<a href="https://kyzylorda-news.kz/">Kyzylorda-news.kz.</a> Аймағымыздағы 30 техникалық және кәсіптік білім беру ұйымдары бойынша 20 маусымнан бастап оқуға құжаттарды қабылдауда. Бүгінгі күнге дейін яғни, 7 күн ішінде 400-ге жуық талапкердің құжаттары қабылданды. Қабылдау жұмыстары 25 тамызға дейін жалғасады.<blockquote>«Аймақтың еңбек нарығының сұранысына сәйкес 4 668 орынға мемлекеттік білім беру тапсырысы (жергілікті бюджет - 3108, республикалық бюджет – 1560) бөлінді, - деді облыстық білім басқармасының бөлім басшысы Бекжан Есенбаев.</blockquote>Талапкерлерге ыңғайлы болу үшін құжаттарды қабылдау үрдісі автоматтандырылды. Құжаттар Egov.kz электронды үкімет порталы және тікелей колледжге барып электронды платформа арқылы қабылданады. Сондай-ақ қабылдау колледждерде дәстүрлі қағаз форматында да жүзеге асырылады.Сонымен қатар талапкерлер кәсіби диагностикадан өтеді. Сондай-ақ, ҚР Оқу-ағарту министрлігінің №578 бұйрығымен бекітілген қағидаға сәйкес, талапкерлер оқуға өтініш білдірген уақытта бірден 4 мамандықты таңдап, еліміздің 4 колледжіне құжат тапсыра алады.Мемлекеттік тапсырыс бойынша 9-сынып талапкерлері арасындағы конкурс 25 маусым және 18 тамыз аралығында өтеді. Ал, 11-сынып және колледж түлектері арасындағы байқау 25 маусым мен 20 тамыз аралығында өтеді. Өнер және мәдениет мамандықтарына түсетіндер үшін байқау 29 шілде мен 2 тамыз аралығында өткізіледі.Былтырдан бастап квота санаттарының тізімі кеңейтілді. Квота 9 санатқа беріледі. Конкурс кезінде талапкерлердің білім туралы құжатының орташа балы, сондай-ақ ҚР Үкіметінің №264 қаулысына сәйкес квота санаты ескеріледі. Ұпайлар тең болған жағдайда квота санаты мен сертификаттың орташа балы есепке алынады», - деп атап өтті Бекжан Шакизатұлы.

Талапкер-2023: Қызылордада колледждерге құжат қабылдау жүргізілуде

<a href="https://kyzylorda-news.kz/">Kyzylorda-news.kz.</a> Ауылға көңiл бөлу, оның жағдайын жақсарту – мемлекеттiк мәнi зор iс. Кез келген экономикалық реформаның түпкi мақсаты – халықтың әл-ауқатын арттыру. Қазақ мемлекетінің қалыптасуы және дамуы негізінен ауыл өмірімен тікелей байланысты. Ауыл болуы үшін оның тірлігін пайымдайтын әртүрлі жағдайлар қажет.Бұрынғы замандарда көшпелі қазақ халқының тіршілігі көбінесе мал өсіру мен оны пайдалану мүмкіншілігіне байланысты болды. Қазіргі нарықтық экономика қоғамында ауыл болашағы әлемдік өзгерістерге сәйкес көптеген факторлардың, яғни табиғи-климат жағдайы, демографиялық, саяси-әлеуметтік, өндірістік-экономикалық, халықтың тұрмыс деңгейі және тағы басқалардың әсерімен анықталады.Соңғы 5 жылда экономиканың негiзгi көрсеткiшi бойынша оң динамика байқалады. Ауылда өмiр сүру деңгейiн одан әрi арттыру үшiн министрлiк «Ауыл – Ел бесiгi» жобасын қабылдап, бүгінде аталған жоба аясында ауылдың тұрмыс-тіршілігінің жақсаруына сеп болуда. Жобаның мақсаты – инфрақұрылымды жаңғырту есебiнен және оны жаңа өңiрлiк стандарттар параметрiне дейiн жеткiзе отырып, ауыл тұрғындарының өмiр сүру сапасын жақсарту. Жоба негізінде әлеуметтiк және инженерлiк инфрақұрылымдарды дамыту, ауыл тұрғындарының әлеуметтiк игiлiктерге қолжетiмдiлiгiн қамтамасыз ету бойынша мiндеттердi iске асыру есебiнен, сондай-ақ қолайлы өмiр сүру ортасын қалыптастыру арқылы жүзеге асырылуда.&nbsp;Биылғы жыл Ақтөбе &nbsp;ауылдық округі бойынша &nbsp;4 жобаға жүзеге асырылмақ. Оған 92 692,5 мың теңге қаржы бөлінді. Осы орайда Ақтөбе ауылында «Ауыл – Ел бесігі» жобасы аясында 55 219 мың теңге бөлінген. Тиісті қаржыға ауылдың Т.Салқынбайұлы көшесін орташа жөндеу жұмыстарына 55 219 мың теңге; (облыстық бюджеттен – 49697мың теңге, аудандық бюджеттен – 5522 мың теңге) қарастырылған. Облыстық бюджеттен 18 376 мың теңге бөлінді. Бұл ауылда жүзеге асырылатын бірінші жоба делік. Екінші кезекте, Ақтөбе ауылындағы Балжарма каналы маңындағы Мүсірбаев көшесінен №3-ТВ техникалық су ұңғымасын бұрғылау жұмыстары жүргізілмек. Оған 18 376 мың теңге қаржы қаралды. Ал аудандық бюджеттен &nbsp;19 097,5 &nbsp;мың теңге бөлінді. Оған елді мекеннің кіре беріс жолдың құрылысы жұмыстарына жоба-сметалық құжаттама әзірлеу, сараптаманың қорытындысын алу жұмыстарына 8 000 мың теңге қаралған. Бұл ауылда жүзеге асырылатын жобаның үшіншісі. Ал соңғы орында Б.Қасқырбаев, Мүсірбаев, Сейтенов көшелеріне орташа жөндеу жұмыстарына жоба-сметалық құжаттама әзірлеуге, ведомстволық сараптамадан өткізу жұмыстары тұр. Оған 11 097,5 мың теңге қарастылуда. &nbsp;Экономиканың дамуына себепші болатын бірінші кезекте ауылшаруашылық саласы. Бұл сала дамымай, бәсекеге қабілетті экономиканы құру мүмкін емес. Дамуға бағыт алған елімізде әсіресе өндірісті өркендету, оның ішінде ауылшаруашылығын жолға қою керегі жиі айтылып жүр. Жүзеге асырылып жатқан нақты іс-шаралар да бар.. Ал ақтөбеліктер қол қусырып отырған жоқ. Жылда ырысын жерден алып, қамбаға астық толтырып жүр.&nbsp;Қазақтың діні де, тілі де, ділі де – ауылда. Бүгінгідей қоғамның рухани жаңғыруы кезеңінде ауыл жаңа келбетке, ал оның рухани өмірі уақыт шындығы мен талаптарына сай келетін жаңа мазмұнға ие болуы тиіс. Ал бұл міндеттерге сәйкес біз ауылды дамытуды мемлекеттің басым бағыты ретінде қарап, мемлекетті дамыту үшін ауылды көркейтуіміз керек-ақ. Ал мұндайда жоғарыдағай жобалардың жүзеге асыру қажет болады.

Ақтөбе ауылында биыл 4 жоба жүзеге асырылмақ

<a href="https://kyzylorda-news.kz/">Kyzylorda-news.kz.</a> Айтыс өнері – ғасырлармен қанаттасып, дәуірлермен үндесіп, заманамен тілдесіп келе жатқан кемел дүние. Ауыз әдебиетінің жарқын мұрасы. Түркі жұртының, оның ішінде қазақ пен қырғыздың төл өнері болып табылатын сөз сайысының, әсіресе, ұлтымыздың біртұтастығы мен саяси өміріне де зор ықпал еткені анық.Осы орайда Қызылорда қаласында ұйымдастырылған «Тұғыры биік Тәуелсіздік» атты республикалық айтыстың бас жүлде иегері, жас айтыскер Нұрзат Қарумен әңгімелескен едік.– Қазалының Өркендеу ауылында туып өстіңіз. Ақындыққа, айтыскерлікке келуіңізге не түрткі болды?– Бұл менің ғана емес, туған жердің ортақ жеңісі деп білемін. «Сыр елі жыр елі» деп бекер айтпаған ғой. Қасиет пен кие қонған мекенде дүниеге келіп, өнерді сезініп өстік. Оның үстіне өзімнің туған анам Ғалия Орынбасар ақын, нағашыларымның ішінде сазгерлер бар. Анамның ақындығы мен өскен ортам қалам ұстауыма әсер етті. Яғни, ақындық қаннан да, қасиетті топырақтан да дарыса керек. Бірақ мұны кәсіби түрде дамытпай жүріппін.Ал айтыскер боп үлкен сахнаға шығуыма себепкер — қарашаңырақ ҚазҰУ-дағы ұстазым Күләш Ахметова. Университет қабырғасында жүргенде бір сабақтың кезінде ұстазыммен сөз қағыстырып, артынан :"сен ақынсың ғой, айтысқа да шамаң келеді",– деп сенім білдірді. Содан бастап айтысқа қатыса бастадым.– Үлкен сахнада ең алғаш кіммен айтыстыңыз?– Өнер адамы үшін халықтың көңілі мен сахнадан үлкен табалдырық жоқ. Айтысты студент кезімнен бастағанымды айтып өттім. ҚазҰҚПУ-да Балғынбек Имашпен бәйгеге түстім. Ал үлкен сахнада ең алғаш Талғат Мықимен Семей қаласында айтыстым. Далада ашық алаңда он мыңдай халық көрермен болды. Әр айтыс өзінше ерекше әсер сыйлайды. Дегенмен, алғашқының орны бөлек. Қай салада болмасын өзін өзгемен емес, кешегі өзімен салыстыратын адам жеңіске жетеді.Сондықтан әр айтыс сайын өзімді салыстырып, дайындығымды көбейтуге тырысамын.– Көтеріліп жатқан мәселелер көп. Бір айтыстың өзінде Қазақстанмен танысып шығуға болады. Айтыста айтқан бір ауыз сөзіңіз өзгеріске әкелген кезін айтып өтсеңіз…– Қай кезде де ақындар халықтың сөзін сөйлеп, елдің жағдайын көтеріп жүр. Бекарыс Шойбеков ағамыз Елбасының алдына барып та қарапайым халықтың жағдайын сөз етті. Әр айтыстан кейін біраз өзгерістер де орын алады. Мысалы, ақындардың мәселені көтеруі арқасында басында баспанасы жоқ, жері жоқ адамдарға аз да болса жағдай жасалды, күнделікті халық қарайтын теледидардағы кәріс, үнді сериалдары тоқтатылып, орнына қазақша контент ұсыныла бастады. Одан да басқа біраз нәрсеге ақындар мұрындық болған. Кеше соңғы айтыста Арал, Қазалы өңіріндегі қуаңшылық мәселесін Қызылорда облысы әкімдігіне жеткіздім. Қазақтың жаны малмен бірге ғой. Айтыс соңынан марапаттау кезінде әкім сол күні Арал жақтан келгенін, елдің жағдайы қиындап жатқанын, жағдайды оңалтудың жолдары қаралып жатқанын айтты. Яғни, облыс әкімінің бұл мәселеге бей-жай қарамай, өз көзімен көріп, дұрыс шешім қабылдайтынына сенімдімін.– ИК, Ninety one сияқты топтарды тыңдайсыз ба?– Ирина Кайратовна, Ninety one топтарын тыңдамаймын. Талғамына қарай әр адам түрлі музыканы тыңдайды ғой. Өзім дәстүрлі әндерді жақсы көремін. Қазақтың баласына дәстүрлі әнді насихаттап, тәрбиені бесіктен бастап беру керек деп ойлаймын. Бұл топтарды тыңдайтын жастар көп. Әрине, оларды тыңдамау керек демеймін. Өнерге еркіндік керек. Олар өз жанрымен Қазақстанды шетелге танытып, өз ойларын қоғамға тыңдатып жүр. Тыңдарманы бар жастарды қолдау керек.– Айтыскердің сөзі билікке,қоғамға қаншалықты өтімді?– Билікке де, қоғамға да айтыс өтімді. Себебі, жоғарыдағылар айтыста айтылған сөздерден кейін нәтиже шығаруға тырысып, әрекет жасайды. Түрлі жобалар да айтыста көтерілген мәселеден кейін талқыланып, жүзеге асып жүр.Көбінесе нақты билікке айтылғандардың біраз сөзі эфирлерде қиылып берілуі немесе сол бөлігі шықпауы мүмкін. Сондықтан қазір ютуб желісіне салынып жүр. Әрі халық өзі қалаған уақытында, өзі қолдайтын ақындарының шығарылымын қарай алады. Әлеуметтік желілердің жаңалығы десек болатын шығар бұрынғыдай қиып тастау, шығармай қою деген нәрсе атымен жоқ.– Қазақстандағы діни фанатизм, тұлғалардың культқа айналуына кім кінәлі?– Діни фанатизм деген – үлкен мәселе. Фанатизм деген жанкештілік, сауатсыздық қой. Дін үшін өмірін қиып жатқандар қаншама. Елбасы Н.Ә.Назарбаев «Қазақстан – 2050» стратегиясында діни фанатизмді тоқтату керектігін атап өткен болатын. Енді ғана барымыз бен жоғымызды түгендеп жатқандықтан біздің елімізде діни ағымдардың насихатталу оқиғасы орын алып жүр. Мынау дұрыс, мынау бұрыс деп тағы айта алмаймыз. Соңғы онжылдықта үлкен мәселе болған ұлы жиһадты тоқтатуға биліктегілер барынша жұмыс істеп, ақпараттық тұрғыдан, әрекет тұрғысынан атсалысуда. Діни фанатизмге нақты біреуді немесе бір нәрсені кінәлі деу қате шығар. Себеп көп, шешім аз.– Әңгімеңізге рақмет!

Сахнадан үлкен табалдырық жоқ

<a href="https://kyzylorda-news.kz/">Kyzylorda-news.kz.</a> Белгілі журналист, «Түркітілдес журналистер қорының» президенті, қазалылық Нәзия Жоямергенқызымен қазіргі қазақ журналистикасының жағдайы, келешегі мен кедергілері туралы аз-кем әңгіме өрбіткен едік.– Нәзия Жоямергенқызы, Түркітілдес журналистер қоры туралы тарқатып айтып өтсеңіз…– Түркітілдес журналистер қоры 2014 жылдың 11 қарашасында, осыдан жеті жыл бұрын құрылды. Біздің басты мақсат – Қазақстандағы журналистердің, жалпы түркі әлемі, сонымен қатар бүкіләлемдегі БАҚ-пен байланыс орнатуына ықпал жасап, олардың кәсіби шеберлігін шыңдау. Осы мақсатта жеті жылдан бері жұмыс істеп келеміз. Біздің ондаған жобамыз бар. Ел ішінде, Өзбекстан, Әзербайжан, Түркияның бірнеше қаласында семинар-тренинг, пресс-тур, экскурсиялар өткізіп келеміз. Стамбулда түркітілдес журналистердің бірінші медиа-форумын өткіздік. Екіншісі Алматы қаласында осы жылы өтеді деп күтілуде.Карантин уақытында вебинарларды бастадық. Оған себеп барлық жерде сыртқы жақпен байланыс үзіліп қалды. Сондықтан да Шеврон компаниясының серіктестігімен «Әлеуметтік журналистика, БАҚ-тағы әлеуметтік мәселелер» деген тақырыпта бес айлық вебинарлар сериясын бастадық. Оны 200-ге жуық журналист бітіріп, сертификат алып шықты. Осы салада жүрген, бірақ журфакта оқымаған әріптестеріміз үшін бір айлық «Журналистика негіздері» атты курс өтті. Бұл курс сұранысқа жақсы ие болғандықтан осы жылы жалғасын табады.Одан бөлек қазақ журналистерінің әлемдік деңгейде ақпарат таратуына ықпал ету үшін ағылшын тілі курсы «Engilish for Media»-ны ұйымдастырып жүрміз. Бес айлық оқыту нәтижесінде біздің әріптестер қазір британдық серіктесіміз «Avropatimes.com» деген сайтқа мақалаларын жариялай бастады.Ең бастысы, кәсіби шеберлік, жалған ақпаратпен күрес, БАҚ өкілдерінің байланысы, нетворкинг мәселесіне жете көңіл бөлеміз. 2020 жылға Еуропалық сапар ойластырып қойған едік. Оның бәрі карантинге байланысты кейінге шегерілді.Түркілтілдес журналистер қорының жанынан медиа-тренерлер мектебі ашылған. Бұл жақта Қазақстандағы, сырт мемлекеттердегі білікті, тәжірибелі мамандар сабақ береді. Мысалы, былтыр біз Қазақстанмен қатар Британия, Бельгия, Германия, Швейцария, Нидерланды, Италия елдерінен тренерлер шақырып, аудармашы арқылы қазақ журналистеріне ана тілінде әртүрлі тақырыпта вебинарлар өткіздік. Әріптестер тәжірбие алмасты.Қазіргі таңда қордың жанынан жас журналистер мектебі ашылған. Ол мектепте журналистикаға қызығушылығы бар оқушыларды бір ай оқытып, содан соң портфолио дайындауға көмектесіп, ¬журналистика факультетіне түсетіндерге мінездеме, анықтама береміз. Түрлі сайттарға мақалаларын жариялауға ықпал жасаймыз. Буындар сабақтастығы үзіліп қалған біздің журналистиканың аға, орта, жас буындарына осындай мүмкіндіктер беруге тырысамыз.Қор жанында әйел журналистер клубы бар. Қазір журналистикада бүкіләлемде әйелдердің үлес салмағы басым.– Кәсіби журналистердің нанын блогерлер жеп жүрген сияқты. Сіздің ойыңызша бұған кім кінәлі?– Әрине журналистер кінәлі. Себебі, егерде біз заманның ағымына, жаңа үдерісіне ілесіп отырар болсақ, онда ешкімге есе жібермес едік. Блогерлер несімен ұтады? Олардың айтатын әңгімелері журналистердің қаузайтын тақырыптары сияқты салмақты, салиқалы ақпарат емес. Бірақ олар әлеуметтік желіде белсенді. Трендтен қалмайды. Сол арқылы ақша табуға бейімделген. Журналистердің де қолынан келеді бұл іс. Бірақ оған әріптестеріміз мән бермейді. ¬Мәселен, бір жерге барып мақала жазып келсеңіз, болмаса белгілі тұлғадан сұқбат алып, өзекті тақырып аясында сараптамалық мақала жазсаңыз, соны қысқаша мәтінмен әлеуметтік желіге салып отыратын болсаңыз сіздің жазылушыларыңыз көп болар еді. Аудитория, контент қалыптастырар едіңіз. Бос ниша тауып алып, содан ақша табар едіңіз. Бүгін біздің түркітілдес журналистер қоры ұйымдастырған семинар-тренингте «Әлеуметтік медиа» туралы презентация жасағанымыз бостан бос емес. Журналистер де осы заманауи ақпараттық технологияның мүмкіндіктерін пайдалануы керек.– Сіз үшін қазақстандық топ 5 журналист…– Айта алмаймын. Өйткені олардың саны мен үшін бестен көп. Және ешкімді бөле-жарғым келмейді. Тағы бір себеп – әлемдік деңгейде жұмыс істеп жүрген ел ішіндегі журналистерді білмеймін. Менің талаптарым өте жоғары. Мықты әріптестеріміз жоқ емес, бар. Бірақ олардың біреуі мемлекетке қызмет етеді де, тек қана позитивті жазады. Ол мықты журналист. Тағы бір мықты әріптесіміз оппозицияға қызмет етеді де, тек қана негативті бағытта жұмыс істейді. Ал менің ұғымымдағы журналист кәсіби тұрғыда өте шебер және бейтарап болуы тиіс. Билікке де, партияға да қызмет етпегені жөн. Белгілі бір лоббистік топтардың мүддесін қорғамай, азаматтық позициясын бейтарап ұстағаны жөн.– Белгілі журналист Қасым Аманжол фейсбукте «Кей замандас егер билікшіл медиадағы журналист тәуелсіз БАҚ-қа ауысса, пікірі еркін болар еді немесе қазір азатпын деген журналист мемБАҚ-та болса әуселесін көрер ем деп жатады» деген жазба қалдырды. Бұл тұрғыда сіздің ойыңыз…– Бұл бұрыннан айтылып жүрген әңгіме. Иә, қазір журналистерді заңдық шеңберде қос өкпеден қысып тастаған. БАҚ туралы заңға өзгерістер мен түзетулер енгізу арқылы журналистердің еркін жұмыс істеуіне мүмкіндік бермей отыр. Қазіргі талқыланып жатқан аккредитациялау туралы ережелердің өзін өзгертуі БАҚ өкілдеріне кедергі тудырады. Журналистикада мықты жанрлар жоғалып кетті. Журналистік зерттеу, репортаж, тәуелсіз ойды айтатын сұхбаттардың өзі өкінішке орай қазір жоқтың қасы. Белгілі бір журналист азаматтық ұстанымын білдіріп, тәуелсіз болуға ұмтылатын болса, психологиялық тұрғыдан қысымға ұшырайды. Кейде тіпті айыппұл төлетіп, заңмен қорқытулар орын алып жатады.– Елде тәуелсіз медиа бар ма? Атап көрсете аласыз ба?– Тәуелсіз медиа ешбір елде жоқ. Біз керемет санайтын BBC-дің өзі Англияның патшайымына тікелей бағынады. Мен бір ай Американың бірнеше штатында жұмыс істеп келдім. Ол жақтан да байқағаным осы. Тәуелсіз медиа деген абстрактылы ұғым. Қандай медиа болмасын белгілі бір мүддеге бағынады. Бірақ заңдық тұрғыда жұмыс істеу әлбетте басқа әңгіме.– Уолл-стрит журналы Пулитцер сыйлығын 30 рет, ал Нью Йорк Таймс 117 рет алған. Қазақ басылымдарының осы бағалы сыйлықты алуға мүмкіндігі бар ма?– Қазақ журналистикасының кәсіби деңгейі төмен. Оны жоғарылату үшін жалпы қоғамдағы журналистерге және осы салаға деген көзқарасты өзгерту керек. Елде бұрын белгілі бір деңгейде журналистиканың ықпалы болатын. Қазір олай деп айта алмаймыз. Журналистер қоғамды жедел, нақты ақпаратпен қамтамасыз етуші ғана емес қоғамдық пікірді қалыптастырушы топ. Ал оны қалыптастыру үшін әрбір редакцияның, журналистің өзіндік көзқарасы болуы керек. Және олар қаржылық тұрғыда тәуелсіз болғаны жақсы. Ой еркіндігі сақталғаны дұрыс. Плюрреализм, пікірлер алуандығы болғаны абзал. Бұл қоғамдағы бізге жетіспейтін басты мәселеміздің бірі.– Қазақ журналистикасының алтын дәуірі өтіп кетті ме?– Қазақ журналистикасының алтын дәуірі болмаған. Олай дейтінім, Кеңес Одағы құлағаннан кейін бізде бұл сала құлдырап, дағдарысқа ұшырадық. Осы тұста қазақ журналистикасын жасаушылардың өздері білімді қалай жетілдіру керектігін білмеді. Тәуелсіздіктің алғашқы жылдары мен журналистиканы бастадым. Ол кезде қазіргідей курс, семинар-тренингтер, вебинарлар болмады. Әріптестеріміз кіммен қалай жұмыс істеу керектігін білмеді. Тіл білу жағы нашар болды. Әлемнің қақпағы ашық болғанымен, біз неден ¬бастау керектігін білмедік.Айта кету керек, тәуелсіздіктің алғашқы жылдары сөз бостандығы болған еді. Одан кейін билік өзіне қажетті медианы заңмен өзгертіп алды.– Шындық қашанда сүйкімді. Жалған ақпаратты ажырату жұрт үшін неге маңызды?– Шындық керісінше, көпшілік үшін сүйкімсіз. Ақиқаттың астарында біреулерге жақпайтын ақпарат, қылмыс, жемқорлық жатуы мүмкін. Ал шындықтың ашылуына мүдделі емес топтар көп. Шын ақпарат қашанда біреудің басын жарып, көзін шығарады. Фактчекинг мәселесі қазір біздің қоғамда жиі айтылып жүр. Бірақ оны ескеретін журналис аз. Жалған ақпараттың пайдасынан гөрі зияны көп. Адам өміріне қауіп төндіріп, ұлттық тұтастыққа кері әсер етуі мүмкін. Біреудің репутациясын бүлдіріп, ар-намысына тию арқылы оны өлімге итермелеуі мүмкін. Жала жабу қашанда жақсылыққа апарған емес. Кез келген журналист ақпаратты беретін кезде бірнеше дерекөзден тексеріп, көз жеткізіп барып таратуы керек. Сіздің білместікпен жасаған қателігіңіз заңдық тұрғыда жауапкершіліктен босатпайды. Азаматтық кодекс, қылмыстық кодекс бойынша жауапқа тартылады.– Қазақ журналистикасының келешегі қандай?– Келешек жарқын. Мен жастарға сенемін. Заманауи ақпараттық технологияларды мықты меңгерген, бірнеше шет тілін білетін, сырт жақта оқып келіп жатқан қоғамдағы әрбір салаға өзгеріс енгізуге құлшынатын, ел болашағын дамытуға мүдделі жастар көп. Ал мұндай жастар бар кезде кез келген сала дамиды.– Әңгімеңіз үшін рақмет!

Нәзия Жоямергенқызы: Шындық – көпшілік үшін сүйкімсіз

<a href="https://kyzylorda-news.kz/">Kyzylorda-news.kz.</a> Қазалы ауданында кәсіпкерлік саласы жылдан жылға қарқынды дамып келеді. Ал соңғы кездері уақыт талабына сай жеке ісін қолға алушылар қатары тіптен көбеюде. Оларға мемлекет тарапынан қабылданған бағдарламалардың да көмегі зор. Әсіресе көпбалалы отбасыларды тығырықтан шығарған қайтарымсыз гранттың пайдасы ұшан-теңіз.<blockquote>«Бала кезден ата-анам мал ұстап, біз соларға көмектесетінбіз. Келін болып түскен кезде де маған қиынға соқпады. Сиыр сауып, айран пісіп, құрт кептіруді қиналмай жүріп атқарып тастаймын. Құдай қосқан қосағым Тойымбетпен бірге 3 қызым мен 3 ұлым да үй тірлігі мен мал баптауда қол ұштарын созады. Осыдан екі жыл бұрын қайтарымсыз грантқа қол жеткізіп, екі бұзаулы сиыр алған болатынмын. Солардан қол үзбей сүтін сауып отырмын. Қосымша қаражаттың басын құрап, тағы бір сиыр алдым. Мал асырағанның бір жақсысы үйіңнен табиғи ағарған сусының арылмайды. Сүтін арасында саудалағандарға сатып, нан-пұлға жаратамын. Айран да ұйытып, күбіммен пісіп, май да аламын. Кейбір кезде құрт жасап, балаларымды құнарлы өніммен қуантып қоямын. Бұған қоса, қорада майда жандық пен тауық асыраймыз. Былайша, базардан ет пен жұмыртқа ала қоймаймын. Себебі, бәрі өзіміздің қорадан өндіріліп тұр. Қазір қарап отырсаң базардағы барлық азық түрлі қоспалармен әзірленгендіктен көпке дейін бұзылмайды, әрі бағасы да шарықтап тұр. Сондықтан өз аулаңда бағып-баптаған табиғи өнімдерге ешнәрсе жетпейді ғой. Ал әрекет етсең, бәрін де еңсеруге болады. Ынталанған адамға Құдай берекетін де береді деп есептеймін», - дейді күміс алқа иесі Әсел Здан.&nbsp;</blockquote><blockquote>«Қазір еңбектенген жанға барлық мүмкіндік бар. Асықпай ойланып табыс табу жолдарын қарастырғанға түрлі жоспар көп. Отбасында ақша табуды жалғыз ер адамға артып қоймай, әйел де қолдан келген көмекті жасаған дұрыс деп есептеймін. Бүгінде жолдасым Руслан екеуміз 5 баланы тәрбиелеудеміз. Олардың жағдайын жасау мақсатында үйде отырып, тапсырыспен той-томалаққа, қонақ күтуге дастархан мәзірлерін дайындауды қолға алғанмын. Уақыт өте тұтынушылар қатары көбейіп, қасыма әуелі екі қыз кейін төрт қыз тартып тойханалардың да тапсырысын орындап отырдым. Жақсы табыс таптым. Дегенмен елді індет шарпыған карантин кезінде жұмысым тоқтап қалды. Күйеуіммен ойласып, кәсіптің жаңа түрін ашуды көздедім. Соның арқасында жұмыспен қамту орталығы арқылы қайтарымсыз грантқа қол жеткіздім. Нәтижелі жұмыспен қамту бағдарламасы ұсынған қаражатқа мұздатқыш пен қажетті аппарат алдым. Бұл дүниелерді әлі де толықтырып, көбейтудемін. Осы күні «Полуфабрикат» атаулы жеке кәсіпкерлігім бар. Таныс еңбекқор қыздарды шақырып, бірге қолдан түйілген табиғи таза өнімді әзірлеудеміз. Санитарлық жағдайға сай жұмыс істейміз. Еттің жұмсақ жерінен алып, оны жақсылап жуып-тазалап, еттартқыш арқылы фарш дайындаймыз. Өнімнің сапалы әрі дәмді болуын өзім қадағалаймын. Кәсіби рецепт бойынша жасау мақсатында арнайы курсқа қатысып, үйрендім. Осылайша өзімнің брендтік қаптамаммен қатталған манты, тұшпара, вареники, тефтели мен самсаны аудан халқына ұсынудамын. Сыртқы бетіне «Қазалы» атауы жазылған қаптаманы Алматыда келісімшартпен жасаттым. Алғашқылардан болып тың дүние шығарған соң аудан халқы уақыт өте өнімімді алып үйренісе бастады. Бүгінде айналымға шығып, тұрақты тұтынушы жинаудамын. Шүкір жаман емес. Тапсырыс көлемін ұлғайттым. Халық теріс баға беріп жатқан жоқ. &nbsp;Қазір «Мечта», «Рамазан», «Назерке», «Халықтық» және «Айдар», «Тыным» дүкендеріне өткізіп тұрмын. Алға қойған жоспар көп, негізгісі – Байқоңыр мен Арал халқына да өнімімді жеткізу», - дейді кәсіпкер Меруерт Қожабергенова.</blockquote><blockquote>«Мемлекет тарапынан ұсынылған жобаларға дән ризамын. Жалғыз мен емес, қаншама қазалылықтың кәсіп ашып, ақ адал табыс табуына септігі тиюде. Отбасымда отағасы бақытжан екеуміз үш ұл мен бір қызды тәрбиелеудеміз. Солардың жарқын болашағы үшін қолдан келген кәсіпті жүргізуге әркез әзірмін. Бастысы, көптен армандап жүрген тігін құралдарын алуға көмегін берген тиісті мамандарға алғысым шексіз. Нәтижелі жұмыспен қамту бағдарламасының игілігін отбасыммен бірге көріп отырмын. Мемлекеттік гранттың арқасында «JACKF5» аппаратына және арнайы маникендер мен кестелеу тігін машинасына қол жеткіздім. Сонымен бірге «Janome» оверлок орындайтын жабдықты иемдендім», - дейді көпбалалы ана Балжан ПОЛАТ.&nbsp;</blockquote>Шыны керек, қуанышымда шек жоқ. Себебі бұлардың ісмерлік өнерде атқаратын қызметі көп. Тоқпен автомат түрінде жұмыс істейтін болған соң тапсырыстарды қиналмай тез дайындауға мүмкіндік мол. Біраз жұмысымды жеңілдетіп, уақытымды үнемдетеді. Тігіншілік ісім де алға басып келеді. Тұрақты тұтынушылар саны да көбеюде. Қандай тапсырыс болмасын орындаймын. Негізінен қазір көрпе де көктеп, құрақ құраймын. Ерлерге арналған пиджак пен түрлі дизайнға қарай әйелдерге де киімдер тігемін. Жалпы қиындығына қарай киім пішіп, келушілер сұранысына орай кез келген тапсырысты әзірлеп беремін. Түрлі жазу мен суретті кестелеп, автоматты түрде әсемдеймін. Қызметіме аса көп баға қоймаймын. Халықтың қаржысы көтеретін тиімді ақыны ұсынып отырмын. Көрші-қолаң, жақын-туыс орындаған қызметіме ризашылығын айтып жүреді. Кейбірі маталарын әкеліп, өз талғамына сай көйлек тіккізеді. Мемлекет тарапынан берілген мұндай қолдауға дән ризамын. Пенде болған соң алға қойған мақсаттарым да бар. Оны алдағы уақытта жүзеге асыруға қамданудамын.

Кәсіпті көркейткен көпбалалылар

Қазақстанның үздік тауары – 2023: «Жаңажол» серіктестігі үздік деп танылды

<a href="https://kyzylorda-news.kz/">Kyzylorda-news.kz.</a> Сынапша сырғыған уақыт – зымыранның көшіне ілесе отырып, егеменді еліміздің беделін биіктететін, абыройын асқақтататын болашақ тұлға тәрбиелеу – заман талабы. Үйірменің үйретері көп, қосымша білім берудің берері мол. Иә, білім алушылардың ептілігін ескеру, талантын тану арқылы бағыт-бағдар беру жетістікке жетелейді. Бос уақытын тиімді пайдаланып, үйірмеге қатысып, ұстазын ұғынған оқушы келешектегі мерейлі маманға айналары сөзсіз.Заман талабынан қалыс қалмауды алға қойған Т.Көмекбаев атындағы №250 мектеп-лицейі оқуда озат оқушыларды даралап қана қоймай, өрендердің өнерін өрістетіп, &nbsp;шәкірттердің шығармашылығын шыңдауды мақсат-мүддесіне айналдырып келеді. Білім ошағының жанынан қосымша білім беру бағытында 12 үйірме құрылып, оған 600 оқушы қамтылды. &nbsp;Спортты сүйіп, шыныққан шәкірттеріміздің игілігіне &nbsp;баскетбол үйірмесі және үстел теннисі, бокс, футбол, гандбол үйірмелері жұмыс жасайды. «Өсімдіктер әлемі» үйірмесінің оқушылары мектеп жылыжайы мен гидропоника кабинетінде зерттеу жүргізіп,өсімдік өсіндісінің сырына үңіліп, тұмса табиғаттың тұңғиықтағы құпиясын білуге дағдыланады.Биылғы оқу жылында мектеп базасының бір блогынан арнайы «Өрнек» өнер орталығы өз жұмысын бастады. Өнер орталығы оқушылардың шығармашылықпен еркін жұмыс жасауына ыңғайланып жабдықталынды. Бұл орталықта «Креатив» қолөнер үйірмесі қыздарды қиынды қағаздан кескіндеме келістіруге, тоқыма тоқып, сурет салуға бейімдесе, «Әдемі-ай» қуыршақ театр үйірмесінің мүшелері жүйелі жиындарда, ауқымды шараларда бой көрсетіп, жас та болса көрермен көзайымына айналып та үлгерді.&nbsp;Қолөнер үйірмесінің оқушылары «Жасыл мектеп» жобасы аясында қалдық заттарға екінші өмір сыйлауды алдарына мақсат етіп алып, кез келген қажетсіз болып қалған заттардан көрсе көз тоятындай керемет туындылар жасады. Қалдық заттардан жасалған әрбір жұмыс өзінше ерекшеленіп, орталыққа келген қонақтар мен ата-аналарды таңғалдырды.Ал «Әдемі-ай» қуыршақтар театрының әрбір қойылымдарына арнайы костюмдер тігіліп, мектеп театрының костюмдер қатары көбейді. Театрға қатысушы оқушылар өздерін жаңа қырынан танып, берілген рольдерін үлкен жауапкершілікпен орындап шыға білді.

Көмекбаев ауылында 600 оқушы үйірмеге қатысуда

<a href="https://kyzylorda-news.kz/">Kyzylorda-news.kz.</a> Осы жылдың сәуір айынан бастап Қызылорда қаласында «Қоғамдық тамақтандыру орындарындағы ас мәзірлерінің мемлекеттік тілдегі лингвистикалық базасын қалыптастыру» жобасы іске асырылуда.Жобаны іске асыру барысында Қызылорда қаласындағы қоғамдық тамақтану орындарында ас мәзірін мемлекеттік тілде ұсынудың қазіргі ахуалын зерттеу, ондағы жағымды және жағымсыз факторларға талдау жасау, қазіргі ас мәзіріндегі атаулардың тілдік негіздерін анықтау бойынша жұмыстар жүргізіледі.Жоба аясында Қорқыт Ата атындағы Қызылорда университетінің ғалымдары Әбілов Алдажар Әбдірасуллеұлы, Боранбай Болат Елтайұлы, Абасилов Аман Маделханұлы, аудармашы Бекіш Ербол Тнейбекұлы &nbsp;қала аумағында орналасқан қоғамдық тамақтану орындарында болып, &nbsp;дайындалып жүрген тамақтар тарихымен танысып, &nbsp;мәзірлерге аударма жұмыстарын жасауда.Маусым айында ғалым Әбілов Алдажар Әбдірасуллеұлы &nbsp;іс-сапармен Астана қаласында болып, Ұлттық академиялық кітапханасында зерттеулер жүргізді.&nbsp;Сонымен қатар Қорқыт ата атындағы Қызылорда университетінің ғылыми кітапханасына, &nbsp;ғалымдардың &nbsp;үй жағдайындағы кітапханаларынан және ғаламтордан жинақталған материалдар сарапталуда.Жинаған мәліметтерді сараптау нәтижесінде ет, сүт және теңіз өнімдерінен, балықтан, ұннан, дәнді-дақылдардан, көкөністерден, жеміс-жидектерден жасалатын тағам атаулары, сусын, шай түрлері, &nbsp;таңғы ас атаулары, тәттілер, пасталар, салаттар, орамдар, ас қоспалары, суши, дәмдеуіштер бойынша барлығы 18 анықтамалық жасап шығу көзделген.

Қызылордада қоғамдық орындардағы ас мәзірі қазақ тілінде жазылмақ

<a href="https://kyzylorda-news.kz/">Kyzylorda-news.kz.</a> Қызылорда облыстық Қазақстан халқы ассамблеясы жанындағы Журналистер мен сарапшылар клубының ұйымдастыруымен алғашқы рет «Караоке BAQ» мерекелік сайысы өтті. Тартысты сайыс басталмас бұрын облыстық қоғамдық даму басқармасының «Қоғамдық келісім» КММ директоры Бақытжан Камалов журналистер клубының белсенділеріне жалпыұлттық бірлік пен қоғамдық келісімді дәріптеуде қосқан елеулі үлестері үшін Алғыс хат пен Monamie бутигіне сертификат табыстап, ізгі лебізін білдірді.<blockquote>«Құрметті БАҚ өкілдері, Сіздерді төл мерекелеріңізбен шын жүректен құттықтаймын. Жыл басынан бері республикалық және облыстық бұқаралық ақпарат құралдарында, 6 ай көлемінде 1409 материал, әлеуметтік желілердегі ресми парақшаларда 880 жариялым, 320 бейнематериал, БАҚ және Интернет ресурстарында 209 мақала жарық көрді. &nbsp;Бұл игі істерде, яғни өңірлік ассамблея жұмысын &nbsp;ақпараттандыруда Сіздердің тікелей үлестеріңіз бар. Журналистер мен сарапшылар клубының ұйымдастыруымен жыл сайынғы дәстүр бойынша 28 маусым - төл мерекелеріңізге орай кездесулер, одан бөлек түрлі байқаулар, семинар-тренингтер өткізіліп тұрады. Бұл жолы ерекше форматта караоке сайысы өтуде. Баршаңызға сәттілік тілеймін»,- деді Бақытжан Камалов.</blockquote>Мерекелік шарада қатысушылар арнайы Журналистер клубының жұмысын бейнелейтін Фотостендіде естелік суреттерге түсіп, бейнеролик тамашалады. Мұнан соң қатысушылар бір түсті шарларды таңдап, үш топқа бөлінді. Топтар атауларын таңдап, оны таныстырды. Бірінші топ – «Makeba», екінші топ – «BAQ like», үшінші топ – «7 МУЗ».Алғашқы тур – «Угадай мелодию» домбырамен қазақша айтылған шетел әндерін табу болды. Бұл турда «Makeba» мен «7 МУЗ» командалары 40/40 ұпаймен алға шықты. Ал екінші тур – «Кім тапқыр?» кері қарай айтылған қазіргі хит әндерді шапшаң тауып, айту. Бұл турда тағы да «Makeba» командасы мықтылығын паш етіп, 40 ұпай алды. Соңғы турда командалар әртүрлі ұлттардың қазақша, орысша, өзбекше әндерін шырқады.Сайыс нәтижесінде жүлделі бірінші орынды - «Makeba», екінші орынды - «7 МУЗ», үшінші орынды - «BAQ like» командасы жеңіп, ұйымдастырушыларға алғыстарын білдіріп, ерекше көңілді күйде тарқасты.<img src="https://knadmin.beoblood.kz/uploads/357095159_3525888954396926_211719574273288795_n_f95188902a.jpg" alt="357095159_3525888954396926_211719574273288795_n.jpg"><img src="https://knadmin.beoblood.kz/uploads/357020941_3525889024396919_8780025171301349373_n_36866d132f.jpg" alt="357020941_3525889024396919_8780025171301349373_n.jpg"><img src="https://knadmin.beoblood.kz/uploads/356862501_3525889177730237_414381592703053160_n_7e2d01f778.jpg" alt="356862501_3525889177730237_414381592703053160_n.jpg">

Журналистер арасында «Караоке Baq» мерекелік сайысы өтті

<a href="https://kyzylorda-news.kz/">Kyzylorda-news.kz.</a> Өткен күндер, яғни тарих қойнауындағы айтулы оқиғалар мен жалпақ жұртқа аты мәшһүр тұлғалар туралы ойлап, ой елегімізге салсақ, санамызда бұлыңғырланып, аса ерекше сезімге бөлеп толғанта алмайтыны көпшілігімізге айдан анық. Алайда, сол өткен күндердегі тарихи оқиғалардың маңыздылығымен тарих сахнасындағы тұғырлы тұлғаларымыздың &nbsp;ерекшеліктерін көз алдымызга елестетіп, қазіргі қоғамдағы көрініс ленталарымен салыстырып қарасақ, санамыздағы бейжайлықпен тарихқа деген немқұрайлы көзқарастан арыларымыз хақ.Тарих дегеніміз – ойлаған адамның санасында әртүрлі мысалдармен түсінік қалыптастырып, бір ұғымға түйісетін, өткен күндердегі айтулы оқиғалардың болмысы.Жалпы тарих, ұлттық тарих, өлке тарихы, барлығы бір-бірімен сабақтасып, бір қазанда қайнап жатқан тіршіліктің қозғалысы секілді. Әр елдің айтулы өз тарихы &nbsp;бар. Сөз төркіні, ел бар жерде, тіршілік бар, тіршілік бар жерде тарих бар және сол тарихты қалыптастырған тұлғалар бар.Қармақшы ауданы, жалпақ тілмен айтқанда Сыр өңірі, оның ішінде Қорқыт елі, күллі Қазақ еліне Қорқыт ата, Байқоңыр ғарыш айлағы атауларымен таныс өлке. Осы ретте жақында өңіріміздегі қатпарлы тарихымыздың біріне айқын дәлел бола алатын құнды жәдігер, тарих сахнасына шығып сырын ашты.Ол тарихи жәдігер өз заманында &nbsp;үш жүздің пірі атанған, әулиелігімен танымал болған, өмірі рухани мұраға толы, Ислам дінінің рухани шамшырағы, діни тұлға Марал ишан Құрманұлының қазақтың соңғы ханы – Кенесары ханға сыйлаған Құран кітабы. Марал ишан барша қазаққа танымал адам болған. Ол – төл тарихымызда ерекше орны бар Кенесары ханның үзеңгілес серігі.Құран кітап екі ғасыр уақыттан бері, сырын бүгіп, қолдан-қолға, шетел асып кеткен екен. Алайда &nbsp;жанашыр азаматтардың, (меценаттардың) атсалысуымен қазақ еліне қайтарып алынған.&nbsp;Айтулы жәдігерге жан-жақты сараптама жасалып, Марал ишанның және Кенесары ханның мөрі басылғаны туралы, &nbsp;отандық және шетелдік ғалымдар мұқият зерттеуі бойынша анықталып, Құран кітаптың Марал ишанға тиесілі болғаны, Кенесары ханға берілгені белгілі болды, – деп Түркістан қаласында өткен Ұлттық құрылтайда Мемлекет басшысы Қасым-Жомарт Тоқаев мәлімдеме жасады. &nbsp;&nbsp;Бұл дегеніміз – еліміздің рухани өміріндегі елеулі оқиға. Я сондағы айтпағым, күллі қазақ еліне ортақ болған тарихи жәдігердің ауданымызға тікелей байланысы бар екендігінде.Дінтанушы &nbsp;ғалым Мұхан Исаханның деректері бойынша «Ишан &nbsp;– дін жолындағы кім көрінгенге берілетін атау емес. Ишан болу үшін арнайы діни мектепте оқып, діни ұстаздан теориялық білім алып, оны тәжірибесімен сабақтастырып, рухани ілімді жан-жақты игеру шарт. Рухани ілімді толық игерген кемел адам ғана ұстазынан иджаза (диплом) алып, ишан атанып, бұл ілімді паш етуге рұқсат алған кісі». Алайда, өкінішке қарай, ХХ ғасырдың басында Кеңес үкіметінің орнауымен дін адамдары қуғындалып, ишандық мектеп ауыр соққыға ұшырағандығы белгілі.&nbsp;Профессор Аманжол Күзембайұлының деректерінде Марал ишан Сыр өңіріне келген кезінде жеті мешіт салдырғаны, Кенесары бастаған ұлт-азаттық қозғалысында діни басшы болғаны айтылады. Сондай-ақ 1821 жылы ол өзін императорға жолықтыруын сұрап, Орынбор әскери генерал губернаторы П.Эссенге және Сібір әскери бөлімінің бастығы генерал П.Капцевичке хат жолдаған. Бабамыздың қыр мен Сырға кең жайылған ата-даңқы, отаршыл орыс үкіметінің үрейін алды. Оның іс-әрекеті орыс ұлықтарын қатты абыржытып, әрбігерге салды. Қазақ-орыс арасындағы саяси мәселелерді Марал бабамыз келіссөз арқылы шешуді көздеді. Омбыға Керей болысының ақсақалы Байсал арқылы жіберген екі хатында, қазақтарды зорлап шоқындыруға, құнарлы жерлерді тартып алуға қарсылық білдіргендігін байқап, Марал ишанның саяси да сауатты екенін аңғарамыз.&nbsp;Ишанның тағы да бір елге жасаған қызметі қазіргі тілмен айтсақ, дәрігерлік еңбегі. Оның медреседе діни іліммен қатар, дәрігерлікті қоса меңгергені. Қазіргідей аурухана, дәрігер, дәрі-дәрмектің жоқ кезінде талай науқасты дәрілік шөптермен қатар, дем салу арқылы &nbsp;елдегі талай ауруларды емдеп жазған. Осындай тарихи тұлғамыздың ғұлама ғалым, әулие-ұстаз болғандығын, 1822 жылы патша үкіметі «Сібір қырғыздарының (қазақтарының) Уставы» атты Заң қабылдап, қазақтың ұлттық, діни дербестігінің көрінісі болып табылатын хандықты жою туралы жарлығына қарсы &nbsp;Ғазауат (ұлт азаттығы үшін күрес) соғысын жүргізгендігін болашақ ұрпаққа насихаттап, мақтан етеміз.&nbsp;Марал бабамыз қолбасшыларға әр уақыт дұға етіп, ақ батасын беріп отырған. Көтеріліске қатысушыларға діни басшылық жасау үшін Марал хан сарайының Кеңес құрамына кіреді. Кенесары көтеріліс бастап, бодандыққа қарсы шайқасып жатқан кезде Марал ишан Батыс-Сібір мұсылмандарының діни басшысы болады. Бұдан былай даулы мәселелер шариғат үкімі бойынша шешіліп отырды. Қазақ қосынына рухани демеу көрсетіп, кей жағдайда өз бойындағы керемет қасиеттерімен де көмектеседі. Марал бабаның жоғарыда айтылып кеткен қызметтерін, қазіргі уақытпен салыстырып қарасақ, Қазақстан Республикасының орталық билігінде отырған жоғары шенді тұлғалардай қызметте болғандығын көруге болады. &nbsp;Арада қанша уақыт өткенімен Марал ишанға деген құрметіміз артпаса, кеміген емес. Өйткені әулиенің ескіріп көнермейтін құнды дүниелері, тағылым-тәрбиеге толы ғұмыры, халқымыз үшін атқарған өлшеусіз еңбегі біздерді &nbsp;имандылыққа, білімділікке, отансүйгіштікке, сондай-ақ ұлтжандылық, і имани ұлы мінездерге қарай жетелейді. Халқымыз &nbsp;әулие-абыздар мен ишан атағына ие болған тұлғалы жандарды қатты қадірлеген. Олардың есімдері алты Алашқа жайылып, &nbsp;бүгінгі күнімізге дейін ұмытылмай келеді. Осы тұста Қармақшы жеріндегі Марал баба ұрпақтарың, асылдың сынығындай орны бөлек. &nbsp;Ол турасында өскелең ұрпаққа, көпшілік қоғамға насихаттап таныстыруда тікелей ұрпақтарының ықпалы зор.…Сөз соңында ескерілетін жайт, осы мақала барысында айтылған деректердің негізіне түрткі болып отырған құнды жәдігер, яғни Марал бабаның Кенесары ханға берген Құран кітабы. Осы кітаптың көшірмесі Марал бабаның мәңгілік орын тапқан мекеніндегі Қармақшы аудандық тарихи-өлкетану музейінің экспозициясына қойылса, баба туралы әлде де кеңінен насихаттауға мүмкіндік артар еді.

Ұлттық құрылтайдағы айтылған құнды жәдігер

<a href="https://kyzylorda-news.kz/">Kyzylorda-news.kz.</a> Көпшілік 5-ші квартал атап кеткен аймақтың тұрғындары Құрбан айт мерекесін ерекше атап өтті.&nbsp;«Әли-муса» мешітінің жамағаты мен 5-ші аймақтағы ағайынның ұйымдастыруымен өткен «Құрбан айт - ұлық мереке» атты шараға аудан әкімі Мұхтар Оразбаев арнайы қатысып, жиналғандарды мерекемен құттықтады.&nbsp;<blockquote>«Құрбан айт – сауапты істер жасайтын, құлшылық ететін қасиетті күндер ғана емес, ол адамдар арасында бауырмалдық орнатып, өзара достыққа, ынтымақтастыққа, сүйіспеншілікке шақыратын мереке. Алланың ақ жолына адалдық пен таза көңiлде бет бұрған болмысымыз бүгiнде ұлттық ұлағатқа ұласты. Үлкендi құрметтеу, кішіге iзет көрсету секiлдi сыйластық арта түстi. Алла Тағала барлық дұға-тілектеріңізді, шалған құрбандықтарыңызды қабыл етсін! Әрдайым еліміз аман, жұртымыз тыныш, болашағымыз жарқын болсын! Баршаңыздың дендеріңізге саулық, отбасыларыңызға амандық тілеймін», - деген аудан басшысы игі істің өтуіне ұйытқы болған бірқатар азаматтарды аудан әкімінің “Алғыс хатымен” марапаттады.&nbsp;</blockquote>Мереке аясында өткізілген шарада «Әли-муса» мешіті жамағатының атынан Ұлттық біріңғай тестілеуден жоғары ұпай жинаған түлектер мен байрақты бәсекелерде ел намысын қорғап жүрген 5 -ші аймақтың жастарына арнайы номинациялар беріліп, сыйлықтар табысталды.Мұнан соң аудан өнерпаздары жиналған көпшілікке арнап терме айтып, ән салды. Сонымен қатар, аталған аймақтың өнерлі жастары өз өнерлерін көрсетті.&nbsp;Артынша жиналған көпшілік жасөспірімдер мен ересектер арасындағы гір тасын көтеру, қой көтеру, асық ату және турникке тартылу сынды сайыстарға куә болды.&nbsp;Құрбан айт мерекесінде балғындарға ерекше көңіл-күй сыйлау үшін батуттар орнатылып, түрлі кейіптегі аниматорлар келді. Сондай-ақ, бүлдіршіндерге тегін тәттілер таратылды.

Қазалы халқы Құрбан айт мерекесін ерекше атап өтті

<a href="https://kyzylorda-news.kz/">Kyzylorda-news.kz.</a> 2023 жылдың 29-маусымында И.Әбдікәрімов атындағы Қызылорда аграрлық техникалық жоғары колледжінде 2022-2023 оқу жылындағы колледж бітірушілеріне арналған «Ақ жол, бітіруші Жас маман-2023» тақырыбында салтанатты шара болып өтті.Биылғы жылы &nbsp;ордалы оқу орнын бітірушілер саны 28 оқу тобы, 19 мамандық бойынша 458 маман даярлап, еңбек жолына аттандырды. Оның 446-ы &nbsp;бюджеттік негізде, 11-і ақылы негізде оқыды. &nbsp;Колледжді үздік бітіруші түлектерінің салтанатты шеруін&nbsp;- &nbsp;«Ветеринария және ауылшаруашылық мамандықтар» бөлімшесі &nbsp;бойынша 8 оқу тобы бітіріп, үздіктер шеруін бөлімше меңгерушісі Бисембаев Бағдат Бүркітбайұлы;- &nbsp;«Энергетика және құрылыс мамандықтар» бөлімшесі бойынша 8 оқу тобы бітіріп, үздіктер шеруін бөлімше меңгерушісі Жапақова Гүлнар Өтешқызы;- «Геология және сандық техника мамандықтар» бөлімшесі бойынша 5 оқу тобы бітіріп, үздіктер шеруін бөлімше меңгерушісі міндетін атқарушысы Мырзабаева Динара Серікқызы;- «Логистика және көлік мамандықтар» бөлімшесі бойынша 7 оқу тобы бітіріп, үздіктер шеруін бөлімше меңгерушісі Меңілқұлов Нұр Машарапұлы бастап шықты.Колледж мамандықтары бойынша бітіруші мамандардың салтанатты жиынын И.Әбдікәрімов атындағы Қызылорда аграрлық техникалық жоғары колледжінің директоры Абдикаримов Бахытхан Жунайдович ашып берді. Колледж Ардагерлер кеңесінің төрағасы, Бекманов Кажданбек Бекманұлы, колледж әлеуметтік серіктестігі “Сауле” шаруа қожалығы &nbsp;директоры Каниева Саулеш Нұғымқызы, &nbsp; колледж директорының &nbsp;оқу жұмысы &nbsp;жөніндегі &nbsp;орынбасары Ермұхан Бауыржан Бақытжанұлы жас мамандарға ақ жол тілеп, құттықтау сөз сөйледі.Бітіруші түлектердің &nbsp;ата-аналары &nbsp;колледж директорының алғыс хатымен марапатталды. Бітіруші түлек Батырхан Айдананың &nbsp;анасы Алтынбекова Тұрсынай Абдуллақызы &nbsp;сөз сөйлеп, алғыс білдірді. Студенттік өмірдің бал күндерін бірге өткізген бітірушілер &nbsp;атынан Абдуллаева Сандуғаш Нариманқызы да сөз сөйлеп, өз қатарластарына ақ жол тіледі.&nbsp;

Қазақстан және Қызылорда облысының жаңалықтары