<a href="https://kyzylorda-news.kz/">Kyzylorda-news.kz.</a> Қазіргі кезде адамның барлық қажеттілігі, құрал-жабдықтары&nbsp; электр энергиясын пайдалану және қолдану арқылы өтеді. Өйткені электр энергиясын оңай, аса көп шығынсыз алуға болады. Тұтынушылардың электр желісіне қатысты бірқатар сұрақтарына&nbsp; Атомдық және энергетикалық қадағалау мен бақылау комитеті Қызылорда облысы бойынша аумақтық департаментінің басшысы Саламат Қалжанов жауап берді.
Электр желісіне қосылу үшін не қажет?
– Энергия беруші немесе энергия өндіруші ұйым электр желісіне рұқсат алу үшін көп пәтерлі құрылыстарда тұратын тұтынушыларды қоспағанда әрбір тұтынушыға техникалық шарттар береді.
Қандай жағдайда техникалық шарт электр желісіне қосылу үшін беріледі?
– Энергия беруші немесе энергия өндіруші ұйым қосылу үшінтехникалық шарттарды мынадай жағдайларда:
1) энергия беруші (энергия өндіруші) ұйымның электр желілеріне жаңа енгізілген немесе жаңартылған электр қондырғыларын қосқанда;
2) тұтынылатын электр қуаты бұрын берілген техникалық шарттарда белгіленген қуаттан артқанда;
3) электрменсырттайжабдықтаусхемасы өзгергенде;
4) тұтынушының электр энергиясы қабылдағыштарын электрменжабдықтау сенімділігінің санаты өзгергенде береді.
Электр желісіне қосылу үшін техникалық шарт қандай мерзім аралығында беріледі?&nbsp;
– Энергия беруші немесе энергия өндіруші ұйым тұтынушыдан өтінім алғаннан кейін төмендегі мерзімде жаңа енгізілген немесе жаңартылған электр қондырғыларын қосуға техникалық шарттар береді:
қуаты 200 килоВатт (бұдан әрі – кВт) дейінгі электр қондырғыларына – 5 жұмыс күнінің ішінде;
қуаты 200 кВт – 1000 кВт аралығындағы электр қондырғыларына – 10 жұмыс күнінің ішінде;
қуаты 1000 кВт жоғары электр қондырғыларына – 15 жұмыс күнінің ішінде.
Құрылыс кезінде қандай техникалық шарттар беріледі?
– Салынып жатқан объектілерді электрмен жабдықтау үшін тұтынушыға немесе жергілікті атқарушы органға құрылыс кезінде уақытша техникалық шарттар беріледі.
–Техникалық шарт беруде қандай талаптар бар?
– Тұтынушының энергия беруші ұйымның электрлік желілеріне немесе энергия өндіруші ұйымның электр қондырғыларына қосылуға техникалық мүмкіндігі болған жағдайда, оған техникалық шарттар беріледі.
Техникалық шарттарды беру және қайта ресімдеу үшін төлем алынбайды.
– Тұтынушылардың электр қондырғыларын қайта қалпына келтіру немесе жаңарту үшін құрылыстың жобалау құжаттары қандай мерзімде келісіледі?
– Тұтынушылардың электр қондырғыларының құрылысына, реконструкциясына немесе жаңғыртылуына арналған жобалау құжаттамасы құрылыс-монтаждау жұмыстары басталғанға дейін техникалық шарттарды берген энергия беруші немесе энергия өндіруші ұйыммен келісіледі.
Электр қондырғыларының жобалық шешімдері берілген техникалық шарттарға сәйкестігі мәніне төмендегі мерзімде келісіледі:
қуаты 200 кВт дейінгі электр қондырғыларына – 3 жұмыс күнінің ішінде; 
қуаты 200 кВт – 1000 кВт аралығындағы электр қондырғыларына – 7 жұмыс күнінің ішінде;
қуаты Техникалық шарттардан ауытқу анықталған жағдайда, техникалық шарттарды берген ұйым жобалық құжаттаманы дәлелденген негіздемесін қоса тұтынушыға пысықтау үшін қайтарады.1000 кВт жоғары электр қондырғыларына – 12 жұмыс күнінің ішінде.
– Тұтынушылардың электр орнатқыштарын іске қосуда қандай талаптар бар?
– Энергияберуші (энергияөндіруші) ұйымның тұтынушылардың электр қондырғыларын пайдалануға беру кезінде кернеу беруі мынадай тәртіпте және мерзімде жүргізіледі:
1) энергиямен жабдықтаушы ұйым осы Қағидалардың 4-1- тармағында көрсетілген құжаттарды және тұтынушы қол қойған электрмен жабдықтау туралы шарт жобасын қабылдаған күннен кейінгі 1 (бір) жұмыс күнінен кешіктірмей энергия беруші (энергия өндіруші) ұйымға тиісті хабарлама жібереді;
2) энергия беруші (энергия өндіруші) ұйым энергиямен жабдықтаушы ұйымнан хабарламаны алған күннен кейінгі 3 (үш) жұмыс күнінен кешіктірмей: 
электр энергиясын коммерциялық есепке алу жүйесін пломбалауды жүргізеді; 
электр энергиясын коммерциялық есепке алу жүйесін қабылдау актісін ресімдейді; 
электр энергиясын коммерциялық есепке алу жүйесін қабылдау актісінің көшірмесін энергиямен жабдықтаушы ұйымға жібереді; 
тұтынушының электр қондырғысына кернеу беруді жүзеге асырады.
Энергия беруші (энергия өндіруші) ұйым және тұтынушы электр энергиясын коммерциялық есепке алу жүйесін қабылдау актісінің әрбір тарап үшін бір данадан 2 (екі) данасына қол қояды.
3) энергиямен жабдықтаушы ұйым энергия беруші (энергия өндіруші) ұйымнан электр энергиясын коммерциялық есепке алу жүйесін қабылдау актісінің көшірмесін алған күннен кейінгі 1 (бір) жұмыс күнінен кешіктірмей тұтынушыға электрмен жабдықтауға қол қойылған шартты пошта арқылы немесе өзге тәсілмен жібереді.

Тұтынушылар электр желісіне рұқсат алу үшін қайда баруы керек?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Өткен жылы өңірімізде 3088 адамға 1,3 млрд.теңге көлемінде гранттық қаржы берілген. Қайтарымсыз қаржы алуға кімдер үміткер бола алады, көлемі қанша, қаржыны мақсатты пайдаланбаған жағдайда не болады? Міне осы сауалдарға Қызылорда облысы кәсіпкерлер палатасының Кәсіпкерлікті қаржылай емес қолдау бөлімінің бастығы Гаухар Елеусінова жауап берді.&nbsp;
<img src="https://kyzylorda-news.kz/wp-content/uploads/2020/01/15granty2.jpg" alt="" />
– Гаухар, жалпы кәсіпкерлік мақсаттағы қайтарымсыз гранттың неше түрі бар? Берілетін қаржы көлемі қанша?
– Сәлеметсіз бе. Мемлекеттік гранттар бастапқы бизнесті іске асыруды жоспарлайтын бағдарламаға қатысушыларға өтеусіз және қайтарымсыз негізде беріледі. Кәсіпкерлік мақсатта берілетін қайтармсыз гранттар «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында – 200 АЕК (айлық есептік көрсеткіш, 1 АЕК – 2651 тг), яғни биылғы көрсеткіш бойынша 530&nbsp;200 теңге және «Бизнестің жол картасы-2025» бизнесті қолдау мен дамытудың мемлекеттік бағдарламасы аясында – 3 млн. теңгеге дейін ұсынылады. «Еңбек» мемлекеттік бағдарламасы аясындағы грант қаражаттары бұрын мемлекеттік бағдарламалар шеңберінде грант алмаған Бағдарламаға қатысушылар, оның ішінде жастар, көпбалалы және табысы аз отбасылардың мүшелері, еңбек етуге қабілетті мүгедектер, сондай-ақ қоныс аударушылар мен оралмандар мемлекеттік гранттар алуға үміткербола алады. Ал «Бизнестің жол картасы-2025» бағдарламасы аясында ісін жаңа бастаған, инновациялық бизнес-идеясы бар кәсіпкерлер грантқа үміткер бола алады.
– «Еңбек» мемлекеттік бағдарламасымен қайтарымсыз қаржыны беру қандай актімен реттеледі?
– «Еңбек» мемлекеттік бағдарламасымен грант беру – «Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған “Еңбек” мемлекеттік бағдарламасына қатысушыларға жаңа бизнес-идеяларды іске асыруға арналған мемлекеттік гранттар беру Қағидаларын бекіту туралы» Қазақстан Республикасы Үкіметінің 2018 жылғы 23 тамыздағы № 513 қаулысымен реттеледі. Осы Қағидада грантты беру тәртібі, жобаларға мониторинг жасау, есептілігін жүргізу ережелері нақтыланған.
– Гранттық қаржының негізгі операторы кімдер?
– «Еңбек» мемлекеттік бағдарламасы аясындағы грант қаражаттары Халықты жұмыспен қамту орталықтары арқылы ұсынылады. «Бизнесті жол картасы – 2025» бағдарламасы аясында қайтарымсыз грант – облыстық кәсіпкерлік және туризм басқармасымен ұсынылады.
– «Еңбек» мемлекеттік бағдарламасы бойынша 200 АЕК көлеміндегі грантқа кімдер үміткер бола алады?Оқу курсына қалай қатысуға болады?
– «Еңбек» мемлекеттік бағдарламасы бойынша 200 АЕК көлеміндегі қайтарымсыз қаржыға – бағдарламаның бірінші бағыты шеңберінде оқуды аяқтаған немесе «Бастау-Бизнес» жобасы бойынша кәсіпкерлік негіздеріне оқыту курсынан өткен және бұдан бұрын мемлекеттік бағдарламалар шеңберінде грант алмаған бағдарламаға қатысушылар, оның ішінде жастар, көпбалалы және табысы аз отбасылардың мүшелері, еңбек етуге қабілетті мүгедектер, сондай-ақ қоныс аударушылар мен оралмандар үміткерлер болып табылады.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Бағдарламаның бірінші бағыты бойынша оқу дегеніміз– әртүрлі мамандыққа, мысалы: шаштараз, аспазшы, жихаз құрастырушы, дәнекерлеуші сияқты мамандықтарға қысқа мерзімді курстардан өту. Бұл оқу операторы – жергілікті халықты жұмыспен қамту&nbsp; орталықтары.&nbsp; «Бастау Бизнес» жобасы бойыншакәсіпкерлік негіздеріне оқыту курсы – «Атамекен» кәсіпкерлер палатасы базасында өтеді.
– Грантты алу үшін қайда, қандай құжат тапсыру керек?
– Жаңа бизнес-идеяларды іске асыру үшін мемлекеттік грант алуға үміткер бағдарламаға қатысушы (немесе оның нотариат куәландырған сенімхат бойынша өкілі) жаңа бизнес-идеяларды іске асыруға мемлекеттік грант алу үшін тұратын жері бойынша халықты жұмыспен қамту орталығына жүгінеді және мынадай құжаттарды ұсынады:
&nbsp;&nbsp;&nbsp;&nbsp;&nbsp; 1) Қағидаларға 1-қосымшаға сәйкес нысан бойынша Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасы шеңберінде жаңа бизнес-идеяларды іске асыруға мемлекеттік грант алуға өтініш;
&nbsp;&nbsp;&nbsp;&nbsp;&nbsp; 2) жеке басын куәландыратын құжат, ал оралмандар үшін – оралман куәлігі (салыстырып тексеру үшін құжаттың түпнұсқасы ұсынылады);
&nbsp;&nbsp;&nbsp;&nbsp;&nbsp; 3) әзірленген бастапқы бизнес-жоспар;
&nbsp;&nbsp;&nbsp;&nbsp;&nbsp; 4) кәсіпкердің бағдарлама шеңберінде оқудан өткенін растайтын құжаттың көшірмесі;
&nbsp;&nbsp;&nbsp;&nbsp;&nbsp; 5) кәсіпкердің атынан өтініш беру құқығына сенімхат, сенім білдірілген өкілдің жеке басын куәландыратын құжаттың (заңды тұлғаның атынан – заңды тұлға куәландырған) көшірмесі;
&nbsp;&nbsp;&nbsp;&nbsp;&nbsp; 6) тұратын тұрғылықты жері бойынша тіркелгенін растайтын құжат (мекенжай анықтамасы немесе ауыл әкімдерінің анықтамасы).
– Бұл қаржыны қандай мақсатқа қолдану керек?
Жаңа бизнес-идеяларды іске асыруға арналған мемлекеттік гранттар қаражаты – қажетті еңбек құралдарын, технологиялық жабдықтарды, жануарларды, малды, құстарды сатып алу үшін нысаналы мақсатта пайдаланылады.&nbsp; Гранттар – тұтынушылық мақсаттарға, кредит қарыздарын өтеуге, жылжымайтын тұрғын үй сатып алуға және салуға, жер учаскелерін сатып алуға, акцизделетін өнімдердің өндірісіне және жалдау ақысы ретінде берілмейді.
– Гранттық қаржыны мақсатты пайдаланбаған жағдайда не болады?
– Мемлекеттік гранттардың мақсатты пайдаланылуына мониторингті Кәсіпкерлер палатасы жүргізеді. Бағдарламаға қатысушы мемлекеттік грантты алған күннен бастап үш ай ішінде оның нысаналы пайдаланылуын Қазақстан Республикасының салық заңнамасына сәйкес салық органдарында өз қызметін тіркеу немесе бірыңғай жиынтық төлемді төлеу арқылы растайды. Кәсіпкерлер палатасы шарт жасасқан күннен бастап он екі ай ішінде қаражаттың мақсатты пайдаланылуына мониторинг жүргізеді және жобаны сүйемелдеу бойынша сервистік қызмет көрсетуге (маркетингтік, заңдық, бухгалтерлік және басқа да қызмет түрлері) жәрдемдеседі. Грант иегері мониторинг барысында грант қаражаттары мақсатыз пайдаланылып, басқа бағытта жұмсалғаны анықталса, бағдарлама талаптарына сәйкес ол жөнінде бағдарламаның өңірлік үйлестірушісіне грант қаражаттарын қайтару бойынша тиісті шешім қабылдау үшін жолданады. Өз кезегінде бағдарламаның өңірлік үйлестірушісі грант қаражаттарын бюджетке қайтару бойынша тиісті жұмыстар атқарады.
– Қайтарымсыз қаржы алуға үміткерлер жобасын қарайтын комиссия құрамына кімдер енеді?
– Кәсіпкерлер палатасы жаңа бизнес-идеяларды іске асыруға арналған мемлекеттік гранттарды алуға үміткерлердің өтініштерін қарау үшін атқарушы билік органдары, қоғамдық бірлестіктер, ғылыми-білім беру мекемелері, өңірлік бұқаралық ақпарат құралдары өкілдерінің, салалық сарапшылардың қатысуымен құрамы кемінде 5 адамнан тұратын комиссияны құрады. Комиссия төрағадан, төрағаның орынбасарынан және комиссия мүшелерінен тұрады. Жергілікті атқарушы органдар мен Кәсіпкерлер палатасының өкілдері комиссияның төрағасы бола алмайды.&nbsp;&nbsp;&nbsp;&nbsp;&nbsp;&nbsp; Комиссияның хатшысы комиссия отырыстарын ұйымдастыруды жүзеге асырады, төрағамен келісу бойынша отырыстар өткізілетін орынды, күнін және уақытын айқындайды, комиссия мүшелерін алдағы отырыс туралы хабардар етеді, отырыс өткізу үшін қажетті материалдарды оның мүшелерінің назарына жеткізеді. Комиссия хатшысы оның құрамына кірмейді және шешім қабылдаған кезде дауыс беру құқығы болмайды.

Кәсіпкерлік мақсаттағы қайтарымсыз гранттар: кімдер, қалай ала алады?

<a href="https://kyzylorda-news.kz/">Kyzylorda-news.kz.</a>&nbsp; Қазақтың Ақбаяны, күміскөмей әнші Мәдина Ералиева жалғыз бауыры Сәғира Ералиева өнер иесінің жомарттығы, еңбекқорлығы, бақилыққа аттанар алдында түсіне кірген аяндары мен соңғы күндері туралы айтып берді, деп хабарлайды <a href="https://stan.kz/ayan-tuster-korip-zhanin-koyarga-zher-tappay-zhurdi-mad-324925/">Stan.kz</a>.
<ul>
<li>Қанша жыл өтсе де, халық «Ақбаянын» Мәдина Ералиеваны ұмытпады, әлі еске алады. Мұның сыры кез-келген әнін жүрекпен қабылдап, жүрекпен халыққа жеткізгенінде ме?</li>
<li>Иә, өмірден озғанына 20 жыл өтсе де, халық әлі Мәдинасын ұмыта қойған жоқ. Бір таң қалатыным, Мәдинаның айтып кеткен әндерін кейінгі жастар да нақышына келтіріп орындап жүр.</li>
</ul>
Ол әр әннің бояуына мән беретін, кейде өз дауысына ыңғайлап, аранжировкасын өзгертіп те жіберетініні бар еді. Менде сазгерлердің Мадинашқа ұсынған көптеген әндері жатыр. Бірақ ол солардың ішінде халықтың жүрегіне жетеді-ау дегенін ғана орындайтын. Өз апам болған соң мақтағаным емес, әдемі көйлекті таңдаған сияқты әнге де талғамы мықты болатын…&nbsp;
<ul>
<li>Өзі «Мен күнде әрбір сәтте тек қана қимылдаумен, тыпырлаумен келе жатырмын» деп айтқан екен бір сұхбатында. Еңбекқорлығы ерекше болған дейді…</li>
<li>Өзі «жыбырламаған адамға Құдай бермейді» дейтін кейде. Үйде де, түзде де тынымсыз еді. Қасында тұрған адамды да қарап отырғызбайтын. Үй тазалығына қатты мән беретін, ол барда үй жарқырап тұратын. Ал сырттан үйге кіріп келгенде артынан 10 адам еріп кіргендей үй толып, жарқырап кететін. Сондай-ақ ол ешқашан ауруға &nbsp;бой алдырмайтын еді. Үнемі өзін -өзі күтіп, сырттан &nbsp;келе сала аузы-басын тұзды сумен шайып, сәл салқындап қалса, денесіне қойдың майын сылап, тез емделіп алатын. Адыраспанды көп қолданатын, әсіресе, үйде біреу тұмаумен ауырса, адыраспанды көк түтін етіп, үйді тазартып, залалсыздандырып алатын.</li>
</ul>
Алла тағала Мадинаштың бойына тігу, сурет салу, әншілік, ішкі түйсік, атасынан дарыған ұсталық сияқты жақсы қасиеттерді қос-қосымен берген.
70-80-ші&nbsp;жылдары қазіргідей киімнің түр-түрі болмады ғой. Анамыздан қалған «Зингер» қол машинасымен Мадинаш киім тіге бастады. Тапсырыспен тігіп, қалған-құтқан матадан маған керемет жейде, белдемше тігіп беретін. Әдемі жарасатыны сондай, тастамай 3-4 жыл киетінмін.
<ul>
<li>Жалпы Мәдина Ералиева адам ретінде, әйел-ана, әпке ретінде қандай еді?</li>
<li>Мадинаш Арсен екеумізге əкенің де, ағаның да, бəрінің орнында болды. Ол барда біз əке іздемеппіз. Егер де әке-шешем болса, Мадинаштың маған жасағандай жақсылықтарын жасауға мүмкіндіктері болса да, соншама жағдайымды жасау ойларына келмес еді-ау деп ойлап қоямын кейде… Бірақ әке-шеше мен бауырларыңның көз алдыңда тірі жүргенінен асқан қандай бақыт пен байлық бар?! Балалы-шағалы болып кетсем де, маған көп алаңдайтын, қолы сәл босаса, барын алып үйге жетіп келетін еді.</li>
</ul>
Анам ауруханада көз жұмарда Мадинаш қасында болыпты, 1972 жылдың 12 наурызы, Қызылордадағы педучилищенің музыка бөлімінде 1 курста оқып жүрген кезі болатын. Анам «Сағираға қара, артыңнан ерген қараң ғой» депті. Мадинаш та өмірден өтерін сезді ме, ауырып тұрмын десем, «ауырма, қарағым, ертең мен өлгенде артымда шошайып отыратын адам керек» деп қалған бірде. Егер де бірге қартайсақ, осы күнде қолына екі түйір кәмпит&nbsp;тисе, біреуін міндетті түрде маған ала жүгірер еді.
<ul>
<li>Әпкесі ретінде сізге қандай ақыл-кеңестер айтып отыратын?&nbsp;</li>
<li>Мадинаштай әпке берген Аллама мың да бір рақметімді жаудырамын. 20 жыл өтсе де, үйде, жүрген ортамызда, қызметте Мадинаштың берген ақыл- кеңесі көп көмегін тигізіп жатыр. Әсіресе, әйел адамға керек үй-шаруасындағы барлық тірлікті, ауырғанда қалай күтіну, жылдың төрт мезгілінде талғаммен және жайлы киінуге дейін үйрететін. Ертең барған жеріңде мені кінәлайды деп ісімен үйретіп жүретін.</li>
<li>Бұрынғы сұхбаттарын қарап отырсақ, сөзге де нағыз шешен болған сияқты. Кітап оқуды сүйетін адамның бірі болған деседі. Тіпті әр гастрольдік сапарынан ұлы Арсенге кітап сыйға алып келеді екен…</li>
<li>Мәдинаш – көптің ортасында жүрген адам еді, шешен болмаса да, дұрыс сөйлеуге міндетті ғой. Негізі жөн-жосықсыз көп сөйлейтін, көп сылтау айтатын адамды «тек ауызымен шөп орады» деп &nbsp;ұнатпайтын.</li>
</ul>
Арсенге кітап көп алатын, ол – өте білімді бала, мектеп қабырғасында жүргенде-ақ кітапты күбірлеп көп оқитын. Әсіресе, география, тарих пәнін сүйіп оқитын. Географиядан дүние жүзінің қалаларын, теңіздер мен тау түбегіне дейін тізімін жазып шығатын.
<ul>
<li>Қандай сыйлығы ерекше есте қалды?&nbsp;</li>
<li>Мадинаштың маған жасамаған сыйлығы жоқ, қайсыбірін айтайын! Әрине, барлығын көзіндей көріп, әлі тұтынып, қуана киіп, сақтап жүрмін. Бір қызығы, ешқандай затының cәні кетпеген, ескірмеген.</li>
<li>Мәдина апаймен түр-келбеттеріңіз ұқсайды. Ал мінезіңіз әпкеңізге келе ме?</li>
<li>«Бір анадан ала да туады, құла да туады» дегендей, екеуміз екі түрліміз. Мадинаш ер мінезді, жігерлі, қиындыққа төзімді, шыншыл, адамгершілігі мол, ақ жарқын, көрінген адаммен сөйлесіп кете беретін, қарапайым жан еді.&nbsp;</li>
<li>Түсінде Арыстан-бабтың шақырып, аян беріп жүргенін сұхбаттарының бірінде айтқан. Арсен ағаның айтуынша, өмірінің соңғы күндерінде оңаша қалуды көп қалаған екен…&nbsp;</li>
<li>Жалпы қиындықтарды басынан өткерсе, жолы болмай жүрсе, ыңғайсыз түс көрсе, кез-келген әйел заты бірден құмалақшыға жүгіреді емес пе? Мадинаш та соңғы кездері қасына кілең құмалақ ашатындарды алып жүрді. Қаланың ішінде жүрсе, шаруаларын бітіріп келе жатып, маған үйге кіріп шығатыны бар еді.</li>
</ul>
Бірде үйге кірген бойда «жаңа құмалақ аштырдым, ұзақ жасайсың деп айтты» деп, маған ойлана қарады. Кейін ойлап отырсам, аян түстер көріп, жанын қоярға жер таппай жүрген кезі екен ғой. Соңғы кездері «мен аман болайын, кілең жетімді асырап отырмын» деген сөзді бір түрлі сыйынып айтатын.
Бір жолы марқұм кинорежиссер Шәкен Айманов түсіме енді. Мадинаштың жатын бөлмесінде төсегінің үстінен термометрді жанталасып іздейді екен деймін. Қайтыс болған кісіге түсіңде зат беруге болмайтынын білемін ғой, барынша термометрді жасырамын. Қайдан білейін, өзі де ыңғайсыз түстер көріп, қорқып жүргенін, осы түсімді Мадинаштың өзіне де айтып бердім.
Сондай-ақ соңғы күндері маған мешіттен шағын-шағын Құран кітаптарын алып беріп жүрді.
Мадинаш туралы тағы бір естелік.&nbsp;Макеш деген құмалақшы əйелді қасынан тастамай алып жүретін болды. Салдырлап қалған ақ көңіл кісі болатын. Соңғы айлары ма деймін, Мадинаштың үйінде жүргенмін. Макешпен үйге кіріп,&nbsp;тамақтанып болған соң концертке баруға боянып отырып, Мадинаш Макешке құмалақ аштырып отырды. Қалай сенбессің, өмірінде болатын жағдайды шамамен айтып отыр. Бірақ менің ол кезде қаперіме де кірген жоқ Құмалағын жинай бастағанда маған да ашуын сұрадым. Құмалағын шашып жіберіп, “ойбуу, басыңның іші быт-шыт демесі бар ма”?! Əйтеуір өмір сүремін ба деп сұрадым. Ана жерде бізге қарама-қарсы боянып отырған Мәдина “сен мені көмесің” демесі бар ма…
<ul>
<li>Ғұмыры қысқа болды деген өкініштер жиі бола ма?</li>
<li>Мадинаш қысқа өмірінде ештеңе көрмей кетті деп айта алмаймын. Жақсы-жақсы адамдармен араласты, есте қалатындай небір қызықты және қиындықтарды да көрді, дүние жүзін аралады деп өзімді жұбатамын. Тек бір ғана өкінішім – немерелерін көре алмай кетті.</li>
<li>«Әйел қашан сұлу болуы керек» деп үнемі айтып жүреді екен. Мәдина апай өз-өзіне күтім қалай жасайтын еді?</li>
<li>Әйел адам бойынан нұр шашып, сұлу болу үшін, ең бірінші, ішкі жан-дүниесі таза болу керек шығар. Мадинаш өтірік айту білмейтін, өз ісіне адал, көп қозғалып, тез жүретін жан еді. Жылдың төрт мезгілінде де ауа-райына тіл тигізбей жайлы киінетін. Дене күтіміне кілең дәріханадағы&nbsp;біз мән бермейтін глицерин, фурациллин сияқты нәрселерді алып, жұмыртқаға араластырып, түрлі кремдер жасап, бетін тазалап отыратын.&nbsp;</li>
<li>Мадина апай жұлдызды әріптестерінің арасында кіммен жақсы дос құрбы болды?</li>
</ul>
Мадина барлығымен бірдей араласатын. Бірақ әншілер арасында ешкіммен жақын дос болмады
<img src="https://kyzylorda-news.kz/wp-content/uploads/2019/12/madina-eralieva1.jpg" alt="" />

Мәдина Ералиева өмірінің соңғы күндерінде түс көріп, неліктен қатты қиналған?

<a href="https://kyzylorda-news.kz/">Kyzylorda-news.kz.</a> Қызылорда облысы кәсіпкерлер палатасы кеңесшілерімен осы жылдың 10 айында 1810 кәсіпкерлік субъектісіне 2136 қызмет көрсетілген. Мұнан өзге, Кәсіпкерлер палатасының аудандардағы Кәсіпкерлерге қызмет көрсету орталықтарындағы кеңесшілер 10 айда 4 мыңнан астам адамға 8069 кеңес берген.
Бүгінгі сұхбатта кәсіпкерлерге көрсетілетін сервистік қызметтер, Палата жанындағы, сондай-ақ облыстық кәсіпкерлік және туризм басқармасы жанындағы Кәсіпкерлерге қызмет көрсету орталықтарының қызметі туралы айтылады. Сауалдарға Кәсіпкерлер палатасының сарапшысы Гүлнұр Құрмантаева жауап береді.
– Біз көбіне кәсіпкерлердің алған сервистік қызметінің санын айтамыз. Жалпы осы сервистік қызметтерге қандай қызмет түрлері кіреді?
– Кәсіпкерлер палатасы жанындағы кәсіпкерлерге қызмет көрсету орталықтарында кәсіпкерлік субъектілеріне және жеке тұлғаларға сервистік қызметтер көрсетіледі. Сервистік қызмет бізде 8 қызмет түрі бойынша ұсынылады. Олар бухгалтерлік және салық есептілігін жүргізу, сондай-ақ статистикалық есептілікті жасау қызметтері, кеден рәсімдері бойынша қызметтер, кәсіпкерлердің және кәсіпкерлік бастамасы бар тұрғындардың өтінімдерін сүйемелдеу, заң қызметтері, маркетинг сұрақтары бойынша қызметтер, ақпараттық технологиялардың қызмет көрсетуі саласында кеңес беру қызметтері, мемлекеттік сатып алулар, ұлттық компаниялар мен жер қойнауын қолданушылардың сатып алулары бойынша қызметтер, мемлекеттік-жекешелік әріптестік саласындағы қызметтер. Мәселен, кәсібін енді ашып жатқан азамат бухгалтерлік есепті жүргізуді, оны тапсыру мерзімін, тәсілдерін біле бермеуі мүмкін. Бұл қызметтерді Кәсіпкерлер палатасының мамандары тегін, кедергісіз тапсырып бере алады. Кәсіпкер ретінде қалай, қайда тіркелу керек, жарғылық құжаттарды қалай дайындау қажет деген, сондай-ақ өзге де сауалдар бойынша заңгер-кеңесшімізге жүгінуге болады. Декларацияларды толтыру, өнімдерді экспортқа шығару үшін қажет құжаттарға қатысты сұрақтарға кедендік рәсімдер бойынша кеңесші жауап береді. Енді кәсібін бастағысы келіп жүрген азаматтар жобасына қаржы алу үшін қаржы институттарына барғанда қолдарына жинақталуы тиіс құжаттардың тізімі беріледі. Алайда бизнеске енді келіп жатқан жандар қай құжатты қай жерден алу қажеттігін толық біле бермейтін кездер кездеседі. Бұл сауалдар бойынша Кәсіпкерлерге қызмет көрсету орталығында жобаларды сүйемелдеу жөніндегі кеңесшігі жүгіне алады. Кәсіпкерлер палатасының барлық кеңесшілері кәсіпкерлерге, сондай-ақ кәсіпкерлік бастамасы бар азаматтарға кәсіпкерлік саласындағы мемлекеттік бағдарламалар жөнінде кеңес береді.
Тағы бір айтып өтетін жайт, сервистік қызметтер онлайн және офлайн режимде көрсетіледі. Онлайн режимде кеңес алу үшін&nbsp;<a href="http://www.services.atameken.kz/">www.services.atameken.kz</a>&nbsp;порталына тіркеліп, қажетті қызмет түрін таңдай отырып, қажетті сауалын қоя алады. Ал офлайн қызмет Кәсіпкерлер палатасының Кәсіпкерлерге қызмет көрсету орталықтарында (аудандарда да филиал жұмыс жасайды) бухгалтерлік, заңгерлік, маркетинг сұрақтары бойынша, сондай-ақ жобаларды сүйемелдеу – барлығы 4 қызмет бойынша көрсетіледі.
–&nbsp;Ендігі бір мәселе, кәсіпкерлерге сервистік қызметтерден өзге, Кәсіпкерлерге қызмет көрсету орталықтарында кеңесшілер кеңес те береді. Ол кеңес түрлеріне не жатады?
– «Бизнестің жол картасы» мемлекеттік бағдарламасының төртінші бағыты қаржылай емес қолдауды көздейді. Бұл бағыттың ресми операторы «Атамекен» Ұлттық кәсіпкерлер палатасы. Қаржылай емес қолдау аясындағы қызметтер аудандар мен Байқоңыр қаласында Кәсіпкерлікті қолдау орталықтарында, Қызылорда қаласында Кәсіпкерлерге қызмет көрсету орталығында көрсетіледі. Аталмыш орталықтарда жеке тұлғалар мен кәсіпкерлік субъектілері мемлекеттік бағдарламалар, қолдау тетіктері туралы жан-жақты ақпарат ала алады. Ол жерде арнайы менеджер-кеңесшілер отыр. Кеңесшілер «Қандай қаржы ұйымынан, қанша пайызбен, қандай мемлекеттік бағдарлама аясында несие алуға болады? Қандай құжаттарды, қайда тапсыру керек?», – деген мәселелер аясында кеңес береді.
– &nbsp;&nbsp;«Кәсіпкерлер үйінде» 2 Кәсіпкерлерге қызмет көрсету орталығы орналасқан. Олардың негізгі міндеттері қандай? Олар бір-бірін қайталамай ма?
– Дұрыс айтасыз. Бізге келген кәсіпкерлер кейде шатасып қалатын жағдайлар бар. Кәсіпкерлер палатасы жанындағы Кәсіпкерлерге қызмет көрсету орталығының мамандары, жаңа сұхбатымда айтып өткендей, 8 қызмет түрі бойынша сервистік қызмет көрсетумен айналысады. Ал Кәсіпкерлік және туризм басқармасы жанындағы «Кәсіпкерлерге қызмет көрсету орталығы» мемлекеттік коммуналдық мекемесі жердің нысаналы мақсатын өзгерту, коммуналдық қызметтерге қатысты техникалық шарттар алып беру қызметтерін көрсетеді. Бұл қызметтер арқылы біз бір-бірімізді толықтырып отырамыз. &nbsp;
– Сұхбатыңызға рахмет!

Кәсіпкерлерге көрсетілетін сервистік қызмет түрлерін білесіз бе?

<a href="https://kyzylorda-news.kz/">Kyzylorda-news.kz.</a> Кәсіпкерлік мақсаттағы жер телімдері мәселесі туралы кәсіпкерлер нені білу керек? Қандай құжаттар әзірлеу қажет? Қайда баруы керек? Аталған сауалдарға Кәсіпкерлер палатасының Қаржылай емес қолдау бөлімінің бастығы Гаухар Елеусінова жауап береді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Жалпы кәсіпкерлік мақсаттағы жер телімдеріне арналған аукциондар, конкурстар туралы ақпараттар қайда жарияланады? Кәсіпкерлер қайдан көре алады?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Аукцион және конкурс өткізу тәртібі Жер кодексінің 43 және 43-1 баптарына сәйкес реттеледі. Конкурсқа, аукционға шығарылатын жерлер туралы хабарлама жергілікті бұқаралық ақпарат құралдарында, оның ішінде жер қатынастары бөлімдерінің конкурс жариялауы нәтижесінде ұтқан БАҚ-да жарияланады. Мысалы, Қызылорда қалалық жер қатынастары бөлімі «Ақмешіт ақшамы» газетінде жариялайды. Қосымша жергілікті атқарушы органның ресми интернет-ресурстарында орналастырылады. Сондай-ақ, жер қатынастары бөлімдерінің ақпараттық қабырға тақталарында міндетті түрде болуы керек.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Кәсіпкер бос тұрған жердің статусын қалай анықтай алады? Сол жерді аукционға қалай шығаруға болады, әлде тек мемлекеттік орган жариялаған жерді ғана алуға мүмкіндік бар ма?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Осы жылдың мамыр айында Жер кодексіне өзгеріс енгізілді. Сол өзгеріске дейін ауылшаруашылығы мақсаттағы болсын, елді мекендердегі ғимараттар үшін өндірістік мақсаттағы жерлер де аукцион арқылы беріліп келді. Жер қатынастары саласындағы нормативтік құжаттардағы өзгерістерден кейін ауылшаруашылығы мақсатындағы жерлер тек конкурс арқылы берілетін болды. Аукцион арқылы елді мекеннен, яғни қаланың ішінен өндірістік мақсатта немесе ғимарат, жылыжай салу үшін жер алғысы келген азамат қалалық әкімдікке алғысы келетін аумағынан, көлемін, мақсатын көрсетіп тұрып өтініш береді. Кәсіпкердің өтінішіне сәйкес жер қатынастары бөлімі аталмыш аумақтағы жер телімін зерттейді. Аталмыш жер телімі бос болып, өтініште көрсетілген мақсатта пайдалануға сай келсе жер қатынастары бөлімі тарапынан ол жерге алдын ала таңдау актісі жасалып, қалалық сәулет және қала құрылысы бөлімі арқылы келісім алынып, аукционға салуға дайындалады. Кей жерлер бос тұруы мүмкін, бірақ зерделей келе ол жер телімінің меншік иесі бар, әлі құрылыс жұмыстарын жүргізбеген болуы ықтимал. Келесі бір жағдайда жер телімін өндіріс үшін деп сұратады. Өндірістік мақсаттағы ғимараттарға елді мекеннің ортасынан, халық тұрып жатқан аумақтан өндіріске жер беруге болмайды. Көбіне өндірістік мақсаттағы жер телімдері шет аумақтан немесе индустриалды аймақтан аукцион арқылы беріледі.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Белгілі бір жер телімін кәсіпкерлік мақсатта алуға өтініш бергеннен кейін, оны аукционға шығару үшін қанша уақыт кетеді?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; –&nbsp; Ең бірінші жер қатынастары бөлімі 15 күн ішінде сіздің өтінішіңіз бойынша тікелей жердің табысталмайтындығы туралы жауап беруге міндетті. Мұнан кейін жер қатынастары бөлімі егер жер талаптарға сай келетін болса 90 күн ішінде аукционға немесе конкурсқа шығару қажет.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Бұрын ауыл шаруашылығы мақсатындағы жер телімдерінің конкурсын өткізгенде негізгі мәселе бағада болатын. Яғни, жоғары баға берген адам жеңімпаз болып табылатын. Қазір балдық жүйемен ол жерге салатын инвестициясына қарайды екен. Осы туралы айтып өтсеңіз…
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Ауыл шаруашылығы мақсатындағы жер телімдерінің конкурсына өтінім тапсырған кезде өтініммен бірге конкурстық ұсынылым тапсырылады. Конкурстық ұсынымға бизнес-жоспар, сол жер телімін тиімді пайдалантындығы туралы міндеттемелері, ашатын жұмыс орнының саны жөнінде мәліметтер қамтылады. Осы жерде кәсіпкерлер ескеруі тиіс жағдай: ертеңгі күні конкурста жеңімпаз атанған жағдайда бизнес-жоспар келісім шарттың ажырамас бөлігі болып саналып, жоспардың ішінде кәсіпкер көрсеткен ашатын жұмыс орындарының саны, салатын инвестициясы, алынатын техникалары туралы ақпараттар орындалуы тиіс міндетке айналады. Кейде кәсіпкерлер бизнес-жоспарда осындай ақпаратты көбірек жазсам ұту мүмкіндігім жоғары болады деп ойлайды. Сол үшін де Кәсіпкерлер палатасының кеңесшілері бизнес-жоспарды әзірлеу барысында бұл жөнінде кәсіпкерді алдын ала ескертеді. Кейін мониторингтік комиссия бизнес-жоспардағы міндеттемелердің орындалуын тексеру барысында егер міндеттемелер орындалмаған жағдайда келісім шартты бұзуға алып келеді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Сұхбатыңызға рақмет!

Қазақстан және Қызылорда облысының жаңалықтары: Сұхбат

Тұтынушылар электр желісіне рұқсат алу үшін қайда баруы керек?

Кәсіпкерлік мақсаттағы қайтарымсыз гранттар: кімдер, қалай ала алады?

Мәдина Ералиева өмірінің соңғы күндерінде түс көріп, неліктен қатты қиналған?

Кәсіпкерлерге көрсетілетін сервистік қызмет түрлерін білесіз бе?

Қызылордада кәсіпкерлік мақсаттағы жер телімдерін қалай алуға болады?

Оңаш Мәжитова: «Қазақта бүтін ұрпаққа «идеал» бола алатын тұлғалар бар»