2023-2024 оқу жылында Жалағаш ауданының білім саласында айтарлықтай серпін қалыптасты. Оқушылар арасында өткен облыстық түрлі танымдық байқауларға 300-ден астам оқушы қатысып, олардың 46 пайызы жүлдемен оралған. Ал республикалық деңгейде 29 оқушы жүлдегерлер қатарынан табылып отыр. Алғаш өткен ауыл мектептерінің оқушыларына арналған олимпиаданың республикалық кезеңіне 10 оқушы қатысса, олардың алтауы үздік деп танылған. Нәтижесінде республикада аудандағы әл-Фараби атындағы №201 мектеп-лицейі үздік 10 мектептің құрамына енген. БАҚ өкілдерімен өткен брифингте Жалағаш аудандық білім бөлімінің басшысы Талғат Садықов осылай деді.
Спикер бұл жетістіктерді жоспарлы жүргізілген жұмыстармен байланыстырады. Сондай-ақ ол оқушыларды пәндік олипиадаларға дайындау жұмыстары да нәтижесін бергенін айтады.
– Жаратылыстану-математикалық бағыттағы 6 пән бойынша «Қамбаш» олимпиадалар және қосымша білім беру орталықтары базасында жалпы білім беру ұйымдарының 7-10 сынып оқушылары, яғни 3 кезең бойынша 96 оқушымыз дайындық курстарынан өтті. Пәндік олимпиадаға дайындықты күшейту мақсатында аудандық «Жас дарын» олимпиадалық резерві мектебі құрылып, 122 оқушы қамтылды. Бұдан бөлек ауданда оқушылар дебаттық қозғалысы жалпыұлттық мәдени білім беру жобасы аясында жүзеге асырылуда, 20 дебат клубы белсенді жұмыс жасауда. Пікірсайыс қозғалысы осы оқу жылында мектептерде 481 оқушыны қамтыды. Ерекше білім беруді қажет ететін оқушыларымыз да назардан тыс қалмайды. Биыл алғаш рет «Менің қолымнан бәрі де келеді» атты олимпиада өтті. Олимпиаданың облыстық кезеңіне 3 оқушы қатысып, ІІ, ІІІ орындардан көрінді, – деді Талғат Құрақбайұлы.
Сала басшысы оқушылардан бөлек мұғалімдердің де жетістігі көп екенін айтады. Мәселен, ҚР Оқу-ағарту министрлігі ұйымдастырған «Үздік педагог» республикалық конкурсында Салтанат Қосжанова 3 млн теңге грант иеленген. Өткен жылдың соңында облыс әкімдігінің қолдауымен 1 үздік педагогке 1 млн 35 мың теңге сыйақы берілді. Былтыр мектепке дейінгі білім беру, жалпы орта білім беру, әлеуметтік-педагогикалық қызмет, қосымша білім беру, техникалық және кәсіптік білім беру, дене тәрбиесі және АӘД бағыттары бойынша 40-тан астам облыстық кәсіби байқау өткен. Республикалық кезеңге қатысқан 9 педагог 3 номинациямен марапатталды.
– Педагог – оқытушы ғана емес, ұлт тәрбиешісі. Педагогтердің шығармашылығын арттыру мақсатында түрлі кәсіби байқау ұйымдастырылып, жетістікке жеткен ұстаздарды қолдау, педагог мәртебесін жоғарылату бағытындағы жұмыстар жалғасын табады, – деді ол.
420 түлек мектеп бітіреді
Ауданның бас ұстазы биыл 420 түлек мектеп бітіретінін айтады. Олардың 18-і – «Алтын белгіге» үміткер, ал 43 оқушы – «Үздік аттестатқа» үміткер. Сондай-ақ биыл 9 сыныпты тәмамдайтын 666 оқушының 132-сі – «Үздік аттестатқа» үміткер.
Биылғы маусымның тағы бір ерекшелігі, 27-31 мамыр аралығында 3264 оқушы бірінші рет «Қазақ тілі мен әдебиеті» пәнінен емтихан тапсырады. Емтихан қазақ сыныптарында қазақ тілінен, орыс сыныптарында қазақ тілі мен әдебиеті пәнінен өтеді. Онда 4 дағды, яғни тыңдалым, айтылым, оқылым, жазылым бағаланады. Грамматикалық талдау жасалады. Емтиханның өтетін күнін мектептің педагогикалық кеңесі айқындайды.
Министрлік биыл елдегі ахуалға байланысты мектеп бітіру іс-шаралары болмайтынын мәлімдеген. Артынша бұл шешімін қайта жоққа шығарды. Бірақ ата-аналар тарапынан әлі де күдік басым екен. Оған кешегі брифингте анық көз жеткіздік. Онда осыған қатысты сауалды ата-аналар төтесінен қойды. Яғни оқушылардың мектеп бітіру кеші бола ма, болмай ма? Осы сауалға нақты жауап беруін сұраған.
– ҚР Оқу-ағарту министрлігі тарапынан білім беру ұйымдарындағы мектеп бітіру іс-шараларын өткізудің тұжырымдамасы бекітілді. 24 мамыр күні «Білімім – Отаныма» 1-11 сынып бойынша бірыңғай тәрбие сағаты 9.00-де өткізіледі. Тәрбие сағаты Әнұранмен басталады. Тәрбие сағатында балалардың жыл бойы білім жетістіктері мен қоғамдық белсенділіктеріне тоқталу маңызды. Сонымен қатар Отанға деген құрметін арттыру мақсатында патриоттық тақырыпта шығармалар мен өлеңдер оқу, еліміздің тарихи-мәдени ескерткіштері мен Қазақтың батырлары туралы әңгіме, аңыздардан үзінділер келтіру ұсынылады. Сол күні «Мен. Мектеп. Ұстаз» тақырыбында 9, 11 сынып түлектері эссе жазады. Онда өзінің оқып шыққан мектебіне ыстық ықыласын, ұстазға алғысын білдіреді. Сынып сағаттарында негізінен патриотизм, отанды сүю, достық,татулық, ел тарихына, саяси репрессия мен аштық құрбандарының есіміне құрмет таныту сынды ақпараттар айтылатын болады. Оқу жылының қорытынды салтанатты іс-шарасы 11 сынып оқушылары үшін 25 мамырда өтеді. Салтанатты іс-шараның басталу уақыты – 8.00. Бірақ 45 минуттан аспауы тиіс. Мектеп ауласында ұйымдастырылады. Қатысушылар міндетті түрде мектеп формасында болуы қажет. Барлық білім беру ұйымының басшыларына білім бөлімі тарапынан түлектердің ата-аналарымен сәнді киім-кешекке жұмсалатын шығындардың орынсыздығы туралы түсіндірме жұмыстарын жүргізуге, мерекелік дастарқандарды ұйымдастыруға, жалға берілетін автокөліктерді пайдалана отырып, қалада, қала сыртында экскурсиялар өткізуге жол бермеу жөнінде қатаң түрде тапсырылды, – деді спикер.
Түлектердің 95,4 пайызы
ҰБТ-ға қатысады
Биыл 6-14 мамыр аралығында ҰБТ-ның үшінші кезеңіне өтініштер app.testcenter.kz сайты арқылы қабылданған. Бітірушілер осы тестілеудің қорытындысымен берілетін сертификат арқылы мемлекеттік грант конкурсына қатысады. ҰБТ 16 мамырдан 5 шілдеге дейін жалғасады. Тестілеу пункттері Қызылорда қаласында орналасқан.
Талғат Садықов биыл мектеп бітіретін түлектердің 95,4 пайызы ҰБТ-ға қатысатынын айтады. Олар ҰБТ-ға тіркелу кезінде тестілеу өтетін орынды, күнді және уақытты өздері таңдайды. Тестілеу уақыты – 4 сағат, ал ерекше білім беру қажеттілігі бар балаларға қосымша 40 минут беріледі. Жоғары балл – 140. Тест тапсырмаларының саны – 120. Қатысушыларға Қазақстан тарихы бойынша 20, оқу сауаттылығынан 10, математикалық сауаттылықтан 10 және екі бейіндік пәннен 40 тапсырма беріледі.
Спикер білім ошақтарын қажетті құралдармен жарақтау, кабинеттерді арнайы техникалармен қамтамасыз ету бойынша да бірқатар жұмыс атқарылғанын айтады. Биыл жергілікті бюджеттен 428 млн 936 мың теңгеге 1 мектеп ғимараты күрделі жөндеуден өтеді. Білім мазмұнын арттыру мақсатында мектептерді заманауи пәндік кабинеттермен жабдықтау, бала қауіпсіздігін қамтамасыз ету үшін соңғы үлгідегі бейнекамералар алуға биыл жергілікті бюджеттен 28 млн 800 мың теңгеге жуық қаржы бөлінген. Құрылғылар жаңа оқу жылына дейін білім беру ұйымдарына орналастырылады.
Жалпы ауданда 1-10 сынып аралығында 6 646 оқушы бар. Бүгінде оның 99 пайызын жазғы тынығумен және еңбекпен қамту жоспарда бар. Бұл шараларға міндетті оқу қорынан 12 млн теңге, демеушілік есебінен 7 млн теңге жұмсалады.
Ауданда жазғы демалысты ұйымдастыруға 185 педагог, 15 белсенді студент пен еріктілер тартылады. Биыл мектеп жанынан жұмыс жасайтын жазғы тынығу лагерінде 2 700-ден астам бала демалады. Одан бөлек қала сыртындағы «Ақтерек» лагерінде 7 ауысымда 560 бала демалса, облыстан тыс жерде орналасқан лагерьлерге 100 бала барады.
Брифинг соңында спикер БАҚ өкілдерінің және ата-аналардың бірқатар сауалын да жауапсыз қалдырмады.