<a href="https://kyzylorda-news.kz/">Kyzylorda-news.kz</a> Германия Федеративтік Республикасының туристік ассоциациясы өкілдері Қазақстан тарапынан жасалған арнайы шақыртуы бойынша Сыр өңіріне табан тіреді.Делегация өкілдері ең алдымен Қызылорда облысының басты туристік аймақтарының бірі – Байқоңыр қаласынан бастады. Делегация мүшелері әлемге әйгілі ғарыш айлағын аралап, оның тарихымен және бүгінгі тыныс-тіршілігімен жан-жақты танысты.Бұдан кейін шетелдік меймандар Қорқыт ата мемориалдық кешеніне барып, аймақтың рухани-мәдени құндылықтарына терең үңілді. Қазақ халқының мәңгілік мұрасы саналатын Қорқыт атаның өмір жолы мен шығармашылығына қатысты жәдігерлерді тамашалап, Сыр бойының бай тарихына ерекше қызығушылық танытты.Сапар қорытындысында делегация өкілдері Қызылорда облысы әкімінің орынбасары Ардақ Темірханұлы Зебешевпен кездесті. Кездесу барысында тараптар Сыр өңірінің туристік әлеуетін дамыту, шетелдік туристерді тарту, екіжақты ынтымақтастықты кеңейту мәселелерін талқылады.Айта кетейік, Германия Федеративтік Республикасының туристік ассоциациясы – 4000-нан астам компанияны біріктіретін, неміс азаматтарының ұйымдастырылған туристік сапарларының 90 пайызын қамтитын елдегі ең ірі салалық ұйым. DRV қауымдастығы Германияда ғана емес, халықаралық деңгейде де туризмнің дамуына ықпал ететін стратегиялық маңызды ұйым болып табылады.Келесі жылы аталмыш ассоциацияға мүше 70 туристік оператор Қазақстанға, соның ішінде Байқоңыр ғарыш айлағына да арнайы сапар ұйымдастыруды жоспарлап отыр. Бұл өз кезегінде еліміздегі туризмді ілгерілетуге, Сыр өңірінің халықаралық деңгейдегі танымалдығын арттыруға зор мүмкіндік бермек.Фото: Қызылорда облысының дене шынықтыру, спорт және туризм басқармасы

Германиядан келген делегация өкілдері Сыр өңірінің туристік нысандарымен танысты

<a href="https://kyzylorda-news.kz/">Kyzylorda-news.kz</a> "Қайрат" – "Реал Мадрид"&nbsp;ойыны билеттері шамамен 20 қыркүйекте сатылымға шығады. Бұл туралы орталық коммуникациялар қызметінде өткен брифингте туризм және спорт вице-министрі&nbsp;Серік Жарасбаев&nbsp;мәлімдеді.&nbsp;Бұл туралы&nbsp;<a href="https://stan.kz/kayrat-real-madrid-oyininin-biletteri-20-kirkuyekte-sat-422938/">Stan.kz</a>&nbsp;ақпарат агенттігі хабарлады.<blockquote>"Қолымыздағы ақпарат бойынша, билет сату ойыннан 10 күн бұрын басталады. Яғни, егер ойын 30 қыркүйекте өтетін болса, онда сатылым шамамен 20 қыркүйекте басталады", – деді Жарасбаев.</blockquote>Вице-министр ойын билеті қанша тұратынын білмейтінін, "Қайрат" клубы бағаны сұранысқа сүйеніп белгілейтінін айтты. Айтуынша, билеттерді "Қайрат" клубының сайты немесе оның әлеуметтік желідегі ресми аккаунттарынан алуға болады.Айта кетейік, "Қайрат" – "Реал Мадрид" кездесуі 30 қыркүйекте Алматыда өтеді.Бұған дейін 26 тамызда алматылық "Қайрат" өз алаңында Шотландияның "Селтигін" қабылдады. Плей-офф раундында алматылықтар екі кездесудің қорытындысы бойынша Шотландияның "Селтик" клубынан мықтырақ болды. Глазгода және Алматыда өткен ойындар 0:0 есебімен аяқталды, ал пенальти сериясында қазақстандық футболшылар 3:2 есебімен жеңіске жетті.Фото: f.c.kairat Instagram парақшасынан алынды

"Қайрат" – "Реал Мадрид" ойынының билеттері 20 қыркүйекте сатылымға шығады

<a href="https://kyzylorda-news.kz/">Kyzylorda-news.kz</a> &nbsp;Қызылорда облысында бұқаралық спортпен шұғылданушылар саны жылдан жылға ерекше қарқынмен артып келеді. Бүгінде аймақта 342 223 адам яғни халықтың 40,4 пайызы спортпен жүйелі түрде айналысады. Бұл туралы облыстық дене шынықтыру, спорт және туризм басқармасының басшысы Бахтияр Ғарифоллаұлы Орталық коммуникациялар қызметінің ақпараттық алаңында баяндады.Облыста бұқаралық спортты одан әрі дамыту аясында осы жылдың І жарты жылдығында облыс көлемінде 491 спорттық іс-шара ұйымдастырылып, оған 98 мыңнан астам адам белсенді қатысқан. Жыл соңына дейін ауқымды спорттық шаралар тізімі бекітіліп, маңызды жарыстардың күнтізбесі де енгізілді.Облыста жоғары білікті спортшылар және спорт резервін әзірлеу мақсатында басқармаға қарасты 33 спорт мекемесі жұмыс істейді. Оның 21 – балалар-жасөспірімдер мектебі, 1 – мектеп-интернат-колледжі, 2 – жоғары спорт шеберлігі мектебі, 1 – олимпиадалық резерв даярлау орталығы, 8 – спорт клубы бар. Сәйкесінше спорт мектептерінде 48 спорт түрінен 670 жаттықтырушы-оқытушы 22 655 спортшыны кәсіби бағытта тәрбиелеуде. Жалпы спорт түрлері бойынша ҚР Ұлттық құрама командасына Қызылорда облысынан 585 спортшы енгізілген. Спорт саласына көрсетілген осы қолдаулардың арқасында Сыр спортшылары ҚР чемпионаттары мен кубоктарынан 118 алтын, 103 күміс, 151 қола медаль жеңіп алса, Әлем және Азия чемпионаттары мен кубоктарынан 36 алтын, 22 күміс, 42 қола еншіледі.Осы ретте, аймақтың спорт саласын дамытуда жүйелі реформаларды сәтті жүзеге асыру маңызды бағыттардың бірі. Осыған орай, биылдан бастап мемлекеттен бөлінген қаржының басым бөлігі олимпиадалық спорт түрлеріне жұмсалатын болады. Бұл бағыттағы жұмыстар алдағы уақытта да жүйелі түрде жалғасатын болады.

Сыр өңірінде бұқаралық спортпен айналысушылар саны 40,4 пайызды құрады

<a href="https://kyzylorda-news.kz/">Kyzylorda-news.kz</a> "Қайрат – Реал Мадрид" ойынының тізгінін кім ұстайтыны белгілі болды. Бұл туралы Stan.kz ақпарат агенттігі хабарлайды.Айта кетейік, матчтардың нақты кестесі 30 тамызда белгілі болады. Чемпиондар лигасы жалпы кезеңінің ойындары 16 қыркүйектен 28 қаңтарға дейін өтеді деп жоспарланған. Жеребе бойынша “Қайраттың” қарсыластары – мадридтік “Реал Мадрид”, белгиялық “Брюгге”, грециялық "Олимпиакос" және кипрлық "Пафос" командалары Қазақстанға келеді.Сонымен қатар "Қайрат" миландық "Интер", лондондық "Арсенал" және лиссабондық "Спортинг", даниялық “Копенгаген” футбол клубтарымен қонақта ойнайды.Танымал спорт блогері, желіде archibaaalt атымен белгілі Артур Асқарұлы "Қайрат – Реал Мадрид" футбол матчының комментаторы болатынын жазып, қуанышын қойнына сыйдыра алмады. Тіпті, көз жасына ерік берді.<blockquote>“Арманым орындалды. Матчты мен жүргізетін болдым”, – деп жылады блогер.</blockquote>Фото:&nbsp;https://www.instagram.com/archibaaalt

"Қайрат-Реал Мадрид" ойынын стадионда кім жүргізетіні белгілі болды

<a href="https://kyzylorda-news.kz/">Kyzylorda-news.kz</a> Испандық клуб басшылығы&nbsp;алдағы кездесу туралы пікір білдіріп, оның қиындығын атап өтті. Бұл туралы <a href="https://stan.kz/real-chempiondar-ligasinda-kayratka-karsi-aldagi-oyindi-422731/">Stan.kz</a> ақпарат агенттігі хабарлайды.Мадридтік "Реал" тарихында алғаш рет 2025/2026 жылғы маусымдағы Чемпиондар лигасының топтық кезеңінде алматылық "Қайратқа" қарсы ойнайды."Реалдың" институционалдық байланыстар жөніндегі директоры Эмилио Бутрагеньо Real Madrid TV арнасына берген сұхбатында матчтың оңай болмайтынын айтты:<blockquote>"Біз бұрын-соңды оларға қарсы ойнаған жоқпыз, әрі олар өте алыс орналасқан. Бұл — тығыз күнтізбемізді ескерсек, қосымша фактор. Біз жақсы дайындалып, жоғары деңгейде ойнауымыз қажет, әрбір детальға назар аударуымыз керек. Мұның бәрі ойынды адамдар ойлағаннан да күрделірек етеді", – деді Бутрагеньо өз сөзінде.</blockquote>Шетелдік басылымдар да логистика мәселесінің маңыздылығын атап өтті. Мәселен, Managing Madrid порталы былай деп жазды:<blockquote>"Әрбір матч маңызды болады, барлық қарсыластар ерекше ынталанған. Біз жоғары деңгейде ойнап, әрбір детальға назар аударуымыз керек".</blockquote>Бұған дейін испан журналистері алдағы сапарды "әлемнің шетіне саяхат" деп атаған еді.&nbsp; Айта кетейік "Реал" Қазақстанға ресми ойын үшін алғаш рет келеді.Фото: Kursiv.kz

"Реал" Чемпиондар лигасында "Қайратқа" қарсы алдағы ойынды бағалады

<a href="https://kyzylorda-news.kz/">Kyzylorda-news.kz</a> Әлі күні белгіленбеген “Қайрат – Реал Мадрид” матчына билеттер сатыла бастады. Қазақстандықтар билеттердің шын екеніне күмән келтіріп жатыр. Бұл туралы <a href="https://stan.kz/otetin-kuni-belgilenbegen-kayrat-real-madrid-oyinina-bi-422730/">Stan.kz</a> ақпарат агенттігі хабарлайды.Рortalbilet.kz сайтында “Қайрат – Реал Мадрид” матчына билеттер сатылып жатыр. Билеттердің ең арзаны 236 мыңнан басталып, 2 миллион теңгеден асады.Сайтта билетті брондау уақыты – 30 минут делінген. Өтетін күні белгіленбегенҚазақстандықтар да сайттан билеттердің сатылымға шыққанын көрген. Алайда билеттердің бағасы әртүрлі.<blockquote>“Біз алдымен Ticketon сайтынан көрдік. Енді Рortalbilet.kz сайтын қарап отырмын. Билет бағасы 333 840 теңгеден және 801 220 теңгеден басталады”, – дейді желі қолданушысы.</blockquote>“Әлі күні белгілі болған жоқ қой”, “Жалған ақпарат таратпаңыздар”, “Бұл алыпсатарлардың сайты”, “Алаяқтар жатпайды”, “УЕФА регламенті бойынша билет бағасы стандар бойынша қойылады”, – деп жарыса жазды желідегілер.Сайттағы билеттердің сатылып жатқанына қатысты Қазақстан футбол федерациясының баспасөз қызметі пікір білдірді.”<blockquote>“Негізі кесте әлі белгісіз. Кестені 30 тамыз күні УЕФА жариялайды. Олар әлі Реал Мадридпен матчтың қашан болатынын айтқан жоқ. Билет туралы ақпаратты әлі Ticketon да, “Қайрат” та жариялаған жоқ. Олардан басқалардың таратып жатқан ақпараты, әсіресе билетке қатысты бәрі жалған”, – деді Сейл Қожатай.</blockquote>

"Өтетін күні белгіленбеген": "Қайрат – Реал Мадрид" ойынына билеттер сатылып жатыр

<a href="https://kyzylorda-news.kz/">Kyzylorda-news.kz</a> Спорт саласын дамыту, спортшыларға қолайлы жағдай жасау – мемлекеттің басты бағыттарының бірі. Осы орайда, өңірдегі спорт нысандарын заманауи талаптарға сай жаңғырту ерекше назарда.Аймақ басшысы Нұрлыбек Машбекұлының тапсырмасына сәйкес, жыл басында облыстық дене шынықтыру, спорт және туризм басқармасының басшысы барлық ауданға жұмыс сапарымен барып, спорт кешендерінің жай-күйімен жан-жақты танысқан болатын. Осы сапар аясында басқарма басшысы Бахтияр Ғарифоллаұлы №16 Қармақшы ауданының балалар-жасөспірімдер спорт мектебіне қарасты ғимараттарға арнайы барып, нысандарды жаңа оқу жылына дейін демеушілер есебінен күрделі жөндеу жұмыстарын жүргізуді тапсырған болатын.Бүгінде міндеттелген тапсырма кезең-кезеңімен жүзеге асырылып, аталмыш мектепке қарасты ғимараттар күрделі жөндеуден өтті. Атап айтқанда, жаттығу залдары кеңейтіліп, ішкі әрлеу жұмыстары жасалды,киім ауыстыру бөлмелері мен жуынатын орындар толық жаңартылды, жылу беру жүйелері қайта жүргізіліп, қыс мезгілінде үздіксіз жұмыс істеуіне жағдай жасалды, сыртқы қоршаулар мен тас төсеніштер жөнделіп, талапқа сай әрленді. Сонымен қатар, ғимараттардың аумағында абаттандыру жұмыстары қолға алынды.Бұл жұмыстар болашақ чемпиондардың спортпен жүйелі түрде шұғылдануына қолайлы жағдай туғызып қана қоймай, ауыл тұрғындары үшін де спорттық инфрақұрылымды қолжетімділігін арттырды.Бұл бағыттағы жұмыстар жүйелі түрде жалғасын табатын болады.<img src="https://knadmin.beoblood.kz/uploads/Sport_mektebi_k_rdeli_zh_ndeu_2_5510a8e12a.jpg" alt="Спорт мектебі күрделі жөндеу 2.jpg">

Спорт мектебі күрделі жөндеуден өтті

<a href="https://kyzylorda-news.kz/">Kyzylorda-news.kz</a> Бүгін Қызылорда қаласындағы «Мұз айдыны» спорт кешенінде ерекше жандар арасындағы облыстық спартакианың жалауы желбіреді. Дәстүрге жалғасқан бұл жарыстың басты мақсаты – мүмкіндігі шектеулі азаматтардың қоғамдағы белсенділігін арттыруға және бұқаралық спортты кеңінен насихаттауға бағытталады. Осы ретте облыстық спартакиадаға 8 команда, 100-ге жуық спортшы үстел теннисі, қол күресі, дойбы спорт түрлері бойынша өзара бақ сынаспақ.Тартысты бәсекенің ашылу салтанатына облыстық дене шынықтыру, спорт және туризм басқармасының басшысы Бахтияр Артаев қатысып, жарыс қатысушыларына сәттілік тіледі.<blockquote>– Бүгінгі облыстық спартакиаданың ерекше қажеттілігі бар жандар үшін маңызы ерекше деп білемін. Себебі бұл дода спортшыларымыздың бар мүмкіндігін көрсетіп қана қоймай, өмірге деген құлшынысын арттыруға септігін тигізеді. Өздеріңіз білетіндей, қазіргі таңда Қызылорда қаласының сол жағалауында мүмкіндігі шектеулі жандардың емін-еркін спортпен шұғылдануына арналған жаңа дене шынықтыру-сауықтыру кешені салынуда. Жаңа нысан осы жылдың қыркүйек айында ел игілігіне табысталатын болады. Заман талабына сай жабдықталатын жаңа ғимаратта спортшыларымыз үлкен жетістіктерге қол жеткізеді деп сенемін. Осы ретте барша жарысқа қатысушыларға сәттілік тілеймін, – деді басқарма басшысы.</blockquote>Айта кетейік, жарыс екі күнге жалғасып, жеңімпаздар мен жүлдегерлерге арнайы Алғыс хаттар мен медальдар табысталатын болады.

Ерекше қажеттілігі бар жандар арасында облыстық спартакиада басталды

<a href="https://kyzylorda-news.kz/">Kyzylorda-news.kz</a>&nbsp;Қызылорда облысының дене шынықтыру, спорт және туризм басқармасының 2025 жылға арналған бұқаралық спорттық іс-шаралар күнтізбелік жоспарына сәйкес, 18-22 тамыз аралығында Қызылорда қаласында ауыл спортшыларының дәстүрлі «Алтын күз – 2025» XXXVIII облыстық спартакиадасы және «Ақ бидай» республикалық VIII ауыл спорты ойындарына іріктеу жарысы ұйымдастырылып жатқаны белгілі.Аталған дода «Ұлы Жеңістің 80 жылдығы» және Қызылорда қаласының Астана болғанына 100 жыл мерекелеріне орай өткізілді. Спартакиада барысында спорттың бірнеше түрінен жарыстар өткізіліп, аудан спортшылары өз шеберліктерін сынға салды.Жарыс қорытындысы бойынша аудан құрама командасы ұлттық спорт түрлерінен жоғары нәтижелерге қол жеткізді. Атап айтқанда, асық ату спортынан командалық есепте жүлделі II орын, бес асық спортынан командалық есепте жүлделі I орын иеленді.Ұлттық спорт түрлерін дамытуға деген қызығушылықтың айқын көрінісі болып табылатын бұл жеңіс аудан спортшыларының мерейін үстем етті.&nbsp;

Асық ату және бес асықтан аралдық спортшылардың мерейі үстем

<a href="https://kyzylorda-news.kz/">Kyzylorda-news.kz</a> &nbsp;Бүгін Қызылорда қаласында «Алтын күз – 2025» ауыл спортшыларының XXXVIII облыстық спартакиадасының салтанатты ашылу рәсімі өтті. Бір аптаға жалғасатын дүбірлі додада 1000-ға жуық спортшы 16 спорт түрінен бақ сынайтын болады.Ашылу салтанатына облыс әкімінің орынбасары Мейрамбек Зинабдинұлы, облыстық дене шынықтыру, спорт және туризм басқармасының басшысы Бахтияр Ғарифоллаұлы, еңбек ардагері, ауыл шаруашылығы ардагерлер кеңесінің төрағасы Нұрлыбай Ұлықпанұлы қатысып, жарыс қатысушыларына сәттілік тіледі.<blockquote>– Биыл дәстүрлі «Алтын күз» спартакиадасының ұйымдастырылып келе жатқанына 38 жыл толып отыр. Бұл жарыс ауылдық жердегі талай талантты спортшының шыңдалып, үлкен жетістіктерге жетуіне жол ашты. Алғаш рет Сырдария ауданы Тереңөзек кентінде өткен бұл дода қазір облыс көлемінде дәстүрге айналып, ауыл-аймақта бұқаралық спорттың дамуына ерекше серпін берді. Ең бастысы жастардың спортқа қызығушылығын арттырып, жігерін шыңдауға ықпал етіп келеді. Бүгінгі жарыста шын мықтылардың топ жарарына сенемін. Баршаңызды берекелі «Алтын күз» мерекесімен құттықтаймын!, – деді облыс әкімінің орынбасары Мейрамбек Зинабдинұлы.</blockquote><img src="https://knadmin.beoblood.kz/uploads/Altyn_k_z_2025_2_9f792e2c18.jpg" alt="«Алтын күз – 2025» 2.jpg">Өз кезегінде еңбек ардагері Нұрлыбай ақсақал спортшыларға ақ батасын беріп, ізгі тілегін жеткізді.Шара соңында жас спортшылар таеквондо және көркем гимнастикадан арнайы қойылым ұсынып, талантты өнерпаздардың гала-концертімен жалғасты.Фото: Қызылорда облысының дене шынықтыру, спорт және туризм басқармасы

Сыр өңірінде «Алтын күз – 2025» ауыл спортшыларының XXXVIII облыстық спартакиадасы басталды

<a href="https://kyzylorda-news.kz/">Kyzylorda-news.kz</a> &nbsp;Қорқыт ата атындағы Қызылорда университетінің студенті Ақәділ Пернебай Ақтау қаласында өткен Жастар арасындағы Жамбы атудан Азия чемпионатында жүлделі орындарға ие болды.Байрақты додаға 10 мемлекеттен келген үздік спортшылар қатысып, өзара бақ сынады. Жарыс нәтижесінде университетіміздің мақтанышы Ақәділ Пернебай Мажар стилі бойынша 1 орынға, ал Азия стилі бойынша 2 орынға қол жеткізді.Бұл жеңіс – ұлттық спортты халықаралық деңгейде насихаттауға қосылған зор үлес. Жас спортшымыздың жеңісі университетіміз үшін үлкен мақтаныш болып табылады.

Ақәділ Пернебай – Азия чемпионы

Ақтан батыр ауылындағы орталық алаңда ел қорғаған ер баба — Ақтан Ақайұлының 255 жылдық мерейтойына арналған ұлттық спорт сайыстары өтіп, қызыққа толы дүбірлі додаға ұласты.Сайыс бірнеше спорт түрінен өтті. Атап айтқанда, қазақша күрес, қол күрес, арқан тартыс, аударыспақ жарыстарымен өрбіді. Жарысқа Ақтөбе облысы, Қармақшы ауданы мен Қазалы өңірінің мықты спортшылары қатысты. &nbsp;Палуандар тартысында: І орын — Арал ауданынан келген білекті &nbsp;палуан Ибрагимов Бақтияр иеленді, ІІ орын — Қазалының үмітін арқалаған, намысты жігіт Қуаныш Есенге бұйырды, ІІІ орын — Қармақшының палуаны, Алмахан Спандиярға табысталды.Білектілер бәсекесі қол күрестің қорытындысымен: І орын – Ақтан батыр ауылынан Өмірбеков Әділетке бұйырды. Әйтеке би кентінен ІІ орын –Жалғасбек Мақсат пен ІІІ орын – Кәден Иьяс иеленді.Арқан тартыс бәсекесінде де тартыс қыза түсті. &nbsp;І, ІІІ орындар Ақтан батыр ауылы иеленсе, ІІ орын – Бекарыстан би ауылының командасы алды.Жүлдегер спортшыларға қаржылай сертификаттар табысталып, арнайы дипломдармен марапатталды. &nbsp; Сонымен қатар, ертең батыр баба рухына арналған ат бәйгесі өткізілетін болады.<img src="https://knadmin.beoblood.kz/uploads/FB_IMG_1755371969052_e705f0675c.jpg" alt="FB_IMG_1755371969052.jpg">

Қазақстан және Қызылорда облысының жаңалықтары: Спорт