Оқыған: Фариза ОМАРОВА
<a href="https://kyzylorda-news.kz/">Kyzylorda-news.kz.</a> Әрбір байқаған адам білсе керек: күлкі өзі бір мастық екенін, әрбір мас кісіден ғафил көп өтетұғынын да, әрбір мастың сөйлеген кезінде бас ауыртатұғынын. Бұлай болғанда, күлкіге салынған кісі не шаруадан, не ақылдан, не бір ұят келерлік істен құр, ғафил көп өткізіп отырса керек. Осындай ғафилдік көп өткізіп, өлмеген кісінің не дүниеде, не ахиретте басы бір ауырмай қалмаса керек.
Әрбір уайым-қайғы ойлағыш кісі не дүние шаруасына, не ахирет шаруасына өзгеден жинақырақ болса керек. Әрбір жинақылықтың түбі кәніш болса керек. Енді олай болғанда, үнемі уайым-қайғыменен жүре аламыз ба? Үнемі күлмей жүруге жан шыдай ма екен? Жоқ, мен үнемі уайым-қайғыменен бол демеймін. Уайым-қайғысыздығыңа уайым-қайғы қыл дағы, сол уайым-қайғысыздықтан құтыларлық орынды харекет табу керек һәм қылу керек. Әрбір орынды харекет өзі де уайым-қайғыны азайтады, орынсыз күлкіменен азайтпа, орынды харекетпен азайт!
Шығар есігін таба алмай, уайым-қайғының ішіне кіріп алып, қамалып қалмақ, ол өзі де – бір антұрғандық. Және әрбір жаман кісінің қылығына күлсең, оған рахаттанып күлме, ыза болғаныңнан күл, ызалы күлкі – өзі де қайғы. Ондай күлкіге үнемі өзің де салынбассың, әрбір жақсы адамның жақсылық тапқанына рахаттанып күлсең, оның жақсылықты жақсылығынан тапқандығын ғибрат көріп күл. Әрбір ғибрат алмақтың өзі де мастыққа жібермей, уақытымен тоқтатады. Көп күлкінің бәрін де мақтағаным жоқ, оның ішінде бір күлкі бар-ау, құдай жаратқан орныменен іштен, көкіректен, жүректен келмейді, қолдан жасап, сыртыменен бет-аузын түзеп, бай-бай күлкінің әнін сәндеп, әдемішілік үшін күлетін бояма күлкі.
Адам баласы жылап туады, кейіп өледі. Екі ортада, бұ дүниенің рахатының кайда екенін білмей, бірін-бірі аңдып, біріне-бірі мақтанып, есіл өмірді ескерусіз, босқа, жарамсыз қылықпен, қор етіп өткізеді де, таусылған күнде бір күндік өмірді бар малына сатып алуға таба алмайды.
Қулық саумақ, көз сүзіп, тіленіп, адам саумақ – өнерсіз иттің ісі. Әуелі&nbsp;құдайға сыйынып, екінші өз қайратыңа сүйеніп, еңбегіңді сау, еңбек қылсаң, қара жер де береді, құр тастамайды.

Абай Құнанбайұлының төртінші қара сөзі (АУДИО)

<a href="https://kyzylorda-news.kz/">Kyzylorda-news.kz.</a> Қазақтың бірінің біріне қаскүнем болмағының, бірінің тілеуін бірі тілеспейтұғынының, рас сөзі аз болатұғынының, қызметке таласқыш болатұғынының, өздерінің жалқау болатұғынының себебі не?&nbsp;Һәмма ғаламға белгілі данышпандар әлдеқашан байқаған: әрбір жалқау кісі қорқақ, қайратсыз тартады; әрбір қайратсыз қорқақ, мақтаншақ келеді; әрбір мақтаншақ қорқақ, ақылсыз, надан келеді; әрбір ақылсыз надан, арсыз келеді; әрбір арсыз жалқаудан сұрамсақ, өзі тойымсыз, өнерсіз, ешкімге&nbsp; достығы&nbsp; жоқ жандар&nbsp; шығады.
Мұның бәрі төрт аяқты малды көбейтеміннен басқа ойының жоқтығынан, өзге егін, сауда, өнер, ғылым – солар секілді нәрселерге салынса, бұлай болмас еді. Әрбір мал іздеген малым көп болса, өзімдікі де, балаларым да малды болса екен дейді. Ол мал көбейсе, малшыларға бақтырмақ, өздері етке, қымызға тойып, сұлуды жайлап, жүйрікті байлап отырмақ. Қыстауы тарлық қылса, арызы жеткендік, сыйы өткендік, байлық қызметінен біреудің қыстауын сатып алмақ, ептеп алмақ, тартып алмақ. Ол қыстауынан айырылған және біреуге тиіспек, я болмаса орынсыздығынан елден&nbsp; кетпек – әр қазақтың ойы осы.
Осылар біріне бірі достық ойлай ала ма? Кедей көп болса, ақысы кем болар еді, малдан айырылғандар көбейсе, қыстауы босар еді деп, мен ананы кедей болса екен деп, ол мені кедей болса екен деп, әуелде ішімізбен қас сағындық. Әрі-беріден соң сыртымызға шықты, жауластық, дауластық, партияластық. Осындай қастарға сөзім өтімді болсын және де ептеп мал жиюға күшім жетімді болсын деп, қызметке&nbsp; болыстық,&nbsp; билікке&nbsp; таластық.
Сонан соң не момынның баласы бөтен жаққа шығып, еңбек қылып, мал іздемейді, егін, сауданың керегі жоқ болады. Өз басын өзі осындай таласпенен кісі көбейтеміз деп партия жиғандардың бүгін біреуіне, ертең біреуіне кезекпен сатады да жүреді. Ұрылар тыйылмайды. Ел тыныш болса, оның ұрлығын ешкім сүйемес еді. Ел екі жар болған соң, кім ант ішіп ақтап, арамдығын жақтап, сүйеймін десе, соған жақ болып сүйеніп, бұрынғыдан ұрлығын әлденеше есе асырады.
Елдегі жақсы адамдардың бәрінің үстінен бекер, өтірік «шапты, талады» деген әртүрлі уголовный іс көрсетіп, арыз береді. Оған дознание – тергеу шығарады. Өтірік көрмегенін көрдім деуші куәлар да әлдеқашан дайындап қойылған, бағанағы жақсы адам сайлауға жарамасы үшін. Ол адам басын құтқармақ үшін жамандарға жалынса, оның да адамдығының кеткені, егер жалынбаса, тергеулі, сотты адам болып, ешбір қызметке жарамай, басы қатерге түсіп өткені. Ол болыс болғандар өзі&nbsp; қулық, арамдықпенен болыстыққа жеткен соң, момынды қадірлемейді, өзіндей арам, қуларды қадірлейді, өзіме дос болып, жәрдемі тиеді деп, егер қас болса, бір түрлі өзіме де залал жасауға қолынан&nbsp; келеді деп.
Осы күнде қазақ ішінде «ісі білмес, кісі білер» деген мақал шықты. Оның мәнісі: «ісіңнің түзулігінен жетпессің, кісіңнің амалшы, айлалылығынан жетерсің» деген сөз. Үш жылға болыс сайланады. Әуелгі жылы «Сені біз сайламадық па?» деп елдің бұлданғандығымен күні өтеді. Екінші жылы кандидатпенен аңдысып күні өтеді. Үшінші жылы сайлауға жақындап қалып, тағы болыс болып қалуға болар ма екен деп күні өтеді. Енді несі қалды? Осы қазақ халқының осындай бұзықшылыққа тартып, жылдан жылға төмендеп бара жатқанын көрген соң, менің ойыма келеді: Халықтың болыстыққа сайлаймын деген кісісі пәлен қадәрлі орысша образование алған кісі болсын. Егер де орталарында ондай кісісі жоқ болса, яки бар болса да сайламаса, уезный начальник пенен военный губернатордың назначениесімен болады десе, бұл халыққа бек пайдалы болар еді. Оның себебі: әуелі – қызметқұмар қазақ балаларына образование беруге ол да – пайдалы іс, екінші – назначениемен болған болыстар халыққа міндетті болмас еді, ұлықтарға міндетті болар еді.
Уә және назначение қылғанда тергеуі, сұрауы барлығына қарамаса, өтірік арыз берушілер азаяр еді, бәлки жоғалар еді. Уә және әрбір болыс елде старшина басы бір би сайланғандық, бұл халыққа көп залал болғандығы көрініп, сыналып білінді. Бұл билік деген біздің қазақ ішінде әрбір сайланған кісінің қолынан келмейді. Бұған бұрынғы «Қасым ханның қасқа жолын, Есім ханның ескі жолын», Әз Тәуке ханның Күлтөбенің басындағы күнде кеңес болғанда «Жеті жарғысын» білмек керек. Әм, ол ескі сөздердің қайсысы заман өзгергендікпенен ескіріп, бұл жаңа заманға келіспейтұғын болса, оның орнына татымды толық билік шығарып, төлеу саларға жарарлық кісі болса керек еді, ондай кісі аз, яки тіпті жоқ.
Бұрынғы қазақ жайын жақсы білген адамдар айтыпты: «Би екеу болса, дау төртеу болады» деп. Оның мәнісі – тақ болмаса, жұп билер таласып, дау көбейте береді дегенмен айтылған сөз. Өйтіп би көбейткенше, әрбір болыс елден толымды-білімді үш-ақ кісі билікке жыл кесілмей сайланса, олар түссе, жаманшылығы әшкере білінгендікпенен түссе, әйтпесе түспесе.
Ол билерге даугер адамдар қалмай, екеуі екі кісіні билікке таңдап алып, үстіне біреуді посредникке сайлап алып, біте берсе; егер оған да ынтымақтаса алмаса, бағанағы үш бидің біреуін алып, яки жеребемен сайлап алып жүгінсе, сонда дау ұзамай, бітім болар еді.
1891

Абай Құнанбайұлының үшінші қара сөзі (АУДИО)

<a href="https://kyzylorda-news.kz/">Kyzylorda-news.kz.</a> Қызылорда облысы бойынша ҚАЖ департаментіне қарасты ЗК-169/5 мекемесінің ұйымдастыруымен қалалық А.Пушкин атындағы кітапханада Ұлы ақынға арналған «Абай-Ұлы тұлға» атты кеш өтті.
Кітапхана қызметкері Қарлығаш Мәжитханқызы мекеме қызметкерлеріне Абай шығармаларының танымдық мәнімен бірге ұлттық әдебиет пен мәдениетті, ана тілін өркендетуге қосқан үлесін таныстырды.
&nbsp;Кеште ақынның өмірі мен шығармашылығынан бейнебаян көрсетіліп, ЗК-169/5 мекемесінің қызметкерлері ақынның қара сөздері мен өлеңдерін оқыды.&nbsp; Кеш&nbsp;соңында&nbsp; Абай Құнанбайұлының өмірі мен шығармашылығы жөнінде сұрақтар қойылып, «Көзімнің қарасы»&nbsp;әнін бірге орындады.
<img src="https://kyzylorda-news.kz/wp-content/uploads/2020/03/twzetw-mekemesi-abaj-175-zhyldyghy-scaled.jpg" alt="" />

Қызылордадағы түзету мекемесінде Абайдың 175 жылдығына арналған кеш өтті

<a href="https://kyzylorda-news.kz/">Kyzylorda-news.kz.</a> «Елу жылда ел жаңа, жүз ­жылда қазанды» мен айтпасам да сүйегіме сіңісті Атасөз. Абайдан бері қазақ қауымы (қоғамы деңіз) үш жаңаның басын қайырып, бір қазанды қылғытып, екіншісіне аяқ басқалы қашан. Бүкіл адамзаттың ұлы ақыны аңсағандай не өзгерді? Уақыт сынаптай асау мінез танытып, сырғып өтіп жатыр. Парақорлық пен жемқорлық асқынды. Дүниеқоңыздық пен ашкөздік жайлады. Көптеген ұлттық құндылықтар көз жаздырды. Жуан жіңішкерді, жіңішке үзілді. Жер шұрық-тесік болып саудаға салынды. Өркениет өңмеңдеп, жаhандану жағаға жармасты.
Сол қазақ әлі өмір көшін түзете алмай салпақтап, сүйретіліп келеді. Келешектен үміт үзгісі келмейді. Көкейкесті мәселе азаюдың орнына, көбейіп бара жат­қандай. Енді бұлардың бәрін қайтіп жуып-шая аламыз?! Барған сайын адам да, заман мен заң да бұзылып барады. Соның бәріне тосқауыл қойылатын шығар деген сенім мол. 
Президент Қасым-Жомарт Кемелұлы Тоқаев қазір қоғамда қызу талқыланып жатқан «Абай және XXI ғасырдағы Қазақстан» атты бағдарламалық-бағдаршамдық мақаласын көпшілікке ұсынды: ­«…­Абай мұрасының тигізер пайдасы зор деп есептеймін. Ұлы ақынның шығармалары бүгін де өзектілігін жоғалтқан жоқ. Абайдың ой-тұжырымдары баршамызға қашан да рухани азық бола алады» деп атап көрсетсе, тағы бір орайда: «Нағыз Абайды, шын Абайды тану үшін оның өлеңдері мен қара сөздерінде айтылған ой-тұжырымдардың мән-маңызы ашылуы керек» дейтін лебіз білдіреді. Иә, Абайды барынша жан-жақты білу, зерделеу, зерттеу менің, сенің және оның – бәріміздің де азаматтық парызымыз. Бізге Абай зәру емес. Оның бізге аса керек екенін уақыт дәлелдеп келеді. 
Абай қашан да Абай. Ол кешеден бүгінге, бүгіннен болашаққа батыл қарап тұр. Көзқарасы өткір. Өңменіңнен өтеді. Жасаураған ­жанарынан ой оты ұшқындайды. Біз пақырды аяп, мүсіркеп қарайтындай. Ол ақын емес, Жамбыл айтқандай, Пайғамбар!.. 
Кім тықақтап тіркеп, есептеп ­жатыр. Егер кейбір мағлұматтарға сенсек, соңғы ширек ғасырда елімізде докторлар мен кандидаттар саны екі есеге өсіпті. Оның елу екі пайызын нәзік жандылар құрайды. Мейлі ғой. Ешқандай қызғаныш жоқ. Сан сапаға айналып жатса, қанекей, бөркімізді аспанға атпаймыз ба? Бірақ, бұл жағымсыз құбылыстың, тұралап қалған қазақ ғылымына тигізетін теріс ықпалы алаңдатады. Соның аясындағы ­абайтану ғылымы да қара үзіп, одан онша алыстай қойған жоқ. Абайшылдар бұл тақырыпқа жапа-тармағай жабыла атсалысып, азды-көпті үлес қосып жатқанда, әсіресе, мұрағатшыл ­профессор Б.Нәсенов бұдан бірнеше жыл бұрын ашқан жаңалығын қайта жаңғыртып, ортаға салады: «Ұлы ақынымызға қатысты тосын ­деректер болды. Сол кезінде үлкен шу туғызып, кейін ­мойындалды (?). Оны мен Омбы архивінен ­таптым. Еңбектенген адам әйтеуір бір жаңалық табады. Мәселен, Абайдың 1843 жылы туғанын, бірнеше жыл би-болыс болып билік еткенін, үш әйелінен он сегіз баласы болғанын және алты жыл жабылған жаладан дертті болып, үйқамақта отырғанын таптым. Оны мен шығарғаным жоқ, архив құжаттары айтты. Ділдәнің азан шақырып қойған шын аты – Тілді екенін де таптым. Абайдың Санкт-Петербургтен арнайы ­Семейге келген архиереймен айтысы, оның осы сапары кезінде мұсылмандарды христиан дініне кіруге және Ресей империясының заңына бағынуға үгіттегендігін, оған Абайдың тойтарыс бергенін, құжаттар арқылы дәлелдеп бердім». Үлкен мерейтой келе жатқанда бұндай ауажайылушылыққа қалай жол беріледі?
Біз бұл бағыттағы ақжолтай хабарға сүйіншілеп қуанатынымыз аз әлі. Озық зерттеушілер тобына нағыз абайтанушы келгенін неге құттықтамаймыз. Ғалым Тұрсын Жұртбаевтың ізденістері жемісті. Салада біраздан бері бұндай жанашыр дауыс естілген жоқ. Ол да хәкім Абайдың (Ибраhимнің) туған күні даулы болып, 15 маусым, 23,29 шілде, 8,10,15,23 тамыз көрсетіліп, ақыры 1940 жылы Мұхтар Әуезов, Әрхам Ысқақов, Қайым Мұхамедханов үшеуінің бір уағдаға тоқтап, абыз ақынның зиратының басына дүниеге келген күнін 10 тамыз, 1845 жыл, бақиға аттанғаны 23 маусым, 1904 жыл деп тасқа қашалып қойылғанын жазады. Түрлі деңгейдегі комиссия да уәжге тоқтап, соны нысанаға алғанына шүкір! Санамаласақ, бұл жолда ақаулар мен матаулар көп.
Онсыз да абайтану ғылымы ұзақ ауыр өткелектерден өтті. Бүйректен сирақ шығара беруге болмайды. Зерттеушілердің бір парасы айтып жүргендей, оны үшке емес, абайтану академик М.Әуезовке дейін және одан кейін деп, екіге бөліп қарастырған қажет сықылды көрінеді. Сұрқылтайлар мен құрқылтайлар мейлінше көбейген заманда кім не демейді? 1928 жылы «Құс жолы» жорналы айтаққа ілесіп: «Мазмұны жағынан бізге Абайдың пайдасынан зияны көп» деп байбалам салып, топырақ шашты. Іле-шала және біреу шаптықты: «Абайды қазақ қоғамына танытуға болмайды, ол кертартпа, көзқарасы дұрыс емес, Абайизммен бүкіл Қазақстанның барлық ұйымдары күресуі керек» (І.Қабылов). Өзін аса ақиқатшыл санайтын «Азаттық» радиосы да бәйгеге қатысып үн қосып қалды: «1930 жылдың ­басында ­саяси сылтаумен Мұхтар Әуезов екі жарым жыл түрмеге қамалып босағаннан кейін, үш жылдық ­шартты жазамен тұрып жатты. Алайда жалпы қазақ зиялы қауымына, санаткерлер мен жазушыларға қарсы қуғын-сүргін үлкен қызыл қырғын жылдарында жүзеге асты». Соларға қарамастан кеңес түрмесінде екі ­жарым жыл отырып шыққан М.Әуезов шайлық­пай да қаймықпай 1933 жылы А.Құнан­байұлының екі томдығына ұйытқы болып жарыққа шығарды. «Абайдың өмірін, дәуірін зерттеп жүріп, адамзат тарихында бұрын-соңды болмаған бұл жойдасыз оқиғаға үн қосып қалды: кейде кемшілікті қате пікірлері болса да, негізінде, Абайды тану ғылымында елеулі еңбек еткен адамдар: Сәбит Мұқанов, Мұхтар Әуезов, Қажым Жұмалиев, Есмағамбет Ысмайылов, ­Бейсенбай Кенжебаев, Белгібай ­Шалабаев сияқты, тағы бірталай әдебиет ­тарихшылары мен жазушылар» деп жазды академик жүрексінбей, өзін де ұмытпай.
Абайға апаратын жолды қиын­датып, енді кінәрат ақауды айнала­сындағылардан іздей бастағандай. Көп оқырманның ортақ ойы бұрыннан қалыптасқаны аян. Ол Әбдірахман (Әбіш) жиені Әбсеметтің үйінде қайтыс болып, күз қарбаласында жол қиындығы ескеріліп, денесі ­Алатау баурайына аманатқа қойылып, жазғытұрым жер дегдігенде Шаhкәрім мен Мағауия келіп алып кеткені белгілі. Сүйікті баласының қазасына хәкім Абай үміт пен күдікке толы оннан астам өлең жазды. Енді соның бәрін күстәналап, «Абай анықтамалығы» («Атамұра» 1995 ж.) бұған былай баға беріпті: «(Ділдәдан туған ұл Әбіш (Әбдірахман) – А.Н.) 1895 жылы 15 қарашада Ташкентте қайтыс болды да, сүйегі әкелініп, Ақмолаға жерленді». Сонда қайсысына сенеміз? Алматыда ма, жоқ, Ташкентте ме? 
Алашорда арыстарының хаттасулары, абайтанушылар еңбегі мен көзкөрген замандастарының естеліктері бойынша немере інісі Шаhкәрім (Шәкәрім емес) ­баласы Турағұл (Тұрағыл емес) ­болып әліптелген. Қазақ БАҚ-тары ерегіскендей, неге қайта-қайта Шәкәрім, Тұрағыл деп жазады? Олар­дың азан шақырып қойған есім­дерімен атауға жоғарыдан нұсқау керек пе? Түзетуге әлі де кеш емес. Тұтас тұлғаны бүйтіп бұтарлап қарастырып қорлауға болмайды. 
Қайда болса да Абайдың орны ойсырап тұрады. Жетісуға келіп, Сұлутөрде болған ба, қауесет пе бұл? 1968 жылы Е.Байболов «Абай Жетісуға келген бе?» атты мақала жариялады («Жұлдыз», №3). Неге екені белгісіз, бұдан он жыл бұрын М.О.Әуезовпен бірігіп Мәскеуде кітап шығарған Тәкен Әлімқұлов үлкен мазмұнды монографияға лайық «Жұмбақ жанда» оған тоқталады да төте сұрақты айналып өткендей. Араға жарты ғасыр өткенде Ж.Қарабасов бұл мәселеге қайта оралып, құмарлық дертін басып, Ноғайбай ­Дәулетбақұлы ­(1834-­1910 жж.) шешенмен Абайды күштеп кездестіреді. Оның ойынша бұл оқиға 1889-1893 жылдар аралығында өткен сияқты. Жазбагер анау айтып еді, мынау айтып еді дегеннен басқа ешқандай дәйек пен дәлел ұсына алмайды. Шығарып салушылар қолпаштап Құнанбайға сәлем айтып жатады. Ау, ол кезде (1885 ж.) ­Меккеге барып, зиярат етушілерге тақия салдырып, қажы болып қайтқан Құнанбай әлдеқашан дүниеден қайтқан жоқ па? Уақыт үйлеспейді. Осы бағытпен кете берсек жақсы басталған іс-шараның науқанға айналып кетуі де мүмкін. Ығыты келген соң айта кетейін, ғасыр соңына қарай, Өскенбаевтар әулетінің үстіне төнген қара бұлт үйіріліп қоюлана түсті. Жуантаяқтардың жалдамалылары абыз ақынды соққыға жықты. «Сенатқа хат» жазылды, жалған жаламен Абай мырзақа­маққа оқшауланды, 1903 жылы Көкшетаудағы Науан (Наурызбай, Науқанбай) Таласовтың ­(1843-1916 жж.)­ ­нұсқауымен Ш.Қосшығұлов жолдаған тілдей хат ізімен жандармерия Абай үйін астаң-кестеңін шығарып тінту жүргізді. «Байтал түгіл, бас қайғы» болып кетпей ме? Қалай болғанда да дүдәмал ­жорамалды малдану жақсылыққа апармайды. Сол «бүлікшіл» хаттың соңына түсіп, тексеру кезінде толтырылған хаттамада Абайдың маңдайына «мың жылқы, екі мың қой біткені» көрсетілген. Демек, олар не кием, не ішем демеген тәрізді. Бірақ, бәрін білген Абай өз шығармаларын жарыққа шығаруға неге асықпады? Таңғалдырады. 
1909 жылы Мүрсейіт Бікіұлы еңбегі арқылы Омбы мен Қазанда жолы болмаған А.Құнанбайұлының кітабын Алашорда серкесі ­Ә.Бөкей­хан­ның қолғабыс көме­гімен Кәкітай Ысқақұлы Санкт-Петербургте жарыққа шығарды. Қа­зақтың Бас ақыны сөйтіп туған халқымен қауышты. Алғаш.
Абайтануға ғажап ғұмырының біразын сарп еткен М.О.Әуезов Абай туындыларын Мүрсейіт қолжазбасы негізінде жинақ шығаруды үлгермей армандап өтті. Бәлкім, осы мерейтой үстінде ол жүзеге асып қалар. Бұны бір орайда Турағұлдың қызы Ақила айтып қалады: «…Кеңес дәуірінде Абай жинақтары аз басылған жоқ, таралымы да мол болды. Енді Мүрсейіттің қолжазбасы бойынша Абайдың жеке, арнайы басылымын даярлап, кітап бастырып шығарса дұрыс болар еді. Мүрсейіт еңбегі ­сонда жарқырап шығар еді».
Бұл нұсқаның да тағдыры оңай болмағаны анық, көрмеген құқайы жоқ. 
«Қай жылы екенін тап басып айта алмаймын. Сол кезде, Мұхтардың арнайы тапсырмасымен әкеммен жерлес, ескі замандас, руы көтібақ ­Са­рымырзаның Ғайсасы келіп, Мүрсейіт қолжазбасына сұрау салған» дейді Мүсекеңнің немересі Мүфтибек.
«Әкем Шолпандағы шешесінің қабірінің бас жағын қазғанда, еш жері бұзылмай сақталған атам­ның қолжазбасын Ғайса арқылы ­Алма­тыдағы Мұхтарға жөнелтіпті». Алды-артын ойлайтын, оны көз қарашығындай сақтап жеткізген жерлестері қисық атаған Рақымбайға рақмет. Болашаққа қандай баға жетпес құндылықты қалдырды. Ғаламат!.. Абай күрделі әлем! Сол арқылы қазақ жүрегінің лүпілі дүниежүзіне естілсе екен. Иншалла!..
Абай кімнің болса да көкірек көзін ашып, санасына сәуле түсіреді. Мәскеудегі студент жылдарым еске түседі. Тәуекел етіп, орыс тілінде тұңғыш «Абай ерлігін» жазып, көп ұзамай одақта ­тарайтын «Огонек» ­жорналында жарияланды. Қатысу мен жазу белсенділігі арқасында басылымның лауреаты атанған болатынбыз. Кейінірек ол туралы алты-жеті ойтолғау жарыққа шықты. Алда Абайдың асқар шыңы шақырып тұр.
Аян-Сейітхан НЫСАНАЛИН,
Ақын
<a href="http://anatili.kazgazeta.kz/?p=56352">«Ана тілі»</a> газеті
<img src="https://kyzylorda-news.kz/wp-content/uploads/2020/02/1abaitanu2.jpg" alt="" />
<img src="https://kyzylorda-news.kz/wp-content/uploads/2020/02/1abaitanu3.jpg" alt="" />

Абайтану неге ала-құла?

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда мемлекеттік университетінің студенттері Абай өлеңдерін шырқап, өзге оқу орындарына жыр эстафетасын жолдады.
Әдеби-сазды шарада жастарды толғандырып жүрген бірқатар мәселе де сөз болды. 80 жылдан астам тарихы бар Қорқыт ата атындағы Қызылорда мемлекеттік университетінде тәлім алатын шәкірттер мамандық таңдау мен еңбек нарығын реттеу жүйесін қалыптастыру керектігін айтады. Білім ордасында құрылған 19 жастар ұйымы мен 9 студенттік кеңес тарапынан ұсынылған жобалар республикалық «Jas Otan»-ға бағдарламасына енгізілетін болды.
<blockquote>
 «ҚР 645-тен астам жатақхана болса, колледж, ЖОО-да соның 66-сы ешқандай санитарлық нормаға сай келмейді. Жекеменшік ЖОО-да біз 35 мың жастан анкета өткіздік. Соның қорытындысын 3 наурыз күні шығарамыз. Қандай ЖОО-да жемқорлық деңгейі жоғары болатын болса, біз тікелей Білім және ғылым министрлігімен осы мәселені шешумен айналысамыз», – дейді «Jas Otan» жастар қанатының төрағасы Елнұр Бейсенбаев.
</blockquote>

Қызылордалық жастар әуенді челлендж бастады

<a href="https://kyzylorda-news.kz/">Kyzylorda-news.kz.</a> Бүгін қаладағы «Мұрагер» мектебінде Абай Құнанбайұлының 175 жылдығына арналған&nbsp; «Абай – ақыл-ойдың алыбы» атты әдеби-сазды кеш өтті.
Шараны қала әкімінің орынбасары Мира Қазбекова ашып берді.
<blockquote>
 «Абай – қазақ болмысының айнасы. Ақынның дара тұлғасы халқымыздың руханиятын әлемге танытатын теңдесі жоқ құндылық. Дүние жүзі әдебиетінде Абай секілді ақын, ағартушы, ойшыл, сыншы кемде кем. Баршаңызға белгілі «Абай – челлендж» поэтикалық эстафетасы бүгінде республика көлемінде жалғасуда. Бұл эстафетаға қала әкімдігіне қарасты бөлімдер мен білім беру ұйымдары ерекше үлес қосып, кеңінен насихаттауда. Дара ақын Абайдың тағылымын жастардың санасына сіңіріп, ұлы тұлғаның ой-толғамдарын кеңінен дәріптеу, Абай Құнанбайұлының 175 жылдығын кеңінен насихаттау бүгінгі шараның негізгі мақсаты болып отыр», – деді қала әкімінің орынбасары.&nbsp;
</blockquote>
Кеш барысында Мира Жомартқызы «Абай – челлендж» поэтикалық эстафетасына өз үлесін қосқан балабақша тәрбиеленушілері мен оқушыларды және ардагер ұстаздарды қала әкімінің Алғыс хатымен марапаттады.
<img src="https://kyzylorda-news.kz/wp-content/uploads/2020/02/28abaimurager1.jpg" alt="" />
Шара қала мектептерінің қатысуымен дайындалған Ұлы ақын Абай Құнанбайұлының өмірі мен шығармашылығынан сыр шертетін әдеби-сазды кешке ұласты.
<blockquote>
 «Қалалық білім бөлімінің ұйымдастыруымен өтіп жатқан кезекті шарамыз Абайдың 175 жылдығына арналып отыр. Шара «Мұрагер» мектебінде ұйымдастырылғанымен қаладағы білім беру ұйымдарының оқушылары мен мұғалімдері қатыстырылуда. Кеш барысында М.Әуезовтің «Абай жолы» роман-эпопеясының «Қайтқанда» бөлімінен Абайдың бала күнінен көрініс қойылып, ақынның әндері орындалып, оқушылардың Абайға арнаған өлеңдері оқылды. Айта кетейін, осы Абайдың 175 жылдығы аясында мұғалімдердің жазғы еңбек демалысында Абайдың елі Жиделі-Байсын жеріне саяхат ұйымдастырмақшымыз. Оған ниет білдірген қаладағы мектеп мұғалімдері бара алады», – дейді қалалық білім бөлімінің әдіскері Рита Мұқашева.
</blockquote>
Абай мұрасы мәңгілік өміршеңдігімен құнды. Олай дейтініміз, жыл сайын өтетін Абай оқулары байқауына қатысуға ниет білдіретін, сөз ұғар оқушылар өсіп келеді. Тіпті осы байқау арқылы респубикалық кезеңдерде топ жарып, жоғарғы оқу орындарына білім грантын жеңіп алған қызылордалық оқушылар да бар.
<blockquote>
 «8 сыныптан бастап Абайдың өлеңдері мен қара сөздерін жатқа айтып, Абай оқулары байқауына қатысып жүрдім. Қазірде №7 орта мектеп-лицейінде қазақ тілі мен әдебиеті пәнінің мұғалімімін. Бұл мамандықты таңдауыма да осы Абай шығармашылығы әсер етті десем болады. Бүгінде Абайдың 130 өлеңін жатқа білемін. Бала күнімде жол көрсеткен Ұлы Абайдың кітаптары өмірлік серігіме айналды десем артық емес. Шәкірттерім де Абай оқуларына қатысып, жүлделі орындардан көрініп жүр», – деді мектеп мұғалімі Элиза Сұлтанова.
</blockquote>
«Өлмейтұғын артына сөз қалдырған» ұлт мақтанышы заманының ұлы ойшылы, ақын сазгер Абай Құнанбайұлы ұрпағымен бірге жасайды. Ақынның өнегілі өмірін елге таныстырып, кемеңгер ойшылдың шығармашылығын ұрпаққа насихаттаудан жалықпауымыз керек.
Кешті қорытындылаған №264 мектептің оқушылары ақынның әндерін орындап, өлеңдерінен үзінді оқыды.
Фариза ОМАРОВА
<img src="https://kyzylorda-news.kz/wp-content/uploads/2020/02/28abaimurager2.jpg" alt="" />
<img src="https://kyzylorda-news.kz/wp-content/uploads/2020/02/28abaimurager3.jpg" alt="" />
<img src="https://kyzylorda-news.kz/wp-content/uploads/2020/02/28abaimurager4.jpg" alt="" />
<img src="https://kyzylorda-news.kz/wp-content/uploads/2020/02/28abaimurager5.jpg" alt="" />
<img src="https://kyzylorda-news.kz/wp-content/uploads/2020/02/28abaimurager6.jpg" alt="" />
<img src="https://kyzylorda-news.kz/wp-content/uploads/2020/02/28abaimurager7.jpg" alt="" />
<img src="https://kyzylorda-news.kz/wp-content/uploads/2020/02/28abaimurager8.jpg" alt="" />
<img src="https://kyzylorda-news.kz/wp-content/uploads/2020/02/28abaimurager9.jpg" alt="" />

Қызылордада Абайдың 175 жылдығына арналған әдеби-сазды кеш өтті

<a href="https://kyzylorda-news.kz/">Kyzylorda-news.kz.</a> ҚР Мемлекеттік қызмет істері агенттігінің Қызылорда облысы бойынша департаменті мен ҚР Президентінің жанындағы Мемлекеттік басқару академиясының Қызылорда облыстық филиалы қызметкерлері ұлы ақын Абайдың 175 жылдық мерейтойына арналған «Абай – дана, Абай – дара қазақта» атты жылжымалы көрмемен танысты.
Қазақстанның барлық аймағына атбасын тіреуді көздеген көрме Сыр елінде С.Айтбаев атындағы көркемсурет галереясында орналасқан.
Мұнда ұлы ақын туралы мол мағлұматтар жинақталған «Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейімен» ұсынылды.
Департамент пен филиал қызметкерлері Абайдың өмірі мен шығармашылығына қатысты тарихи құжаттармен, архивтік деректермен, құнды қолжазбалармен, Абай оқыған Ахмет-Риза мешіт-медресесінің араб, түрік, парсы, шағатай тілдеріндегі кітаптарымен, этнографиялық бұйымдармен танысты.
<blockquote>
 «Ұлы ақынның ұлағатты өмірінен сыр шертетін, рухани нәр беретін жәдігерлермен танысу, әрбір мемлекеттік қызметшінің жұмысына тың серпін әкелетініне сенімдімін. Сол себепті сырбойылық барлық мемлекеттік қызметшілерді көрмемен танысуға шақырамын», – деді департамент басшысы Нұрман Талқанбаев.
</blockquote>
Жылжымалы көрмедегі құнды жәдігерлерді тамашалап, ерекше әсер алған қызметкерлер музей мамандарына алғыстарын білдірді.
<img src="https://kyzylorda-news.kz/wp-content/uploads/2020/02/28zhkorme2.jpg" alt="" />
<img src="https://kyzylorda-news.kz/wp-content/uploads/2020/02/28zhkorme3.jpg" alt="" />

Қызылордада Абайдың 175 жылдығына арналған жылжымалы көрме жалғасын табуда

<a href="https://kyzylorda-news.kz/">Kyzylorda-news.kz.</a> Қызылорда облысына жұмыс сапарымен келген «Nur Otan» партиясы төрағасының бірінші орынбасары Бауыржан Байбек пен Қызылорда облысының әкімі Қуанышбек Ысқақов Ұлы ақын Абай Құнанбайұлының 175 жылдығына арналған «Абай жолымен» атты республикалық ақындар айтысының ашылу салтанатына қатысты.
Аймақ басшысы айтыс – сөздің аламаны, халқымыздың өр рухының нәрі, сонымен қатар, идеологиялық тәрбиенің өткір құралы екенін атап өтті.
Қасиетті Сырдың бойы қазақ өнерінің қара шаңырағы және ортаймас ордасы 
екені – мойындалған шындық. Бұл киелі өлке ұлт өнерін асқақтатқан талай дүлдүлдер мен жүйріктерді дүниеге әкелген.
<blockquote>
 «Мысалы, сырнаймен төгілте жыр төккен Нартай, Сыр әуенін әуелете салған Әбілда Жүргенбаев, Мүтәліп Қыраубаев, сөз өнерін өрістеткен Манап Көкенов, Бибігүл Жаппасбаева, кеше ғана сексеннің сеңгіріне шыққан ақиық ақын Зәмеддин Ибадуллаев, ұстаздық пен айтысты қатар алып жүрген Серік Ыдырысов және айтыстың ақтаңгері, екі мәрте «Алтын домбыра» иегері Мұхтар Ниязовтың сөз сайысында ел намысының туын түсірмеген Кенжебай, Әбілқайыр, Нұрмат, Мейірбек сынды арынды ақындардың шабыттарын шыңдап, аққанат жырларын аспандатқан мекен», – деді облыс әкімі Қуанышбек Ысқақов.
</blockquote>
Қазақ халқының ұлы ақыны, ағартушы Абай Құнанбайұлының 175 жылдығына арналған республикалық «Абай жолымен» атты ақындар айтысына республикадан барлығы 12 ақын келді. Ал, ақындардың өнеріне Халық ақыны, Қазақстан Республикасының мәдениет және білім саласының үздігі Әсия Беркенова, ақын, Қазақстан Жазушылар Одағының мүшесі, республикалық «Жұлдыз» журналының бас редакторы Ғалым Жайлыбай, жырау, Қазақ ұлттық өнер академиясының профессоры, Қазақстанның еңбек сіңірген қайраткері Алмас Алматов пен ақын, журналист, публицист, Қазақстан Жазушылар одағының мүшесі Жанарбек Әшімжан және Қ.Мырзалиев атындағы өнер орталығының директоры Бауыржан Халиолла қазылық етті.
Республикалық ақындар айтысының ашылуынан кейін «Nur Otan» партиясы төрағасының бірінші орынбасары Бауыржан Байбек пен облыс әкімі Қуанышбек Ысқақов партия қатарына жаңа мүшелерді қабылдау салтанатты шарасына қатысты.
Бүгін Сыр елінде өтіп жатқан ақындар айтысының бас жүлдесін екі дүркін алтын домбыраның иесі, айтыстың ақтаңгері Мұхтар Ниязов иеленді. Ал І орынды оралдық Жансая Мусина қанжығасына байласа, ІІ орынды Нұр-Сұлтан қаласынан келген Әсем Ережеқызы иеленді. Қызылордалық Мейірбек Сұлтанхан мен Арқалықтың тумасы Айбек Қалиев ІІІ орынға жайғасты.
Жеңімпаздарды «Nur Otan» партиясы төрағасының бірінші орынбасары Бауыржан Байбек пен «Nur Otan» партиясы Қызылорда облыстық филиалының төрағасы, облыс әкімі Қуанышбек Ысқақов марапаттады.
<img src="https://kyzylorda-news.kz/wp-content/uploads/2020/02/28aitys2.jpg" alt="" />
<img src="https://kyzylorda-news.kz/wp-content/uploads/2020/02/28aitys3.jpg" alt="" />
<img src="https://kyzylorda-news.kz/wp-content/uploads/2020/02/28aitys4.jpg" alt="" />
<img src="https://kyzylorda-news.kz/wp-content/uploads/2020/02/28aitys5.jpg" alt="" />
<img src="https://kyzylorda-news.kz/wp-content/uploads/2020/02/28aitys6.jpg" alt="" />
<img src="https://kyzylorda-news.kz/wp-content/uploads/2020/02/28aitys7.jpg" alt="" />
<img src="https://kyzylorda-news.kz/wp-content/uploads/2020/02/28aitys8.jpg" alt="" />
<img src="https://kyzylorda-news.kz/wp-content/uploads/2020/02/28aitys9.jpg" alt="" />
<img src="https://kyzylorda-news.kz/wp-content/uploads/2020/02/28aitys10.jpg" alt="" />
<img src="https://kyzylorda-news.kz/wp-content/uploads/2020/02/28aitys11.jpg" alt="" />
<img src="https://kyzylorda-news.kz/wp-content/uploads/2020/02/28aitys12.jpg" alt="" />
<img src="https://kyzylorda-news.kz/wp-content/uploads/2020/02/28aitys13.jpg" alt="" />
<img src="https://kyzylorda-news.kz/wp-content/uploads/2020/02/28aitys14.jpg" alt="" />
<img src="https://kyzylorda-news.kz/wp-content/uploads/2020/02/28aitys15.jpg" alt="" />
<img src="https://kyzylorda-news.kz/wp-content/uploads/2020/02/28aitys16.jpg" alt="" />

«Абай жолымен» республикалық ақындар айтысының бас жүлдесін Мұхтар Ниязов иеленді (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысында ұлы ақын Абай Құнанбайұлының 175 жылдық мерейтойына арналған «Абай жолымен» атты республикалық ақындар айтысы өтіп жатыр. Сөз аламанын «Nur Otan» партиясының қолдауымен Қызылорда облысының әкімдігі ұйымдастырды.
Айтыстың ашылу салтанатына қатысқан «Nur Otan» партиясы Төрағасының бірінші орынбасары Бауыржан Байбек қазақтың төл өнеріне биыл ерекше қолдау болатынын айтты.
<blockquote>
 – Баршаңызға белгілі мен осы аптаның басынан бастап Шымкент қаласы мен Түркістан облысында болып халықпен кездестім. Бүгін Қызылорда облысына табан тіреп, Жаңақорған, Шиелі аудандарының тұрғындарымен пікірлесіп, ұсыныс-тілектері мен мәселелерін тыңдап, оның шешу жолдарын талқыладық. Бүгінгі сапарымның ерекшелігі – сіздермен бірге республикалық айтысқа қатысып, ақындардың өнерін тамашалауға келіп отырмын. Елбасы, «Nur Otan» партиясының көшбасшысы Нұрсұлтан Назарбаевтың тапсырмасы бойынша партия халқымыздың төл өнері – айтысты қолдап, дамытуды қолға алды. Былтыр біздің партияның қолдауымен 9 республикалық айтыс өтті. Биыл елімізде түрлі деңгейдегі 77 айтыс өтеді. «Nur Otan» партиясы барлық өңірдегі халықпен кездесуінде олардың пікіріне құлақ асып, оң шешімін табылуы үшін жұмыс жасап келеді. Сондай кездесулерде айтыстан бөлек, көркем әдебиеттің дамуына қолдау көрсетсе деп жатыр. Осы ұсыныс бойынша мүшәйра өткізуді ақылдасып жатырмыз. Халықтық партия ретінде ұлттық спорт түрлерінің дамуына атсалысып келеміз, – деді Бауыржан Байбек айтыстың ашылу салтанатында.
</blockquote>
Оның айтуынша, халықтың мұң-мұқтажын билікке айтыскерлер жақсы жеткізе біледі. Сондықтан, еліміздің әр өңірінде ақындар додасын жиілету қолға алыныпты.
<blockquote>
 – Әрине, біздің ұлттық мәдениетімізде айтыстың орны қашан да биік. Айтыс арқылы біз көптеген мәселелерді естиміз. Партияның мүшелері, депутаттар айтыс ақындары айтқан көптеген мәселелерге құлақ асып, оларды шешуге тырысамыз. Тәуелсіздік алған жылдардан бері елімізде қандай экономикалық қиын жағдайлар болса да, мәдениетке, оның ішінде, айтысқа қолдау көрсетілмей қалған емес. Елбасымыздың «Мәдени мұра», «Рухани жаңғыру», «Ұлы даланың жеті қыры» бағдарламаларының арқасында көптеген игі жұмыстар атқарылды, – деді «Nur Otan» партиясы Төрағасының бірінші орынбасары.
</blockquote>
Бүгінде ұлы Абайдың 175 жылдығына орай республиканың түкпір-түкпірінде түрлі іс-шаралар легі ұйымдастырылып келеді. Сыр елі де бұл тойдан тыс қалып жатқан жоқ.
<blockquote>
 – Елбасымыз «Алаштың анасы» деп бағалаған Сыр елінде ұлы ақынымыз Абай Құнанбайұлының 175 жылдық мерейтойына арналған шаралар легі жыл басынан басталды. Хакім Абайды ұлықтауға арналған шаралар Н. Бекежанов атындағы қазақ музыкалық академиялық драма театры сахналаған «Абай» қойылымынан бастау алды. Қала мен аудандарда да түрлі деңгейдегі мәдени-танымдық іс-шаралар өткізіліп келеді. Біздің Қызылорда облысы – қазақтың мәдениетінің нағыз қайнаған қара қазаны. Біздің өңірден талай өнер майталмандары шыққан. Сондықтан да, ұлы Абайды дәріптеуге арналған, Нұр-Сұлтан қаласында басталған айтыстың Сыр елінде жалғасуы заңдылық. Айтыс – барлық өнердің ұлысы. Ол тек өнер ғана емес, үлкен идеологиялық құрал. Сондықтан да, бүгін керемет сөз сайысы болады деп сенемін, – деді Қызылорда облысының әкімі Қуанышбек Ысқақов.
</blockquote>
Сыр еліндегі республикалық айтысқа еліміздің түкпір-түкпірінен келген 12 ақын қатысуда. Абайды ұлықтауға арналған сөз аламанына айтыстың үш буын өкілдері шақырылған. Үлкен буыннан Айбек Қалиев (Арқалық), Серік Құсанбаев (Өскемен), Кенжебай Жүсіпов (Қызылорда) айтыстың аламанын қыздырса, орта буыннан Әсем Ережеқызы (Нұр-Сұлтан), Мұхтар Ниязов (Қызылорда), Аспанбек Шұғатаев (Баянауыл), Жансая Мусина (Орал), Мейірбек Сұлтанхан (Қызылорда), Аруна Керімбек (Ақтөбе) сөз барымтасында сынға түспек. Сондай-ақ, жас буыннан Сұлужан Таубалды (Алматы), Бексұлтан Орынбасаров (Қызылорда), Аян Ниязбек (Шымкент) үлкендермен қатар үзеңгі қағыстыруға талпынып отыр.
Ал, айтыста өнер көрсеткен ақындарды белгілі халық ақыны Әсия Беркенова төрағалық еткен әділқазылар алқасы анықтайды. Олардың қатарында дүлдүл жырау Алмас Алматов, белгілі ақындар Ғалымжан Жайлыбай, Жанарбек Әшімжан, Бауыржан Халиолла бар.
Айта кетейік, айтыс ақындары көрермендердің алдында жұпталып отырады. Бұл өз кезегінде ақындардың суырыпсалмалық қасиетін көрсетіп, шаппа-шап айтысты дамыта түспек.
Сөз барымтасын қызылордалық Кенжебай Жүсіпов пен шымкеттік Аян Ниязбек бастады.
<img src="https://kyzylorda-news.kz/wp-content/uploads/2020/02/whatsapp-image-2020-02-27-at-17.24.21.jpeg" alt="" />

Қызылордада «Абай жолымен» атты республикалық ақындар айтысы өтіп жатыр

<a href="https://kyzylorda-news.kz/">Kyzylorda-news.kz.</a> Бүгін сағат 15:00-де Н.Бекежанов атындағы музыкалық драма театрында республикалық ақындар айтысы өтеді.
Жыр додасы ұлы ақын, ағартушы Абай Құнанбайұлының 175 жылдығына орай ұйымдастырылып отыр.
Бұл айтыста бәрі айтылады, шұрайлы тіркес пен әдемі ұйқас та болады. Аламан айтысқа наркескен тілмен жыр етер, есімі елге таныс ақындар қатыспақ.&nbsp;
Қазақ өнерінің туын көкке көтерер, сөз қадірін өз қадірім деп білетін жанашыр қауым айтыстан қалыс қалмаңыз!

Бүгін Қызылордада республикалық айтыс өтеді

<a href="https://kyzylorda-news.kz/">Kyzylorda-news.kz.</a> Елімізде ұлы ақын Абай Құнанбайұлының 175 жылдық мерейтойын жоғары деңгейде мерекелеу туралы Президент Жарлығы шығып, жалпыреспубликалық жоспар бекітілді. Соған сәйкес ел көлемінде елеулі мәдени шаралар өткізілуде.
Абайды танып-білу, данышпанның дүниетанымына үңілу – бар қазақтың мақсаты болмақ. Осыған орай, Арал аудандық мәдениет үйінде қазақтың бас ақыны, ағартушы, композитор Абай Құнанбаевтың 175 жылдық мерейтойының аудандағы салтанатты ашылуы өтті.&nbsp;
Шараға қатысушыларға алдымен ақынның өмірі мен шығармашылығы жайлы кітап көрмесі таныстырылды.
<blockquote>
 &nbsp;«Ұлы Абайдың 175 жылдығы – маңызды саяси шаралардың бірі. Абай дүниетанымы – ұлттың рухани игілігі. Сондықтан да, ішкі түйсік пен ой-өрісімізді дамытуда Абайды айналып өту мүмкін емес. Ақынның мерейтойы өнегелі, өміршең жобалармен есте қалары анық. Дүйім ел, тұтас ұрпақ буыны үшін тағылымды маңызы зор, тәрбиелік мәні жоғары осындай шаралар бүгінгі буынның Отаншылдық рухына дем беріп, ұлтты ұйыстыратын, жасампаз істерге жұмылдыратын рухани маңызы зор мәдени мұраға айналуына тілектеспін»- деп лебізін білдірді аудан әкімі Мұхтар Оразбаев.
</blockquote>
Шара барысында көркем сөз бен ойлы өлеңнің реформаторы, жаңа замандағы жазба әдебиеттің негізін қалаушы Абай Құнанбаевтың жастық шағы жайлы театрландырылған қойылымдар мен ақын бейнесі сомдалған көріністер көпшілік назарына ұсынылды. Сонымен қатар, мектеп оқушылары Абайдың ақындық мұрасына қосылған бағалы қазынасы – қара сөздерін, философиялық ой-толғаныстары мен өлеңдерін нақышына келтіре орындады.
Мерекелік шарада ақынның халыққа танымал «Айттым сәлем Қаламқас», «Желсіз түнде жарық ай», «Сегізаяқ», «Жарқ етпес қара көңілім» сынды әндері аудан өнерпаздарының орындауында айтылып, жырлары Сыр мақамдарына келтіріліп шырқалды.
<img src="https://kyzylorda-news.kz/wp-content/uploads/2020/02/25aralabaidyn2.jpg" alt="" />
<img src="https://kyzylorda-news.kz/wp-content/uploads/2020/02/25aralabaidyn3.jpg" alt="" />
<img src="https://kyzylorda-news.kz/wp-content/uploads/2020/02/25aralabaidyn4.jpg" alt="" />
<img src="https://kyzylorda-news.kz/wp-content/uploads/2020/02/25aralabaidyn5.jpg" alt="" />

Аралда Абайдың 175 жылдығына орай салтанатты кеш өтті

<a href="https://kyzylorda-news.kz/">Kyzylorda-news.kz.</a> Қазақстан Республикасы Тұңғыш Президенті — Елбасы қоры мен Мемлекеттік тілді дамыту қоры Абай Құнанбайұлының 175 жылдық мерейтойына арналған студенттер мен магистранттар арасында «Абай әлемі» ғылыми байқауын жариялайды, деп хабарлады <a href="https://abaialemi.kz/post/view?id=1393">Abaialemi.kz</a>.
Байқаудың мақсаты – қазақтың ұлы ақыны Абай мұрасын кеңінен насихаттау, дарынды жас ғалымдарды анықтау, ақын шығармашылығының ғылыми тұрғыдан талдануына қолдау көрсету, жастардың әдебиетке деген қызығушылығын арттыру.
Биыл қазақтың ұлы ақыны, философ, гуманист және қазақ классикалық әдебиетінің негізін қалаушы Абай Құнанбаевтың туғанына 175 жыл толады. Көрнекті ақын-ағартушының бейнесі тек әдебиет саласында ғана емес, музыка және бейнелеу өнерінде де сақталған. Абай орыс классиктерінің шығармаларын бірінші болып қазақ тіліне аударды. Абайдың көркем әдебиеттің дамуына қосқан елеулі үлесі «Қара сөздері» болды. Бұл мұра жастарды қазақ халқының рухани құндылықтарымен таныстыруда маңызды рөл атқарды.
Байқауға магистранттар мен студенттердің қазақ тіліндегі бұрын жарияланбаған, түпнұсқадағы ғылыми мақалалары қабылданады.
Жеңімпаз студенттерге арнайы тақырыптар бойынша ақшалай сыйлық беріледі: бір бірінші орынға – 300 000 теңге, екі екінші орынға – 200 000 теңгеден және үш үшінші&nbsp; орынға – 100 000 теңгеден, магистранттарға: бірінші орынға – 400 000 теңге, екі екінші орынға – 300 000 теңгеден және үш үшінші орын үшін әрқайсысы 200 000 теңгеден табысталады.
Байқауға ұсынылған жұмыстарды бағалау кезінде мақаланың өзектілігі, ой-тұжырымдардың жаңашылдығы, ғылыми зерттеу нәтижесі, идеялардың түпнұсқалығы, құрылымдылығы мен автордың ойлау дербестігі басшылыққа алынады. Жұмыстарды бағалаудың объективтілігі – қорытынды шешім қабылданғанға дейін анонимділік сақталады.
Үздік ғылыми жұмыстар&nbsp;«Abaialemi.kz»&nbsp;порталында жарияланады.
Өтініштер 2020 жылдың 25 ақпанынан 25 мамырына дейін abai_fond@mail.ru электронды поштасы арқылы қабылданады. Жеңімпаздар 2020 жылдың маусым айында белгілі болады.

Қазақстан және Қызылорда облысының жаңалықтары: АБАЙ-175