<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев жаңадан салынған техникалық және кәсіптік білім беруді дамытуға арналған құзыреттілік орталығына барды. Қызметі жастардың кәсіби шеберлігін арттыруға бағытталған нысанның құрылысы аяқталып, жақын күндері пайдалануға беріледі деп күтілуде.Жұмысшы мамандар даярланатын орталық ғимараты екі қабатты, 215 орынға арналған. Мұнда түрлі қоғамдық іс-шаралар өткізетін 100 орындық конференц-зал, 20 орындық СІР, көрме залдары қарастырылған.Айта кету керек, аймағымызда жас ұрпақтың сапалы білім алуына барлық жағдай жасалған. Соңғы жылдары бюджет қаржысының басым бөлігі әлеуметтік, оның ішінде білім саласына бағытталуда. Соңғы үш жылда салаға 812 млрд. 245 млн. теңге, биыл 302 млрд. теңге қаралды.Бөлінген қаржының түпкілікті мақсатқа жетуі үшін нақты шаралар қабылданған.<img src="https://knadmin.beoblood.kz/uploads/zyrettilik_ortaly_y_2_a1c3f3332b.jpg" alt="Құзыреттілік орталығы 2.jpg">

Облыс әкімі құзыреттілік орталығына барды

<a href="https://kyzylorda-news.kz/">Kyzylorda-news.kz</a> ҚР Премьер-министрі Олжас Бектеновтің төрағалығымен өткен Үкімет отырысында автожол саласын дамыту мәселесі талқыланды.&nbsp;Оған облыс әкімі Нұрлыбек Нәлібаев селекторлық режим арқылы қатысып, отырыстан соң жауапты сала басшыларына күн тәртібіндегі мәселеге орай жиналыс өткізді.<blockquote>«Үкімет басшысы орталық атқарушы органдар мен өңір әкімдеріне саладағы жұмыстарды бақылауға алып, сапалы жүргізуді тапсырды. Биылға жоспарланған жол құрылысы жобалары сапалы әрі мерзімінде жүзеге асырылуы керек. Жол сапасын жақсарту, жөндеу, асфальт төсеу қазан-қараша айларына дейін толық аяқталуы тиіс. Өздеріңізге белгілі, әрбір жобаға қойылатын басты талап – құрылыс сапасы. Дегенмен Жол активтері ұлттық сапа орталығы жүргізген тексеруден кейін бірқатар кемшілік анықталды. Бұл кемшіліктер толық қалпына келтірілуі тиіс. Мемлекет басшымыз Ұлттық құрылтай отырысында «Батыс Еуропа – Батыс Қытай» халықаралық автодәлізінің Қызылорда – Ақтөбе бағытын төрт жолақты етіп кеңейту жобасы басталатынын, «Бейнеу – Сексеуіл» жолының құрылысы биыл қолға алынатынын атап өтті. Бұл жобалар Президентіміздің тікелей бақылауында. Аталған маңызды жобалардың мерзімінде басталуын қамтамасыз етіңіздер. Тиісті министрліктермен жұмыс жасаңыздар. Қыстың соңғы күндері табиғат тосын мінез көрсетіп, бір күн бойы нөсер жаңбыр жауды. &nbsp;Артынша қатты жел тұрып, аяз болды. Қызылорда қаласы мен Сырдария, Жалағаш, Қармақшы аудандарына қарасты бірқатар елді мекендегі электр желілеріне, қондырғыларға, ағаштарға толықтай мұз қатып, қалың қар жауып, бағаналар, талдар құлады. Салдарынан 250-ден астам электр бағанасы құлап, 80 шақырымға жуық желі үзілді. Апатты жағдайды қалпына келтіру мақсатында жедел штаб құрылып, &nbsp;«Қызылорда электр тарату тораптары» компаниясының 170-тен аса маманынан құралған жедел жөндеу бригадалары, 80 арнайы техника жұмылдырылды. Тұрғындарды мүмкіндігінше қысқа мерзімде электр энергиясымен қайта қамтамасыз ету үшін 24 сағат бойы үзіліссіз, күшейтілген режимдегі жұмыс екі ауысымда жүргізілуде. Уақытпен санаспай, күні-түні нысандар басынан табылған коммуналдық мекеме қызметкерлеріне, қалпына келтіру жұмыстарына атсалысқан, жағдайға түсіністікпен қараған жергілікті тұрғындарға, елді ауызбірлікке шақырған ауыл ақсақалдарына, ел ағаларына зор алғысымызды білдіреміз», – деді Н.Нәлібаев.</blockquote>Сондай-ақ, басқосуда коммуналдық салалар жұмысты күшейтілген режимде жалғастыруы қажет екені айтылды. «Таза Қазақстан» экологиялық бағдарламасы аясындағы санитарлық тазалық жұмыстары да күн тәртібінен түспейді. Бұл бағытта да нақты тапсырмалар жүктелді.Еске салайық, өткен жылы жол инфрақұрылымын дамытуға республикалық және жергілікті бюджеттен қаржы бөлініп, 329 шақырым автомобиль жолы, көшелер мен көпірлер жөндеуден өтті. Нәтижесінде жақсы және қанағаттанарлық жағдайдағы жолдардың үлесі 95 пайызға жетті.«Қызылорда-Жезқазған» автомобиль жолының облыс аумағынан өтетін 216 шақырымының құрылысы толығымен аяқталып, пайдалануға берілді.Биыл да жол инфрақұрылымын дамытуға бағытталған 56 жобаға қаржы бөлінді. Оған өңірдегі 136 шақырым жол мен көпір өткелдері жөнделеді.

Автожол саласын дамыту мәселесі талқыланды

<a href="https://kyzylorda-news.kz/">Kyzylorda-news.kz</a> &nbsp;Облыс әкімі Нұрлыбек Нәлібаев Алғыс айту күніне орай “Достық үйінде” тұрғындардың қалыпты тұрмыс-тіршілігін қамтамасыз ететін салалардың қызметкерлерімен кездесті.Оған Парламент Сенатының депутаты Руслан Рүстемов, құқық қорғау органдарының бірінші басшылары, зиялы қауым өкілдері қатысты.<img src="https://knadmin.beoblood.kz/uploads/akimat_ca496b56f4.jpg" alt="акимат.jpg">Аймақ басшысы жиналған жұртшылыққа құттықтауын жеткізіп, еңбек адамдарының мәртебесі қашанда биік екенін айтты.<blockquote>“Жарқын көктеммен жарасым тапқан бұл мереке адамдар арасындағы сыйластық пен тілектестікті, ризашылық пен шынайы құрметті арттырады.Айтулы күн қарсаңында тұрғындардың қалыпты тұрмыс-тіршілігін қамтамасыз ететін салаларда күннің ыстық-суығына қарамай, уақытпен санаспай еңбек ететін қызметкерлерге құрмет көрсету үшін бас қостық. Сондай-ақ қасиетті Отанымызды қорғауда патриотизмнің нағыз үлгісін көрсетіп, өзіне жүктелген міндетті мүлтіксіз орындайтын айбынды әскери қызметшілерімізге, құқық қорғау саласы қызметкерлеріне, сын сағатта қайсарлық танытып, өзгенің өмірін сақтау үшін өз басын қатерге тігетін өрт сөндірушілер мен құтқарушыларымызға, шұғыл медициналық көмек көрсететін жедел жәрдем қызметкерлері мен жол саласы мамандарына, ел игілігі жолында еңбек етіп жүрген еріктілерімізге барша Сыр жұртшылығының атынан зор ризашылығымды, шынайы алғысымды білдіремін!Сіздердің адал еңбектеріңіз барлық құрметке лайық.Президентіміздің Жарлығымен жаңа Конституцияға арналған Республикалық референдумды 2026 жылғы15 наурызда өткізу туралы шешім қабылданды.Бұл – еліміздің жарқын келешегі үшін өз таңдауымызды жасап, қастерлі Отанымыздың берік негізін қалауға берілген тарихи мүмкіндік.Конституция жобасында Ұлы Даланың мыңжылдық тарихының сабақтастығы сақталып, мемлекеттің унитарлы сипаты мен шекарасына, аумақтық тұтастығына қол сұғуға болмайтыны нақтыланған.Елдігіміздің басты нышаны саналатын жаңа құжатта «Адам мемлекет үшін емес, мемлекет адам үшін» қағидаты айқындалған.Ұлтымыздың тарихына алтын әріппен жазылатын саяси маңызды кезеңде Сыр жұртшылығы жаңа Конституция жобасын қолдайды деп сенеміз.Баршаңызды осы іске жоғары жауапкершілікпен белсенді атсалысуға шақырамын!Тәуелсіз еліміздің жарқын болашағы жолындағы еңбектеріңіз жемісті әрі табысты болсын!”,- деді Н.Нәлібаев.</blockquote>Жиында Руслан Рүстемов сөз сөйлеп, бірқатар сала мамандары облыс әкімінің Алғыс хатымен марапатталды.Фото: облыс әкімдігі

Аймақ басшысы Алғыс айту күніне орай бірқатар сала қызметкерлерін марапаттады

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың төрағалығымен өткен мәжілісте әріптестері облыстық денсаулық сақтау басқармасының басшысы лауазымын абыроймен атқарған Олжас Искаковты республикалық медициналық-санитариялық алғашқы көмек орталығының басшысы қызметіне шығарып салды.Аймақ басшысы Олжас Ермекұлының адал қызметі мен салаға сіңірген еңбегін атап өтіп, алғыс білдірді.<blockquote>«Әріптесіміз Санжар Асфендияров атындағы Қазақ ұлттық медицина университетінде «Емдеу ісі», Қарағанды Қазтұтынуодағы университетінде «Құқықтану» мамандықтары бойынша білім алған. «Денсаулық сақтау менеджменті» мамандығы бойынша іскерлік әкімшілік магистрі. Еңбек жолын облыс орталығындағы №3 қалалық емхананың аймақтық терапевт дәрігеріболып бастап, осы емхананың бөлім меңгерушісі, бас дәрігердің емдеу ісі жөніндегі орынбасарықызметтерін атқарған. &nbsp;Әр жылдары облыстық денсаулық сақтау басқармасында бөлім басшысы, басқарма басшысының орынбасары, Денсаулық сақтау министрлігінің басқарма басшысы, департаментдиректорының орынбасары болған. Олжас Ермекұлы денсаулық сақтау саласын басқарған кезеңде нақты әрі жүйелі қадамдар жасап, елеулі нәтижелерге қол жеткізді. Соңғы 3 жылда облыста жалпы өлім-жітім 5,6 пайыз, ана өлімі 12 есе, сәби өлімі 37 пайыз, туберкулезден аурушаңдық көрсеткіші 11,6 пайыз, өлім-жітім көрсеткіші 9 пайыз, қан айналым жүйесінен өлім-жітім көрсеткіші 19,6 пайыз төмендеді. Бұған дейін орталықта қызмет атқарып, кәсіби біліктілігі мен ұйымдастырушылық қабілетін танытқанының арқасында Денсаулық сақтау министрлігімен тығыз байланыс орнатты, бірқатар жобаның табысты жүзеге асуына ықпал етті», –деді Нұрлыбек Машбекұлы.</blockquote>Жиында денсаулық сақтау саласының ардагері, Қызылорда облысының құрметті азаматыТұрғанбай Маханов пен медицина саласының ардагері Абдулла Шүленбаев, Наурызбай Байқадамов - Қорқыт ата атындағы Қызылорда университетінің Басқарма Төрағасы-ректоры ізгі тілектерін жеткізді.&nbsp;Олжас Ермекұлына «Қызылорда облысының дамуына қосқан үлесі үшін» медалі, Құрмет грамотасы, облыс әкімінң Алғыс хаты табысталды.Өз кезегінде Олжас Искаков әріптестеріне алғысын, туған жердің өсіп-өркендеуіне тілектестігін білдірді.

Олжас Ысқақовты жаңа қызметке шығарып салды

<a href="https://kyzylorda-news.kz/">Kyzylorda-news.kz</a> Қазалы ауданындағы аудандық көп бейінді орталық ауруханада заманауи компьютерлік томография аппараты жұмыс жасайтын жаңа кабинет ашылды. &nbsp;Аудандық ауруханада өткен шарада аудан әкімі Алмасбек Есмаханов құттықтау сөз сөйлеп, денсаулық сақтау саласындағы атқарылып жатқан игі жұмыстар жайында айтып өтті.<blockquote>– Мемлекет басшысы Қасым-Жомарт Кемеұлы Тоқаевтың бастамасымен, аймақ басшысы Нұрлыбек Машбекұлының қолдауымен ауданымызда денсаулық сақтау саласын жаңғырту, медициналық көмектің қолжетімділігі мен сапасын арттыру бағытында жүйелі реформалар жүзеге асырылып келеді. Соңғы үш жылда Бозкөл, Кәукей және Абай ауылдарында «Ауылда денсаулық сақтауды жаңғырту» ұлттық жобасы аясында 3 бірдей дәрігерлік амбулаториялар пайдалануға берілсе, Жалпақ және Жұбан елді мекендерінде жаңа медициналық бекеттер ашылды. Өткен жылы «Бекарыстан би» және «Болат жолы» дәрігерлік амбулаторияларының ғимараттарына күрделі жөндеу жұмыстары жүргізілді. Елді мекендердегі денсаулық сақтау ұйымдарына 26 дана жедел жәрдем автокөлігі табысталып, ауданда санитарлық автокөлікпен қамту мәселесі түбегейлі шешілді. Өткен жылдың желтоқсан айында аудандық көп бейінді орталық аурухананың жанынан Мемлекет басшысының тапсырмасына сәйкес, мемлекетке қайтарылған активтер есебінен құны 1 миллиард 810 миллион теңге болатын, 42 төсектік кардиология және инсульт орталығы іске қосылды. Алдағы уақытта аталған жапсарлас ғимаратқа заманауи МРТ медициналық құрылғысын орнату жоспарланып отыр. 2025 жылдың қараша айынан бастап Қазалы көп бейінді орталық ауруханасында жүрек ырғағының бұзылыстары бойынша аритмологиялық жоғары мамандандырылған оталар алғаш рет жасала бастады. Бұл – республика көлемінде аудандар арасында тұңғыш рет Қазалы ауданында жүзеге асырылып отырған жоғары технологиялы медициналық қызмет түрі. Бүгін іске қосылған компьютерлік томография аппаратыда осы жүйелі жұмыстардың жалғасы. Құны 326 миллион 699 мың теңгені құрайтын бұл аппарат «Ауыл денсаулық сақтауды жаңғырту» ұлттық жобасы аясында пайдалануға беріліп отыр, - деді аудан әкімі.</blockquote><img src="https://knadmin.beoblood.kz/uploads/azaly_kompyuterlik_tomografiya_4075d3de77.jpg" alt="Қазалы компьютерлік томография.jpg">Жаңа кабинеттің ашылу рәсімінде денсаулық сақтау саласаның ардагері Құлпыбай Ысқақов сөз сөйлеп, аудан тұрғындарының көптен бері көтеріп келе жатқан маңызды мәселенің шешімі табылғанына қуанышты екенін жеткізді.Мұнан кейін заманауи диагностиканың жаңа мүмкіндіктеріне жол ашатын кабинеттің лентасы салтанатты түрде қиылып, аудан әкімі мен шараға жиналған қонақтар жаңа аппараттың мүмкіндіктерімен танысты.Айта кетейік, енді Қазалы ауданының тұрғындары компьютерлік томографиядан өту үшін облыс орталығына сабылмай, ауданымызда сапалы әрі қолжетімді диагностикалық қызмет ала алады. Бұл тұрғындардың уақытын үнемдеп, жол шығынын азайтып, ауруды ерте анықтап, дер кезінде ем алуға жол ашады.

Қазалы аудандық ауруханасында компьютерлік томография аппараты іске қосылды  

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев, «Атамекен» ҰКП төралқа төрағасы Қанат Шарлапаев Қызылорда облысының кәсіпкерлерімен кездесуі өтті. Оған бизнес өкілдері, облыстық кәсіпкерлер палатасы өңірлік кеңесінің мүшелері, салалық басқармалар мен мемлекеттік органдардың, қаржы институттарының басшылары қатысып, өңірдегі кәсіпкерлікті қолдау және дамыту мәселелері талқыланды.<blockquote>«Сыр өңірінде өткен Ұлттық құрылтайда Президентіміз «Соңғы жылдары Қызылорда облысы заман талабына сай өсіп-өркендеп жатыр», – деп ерекше атап өтіп, атқарылған жұмыстарға оң бағасын берді. Жыл қорытындысымен облыста негізгі макроэкономикалық көрсеткіштердің өсімі қамтамасыз етілді. Бүгінде кәсіпкерліктің даму қарқыны жоғары, экономикадағы үлесі 20,5 пайыз. Өткен жылы өңір экономикасындағы осы сектордың өнім шығару көлемі 30,5 пайызға артып, республикадағы алғашқы үштікке енді. Мемлекет басшымыз қойған маңызды стратегиялық міндет – толыққанды жаңа инвестициялық кезеңді бастау, өңдеу өнеркәсібі мен кәсіпкерлікті дамыту. Бұл міндетті мемлекет пен бизнес бірге әрекет еткенде ғана орындай алады. Сіздерді экономиканың ұзақ мерзімді өсімін қамтамасыз етуге бағытталған сапалы жобаларды жүзеге асыруға, инвестиция көлемін арттыруға шақырамыз. Ол үшін әкімдік кәсіпкерлер палатасымен бірлесіп, бизнесті қолдау және дамыту бағытындағы маңызды шараларды қабылдауға әрқашан дайын», – деді Нұрлыбек Нәлібаев.</blockquote>Басқосуда Қанат Бисимбайұлы, Ризабек Кәрімұлы, бизнес өкілдері өз ұсыныс-пікірлерін білдірді. Бүгінде аймақта қолайлы инвестициялық ахуал қалыптасып, ірі инвестициялық жобалар табысты жүзеге асуда. Соңғы үш жылда облыс экономикасына шамамен 2 трлн теңге инвестиция тартылды. Өткен жылы құны 300 млрд теңгеден асатын 27 инвестициялық жоба іске асты.Мемлекет басшысының қолдауымен түркиялық инвестор «Акса Энерджи» компаниясы құны 215 млрд теңге болатын, қуаттылығы 240 мегаваттық жаңа жылу электр орталығын салды. Оған бюджет қаражаты есебінен 15 млрд теңгеге 45 шақырым газ құбыры тартылды.Бұдан бөлек, нан өнімдері кешені, кірпіш, айна шығару, күріш және ас тұзын өндіру зауыттары, шағын өнеркәсіптік аймақ, сондай-ақ қуаттылығы 40 мегаваттық күн электр станциясы іске қосылды. Өңір экономикасын әртараптандыру мақсатында 2026-2029 жылдары 48 инвестициялық жобаны жүзеге асыру жоспарланған. Бұл жобалар 10 мыңнан астам жаңа жұмыс орнын ашуға мүмкіндік береді.<img src="https://knadmin.beoblood.kz/uploads/irlik_k_sipkerlikti_damytu_2_a85978e629.jpg" alt="Өңірлік кәсіпкерлікті дамыту 2.jpg">

Өңірдегі кәсіпкерлікті қолдау және дамыту мәселелері талқыланды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев «Атамекен» ҰКП төралқа төрағасы Қанат Шарлапаевпен кездесті. Онда инвестиция тарту мен кәсіпкерлік саласындағы &nbsp;жұмыстар жайы талқыланды.<blockquote>«Мемлекет басшысы шағын және орта бизнесті дамытуға айрықша мән беріп, Үкімет қолдау көрсетуде. Бүгінде өңірімізде кәсіпкерліктің даму қарқыны &nbsp;белсенді, экономикадағы үлесі 20,5 пайыз. Өткен жылы өңір экономикасындағы бұл сектордың өнім шығару көлемі 30,5 пайызға артып, облыс өңірлер арасынан 3-орынды иеленді. Салық түсімдері алдыңғы жылмен салыстырғанда 2,5 есе ұлғайды. Кәсіпкерліктің тұрақты дамуына &nbsp;жүйелі әрі тиімді мемлекеттік қолдау оң ықпал етті. Өңір экономикасын әртараптандыру мақсатында 2026-2029 жылдары 1 трлн. 900 млрд. теңгенің 48 инвестициялық жобасын жүзеге асырып, 10 308 жаңа жұмыс орнын ашу көзделген. &nbsp;Биыл 100 млрд. теңгеге 21 жобаны іске қосу жоспарлануда. Атап өту қажет, Өзіңіздің тікелей көмегіңізбен испандық «Рока групп» компаниясымен жылына 500 мыңға дейін санитарлық-техникалық бұйым шығаратын жоғары технологиялық зауыт салу жөнінде инвестициялық келісімге қол қойылды. Биыл құрылысы басталады. Жеке кәсіпкерлікті қаржылай қолдауға бюджеттен 22 млрд. 700 млн. теңге қарастырылды. Мемлекет басшысының тапсырмасына сәйкес, биыл микро және шағын бизнес үшін «Іскер аймақ» бағдарламасы іске қосылды. Бүгінгі кездесу жаңа жобалар мен бастамаларға жол ашады деп сенеміз», - деді Н.Нәлібаев.</blockquote>Былтыр жеке кәсіпкерліктің 2 929 жобасы барлық қаржы көзі есебінен 61 млрд. 100 млн. теңгеге қаржыландырылды. Мемлекеттік қолдау шаралары өңірдің инвестициялық әлеуетін арттырып, жаңа өндірістер ашуға, жұмыс орындарын құруға мүмкіндік берді. &nbsp;Сонымен бірге 300 млрд. теңгеден астам қаржыға 27 инвестициялық жоба жүзеге асырылды. &nbsp;Түрік инвесторы жаңа жылу электр орталығын салды.&nbsp;Нан өнімдері кешені, кірпіш, айна шығару, күріш және ас тұзын өндіру зауыттары, шағын өнеркәсіптік аймақ және қуаттылығы 40 мегаваттық күн электр станциясы іске қосылды.

Аймақ басшысы «Атамекен» ҰКП төралқа төрағасымен кездесті

<a href="https://kyzylorda-news.kz/">Kyzylorda-news.kz</a> «Өнер орталығында» композитор, ҚР Еңбек сіңірген қайраткері, «Құрмет», «Парасат» орденінің иегері Кеңес Дүйсекеевтің 80 жылдығына арналған еске алу кеші өтті.Оған облыс әкімі Нұрлыбек Нәлібаев, Сыртқы істер министрінің орынбасары Әлібек Қуантыров, Еуропалық Одаққа мүше мемлекеттердің елшілері, Парламент Сенаты мен Мәжілісінің депутаттары, композитордың жары Баян Дүйсекеева, баласы Нұркен Дүйсекеев пен туған-туыстары арнайы қатысты.Кеш туған жерін ән қанатында тербеген композитордың шығармашылығына арналған бейнеролик көрсетілімінен басталып, концерттік бағдарламада ел жадында жатталған таңдаулы туындылар орындалды. Атап айтқанда «Асыл ана», «Ойлан, балам», «Өмір, өмір», «Анаға хат», «Ойлайсың ба, жаным», «Ақ қар», «Ғашық әнім», «Өкінбе сен» әндері көрермен назарына ұсынылды. Сахна төрінде Қазақстанның Халық артисі Роза Рымбаева «Сәлем саған, туған ел» әнін әуелете шырқады. Ал Мәдина Сәдуақасова Исраил Сапарбайдың сөзіне жазылған «Теңеу бар ма саған?» әнімен көрерменнің ыстық ықыласына бөленді. Сондай-ақ Жұбаныш Жексенұлы «Туған жер» әнін әсерлі орындап, кештің сәнін кіргізе түсті.<img src="https://knadmin.beoblood.kz/uploads/Syr_elinde_Ke_es_D_jsekeevti_80_zhyldy_yna_arnal_an_eske_alu_keshi_tti1_af8869ebd4.jpg" alt="Сыр елінде Кеңес Дүйсекеевтің 80 жылдығына арналған еске алу кеші өтті1.jpg">Кеңес Дүйсекеев – қазақ музыка өнерінің алтын қорына енген бірегей шығармалардың авторы, ұлттық рух пен заманауи әуенді шебер ұштастырған көрнекті композитор. Ол ұлттық эстрада мен симфониялық музыкада өзіндік қолтаңбасын қалыптастырып, қазақ ән өнерін жаңа деңгейге көтерген тұлға.<img src="https://knadmin.beoblood.kz/uploads/Syr_elinde_Ke_es_D_jsekeevti_80_zhyldy_yna_arnal_an_eske_alu_keshi_tti3_b63426116e.jpg" alt="Сыр елінде Кеңес Дүйсекеевтің 80 жылдығына арналған еске алу кеші өтті3.jpg">Композитордың «Қаракөзайым», «Домбыра туралы баллада», «Сәлем саған, туған ел!» сынды алғашқы туындыларының өзі-ақ қалың жұртшылықтың ыстық ықыласына бөленген. Әлем сахналарында қазақ әнін асқақтатқан Димаш Құдайбергеннің орындауындағы «Қарағым-ай» әні мыңдаған шетелдік тыңдарманның зор қошеметіне ие болды.<img src="https://knadmin.beoblood.kz/uploads/Syr_elinde_Ke_es_D_jsekeevti_80_zhyldy_yna_arnal_an_eske_alu_keshi_tti4_9325dc5443.jpg" alt="Сыр елінде Кеңес Дүйсекеевтің 80 жылдығына арналған еске алу кеші өтті4.jpg">2006 жылы композитордың 60 жылдық мерейтойына орай «Туған жер» атты композиторлар мен әншілердің облыстық байқауы ұйымдастырылды. 2008 жылы бұл өнер додасы республикалық деңгейге көтеріліп, талай дарынды жастың шығармашылық жолына серпін берді, үлкен сахнаға жол ашты. 2013 жылдан бері халықаралық мәртебеге ие болған конкурс жыл сайын Өзбекстан, Қырғызстан, Польша, Болгария сынды алыс-жақын шетелдерден жиналған таланттарды бір арнаға тоғыстырып келеді.<img src="https://knadmin.beoblood.kz/uploads/Syr_elinde_Ke_es_D_jsekeevti_80_zhyldy_yna_arnal_an_eske_alu_keshi_tti5_f91d78d755.jpg" alt="Сыр елінде Кеңес Дүйсекеевтің 80 жылдығына арналған еске алу кеші өтті5.jpg">Фото: Қызылорда облысы әкімінің баспасөз қызметі

Сыр елінде Кеңес Дүйсекеевтің 80 жылдығына арналған еске алу кеші өтті

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев, ҚР Сыртқы істер министрінің орынбасары Әлібек Қуантыров, Еуропалық Одақтың Қазақстандағы елшісі Алешка Симкич, Еуро Одаққа мүше мемлекеттердің Қазақстандағы елшілерінің қатысуымен Қызылорда облысының инвестициялық әлеуеті талқыланған дөңгелек үстел өтті.Аймақ басшысы өңірдің инвестициялық ахуалы мен экономиканы әртараптандыруда атқарылған жұмыстарға тоқталды.<blockquote>«Өткен жылы Президентіміз Сыр өңіріне жасаған жұмыс сапарында инвестициялық климатты жақсарту, бизнес жүргізу үшін қолайлы жағдай жасау бағытын жалғастыруды тапсырған болатын. Бүгінде облыс экономикасын әртараптандыру арқылы жоғары өнімді, экспортқа бағдарланған шикізаттық емес өңдеу өнеркәсібін құру &nbsp;жұмыстарын кезең-кезеңімен атқарудамыз. Өздеріңізге белгілі, бүгінде су ресурстары – тек Қазақстан ғана емес, Орта Азия мемлекеттері үшін де өте өзекті мәселе. Облыстың экономикалық, экологиялық жағдайы, халқының тыныс-тіршілігі Сырдария өзенінің деңгейіне, Арал теңізінің жағдайына тікелей байланысты. Су ресурстарын неғұрлым тиімді пайдалану, су үнемдеу технологияларын енгізу, су жүйелерін цифрландыру – бүгінгі күннің басты талабы. Облыстың агроөнеркәсіп кешеніне инвестиция тартуда осы мәселелерге басымдық беріледі», – деді аймақ басшысы.</blockquote>Жиында Әлібек Қуантыров, Алешка Симкич, облыс прокуроры Р. Ожаров, облыс әкімінің орынбасары Ардақ Зебешев, «Рока групп» серіктестігінің бас директоры Даниэль Эрнандес, «Харвест Агро» компаниясының жоба басшысы Дәулет Увашев пікір білдірді.Еліміз тәуелсіздік алғаннан бері Еуропалық Одақ мемлекеттерімен ашық әрі сенімді дипломатиялық қарым-қатынас орнатқан. Бүгінде Қазақстан – Еуро Одақтың Орта Азиядағы негізгі инвестициялық және сауда-экономикалық серіктесі.Кеше қонақтар Қызылорда қаласындағы әлеуметтік нысандарды араласа, бүгін Сырдария ауданының Бесарық елді мекеніндегі шағын өнеркәсіптік аймақтың жұмысымен танысады. Бұл сапар әріптестікті жаңа деңгейге шығаруға оң серпін бермек.<img src="https://knadmin.beoblood.kz/uploads/yzylorda_oblysyny_investicziyaly_leueti_2_8fea75ea5d.jpg" alt="Қызылорда облысының инвестициялық әлеуеті 2.jpg">

Қызылорда облысының инвестициялық әлеуеті талқыланды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев ҚР Сыртқы істер министрінің орынбасары Әлібек Қуантыровпен, Еуропалық Одақтың Қазақстандағы елшісі Алешка Симкичпен кездесті. Кездесуде инвестиция тарту мәселесі талқыланды.<blockquote>«Біз аймақтың экологиялық жағдайына ерекше мән береміз. Басты басымдықтардың бірі – Арал теңізінің экожүйесін сақтау, суды, соның ішінде трансшекаралық су ресурстарын тиімді басқару. Арал теңізінің апатты жағдайы тек өңірге немесе бір елге ғана емес, әлемге теріс әсерін тигізуде. Құм көшкінін тоқтатудың бірден-бір жолы – теңіз ұлтанын көгалдандыру, жергілікті климатқа сай өсімдіктерді егу. Бүгінде халықаралық қорлардың демеушілігімен Арал теңізінің құрғаған табанына сексеуіл егілуде. Былтыр егін шаруашылығында су үнемдеу технологияларын пайдалану көлемі 8100 гектарға жеткізіліп, 2024 жылмен салыстырғанда 2 есе артты. Шетелдік компаниялардың қатысуымен су үнемдеу технологияларын қолдану арқылы жүгері, техникалық қарасора, соя дақылдарын егетін 3 ірі жоба жүзеге асуда. Тағы бір маңызды бағыт, 2024 жылы ашылған, Орталық Азиядағы алғашқы геопарк атанған «Арал геопаркін» дамыту мәселесіне назар аударғым келеді. Бұл жоба өңірдің табиғи, тарихи, туристік әлеуетін дамыту арқылы орнықты экономикалық-әлеуметтік өсімге серпін береді. Өткен жылы Қызылорда облысы «Арал геопаркін» ЮНЕСКО-ның Дүниежүзілік геопарктер тізіміне енгізу жөнінде өтінім берді. &nbsp; Арал өңірінде орнықты даму мен экологиялық туризмге бағытталған бастамаларды ілгерілетуде Еуро Одақтың қолдауына үміт артамыз»,– деді Нұрлыбек Машбекұлы.</blockquote>Айта кетейік, өткен жылы өңірге 774 млрд. теңгеден астам инвестиция, 9 айдың қорытындысымен 205 млн. АҚШ долларынан астам тікелей шетелдік инвестиция тартылды.Экономиканы әртараптандыруда алдағы үш жылда 1 трлн. 900 млрд. теңгенің 48 инвестициялық жобасы іске асырылады. Биылға 100 млрд. теңгенің 21 жобасы жоспарланған.<img src="https://knadmin.beoblood.kz/uploads/Europaly_oda_elshisi_2_8293921f03.jpg" alt="Еуропалық одақ елшісі 2.jpg">

Аймақ басшысы Еуропалық одақтың Қазақстандағы елшісімен кездесті

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев, Денсаулық сақтау министрі Ақмарал Әлназарова, Парламент Мәжілісінің депутаттары Мұрат Әбенов, Мархабат Жайымбетов, Мұрат Ергешбаев бір ауысымда 100 келушіні қабылдайтын емханасы бар 300 төсектік көпбейінді аурухананың (онкологиялық бөлімшесімен) құрылыс алаңына барып, жұмыс барысымен танысты.Облыс тұрғындары үшін аса маңызды әлеуметтік нысан Мемлекет басшысының тапсырмасымен салынуда. Аурухана заманауи техникалық шешімдерді ескеріп жобаланған, ең озық технологиямен қамтамасыз етіледі. Диагностика және емдеу бойынша заманауи стандарттарға сай келетін жоғары технологиялық инновациялар енгізіледі, бұл медициналық көмектің сапасы мен қолжетімділігін арттырады. Осылайша Қызылордада шетелдік клиникалардан еш кем түспейтін заманауи медициналық кешен пайда болады.«Мелиоратор» серіктестігі қолға алған жобаға 36 млрд 416 млн теңге қаржы қаралған. Бұл – аймақтағы халықаралық стандарттарға сай, ең ауқымды жобалардың бірі. Аумағы 57 мың шаршы метр, 7 гектар жерге орналасқан. Нысан 10 блоктан тұрады: емхана, пансионат, конференц-зал, асхана, физиотерапия, қабылдау бөлімі, әкімшілік, реанимация, химиотерапия және радиотерапия, операциялық бөлім.<img src="https://knadmin.beoblood.kz/uploads/whatsapp_image_2026_02_19_at_21_52_34_313d8421f7.webp" alt="Қызылордадағы көпбейінді аурухана жыл соңына дейін пайдалануға беріледі">Құрылысы екі жыл бұрын басталған ғимаратты салу барысында осы уақытқа дейін 21 млрд. теңге қаражат игеріліп, жұмыстың 70 пайызы еңсерілді. Қалған 16 млрд. теңге осы жылы республикалық және облыстық бюджеттен бөлінген. Қазіргі таңда бетон жұмыстары толық біткен, ал кірпіш қалау аяқталып қалды.Жақын арада құрылысшылар терезесін салып, қасбетін бастайды. Сонымен қатар, жылу құбырлары орнатылып, қажетті тораптарға қосылуда. Электр желісі тартылып, тарату нүктелері дайындалды. Құрылыс кестеге сәйкес жүргізілуде. Жоспар бойынша күшейтілген жұмыс режиміне көшіп, жыл соңына дейін құрал-жабдықтарын орнатып, пайдалануға береді.Бүгінде құрылыс басында 200-ге жуық адам, 15 техника бар. Газоблог, инженерлік жүйелерге қажетті материалдар жеткілікті.Айта кетейік, Мемлекет басшысының тапсырмасына сәйкес 12 облыста заманауи перинаталдық орталықтар салу көзделген. Бүгін Қызылорда қаласында халықаралық тәжірибе мен озық медициналық технологиялар енгізілетін 200 төсектік перинаталдық орталықтың іргетасы қаланды. Нысанға 2,7 гектар жер телімі бөлініп, 48,8 млрд теңге қаражат қаралған.Фото: Қызылорда облысы әкімінің баспасөз қызметі

Қызылордадағы көпбейінді аурухана жыл соңына дейін пайдалануға беріледі

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Нұрлыбек Нәлібаев, Денсаулық сақтау министрі Ақмарал Әлназарова, Парламент Мәжілісінің депутаттары Мұрат Әбенов, Мархабат Жайымбетов, Мұрат Ергешбаев, құқық қорғау органдарының бірінші басшылары, мәслихат депутаттары, зиялы қауым өкілдері, ел ағаларының арнайы қатысуымен Титов қыстағындағы 400 орындық &nbsp;жаңа емхананың іргетасын қалау рәсімі өтті.<img class="image_resized" style="width:98.39%;" src="https://knadmin.beoblood.kz/uploads/FB_IMG_1771508282984_85b657f070.jpg" alt="FB_IMG_1771508282984.jpg">Аймақ басшысы жиналған жұртшылықты жаңа нысан құрылысының басталуымен құттықтап, денсаулық саласындағы атқарылған жұмыстарды атап өтті.<blockquote>«Мемлекеттің ең басты байлығы – адам, адамдағы байлықтың негізісі – денсаулық. Деннің саулығы – мемлекеттің дамуы мен өркендеуінің арқауы. Президентіміздің әлеуметтік саясаттағы басым бағыттарының бірі де – халыққа қолжетімді әрі сапалы медициналық қызмет ұсыну. Бүгін біз Қызылорда қаласы үшін, соның ішінде Титов мөлтек ауданының 40 мыңнан астам тұрғындары үшін аса маңызды, тарихи сәттің басында тұрмыз.&nbsp; Ауысымына 400 келушіге арналған №5 қалалық емхананың жаңа ғимаратының іргетасын қалау рәсіміне куә болуға жиналдық. Жалпы 9 млрд. 823 млн. теңгеге салынатын жаңа емхана ғимаратының аумағы 9 мың шаршы метр, заманауи талаптарға сай жоғары сапалы технологиялармен жабдықталады.&nbsp; Бұл – ана мен бала өмірін сақтауға, қазыналы қарттарымыздың денсаулығын жақсартуға бағытталған мемлекет қолдауы. Алдағы уақытта да өңір халқының өмір сапасын арттыруға арналған кешенді жұмыстар жалғасады», – деді Н.Нәлібаев.</blockquote>Іс-шарада Ақмарал Шәріпбайқызы, Мархабат Жайымбетұлы құттықтау сөз алып, Қызылорда облысының құрметті азаматы Тұрғанбай Маханұлы бата берді.Айта кетейік, 2022-2025 жылдары өңірде 26 млрд 400 млн. теңгеге 40 медициналық нысан салынып, пайдалануға берілген. «Ауылда денсаулық сақтауды жаңғырту» ұлттық жобасымен 10 млрд 700 млн. теңгеге бой көтерген 28 нысан бүгінде халық игілігіне айналды. Сонымен қатар, ауыл тұрғындарына шұғыл медициналық көмек көрсету үшін 9 млрд 900 млн. теңгеге 6 жоба іске асырылды.<img src="https://knadmin.beoblood.kz/uploads/FB_IMG_1771508294951_ebbcd2d1aa.jpg" alt="FB_IMG_1771508294951.jpg">Арал, Қазалы, Шиелі, Жаңақорған аудандық көпбейінді ауруханалары жанынан қосымша құрылыстар, Шиелі мен Арал ауданындағы жұқпалы аурулар бөлімшелеріне арнап жаңа ғимараттар салынды.Жергілікті бюджет есебінен Жаңақорған ауданындағы Төменарық ауылында 15 төсектік ауылдық аурухана мен амбулатория, Арал ауданының Сексеуіл кентінде 40 төсектік ауылдық аурухана, облыстық қан орталығы пайдалануға берілді.

Қазақстан және Қызылорда облысының басты жаңалықтары