<a href="https://kyzylorda-news.kz/">Kyzylorda-news.kz</a> “AMANAT” партиясы облыстық филиалы жанындағы Партиялық бақылау комиссиясының отырысы өтті. Онда Мемлекет басшысы Жолдауынан туындайтын және партияның сайлауалды бағдарламасында қамтылған халықты таза ауыз сумен қамтамасыз ету мәселесі қаралды.Жиынды ашқан Партиялық бақылау комиссиясының төрағасы Нұркен Бақытбекұлы өңір тұрғындарын таза ауыз сумен қамтамасыз ету мәселесінің маңыздылығына ерекше тоқталды.&nbsp;Оның айтуынша, бұл бағыт Мемлекет басшысы Қасым-Жомарт Тоқаевтың 2021 жылғы Жолдауында нақты айқындалып, 2025 жылға дейін халықты толықтай таза ауыз сумен қамту міндеті қойылған. Сондай-ақ, аталған мәселе «AMANAT» партиясының «Халықпен бірге!» сайлауалды бағдарламасында да басым бағыттардың бірі ретінде көрініс тапқан.&nbsp;Күн тәртібіндегі өзекті мәселеге қатысты өңірде атқарылып жатқан жұмыстарды облыстық энергетика және тұрғын үй коммуналдық шаруашылығы басқармасының Сумен қамтамасыз ету және суды бұру бөлімінің басшысы Әбдіғани Абдуллаев кеңінен жеткізді.Бөлім басшысының айтуынша 2024 жылдың қорытындысы бойынша облыс халқын орталықтандырылған ауыз сумен қамту деңгейі 98,6 пайыз болған. Өткен 2025 жылы 9,9 млрд. теңге қаржыға Арал ауданы Ерімбетжаға және Тастүбек елді мекендері топтық су құбырына қосылған. Шиелі ауданы Лесхоз және Қазалы ауданы Бірлік елді мекендеріне су тұщытқыш қондырғысы орнатылып, Қазалы ауданы Шәкен, Шилі, Шитүбек және Сарбұлақ елді мекендерінде ішкі су жүйелерінің құрылысы жүргізілген. &nbsp;Сонымен қатар, ҚР Су ресурстары және ирригация министрлігінің тапсырысымен Арал ауданы Абай, Тоқабай және Ақбасты елді мекендерін топтық су құбырына қосу жұмыстары аяқталған. Бұл жұмыстар биыл да жалғасып, мәселе түбегейлі шешімін тапқан.<blockquote>«Қазіргі таңда облыста 4 қала және 222 ауылдық елді мекен бар. Ағымдағы жылы облыс бойынша 83 шақырым су құбыры салынып, Мемлекет басшысының халықты 100 пайыз сапалы ауыз сумен қамту тапсырмасы &nbsp;өңірде толық орындалды», - деді Әбдіғани Абдуллаев. &nbsp;</blockquote>Жиын барысында кеңес мүшелері ауыз су тарифі, су желілерін күтіп ұстау, жөндеу мәселелеріне қатысты ұсыныс пікірлерін ортаға салды.Комиссия отырысында сондай-ақ, партияның Қызылорда қалалық филиалы жанындағы Партиялық бақылау комиссиясымен 2025 жылы атқарылған жұмыстар есебі тыңдалып, алдағы міндеттер пысықталды.&nbsp;<img src="https://knadmin.beoblood.kz/uploads/Amanat_auyzsu_m_selesi_3c12c11969.jpg" alt="Аманат ауызсу мәселесі.jpg">

«AMANAT»: Ауызсу мәселесі партия назарында

<a href="https://kyzylorda-news.kz/">Kyzylorda-news.kz</a> Жаз мезгілі басталысымен балалардың қауіпсіздігі басты назарда болуы тиіс. Өкінішке қарай, балалардың терезеден құлау фактілері ата-аналардың балаларды қараусыз қалдыруынан, терезелерде қорғаныс құралдарының болмауынан және балалардың терезе алдында ойнауынан туындап отыр. Осыған орай, облыстық Төтенше жағдайлар департаменті жыл басынан бері 3000-ға жуық тұрғынға 20-дан астам түсіндіру жұмыстарын жүргізді. Бұл туралы Өңірлік коммуникациялар қызметінің баспасөз алаңында облыстық ТЖД Төтенше жағдайдың алдын алу басқармасының бастығы Асхат Оразбеков мәлімдеді.<blockquote>- Бүгінде балалардың қауіпсіздігі - қоғамдағы ең өзекті мәселелердің бірі. Әсіресе, көпқабатты тұрғын үйлерде балалардың ата-анасының қарауынсыз қалып, терезеден немесе балконнан құлап кету жағдайлары алаңдаушылық туғызып отыр. Мұндай оқиғалар көбінесе ересектердің немқұрайлығы мен қауіпсіздік талаптарының сақталмауы салдарынан орын алады.Талдау көрсеткендей, балалардың терезеден құлау фактілерінің негізгі себептері - ата-аналардың балаларды қараусыз қалдыруы, терезелерде арнайы қорғаныс құралдарының, яғни блокираторлар мен бекіткіштердің болмауы, сондай-ақ балалардың терезе маңында ойнауы. Сонымен қатар, балалардың терезе алдына шығып кетпеуі үшін жиһаздарды терезе жанына қоймаған жөн. Ата-аналар балалармен қауіпсіздік тақырыбында тұрақты түрде әңгіме жүргізіп, үлкен балаларды кішілерге қамқор болуға үйретуі тиіс. Ең тиімді шаралардың бірі &nbsp;терезелерге арнайы блокираторлар орнату немесе тұтқаларына құлып қою , - деді Асхат Плалұлы.</blockquote>Спикердің айтуынша, өңірде балалардың терезеден құлау фактілерінің алдын алу мақсатында кешенді жұмыстар жүргізілуде. Атап айтқанда, көпқабатты тұрғын үйлердің кіреберістеріне, шағын маркеттер мен сауда орындарына ескерту парақтары ілініп, тұрғындармен түсіндіру іс-шаралары ұйымдастырылуда. Сонымен қатар, “Терезе” жедел алдын алу шарасы жүзеге асырылуда.

Қауіптің алдын алу – басты міндет

<a href="https://kyzylorda-news.kz/">Kyzylorda-news.kz</a> Қызылорда облысының кәсіпкерлік және өнеркәсіп басқармасының ұйымдастыруымен, облыс әкімі Н.Нәлібаевтың төрағалығымен өткен Үкімет отырысынан кейінгі тапсырмалар аясында, қаржы институттарымен бірлескен жұмысшы топ аудандарда көшпелі түсіндірме жұмыстарын жүргізуде.Жұмысшы топ құрамына Қызылорда облысының &nbsp;кәсіпкерлік және өнеркәсіп басқармасы, «Байқоңыр» ӘКК» АҚ, облыстық кәсіпкерлер палатасы, «Даму» кәсіпкерлікті дамыту қоры, «Аграрлық несие корпорациясы» АҚ, «Қорқыт Ата» арнайы экономикалық аймағын басқарушы компаниясы» ЖШС және «Қызылорда» өңірлік инвестициялық орталығы» МҚҰ ЖШС өкілдері енгізілген.Бекітілген кестеге сәйкес Сырдария, Жалағаш, Қармақшы аудандарында көшпелі кездесулер өткізіліп, кәсіпкерлермен ашық диалог орнатылды. Кездесулер барысында мемлекеттік бағдарламалар аясындағы қолдау құралдары — жеңілдетілген несиелеу, субсидиялау, кепілдендіру және гранттық қаржыландыру бойынша кеңінен түсіндірме берілді.Сонымен қатар жұмысшы топ өңірдегі бірқатар кәсіпкерлік және өндірістік нысандарды аралады. Сырдария ауданында биыл жүзеге асырылуы жоспарланған құны 40 млрд теңгені құрайтын «Қызылорда крахмал-сірне зауыты» ЖШС-нің жүгері дәнін терең өңдеу жобасымен танысты. Жоба аясында крахмал, глютен, патока, май, этанол сынды 29 түрлі өнім өндіру жоспарланып отыр. Бұл өз кезегінде тамақ, химия, фармацевтика және ауыл шаруашылығы салаларының дамуына серпін береді.Сондай-ақ Жалағаш ауданында орналасқан индустриялық аймақтың жұмысымен танысып, оның өндірістік әлеуеті мен даму мүмкіндіктері зерделенді. Қазіргі уақытта Арал және Қазалы аудандарында тиісті жұмыстар жүргізілуде. Алдағы кезеңде бұл аудандарға да жұмысшы топтың іссапары жоспарланған.Жалпы атқарылған жұмыстар кәсіпкерлердің мемлекеттік қолдау шаралары туралы хабардарлығын арттырып, жаңа жобалардың жүзеге асуына оң ықпал етуде.

Мемлекеттік қолдау шараларын түсіндірді

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың, мәслихат депутаттары, зиялы қауым өкілдері және ел ағаларының қатысуымен Сырдария ауданында жүгері дақылын терең өңдеу зауытының &nbsp;іргетасын қалау рәсімі өтті.&nbsp;Аймақ басшысы жиналған жұртшылықты жаңа жобаның басталуымен құттықтап, агроөнеркәсіп кешенін дамыту бағытындағы жұмыстарға тоқталды.<img src="https://knadmin.beoblood.kz/uploads/Zh_geri_deu_zauyty_ed216724cd.jpg" alt="Жүгері өңдеу зауыты.jpg"><blockquote>«Президентіміз айқындап берген экономиканы әртараптандыру, өңдеу өнеркәсібін дамыту жөніндегі стратегиялық міндеттер аясында аймағымызда нақты істерді кезең-кезеңімен жүзеге асырып келеміз. &nbsp;Өткен жылы тамыз айында Жетісу өңіріне арнайы жұмыс сапарымен барып, еліміздегі ірі өндіріс орындарының бірі – «Жаркент крахмал-сірне зауытымен» жан-жақты таныстық. Келіссөздер нәтижесінде серіктестіктің қолдауымен облысымызда жүгері дақылын терең өңдейтін жаңа зауыт салу жөнінде маңызды келісімге қол жетті. &nbsp;Бүгін аймағымыз, оның ішінде Сырдария ауданының тұрғындары үшін аса маңызды, тарихи сәттің куәсі болуға жиналдық. Жылына 150 мың тонна жүгері дақылын терең өңдейтін, 40 млрд.теңгенің жаңа өндіріс орнының іргетасы қалануда. Зауыт заманауи талаптарға сай жоғары сапалы технологиялармен жабдықталып, 550 адамдытұрақты жұмыспен қамтамасыз етеді. &nbsp;Биылдан бастап жүгері егісі 15 мың гектарға дейін ұлғайтылады. Бұл көрсеткіш жыл сайын артып, өңіріміздің аграрлық әлеуетін жаңа деңгейге көтеруге мүмкіндік береді. Терең өңдеуге бағытталған жүгері өндірісін қолға алған шаруаларға мемлекет тарапынан қаржылай көмек көрсетіледі. Маңызды жобаны жүзеге асыруға бастамашы болып, зор үлес қосқан инвесторларға тағы да шынайы алғысымды, зор ризашылығымды білдіремін. Зауыт құрылысының сәтті аяқталуына, жаңа нысанның ел игілігіне қызмет етуіне тілектеспін», – деді Нұрлыбек Машбекұлы.</blockquote><img src="https://knadmin.beoblood.kz/uploads/Zh_geri_deu_zauyty_5_38a6a2bd92.jpg" alt="Жүгері өңдеу зауыты 5.jpg">Рәсімде мемлекет және қоғам қайраткері Бекмырза Еламанов сөз сөйлеп, батасын берді. Айта кету керек, 2022-2025 жылдары мемлекет тарапынан аграрлық саланы қолдауға 92,4 млрд теңге бөлінді. Биыл бұл мақсатқа 34 млрд 800 млн теңге қарастырылған. Шаруашылықтар есебінен 58 млрд теңгеден астам инвестиция тартылды.Өткен жылы ауыл шаруашылығында 11 млрд 600 млн теңгенің 16 инвестициялық жобасы іске қосылып, саланың негізгі қорына тартылған инвестиция көлемі 74 пайызға артты.&nbsp;2026-2028 жылдарға арналған инвестициялық жобалардың жол картасы әзірленіп, оған 138 млрд 200 млн теңгенің 17 жобасы енгізілді. Жүйелі жұмыстың арқасында жалпы өнім көлемі жыл сайын өсіп келеді.&nbsp;Мәселен, өткен жылы бұл көрсеткіш 233 млрд 450 млн теңге болса, биыл 240 млрд 400 млн теңгеге жеткізу жоспарланған.<img class="image_resized" style="width:51.42%;" src="https://knadmin.beoblood.kz/uploads/Zh_geri_deu_zauyty_3_3ecde3d7ee.jpg" alt="Жүгері өңдеу зауыты 3.jpg"><img class="image_resized" style="width:46.97%;" src="https://knadmin.beoblood.kz/uploads/Zh_geri_deu_zauyty_4_3c76491c9c.jpg" alt="Жүгері өңдеу зауыты 4.jpg">

Сырдария ауданында жүгері дақылын терең өңдеу зауытының құрылысы басталды

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмаханов Әйтеке би кентіндегі көшелерді тегістеу жұмыстары мен Жанқожа батыр көшесінің айналма жолын қайта жаңғырту жобасын көрді.Қазіргі таңда мердігер мекеме «Сарбұлақ» жауапкершілігі шектеулі серіктестігі тарапынан кент аумағындағы жалпы 16 көшеде тегістеу жұмыстары жүргізілуде. Аудан әкімі Нұрилла ана, М. Өтемісұлы және Қ. Жаймұратов көшелеріне арнайы барып, атқарылып жатқан жұмыстардың сапасын көрді. Аталған аумақ тұрғындарымен кездесіп, олардың ұсыныс-пікірлерін тыңдады.Тұрғындар тарапынан жолдардың жай-күйіне қатысты өзекті мәселелер көтеріліп, алдағы уақытта асфальттау, жарықтандыру және абаттандыру жұмыстарына қатысты ұсыныстар айтылды. Аудан әкімі көтерілген мәселелер кезең-кезеңімен шешімін табатынын атап өтті.Аудан басшысы «Жанқожа батыр көшесінің айналма жолын қайта жаңғырту» жобасының жүзеге асу барысымен де танысты. Қазіргі уақытта нысанда жер төсемін дайындау және тегістеу жұмыстары жүргізілуде. Жобаның жалпы ұзындығы 3,192 шақырымды құрайды.Аталған жобалар кенттің көлік инфрақұрылымын жақсартуға, жол қозғалысы қауіпсіздігін арттыруға және тұрғындарға қолайлы орта қалыптастыруға бағытталған.Аудан әкімі Алмасбек Әбілқасымұлы Әйтеке би кентінің әкімі мен тиісті сала басшыларына белгіленген жұмыстарды сапалы әрі мерзімінде аяқтауды тапсырды.<img src="https://knadmin.beoblood.kz/uploads/azaly_zhol_rylysy_2_a6791b0029.jpg" alt="Қазалы жол құрылысы 2.jpg">

Жол құрылысын жаңғырту жұмыстарын көрді

<a href="https://kyzylorda-news.kz/">Kyzylorda-news.kz</a> Қазалы ауданы әкімдігінің мәжіліс залында сыбайлас жемқорлыққа қарсы іс-қимыл мәселелері жөніндегі ведомствоаралық комиссияның отырысы өтті.Жиынды ашып, жүргізіп отырған аудан әкімі Алмасбек Есмаханов алдымен күн тәртібіндегі мәселелердің маңыздылығына тоқталып, Мемлекет басшысы Қасым-Жомарт Тоқаевтың «Заң мен тәртіп» қағидаты аясында жүктеген міндеттерін жүйелі түрде жүзеге асыру қажеттігін атап өтті. Сыбайлас жемқорлықпен күрес мемлекеттік саясаттың басым бағыттарының бірі екенін жеткізіп, бұл бағыттағы жұмыстар барлық деңгейде күшейтілуі тиіс екенін айтты.Комиссияның күн тәртібінде жұмыспен қамту және әлеуметтік бағдарламалар саласында және Әйтеке би кенті әкімі аппаратымен сыбайлас жемқорлыққа қарсы іс-қимыл бағытында атқарылған шаралары мен алдағы міндеттері туралы мәселелер қаралды. Бұл жөнінде аудандық жұмыспен қамту және әлеуметтік бағдарламалар бөлімінің басшысы Совет Бабанаев пен Әйтеке би кентінің әкімі Әліби Әбиев баяндама жасады.Отырыс барысында аудан прокуроры Мадияр Бекпанов сөз сөйлеп, сыбайлас жемқорлықтың алдын алу бағытында заң талаптарын қатаң сақтау, мемлекеттік қызмет көрсету кезінде әділдік пен ашықтықты қамтамасыз ету, сондай-ақ құқық бұзушылықтарға мүлдем төзбеушілік қағидатын қалыптастыру қажеттігін атап өтті. Бұл бағыттағы жұмыстарды күшейтіп, профилактикалық шараларды жүйелі түрде жүргізудің маңыздылығына тоқталды.Жиында аудан басшысы жауапты мекеме басшылары мен қала, кент және ауылдық округ әкімдеріне сыбайлас жемқорлық тәуекелдерінің туындау себептерін анықтау және оның алдын алу жұмыстарын күшейту, мемлекеттік қызметшілердің әдеп нормалары мен мінез-құлық қағидаларын қатаң сақтау, мемлекеттік қызмет көрсету мен мемлекеттік сатып алу жұмыстарын заң талаптарына сәйкес жүргізу, бюджет қаражатын тиімді әрі мақсатты пайдалану, қызметкерлердің кірістері мен мүліктері туралы декларацияларын уақытылы тапсыруын бақылау, сондай-ақ ақылы қоғамдық жұмыстарға қабылдау кезінде ашықтықты қамтамасыз ету мәселелері бойынша нақты тапсырмалар жүктеді.Аудандық қоғамдық даму бөліміне сыбайлас жемқорлыққа қарсы мәдениетті қалыптастыру бағытында ақпараттық-түсіндіру жұмыстарын күшейтіп, әлеуметтік желілер мен бұқаралық ақпарат құралдарында жүйелі түрде жариялап отыруды тапсырды.Жиынды қорытындылаған аудан әкімі комиссия барысында қаралған мәселелер бойынша нақты міндеттер белгілеп, сыбайлас жемқорлықтың алдын алу бағытындағы жұмыстарды одан әрі жетілдіру қажеттігін айтты.

Сыбайлас жемқорлыққа қарсы іс-қимыл мәселелері жөнінде комиссия отырысы өтті

<a href="https://kyzylorda-news.kz/">Kyzylorda-news.kz</a> 45,4% респондент ақпаратты мемлекеттік тілде алуды жөн көреді, ал негізгі ақпарат көзі – әлеуметтік желі DEMOSCOPE қоғамдық пікірге жедел мониториң жүргізу бюросы 2026 жылғы 24 ақпаннан 6 наурызға дейін «Ақпарат көздеріне деген сенім» тақырыбында азаматтар арасында сауалнама жүргізді. Жобаны MediaNet Халықаралық журналистика орталығы PAPERLAB зерттеу орталығымен ынтымақтаса отырып, Конрад Аденауэр атындағы қордың қолдауымен жүзеге асырды.DEMOSCOPE бюросының сауалнамасы қазақстандықтардың медианы тұтыну құрылымы әрқилы екенін және көбінесе респонденттердің таңдайтын тілі мен жасына байланысты екенін көрсетті.Медиа кеңістікте қазақ тілінің рөлі күшеюі негізгі тенденция болып отыр. Сауалнама азаматтардың айтарлықтай бөлігі – жалпы 76,5%-і қазақ тіліндегі ақпараттарды тұтынатынын көрсетті. Оның ішінде 45,4%-і ақпаратты негізінен мемлекеттік тілде алуды жөн көрсе, 31,1%-і қазақ және орыс тілдерінде теңдей тұтынады. Әр бесінші респондент (21,1%) ақпаратты орыс тілінде алады.Ақпарат көздеріне сенім деңгейі медианы таңдау кезіндегі маңызды көрсеткішке жатады. Сауалнама нәтижесі аудиторияның көптеген медиа ресурсқа айтарлықтай күдік-күмәнмен қарайтынын көрсетіп отыр. Азаматтардың жартысынан астамы екі дерек көзін ғана салыстырмалы түрде сенімді деп санайды: мемлекеттік БАҚ (57,4%), сонымен бірге туыстары, достары мен таныстары (54,4%). Бұл ақпарат көздеріне сенбейтіндердің үлесі сәйкесінше 30,9% және 29,7%.Сенім деңгейі респонденттердің жасына орай айтарлықтай ауытқитынын айта кеткен жөн. Мәселен, ресми БАҚ-қа барынша сенім білдірген 18–29 жас аралығындағы респонденттер (66,4%). Ал мұндай ақпарат құралдарына сенім деңгейі төмен топ 50–59 жас аралығындағылар (46,5%).Қазақстандықтар басқа ақпарат көздеріне сенімсіздікпен қарайды деуге болады:<ul><li style="text-align:justify;">Блогерлер мен қоғамдық пікір көшбасшылары – 66,1% сенбейді, 16,6% сенеді</li><li style="text-align:justify;">Әлеуметтік желідегі пабликтер мен топтар – 62,9% сенбейді, 16,7% сенеді</li><li style="text-align:justify;">Ресейлік БАҚ – 60,7% сенбейді, 18,1% сенеді</li><li style="text-align:justify;">Басқа елдердің ақпарат құралдары – 48,9% сенбейді, 21,9% сенеді</li><li style="text-align:justify;">Жекеменшік БАҚ – 43,3% сенбейді, 37,3% сенеді.</li></ul>Соның ішінде инфлюенсерлерге мейлінше күмәнмен қарайтындар миллиениалдар (30–39 лет) – олардың 72,6%-і блогерлерге сене қоймайды. Бір қызығы, блогерлерге мейлінше оң көзбен қарайтындар зумерлер арасында да (18–29 жас), 50–59 жас аралығындағы топта да байқалды, бұл екі топтағы сенім деңгейі сәйкесінше 20,5% және 21,3%.Жекеменшік БАҚ-қа келгенде қоғамның пікірі қақ жарылды. Сенім білдірген респонденттер мен сенімсіздік танытқандардың үлесі шамалас: 43,3%-і сенбеймін десе, 37,3%-і сенеді. Ал жекеменшік БАҚ-тың негізгі аудиториясы – жастар (18–29 жас).Бұл жас тобында қолдаушылар үлесі мейлінше жоғары – 49,6%. 60 жастан асқан респонденттердің көзқарасы бұған қарама-қайшы – 52,7%-і жекеменшік БАҚ-қа сене қоймайды.Медианы тұтыну елдегі сөз бостандығы деңгейіне тікелей тәуелді. 2025 жылы Қазақстан «Шекарасыз репортерлер» (RSF) ұйымының халықаралық баспасөз бостандығы рейтингінде 141-орында тұр, оған сәйкес елдегі жағдай «өте алаңдатарлық» деңгейде.DEMOSCOPE сауалнамасына сәйкес, сөз бостандығын қоғамның бағалауы біртекті емес. Респонденттердің 34,9%-і сөз бостандығына қатысты жағдайды оң бағалайды.Тағы үштен бірі (33,6%) бейтарап баға береді. Азаматтардың 27,2%-і Қазақстандағы баспасөз бостандығының жағдайын теріс бағалайды. Бір қызығы, баспасөз бостандығына қатысты көзқарас респонденттердің жасына байланысты әртүрлі.Мейлінше теріс пікір білдірген 50–59 жас аралығындағылар (36,3%) болса, 18–29 жас өкілдерінің көңіл толмау деңгейі төмендеу (23%). Бұл мәліметтер Ресми БАҚ-қа деген сенім деңгейімен сәйкес келеді – жастар мейлінше оң көзбен қараса, 50–59 жас аралығындағылардың сенім деңгейі төмен болған еді.DEMOSCOPE зерттеуі мейлінше танымал ақпарат көздерін де көрсетті. Күткеніміздей, қазақстандықтардың жаңалық оқитын негізгі ақпарат көзі әлеуметтік желі болып отыр (55,9%). Одан кейінгі орында біршама төмен көрсеткішпен интернет ресурстар (30,6%) және телевидение (30,2%) тұр.Одан кейінгі орын YouTube арналар (16,1%) мен WhatsApp, Telegram және басқа мессенджерлерге (13,1%) тиесілі. Дәстүрлі БАҚ ақпарат көзі ретінде аса сұраныста емес: мерзімді баспасөз (3,4%) және радио (2,5%). (Бұл сұрақта екі жауап нұсқасына дейін таңдау мүмкіндігі болды).Сауалнама кезінде респонденттерден қандай әлеуметтік желілер мен мессенджерлерде отыратыны және қайдан ақпарат алатыны да сұралды.Сонымен, қазақстандықтардың пікірі бойынша, мейлінше танымал 5 платформа мынадай:<ul><li style="text-align:justify;">Instagram-58,0%</li><li style="text-align:justify;">TikTok-39,1%</li><li style="text-align:justify;">WhatsApp-29,0%</li><li style="text-align:justify;">YouTube-28,1%</li><li style="text-align:justify;">Telegram-16,4%</li><li style="text-align:justify;">Қазақстандықтардың азғантай бөлігі ресейлік Вконтакте (1,7%) және Одноклассники (3,3%) әлеуметтік желілерін құп көреді.&nbsp;</li></ul>Ал респонденттердің 14,7%-і әлеуметтік желіні мүлдем қолданбайтынын айтты. (Бұл сұрақта бес жауап нұсқасына дейін таңдау мүмкіндігі болды).Ақпаратты тұтыну сапасын көрсететін маңызды критерий – аудиторияның медиа сауат деңгейі мен алған ақпаратты тексеру қабілеті. Зерттеу сауалнамаға жауап бергендердің жалпы 65%-і ақпаратты басқаларға жібермес бұрын тексеретінін көрсетті.Оның ішінде 46,9%-і ылғи дерлік тексерсе, 18,1%-і арасында тексереді. Дегенмен, респонденттердің 10,8%-і ақпаратты ешқашан алдын ала тексермейтінін айтса, 7,8%-і өте сирек жағдайда ғана тексереді. Сондай-ақ, респонденттердің 39,2%-і жалған ақпарат пен рас ақпараттың ара-жігін ажырата алатынын айтқан. Соның ішінде 17,6%-і мүлдем қиналмаймын десе, 21,6%-і аса қиын соқпайтынын білдірген. Сауалнамаға жауап бергендердің 33,4%-і ақпараттың рас-өтірігін тексеруде қиналады – 13,1%-і қатты қиналса, 20,3%-і қиналатынын сезінеді. Тағы 23%-і бұл туралы ойланбағанын айтқан.DEMOSCOPE зерттеуі қазақстандықтардың медианы тұтынуы әртекті екенін және көбінесе қазақ тілінің рөлі күшейіп келе жатқанын көрсетіп отыр, соның ішінде жас топтарына қатысты айырма мен ақпаратты дұрыс қабылдауда медиа сауаттың маңызды екенін де көрсетті. Негізгі ақпарат көзі әлеуметтік желілер, интернет ресурстар және телевидение болып отырса, мерзімді баспасөз бен радио секілді дәстүрлі БАҚ-қа сұраныс төмен.Аудиторияның сенімі жақындарына, яғни туған-туысына, достары мен таныстарына тәуелді. Басқа ақпарат көздері, соның ішінде блогерлер, әлеуметтік желідегі пабликтер мен шетелдік БАҚ аса сенім тудырмайды. Мемлекеттік тілдің рөлінің күшеюі қазақ тілінде әртүрлі және сапалы контент өндіру, соның ішінде жастар аудиториясына назар аудару отандық БАҚ пен контент креаторларына арналған стратегиялық маңызды мәселе екенін аңғартады. Сондай-ақ, медиа менеджерлердің алдында материалдарды формат пен әлеуметтік желінің алгоритмдеріне бейімдеу міндеті де тұр, бұл контенттің барынша кең тарауына және назарға ілігуіне ықпал етеді.Сауалнаманың толыққанды нәтижесін жобаның сайтынан көре аласыздар. Қазақ және орыс тілдеріндегі баспасөз релизі мен инфографикалар мына сілтемеде. Материалды пайдалану кезінде DEMOSCOPE сайтына сілтеме жасау міндетті.

Қазақстандықтар әлеуметтік желіні және қазақ тілін таңдайды

<a href="https://kyzylorda-news.kz/">Kyzylorda-news.kz</a> Қала тазалығын сақтау – баршаға ортақ іс. Дегенмен, оны ұғынбай, шаһар тазалығына немқұрайлы қарайтын жандардың қатары әлі азаймай тұр. Осыған орай, тұрғындарды тазалық тәртібіне және мәдениетіне шақыру бойынша қадағалау күшейтіліп, рейдтік шаралар күнделікті жүргізілуде.&nbsp;Қала әкімінің орынбасары Дархан Тұрсынбаев қала аумағында құрылыс пен тұрмыстық қалдықтарды белгіленбеген орындарға тастап, абаттандыру қағидаларын бұзу фактілері бойынша аралау жұмыстарын жүргізді. &nbsp;Бірлескен рейд барысында кәсіпкерлерге, тұрғындарға түсіндірме жүргізілді. Айта кету қажет, рұқсат етілмеген, арнайы белгіленбеген орындарға қоқыс төгу, құрылыс материалдарын көше бойына қою, абаттандыру қағидаларын бұзу фактілері анықталған жағдайда Қазақстан Республикасының Әкімшілік құқық бұзушылық туралы кодексінің 505-бабына сәйкес шара қолданылады.<img src="https://knadmin.beoblood.kz/uploads/V_Kyzylorde_zafiksirovany_fakty_narusheniya_pravil_blagoustrojstva2_47b50d54ff.jpg" alt="В Кызылорде зафиксированы факты нарушения правил благоустройства2.jpg">

Қала тазалығы басты назарда

<a href="https://kyzylorda-news.kz/">Kyzylorda-news.kz</a> Бүгін Қорқыт ата университетінде Мемлекет басшысының бастамасымен жүзеге асып жатқан «Таза Қазақстан» жалпыұлттық экологиялық акциясы аясында «Әлемді ғылым құтқарады – IV» ғылым айлығының салтанатты ашылуы өтті.Іс-шараға партияның облыстық филиал төрағасы Жандос Базартай қатысыпы, қатысушыларды ғылым айлығының басталуымен құттықтады. Ол ғылымның қоғам дамуындағы рөліне тоқталып, оның елдің тұрақты дамуы мен өркендеуінің негізгі факторы екенін атап өтті.Сонымен қатар филиал төрағасы «AMANAT» партиясының ғылым мен білім саласын дамытуға бағытталған бастамаларына назар аударып, жас ғалымдарды қолдау, ғылыми жобаларды қаржыландыру және ғылыми нәтижелерді нақты экономикаға енгізу бағытындағы жұмыстар жүйелі түрде жүзеге асып жатқанын жеткізді. Бұл бастамалар партияның «Халықпен бірге!» сайлауалды бағдарламасының негізгі басымдықтарының бірі екенін жеткізді.Ғылым айлығы аясында экологиялық акциялар да ұйымдастырылды. Атап айтқанда, университеттің ботаникалық бағына тал егу жұмыстары жүргізілді. Бұл бастама ғылым мен табиғаттың өзара үндестігін айқындап, қоршаған ортаны қорғауға және экологиялық мәдениетті қалыптастыруға бағытталған.Акция барысында сөз алған Қорқыт ата университетінің Басқарма төрағасы – Ректор Наурызбай Байқадамов, Инжинирингтік технологиялар білім беру бағдарламасы профессоры, химия ғылымдарының кандидаты Нұрбол Аппазов мұндай шаралар жастардың ғылымға қызығушылығын арттырып, еліміздің экологиялық жағдайын жақсартуға өз үлесін қосатынына сенім білдірді.

«Әлемді ғылым құтқарады – IV» Ғылым айлығы басталды

<a href="https://kyzylorda-news.kz/">Kyzylorda-news.kz</a> &nbsp;Кеше аудан әкімі Алмасбек Есмаханов саналы ғұмырын ауданның әлеуметтік-экономикалық дамуына арнаған азамат, Бірлік ауылдық округінің әкімі қызметін атқарып келген Өтеп-Әлі Өміртай Жалғасұлына құрмет көрсетіп, зейнет демалысына шығарып салды.<blockquote>– Өміртай Жалғасұлы, саналы ғұмырын туған елінің дамуына, ауылдың өркендеуіне арнаған, өз ісіне адал, еңбекқор азамат. Бұл кісінің атқарған қызметі, ел үшін сіңірген еңбегі әрдайым жоғары бағаланып, көпшілікке үлгі болады. Ұзақ жылдар бойы халықтың сенімін ақтап, жауапты қызметтерді абыроймен атқарып, ауданымыздың әлеуметтік-экономикалық дамуына зор үлес қосты. Бүгінгі зейнеткерлік демалыс – бұл бір белестің аяқталып, жаңа өмір кезеңінің басталуы. Алдағы уақытта да отбасыңызбен бірге аман-есен, ұзақ ғұмыр кешіп, немер-шөберелеріңіздің қызығын көріп, ортамыздың ақылшысы болып жүре беруіңізге тілектеспіз, – деген аудан әкімі Өміртай Жалғасұлына облыстың ең жоғары марапаты – Қызылорда облысының «Құрмет грамотасын» табыстап, иығына шапан жапты.</blockquote>Аудан басшысынан кейін аудандық мәслихат төрағасы Ғазиз Әліш сөз алып, Өміртай Өтеп-Әлінің ауданның әлеуметтік-экономикалық дамуына, оның ішінде ауыл шаруашылығы саласының өркендеуіне қосқан еңбегіне тоқталып, ізгі тілегін жеткізді.Өз кезегінде Өміртай Жалғасұлы аудан басшысы мен әріптестеріне зор алғысын білдіріп, ел игілігі үшін жасап жатқан жұмыстарына сәттілік тіледі.Өтеп-Әлі Өміртай Жалғасұлы – 1995 жылы Алматы зоотехникалық малдәрігерлік институтын зооинженер мамандығы бойынша бітіріп, еңбек жолын 1988 жылы Жалағаш ауданындағы Калинин кеңшарында мал тұқымын асылдандыру зоотехнигі болып бастаған. 1990-2004 жылдары аудандағы шаруашылықтарда жауапты қызметтер атқарған. 2005-2017 жылдар аралығында Ақжона, Майдакөл ауылдық округтерінің әкімі болып қызмет атқарған. 2017-2019 жылдары Қазалы аудандық ауылшаруашылығы бөлімінің басшысы, 2019 жылдан бастап 2026 жылдың наурыз айына дейін Бірлік ауылдық округінің әкімі қызметін абыроймен атқарып келді.Фото: Қазалы ауданы әкімдігі

Құрметті зейнет демалысына шығарып салды

<a href="https://kyzylorda-news.kz/">Kyzylorda-news.kz</a> &nbsp;Кеше аудан әкімі Айтбай Жандарбеков аудандық мәслихат депутаттары және тиісті сала басшыларымен бірге Шиелі кентін аралап, көркейту, көгалдандыру және абаттандыру бағытындағы алдағы жобаларды пысықтады.Кент ішіндегі бірқатар нысандарды аралау барысында аудан басшысы жоспарланған жұмыстардың тиімділігіне мән беріп, ауданның келбетін жақсартуға бағытталған нақты ұсыныстарды қарастырды. Сонымен қатар, абаттандыру жұмыстарының сапасын арттыру, қоғамдық орындарды ретке келтіру және тұрғындарға қолайлы орта қалыптастыру бойынша бірқатар тапсырмалар беріліп, тиісті жоспарлар бекітілді.Сондай-ақ, аудан әкімі Мемлекет басшысының бастамасымен жүзеге асырылып жатқан «Таза Қазақстан» республикалық экологиялық акциясы аясындағы жұмыстардың барысын бағамдады. Аталған акция шеңберінде қоршаған ортаны қорғау, санитарлық тазалықты сақтау және жасыл желектерді көбейту бағытында атқарылып жатқан жұмыстарды жүйелі түрде жалғастыру қажеттігін атап өтті.Аралау барысында кент аумағындағы көркейту және абаттандыру жұмыстары да назардан тыс қалмады. Аудан басшысы жауапты сала жетекшілеріне аумақтардың тазалығын тұрақты бақылауда ұстап, көгалдандыру көлемін арттыру, сондай-ақ инфрақұрылымды жақсарту бойынша нақты міндеттер жүктеді.Жалпы, жүзеге асырылатын жобалар ауданның көркін арттырып қана қоймай, тұрғындардың өмір сүру сапасын жақсартуға және қолайлы экологиялық орта қалыптастыруға бағытталған.Фото: Шиелі ауданы әкімінің баспасөз қызметі

Кент келбетін көркейту бағытында нақты жоспарлар бекітілді

<a href="https://kyzylorda-news.kz/">Kyzylorda-news.kz</a> Ана – өмірдің бастауы, мейірім мен махаббаттың символы. Ал бала – отбасының қуанышы, болашақтың жалғасы. Ана мен бала тақырыбы қай заманда да өзектілігін жоғалтқан емес. Себебі ұлттың болашағы дені сау, тәрбиелі ұрпаққа тікелей байланысты.Бүгінде ана мен бала денсаулығын қорғау – мемлекет назарындағы маңызды мәселелердің бірі. Перзентханалар мен емханаларда анаға сапалы медициналық көмек көрсетіліп, нәрестелердің денсаулығын бақылауға арналған түрлі бағдарламалар жүзеге асырылуда. Бұл – болашақ ұрпақтың амандығына жасалған үлкен қадам. Сонымен қатар, декреттік төлемдер, әлеуметтік көмектер мен көпбалалы аналарға көрсетілетін қолдау да аналардың өмірін жеңілдетуге бағытталған маңызды шаралар болып табылады.Сонымен қатар, баланың дұрыс тәрбиесі ең алдымен отбасынан басталады. Ана баласына тек күтім жасап қана қоймай, оған мейірімділік, адамгершілік, еңбекқорлық сияқты қасиеттерді сіңіреді. Халқымыз «Ана көрген тон пішер» деп бекер айтпаған. Бала анасының іс-әрекетіне қарап өседі, сондықтан әр ана өз мінезімен, тәрбиесімен балаға үлгі бола білуі керек.Қазіргі технология дамыған заманда бала тәрбиесі бұрынғыдан да күрделене түсті. Телефон, интернет, әлеуметтік желілер балалардың санасына әсер етуде. Осындай кезеңде ата-ананың, әсіресе ананың бақылауы мен дұрыс бағыт-бағдары аса қажет. Баланың бос уақытын тиімді ұйымдастырып, кітап оқуға, спортқа, өнерге баулу – болашақ үшін маңызды инвестиция.Қазіргі таңда жас аналарға арналған пайдалы ақпараттар, психологиялық қолдау және бала күтіміне қатысты кеңестер де маңызды рөл атқарады. Себебі ана өзін жақсы сезінсе, бала да бақытты болып өседі. Ана денсаулығы, дұрыс тамақтануы және психологиялық жағдайы да ерекше назарда болуы тиіс.Менің ойымша, қоғамның дамуы ең алдымен анаға деген құрметтен басталады. Ана бақытты болса, отбасы берекелі болады. Ал тәрбиелі, білімді бала – елдің ертеңі. Сондықтан ана мен балаға қамқорлық жасау тек отбасының емес, мемлекет пен қоғамның ортақ міндеті деп есептеймін.Ана мен балаға қамқорлық жасау – әр отбасының ғана емес, тұтас қоғамның міндеті. Ана аман болса, бала бақытты болады, ал бақытты бала – жарқын болашақтың кепілі.Назым Әбілхай,Қорқыт ата атындағы Қызылорда университетінің 4-курс студентіФото: Нұрболат Нұржаубай

Архив