<a href="https://kyzylorda-news.kz/">Kyzylorda-news.kz.</a> 1 маусымнан бастап Қазақстанда теміржол арқылы жолаушыларды тасымалдау қайта іске қосылады. 15 мамырдан билеттерді интернет арқылы және вокзал кассаларынан сатып алу басталды.
Дей тұрғанмен, жолаушыларды вокзал ғимараты мен пойыздарда жаңа ережелер күтіп тұр.&nbsp;
<img src="https://kyzylorda-news.kz/wp-content/uploads/2020/05/pojyz.png" alt="" />
<a href="https://sputniknews.kz/infographics/20200519/14013200/vokzaldar-zhumys.html">sputniknews.kz</a>

Қазақстанда вокзалдар қалай жұмыс істейді

<a href="https://kyzylorda-news.kz/">Kyzylorda-news.kz.</a> Биыл Қызылорда облысында «Жұмыспен қамту жол картасы» аясында 9299 жұмыс орны ашылып, 500-ге жуық тұрақты жұмыс орнын құру жоспарлануда. Бұл туралы Өңірлік коммуникациялар қызметінің ақпарат алаңында өткен баспасөз конференциясында Облыстық жұмыспен қамтуды үйлестіру және әлеуметтік бағдарламалар басқармасының басшысы Талғат Дүйсебаев мәлімдеді.
«Бағдарламаның мақсаты – жұмыссыздық деңгейін төмендету, кадрлік әлеуетті дамыту, жаңа жұмыс орындарын құру. Сондай-ақ, жол картасында мынадай жұмыс түрлері мен объектілер бойынша инфрақұрылымдық жобалардың тізімі ұсынылды. Олар:
1) Әлеуметтік-мәдениет объектілерін – білім беру, денсаулық сақтау, әлеуметтік қамсыздандыру, мәдениет объектілерін күрделі және ағымдағы жөндеу, реконструкциялау;
2) Тұрғын үй-коммуналдық шаруашылық объектілерін (сумен жабдықтау, кәріз объектілері, жылумен, электрмен жабдықтау жүйелері, көппәтерлі тұрғын үйлер) күрделі, орташа және ағымдағы жөндеу;
3) Инженерлік-көлік инфрақұрылымын (кентішілік және ауылішілік жолдар, кірме жолдар, тротуарлар, бөгеттер, дамбалар мен көпірлер, арналар, су шаруашылығы объектілері және құрылыстары) күрделі, орташа және ағымдағы жөндеу, реконструкциялау;
4) Елді мекендерді абаттандыру. Яғни аулаларды абаттандыру, көшелерді, саябақтарды, скверлерді жарықтандыру және көгалдандыру, қоршауларды, балалардың ойын және спорт алаңқайларын жайластыру »,- деді сала басшысы.
Қазіргі таңда 175 жобаның мемлекеттік сатып алу конкурстары аяқталып, мердігерлері анықталды. Мұнан өзге, 25 жоба бойынша келісім шарт жасалып, 74 азамат жұмысқа тартылды.
Айта кетейік, жобаларды іске асыру кезінде жұмыссыз жастарға, оның ішінде денсаулығына зиян келтірмейтін және оқу процесін бұзбайтын жұмыстарға студенттерді жұмысқа орналастыруға басымдық беріледі.
Құрметті қызылордалықтар, бағдарламаға қатысу үшін сіз алдын ала жұмыссыз тұлға ретінде жұмыспен қамту орталығына хабарласып, тіркелуіңізге болады.

Қызылорда облысында 276 инфрақұрылымдық жоба іске асырылады

<a href="https://kyzylorda-news.kz/">Kyzylorda-news.kz.</a> Оқу жылы аяқталуға жақын. Пандемия кезеңіне орай IV тоқсан қашықтан оқыту форматында аяқталады. Осыған орай 11-сынып оқушылары үшін бір мезетте кәсіби бағдар беруге арналған телесабақтар берілмек.
22 мамыр күні, сағат 11:00-де, (Қызылорда уақытымен 10:00-де) “Балапан” және “Еларна” телеарналарында телесабақтар ұйымдастырылады.
11-сынып оқушылары үшін кәсіби бағдар беріліп, жан-жақты ақпарат ұсынылады. Осы себепті барлық мектептің жоғары сынып оқушылары телесабақтар трансляциясын көруі қажет.
Айта кетейік, Қызылорда облысында 6060 оқушы 11-сыныпты аяқтайды.

Телесабақтар арқылы кәсіби бағдар беріледі

Оқыған: Фариза ОМАРОВА
Аз ба, көп пе, адам баласы бір түрлі мақтаннан аман болмағы – қиын іс. Сол мақтан деген нәрсенің мен екі түрлісін байқадым: біреуінің атын үлкендік деп атаймын, біреуін мақтаншақтық деймін. Үлкендік – адам ішінен өзін-өзі бағалы есеп қылмақ. Яғни, надан атанбастығын, жеңіл атанбастығын, мақтаншақ атанбастығын, әдепсіз, арсыз, байлаусыз, пайдасыз, сұрамшақ, өсекші, өтірікші, алдамшы, кеселді – осындай жарамсыз қылықтардан сақтанып, сол мінездерді бойына қорлық біліп, өзін ондайлардан зор есептемек. Бұл мінез – ақылдылардың, арлылардың, артықтардың мінезі. Олар өзімді жақсы демесе, мейлі білсін, жаман дегізбесем екен деп азаптанады. Екінші, мақтаншақ деген біреуі «демесін» демейді, «десін» дейді. Бай десін, батыр десін, қу десін, пысық десін, әрдайым не түрлі болса да, «десін» деп азаптанып жүріп, «демесінді» ұмытып кетеді. Ұмытпақ түгіл, әуелі іс екен деп ескермейді. Мұндай мақтаншақтардың өзі үш түрлі болады. Біреуі жатқа мақтанарлық мақтанды іздейді. Ол – надан, ләкин надан да болса адам. Екіншісі өз елінің ішінде мақтанарлық мақтанды іздейді. Оның надандығы толық, адамдығы әбден толық емес. Үшіншісі өз үйіне келіп айтпаса, я ауылына ғана келіп айтпаса, өзге кісі қостамайтын мақтанды іздейді. Ол – наданның наданы, ләкин өзі адам емес.
Жатқа мақталсам екен деген елім мақтаса екен дейді. Еліме мақталсам екен деген ағайыным мақтаса екен дейді. Ағайынның ішінде өзі мақтау іздеген өзімді өзім мақтап жетем дейді.
1894

Абай Құнанбайұлының жиырма бірінші қара сөзі (АУДИО)

<a href="https://kyzylorda-news.kz/">Kyzylorda-news.kz.</a> Дүниежүзілік денсаулық сақтау ұйымы&nbsp; COVID-19 коронавирусын пандемия деп жариялады. Осыған байланысты Қазақстанда да халықтың қауіпсіздігін сақтау үшін төтенше жағдай жарияланды.
Әлемді шарпыған індет біздің елдің әлеуметтік-экономикалық дамуына да кер әсерін тигізбей қоймады. Өндіріс орындарының жұмысы тоқтап, халық көп шоғырланатын ұйымдар онлайн режимге көшті. Жүзден астам мемлекетте орта мектептер жұмысын тоқтатты. Ал білім беру жүйесі қандай жағдай да да тоқтамауы тиіс.
Бұл біздің елдің алдында тұрған үлкен сынақ болғаны анық. Дегенмен ҚР Білім және ғылым министрлігінің дер кезінде қабылданған шешімінің арқасында мектептердегі оқу үдерісі қашықтан оқыту режиміне көшті. Бұрын мұндай үдерісті бастан өткізіп көрмеген біз үшін бұл таңсық болды, әрине.
Алғашында интернет, техника жағынан қиындық туындағаны жасырын емес. Десек те ХХІ ғасыр оқушылары дәстүрлі оқу мен жаңа технологияны да қатар игеруі керек. Осы ретте айтарым кездескен көптеген кедергілерге қарамастан мектеп мұғалімдері балаларымыз бен қоса бізге де, яғни, ата-аналарға да көмек көрсетті.
Қалай десек те, «Өзінің уақытын аямаған, өзгенің бағытын аялаған» ұстаздар қауымының еңбегі зор. Әр балаға білім беріп, оның артында тұрған бір-бір ата-анаға жаңа білім жүйесін түсіндіруден жалыққан емес. Әр пәнді жете түсіндірген мұғалімдер баланың жанында отырғандай сүйеу бола білді.
Ұстаздар қауымының әр онлайн-сабаққа үлкен жауапкершілікпен дайындалатындары көрініп тұрды. Балалар сыныптастарымен бірге сабаққа белсене қатысудың арқасында тақырып меңгеруде қиындықтар туындаған жоқ.
Осылайша, оқу жылының соңғы тоқсанында өткен қашықтан оқыту жүйесі мектептің&nbsp; бала тәрбиесіндегі маңыздылығын және ұстаздар қадірін арттыра түсті.
№3 IT–мектеп
4 «А» сыныбының ата-аналары

Қашықтан оқыту жүйесі ұстаздар қадірін арттыра түсті

<a href="https://kyzylorda-news.kz/">Kyzylorda-news.kz.</a> Жалағаш ауданында еріктілер жалғызбасты зейнеткердің үйінің шатырын жөндеп берді. Бұл туралы Қызылорда облысы бойынша қылмыстық-атқару жүйесі департаментінің баспасөз қызметі мәлімдеді.
Аудан жастарынан құрылған «Темірқазық»&nbsp;қоғамдық бірлестігі&nbsp;мен аудандық пробация қызметі есебінде тұрған азаматтар арасынан еріктілер тобы құрылып,&nbsp; өз қаражаттары есебінен, тұрмыс жағдай төмен зейнеткердің&nbsp; үйін шатырлап берді.
<blockquote>
 «Жалғызбасты зейнеткер қыс-көктем айларында қиналғанын айтты.&nbsp; Қыста сыз тартып, көктемде жаңбыр жауса, шатыры болмағандықтан&nbsp; төбесінен&nbsp;&nbsp; су ағатын үйде жалғыз өмір сүріп келеді. Қиын жағдайдағы әжейдің&nbsp; тұрмысымен танысқан есептегі азаматтар,&nbsp; қол қусырып отыра алмады. Тез әрі жылдам шешім қабылдып, шатырға қажетті заттарды өз қаражаттары есебінен алып, сауабы мол іс тындырды», – делінген хабарламада.
</blockquote>
«Жас&nbsp; келсе, іске» демекші, бұл азаматтар өмірде шалыс басса да,&nbsp; адамгершілік қасиеттерінен айныған емес.&nbsp; Үйінің шатырланғанын риза болған зейнеткер «Темірқазық»&nbsp;қоғамдық бірлестігіне және&nbsp; аудандық пробация қызметкерлері мен есептегі азаматтарға алғысын айтып, ақ батасын берді.

Жалағашта есептегі еріктілер зейнеткердің үйін шатырлап берді

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласы тұрғынының көлігінен қарақұйрық денесі мен аңшы мылтығы табылды.
Шиелі аудандық Полиция басқармасы ЖПҚБ-ның Табиғат қорғау полиция тобының қызметкерімен және «Охотзоопром» РМҚК өкілдерімен бірлескен рейдтік іс-шаралар кезінде 18 мамырда Шиелі ауданы Телікөл ауылының «Камал» су скважинасының жанында күдік тудырған «ВАЗ» маркалы автокөлігі тоқтатылды.
Автокөлікті тексеру барысында қапқа салынған қарақұйрық жануарының денесі, 16-калибрлі аңшы мылтығы заттай дәлелдеме ретінде алынды.
Осы қылмысқа қатысы бар күдікті 40 жастағы жұмыссыз, облыс орталығының тұрғыны болып шықты.
Қазіргі таңда аталған дерек бойынша ҚР Қылмыстық кодексінің 337-бабы 1-бөлігінің бойынша (заңсыз аңшылық) сотқа дейінгі тергеп-тексеру жұмыстары жүргізіліп жатыр.
<img src="https://kyzylorda-news.kz/wp-content/uploads/2020/05/karakwjryk-kaz-2-1.jpeg" alt="" />
<img src="https://kyzylorda-news.kz/wp-content/uploads/2020/05/karakwjryk-kaz-3-1.jpeg" alt="" />

Қызылордада қарақұйрық атқан тұрғын ұсталды (ФОТО)

<a href="https://kyzylorda-news.kz/">Kyzylorda-news.kz.</a> Күзде коронавирустың екінші толқыны келсе, карантиндік шаралар қабылдануы мүмкін. Бұл туралы ҚР Денсаулық сақтау вице-министрі Людмила Бюрабекова мәлім етті, деп хабарлайды <a href="https://lenta.inform.kz/kz/vice-ministr-kuzde-de-karantindik-sharalar-kabyldanuy-mumkin_a3651662">ҚазАқпарат.</a>
Онлайн тәртіпте өткен баспасөз мәслихатында күзде коронавирустың екінші толқыны болатындығы туралы пікірлерге қатысты сұрақ қойылды. Бұл тұрғыда кәсіпорындардың жұмысына шектеу енгізу мүмкіндігі жайында сұралды.
<blockquote>
 «Шынымен де күзде біз екінші толқыны келуі мүмкін екенін жоққа шығармаймыз. Алайда күзде қабылданатын шаралар жағдайға қарай іске асырылады, яғни сол кездегі эпидемиологиялық ахуал назарға алынады. Күзде қандай да бір карантиндік шаралар қабылдануы мүмкін, бұл қадамдар індеттің таралуы қаупіне байланысты болады», – деді вице-министр.
</blockquote>
Бұдан бұрын хабарланғандай, ҚР ДСМ Қоғамдық денсаулық сақтау ұлттық орталығы директоры Дамир Көбжасаров коронавирустың екінші толқыны қай кезде келуі мүмкін екенін&nbsp;<a href="https://www.inform.kz/kz/koronavirustyn-ekinshi-tolkyny-kuzde-kelui-mumkin_a3647535">айтты</a>.
<blockquote>
 «Індет жұқтыру көрсеткіштері артуының екінші кезеңі күз мерзімінің екінші бөлігіне келуі мүмкін. Ел халқы вирустың бар екенін ұмытпауы керек. Бұл індет барша әлемде толықтай жойылмады. Кейбір адамдарда бұл ауру ешбір белгілерсіз болады, кейіннен бұл инфекция ағзасы індетке сезімтал кісілерге жұғуы мүмкін», – деді Д. Көбжасаров онлайн тәртіпте өткен брифингте.
</blockquote>

Вице-министр: Күзде де карантиндік шаралар қабылдануы мүмкін

<a href="https://kyzylorda-news.kz/">Kyzylorda-news.kz.</a> Қызылорда облысында күріш егістерінің өлу&nbsp;қаупі бар, өйткені шаруаларға суармалы су жетіспейді, деп хабарлайды&nbsp;<a href="https://astanatv.kz/ru/news/54832/">«Астана»</a> телеарнасы.
Облыста егінді суаруға жыл сайын төрт миллиард текше метрден астам қаражат жұмсалады. Биыл Шардара су қоймасы мен Көксарай контрреттегішінде&nbsp;бір миллиард текше метрге аз жиналды. Бұл резервтерді әлі де Түркістан облысының аграршыларымен бөлісу қажет.
<blockquote>
 «Сырдария – трансшекаралық өзен және біз жоғарыдағы мемлекеттерге тәуелдіміз. Мысалы, қазір Шардарада әдеттегідей бір жарым мың текше метрден он есе аз су жеткізіледі», – дейді «Қазсушар»&nbsp;РМК Қызылорда филиалының өндірістік учаскесінің бастығы Жорабек Нұрымбетов.
</blockquote>
Биылғы жылы судың жалпы жетіспеуіне байланысты күріш егілетін егістік алқапты он мың гектарға қысқарту туралы шешім қабылданды. Бұл барлық жердің 10 пайызынан астамын құрайды. Күріш фермерлерінен рентабельділікті мұқият есептеп, ғалымдардың кеңесіне жүгіну керек.
<blockquote>
 «Басқа дақылдарға көшу бес жылдан астам уақытты қажет етеді. Біздің ауыспалы егісті толығымен өзгерту қажет. Ал мұның қаншалықты пайдасы бар? Егер жүгері немесе соя түсімі күріш деңгейінде болса, онда біз, әрине, оларға ауысуға дайынбыз. Бірақ тағы да маркетинг. Жүгеріні құс фабрикалары сатып алып&nbsp;жатыр&nbsp;дейді, бірақ елде мұндай фабрикалар аз», – деді бас агроном Асқар Әлиакбаров.
</blockquote>
Осы уақытқа дейін аграрлардың көкейкесті мәселелерінің бірі – Сырдария өзенінің арнасын тазарту басталды. Әзірге осы мақсатта 350 миллион теңгенің алғашқы траншы бөлінген.

Қызылорда облысында күріш дақылдарына қауіп төнуде

<a href="https://kyzylorda-news.kz/">Kyzylorda-news.kz.</a> Биыл педагогттерді аттестаттау 3 кезеңмен өтеді. Бұл туралы ҚР Білім және ғылым министрлігінің Мектепке дейінгі және орта білім комитетінің төрайымы Майра Мелдебекова айтты, деп хабарлайды <a href="https://www.inform.kz/kz/attestattaudan-otken-pedagogtin-zhalakysyna-kansha-ustemaky-kosylady_a3651532">ҚазАқпарат.</a>
<blockquote>
 «Педагогтерді аттестаттау ерекше санитарлық нормаларды сақтау талабымен өтеді. Жалпы, кабинеттердің барлығында әрбір педагогтің арасындағы 2 метрлік арақашықтық сақталатын болады. Сонымен қатар әрбір педагог маска тағады. Аттестаттау өтетін аудиторияларда санитайзерлер мен сенсор термометр болуы талап етіледі. Педагогтерді аттестаттау министрліктің 2 бұйрығымен белгіленген. Ол – педагогтердің барлығына таныс 83-ші бұйрық пен педагогтердің біліктілік санаттарын беру және растау қағидалары», – деді Майра Мелдебекова.
</blockquote>
Оның айтуынша, аттестаттау 3 кезеңмен өтеді. Бірінші кезеңде Ұлттық біліктілік тестін тапсырады. Екінші кезекте біліктілік бағалау жүргізіледі. Ал үшінші кезеңде жалпы педагогтің немесе білім беру ұйымы басшысының портфолиосын талдау өткізіледі. Педагогтер аттестаттаудан 5 жылда 1 рет, білім беру ұйымдарының басшылары 3 жылда 1 рет өтеді.
<blockquote>
 «Биылдан бастап мектепке дейінгі білім беру ұйымдарының педагогтері мен басшылары, қосымша білім беру ұйымдарының педагогтері, методикалық кабинеттердің әдіскерлері, сонымен қатар техникалық және кәсіптік білім беру ұйымдарының педагогтері мен басшылары қатысады. Осы үш кезеңді сәтті өткен әрбір педагогтің, сонымен қатар білім беру ұйымы басшысының жалақысына үстемақы төленеді. Басшылар мен олардың орынбасарларына тағайындалған санатына байланысты 30-дан 100 пайызға дейін, педагогтерге 30-дан 50 пайызға дейін үстемеақы қосылады», – деді комитет төрайымы.
</blockquote>

Аттестаттаудан өткен педагогтің жалақысына қанша үстемақы қосылады?

Kyzylorda-news.kz. Аса қамқор ерекше мейірімді Алланың атымен бастаймын! Барлық мақтау Аллаға тән. Ардақты Пайғамбарымыз Мұхаммедке Алланың салауаты мен сәлемі болсын!&nbsp;
Қадірлі жамағат! Баршамызды қасиетті Рамазанның, оның ішінде мың айдан қайырлы Қадір түніне аман-есен жеткізген Аллаға сансыз шүкірлер болсын!
Алла Тағала жылдардың ішінен ардақты Пайғамбарымыз Мұхаммед (оған Алланың салауаты мен сәлемі болсын) дүниеге келген жылды берекелі етіп қойды. Айлардың ішіндегі Рамазан қасиетті ай. Күндердің ішіндегі жұма, арапа күндерінің қасиеті ерекше. Ал Жаратқан Жаббар Иеміз түндердің ішінен Қадір кешінің қадірі мен қасиетін, дәрежесі мен сауабын арттырып қойған.
Исі мұсылман баласының тағдыр жазылатын түнді тағатсыздана күтуінің бір хикметі – Жаратқанға жақындай түсуге талпынуы. Қадір кешінің әрбір сәтін құлшылықпен, дұғамен, Құран оқумен, т.б. Аллаға ұнамды сауапты амалдармен өткізетініміз сондықтан.
Қадір түнінің негізгі қасиеті – адамзат баласын екі дүние бақытына жетелейтін Құран Кәрімнің түсуінде. Алла Тағала бұл туралы былай баяндайды:
«Біз шынында, Құранды Қадір түнінде түсірдік. Қадір түнінің не екенін білесің бе? Қадір түні&nbsp;(қасиет және сауап жағынан)&nbsp;мың айдан да қайырлы. Сол түнде періштілер және Жәбірейіл Алланың әмірімен&nbsp;(жер бетіне Алла тағдыр еткен)&nbsp;барлық істерді атқару үшін түседі. Сол бір түн, ағарып таң атқанға дейін амандық-тыныштық түні болады» («Қадір» сүресі, 1-5-аяттар).
Пайғамбарымыз (оған Алланың салауаты мен сәлемі болсын) бір хадисінде:&nbsp;«Кімде-кім Қадір түні иманмен және сауабын үміт етіп құлшылық етсе, оның алдыңғы күнәлары кешіріледі», – деген.
Алланың рақымы мен мейірімі ерекше төгілетін түнде уақытымызды мүмкіндігінше бос жібермей, құлшылықпен өткізейік. Өйткені, бұл түнде Жаратқанға шынайы жалбарынған пенделердің тілектері қабыл етіліп, тағдыры жазылып, ризық-несібесі бекітіледі. Кейбір ғұламалар қасиетті Қадір кешінде кімдердің қажылыққа баратыны белгілі болады деген. Демек, әр адамға қатысты үкім шығарылатын түнді барынша сауапты амалға арнағанымыз абзал. Осы ретте Қадір түнінде жасайтын қайырлы амалдарға тоқтала кетейін. Ең бастысы мұсылман баласы бұл кешті иманмен, Аллаға деген мықты сеніммен, сауабын үміт ете отырып өткізуі тиіс. Намаз, Құран оқып, дұға жасап, Алладан кешірім сұрап, ардақты Пайғамбарымыз Мұхаммедке (оған Алланың салауаты мен сәлемі болсын) салауат айтып, уағыз-насихат тыңдап өткізуге аса мән беру керек. Сонымен қатар, алдын ала Қадір түнінің қасиеті туралы оқып-біліп алған жөн. Өйткені, бұл кештің мәні мен маңызын, дәрежесі мен мәртебесін, сауабы мен қасиетін түсінген адам оның берекетінен әсте мақұрым қалмауға тырысады.
Ардақты ағайын!
Биылғы Рамазанның қасиетті Қадір кеші мамыр айының 19-нан 20-на қараған түнге сәйкес келіп отыр. 19 мамырда мешіттеріміз таңғы сағат 07:00 мен кешкі 20:00 аралығында жұмыс істейтін болады. Осы ретте баршаңызды Қадір кешін өз үйлеріңізде өткізуге шақырамын. Биылғы Рамазан айы карантин жағдайында өтіп жатқаны өздеріңізге белгілі. Карантин талаптарын орындауымыз тиіс. Бұл – сіз бен біздің, өз отбасымыз бен ең жақын туыстарымыздың денсаулығы мен өмірінің игілігі үшін қабылданған шешім. Мұны түсіністікпен қабылдайсыздар деген үміттемін.
Қазақстан мұсылмандары діни басқармасы қасиетті Қадір кешінде Құран хатым дұғасын, уағыз-насихат пен пайдалы дәрістерді онлайн режимде өткізеді. Үйде отырып, онлайн режимде дұғаға қатысып, насихат тыңдауға толық мүмкіндік бар.
Осы ретте барша қауымды қасиетті Қадір түнінде Түркістан облысындағы тасқын судан зардап шеккен жерлестерімізге дұға жасауға үндеймін.
Жаратқан Жаббар Иеміз жер бетінен жұқпалы індетті жойып, жақсылықта жүздесуді нәсіп еткей.
Мың айдан да қайырлы Қадір түнінде тілеген тілектеріміз бен құлшылықтарымызды Алла Тағала қабыл еткей! Әмин!
<img src="https://kyzylorda-news.kz/wp-content/uploads/2020/05/bas-muefti-qasietti-qadir-tuenimen-quttyqtady.jpg" alt="" />

Бас мүфти қасиетті Қадір түнімен құттықтады

<a href="https://kyzylorda-news.kz/">Kyzylorda-news.kz.</a> 25 мамыр күні еліміздің барлық мектептерінде оқу жылының аяқталуына орай соңғы қоңырау онлайн режимде соғылады. Бұл туралы ҚР Білім және ғылым вице-министрі Шолпан Каринова айтты, деп хабарлайды <a href="https://www.inform.kz/kz/songy-konyrau-25-mamyrda-onlayn-rezhimde-sogylatyn-boldy_a3651507">ҚазАқпарат.</a>
<blockquote>
 «Білім саласында осы апта маңызды екендігін естере отырып, тоқсандық бақылаулардың дұрыс өткізілуін қадағалау қажет. 25 мамырда соңғы қоңырау мерекесі міндетті түрде онлайн режимде өткізілетіндігіне назар аудартамыз. Ал 3-4 маусым күндері барлық 11-сынып түлектеріне аттестат тапсыру шараларын ұйымдасқан және талаптарды сақтай отырып өткізуді ұсынамыз», – деді Шолпан Каринова.&nbsp;
</blockquote>
Осы ретте ҚР Білім және ғылым министрлігі Асхат Аймағамбетов жоғарыда аталған ұсыныстар еліміздің Денсаулық сақтау министрлігімен келісілгендігін атап өтті.
<blockquote>
 «25 мамырда онлайн режимінде 1-10 сыныптарға арналған соңғы қоңырау сынып сабақтарын өткіземіз. Жыл қорытындысын сол жерде әр сынып бойынша жасауға, оны әртүрлі уақытта өткізуге болады. Оны асыра ұйымдастырудың қажеті жоқ. Әр сынып жетекшісі қай уақытта, қалай өткізетіндігін ешқандай есепсіз, сұраусыз жеке тәртіпте өткізуі тиіс», – деді министр.
</blockquote>
Асхат Аймағамбетов 3-4 маусымда мектеп түлектеріне аттестат тапсыру шарасы кезінде санитарлық талаптардың қатаң сақталуы тиістігіне ерекше назар аудартты.

Қазақстан және Қызылорда облысының жаңалықтары