<a href="https://kyzylorda-news.kz/">Kyzylorda-news.kz.</a> «Елдің тұрмыс-тіршілігі төмен­де­ген сайын «аңқау елге арамза молда» көбейе түседі». Көпшілік осылай уайым шегеді. Оған себеп – әлеу­мет­тік желіде лотерея ойнататын­дар­дың көбеюі. Қазір Instagram желісіне кір­сеңіз, «Он мың теңгеге билет сатып ал­саңыз, автокөлік ұтасыз, екі бөлмелі пәтердің кілтін ұстатамыз» деген жар­намадан көз сүрінеді. Тіпті, осы­ған дейін 20 көлікті ұтысқа қой­ғандар да бар. Оған қосымша 7 пә­тер­ді қо­сыңыз. Бас­панасыз жүрген жан­дар лотереядан үміттеніп, соңғы тиынына билет сатып алуға мәжбүр. Бірақ бә­ріне бірдей баспана мен көлік бұйыра бере ме? Сонда ұтатын кім, ұтылатын ше?
Бұл не қылған«батпан құйрық»?
Қоғамда әлеуметтік желі арқылы авто­көлік пен баспана, түрлі ұтыс ойындарын ұйымдастыратындар көбейіп тұр. Алау­латып-жалаулатып жүргендердің арасында танымал спортшылар, эстрада әншілері, тіпті әзілкештер де жоқ емес. «Ұйым­дас­тырушы­лардың» дені танымалдардың тасасында тұрған секілді. Өйткені әнші-әзілкеш, спортшыларға қоңырау соқсаңыз, «ұйымдастырушыларға қоңырау шалыңыз» деп ат-тонын ала қашады. Жуырда ғана пә­терін ұтысқа тігіп, лотерея ойнатқан белгілі журналист қыздардың бірі «жақсы пайда тапқанын, лотереяның ұтымды жоба екенін» айтады. Ал 20 көлікті ұтысқа қойғанның бірі – әнші Нұрлан Еспанов. Ол «Қарақатпен шай» бағдарламасында ұтысты ойнатудағы басты мақсаты – қа­йырым­дылық жасау болғанын айтқан екен.
<blockquote>
 «Мен алаяқ емеспін. Оның бәрі құр ай­тылып жат­қан бос сөздер. Бұған дейін бір лотерея ойынын өткізген едім. Маған жақсы араласатын інілерімнің бірі келіп: «Нұреке, сіз өнер адамысыз ғой. Сізбен бірге жұмыс істесек қайтеді? Сіз жай ғана жарна­масына түсіп беріңізші» деп өтініш айтқан соң, келісім бердім» дейді.
</blockquote>
Аталмыш лотерея жүргізбес бұрын оның ресми құжаттарын толықтай қарап шығып, дұрыс-бұрыстығына көз жеткізген соң ғана келісім бергенге ұқсайды.
Жай­дан-жай келісе салмаймын. Өйткені мұндайдың барлығын басымнан өткерген адаммын. Бар­лық құжатын қарап шығамын. Мен өткізіп жатыр екен деп, алып кете са­латын автокөлік емес. Бұл дегеніңіз – ав­тоор­талықпен заң­дастырылып жасалған дүние. Тек кілтін табыстаймын. Ол авто­кө­лік­тердің ақшасы толық жи­налмай, орталық оларды бермейді» дейді.
Бірнеше пәтерді ұтысқа тігіп, лотерея ойнатқан жігіттердің бірі – Дәулет Мұқаев есімді азамат. Ол баспана­мен бірге, бірнеше бағалы жүлде­лерді де қатар ойнатты. Әуелі ол бір бөлмелі пәтер мен тағы басқа бағалы заттарды ұтысқа қойған еді. Бір билеттің құны – 10 мың теңге. Бас-аяғы 3 200 билет сатылып, одан 32 млн теңге түскен. Бұлар­дың артықшылығы кәсіпкер ре­тінде тір­келген және табыс салы­ғын төлеп отырады.
«Сәтті жұлдызға» тіркеліп жүр ме?
Мұны бір жағынан желідегі «же­ңіл» бизнес деп атауға да бо­лады. Оңай олжа табудың жолы. Алайда елімізде лотерея саласын реттейтін уәкілетті орган бар. Ол – Мәдениет және спорт министрлігі, оның ішінде спорт және дене шы­нықтыру істері жөніндегі комитет. Министрлік өкілінің айтуынша, Қазақстанда бір ғана ұйым лотерея өткізуге құқылы. Яғни, 2017 жыл­дың 10 ақпанында қол қойылған №48 қаулыға сәйкес «Сәтті жұл­дыз» АҚ 15 жылға лотерея опе­ра­торы болып бекітілген. Демек, ел аумағында лотерея өткізуге осы ак­ционерлік қоғамның ғана құ­қығы бар. Алайда лотерея ойнатып жүрген тұлғалардың арасында оператормен келісімшарт жасас­қандар кемде-кем. Қазір қандай да бір бизнес өкілі лотерея билеттерін сатамын десе, онда ол үшін та­ратушы келісімшартқа қол қоюы керек. Бірақ Instagram желісі арқылы ұтыстар ұйымдастырып жатқан адамдардың кейбірі атал­мыш оператормен келісімшартқа отырмаған көрінеді.
2019 жылдың соңында Мәжі­лісте арнайы жұмыс тобы лотерея бизнесіне қатысты кейбір заңдарға ұсынылып отырған өзгерістерді тал­қылаған еді. Жұмыс тобын де­пу­тат Әлия Сапарова басқарған. Мә­жіліс сайтындағы деректерге сү­йенсек, заң жобасы төменгі па­латаға маусым айында түскен екен. Бұған дейін заңсыз лотерея ойнату ешқандай құқықбұзу­шы­лыққа жатпаса, енді заң жобасында әкім­шілік құқықбұзушылыққа жатқызу ұсынылып отыр. Әуелі ұтыс ой­натқысы келетін тұлғаларға ескерту жасалады. Одан кейін тағы да заң бұзса, әкімшілік құқық­бұ­зушылық жасау салдарынан алын­ған кірістер тәркілене отырып, жеке тұлғалар­ға – 200, шағын кәсіпкерлік су­бъектілеріне немесе коммерциялық емес ұйымдарға – 750, орта кә­сіп­керлік субъек­ті­леріне – 1 000, ірі кәсіпкерлік субъектілеріне 2 000 ай­лық есептік көрсеткіш мөл­ше­рінде айыппұл салуға әкелмек.
Салықтан жалтару мүмкін емес
Қаржы министрлігі Мемле­кеттік кірістер комитеті Жұрт­шы­лықпен байланыс басқармасының басшысы Олжас Отардың айтуын­ша, кез келген табыс табуға ықти­мал тұлғалардың бәрі – салық төлеуге міндетті. «Азаматтық ко­декс бойынша ұтыс ойынын өткізгісі келе ме, ол өз құқы. Оған «лицензияң бар ма, жоқ па?» деген шектеу қоя алмаймыз. Ал бірақ тапқан пайдасынан салық төлеуге міндетті. Мәселен, 1 000 теңгеден 100 билет сатты делік. Ол 100 мың пайда тауып отыр. Яғни, 100 мың үшін салық төлеуге тиіс. Бізде камералды бақылау деген бар. Сол арқылы сіздің табыстық есебіңізді қараймыз. Әлеуметтік желіде лотерея ойнатқандардың көпшілігі күз мезгілінде өткізді. Олар биыл ақпан айына дейін салық төлеуі тиіс. Салық төлемеген жағдайда салықтық есебін қараймыз. Сол арқылы хабарлама жібереміз. Ешкім тапқан табысынан жалтара алмайды. Қазір барлығы ашық жарияланып отырады. Тіпті, әлеуметтік желінің өзінде «пәлен билет сатылды, түген билет са­тыл­ды» деп ашық жарнамалап отыра­ды. Ол шынымен 100 билет сатты ма, әлде 200 билет сатты ма, өзі дә­лелдейді. Сондықтан кез келген азамат тапқан табысынан салық төлеуге міндетті» дейді.
Демек, лотерея ойнатқысы ке­летін, не болмаса оңай олжаға ке­нелгісі келетіндер де салықтан жал­тара алмайды. Оны бақылау те­тікте­рі елімізде нақты жүйеге қойылған.
Лотерея ойнату – харам
«Лотерея ойнату құмарға жа­тады» дейді Қазақстан мұсыл­мандары діни басқармасы төра­ғасының орынбасары, наиб мүфти Ершат Оңғаров. «Құмар – кездей­соқ сәттілікке үміттеніп, ұтыс мақсатымен ақша, құнды зат тіге отырып ұту немесе ұтылуды білдіреді. Шариғатымызда құмар ойындарға қатаң түрде тыйым салынған. Алла Тағала Құранда былай дейді: «Олар [адамдар] сенен (уа, Пайғамбар) арақ пен құмар туралы сұрайды. «Ол еке­уінде үлкен күнә және адамдар үшін кейбір пайдалар бар. Алайда пайдасынан күнәсі көп» деп айт» («Бақара» сүресі, 219-аят).
Аяттағы «мәйсир» сөзі құмар деген мағынаны білдіреді. Яғни, бі­реудің ұзақ уақыт бойы еңбек­те­ніп тапқан ақшасын құмар ойыны арқылы оп-оңай, жеңіл жолмен алғандықтан «мәйсир» деп аталған.
Құмар ойынына карта, нарда, ойын автоматтары, рулетка, ло­терея, букмекерлік кеңсе т.б. жа­тады. Кең таралғаны – лотерея. Оның бірнеше түрі бар. Негізгілері мыналар:
1. Сандық лотерея: белгілі бір мөлшерде сандар басылған билет ретінде сатылады. Кездейсоқ таң­далатын сандар арқылы жеңімпаз анықталады. Бұл құмар ойынында қатысушылардың кейбірі ғана ұтысқа ие болып, жүздеген, мың­даған адам шығынға ұшырайды. Ұйымдастырушы тарап пайдаға кенеледі. Сол секілді үйді, көлікті, кітапты т.б. заттарды лотерея арқылы ойнатып сату, лотереяның осы түріне жатады.
2. Спорттық лотерея (ойын авто­маттары, букмекерлік кеңсе): әртүрлі спорттық жарыстардың нәтижелерін жорамалдап, бәс ті­геді. Егер ұтса ставканың мөлшері мен коэффициентіне байланысты ұтысын алады. Ал сәтсіздікке ұшы­раса, тіккен ақшасынан айы­рылады.
Лотереяның кез келген түрі құмарға жататындықтан үкімі үзілді-кесілді харам саналады. Оған қандай ниетпен болса да, тіпті билетін тегін алса да қатысуға болмайды. Ибн Аббастан жеткен риуаятта Алла елшісі (оған Алла­ның салауаты мен сәлемі болсын): «Алла Тағала бір қауымға бір нәрсені жеуді харам еткен болса, онда оның ақшасын алуды да ха­рам етті» (Бұхари, Муслим), – деген. Себебі құмар адал кәсіп емес, керісінше адамдардың мал-дүниесін арам жолмен алу.
3. Жарнамалық лотерея: бұл тауарларды сатуға ынталандыратын лотерея түрі. Мысалы, дүкендерде, сауда орындарында клиенттерді тарту мақсатында тауарларға жүл­делер қойып ойнатады. Ол тауар­ларға белгілі бір номерлер белгі­лейді. Кейін оны тұтынушы на­рық­тағы бағасына немесе одан қымбатқа сатып алып, сыйлыққа қол жеткізуі мүмкін» дейді ислам­танушы.
Кейбір ғұламалар бұл ойынға харам деп үкім берген екен. Яғни, ол елді алдау, құмар болып са­на­ла­ды. Саудагерлер арасында бә­се­келестік тудырады. Оның соңы бір-бірін балағаттауға әкелуі мүм­кін. Ал шариғатта өзіне де, өзгеге де зиян тигізуге болмайды делінген.
«Қазақстан мұсылмандары діни басқармасы Ғұламалар кеңесінде 2019 жылы 5 желтоқсанда қабыл­дан­ған пәтуада осы мәселеге бай­ла­нысты төмендегі үкімдер бекітілді:
1. Кез келген құмар ойыны харам;
2. Сандық және спорттық ло­те­рея құмар ойынына жатады;
3. Жеке мүлікті лотерея арқылы сату харам;
4. Тауарды өткізу мақсатында тігілген сыйлықты мынадай шарт­тармен ғана алуға рұқсат етіледі:
– Тауардың құны нарықтағы бағадан аспауы керек. Егер ұтыс себепті бағасы көтерілсе құмар са­налады;
– Сыйлыққа жету үшін тауар сатып алмауы қажет. Егер затты ке­рек етпей, тек жүлдеге қол жет­кізу мақсатында сатып алса, онда ол мал-дүниені бекер шашқан болады;
– Тауар адал әрі пайдалы болуы тиіс;
– Сыйлық қатысушы тарап­тың берген ақшасынан алынбауы керек;
– Тұтынушыларға қиянат жа­сал­мауы тиіс әрі тауарды өткізуде алдау, алаяқтық болмауы шарт» дейді Ершат Оңғаров.
<a href="https://aikyn.kz/">AIQYN</a>

Инстаграмдағы лотерея: алған көп пе, алданған көп пе?

<a href="https://kyzylorda-news.kz/">Kyzylorda-news.kz.</a> Қазақстандықтар Сенат депутаттарының заң жобаларын талқылау барысын тікелей эфирден көре алады. Бұл турады Қызылорда облысының тұрғындарымен кездесу барысында аталмыш палата депутаты Мұрат Бақтиярұлы айтты.
Парламент Сенатының баспасөз қызметінен мәлім еткендей, депутаттар Мұрат Бақтиярұлы мен Бекмырза Еламанов жұмыс бабындағы сапармен Қызылорда облысының Жалағаш ауданындағы Жалағаш кентінде және Бұқарбай батыр ауылында, сондай-ақ Сырдария ауданындағы Сырдария кентінде болды.
Жүздесуде Сенат жұмысының ашықтығы туралы айтылып, палатаның жалпы отырыстары мен комитеттердің кеңейтілген отырыстары тікелей эфирде көрсетілетіні айтылды.
<blockquote>
 «Заң жобасын талқылау барысын ғаламтордан барша қазақстандықтар көре алады. Өткен жылы «Педагог мәртебесі туралы» және халықтың денсаулығына қатысты заңдар халық арасында кеңінен талқыланды. Осындай мәселелерді талқылауда халықтың пікірі, ұсынысы біз үшін маңызды. «Педагог мәртебесі туралы» заң ұстаздардың сапалы білім беруі және оларды артық жүктемеден арылту үшін қабылданып отыр. Мұғалімдердің ар-намысына тиіскендерге қатысты жауапкершілік күшейтіліп, тиісті мөлшерде айыппұл төлейтін болады. Ұстаздар қауымын әлеуметтік жағынан қамтамасыз ету де қолға алынып отыр», – деді Мұрат Бақтиярұлы.
</blockquote>
Одан басқа, елімізде жол-көлік оқиғаларының жиілеп кетуіне байланысты бірқатар заңдарға өзгерістер енгізілді. Атап айтқанда, көлікті мас күйінде басқарған азаматтар 10 жылға дейін көлік жүргізу құқығынан айырылуы мүмкін.
Депутаттар аймақты аралау барысында И.Тоқтыбаев атындағы №35 мектеп-лицейге арнайы барып, ауыл тұрғындарымен, мұғалімдермен, медицина қызметкерлерімен, аудандық және облыстық мәслихат депутаттарымен, шаруа қожалықтарының өкілдерімен, сондай-ақ ауыл ақсақалдарымен кездесті.
Сенаторлар сонымен бірге тұрмыстық және кәмелетке толмағандарға қатысты зорлық-зомбылық, нашақорлық, адам өліміне қатысты қылмыстар үшін жауапкершілікті күшейту шаралары туралы айтты. Жүздесуде ауыл тұрғындарының ұсыныс-пікірлері тыңдалды. Тұрғындар «Педагог мәртебесі туралы» заң жобасының қабылданғанына ризашылығын білдіріп, міндетті әлеуметтік медициналық сақтандыру, зейнетақы және еңбекақыға қатысты сауалдар қойды.
Палата өкілдері кездесуде айтылған өзекті мәселелер бақылауда болатынын айтып, маңызды тақырыптар Парламент Сенатында талқыланатынын жеткізді.
<img src="https://kyzylorda-news.kz/wp-content/uploads/2020/01/qazaqstandyqtar-zang-zhobalaryn-talqylaw-1.jpg" alt="" />

Қазақстандықтар заң жобаларын талқылау барысын онлайн көре алады &#8211; сенатор

<a href="https://kyzylorda-news.kz/">Kyzylorda-news.kz.</a> Қазақстан Республикасының Президенті Қасым-Жомарт Тоқаевтың «Абай және ХХІ ғасырдағы Қазақстан» атты мақаласы қазақ руханиятының өркендеуіне серпін береді.
Абай мұрасының қазақ ұлтының ғана емес барша адамзаттың рухани құндылығы десек қателеспейміз.Тарих беттеріне үңілсек өткен ғасырдағы алаш қайраткерлері оның ішінде Әлихан Бөкейханов Абай шығармашылығына Еуропаның әйгілі ақындарына мақтаныш болды деп баға беріп, жарыққа шығуына зор ықпал етті. Сол дәуірдің өзінде түркі жұртында ұлы ақынмен шендесе алатындай тұлға болған жоқ. Одан кейін бір ғасыр уақыт өтсе де Абай шығармашылығы еш мәнін жоғалтпай руханиятымыздың темірқазығына айналды. Осы арада аяулы алаш қайраткері Міржақыптың «Абайдың өлген күнінен қанша алыстасақ рухына сонша жақындармыз» деген сөзі еріксіз ойға оралады.&nbsp;
Ұлттық рухымызды көтеретін мақалада жаңа қоғамда береке-бірлігімізді сақтап, халқымыздың қадір-қасиетін арттыру үшін Абай мұрасына арқау болған мақтан мен масылдық психологиядан арылып, қайраттанып еңбек ету арқылы әрбір Қазақстандықтың еселі еңбегінің арқасында еліміздің экономикасының қарыштап ілгерлейтіні ерекше аталды. Осы орайда еліміздің қай саласында болмасын Абай мұрасын насихаттап, әлемдік деңгейге көтеру&nbsp; рухани жаңғырудағы бір белесіміз болмақ. Оның ішінде ұлтымыздың ұлы тарихын ұлықтап отырған музейлерде ұлы ақынның 175 жылдық мерейтойы аясында келелі шараларды ойдағыдай жүзеге асыру киелі міндетіміз деп білемін.
Гүлзира ЖҰМАБАЙҚЫЗЫ,
Қызылорда облыстық тарихи-өлкетану музейі Ақмешіт филиалының қызметкері

Абай мұрасын насихаттау міндетіміз

<a href="https://kyzylorda-news.kz/">Kyzylorda-news.kz.</a> Академик, математика ғылымдарының докторы Асқар Жұмаділдаев қосымша сабақсыз, яғни мұғалімді жалдап оқытпай, қазір оқушыға мектептегі білімді үйрену қиын болатын жағдайға жетіп қалғанымыз туралы ащы шындықты айтты, деп хабарлайды&nbsp;<a href="https://dalanews.kz/">Dalanews.kz.</a>&nbsp;
<blockquote>
 «…Жалға сабақ беретіндер бар. Репетиторлардың дәурені жүріп тұр қазір. Бұл – біздің министрлік жасаған реформалардың «жемісі».
 Бұл – біз жүргізген реформаның жүйесіздігі. Анаған еліктеп, мынаған еліктеп, босқа далақтағанымыздан солай болды. Қазір мектепте оқушы оқып отырған сабағын ұқпайды. Сондай деңгейге жеттік. Еріксіз қосымша сабақ алады бала содан», – дейді ол.
</blockquote>
Ғалым білім саласында одырайып көзге оғаш көрініп тұрған бұл бір нәрсе емес екенін айтады.
<blockquote>
 «Мысалы, қазақтар жапонның көлігін мінгісі келеді, мініп те жүр, бірақ жапон өлшемдерімен өмір сүруді ойламайды.
 Сол секілді америкалықтар құсап жалақы алғысы келеді, алып та жүр топ-менеджерлер, бірақ америкалық өлшеммен елді дамытуға бастарын да қатырғысы келмейді.
 Бұл дұрыс емес нәрсе. Егер бір үрдісті алғыңыз келсе, оны толықтай, 100 процент енгізу керек. Біздің реформалардың ақсап жатқандығының бір себебі осында. Ана арадан бір жұлып, мына арадан бір жұлған шалағайлық бәрі.
 Одан түк шықпайды. Қазір Қазақстанда ең коррупциялы кәсіпті атаңыз десе, мұғалім мен дәрігерді атайды. Неге? Өйткені бүкіл жүргізілген реформа&nbsp;осы екі қастерлі мамандықты аяқ астына тастап жіберді.
 Әйтпесе кез келген мемлекетке барыңыз, мұғалімді ұстаз деп алақандарына салады, дәрігерді қалай құрметтейді. Ал бізде ешқандай құрмет жоқ.
 Қарап тұрсаңыз, адамдардың көзқарасы мұғалімге де, дәрігерге де, полицияға да қарсы. Бұл дұрыс емес қой. Неге мұндай көзқарас қалыптасты, бұл үшін осы мамандық иесі кінәлі деп ойлайсыз ба, жоқ әрине», – дейді ол.
</blockquote>
Асқар Жұмаділдаев Кеңес заманы мұғалімдері түгелсілген кейінгі кезеңді көз алдына елестете алмайтынын айтты.
<blockquote>
 «Мысалы, қазір Кембридж білім жүйесіне кіріп жатыр, қанша ақша шығарып оны сатып алдық. Егер сол жүйемен оқығандармен біздің балаларды салыстырса, біздікілер озып кетеді. Әсіресе, математика бойынша. Себебі олар Кеңес заманынан қалған білім жүйесінің инерциясымен қазір алда келеді. Кеңес заманы мұғалімдері құрыған соң құлайды мұның бәрі. Қазір де құлдырау бар бізде», – дейді ол.
</blockquote>
Ғалым Қазақстанға ағылшын тілі бас бәлеге айналып келе жатқанын айтады.
<blockquote>
 «Біз балаларды ағылшынша оқытамыз дедік. Одан не пайда таптық, бәрі шетелге қашып кетіп жатыр. Бұл – қазіргі менің басты проблемам.
 Оқытқан балаларымды қалай ұстап қалсам деп басымды қатырамын. Оның бәрін шетел экономикасын дамытсын деп оқыттық па сонда дейсің?
 Басы істейтін, мықтыларды ұстай алмайсың. Қиын. Сондықтан маған ауылдан шыққан балалар ұнайды. Орыс тілін де, ағылшын тілін де білмейтін. Солар қалады менде, ал қалғандары бәрібір кетіп қалады», – дейді Асқар Жұмаділдаев.
</blockquote>
Ғалым үштұғырлы тілге қатысты көзқарасын үнемі айтып жүргенін, бірақ оны жоғарыда естір құлақ жоқ екенін де баса айтты.
<blockquote>
 «Ұштұғырлы тіл деген немене? Бізге айтады, тарихтан басқа пәннің барлығы ағылшын тілінде жүрсін дейді. Демек, не деп жатыр біздің Үкімет? Қазақ тілі – ауыл-аймақтың тілі. Қазақ тілінде тарихты айтып, құйқылжытып ән сала бер дейді, бірақ іргелі ғылым қазақ тілінде сөйлемесін дейді. Осы дұрыс па? Өз-өзімізді кемсітіп отырмыз ғой сонда. Компьютер тілі қазақша болмасын, тағысын тағы дегендей.
 Намыс деген әңгіме осы жерде шығуы керек. Намыс жоқ бізде. Менің түсінігімде, мектептердің барлығында барлық сабақ тек өз ана тілінде өтуі тиіс. Ал мектептен соң қай тілде оқиды бала, өзі білсін. Іргелі ғылымдарды ағылшынша оқытамын деп жүргендердікі бос сөз. Шындығында келгенде, тарихты ағылшынша оқытамыз десек, ол ақылға қонымды. Біздің тарихты басқа елдер де білсін, бұл насихат түрі ғой. Негізі, тіл проблема емес, проблема ғылымның өзі.Қазақ тілі байланыс құралына айналып, ғылым мен техниканың тіліне айналғанда ол өзіндік орнын табады. Бұл – мемлекеттің шаруасы. Мемлекет «100 кітап» деген бағдарламаны жалғастыруы тиіс. Алдында аударылған кітаптардың 90 проценті гумантиарлық салаға тиесілі. Жоқ, техникалық саладағыларды аудару керек бізге. Құр, қазақша сөйле деп ұрандағаннан пайда жоқ. Осындай іспен тындыру керек бұл мәселені», – дейді ғалым.
</blockquote>

Асқар Жұмаділдаев: Қазіргі оқушы оқып отырған сабағын ұқпайды

<a href="https://kyzylorda-news.kz/">Kyzylorda-news.kz.</a> Қазақстан Республикасының Президенті Қасым-Жомарт Кемелұлының баспасөз беттерінде жарияланған «Абай және ХХІ ғасырдағы Қазақстан» атты мақаласы – бүгінгі қазақ қоғамы аса қажетсініп отырған бірқатар маңызды да күрмеулі мәселелерді қозғауымен құнды деп білемін. Биыл қазақтың бас ақынының туғанына 175 жыл толатындығын ойға алсақ, мемлекет басшысының аталған мақаласы – Ұлы дала тойының беташары іспетті. Президент мақаласында Абай шығармашылығының бағалы жақтарына баса назар аударылып, ондағы қазақ халқына ғана емес, күллі әлем жұртшылығы үшін қымбат жалпыадамзаттық идеяларға арнайы тоқталып, тарихи-әлеуметтік тұрғыдан терең талдау жасалыпты.
<img src="https://kyzylorda-news.kz/wp-content/uploads/2020/01/abajyn-ulyqtaghan-el-utylmajdy-2-1.jpg" alt="" />
Мақаланың «Ұлттық болмыстың үлгісі» тараушасында Абай поэзиясында сипатталған ұлт мінезіне, ақынның жақсы-жаман қылықтарды қалай сынап көрсеткенін сараптай отырып, ақын өлеңдеріндегі мысалдардың мәні бүгінгі қоғам үшін де актуальді екендігіне ден қояды. Расында да, Абай өз халқының бойында кездесіп қалатын кейбір келеңсіз кемшіліктерді аяусыз сынағаны белгілі. Алайда ойшыл ақын мұны «қазақ ел болсын, өркениет көшінен кейін қалмасын» дейтін жанашыр ниетпен жазғандығы тағы мәлім. Президент Абай қара сөздерінде кездесетін «толық адам», «кәміл мұсылман» секілді философиялық мәні терең терминдерді әлі де зерттей түсу керектігін айтқан. Бұл орайда ел басшысы гуманитарлық ғылымның алдына маңызды міндет қойып, отандық ғалымдарға үлкен үміт жүктеді деп түсінемін. Абай әлемі – рухани қымбат қазыналардың қоймасы. Ақын мұрасы сыры толық ашылмаған жұмбақ арал сияқты. Әйтпесе, қазақ данасы «Жүрегімнің түбіне терең бойла, // Мен бір жұмбақ адаммын оны да ойла» деп бекер ескертпес еді.
Мақалада Абай поэзиясында аталған «бес жақсы мен бес жаман» қасиеттерге ерекше көңіл аударылыпты. Әлбетте, бүгінгі жастарымыздың ақын өлеңінде аталған жақсы қасиеттерге бойға сіңіріп, жаман мінездерден жиренуі – заман талабы. Абай жалғыз жастарға ғана емес, қазақтың үлкені мен кішісіне, ерлі-зайыпты мен туған-туысқа, бай мен кедейге де келелі кеңесін аямаған. Президент «бай» мен «кедей» дегенде қазіргі қоғамдағы бизнесмен азаматтар да, тұрмысын түзей алмай жүрген кедей жандар да Абайды оқыса, хакімнің өсиет сөздерін өмірлік үлгі етсе дейді. Яғни, бұл дегеніміз Абай мұрасын балабақшадан бастап, билік биігіндегілерге дейінгі барша халықтың жата-жастана оқуы – өнегелі дәстүрге, ұлттық парызға айналса деген игі тілек деп ұққан абзал.
Президентіміздің Абай, Шәкәрім, Мұхтарлар туған Семей өңірін дамытуға көңіл бөлуі – көпшілік құптайтын игілікті істердің бірі. Абайдың рухы мәңгі тыным тапқан Жидебай аулындағы ақын музейін жаңғырту да дер кезінде қолға алынып отырған рухани қажеттілік. Осы айтылғандар сәтімен жүзеге асқан жағдайда Президентімізге алғыстан басқа айтарымыз жоқ!
Қасым-Жомарт Кемелұлының аталған мақаласында Абайды «әлемдік мәдениеттің тұлғасы» ретінде танытуға айрықша назар аударылған. Ұлы ақын мұрасын әлем халықтарының 10 тіліне аудару – Абай шығармашылығын насихаттауға тың серпін берері анық. Расында ақын Абайды тек қазақ халқының мақтанышы ғана емес, бүкіл адамзат баласына ортақ данышпан, ойшыл тұлға ретінде танитын уақыт жетті деп білеміз. Бұл ретте мемлекет басшысы қазақ әдебиеттанушыларынан ұлы ақын шығармашылығын тың ізденістер, тыңғылықты зерттеулер күтетінін де қадап айтты. Әрине, өзім де біраз жылдардан бері ақынның қолжазба мұрасын зерттеумен шұғылданушы ғалым ретінде абайтануға өз үлесімді қосамын деп үміттенемін. Қорыта айтқанда, Қазақстан Президентінің «Абай және ХХІ ғасырдағы Қазақстан» атты мақаласы бүгінгі абайтану бағытындағы көкейтесті пікірлерімен және ақын мерейтойының халықаралық деңгейде ойдағыдай өтуіне орай айтылған ойлы ұсыныстарымен қуантты.
Серікбай ҚОСАН, ф.ғ.к.,
Қызылорда облыстық
«Рухани жаңғыру» орталығының бөлім басшысы

Абайын ұлықтаған ел ұтылмайды

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» мемлекеттік корпорациясы қарамағындағы 1411 байланыс орталығы енді тәулік бойы қоңыраулар қабылдайды.
Әлеуметтік төлемдер мен еңбек саласына қатысты кеңес беретін call-орталық қызметкерлері бұдан былай атаулы әлеуметтік көмек пен әлеуметтік қызметтер порталының жұмысына қатысты сауалдарға, сондай-ақ info@info.mintrud.kz электронды поштасына келіп түсетін хаттарға жауап береді.
<blockquote>
 «Бүгінде 1411 &nbsp;байланыс орталығына орташа есеппен бес мың қоңырау келіп түседі. Азаматтар демалыс және мереке күндері де қоңырау шалып, өз сауалдарына жауап ала алады. Жыл басынан бері 22 мың қоңырау келіп түссе, олардың басым бөлігі зейнетақы және әлеуметтік қамсыздандыру, көп балалы аналардың ай сайынғы жәрдемақысы, атаулы әлеуметтік көмек мәселелерін қамтиды. Қызмет алушылар ХҚО-ға бармас бұрын, 1411-ге хабарласып, әлеуметтік қызметтерді рәсімдеуге қажет құжаттар тізімін де алдын ала біліп отыра алады», – дейді «Азаматтарға арналған үкімет» мемлекеттік корпорациясының басқарма төрайымының орынбасары Біржан Жүнісов.
</blockquote>
1411 бірыңғай қысқа нөміріне тегін қоңырау шала отырып, кез келген оператордан келесі мәселелерге қатысты жауап алуға болады:
– зейнетақымен жәрдемақы рәсімдеу;
– көп балалы отбасының мемлекеттік жәрдемақысы;
– атаулы әлеуметтік көмек;
– әлеуметтік қызметтер порталы;
– еңбек қатынастары және халықты жұмыспен қамту;
– мүгедек балаларды тәрбиелеп отырған адамдарға онлайн-психологиялық консультация беруге өтінімдер қабылдау мәселелері.
Бұдан басқа, әлеуметтік төлемдер мен зейнетақы және еңбекпен қамту мәселесіне қатысты негізгі сауалдардың жауабын www.info.mintrud.kzсайты арқылы да білуге болады.

1411: АӘК, зейнетақы және тағы басқа сұрақтарға жауап береміз

<a href="https://kyzylorda-news.kz/">Kyzylorda-news.kz.</a> Бүгін «Nur Otan» партиясы облыстық филиалы жанындағы партиялық бақылау комиссия мен сыбайлас жемқорлыққа қарсы іс-қимыл жөніндегі қоғамдық Кеңестің бірлескен отырысы өтті.
Отырыстың күн тәртібіне қоғамдық көлік саласындағы қызмет көрсету сапасын арттыру, партия филиалдарының қоғамдық қабылдау бөлмелеріне азаматтардан келіп түскен өтініштердің оң шешілуі деңгейі және аумақтық комиссиялар мен кеңестердің жұмыстарын күшейту. Сондай-ақ 2020 жылға арналған жұмыс жоспарларын бекітіп, алдағы жұмыстарды айқындау сынды мәселелер ұсынылды.
Отырысқа облыстық партия филиалы партиялық бақылау комиссиясының төрағасы, «Қазпошта» акционерлік қоғамы Қызылорда облысы бойынша филиалының директоры Аида Әбибуллаева, облыстық және қалалық комиссия мен кеңес мүшелері, тиісті облыстық басқарма мен бөлім басшылары, облыстық, қалалық партия филиалының жауапты қызметкерлері және бұқаралық ақпарат құралдарының өкілдері қатысты.
Күн тәртібіндегі бірінші мәселе бойынша «Қызылорда» Автобус паркі» жауапкершілігі шектеулі серіктестігінің директоры Нұржан Ахатов хабарлама жасады.
Иә, қала тұрғындарының басым көпшілігі қоғамдық көліктердің қызметін күнделікті пайдаланады десек қателеспейтін шығармыз. Оның ішінде зейнеткерлер, мектеп оқушылары да бар.
Яғни күнделікті жұмыстағы адам таңертеңгі сағат 6-7 – ден бастап түнгі сағат 20.00-22.00-ге дейін қоғамдық көліктің қызметін тұтынады. Одан кейін сенбі, жексенбідегі демалыс күндері де жеке шаруасының қамымен қала орталығына, базар, сауда орталықтарға қатынайтындар көп. Тұрғындар үшін қоғамдық көлік қызметі басты қажеттіліктің бірі.
Осы орайда, халыққа қызмет көрсету аясында қоғамдық көлік қызметінің сапасын бақылау мақсатында партиялық бақылау комиссия мен Сыбайлас жемқорлыққа қарсы іс-қимыл жөніндегі қоғамдық Кеңес тарапынан ай сайын партиялық мониторинг жүргізіліп отыр.
Бүгінгі таңда партияның қабылдау бөлмелері – халық пен биліктің арасындағы алтын көпір. Себебі, көпшілік өзінің мұң-мұқтажын, түйінді мәселелерін қоғамдық қабылдау бөлмелеріне келіп, білдіріп жатады. Сондықтан бүгінгі таңда қоғамдық қабылдау бөлмелеріне үлкен талаптар жүктелуде. Осы орайда партияның қабылдау бөлмелеріне келіп түскен өтініштердің нәтижесі жөнінде облыстық партия филиалының Қоғамдық қабылдау бөлімінің меңгерушісі Нұрлан Әбдікәрімов баяндап өтті.
Оның айтуынша ағымдағы жылы облыстық партия филиалдарының қоғамдық қабылдауларына тұрғындардан 4908 өтініш түскен. Бұл өткен жылдың осы мерзімімен салыстырғанда 1712 өтінішке өскен. Сонымен бірге, 2018 жылдың қорытындысы бойынша тұрғындардан түскен өтініштердің 1135-і немесе 36,5% оң шешімін тапса, 2019 жылдың қорытындысы бойынша 2041-і немесе 41,6% оң шешімін тапқан.
Жиында қоғамдық қабылдау бөлмелерінде қабылдауларды өткізу кестелеріне талдауларды жүйелі негізде жасап, қабылдаулардың тиімді, сапалы, өз дәрежесінде өткізілуін, қабылдау тәртіптерінің бұзылу жайларына жол берілмеуін қатаң бақылауға алу қажетті тапсырылды.
Жиын барысында қалалық партиялық бақылау комиссиясы мен сыбайлас жемқорлыққа қарсы іс-қимыл жөніндегі қоғамдық Кеңесінің атқарған жұмыстарының есептері тыңдалып, облыстық партия филиалының Партиялық бақылау комиссиясы мен филиалы жанындағы Сыбайлас жемқорлыққа қарсы іс-қимыл жөніндегі қоғамдық Кеңесінің 2020 жылға арналған жұмыс жоспарлары бекітілді.

Қызылордадағы қоғамдық көлік мәселесі партия бақылауында

<a href="https://kyzylorda-news.kz/">Kyzylorda-news.kz.</a>&nbsp;Білім және ғылым вице-министрі Шолпан Каринова жаңа заңға енгізілген қолдау шаралары туралы айтып берді.
<blockquote>
 “Негізі, бүгінде “Дипломмен ауылға” бағдарламасы бар. Онда қолдаудың біраз шарасы көрсетілген. Сондықтан оның бәрі заңмен бекітудің қажеті жоқ. Бұл – бөлек бағдарлама. Ауылға баратын педагогтар ол қолдауға жиі жүгініп жатады. Мәселен, биыл бағдарламаға бірқатар өзгеріс енгізілді. Соған сәйкес, бір реттік көтерме жәрдемақының көлемі 70 АЕК-ке (185 570 теңге – Sputnik Қазақстан) көтерілді”, – деді Каринова.
</blockquote>
Оның сөзіне қарағанда, биылдан бастап “Дипломмен ауылға” бағдарламасы бойынша берілетін несиенің көлемі де өсіп, 1 500 айлық есептік көрсеткішке (3 976 500 – Sputnik Қазақстан) жеткен. Осы ақшаға баспана сатып алуға болады.
Ал жер қатынастары туралы заңнама бойынша мұғалімнің жер учаскесін алуға басымдық құқығы бар. Сондай-ақ, мәслихаттың шешімімен жергілікті бюджеттен коммуналдық төлемдер мен көмір-отынды сатып алуға мүмкіндік алады. Бұның бәрі болған. Бірақ “Педагог мәртебесі туралы” заңда тағы бір мәрте көрсетіліп, педагогтың кепілдіктері ретінде айқындалды.
<blockquote>
 “Ал заңға енгізілген жаңа нормаларға келетін болса, әкімдіктерге тағы бір құқық берілді. Мысалы, өте қажетті маман болса, оның баспананы жалдауға кететін шығындары мен коммуналдық төлемдерін өтеуге болады. Сосын санаторийлік-курорттық емге байланысты ақшасын толықтай немесе жартылай төлеп тұруға мүмкіндік беріледі. Бұрын ондай болмаған”, – деп атап көрсетті Каринова.
</blockquote>
Айта кетейік, “Педагог мәртебесі туралы” заңда жаңа норма былай көрсетілген: “Жергілікті атқарушы органдар педагогке тұрғын үйді жалдауға және коммуналдық қызметтерге өтемақы төлемдерін, санаторийлік-курорттық емделуге және демалуға жолдама алу үшін толық немесе ішінара төлемақы, сондай-ақ педагогті әлеуметтік қолдауға бағытталған өзге де жеңілдіктерді көздеуге құқылы”.
[Sputnik Қазақстан](http:// https://sputniknews.kz/society/20200107/12475654/mugalimder-sanatori-demalys.html)

Мұғалімдер шипажайда тегін емделеді

<a href="https://kyzylorda-news.kz/">Kyzylorda-news.kz.</a> 2020 жыл Қазақстан мен әлем үшін жарқын сәттерге толы болмақ. Себебі, алдағы уақытта қазақстандықтарды ірі саяси және маңызды спорттық шаралар күтіп түр. Толығырақ&nbsp;[Sputnik Қазақстан](http:// https://sputniknews.kz/society/20191231/12362391/Tyshkan-zhyly-2020.html)&nbsp;шолуынан оқыңыз.
Токио Олимпиадасы
2020 жылы 24 шілде мен 9 тамыз аралығында Жапонияның астанасы Токиода жазғы XXXII Олимпиада ойындары өтеді.
Маңызды спорттық шараны ұйымдастырушылардың айтуынша, 4 жылда бір рет өтетін дүбірлі дода жоғары деңгейде ұйымдастырылады, онда соңғы үлгідегі инновациялық технологиялар пайдаланылады.
Сондай-ақ, Токио Олимпиадасының бағдарламасына жаңа 5 спорт түрі енеді. Олар – бейсбол/софтбол, карате, серфинг, құзға шығу және скейтбординг. Жалпы, жазғы XXXII Олимпиадасында 33 спорт түрінен 339 медаль жиынтығы сарапқа салынады.
Бүгінде Қазақстан құрамасының еншісінде 13 спорт түрінен 28 лицензия бар. Дүбірлі додаға жолдама алған спортшылар: Георгий Шейко (жеңіл атлетика), Ольга Рыпакова (жеңіл атлетика), Евгений Гидич (велоспорт), Виталий Худяков (жүзу), Дмитрий Баландин (2 лицензия, жүзу), Санжар Мұсаев, Денис Ганькин, Ильфат Абдуллин (садақ ату, жеке және командалық есептегі лицензия).
Expo-2020 көрмесі
Алдағы жылдың 20 қазаны мен 10 сәуірі аралығында Дубай қаласында халықаралық Expo-2020 көрмесі өтеді.
Бұл – Таяу Шығыс, Африка және Оңтүстік Азия өңірінде ұйымдастырылатын алғашқы халықаралық көрме. Маңызды шараның тақырыбы – “Ақыл адамдарын біріктіріп, болашаққа қадам басу”.
Көрмеге 25 миллион адам келеді деп жоспарланып отыр. Оның 70%-і шетелдіктер. Бұл – 168 жылдық тарихы бар Expo көрмесіндегі рекордтық көрсеткіш.
ЭКСПО кешенінің жалпағы аумағы – 438 гектар. Оның құрамына метро станциясы, Dubai South Mall сауда үйі, тұрғын үйлер, қонақ үй кешендері кіреді. Expo көрмесіндегі басты объект – диаметрі 150 метрді құрайтын “Аль-Васл” алаңы болады. Оның жанында Біріккен Араб Әмірліктерінің павильоны орналасады.
Қазақстан 9 млрд теңге жұмсайды
Халықаралық көрмеге қатысуға 190 мемлекет келісім берген. Одан бөлек, маңызды шараға халықаралық ұйымдар, кәсіпорындар мен білім беру ұйымдары қатысады. Жалпы, Expo-2020 көрмесінде 200-ден астам қатысушы өз жетістігін әлемге паш етеді. Оның арасында Қазақстан да бар.
Қазақ елі дүниежүзілік шараға қатысу үшін 9 миллиард теңгеге жуық қаражат жұмсағалы отыр. Осы орайда үкімет басшысының бірінші орынбасары – қаржы министрі Әлихан Смайылов бұл жағдайға қатысты түсініктеме берді.
<blockquote>
 “Біз 10 миллиард доллар инвестиция тартқымыз келеді. Бұл үшін бізге Дубайдағы “ЭКСПО” көрмесіне қатысу қажет. “Мүмкіндіктер” технологиялық кластері аясында Қазақстанның ұлттық павильоны болады. Оны әлемнің түкпір-түкпірінен жиналған көптеген инвестор аралайды. Уақытша құрылыстар тұрғызу үшін 8,8 миллиард теңге немесе 22 миллион доллар бөлініп отыр”, – деген еді Смайылов.
</blockquote>
Дүниежүзілік сауда ұйымының конференциясы
2020 жылы Қазақстанның астанасында Дүниежүзілік сауда ұйымының (ДСҰ) 12-ші министрлік конференциясы өтеді. Халықаралық сауда тақырыбына арналған маңызды шара 8-11 маусым аралығында ұйымдастырылады.
Конференцияға ұйымға мүше елдің 164 сауда министрі мен ДСҰ-дағы бақылаушы мемлекеттердің 20 сауда министрі қатысады. Одан бөлек, халықаралық шарада беделді сарапшылар болады. Жалпы, конференцияға қатысушылардың саны – 5 мың адам.
Маңызды жиында Дүниежүзілік сауда ұйымының жұмысына реформа жасау, қызмет көрсету саласындағы жаңа ғаламдық ережелерді реттеу, инвестиция тартуға көмектесу, электронды сауда, әрі балық аулау кәсібіне субсидия тарту сынды мәселелер талқыға салынады.
Естеріңізге сала кетейік, Қазақстанда Дүниежүзілік сауда ұйымының 12-ші министрлік конференциясын өткізу туралы шешім 2019 жылдың 29 қазанында қабылданған. Нақтырақ айтсақ, ҚР сауда және интеграция министір Бақыт Сұлтанов Женеваға жұмыс сапары барысында Дүниежүзілік сауда ұйымымен халықаралық конференцияны өткізу туралы келісімге қол қойды.
XVIІ өңіраралық ынтымақтастық форумы
2020 жылы Қазақстан мен Ресейдің XVIІ өңіраралық ынтымақтастық форумы Көкшетау қаласында өтеді.
Алдағы жылы форумға қатысушылар экология және жасыл даму мәселелерін талқыға салады. Жиынның орны мен оның тақырыбын Қазақстан президенті Қасым-Жомарт Тоқаев ұсынды. Бұл ұсынысты Ресейдің мемлекет басшысы Владимир Путин қолдаған.
Айта кетейік, алғаш рет өңіраралық ынтымақтастық форумы 2003 жылы Омбы қаласында өткен болатын. Оған Қазақстанның тұңғыш президенті Нұрсұлтан Назарбаев пен Ресей президенті Владимир Путин қатысты. Осы уақыттан бері форум Ресеймен шекаралас аудандарда дәстүрлі түрде ұйымдастырылып келеді. Алайда 2020 жылы форум Ақмола облысында өтеді, бұл өңір Ресеймен шектеспейді.
ЕАЭО елдеріндегі халық санағы
2015 жылдың желтоқсанында Еуразиялық экономикалық комиссия кеңесі 2020 жылы ЕАЭО-ға мүше елдерде халық санағын өткізу туралы шешімді мақұлдаған.
Ал сол жылдың 2 желтоқсанында Жоғары Еуразиялық экономикалық кеңес отырысында “2020 жылы Еуразиялық экономикалық одаққа мүше елдерде халық санағын жүргізу” туралы жобаны жүзеге асыру туралы шешім қабылданды.
Айта кетейік, ЕАЭО-ға мүше елдерде халық санағы 10 жылда бір жүргізіледі. Мамандардың пікірінше, халық санағы одаққа мүше елдердің әлеуметтік-экономикалық индикатор көрсеткіштерін түзетуге мүмкіндік береді.
Қазақстанда халық санағы 2020 жылдың қазанында жүргізіледі.
XIII Астана экономикалық форумы
Алдағы жылы Қазақстанның бас қаласында дәстүрлі Астана экономикалық форумы ұйымдастырылады. Онда әлемдік көшбасшылар және беделді халықаралық сарапшылар ғаламдағы өзекті мәселелер туралы пікір алмасады.
2020 жылы да XIII Астана экономикалық форумы аясында түрлі тақырыптағы панельдік сессиялар, дөңгелек үстелдер, конференциялар, бизнес-диалогтар өтеді. Қазіргі таңда форум қай уақытта өтетіні нақтыланған жоқ.

Тышқан жылы: 2020 жылы болатын маңызды оқиғалар

<a href="https://kyzylorda-news.kz/">Kyzylorda-news.kz.</a> Қызылорда облысы полиция департаментінің көші-қон&nbsp; қызметі басқармасы&nbsp; бастығының орынбасары полиция подполковнигі С.Қамитбеков&nbsp; «Шетел азаматтарын тіркеу рәсімдерін жеңілдету» тақырыбы бойынша негізгі сұрақтарға&nbsp; жауап берді.
Енді шетелдіктерді тіркеу ұғымы толығымен жойылады.
Олар 30 күнтізбелік күн тіркелусіз елде болуы мүмкін. Шекарада бұрын болған көші-қон картасын толтырудың қажетті жоқ. Көші-қон карталары айналымнан толық алынады. Бұл дегеніміз, Қазақстанға кіру кезінде шетелдік азамат шекаралық бақылау орнында 30 күнге дейін есепке&nbsp; автоматты түрде қойылады, оның паспортында елге келу күнін белгілейтін күні-мөртаңба қойылады.
Бұл ретте шетелдіктің полицияда тіркелу сияқты міндеті жоқ. Осы&nbsp; міндеттер заң бойынша қабылдаушы тарапқа жеке және заңды тұлғаға жүктеледі. Бұл ретте қабылдаушы тарап шетелдік азаматтың келгені туралы 3 жұмыс күні ішінде көші-қон қызметін хабардар етуге міндетті.
Хабардар етудің&nbsp; үш жолы бар
Визалық көші-қон порталы арқылы
Электрондық үкімет порталы арқылы. Егер Сіз осы жолды таңдасаңыз, онда қабылдаушы тарапқа электрондық цифлық қолтаңба жеткілікті.
Сондай-ақ, жазбаша хабарлауға болады.
Бұл үшін қабылдаушы тарап шетелдік азаматтың келгені туралы жазбаша хабарлай отырып көші-қон қызметіне жүгінеді.
Өтініш еркін нысанда жазылады.
Қазақстан Республикасына визалар бойынша келетін шетелдік азаматтарда жеке есепке тұрудан босатылады, сондықтан визаның өзі елде уақытша тұруға рұксаты бар.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – 30 күн елде болған соң&nbsp; шетелдік не істеу керек?
Егер шетелдік рұқсат етілген елде 30 күннен асып, қалуға ниет білдірсе /жұмысқа,оқуға,емделуге т.б/, онда ол уақытша тұруға рұқсат (орысшасы РВП) ала отырып, өзінің болу мерзімін ұзарта алады, ол оған елде бір жылға дейін &nbsp;болуға құқық береді.&nbsp;&nbsp; Бұл – ең ұзақ мерзімі.
Еңбек қызметіне рұқсат (заңдастыру), жергілікті атқарушы органдар берген рұқсат, оқу немесе медициналық мекеменің қолдаухаты- шетелдіктің уақытша тұруға рұқсат (УТР) алу үшін негіздері болып табылады.
Шетелдік азамат қабылдаушы тараптың өтініші бойынша ғана уақытша тұруға рұқсат&nbsp; (УТР) алатын болады.
–Көші-қон заңнамасын бұзғаны үшін қандай жауапкершілік көзделген?
&nbsp;Қазақстан Республикасының Әкімшілік құқық бұзушылықтар туралы Кодексіне, сондай-ақ, көші-қон заңнамасына өзгерістер енгізілді.
ҚР ӘҚБтК-нің 517 , 518 және 519&nbsp; баптарына сәйкес шетелдік азаматтың, қабылдаушы тараптың жауапкершілігі қарастырылған.
Қабылдаушы тарап шетелдік азаматтың ел аумағына келгені туралы көші-қон қызметіне хабарламағаны үшін және шетелдікке уақытша тұруды тіркеуді рәсімдемегені үшін жауапты болады.
<img src="https://kyzylorda-news.kz/wp-content/uploads/2020/01/dvd-migracija-2.jpeg" alt="" />

Шетелдіктерді тіркеу тәртібі өзгерді

<a href="https://kyzylorda-news.kz/">Kyzylorda-news.kz.</a> Қызылорда облысы Шиелі ауданы Тартоғай елді мекені тұсындағы «Шымкент-Самара» тас жолының бойында «Chevrolet Lacetti» жеңіл автокөлігі жанып кетті. Бұл туралы Қызылорда облысы төтенше жағдайлар департаменті өрт сөндіру және авариялық құтқару қызметі хабарлады.
Автокөлік Ресейден Өзбекстанға бағыт алып бара жатқан. Оқиға орнына Тартоғай өрт сөндіру бекетінің 4 маманы өрт сөндіру көлігімен дереу жетті.
<blockquote>
 «Өрт сөндірушілер жылдам әрекет етіп, нақты іс-қимыл атқарды. Нәтижесінде өрт оқшауланып, 19 сағат 59 минутта толығымен сөндірілді. Өрт салдарынан зардап шеккендер мен қаза болғандар жоқ», – деп мәлім етті Қызылорда облысы төтенше жағдайлар департаменті өрт сөндіру және авариялық құтқару қызметінің баспасөз маманы Әлия Ережепова
</blockquote>

Тартоғай елді мекені тұсында автокөлік жанып кетті

<a href="https://kyzylorda-news.kz/">Kyzylorda-news.kz.</a> 2018 жылдың шілдесінде ұрылардың қолынан қаза тапқан танымал спортшы Денис Теннің шешесі Оксана Тен оқиға орнында болған екі полицейдің үстінен арыз түсіріп, тергеуді қайта жүргізуді талап етті. Бұл туралы <a href="https://kaz.tengrinews.kz/">Tengrinews.kz</a> жазды.
Оксана Тен Қылмыстық кодекстің 371-бабының 2-бөлігі (абайсызда ауыр зардаптарға әкеп соққан салғырттық) бойынша полицейлерді жауапқа тартуды талап етіп отыр. Бұл істі Сыбайлас жемқорлыққа қарсы іс-қимыл агенттігінің Алматы қалалық департаменті жүргізген. Алайда 2019 жылдың наурыз айында іс тоқтатылыпты. Талап арыз берушінің адвокаты Нұрлан Сиқымбаев «істі тоқтатып тастауы заңсыз» дейді.
Ертең Алматы қаласының мамандандырылған ауданаралық сотында осы іске байланысты жабық сот процесі өтеді. Оксана Теннің пікірінше, егер оқиға орнында болған екі полицей салғырттық танытпағанда қайғылы оқиға болмас еді.
<blockquote>
 «Бәрі олардың көз алдында болған. Олар ұрыларды қорқыту үшін тіпті қызметтік ысқырығын да пайдаланбаған. Ішкі істер органдары туралы заңның талабы бойынша, полицейлер қылмыстың алдын алып қана қоймай, алғашқы медициналық көмек көрсете білуі қажет. Көмек көрсетудің орнына тек «Жедел жәрдем шақырыңдар!» деп айқайлаған» дейді арызданушы.
</blockquote>

Қазақстан және Қызылорда облысының жаңалықтары

Инстаграмдағы лотерея: алған көп пе, алданған көп пе?

Қазақстандықтар заң жобаларын талқылау барысын онлайн көре алады – сенатор

Абай мұрасын насихаттау міндетіміз

Асқар Жұмаділдаев: Қазіргі оқушы оқып отырған сабағын ұқпайды

Абайын ұлықтаған ел ұтылмайды

1411: АӘК, зейнетақы және тағы басқа сұрақтарға жауап береміз

Қызылордадағы қоғамдық көлік мәселесі партия бақылауында

Мұғалімдер шипажайда тегін емделеді

Тышқан жылы: 2020 жылы болатын маңызды оқиғалар

Шетелдіктерді тіркеу тәртібі өзгерді

Тартоғай елді мекені тұсында автокөлік жанып кетті

Денис Теннің ісі қайта қаралуы мүмкін бе?

Қазақстан және Қызылорда облысының жаңалықтары

Инстаграмдағы лотерея: алған көп пе, алданған көп пе?

Қазақстандықтар заң жобаларын талқылау барысын онлайн көре алады &#8211; сенатор

Абай мұрасын насихаттау міндетіміз

Асқар Жұмаділдаев: Қазіргі оқушы оқып отырған сабағын ұқпайды

Абайын ұлықтаған ел ұтылмайды

1411: АӘК, зейнетақы және тағы басқа сұрақтарға жауап береміз

Қызылордадағы қоғамдық көлік мәселесі партия бақылауында

Мұғалімдер шипажайда тегін емделеді

Тышқан жылы: 2020 жылы болатын маңызды оқиғалар

Шетелдіктерді тіркеу тәртібі өзгерді

Тартоғай елді мекені тұсында автокөлік жанып кетті

Денис Теннің ісі қайта қаралуы мүмкін бе?

Қазақстандықтар заң жобаларын талқылау барысын онлайн көре алады – сенатор