<a href="https://kyzylorda-news.kz/">Kyzylorda-news.kz.</a> Қызылорда облысының спорт саласындағы жетістіктері жылдан-жылға артып келеді. Бұл туралы Қызылорда облысының әкімі Қуанышбек Ысқақов Н. Бекежанов атындағы облыстық қазақ музыкалық драма театрында өтіп жатқан халық алдындағы есепті кездесуінде баяндады.
Қызылорда облысында өткен жылы Ғани Мұратбаев атындағы стадион қайта жаңғыртудан, Жалаңтөс Баһадүр атындағы спорттағы дарынды балаларға арналған мектеп-интернат-колледжінің ғимараты күрделі жөндеуден өткен. Ал, «Нұрсәт» теннис орталығының төртінші жабық кортының құрылысы жалғасуда. Мемлекеттік-жекешелік әріптестік аясында 6 спорт кешені пайдалануға берілді.
Өңір спортшылары 2019 жылы ел чемпионаттарында 1457, Әлем және Азия чемпионаттарында 170 медальға қол жеткізді, 578 спортшы Ұлттық құрама сапына енген.
Өткен жылдың айтарлықтай жаңалығы – «Қайсар» футбол командасы 20 жыл уақыттан кейін екінші рет Қазақстан Кубогын жеңіп алды. Алдағы мақсат – Еуропа лигасында лайықты өнер көрсету.
Жыл қорытындысымен Қазақстан Республикасының Мәдениет және спорт министрлігі, Ұлттық Олимпиада комитеті ұйымдастырған «Алтын Самғау-2019» Ұлттық конкурсында Қызылорда облысы «Үздік спорттық өңір» номинациясын жеңіп алды.
<blockquote>
 «Мойындау керек, біз үшін әлеуметтік-маңызды сұрақтарды шешуге мемлекеттік-жекешелік әріптестік тетігін пайдаланудың зор пайдасы тиіп отыр. Қазіргі таңда мемлекеттік-жекешелік әріптестік бойынша бізде денсаулық сақтау, білім, мәдениет, спорт, қоғамдық тәртіп, тұрғын үй-коммуналдық шаруашылық және басқа да салаларда 142 жоба бар. Олардың 56-сы бойынша жобаларды іске асыру шарттарына инвесторлармен қол қойылды. Бүгінде мемлекеттік-жекешелік әріптестік жобаларын іріктеу барысында бюджеттен инвестициялық шығындарды талап етпейтін, мемлекеттік тапсырыс немесе нарықта қызмет көрсету арқылы жұмыс жасайтын жобаларға басымдық беріледі», – деді аймақ басшысы Қ. Ысқақов.
</blockquote>

Қызылорда облысы былтыр «Үздік спорттық өңір» атанды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов Н. Бекежанов атындағы облыстық қазақ музыкалық драма театрында өтіп жатқан халыққа есеп беру жиынында денсаулық сақтау саласындағы оң өзгерістерді баяндады.
Аймақ басшысының айтуынша денсаулық сақтау саласында «2019-2025 жылдарға арналған денсаулық сақтау нысандарының өңірлік перспективалық даму жоспары» бекітілген.
<blockquote>
 «Облыстық бюджеттен 2,7 млрд теңге бөлініп, медициналық ұйымдардың материалдық-техникалық қамтылуы 85,3 пайызға жеткізілді. Былтыр апаттық жағдайдағы денсаулық сақтау нысандарының орнына Шиелі ауданаралық ауруханасы пайдалануға берілді. Апаттық жағдайдағы соңғы нысан Жалағаш ауданында жаңа аурухана құрылысы жүргізілуде. Сонымен бірге, мемлекеттік-жекешелік әріптестік шеңберінде жеті дәрігерлік амбулатория қолданысқа берілсе, облыстық көпбейінді аурухана мен Қазалы ауданаралық ауруханасына ангиографиялық қондырғы орнатылды», – дейді облыс әкімі.
</blockquote>
Оның айтуынша былтыр 95 дәрігер қабылданып,&nbsp; қамту көрсеткіші 82 пайызға жеткенімен бұл салаға әлі 159 маман жетіспейді. Сондықтан, маман тапшылығын шешу мақсатында 20 маманды резидентураға және 30 маманды бакалавриатураға оқыту үшін облыс әкімдігінің гранты бөлінген.
<blockquote>
 «Сырдария өзенінің сол жағалауына онкологиялық бөлімі бар 500 төсек-орындық көпбейінді облыстық аурухана құрылысы республикалық жобалар тізіміне енгізілді. Заманауиқұралдармен жабдықталған аурухананы Үкіметтің кепілдігімен Еуразиялық даму банкінің қаржысына салу жоспарлануда. Сонымен бірге, биыл 8 дәрігерлік амбулатория пайдалануға берілетін болады», – дейді Қуанышбек Досмайылұлы.
</blockquote>

Қызылорда облысында биыл 8 дәрігерлік амбулатория пайдалануға беріледі

<a href="https://kyzylorda-news.kz/">Kyzylorda-news.kz.</a> «Әлеуметтік сала – облыс басшылығы үшін ең басым салалардың бірі». Бұл туралы Қызылорда облысының әкімі Қуанышбек Ысқақов Н. Бекежанов атындағы облыстық қазақ музыкалық драма театрында өтіп жатқан облыстың 2019 жылғы әлеуметтік-экономикалық даму қорытындылары туралы тұрғындар алдындағы есепті кездесуінде баяндады. Бұл туралы Baq.kz хабарлады.
Облыста 2019 жылы 19 әлеуметтік нысанның құрылысы салынып, олардың 11-і іске қосылған. Ал, қалғандары – осы жылы аяқталады. Алайда аймақта әлі күнге едйін апаттық нысандардың бар екендігі де жасырын емес.
Қазіргі таңда анықталған үш апаттық мектептің екеуінде, атап айтқанда, Жалағаш ауданының Мөрәлі Шәменов атындағы елді мекенінде және Жаңақорған кентінде құрылыс жұмыстары жүргізілуде. Арал қаласындағы №71 апаттық мектептің жобалық-сметалық құжаттамалары әзірленуде.
Өңірде бүгінде 3 ауысымда оқытатын мектептер болмағанымен, үш ауысымға өту қаупі қалыптасқан жеті мектеп бар.
<blockquote>
 «Бұл – түсінікті жағдай. Облысымыздың дамуы негізінде халық саны артып жатыр, қосымша мектептер талап етілуде. 2019-2020 оқу жылында екі мыңнан астам бала бірінші сыныпқа артық барды. Бала санының артуы көңілімізге қуаныш ұялатады. Мектеп салу мәселелерін бюджет арқылы, сондай-ақ, мемлекеттік-жекешелік әріптестік бойынша шешудеміз», – деді аймақ басшысы Қ. Ысқақов. Айта кетейік, 2019 жылы жеке инвесторлар есебінен 1450 орынға арналған 3 мектеп салынған. Тағы да 3 инвестор жеке мектеп салуды жоспарлауда.
</blockquote>

Қызылорда облысында үш ауысымға өту қаупі туындаған 7 мектеп бар

<a href="https://kyzylorda-news.kz/">Kyzylorda-news.kz.</a> Басты міндет – өмір сүру үшін қаланы тек қолайлы етіп қана қоймай, сонымен қатар, қауіпсіз қалаға айналдыру. Бұл туралы Қызылорда облысының әкімі Қуанышбек Ысқақов халық алдындағы есепті кездесуде айтты. Бұл туралы Baq.kz хабарлады.
Ағымдағы жылы Қызылорда қаласының жолдарына 20 зияткерлік жылдамдық өлшеуіштер орнату жоспарланған. Қазіргі таңда облыс орталығында тек қана 6 жылдамдық өлшеуіш жұмыс істеп тұр.
<blockquote>
 «Бұрынғы жылдары жолдар мен көпқабатты үйлер аулаларында 270 бірлік шамасында бейнекамералар орнатқанбыз. Және мұнын оң нәтижесін де көрдік. Қылмыскерлік деңгейінің көрсеткіші тек соңғы жылда 19,5 пайыз төмендеді. Алайда, жол-көлік оқиғасының көрсеткіштерінде айтарлықтай 30 пайыздан асатын өсім байқалады. Бұл ретте, өлімге әкеліп соққан жол-көлік оқиғасы 38 пайыз, жол-көлік оқиғасы барысында жарақат алғандар 22,4 пайызды құрап отыр. Бұл – алаңдатарлық көрсеткіштер», – дейді аймақ басшысы.
</blockquote>
Сонымен қатар облыс әкімі өз баяндамасында қалаішілік автобустарға электрондық билеттеу жүйесі сынақтық режимде қосылғанын айтып өтті. Бұл жоба, қалада ашылған автобус паркінің тиімділігін арттыруға мүмкіндік беретіні сөзсіз.
<blockquote>
 «Бюджет қаражаты есебінен де қосымша автобустар сатып алатын боламыз. Биылға 13 автобус сатып алуға 487 млн теңге қаралған», – дейді Қуанышбек Досмайылұлы.
</blockquote>

Қуанышбек Ысқақов: Біздің міндетіміз – Қызылорданы қауіпсіз қалаға айналдыру

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов есепті кездесу кезінде алда тұрған келесі міндет – барлық өмір тіршілік инфрақұрылымдарын онлайн-сервиспен қамтамасыз ету екенін айтты.
<blockquote>
 «Экономиканың әр түрлі салаларына жоғары технологияларды жеделдетіп ендіру үшін цифрландыру бойынша 47 жоба жүзеге асырылып, тағы 11 жоба бойынша жұмыстар жүргізілуде. Мысалы, біз елімізде бірінші болып «Бірыңғай кезекшілік диспетчер қызметі» жобасын іске қостық. Енді барлық жедел қызметтер 101, 102, 103, 112 нөмірлері, бірыңғай «112» нөмірімен жұмыс істейтін болады», – дейді аймақ басшысы.
</blockquote>
Сонымен қатар қаланың тұрмыс-тіршілігін қамтамасыз ету бойынша тұрғындардың өтінімдерін өңдейтін «109-бірыңғай контакт-орталығы» іске қосылды. Бұл орталық абаттандыру, электр, су, жылумен қамтамасыз ету, ашық жатқан люктер мәселесі, қоғамдық көлік және тағы басқа көптеген мәселелерді қамтитын қызмет болады.
<blockquote>
 «Бұрын қала тұрғындары осы мәселелерді шешу үшін 80-нен аса телефон нөмірлерін білуі керек еді. Ал, енді өтінімдер автоматты түрде тиісті мекемелерге жолданады», – деді облыс әкімі.
</blockquote>

Қызылорда облысы республикада алғаш болып «Бірыңғай кезекшілік диспетчер қызметі» жобасын іске қосты

<a href="https://kyzylorda-news.kz/">Kyzylorda-news.kz.</a> Бұл туралы халыққа есеп беру жиынында облыс әкімі Қуанышбек Ысқақов мәлімдеді.
Облыс әкімі өңірдегі тұрғын үй-коммуналдық шаруашылық саласындағы бір қатар мәселелер кезең-кезеңімен шешілетінін жеткізді.
<blockquote>
 «Бүгінгі күні бізде тұрғын үй кезегінде 30 мыңнан астам (оның 25395 – Қызылорда қаласы бойынша) азамат тіркелген. Тұрғын үйге кезектің қатары жоғары болып тұр. Сондықтан, осы мәселені шешу барысында қарқынды жұмысты жалғастыруға тиістіміз. Сонымен қатар Қызылорда облысы бойынша жер кезегінде тұрған азаматтардың саны 96&nbsp;882-ні құрап отыр, оның басым көпшілігі Қызылорда қаласының үлесінде – 59787 (62%). Соған қарамастан, бізде тұрғын үй салуға берілген жер телімдері уақтылы игеріліп жатқан жоқ. Мысалы, Қызылорда қаласында “Байтерек” тұрғын ауданынан тұрғын үй құрылысы үшін 5112 жер учаскесі ұсынылса, үш жылда не бәрі оның 1 мыңға жуығы ғана үйлерін аяқтап, кіру актісін алды», – дейді аймақ басшысы.
</blockquote>
Оның айтуынша игерілмей тұрған жер учаскелерін мемлекетке қайтарып, кезекте тұрғандарға қайта табыстау қажет. Ал, ондай игерілмеген облыста 2600 жер учаскесі бар болып шықты.

Қызылорда облысында 96 882 азамат жер кезегінде тұр

<a href="https://kyzylorda-news.kz/">Kyzylorda-news.kz.</a> Өткен жылдары Қызылорда қаласы мен 4 аудан орталығы газға қосылды. Қызылорда облысының әкімі Қуанышбек Ысқақов халық алдындағы есепті кездесуінде аймақ халқының 63 пайызы табиғи газды тұтыну мүмкіндігіне ие болып отырғанын айтты.
Өткен жылы Байқоңыр қаласын газға қосу аяқталып, қалған 3 аудан орталықтары – Жосалыда, Тереңөзекте және Жалағашта кентішілік газ желілері құрылысы жұмыстары жүргізілуде. Ағымдағы жылы осы аудан орталықтары мен Арал ауданы Жақсықылыш кентінің тұрғындары газ тұтыну мүмкіндігіне ие болады.
<blockquote>
 «Орталық мемлекеттік органдармен бірлесіп 2020 жылы тұрғындар саны 24 мыңдай адамды құрайтын Қазалы ауданының Қазалы қаласы мен Мұратбаев елді мекенін және Шиелі ауданының Байсын, Қодаманов, Бидайкөл, Бекежанов, Алғабас елді мекендерін газдандыру жобаларын іске асыруды бастау мәселелерін пысықтап жатырмыз», – дейді Қуанышбек Досмайылұлы.
</blockquote>
Келесі кезеңде тіректі елді мекендер мен серіктес елді мекендер газдандырылады. Атап айтар болсақ, 2021 жылы Төретам және Ақай, 2021-2022 жылдары Сексеуіл, Наурыз және Махамбетов елді мекендері газға қосылатын болады.
Биыл жылдың соңына қарай елдімекендерді газдандыру деңгейін 70 пайызға дейін жеткізу жоспарланған.

Қызылордадағы Наурыз елдімекеніне көгілдір отын 2022 жылы келеді

<a href="https://kyzylorda-news.kz/">Kyzylorda-news.kz.</a> Қызылорда облысы халқының 97 пайызы орталықтандырылған ауыз сумен қамтамасыз етілген.
<blockquote>
 «Халықтың табысы мен өмір сүру сапасынарттыру – мемлекет пен барлық деңгейдегі әкімдердің жұмысының басты критерийі. Ал, бұл халықтың тек өмір сапасының ғана емес, оның денсаулығының да жақсаруына әсер ететінін білеміз. Сондықтан, 2023&nbsp;жылға қарай бұл көрсеткішті 100 пайызға жеткізуді көздеп отырмыз», – дейді Қызылорда облысының әкімі Қуанышбек Ысқақов халық алдындағы есепті кездесуіндегі баяндамасында.
</blockquote>
Қазіргі таңда Үкіметке биыл Арал ауданының Ақбасты, Тоқабай, Абай елді мекендерін Арал-Сарыбұлақ топтық су құбырына қосу, Шиелі ауданында «Тақыркөл» бас тоғанынан №3 сорғы станциясына дейінгі магистральдық суағардың екінші желісін салу жобаларын іске асыруды бастау қажеттігі ұсынылған. Бұл жобалар Қызылорда облысын әлеуметтік-экономикалық дамыту кешенді жоспарының 2021 жылғы іс-шараларына енгізілген.
Аталған жобалар іске асырылғанда 38 мыңнан астам ауыл тұрғындары сапалы ауыз сумен қамтамасыз етіледі.

Қызылорда халқының 97 пайызы орталықтандырылған ауыз сумен қамтамасыз етілген

<a href="https://kyzylorda-news.kz/">Kyzylorda-news.kz.</a> Қызылорда облысында мұнай өндіру төмендеп кеткенімен, аймақ басшылығы өңірде жаппай қысқартуларды болдырмай, еңбекке жарамды халықтың барлығы жұмыспен қамтылып, олардың өзін-өзі және отбасын қамтамасыз ете алатындай болуына барынша күш салып келеді. Бұл туралы Қызылорда облысының әкімі Қуанышбек Ысқақов халық алдындағы есепті кездесуінде айтты.
Облыс әкімінің айтуынша, атаулы әлеуметтік көмекке байланысты мәселелер былтыр және тіпті биылдың өзінде аз қамтылған отбасылар мен көпбалалы аналар тарапынан туындап отыр. Ал, бұл ретте мемлекет оларға жәрдем көрсетіп, аталған отбасылардың табыстарын көбейтуге арнайы шаралар қабылдағаны белгілі.
<blockquote>
 «Біз осындай проблемаларға, әсіресе, жәрдемақы алу үшін адамдардың өз табыстарын жасыру, салықтан жалтару, әдейі ажырасу, мүліктерін туысқандарының атына жазу сияқты фактілері орын алған кезге тап болдық. Жұмыс берушіге қарағанда мемлекет төлейтін атаулы әлеуметтік көмек көбірек болғандықтан, кейбіреулер тіпті әдейі жұмыстан да шығып жатты. Оларға жұмыс істемей-ақ, үйде отырып, мемлекеттен жәрдемақы алу тиімді болды. Бір сөзбен айтқанда, мемлекет адамдардың масылдық көңіл-күйіне тап болды. Ең сорақысы, атаулы әлеуметтік көмек алуға ниет білдіргендердің ішінде тіпті екіқабатты коттеджде тұратын тұлғалар да кездесіп жатты», – деді облыс әкімі.
</blockquote>
2020 жылдан бастап атаулы әлеуметтік көмек алуға әр отбасы мүшесіне күнкөріс минимумының 70 пайыздан аз келетін (күнкөріс минимумы – 28276 теңге, оның 70%-ы – 19793 теңге) отбасылар ғана үміткер болатындай шешім қабылданды. Сондай-ақ, бұл ретте отбасының еңбекке жарамды мүшелері жұмыс істеуі міндетті.
<blockquote>
 «Биыл кем дегенде 10400 тұрақты жұмыс орындарын ашуды көздеп отырмыз. Бос орындарға, мемлекеттен жеңілдік берілетін жұмыс орындарына жұмысқа орналастыру, жеңілдетілген шағын несиелер, қайтарымсыз гранттар беру, жаңа мамандықтарға оқыту ұсынылатын болады. Алайда, егер отбасының еңбекке жарамды мүшесі жұмыспен қамтудың ұсынылған шараларынан бас тартатын болса, онда атаулы әлеуметтік көмекті оған ғана емес, тұтас отбасына да төлеу тоқтатылатын болады. Бұл елімізде барлығына бірдей ортақ ереже!», – деді аймақ басшысы Қ. Ысқақов.
</blockquote>

Қ. Ысқақов: Егер отбасы мүшесі ұсынылған жұмыстан бас тартса – атаулы әлеуметтік көмектен тұтас отбасы қағылады

<a href="https://kyzylorda-news.kz/">Kyzylorda-news.kz.</a> «Қызылорда облысында жұмыс істеп тұрған кәсіпкерлік субъектілерінің саны, кәсіпкерлікпен айналысатын халықтың саны да артқан. Шағын және орта бизнестен түсетін салық көлемі де былтырдың өзінде 11 пайызға өсіп отыр», деп мәлімдеді аймақ басшысы халыққа есеп беру жиынында.&nbsp;
Облыс әкімі Қуанышбек Ысқақовтың айтуынша жұмыс істеп тұрған 46 мың кәсіпкерлік субъектісінің 22 пайызы ғана жылына 2 млн. теңгеден артық табыс түсірген.
<blockquote>
 «Президенттің тапсырмасына сәйкес, шағын және орта бизнестің өңірдегі өндірілген өнімдегі үлесін 2025 жылға 35 пайызға жеткізуіміз керек. Ал, бізде,өткен жылдың 9 айы бойынша 16,5 пайыз ғана. Өңірде жалпы көлемі – 910 гектарды құрайтын 6 индустриалдық аймақ жұмыс жасауда. Оның ішінде 54 жоба (193,7 млрд.теңге) орналасып, 237,5 гектар жер телімі ғана игеріліп тұр. 636 гектар учаскесі бос. Сондықтан, біз осы индустриалдық аймақтардың мүмкіндігін барынша пайдалануымыз қажет»,&nbsp; – деді ол.
</blockquote>
Аймақ басшысы «Еңбек» және «Қарапайым заттар экономикасы» бағдарламаларының мүмкіндіктерін барынша тиімді пайдалануға шақырды.&nbsp;
<blockquote>
 «Енді халық тұтынатын қарапайым тауарлар шығаруға бағытталуымыз қажет. Бұрында біздегі тігін фабрикасы, аяқ киім фабрикасы қандай сапалы өнім шығарғаны естеріңізде болар. Табиғи теріден жасалған балалар аяқ киімі тіпті алыс шетелдерге де экспортқа шығарылған болатын. Неге, біз төсек-орын жабдығын өзімізде шығаруға мүмкіндік бола тұра бүгінде шетелден әкелеміз?! Бізде қаражат та, шикізат та, жұмыс күші де бар», – дейді Қуанышбек Досмайылұлы.
</blockquote>

Қызылорда облысында 46 мың кәсіпкерлік субъектісі жұмыс жасайды

<a href="https://kyzylorda-news.kz/">Kyzylorda-news.kz.</a> Қызылорда облысында балық шаруашылығы айтарлықтай жақсы дамып келеді. Бұл туралы Қызылорда облысының әкімі Қуанышбек Ысқақов халық алдындағы есепті кездесуінде айтты.
Соңғы 5 жылда балық өнімдерінің экспорты 2,5 есеге дейін артса, экспортқа шығаратын елдердің тізімі тек соңғы жылда 8-ден 11-ге дейін көбейді.
<blockquote>
 «Бүгінде біз балық ресурстарына тұтынушылық тұрғыдан ғана қарап келе жатқанымызды мойындауымыз қажет. Яғни, оны өнеркәсіптік деңгейде аулап, табиғатқа келетін залалын өтемей отырмыз. Балық питомниктерін, тоған шаруашылықтарын дамытуға күш салуға тиіспіз. Бұл – индустриалды балық өсірудің маңызды бағыттарының бірі болып саналады», – дейді аймақ басшысы.
</blockquote>
Облыс әкімі аталған саланы дамыту үшін мүмкіндіктер бар екенін, алайда, бұл бағытта бизнес ашуға кәсіпкерлер әзірге ынта білдірмей отырғанын жеткізді. Сондай-ақ бұл табыс табудың жақсы мүмкіндігі екенінде айтты.

Қуанышбек Ысқақов: Балық шаруашылығы бойынша бизнес ашуға кәсіпкерлер ынталы емес

<a href="https://kyzylorda-news.kz/">Kyzylorda-news.kz.</a> Н. Бекежанов атындағы облыстық қазақ музыкалық драма театрында Қызылорда облысының әкімі Қуанышбек Ысқақовтың облыстың 2019 жылғы әлеуметтік-экономикалық даму қорытындылары туралы тұрғындар алдындағы есепті кездесуі өтіп жатыр.
Жиын барысында өткен жылы су торабының бөгетін су шайып, оның толықтай қирауына қауіп төнгенін атап өтті. Егер төтенше жағдай орын алғанда, Сырдария және Жалағаш аудандарының аумағындағы 16 мың гектар жерді сусыз қалдыру қатері туған болатын.
<blockquote>
 «Су торабы бөгетінің жағалауын бекіту бойынша шұғыл жұмыстар жасалды. Алайда, бұл – уақытша шаралар еді. Бүгінгі күні түпкілікті жөндеу және қалпына келтіру жұмыстарының жобалық-сметалық құжаттамасына Су ресурстары комитетінен 48 млн. теңге қаржы бөлініп, жөндеу жұмыстарын жеделдету шаралары қабылдануда. «Сырдария өзенінің арнасын реттеу және Арал теңізінің солтүстік бөлігін сақтау» жобасының екінші кезеңінің үш компоненті – Қызылорда су торабын қайта жаңғырту, Қармақшы, Қазалы аудандарындағы қорғаныс бөгеттерін нығайту, Жалағаш ауданында Тұрымбет және Қорғанша учаскелерінде Сырдария өзенінің арнасын түзету ағымдағы жылы іске асыру жұмыстары басталатын болады», – деді облыс әкімі Қуанышбек Досмайылұлы.
</blockquote>
Жиында аймақ басшысы көптен бері халықтың көкейінде жүрген облыс орталығы шегінде Сырдария өзенінің арнасын тазалауды қаржыландыру мәселесін шешуге қол жеткізілгенін мәлімдеді.
Құны 5 млрд теңге болатын жоба іске асқанда, өзен арнасының 9 шақырымындай табаны 7 метрге жуық тазаланады.

Қазақстан және Қызылорда облысының жаңалықтары