<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> «Nur Otan» партиясы Қызылорда облыстық филиалының бастамасымен Ұлы жеңіс күніне орай &nbsp;«Жеңіс үшін мың алғыс Сізге майдангер» атты акция аясында студенттер арасында&nbsp; өткен «Отан үшін от кешкен батырлардың ұрпағымыз!» тақырыбындағы шығармалар байқауы өз мәресіне жетті.
Студент жастар арасында ұйымдастырылған шараның негізгі &nbsp;мақсаты оларға&nbsp; патриоттық тәрбие беру, Жеңіс күнінің тарихын білуге, ата-бабалардың ерлігін құрметтеуге, елі мен жерін қастерлеуге шақыру және отбасылық құндылықтарды дәріптеу,бойына жауапкершілік қасиетті сіңіру.
Байқауға жоғары және орта арнаулы оқу орындарынан 17 студент &nbsp;қатысты.
Байқаудың әр кезеңіне кәсіби сараптама жасап, баға беру үшін құрылған қазылар алқасы талантты жастар қатары өсіп келе жатқанын ерекше атап өтті. Олардың пікірінше, байқауға қатысушылар&nbsp; шығарма жазу барысында ойларын шырайлы етіп бейнелей білген.
Шығармалардың барлығы бірінен бір өткен. Ұлы соғыстың және оның майданы мен тылында ерлік көрсеткен ең жақын адамдардың шынайы келбеті бейнеленіп, ондағы кейіпкерлер қатысушылардың мақтан тұтар тегіне айналған. Сонымен қатар, &nbsp;студенттер Жеңіс күнін неліктен көзді жасқа толтыра тойлайтын мереке екенін түсінгендерін, өз аталарын мақтан тұтатындарын ерекше сезіммен дәріптегенЖұмыстарды оқи отырып, олардың батыр ата-бабасын мақтанышпен жазғандығын сезесің».Әрине,қазылар үшін шын мықтыны анықтау оңайға соқпады. Дегенмен қаламы ұшқыр, сөзі салмақты,- деген шығарма иелерін біз жеңімпаз деп таныдық,- дейді&nbsp; облыстық партия филиалы жанындағы «Miras» аймақтық қоғамдық кеңесінің мүшесі, Сәрсенкүл Биқожа.
Майдангер аталарын жарыса жазған студенттер арасынан үздіктер қатары да анықталды. І орынды Қорқыт ата атындағы Қызылорда университетінің студенті Айгерім Қанжарбаева алса, ІІ орын Марат Оспанов атындағы Батыс Қазақстан медицина университетінің студенті, қызылордалық Кәрімжан Сәдуге бұйырды.&nbsp; Ал, ІІІ орынға&nbsp; Қорқыт ата атындағы Қызылорда университетінің студенті Ақназ Декабрьқызының шығармасы лайықты деп танылды.
Жеңімпаздар арнайы алғыс хат және құнды кітаптармен марапатталмақ.

«Nur Otan»: Қызылордада шығармалар байқауының жеңімпаздары анықталды

<a href="https://kyzylorda-news.kz/">Kyzylorda-news.kz</a> Ресей ұлттық кітапханасында қазақ ақыны Жамбыл Жабаевтың 175 жылдығына арналған кітап көрмесінің ашылуы салтанатты түрде <a href="https://www.inform.kz/kz/sankt-peterburgte-zhambyl-zhabaevka-arnalgan-kitap-kormesi-ashyldy_a3774777">өтті.</a>
Шараны Қазақстан Республикасы Тәуелсіздігінің 30 жылдығына орай ҚР-дың Санкт-Петербургтегі Бас консулдығы «Ата-Мекен» қазақ қоғамымен бірлесіп ұйымдастырды.
Бас консулдықтан мәлім еткендей, көрмеге Жамбыл Жабаевтың шығармашылығымен байланысты әлемнің түрлі тілінде жарық көрген 100-ден астам басылым қойылды.
Кітапхана басшылығы ұйымдастырылып отырған шараның екіжақты әріптестікті нығайту және кеңейтуде маңызы зор екенін атап өтті. Аталмыш шара петербургтік оқырмандарға Қазақстан халқының мәдени мұрасымен және рухани байлығымен таныстыру мүмкіндігін ұсынды.
<img src="https://kyzylorda-news.kz/wp-content/uploads/2021/07/2104101355165326g.jpg" alt="" />
<img src="https://kyzylorda-news.kz/wp-content/uploads/2021/07/2104101355150615g.jpg" alt="" />

Санкт-Петербургте Жамбыл Жабаевқа арналған кітап көрмесі ашылды

<a href="https://kyzylorda-news.kz/">Kyzylorda-news.kz.</a> 2020 жылдың 10 қарашасында Президент Қасым-Жомарт Тоқаев Қазақстан мұсылмандары діни басқармасының төрағасы, Бас мүфти Наурызбай қажы Тағанұлын қабылдаған болатын. Бас мүфти Мемлекет басшысына Діни басқарма алдағы уақытта «Ихсан» ілімін, Абайдың кемел адам концепциясын кеңінен дәріптеп, насихаттау жұмыстарымен айналысатынын жеткізді.
Бүгінде Бас мүфти бастамасымен бұқаралық ақпарат құралдарында, күнделікті уағыз-насихат жұмыстарында, игі басқосуларда «Ихсан» ілімі мен Хәкім Абай атамыздың кемел адам концепциясы кеңінен насихатталуда. Біз толық адам болуға үндеген Абай мұрасын рухани көзқарас тұрғысынан талдап, тарқатып жазуға тырысқан едік. Соны назарларыңызға ұсынуды жөн көрдік.
Расында, Абай мұрасы мен оның өскелең ұрпаққа, жалпы халыққа қалдырған өсиеті өз өміршеңдігін осы күнге дейін жоймай келеді. Абайды таныған сайын рухымыз байып, жан-дүниеміз Ислам құндылықтарынан сусындап келеді. Хәкім атаған талап пен еңбек қайратты танытуға жетелейді. Ал терең ой ақылға ақыл қосуға үндейді. Қанағат пен рахым – &nbsp;жүректі иманға толтыратын адами асыл қасиеттер.
Осы үш қасиет адам бойынан табылса игілікке кенеледі. Абай «Малға достың мұңы жоқ малдан басқа» атты өлеңінде: «Үш-ақ нәрсе – адамның қасиеті: ыстық қайрат, нұрлы ақыл, жылы жүрек» дейді. Осы үш қасиетке аз-кем талдау жасап көрсек.
Ыстық қайрат – пендеге «маза» бермейтін қасиет. Қайратты адам үнемі ізденіс үстінде жүреді. Бұл сипаттағы пенде қарсы келген сынаққа мойымай, алға ұмтылып, мақсат-мұратына жеткенше тыным таппайды.&nbsp;
Нұрлы ақыл – айналаға шуақ шашып, пайдалы тұлға болуға итермелейтін қасиет. Пайғамбарымыз Мұхаммед (оған Алланың салауаты мен сәлемі болсын) бір хадисінде:&nbsp;«Жақсы адам – қоғамға пайдасы тиген пенде»&nbsp;деген. Ілгеріде ізгілік жолын ұстанып, өмірден өткен аталарымыз: «Әрқашан елге сәулеңді түсіріп, шуағыңды шашып жүр. Алланың берген ақылын жақсылыққа жұмса. Ізгі іс өмірлік серігің болсын» деп өсиет айтып отыратын. Өзіңе қалағанды өзгеге қаламайынша, толық иманға қол жеткізе алмайсың. Бұл – асыл дініміздің негізгі принциптерінің бірі.
<img src="https://imgs.muftyat.kz/orig/7291e7e7-8f41-4a2a-a449-1d1f3aeb0049.jpeg" alt="" />
Жылы жүрек – иманды мұсылманның сипаты. Жүректен жылу кетсе – қоғамнан мейірім кетеді. Жүрек жылуы қайырымдылыққа, қарапайымдылыққа, бауырмалдыққа бастайтын қасиет. Қоғамда болып жатқан келеңсіз жағдайлар осы сипаттан алыстағанның көрінісі деп ұғуға болатын шығар. Жүрек адам денесінің патшасы деуге болады. Ол түзелсе – бүкіл дене түзеледі, бұзылса – бүкіл дене бұзылады. Бұған қатысты мынадай хадис бар:&nbsp;«Адамның денесінде бір кесек ет бар. Егер ол сау (жақсы) болса, бүкіл дене сау (жақсы) болады. Егер ол ауырса (бұзылса), бүкіл дене ауырады (бұзылады). Ол – жүрек!»
Сайып келгенде, осы үш қасиетті (ыстық қайрат, нұрлы ақыл, жылы жүрек) тұлабойына қалыптастырған тұлғада толық адам сипатының көріністері байқала бастайды. Абайдың да айтары осы:
«Ақыл, қайрат, жүректі бірдей ұста,
Сонда толық боласың елден бөлек».
Расында, толық адам сипатында болу үшін ең әуелі толық иман керек. Абай атамыз: «Әрбір ақылды адамға иман парыз, әрбір иманды адамға ғибадат парыз» деген. Демек, мұсылман баласы ғибадат жасау арқылы рухын, жан-дүниесін байытады. Сөйтіп, иманын толықтырады.
Иман деген ұғымның сөздік мағынасы бір нәрсеге сену дегенді білдіреді. Ал діни терминдік мағынасы: Пайғамбарымыз Мұхаммедтің (оған Алланың салауаты мен сәлемі болсын) Алладан жеткізгендеріне күдіктенбей, шын жүректен сену және бұл сенімін тілмен жеткізу. Ал иман шарттары жетеу: Алла Тағаланың бар әрі бір екендігіне сену, періштелерге сену, кітаптарына сену, пайғамбарларына сену, ақырет күніне сену, тағдырға (жақсылық пен жамандық тек Алладан екеніне) сену, қайтыс болған соң қайта тірілу бар екендігіне сену.Абай «Тасдиқ» деп аталатын ғылыми трактатында, яғни 38-інші қара сөзінде былай жазады:
<blockquote>
 «Иман дегеніміз бір ғана инанмақ емес, сен Алла Тағаланың бірлігіне, уа Құранның аның сөзі екендігіне, уа пайғамбарымыз Мұхаммед Мұстафа (с.ғ.у.) оның тарапынан елші екендігіне инандық. Жә, не бітті? Сен Алла Тағалаға Алла Тағала үшін иман келтіремісің? Сен иман келтірмесең де Алла Тағалаға келер еш кемшілік жоқ еді. …Ол инанмақтығың құр ғана инанмақтықбірлән қалса саған пайда бермейді. …Пайдаланамын десең, пайда береді, кәміл иман болады. Пайданы қалайша алуды білмек керек».
</blockquote>
Абай осылайша иманнан пайда алуға шақырады. Ал кәміл иманның шарты – шынайы сену, оны сөзбен айту, жан-тәніңмен беріле құлшылық ету. Сонда ғана игілікке кенелеміз.
Қазақстан мұсылмандары діни басқармасы ІІІ республикалық имамдар форумында «Жеті рухани қазық» тұғырнамасын қабылдаған болатын. Мұсылманның ең бірінші тұла бойынан табылуы тиіс имандылық бағытын Жеті рухани қазықтың біріне енгізді.
Ендігі мақсат, Абай айтқандай, пендешілік мінезден арылып, иманнан пайда алуға асығу, сөйтіп, «кәміл мұсылман» сипатына ие болу. Алла Тағала баршамызға осындай мәртебені нәсіп еткей. Әмин!
Бақдәулет НҰРМАТҰЛЫ,
Шымкент қаласының бас имамы

Кемел адам концепциясы һәм толық иман

Kyzylorda-news.kz. Бүгін күллі мұсылман қауымы қасиетті Бараат түнін қарсы алады. Биыл Бараат түні 28 наурыздан 29 наурызға қараған түнге түсіп тұр.
Бараат – Шағбан айының он бесінші түні. Бұл түн – кешірім түні деп те аталады. Өйткені, осы түні Жаратушы ғибадат еткендерді рақымына бөлеп, тәубесін қабыл алып, күнәларын кешіреді, мейіріміне бөлейді.
<blockquote>
 “Бараат – күнәлардан тазарып, оттан құтылуға мүмкіндік беретін, дұғалар қабыл болатын, кері қайтарылмайтын берекелі түн. Бұл түнде Алла Тағала кейбір адамдарды бақытқа кенелтіп, кейбірін мейірімінен ұзақтатады, бірінің дәрежесін көтеріп, бірін түсіреді, біреуін сыйлыққа жетелейді, тағы бірін одан құр қалдырады. Пайғамбарымыз (оған Алланың салауаты мен сәлемі болсын): “Бес түнді ұйықтамай құлшылықпен өткізген адам міндетті түрде жәннатқа кіреді. Олар – Тәруия, Арапа, Құрбан айт, Ораза айт және Шағбанның он бесінші түндері” деген”, – дейді Қазақстан мұсылмандары діни басқармасы шариғат және пәтуа бөлімі меңгерушісінің орынбасары Хасан Аманқұл.
</blockquote>
<h3 id="">Бараат түні не істеу керек</h3>
ҚМДБ өкілі мұсылман қауымы берекелі Бараат түнін қалай қарсы алуы керек екенін айтты.
Бірінші – құптан мен таң намазын жамағат болып оқу. Ең алдымен, парыз намаздарды оқып, сосын сүннет және мұстахаб ғибадаттарды орындаған абзал. Бараат түнінде көп ғибадат жасау керек.
Екінші – күнә істерден арылу.
“Ана-ананы сыйлау, туыстармен байланысты үзбей, олардың қал-жағдайын сұрау, науқас адамдардың көңілін сұрау, бала-шағаға үлгі-өнеге болу арқылы да күнәлар кешірілуі мүмкін. Сондай-ақ, біз кез-келген қастандықтан, арамдықтан, ашудан, мақтаншақтық пен өркөкіректіктен бойымызды аулақ ұстауымыз қажет. Әйтпесе Алла Тағала бізді тазарудан алыстатады”, – деді Хасан Аманқұл.
Үшінші – тәубе ету және истиғфар айтуға көңіл бөліп, түрлі бидғаттардан сақтану.
Бұл түні мұсылман адам өз өмірі мен жыл бойы істеген істерін електен өткізіп, ойлануы керек. Егер қателік жасағанын түсінсе, Құдайдан кешірім сұрап, оны түзетуге тырысқаны абзал. Егер біреуді ренжітсе немесе біреумен араздасып қалса, одан кешірім сұрап, достасуы керек. Егер біреуден қарыз алып, оны қайтармай жүрсе, дереу берешекті қайтарудың жолын табуы қажет.
Төртінші – өзі және мұсылман үмметі үшін қайырлы дұға жасау.
Қасиетті Бараат түні Алла Тағала дұғамызды қабыл етеді деген үміт бар. Сол себепті әрбір мұсылман бұл түнді бағалай білуі керек. Бұл түні мүміннің жүрегінде өзге адамдарға деген ашу-ыза болмауы қажет, өзгелерді кешіріп, оларға жақсылық тілеуі тиіс.
Бесінші – шамасына қарай зікір айту, нәпіл намаз оқу, Құран тиләуат ету.
Нәпіл намаз жамағатпен оқылмайды, әркім өзі жеке оқиды. Ал Құран оқу осы түні атқарылар пайдалы құлшылықтың түріне жатады.
Алтыншы – Шағбан айының он бесінші күні ораза ұстау.
<blockquote>
 “Пайғамбарымыз (оған Алланың салауаты мен сәлемі болсын) былай деген: “Шағбан айының жартысы толған түнді құлшылықпен өткізіңдер. Күндіз ораза ұстаңдар. Өйткені Алла Тағала күн ұясына батқан шақта: “Кешірім тілеуші бар ма, кешірейін. Ризық сұраушы бар ма, ризық берейін. Ауру-сырқауға ұшыраған бар ма, шипасын берейін”, – деп, таң шапағы атқанға дейін рақымын төгеді. Бұл күні ораза тұту – мұстахаб. Ал ораза ұстамаған адам күнәһар болмайды”, – деді Хасан Аманқұл.
</blockquote>
Шағбан айының 15 күні күндіз ораза ұстап (28 наурыз), түнін (Бараат түні, 29 наурыз) ғибадатпен өткізгеннің сауабы мол.
<a href="https://m.sputnik.kz/">Sputnik</a>

Бараат түнін қалай өткізу керек?

Kyzylorda-news.kz. Арал ауданына қарасты Тоқабай ауылында жаңа мешіт пайдалануға берілді.
ҚМДБ-ның Қызылорда облысы бойынша бас имамы Болатбек Әбуов Наурыз мерекесіне орай ұйымдастырылған «Әли Мақсым» мешітінің жаңа ғимаратының ашылу рәсіміне қатысып, демеушілік​ танытқан жергілікті кәсіпкерлер мен ауыл халқына алғыс білдірді.
​ Қазақстан Респуликасы Тәуелсіздігінің 30 жылдық мерейтойы аясында ашылған құлшылық үйі ​ 70 адамға арналған. Айта кетейік, 1995-1996 жылдары пайдалануға берілген көне мешіт ғимаратының тозығы жеткендіктен, 2019-2020 жылдары заман талабына сай жасақталған жаңа ғимараттың құрылысы жүргізілген болатын.
<img src="https://kyzylorda-news.kz/wp-content/uploads/2021/03/fb_img_1616528889604.jpg" alt="" />
<img src="https://kyzylorda-news.kz/wp-content/uploads/2021/03/fb_img_1616528874362.jpg" alt="" />
<img src="https://kyzylorda-news.kz/wp-content/uploads/2021/03/fb_img_1616528877281.jpg" alt="" />

Арал ауданында жаңа мешіт ашылды

Kyzylorda-news.kz. Халық арасында Ұлыстың ұлы күні даланы “Қыдыр ата аралайды” деген наным бар. Ол әр шаңыраққа құт-береке дарытады деп сенеді. Міне, сондықтан әр қазақ Қыдыр атаның жолын күтіп, үйінің іші-сыртын, қора-қопсыны тазартады. Кейбір дінтанушылар оны Ілияс пайғамбар деп те жорамалдайды. “Қыдыр ата әлі күнге дейін тірі, адамдар арасында жүр” деген де дерек бар. Шын мәнінде Қыдыр ата кім? Қасиетті Құран Кәрімде, діни кітаптарда ол жайлы не айтылған? Осы және өзге де сұрақтарға Қазақстан мұсылмандары діни басқармасы шариғат және пәтуа бөлімі меңгерушісінің орынбасары Хасан Аманқұл жауап берді.
<h3 id="">Мұса пайғамбар мен Қыдыр атаның кездесуі</h3>
Хасан Аманқұлдың айтуынша, Қыдыр ата исламда ғана емес, барлық дінде кездеседі. Еврей, христиан діндерінде де атауы сәл өзгеше болғанмен, дәл осы Қыдыр атаның сипаты берілген. Ал Құран Кәрімде Мұса пайғамбар мен Қыдыр атаның кездесуі, бірге өткізген сапары жайлы Кәһф сүресінде баяндалады.
<blockquote>
 “Мұса пайғамбар менен білімді адам жоқ шығар деп ойлайды. Сонда Алла Тағала “сенен білімдірек адам бар, екі өзеннің қосылатын жеріне барсаң, ол адамды кездестіресің” дейді. Мұса пайғамбар әлгі кісімен жолығады, оған “мені өзіңізбен бірге сапарға ертіп шығыңыз, сізге шәкірт болайын” деп өтініш білдіреді. Ол кісі тұйық, жұмбақтау адам екен: сен менің кейбір әрекеттерімді түсінбей, шыдамсыздық танытасың, менімен бірге жүре алмайсың деп бетін қайтарады. Бірақ Мұса пайғамбар “жоқ, мен шыдаймын” деп сөз береді. Сөйтіп екеуі сапарға шығады. Әрине, Құран Кәрімде ол Қыдыр деп аталмайды, бірақ дінтанушы ғалымдар Мұса пайғамбар кездескен кісі Қыдыр ата деген тұжырым жасайды”, – дейді мүфтият өкілі.&nbsp;
</blockquote>
Сөйтіп кемеде кетіп бара жатқанда Қыдыр ата өздері мінген кемені балталайды. Одан кейін кішкентай баланы өлтіреді. Соңында құлағалы тұрған қабырғаны ағаш тіреп, жөндейді.
Мұса пайғамбар Қыдырдың бұл әрекеттерін еш түсінбей, сабырсыздық танытып, жол бойы сұрақ қойып, мазасын алады. Қыдыр ата Мұсаға оның себептерін түсіндіреді.
<blockquote>
 “Кемені балтамен шауып, тескенім: патша теңіздегі барлық кемені тартып алып жатыр, ал кеме – кедейлердің күнкөріс көзі. Егер одан айырылса, жағдайы қиындайтын еді. Балтамен шабылған кемеге патшаның әскерлері тиіспейді. Ал кедейлер кейін мұны жөндеп алады. Мен мұны Алла Тағаланың бұйрығымен орындадым дейді. Кішкентай баланы өлтірген себебім: ол ержеткенде кәпір, надан болып, әке-шешесіне зұлымдық жасайды, сондықтан мен оны өлтірдім. Алла Тағала ол ата-анаға басқа перзент сыйлайды, ал егер мына бала есейсе, оның ата-анасына тыныштық жоқ. Қабырғаны тіреп қойған себебім: ол екі жетім баланың үйі, қабырғаның астында ата-анасы қалдырған қазына бар. Егер қабырға құласа, оны басқалары алып қояды, Алла Тағала олар өскенде, өздері қазып алуын қалады. Мен мұның бәрін өз бетіммен істеген жоқпын, Алланың бұйрығын орындап жатырмын” дейді. Ал Алланың бұйрығы келген адам ол пайғамбар болады. Дінтанушы ғалымдар осы оқиғаны Қыдыр атаның пайғамбар екендігіне дәлел ретінде келтіреді”, – дейді Хасан Аманқұл.
</blockquote>
<h3 id="-1">Қыдыр ата тірі ме</h3>
Оның айтуынша, ислам деректерінде Қыдыр ата Адам атаның баласы деген де жорамал бар.
<blockquote>
 “Адам ата қайтыс боларының алдында балаларына: “Мені осы жерде жерлейсіңдер, бірақ болашақта Жер бетін топан су басады, сол кезде менің денемді су астында қалдырып қоймаңдар. Қазып алып, өздеріңмен бірге кемеге алыңдар, құрғақ жерге қонғаннан кейін, сол жерге жерлеңдер. Менің денем су астында қор болмасын” деп өсиет етеді. Бірнеше ғасырдан кейін Нұх пайғамбар заманында Жерді топан су басады. Сол кезде балалары өсиетті орындап, кемеге Адам атаның денесін алып, құрғақ жерге жеткеннен кейін, сол кісіні жерлейді. Адам ата өсиетінде “кімде-кім мені жерлеу жұмыстарына басшылық жасаса, сол адамның өмірі ұзақ болады” дейді. Сол Қыдыр ата Адам атаның жерлеуімен айналысқан екен. Міне, осыған байланысты ол қазір де тірі деген деректер бар”, – деп түсіндірді Хасан Аманқұл.
</blockquote>
Десе де, айтуынша, ғалымдардың көбі бірауыздан Қыдыр атаның қайтыс болғанын айтады. Бірақ қарапайым халық арасында Қыдыр ата тірі деген наным-сенім бар.
<h3 id="-2">Қадір түні мен Қыдыр ата бір ұғым ба</h3>
<blockquote>
 “Қадыр түні мен Қыдыр деген екеуі екі бөлек сөз. “Қыдыр” деген жасыл деген мағынаны білдіреді. Қыдыр ата жүрген жер гүлдеп, көктеп сала беретін болған, сол себепті ол Қыдыр аталып кеткен. Ал Қадір түнінің мағынасы мүлде басқа, тағдыр, құрметті деген мағынаны білдіреді. Қадір түні Қыдыр ата келеді дегеннің ешқандай негізі жоқ, халықтың ойдан шығарып алғаны”, – деді мүфтият өкілі.
</blockquote>
Хасан Аманқұл Қыдыр ата келеді деп, оны ұлықтап, Алла Тағаланың дәрежесіне дейін көтеру дұрыс емес екенін айтты.
<a href="https://m.sputnik.kz/">Sputnik Қазақстан</a>

Ұлыстың ұлы күні даланы &#8220;Қыдыр ата аралайды&#8221; деген наным бар

<a href="https://kyzylorda-news.kz/">Kyzylorda-news.kz</a>. Мұқағали Мақатаевтың туғанына 90 жыл толған мерейтой Тәуелсіздігіміздің 30 жылдығымен тұспа-тұс келіп отыр. Бұл туралы ҚР Президенті Қасым-Жомарт Tоқаев Тwitter-дегі парақшасында жазды.
<blockquote>
 «Бүгін – ақиық ақын Мұқағали Мақатаевтың туғанына 90 жыл. Мұқағали поэзиясы – күллі қазақтың болмыс-бітімі. Оның сырлы сезімге толы жырлары қалың оқырманның жүрегінен орын алды. Ақын мерейтойы Тәуелсіздігіміздің 30 жылдығымен тұспа-тұс келіп отыр. Бұл – әр қазақтың шаңырағындағы мерейлі той» делінген хабарламада.
</blockquote>

Қасым-Жомарт Tоқаев: Мұқағали поэзиясы – күллі қазақтың болмыс-бітімі

Kyzylorda-news.kz. Қызылорда облыстық тарихи-өлкетану музейінде Қазақстан Республикасының Президенті Қ.Тоқаевтың «Тәуелсіздік бәрінен қымбат» атты мақаласы бойынша «Ұлағат пен ұстаным» тақырыбында зерттеуші ғалымдармен семинар өтті.
Мақаланың соңғы төртінші бөлімі «Ұлағат пен ұстаным» деп аталып, азаматтық қоғамды дамыту мен саяси реформаларды жалғастыруға арналады. Білім мен біліктің дәуірі – ХХІ ғасырда қазақ халқы да технологиядан қалыспай, әр адам өзін жетілдіріп, жаңа кәсіпті игеріп, ел дамуының басты қозғаушы күші болуы тиіс.
Шара барысында республикалық әдеби-мәдени, тарихи-танымдық «Әлімсақ» журналының редакторы Нұрлан Көбегенұлы, өңірімізге белгілі теолог Бақтияр Оспанов және Қорқыт ата атындағы ҚУ «Археология және этнография» ғылыми-зерттеу орталығының жетекшісі Әзілхан Тәжікеевтер қатысып, өз ойларын ортаға салды.
Сондай-ақ егемендігіміз бен елдігіміздің тірегі болатын басты бағыттар мен іргеміздің берік болуы үшін қажетті шаралар айтылды.
<img src="https://kyzylorda-news.kz/wp-content/uploads/2021/01/fb_img_1611061399121.jpg" alt="" />

«Тәуелсіздік бәрінен қымбат»: Қызылордада зерттеуші ғалымдар бас қосты

Kyzylorda-news.kz. Алтын Орда мемлекетінің құрылғанына 750 жылдығы мен қазақ мемлекетінің нығаюына, қазақ жерін басқыншылардан қорғап, жерін сақтап қалуда ерен ерлік көрсеткен халық батыры Ақтан Ақайұлының 250 жылдығына орай Роза Бағланова атындағы Қазалы ауданындық мәдениет орталығында «Бабалар сөзі-даналар көзі» атты дастан орындаушы жыршы-жыраулардың облыстық фестивалі өтті.
Аталған шараға облыстың барлық аудандары мен Қызылорда қаласынан танымал 10 жыршы-жырау қатысты. Фестивальде түркі халықтарына ортақ «Көрғұлы», «Күлтегін» және Н.Қосшанұлының «Сартай батыр», Кете Жүсіптің «Сұр мерген», Сәрсенбай жыраудың «Мұңсыз хан», О.Сұлтановтың «Жанқожа батыр», З.Ибадуллаевтың «Түлкібай батыр» дастандары орындалды.
Фестивальде дастандар Сыр сүлейлерінің орындалмай жүрген мақам-саздарымен жырланды.

Қазалыда жыршы-жыраулардың облыстық фестивалі өтті

<a href="https://kyzylorda-news.kz/">Kyzylorda-news.kz</a>. Қызылорда «Болашақ» университетінде «Болашақ» Ғылыми-зерттеу институты мен «Жалпы білім беру және құқық» кафедрасы жанындағы Әлеуметтік-экономикалық және саяси зерттеулер орталығының ұйымдастыруымен «Шығыс пен Батыс ғылымының көпірі – әл-Фараби мұрасы» тақырыбында республикалық дөңгелек үстел онлайн форматта өтті. Дөңгелек үстел жұмысына оқу орнының профессор-оқытушылар құрамы, студенттері қатысты.
Алғашқы сөз философия ғылымдарының кандидаты, доцент, Әл-Фараби Орталығының директоры Бекжан Берікбайұлы Мейрбаевқа берілді. Баяндамашы «Қазіргі Қазақстандағы фарабитану мәселелері» тақырыбы бойынша сөз қозғап, аталмыш ғылым саласының дамуына мән берді. Әл-Фараби орталығының негізгі міндеттеріне тоқталды. Философия ғылымдарының кандидаты, әл-Фараби атындағы Қазақ ұлттық университеті, Философия және саясаттану факультеті, Философия кафедрасының меңгерушісі, «Жаңа гуманитарлық білім. Қазақ тіліндегі 100 жаңа оқулық» жобасы аясында «Ұлттық аударма бюросы» қоғамдық қоры жүзеге асырып жатқан аударма еңбектердің ғылыми редакторы қызметін атқарып келе жатқан Әсет Абайұлы Құранбек «Фарабитану және қазақ қоғамының рухани жаңғыруы» тақырыбында баяндама жасады. Ғалым Қазақстандағы фарабитанудың мәселелері мен міндеттеріне тоқталып, өз ойларын қоғамдағы рухани жаңғырумен байланыстырды.
Философия ғылымдарының кандидаты, әл-Фарабиді зерттеген шығыстанушы, Қазақстан Республикасы Президентінің жанындағы Мемлекеттік басқару академиясы Түркістан облысы бойынша филиалының директоры Жанат Байжомартұлы Момынқұлов «әл-Фарабидің түсінігіндегі философия және діннің арақатынасы» баяндамасын жұртшылық назарына ұсынды. Баяндамашы әл-Фарабиді философия мен діннің арақатынасы туралы зерттеген алғашқы шығыс философы екендігін айта келе, ойшылдың көзқарастары негізіндегі философиялық пікірлері мен діни дүниетанымының байланысын талдайды. Филология ғылымдарының кандидаты, Қызылорда «Болашақ» университеті, Білім беру және педагогика&nbsp; жоғары мектебі, филология, журналистика кафедрасының аға оқытушысы Тасболат Сиезбайұлы Медетбаев «әл-Фараби – әлемнің екінші ұстазы, ұлы философ әрі ғалым» тақырыбында баяндама жасады. Ол ойшылдың ұстаз, философ және ғалым ретіндегі үш қырына ерекше тоқталды.
Философия ғылымдарының кандидаты, Қ. Жұбанов атындағы Ақтөбе өңірлік университеті, Тарих факультеті, Қазақстан халқы Ассамблеясы және әлеуметтік-саяси пәндер кафедрасының меңгерушісі Үмбетхан Қуандықұлы Сәрсембин «әл-Фарабидің Қайырымды қала тұрғындары туралы көзқарастарының қазіргі қоғамда алатын орны» мәселесін қозғады. Ғұламаның әйгілі трактатының философиялық негіздерін атап көрсетті. PhD, Қ.А. Ясауи атындағы Халықаралық қазақ-түрік университеті, Әлеуметтік ғылымдар факультеті, Қоғамдық ғылымдар кафедрасының қауымдастырылған профессоры Қайнар Қалдыбайұлы Қалдыбай «Ұлы ойшылдың туған жерге оралуы» баяндамасы арқылы ойшылдың зиратынан алынған топырақты Отырардағы Арыстан Баб кесенесінің жанына әкеліп қойылған бейнесюжеттерді көрсетті. Соңғы баяндаманы Қорқыт Ата атындағы Қызылорда университеті, Экономика және құқық институты, Философия және әлеуметтік-гуманитарлық пәндер кафедрасының меңгерушісі, PhD Жарқынбек Оралбекұлы Әбікенов «әл-Фарабидің ізгілікті қоғам идеяларын мәдени талдау» тақырыбында жасады.
Дөңгелек үстел жұмысы барысында қатысушылармен сұрақ-жауап, пікір алмасу жүрді. Мазмұнды республикалық іс-шараны техника ғылымдарының кандидаты, Қызылорда «Болашақ» университетінің ректоры Қуаныш Қойшығұлұлы Дауренбеков жүргізді. Аталмыш кездесуді философия магистрі, Қызылорда «Болашақ» университетінің «Жалпы білім беру және құқық» кафедрасының аға оқытушысы Ботагөз Жаппарқызы Паридинова ұйымдастырды.
Әлеуметтік-экономикалық және саяси зерттеулер орталығы

Қызылордада әл-Фараби мұрасына арналған республикалық дөңгелек үстел өтті

<a href="https://kyzylorda-news.kz/date/2020/11/10/?doing_wp_cron=1604987071.8866970539093017578125">Kyzylorda-news.kz.</a> Пандемия кезеңінде Сыр еліндегі Жастар театры онлайн форматта жұмысын жалғастырды. Театр ұжымы Абай Құнанбаевтың 175 жылдық мерейтойына арнайы онлайн өлең оқу эстафетасын, «Ұлттық ғашықтар» күні мерекесіне орай онлайн мәдени іс-шаралар ұйымдастырды. Ал, Отбасы күніне орай, қысқа метражды фильм түсіріп, көрермен назарына ұсынды.
Ең алғаш 2016 жылы құрылған Жастар театры өткен жылы 23 қойылым сахналап, көрерменнің жоғары бағасына ие болды. Аз ғана уақыт ішінде көптеген республикалық фестивальдер мен конкурстарға қатысып, жеңімпаз атанған театр ұжымы Қарағанды облысында ұлы ақынның 175 жылдығына орай өтіп жатқан «ТТТ» республикалық онлайн театрлар байқауында Оңталап Нұрмахановтың «Қалың елім, қазағым, қайран жұртым…» атты қойылымын ұсынды.
Театр әртістері пандемияға дейін Арал, Қазалы, Қармақшы, Жалағаш аудандарына және Шымкент қаласы Ж.Шанин атындағы облыстық академиялық драма театрында «Қыз қасқыр» атты қасіретнамалық қойылымымен гастрольдік сапарда болып, қалың жұртқа рухани азық сыйлады.

Сыр еліндегі Жастар театры 23 қойылым сахналады

<a href="https://kyzylorda-news.kz/">Kyzylorda-news.kz.</a> Сыр елінде Қазақстанның киелі жерлер картасына енген 12 нысанға бейнеролик әзірленуде. Олар «Рухани жаңғыру» орталығының ресми ютуб каналына, әлеуметтік желілерде жарияланатын болады. Бұл туралы Өңірлік коммуникациялар қызметінің ақпарат алаңында өткен брифингте «Рухани жаңғыру» орталығының директоры Уәлихан Ибраев мәлімдеді.
<blockquote>
 “Биыл «Рухани жаңғыру» бағдарламасы аясында 1421 шара өткізілді. Пандемияға байланысты&nbsp;бірқатар іс-шаралар онлайн форматта болды. Аймақта «Тұлға» жобасы жүзеге асырылуда. Жоба шеңберінде өз саласы бойынша жетістікке жеткен азаматтарды халық арасында танымал ету, еңбек жолын жастар арасында насихаттауды көздейді. Бүгінде 24 тұлғаның бейнеролигі түсірілді. Сондай-ақ, «Дәстүр мен ғұрып» және «Үнем – қоғам қуаты» атты жаңа арнайы жобалар бойынша облыстық іс-шаралар жоспары әзірленді. Жоспар аясында 21 шара өткізілді”, – деді Уәлихан Серікұлы.
</blockquote>
Бұған қоса, республикалық “Жомарт жүрек” байқауының облыстық кезеңі ұйымдастырылды. Оған аудандар мен қаладан іріктеліп алынған азаматтар 4 номинация бойынша қатысып, үздіктер марапатталды.

Қазақстан және Қызылорда облысының жаңалықтары: Руханият

«Nur Otan»: Қызылордада шығармалар байқауының жеңімпаздары анықталды

Санкт-Петербургте Жамбыл Жабаевқа арналған кітап көрмесі ашылды

Кемел адам концепциясы һәм толық иман

Бараат түнін қалай өткізу керек?

Арал ауданында жаңа мешіт ашылды

Ұлыстың ұлы күні даланы “Қыдыр ата аралайды” деген наным бар

Қасым-Жомарт Tоқаев: Мұқағали поэзиясы – күллі қазақтың болмыс-бітімі

«Тәуелсіздік бәрінен қымбат»: Қызылордада зерттеуші ғалымдар бас қосты

Қазалыда жыршы-жыраулардың облыстық фестивалі өтті

Қызылордада әл-Фараби мұрасына арналған республикалық дөңгелек үстел өтті

Сыр еліндегі Жастар театры 23 қойылым сахналады

Рухани жаңғыру: Қызылордада «Тұлға» жобасы жүзеге асырылуда

Қазақстан және Қызылорда облысының жаңалықтары: Руханият

«Nur Otan»: Қызылордада шығармалар байқауының жеңімпаздары анықталды

Санкт-Петербургте Жамбыл Жабаевқа арналған кітап көрмесі ашылды

Кемел адам концепциясы һәм толық иман

Бараат түнін қалай өткізу керек?

Арал ауданында жаңа мешіт ашылды

Ұлыстың ұлы күні даланы &#8220;Қыдыр ата аралайды&#8221; деген наным бар

Қасым-Жомарт Tоқаев: Мұқағали поэзиясы – күллі қазақтың болмыс-бітімі

«Тәуелсіздік бәрінен қымбат»: Қызылордада зерттеуші ғалымдар бас қосты

Қазалыда жыршы-жыраулардың облыстық фестивалі өтті

Қызылордада әл-Фараби мұрасына арналған республикалық дөңгелек үстел өтті

Сыр еліндегі Жастар театры 23 қойылым сахналады

Рухани жаңғыру: Қызылордада «Тұлға» жобасы жүзеге асырылуда

Ұлыстың ұлы күні даланы “Қыдыр ата аралайды” деген наным бар