<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықованың төрағалығымен өткен КВИ жағдайы бойынша жедел штаб отысырында аймақтағы эпидемиологиялық жағдайды жақсарту мәселелері талқыланды. Жиынға әкім орынбасарлары, бірқатар басқарма және департамент басшылары мен онлайн режимде қала, аудан әкімдері қатысты.
Аймақ басшысы өңірде вирустың тәулігіне 100-ден астам жағдайы анықталып, індеттің өрши түскенін қаперге салып, сақтық шараларын қатаң түрде күшейтуді тапсырды.
<blockquote>
 «Республика бойынша жаңа үнділік «Дельта», оған қоса «Дельта плюс» штаммы тіркеліп, қазіргі таңда біздің облысымызда кең таралуда. Жағдай өте ауыр. Былтыр осы кезеңде, облысымызда коронавирусты инфекциясынан өлім-жітім саны көп болғаны белгілі. Биылғы жылы қайтыс болған адамдардың жылдық «астары» өткізілуде және тойлар кеңінен өткізіліп жатқандығы туралы мәліметтер түсуде. Күні кеше Қызылорда қаласында орналасқан «Арнау палас», «Бақ-Сарай» мейрамханаларында отбасылық шаралар өткізілген. Дегенмен, бұл шаралар мониторингтік топтардың назарынан тыс қалған. Дәл осындай шаралар аудандар көлемінде де өткізілуде. Сондықтан мониторингтік шаралардың жұмысын қатаң түрде күшейту қажет», – деді облыс әкімі.
</blockquote>
Облыс аумағында эпидемиологиялық жағдай туралы баяндама жасаған облыстық санитарлық-эпидемиологиялық қадағалау департаментінің басшысы Динара Жаңабергенова ағымдағы жылдың наурыз айындағы мерекелік күндерден кейін сәуір айында ауру санының күрт жоғарылап, тәуліктік тіркеменің артқанын жеткізді. Мұнан бөлек, департамент басшысы әлі де екпе алмаған жекеленген санатты азаматтардың вирус жұқтыру қаупі жоғары екенін, ал ұжымдық вакцина алған қызметкерлердің аурушаңдық деңгейі төмендеп келе жатқанын тілге тиек етті. Сондай-ақ, бас мемлекеттік санитариялық дәрігер Қызылорда қаласы тұрғындарының аурушаңдық көрсеткішінің жоғары болуы себепті Қызылорда қаласы үшін жаңа қаулы қабылданып, ертеңнен бастап күшейтілген түрде сақтық шаралары енетінін хабарлады. Яғни демалыс күндері қарым-қатынасты мейлінше шектеу үшін локдаун шаралары енгізілмек.
Ал, облыстық полиция департаментінің бастығы Бектөре Сұлтан өңірдегі мониторингтік топтардың жұмысын әлдеде күшейту үшін мониторингтік топ құрамына тәжірибелі, сала басшыларын қосып, жұмыстарын жіті бақылауда қажеттігін атап өтті.
Отырыста облыстық денсаулық сақтау басқармасының басшысы Сабит Пазилов ауруханалардағы төсек орындармен қамту және жаппай вакциналау жұмыстары барысын баяндады. Жүктеменің артуына байланысты коронавирус індетін емдеуге арналған инфекциялық төсек орындар саны 3 есеге ұлғайды. Яғни 1820 төсек-орын ұйымдастырылды.
Қажетілікке қарай инфекциялық және провизорлық стационарларда төсек-орын қорын 3200-ге дейін ұлғайтуға мүмкіндік бар. Сонымен бірге 518 орны орталықтандырылған оттегімен жабдықталған. Ал, үй жағдайында ем алуға мәжбүр азаматтарға 138 дәрігерлік мобильдік топ құрылған. Мобильдік топ дәрігерлерінің науқастарға шұғыл түрде жетуі үшін облыс әкімдігі мен қала әкімдігі тарапынан қосымша көліктер қарастырылды. Облыста вакцина салынуға тиіс 401 мың тұрғын болса, соның бүгінде І компоненті бойынша 211 445 екпе алып үлгерсе, II-ші кезеңді салдыру кестеге сәйкес жүргізілуде. Бүгінгі таңда вакцинациялау 106 егу кабинетінде жүргізілуде, оған 133 мейірбике мен 89 дублер тартылған.
Басқарма басшысы аймақтағы емдеу орындарында төсек орындар қоры жеткілікті екенін айтып, кеселді уақытылы анықтап, қажетті ем-дом шараларын қабылдауға шақырды.
Жиында Гүлшара Әбдіқалықова дәрі-дәрмек мәселесінің барысын саралады. Облыстық медициналық және фармацевтикалық қадағалау департаменті басшысының міндетін атқарушы Ғалима Азирова апта сайын коронавирустық инфекцияны амбулаториялық емдеу кезінде пайдаланылатын сұранысқа ие 10 дәрілік заттың мониторингін жүргізеді. Яғни қызуды түсіретін, қабынуға қарсы, антикоагулянттардың 2 айлық қажеттілік мөлшері жасақталғанын, қажет болған жағдайда қорлар толықтырылатынын хабарлады.
Департамент басшысының есебін саралаған облыс әкімі керекті дәрілердің ауылдар мен қала шетіндегі дәріханаларға уақытылы және қажетті мөлшерде тұрақты түрде жеткізілуін қадағалауды тапсырды.
Штаб отырысында облыстық кәсіпкерлік және туризм басқармасы басшысы Фердоуси Қожабергенов «Ashyq» жобасына кәсіпкерлерді белсенді түрді тарту жұмыстарының барысын баяндады. Бүгінде 252 нысан «Ashyq»-ға енген.
Облыс әкімі қоғамдық тамақтану мен сервистік қызмет орындарында қауіпсіздікті сақтау үшін кәсіпкерлік нысандар «Ashyq» жобасына белсене қатысу қажет екенін еске салып, бұл бағытта тиісті сала басшыларына жұмысты қысқа мерзім ішінде үйлестіруді тапсырды.
Жиынды қорытындылаған аймақ басшысы облыстық санитариялық эпидемиологиялық бақылау департаментіне науқастармен қарым-қатынаста болған тұрғындарды шұғыл түрде анықтап, аурудың таралуына жол бермеуді тапсырды. Сондай-ақ, облыстық санитариялық эпидемиологиялық бақылау және полиция департаменттеріне, Қызылорда қаласы және аудан әкімдіктерімен бірлесіп күнделікті мониторинг топтардың жұмысын күшейту тапсырылды.
Аймақ басшысы облыстық денсаулық сақтау басқармасына барлық медициналық мекемелердегі құрал-жабдықтарға, төсек-орындарға күнделікті ревизия жасап, белгіленген алгоритмге сәйкес кезең-кезеңімен қайта бейімдеу және қажет болған жағдайда қосымша төсек-орындар әзірлеу мен вакцинациялау жұмыстарын қатаң түрде күшейтуді міндеттеді.
<blockquote>
 «Қазіргі таңда вакцинациялау мәселесіне басты назар аударылуы тиіс, өйткені ол ауруды жұқтырмаудың бірден-бір жолы. Мұнан бөлек, төсек орынмен қамту мен реанимациялық бөлімдерінің дайындығы аса маңызды. Сондай-ақ, үйде емделіп жатқан науқастардың толыққанды ем алуын қамтамасыз ету қажет. Жағдайын ұшықтырып алмас үшін күнделікті олардың жағдайын қадағалауды тапсырамын. Барлық жұмыстар ұйымдасқан түрде жүргізіліп, тұрақты бақылауда болсын», – деді облыс әкімі.
</blockquote>
Жедел штаб отырысында берілген тапсырмалардың орындалуын бақылау облыс әкімінің орынбасары Балжан Шаменоваға жүктелді.

Гүлшара Әбдіқалықова індетпен күрес амалдарын қатаң түрде күшейтуді тапсырды

<a href="https://kyzylorda-news.kz/">Kyzylorda-news.kz</a>. Қызылорда аймағы Конго-Қырым геморрагиялық қызбасының табиғи ошағында орналасқан. Өңірдегі 113 елді мекен қолайсыз аймаққа енген. Жыл басынан бері 288 тұрғын кене шағу бойынша медициналық көмекке жүгінген. Күдікті деп 18 жағдай есепке алынса, оның 11 жағдайы нақтыланды. Бұл туралы бүгін Өңірлік коммуникациялар қызметінде өткен баспасөз конференциясында облыстық санитариялық-эпидемиологиялық бақылау департаменті басшысының орынбасары Әлия Әбдіқайымова мәлімдеді.
Эпидмаусымның басталуына орай қолайсыз елді мекендерде аса қауіпті жұқпалы ауруға қарсы энтомолог мамандардан тұратын 3 арнайы жұмысшы топ зоологиялық барлау жұмыстарын жүргізді. Эпидемиологиялық жағдай әлі де тұрақсыз. Қызылорда қаласы, Қармақшы, Сырдария, Шиелі аудандары бойынша ошақтар белсенділігінің артуы байқалуда.
<blockquote>
 «Осы жылы 288 тұрғын кене шағу бойынша медициналық көмекке жүгінген, бұл былтырғы жылдың осы мерзімімен салыстырғанда 30 жағдайға көбейген. Конго-Қырым геморрагиялық қызбасының 11 фактісі тіркелді. Атап айтқанда, Қармакшыда – 1, Сырдария, Шиелі аудандарында-3 жағдайдан және Қызылорда қаласында 4 дерек», – деді Әлия Мүтәліпқызы.
</blockquote>
Айта кету керек, бүгінде облыстағы медициналық мекемелерде КҚГҚ-мен ауыратын науқастарды емдеу үшін вирусқа қарсы препараттар, иммундалған плазма және т.б. қажетті құрал-жабдықтар қоры жеткілікті.
Дегенмен, эпидмаусымның басталғанына қарамастан тұрғындар мал шаруашылығымен айналысқанда сақтық шараларына мән бермейді, кене шағу жағдайында дер кезінде меициналық көмекке жүгінбеу салдары аса ауыр жағдайға соқтыруы мүмкін. Әр адам өз денсаулығына барынша мұқият болуы тиіс.

Қызылордада 18 кене шағу фактісі тіркелді

<a href="https://kyzylorda-news.kz/">Kyzylorda-news.kz</a>. Қызылорданың 40 ауылдық округінде ауыл әкімдерінің сайлауы өтті. Оған 122 үміткер қатысты. Бұл туралы Өңірлік коммуникациялар қызметінде өткен баспасөз конференциясында облыстық сайлау комиссиясының төрағасы Ғалым Баймырзаев мәлімдеді.
<blockquote>
 «Еліміздің тарихында алғаш рет өткізілген ауыл әкімдерінің сайлауына 122 кандидат тіркелді. Олардың 47-і саяси партиялардан ұсынылғандар: «Nur Otan» партиясынан – 32, «Ауыл» ХДСП – 4,«Ақ Жол» ҚДП – 4, «АDAL» саяси партиясынан – 3, ҚХП – 4, өзін-өзі ұсынған – 75 кандидат. Шиелі ауданындағы Ортақшыл және Жуантөбе ауылдық округтеріндегі сайлауға тек өзін-өзі ұсынған үміткерлер қатысты. Облыс бойынша ең көп кандидат Жаңақорған ауданының Кейден ауылдық округінде тіркелген – 6 кандидат», – деді Ғалым Қонақбайұлы.
 «Сайланған 40 әкімнің 10 мемлекеттік қызметші, 22 – сол ауылдық округтің қызмет атқарып жүрген әкімдері, 5 – бюджеттік сала қызметкерлері, 3 – уақытша жұмыссыз азаматтар, 1-і әйел. Ауылдық округ әкімдерінің сайлауларын жарамсыз деп тануға немесе қайта сайлау өткізуге негіз болған жоқ. Барлық сайлау учаскелерінде заң талаптары толықтай сақталды», – деді облыстық сайлау комиссиясы төрағасының орынбасары Болат Накипов.
</blockquote>
Айта кетейік, жаңадан сайланған әкімдердің орташа жасы 46,7 құрайды, ең жасы – 27 жаста. Ал сайлаушылардың ең көп дауысын жинағаны Сұлтанов Мейрбек Арал ауданы, Бекбауыл ауылдық округінен сайлауға түскен.
Сайланған әкімдердің 35-і саяси партиялардан. Яғни, олардың қатарында «Nur Otan», «Ауыл», «ADAL», «ҚХП» партиялары бар.Сонымен қатар, өзін өзі ұсынған 5 азамат жоғарғы нәтиже жинап, ауыл әкімі атанды.

Қызылордада ауыл әкімдері сайлауының нәтижесі жарияланды

<a href="https://kyzylorda-news.kz/">Kyzylorda-news.kz</a>. Аймақта пандемия басталғалы бері коронавирус инфекциясының 9369 жағдайы тіркелді. Мәселен, соңғы тәулікте 168 дерек анықталды. Індет жұқтырғандардың басым көпшілігі облыс орталығынан тіркелуде. Оның ішінде, 14 жасқа толмаған балалардың үлесі 19-ды құрап отыр. Бұл туралы Өңірлік коммуникациялар қызметінің ақпараттық алаңында өткен брифингте облыстық санитариялық-эпидемиологиялық бақылау департаментінің басшысы Динара Жаңабергенова мәлімдеді.
<blockquote>
 «Күнделікті жүргізілетін эпидемиологиялық талдау нәтижелері көрсеткендей, COVID-19 жұқтырғандардың басым көпшілігі вакцина салдырмаған адамдар. Қазір әлемде, республикада, аймақта эпидахуал өршіп тұр. Ауруханалардағы жүктемелер саны артты, індет жұқтырғандардың басым көпшілігі ауыр халде жатыр. Былтырғы жылы аурудың симптомсыз түрі көп тіркелген болса, биыл аурудың мутациялануынан ауыр ағымда өтуде. Бұл жағдайды тұрақтандырудың жолы – ол сақтық шаралары мен вакцинация. Вакцина алу, оның қолжетімділігін қамтамасыз ету үшін барлық жағдайлар жасалған. Онлайн түрде екпеге жазылып, өз емханаңызда немесе ірі сауда орындарында ешбір кезексіз вакциналануға болады. Ауруды еңсеруге бірге күш салуға шақырамыз»,-деді Динара Жаңабергенова.
</blockquote>
1 ақпаны мен 26 шілде аралығында облыста вакцинаның 1 компонентімен 220 060 адам, 2 компонентімен – 140 309 адам екпе салдырған.
Сонымен қатар, мониторингтік топ 11 820 нысанға рейд жүргізген. Нәтижесінде карантин талаптарын бұзған 396 дерек анықталып, әкімшілік айыппұл салынды.

Қызылорда облысында індет жұқтырғандардың саны артуда

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 2381 адам коронавирус инфекциясынан жазылып шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 370,
Алматы қаласы – 416,
Шымкент қаласы – 280,
Ақмола облысы – 139,
Алматы облысы – 72,
Атырау облысы – 257,
Шығыс Қазақстан облысы – 41,
Жамбыл облысы – 25,
Батыс Қазақстан облысы – 50,
Қарағанды облысы – 186,
Қостанай облысы – 179,
Қызылорда облысы – 117,
Маңғыстау облысы – 97,
Павлодар облысы – 29,
Солтүстік Қазақстан облысы – 65,
Түркістан облысы – 58.
Қазақстан бойынша жазылғандар саны – 449377.

Қызылордада 117 адам коронавирустан жазылды

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 6637 адамнан коронавирус инфекциясы ПТР арқылы анықталды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 1510
Алматы қаласы – 1219
Шымкент қаласы – 520
Ақмола облысы – 192
Ақтөбе облысы – 255
Алматы облысы – 194
Атырау облысы – 420
Шығыс Қазақстан облысы – 139
Жамбыл облысы – 152
Батыс Қазақстан облысы – 168
Қарағанды облысы – 781
Қостанай облысы – 181
Қызылорда облысы – 168
Маңғыстау облысы – 258
Павлодар облысы – 202
Солтүстік Қазақстан облысы – 133
Түркістан облысы – 145
Жалпы ел бойынша ауырғандар саны 535906.

Қызылордада өткен тәулікте 168 адамнан коронавирус анықталды

<a href="https://kyzylorda-news.kz/">Kyzylorda-news.kz</a>.&nbsp;Токиодағы Олимпиада стадионында XXXII жазғы Олимпиада ойындарының ашылу салтанаты <a href="https://qazsporttv.kz/ru/live">басталды</a>.
Ашылу салтанаты коронавирустық пандемияға байланысты көрерменсіз өтеді. Көрермендер түрлі-түсті қойылымды, қатысушы командалардың шеруін және алаудың жағылуын тамашалай алады. Көрермендер Олимпиаданың ашылу салтанатын <a href="https://qazsporttv.kz/ru/live">мына сілтемеден</a> көре алады.

Токиода XXXII жазғы Олимпиада ойындарының ашылу салтанаты басталды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова Украина ұлттық аграрлық ғылымдар академиясының академигі Николай Безуглый бастаған украиналық делегациямен кездесіп, аграрлық саладағы, оның ішінде күріш өсіру бойынша әріптестік мүмкіндіктерін талқылады.
Кездесуге «Ы.Жақаев атындағы Қазақ күріш шаруашылығы ҒЗИ» директорының міндетін атқарушы Нурбол Аппазов, «Ер-Әлі» ЖШС директоры Әліби Бекжанов және украиналық ұйымдардың өкілдері қатысты.
Аймақ басшысы Сыр еліне арнайы келген делегаттарға алғыс айтып, Қызылорда облысы табиғи-климаттық жағдай бойынша Украинаның күріш өсіруші оңтүстік аймақтарымен ұқсас екенін атап өтті.
<blockquote>
 «Аймағымыз республика бойынша күрішке қажеттіліктің 90%-ын қамтамасыз етеді. Соңғы жылдары шаруаларымыз рекордтық өнім алып жүр. Мәселен, 2020 жылы 500 мың тоннадам астам астық жиналды, күріш өнімділігі 61,8 цн/га құрады. Одан бөлек, басты дақылымыз әлемнің 10 еліне экспортталуда», – деді Гүлшара Әбдіқалықова.
</blockquote>
Атап өтейік, өткен жылы Украинаға Қызылорда облысынан 5,8 мың тонна күріш сыртқы нарыққа жіберіліп, экспорт көлемі 1,6 млн.долларды құрады. Ағымдағы жылдың 5 айында 1.5 млн.долларға 4,4 мың тонна күріш шығарылды.
Облыс әкімі аймақта негізінде ресейлік «Янтарь», «Лидер», «Новатор» сорттарымен қатар жергілікті «Маржан», «Әй-Керім», «Сыр сулуы» өсірілетінін ескертті.
<blockquote>
 «Мұнан бөлек, өткен жылдан бастап Жалағаш ауданындағы «Ер-Әлі» шаруашылығында украиналық «Виконт», «Фагот» және «Премиум» сорттары сынамадан өтті. Нәтижесі жаман емес. Күріш өнімділігі шамасымен 90 ц/га құрады. Биыл жаңа сұрыптар 160 гектар жерге отырғызылды», – деп атап өтті аймақ басшысы.
</blockquote>
Өз кезегінде, академик Безуглый Украина күздік бидайды өсіру бойынша көшбасшы елдердің үштігінде екенін атап өтіп, бұл дақылды өңірімізде өсіруді ұсынды.
<blockquote>
 «Біз әріптестік орнатуға мүдделіміз. Жақын арада Қазақстан делегациясының Украинаға тәжірибе алмасуға келуі жоспарланған, сіздерді де елімізге келуге шақырамын. Дәнді дақылдарды өсіру технологиялары мен жоғары өнімді сұрыптармен бөлісуге дайынбыз», – деді делегация басшысы.
</blockquote>
Кездесуді қорытындылаған облыс әкімі украиналық әріптестерінің жұмысына сәттілік тілеп, тиімді өңіраралық әріптестік орнатылуына сенім білдірді.
Айта кетейік, украиналық делегация бүгін «Ы.Жақаев атындағы Қазақ күріш ҒЗИ» басшылығымен өзара әріптестік мәселелері бойынша келіссөз жүргізетін болады және ертең Қызылорда облысының ауылшаруашылық тауар өндірушілерімен кездеспек.

Облыс әкімі украиналық делегациямен аграрлық саладағы негізгі мәселелерді талқылады

<a href="https://kyzylorda-news.kz/">Kyzylorda-news.kz</a>. Жаңақорған ауданында 3000 рулон шөп өртеніп кетті.
Оқыс оқиға 21 шілде күні сағат 20:20-да ауданға қарасты М.Нәлібаев ауылдық округінде орын алды. Ауылдағы шаруа қожалықтың аумағындағы ашық алаңда жиналған шөп өртенген.
3 мың рулонды құрайтын шөптің салмағы 1200 тоннаға жуық. Оқиға орнына жеткен өрт сөндірушілер сағат 00.30 шамасында өртті толығымен сөндірді.

Жаңақорғанда 3 мың рулон шөп өртеніп кетті

<a href="https://kyzylorda-news.kz/">Kyzylorda-news.kz</a>. Арал ауданында 50 елді мекен бар. Осы елді мекендердің 39-ы яғни 78%-ы орталықтандырылған ауыз су жүйесімен қамтылса, 10 елді мекен орталықтандырылмаған көздер (скважиналар) және 1 елді мекен тасымал арқылы ауыз сумен қамтамасыз етілген. Бұл туралы бүгін Өңірлік коммуникациялар қызметінде өткен баспасөз конференциясында Арал ауданының әкімі Серік Сермағанбетов мәлімдеді.
Осы жылдың мамыр айында бастау алған Аққұлақ елді мекеніндегі ауыз су жүйелерін қайта жаңғырту және ескі су айдау стансасының ғимараты күрделі жөндеуден өткізу жұмыстары толықтай аяқталып, пайдалануға берілді.
<blockquote>
 «Бұдан бөлек Ақбасты, «Абай-Тоқабай» елді мекендерін ауыз су жүйесіне қосу үшін Су ресурстар комитетімен мемлекеттік сатып алу жұмыстары аяқталып «Сапа Құрылыс» мекемесі жеңімпаз болып анықталды. Бастапқы бөлінген қаржы 100 млн. теңге. Техникалық қадағалаушы анықталуда», – деді аудан басшысы Серік Сағитжанұлы.
</blockquote>
Сонымен бірге, Арал қаласының №5 шағын ауданының су құбыры желісінің құрылысына мемлекеттік сатып алу жұмыстары жүргізілуде. Ал, 2020 жылы жобалық-сметалық құжаттамасы әзірленген. Көктем елді мекенін ауыз суға қосу бағытында тиісті орындарға бюджеттік өтінім тапсырылды.

Арал ауданындағы 39 елді мекенге ауыз су жүйесі тартылған

<a href="https://kyzylorda-news.kz/">Kyzylorda-news.kz</a>. Аудан аумағындағы қуаңшылық салдарын еңсерумен қатар өмірмен күресте салғырттықты көтермейтін тажал індеттің де екпіні қайтпай тұр. Бұл туралы Арал ауданының әкімі Серік Сермағанбетов мәлімдеді.
<blockquote>
 «Жағдай тіптен ушығу үстінде. Қазірдің өзінде аудандағы жағдай күрт нашарлап, коронавирус дертіне шалдыққан науқастар саны 286-ға жетті. Өкініштісі сол науқастардың 1-еуі дерт салдарынан бақилық болса, тағы 4 науқас жан сақтау бөлімінде. Біз қай кезде болмасын басымызға тимесе бүкіл жаманат бізді айналып өтетіндей күйде жүретін халықпыз. Әрине мұндай жағдайда бәрі де кеш болуы мүмкін. Осы бір кеселмен күресте өмірімізге араша бола алатын вакцина салдыру екенін жұрт енді түсіне бастағандай. Қазіргі таңда аудан бойынша екпе салдырған азаматтардың саны 16 мыңнан асты(44,8 %). Бұл бағыттағы жұмыстар әлі де жалғаса беретін болады», – деді аудан әкімі Серік Сағитжанұлы.
</blockquote>
Қазіргі таңда, аудандағы провизорлық стационарда – 53 науқас ем алуда. Үй карантинінде – 44 адам болса, емделіп шыққандар саны – 188 адам.
Бүгінгі күнге дайындық төсек орны бойынша жұқпалы аурулар бөлімшесінен – 25 орын, жүйке аурулары бөлімшесінен – 100 орын дайын тұр. Қосымша А.Байтұрсынов ауылдық емханасынан – 120 орындық карантиндік стационар ашуға мүмкіндік бар.
Жалпы алғанда, аудан халқының саны 80 855 болса, орта есеппен 36337 азамат, яғни аудан тұрғындарының 44,9 пайызы вакцина егілуге жатады. Бүгінде екпе салдырған азаматтардың саны 16303-ке жетті.

Серік Сермағанбетов: Жағдай ушығып жатыр

<a href="https://kyzylorda-news.kz/">Kyzylorda-news.kz</a>. Бүгін ҚР Президенті Қасым-Жомарт Тоқаев телефон арқылы Қызылорда облысының әкімі Гүлшара Әбдіқалықованың есебін тыңдады. Мемлекет басшысы өңірдегі қазіргі санитарлық-эпидемиологиялық және әлеуметтік-экономикалық ахуалды талқылады.
Облыс әкімі Президентке коронавирус індетімен күресте жүргізіліп жатқан жұмыстар туралы есеп берді. Қазіргі кезде өңірдегі вакцина салдыруға тиісті тұрғындардың 52 пайызы екпе алды. Сонымен қатар облыс әкімі аймақтағы су шаруашылығына қатысты жағдайды да баяндады. Сырдария өзені арқылы облысқа секундына 550 текше метр су келуде. Шаруашылық субъектілеріне су беру кезегі мен оның көлемін анықтайтын жұмыс комиссиясы құрылды.
Бүгінде Арал ауданында 12 шілдеде төтенше жағдай жарияланған. Осыған байланысты Үкімет резервінен және облыстық бюджеттен жем-шөп субсидиясына, сондай-ақ, су арналарын тазартуға және ұңғымалар қазуға қаржы бөлу туралы шешім қабылданды. Мемлекет басшысы Қызылорда облысының әкіміне халықты вакциналауға қатысты ақпараттық-түсіндіру жұмыстарын күшейтуді, мұнай-газ саласындағы проблемаларды шешу үшін кешенді амал қарастыруды, сондай-ақ, Қызылорда облысына қарасты аудандардағы зардап шеккен шаруашылық субъектілеріне жем-шөп дайындауды қамтамасыз етуді тапсырды.

Қазақстан және Қызылорда облысының жаңалықтары: Басты жаңалықтар old