Kyzylorda-news.kz. 2022 жыл Қызылорда облысында да елеулі оқиғаларға толы болды. Барыс жылы «есіктен» кіргеннен ел ішінде дүрбелең басталып, ол тарих бетінде «Қасіретті қаңтар» атауымен қалды. Қасіретті қаңтар оқиғасы, Қызылорда облысының экс-әкімі Гүлшара Әбдіқалықованың Сыр жұртшылығымен қоштасуы, Нұрлыбек Нәлібаевтың облысқа басшы болып келуі, сәбиді құтқарған Сәбит, аймақтың бұрынғы басшысы Қуанышбек Ысқақовтың бостандыққа шығуы барыс жылындағы айтулы оқиғалар екені сөзсіз. Жыл бедеріндегі осы және өзге де басты жаңалықтарды Kyzylorda-news.kz ақпарат агенттігі қорытындылайды.
Қасіретті қаңтар оқиғасы
Жаңа жыл басталғаннан ел іші азан-қазан күйге түсті. Аймақтарда митингке шыққандар қарасы күн өткен сайын көбейіп, шерушілер жолдарды жапты, құқық қорғау қызметкерлері мен мекемелеріне шабуыл жасады. Шеруге шыққандар аймақ басшысына түрлі талап қоя бастады.
Қаңтар айының алғашқы аптасында Қызылорда өңірінде террористік қауіптің қызыл шекті деңгейі енгізілді. Бұл уақытта облыс аумағында террористерге қарсы операция жалғасып жатты. Қарулы топ облыстық, қалалық әкімдікке, Nur Otan партиясы мен облыстық сот ғимаратына шабуыл жасаған. Жарақат алғандар мен мерт болғандар көбейді.
Облыстың сол кездегі әкімі Гүлшара Әбдіқалықова облыстық полиция департаментінің жергілікті полиция қызметіне барып, құқық қорғау саласының қызметкерлері және сарбаздармен кездесті. Сондай-ақ ауруханада ем алып жатқан 5 полиция және әскери қызметшінің жағдайын сұрады.
Қаңтар айының 5 күні жаппай тәртіпсіздік кезінде полиция қызметкерлері жараланып, 5547 әскери бөлімінің сарбазы ауыр жарақаттан оқиға орнында көз жұмды. Көп ұзамай жас сарбаздың өліміне қатысы бар 31 жастағы Қызылорда қаласының тұрғыны анықталды. 29 қарашада Қызылорда соты Қаңтар оқиғасына қатысқан Қазыбек Құдайбергеновті «жаппай тәртіпсіздікке қатысқаны» және «қызмет міндетін атқарған әскери қызметкердің өліміне әкелетін қасақана іс-әрекетке барғаны» үшін айыпты деп танып, 17 жыл түрме жазасын кесті.
Жазушы Әбдіжәміл Нұрпейісов өмірден озды
Қазақ әдебиетіне зор үлес қосқан белгілі жазушы, аудармашы, Ұлы Отан соғысының ардагері Әбдіжәміл Нұрпейісов өмірден озды.
Жазушы 1924 жылы 22 қазанда Қызылорда облысында дүниеге келген. Ол «Курляндия», «Қан мен тер» сияқты танымал романдар жазды. Нұрпейісовтің ең әйгілі шығармасы – «Қан мен тер» трилогиясы 30 шет тіліне аударылып, шетелдік әдебиеттанушылар тарапынан үлкен құрметке ие болды. Романның әдеби сценарийі бойынша көркем фильм түсірілді.
2019 жылы ол өзінің 95 жылдығын атап өтті. Кейін Президент жазушыға «Қазақстанның Еңбек Ері» атағының «Алтын жұлдыз» айрықша ерекшелік белгісін табыс етті. Тоқаев Нұрпейісовке: «Сіз халқымызға керексіз» деген еді.
Қызылорда облысына жаңа әкім тағайындалды
Биылғы жылдың 7 сәуірінде Қызылорда облысының әкімі болып Нұрлыбек Нәлібаев тағайындалды. Ол 2013-2021 жылдар аралығында Қызылорда қаласының әкімі лауазымында болды. 2021 жылдан 2022 жылдың сәуіріне дейін Қазақстан Республикасы Премьер-Министрі Кеңсесінің Өңірлік даму бөлімінің меңгерушісі қызметін атқарды.
Гүлшара Әбдіқалықова Сыр жұртшылығымен қоштасты
Өңірге Нұрлыбек Нәлібаев келгеннен кейін Қызылорда облысының экс-әкімі Гүлшара Әбдіқалықова елордаға аттанды. Сәуір айының бас кезінде Наушақызын Сыр бойының бірқатар шенеунігі құрметпен шығарып салды.
Сәбиді құтқарған Сәбит
Жалағаш ауданының тумасы 36 жастағы Сәбит Шонтақбаев елордада сегізінші қабаттан құлағалы тұрған үш жасар қызды құтқарды. Бұл елді елең еткізге жаңалық болды. Қазақстандықтардың жүрегін елжіреткен видео бір демде әлеуметтік желілерде кеңінен тарап кетті.
Астана қаласына жұмыс істеуге барған бүгінгі күннің батырына «G-Park» компаниясы «Рио-Де-Жанейро» тұрғын үй кешенінен 3 бөлмелі пәтердің кілтін сыйға тартты. Сонымен қатар Төтенше жағдай бірінші вице-министрі генерал-лейтенант Ибрагим Күлшімбаев Сәбит Шонтақбаевты «Төтенше жағдайдағы ерлігі үшін» төсбелгісімен марапаттады. Сондай-ақ батырдың ауылдағы ата-анасына облыс және аудан әкімдерінің құттықтауы жетті.
Айта кетейік, Сәбиттің жанында терезені тіреп, көмек көрсеткен досы да елорданың төрінен пәтерлі болды.
Ысқақов бостандыққа шықты
Қызылорда облысының 7 жылға сотталған экс-әкімі Қуанышбек Ысқақовтың жазасы жеңілдетіліп, мерзімі қысқартылды. 2020 жылдың желтоқсанында Ысқақов «Алаяқтық» бабы бойынша айыпталып, өмір бойына мемлекеттік қызметпен айналысу құқығынан шеттетіліп, 7 жылға бас бостандығынан айырылған болатын. Расында экс-әкімнің бостандыққа шығуы көпшіліктің көңіліне қуаныш ұялатты.
Айта кетейік, Қуанышбек Ысқақов облыстың жыл қорытындысына арналған салтанатты шарада төбе көрсетті. Ол облыс әкімі Нұрлыбек Нәлібаевтың жанында, яғни кештің құрметті қонақтары жайғасқан қатарда отырды. Қызылорда облысының бұрынғы және қазіргі әкімінің салтанатты кештегі суреттері әлеуметтік желіде кең тарады. Көпшілік экс-әкімге құрмет көрсеткені үшін аймақ басшысына ризашылығын білдіріп жатты.
15 жасар Арманның ерлігі
Аралдан арман қуып, оқуға келген 15 жастағы Арман Аманжолов көзсіз ерлікке барып, құдыққа түсіп кеткен баланы құтқарып қалды.
Қала орталығындағы «Универсам» шағын ауданында оқыс оқиға орын алып, екі жарым жастағы сәби ашық тұрған кәріз құдығына түсіп кеткен болатын. Баланың дауысын естіген жасөспірім Арман дереу көмекке ұмтылған. Ол осы батырлығының арқасында көпшіліктің ыстық ықыласына бөленді.
Қызылорда облысындағы педагогикалық тамыз кеңесіде Арман Аманжоловқа 2 бөлмелі пәтердің кілті табысталды. Бүгінгі күннің батырын облыс әкімі Нұрлыбек Нәлібаев құттықтады.
Арман Аманжолов Арал ауданы, Бөген ауылында 2007 жылы дүниеге келген. Бес ағайынды, екі тәтесі, екі ағасы бар. Әкесі Жаңалық жұмыссыз, анасы Майра мектеп асханасында жұмыс істейді.
Сыр өңірі инвестиция тартудан көш басында
Қазан айындағы Үкімет отырысында Қызылорда облысы негізгі капиталға салынған инвестиция бойынша жоғары өсім көрсеткені аталып өтті.
Отырыста Қазақстан Республикасының 2022 жылдың қаңтар-қыркүйек айындағы әлеуметтік-экономикалық дамуының қорытындысы және республикалық бюджеттің атқарылу мәселесі қаралды.
Ұлттық экономика министрі Әлібек Қуантыров өз баяндамасында Қызылорда облысы негізгі капиталға салынған инвестиция бойынша жоғары өсім көрсеткенін атап өтті. Есепті кезеңде инвестиция тарту көлемі 24 пайызға жоғарылаған өңіріміз республика бойынша көш басында тұр.
Шыны зауытынан өнім шыға бастады
Биыл Қызылорда қаласындағы шыны зауыты өнімнің алғашқы партиясын шығарды.
Аймақта құрылысы аяқталған шыны зауытында күйдіру пешінің температурасы қажетті деңгейге жетті. Биыл 9 қазанда алғашқы сынақ өнімі шығарылды. Сынақ сәтті өтті. Зауыт штаттық режимде жұмыс істеп, шыны шығара бастады. Қазіргі кезде шетелден тапсырыстар түсіп жатыр. Атап айтқанда, Өзбекстан, Ресей, Түрікменстан, Тәжікстан, Ауғанстан мен Үндістан қазақстандық шыны өнімдерін сатып алуға дайын.
«Бүгінде 17 мың тонна шыны Астана, Алматы, Шымкент қалаларына жөнелтілді, алдағы уақытта өнімді Өзбекстанға экспорттау жоспарлануда. Биылғы жылы шамамен 30 мың тоннаға жуық шыны шығару жоспарлануда. Зауыт жанынан инвестиция көлемі 100 млрд. теңгеге жуық 8 ілеспе кәсіпорын құру жоспарлануда. Оның үшеуі - шыны талшықтар мен композитті материалдар, айна және жұқа шыны шығару жобалары бойынша жобалау жұмыстары басталды», - деді аймақ басшысы «Бетпе-бет» бағдарламасына берген сұхбатында.
P.S. Құрметті оқырман! Сіздің ойыңыз біз үшін маңызды. Сондықтан облыста жыл көлемінде қандай оқиғалар есте қалды деп ойлайсыз. Өңірде біз ұмыт қалдырған, бәлкім ескермей қалған оқиғалар болса Kyzylorda-news.kz ақпарат агенттігінің әлеуметтік желідегі парақшаларына жазба қалдыруыңызды сұраймыз.
Дайындаған Динара МАХАНОВА