<a href="https://kyzylorda-news.kz/">Kyzylorda-news.kz</a>. Қызылордада әжесі таксиге отырғызып жіберген 7 жасар бала жоғалып кетті.
17 мамыр күні сағат 10:50-де Қызылорда қалалық Полиция басқармасына немересінің жоғалып кеткені туралы жергілікті тұрғын арызданған.
Одан бір күн бұрын 16 мамырда келіні 7 жасар ұлымен бірге қонаққа келген. Бала әжесінің үйінде қалуды жөн көреді. Келесі күні таңертең әжесі такси жүргізушісіне нақты мекенжайды көрсетіп, немересін көлікке отырғызып, анасына жіберген. Шамамен бір сағаттан кейін келініне қоңырау шалған әжесі, баланың үйге әлі келмегенін біліп, дереу 102 арнасына хабарлама түсіреді.
Аталған дерек бойынша іздеу шаралары дереу ұйымдастырылды. Қызылорда қалалық Полиция басқармасының барлық жеке құрамы дабыл бойынша көтеріліп, баланы іздеуді бастайды.
Баланы барлық жерден іздеген полицейлер, үй маңайындағы барлық жерді тінтіп шыққан. Іздестіру жұмыстары аясында анықталғандай, такси жүргізушісі көрсетілген мекенжайды таппай, баланы әжесі отырғызған жерге қайта апарып тастаған. Осылайша жасөспірім бала үйді шатастырып, жоғалып кеткен.
Ювеналдық және криминалдық полиция қызметкерлерінің, учаскелік полиция инспекторлар мен патрульдік полиция батальоны қызметкерлерінің үйлесімді іс-әрекеттерінің нәтижесінде бір сағат ішінде кәмелетке толмаған бала табылып, анасына аман-есен тапсырылды. Баланың анасы полицейлерге қызметі мен жеделдігі үшін шын жүректен алғыс айтты.

Қызылордада таксиге отырған 7 жасар бала жоғалып кетті

Kyzylorda-news.kz. Бүгін аймақ басшысы Гүлшара Әбдіқалықованың төрағалығымен облыс әкімдігі жанындағы мемлекеттік рәміздер жөніндегі комиссия отырысы өтті.
Жиында мемлекеттік рәміздердің насихатталуы және қолданылу жай-күйіне облыстық инспекциялық топтың тексеру қорытындысы, облыстық жұмыспен қамтуды үйлестіру және әлеуметтік бағдарламалар басқармасына қарасты мекемелерде мемлекеттік рәміздердің пайдаланылуы және насихатталу барысы, Жаңақорған ауданында мемлекеттік рәміздердің қолданылуы мен насихатталуы мәселелері қаралды.
Күн тәртібіндегі алғашқы мәселе бойынша облыстық ішкі саясат басқармасының басшысы Мира Қазбекова облыстық инспекциялық топтың 2021 жылдың 5-30 сәуір аралығында Қызылорда қаласы мен аудандардағы мемлекеттік мекемелерде Мемлекеттік рәміздердің стандарттарға сәйкес қолданылуы мен орналастырылуы бойынша жүргізген зерделеу жұмыстардың нәтижесін баяндады.
<blockquote>
 “2020 жылғы 20 тамызда өткен облыс әкімдігі жанындағы Мемлекеттік рәміздер жөніндегі комиссия отырысының хаттамалық тапсырмасын орындау мақсатында Қызылорда облысының ішкі саясат басқармасы және облыстық полиция департаментімен бірлескен ведомствоаралық облыстық инспекциялық топ құрылды. Инспекциялық топ 2021 жылдың 5-30 сәуіраралығында Қызылорда қаласы мен аудандардағы мемлекеттік мекемелерде Мемлекеттік рәміздердің стандарттарға сәйкес қолданылуы мен орналастырылуы бойынша зерделеу жұмыстарын жүргізіп, барлығы 374 мемлекеттік мекемені қамтыды. Зерделеу барысында 35 мекемеде кемшіліктер анықталып, 13-і дер кезінде қалпына келтірілсе, 2 мекемеге әкімшілік хаттама толтырылды”, – деді облыстық ішкі саясат басқармасының басшысы Мира Қазбекова.
</blockquote>
Өңір басшысы Гүлшара Әбдіқалықова кейбір аудан әкімдіктері мен аумақтық департаменттердің аудандық бөлімшелерінде заңнама талаптары сақталмайтынын айтып, аудандар әкімдіктері жанындағы мемлекеттік рәміздер жөніндегі комиссия тиісті деңгейде жұмыс істемей отырғанын тілге тиек етті.
<blockquote>
 “Рәміздерді қолдануда аудан әкімдіктері мен облыстық басқармаларға қарасты мекемелерде, аумақтық департаменттердің аудандық бөлімшелерінде заңнама талаптары сақталмайтыны айтылды. Биыл, Ел тарихындағы мерейлі дата, Тәулсіздігіміздің 30 жылдығы қарсаңында мемлекеттік рәміздерге деген құрмет ерекше болуы керек. Сондықтан, мемлекеттік рәміздерімізге құрметпен қарауды қалыптастыруда ең алдымен өздеріңіз үлгі болыңыздар. Алдағы уақытта заңнама талаптарын сақтамау фактілері тіркелетін болса, жеке жауапкершіліктеріңіз қаралатынын ескертемін”, – деді облыс әкімі Гүлшара Әбдіқалықова.
</blockquote>
Мұнан соң комиссия отырысының күн тәртібіндегі келесі мәселе Қызылорда облысының жұмыспен қамтуды үйлестіру және әлеуметтік бағдарламалар басқармасына қарасты мекемелерде мемлекеттік рәміздердің пайдаланылуы және насихатталу барысы туралы аталған басқарманың басшысы Гаухар Қалмақова баяндады. Басқарма басшысы рәміздерді пайдалануы мен насихаттау бағытында арнайы жұмыс жоспары бекітіліп, қазіргі таңда басқармаға қарасты мекемелерде кемшіліктер анықталмағанын жеткізді.
Ал, Жаңақорған ауданында мемлекеттік рәміздердің қолданылуы мен насихатталуы жайын айтқан аудан әкімі Руслан Рүстемов инспекциялық топтың ауданда анықтаған кемшіліктерінің барлығы бүгінде жойылғандығын айтты. Сондай-ақ, Қазақстан Республикасының Тәуелсіздігінің 30 жылдығына орай өткізілетін шаралар қатарында мемлекеттік рәміздер ұлықталатын болады деді.Отырыс соңында аймақ басшысы Гүлшара Әбдіқалықова мемлекеттік рәміздерді насихаттауда идеологиялық жұмыстарға аса мән беру керектігін жеткізді.
<blockquote>
 “Мемлекет Басшысы Қасым-Жомарт КемелұлыТоқаев «Егемен еліміздің бейбіт аспанында желбіреген көк туымыз бүгінгі күннің баға жетпес байлығы» – деген болатын. Мемлекеттік рәміздерге құрмет көрсетуді барша азамат қасиетті борышы ретінде ұғынуы тиіс. Осы ретте, 4 маусым – Қазақстан Республикасының Мемлекеттік рәміздері күні аясындағы іс-шаралардың мазмұны мен өткізілу форматтары жаңа бағыттарда болуы қажет. Халқымыздың рухын, ұлттық салт-санасын, қаһармандығы мен даналығын бейнелейтін ерекше құнды белгілерді құрметтеу, насихаттау – әрбір Қазақстан азаматының міндеті”, – деді облыс әкімі Гүлшара Әбдіқалықова.
</blockquote>
Сондай-ақ аймақ басшысы облыстық басқарма басшылары, Қызылорда қаласы және аудан әкімдері, аумақтық департамент басшыларына өздеріне қарасты мекемелерде мемлекеттік рәміздердің талапқа сай орналасуын тұрақты бақылауға алып, облыстық инспекциялық топтың тексеру қорытындысына сәйкес кемшілік жіберген мекеменің жауапты тұлғаларының жауапкершілігін қарауды тапсырды. Облыстық инспекциялық топ анықтаған кемшіліктерді 1 ай ішінде ретке келтіріп, аудан әкімдіктері жанындағы мемлекеттік рәміздер жөніндегі комиссияның жұмысын күшейтуді жүктеді.
<img src="https://kyzylorda-news.kz/wp-content/uploads/2021/05/fb_img_1621429139110-1.jpg" alt="" />

Гүлшара Әбдіқалықова: Мемлекеттік рәміздерге құрмет көрсетуді барша азамат қасиетті борышы ретінде ұғынуы тиіс

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Жалағаш ауданының тұсында “Volkswagen Transporter” автокөлігі өртенді.
Әуесқой видеоны түсірушінің айтуынша, автокөліктегі газ құрылғысынан өрт шыққан. Әзірге ресми ақпарат жоқ.

Жалағашта автокөлік өртенді (ВИДЕО)

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қазақстанның тұңғыш президенті, Елбасы Нұрсұлтан Назарбаев қауіпсіздік кеңесінің отырысын өткізді. Жиында қарулы күштерді дамыту мен құрудың 2030 жылға дейінгі тұжырымдамасының жобасы қаралды, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “Біз барлық көршілерімізбен берік достық байланыс, жетекші державалармен сенімді серіктестік орнаттық. Сонымен бірге қуатты армия ел қауіпсіздігінің маңызды кепілі болып саналады”, – деді Назарбаев.
</blockquote>
Осы орайда тұңғыш президент ассиметриялы және гибридті қауіп-қатерлерге тойтарыс беруге дайын болу қажеттігін ерекше атап өтті. Сондықтан әскери процестерді басқаруды автоматтандыру және жаңа технологияларды енгізу мәселесіне баса назар аудару қажет.
<blockquote>
 “Біздің Қарулы Күштер егемендігіміз бен аумақтық тұтастығымызды, ұлттық мүдделерімізді қорғауға қабілетті болуға тиіс. Мұның бәрі армияның таяу онжылдықта дамуын жоспарлау кезінде ескерілуі керек”, – деп атап көрсетті Назарбаев.
</blockquote>
Қауіпсіздік кеңесінің төрағасының айтуынша, шекара қауіпсіздігін қамтамасыз ету үшін шекара қызметінің жұмысын жетілдіріп қана қоймай, экономикалық, ақпараттық, қоғамдық және әскери қауіпсіздік бойынша жүйелі шараларды атқару қажет.
<blockquote>
 “Шекараны барлық қауіп-қатерден қорғауды қамтамасыз ету керек. Шекара қызметі мен Қарулы күштерді құру өзара үйлесімді әрі бірыңғай стандарт бойынша жүргізілуге тиіс. Сонымен бірге шекаралық қауіпсіздік мәселесін кешенді, жүйелі түрде қарастырған жөн”, – деді Назарбаев.
</blockquote>

Нұрсұлтан Назарбаев: Шекараны барлық қауіп-қатерден қорғауды қамтамасыз ету керек

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Байқоңыр ғарыш айлағында алдағы ұшырылымдарға дайындық бойынша жұмыстар белсенді түрде жүргізілуде, деп хабарлайды <a href="https://lenta.inform.kz/kz/biyl-baykonyrdan-11-zymyran-tasygyshy-ushyrylmak_a3789689">ҚазАқпарат</a>.
Байқоңыр ғарыш айлағынан 2021 жылға бекітілген ұшыру жоспарына сәйкес келесі ұшырылым 30 маусымға жоспарланған. Бұл күні «Прогресс МС-17» ғарыш жүк көлігін орбитаға шығаратын «Союз 2.1 а» зымыран тасығышын ұшыру жоспарланған.
Жаздың соңына дейін тағы үш ұшырылым жоспарланған. 15 шілдеде Халықаралық ғарыш станциясына арналған «Ғылым» зертханалық модулімен «Протон-М» зымыран тасығышы, 2 тамызда «Фрегат-М» үдемелі блогы бар «Союз-2-1Б»зымыранында OneWeb 34 спутнигі, 26 тамызда «Союз-2-1Б/Фрегат-М» зымыранында OneWeb 34 спутнигі ұшырылуы керек.
Байқоңыр ғарыш айлағынан ең көп ұшырылым 2021 жылдың күзіне жоспарланған. Тамыз-қыркүйек айларына биыл осымен екінші рет «Экспресс-АМУ3, Экспресс-АМУ7» ғарыш аппараттарымен «Протон-М»зымыран тасығышын ұшыру жоспарланып отыр.
18 қыркүйекте бортында OneWeb 34 спутнигі бар «Союз-2-1Б» зымыраны ұшырылады.
5 қазанда «Союз МС-19» басқарылатын кемесі бар «Союз-2» зымыран тасығышының ұшырылымы өтеді. 28 қазанда «Прогресс МС-18» көліктік жүк кемесімен «Союз-2.1 а» зымыраны ұшырылады.
24 қарашада «Союз – 2-1-Б» зымыранының көмегімен тағы бір ғарыш кемесін – «Прогресс М-УМ-ды» ұшыру жоспарлануда.
8 желтоқсанда бортында ғарыштық туристері бар «Союз МС-20» басқарылатын кемесімен «Союз-2» зымыраны ұшырылмақ.
23 желтоқсанда Байқоңырдан «Фрегат-М» үдемелі блогы бар «Союз-2-1Б» зымыран-тасығышымен OneWeb 34 спутнигі ұшырылады.
Ұшырылымдар жоспары ай сайын нақтылануы мүмкін.

Биыл Байқоңырдан 11 зымыран тасығышы ұшырылмақ

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;“Бизнестің жол картасы 2025” бағдарламасы аясында кәсіпкерлердің 666 жобасы несиелендірілді. Несие портфелі өткен жылмен салыстырғанда 6 есеге ұлғайды. Бұл туралы Өңірлік коммуникациялар қызметінің ақпарат алаңында Облыстық кәсіпкерлік және туризм басқармасының басшысы Фердоуси Қожабергенов мәлімдеді.
<blockquote>
 «Аймақта 528 жоба екінші деңгейлі банктердің “скоринг” бағдарламасы арқылы мақұлданды. Қаржыландырылған жобалардың басым бөлігі пандемия кезеңінде аса зардап шеккен бөлшек сауда, жолаушылар тасымалы, қоғамдық тамақтану және шағын қызмет саласында жұмыс жасайтын микро кәсіпкерлік субъектілерінің үлесінде. Сондай-ақ, өткен аптада Бақылау кеңесінің отырысында ауылдық елді мекен кәсіпкерлерінің 143 жобасы мақұлданды», – деді Фердоуси Әбілқасымұлы.
</blockquote>
Биыл облыстық бюджеттен шамамен 30 жобаны қайтарымсыз грант арқылы қаржыландыру жоспарлануда. Бұдан өзге, қаржы ұйымдары арқылы жыл басынан бері 41 адам шағын несиемен қамтамасыз етілді.
Айта кету қажет, өңірде соңғы бес жылдықта шағын және орта бизнес өнімі 13,5 %-дан 17,8 %-ға дейін ұлғайған.
<img src="https://kyzylorda-news.kz/wp-content/uploads/2021/05/ferdawsi.jpg" alt="" />

Қызылорда облысында биыл 666 жоба несиелендірілді

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;Алдағы күндері еліміздің басым бөлігінде күн райы бұзылады деп күтілуде.
Синоптиктер күн күркіреп, бұршақ жауады деп болжап отыр. Бүгін елордада күн бұлттанып тұр. Ақмола және Қарағанды облыстарында қатты жаңбыр жауады. Республикамыздың орталық және шығыс аймақтарында жел тұрады. Ал оңтүстік-батысында күн ашық болады деп күтілуде.

Еліміздің басым бөлігінде ауа райы бұзылады

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қазақстанда бірқатар маман иелерінің зейнетке шығу жасын төмендету ұсынылды,&nbsp; деп хабарлайды&nbsp;<a href="https://stan.kz/">Stan.kz</a>.
Мәжіліс отырысында депутат Ерлан Смайлов қазақстандықтардың зейнет жасына байланысты&nbsp;бірқатар мәселені ортаға салды.
<blockquote>
 “Еліміздің конституциясына сәйкес, Қазақстан өзін әлеуметтік мемлекет ретінде бекітеді, оның ең жоғарғы құндылығы – адам, оның өмірі, құқықтары мен бостандықтары. Лайықты қарттық құқығы, әрине, еңбек ету құқығы сияқты, біздің азаматтардың басты құқығы болып табылады. Қазіргі кезде лайықты қарттық құқығын жүзеге асыру бойынша сұрақтар көп. Бұл әсіресе зиянды және қауіпті еңбек жағдайларында жұмыс істейтін жұмысшыларға – металлургтерге, кеншілерге, мұнайшыларға, кен байыту, уран өнеркәсібінің жұмысшыларына және өнеркәсіптік кәсіпорындарда жұмыс істейтін жүз мыңдаған қазақстандыққа қатысты”, – деді депутат.
</blockquote>
Оның айтуынша, зиянды және қауіпті еңбек жағдайларында жұмыс істейтін жұмысшылардың зейнетке шығу жасын төмендету керек.
<blockquote>
 “Мемлекет олар үшін зейнет жасын төмендетіп, лайық зейнетақымен қамтамасыз етуі керек. Қазіргі белгіленген зейнеткерлік 63 жаста қазақстандықтардың қартайған кезде лайық өмір сүру мүдделері мен құқығы мүлде сәйкес келмейді. Қауіпті және зиянды еңбек жағдайларында жұмыс істейтін қазақстандық жұмысшылардың саны – 1 645 247 адам, олардың 987 645-і – ер, 657 602-сі – әйел”, – деді Смайлов.
</blockquote>
Депутат қауіпті және зиянды еңбек жағдайында жұмыс істеу жұмысшылардың денсаулығына кері әсер ететінін атап өтті.
<blockquote>
 “Статистикалық мәліметтерге сүйенсек, біздің елде өмір сүрудің орташа ұзақтығы 2020 жылы ерлерде – 67, әйелдерде 75,5 жас болды. Сонау 1956 жылы КСРО заңымен жұмысшылар мен қызметкерлерге жер асты жұмыстарында, зиянды еңбек жағдайлары бар жұмыс орындарында&nbsp;және ыстық цехтарда жеңілдікпен зейнеткерлікке шығу құқығы белгіленді: ерлер – 50 жасқа толғанда және жұмыс өтілі кемінде 20 жыл болса, әйелдер – 45 жасқа толғанда және жұмыс өтілі кемінде 15 жыл болса. Ел жойқын соғыстан енді ғана айығып келе жатты, бірақ соған қарамастан жұмысшылардың құқықтары мен мүдделері анық құрметтелді”, – деді депутат.
</blockquote>
Смайлов оңтайлы зейнеткерлік жасты анықтау үшін қауіпті өндірістегі жұмыс өтіліне сәйкес&nbsp; және мамандық пен жұмыс ерекшеліктеріне байланысты бөлу әдісін ұсынды. Сонымен қатар, ол қызметкердің денсаулығына қатысты қарама-қайшылықтар болмаған кезде және компанияның маманға қызығушылығы болған жағдайда жұмысын жалғастыру құқығын сақтайтынын айтты.

Қазақстанда кей маманның зейнетке шығу жасын төмендету ұсынылды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;Қазақстанда 1 қыркүйек пен 30 қазан аралығында жалпыұлттық халық санағы өтеді. Әрбір қазақстандыққа 87 сұрақ қойылады, деп хабарлайды&nbsp;Ұлттық статистика бюросының баспасөз қызметі.
1 қыркүйектен бастап sanaq.gov.kz арнайы сайты жұмысын бастайды, мұнда қазақстандықтар 15 қазанға дейін онлайн-режимде санаққа қатысты барлық сұрақтарға жауап бере алады. Дәстүрлі жалпы аралау 1-30 қазан аралығында өтеді, ол белгіленген мерзім ішінде санақтан онлайн-режимде өтпеген респонденттер арасында жүргізіледі.
Дәстүрлі кезеңнің жаңашылдығы – интервьюерлердің үй аралау кезінде электрон планшеттерді пайдалануы болмақ. Бұл санақ жүргізетін қызметкерлердің еңбек шығынын төмендетуге, мәліметтер сапасына адам факторының ықпалын азайтуға, ЖСН-ін енгізе отырып, санақ мәліметтерінің нақтылық деңгейін арттыруға, қағаз бен кеңселік құралдарды айтарлықтай үнемдеуге, сондай-ақ, интервьюерлер үшін қолайлылық пен олардың жинақылығын арттыруға мүмкіндік береді.&nbsp;
Санақ кезінде мәліметтер жинау үшін сәйкестендіргіш ақпарат ретінде сауалнамаға қатысушының ЖСН-і қолданылады. Бұл ақпараттың қайталануын болдырмауға мүмкіндік береді.
Санақ парақтарындағы сұрақтар тізбесі айтарлықтай ұлғайтылған. Мұнда барлығы 67 сұрақ және оған қосымша 20 нақтылаушы сұрақтар кірістірілген. Сұрақтардың аясын кеңейтуге Еуропалық санақшылардың 2020 жылғы тұрғын үй қорын және тұрғындар санағын жүргізу жөніндегі ұсыныстары мен ТМД Мемлекетаралық статистикалық комитеттің әдістемелік материалдары негіз болды.&nbsp;
Сауалнама 73 сұрақ аясында жүргізілген 2009 жылдың ұлттық санағынан ерекшелігі, 2021 жылдың санағында көші-қон, еңбекпен қамту, неке жағдайы, бала туу және тіл білуі бойынша сұрақтар аясы кеңейтілген. Сондай-ақ, БҰҰ-ның мүгедектік статистикасы жөніндегі Вашингтон тобымен ұсынылған жаңа сұрақтар қосылды, мұнда мүгедектік критерийлерін ескеріп, денсаулық сақтау статистикасы аясында халықаралық ынтымақтастықты кеңейтуге ықпал ету көзделген.

Халық санағы кезінде қазақстандықтарға қанша сұрақ қойылады?

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қызылорда облысында коронавирусқа екпені 77751 адам салдырды. Ал екінші дозасын 20901 адам қабылдады. Бұл туралы Өңірлік коммуникациялар қызметінің ақпарат алаңында өткен брифингте облыстық денсаулық сақтау басқармасының басшысы Сәбит Пазилов баяндады.
<blockquote>
 «Өңірде отандық және шетелдік ғалымдардың жасаған екпелерінің қоры жеткілікті. Сондай-ақ, жылжымалы егу бригадалары халыққа қолжетімді жерлерде және шалғай ауыл-аймақтарды аралап вакцина салуда. Қазір өңірде эпидемиологиялық ахуал тұрақталып келеді. Қалыпты өмірге қайта оралу үшін сақтық шарасына мән беріп, екпе салдырайық»,- деді облыстық денсаулық сақтау басқармасының басшысы Сәбит Пазилов.
</blockquote>
Соңғы тәулікте облыста коронавирус инфекциясын 24 адам жұқтырды. Қазір аймақ бойынша инфекциялық стационарда 392 науқас, реанимациялық бөлімде 44 науқас ем қабылдауда.

Қызылордада 78 мыңға жуық адам екпе салдырды

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қазалылық Қали Рүстемов гір көтеру спортынан Өзбекстан елінің астанасы Ташкент қаласында өткен Азия чемпионатында жеңімпаз атанды. Осылайша Әйтеке би кентіндегі №266 мектеп-лицейдің мұғалімі ардагерлер арасындағы Азия чемпионатынан алтын медаль иеленді.
Жеңіспен оралған чемпионды бүгін Қазалы ауданының әкімі Мұрат Ергешбаев қабылдап, құттықтады.
Чемпионмен кездесу барысында Мұрат Нәлқожаұлы ауданның спорт саласындағы жетістігі тағы бір алтын медальмен толыққанын, бұл жеңістің күшті рух пен үздіксіз шынығу және үлкен еңбектің арқасында келгенін атап өтті.
Айта кетейік, Қали Рүстемұлы 2006 жылдан бастап Қазалы ауданы бойынша гир спортынан аға жаттықтырушы болып еңбек етеді. Бүгінгі күнге дейін қол жеткізген жетістіктері де жетерлік. Сауалауатты өмір салтын ұстанып, жанына спортты серік еткен ұстаздың өз жеңістерінен бөлек, шәкірттері де біршама биік белестерді бағындырған. Мәселен, Нұрлан Ерекенов, Сәбит Аяпов, Жандәулет Өндіреев, Аманжол Бердиев гір спортынан, Мәметек Өтепбергенов қол күресінен облыстық, республикалық жарыстарда топ жарған.
<img src="https://kyzylorda-news.kz/wp-content/uploads/2021/05/b7b55aa6-1f23-4339-8ae9-56c3e636a0db.jpg" alt="" />

Қазалы ауданының әкімі Азия чемпионы Қали Рүстемовті қабылдады

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Биыл 1 мамырдан бастап Қызылорда облысында каналдар арқылы су беруге жаңа тарифтер бекітілді. Енді Сыр шаруалары 1 текше метр су үшін қосымша құн салығынсыз 66 тиын төлейді. Су бағасының өсуін мамандар еңбек ақының өсуіне, күрделі жөндеу жұмыстары мен инвестициялық бағдарламаның толықтай орындалуына ықпал етеді дейді.
<blockquote>
 «Су беру қызметінің орташа ағымдағы құны негізгі ауыл шаруашылығы дақылдарын өндіруге жұмсалатын шығындардың 1,2 пайызын құрайды. Пайдаланылған суға 50 пайыздық субсидия төленеді. Оның үстіне биылдан бастап күріштен басқа дақылдарға қолданылған тіршілік нәрі де субсидияланады. Сондықтан бағаның өсуі шаруашылықтарға қолайсыздық тудырмайды деп есептеймін. Біз алдын ала түсіндіру жұмыстарын жүргіздік», – деді «ҚАЗСУШАР» РМК Қызылорда облыстық филиалы директорының орынбасары Жорабек Ерназаров.
</blockquote>

Қазақстан және Қызылорда облысының жаңалықтары