<a href="https://kyzylorda-news.kz/">Kyzylorda-news.kz</a> Биыл Қазақстан Республикасының Конституциясына – 30 жыл. Бұл – ел дамуының, құқықтық мемлекет ретінде қалыптасуының маңызды кезеңі. 1995 жылғы 30 тамызда қабылданған Ата Заң – еліміздің тәуелсіздігін бекітіп, азаматтардың құқықтары мен бостандықтарының, мемлекеттік билік тармақтарының, соның ішінде сот жүйесінің конституциялық негізін айқындады.Қазақстан Республикасы Конституциясының 75-бабына сәйкес, сот төрелігін тек сот қана жүзеге асырады, ал сот билігі тек Конституция мен заңдарға сүйенеді.Бұл қағида Қызылорда қалалық сотының күнделікті қызметінің негізіне айналған. Қалалық сот – азаматтық істер бойынша әділ шешім шығарып, Конституцияда бекітілген адам және азаматтың құқықтарын қорғауды басты мақсат етіп отыр. Конституциялық нормалар – әрбір судья мен сот қызметкерінің кәсіби және адамгершілік бағдаршамы.Құқықтық мемлекет – сот арқылы көрінедіКонституцияның 13-бабында әрбір азаматтың өз құқықтары мен бостандықтарын сот арқылы қорғауға құқылы екені жазылған. Бұл – құқықтық мемлекеттегі басты қағидалардың бірі. Қызылорда қалалық соты соңғы жылдары ашықтық, жариялылық, қолжетімділік бағытында жүйелі жұмыс жүргізіп келеді.<ul><li style="text-align:justify;">Азаматтар электронды түрде талап қоюға, құжат тапсыруға, істің барысын онлайн бақылауға мүмкіндік алды.</li><li style="text-align:justify;">Медиация, татуласу рәсімдері және сотқа дейінгі реттеу жолдары кеңінен қолданыла бастады.</li><li style="text-align:justify;">Азаматтардың сотқа деген сенімі артып келеді – бұл сот жүйесінің сапалы қызметінің көрсеткіші.</li><li style="text-align:justify;">Конституциялық реформалар – сот жүйесінің жаңа кезеңі</li></ul>Соңғы жылдары жүргізілген сот реформалары Ата Заң негізінде жүзеге асырылды.&nbsp;Атап айтқанда:<ul><li style="text-align:justify;">Судьяларды іріктеу жүйесі күшейтілді;</li><li style="text-align:justify;">Жаңа әкімшілік әділет институты енгізілді;</li><li style="text-align:justify;">Сот процестерінің сапасы мен сот актілерінің орындалуына бақылау күшейді.</li></ul>Бұл өзгерістер Қызылорда қалалық сотында да оң нәтиже беріп отыр. Сот төрелігі неғұрлым әділ, кәсіби және заманауи үлгіге сай жүргізілуде.Конституция – елдің құқықтық қазығы, ал сот – сол қағидаларды іс жүзінде орындайтын билік тармағы. Қызылорда қалалық соты 30 жылдық Ата Заң тарихында өз үлесін қосып, азаматтардың құқықтары мен заңды мүдделерін қорғау жолында қызмет етіп келеді.«Конституция үстем болса – әділет орнайды. Ал әділет бар жерде – қоғамда тұрақтылық пен сенім нығаяды.»Әбдуәли Л.Р,Қызылорда қалалық сот әкімшісінің&nbsp;жетекші маманыФото: gov.kz

Конституция – әділет пен заң үстемдігінің негізі

<a href="https://kyzylorda-news.kz/">Kyzylorda-news.kz</a> Сырдария ауданында жұмыссыздықты азайту және халықты жұмыспен қамту бағытындағы іс-шаралар белсенді түрде жүзеге асырылуда. Биыл ауданда жаңа жұмыс орындары ашылып, тұрғындардың тұрақты еңбекке орналасуы қамтамасыз етілуде. Бұл туралы бүгін Өңірлік коммуникациялар қызметінің ақпарат алаңында Сырдария ауданының әкімі Берік Сәрменбаев баяндады.<blockquote>- Халықтың жұмыспен қамтылуы - біздің ең басты мақсатымыз. Биылғы жылы өңірлік жұмыспен қамтудың жол картасы аясында 1293 жаңа жұмыс орны ашылды. Ұлттық жобалар бойынша 13 жоба іске қосылып, 105 адам тұрақты және уақытша жұмысқа орналасты. Мемлекет басшысының тапсырмасына сәйкес, әр 10 мың адамға 100 жаңа жұмыс орнын ашу мақсатында аудан көлемінде 186 жұмыс орны құрылды. Бұл көрсеткіштер алдағы уақытта жұмыспен қамтуды одан әрі кеңейтуге мүмкіндік береді. Жұмыссыздық деңгейін төмендету - экономикалық тұрақтылық пен тұрғындардың өмір сапасын арттырудың негізгі шарты. Аудандағы жаңа жұмыс орындары халықтың әлеуметтік жағдайын жақсартуға және ауданның дамуына оң әсерін тигізуде. Алдағы уақытта да жұмыспен қамтуды кеңейту бағытындағы іс-шаралар жалғасатын болады,-деді Берік Әбдіғаппарұлы.</blockquote>Сырдария ауданында тұрғындардың өмір сүру сапасын жақсарту мақсатында сапалы жол инфрақұрылымын дамытуға ерекше көңіл бөлініп, жүйелі жөндеу жұмыстары жүргізілуде. Аудандағы автомобиль және ішкі көшелердің жағдайы жақсартылып, халықтың көлік қатынасы мен қауіпсіздігі қамтамасыз етілуде.<blockquote>- Халықтың күнделікті тұрмысын жеңілдету үшін сапалы және қауіпсіз жолдар маңызды екенін жақсы түсінеміз. Аудан аумағында жалпы ұзындығы 263 шақырымнан астам автомобиль жолдары бар, оның 44 шақырымы республикалық, 111 шақырымы облыстық, ал 108 шақырымы аудандық маңызға ие. Аудандық маңызы бар жолдардың 99 пайызы жақсы және қанағаттанарлық жағдайда. Ішкі жолдардың 82 пайызы жақсы жағдайда. Биыл жол саласына 5 жобаға 1 миллиард теңгеден астам қаржы бөлінді. Қазіргі таңда «Қызылорда-Аэропорт-Қоғалыкөл-Шіркейлі» автожолының қалған 10 шақырымы күрделі жөндеуден өтіп, жалпы 46 шақырым жол жаңартылды. Сондай-ақ, Шіркейлі, Шаған және С.Сейфуллин елді мекендерінде 7 көше күрделі жөндеуден өтіп жатыр, жұмыстар жақын арада аяқталады. Бұл жұмыстар ауданның әлеуметтік-экономикалық дамуына және тұрғындардың жайлы өмір сүруіне септігін тигізеді, - деді аудан әкімі.</blockquote>Сырдария ауданында кәсіпкерлікті дамыту мен өнеркәсіп өндірісін ұлғайту бағытында жүйелі жұмыстар жүргізілуде. Биылғы жылдың бірінші жартыжылдығында өңірде өнеркәсіп өнімінің көлемі өсті, шағын және орта бизнес белсенділігі артты. Бұл көрсеткіштер мемлекеттік бағдарламалар мен қаржылай қолдаудың нәтижесінде қалыптасуда.&nbsp;<blockquote>- Мемлекет басшысы кәсіпкерлікті дамытуға нақты тапсырмалар жүктеді. Біз ауданымызда осы бағытта жүйелі жұмыстарды жүргізудеміз. Биылғы жылдың бірінші жартыжылдығында өнеркәсіп өнімінің көлемі 49 млрд. теңгеге жуықтап, өткен жылдың осы кезеңімен салыстырғанда 106 пайызға орындалды. Шағын және орта кәсіпкерлік саласында 2600-ден астам кәсіпкер тіркеліп, оның 2550-ге жуығы нақты жұмыс істеуде. Аудандағы шағын және орта кәсіпкерлер 6,5 млрд. теңгенің өнімін өндіріп, 23 пайыздық өсімге қол жеткізді. Мемлекеттік бағдарламалар аясында кәсіпкерлерге жыл басынан бері 75 жоба бойынша 3,7 млрд. теңге көлемінде несие және грант қаражаты берілді. Бұл қаржы жаңа жобаларды іске асыруға және кәсіпкерлікті одан әрі дамытуға мүмкіндік береді, - деді Берік Әбдіғаппарұлы.</blockquote>

Сырдария ауданында кәсіпкерлік саласын дамыту жұмыстары жалғасуда

<a href="https://kyzylorda-news.kz/">Kyzylorda-news.kz</a> Арал ауданы әкімдігінің мәжіліс залында Қызылорда облысының санитариялық-эпидемиологиялық бақылау департаментінің 2025 жылдың І жарты жылдық қорытындысымен көшпелі алқа мәжілісі өтті.Жиынды Арал ауданының әкімі Аманжол Оңғарбаев ашып, көшпелі мәжіліске келген қонақтарды таныстырып өтті. Алқа отырысына Қызылорда облысы бойынша санитариялық-эпидемиологиялық бақылау департаментінің басшысы Г.Сыздықова, Қызылорда обаға қарсы күрес стансасының директоры Н.Нұрмағанбетов және «Ұлттық сараптама орталығының» Қызылорда облысы бойынша филиалы директорының міндетін атқарушы А.Мырзағұлова мен Қызылорда қаласы мен аудандардағы санитариялық-эпидемиологиялық бақылау басқармаларының басшылары арнайы қатысты.Қазіргі таңда, санитариялық-эпидемиологиялық ахуалды жақсарту арқылы халықтың денсаулығын сақтау мен жұқпалы аурулардың алдын-алу үшін Үкімет тарапынан кешенді шаралар қабылдануда. Осы бағытта облыс деңгейінде де көптеген жұмыстар атқарылып жатқаны белгілі. Дегенмен, санитариялық-эпидемиологиялық тұрақтылықты сақтау, жаңа қауіп-қатерлерге дайын болу, заманауи әдістер мен зертханалық мүмкіндіктерді жетілдіру күн тәртібінен түспейтін басты міндеттердің бірі.Арал ауданынан басталған көшпелі алқа отырысында алғаш болып ҚР ДСМ СЭБК Қызылорда облысы бойынша департаменті басшысының орынбасары Е.Ұзақбаев «2025 жылдың І жартыжылдық қорытындысымен облыс бойынша қалыптасқан эпидемиологиялық ахуал, атқарылған жұмыстар мен алға қойған міндеттері» туралы хабарлама жасады.Қосымша Арал аудандық санитариялық-эпидемиологиялық бақылау басқармасының басшысы А.Сатекеева «Арал аудандық санитариялық-эпидемиологиялық бақылау басқармасының атқарған жұмыстары мен проблемалық мәселелері» туралы баяндады.Мұнан соң «Мемлекеттік тапсырыс жоспарының орындалуы» туралы «Ұлттық сараптама орталығы» ШЖҚ РМК Қызылорда облысы бойынша филиалының директорының міндетін атқарушы А.Мырзағұлова және «2025 жылдың І жартыжылдық қорытындысымен атқарылған жұмыстар мен алға қойған мақсаттары» туралы «Ұлттық сараптама орталығы» ШЖҚ РМК Қызылорда облысы бойынша филиалының Арал аудандық бөлімше бастығы Б.Қайнбаева хабарлама жасады.&nbsp;Мәжіліс соңында «Арал аудандық обаға қарсы күрес стансасының атқарған жұмыстары» туралы ҚР ДСМ «Арал теңізі обаға қарсы күресу стансасы» РММ басшысы Е.Мұстапаев хабарлама жасап, обаға қарсы күресу стансасының құрылу тарихы мен атқарған жұмыстарына жан-жақты тоқталды.Жиын қорытындысына сәйкес көтерілген ұсыныс-пікірлер жан-жақты сараланып, ҚР ДСМ СЭБК Қызылорда облысы бойынша санитариялық-эпидемиологиялық бақылау департаментінің басшысы Гүлмира Жамбылқызы айтылған ұсыныстардың барлығы алдағы уақытта ескеріліп, сала бойынша жол берілген кемшіліктердің барлығын жоюға жұмыс жасау керектігін жеткізді.

Алқа мәжілісінде бірқатар мәселелерді саралады

<a href="https://kyzylorda-news.kz/">Kyzylorda-news.kz</a> 1-31 тамыз аралығында Қазақстанда Ұлттық ауыл шаруашылығы санағының бірінші кезеңі өтеді. Осы уақыт аралығында барлық қатысушы sanaq.gov.kz сайтында онлайн форматта санақтан өте алады. Сайтта ауыл шаруашылығы өндірушілері мен үй шаруашылықтарына арналған екі түрлі сауалнама парағы болады.Өсімдік шаруашылығымен, мал шаруашылығымен немесе балық шаруашылығымен айналысатын заңды тұлғалар, жеке кәсіпкерлер мен шаруа (фермер) қожалықтары 2-АШК/ШФҚ санақ парағын толтыруы тиіс. Бұл сауалнама тоғыз бөлімнен тұрады және 29 сұрақты қамтиды. Онда жер учаскелерінің көлемі, олардың қалай пайдаланылып жатқаны, суару тәсілдері, жердің меншікке немесе жалға алынғаны туралы мәліметтер көрсетілуі керек.Сондай-ақ сауалнамада шаруашылықтағы мал, құс, балық саны, қолданылатын техника, құрал-жабдықтар, қоймалар, сақтау орындары мен басқа да қажетті нысандар туралы ақпарат сұралады. Қатысушылар тыңайтқыштарды, өсімдіктерді қорғау құралдарын қолдану, органикалық өнім өндіру, ауыл шаруашылығы өнімдерін өткізу, сондай-ақ жұмысшылардың саны мен олардың сипаттамасы жөнінде де мәлімет береді.Егер шаруашылық бірнеше өңірде қызмет жүргізсе, әр өңір бойынша жеке бөлімді толтыру қажет. Бұл парақта жер учаскелерінің, егістік алқаптарының, мал мен құстың нақты орналасқан жері көрсетілуі тиіс.Бақша егетін немесе мал мен құс ұстайтын үй шаруашылықтары да санаққа қатысады. Олар үшін 3-ЖҚШ сауалнама парағы қарастырылған. Бұл сауалнамада қандай дақылдар өсірілетіні, қанша мал мен құс ұстайтыны, жайылымдарды қолданатыны, мал ұстауға арналған құрылыстардың бар-жоғы, сондай-ақ өнімнің сатылатыны немесе жек тұтынуға пайдаланылатыны туралы мәлімет беріледі. Үй шаруашылықтарына арналған сауалнама 8 бөлімнен және 22 сұрақтан тұрады.Барлық ұсынылатын ақпараттың құпиялылығы сақталады, деректер «Мемлекеттік статистика туралы» заңымен қорғалады және салық немесе басқа мемлекеттік органдарға берілмейді.Санақ аясында Бюро еліміз бойынша шамамен 300 мың ауыл шаруашылығы ұйымын және 2 млн үй шаруашылығын қамтуды жоспарлап отыр.

Ауыл шаруашылығы санағы кезінде қандай сұрақтар қойылады?

<a href="https://kyzylorda-news.kz/">Kyzylorda-news.kz</a> &nbsp;Елорда соты «Biz birgemiz» қайырымдылық қорының бұрынғы жетекшісі Перизат Қайрат пен оның анасы Ғайни Алашбаеваға үкім шығарды. Бұл туралы <a href="https://kaz.inform.kz/news/perizat-kayrat-zhilga-anasi-zhilga-sottaldi-7e86bd/">kaz.inform.kz </a>хабарлады.&nbsp;Перизат Қайратты Қылмыстық кодекстің 190-бабы 4-бөлігінің 2-тармағында көзделген қылмысты жасағаны үшін кінәлі деп танып, оған 8 жыл мерзімге бас бостандығынан айыру жазасын, сондай-ақ 10 жыл мерзімге қайырымдылық қызметпен айналысу құқығынан айыра отырып, мүлкін тәркілеу түріндегі қосымша жаза тағайындалды. Сондай-ақ Қылмыстық кодекстің 58-бабының 3-бөлігі негізінде бірнеше қылмыс жасау жиынтығы бойынша жазаны ішінара қосу жолымен түпкілікті 10 жыл мерзімге бас бостандығынан айыру жазасы тағайындалды,&nbsp;– деді Астана қаласы қылмыстық істер жөніндегі ауданаралық сотының судьясы Сабыржан Кәрімов.Перизат Қайрат жазасын қауіпсіздігі орташа деңгейдегі мекемеде өтейді.Одан әрі судья сотталушының анасы Ғайни Алашбаеваға үкім шығарды.<blockquote>–&nbsp;Анасын Қылмыстық кодексінің 190-бабы 4-бөлігінің 2-тармағы бойынша кінәлі деп танып, 6 жыл мерзімге бас бостандығынан айыру жазасын, сондай-ақ 10 жыл мерзімге қайырымдылық қызметпен айналысу құқығынан айыру және мүлкін тәркілеу түріндегі қосымша жаза тағайындалсын. Сондай-ақ Қылмыстық кодекстің 218-бабы 3-бөлігінің 3-тармағы бойынша кінәлі деп танып, оған 5 жыл мерзімге бас бостандығынан айыру және мүлкін тәркілеу жазасы тағайындалсын. Қылмыстық кодекстің 58-бабының 3-бөлігіне сәйкес бірнеше қылмыс жасау жиынтығы бойынша жазаны ішінара қосу жолымен Ғайни Алашбаеваға түпкілікті жаза ретінде 7 жыл мерзімге бас бостандығынан айыру, 10 жыл мерзімге қайырымдылық қызметпен айналысу құқығынан айыру және мүлкін тәркілеу жазасы тағайындалсын,&nbsp;— деді судья.</blockquote>Перизат Қайраттың анасы да&nbsp;жазасын қауіпсіздігі орташа деңгейдегі мекемеде өтейді.Айта кетсек, прокурор Перизат Қайратты 10 жыл, анасын 8 жыл бас бостандығынан айыруды&nbsp;сұраған еді.&nbsp;Еске салайық, Перизат Қайрат пен оның анасы Ғайни Алашбаевадан жауап алу жабық режимде өтті.&nbsp;Атышулы іске қатысты Үкімет басшысы Олжас Бектенов пікір білдіріп, «Перизат Қайрат ісі&nbsp;– заңнамалық өзгерістер үшін мүмкіндік» деген еді.Фото: Перизат Қайраттың жеке парақшасы

Перизат Қайрат 10 жылға, анасы 7 жылға сотталды

<a href="https://kyzylorda-news.kz/">Kyzylorda-news.kz</a> Биыл Қызылорда облысында жол-көлік инфрақұрылымын жақсарту бағытында 42 миллиард теңге қаржы қаралып, ауқымды жобалар жүзеге асырылып жатыр. Әсіресе, жаңадан салынып жатқан жол құрылыстарының сапасына баса мән беріліп отыр. Осы орайда «Жол активтері сапасының ұлттық орталығы» ҚОФ мамандары БАҚ өкілдерімен бірге қала аумағындағы бірқатар нысандарға жылжымалы зертханамен тексеру жүргізіп, арнайы пресс-тур ұйымдастырды.Қаланың жол қатынасын оңтайландырып, көлік кептелісі мәселесін шешуге бағытталған Тәуелсіздікке 25 жыл даңғылы кеңейтіліп қана қоймай, бүгінде Әбілқайыр хан көшесінен Саламатов көшесіне дейін ұзарту көзделген. Яғни, Сырдария өзенінің бойымен 2,8 шақырым жаңа жол салынып, дария бөгетін нығайту жұмыстары қызу жүріп жатыр. Мердігер «УАД» мекемесі. Жоба бойынша жол төрт жолақты болады. Алдымен топырақпен үйілген жер қабаты нығыздалып, 25 см малта тасты құмды қоспа салынды. Содан кейін 8см қиыршық тас пен 6 см ірі түйіршікті ыстық асфальт бетон қоспасы төселуде. Ең соңғы қабатына қиыршық тасты мастикалық асфальт бетон қоспасы салынады.<blockquote>Тәуелсіздікке 25 жыл даңғылында жұмыстар мамыр айынан басталды. Содан бері, жолдың негізгі қабаты толық жүргізілді. Қазір бірқатар учаскесінде асфальт төсеу жұмыстары басталып кетті. Бұл нысан бойынша филиал мамандары құрылыс-материалдарынан 5 рет сынама алып, жолдың сапасы ұдайы бақылауда. Зертханалық тексеру барысында өрескел кемшіліктер анықталған жоқ. Дегенмен, бірқатар сын-ескертпе берілді. Мердігер мекеме тарапынан уақытында талапқа сай түзету жұмыстары жүргізілді. Жалпы ЖАСҰО мамандары жыл басынан бері 126 нысан бойынша жол құрылыс жұмыстарына 607 мәрте зертханалық және аспаптық тексеруге шыққан. Барлығы 1714 сынама алынып, тиісті сараптама жасалды. Бүгінде аймақ басшысы да жолдардың сапалы салынуына баса назар аударып отыр. Сондықтан, орталық мамандары бұл бағытта бақылау жұмыстарын күшейтіп, кемшіліктерге жол бермеу басты міндетіміз,-дейді ЖАСҰО Қызылорда филиалының директоры Мақсат Мұқанов.</blockquote>Сондай-ақ, тағы бір маңызды жоба «Қызылорда-Жезқазған» республикалық автожолының қала аумағынан өтетін 2-12 шақырым аралығына орташа жөндеу жұмыстары. Бұл нысан «ҚазАвтоЖол» ҰК» АҚ қаржыландыруымен жүзеге асырылып жатыр. Жөндеуден өтіп жатқан автожол шаһардың іргесіндегі Қарауылтөбе, Досан, Абай елді мекендері мен Бәйтерек мөлтек ауданы тұрғындарының көлік қатынасына оң септігін тигізеді. Ұлттық сапа орталығының жылжымалы зертханасымен жаңадан төселген асфальт жабындысынан сынама алынды. Мамандар бұған дейін де 40 мәрте тексеріп, барлығы 122 сынама зертханалық тексеруден өткен.<blockquote>- &nbsp; Орташа жөндеуден өтетін автожолдың ұзындығы 9,5 км. Ені – 14 метр болады. Жер төсемесін кеңейту жұмыстары жүргізіліп, 7,3 шақырымында жолдың негіздемесі 20 см қалыңдықта ресайклерлеу әдісімен жасалды. Содан кейін 6,0 шақырым ұзындықта 8 см ірі түйіршікті асфальт төселіп, жамылғының жоғарғы қабатына 5 см қиыршық тасты мастикалық асфальт төсеу жұмыстары басталды. Бүгінде жоғарғы қабаты бойынша 1,6 шақырымы орындалды. Жоғарғы қабаты төселген учаскелерде кезең кезеңімен жол қозғалысын ұйымдастыру жоспарлануда.-дейді «ҚазАвтоЖол» ҰК» АҚ ҚОФ директорының орынбасары Ерсайын Мұзафар.</blockquote>Жол құрылысынан алынған барлық сынама орталықтың заманауи зертханасында сараптамадан өтеді. Автоматтандырылған қондырғылар арқылы асфальт жабындысының тығыздығы, суға қанығу коэфицентіөлшеніп, оның құрамындағы қиыршық тас пен құмның да сапасы анықталады.<blockquote>Аймақ жолдарының сапасын арттыру үшін ең бастысы құрылыс-материалдарын сараптамадан өткізетін зертхана заман талабына сай болуы керек.Ұлттық сапа орталығында қазір қағазбастылық жоқ. Жолдан алынған әрбір сынама арнайы планшет арқылы базаға тіркеледі. Асфальт жабындысы нөмірленіп, қандай сараптама жүргізілгені және оның нәтижесі барлығы тайға таңба басқандай платформада көрсетіліп тұрады. Яғни, қазір толықтай цифрлық жүйеге көштік. Зертханада 100-ден аса соңғы үлгідегі заманауи қондырғы бар. Бұрын бір сынамаға 10-15 күніміз кететін болса қазір 3 күннің ішінде сапасын анықтап береміз. Мамандарымыз жыл сайын шет елдерде біліктілік арттырып, олардың озық тәжірибесін өндіріске енгізіп жатырмыз,- дейді зертхана меңгерушісі Мағжан Қасымхан.</blockquote>Айта кетейік, бүгінде Жол активтері сапасының ұлттық орталығы мамандары республикалық жолдар бойынша 11 нысанға, облыстық маңыздағы 10 жобаға, аудандық және елді мекендерді ішкі жолдар 88 жолға, қалада 16 көшенің құрылысына бақылау жүргізуде.

Жылжымалы зертханамен автожолдардың құрылысы тексерілді

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимов кезектілік тәртібімен жазылған аудан тұрғындарын жеке қабылдады.Қабылдауда ұсыныс-пікірін, өтінішін жеткізген тұрғындардың сауалдары назарға алынып, заң аясында шешілу жолдары қарастырылды. Сондай-ақ, көтерілген мәселелерге заңға сәйкес түсіндіру жұмыстары жүргізіліп, сала басшыларына тиісті тапсырмалар берілді.Айта кетейік, тұрғындар аудан әкімінің қабылдауына egov.kz порталы, е-otinish бірыңғай базасы арқылы немесе әкімдікке келіп, жазбаша өтініш беру арқылы жазыла алады.

Кезектілік тәртібі бойынша тұрғындарды жеке қабылдады

<a href="https://kyzylorda-news.kz/">Kyzylorda-news.kz</a> Аймақтағы мемлекеттік қызметшілердің құқықтық сауаттылығын арттыру мақсатында құзырлы органдар тарапынан құқықтық оқытулар, түсіндірмелік семинар-кеңестер ұдайы өткізіліп келеді. Бұл жұмыстарда Әдеп жөніндегі уәкілдер институтының рөлі ерекше.Осы мақсатта облыс әкімі аппаратының әдеп жөніндегі уәкілі Бағдат Әбдіқадыр Сырдария ауданының жергілікті атқарушы орган қызметкерлеріне семинар-кеңес өткізді. Жиынның басты мақсаты – Қазақстан Республикасының мемлекеттік қызметі, сыбайлас жемқорлыққа қарсы іс-қимыл заңнамаларының талаптарын түсіндіру және мемлекеттік қызметшілердің қызметтік әдебін нығайту. Семинар-кеңеске аудан әкімі аппаратының басшысы, әдеп жөніндегі уәкілі Нұржан Ешниязов, кент, ауылдық округ әкімдері, дербес бөлімдердің, квазимемлекеттік сектор субъектілерінің басшылары мен қызметкерлері қатысты.Әдеп жөніндегі уәкіл семинар-кеңес барысында қолданыстағы мемлекеттік қызмет, сыбайлас жемқорлыққа қарсы іс-қимыл заңнамаларының және Әдеп кодексінің нормаларына қатысты ақпарат беріп, мемлекеттік қызметшілердің құқықтары мен әлеуметтік кепілдіктерін жан-жақты түсіндірді. Сондай-ақ, мемлекеттік қызметшілердің қызметтен тыс уақыттағы мінез-құлқы және сыбайлас жемқорлық шектеулеріне тоқталды. Мемлекеттік орган қызметкерлерінің арасында лудоманияның алдын алу мақсатында ойын мекемелеріне барудан бас тарту, құмар ойындарға және бәс тігуге қатысу туралы түсіндірме берілді.<blockquote>«Мемлекеттік қызметші өзінің жауапкершілігін, мәртебесін сезіне отырып, барлық іс-әрекеттерін әдеп нормаларының шеңберінде жүзеге асыруы тиіс. «Сыбайлас жемқорлыққа қарсы іс-қимыл туралы» Қазақстан Республикасы Заңының 12-бабының 1-тармағында жауапты мемлекеттік лауазымды атқаратын адамдар, мемлекеттік функцияларды орындауға уәкілеттік берілген адамдар және оларға теңестірілген адамдар сыбайлас жемқорлыққа қарсы шектеулерді қабылдайды деп көрсетілген. Шектеулердің бірі - құмар ойындарға және бәс тігуге қатысу. Қазақстан Республикасының «Ойын бизнесі туралы» Заңының 15-бабы 1-тармағының 2) тармақшасына сәйкес құмар ойындарға және (немесе) бәс тігуге қатысуы шектелген адамдардың қатысуына тыйым салынған. Сәйкесінше сыбайлас жемқорлыққа қарсы шектеулерді қабылдамау лауазымға қабылдаудан бас тартуға не жұмыстан шығаруға (атқарып жүрген лауазымынан босатуға, өкілеттіктерін тоқтатуға) алып келеді», - деді Б.Әбдіқадыр.</blockquote>Жиындардың соңында мемлекеттік қызметшілерден ұжымдағы қарым-қатынас деңгейін анықтауға арналған анонимді сауалнамалар алынды. Сонымен қатар, Әдеп жөніндегі уәкіл мемлекеттік қызметшілер мен азаматтарға жеке қабылдау өткізді. Жеке қабылдауға келген мемлекеттік қызметшілердің сұрақтарына жауап берді.

Әдеп жөніндегі уәкіл мемлекеттік қызметшілермен кездесті

<a href="https://kyzylorda-news.kz/">Kyzylorda-news.kz</a> ҚР Қаржы нарығын реттеу және дамыту агенттігі әзірлеген жаңа қаулы халықтың әлеуметтік осал топтарына жататын, табысы төмендеген немесе төтенше жағдайдың салдарынан зардап шеккен азаматтарға көмек көрсетуге арналған.&nbsp;Шарт талаптарын өзгертуге кім құқылы екендігі және оны қалай рәсімдеуге болатыны жөнінде Fingramota.kz-пен бірге қарастырып көрелік.&nbsp;Қазақстанда төтенше жағдайлар жиі орын алады.&nbsp;Су тасқыны, үсік шалу және басқа да ауа райының күрт өзгерістері халықтың, әсіресе әлеуметтік осал топтардың және кәсіпкерлікпен айналысатын азаматтардың қаржылық жағдайына теріс әсер етуі мүмкін.Бұған дейін және қазіргі таңда да банктер мен микроқаржы ұйымдары әлеуметтік осал санаттағы немесе төтенше жағдайлардан зардап шеккен азаматтарға ерікті түрде кредит төлеуді кейінге шегеру мүмкіндігін ұсынып келеді.Жаңа ережелер және олар қандай көмек береді &nbsp;Жаңа нормативтік құқықтық актімен мұндай көмек міндетті және бірыңғай болады. Түзетулер өткен жылы қабылданған&nbsp;қаржылық қызметтерді тұтынушылардың құқықтарын қорғау&nbsp;туралы заңмен тікелей байланысты - олар төтенше жағдай (мысалы, табиғи апаттар немесе техногендік апаттар), сондай-ақ кірістің төмендеуі кезінде халықты қолдау құралдарын күшейтеді.Жаңа актілерге сәйкес, кейінге қалдырудың ең аз мерзімі — 3 айдан кем емес және оны тек жоғары қарай өзгертуге болады. Сонымен қатар, егер сіз ХӘОТ санатына жатсаңыз немесе төтенше жағдайдан зардап шеккен болсаңыз және оны құжатталған түрде растай алсаңыз, кейінге қалдыру&nbsp;комиссия, өсімпұл және айыппұл есептелмей&nbsp;беріледі.Ең маңызды тұсы – кредитті өтеуді кейінге шегеру табыстың азаюы жағдайында ғана қарастырылады. Мұндай жеңілдік алу үшін келесі құжаттарды ұсыну қажет:<ul><li style="text-align:justify;">табыстың азайғанын растайтын анықтамалар;</li><li style="text-align:justify;">жұмыс орнынан берілген анықтама;</li><li style="text-align:justify;">сіздің төтенше жағдай аймағында болғаныңызды растайтын құжаттар.</li></ul>Банктер мен МҚҰ нақты орын алған жағдайға байланысты жәбірленушіден белгіленген тәртіппен құжаттар сұратуға тиіс – мысалы, төтенше жағдай кезінде тізім - бір тізім, кірісі төмендеген кезде - басқа тізім болады. НҚА әрбір жағдайға бейімделген қағаздардың жеңілдетілген тізбесін, сондай-ақ осындай жағдайларды қарау кезінде дәлдікті, ашықтықты және біркелкілікті көздейді.Нәтижесінде қаржы ұйымдары негізсіз бас тарта алмайды, ал қарыз алушылар өз жағдайларын қосымша шығындар мен артық төлемдерсіз реттеуге мүмкіндік алады.&nbsp;НҚА жобасы кредиттерді кейінге қалдыруды қол жетімді, түсінікті және заңмен қорғалған етеді. Егер сіз талаптарға сай болсаңыз, үш айлық демалысқа кепілдік беріледі. Жобаны талқылау аяқталды, ол жақын арада қабылданады және қолданысын бастайды.Егер кейінге қалдыру стандартты жағдайда орын алса2021 жылдан бастап проблемалық берешекті реттеудің бірыңғай тәртібі қолданылады. Ол шамамен 2,2 млн қарыз алушының шарттарының талаптарын өзгертуге мүмкіндік берді.Мерзімін өткізу басталған жағдайда қарыз алушы ол басталған күннен бастап&nbsp;күнтізбелік 30 күн&nbsp;ішінде жазбаша өтінішпен не кредиттік шартта жазылған өзге де тәсілмен қарызды қайта құрылымдау үшін кредиторға жүгінуге құқылы. Алайда, егер сіз мерзімін кешіктіру жақын арада басталатынын түсінсеңіз, мұны алдын-ала жасауға болады. Тек кредиторға жүгіну фактісін тіркеу қажет.Өтініште кірістің төмендеуі немесе жұмысынан айрылу сияқты&nbsp;төлем мерзімін кешіктірудің туындау&nbsp;себебі көрсетілген; күрделі ауру немесе мүгедектік; декреттік демалыс; форс-мажорлық жағдайлар (өрт, мүлікті ұрлау және т.б.). Себептерді көрсеткеннен&nbsp;кейін бәрін құжатпен растаңыз.Сондай-ақ, өтініште сіз қайта құрылымдаудың нұсқаларын көрсете аласыз. Мұндай әрекеттер айыппұл төлемеу, кредиттік тарихтың нашарлау және сот арқылы өндіріп алуды болдырмауды төмендетуге көмектеседі.Есіңізде болсын! Қарызды қайта құрылымдау түрлері: &nbsp;<ul><li style="text-align:justify;">сыйақы мөлшерлемесін төмендету;</li><li style="text-align:justify;">төлемді кейінге қалдыру;</li><li style="text-align:justify;">өтеу әдісінің өзгеруі (бұл шарт кепілмен қамтамасыз етілген қарыздарға тән);</li><li style="text-align:justify;">қарыз мерзімін ұлғайту;</li><li style="text-align:justify;">мерзімі өткен негізгі борышты және (немесе) сыйақыны кешіру, айыпақыны (айыппұл, өсімпұл), комиссияларды және қарызға қызмет көрсетуге байланысты өзге де төлемдерді жою;</li></ul>Егер қарыз болған жағдайда кепілді қарыз алушы мүлікті&nbsp;үш ай&nbsp;ішінде соттан тыс тәртіппен дербес өткізуге құқылы.Кредитор&nbsp;күнтізбелік 15 күн&nbsp;ішінде қарыз алушының өтінішіне жауап беруі керек. Бұл ретте кредитордың кредит беру шартының талаптарын өзгерту жөніндегі ұсыныстарын алған күннен бастап күнтізбелік 30 күн ішінде қайта құрылымдау талаптары бойынша келісімге қол жеткізбеу&nbsp;реттеуден бас тарту болып есептеледі.Есіңізде болсын, банктер мен МҚҰ кредитті қайта құрылымдау мәселесін қарау үшін қарыз алушыдан мерзімі өткен берешекті немесе оның бір бөлігін біржолғы өтеуді талап ете алмайды.Егер келісімге келе алмасаңызЕгер кредитор мен қарыз алушы өзара қолайлы шешім таба алмаса, бұл жағдайда қарыз алушы банктік немесе микроқаржы омбудсманына жүгіне алады.Банк омбудсманы Дархан Қадырбайұлы Нұрпейісов болып табылады. 2024 жылғы 21 желтоқсаннан бастап банк омбудсманының өкілеттігі кеңейтілді. Омбудсманның негізгі міндеті – қарыз алушылар мен кредиторлар арасындағы қаржылық дауларды сотқа дейінгі реттеу. Ол қазақстандықтардың барлық қарыздар, оның ішінде тұтынушылық қарыздар бойынша дауларын қарайды. Бұрын омбудсман қарыз алушылар-жеке тұлғалар мен банктер арасындағы ипотекалық қарыз шарттары бойынша ғана дауларды шешуге қатысқан.Омбудсман соттың қарауына қабылданған және/немесе заңды күшіне енген сот актісі бар, сондай-ақ істің жаңа мән-жайлары болмаған кезде қайта жіберілген жолданымдарды қарамайды.Банк омбудсманының Колл-орталығы, WhatsApp телефон нөмірі, электрондық пошта және https://www.bank-ombudsman.kz/ сайты бар. Омбудсман кеңсесі Алматыда орналасқан.Микроқаржы омбудсманы – Назгүл Қарасқызы Естеусізова. Микроқаржы омбудсманы болып сайланғанға дейін «Қазақстанның ұлттық коллекторлар палатасы» заңды тұлғалар бірлестігінің Төрағасы болды.Жаңа омбудсманның алдына микроқаржылық ұйымдардың клиенттерінің құқықтарын қорғауды қамтамасыз ету және қарыз алушылар және микроқаржы ұйымдары, талап ету құқығы берілген коллекторлық агенттіктер арасындағы дауларды шешуге жәрдемдесу міндеттері қойылған. &nbsp;&nbsp;Микроқаржы омбудсманының институты алғаш рет&nbsp;Қазақстанда құрылды.&nbsp;Микроқаржы ұйымының шешімі оны қарыз алушы-жеке тұлға қабылдаған жағдайда,&nbsp;микроқаржы ұйымы және&nbsp;қарыз алушы-жеке тұлғамен жасалған микрокредит беру туралы шарт бойынша құқық (талап ету) берілген&nbsp;коллекторлық агенттік үшін&nbsp;міндетті.Микроқаржы ұйымы, қарыз алушымен жасалған микрокредит беру туралы шарт бойынша құқық (талап ету) берілген тұлға микроқаржы омбудсманының шешімін ол белгілеген мерзімде орындамаған жағдайда микроқаржы омбудсманы бұл туралы уәкілетті органға бес жұмыс күнінен кешіктірмей хабар беруге міндетті.Микроқаржы ұйымының, қарыз алушымен жасалған микрокредит беру туралы шарт бойынша құқық (талап ету) берілген тұлғаның микроқаржы омбудсманының шешімін орындау мерзімі&nbsp;күнтізбелік отыз күнді&nbsp;құрайды.Микроқаржы омбудсманы мынадай:1) сот қарауға қабылдаған және (немесе) олар бойынша заңды күшіне енген сот актісі бар; 2) жүгінуші адам микрокредит беру туралы шарт шеңберінде туындаған жағдайды реттеу мақсатында өзінің микроқаржы ұйымына, микрокредит беру туралы шарт бойынша құқық (талап ету) берілген тұлғаға жүгінуінің жазбаша дәлелдемесін ұсынбаған; 3) істің жаңа мән-жайлары болмаған кезде қайтадан жіберілген жолданымдарды қарамайды.Екі омбудсманның да қызметтері&nbsp;өтеусіз.&nbsp;Қарыз алушы омбудсмандардың&nbsp;әрекеттеріне немесе әрекетсіздігіне шағым беруге құқылы. &nbsp;Микроқаржы омбудсманы туралы және оған қалай жүгінуге болатындығы туралы қосымша ақпаратты мына сілтеме бойынша таба аласыз <a href="https://mfombudsman.kz/">https://mfombudsman.kz/</a><img src="https://knadmin.beoblood.kz/uploads/Fingramota_25_07_b6e821043f.png" alt="Финграмота 25.07.png">Өз қаржылық сауаттылығыңызды бізбен бірге арттырыңыз!&nbsp;

Кредит бойынша кейінге қалдыруды қалайша алуға болады

<a href="https://kyzylorda-news.kz/">Kyzylorda-news.kz</a> Қызылорда қаласындағы қауіпсіздігі барынша төмен ҚАЖ департаментінің №37 мекемесінен үш жазасын өтеуші «Қазақстан Республикасы Конституциясының отыз жылдығына байланысты рақымшылық жасау туралы» Заң аясында бостандыққа шықты.Бостандық алғандардың бірі – алаяқтық бабымен 1 жылға бас бостандығынан айырылған ер адам. Ол жазасын қауіпсіздігі барынша төмен мекемеде өтеп жатқан болатын. Қызылорда қалалық №2 сотының қаулысымен оның қалған 5 ай мерзімі рақымшылыққа сәйкес қылмыстық жауаптылықтан босатылды.<blockquote>– Жасаған қылмысыма өкінемін. Рақымшылық заңы бойынша бостандыққа шықтым – бұл мен үшін үлкен өмірлік сабақ болды. Ендігі мақсатым – отбасыммен қауышып, заң талаптарын бұзбай, жұмысқа орналасып, балаларымды дұрыс тәрбиелеуге бар күшімді салу, – деді босатылған азамат.</blockquote>№37 мекеме бастығының орынбасары Нұрлан Мұхтаровтың айтуынша, аталған рақымшылық заңы мекемеде жазасын өтеп жатқан 79 сотталған тұлғаға қолданылады. Оның ішінде жетеуі толық босатылуға, қалғандарына жаза мерзімін қысқартуға жатады.<blockquote>– Бүгінгі күні үшеуі бостандыққа шықты. Қалған сотталғандардың құжаттары сотта қаралуда. Рақымшылық заңы аясындағы жұмыстар заң талаптарына сай әрі жүйелі түрде жүргізілуде, – деді мекеме бастығының орынбасары.</blockquote>Айта кетейік, рақымшылық заңы Қызылорда облысы бойынша ҚАЖ мекемелерінде жазасын өтеп жатқан 200-ден аса сотталғанға қолданылады.

Қызылордада жазасын өтеуші азаматтар рақымшылықпен босатылды

<a href="https://kyzylorda-news.kz/">Kyzylorda-news.kz</a> &nbsp;Тараздық әйел тұтынушылық несие бойынша бес банкке 6 миллион теңгеден астам қарыз болған.&nbsp;Бұл туралы&nbsp;<a href="https://stan.kz/kazakstandik-kopbalali-ananin-ay-sayingi-nesiesi-zhalak-421117/">Stan.kz</a>&nbsp;ақпарат агенттігі хабарлады.Әйел&nbsp;балалардың әкесімен ресми некеде емес, ЖШС-де оператор болып жұмыс істейді және 220 мың теңге&nbsp;жалақы алады. Ал оның ай сайынғы несие бойынша төлемдері 395 мың теңге болып, табысынан едәуір асып түскен. Сонымен қатар&nbsp;ол отбасы шығындарын төлейді.Төрт баланың анасы сотқа жүгініп, төлем қабілеттілігін қалпына келтіруді сұраған.Ол несиелік жүктеменің шамадан тыс екенін көрсетіп, ай сайынғы төлемдерді азайта отырып, қарызды өтеу мерзімін 60 айға дейін ұзартуды сұраған. Бес кредитордың төртеуі талапты қанағаттандыруға қарсы болған.<blockquote>“Тараз қалалық соты талап қоюшының уәждері іс материалдарымен толықтай расталған, оның әрекетінде арам пиғылдың белгілері жоқ деген қорытындыға келген. &nbsp;Сот талап қоюды қанағаттандырып, төлем қабілеттілігін қалпына келтіру тәртібін қолданды, оған сәйкес қарыз 5 жыл бойы ай сайын өтеледі”, –&nbsp;деп мәлімдеді сот.</blockquote>Сот шешіміне екі кредитор банк шағым түсірген. Алайда Жамбыл облыстық соты шешімді өзгеріссіз қалдырды. Сот актілері заңды күшіне енді.Фото: Нұрболат Нұржаубай

Сот банктерді қазақстандық көпбалалы анаға көмектесуге міндеттеді

<a href="https://kyzylorda-news.kz/">Kyzylorda-news.kz</a> Ағымдағы жылдың алғашқы алты айында Қызылорда облысында мемлекеттік сатып алу саласында бірқатар шаралар атқарылып, заң бұзушылықтардың алдын алу бойынша нақты қадамдар жасалды. Жалпы 94 мыңнан астам мемлекеттік сатып алу жоспарланып, оның басым бөлігі жарияланды. Соңғы бес жылда облыс көлемінде 14 мыңнан аса конкурс ұйымдастырылған. Сонымен қатар, сала мамандары үшін семинарлар мен оқыту шаралары жиі өткізіліп, мемлекеттік сатып алу жүйесін жетілдіруге бағытталған ұсыныстар енгізілуде. Бұл туралы Өңірлік коммуникациялар қызметінің ақпарат алаңында Қызылорда облысының мемлекеттік сатып алу басқармасы басшысының міндетін атқарушы Ғалымжан Ілкібаев баяндады.<blockquote>- Биылғы алты айда мемлекеттік сатып алу саласындағы ашықтықты арттыру, заң бұзушылықтарды болдырмау және жаңа заңнама талаптарын түсіндіру бағытында ауқымды жұмыстар атқардық. Әкімдіктер мен облыстық басқармалар мамандары үшін 55-ке жуық оқыту шарасы ұйымдастырылды, оның ішінде 200-ден астам маманның қатысуымен облыстық семинар-кеңес өткізілді. Астана қаласынан келген сарапшылардың қатысуымен өткен іс-шарада 250 маманға сертификат табысталды. Бұдан бөлек, тексеру комиссиясы және ішкі мемлекеттік аудит департаментімен бірлесіп, барлық аудандарда көшпелі семинарлар өткіздік. Мемлекеттік сатып алуларға қатысты заңнамаға енгізілген өзгерістер бизнеске қолайлы жағдай жасап, отандық өндірушілерді қолдауға бағытталды. Мәселен, шарт бойынша төлем мерзімі қысқартылып, аванстық төлемдер көлемі артты. Біз үшін басты міндет - сатып алу процесін барынша ашық әрі тиімді ету, - деді Ғалымжан Маратұлы.</blockquote><img src="https://knadmin.beoblood.kz/uploads/Memlekettik_satyp_alu_salasynda_zha_a_zgerister_engizilip_ba_ylau_k_shejtildi_d5846c18e2.jpg" alt="Мемлекеттік сатып алу саласында жаңа өзгерістер енгізіліп, бақылау күшейтілді.jpg">Фото: Нұрболат Нұржаубай

Архив