Басымыз ауырып, балтырымыз сыздаса, ақхалаттылардың көмегіне жүгінеміз. Себебі денсаулықтың қорғаны – дәрігер. Олар қай кезде де қарбалас жұмыстың басында жүреді. Бастысы, медицина саласының ыстығына күйіп, суығына тоңып, тұрғындардың денсаулығын сақтау негізгі міндеттері екендерін естен шығармайды. Әр минут сайын адам өмірін құтқаруға бар күш–жігерін салатын әрі өмір мен өлім үстіндегі жанның өмірін арашалап, дертіне дауа тауып, әрқашан көмек қолын созуға дайын тұратын ақ халаттылардың еңбегі еселі.
Халық үшін ең маңызды сала – денсаулық сақтау саласында біраз жетістік, ауқымды шаралар жасалды. Соңғы жылдарда апатты жағдайдағы ғимараттардың орнына жаңадан денсаулық сақтау нысандары салынды. Сонымен бірге облыста алғашқы медициналық-санитарлық көмек нысандарының бірқатары жаңғыртылған. Облыс экономикасын қарқынды дамытуда Жалағаш ауданы да шет қалып отырған жоқ. Ауданға қарасты елді мекендердегі медициналық көмек беретін орындар жаңғыртылды, күрделі жөндеуден өтті, пайдалануға берілді. Соның нәтижесінде ауыл тұрғындарына да талапқа сай медициналық көмек көрсетуге мүмкіндік туды.
Аудандағы орталық аурухана ғимараты заманға сай жабдықталып, жасақталып, жаңа үлгімен бой көтерді. Аудан халқының көптен бергі көкейінде жүрген мәселе шешімін тапты. Кең әрі жаңа ауруханада енді жалағаштықтар сапалы медициналық көмек алуда. Дәрігерлер де жыл сайын біліктіліктерін арттырып, адам өміріне деген жауапкершіліктерін сезіне біледі. Кешегі індет жайлаған кезеңде де ауданның ақхалаттылары табандылық танытып, күн-түн демей, уақытпен санаспай жұмыс жасады. Барлық ауырған, індет жұқтырған науқастардың аман-есен отбасына қайта оралуына күш салды. Қашанда адам өмірі бәрінен қымбат дейтін абзал жандармен жолыққанда да мамандықтарына деген адалдығы мен кәсібиліктеріне тағы бір көз жеткіземіз. Аптаның сәрсенбісінде аудандық орталық ауруханаға барып, әр бөлімнің жұмысымен танысып, ондағы жауапты дәрігерлермен азын-аулақ тілдестік.
Аудандық ауруханаға ат басын бұрғанымызда алдымен ең күрделі бөлім – терапия бөлімінің тыныс-тіршілігін бағамдадық. Абзал жандардың тығыз жұмыс кестесін, олардың еңбегін меңгеріп кетпесек те, іштей сезіну үшін ақ халатымызды киіп, бөлімнің әрбір палатасын, емдік бөлмелерін аралап шықтық.
Айта кетейік, жаңа аурухана ашылғанда «Ел игілігіне берілді» деп қалпағымызды аспанға атып, қуанғанымыз рас, бірнеше мәрте газет бетінде сүйіншіледік те. Адамды ауыртпасын дейміз, бірақ палаталардағы науқастармен азды-кем сұхбаттасқанда расымен игілікке берілген нысан екеніне тағы да көз жетті. Олардың ақ халаттыларға айтар алғысы шексіз, жағдайымыз да жақсы дейді. Барлық жағдай жасалғанын, сапалы медициналық қызмет көрсетілетінін және дәрігерлердің ерекше ықыласпен қарайтынын айтады. Жылы әрі жарық бөлмеде алған еміміз де қонымды, жанымыз тыныш дейді.
Терапия бөлімінің бөлім меңгерушісі Әзизбек Жәмкеев бөлімде 2 пост барын айтады. 3 дәрігер, 1 аға медбике, жалпы медбикелер саны – 17, кіші аяжандар – 14. Бөлімше 28 төсек орыннан тұрады. Оның ішінде 8 кардиологиялық, 10 неврологиялық, 7 терапиялық, 3 ревматологиялық төсек орын. Ал терапияның күндізгі стационарында 15 төсек орын бар. Ақылы палата 1 орын. Барлық бөлмелер кең, таза, жылы сумен қамтамасыз етілген. Әрбір палатада 2-4 орындық. Әсіресе риза болғанымыз аурухана мен емхана аралығына жабық жолмен өтуге болатындығы. Емханадан қажетті дәрігерлер ауруханаға баратын болса, айналып жүрмей-ақ жаңағы аспалы қатынас жолмен барып келе береді. “Дені сау адам – қоғамның басты байлығы” деп ғалымдар айтып кеткен. Осы жолда қазірдің өзінде дәрігерлер белсенді кірісіп жұмыс жасауда. Соның бірін мысалға алсақ, терапия бөлімі осы кездері халық денсаулығын сақтау және қорғау барысында айтарлықтай жақсы жұмыстар атқарып жатқаны белгілі.
Дәрігерлер мен медбикелер, медағалар, шаруашылық аяжаны, аспазшы және кіші аяжандардың еңбегі еселі. Әсіресе кіші аяжандардың еңбектері ерекше деп айтар едік. Егде жастағы кісілердің жүріп-тұруы қиын болатыны белгілі. Әсіресе қайта қалпына келтіруде жатқан науқастарға көмек өте қажет. Жуындыру, әжетханаға апару, арбамен тасымалдау сияқты сан қилы жұмыстар атқарылады.
Күндіз-түні еңбек еткен денсаулық сақшыларының бұл – күнделікті жұмысының бір ғана бөлігі. Келген науқастар әртүрлі жастағы адамдар, оның ішінде егде жастағы науқастар үшін күтімі, ем-домы күрделірек болады. Әркім өз ойымен денсаулық сақшыларының еңбектерін ойша салыстырса, көздері жетер еді.
– Медицина саласындағы басты мақсат Қазақстан халқының денсаулығын сақтау, өскелең ұрпақтың саулығын қамтамасыз ету ісіне озық технологиялар енгізу, ауылдағы медициналық қызметтердің сапасын арттыру болып табылады. Осы бағытта халқымыздың дені сау ұлт болып өсіп-жетілу жолындағы ақ халатты абзал жандардың еңбегі зор дер едім. Әсіресе кешегідей індет жайлағанда, ел басына күн туғанда, сын сағатта жауапкершіліктен қашпай, еш мойымай бар күш-жігерін елдің амандығы жолында жұмсаған да дәрігерлер қауымы болды. Сол сәттердегі осы терапия бөлімінің, осындағы ақ халаттылардың қалай қауырт жұмыс жасағанын мен білемін. Өзім де дәрігер деген ардақты атты арқалап жүргендіктен, жауапкершіліктің бәрінен маңызды, ал адам өмірі ең қымбат екенін жақсы түсінемін. Кәсіби біліктілікті үнемі арттырып отыру, мамандықтың қыр-сырын меңгерумен қатар жауапкершілікті үнемі сезіне білу және ең бастысы уақытпен санаспай жұмыс жасай білу маңызды. Жалпы біздің терапия бөлімі күрделі. Мұнда көптеген диагноздағы науқастар емделеді. Мәселен, жүректің ишемиялық ауруы, артериальды гипертензия, өкпенің созылмалы обструктивті аурулары, бронх демікпесі, қант диабеті, анемияның ауыр дәрежелі түрлері, ревматологиялық аурулар, цереброваскулярлы ауру мен дисцир-куляторлы энцефалопатия, ми қан айналымының жедел бұзылысының салдары, эплепсия, бел омыртқаларының остеохондрозы, протрузиясы, грыжасы және созылмалы пиелонефрит, созылмалы холецистит пен созылмалы панкреатит сияқты көптеген ауру түрлері бойынша ем-дом жасаймыз. Дегенмен бөлім күрделі болғанымен, мамандар жеткілікті деп айта аламын. Білікті дәрігерлер де, жұмысына жауапты медбикелер де бар. Осында келіп түскен әрбір науқастың аман-есен үйіне оралуына және ауруханадан шығарда тек алғыс айтып кетуіне күш саламыз, – деген терапия бөлімінің меңгерушісі Әзизбек Жәмкеев ақ халатты абзал жандар деген атқа лайықты болу әр медицина қызметкерінің міндеті екенін айтады.
Осындай күрделі бөлімге меңгерушілік етіп отырған Әзизбек Смағұлұлы еңбек жолын 2009 жылы аймақтық дәрігер, бөлім меңгерушісі болудан бастапты. Одан кейін Алматыда білімін жетілдіріп, невропатолог мамандығын алып шыққан. 2016 жылдан бастап невропатолог дәрігер болса, қазіргі таңда аудандық аурухананың терапия бөлімінің меңгерушісі. Бөлімдегі қырыққа жуық науқас толық әрі өз дәрежесінде ем қабылдап жатыр. Күндізгі стационарда оннан астам науқас бар. Ал бөгде адамның, медбикелердің күтімін қажет ететіндер саны – 8.
Айта кетейік, терапия бөлімінен ақылы 1 орындық палата ашылған. Мұнда ерікті түрде ақылы қызмет аламын, толық ақылы тексеруден өткім келеді деген кез келген адам медициналық көмекке қол жеткізе алады.
Міне, 3 қабатты аурухана ғимараты осы заманға сай салынып, жабдықталған. Жоғары білімді дәрігерлер де жыл өткен сайын көптеп келуде. Түптеп келгенде біздің ең қымбат байлығымыз – өміріміз осы сала қызметкерлерінің кәсібиліктеріне байланысты. Сондықтан да бұл сала иелеріне үлкен жауапкершілік жүктеледі. Басы ауырып, балтыры сыздаған жанның жанына дауа, дертіне шипа бола алатын да осы сала қызметкерлері. Ал денсаулық сақтау саласында талай жыл тапжылмай тер төгіп, еңбегімен елдің ыстық ықыласына бөленіп жүрген білікті жандардың жүріп өткен жолы көпке үлгі деуге болады. Себебі тіршілікке нәр беріп, қалтқысыз қызметін ұсынып, мейірімділік пен жылылықты жанына серік еткен, игілікті мамандық иесі атанған олар қашанда сый-құрметке лайық.