<a href="https://kyzylorda-news.kz/">Kyzylorda-news.kz</a> Қызылорда қаласында «Әділетті және Прогрессивті Қазақстанның Халықтық Конституциясы үшін!» атты өңірлік коалиция өкілдері энергетика саласының қызметкерлерімен кездесу өткізді.Қызылорда электр тарату тораптары компаниясында өткен басқосуға коалиция мүшелері Гүлшат Мұсаева, Дәурен Сейтжанов, Талғат Мақаш және Жанар Бимұратова қатысты. Жиынның негізгі мақсаты – жаңа Конституция жобасының мазмұнын таныстырып, ұсынылған өзгерістердің бағыт-бағдарын түсіндіру.Коалиция өкілі Гүлшат Мұсаева Конституциялық реформалардың негізгі басымдықтарына тоқталды.<blockquote>«Ұсынылып отырған өзгерістер мемлекеттік басқару жүйесін жаңғыртуға, билік тармақтары арасындағы тепе-теңдікті күшейтуге бағытталған. Сонымен қатар, азаматтардың құқықтары мен бостандықтарын қорғау тетіктерін нақтылау көзделіп отыр», – деді ол.</blockquote>Өз кезегінде Талғат Мақаш Парламенттің рөлін арттыру және жергілікті өзін-өзі басқару институттарын дамыту мәселесіне назар аударды.<blockquote>«Жоба аясында Парламенттің ықпалын күшейту, өңірлердегі өзін-өзі басқару құрылымдарының мүмкіндіктерін кеңейту қарастырылған. Бұл – шешім қабылдау үдерісіне азаматтардың қатысуын арттыруға бағытталған қадамдардың бірі», – деді спикер.</blockquote>Дәурен Сейтжанов адам құқықтарын қорғау тетіктеріне қатысты өзгерістерге тоқталды.<blockquote>«Жаңа редакцияда адам құқықтарын қорғау кепілдіктерін нақтылау, заң үстемдігін қамтамасыз ету және ашықтық қағидаттарын орнықтыру мәселелері көрініс тапқан», – деді ол.</blockquote>Ал Жанар Бимұратова конституциялық өзгерістердің ықтимал әлеуметтік-экономикалық әсеріне тоқталды.<blockquote>«Ұсынылған түзетулер ұзақ мерзімді даму стратегияларын іске асыруға құқықтық негіз қалыптастыруды көздейді. Бұл өзгерістердің тиімділігі қоғамның белсенді талқылауына да байланысты», – деп атап өтті ол.</blockquote>Кездесу ашық диалог форматында өтті. Компания қызметкерлері өздерін қызықтырған сұрақтарын қойып, ұсыныс-пікірлерімен бөлісті. Олар жаңа Конституция жобасының мазмұнын жан-жақты түсіну және қоғамдық талқылауға қатысу азаматтық жауапкершіліктің маңызды бөлігі екеніне назар аударды.

Жаңа Конституция жобасының мазмұны түсіндірілді

<a href="https://kyzylorda-news.kz/">Kyzylorda-news.kz</a> &nbsp;Жалпыұлттық Коалицияның бастамасы аясында құрылған өңірлік коалицияның бүгін алғашқы отырысы өтіп, оған саяси партиялардың өңірлік филиалдары төрағалары, қоғамдық ұйымдар, зиялы қауым, мәслихат депутаттары, сарапшылар, қоғам белсенділері, азаматтық сектор мен жастар өкілдері және Конституциялық реформа жөніндегі комиссияның мүшелері қатысты.Отырыста сөз алғандар жаңа Конституция жобасы Қуатты әрі Әділетті Қазақстанды қалыптастырудың берік негізі болатынын, сондай-ақ саяси жүйенің құрылымын қоғамның заманауи талаптарына сәйкес түбегейлі жаңартатынын атап өтті.<blockquote>«Жаңа Конституция жобасы – елдегі саяси жаңғырулардың заңды әрі кезең-кезеңімен жүзеге асып келе жатқан реформалардың жалғасы. Бұл құжат мемлекеттілікті нығайтып қана қоймай, билік пен қоғам арасындағы өзара жауапкершілікті күшейтеді, азаматтардың шешім қабылдау үдерісіне белсенді араласуына жол ашады. Негізгі құндылық – адам және оның құқықтары мен бостандықтары. Сондықтан Ата Заң халықтың мүддесіне қызмет ететін, әділетті әрі ашық қоғам қалыптастыруға бағытталған нақты әрі тиімді тетіктерді қамтуы тиіс. Сонымен қатар, Конституциялық өзгерістер заң үстемдігін қамтамасыз етуге, мемлекеттік институттардың ашықтығы мен есептілігін арттыруға, қоғамдағы сенім мәдениетін орнықтыруға негіз болады. Бұл бастамалар ел бірлігін бекемдеп, әлеуметтік тұрақтылық пен орнықты дамуға берік негіз қалайды. Біздің басты міндетіміз – осы өзгерістердің мәні мен маңызын өңір тұрғындарына жан-жақты түсіндіріп, олардың пікірін ескеру арқылы қоғамдық диалогты күшейту», – деді «AMANAT» партиясы облыстық филиалының төрағасы, облыстық Коалиция жетекшісінің орынбасары Жандос Базартай.</blockquote>Жиын барысында Конституциялық реформа жөніндегі комиссияның мүшесі, Қызылорда облыстық мәслихатының төрағасы, облыстық коалиция төрағасының орынбасары Мұрат Тлеумбетов, Мемлекет және қоғам қайраткері, саяси ғылымдар докторы, профессор Мұрат Бахтиярұлы, облыстық ардагерлер кеңесінің төрағасы Серік Дүйсенбаев, «Ақ жол» Қазақстан Демократиялық партиясы Қызылорда облыстық филиалының төрағасы Бауыржан Сандыбаев, «Ауыл» партиясы Қызылорда облыстық филиалының аппарат басшысы Динара Ибадуллаева, «Respublica» партиясы Қызылорда облыстық филиалының төрағасы Дәурен Сейтжанов, «Қазақстан Халық партиясы» Қызылорда облыстық филиалының мүшесі Талғат Телеубаев, «Қызылорда облысының Үкіметтік емес ұйымдарының Альянсы Ассоциациясы» заңды тұлғалар бірлестігінің төрайымы Анар Ізден, «Қазақ тілі» қоғамы облыстық филиалының төрағасы Абайбек Жүнісов пікір білдіріп, Жаңа Конституция жобасы елдің саяси жүйесін жаңғыртуға, әлеуметтік кепілдіктерді күшейтуге, кәсіпкерлікке қолайлы орта қалыптастыруға, ғылым мен мәдениетті және ұлттық құндылықтарды өркендетуге бағытталған ұзақмерзімді стратегиялық мақсаттармен толық үндесетінін атап өтті.Сондай-ақ, елдің институционалдық тұрғыдан жаңа сапалық кезеңге қадам басқаны айтылды. «Күшті Президент – ықпалды Парламент – есеп беретін Үкімет» қағидаты іс жүзінде бекіп, билік тармақтары арасындағы тепе-теңдік нығая түсті. Конституциялық бақылау тетіктері жетілдіріліп, заңсыз иемденген активтерді мемлекет меншігіне қайтару жұмыстары жүргізілуде, ұлттық ресурстарды әділ бөлу ұстанымы күшейтілуде. Барлық шешімдер әділдік, теңдік және келер ұрпақ алдындағы жауапкершілік қағидаттарына сүйенетіні ерекше аталды.Қатысушылардың айтуынша, Жаңа Негізгі заң қоғамдағы терең өзгерістерге, дүниетанымы жаңарған әрі мемлекетке жоғары талап қоятын жаңа буынның сұранысына жауап ретінде қабылдануда. Бұл үміттердің түп-төркіні – адалдық, заң үстемдігі, адам қадір-қасиетін құрметтеу және құқықтарға берік кепілдік орнату. Жаңа Конституция дәл осы қоғамдық қажеттіліктерге нақты әрі мазмұнды жауап береді.Айта кету қажет, қоғамның әртүрлі әлеуметтік топтарын ортақ құндылықтар төңірегіне топтастырып, ел дамуының жаңа кезеңіне бірлесе қадам басуды мақсат еткен Жалпыұлттық коалиция – кең ауқымды қоғамдық алаңға айналды. Оның құрамына елдегі бес жетекші саяси партиямен қатар, мыңдаған азаматтың мүддесін білдіретін 300-ден астам қоғамдық ұйым енді. Бұл – бастаманың кең қоғамдық қолдауға ие екенін көрсететін маңызды көрсеткіш. Осының жалғасы ретінде облыста саяси партиялардың өңірлік филиалдары мен қоғамдық ұйымдар жалпы құрамы 349 азаматтан тұратын аймақтық және аумақтық коалициялар құрылды. Олардың жанында белсенді үгіт-насихат жұмыстарын ұйымдастыруға арналған 200-ден аса Еріктілер қызмет атқарады. Коалицияның алдағы кезеңге арналған 695 іс-шарадан тұратын кешенді жұмыс жоспары әзірленген. Жоспар аясында тұрғындармен кездесулер, түсіндіру жұмыстары, қоғамдық талқылаулар және ашық диалог алаңдары ұйымдастырылады. Бұл форматтар арқылы өңір жұртшылығына жаңа Конституция жобасында ұсынылған өзгерістер жан-жақты түсіндіріліп, азаматтардың пікірін тыңдауға және ашық ой алмасуға басымдық берілмек.

Қызылордада «Әділетті және прогрессивті Қазақстанның халықтық Конституциясы үшін!» өңірлік коалициясы құрылды

<a href="https://kyzylorda-news.kz/">Kyzylorda-news.kz</a> «Әділетті және Прогрессивті Қазақстанның Халықтық Конституциясын қолдау» жалпыұлттық коалициясының ресми сайты алдағы референдумға және Жаңа Конституция жобасына арналған. Ресурс қазақстандықтарға ұсынылып отырған өзгерістердің мазмұнымен танысуға мүмкіндік беретін түсінікті әрі қолжетімді ақпарат алаңы ретінде әзірленді.<a href="https://referendum2026.kz/kz">referendum2026.kz </a>сайтында Негізгі заң жобасының толық мәтіні жарияланды. Сонымен қатар мұнда өзекті материалдар, сарапшылардың пікірлері және Коалицияның өңірлердегі жұмысына қатысты жаңалықтар тұрақты түрде жарияланып отырады. Платформаның құрылымы пайдаланушыларға ондағы мәліметтерді оңай бағдарлап, алдағы дауыс беруге қатысты сұрақтарына жауап табуға ыңғайлы етіп жасалған.Ақпаратты қабылдаудың қолайлылығына айрықша көңіл бөлініп, ерекше қажеттіліктері бар азаматтарға арналған бейімделген нұсқа және бет параметрлерін өз қалауынша өзгерту мүмкіндігі қарастырылған.Түсіндіру материалдарынан бөлек, сайтта Конституцияның мәні мен оның қоғам өміріндегі рөлін тереңірек ұғынуға көмектесетін тақырыптық материалдар, видеоконтент және интерактивті форматтар ұсынылған.Сайт ұсынылып отырған реформалардың мәнін жан-жақты түсініп, саналы шешім қабылдағысы келетін барлық азаматқа сенімді әрі тексерілген ақпаратқа қол жеткізуге мүмкіндік береді.Бұл ресурстың іске қосылуы «Әділетті және Прогрессивті Қазақстанның Халықтық Конституциясы үшін» жалпыұлттық коалициясының жүйелі жұмысының жалғасы болды. Оның құрамына жетекші саяси партиялардың өкілдері мен жүздеген қоғамдық ұйымдар кірді. Бірлестіктің жұмысы қазірдің өзінде еліміздің барлық өңірінде қызу жүріп жатыр. Ол Жаңа Конституция жобасының негізгі қағидаларын түсіндіруге және қоғамның бұл іске белсенді араласуына бағытталған кездесулер мен ашық диалог алаңдары арқылы жүзеге асырылып жатыр.Фото: freepik.com

Халықтық Конституция үшін коалициясының сайты іске қосылды

<a href="https://kyzylorda-news.kz/">Kyzylorda-news.kz</a> Қазақстан Республикасы Президентінің «Еститін мемлекет» тұжырымдамасын іске асыру мақсатында және «Цифрлық Қазақстан» мемлекеттік бағдарламасы шеңберінде ҚР Цифрлық даму, инновациялар және аэроғарыш өнеркәсібі министрлігінің 10.07.2019 жылғы №152/НҚ бұйрығымен бекітілген «Ақылды қала» эталондық стандартында барлық коммуналдық мәселелер бойынша азаматтардың өтініштерін қабылдайтын 109-Бірыңғай байланыс орталығын құру қарастырылған.2020 жылдан бастап Қызылорда қаласында (2023 жылы Қызылорда облысы толығымен қосылды) «109» бірыңғай нөмірі арқылы коммуналдық мәселелер бойынша облыс тұрғындары мен қонақтарының өтінімдерін қабылдайтын 109-Бірыңғай байланыс орталығы (әрі қарай – 109-қызметі) қызмет атқаруда. 109 – қызметі 24/7 жұмыс режимінде, барлығы 28 қызметкермен (4 ауысыммен) телекоммуникация құралдары («109» желісі, мобильді қосымша, әлеуметтік желілер) арқылы өтінімдерді тіркейді, жауапты мекемелер мен ұйымдарға жолдайды.2020-2025 жылы аралығында 831 742 қоңырау тіркелді (2020 жылы – 95595 өтінім, 2021 жылы – 111426 өтінім, 2022 жылы – 109061 өтінім, 2023 жылы – 165482 өтінім, 2024 жылы – 167237 өтінім, 2025 жылы – 182 941 өтінім тіркелді).Азаматтардың мемлекеттік қызмет және коммуналдық мәселелерін шешу, мемлекеттік органдардың жұмысын жетілдіру және ақпарат алу қажеттіліктерін қанағаттандыру бойынша халықтың мемлекеттік органдармен өзара іс-қимыл тәжірибесін жақсарту мақсатында қызмет атқарады. Бүгінгі күні тұрғындар «109» нөмеріне хабарласу арқылы бірнеше мәселелерді бір нөмерге хабарласа отырып шешімін таба алады.Сонымен қатар, 109-қызметі:– Облыстық сайлау комиссиясының колл орталығы болып жұмыс атқарады;– «Азаматтарға арналған үкімет» комерциялық емес акционерлік қоғамының бастамасымен 111 «Аманат» колл орталығы (Отбасы, әйелдер және балалардың құқықтарын қорғау мәселелері бойынша) «109» желісіне қосылды;– Республикада алғашқы болып «104» желісіне келіп түсетін қоңыраулар «109» желісіне бағытталды;– «Аманат» партиясы Қызылорда облыстық филиалының бастамасымен «Ерікті көмекке» желісінің колл орталығы болып бекітілді;– Smart City жобалары аясында Қызылорда облысында iorda.kz порталы көмегімен жеке және заңды тұлғаларға коммуналдық қызметтермен 85 бағыт бойынша қызмет көрсетуде;– «Таза Қазақстан» экологиялық бағдарламасының операторы болып бекітілді.«Көмек-109» АЖ «Smart Qyzylorda», АТЖ «SDU» және Қазақстан Республикасының Бас прокуратурасымен «Цифрлық қадағалау» бірыңғай ақпараттық-талдау жүйесімен интеграция жұмыстары жүргізілді.

109 – байланыс қызметі Қызылордада қолжетімді

<a href="https://kyzylorda-news.kz/">Kyzylorda-news.kz</a>&nbsp; Павлодарда офицер&nbsp;әскерге шақырылғандарды “әскерден босатып беремін” деп ақша алған. Ұлттық қауіпсіздік комитеті бұл әрекеті үшін&nbsp;әскери комиссариат қызметкерінің үстінен шағым түсірді.&nbsp;Бұл туралы&nbsp;<a href="https://stan.kz/pavlodarda-oficer-kazakstandik-askerge-shakirilgandarid-430302/">Stan.kz</a>&nbsp;ақпарат агенттігі хабарлады.“Сот кабинеті”&nbsp;материалдарына сәйкес, әскери комиссариаттан шақыру қағазын алған жігіттер таныстары арқылы Павлодар облысы Қорғаныс істері департаментінің қызметтік қызметті ұйымдастыру бөлімінің офицеріне&nbsp;шыққан. Олар одан мерзімді әскери қызметтен босатуға көмектесуін сұраған. 32 жастағы әскери комиссариат қызметкері бұл мәселені сыйақы үшін шешіп бере алатынын айтқан.“Оның көрсеткен “қызметінің”&nbsp;құны 250 мыңнан 1,4 миллион теңгеге дейін өзгеріп отырған. Ақшаны қолма-қол алған&nbsp;және әскери қызметкердің туыстарының банк карталарына аудартқан”, –&nbsp;делінген құжатта.Іс материалдарына сәйкес, офицердің көмегіне&nbsp;запастағы әскери қызметкер де жүгінген. Ол әскери-дала жиындарынан жалтармақ болған.<blockquote>“Сотталушы Н өзінің қызметтік лауазымына байланысты мерзімді әскери қызметтен босатуға ықпал ете алмайтынын біле тұра, алдап, ақша&nbsp;жымқырып, қылмысқа&nbsp;барған”, –&nbsp;делінген сот құжатында.</blockquote>Іс материалдарында төрт жағдай көрсетілген. Келтірілген жалпы залал көлемі – 3,6 миллион теңге. Сондай-ақ ақша төлеген барлық әскерге шақырылғандардың&nbsp;әскери-дәрігерлік комиссия денсаулық жағдайына байланысты уақытша әскери қызметке жарамсыз деп танығаны атап өтілді. Бұдан соң&nbsp;жігіттер&nbsp;Ұлттық қауіпсіздік комитетіне арызданған. Жәбірленушілердің арасында шақырылғандардың&nbsp;бірінің анасы&nbsp;болған.<blockquote>“Азаматша С&nbsp;өзінен заңсыз түрде ақша алынғанын және мәселесінің шешілмегенін түсінген соң, өзіне 1 миллион теңге көлемінде материалдық шығын келтірілгенін көрсетіп, ҰҚК департаментіне арызбен жүгінуге шешім қабылдады”, – делінген сот құжатында.</blockquote>Сотталушы офицер өз кінәсін мойындады. Сот жеңілдететін мән-жайлар ретінде оның өкініш білдіруін, тергеуге көмектесуін, кәмелетке толмаған балаларының болуын және келтірілген зиянды ерікті түрде өтеуін ескерді. Ал&nbsp;әскери антты бұзуы –&nbsp;ауырлататын мән-жай ретінде танылды.Семей гарнизонының әскери соты айыпталушыны Қылмыстық кодекстің 190-бабы 3-бөлігі 2,4-тармақтары (Мемлекеттік функцияларды орындауға уәкілетті адамның бірнеше рет жасаған&nbsp;алаяқтық) бойынша кінәлі деп танып, оған жымқырылған соманың сегіз еселенген мөлшерінде 29,2 миллион теңге айыппұл тағайындады.Айыпталушының үйқамақта болған уақытын ескеріп, сотталушы 28 464 750 теңге төлеуге міндеттелді. Сонымен қатар офицер “лейтенант”&nbsp;әскери атағынан және мемлекеттік қызметте лауазым атқару құқығынан өмір бойына айырылды. Ол айыппұлды&nbsp;алты ай ішінде өтеуі қажет.“Сот кабинеті”&nbsp;жүйесінде жарияланған материалдарда соттың сотталушыға ақша берген тұлғаларға қатысты қандай шара қолданғаны нақтыланбады. Сондай-ақ сот құжаттарында тергеу барысында сотталушыдан&nbsp;тәркіленген ақша сот шешімімен мемлекеттік бюджет кірісіне аударылатыны көрсетілген.<blockquote>“Сотталушыдан&nbsp;жәбірленушілерге өтемақы қорының пайдасына 20 айлық есептік көрсеткіш мөлшерінде, яғни 78 640 теңге көлемінде мәжбүрлі төлем өндірілсін. Үкім заңды күшіне енгеннен кейін, автокөлікті тінту кезінде алынған 250 000 теңге көлеміндегі ақша мемлекет кірісіне тәркіленсін”, –&nbsp;делінген сот шешімінде.</blockquote>Үкім заңды күшіне енген жоқ.Фото:&nbsp;Pexels.com

Қазақстандық офицер әскерге шақырылғандарды "әскерден босатамын" деп алдап ақша алған

<a href="https://kyzylorda-news.kz/">Kyzylorda-news.kz</a> &nbsp;Қызылорда облысының Полиция департаменті Есірткі қылмысына қарсы іс-қимыл басқармасы мектеп оқушылары арасында облыстық қазақ ұлттық ойындарын ұйымдастырды. Аталған іс-шара спортты, ұлттық дәстүрді және профилактикалық жұмысты ұштастыра отырып, жас ұрпақ арасында салауатты өмір салтын насихаттауға және есірткіге қарсы тұрақты көзқарас қалыптастыруға бағытталды.Жарысқа облыстың жалпы білім беретін мектептерінің 600-ден астам жоғары сынып оқушылары қатысты. Ұлттық ойындар алаңы спорттық рухқа, достық бәсекеге және жанкүйерлік қолдауға толы болды. Қатысушылар өздерінің дене дайындығын ғана емес, қазақ халқының мәдени мұрасына деген құрметін де көрсетті.Сайыс бағдарламасына қазақтың дәстүрлі ұлттық спорт түрлері енгізілді: «қол күрес», «бұқа тартыс», «ләнгі тебу», «асық», «батпан көтеру», «бес асық», «қыз қуу», «шоқпарласу». Әрбір ойын түрі күшті, ептілікті, төзімділікті, шапшаңдықты және тактикалық ойлауды талап етті.Жеңімпаздар жиналған ұпай саны бойынша, сондай-ақ есірткіге қарсы атрибутиканы мен ұлттық киімді қолданғаны үшін берілген қосымша ұпайлар негізінде анықталды. Бұл жарысқа ерекше көрік беріп, тәрбиелік мәнін арттыра түсті.Жарыс қорытындысы бойынша 24 жеңімпаз анықталды. Үздіктер қатарында: Жаңақорған ауданының №184, 209 орта мектептері, Қазалы ауданының №94, 97, 25 орта мектептері және Шиелі ауданының №149, 133 орта мектептері.Осындай іс-шараларды өткізу ұлттық құндылықтарды дәріптеуге, бұқаралық спортты дамытуға және жас ұрпақтың денсаулықты, белсенді өмір салтын таңдауға деген жауапкершілігін арттыруға ықпал етеді.Фото: Полиция департаменті

Қызылорда облысында мектеп оқушылары арасында ауқымды ұлттық ойындар өтті

<a href="https://kyzylorda-news.kz/">Kyzylorda-news.kz</a> Қызылорда облысы Полиция департаментінің Өзіндік қауіпсіздік басқармасы сыбайлас жемқорлықтың алдын алу бағытында тұрақты түрде түсіндірме жұмыстарын жүргізуде. &nbsp;Азаматтардың құқықтық санасын арттыру, қоғамда парақорлыққа төзбеушілік мәдениетін қалыптастыру мақсатында өңірдегі кинотеатрларда арнайы бейнероликтер көрсетіліп, насихат жұмыстары жүргізілді. &nbsp;Бұл – ел ішінде әділдік пен тазалықты нығайтуға, халықтың сенімін арттыруға бағытталған маңызды қадам. &nbsp;Сыбайлас жемқорлық — қоғам дамуына үлкен кедергі. Заң бәріне ортақ және қатал. &nbsp;&nbsp;Фото: polisia.kz

Сыбайлас жемқорлыққа жол жоқ: заң мен тәртіп – басты қағида

<a href="https://kyzylorda-news.kz/">Kyzylorda-news.kz</a> «Заң мен тәртіп» қағидаты аясында Қызылорда облысы Полиция департаменті бастығының орынбасары, полиция полковнигі Е. Абдраманов және Қоғамдық қауіпсіздік басқармасының бастығы, полиция полковнигі Е. Жаукеев Қызылорда қаласындағы М. Ықсанов атындағы Қызылорда политехникалық жоғары колледжі мен Е. Әуелбеков атындағы №4 облыстық мамандандырылған мектеп-лицей-интернатының студенттері және оқушыларымен кездесу өткізді.Айта кетейік, Қазақстан Республикасы Ішкі істер министрі 2026 жылды «Заң мен тәртіп – қауіпсіз балалық шақ кепілі» жылы деп жариялаған болатын. Осыған орай ұйымдастырылған іс-шараға аталған оқу орындарының 1–3 курс студенттері мен 7–11 сынып оқушылары қатысты.Кездесудің негізгі мақсаты – жасөспірімдер қылмысының алдын алу, кәмелетке толмағандардың құқыққа қайшы мінез-құлқына қоғамда төзбеушілік қалыптастыру және жастардың құқықтық мәдениетін арттыру.Шара барысында өмірден алынған нақты мысалдар келтіріліп, студенттер мен оқушыларды толғандырған сауалдарға толыққанды жауап берілді. Әсіресе бұзақылық, заңмен тыйым салынған үшкір және тескіш заттарды алып жүру, буллинг пен кибербуллинг, сталкинг, некеге мәжбүрлеу, нашақорлық және әкімшілік құқықбұзушылықтардың салдарына ерекше назар аударылды.Сонымен қатар қоғамдық тәртіпті сақтау, жол жүрісі қағидаларын қатаң ұстану және интернет кеңістігінде алаяқтардың арбауына түспеу мәселелері кеңінен түсіндірілді.Полиция қызметкерлері күнделікті өмірде кездесетін нақты жағдайлар арқылы еркіндік пен жауапкершіліктің ара-жігін ажыратып, жеке қауіпсіздік саналы таңдаудан басталатынын атап өтті.Кездесу ашық форматта өтіп, оқушылар мен студенттер өз пікірлерін еркін білдіріп, көкейдегі сұрақтарын қоюға мүмкіндік алды.Мұндай профилактикалық іс-шаралар құқықбұзушылықтың алдын алып қана қоймай, жасөспірімдердің өз-өзіне деген сенімін арттыруға, заңға құрметпен қарауға және қауіпсіздік – ересектер мен балалардың ортақ жауапкершілігі екенін түсінуге ықпал етеді.

«Заң мен тәртіп» – қауіпсіз балалық шақ кепілі

<a href="https://kyzylorda-news.kz/">Kyzylorda-news.kz</a> Жетісу облысында интернет-таныстық арқылы бопсалаумен айналысқан Талдықорған қаласының 9 тұрғыны сотталып кетті, деп хабарлайды облыстық прокуратураның баспасөз қызметі.Жетісу облысының прокуратурасы сотта ұзақ уақыт бойы психологиялық қысым мен бопсалау әдістерін қолдана отырып қылмыс жасаған адамдар тобының кінәсін <a href="https://kaz.inform.kz/news/taldikorganda-kilmistik-top-adamdarga-psihologiyalik-kisim-zhasap-aksha-talap-etken-6207c3/">дәлелдеді.</a>2024 жылғы мамырдан 2025 жылғы наурызға дейін өңір аумағында азаматтарды бопсалаумен айналысқан топ әрекет еткен. Қаскүнемдер әлеуметтік желілер мен мобильді қосымшалар арқылы жәбірленушілердің сеніміне кіріп, кейін түрлі сылтаулармен оларды өз үйлеріне шақырған. Қылмыстық схема психологиялық қысым мен манипуляцияға негізделіп, жәбірленушілерді жалған түрде «зорлау фактісі бойынша полицияға арыз береміз» деп қорқыту арқылы жүзеге асырылған. «Мәселені реттеу» үшін олардан ірі көлемде ақша талап еткен.&nbsp;Азаматтар алдын ала бөлінген рөлдер бойынша әрекет еткен адамдар тарапынан қатты қысымға ұшыраған.<blockquote>–&nbsp;Құқыққа қайшы жүйе анықталғаннан кейін аталған тұлғалар ұсталып, сотқа дейінгі тергеп-тексеру жүргізілді. Оның нәтижелері бойынша қылмыстық іс сотқа жолданды. Сот отырысында мемлекеттік айыптаушы тағылған айыптың негізділігін дәлелдеп, ұсынылған дәлелдемелерге құқықтық баға берді. 2026 жылғы 30 қаңтарда Талдықорған қалалық сотының үкімімен аталған адамдар ҚР ҚК-нің 194-бабы 2-бөлігінің 1), 2) және 3) тармақтары бойынша кінәлі деп танылып, әртүрлі мерзімге жаза тағайындалды. Үкім заңды күшіне енген жоқ,&nbsp;– делінген хабарламада.</blockquote>Фото: freepik.com

Талдықорғанда қылмыстық топ адамдарға психологиялық қысым жасап, ақша талап еткен

<a href="https://kyzylorda-news.kz/">Kyzylorda-news.kz</a> &nbsp;Алматы қаласы мен Алматы облысында интернет арқылы синтетикалық есірткі таратумен айналысқан ұйымдасқан қылмыстық топтың жолы кесілді. Бұл туралы <a href="https://stan.kz/almati-oblisinda-esirtki-satumen-aynaliskan-11-adam-kol-430212/">Stan.kz</a> ақпарат агенттігі хабарлады.Ішкі істер министрлігі “Заң мен тәртіп” қағидаты аясында есірткі қылмысына қарсы күресті күшейтіп жатыр.Ведомствоның Есірткі қылмысына қарсы іс-қимыл комитеті Алматы қаласы мен Алматы облысының аумағында есірткі заттарын интернет арқылы байланыссыз тәсілмен таратқан интернет-дүкеннің қызметін тоқтатты.Жедел-іздестіру іс-шаралары барысында қылмыстық топтың 11 қатысушысы ұсталды. Олардың қатарында ұйымдастырушылар, операторлар және заңсыз қызметті қаржылық жағынан қамтамасыз еткен тұлғалар бар.Арнайы операция кезінде&nbsp;заңсыз айналымнан шамамен 3 келі синтетикалық есірткі тәркіленді. Сонымен қатар қылмыстық схеманы үйлестіруге пайдаланылған байланыс құралдары, банк карталары және цифрлық тасымалдағыштар алынды.Аталған дерек бойынша сотқа дейінгі тергеп-тексеру басталды. Құқық қорғау органдары интернет арқылы есірткі сатумен айналысатын заңсыз арналардың жолын кесу бағытындағы жұмысты жалғастырып жатқанын мәлімдеді.Фото: Видеодан скрин

Алматы облысында есірткі сатумен айналысқан 11 адам қолға түсті

<a href="https://kyzylorda-news.kz/">Kyzylorda-news.kz</a> &nbsp;Облыстық полиция департаментінің баспасөз қызметі таратқан мәліметке сүйенсек, қызылордалық бойжеткенді өгей әкесі аңдып, оның тыныштығын <a href="https://kaz.inform.kz/news/kizilordada-stalking-s-boyinsha-ogey-ake-kamauga-alindi-82bb9e/">бұзған.</a>Жәбірленушінің арызы негізінде полиция қызметкерлері жедел іс-шаралар нәтижесінде күдіктіні ұстап, қамауға алды. Қылмыстық іс тәулік ішінде сотқа жолданды.<blockquote>– Жыл басынан бері облыс аумағында әйелдерге қатысты 6 сталкинг дерегі анықталып, жолы кесілді. Барлық жағдайда күдіктілер жәбірленушілермен бұрын таныс болған. Көп жағдайда қарым-қатынастың тоқтағанына қарамастан күдіктілер қудалауын жалғастырған. Атап айтқанда, түрлі нөмірден қоңырау шалған, хабарлама жазған, үйі мен жұмыс орнына барған, әлеуметтік желілер арқылы мазалаған. Жәбірленушілер байланысын толық үзгеніне, нөмірін бұғаттағанына және кездесуден бас тартқанына қарамастан қудалау әрекеттері тоқтамаған, – делінген хабарламада.</blockquote>Полиция мұндай құқықбұзушылық үшін заңнама аясында қатаң жауапкершілік қарастырылғанын ескертеді. Мұндай жағдайға тап болғанда дереу полицияға хабарласуға кеңес береді.Еске салайық, жуырда Алматыда азаматтарды қасақана қудалау мен психологиялық қысымнан қорғауға бағытталған Қылмыстық кодекстің 115-1 бабы бойынша алғашқы сот үкімдерінің бірі шықты.Фото: freepik

Қызылордада сталкинг ісі бойынша өгей әке қамауға алынды

<a href="https://kyzylorda-news.kz/">Kyzylorda-news.kz</a> &nbsp;Мемлекет басшысы Қасым-Жомарт Кемелұлы Тоқаевтың «Заң мен тәртіп» қағидатын іске асыру аясында Шиелі ауданында ауыл тұрғындарымен көшпелі жеке қабылдаулар ұйымдастырылды.Кездесу барысында ауыл тұрғындарына Конституциялық реформа жөнінде жан-жақты түсіндіру жұмыстары жүргізіліп, заң талаптары, азаматтардың құқықтары мен міндеттері, сондай-ақ құқықтық мәдениетті арттыру мәселелері туралы кең көлемде ақпарат берілді.Конституциялық реформа туралы аудан әкімі Айтбай Жандарбеков өз сөзінде аталған өзгерістердің қоғамдағы әділеттілікті нығайтуға, заң үстемдігін қамтамасыз етуге, мемлекеттік басқару жүйесін жетілдіруге және халықтың шешім қабылдау үдерісіне қатысу мүмкіндігін кеңейтуге бағытталғанын атап өтті.Көшпелі кездесу Тартоғай ауылдық клубында өтіп, Тартоғай, Сұлутөбе, Майлытоғай және Қоғалы ауылдарының тұрғындарын қамтыды. Аудан әкімі Айтбай Жандарбеков пен аудандық құқық қорғау органдарының бірінші басшылары,аудан прокуроры Мейрамбек Маханбетжанов, аудандық сот төрағасы Нұржан Бекетаев, ҚР ҰҚК Қызылорда облысы және Байқоңыр қаласы бойынша департаментінің Шиелі аудандық бөлімше бастығы Асқар Баймаханов, аудандық полиция бөлімінің бастығы Болатхан Мұханов ауыл тұрғындарын жеке қабылдап, олардың көтерген әлеуметтік, құқықтық, инфрақұрылымдық және тұрмыстық мәселелеріне назар аударып, әрбір өтініш бойынша нақты түсіндірмелер берді.Аудан басшысы көтерілген мәселелерді жеке бақылауына алып, оларды шешу бойынша тиісті сала басшыларына нақты тапсырмалар берді. Көтерілген әрбір мәселе кезең-кезеңімен қаралып, заң талаптарына сәйкес тиісті шаралар қабылданатын болады.

Қазақстан және Қызылорда облысының жаңалықтары: Құқық