Ауылдық елді мекендерді дамыту, ауыл инфрақұрылымын жақсарту мақсатында ауданда ауқымды жобалар жүзеге асырылуда. Соның бірі Жалағаш ауданына Аламесек ауылдық округінде бүгінде 5 көшенің күрделі жөндеу жұмыстары басталып кетті. Жағымды жаңалықты естіген бойда әлеуметтік маңызы бар жобаның жүзеге асырылу барысымен танысу мақсатында ауылға ат басын бұрдық.
Елді мекенге кіреберістен қызу тірліктің көрінісіне тап болдық. Шыны керек, қарқын алған құрылысқа қарасаңыз, көз тойып, көңіл марқаяды. Жол жөндеуге қажетті техникалық көліктер мен жұмысшылар қызу тірлікке кірісіп кеткен. Жол жиектеріне ескертпе белгілері қойылып, сүрілген жолды тегістеп, қиыршық тас төселіп жатыр. Құрылыс басында ауыл әкімі жұмыс жайын егжей-тегжейлі бақылап жүр.
– Биыл ауылда атқарылар жұмыс көп, бірқатар жобаларымыз басталып та кетті. Ауылда 13 ішкі көше бар, оның екеуіне асфальт, ал 3 көшеге тас төселген. Көріп тұрғаныңыздай, бүгінде Төлеген Бейсенбаев, Бөлебай би, Өмірбай шешен, Жаңажарма және Сарман батыр көшелерінің сапасына мән беріліп, күрделі жөндеу жұмыстары жасалуда. Мұнан бөлек ауылда электр желілерін қайта жаңғырту жұмыстары қарқынды жүруде. Нақтырақ айтсам, қазіргі таңда жоспарланған 377 тұрғын үйдің тұсына бағана орнату жұмыстары жүргізілуде, – дейді ауыл әкімі Дәулеткерей Тәжібаев.
Ауыл әкімінің айтуынша, күріш егетін төрағалар да ауылды абаттандыруда белсенді. Тіпті бұған қатысты аудан әкімдігімен арада жасалған арнайы меморандум да бар. Бұл құжаттардың барлығы ауылдың болашағын жарқын етуге арналғаны жергілікті халықты қуантып отыр. Бүгінде олардың бірқатары жүзеге асқан. Сондай-ақ аудан әкімі Ардақ Ибраимовтың ауыл көшелерін жарықтандыру бастамасын да шаруашылық төрағалары бірауыздан қолдап, бүгінде электр бағаналарына жарық шамдары қойылуда.
Жалпы жөндеу жұмыстарының белсенділігі жоғары, мердігер мекеме де ауа райы қолайлы болып, қиындықтар туындамаса, құрылыс жұмыстарын тезірек аяқтап, тұрғындардың игілігіне табыстауға ниетті. Сондай-ақ арықтарға аяқсу өтетін құбырлар қойылып, жан-жағы тегістеліп, үстіне көлік жолы, яғни асфальт жабындысы төселеді. Бүгінде арықтарға сол құбырларды орнату жұмыстары жүріп жатыр.
– Ескі асфальтты толықтай қырып болған соң, көшені әбден тегістеп, жолдың бетіне бірінші топырақ төседік. Толықтай топырақпен тегістеген соң, бетіне қиыршық тас төселеді. Содан кейін асфальт төсеу жұмыстары жүреді. Жалпы 5 көшенің ұзындығы 4 шақырымды құрайды, ал асфальттың қалыңдығы – төселген тасымен есептегенде 10 см, ал асфальттың өзі 5-6 см қалыңдықта болады. Жұмыс барысына ешқандай қиындық туғызатындай мәселе жоқ. Келесі айдың соңына дейін жұмыстарды 100 пайыз аяқтауды жоспарлап отырмыз. Асфальттау жұмыстары аяқталған соң жол белгілері міндетті түрде орнатылады, – дейді мердігер мекеме «Ақтоған» ЖШС бас инженері Нұрдәулет Серікұлы.
Иә, өңірімізде кейінгі жылдары жол құрылысы қарқын алғанын жалағаштықтар жақсы біледі. Былтырдың өзінде, әсіресе ауылдық елді мекендердің бірқатар ішкі көшесі жаңарды. Сондықтан болар, ауыл тұрғындары да жол жөндеу жұмыстарының уәде еткен уақытында басталғанына риза болып, қуаныштарын жасырмауда.
– Биыл ауылымыздың көшелері жаңаратынын естіп, қуанып қалдық. Сол себепті ауыл тұрғыны ретінде аудан басшылығына алғысымды айтамын. Көзіміз көріп отыр, қаншама жұмыс атқарылып жатыр, ауылымыз көркеюде. Халыққа мұнан басқа не керек? Міне, оған қоса жарық жүйесі жаңарып жатыр, – дейді ауыл тұрғыны Байзақ Көшеков.
Құт-берекенің ортасы саналатын ауылды дамыту, тұрғындарға қолайлы орта туғызу ел үшін ең басты қадам екені сөзсіз. Ауыл дамыса, қараша халықтың әл-ауқаты көтеріледі. Сондықтан болар, аудан әкімі Ардақ Ибраимов ауданға қарасты елді мекендердің әлеуметтік әлеуетін көтеретін түрлі мемлекеттік жобаларды жүзеге асыруға аса мән беруде.
Жандос МАХМҰТҰЛЫ