<a href="https://kyzylorda-news.kz/">Kyzylorda-news.kz.</a> Бала босанып, ана атану – әйел өміріндегі ең жауапты шақ. Бұл кезеңде аналарға барынша қолдау көрсетіп, бала күтімімен айналасуына арнайы демалыс берілуі қажет.
Қазақстанда жүктілікке және босануға байланысты демалыс беру тәртібі&nbsp;<a href="http://adilet.zan.kz/kaz/docs/K1500000414">Еңбек кодексімен</a>&nbsp;реттеледі, деп жазады <a href="https://informburo.kz/kaz/dekrettk-demalys-pen-tlemder-alay-esepteled-.html">Informburo</a>.
Кодекстің 99-бабында жазылғандай, жүкті әйелдерге, бала босанған әйелдерге және жаңа туған баланы асырап алған әйелдерге (еркектерге) баланың туылуына байланысты келесі демалыс түрлері беріледі:
<ul>
<li>Жүктілікке және босануға байланысты демалыс;</li>
<li>Жаңа туған баланы (балаларды) асырап алған жұмыскерлерге демалыс;</li>
<li>Бала үш жасқа толғанға дейін оның күтіміне байланысты жалақы сақталмайтын демалыс.</li>
</ul>
Жұмыс беруші қызметкерді қай уақытта декреттік демалысқа жібереді?
Қызметтегі жүкті әйел декреттік демалысқа шығуы үшін оған уақытша еңбекке жарамсыздық парағы беріледі. Бұл парақ тек демалысқа шығу үшін ғана емес, бала босануына байланысты жәрдемақылар алу үшін де қажет.
Уақытша еңбекке жарамсыздық парағы&nbsp;– еңбекке уақытша жарамсыздықты куәландыратын және жұмыстан уақытша босатуға және еңбекке уақытша жарамсыздығы бойынша жәрдемақы алуға құқығын растайтын құжат.
Еңбекке уақытша қабілетсіздік парағын жүкті әйел тіркелген және тұрақты қаралып жүрген акушер-гинеколог дәрігер береді. Демалыс мерзімі: босануға дейін күнтізбелік 70 күн және босанғаннан кейін күнтізбелік 56 күн (қиын босанған немесе екі немесе одан көп бала туған жағдайда – 70 күн). Ал ядролық сынақтардың әсеріне ұшыраған аумақтарда тұратын әйелдерге берілетін демалыс 170 күнге дейін ұзаруы мүмкін. Бұл санатқа жататын әйелдер қиын босанған немесе екі немесе одан көп бала туған жағдайда тағы 14 күн демалыс қосылады.
Жұмыс беруші аталған медициналық құжатта көрсетілген күннен бастап, жүкті қызметкерді жұмыстан босатуы керек.
Көп ретте декреттік демалысқа бала анасы шығатын болғанымен, бұл мүмкіндікті әкелер де пайдалана алады. Бірақ, біреуі ғана: баланың не анасы, не әкесі. Әкелердің декрет демалысына шығу тәртібі туралы informburo.kz бұған дейін де жазған болатын, ол туралы&nbsp;<a href="https://informburo.kz/kaz/keler-de-dekretke-shya-alady-azastanda-soy-bes-zhylda-40-mynan-astam-ke-dekretke-shyan.html">осы жерден</a>&nbsp;оқи аласыздар.
Жүктілік және босануға байланысты әлеуметтік төлемдер
Жұмыс істейтін әйелдер үш түрлі жәрдемақы ала алады. Олар:
<ol>
<li>Баланың тууына байланысты бір жолғы мемлекеттік жәрдемақы;</li>
<li>Жүктілігі және босануы бойынша табысынан айырылуына байланысты әлеуметтік төлем;</li>
<li>Баланың бір жасқа толғанға дейінгі күтімі бойынша әлеуметік жәрдемақы.</li>
</ol>
Бір жолғы мемлекеттік жәрдемақы&nbsp;көлемі айлық есептік көрсеткішке қарай өзгеріп отырады. 2019 жылғы жәрдемақы мөлшері төмендегіше:
<ul>
<li>Бірінші, екінші, үшінші балаға – 95 950 теңге;</li>
<li>Төртінші және одан көп балаға – 159 075 теңге (бұл туралы&nbsp;<a href="https://informburo.kz/kaz/2019-zhyly-dekrettk-tlemder-men-zhrdemaylar-klem-alay-zgered.html">осы жерден</a>толығырақ оқуға болады).</li>
</ul>
Жұмыс істейтін әйелдер демалысқа шығарда берілетін әлеуметтік төлем&nbsp;түрі соңғы 12 айдағы орташа айлық табыс мөлшерін еңбекке жарамсыздық күндерінің коэффициентіне көбейту арқылы анықталады:
Әлеуметтік төлем = ОАТ*ЕЖК
Бұл жерде:
ОАТ&nbsp;– жүктілік және босану бойынша еңбек демалысына дейінгі соңғы 12 ай ішіндегі орташа айлық табыс;
ЕЖК&nbsp;– еңбекке жарамсыздық күндерінің коэффициенті, ол жүктілік және босану бойынша еңбекке уақытша жарамсыздық парағында көрсетілген күндер санын 30-ға бөлу арқылы анықталады.
Формула қарапайым ғана. Енді оны мысалмен берейік. Айталық, қалыпты босанған жағдайда жалпы ұзақтығы 126 күнді құрайтын декреттік демалыс беріледі. Сәйкесінше, еңбекке жарамсыздық күндерінің коэффициенті 4,2-ні құрайды: 126 күн/30. Декреттік демалысқа шығатын әйелдің орташа айлық табысы 100 мың теңге болған жағдайда жүктілік және босану бойынша әлеуметтік төлемнің мөлшері 420 000 теңгені (жоғарыдағы формулаға сәйкес, 100 000*4,2) құрайды. Осылайша, ешбір маманның көмегінсіз әлеуметтік төлем мөлшерін өзіңіз-ақ есептеп алуыңызға болады.
Егер декреттік демалыста болған уақыт ішінде екінші балаға жүкті болған жағдайда, қызметкер бала күтіміне байланысты тағы да демалыс сұрап, өтініш жазады. Сол арқылы бұйрық шығарылады. Жұмыс орнын сақтау үшін, жұмыс берушіге қызметкер өзінің жүктілігін растайтын тиісті құжаттарды беруі тиіс. Айта кетейік, декреттегі аналар демалыс уақытында жұмыстан айрылып қаламын деп уайымдамаса болады. Өйткені бұл Еңбек кодексінің&nbsp;<a href="http://adilet.zan.kz/kaz/docs/K1500000414">54-бабымен</a>&nbsp;реттелген:
Жұмыс берушіге жүктілік туралы анықтаманы ұсынған жүктi әйелдермен, үш жасқа дейiнгi балалары бар әйелдермен, он төрт жасқа дейінгі баланы (он сегіз жасқа дейінгі мүгедек баланы) тәрбиелеп отырған жалғызілікті аналармен, аталған балалар санатын анасыз тәрбиелеп отырған өзге де адамдармен жұмыс берушінің бастамасымен еңбек шартын бұзуға жол берілмейді.
Декреттік демалыстың бүкіл кезеңі еңбек өтіліне қосылады. Екінші декреттік демалыстан шыққан қызметкер жыл сайынғы ақылы еңбек демалысын алу құқығына ие.
Жұмыс істейтін әйелдерге берілетін жәрдемақылардың үшінші түрі – жоғарыда атап өткеніміздей,&nbsp;баланың бір жасқа толғанға дейінгі күтімі үшін берілетін әлеуметік жәрдемақы.
Бұл жәрдемақы түрі төмендегіше есептеледі:
Соңғы екі жыл ішіндегі жалпы табысының көлемін 24 айға бөліп, содан кейін 0,4-ке көбейту керек. Одан 10 пайыз зейнетақы жарнасын алынады.
Мысалы, әйел босанғанға дейін бір жарым жыл жұмыс істейді. Бір жыл бойы жалақысы 180 мың, қалған алты айда 200 мыңға өсті делік. Енді осының барлығын есептеп көрейік: 180*12+200*6=3 360 000. Бұл сіздің соңғы екі жылдағы жалпы табысыңыз. Алынған соманы 24 айға бөлеміз: 3 360 000/24= 140 000 теңге. Бұл – табыстың орташа айлық мөлшері. Баланың бір жасқа толғанға дейінгі күтімі бойынша жәрдемақы мөлшерін есептеу үшін осы көрсеткішті 0,4-ке көбейтіп, 10% зейнетақы жарналарын шегеру керек, яғни: 140 000*0,4 = 56 000 теңге, 10% шегергенде босанған әйел ай сайын 50 400 теңге көлемінде алады.
Бұл ретте, бала бір жасқа толғанға дейін оның күтіміне байланысты табысынан айырылған жағдайда төленетін әлеуметтік төлемнің ең жоғары мөлшері 7 еселенген ЕТЖ (2019 жылы ЕТЖ – 42 500 теңге) мөлшерінің қырық пайызынан аспауға, ал әлеуметтік төлемнің ең төмен мөлшері бала бір жасқа толғанға дейін оның күтіміне байланысты берілетін ай сайынғы мемлекеттік жәрдемақы мөлшерінен кем болмауға тиіс.
Ал, жұмыс істемейтін әйелдерге берілетін жәрдемақы түрлері туралы&nbsp;<a href="https://egov.kz/cms/kk/articles/child/ui_decret">осы жерден</a>&nbsp;оқи аласыздар.

Декреттік демалыс пен төлемдер қалай есептеледі?

<a href="https://kyzylorda-news.kz/">Kyzylorda-news.kz.</a> 2019 жылғы 11 желтоқсанда сағат 10.00-17.00 аралығында Қызылорда облысының әкімі Қ.Д.Ысқақовтың қатысуымен «Индустриялық-инновациялық даму – аймақ экономикасының тұрақты дамуының негізгі факторы» тақырыбындаинтернет-конференция өтеді.
Онлайн режимде өтетін конференция барысында облыс әкіміне тақырып аясында қоятын сауалдарыңыз бен ұсыныстарыңызды <a href="https://dialog.egov.kz/">https://dialog.egov.kz/</a> сілтемесі арқылы жолдауға болатындығын хабарлаймыз.&nbsp;
Сонымен қатар, сауалдарыңыз бен ұсыныстарыңызды жолдау үшін электронды цифрлық қолтаңба (ЭЦҚ) қажет екендігін ескертеміз.

Қызылорда облысы әкімінің қатысуымен интернет-конференция өтеді

<a href="https://kyzylorda-news.kz/">Kyzylorda-news.kz.</a> 2016 жылдың сәуірінен бастап көлік жүргізу куәлігін алу үшін арнайы мектептерде оқу міндетті емес. Алайда емтиханды сәтті тапсыру қажет. Сынақтан сүрінген жағдайда жүргізуді үйрету курсына жазылуға тура келеді, деп жазады <a href="https://kaz.nur.kz/1831129-kazakstanda-klik-zrgizu-kuligi-nese-tege-trady.html">KAZ.NUR.KZ</a>.
Егер сіз көлік жүргізуді өз бетіңізше үйреніп, барлық жол ережелерін игерсеңіз, онда қалаңыздағы мамандандырылған халыққа қызмет көрсету орталығына сенімді түрде барсаңыз болады.
Теориялық және тәжірибелік тестілеуден өту үшін 1,25 АЕК көлемінде мемлекеттік баж салығын төлеу қажет.
2019 жылы – 3 156,25 теңгені құраса, 2020 жылы 3 313,75 теңге болады.
<blockquote>
 Егер сіз көлік жүргізу білмесеңіз, онда аталған емтиханнан сөзсіз өте алмайсыз.
</blockquote>
Мұндай жағдайда көлік мектебіне түсуіңіз маңызды.
Сонымен аталған курстардың бағасына тоқталып өтсек.
<ul>
<li>Теориялық білім: 15000-нан 35000 теңгеге дейін;</li>
<li>Тәжірибелік білім: бір академиялық сағатқа 1300-ден 2500 теңгеге дейін (45 минут);</li>
<li>Көлік жүргізу куәліктері бар адамдар: бір академиялық сағатқа 2 500 ден 4 000 теңгеге дейін (45 минут);</li>
<li>Онлайн оқыту: 15 000 теңге.</li>
</ul>

Қазақстанда көлік жүргізу куәлігі қанша теңге тұрады?

<a href="https://kyzylorda-news.kz/">Kyzylorda-news.kz.</a> IELTS халықаралық емтиханында Қызылордадағы Зияткерлік мектептің 12-сынып оқушылары&nbsp; жоғары нәтижелерге қол жеткізді, оның орташа ұпайы 6,3 балды құрады. 101 оқушының екеуі 8,0 ұпай&nbsp; жинаса, 11-і – 7,5 және 14-і –7,0 ұпайды растады.&nbsp;
Айта кету керек, биылғы оқу жылы түлектерінің IELTS нәтижелері өткен жылмен салыстырғанда 6,0-ден 6,3 ұпайға артты. Саодат Құрманаева,&nbsp; Аида Енсебаева және Дильназ Еркемблан жекелей секцияларда ең жоғары 9,0 ұпайды көрсе алды.
Негізінен аталмыш емтиханның шет мемлекетте ақысыз білім алу үшін маңызы зор. IELTS нәтижесі қаншалықты жоғары болса, соншалықты деңгейде шетелдің беделді оқу орындарында білімдерін жалғастыруға және жұмысқа сәтті орналасуға мүмкіндіктері бар.

Қызылордадағы Назарбаев мектебінің оқушылары ағылшын тілінен халықаралық емтиханда ең жоғарғы нәтиже көрсетті

<a href="https://kyzylorda-news.kz/">Kyzylorda-news.kz.</a> Нұр-Сұлтанда ерлік әрекеттерімен көзге түскен қаһарман полиция қызметкері сотталды, деп хабарлайды&nbsp;<a href="https://kaz.zakon.kz/4998390-n-r-s-ltanda-erl-k-zhasap-k-zge-t-sken.html">zakon.kz</a>.
Нұр-Сұлтан қаласындағы №2 Есіл сотының үкімінде қамтылған дерекке сүйенсек, сотталушы Балтабаев Азамат пен Абдрахманов Ринат Нұр-Сұлтан қаласы ПД ҮМЗ патрульдік полиция полкінің қызметкерлері болып тұрғанда 29 наурызда қоғамдық тәртіпті және жол қауіпсіздігін қамтамасыз ету үшін қаланы аралап, Кенесары көшесінен сол жаққа – Сарыарқа даңғылына бұрылған Mercedes-Benz ML 300 маркалы көлікті тоқтатқан. Сотталушылар оның біраз сыра ішкенін анықтаған.
Көлік тізгінінде “Ұлттық нейрохирургия орталығы” АҚ басқарма төрағасы, ҚР Ұлттық ғылым академиясының академигі, медицина ғылымдарының профессоры екенін білген соң, олар әкімшілік жауапкершілікке тартпай, бұл жайттың БАҚ беттерінде пайда болмасы үшін одан ақша талап еткен.
Іс материалына сәйкес, Балтабаев өзінің телефонынан 1 000 000 деген санды көрсеткен, өз кезегінде көлік жүргізушісі 400 мың теңге ғана ұсына алатынын, ол үшін “Ұлттық нейрохирургия орталығындағы” банкоматқа бару керектігін айтқан. Бұған сотталушылар келіскен. Сөйтіп ақша сол арада шешіліп алынып, шенді оны қызметтік көлік ішінде оларға табыс еткен.
1 сәуірде академик Нұр-Сұлтан полиция департаментіне келіп, шағым түсірген. Мұны білген сотталушылар арызданушымен байланысып, ақшаны қайтару туралы шешім қабылдайды. 2 сәуірде полиция қызметкерлері Ұлттық нейрохирургия орталығы ғимараты алдында академиктен кешірім сұрап, 400 мың теңгені қайтарып береді.
Сотта Балтабаев пен Абдрахманов өз кінәсін мойындамады.
Сот үкімімен Абдрахманов пен Балтабаев ҚР Қылмыстық кодекстің 366-бабы, 3-бөлігінің 1.2-тармағы бойынша кінәлі деп танылып, 7 жылға бас бостандығынан айырылды әрі мемлекеттік қызметте лауазымдарды атқару құқығынан өмір бойына босатылды. Олар сот залында қамауға алынды.
Сондай-ақ, сот Абдрахмановты “полиция капитаны” арнайы атағынан, Балтабаевты “полиция аға лейтенанты” арнайы атағынан айыру туралы шешім қабылдап, Қазақстан Президентіне Балтабаевты II дәрежелі “Айбын” орденінен айыру туралы ұсыныс тастады.
Азамат Балтабаев 2018 жылы 9-қабаттың терезе жақтауында тұрған 6 жасар баланы аман алып қалды. 2017 жылы ол Франция азаматы Жорж Киффермен бірге суға батып бара жатқан адамды құтқарды.
<img src="https://kyzylorda-news.kz/wp-content/uploads/2019/12/10paramen2.jpg" alt="" />

Бірнеше рет ерлік жасаған атақты полиция қызметкері 1 млн парамен сотталды

<a href="https://kyzylorda-news.kz/">Kyzylorda-news.kz.</a> Тасмағамбетов 2017 жылдың ақпан айында елші қызметіне тағайындалған болатын.
Иманғали Тасмағамбетов Ресейдегі Қазақстан елшісі қызметінен кетпек. Бұл туралы&nbsp;Telegram-ға&nbsp;саясаттанушы Ербол Еділов жазды.
<blockquote>
 «Кейбір мәліметтерге сүйенсек, Иманғали Тасмағамбетов Ресей Федерациясындағы Қазақстан Республикасының Төтенше және Өкілетті Елшісі қызметінен кетеді. Зейнет жасына келуіне байланысты демалысқа шығады», – делінген жазбада.
</blockquote>
Айта кетейік, Иманғали Тасмағамбетов 9 желтоқсан күні 63 жасқа толды. Ол&nbsp;1956 жылы &nbsp;Атырау облысы, Махамбет ауданы, Новобогат ауылында дүниеге келген.&nbsp;
Тасмағамбетов 2017 жылдың ақпан айында елші қызметіне тағайындалған болатын.

63 жасқа толған Тасмағамбетов Ресейдегі Қазақстан елшісі қызметінен кетпек

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>WhatsApp мессенджері Windows Phone операциялық жүйесі қолданушыларында және Android пен iOS-тың ескі нұсқаларында істемейтін болады, деп хабарлайды&nbsp;<a href="https://sputniknews.kz/society/20191210/12247259/milliondagan-qoldanushy-WhatsApp.html">Sputnik Қазақстан</a>.
Windows Phone-да хат алмасу сервисі 2019 жылдың 31 желтоқсанында тоқтатылады. Операциялық жүйесі Android 2.3.7-ден және iOS 8 –ден ескі болса бұл қызмет 2020 жылдың 1 ақпанынан бастап қолжетімді болмайды. Басылымның ақпаратына сәйкес, миллиондаған адам WhatsApp-сыз қалады.
Мессенджер Android 4.0.3-тен және iOS 9-дан бастап қолжетімді болады. Компания мұндай қадамға ескі жүйеде қосымшаның мүмкіндігін одан әрі кеңейту мүмкін болмағасын барған.
Бұған дейін WhatsApp қолданушы жіберген хабарламаларды автоматты түрде өшіретін функция қосатынын хабарланған болатын. Сондай-ақ, таймер уақытын да реттеуге болады. Бір сағат, бір күн, апта, ай және жылдан соң деп белгілеуге болады.

Миллиондаған қолданушы WhatsApp-сыз қалады

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>Облыс әкімі Қуанышбек Ысқақовтың қатысуымен облыстық мәслихаттың кезектен тыс 39-шы сессиясы өтті.
Сессияны ашқан облыстық мәслихат хатшысы Қылышбай Бисенов күн тәртібінде бір ғана мәселе – «2019-2021 жылдарға арналған облыстық бюджет туралы» Қызылорда облыстық мәслихатының (2018 жылғы 12 желтоқсандағы) №271 шешіміне өзгерістер мен толықтырулар енгізу жайы талқыланатынын жеткізді. Ол туралы облыстық экономика және бюджеттік жоспарлау басқармасының басшысы Нұрғали Қордабай хабарлама жасады.
Хабарламашы атап өткендей, бюджеттік бағдарламаларды қысқартуға байланысты &nbsp;және игерілмей қалған қаржы есебінен бүгінгі күнге үнемделген қаржы көлемі 1,2 млрд теңгені құрап отыр. Осыған байланысты бірқатар бюджеттік бағдарламаларға өзгертулер енгізіліп, облыстық бюджет қайта нақтыланатын болады. Оның ішінде облыстағы құрылыс жұмыстарына 395 млн, азық-түлік бағасын тұрақтандыруға 100 млн, Қызылорда қаласында қоғамдық көлікті дамытуға 209 млн, Қазалы қаласында тұрғын үйлерге инфрақұрылым жүргізуге 95 млн теңге &nbsp;қаржы қарастырылады.
Басқарма басшысы соңғы нақтылаудан кейін облыстық бюджет 279,4 млрд теңгені құрап отырғанын атап өтті. Ал жыл басында ол 191 млрд теңге көлемінде бекітілгенін еске түсірсек, осы кезеңде облыстық бюджет 90 млрд теңгеге жуық көбейгенін аңғару қиын емес.
Сессияда депутаттар бюджеттік бағдарламалар­дағы өзгерістерді қолдап, бірауыздан дауыс берді.

Қызылорда облысының бюджеті нақтыланды

<a href="https://kyzylorda-news.kz/">Kyzylorda-news.kz.</a> Қызылордада жол-көлік оқиғасынан 2 адам қайтыс болды.
Қайғылы оқиға 9 желтоқсан күні таңертең болған. Қызылорда қаласының орталық бөлігіндегі Қорқыт ата және Желтоқсан көшелерінің қиылысында екі көлік соқтығысты.
<blockquote>
 «Mercedes-Benz» көлігінің иесі қарама қарсы бағытта келе жатқан «Volkswagen» маркалы автокөлікке жол берместен бұрылған. Оқыс оқиға салдарынан екі адам көз жұмды. Аталған дерек бойынша ҚР Қылмыстық кодексінің 345-бабының 4-бөлігімен сотқа дейінгі тергеп-тексеру амалдары жүргізілуде. Сараптамалар тағайындалды», – деп мәлім етті Қызылорда облыстық полиция департаментінің баспасөз қызметі.
</blockquote>
Кейбір дереккөздерге сүйенсек, қайтыс болған 2 адам ерлі-зайыпты болған. Олар 9 желтоқсан күні таңғы 04:00-де жеңілдікпен медициналық аппаратқа түсуге барған.

Қызылордада көлік апатынан ерлі-зайыптылар көз жұмды

<a href="https://kyzylorda-news.kz/">Kyzylorda-news.kz.</a> 28 жыл бұрын еліміз егемендігін алып, мемлекетіміз тәуелсіздігін жариялады. Осы уақыттар аралығында 28 жылдың ішінде Қазақстан жас болса да әлем мойындаған мемлекетке айналды.
Бір сәт болса да артқа шегініс жасап, тарихқа көз жүгіртсек. 1991 жылдың 1 желтоқсанында қазақстандықтар президенттік сайлау өткізіп, 98,78 пайыздық дауыспен жеңіске жеткен Н.Назарбаев ел Президенті болды. Қазір бұл күн «Тұңғыш Президент күні» ретінде аталып жүр. “Қазақстан Республикасының мемлекеттік тәуелсіздігі туралы” Конституциялық Заң қабылданған 1991 жылғы 16 желтоқсан Тәуелсіздік күні болып мерекеленіп келеді.&nbsp;
Дегенмен, тәуелсіздіктің алғашқы жылдары жасалған қадамдар даңғыл жолға түсіп кете қойған жоқ. Халық та, ел де экономикалық-әлеуметтік қиындықтарды бастан кешті. Ескі кеңес мемлекетінен бізде кені қопарылып алынған бос шахталар, игерілмеген кен және тозығы жетіп ескірген өнеркәсіп орындары, әлеуметтік мәселелері шешілмей жатқан қалалар мен елді мекендер, құнарынан айырылған егіс алқаптары, құлазыған мал фермалары ғана қалды. Жерасты байлығы көп болғанымен, өзімізде қазылған кенді өңдейтін өңдеуші кәсіпорындардың болмауы, зауыт-фабрикалардың тоқтап қалуы, ішкі қаржы дағдарысы, ескірген экономикалық жүйе, жұмыссыздықтың белең алуы және басқа да кедергілер – 1990 жылдардың шынайы көрінісі болатын. Осындай қиын шақта жас мемлекетті ауыртпашылықтардан алып шығу міндетін өзіне жүктеп, мүлдем жаңа типтегі егемен мемлекетті құру үдерісін басқаруды мойнына артып “әуелі – экономика, содан кейін саясат” деген ұстанымды ұстанған Елбасымыз Н.Ә.Назарбаев барлық маңызды салалар бойынша түбегейлі реформалар жасауды жүзеге асыруға кірісті. Президент Жарлығымен жас мемлекет пен қоғамды жаңғырту үшін аса қажетті “Жер туралы”, “Жер қойнауы және жер қойнауын пайдалану туралы”, “Мұнай туралы”, “Шетелдік инвестиция туралы” т.б. экономиканы дамытуға, орнықты банк жүйесін қалыптастыруға бағытталған нарық заңдары қабылданды. Осылайша, қазба байлықтарды игеру, оны өзімізде өңдеуді жүзеге асыру үшін елімізге шетелдік инвестициялар тартылып бұрынғы кен орындары қайта жанданып, жаңа өңдеуші кәсіпорындар салына бастады.
Бүгінгі таңда Елбасы ұсынған индустриялық-инновациялық жоба бойынша еліміздің әр аймағында ірі-ірі зауыттар, кәсіпорындар салынып, пайдаланылуға беріліп жатқандығына куәміз. “Қазақстанда жасалған” деген белгімен шетелдерге экспортталып жатқан техникалар мен тауарларымыздың көбейіп келе жатқандығы қарыштап дамуымыздың жарқын көрінісі емес пе. Әлем елдерімен терезесі тең қатынас орнатылып жоспарлы экономикадан нарықтық экономикаға көштік. Елдің, жердің тұтастығын сақтау мақсатында арқа төсіндегі ерке Есілдің бойынан жаңа астана тұрғызылып, оған биыл Мемлекет басшысы Нұр-Сұлтан деген атау берді.&nbsp; Қазақстан халқы ассамблеясы құрылып, адам мен азамат құқықтары мен бостандықтарының өркениетті қағидалары толық жүзеге асырылды. Қазақ тілі мемлекеттік тілге айналды. Бірінші болып ядролық қарудан бас тартқан елімізде ядролық сынақ алаңы жабылып, еліміздің мемлекеттік шекарасы белгіленіп, мемлекетіміздің&nbsp; қауіпсіздігі нығайтылды. “Қазақстан – 2030”,&nbsp; “Қазақстан – 2050“, “Қазақстан Республикасының 2020 жылға дейінгі стратегиялық даму жоспары”&nbsp; бекітіліп, 2010 жылы еліміз Еуропадағы қауіпсіздік пен ынтымақтастық ұйымына, 2011 жылы 1,5 миллиард адамды құрайтын 57 мемлекетті біріктірген Ислам конференциясы ұйымына төрағалық жасады. Халықаралық БҰҰ-ның мүшесі болып табылатын еліміз 1992 жылы БҰҰ Адам құқықтары жөніндегі кеңесінің мүшесі болып сайланып, биылғы жылы Дүниежүзілік сауда ұйымына қабылданды. 2013 жылы құрылған Еуразиялық одақтың мүшесі болып табылатын еліміз қазіргі таңда өзге де көптеген халықаралық ұйымдарға мүше. 2017 жылы халықаралық “ЭКСПО” көрмесін өткізген елімізді 2015 жылы Қазақстанның Тұңғыш Президенті жариялаған 5 институтционалдық&nbsp; реформа, одан туындайтын “100 нақты қадам” Ұлт жоспары да әлемдегі дамыған өркениетті елдер қатарына жеткізері анық.
Жансая ДӘРІБАЕВА,
№49 мектеп мұғалімі.
Шиелі ауданы.

Тәуелсіз Қазақстан: егемендіктің алғашқы күнінен бүгінге дейін

<a href="https://kyzylorda-news.kz/">Kyzylorda-news.kz.</a> Дүйсенбі 9 желтоқсанда Парижде «норманд төрттігінің» кездесуі өтті. Ресей, Украина, Франция және Германияның басшылары – Владимир Путин, Владимир Зеленский,&nbsp;Эммануэль Макрон және Ангела Меркель бір үстел басында отырды.
Әлем елдерінің&nbsp;басшыларының кездесуінің негізгі мақсаты – Украинаның оңтүстік шығысындағы дағдарыс мәселесін шешу. Алайда кездесу барысында аздаған келеңсіз жайт болды, – деп хабарлайды <a href="https://www.mk.ru/politics/2019/12/09/zelenskiy-okonfuzilsya-pered-putinym-v-parizhe.html">“Московский комсомолец”</a>.
Кездесудің төрт мүшесі мәжіліс залына кірген кезде Зеленский Путинге арналған креслоға бағыт алған. Сол кезде monsieur Poutine деп жазылып тұрған креслоға&nbsp;Ресей президенті келген кезде Зеленский қателескенін түсініп, орындықтың басқа тұсына өтіп кетті.&nbsp; Зеленский орындыққа отырып, бірден қолына су алды. Артынша тағы бір келеңсіз жайт болды. Орнына отырған Украина президенті журналистерге қарап суретке түсу керек екенін түсінбей қалды. Макрон мен Путин Зеленскийге журналистерге қарап, суретке түсу керек екенін түсіндірді.&nbsp;
Сонымен қатар, ресейлік журналистер Париждегі саммитте Владимир Зеленскийдің сөзі орыс тілінде қолмен жазылғанын аңғарып қалған. Украина президентінің шпаргалкасын Кремль пулының тілшісі Дмитрий Смирнов суретке түсіріп алған.
Артынша Елисей сарайында Зеленский мен Путиннің кездесуі өтті. Ол бір сағаттан аса уақытқа созылды.&nbsp; Айта кетейік, бұл – Ресей және Украина президенттерінің алғашқы кездесуі. Бұған дейін олар тек телефон арқылы сөйлескен.
<img src="https://kyzylorda-news.kz/wp-content/uploads/2019/12/10putin2.jpg" alt="" />

Путин мен Зеленскийдің алғашқы кездесуінде келеңсіз жайт болды (ВИДЕО)

<a href="https://kyzylorda-news.kz/">Kyzylorda-news.kz.</a> 9 желтоқсан күні сағат 19:30 шамасында Қызылорда қаласы Назарбаев даңғылының бойында «BMW» және «Ford» маркалы автокөліктері соқтығысты, деп хабарлайды полиция департаментінің баспасөз қызметі.
<blockquote>
 «Аталған дерек бойынша Қылмыстық Кодекстің 345-бабының 2 -бөлігімен (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) сотқа дейінгі тергеп-тексеру амалдары жүргізілуде. Тиісті сараптамалар тағайындалды. Оқиғаның мән-жайы анықталуда», – делінген хабарламада.
</blockquote>
Жол-көлік оқиғасы салдарынан қайтыс болғандар жоқ. Екі азамат медициналық мекемеге жеткізілген.
<img src="https://kyzylorda-news.kz/wp-content/uploads/2019/12/10zholkolik2.jpg" alt="" />
<img src="https://kyzylorda-news.kz/wp-content/uploads/2019/12/10zholkolik3.jpg" alt="" />

Қазақстан және Қызылорда облысының жаңалықтары