<a href="https://kyzylorda-news.kz/">Kyzylorda-news.kz</a> &nbsp; Мемлекеттік қызмет – барлық саланы тиімді басқаруды ұйымдастыруда жетекші рөл атқаратын мемлекеттік жүйенің ең маңызды тетіктерінің бірі. Билікке деген сенім қазіргі қоғамның талаптарына сай қызмет ететін мемлекеттік қызметшіден басталады. Ал, мемлекеттік қызметшінің қызметі – Отаны мен халқына адал еңбек етуімен бағаланады.Биылғы жылдың бірінші тоқсанының қорытындысы бойынша өңірдегі мемлекеттік қызметшілердің штат саны - 3 338 бірлікті құрайды. Оның 14-і саяси мемлекеттік қызметші болса, қалған - 3 324-ы «Б» корпусының мемлекеттік әкімшілік қызметшілері. Бүгінде бұл салада 3 236 адам жұмыс істейді.Сондай-ақ, жыл басынан бері мемлекеттік органдарда 157 бос лауазымдарға конкурс өткізілген. Оның ішінде ішкі конкурс 83 болса, жалпы конкурстың саны 74-ті құрап отыр. Ішкі конкурстардың нәтижесімен қабылданған 51 үміткердің 31-і жоғары лауазымды орындарға тағайындалды.Айта кетейік, қазіргі таңда Өңірлік кадр резервіне іріктеудің соңғы кезеңі өтуде. Бұған дейін іріктеудің бірінші кезеңінде өңірлік кадрлық резервке 235 үміткердің құжаты қабылданды. Ал, екінші кезең екі блокта өтті. Біріншісі – заңнаманы білуге арналған тестілеу болса, екінші блок – жеке қасиеттерді бағалауға арналған.Нәтижесінде, Астана қаласында өтетін "Құзыреттерді бағалау" деп аталатын үшінші кезеңге 51 үміткер жіберілді. Бұл үміткердің басым бөлігін мемлекеттік қызметшілер мен халыққа қызмет көрсету орталықтары және жеке сектордың қызметкерлері құрайды.23 маусым – Мемлекеттік қызметшілер күніне орай, осы салада қызмет ететін барлық азаматтарды кәсіби мерекесімен құттықтаймыз!Фото: tengrinews.kz

23 маусым – мемлекеттік қызметшілер күні

<a href="https://kyzylorda-news.kz/">Kyzylorda-news.kz</a> &nbsp; Қызылорда облысы әкімінің 2020 жылғы “Мемлекеттік өртке қарсы қызметі жоқ елді-мекендерде өрт сөндіру бекетін құру туралы” жоспарына сәйкес, Сырдария ауданына қарасты Ақжарма, Шіркейлі ауылдық округінде өрт сөндіру бекетін құру жоспарланды.Еске сала кетейік, осыған дейін Ақжарма ауылдық округінде өрт сөндіру бекеті ашылып, бүгіндее өз жұмысын жүйелі атқарып жатыр.Табиғи және техногенді апаттар кезінде, күнделікті сын сәттер мен сағаттарда құтқарушы мамандарға үлкен жауапкершілік жүктелетіні белгілі. Сол себепті, өрт сөндірушілердің еңбек етуіне қолайлы жағдай жасау мемлекет үшін үлкен маңызға ие болып табылады. Аталған бағытта облыс әкімдігі мен төтенше жағдайлар департаменті бірлесіп, кешенді жұмыс жүргізіліп келеді. Соның бір дәлелі соңғы 3 жылда бюджет есебінен 11 автокөлік сатып алынған болатын. Енді, міне тағы қажетті техника қатары толығып отыр. Сондай-ақ, алдағы уақытта да жаңадан өрт сөндіру депосы салынады деп күтілуде.2024 жылғы 20 маусымда Қызылорда облысы ТЖД “ӨСжАҚЖҚ” РММ-нің есебінен шығарылған өрт сөндіру автокөлігі Шіркейлі ауылдық округіне табысталды. Алдағы уақытта өрт сөндіру бекеті ашылып, өз жұмысын бастайтын болады деп жоспарлануда.

Өрт сөндіру автокөлігі табысталды

<a href="https://kyzylorda-news.kz/">Kyzylorda-news.kz</a> &nbsp;Мұхтаровтар әулеті 158 жыл ішкі істер органдарында қызмет атқарып, жүрген – үлгілі полицейлер династиясы. Полицейлер династиясының ұстанымы – темірдей тәртіп және өз елінің патриоты болу. Сонда ғана қиындығы мен қатері мол саладағы тынымсыз еңбек жемісін бермек. Полиция династиясының мақсаты – қылмыстық істерді тергеу мен ашу, қылмыскерлерді құрықтау ғана емес, сонымен бірге, ұрпақ бойына Отанға деген сүйіспеншілік пен патриоттық рухты сіңіру.Бұл отбасы – әрқашан әулеттің абыройы мен жаңа ұрпақты тәрбиелеудегі ата-бабаларының өмірлік ұстанымдарын жадында берік сақтаған және осы құндылықтар арқылы өскелең ұрпақты тәрбиелеген отбасылар. Осындай отбасылардың қатарына бір әулеттің өрелі ісін жалғап, ішкі істер органдарында абыройлы қызмет атқарып келе жатқан үшінші буыны– Мұхтаровтар әулетін айтуға болады.Мұхтаровтар әулеті ата, әке, бала, немере жолын жалғап халықтың игілігі үшін қызмет атқарып келе жатқан өнегелі отбасы.Ата, әке жолын жалғап, бүгінде Қызылорда қалалық Полиция басқармасының абыройлы қызмет атқарып жүрген Абдулла Жасұлан Әбдықалықұлы Қызылорда қалалық Полиция басқармасының тергеу бөлімінің аға тергеушісі полиция аға лейтенанты шенінде адал қызмет атқаруда. Өзінің кәсібилігімен және қызметтік міндеттеріне жауапкершілікпен қарауымен ерекшеленді, ол көптеген әріптестеріне үлгі бола білді. Жасұлан қызметте өте жауапты және өзінің алдына қойған мақсатына ұмтылған, мінезі қайырымды, әрқашан әріптестеріне қандай да бір мәселелерде көмектесуге әзір тұрады.Жасұлан бала кезінен бастап атасы мен әкесінің әр кезде полиция қызметкері формасында көріп өскен. Ол үшін әкесі үлкен үлгі болды. Оның көзінде полиция әрқашан қорған болып тұрды. «Мен әрқашан атам мен әкемді мақтан тұтамын. Полиция – бұл өте қиын және күрделі мамандық, өйткені адамдар үнемі өз өмірін адамдар үшін тәуекел етеді. Әкем әрдайым жұмыста болатын, оны отбасылық дастархан басынан жиі көре бермейсің», – деп Жасұлан әңгімелеп берді.Атасы – Абдулла Мұхтаров, өзі құқық қорғау саласын сүйе, бағалай білген және балаларына да кішкентайынан өз жолын таңдауға үйреткен. Ол 1967 жылы ішкі істер саласындағы қызметін лейтенант шенімен бастап, еңбегінің арқасында облыстық дәрежедегі басшылық қызметтерге дейін көтеріледі. Өмірінің 28 жылын құқық қорғау қызметіне арнап, 1989 жылы подполковник шенімен құрметті демалысқа шығады. Ал оның үш бірдей ұлы тәртіп сақшысының қызметін өмірлік жолы ретінде таңдап, құқық қорғау органдарында нәтижелі еңбек етіп, зейнеткерлікке шыққан.Жасұланның үлгі тұтар әкесі Әбдықалық Абдуллаұлы ҚР Ішкі істер органының қылмыстық іздестіру саласында жұмыс жасап, подполковник шенімен зейнетке шыққан. Анасы Бакирова Айгул Амирбекқызы Қызылорда қалалық санитарлық-эпидемиологиялық станциясында лаборант қызметінде.Әбдіқалық Абдуллаұлы өзі: «Төрт баламды зайыбым Айгул Амирбекқызымен бірге тәлім-тәрбие беріп, елінің нағыз патриоты етіп тәрбиелеудеміз. Полицей адал, әдепті және жақсы маман болуы керек. Өз жұмысын тиянақты орындау үшін оны жақсы көру керек. Адам қызметке қуанышпен, жақсы көңіл-күймен баруы керек. Отбасы-басты құндылық. Қиын және қауіпті жұмыс біздің отбасымыздағы қарым-қатынасымызға теріс әсер етпейді. Керісінше, полиция қызметі біздің отбасымыздағы байланысты нығайта түсуде».Ғарышкердің де, полицейдің де, дәрігер мен ұшқыштың да қанатын қатайтып, өмірлік бағыт беретін үлкен орта ол – отбасы. Әр отбасыдан қазақтың ерік-жігері, күш-қайраты мықты батырлары мен халықтың тыныштығын күзете отырып, әке жолын жалғастырар адал әрі ержүрек ұлдары тәрбиеленіп шығатыны сөзсіз.

Ішкі істер саласында ғасырдан астам еңбек еткен әулет

<a href="https://kyzylorda-news.kz/">Kyzylorda-news.kz</a> Қазіргі таңда ел дамуына үлес қосып, тіршіліктің түрлі тізгінін ұстап жүрген нәзіжандылар қатары қалың. Солардың бірі – Сәуле Бишекова. Ол ерлермен сапта тізе қосып, бейбіт күннің тыныштығын түзетуге атсалысқандардың бірі.Сырт көз талдырмаш арудың полиция саласында жауаптылығы, парасаттылығы, ыждахаттылығымен дараланып келеді.Қазалы қаласының тумасы, орта мектепті бітірісімен, Алматы қаласындағы Қазақ Ұлттық аграрлық университетінің халықаралық құқық мамандығына құжат тапсырады. Қағілез қыз жоғары оқу орнын 2008 жылы аяқтап, сол жылы «Астана» университетінде магистратураны оқуға талыпанды. Құқық магистранты атанған қыз теориялық білімін практикамен ұштастыруды мақсат тұтады.2017 жылы Сырдария ауданы полиция бөліміне жұмысқа қабылданады. Ол жерде әйелдерді зорлық-зомбылықтан қорғау инспекторлығына орналасады. Антына адал ару 2019 жылы Қазалы ауданындағы бөлімшеге ауысып, қызметін жалғастырады.Қазалы ауданы полиция бөлімі жергілікті полиция қызметінің әйелдерді зорлық-зомбылықтан қорғау тобының инспекторлығы – жауапты жұмыс.«Әйелдерді зорлық-зомбылықтан қорғау саласына саналы түрде келдім. Мұнда түрлі туындаған түйіткілдер анықталып, оны шешу жолында шешімдер қабылданады. Осы қиындыққа тап болған әрбір отбасы азап пен үмітсіздікке толы арпалысты күй кешеді. Түйіннің түйіткілсіз шешілуіне полиция қызметкерлерімен бірге әйелдер, ақсақалдар кеңесі белсенді рөл атқарады», – дейді жұмысы туралы Сәуле Талғатқызы.Отбасылық жанжалды бағамдау оңай іс емес. Ондағы әлеуметтік жағдайы, денсаулығы, қауіптілігі анықталады. «Құрбанға» айналған ана, жақынын қорғаймын деп арызданудан бас тартқан әлсіз топпен психологиялық жұмыс жүргізу де маңызды. Мамандық жан-жақтылықты қажет етеді.Бүгінде тұрмыстық зорлық-зомбылық қоғамдағы өзекті мәселе екендігін айғақтады. Нәтижесінде, заң қайта қаралып, тұрмыстық зорлық-зомбылық үшін жауапкершілік қатаңдатылды.<blockquote>««Ерлі-зайыптының арасына есі кеткен кіреді» деген жаңсақ пікірден арылатын кез келді. Зайырлы, демократиялық қоғамда өмір сүріп жатқан әрбіріміз, оны аңғаруымыз керек. Зәбір көрген ананың артында үлкен қоғам тұр. Өсіп келе жатқан бала әке ісін қайталамасына кім кепіл? Ал, әкесін жек көретін қыз отбасын құруға асықпай, кейде өз туған перзентінен бас тарып жатса, оны екі адамның ісі деу қаншалықты қисынды?.. Өмірге өкпелі адамдар қылмыстылыққа бейім келеді. Бұны да, бағамдау қажет», – дейді ертеңге алаңдаған ару. Қуантатыны, бұрын отбасында орын алған денсаулыққа қасақана жеңіл зиян келтіру, ұрып-соғу әкімшілік құқық бұзушылық болып саналса, соңғы өзгерістерге орай, бұл әрекеттер криминализацияланғаны. Полиция қызметі әрдайым жаңашылдықта болуы тиіс дейді шенді қыз .</blockquote>«Ал, үйде полиция капитаны образынан шығу оңайға соқпайтын болар...» деген көкейдегі сұрақты жайып салдық.«Бұл орайда, өзімді жолы болған жанға балаймын. Алаңсыз жұмыс істеуге отбасы мен туыстардың қолдауы маңызы. Жолдасым әскери қызметкер. Шекарашы. Екеуіміз үш перзентті тәрбиелеп отырмыз. Басқа отбасылар сияқты қажетті жерде қаталдық, қажетті жерде жұмсақтық танытатын кезіміз болады. Балалар үшін біз құқық қорғаушы емес, ата-анамыз. Ең басты миссиямыз осы», – дейді күліп.«Мені өзін жалғыз сезінетін жандар толғандырады. Кез келген қиындықтан, тығырықтан шығатын нұсқа қашан да бар. Ешкім өзін мәжбүрлеуге, қорлауға жол бермеуі тиіс. Ана қорғансыз, бала қамқорсыз қалмасы үшін елімізде нәтижелі жұмыстар жасалып келеді» , – дейді бізбен қоштасарда қоғамның жүгін қаймықпай көтерген қайсар қыз.

Сәуле Бишекова: Әйелдерді зорлық-зомбылықтан қорғау – жауапты жұмыс 

<a href="https://kyzylorda-news.kz/">Kyzylorda-news.kz</a> Құқық қорғау саласында тер төгіп, талай қылмыстың ашылуына себепші болған ардагер тәртіп сақшысы Дәстен Өмірзақұлының есімі еліне етене таныс. Бүгінде зейнетінің бейнетін көріп отырған ақсақал жас толықынның ақылшы ағасына айналған. Әке ізін жалғап, жұртшылықтың тыныштығы үшін тынбай тер төккен Дәстен Өмірзақұлының өмір жолы – өнеге, қызметі – үлгі. Өрісін кеңге жайған мәуелі бәйтеректің отағасы бүгінгі мақаламыздың кейіпкері болмақ.Жуырда ғана «Ішкі істер министрлігінің Құрметті ардагері» төсбелгісімен марапатталған запастағы полиция подполковнигі Дәстен Айбосын мектепті бітірген соң Жамбыл гидромилоративный институтына оқуға түседі. Спортқа құмар бозбала 1968 жылы бастап, грек-рим күресіне қатысып, 1974 жылы «СССР спорт мастері» атағын алады. Осы жылдар арасында қазақ ССР, СССР чемпионаттарында жүлделі орындарға ие болды. Қазақстан, Азия студенттер арасында үш дүркін чемпионаты атанды. 1977 жылы институтты бітіріп, Қазалы ауданына жолдамамен келіп, НГЧ-2 мекемесінде аға механик қызметін атқарды.&nbsp;Әкесі – Өмірзақ Айбосынов Отан соғысына қатысып, 1944 жылы жарақатына байланысты қайтып келіп, туған жері Қазалыда аудандық ішкі істер бөлімінде лейтенат шенімен қызмет атқарған. Паспорт столының қызметін атқарып, 1953 жылы денсаулығына байланысты қызметтен босап, аудандық поселкелік кеңеске жұмысқа тұрады. Басқа да, басшылық қызметтер істеп, 1969 жылы ауыр науқастан қайтыс болды.&nbsp;Дәстен әке жолын қуып, 1983 жылы наурыз айынан бастап, Қазалы аудандық ішкі істер бөлімінің қылмыстық істі зерттеу бөлімшесінің оперативті уәкілі, екі жылдан соң, аға оперативті уәкіл болды. 1990 жылы аудандық ішкі істер бөлімінің қылмыстық істі зерттеу бөлімшесінің бастығы қызметін атқарды. Бұдан соң, қызметтік жолы Қазалы қалалық ішкі істер бөлімшесінің бастығы, Арал аудандық ішкі істер бөлімінің бастығы лауазымдарымен жалғасты. Дәстен Өмірзақұлы Қазалы аудандық ішкі істер бөлімінің оперативті істер жөніндегі орынбасары қызметін де атқарды. Қазалы қалалық ішкі істер бөлімінің бастығы болып, еңбек демалысына шықты.&nbsp;Спортты серік еткен сақшы 2005 жылдан бастап, аудан спорт мектебінде қызмет атқарды. 2009 жылы Қазалы ауданы бойынша «Жалаңтөс» күзет агентінде директор болып, он жыл жұмыс істеді. Қоғамдық жұмыстарда әркез белсенділік танытатын ардагер Дәстен Өмірзақұлы 2007 жылдан 12 жыл бойы Қазалы аудандық ішкі істер бөлімінің ардагерлер кеңесінің төрағасы қызметін атқарды. Отбасында жары – Зияда Айбосыновамен өмірге Амангелді атты ұл, Жанар есімді қыз әкеліп, тәрбие берді. Амангелді әке жолын жалғап, ішкі істер саласында еңбек етті. Ол 2002 жылы қылмысты зерттеу бөлімшесіне оперативті өкіл болып қызметке тұрды. Қазалы қалалық ішкі істер бөлімшесінің бастығы, полиция подполковнигі қызметін атқарып, 2019 жылы еңбек демалысына шықты. Келіні – Айгүл Медетбаева, дәрігер. Аружан, Мұхаммед, Арлан, Арсен, Әмір атты немерелер ата-әжесінің көз қуанышы.&nbsp;<blockquote>– Бала кезден әкемнің күн-түн демей, қызметте жүріп, қылмысқа қарсы күрес жүргізетініне, қылмыскерлерді ұстайтынына қызғатынмын. Тіпті, оның фуражкасын киіп көріп, өзімді құдды тәртіп сақшысындай сезінетінмін, – дейді бала күнгі арманын ақиқатқа айналдырған ұлы Амангелді Дәстенұлы.&nbsp;</blockquote>Тәжірбиесі мол ардагер жас толқын тәртіп сақшыларды тәрбиелеуге белсене ат салысты. Дәстен Өмірзақұлының жинақтаған өмірлік тәжірибесі, жас мамандарға айтар ақыл-кеңесі ұшан-теңіз. Оның қызмет жолдары қылмысқа қарсы күрестегі кәсіби әдіс-тәсілі – үлкен өмір сабағы. Ол қызмет атқарған жылдары талай ауыр қылмыстарды ашты. Солардың біріне тоқтала кетуді сұрағанымызда:&nbsp;– Ауылдағы ағайынның негізгі күнкөрісі – алдындағы төрт түлігі. Өрістегі малды даладан, қорадағы малды қолдан алғандай ұрлау кең етек алған кез. Жыл бойына баптап, бала-шағасына нәпақа болатын малын ұрлатып, қабырғасы қайысқан тұрғын көбейді. Ұмытпасам, 1986 жылдың қыркүйек айында Абай ауылының тұрғыны – Байтөреев жайылымда жүрген төрт сиырының ұрланып кеткені жөнінде арызданып келді. Осы қылмыстық іс бойынша Қазалы қаласының учаскелік инспекторы Жеңіс Күркебаев екеуміз іздестіру жұмысын жүргіздік. Алдымен, Абай ауылының тұрғындарымен сөйлестік. Ұрланған малды көрген, білген адам жоқ. Құмжиек, Басықара ауылдарының да тұрғындарымен арасында сауал жүргіздік. Содан Басықара ауылынан жеті-сегіз щақырым жердегі «Томай» учаскесіндегі малшылар екі атты адамның сиырларды айдап бара жатқанын көргенін айтты. Олардың бағытын малшылардан нақтылап сұрап алдық. &nbsp;Жеңіс екеуміз мотоциклмен түнге қарай аудан орталғына қайтып келдік. Ертеңіне Қазалы аудандық ватотранспорт кәсіпорнының директоры Кәтебай Смағұловқа жолығып, мән-жайды айтып, көлікпен көмек көрсетуді сұрадық. Ол бізге Бақытбек Қошқаров есімді жүргізуші жігітті қосып берді. Желдей жүйрік «КамАЗ» көлігімен қайта жолға шықтық. 14-15 қыркүйек күндері Бозкөл, қызылқұм совхоздарының малшыларын аралап, сұрау салғанымызбен ұрлық мал жайлы мәлімет ала алмадық. Одан әрі қарай ілгерілей бердік. Қазалы ауданының көршілес Қарақалпақ елінің шекарасындағы «Ақтан-Қарақыз» мекеніне жеттік.Мұнда жалғыз үй бар екен. Үй иесі Шәкен ақсақал біздің келген шаруамызды білген соң жолға шығып, мал өрісін қарайық деп бізге көмектесуге ниет білдірді. «КамАЗ» көлігіне екі атты тиеп алып, жолға шықтық. Малшылар ауылын аралап, Бозкөл совхозының шопандарына жолықтық. Көліктен түсіріп, Шәкен ақсақал екеуміз атқа мініп, Қызылқұмдағы бұлақтарды араладық. Жеңіс пен Бақытбек автокөлікпен ізімізден жүріп отырды. Сол күні түнде малшы үйлерінің біріне қонып, ертеңіне қайтадан малшы ауылдарын аралап, ұрланған малды іздестірдік. Кешке қарай, бұлақ басынан мал іздеріне ойлана қарап тұрып: «Бұл – ұрлық мал, 32 бас сиыр, бір есек, екі аттылы адамның ізі бар. Бір аттылы адам осы жерден кейін қайтқан. Шамасы, ұрлық малды осы жерге дейін шығарып салған болуы керек» деп маған бағдарлай қарады. «Екі аттылы адам 32 сиырды айдап, Қарақалпақстанға қарай бет алған. Енді, бұл жерде тұрудың қажеті жоқ кеттік!» деді тағы, Шәкен ақсақалдың Ақтан-Қарақыздағы үйіне қайттық. Малдың ұрлығына 10 күн болды. Енді не істеу керек? Шәкен ақсақалдың үйінде бұл жайлы ұзақ ойластық. Шәкен Қарақалпақстанның «Нысан» деген ауылына баратын жолсызбасын сызып, жол-жобаны ұқтырды және сол ауылдың Қазтуған, Ұлтуған деген ақсақалдарына бізге көмектесуді айтып, хат жазып берді. 18 қыркүйек күні таңертең жолға шықтық. Ертеңіне Қазтуған, Ұлтуған деген ақсақалдармен әңгімелесіп, ұрлық малды іздеп келе жатқанымызды айттық.&nbsp;<blockquote>– Осыдан екі күн бұрын ауыл маңынан сиырларды айдап, аттылы адам өтті. Бірақ өзі ауылға соққан жоқ. Бағыты – Тақтакөпір ауданы. Аудан орталығы осы жерден 230 шақырымдай. Демек, мал әлі аудан орталығына жеткен жоқ. Егер, ол ұрлық мал болса, ізіне түссеңдер, ұстап аласыңдар. Малды құм арасымен айдап барады. Оған автокөлікпен жете алмайсыңдар, – деді.&nbsp;</blockquote>Жеңіс екеуміз «Нысан» ауылының екі жігітімен келісім жасадық, сөйтіп, сезіктінің ізіне екі яқты мотоциклмен түстік. Мұнымыз жақсы болды. Құм жоталарының арасынан еркін жылжимыз. Тақтакөпір ауданының орталығына – 30 шақырым қалғанда құмның арасынан 32 сиырды иіріп қойып, ұйықтап жатқан адамды қолға түсірдік. Еңгезердей жан екен. Қолына сол жерде кісен салдық. Сиырларды Нысан ауылына айдап әкеліп, қораға қамадық. Қарақалпақстандық азамат сезікті – Батырхан Смайловты сөзге тарттық.&nbsp;<blockquote>– Мен сиырларды Абай ауылының тұрғыны Болатбек Естенқұловтан – 500 сомға сатып алдым. Ол сиырларды айдасып, шығарып салды, – деді.&nbsp; Нысан ауылындағы мал қораға қамалған сиырлардың 32-сін автокөлікке тиеп, аудан орталығына алып келдік. Тескеру барысында сезікті – Б.Естенқұлов 32 сиырды ұрлап, Қарақалпақстанның азаматына – 500 сомға сатқанын мойындады. Ұрлық малдар Абай, Басықара, Құмжиек елді мекенінің тұрғындарына қайтарылды. Ұры қамауға алынып, сот арқылы жазасын алды, – деп өткенді еске алды.</blockquote>

Қазалылық тәртіп сақшылар қылмыстың алдын алу шараларын жүргізуде

<a href="https://kyzylorda-news.kz/">Kyzylorda-news.kz</a> Полиция қызметі – жауапкершілігі мол әрі қоғамдық қатынаста азаматтардың құқығын қорғау үшін белгілі бір функцияны орындайтын мамандық. Маңызды қызметтің жүгін абыроймен арқалап жүрген қызметкерлердің бірі - Қызылорда облысы бойынша Қылмыстық-атқару жүйесі департаментінің №60 мекеме бастығының тәрбие ісі жөніндегі орынбасары Өскенбаев Алтынбек Тұрарбекұлы.2000 - 2002 жылдар аралығында әскери борышын Орал қаласында өтеп, Ішкі істер органдарындағы қызметін 2003 жылы Қызылорда облысы бойынша Қылмыстық-атқару жүйесі департаментінің №60 мекемесінде күзет бөлімінің бақылаушысы болып бастаған ол қазіргі таңда әділет подполковнигі шенінде. Мекеме бастығының тәрбие ісі жөніндегі орынбасары. 1978 жылдың 30 қаңтарында Қызылорда қаласында дүниеге келген. 1985- 1995 жылдар аралығында Қызылорда қаласындағы №212 орта мектепті бітіргеннен кейін, Павлодар қаласындағы Ішкі істер министрлігінің заң колледжін «құқықтану» мамандығы бойынша сырттай білім алып шыққан. Өзінің келешек мамандығын Қылмыстық-атқару жүйесінде қызмет етумен байланыстырған жас маман 2009 – 2013 жылдар аралығында Қостанай заң академиясын аяқтаған. Қатардағы бақылаушы лауазымынан, мекеме бастығының орынбасары, подполковник шеніне дейін аянбай еңбек етуі арқасында бірнеше медаль, құрмет грамоталарымен награтталған. 2005 жылы Аян есімді арумен отбасын құрып, бүгінде Талшын, Бірлік, Инабат есімді ұл-қыздарына тәлім - тәрбие беруде. Жұбайы Аян Алтынбектің жұмысына үлкен түсіністікпен қарайды. Түңғыш қызы Талшын - Қызылорда қаласындағы Білім иновация лицейін 2024 оқу жылында алтын белгі иегері атағымен тәмамдады. Сонымен қатар, Республикалық Code-W жарысының 1 орын иегері. «Елбасы медалі» жобасының қола медаль иегері. Мектепаралық дебат ойындарының 1 орын иегері. Облыстық «Сыр дарыны» білімділер академиясының 1 орын иегері. Ұлы Бірлік – Назарбаев зияткерлік мектебінің 9 сыныбының үздік оқушысы. Кенжесі Инабат – Алматы қаласындағы Республикалық физика – математика мектебінің 5 сыныбын үздік аяқтады. Жары Аянның да жетістіктері аз емес. Ғылым жолын таңдаған аяулы жар Қазан қаласындағы Ресей федералдық университетінің психология – педагогика мамандығында докторантура деңгейіне дейін білім алған. Қазіргі таңда Қорқыт ата атындағы Қызылорда университетінде психолог маман. Отбасының ауыз толтырып айтар жетістігін қылмыстық-атқару саласының маманы өзінің қолдауының арқасында деп біледі.<blockquote>– Заман талабына сәйкес алынған білім – халықтың игілігіне жаратылып, мемлекетіміздің дамуына үлес қосуы керек. Бұл менің өмірлік ұстанымым. Сол себепті білім алуға құйылған инвестицияның қашан да қайтарымы болады. Оның дәлелі – өмірлік жарымның республикалық деңгейдегі бәсекеге қабілетті маман болуы, балаларымның үздік деп танылған оқу орындарында білім алып, жақсы жетістікке жеткені деп білемін.</blockquote>Қызметте де, отбасында да үлкен абыройға ие әке мамандық таңдаудан да, жар таңдаудан да қателеспегенін айтып, бұл қызметтің қатал тәртіпті талап ететінін тілге тиек етті.

Қызылорда: Еңбекте абыройлы Алтынбек

<a href="https://kyzylorda-news.kz/">Kyzylorda-news.kz</a> &nbsp; Арал аудандық прокуратурасы 2024 жылдың 5 айында құқық бұзушылық профилактикасы саласында және аудандық прокуратурамен атқарылған жұмыстар туралы БАҚ өкілдеріне есеп берді.Аталған мерзімде жалпы тіркелген қылмыстар алдыңғы жылмен салыстырғанда бір деңгейде. Қылмыстардың төмендету мақсатында аудан көлемінде құзырлы және үкіметтік емес ұйымдардың өкілдерімен бірлесіп күнделікті рейдтік іс-шаралар ұйымдастырылып, білім беру ұйымдарында білім алушылар мен олардың ата-аналарына түсіндірме жұмыстары жүргізілген. Оның ішінде аудандық прокуратураның бастамасымен қоғамдық кеңес, жергілікті атқарушы органдар мен аудандағы мейрамхана, тойхана, кафе меңгерушілері (жеке кәсіпкерлер) арасындағы өзара келісім орнату жөніндегі меморандум жасалып, мейрамхана және тойханалардың уақытын сағат 00:00-ге дейін, ал, кафелер мен кешкі мезгілде ұйымдастырылатын шараларды сағат 01:00-ге дейін өткізу туралы шешім қабылданды.Сондай-ақ, алаяқтықтан сақтану жолдары бойынша «Толқын» газетіне және аудандық прокуратура, әкімдік пен полиция бөлімінің «Facebook» ресми парақшаларында мақалалар мен видеороликтер үнемі шығып, жадынамалар таратылуда. Бұдан бөлек «Зорлық-зомбылықсыз отбасы» тақырыбында Арал аудандық Ардагерлер кеңесі және аудандық әйелдер кеңесінің қатысуымен аудандық полиция бөлімінде әкімшілік құқық бұзушылықтар жасап, қорғау нұсқамалары тағайындалған азаматтармен кездесу өткізіп, тиісті түсіндірме жұмыстарын жүргізілуде. Аудандық прокуратура және жергілікті атқару органдарымен бірлесіп әзірленген бейнеролик түсіріліп, әлеуметтік желілерде, Арал қаласында орналасқан LED-экрандарда жарияланды және қаланың негізгі көшелеріне билбордтар ілінген. Профилактикалық есепте тұрған тұлғалардың мекенжайлары ұдайы араланып, түсіндірме жұмыстары да жүргізілуде.Сотқа дейінгі тергеп-тексеру барысында жүзеге асырылған қадағалаудың нәтижесінде азаматтардың конституциялық құқықтарының бұзылуы орын алмаған. «Цифрлы Қазақстан» мемлекеттік бағдарламасына сәйкес ауданымызда қылмыстық істердің 100 процент электронды форматта тергелуі қамтамасыз етілген. Сонымен бірге әлеуметтік-экономикалық салада атқарылған қадағалау жұмыстарының нәтижесінде ағамдағы жылдың 5 айында 17 тексеру жүргіліліп, тексеру қорытындысымен 32 ұсыну және 2 наразылық енгізілген. Олардың қаралу қорытындысымен 88 тұлға тәртіптік, 265 тұлғаға әкімшілік шаралар көріліп, 13 миллион теңге әкімшілік айыппұл өндірілген. Ал 40 миллион теңгенің мүлкі мемлекетке кері қайтарылған. Бұдан бөлек 15 мыңнан астам кәсіпкерлердің және азаматтардың құқықтары қорғалған. Прокурордың ықпал ету актісімен 7 миллион теңге мемлекет бюджетіне өндірілген. &nbsp;Кәсіпкерлердің құқықтарын қорғау бағытында үнемі кездесулер жүргізілуде. Сонымен қатар ауданда жүргізіліп жатқан инвестициялық жобаларға сүйемелдеу көрсетілуде.Сондай-ақ атқарылған жұмыстардың нәтижесімен ауыл шаруашылық мақсатындағы пайдаланылмай жатырған құны 39 миллион теңге болатын 6490 гектар жер учаскелері мемлекеттік жер қорына қайтарылды және аталған жерлер басқа шаруаларға табысталуда.Аудандық прокуратурамен алимент төлеуден қасақана жалтарған екі борышкерге қатысты ҚК-тің 139-бабымен қылмыстық істер тіркеліп, жүргізілген тергеп-тексеру нәтижесімен істер сотқа жолданып, үкім қабылданған.Бұдан бөлек, алимент төлемеген 8 борышкерге қатысты әкімшілік іс қозғалып, тиісті жауапкершілікке тартылды.Арал аудандық прокуратурамен аймақта азаматтардың конституциялық құқықтарының сақталуын және құқық бұзушылықпен күресуді қамтамасыз етуде жоғарғы қадағалауды жүзеге асыруға байланысты жұмыстар жалғасын таба бермек.

Аралда құқық бұзушылық саласында атқарылған жұмыстар сараланды

<a href="https://kyzylorda-news.kz/">Kyzylorda-news.kz</a> &nbsp;Полиция қызметінде криминалистика саласының алатын орны ерекше. Қылмысты ашу ісінде бұл қызмет үлкен жұмыс атқарады. Қазіргі таңда криминалист мамандығына қызығатын жастар қатары көбейіп келеді. Солардың бірі – Ерқанат Болатов Қызылорда қалалық полиция басқармасының жедел-криминалистка бөлімінің криминалисті, полиция капитаны болып қызмет атқарады.Ерқанат Қуатұлы 1994 жылы 9 қарашада Қызылорда қаласында дүниеге келген. «Ақмешіт» гуманитарлық-техникалық институтында заңгер мамандығы бойынша оқуға түседі. Әкесінің салған сара жолымен жүріп, әке сөзін екі етпеген ол аталмыш білім ордасын үздікке тәмамдаған. Ата – ана үмітін ақтауда Ерқанат Қызылорда қаласына қызметке орналасады. Алғашқы еңбек жолы 2014 жылы Қызылорда қаласы Полиция басқармасының патрульдік полиция батальоны қызметінен бастаған.«Біздің отбасында полиция қызметінде еңбек еткен адам жоқ. Ал әкемнің досы сол салада жұмыс жасады. Ол кісі келгенде қасына отырамын. Әңгімесіне құлақ саламын. Кейін ол жайында деректер жинауға мән бердім. Жоғары оқу орнында жүргенде сыры көп сала жөнінде білімімді толықтырдым. Келешекте осы сала маманы атануға дайындалып жүрдім. Оқып жүргенде тиісті мекемелерге іс-тәжірибеден өтуге бардық. Сонда арнайы құралдармен жабдықталған чемоданды көзіміз жиі шалатын», - деді Ерқанат Болатов.Жас жігіт осылайша криминалистика саласының қыр-сырына қанығуға тырысты. Кейбір уақытта түйінді мәселенің тарқауын сол мамандар шешіп жататын еді. Осының барлығы оған ерекше әсер етті.<blockquote>«Қиын мамандық қой. Кейін полиция саласына қызметке келгенде де маған оңайға соққан жоқ. Патрульдік бекеттерде жүргенде криминалистиканың қыр-сырын бірте-бірте үйрене бастадым. Жедел тергеу тобының ісіне белсене араластым. Оған терең білімнің қажеттігін түсіндім. Бұл саладағы тәжірибелі мамандардан ақыл-кеңес алдым. Олар қолдау білдірді. Осылайша саланың қиын соқпағына түсіп кеттік. Қылмыстық оқиға орнында әрбір айғақты сүзгіден өткізуге мән бердім», - деді ол.</blockquote>Криминалистер жұрттың барлығы біле бермейтін чемоданды арқалап жүреді. Олардың көбісі тұрмыста қолданыла бермейді. Мәселен, ғылыммен ұштасқан ұнтақты қылды қаламмен меңгеру үлкен жауапкершілікті талап етеді.<blockquote>«Мен 2017 жылдың 5 шілдесінде Қызылорда қалалық полиция басқармасының жедел-криминалистика бөлімінде еңбек жолымды бастадым. Рас, ерекше түсті кеудеше киіп маман ретінде чемодан асынып жүру маған бірден бұйыра қойған жоқ. Бөлімде аға криминалист қызметін атқаратын тәжірибелі маманның бірі маған ақыл-кеңесін айтты. «Қылмыс жасырынды айлаға құрылады, айланы әшкерелеу үшін амал керек, ал амалын табу үшін не керек» деп алдыма криминалистика саласына қатысты том-том болған кітаптарды қойды. Олар мен үшін шешуі жоқ теңдеу секілді көрінді. Сол кітаптарды оқып шықтым. Өзіме қажетті көптеген мәліметтерге кезіктірдім», - деді ол.</blockquote>Жаңылуды жаны сүймейтін із кесуші криминалистің үш қаруы бар екенін айтады. Олар ең бірінші – адамгершілік, екінші – білімі, соңғысы – қызметіне деген адалдығы. Бұл салада ұзақ бөгелу үшін асқан төзім, салқынқандылық, байыпты мінез керек.Жүктелген зор міндеттің маңыздылығын әбден түсініп, ауыр да жауапты сәтте ұстамдылық танытады. Жасынан өжет, қылмысқа қарсы күрес жүргізу негіздерін шебер меңгерген жігіт Отан алдында қызмет ету жолында көзге түсуде. Қылмыс әлеміне қарсы күресте көптеген операцияларға қатысып, қылмыстарды ашқан.

Әке арманын орындаған полицей

<a href="https://kyzylorda-news.kz/">Kyzylorda-news.kz</a> &nbsp;Бүгін Қызылорда облысының Полиция департаментімен «Жолда қабылдау» акциясы өткізілді. Жол қауіпсіздігін қамтамасыз ету мен жүргізушілер арасында жүргізу тәртібін қалыптастыру бойынша құқықтық түсіндіру жұмыстарын жүргізу мақсатында ұйымдастырылған шара «Самара-Шымкент» тас жолының Бірқазан елді мекенінің тұсында өтті.Департамент бастығының бірінші орынбасары полиция полковнигі Е.Абдрамановтың бастамасымен өткен акция барысында жүргізушілерге тек жазалау шарасын қолдану емес, сонымен қатар адамның өмірі мен денсаулығын сақтап, қауіпсіздігін қамтамасыз ету полиция қызметкерінің басты мақсаты екендігі түсіндірілді.Жол қауіпсіздігі мәселесі қашан да өзекті. Жыл басынан Сыр өңірінде полиция қызметкерлерімен қабылданған шаралар нәтижесінде жол көлік оқиғаларынан қайтыс болғандар саны 11,4 процентке, ал «Самара-Шымкент» тас жолында 36,8 процентке азайған.«Самара-Шымкент» тас жолының бойында жол ережесін бұзудың 18 мың 344 дерегі анықталса, оның 5 мыңға жуығы жол апатына тікелей әсер ететін өрескел құқық бұзушылықтар.«Жол-көлік оқиғаларынан қайтыс болғандар саны төмендеді. Дегенмен де әлі де болса қауіпсіздік ережелерін сақтауға назар аударған абзал.Бүгінгі күні жүргізушілердің бақылау камералары тұсында ғана жылдамдықты бәсеңдетіп, келесі камераға дейін қатты жүретінін бәріміз білеміз. Жүргізушілерді тәртіпке келтіру үшін қазіргі уақытта «Қорғау» жүйесі, мобильдік жылдамдық өлшегіштері бар автомобильдер қолданысқа енгізілді. Бүгінде автокөлік жүргізушісі сан мәрте айыппұл арқаласа да, жылдамдық асыруды тоқтатар емес.Жол ережесіне бағынбаудың өзі адам өміріне қауіпті. Жалпы, тәртіпке бағынбаған жүргізуші көбіне көлік құралдарын пайдалану қағидасын бұзу, көлік құралдарының жүруіне кедергі келтіру, көлік құралын басқарудан айыру, көлік құралын басқарудан шеттету және масаң күйін куәландыру бойынша айыппұл мен жаза арқалайды.Сондай-ақ, жол бойында жайылып жүретін малдың да көлік апатын тудыратын бірден-бір фактор екенін де естен шығармаған жөн.Жол саласына қатысты әр деректің артында адам тағдыры тұрғанын ұмытпайық. Ең бастысы – қайғылы оқиғаны болдырмаудың нақты нәтиже беретін жолдарын тауып, жүзеге асыруымыз қажет» деді Е.Абдраманов.Бүгінгі шара барысында полиция қызметкерлері жол қозғалысы ережелерін сақтау бойынша түсіндірме жұмыстарын жүргізіп, жүргізушілердің сұрақтарына жауап берді. Сонымен қатар, көлік жүргізушілеріне ескертпе, түсіндірме парақшалары таратылды.

Қызылордада «Жолда қабылдау» акциясы өтті

<a href="https://kyzylorda-news.kz/">Kyzylorda-news.kz</a> Ішкі істер саласында қоғамдық тәртіп пен азаматтардың қауіпсіздігін қамтамасыз ету сапында еңбек етіп келе жатқан ағайынды Бердібековтер бағындырған биіктер көп.Елге қызмет етуді ердің міндеті деп ұғынған бауырларды әріптестері адал еңбек пен таңдаған мамандықтарына беріктікке тәрбиелейтін үлгі деп бағалайды.Отбасының тұңғышы – Самат Сейілханұлы болашағын құқық қорғаумен мектеп жасында жүріп-ақ байланыстырыпты. Ұстамды, ізденімпаз қабілетін қажеттігі бар іске жұмылдыруды мақсат тұтады. Сабақ үлгерімі жақсы талапкердің қандай оқу орынына таңдаса да, мүмкіндігі бар болатын. Алайда, Самат қоғамдық тыныштықты түзететін маман иесі болуға бел буады.Ақтөбе қаласындағы Қ.Жұбанов атындағы университеттің құқықтану мамандығын тәмамдаған жас маманның еңбек жолы Қызылорда патрульдік полиция батальонында инспектор қызметінен басталады.Бұған дейін жоғары оқу орнында алған білімін енді, ол тәжірибемен тоғыстырады. Қиындығы көп саланың қыр-сырына үңіліп, қызығушылығы мен ізденісін арттыра түседі. Алғашқы орындағы үш жыл капитан Бердібековтің әлі есінде. Облыс орталығында шарболаттай шыңдалған полицей 2012 жылы туған жері Қазалыға оралады. Алғаш аудандық бөлімнің әкімшілік қамау орнында қызмет етсе, 2016 жылдан учаскелік полиция инспекторы болып, қоғамдық тәртіп пен қауіпсіздікті сақтау сапында тер төгіп келеді.Ішкі істер органдарында бір отбасының бірнеше адамының болуы қызметке деген құрмет, парызға адалдық. Алдыңғы буын ағасының ісін мақтанышпен жалғап келе жатқан Алмат Бердібековке мамандықтың маңызы бала күнінен қалыптасады.<blockquote>«Інім мен қызмет ететін салаға қызығушылық танытқанда, іштей қарсылық білдіргенім бар. Алайда, «Ішінде кімнің оты бар, Қар жауса да сөнер ме?» дегендей, жүзіндегі жалын, батыл байламы мені тәнті етпей қоймады. Жаңадан оқу бітіріп келген жастарға еңбекке етене араласу оңайға түспейді. Алмат та, Асхат та қызметтің жауапкершілігін, қиындықтары мен қауіптілігін жан-тәндерімен сезініп өсті. Қазір бір-бірімізге қолдау білдіріп, ортақ саланың қыр-сырымен жақсы әріптес, жақын туыс болып, бөлісеміз», – дейді Самат.</blockquote>Алмат Бердібеков – Қазақстан Республикасы Ішкі істер министрлігі Б.Бейсенов атындағы Қарағанды академиясының түлегі. Құқықтану мамандығын алған дипломды маман 2010 жылы аудандық полиция бөліміне жедел уәкіл болып жұмысқа орналасады. 2019 жылы жедел криминалистика бөлімшесінде. Мұнда қатардағы криминалистен бөлімше бастығы лауазымына дейін жоғарылайды.Жедел қызметкердің алдында қашан да, жауапты міндет тұрады. Қылмысты ашу, іздестіру, құрықтауда жинақылық, шапшаңдылық, тез шешім қабылдауға бейміділік қажет. «Ізін суытпай», қажетті шараларды қабылдауда кәсіби шеберлік сыналады. Бұл тұрғыда полиция капитаны А.Бердібековтің бастамасымен ашылған істер көп. Әсіресе, қазір өршіп тұрған алаяқтық құрбандарын құрықтауда жинаған тәжірибесі мен жинақылығы көмегін тигізген. Қарамағындағы аға жедел уәкіл, жедел уәкіл, кинологтардың әрбірі «сен тұр, мен атайын» дейтін кәсіби мамандар.Бүгінде жауапты жолдағы өріс отбасында ортақ басымдыққа айналып үлгерген. Қос ағасының жолын жалғаған Асхат Бердібек те тәртіп сақшысы. Қызылорда облыстық полиция департаментінің жылдам қимылдайтын жасақ уәкілі болған ол 2015 жылдан облыстық мемлекеттік күзет басқармасында. Полиция капитанының жас бола тұра, алған асулары көп.<blockquote>Қызмет бабында кездестірген, ерекше есте қалған оқиғалар, мақтау-марапаттары туралы сұрағанымызда, ағайындылар айтудан бас тартты. «Қиындық та, қызық та өз уақытында өтіп жатады. Бізің мамандығымыздың маңызы сонда. Бір-біріне ұқсамайтын оқиғаларға жиі ұшырасамыз. Кейде олардан өмірлік сабақ түземіз. Салалық марапаттар да бар. Бірақ біздің жұмыс онымен өлшенбейді. Талап пен қауіпсіздік үдесінен көріну», – дейді Алмат Сейілханұлы.</blockquote>Түрлі бөліністе кейде тоғысуларына тура келетін туыстар ондайдың қиындығы да, жеңілдігі де бар. Тағдырларын ішкі істер саласымен байланыстырған ағайындылар таңдау сырын жігіттер тәрбие алған ұядағы адалдық, әділдік, серттен таймау кредосынан туындаған деп топшыладық.

Қазалы: Бердібековтер отбасы бағындырған белес көп

<a href="https://kyzylorda-news.kz/">Kyzylorda-news.kz</a>&nbsp; Ішкі істер органдарының заманауи жүйесінің қалыптасуына, құқықтық тәртіпті сақтауда сала ардагерлерінің де үлесі зор. Кешегі капитан мен лейтенант шеніндегі мамандар көптеген жылдар бойы органдарда жұмыс істеген полиция қызметкерлері, бүгінгі таңда жастарға үлгі болар құрметті демалыстағы зейнеткерлер.Сондай ел алғысына бөленген ардагердің бірі – ішкі істер органдарының ардагерлер кеңесінің төрағасы, 80 жастағы ардагер, полиция майоры шенінде зейнеткерлікке шыққан Алмағанбетұлы Жақсылық.Жақсылық Алмағанбетов құқық қорғау саласында 25 жыл қызмет жасап, құрметті еңбек демалысына шыққан ардагер. Ол 1943 жылы 15 тамыз күні Қызылорда облысы Арал ауданы, Қаратерең ауылдық округінде дүниеге келген. Қарағанды милиция мектебін үздікке бітірген. 1960–1962 жылдары Арал қаласындағы техникалық училищесінде кеме жүргізуші механик мамандығын бітірген. 1962 –1965 жылы күз айында әскер қатарына шақыртылып, әскери борышын өтеп келген. Сол жылы ДЭС(дизельский электро станциясында) өз мамандығы бойынша машинист-дизилист болып жұмыс атқарған. Ал 1968 жылы 15 тамыздан бастап Ішкі істер органына қызметке қабылданған.Кейіпкеріміз ішкі істер саласында еңбекпен түзеу мекемесінде кадр бөлімінің аға инспекторы, оперативтік инспектор, отряд бастығы қызметін атқарған. Сонымен қатар, ішкі істер бөлімінде штаб аға инспекторы, арнаулы комендатура бастығы қызметтерін атқарып, майор шенімен 1993 жылы зейнетке шыққан. 2011 жылдың 1 қазанынан бастап қалалық ардагерлер ұйымының төрағасы болып бекітіліп, қоғамдық қызметте ат салысуда.<blockquote>– Жалпы полиция болу – форманы киіп алып, қызметіңді асыра пайдалану емес, елге қызмет ету. Қандай шен, лауазымда жүрсең де өзіңе жүктелген міндетті қиналмастан, асқан жауапкершілікпен мінсіз атқару ең маңыздысы. Полиция – жұртшылыққа, елге жақсы қасиеттерімен, жанашырлығымен, қамқорлығымен есте қалуы керек. Тәртіп пен төзім салтанат құрған жерде құқық қорғаушылардың да абыройы арта түспек, – дейді зейнеткер.</blockquote>Өзінің егде жасына қарамастан, ол әлі күнге дейін жастар үшін тәлімгер болып табылады. Жас кадрлардың қалыптасуы мен дамуына ардагерлердің қосқан үлесі баға жетпес. Құқық қорғау органдарындағы қызметі кезінде көптеген наградалармен, бірнеше мәрте Қазақстан Республикасының Ішкі істер министрлігінің «Құрметті ардагері» медалін, «Құрмет грамотасымен» марапатталған.Мұндай қиын жұмыста жақындардың қолдауы өте маңызды. Жары Алмағанбетова Күнқияш апамызбен отасқандарына 57 жыл болған. Ол кісі де күзет департаментінде бас бухгалтер қызметін атқарып, зейнетке шыққан. Адал еңбек арқасында құрметке бөлінген ардагер бүгінгі таңда 1 ұл және 3 қыз баланың әкесі, 6 немере мен 5 шөберенің атасы.<blockquote>– Халық алдында адал қызмет етуге ант берген қатардағы әрбір тәртіп сақшысына үлкен жауапкершілік жүктейді. Өйткені, еліміз үшін адам өмірінің қауіпсіздігі қашанда басты назарда тұрады. Соған орай біздің негізгі міндетіміз халық сенімін барынша иеленіп, азаматтардың конституциялық құқықтары мен бостандықтарын қорғау. Бұл біздің қызметімізді бағалаудың негізгі өлшемі. Ал ол отансүйгіштіктен бастау алады. Тәртібі қатаң, адамның төзімін сынайтын құқық қорғау саласының қоғамдық қызметтегі жүгі ауыр. Кейінгі буын осыны саналарына түйіп, адал еңбек етуге тырысса деймін. Ел тыныштығын қорғаудағы полиция қызметкерлерінің еңбегі әрдайым жоғары бағалана берсін, – дейді құрметті ардагер.</blockquote>

Ел алғысын алған ардагер полицей

<a href="https://kyzylorda-news.kz/">Kyzylorda-news.kz</a> Жас болса да өзінің жұмысына деген жауапкершілігі мен тынымсыз еңбегінің арқасында қатарларынан оза шауып, жоғары көрсеткіштерге қол жеткізген өз ісінің майталманы – Қызылорда қаласы Полиция басқармасының тергеу бөлімінің тергеушісі полиция лейтенанты Махсатов Мағжан Махсатұлы.Кейіпкерміз 2001 жылы Қызылорда облысы, Арал ауданында дүниеге келген. Ол ішкі істер саласында қызмет етуді бала кезден армандаған. Мектеп бітірген соң арман қуып ҚР Б.Бейсенов атындағы Қарағанды академиясына оқуға түседі. Арманына адал Мағжан оқуды үздік бітіріп, 2023 жылдың мамыр айында Қызылорда қаласы Полиция басқармасының тергеу бөлімінің тергеушісі лауазымына тағайындалған күннен бастап тыңғылықты жұмысы мен кәсіби деңгейінің арқасында ұжым арасында абыройлы, жұмыс іскерлігі биік, үлгілі дәрежеде қызмет атқарып келеді.Оның бірден-бір дәлелі – Қазақстан Республикасы Ішкі істер Министрлігімен бекітілген тергеушілердің жеке рейтингін анықтау әдістемесін бекіту туралы бұйрығына сәйкес, 2024 жылдың 4 айында өндірісіндегі қылмыстық істерге барынша процестік шешім қабылдап, заңды баға берген ол ұшқыр ойымен, зеректігімен оңтайлы көрсеткіштерге қол жеткізіп, қырағылығымен көріне білді.Жас тергеушінің тәлім-тәрбиесі, ұшқан ұясы жайлы тоқтала кетсек артық етпес. Ұлы ойшыл Әбу Насыр Әл-Фараби «Адамзатқа әуелі тәрбие берулі керек, тәрбиесіз берілген білім қоғамға апат алып келеді» деген даналық сөзі осы кезде ойға оралады.Әкесі – Жұбаныш Махсат Ерғазыұлы ТОО «PSI ENGINEERING» мекемесінде көлік механигі қызмет абыройлы қызмет атқаруда. Анасы –Жубаныш Әлия Байтаққызы АО «Отбасы банккінде халыққа қызмет көрсетіп, елдің алғысына бөленіп жүрген жан.«Әке көрген оқ жонар» дегендей, Мағжан үйде берген тәрбие мен білімін ұштастыра, өзіндік сөз саптауымен іскерлік қызмет барысында адамдармен тіл табыса білу, олардан жауап алу барысында өзіндік стилін қалыптастырып, адам өміріне қасақана ұйымдастырылған (бұзақылық, алаяқтық, тонау, қарақшылық және тағы да басқа) қылмыстарды тергеуде оң шешімін таба білуде.Қиыны мен қызықшылығы қатар жүретін бұл салада өзінен кейін ерген жас тергеушілерге үлгілік танытып жүрген Мағжанға сәттілік тілеміз.

Қазақстан және Қызылорда облысының жаңалықтары: Құқық