<a href="https://kyzylorda-news.kz/">Kyzylorda-news.kz.</a> 27 ақпан күні сағат 15:00-де Н.Бекежанов атындағы музыкалық драма театрда өтетін республикалық ақындар айтысы өтеді. Жыр додасы ұлы ақын, ағартушы Абай Құнанбайұлының 175 жылдығына орай ұйымдастырылып отыр.
Бұл айтыста бәрі айтылады, шұрайлы тіркес пен әдемі ұйқас та болады. Аламан айтысқа наркескен тілмен жыр етер, есімі елге таныс ақындар қатыспақ.&nbsp;
Қазақ өнерінің туын көкке көтерер, сөз қадірін өз қадірім деп білетін жанашыр қауым айтыстан қалыс қалмаңыз!

Қызылордада республикалық айтыс өтеді

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалының №1 қалалық бөлімінде облыстық филормония және «Ақмешіт» фольклорлық ансамблімен бірлесе мәдени шара өтті.
Ұлтымыздың ойшылы, қара өлеңнің патшасы Ұлы Абайдың 175 жылдық мерейтойы қарсаңында өткізілген мәдени шарада облыстық филармония және «Ақмешіт» фольклорлық ансамблімен бірге тұрғындардар да қосылып, Абайдың танымал әндерін шырқады.
ХҚО-ға келген қызылордықтар қызмет алумен қатар, қазақтың ұлттық аспаптарымен жанды дауыста орындалған Абай әндерін тыңдап, ерекше көңіл-күйде қайтты.
Осылайша мереке қарсаңында ұйымдастырылған мәдени шара көптің көңілінен шықты.
<img src="https://kyzylorda-news.kz/wp-content/uploads/2020/02/24sonabai2.jpg" alt="" />
<img src="https://kyzylorda-news.kz/wp-content/uploads/2020/02/24sonabai3.jpg" alt="" />

Қызылордадағы ХҚО-да Абайдың 175 жылдығына орай мәдени шара өтті

<a href="https://kyzylorda-news.kz/">Kyzylorda-news.kz.</a> Қызылордада Салихитдин Айтбаев атындағы көркемсурет галереясында «Жидебай-Бөрілі» мемлекеттік тарихи-мәдени және әдеби-мемориалдық қорық-музейінің «Абай – дана, Абай – дара қазақта» атты жылжымалы көрмесі ашылды. Жылжымалы көрме қазақтың ұлы ақыны Абайдың 175 жылдық мерейтойына арналған, деп хабарлайды ҚазАқпарат.
Көрмеге ақын тұтынған заттар, оның өмірі мен шығармашылығын насихаттайтын құнды жәдігерлер қойылды. Көрмеге келушілер ақынның өмірі мен шығармашылығына қатысты тарихи құжаттар мен архивтік деректер, құнды қолжазбалар, тұрмыста қолданған заттары, кітаптары мен фотосуреттері бар.
Көрме екі бөлімнен тұрады. Онда қазақ даласындағы медреселер тарихына қатысты жәдігерлер де жинақталған. Көпшілік Абай оқыған Семейдегі Ахмет Риза медресесі жайлы, ондағы кітаптармен де таныса алады. Этнографиялық бұйымдар да келушілер қызығушылығын туғызып отыр.
«Көрмеге келушілер Абай жайында жазылған дүниелермен де таныса алады. Олардың қатарында Тайыр Жароков пен Мұхтар Әуезовтің еңбегі мен латын әліпбиіндегі Абай жайлы кітап бар. Семейлік суретші Нұрлан Өтебаевтың Абай портреті дк көпшілікті қызықтырады деп ойлаймын», – деді Абайдың «Жидебай-Бөрілі» мемлекеттік тарихи-мәдени және әд­би-мемориалдық қорық-музейінің ғылыми қызметкері Қуат Қиықбаев.
Ұлы тұлғаның өнегелі өмірінен мағлұмат беретін көрме 1 наурызға дейін жалғасады.
<img src="https://kyzylorda-news.kz/wp-content/uploads/2020/02/24abaizattar2.jpg" alt="" />
<img src="https://kyzylorda-news.kz/wp-content/uploads/2020/02/24abaizattar3.jpg" alt="" />
<img src="https://kyzylorda-news.kz/wp-content/uploads/2020/02/24abaizattar4.jpg" alt="" />

Қызылордада Абай қолданған заттар қойылған жылжымалы көрме ашылды

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Сыр еркесі» балабақшасының кішкентай бүлдіршіндері Ұлы Абайдың 175 жылдық мерейтойының құрметіне орай өткізілген «Үкілі үміт» атты халықаралық өнер фестивалінде Гран-При иеленді.
«Бейбітшілік әлемі» халықаралық қазақ творчестволық бірлестігі ұйымдастырған халықаралық байқауда аталған балабақшаның 4-5 жас аралығындағы бүлдіршіндерінен құралған хор тобы ұлы ақын Абай Құнанбайұлының «Желсіз түнде жарық ай» әнін орындап, жеңіс тұғырынан көрінді.
12 бүлдіршіннен құралған хор тобын аталған халықаралық байқауға балабақшаның музыка жетекшілері Қазбек және Әділет Әбіләкімдер дайындап, Сыр елінің абыройын аспандатуға үлкен еңбек сіңірген.
<img src="https://kyzylorda-news.kz/wp-content/uploads/2020/02/21abaihor2.jpg" alt="" />
– Бұл байқауға бізді Қазбек және Әділет ағайлар дайындады. Үйде Бота әжем күнде қайталатып, Абай атаның әнін тез жаттауыма көмектесті. Біз достарымызбен осы әнді айтып, жеңімпаз атанғанда қатты қуандық. Бізге балабақшадағы ағай-апайларымыз қатты риза болды, – дейді осы хорда өнер көрсеткен 5 жасар Расул Шынтеміров.
Жалпы, бұл аталған балабақшадағы хор тобының алғашқы жеңістері емес. Қызылордалық бүлдіршіндер бұған дейін де көптеген республикалық, халықаралық байқаулардың жеңімпазы атанған. Мысалы, өткен жылы Алматы қаласында бүлдіршіндер арасында өткен хор байқауында Бас жүлде иеленіп, Грузияның Батуми қаласында өтетін халықаралық байқауға жолдама алған.
Айта кетейік, бүгінде Раушан Ысқақова жетекшілік ететін «Сыр еркесі» балабақшасы қалада 7 жылдан бері жұмыс жасайды. Осы уақыттың ішінде бірлігі жарасқан ұжымның тәрбиеленушілері Қызылорда облысының атын халықаралық байқауларда талай рет биіктен көрсеткен.
<img src="https://kyzylorda-news.kz/wp-content/uploads/2020/02/21abaihor3.jpg" alt="" />

Сыр бүлдіршіндері Абайға арналған халықаралық өнер фестивалінде жеңімпаз атанды (ФОТО)

Оқыған: Фариза ОМАРОВА
Мен бала күнімде естуші едім, біздің қазақ сартты көрсе, күлуші еді «енеңді ұрайын, кең қолтық, шүлдіреген тәжік, Арқадан үй төбесіне саламын деп, қамыс артқан, бұтадан қорыққан, көз көргенде «әке-үке» десіп, шығып кетсе, қызын боқтасқан, «сарт-сұрт деген осы» деп. Ноғайды көрсе, оны да боқтап күлуші еді: «түйеден қорыққан ноғай, атқа мінсе – шаршап, жаяу жүрсе – демін алады, ноғай дегенше, ноқай десеңші, түкке ыңғайы келмейді, солдат ноғай, қашқын ноғай, башалшік ноғай» деп. Орысқа да күлуші еді: «ауылды көрсе шапқан, жаман сасыр бас орыс» деп.
Орыс ойына келгенін қылады деген… не айтса соған нанады, «ұзын құлақты тауып бер депті» деп.
Сонда мен ойлаушы едім: ей, құдай-ай, бізден басқа халықтың бәрі антұрған, жаман келеді екен, ең тәуір халық біз екенбіз деп, әлгі айтылмыш сөздерді бір үлкен қызық көріп, қуанып күлуші едім.
Енді қарап тұрсам, сарттың екпеген егіні жоқ, шығармаған жемісі жоқ, саудагерінің жүрмеген жері жоқ, қылмаған шеберлігі жоқ. Өзіменен өзі әуре болып, біріменен бірі ешбір шаһары жауласпайды! Орысқа қарамай тұрғанда қазақтың өлісінің ахиреттігін, тірісінің киімін сол жеткізіп тұрды. Әке балаға қимайтұғын малыңды кірелеп сол айдап кетіп тұрды ғой. Орысқа қараған соң да, орыстың өнерлерін бізден олар көп үйреніп кетті. Үлкен байлар да, үлкен молдалар да, ептілік, қырмызылық, сыпайылық – бәрі соларда. Ноғайға қарасам, солдаттыққа да шыдайды, кедейлікке де шыдайды, қазаға да шыдайды, молда, медресе сақтап, дін күтуге де шыдайды. Еңбек қылып, мал табудың да жөнін солар біледі, салтанат, әсем де соларда. Оның малдыларына, құзғын тамағымыз үшін, біріміз жалшы, біріміз қош алушымыз. Біздің ең байымызды: «сәнің шақшы аяғың білән пышыратырға қойған идән түгіл, шық, сасық казақ», – деп үйінен қуып шығарады. Оның бәрі – бірін-бірі қуып қор болмай, шаруа қуып, өнер тауып, мал тауып, зор болғандық әсері. Орысқа айтар сөз де жоқ, біз құлы, күңі құрлы да жоқпыз. Бағанағы мақтан, бағанағы қуанған, күлген сөздеріміз қайда?
1890

Абай Құнанбайұлының екінші қара сөзі (АУДИО)

<a href="https://kyzylorda-news.kz/">Kyzylorda-news.kz</a> ақпараттық агенттігінде ұлы ақын, данышпан Абай Құнанбаевтың 175 жылдығына орай “АБАЙ-175” арнайы айдары іске қосылды. Ұлы ақынға қатысты барлық материалдар, мақалалар осы айдарда жарияланатын болады.
Ал, бүгіннен бастап Абайдың қара сөздерінің аудионұсқасын ұсынамыз.
Оқыған: Фариза ОМАРОВА
БІРІНШІ СӨЗ
Бұл жасқа келгенше жақсы өткіздік пе, жаман өткіздік пе, әйтеуір бірталай өмірімізді өткіздік: алыстық, жұлыстық, айтыстық, тартыстық – әурешілікті көре-көре келдік.&nbsp;Енді жер ортасы жасқа келдік: қажыдық, жалықтық; қылып жүрген ісіміздің баянсызын, байлаусызын көрдік, бәрі қоршылық екенін білдік. Ал, енді қалған өмірімізді қайтіп, не қылып өткіземіз? Соны таба алмай өзім де қайранмын.
Ел бағу? Жоқ, елге бағым жоқ. Бағусыз дертке ұшырайын деген кісі бақпаса, не албыртқан, көңілі басылмаған жастар бағамын демесе, бізді құдай сақтасын!
Мал бағу? Жоқ, баға алмаймын. Балалар өздеріне керегінше өздері бағар. Енді қартайғанда қызығын өзің түгел көре алмайтұғын, ұры, залым, тілемсектердің азығын бағып беремін деп, қалған аз ғана өмірімді қор қылар жайым жоқ.
Ғылым бағу? Жоқ, ғылым бағарға да ғылым сөзін сөйлесер адам жоқ. Білгеніңді кімге үйретерсің, білмегеніңді кімнен сұрарсың? Елсіз-күнсізде кездемені жайып салып, қолына кезін алып отырғанның не пайдасы бар? Мұңдасып шер тарқатысар кісі болмаған соң, ғылым өзі – бір тез қартайтатұғын күйік.
Софылық қылып, дін бағу? Жоқ, ол да болмайды, оған да тыныштық керек. Не көңілде, не көрген күніңде бір тыныштық жоқ, осы елге, осы жерде не қылған софылық?
Балаларды бағу? Жоқ, баға алмаймын. Бағар едім, қалайша бағудың мәнісін де білмеймін, не болсын деп бағам, қай елге қосайын, қай харекетке қосайын? Балаларымның өзіне ілгері өмірінің, білімінің пайдасын тыныштықпенен керерлік орын тапқаным жоқ, қайда бар, не қыл дерімді біле алмай отырмын, не бол деп бағам? Оны да ермек қыла алмадым.
Ақыры ойладым: осы ойыма келген нәрселерді қағазға жаза берейін, ақ қағаз бен қара сияны ермек қылайын, кімде-кім ішінен керекті сөз тапса, жазып алсын, я оқысын, керегі жоқ десе, өз сөзім өзімдікі дедім де, ақыры осыған байладым, енді мұнан басқа ешбір жұмысым жоқ.
1890

Абай Құнанбайұлының қара сөздері (АУДИО)

<a href="https://kyzylorda-news.kz/">Kyzylorda-news.kz.</a> Тұңғыш рет Қызылордада облыстық мәдениет, архивтер және құжаттама басқармасының ұйымдастыруымен Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейінің «Абай – дана, Абай – дара қазақта» атты жылжымалы көрмесі өтеді.
Мәдени шараның мақсаты Абай Құнанбайұлының 175 жылдығына орай хәкім Абайдың бай мұрасын насихаттау, облыс жұртшылығына таныстыру.
Сыр халқы көрмеден Ұлы тұлғаның өмірі мен шығармашығлығына қатысты тарихи құжаттармен, архивтік деректермен, құнды қолжазбаларымен, Абайдың әкесі туралы жазған өлеңдерінің үзінділерімен, Абай оқыған Семей қаласындағы Ахмет Риза медресесі туралы деректермен, ақынның тұрмыста қолданған заттарымен таныса алады.
Көрменің ашылуы 2020 жылғы 21 ақпан күні сағат 11.00-де С.Айтбаев атындағы көркемсурет галереясында болады.
Айта кетейік, көрме 1 наурызға дейін жалғасады.

Қызылордалықтар Абай музейін тамашалай алады

<a href="https://kyzylorda-news.kz/">Kyzylorda-news.kz.</a> Қазақтың ұлы ақыны әрі ағартушысы Абайдың 175 жылдық мерейтойына орай 21 ақпанда Түмен облысының Есіл қаласында қазақ тілін оқытатын сынып ашылады. Сыныпқа Абай есімі берілмек, деп хабарлайды <a href="https://www.inform.kz/kz/reseydin-esil-kalasynda-abay-atyndagy-kazak-tili-synyby-ashylady_a3614725">ҚазАқпарат</a>.
<blockquote>
 «Ресейде, әсіресе Түмен облысында тұрып жатқан қазақтар үшін Абай шығармалары мен мұрасы өте маңызды. Түмендік жастар үлкендерге, еңбекке құрмет көрсету, отбасы мен дәстүрге қамқорлықпен қарау бағытында тәлім-тәрбие алып жатыр. Бұған қоса, Абайдың ұлы – Әддірахманның 1886-1889 жылдары Түмендегі Александровск училищесінде білім алуының да біздер үшін маңызы өте жоғары. Ол Түменге 18 жасында келген. Тіпті Абайдың өзі де қаламызға, баласына келіп-кетуі мүмкін. Қазір мұрағат материалдарын зерделеп жатырмыз», – деді Ресейдің Түмен облыстық қазақтардың ұлттық-мәдени автономиясының төрағасы Есенғали Ибраев.
</blockquote>
Оның атап өтуінше, биыл Түмен облыстық қазақтардың ұлттық-мәдени автономиясы өткізетін барлық ірі шаралар Абайдың 175 жылдық мерейтойына арналатын болады.
<blockquote>
 «Түмен облысында Абайдың 175 жылдық мерейтойы аясында қазақ мәдени күндері, Түмен облысы қазақтарының құрылтайы, қазақ шығармашылығына арналған «Жас ұрпақ» ІІ облыстық балалар фестиваль-конкурсы өткізіледі. Сонымен қатар ұлы ақынның шығармалары мен мұрасын насихаттауға арналған «Абай оқулары» ұйымдастырылады. Ал 2020 жылдың 21 ақпанында, Халықаралық ана тілі күнінде Абайдың 175 жылдық мерейтойының құрметіне орай Түмен облысының Есіл қаласында қазақ тілін оқытатын сынып ашуды жоспарлап отырмыз. Сынып қазақтың ұлы ақыны әрі ағартушысы Абай есімімен аталатын болады», – деді Е. Ибраев.
</blockquote>
Ол Түмен облыстық қазақтардың ұлттық-мәдени автономиясы өңірде бұған дейін де оқушылар мен жастарға ана тілдерін оқытатын сыныптарды ұйымдастырғандығын айтты.
<blockquote>
 «Бұл Түмен облысында ашылған төртінші сынып болмақ. Сыныптар Түмен облыстық қазақтардың ұлттық-мәдени автономиясы бастамасымен және Түмен облыстық үкіметінің, жергілікті атқарушы органдардың қолдауымен құрылып жатыр. Алдағы міндет – балаларды ана тілдерінде сөйлеуге және жазуға ғана үйретіп қоймай, туған халқының, оның ұлы тұлғаларының тарихымен таныстыру», – деді Е.Ибраев.
</blockquote>

Ресейдің Есіл қаласында Абай атындағы қазақ тілі сыныбы ашылады

<a href="https://kyzylorda-news.kz/">Kyzylorda-news.kz.</a> Биыл Абай Құнанбайұлының 175 жылдығына орай Қызылорда облысында да мәдени-танымдық шаралар ұйымдастырылады. Жыл бойы өткізілетін іс-шаралар туралы бүгін Өңірлік коммуникациялар орталығында өткен баспасөз конференциясында Қызылорда облыстық мәдениет, мұрағаттар және құжаттама басқармасының басшысы Мира Абуова айтты.
Ұлы ақынның 175 жылдығына орай өткізілетін шаралар тізіміне тоқталсақ.
<ul>
<li>Мен жазбаймын өлеңді ермек үшін» атты Абай өлеңдері мен қара сөздерін мәнерлеп оқу шеберлері мен концерт жүргізушілердің облыстық конкурсы;</li>
<li>«Қанат жайған руханият» атты көрме;</li>
<li>Абайдың «Жидебай-Бөрілі» мемлекеттік қорық-музейінің «Абай – дана, Абай – дара қазақта» атты Қызылорда қаласындағы жылжымалы көрмесінің ашылуы;</li>
<li>«Даналыққа құрмет, ерлікке тағзым» республикалық ақындар айтысы;</li>
<li>Е.Төлеубайдың «Абай» драмасы;</li>
<li>Абай оқулары;</li>
<li>«Абай әлемі» кітап фестивалі;</li>
<li>А.Жұбанов, Л.Хамиди «Абай» операсынан үзінді қою (концерттік нұсқасы);</li>
<li>«Ұлы дала ырғақтары» атты Абай әндеріне қойылған облыстық би байқауы;</li>
<li>«Көзімнің қарасы» атты облыстық вокалистер конкурсы;</li>
<li>«Ұлы халықтың – Ұлы Абайы», «Абай дара, Абай дана қазақта», «Әлемге танылған Абай», «Кемеңгерліктің биік шыңы – Абай», «Асыл сөзді іздесең, Абайды оқы ерінбе» атты кітап көрмелері мен әдеби кештері;</li>
<li>Тұрмағамбет атындағы халық аспаптар оркестрінің «Абайдың ән әлемі» атты концерті өтеді.</li>
</ul>
<img src="https://kyzylorda-news.kz/wp-content/uploads/2020/02/10madenisharalar2.jpg" alt="" />

Абайдың 175 жылдығы: Қызылордада қандай мәдени-танымдық шаралар ұйымдастырылады?

<a href="https://kyzylorda-news.kz/">Kyzylorda-news.kz.</a> &nbsp;Қызылорда қаласындағы Достық үйінде «Абай қазынасына саяхат» клубының тұсаукесері болып өтті. Клубқа 35&nbsp; адам мүше болып қабылданды.
Қызылорда облыстық Қазақстан халқы ассамблеясының ұйымдастыруымен өткен мазмұнды шараға филология ғылымының кандидаты, доцент, абайтанушы Сара Бақтиярқызы, ұлы ақынның 200 өлеңін жатқа білетін жас филолог Елена Пак, Қоғамдық келісім кеңесінің мүшесі Александр Абанин, Абайдың бейнесін әсем бейнелейтін жас қылқалам шебері Жайна Балықбаева, Назарбаев Зияткерлік мектебінің мұғалімі Меруерт Маратова, өзге де Абай шығармасын сүйетіндер және БАҚ өкілдері қатысты.
Тағылымы мол шараны «Қоғамдық келісім» КММ аға сарапшысы, клуб жетекшісі Шакизат Абдраманова және Қорқыт ата атындағы ҚМУ «Филология» факультетінің студенті Елена Пак жүргізді.
Ең бірінші клубтың мақсат-міндеттері, алдағы жұмыс-жоспарлары таныстырылды.
Клубтың ашылуымен құттықтай отырып, ұлы Абайдың шығармашылығы туралы абайтанушы Сара Бақтиярқызы сөз сөйледі. Абай мұрасы бүгінгі жас буын барда өлмейді, өшпейді дей келе, бүгінгі клуб мүшелігіне қабылданған барша&nbsp; Абай сүйер қауымға Абайдай дананың кәусар бұлағынан сусындап мәңгі жасап, мәңгі жаңара беріңдер деп ақ тілегін тіледі.
Абайдың Пушкин, Лермонтовпен ұштастырған бейнесі жөнінде Қоғамдық келісім кеңесінің мүшесі Александр Абанин ой бөлісті.
Танымдық шарада клуб мүшелері караокемен «Көзімнің қарасы» әнін әсем орындап, көңіл тебірентті.
Абай – ұлттық мәдениетіміз бен тарихымыздағы ерекше тұлға екенін барлығымыз білеміз. Біртуар қайталанбас тұлғаның адамзаттық, ақындық, халықтық мұрасы айтылар ойға сыймас, қыр-сыры мол дүние. Осы ретте қатысушылар ұлы ақын жайлы білімдерін ортаға салып, қойылған сұрақтарға жауап берді. Үлкені де кішісі де зор қызығушылықпен қатысты.
Әлеуметтік желіден клубтың ашылуы жөніндегі хабарландыруды көрген жас өрендердің, Абайға жүрегі&nbsp; жақын&nbsp; жандардың ақын шығармаларынан үзінділері және Абайға арналған ұрандары тыңдалды.
Сонымен бірге, «Сыр қамқоры» балабақшасынан бүлдіршіндер келіп, клубтың ашылуына орай арнайы әзірлеген қойылым қойды. Көрермендер тарапынан өнерлі бүлдіршіндерге деген қошемет толассыз болды.
Тұсаукесерде&nbsp; ұлы ақының бейнесін өзіндік танымы арқылы бейнелеп көрсеткен жас қылқалам шебері Жайна Балықбаеваға қатысушылардың ілтипаты ерекше болды.
Клубтың соңында мүшелікке қабылданған 35 адамға арнайы әзірленген «Абай клубының мүшесі» куәлігі табысталды.
Динара МАХАНОВА
<img src="https://kyzylorda-news.kz/wp-content/uploads/2020/02/10abaikluby2.jpg" alt="" />
<img src="https://kyzylorda-news.kz/wp-content/uploads/2020/02/10abaikluby3.jpg" alt="" />
<img src="https://kyzylorda-news.kz/wp-content/uploads/2020/02/10abaikluby4.jpg" alt="" />
<img src="https://kyzylorda-news.kz/wp-content/uploads/2020/02/10abaikluby5.jpg" alt="" />

Қызылордада оқырмандарға арналған Абай клубы ашылды

<a href="https://kyzylorda-news.kz/">Kyzylorda-news.kz.</a> &nbsp;Чех жазушысы Абайдың қара сөздерін туған тіліне аударып жатыр,&nbsp;деп хабарлайды <a href="https://24.kz/kz/zha-aly-tar/o-am/item/372747-abajdy-ara-s-zderi-chekh-tilinde-basyp-shy-arylady">«Хабар 24»</a>.
Владислав Кучик ұзақ уақыт Қазақстан мен қазақ әдебиетін зерттеп келеді. Айтуынша, алғаш рет кемеңгер ақынымыз туралы Прагада оқитын қазақ студенттерінен естіпті. Бірақ Абай шығармашылығымен жақынырақ танысқысы келгенде, чех тіліндегі туындыларын тапқан жоқ. Осыған байланысты өлеңдері мен қара сөздерін туған тіліне аударып, кең жұртшылыққа таныстыру ойы келді. Владислав Кучик өз қара сөздерден бастауды ұйғарды. Абайдың қағидалары жерлестеріне де өте қызық болар деп санайды. Жазушы бұл аудармасын тамыз айында аяқтауды көздеп отыр. Ал күзде Қазақстан елшілігінің қолдауымен бұл кітаптің ресми тұсаукесері өтеді.
<blockquote>
 «Абайдың чех тіліндегі туындыларын іздеп, антиквар дүкенінде 1969 жылы шыққан жалғыз кітапты таптым. Оның шығармашылығы мені шынымен қызықтырады. Абай 19-ғасырда достық, адамгершілік пен адам баласына тән жаман қылықтар туралы жазған. Қанша уақыт өтсе де, бұл қағидалары мен ақылдары әлі күнге дейін өзекті», – дейді жазушы Владислав Кучик.
</blockquote>

Абайдың қара сөздері чех тілінде басып шығарылады

<a href="https://kyzylorda-news.kz/">Kyzylorda-news.kz.</a> Әлемнің 29 мемлекетімен&nbsp;байланыс орнатқан облыстық Пушкин атындағы кітапхана Абайдың мұрасын&nbsp;жинауда, деп хабарлайды <a href="https://baq.kz/news/othernews/abay-175-a-ynny-m-rasy-lemnen-zhinaluda/">Baq.kz</a>.
Жақын және алыс шетелдердегі орталық кітапханалармен байланыс орнатқан Шығыс Қазақстан облыстық кітапхана қызметкерлері электронды кітап қорын Абайдың шығармаларымен толықтыруды бастап кетті.
<blockquote>
 «Әлемнің 29 мемлекеті біздің бастамамызға үн қосып, өздерінің кітапхана қорларындағы Абай Құнанбаев туралы бар мәліметтерді беруде. Олардың көпшілігі&nbsp;материалдардың электронды нұсқаларын табыстаса, Моңғолия, Қытай және Литва сияқты мемлекеттер өз тілдерінде жарық көрген “Абай жолы”&nbsp;романдарының қағаздағы нұсқаларын берді. Оларды сканерлеп кітапхананың электронды қорына қостық, ал кітаптағы нұсқаларын өзіміздің кітап қорына қойдық», – дейді Пушкин атындағы облыстық кітапхананың өлкетанушы-библиографы Зиза Сіләмова.
</blockquote>
Осылайша әр адам ғаламтор арқылы “Абай жолы”&nbsp;роман-эпопеясының әлемнің 29&nbsp;тілдегі нұсқасын оқуға мүмкіндік алды. Абайдың өмір жолын баяндайтын романды өзге&nbsp;тілде оқығыңыз келсе не істеуге болады? Ол үшін кітапхананың оқырманы болу міндетті.
Смартфоныңыздағы арнайы қосымша арқылы QR-кодпен кіріп романның өзбек, тәжік, парсы және басқа да тілдеріндегі нұсқаларын оқи бересіз.
<blockquote>
 «Абайдың мұрасын әлем бойынша&nbsp;жинағаннан кейінгі библиографиялық жұмыстар таза біздің кітапхана қызметкерлерінің мойнында болды. “Біздің Абай” жобасы өте ауқымды. Оның ішінде жалғыз Абай туралы немесе Абайдың жазған кітаптары ғана емес, сонымен қатар Абай туралы әлемнің басқа елдерінде қандай сайттар бар, қандай&nbsp;мақалалар шықты, ақынның қанша ескерткіші бар осының барлығы біздің сайтмызға енгізілген», – деді Зиза Мұхтарханқызы.
</blockquote>
Кітапхана төрінде орын тепкен “Адамзаттың Абайы”&nbsp;көрмесін де бірнеше бөлікке бөліп ақынның түрлі қасиеттеріне орай “Абай ағартушы”, “Абай – гумманист-философ”, “Абай – аудармашы”, “Абай – композитор”&nbsp;деп атаған екен.
<blockquote>
 «Ақынның ұстаздық, пәлсапалық, аудармашылық өнерлеріне орай біз көрмені&nbsp;бірнеше бөлікке бөліп, көпшілікке ұсынуды жөн көрдік. Өйткені оның қара сөздері мен&nbsp;шығармаларында қаншама пәлсапалық ойлар жатыр. Ол Пушкин мен Лермонтовты&nbsp;аударып, қазақ даласына әкелді. Абайдың ақындық қасиеттерінен бөлек оның әндері&nbsp;қаншама. Біз оның өз әндеріне әуенді өзінің жазғанын біле бермейміз. Осынысынан-ақ&nbsp;оның композиторлық қасиетін танимыз. Абайдың артында үш бірдей күй қалғанын&nbsp;көпшілік білмейді. Міне сондықтан біз ұлы ойшылдың көрмесін оның түрлі қасиеттеріне&nbsp;қарай бірнеше бөлікке бөлдік», – деп қосты Зиза Сіләмова.
</blockquote>

Қазақстан және Қызылорда облысының жаңалықтары: АБАЙ-175