<a href="https://kyzylorda-news.kz/">Kyzylorda-news.kz</a>. 2020 жылдың 1 наурызынан бастап коронавируспен күресу жөніндегі іс-шараларға қатысатын медицина қызметкерлері салықтар мен әлеуметтік төлемдерден босатылады.
Осылайша, Алматы Мемлекеттік кірістер департаментінің ақпараты бойынша олар:
– төлем көзінен ұсталатын жеке табыс салығы;
– әлеуметтік салық;
– міндетті зейнетақы жарналары;
– міндетті кәсіптік зейнетақы жарналары;
– әлеуметтік аударымдар;
– ММС (міндетті әлеуметтік медициналық сақтандыру) бойынша жарналар төлеуден босатылған.
Бұл шешім үкіметтің 2020 жылғы 20 сәуірдегі қаулысына сәйкес қабылданды.

Коронавируспен күресіп жатқан дәрігерлер салық пен әлеуметтік төлемдерден босатылды

<a href="https://kyzylorda-news.kz/">Kyzylorda-news.kz.</a> Әлемді шарпыған дауасыз дерттің таралу қарқыны, мемлекет тарапынан дер кезінде&nbsp;&nbsp; қабылданған дұрыс шешімдердің арқасында біздің елімізде&nbsp; баяу дегенімізбен,&nbsp; әлі де бәсеңсімей тұр. Соңғы дерек бойынша кароновирус індетін жұқтырғандар саны республикада 1852-ге, Қызылорда облысында 149-ға жетіп, аймағымыз Алматы мен Нұр-Сұлтан қалаларынан кейінгі орынға жетті.
Осынау сындарлы сәтте аймақ тізгінін қолына алған Гүлшара Наушақызы алғашқы күннен ақ&nbsp; ең басты назарды осы аталған жаман індетпен күреске аударды.
Жергілікті телеарналар арқылы аймақ тұрғындарына арнаған үндеуінде елімізде короновирус індетінің таралуына байланысты төтенше жағдай жариялай отырып, облыс жұртшылығының қауіпсіздігін қамтамасыз етуга бағытталған қатаң шаралар қабылдауды талап етті. Соның нәтижесінде індетке қарсы қорғаныс шаралары барынша қолға алынып, тиімді тетіктер мен мүмкіндіктердің бәрі&nbsp; қарастырылып, аймақтағы ахуал жайлы&nbsp; облыстық жедел штаб күн сайын ақпарат беріп келеді.&nbsp;
Бірақ, аймақ тұрғындарының қауіпсіздігі үшін қабылданған қатаң шаралардан бөлек аурудың таралуын болдырмаудың ең басты шарты – әркімнің өз отбасында оқшаулануы екендігін білсек те, кейбір азаматтар осы мәселеге әлі де жете мән бермей келеміз.&nbsp;&nbsp; Облысымыздағы індет ошақтарының көбеюі де осындай салғырттығымыз бен бейқамдығымыздың нәтижесі екендігін біле тұра, ел арасында төтенше жағдай талаптарына бойұсынбау деректерінің әлі де орын алатындығы қынжылтады.
Тіпті кейбіріміз сенімсіздік білдіріп, астарынан саясат іздеп, елдің ойын сан-саққа жүгіртудеміз. Әлемнің небір алпауыт мемлекеттері дәрменсіздік танытып, кәсіби мамандар дабыл қағып жатқанда, бұлайша сенімсіздік таныту еш ақылға сыймайды. Бұл дерт, әсіресе, балаларымыз бен қарттарымыз үшін өте қауіпті, сондықтан өз жеке басымызды ғана, жақындарымызды ғана емес, бүкіл елдің амандығын ойлайық ағайын!
Қаншама медициналық қызметкерлеріміз осы дертпен бетпе-бет келіп, науқастарды емдеуде уақытпен де санаспай, өз бастарын да қатерге тігуде. Аймақ қауіпсіздігін қамтамасыз етуде күндіз-түні үй бетін көрмей қаншама құқық қорғау саласының қызметкерлері жүр! Құрметті ағайын, олардың да өз денсаулықтары өздеріне қымбат, олардың да жанын шүберекке түйіп, тілеуін тілеп отырған ата – анасы, отбасы, бала-шағасы бар екенін де ұмытпайық. Бұл дерт қазір ешкімге де оңай тиіп тұрған жоқ. Олай болса, алапат індетпен күресте алдыңғы шепте жүрген бейбіт күннің батырларының еңбегін еш қылмайық, оларға көрсетер құрметіміз де, алғысымыз да соншалықты қиын да емес, ол – әрбіріміздің тек үйде болуымыз ғана!
Мұнан бөлек, қандай қиындық жағдай болса да, балаларымыздың амандығы мен білімнен қол үзіп қалмасы үшін, бүкіл еліміздегі жалпы орта білім беретін мектеп оқушылары, оның ішінде аймағымыздағы 293 мектептің 161 780 оқушысы, сонымен бірге колледждер мен&nbsp; университеттердің 25000-нан аса студенттері үйде отырып қашықтықтан оқу жүйесіне көшірілді. Әрине, күтпеген жерден, алдын-ала дайындықсыз, тек тәуекелдікпен қолға алынған жүйеде білім берудің мұғалімдер үшін де, оқушы үшін де кездесетін қолайсыздықтары мен қиындықтары жетерлік. Бұған ұстаздар қауымымен бірге&nbsp; ата аналар&nbsp; да түсіністікпен парасаттылықтарын танытуда. Осындай қиындықтардан шығар жол тауып, аса жауапкершілікпен өз міндеттерін адал орындап жүрген ұстаздар қауымының еңбегін де ерекше бағалауға тиіспіз.!
&nbsp;Мынадай алапат дерт алқымнан алып тұрған зауал сәтте қоғамдық ортада да, әлеуметтік желілерде де билікке айтылып жүрген сын да аз болмай тұр. Әрине, сын айтқан дұрыс та шығар, адам да, қоғам да сол сынға қарап түзеледі. Тек сол сынды&nbsp; басқалай емес, сыналушының жетесіне пайымды, сындарлы оймен, жағымды түрдегі жанашырлықпен жеткізе білсек, ол санаға да сіңімді болар еді-ау.
«Істеу қиын, сынау оңай», «Сынасуға жараған, сыйласуға да жарайды» деген халық тәмсілдерін де қаперге ала жүрсек жарар еді.
Қазақтың басынан әр кезеңдерде түрлі қауіп – қатер де, аштық та, жоқтық та өткен,&nbsp;&nbsp; соның бәрін халқымыз «Жоқты бар десең – құт болар, барды жоқ десең жұт болар» деп сабырлылықпен жеңген. Дана Абай да «…сабырсыз, арсыз, еріншек…» деп, сабырсыздықты адамдағы ең жаман қасиеттің қатарына қойған. Сондықтан, уақытша қиындықты көтере алмай, шыдамсыздық танытып, үйде отырмай, көшеге шығып, өзгеге ғана емес, өз жақындарымыздың өміріне де қауіп келтірмейік ағайын!
Қазіргі күні жұртшылық арасындағы да, әлеуметтік желідегі де алыпқашпа әңгіме, әсіресе, еліміздегі төтенше жағдай жарияланған кезеңде табыс көзінен айрылған, немесе ақысыз еңбек демалысына шығарылған азаматтарға арналған 42 500 теңге көлеміндегі әлеуметтік төлемақы төңірегінде болып жатыр. Ресми ақпарат бойынша бүгінгі күнге дейін 42 500 теңге жәрдемақы 3 млн 960 мың адамға тағайындалып, бюджеттен 157 млрд теңге бөлінген екен. Осындай қиын сәтте түрлі бюрократиялық кедергілерді болдырмас үшін аталған төлемақы, дәләлді құжаттар талап етілмей-ақ, азаматтардың өз өтініштері&nbsp; негізінде ғана тағайындалып келеді.
&nbsp;Бірақ, бүгінгі күні осы әлеуметтік жәрдемге «көппен бірге әйтеуір ала берейік» деген пиғылмен тұрақты жұмысы бар, айлығы жүріп тұрған қызметкерлер де, тіпті шетелде тұратын&nbsp; азаматтардың да, ең сорақысы – қайтыс болып кеткен жандар атынан да сұраныс берілгені – бұл елдігімізге де, қазақи ұлттық болмысымызға да жат құбылыс, адамгершілігімізге&nbsp; де үлкен сын, ойланайық!
Құрметті ағайын!
Елімізде жарияланған төтенше&nbsp; жағдай мерзімінің ұзақтығы, ол тек өзіміздің карантин талаптарын қаншалықты сақтайтындығымызға, артық жүрісті тоқтатып, қаншалықты өз-өзімізді оқшаулай алатындығымызға байланысты екендігі аз айтылып келе жатқан жоқ.
Сондықтан да әрбір қызылордалықты осынау қиын сәтте халқымыздың амандығы үшін барынша сабырлы, ұстамды және қоғам алдында жауапкершілікті болуға шақырамын!
Сыр жұртшылығы осынау сындарлы сәтте ауызбіршілік танытып, аты жаман дертпен күреске өз үлестерін қосады&nbsp; деп сенемін! Қиындықты еңсеруге әрине, әрбіріміз де жауаптымыз!&nbsp; Аман болайық, бірге болайық, үйде болайық!
Бахытжан САЙЛЫБАЕВ,
облыстық қоғамдық кеңес төрағасы.
М.Мәметова атындағы Қызылорда педагогикалық жоғары колледжінің директоры

Бахытжан Сайлыбаев: «Қиындықты еңсеруге әрбіріміз жауаптымыз»

<a href="https://kyzylorda-news.kz/">Kyzylorda-news.kz</a>. Сыр өңірінде жол құрылыстарына бақылау жетіспейді. Тиісті қадағалаудың жоқтығынан аймақта сапасыз автожолдар салынып келеді, деп хабарлайды <a href="https://24.kz/kz/zha-aly-tar/o-am/item/390199-syr-irinde-zhol-rylystaryna-ba-ylau-zhetispejdi">«Хабар 24»</a>.
Осыған орай сыбайлас жемқорлыққа қарсы қызмет және Жол активтері ұлттық сапа орталығының мамандары бірлесіп, облыстық маңызы бар бағыттарды тексеріп шықпақ. Тұрғындар күнделікті ерсілі-қарсылы қатынайтын соқпақ жолдың түзулігі мен тегістігін бақылайтын шара «Сапалы жол – адалдық алаңы» кеңселік жобасы аясында жүзеге асырылады.
Қос құзырлы мекеме басшылары әлеуметтік желі арқылы онлайн конференция өткізіп, осы жолға қатысты көптің пікірін тыңдап алды. Соңғы жылдары сырбойылықтар тарапынан жаңадан салынған асфальт сүрлеулердің сапасына қатысты көптеген арыз-шағым түскен. Ағымдағы жылы облыс аумағында 11 миллиард теңгеге 200 шақырымнан астам автожол жөндеуден өткізіледі. Қыруар қаржының мақсатты жұмсалып, тұрғындар игілігі үшін тиімді игерілуі қатаң бақыланатын болады. Құрылыс барысын қадағалауда заманауи техникалық-зертханалық құралдарды қолдану міндеттеледі.
<blockquote>
 «Жолға күнделікті технадзор барып тексеріп тұрмаса, күнделікті тиесілі сынамаларын зертханаға апарып зерттемесе, бекітілген нормасы бар. Сол нормативтерге сәйкес болу керек. Бұл зертханалардың аттестациясы болу керек. Аккредитациясы болуы керек. Ішінде мамандары мықты болуы керек», – дейді Жол активтерінің ұлттық сапа орталығы облыстық филиалының директоры Жасұлан Керімқұлов.
</blockquote>
Ал, облыстағы сыбайлас жемқорлыққа қарсы іс-қимыл департаменті осы саладағы сыбайлас жемқорлық тәуекелдерін зерттемек.
<blockquote>
 «Осы саладағы жұмысты өз деңгейінде атқармаған жағдайда сыбайлас жемқорлық тәуекелдері туындаған жағдайда немесе басқа да құқықбұзушылық туындаған жағдайда, алдағы бірінші жартыжылдықтың нәтижесі мен ұсыныстарды жолдайтын боламыз», – дейді облыс бойынша сыбайлас жемқорлыққа қарсы іс-қимыл департаменті бастығының бірінші орынбасары Бақытжан Ниязов.
</blockquote>

Қызылорда облысында жол құрылыстарына бақылау жетіспейді

<a href="https://kyzylorda-news.kz/">Kyzylorda-news.kz</a>. Қызылордада Конго-Қырым геморрагиялық қызбасы бойынша күдікті жағдай тіркелді. Бұл туралы облыстық Тауарлар мен көрсетілетін қызметтердің сапасы мен қауіпсіздігін бақылау департаментінің бас маманы Жәмила Өтепова мәлімдеді.
Бұл – биылдыққа тіркелген алғашқы жағдай. Алғашқы зерттеу нәтижесі теріс болды. Ықтимал жағдай анықталған адам Қармақшы ауданының Жосалы аудандық ауруханасында ем қабылдауда. Індетке қарсы шаралар жалғасып жатыр.
Қызылорда облысы Конго-Қырым геморрагиялық қызбасының табиғи ошағында орналасқан. Биыл өңірде КҚГҚ бойынша 117 елді мекен қолайсыз болып анықталды.
Кенеге қарсы өңдеу жұмыстарын 6 сәуірден бастау жоспарланған. Алайда, ауа райының&nbsp; суытуына байланысты залалсыздандыру кейінге шегеріліп, 17 сәуірден басталды.
Бүгінгі күні өңдеу шаралары Жаңақорған, Шиелі аудандары мен Қызылорда қаласында жүргізілуде. Залалсыздандыру жұмыстарына ветеринария басқармасы ұсынған препарат қолданылуда.
Жыл басынан бастап энтомолог мамандар тарапынан 9637 дана кене жиналды. Оның ішінде елді мекендерден 2192, жануарлардан 734, табиғаттан 6711 кене жиналған. Барлығы 1014 кене сынамасы зерттеліп, оның 13-нен оң нәтиже анықталған. Осыған байланысты облыс бойынша кенелердің жұқпалылық пайызы 1,2 %-ды құрайды.
Қолайсыз аймақтардағы залалсыздандыру жұмыстары бекітілген кестеге сәйкес жалғасуда.

Қармақшы ауданында кенеден келетін кеселдің алғашқы күдікті жағдайы анықталды

<a href="https://kyzylorda-news.kz/">Kyzylorda-news.kz</a>. ҚР Ауыл шаруашылығы министрі мен ҚР Премьер-Министрінің бірінші орынбасары – Қаржы министрі «Ауылшаруашылық жануарларын экспорттаудың кейбір мәселелері туралы» 2020 жылғы 15 сәуірдегі бірлескен&nbsp;<a href="https://online.zakon.kz/Document/?doc_id=35465484#pos=0;10">бұйрыққа</a>&nbsp;қол қойды.
Атап айтқанда, құжатта алты ай мерзімге Қазақстан Республикасының аумағынан тірі малды, сондай-ақ қой мен ешкілерді әкетуге тыйым салынады.
Бірлескен бұйрық алғаш ресми жарияланған күнінен кейін күнтізбелік он күн өткен соң қолданысқа енгізіледі.

Қазақстанда сиыр мен қойды басқа елдерге сатуға тыйым салынды

<a href="https://kyzylorda-news.kz/">Kyzylorda-news.kz</a>. Ресейлік аллерголог-иммунолог Владимир Прокопенко коронавирустық инфекцияны емдеудің толық мүмкіндігі бар екенін айтады. Бірақ оны жеңгеннен кейін вирустың адам ағзасындағы әрекеті беймәлім күйде қалатынын мәлімдеді, деп хабарлайды&nbsp; <a href="https://sputniknews.kz/world/20200421/13751281/Em-adam-agzasy-koronavirus.html">Sputniknews.kz</a>.
Қазіргі кезде коронавирус дертінен айыққан науқастар көбейіп келеді. Ал инфекция жұқтырғандарды емдеу үшін құрамында антиденелері бар қан плазмасы қолданыла бастайды. Маман пікірінше, ендігі жерде сауығып шыққан адамның денесінде COVID-19 вирусының бар-жоғын зерттеу қажет.
<blockquote>
 «Сауығып шыққан адамның мұрын қуысынан сынама алып, талдау жасағанда оның таза екенін анықтаймыз. Бұл жағдайда вирус мұрын қуысында емес, өзге вирустар сияқты өкпеде немесе басқа дене мүшелерінде қалуы мүмкін. Егер осылай болса, бұл сұраққа бүгін жауап бере алмаймыз. Оның жауабы алты айдан кейін немесе бір жылдан кейін ғана табылады», – деді Прокопенко.
</blockquote>
Аллерголог-иммунолог аурудан айыққан адам ағзасында қалған вирустар әрқашан қауіпті бола бермейтінін атап өтті. Ол емделіп болғаннан кейін, коронавирустың қалай жоғалатынын анықтау керек деп санайды.
<blockquote>
 «Бұл вирустар адам ағзасымен бірге өмір сүрудің бірнеше формаларына ие болып, олар организмде өмір сүретін вирустарға айналуы мүмкін және жедел респираторлы вирустық инфекция (ЖРВИ) тудыратын басқа да көптеген вирустар сияқты ауру туғызбайды. Бұл вирус адаммен бірге өмір сүре ме, әлде ол толығымен кете ме? Ағзаға қалай әсер етеді және оның әрбір жаңа вирустармен өзара әрекеттесуі қалай? Қазіргі вирусология және иммунология ғылымы алдында тұрған негізгі сұрақтар осындай, біз оларға жауап беруіміз керек», – деді иммунолог Прокопенко.
</blockquote>

Танымал дәрігер COVID-19-дан жазылғандардың болашағы туралы айтты

<a href="https://kyzylorda-news.kz/">Kyzylorda-news.kz</a>. Қазақстан мұсылмандары діни басқармасының Бас мүфтиі&nbsp;Наурызбай қажы Тағанұлы Рамазан айы кезінде қасиетті дұғалар онлайн түрде оқылатынын жеткізді.
<blockquote>
 «Төтенше жағдай кезінде мешітте үлкен жамағатпен оқылатын намаздарға уақытша шектеу қойдық. Әр азаматтың өмірі мен денсаулығы басты құндылық болғандықтан осындай шешім&nbsp;шығаруға тура келді. Алайда енді үйде отырып, онлайн насихат тыңдап, сауапты амалдарға ортақтасуға болады», – деді елімізідң Бас мүфтиі.
</blockquote>
Атап айтқанда, ҚМДБ тарапынан мынадай игі жобалар іске асырылмақшы:
ҚМБД-ның ресми сайтында «Рамазан энциклопедиясы» қосымша парақшасы іске қосылып отыр. Бұл веб-парақшада Рамазан айы туралы ақпаратты оқуға болады.&nbsp;
Еліміздің барлық аймақтарына, облыстары мен қалаларына арналған Рамазан айының кестесі ҚМБД сайтында қазақ және орыс тілдерінде жарияланды.&nbsp;
«Хикмет ТВ» арнасы арқылы Рамазан айының отыз күнінен арналған отыз онлайн дәріс жүргізіледі.&nbsp;
Сондай-ақ, осы «Хикмет ТВ» арнасы арқылы Рамазан айында күн сайын республикалық&nbsp;Әзірет сұлтан мешітінің қабырғасында күніне бір сағат арнайы онлайн уағыз оқылып, қасиетті Қадыр түнінде Құран хатым дұғасы&nbsp;жасалады
<blockquote>
 «Мүфтияттың Instagram парақшасында «Батаменен ел көгерер» атты онлайн дұға бағыштау рәсімі күн сайын 15 минуттан өткізіліп тұрады», – деді бас мүфти.&nbsp;
</blockquote>
Сонымен қатар, ҚМБД өкілдері осы жылы пітір садақасын мобильді қосымша арқылы аударуға болатынын тағы бір рет ескертіп өтті.

Дұғалар онлайн жасалады: Биылғы Рамазан айында қандай өзгерістер орын алмақ?

<a href="https://kyzylorda-news.kz/">Kyzylorda-news.kz</a>. Қызылорда облысы Жалағаш ауданына қарасты Таң ауылында полицейлер жоғалып кеткен 7-8 жастағы екі баланы ата-аналарына тауып берді.
Екі бала есік алдына түскі уақытта ойнауға шыққан. Содан кейін ата-аналары олардан хабарсыз қалған. Бұл жөнінде полицияға хабарланды. Аудандық полиция бөлімі тарапынан арнайы топ құрылды.
Алғашқыда балаларды ата-аналарының өздері іздеген. Полицияға жергілікті уақытпен сағат 23:00 шамасында хабарласқан. Учаскелік полиция инспекторы Нұрбек Сариев, арнайы топ мүшелерінің қатысуымен балаларды іздестіру жүргізілгендігін айтты.
<blockquote>
 «Аудандық полиция бөлімі тарапынан құрылған топ мүшелері балаларды түнгі сағат 03:00 шамасында Шіркейлі каналының тұсындағы шабындық ішінде ұйықтап жатқан жерінен тауып алды. Оларды ата-аналарына аман-есен табыс етті. Екі баланың ата-аналарына төтенше жағдай кезіндегі карантин режимінің талаптарын сақтамағаны үшін ҚР Әкімшілік құқықбұзушылық туралы кодекстің 476-бабының 6-бөлігімен әкімшілік хаттамалар толтырылып, жинақталған құжаттар аудандық сотқа жолданды. Мұндай келеңсіз жағдай орын алмас үшін олармен профилактикалық түсіндіру жұмыстар жүргізілді», – деп мәлім етті Қызылорда облыстық полиция департаментінің баспасөз қызметі.
</blockquote>

Жалағаштың Таң ауылында жоғалып кеткен балалар табылды

<a href="https://kyzylorda-news.kz/">Kyzylorda-news.kz.</a> Бүгінде Қызылорда облысы әкімінің тапсырмасына сәйкес, коронавирустық инфекцияның таралуына байланысты аймақта 3 республикалық және 2 жергілікті телеарна, 8 республикалық және 7 облыстық басылымдар мен сайттар ақпарат тарату жұмыстарын жүргізіп келеді. Карантин кезінде облыс тұрғындарына қабылданып жатқан шектеулер туралы уақытылы ақпарат тарататын телеарна, газеттер мен сайттар, ақпараттық порталдармен тұрақты түрде тығыз байланыс орнатылған. Бұл туралы өңірлік коммуникациялар қызметінің ақпарат алаңында облыстық ішкі саясат басқармасы басшысының міндетін атқарушы Еркін Әбішев баяндады.
Облыстағы 7 ауданның басылымдары мен олардың сайттары да насихат жұмыстарын жасауда. 1 сәуірден бастап облыстағы бұқаралық ақпарат құралдарында 2804 материал жарыққа шықты. <a href="https://kyzylorda-news.kz/">Kyzylorda-news.kz</a> ақпарат агенттігінің сайтында арнайы <a href="https://kyzylorda-news.kz/covid-19/">«Covid-19»</a> медиа блогы жасалып, барлық ресми ақпараттар жинақталған 400-100.кz сайты іске қосылды. Сонымен бірге, жергілікті телеарналарда арнайы әзірленген 73 бейнеролик көрсетілді.
<blockquote>
 «Облыстық ішкі саясат басқармасы және өңірлік коммуникациялар қызметі тарапынан арнайы сұхбаттар, ақпараттық контенттер, видео-материалдар, баннерлер дайындалып, халықтың басым бөлігі қолданатын фейсбук, инстаграм әлеуметтік желілері арқылы жарияланып келеді. Есептік мерзімде 3354 материал әлеуметтік желілерге жарияланды. Сондай-ақ, өңірлік коммуникациялар қызметінің баспасөз алаңында 70 брифинг ұйымдастырылды. «QYZYLORDA» телеарнасы арқылы облыс әкімінің орынбасары және облыстық денсаулық сақтау басқармасы басшысының қатысуымен күнделікті таңғы 9.30-да және түстен кейін сағат 16.30-да тікелей эфирде брифингтер өткізілуде», – деп атап өтті Еркін Жұмаханұлы.
</blockquote>
Осы орайда Еркін Әбішев уақытпен санаспай карантиндік режимдегі шектеулер мен қоғамдық қауіпсіздік шаралары туралы ақпарат беріп жүрген азаматтық қоғам мен әлеуметтік желі белсенділеріне, бұқаралық ақпарат құралдары өкілдеріне алғысын білдірді.
<blockquote>
 «Төтенше жағдайға байланысты тұрғындар тарапынан көптеген сауалдар жолдану үстінде. Осыған сәйкес 400-100 call-орталығында түрлі сала мамандары 24 сағат бойы кезекшілік бойынша жұмыс істеп жатыр. Кері байланыс орталығына тәулігіне 1000-ға жуық сұрақ келіп түседі. Осы уақытқа дейін бұл орталыққа 12 331 қоңырау түсті. Оның 86 пайызы әлеуметтік төлемдерге қатысты болса, 6,8 пайызы бақылау бекеттеріне байланысты, 7,2 пайызы кәсіпкерлік саласы мен басқа да мәселелерге қатысты сұрақтар болды. Тұрғындардың байланыс орнатуына тиімді болу үшін басқарманың Facebook әлеуметтік желісіндегі «Нақты ақпарат» парақшасы жанынан WhatsАpp мессенджері арқылы байланыс телефоны ұйымдастырылған. Бұл нөмірге 1 сәуірден бастап 994 сауал жолданып, тиісті жауаптар берілді. Бүгінде апта сайын әр сала бойынша ақпараттар ұсынылып келеді. Мәселен, өткен аптада ауыл шаруашылығына қатысты мәліметтер айтылса, осы аптада кәсіпкерлікті қолдау шаралары туралы ақпараттандыру жұмыстары жүргізіледі», – деді Еркін Жұмаханұлы.
</blockquote>
<img src="https://kyzylorda-news.kz/wp-content/uploads/2020/04/abishev-brifing-ishine.jpg" alt="" />

Қызылордада карантин ережелерін халыққа БАҚ арқылы насихаттау жұмыстары кеңінен жүргізілуде

<a href="https://kyzylorda-news.kz/">Kyzylorda-news.kz.</a> Қазақстанда жемқорлық туралы хабарлаған адамға немесе осы сипаттағы қылмыстың бетін ашуға септескен азаматтарға қандай қолдау бар?
Бұл сұраққа Сыбайлас жемқорлыққа қарсы іс-қимыл агенттігінің әкімшілік-құқықтық департаментінің директоры Айгүл Базарбаева жауап берді, деп хабарлайды <a href="https://lenta.inform.kz/kz/zhemkorlyk-turaly-habarlagan-adamga-memleket-kanday-kepildik-beredi_a3640267">ҚазАқпарат</a>.
<blockquote>
 «Жемқорлық туралы хабарлаған адамды немесе осы сипаттағы қылмыстың бетін ашуға септескен азаматтарды көтермелеу – сыбайлас жемқорлыққа қарсы күрес механизмдерінің бірі саналады. Мемлекет басшысының тапсырмасымен жемқорлық фактісі туралы азаматтарды көтермелеудің жүйесі бекітілді. Азаматтарды көтермелеудің сараланған жаңа жүйесі енгізілді. Қазіргі таңда жемқорлық туралы хабар берген адам сол қылмыс барысында анықталған соманың 10 пайызына ие болады. Тіпті қылмыс барысындағы ақша көлемі 1000 АЕК болса да хабарлаған адам өз үлесін алады. Яғни 5 млн теңгенің қылмысы туралы хабарлаған адамға 500 мың теңге беріледі», – деді ол агенттіктің онлайн режимдегі баспасөз мәслихатында.
</blockquote>
Оның айтуынша, жемқорлық туралы хабарлаған адамды қорғау тетіктері де қарастырылған. «Сыбайлас жемқорлыққа қарсы күрес туралы» заңға сәйкес осы қылмыс туралы хабар берген азамат ақшалай көтермелеумен қамтамасыз етіліп қана қоймай, мемлекеттің қорғауына алынады. Ол кісі туралы ақпарат мемлекеттік құпияға жатады.
Айта кетсек жемқорлық жағдайымен бетпе-бет келген адам 1424 нөміріне хабарласуына болады.

Жемқорлық туралы хабарлаған адамға мемлекет қандай кепілдік береді?

<a href="https://kyzylorda-news.kz/">Kyzylorda-news.kz</a>. Бас мүфти Наурызбай қажы Тағанұлы коронавирустан қорғану үшін антисептик пен спирт қолдану оразаны бұзбайтынын айтты.
Бұл туралы ҚМДБ төрағасы, бас мүфти Наурызбай қажы Тағанұлы ОКҚ онлайн-брифингінде айтты.
<blockquote>
 “Жоқ, Алла қаласа, бұзбайды, әрине. Қазір енді біз төтенше жағдайдамыз, жай жағдай емес. Сондықтан бұл кездерде адам қорғану үшін денсаулығына зиян тигізбейтін, қайта денсаулығын қорғайтын дүниелерді біздің шариғатымыз қолдайды”, – деді бас мүфти.
</blockquote>
Еске салайық, биыл қазақстандықтар үшін Рамазан айы 24 сәуірде басталады.

Антисептик қолданса, ораза бұзылады ма?

<a href="https://kyzylorda-news.kz/">Kyzylorda-news.kz</a>. Санитарлық-эпидемиологиялық қауіпсіздік қатаң сақталған жағдайда, Қазақстанның басқа өңірлерінде карантиндік режим жеңілдетіліп, кәсіпорындар жұмысын бастайды. Бұл туралы үкімет басшысы Асқар Мамин мәлімдеді, деп хабарлайды&nbsp;<a href="https://sputniknews.kz/society/20200421/13749815/mamin-karantin-rejimi.html">Sputnik Қазақстан.</a>&nbsp;
Премьер-министр 20 сәуірден бастап Нұр-Сұлтан мен Алматы қалаларында карантин режимі жеңілдетілгенін еске салды.&nbsp;
<blockquote>
 «Санитарлық нормаларды қатаң сақтай отырып, экономиканың бірқатар саласындағы кәсіпорындар жұмысын бастады. Эпидемиологиялық жағдайды ескере отырып, карантиндік режимге өзгерістер енгізу және біртіндеп жеңілдету бойынша тиісті шешім қабылданатын болады», – деді деді Мамин үкімет отырысында.
</blockquote>
Эпидемиологиялық жағдайды ескере отырып, басқа да кәсіпорындар мен бизнес субъектілеріне жұмысты жалғастыруға рұқсат беріледі.&nbsp;
<blockquote>
 «Мұндай жұмыс елдің басқа да өңірлерінде де жүргізіледі. Дегенмен бұл санитарлық-эпидемиологиялық қауіпсіздік қатаң сақталған жағдайда ғана мүмкін болады», – деді премьер-министр.
</blockquote>

Қазақстан және Қызылорда облысының жаңалықтары