырлайды» атты республикалық онлайн-күйшілер конкурсынан жүлделі орындарды иеленді.

Қызылордада филормония жанындағы қосымша ғимарат пайдалануға берілді

<a href="https://kyzylorda-news.kz/">Kyzylorda-news.kz.</a> Қызылорда қалалық Полиция басқармасына 73 жастағы зейнеткер арыз түсіріп, өзінің алданғаны туралы баяндады.
Арызда ағымдағы жылдың 13 қаңтарында 250 000 теңге тұратын құндыз тонын алдап алғанын көрсеткен.
Тәртіп сақшыларының жедел-іздестіру шараларының нәтижесінде 37 жастағы бұрын сотты болған Қызылорда облысының тұрғыны анықталып, ұсталды.
Аталған дерек бойынша Қазақстан Республикасы Қылмыстық кодексінің 190 бабының 1 бөлігі бойынша (алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену) сотқа дейінгі тергеп-тексеру амалдары жүргізілуде.

Қызылордада алаяқ зейнеткердің құндыз тонын алып кеткен

<a href="https://kyzylorda-news.kz/">Kyzylorda-news.kz</a>. Қызылорда облысында пандемиядан зардап шеккен шағын және орта бизнес өкілдерін қолдау мақсатында бірқатар жұмыстар жасалуда.
Атап айтар болсақ, биыл мемлекеттік, өңірлік бағдарламалар аясында 6 млрд теңге бөлінді. Яғни, «Бизнестің жол картасы 2025» бағдарламасы шеңберінде 2,6 млрд теңге, «Еңбек» бағдарламасына 3 млрд теңге және өңірлік инвестициялық орталығына 300 млн теңге. Аталған бағдарламалар аясында кәсіпкерлердің 1000-ға жуық жобасы қаржыландырылады.
<blockquote>
 “Аймақта шағын және орта бизнес өкілдірінің саны 54 700-ді құрайды. Пандемия кезінде 74 пайызының кәсібі ішінара тоқтатылды. 10-мыңға жуық кәсіпкер зардап шекті. Сол кезде бизнесті қайта жандандыру үшін кәсіпкерлерге салық жеңілдіктері берілді. Несие төлемдері кейінге қалдырылып, кредиттерді жеңілдікті шарттармен қайта қаржыландыру мүмкіндігі берілді. Мемлекеттік бағдарламалардың несиелендіру шарттары оңтайландырылып, бюджеттен қаржы қарастырылды. Кәсіпкерлік саласындағы әртүрлі бағдарламалар аясында 20 млрд. теңге несие берілді. 500-ге жуық жоба несиелендірілді. Сондай-ақ, өткен жылы 252,8 млрд.теңгенің өнімі өндірілді”, – деді облыстық кәсіпкерлік және туризм басқармасының басшысы Фердоуси Қожабергенов.
</blockquote>

Қызылордада 1000-ға жуық жоба іске асырылады

<a href="https://kyzylorda-news.kz/">Kyzylorda-news.kz</a>. Бүгін «Қоғамдық келісім» КММ директоры Бауыржан Мастеков облыстағы 11 этномәдени бірлестік жетекшілерімен кездесті.
Кездесу барысында қоғамдық келісім мен этносаралық бірлікті нығайту, ұлттық рухани құндылықтарды насихаттау, Тәуелсіздіктің 30 жылдық мерейтойына арналған бірнеше жобаларды жүзеге асыру және тағы басқа бірқатар мәселелерді талқыға салды.
Мекеме директоры Бауыржан Мастеков қазақ елінің бүгінгі жеткен жетістігі – қоғамдағы мызғымас тұрақтылықтың нәтижесі. Тәуелсіздіктің 30 жылында еліміз тек берекеге бастау болар сан мың жолдан өткендігін атап өтті. Бүгінге дейін бағындырған белестер баянды болуы үшін бірлескен жұмыстарды қолға алып, жүзеге асыратындығын жеткізді.
Өз кезегінде этномәдени бірлестіктің жетекшілері әрі де қазақ халқының ынтымақшылдығы негізінде бірлік пен келісімді нығайтуға дайын және әрбір бастаманы қолдауға әзір екендерін алға тартты.

Бауыржан Мәстеков: Бірлескен жұмыстар жалғасын табады

<a href="https://kyzylorda-news.kz/">Kyzylorda-news.kz</a>. Арал және Жалағаш ауданындағы типтік жобадағы мал қорымының құрылыс жұмыстары аяқталды.
Биыл ветеринария саласын дамыту мақсатында 2021-2023 жылдарға арналған «Жол картасы» әзірленді. Оның аясында 24 типтік жобадағы мал қорымы және 40 ветеринариялық пункт салу жоспарлануда. Бұл туралы Өңірлік коммуникациялар қызметінің ақпарат алаңында өткен брифингте облыстық ветеринария басқармасының басшысы Ерсұлтан Апетов мәлімдеді.
<blockquote>
 “Бүгінде типтік жобадағы мал қорымдарын салу мақсатында тиісті жұмыстар жүргізілуде. Облыс бойынша 146 мал қорымы бар. Оның ішінде, ветеринариялық-санитариялық талаптарға сәйкес 90 типтік жобада салынды. Сондай-ақ, тағы да жеті типтік жобадағы мал қорымы салынады, – деді Ерсұлтан Амантайұлы.
</blockquote>
Айта кетейік, облыста аса қауіпті жұқпалы аурулар тіркелген жоқ. Эпизоотиялық ахуал тұрақты.

Қызылордада 7 типтік жобадағы мал қорымы салынады

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 1413 адамнан коронавирус індеті ПТР арқылы расталды.
Аймақтар бойынша:
Нұр-Сұлтан қаласы – 125,
Алматы қаласы – 138,
Шымкент қаласы – 13,
Ақмола облысы – 209,
Ақтөбе облысы – 10,
Алматы облысы – 71,
Атырау облысы – 90,
Шығыс Қазақстан облысы – 39,
Жамбыл облысы – 24,
Батыс Қазақстан облысы – 93,
Қарағанды облысы – 79,
Қостанай облысы – 140,
Қызылорда облысы – 13,
Маңғыстау облысы – 15,
Павлодар облысы – 221,
Солтүстік Қазақстан облысы – 117,
Түркістан облысы – 16.
Жалпы ел бойынша ауырғандар саны – 182 530.

Коронавирус: Қызылордада бір күнде  13 адам тіркелді

Kyzylorda-news.kz. Өңірде жас өнертапқыш баламалы қуат көзі арқылы шаһар көшелерін жарықтандыруға арналған жоба ойлап тапты. Яғни, автокөліктің қозғалысы арқылы баламалы энергия көзін өндіруге арналған. Бұл жоба ұлттық «STEAMUP» байқауында үздік деп танылды.
<blockquote>
 «Жүрген көліктерден энергия өндірудің шағын макетін жасадық. Өндіру механизмі бірнеше бөлшектерден тұрады және көліктер көп шоғырланған аймақтардың көшелерінде жер астында орналастырылады. Олар жылдамдық бəсеңдеткіш төмпешіктерге ұқсас болады. Аталмыш платформадан көлік өткен сайын құрылғы төменге түсіп, қайта орнына келу арқылы энергия өндіреді», – деді Назарбаев зияткерлік мектебінің оқушысы Мерей Сембай.
</blockquote>
Механизм құрылысын сипаттау және қажетті есептеулер жүргізу үшін жоба авторлары Қызылорда жылу электр торабының қызметкерлерінен кәсіби кеңестер алған. Сол жердегі генераторлардың жұмысын қадағалап, оның параметрлері мен құрылғы өлшемдері жайлы ақпарат жинақтаған.
<blockquote>
 «Бұл – электр энергиясын адам денсаулығына, қоршаған ортаға залалсыз түрде алудың тиімді əрі қарапайым жолы. Қомақты қаржыны да қажет етпейді. Дегенмен белгілі аумақты жылдар бойы шығын келтірмей жарықпен қамтамасыз ете алады. Мәселен, 20-дан астам жылдамдық бəсеңдеткіш төмпешіктің орнын осындай 10 конструкциямен алмастырсақ, үш жылдың ішінде 70 млн теңге қаржыны үнемдей аламыз», – деді Назарбаев зияткерлік мектебінің оқытушысы Жеңісбек Жолмырзаев.
</blockquote>
Қызылордалық новаторлар бұл экономикалық, экологиялық және энергетикалық тұрғыда тиімді саналатын жобаның әзірге отандық тәжірибеде баламасы жоқ дейді. Сондықтан алдағы уақытта тың технологияны патенттеп алып, өндіріске қосуды мақсат етіп отыр.

Қызылордада жас өнертапқыш автокөліктен энергия өндіру жобасын ойлап тапты

<a href="https://kyzylorda-news.kz/">Kyzylorda-news.kz</a>. Биыл Мұқағали Мақатаевтың 90 жылдығы қарсаңында Қызылорда қаласындағы Назарбаев Зияткерлік мектебі&nbsp;#Мұқағалиға90жылNIS отбасылық жыр эстафетасын бастады.
«Зияткерлік мектеп оқушысына оқуға ұсынылатын 100 кітап» жобасы аясында ұйымдастырылған шараға оқушылар мен ата-аналар белсенді қатысуда. Мектеп қауымдастығы қазақ поэзиясына үлкен қолтаңба қалдырған ақиық ақын Мұқағали Мақатаевтың шығармашылығынан тәрбиелік мәні зор өлеңдерін жатқа айтып, әлеуметтік желі арқылы көпшілікке насихаттауда.
Алғашқы болып «Номад» шаңырағының оқушысы Надира Атымтай мен анасы Бахытжан Рахманбердіқызы эстафетаны бастап, ақынның «Не деген керемет күн» туындысын таныстырды.
<blockquote>
 “Мұқағали атаның бұл өлеңіндегі табиғаттың әсем көрінісі көңілімді ерекше тербеді, сол себепті осы шығарманы анам екеуміз жатқа оқуды ұйғардық”, – дейді Надира Атымтай.
</blockquote>
Отбасылық челлендж аясында қатысушылар Мұқағали Мақатаевтың өлеңдеріне жазылған&nbsp; әсем әндерден шашу шашып, тыңдармандарға ерекше әсер қалдырды.
<blockquote>
 “Қазақ сөз өнерінің зергері деп танылған қаламгер еңбектері адалдық пен жан тазалығына, шынайылыққа үндейді. Оқушылар мен ата-аналарды ақынның шоқтығы биік шығармаларымен таныстыра отырып, ақын өлеңдеріндегі елжандылық, құрмет, сүйіспеншілік құндылықтарын өскелең ұрпаққа дәріптеу мақсатында ұйымдастырылды”, – дейді жоба координаторы Ақбота Жұмабаева.
</blockquote>
Эстафета ақынның туған күніне дейін&nbsp; жалғасады. Мектеп ұжымы әдеби&nbsp; эстафетаға барша халықты үлес қосуға шақырады. Ол үшін ақын шығармашылығынан сүйікті өлеңін мәнерлеп оқыған видеоларды #Мұқағалиға90жылNIS&nbsp; хэштегімен әлеуметтік желіге жүктеу қажет.

Қызылордада отбасылық жыр эстафетасы басталды (ВИДЕО)

<a href="https://kyzylorda-news.kz/">Kyzylorda-news.kz</a>. Қазақ тілі мен әдебиеті пәнінен республикалық «Абайтану» олимпиадасында Қызылорда қаласындағы Назарбаев Зияткерлік мектебінің 11 сынып оқушысы Ләззат Өтеп жүлделі ІІІ орынды иеленді.&nbsp;
Аталмыш білім бәйгесінің республикалық кезеңіне еліміздің барлық жалпы білім беретін мектеп оқушылары қатысты. Жас абайтанушылар бірінші кезеңде Абай қарасөздері мен поэзиясы негізінде дайындалған тақырыптардың біріне ЭССЕ жазып шығармашылық қабілет -қарымын танытса, екінші кезеңде шығармашылығы бойынша ауызша сұрақтарға&nbsp; тікелей режимде жауап беріп, терең білімдерімен сынға түсті.
<blockquote>
 «Абай поэзиясының&nbsp; қазіргі жастарға беретін тағылымы зор. Данышпан ақын әсіресе, білім мен ғылымның&nbsp; маңызына көп мән берген. Ақын өлеңдерін бала кезімнен жаттап өстім. Абайдың табиғат тақырыбындағы&nbsp; шығармалары қатты ұнайтын. Суреткерлігі сонша — оқыған кезде&nbsp; жанды картина көз алдымызға келеді», — дейді Ләззат Өтеп.
</blockquote>
Сонымен бірге ғұламаның қара сөздерінің астарына тереңірек үңілу керек , күнделікті өмірде ұстаным ретінде&nbsp; қолданатын тұжырымдардың мол екенін айтады.&nbsp;&nbsp;&nbsp; Байқауда жас зияткер Абай жолы романының мазмұны бойынша білімімен ерекшеленіп, жүлделі 3-орын иеленді.&nbsp;&nbsp;
<blockquote>
 «Елімізде биыл үшінші рет өткізіліп отырған Абайтану олимпиадасы онлайн форматта жоғары деңгейде әділ өтті. Әрине, үлкен дайындықты талап етеді. Оқу бағдарламасынан бөлек сабақтан тыс уақыттарда да Абай әлемімен толық таныс болу үшін қосымша жұмыс жүргіздік. Абай шығармашылығы — жас жеткіншектер үшін рухани азық, өмірлік бағыт беруші шамшырақ іспетті, сондықтан оның мол мұрасы насихатталу керек», — дейді ұстазы Мира Дөненхожаева.
</blockquote>

Қызылордалық зияткер «Абайтану» олимпиадасының жүлдегері атанды

<a href="https://kyzylorda-news.kz/">Kyzylorda-news.kz</a>. Қызылорда облысында жылудың бағасы республикада бойынша 9 өңірден төмен.
Ал электр энергиясының бағасы 5 аймақтан арзан. Жалпы коммуналдық қызмет тарифтері басқа өңірлермен салыстырғанда орташа деңгейде сақталуда. Бұл туралы Өңірлік коммуникациялар қызметінің ақпараттық алаңында өткен брифингте облыстық энергетика және тұрғын үй-коммуналдық шаруашылық басқармасы басшысының орынбасары Ерлан Жоламанов мәлімдеді.
Аймақта электр энергиясымен жабдықтаушы үш мекеме айналысады. Барлығы да қаңтар айынан бастап бағаны арзандатты. Мәселен, тұрғындар үшін «Дәулетэнерго» ЖШС 1,9 пайызға, «Шиелі жарығы» ЖШС 3 пайызға, «Энергосервис» ЕЖШС 2,2 пайызға төмендетті.

Қызылордада коммуналдық тарифтердің бағасы төмендеді

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова Қорқыт ата атындағы Қызылорда университетінің «Қорқыттану және өлке тарихы» ғылыми-зерттеу институтының директоры, филология ғылымдарының докторы, профессор Бағдат Кәрібозұлымен кездесті. Жүздесу барысында аймақ басшысы сөз өнері мен руханияттың дамуына елеулі үлес қосып жүрген Бағдат Кәрібозұлының ел игілігі жолындағы еңбегін ерекше бағалап, құрметін білдірді.
<blockquote>
 Сіздің жас ұрпақ тәрбиелеу ісіндегі еңбегіңіз өз алдына бір белес. Қырық жылға жуық өңіріміздегі іргелі оқу орнында қызмет етіп, сонымен бірге қорқыттануға, өлкетануға байланысты қыруар жұмыстарды атқардыңыз. Шығыс халқына ортақ құнды мұралардан бастап, әдебиет әлемінің бүгінгі есімдеріне дейінгі аралықты қамтыған 200 томдық «Сырдария кітапханасының» жауапты редакторы болып, жергілікті қаламгерлердің шығармаларының жарыққа шығуына атсалыстыңыз. Ел ішіндегі фольклорлық мұраларды жинақтап, ұрпағымыздың төл тарихын тануына да өлшеусіз еңбек сіңіріп келесіз. Сізге деніңізге саулық, отбасыңызға амандық тілеймін, – деді Гүлшара Әдбіқалықова.
</blockquote>
Өз кезегінде Бағдат Кәрібозұлы кездесуге шақырып, ілтипат танытқан облыс әкіміне ризашылығын білдіріп, рухани-мәдени бағыттағы келелі ұсыныстарын жеткізіп, ой бөлісті. Атап айтсақ, саңлақ жырау Базар Оңдасұлының 180 жылдық мерейтойын облыс деңгейінде атап өту және Қырымбек Елеуұлының қолдауымен басталған «Сыр өңірінің фольклорлық антологиясы» жобасына сай жинақ том шығаруды ұсынды.
Облыс әкімі Сыр елінің рухани-мәдени кеңістігінде мол мұра ретінде қалатын жинақ шығару ісін қолдайтынын және айтылған ұсыныстарға ерекше мән берілетінін айтып, бірлесіп жұмыс істеуге дайын екендігін қаперге салды.
Кездесу соңында облыс әкімі Гүлшара Әбдіқалықова ғалым, профессор Бағдат Кәрібозұлына жас ұрпақ тәрбиелеудегі шығармашылық қызметіне табыс тіледі.
Еске салайық, Бағдат Кәрібозұлы 200 томдық «Сырдария кітапханасын» жарыққа шығарумен айналысып, осы кітапхананың жауапты редакторы болды. Ғалымның басшылығымен университеттің бір топ ғалымдары Қорқыттану бағытында ғылыми-зерттеу жұмыстарын жүргізіп, 2019 жылы «Қорқыт ата туралы аңыздар мен әңгімелер» хрестоматиялық жинағы шығарылды. «Менің Отаным-Қазақстан» сериясы бойынша оның жетекшілігімен «Қазалы», «Қызылорда», «Сырдария», «Жаңақорған», «Қармақшы», «Отан үшін от кешкендер» кітаптары жарыққа шықты.

Облыс әкімі филология ғылымдарының докторы, профессор Бағдат Кәрібозұлымен кездесті

<a href="https://kyzylorda-news.kz/">Kyzylorda-news.kz</a>. Қызылорда облысында алғаш рет «Bolashak bridge» толық метраждағы фильмі түсіріліп, көрермен назарына ұсынылды.
Студенттер өмірінен сыр шертетін туындыны «Болашақ» университетінің тапсырысымен «Aslan films» студиясы таспалады. Аталмыш университет 2009 жылдан бері «Болашақ аялдамасы» атты сериал түсіріп келеді. Бұл жолғы кино туындының атауы да, шығармашылық тобы да өзгеше. Яғни, қазақша баламасы «Болашақ көпірі» деп аталады.
<blockquote>
 “Үш достың университет қабырғасында өткізген қиыншылықтары мен қызықты оқиғаларына құралған фильм алғашқы күндерден ақ көрерменнің ыстық ықыласына ие болды. Алдағы уақытта да университетіміздің ғылыми жетекшісі, экономика ғылымдарының докторы, профессор Бақберген Досманбетовтың қолдауымен өз көрермендерімізді тың дүниелермен қуантамыз. Өздеріңіз білетіндей, ҚР Президенті Қасым-Жомарт Тоқаев «Тәуелсіздік бәрінен қымбат» мақаласында «Бүгінде әлемдік киноиндустрияда тарих тақырыбындағы сценарийлерге сұраныс жоғары. Американың да, Еуропаның да айтулы оқиғалары туралы фильмдер өте көп. Қазір Netfliх, HBO және басқа да алпауыт кинокомпаниялар Азияға бет бұруда. Осы орайда біздің де шежіремізде ауқымды фильмдерге арқау болатын маңызды белестер мен оқиғалар баршылық. Мысалы, әлемдегі ең қуатты империялардың бірі болған Алтын орда тарихы дайын тұрған жоқ па?! Бұл мәселеге болашақта кино саласының мамандары баса назар аударғаны жөн», деген болатын. Бұл бағытта да жұмыс жасау жоспарда бар”, – деді «Болашақ» университетінің ректоры Қуаныш Дәуренбеков.
</blockquote>
Киноға университеттің ұстаздары мен студенттері арасында кастинг өткізіп, актерларды таңдаған.
<blockquote>
 “Біз осыған дейін төрт қысқа метражды фильм, клиптер түсірдік. Уақыт өткен сайын тәжірибе жинақтап келеміз. Әрине, барлығы кәсіби актер болмағасын түсірілім барысында аздаған қиыншылықтар болды. Бірақ ұстаздар мен студенттердің талпынысы бізді қуантты. Алға қойған жоспарларымыз өте көп. Жақсы сценарийлік жұмыстар болса біз қабылдауға дайынбыз. Өткен жылы «Аслан» балалар студиясын аштық. Мақсатымыз таланттарды іріктеу, дәріс беріп, актерлық мамандыққа бейімдеу. Бұйыртса, өз киноларымызда ойнайтын болады”, – «Aslan films» студиясының директоры Жасұлан Алдабергенов.
</blockquote>

Қазақстан және Қызылорда облысының жаңалықтары: Басты жаңалықтар old