Kyzylorda-news.kz Аудан әкімі Ардақ Ибраимов жұмыс сапарымен бірқатар ауылда болды. Мақсат – елді мекендердің тыныс-тіршілігімен танысып, жүргізіліп жатқан жұмыстардың жай-күйінен хабардар болу. Ол ең алдымен қоғам қайраткері Темірбек Жүргенов ауылына табан тіреп, елді мекеннің тұрғын үй секторының инженерлік-коммуникациялық инфрақұрылымының электрмен жабдықтау жұмыстарымен танысты.
Бүгінде ауылда мердігер мекеме «Энергомера» ЖШС арқылы электрмен жабдықтау жұмыстары басталған. Жобаның сметалық құны – 423, 871 млн теңге. Оның ішінде құрылыстың сметалық құны – 288, 542 млн теңгені құрайды, жабдықтар – 66, 405 млн теңге. Ал басқа жұмыстар мен шығындар 68, 923 млн теңгені құраған. Желінің ұзындығы ВЛЗ-10 кВ 7 729 м, КЛ-10 кВ 200 м, ВЛИ-0,4 кВ 20 271 метрді құрайды. Қазіргі таңда жоспарланған 314 тұрғын үй тұсына бағана орнату жұмыстары жүргізілуде. 6 айда Т.Жүргенов ауылының тұрғын үй секторларын электрмен жабдықтау жұмыстары толық аяқталады.
Елді мекендегі электр желілерін қайта жаңғырту жұмыстарымен танысқан аудан әкімі Ардақ Әбдіғаппарұлы әдеттегідей мердігер мекеменің назарына әуелі жобаның сапалы аяқталуы қажеттігін салды. Сондай-ақ сала бойынша жауапты бөлім басшыларына елді мекендегі көптен бері оң шешімін тапқан, тұрғындар сұранысындағы жүйелі істің мерзімінде, сапалы аяқтауын қадағалауды тапсырды.
Мұнан кейін аудан басшысы ауыл ардагерлерімен пікір алмасып, ұсыныстарын тыңдады. Ауылда бастау алған ауқымды жобаның іске асуы барысында тұрғындар пікірі маңызды екенін де тілге тиек етті.
Облыс әкімінің тапсырмасына сәйкес ауыспалы егісті сақтай отырып, әлеуметтік маңызы бар азық-түлік өнімдерін өндіруде аудан бойынша «Ер-Әлі» шаруа қожалығы көш бастап тұр. Сөзімізге дәлел ретінде айта кетейік, қыс бойы өткізілген жәрмеңкелерде аталған шаруашылық картоп, сәбіз және қызылша өнімдерін өндірушіден делдалсыз тұтынушыларға арзан бағада ұсынды. Күрішпен кірісін еселеген Сыр өңірінде соңғы жылдары «Ер-Әлі» шаруа қожалығының алмабағында өскен жемістер «Құрманбай ата алмасы» атауымен нарықта өз орнын қалыптастырып үлгерді.
Іс-сапар барысында аудан әкімі Ардақ Ибраимов шаруашылық төрағасы Әліби Бекжановпен бірге қызу тірліктің куәсі болды.
Аталған шаруашылық 2017 жылдан бастап алма өсіруді қолға алған. «Құрманбай ата» деп аталатын бақтың өнімі бүгінде облыс орталығы мен өзге аудандардағы сауда орталықтарының сөрелерінде сатылымда тұр.
Былтыр барлығы 5 гектарға егілген 12 600 көшеттен 20 тонна алма жиналған. Ал биыл шаруашылық төрағасының айтуынша, 30-40 тоннаға дейін өнім жинау жоспарда бар.
Бақта алманың «Гала», «Голден», «Симиринко», «Фуджи» сорттары бар. Тіршілігі тындырымды кәсіп иесі, алмабақтың бағбаны былтыр 310 қаз балапандарын әкелген. 2023 жылы оң нәтижесін берген бұл бастама шаруашылықтың құс етін өндірумен айналысуына сеп болған.
Аудан әкімі өнімді істің бабын тапқан шаруашылықтың тұрғындарға ұсынған татымды өнімдері мен жаңа жұмыс орындары басқаға үлгі етіп көрсетерлік іс екенін жеткізді.
Жалпы бұдан бөлек Темірбек Жүргенов ауылында 90-ға жуық кәсіпорын бар. Тіркелген кәсіпкерлік субьектісінің бүгінде 99 пайызы жұмыс жасап тұр. Бұрын елді мекенде тек егін мен мал шаруашлығында жергілікті тұрғындар кәсібін дөңгелентсе, бүгінде сала түрленген. Қай саланы алып қарасақ та өрлеу мен өсу бар. Ауылда 1 серіктестік, 10 шаруақожалық егін шаруашылығымен айналысады. Олар былтыр 4 021 гектар жерге егін еккен. Оның 1 896 гектарына Сырдың басты дақылын сепкен. Мұнан бөлек 1 135 гектарға ескі жоңышқа күтімге алынып, 492 гектарға жаңа жоңышқа егілген. Нәтижесінде олар мол астықтан тау тұрғызып, жыл сайын рекордтық өнімге қол жеткізіп жүр.
Аудан басшысы бүгінге дейін ауылдарға жасаған жұмыс сапарында әрбір жобаның сапасына мән беру қажеттігін қатаң ескертуден еш жалыққан емес. Бұған дейін Таң ауылдық округіне барған ол ауылдың амбулаториясына жөндеу жұмыстарын жасауды, №118 орта мектептің абаттандыру жұмыстарын, балалар ойын алаңы мен футбол алаңын сапалы жүзеге асыру қажеттігін жеткізген болатын. Осы айтылған тапсырмалардың орындалуымен танысу үшін ол арнайы Таң ауылдық округіне де табан тіреді.
Ауылдық округте бастау алған жобалармен танысып шыққан аудан әкімі Ардақ Ибраимов жауапты сала басшыларына нәтижелі іс болу үшін қатаң бақылау қажеттігін жеткізіп, ел игілігі үшін салынып жатқан жобаларды жоғары сапада жүзеге асыруды тапсырды.
Сондай-ақ ауылдағы көркейту-көгалдандыру жұмыстарын қарқынды жалғастырып, облыс әкімі Нұрлыбек Нәлібаевтың тапсырмасына сәйкес іске асырылып жатқан кәсіпкерлік мақсаттағы бастамаларды тиянақты аяқтауды міндеттеді.
Жалпы Таң ауылының даму динамикасына келсек, тарқатып жазар дүние көп. Әсіресе мұндағы жарқын жобалардың жүзеге асуы жергілікті тұрғындардың тұрмыс сапасына оң әсерін тигізуде. Ауыл – тынымсыз тірлік жасап жатқан елді мекендердің бірі. Әсіресе ауылды көркейту, дамыту жолында жыл сайын жүйелі жұмыстар атқарылуда.
Осылайша іргелес жатқан елді мекендердің тыныс-тіршілігімен танысып, тұрғындардың талап-тілегіне құлақ түрген аудан басшысының жұмыс сапары ауыл ақсақалдарының батасымен қорытындыланды.