<a href="https://kyzylorda-news.kz/">Kyzylorda-news.kz</a> Қазақ өркениетінің бастауы – өнер және дәстүр құндылығы. Оның ішінде ғасырдан-ғасырға жалғасып, жалпы қазақ қоғамының әр кезеңіндегі тарихи оқиғалармен қатар, ұлт мүддесі, әлеумет ұстанымы, салт-сана, тұрмыс-тіршілік сипатын арқау еткен жыраулық, жыршылық өнердің бүгінгі беталысы, деңгейі өте жоғары. Жуырда белгілі жырау, Жиенбай жыр мектебінің өкілі Серік Жақсығұлов өзінің жыр кешін өткізген болатын. Осыған орай жыраудан жыршылық өнері мен құндыылықтары туралы әңгімелескен едік.– Серік аға, «Жырдария» атты жыр кешіңіздің сәтті өтуімен құттықтаймын. Әсеріңізді бөліссеңіз…– Рахмет! Өздеріңіз білесіздер, Сыр өңірі қашаннан да өнерге оң көзқараста. Өнер мерейі тасып бір белеске көтерілген кеш болды. Әр шығарма орындаған сайын халықтың қолпаштауы, алғаусыз көңілі үлкен шабыт сыйлады. &nbsp;Жыр жәрмеңкесінде сыр сүлейлері Тұрмағамбет Ізтілеуұлы, Шораяқтың Омары, Кете Жүсіп, Махамбет Өтемісұлының толғаулары мен «Көрұғлы» дастаны сияқты көлемді шығармаларға тоқталдық. Аямызды тарылтпадық. Тиісінше алдағы жоспарларға із салдық деп ойлаймын.– Жыр кешіңізді өткізу идеясы қайдан келді?– Идеяның өзі халықтың сұранысынан туады. «Халық &nbsp;қаласа, хан түйесін сояды» деген ұғым бар. Біз қашанда халықтың қызметіндеміз. Облыс әкімдігі, облыстық мәдениет, архивтер және құжаттама басқармасының басшысы Мира Жомартқызы, Н.Бекежанов атындағы қазақ академиялық музыкалық драма театры басшысы Мұхтар Мәуленұлы бастаған ұжым шараның жоғары деңгейде өтуіне септігін тигізді. Негізгі мақсат – жыраулық өнерге келген уақыттан бергі тәжірибемен бөлісу. Өнер адамында адымдап келіп, қадамдап шабатын уақыты болады. Профессор Алмас Алматов ағамыздың сөзі бар «Кезеңі келмей, кезегі келмес» деген. Бұл сондай бір сәті келген кеш болды деп есептеймін.– Орындаушылық шеберлігіңізде өзгешелік бар.&nbsp;Десе де бұл шыңы емес шығар…– Бұл – көп жылғы ізденіспен келген нәтиже. Үлкен жырауларды көп тыңдадық. Әрбір жыраудың мақам, саз, ән шақыру, жырлау, мәнерлеп орындау сипаттамасын меңгеруге талпындық. Қадау-қадау жүйріктердің ішінде қадап айтарымыз, Рүстембек жырау, Мұзарап жырау, Жаппар Тұңғышбаев, Шамшат Төлепова, Көшеней Рүстембеков, Қуандық Бүрлібаев, Бидас Рүстембеков, Алмас Алматов сияқты таңбалы жыраулардың жыр қорынан сусындап өстік. Соларға еліктеп, мақам-саздарын үйрендік. Орындаушылық шеберліктің шыңы әлі алда. Өзімді қай кезде де күрделі мақамдар орындап, жетілдіріп отырамын. Әрбір мақамның мәйегіне жетуге, әр дыбыстық жүйеге мән беруге, оның қайырымын орын-орынына түсуіне жұмыс жасадық. Соның нәтижесі міне осы.– Жалпы жыраулық өнер қай кезеңнен бастау алады?– Әр өңірдің өзіне тән өнер сабақтастығы болады. Біздің өңірдегі жыраулық өнер бастау бұлағын Сыр анадан, Қорқыт бабадан алып жатыр десем артық айтқандық емес. Бұл өнер біздің қанымызда бар. Кешегі Күлтегін, Тоныкөк дәуірлері, бертінде Ешнияз сал, Жиенбай жырау, Тасберген жыраулардан қалған мұра. Біз жыраулық өнерді сонау күретамыры үзілмеген кезеңнен бастадық. Бүгінде атамұра өнер жалғасын тауып, жаңғырып жатқаны көңіл құсын көкке шарлатады.– Домбыраны алғаш неше жасыңызда қолға алдыңыз? Кім себепші болды?– Алғаш домбыраны алты жасымда қолға алдым. Өнерге келуімізге ата-анадан алған тәрбиемізбен қатар өскен ортамыздың әсері болды. Әкем Орынбек Шәріпұлы, анам &nbsp;Тұрды Құдайбергенқызы көп септігін тигізді. Кешегі Көшеней Рүстембеков, Қуандық Бүрлібаев, Шамшат Төлепова секілді жампоз жырауларды тыңдай жүріп, туысқандық қатынастарымен де араласқан. Әкем бозбала күнімде белгілі жырау Алмас Алматовқа өз қолымен апарып, табыстағаны күні кешегідей көз алдымда. Содан бері жыраулық-жыршылық әлеміне өз қосымызды тігіп, өнер өлкесіне қадам бастық.– Шәкірт тәрбиелеуде нені бағдар етесіз?– Біз әрбір орындаушының шығарманы дұрыс айтылуына баса мән береміз. Ұстаздық жолы ауыр. Біркелкі мақаммен шектелмей, күллі қазаққа ортақ өнер өкілі болуына баулимыз. Беретін бағдарымыз тек орындаушылық емес, кәсіби шеберлік. Сонымен қатар азаматтық болмысының қалыптасуына да бағыт беріп отырамын.– Жыр қорыңызда қанша қисса-дастан бар?– Сыр сүлейлерінің барлық шығармаларынан орындаймыз. Себебі Сыр бойы жырауларының сонау түркі дәуірінен тамыр алатыны белгілі. Шораяқтың Омары, Балқы Базардың еңбектері мен Тұрмағамбет ақынның бірнеше дастанына бой алдырдық. Сондай-ақ Рахмет Батырбаевтың, Әбзәли Егізбаевтың туындылары және «Бұқарбай батыр», «Шахнама», «Көрұғлы» дастандары бар. Атап айтқанда осылар. Бірақ терме, дастанның барлық түрлері бар. Кешегі «Қобыланды», «Алпамыс» сияқты жырларға дейін бойлап бара береміз. Халықтың сұранысына сай жырлауға толық мүмкіндігіміз баршылық.– Ғылым мен мәдениетте, әдебиет пен өнерде қандай тұстарымыз жетіспей жатады?– Бұл – көлемді тақырып. Ғылым мен мәдениет, әдебиет пен өнер аясы өз кеңістігінде өсіп келеді деп айта аламын. Дегенмен, кешегі ғалымдарымыз Әлкей Марғұлан, Мұхтар Әуезов, Рахманқұл Бердібай, Мардан Бәйділдаевтардың атқарған еңбегінің ізінде көптеген мұраларымызды әлі де жетілдіруіміз қажет. Бұл ғалымдардың жасап кеткен еңбегін жалғастыру – біз үшін үлкен бағыт-бағдар, аманат. Жетіспей жатқан тұсымыз көп. Бүгінгі жыраулардың барлығы мақала жазып, әрбір орындаушының үлкен мектеп қалыптастырған Нұртуған, Нартай, Жиенбай шығармаларын айналымға ендіру мәселесі. Қазақ әдебиетінде толық орын алатын тұлғалардың жыр-дастандарын зерттеу мұраты біздің алдымызда тұрады.– Қазір театрда қызметтесіз. Жыраулық пен театр – екеуі екі бағыттағы сала. Қиындық туғызбай ма?– «Театрдың өзі – синкреттік өнер. Ал жыраулық өнер – даралық өнер шоғыры» дейді профессор Алмас Алматов. Синкреттік – ол жан-жақтылық. Әр саланың, әр өнердің төрт құбыласын түгел қамтып келетін орта. Жалпы осы жыр кешімізді жыр спектакль ретінде ұсынып, жыр кешінің жаңаша форматта өтуі үлкен өзгеріс, тамаша көрініс тапты. Атап айтқанда, режиссер Бақытбек Темірбеков өз қолтаңбасын қалдырды. Театр басшысы, айтыс ақаны Мұхтар Ниязов сценарийге атсалысып, Сыр ана мен Қорқыттың үйлесім табуына үн қосып, үлкен қолдауын көрсетті. Қос саланың қатар тоғысқан тұсында қашанда жаңа келбет жарқырай көрінеді.– Қазақы құндылық қазіргі қоғамда қадірін жоғалтып алған жоқ па?– «Қадірін білген адамға адам қымбат» дейді халық даналығында. Хакім Абайдан: – Бұл өмірде кімнен, неден жеңілдіңіз?» деп сұрапты. Сонда ұлы Абай: «Сөз ұқпайтын ақымақтан күнде жеңілемін» деген екен. Қазақы құндылық қазіргі қоғамда қадірін жоғалтпайды. Егер де соны ел болып көздің қарашығындай қорғай білсе, жас ұрпақ бойына сіңіре білсек, нұр үстіне нұр болар еді. «Жоқ деген жерге, бардың шамын алып бар» дейді ұстазым Алмас Алматов. Жоқ деген сөзден қашуымыз керек. Бар, болады деуіміз керек. Әрқашанда алда жүруге, құндылығымызды кеңінен насихаттауға әрбіріміз үн қосуымыз қажет деп есептеймін.– Соңғы сауал. Жыр кешін аудандарда өткізуіңіз мүмкін бе?– Әбден мүмкін. «Жырдария» атты жыр жәрмеңкесінің облыс орталығында тұсауы кесілді. Жоғарыда атап өткенімдей, бұл – жаңа формат. Халыққа осы үрдісте ұсынсақ жақсы қабылдайды деген ниет бар. Бұл жыр кеші «Руханият жылы» аясында ауқымды шаралардың бірі деп есептеймін.Тұрар Бекмырзаев

Серік Жақсығұлов:  Сыр өңірі қашаннан да өнерге оң көзқараста

<a href="https://kyzylorda-news.kz/">Kyzylorda-news.kz</a>&nbsp; Сырдария ауданына қарасты Нағи Ілиясов ауылында «Жүректен шыққан сырлы сөз» тақырыбымен поэзия кеші өтті.&nbsp;Аудандық басылымның 85 жылдығына орай қоғамдық даму бөлімінің қолдауымен&nbsp;ашық аспан астында ақынға да, тыңдарманға да шабыт сыйлаған кешті жастар ресурстық орталығы ұйымдастырды.Жасыл желекке бөле­ніп тұрған ауыл көркі ерекше көз тартады. Әсем табиғат пен таза ауа үйлесімі жас ақындар жырымен тіпті айшықтала түскендей болды. Ауылдағы «Еңбек аллеясында» республикалық деңгейдегі жыр мүшәйраларының жеңімпазы атанған, өзіндік оқыр­маны қалыптасқан сырбойылық жас ақындар бас қосып, ауыл кешін көріктендіре түсті.Ерекше, еркін форматтағы поэзия кешін аудандық мәдениет және тілдерді дамыту бөлімі басшысының міндетін атқарушы Жеңісбек Үсенұлы мен ауылдық ардагерлер кеңесінің төрағасы, Сырдария ауданының Құрметті азаматы Төребек Жұмабекұлы ашып берді.<blockquote>– Облыс әкімі биылғы жылды «Руханият жылы» деп жариялағанын білесіздер. Атаулы жыл аясында көптеген іс-шара өтіп, мәдениет пен руханият саласында іргелі мекемелер бой көтеріп жатқаны да сіздерге аян. Салада атқарылып жатқан жұмыстардың барлығы халықтың рухани қазынасын байытары сөзсіз. Облыс қана емес, республикалық деңгейдегі жас ақындар ауданға ат басын бұрып, іргелі ауылда бас қосып отырмыз. Талаптарыңызға нұр жаусын, қаламдарыңыз мұқалмасын, – деді Ж.Төрәлиев. Ал батагөй ақсақал Төребек ата ақындарға шалқар шабыт тілеп, тілеулес­тігін білдірді.</blockquote>Жас ақындар Ұлықбек Тәңірбергенов, Ақжол Түменбай, Айдар Сайлауов, Дина Бөкебай және Ақтөре Ибрагимұлы поэзия кешінің құрметті қонақ­тары ретінде төрден орын алды. Содан кейін ақындар кезек­пен өлең оқып, өлең-жырға, поэзияға шөліркеген халық­тың шөлін қандырды. Алдымен туған жер, Отан, отбасы туралы өлеңдерін ортаға салған ақындар махаббат поэзиясына да кезек берді. Одан кейін белгілі өлеңдердің авторы Ақжол Түменбай мен ақын Дина Бөкебай поэти­калық дуэльге шығып, тартысты дуэль көрсетті.Кеш соңына таяу ақын аға-апаларының ізін басып келе жат­қан мектеп оқушылары Айшат Ешмұратова, Нұрахмет Мансұров, Назым Кенжебекқызы, Жансая Әбибуллақызы ақындардың өлеңін оқып, көрерменнің ыстық ықыласы­на бөленді. Жас ақын­дарға аудан әкімінің орынбасары Димаш Байдушевтің алғыс хаты мен естелік сыйлық табыс­талды. Аудандық мәдениет үйінің өнерпаздары поэзия кешін­де қонақ болған ақындардың сөзіне жазылған бірнеше өлеңді орындап, ауыл кешінің сәні мен мәнін үстеді. Ең қызығы, аудандық газеттен поэ­зия кеші өтетіні туралы ақпараттанған жас ақындар аллеяға көптеп жиналып, өз кезегінде жырдан шашу шашты. Жас ақындар аудандық газеттің 85 жылдығына арнаған арнауымен кешті қорытындылады.Ашық аспан астында, әуелеген әсем ән мен сырлы поэзияға қаныққан жұртшылық ризашылығын білдіріп жатты. Республикадағы «Үлгілі ауыл» атанған батыр атындағы ауылдың әдемі табиғаты ақындарға шабыт сыйлап, көрерменнің көңіліне қуат сыйлады.Көтеріңкі көңіл-күйде тәмамдалған кеш­ті ауыл әкімі Сағдат Нұрмағамбетов, аудандық жастар ресурс­­тық орталығының директоры Айгүл Ахметова, мәдениет сала­сының ардагері Күләш Құдабаева қорытындылап, жылы лебіздерін білдіріп, аудандық газеттің мерейтойымен құттықтады. Бірнеше сағат бойына сыршыл поэзиямен жан сарайын толтырған тыңдарман әдебиет әлемінде өзіндік өрнегін сызып келе жатқан жас ақындармен естелік суретке түсті.

«Жүректен шыққан сырлы сөз» тақырыбымен поэзия кеші өтті 

<a href="https://kyzylorda-news.kz/">Kyzylorda-news.kz</a>&nbsp; Қазалы ауданы ықылым заманнан ынта-пейілі өнерге ауған өңір санатында. Ән-жыр, күй десе, ішкен асын жерге қойып, өнерпаз алдында ұйып қалатыны бар. Ол да болса, табиғи болмысымыздағы тектілік пен өнерге деген өреміздің биіктігінен болса керек. Қазалы ауданында көрермен көзайымына айналып, сахна саңлағы болған талантты жандар жеткілікті. Солардың ішінде белгілі күйші, КСРО мәдениетінің үздігі, ҚР Мәдениет қайраткері Орақ Баубековтің шоқтығы биік. Осы орайда, ел сыйлаған өнерпаздың ғұмыр жолы, асқақ рухты өнері жайлы сөз қозғап, сұхбат құрудың реті келген болатын. – Орақ аға, жалпы, өмір өзеніңіз қай жерден бастау алды? – Рахмет. Мен 1948 жылы 15 мамыр күні Арал ауданына қарасты «Көне Бөген» деген жерде дүниеге келдім. Әкемнен сегіз айлығымда қалдым. Бала күнімнен домбыраға құмартып өстім. Біз тұратын жерге іргелес қазақтың қабырғалы қаламгері Зейнолла Шүкіров те тұрды. Мен ең алғаш домбыра тартуды сол кісіден үйрендім. Ол күй «Огонек» деп аталатын. Кейіннен Дәулеткерейдің «Қос алқа» күйін де үйретті. Алғашқы ұстазым Зейнолла ағамыз десем, артық айтқандық емес. Жетінші сыныпты бітірген жылы Қазалы ауданына қарасты Бек¬арыстан би ауылына көшіп келдік. Мұнан соң, Кеңес Одағының Батыры Үрмәш Түктібаев атындағы №24 мектепті тәмамдадым. Мектеп қабырғасынан бастап аудандық, облыстық байқауларда бақ сынадым. Содан соң, сол тұстағы аудандық мәдениет бөлімінің меңгерушісі Кеңес Асанбаевтың тәрбиесінде бол¬дым. Кейіннен белгілі күйші Махамбет Әуезов пен Әбен Жолтаевтан домбырашылықтың қыр-сырын үйреніп, құмарым арта түсті. 1968 жылы жолдамамен Алматы қаласындағы Өнер институтына оқуға бардым. – Негізінен, өнер атаның қанымен, ананың сүтімен дариды. Сізге күйшілік қабілет қалай қонған? Сондай-ақ, шығармашылық еңбегіңізді айтып өтсеңіз? – Алғаш Зейнолла Шүкіровтен әртүрлі күй үйренгенімді жоғарыда айттып өттім. Сосын, менің Балшын әжем жастайынан жырау атанған. Ол кісі домбыраны шебер тартатын. Соған қарағанда, өнерге жақындығым нағашыларымнан қонса керек. Ал, екінші сұрағыңа келсек, қазіргі таңда өзім шығарған 28 күй, 5 ән жарық көріп, көрермен көзайымына айналды. Оның ішінде: «Жанқожа батыр баба», «Қаразым», «Өмір талабы», «Сұлушаш», «Ойлану» секілді күйлерім бар. – Адам бойындағы қандай қасиетті жоғары бағалайсыз? – Кез келген адам бойындағы кішіпейілділік қасиетті жоғары бағалаймын. Үлкенге сәлем беріп, кішіге ізет көрсететін жандарды құрметтеймін. Сонымен бірге, мақтанып асып-таспағанды, «Мен олай едім, мен былай едім» деп көкірегін кермейтіндерді жақсы көремін. Осы ретте, «әдептілік – әдемілік» дегенді айтқым келеді. – Жас күйшілерге қандай кеңес бересіз? – Қазақ күй тарихындағы Құрманғазы, Дәулеткерей, Шалмырза, Қазанғаптардың ешқандай нота білмегендігі белгілі. Сонда да болса, олар біздің қазақ тарихындағы асқан дәулескер күйшілер болды. Осылардың ғұмыр жолдары, тұрмыс-тауқыметі де, әралуан өтті. Мысалы, Құрманғазы өте жарлы болса, Дәулеткерей дәулетті, малды кісі еді. Осы себептен шығар, оның күйлерінің көбі, анаға, табиғатқа, жер-суға, қыз-келіншектерге арналған. Ал, «күй атасы» атанған Құрманғазы орыс отаршылдарынан зор теперіш көрді. Сондықтан да, оның күйлері әрдайым тәуелсіздікке, азаттыққа арналған. Мұнымен қоса, терең ойға, мұң мен шерге толы болып келеді. Шүкір, қазіргі таңда дамыған мемлекетке айналдық. Күйді, нотаны үйрететін музыкалық мектептер көп. Ендігі жас буындар соларға барып оқып, іздену керек деп ойлаймын. – Үйрену керек деп қалдыңыз. Ал, өзіңіз дайындаған, өнер аспанына ұшырған шәкірттеріңіз бар ма? – Әрине, өзім де, осы күй өнеріне біраз ізбасарларымды баулыдым. Олардың бірқатары еліміздің 12 қаласында жүр. Осылардың ішінде Нұркен, Дәулет, Роман деген шәкірттерімді айрықша атап өткім келеді. Бұлардың екеуі Астана қаласындағы Өнер академиясына оқуға түсті. Республикалық Құрманғазы, Нұрғиса Тілендиев атындағы байқаулардың, «Шабыт» фестивалінің лауреаттары атанды. – Қазақ даласындағы сіз мойындайтын ең ұлы музыкант кім? – Жалпы, мен өнер адамдарының көбін құрметтеймін. Бірақ, соның ішінде, өзіміздің жерлес, республикаға есімі белгілі сазгер Кеңес Дүйсекеевті айрықша мойындаймын. Мойындайтын себебім, 1981 жылы телевидениеде жұмыс жасап жүрген кезінде Қазалыға келіп, біздің оркестрімізді көріп, телефильмге түсірді. Одан бөлек, оның әндерінің өзі қандай керемет! Сондықтан, мен үшін ең мықты сазгер сол. – Өмірде өкінетін сәттеріңіз жиі болып тұрады ма? – Өкінетін сәттер дегенде мәдениет, өнер жайындағысын айтайын. Бұл жағына келгенде, аздаған көңіл толмайтын кішкентай өкініш бар. Бұрын Кеңес үкіметі кезінде 1980 жылдары Қарақалпақстан, Өзбекстан, Түркіменстан секілді жерлерде өнер көрсеттік. Мәскеуге, Омбыға, Орынборға сапарладық. Тәуелсіздік алған алғашқы жылдары Әбіш Кекілбаевтың ықпалымен бірінші рет, Алматы қаласында Қазалы ауданының мәдениеті мен өнері күндері өткізілді. Оған КСРО халық әртісі Роза Бағланова апамыздан бастап, Кеңес Дүйсекеев, Мәдина Ералиева, Рүстем Жанаев секілді өнер қайраткерлері бастаған топ қатысты. Шара жоғарғы деңгейде өтті. Кейін, осы құраммен Египетке баратын болып ұсыныс түскен. Сол кездегі облыс, аудан басшыларының қаржы мәселесін шешіп бере алмауынан жол сапардың сәті түспеді. Өнер саласында осындай түрлі жайттар кездесіп тұрады. – «Атамұра» ансамблі туралы айтып өтсеңіз? – Бүгінде көпшілікке белгілі «Атамұра» ансамблі көптеген мәдени шараларға белсене қатысып жүр. Оның құрамындағылар зейнеткерлер болса да, аянбай тер төгіп жатқанын айту ләзім. Басқа салаларда зейнеткерлік болса да, өнерде «ардагер» деген ұғым жоқ. «Атамұра» ансамблінің шығармашылық кешін өткізіп тұрамыз. Әркез жиналған көпшілік жылы қарсы алады. Бұдан бөлек, ел азаматтары арнайы келіп, біздің ұжымға қошеметтерін білдіреді. Алдағы уақыттары да, өнерпаздар өз өнерлерімен ел-жұртты қуанышқа бөлей береді деген сенімдемін. – Әңгімеңізге рахмет!

Орақ Баубеков:  «Ең алғашқы күйді Зейнолла Шүкіровтен үйрендім»

<a href="https://kyzylorda-news.kz/">Kyzylorda-news.kz</a>&nbsp; &nbsp;Қасиетті Қазалы топырағы талант дарыған тұлғаларға бай. Туған жерден тұрақ тауып, елін, жан сырын әнге арқау еткен әнші Нұрмаш Алғашбайды аудан жұртшылығы жақсы біледі. Көпшілік Нұрмаш Қабылбайұлын күміскөмей әнші деп қана емес, талай өлеңге ән жазған композитор ретінде де жақсы таниды. «Қазалының Шәмшісі» атанған сазгер Нұрмаш Алғашбаев бүгінде 300-ге жуық әннің авторы. Қара сөздің қаймағын қалқыған ақындығы да бар жан-жақты жанның жүрегінен шыққан төл туындылары аудан, облыс көлемінен асып, республикалық сахналарда шырқалып жүр.Қарапайымдылығымен ерекшеленетін өнер иесінің Отан, туған жер, табиғат, әке мен ана, бейбітшілік, махаббат, салт-дәстүр, тәуелсіздік тақырыптарындағы әндері республикалық телерадионың алтын қорында сақтаулы. «Жастық шақ әуендері», «Сырдың сұлу саздары», «Сыр әуендері» жинақтарына бір топ әндері, балаларға арналған бірнеше әуендері мектеп оқулықтарына енгізілген. Бүкілодақтық фестивальдің лауреаты Нұрмаш Алғашбаев қазірде аудандық «Атамұра» ардагерлер ансамблінде өнер көрсеткен болатын. Әуелеген саз әлемінде өзіндік қолтаңбасын қалыптастырған сыршыл сазгермен сұхбаттасудың сәті түскен еді.– Нұрмаш аға, бойыңыздағы өнер қанмен берілген қасиет пе әлде...– Солай деуге болады. Өйткені, анам Разия өнерлі кісі еді. Ән салатын. Үй шаруашылығында болып, балалардың тәрбиесімен айналысты. Әкем Қабылбай күрішші болды. Бауырларымның ішінде ағам Әбілтай екеуміз өнерге жақынбыз. Ол кісі де мен секілді аудандағы өнерпаз ардагерлерден құралған «Атамұра» ұлт-аспаптар ансамблінің құрамында.Мектеп қабырғасында жүрген кезден-ақ аудандағы оркестердің құрамында болып, ән айтып жүрдім. Талай жарыстарға қатысып, жүлдемен оралдық.– Ең алғашқы туындыңыз туралы айтсаңыз...– Мектептен кейін өнер жолына түскім келді. Алайда, шығармашылық тапсыру емтиханына кешігіп қалыппын. Сөйтіп, Алматыдағы Зооветеринариялық институтына оқуға түстім. Зоотехник-инженер мамандығын алған соң, жолдамамен Қарағанды облысының Нұра ауданына қарасты Киевка совхозында екі жыл еңбек еттім. Содан соң туған жерге оралып, сол кездегі Қазалы қаласындағы СПТУ-34 мекемесінде, кейін №17 мектепте мұғалім болдым. Бертін келе, С.Сейфуллин атындағы №165 мектептен музыка пәнінен оқушыларға білім беріп, зейнеткерлік демалысқа шықтым.Алғашқы туындым институт қабырғасында өмірге келді. Бір күні бөлмеде жалғыз отырғаныма радиодан Мұхиттың әні шырқалды. Сол әннен шабыт алсам керек, ойыма әуен оралып, «О,Зәуреш» әнін шығардым. Сөзі де өзімдікі, алғашқы орындаушысы да өзім. Оқу орнында өнер студиясы болды.&nbsp;Оркестрдің құрамында болып, домбырада ойнадым. Гитара, прима-қобыз, баян, бас домбырада тарта аламын.– «Өлең деген тумайды жайшылықта» деп Мұқағали ақын жыралағандай әр өнер адамының шабыт алатын дүниесі болады? Сіздің жүрегіңізді тербеп, көңіліңізді шалқытатын не нәрсе?– Көбіне оңаша қалғанда тың дүниелер туады. Табиғаттың керемет көрінісі де менің музама айнала алады. Әсемдіктен алатын әсерім де жоқ емес.– Білуімше, 300-ге жуық әннің авторысыз. Жаныңызға ерекше жақынын атасаңыз...– Әр ән өзінше бір әлем. Бір-бірінен бөле-жара қарау мүмкін емес. Олда балаңдай ғой. Әрбірінің өзіндік орны мен шығу тарихы бар. Мен патриоттық тақырыпта да, лирикалық жанрда да жазамын.«Аралым, Аяулым», «Он екі ирек», «Әләулім» әндерім қазақ телевизиясының алтын қорына қабылданған. 1998 жылы жазылған «Қызыма» атты әнім сол уақыттан бері ұзату тойларында айтылып жүр. 70 әнім қазақ авторлар қоғамында тіркелген. Күйлерім мен арнайы шығармаларым да бар.– Ал, балаларға арналғаны бар ма?– Иә, 50-60 шақты балаларға арнап жазған әнім бар. «Әжем айтқан ертегі», «Көгершіндер», «Суық торғай», «Су торғай», «Анашым», «Егеменді ел Қазақстан» сынды әндерім мектеп оқулықтарына енген.– Отбасыңыз өнерге қаншалықты жақын?– Зайыбым Жаңыл бастауыш сынып мұғалімі болып еңбек етіп, зейнеткерлікке шықты. Ол кісі де, ән салады. Екеумізді табыстырғанда осы өнер жолы. Ол кезде Қызылтуда мұғалім еді. Мен СПТУ-34 мекемесіндемін. Аудан өнерпаздары болып, Жалағашқа жарысқа бардық. Оркестр құрамында жолдасым да болды. Сөйтіп, танысып, сөзіміз жарасып, шаңырақ көтердік. Үш ұл, бір қыз тәрбиелеп, өсірдік. Екі ұлым Алматыда тұрады. Ғалымжаным құрылысшы, келінім Айнұр мейірбике. Біржаным реаниматолог-дәрігер, келіншегі Жанерке мейірбике. Қазалыда қызым Ақсамал №165 мектепте орыс тілінен, ұлым Ғани №249 мектеп-лицейде музыка пәнінен мұғалім. Келіншегінің есімі Марқаббат. Ақсамал фортепиано, Ғани музыка мектебінен баян класын бітірді. Алайда, өнер жолында тек Ғани ғана. Оның қыздары Жаннұр мен Қарақат ән салады. Түрлі сайыстардың жеңімпаздары.– Бір сөзіңізде кітапты жиі оқитыныңызы айтып қалдыңыз. Қандай ақындармен шығармашылық байланыстасыз?– Сазгер болғандықтан әніңе сәйкес, өлең іздейсің. Сол себепті де, кітапты көп оқимын. Кейде бірінші ән өмірге келеді. Оған лайықты өлең жолдарын қараймын. Қазалылық ақындардан Жетіскен Мәкеналы, Насыр Баекеев, Жұмабек Табынбаев, Жұмабек Құлбаевпен бірлесіп, бірнеше туындыны жарыққа шығардық.– Қазіргі эстрада әншілерінен кімді тыңдайсыз? Қандай сазгерлердің әні көңіліңізге қонымды.– Шынымды айтсам, қазіргі әншілерді көп тыңдамаймын. Шәмші, Ескендір, Әсеттің әндері жүрегіме жақын.– «Өнер – ортақ байлық» деген тәмсіл бар. Кейінгіге мұра ретінде туындыларыңызды топтастырып, кітап қылып шығару ойыңызда бар ма?– Ілгеріде Болатбек Пұсырманов аудан әкімі болған тұста: «Кітабыңызды шығарайық. Қанша қаржы болса да, көтереміз» деген еді. Алайда, өзім құнттамадым. Әндерімді жарнамаламаймын. Жазылып, орындалмай жатқаны қаншама. Уақыт өте келе ойланып жүрмін. Барлығы дайын. Енді жүйелеп, жинақтап, кітап қылу ойда жүрген істің бірі.– Армансыз адам болмас аға. Сіздің де жетсем деген мақсатыңыз бар шығар...– Атақты Шәмшінің өзі «Естайдың Қорланындай ән жазсам шіркін!» деп армандаған екен. Менің де, көкейімде жүрген мақсатымның бірі, әрі бірегейі – керемет туындыны өмірге әкелу. Сол арманның жетегімен «Естай-Қорлан» атты ән жазудамын. Жуырда жарыққа шығады деген ойдамын.– Әңгімеңізге рахмет. Шабытыңыз шалқи берсін!СұхбаттасқанҰлболсын ТАЛАПБАЕВА

Нұрмаш Алғашбаев: Шәмшінің әндері жүрегіме жақын

<a href="https://kyzylorda-news.kz/">Kyzylorda-news.kz</a>&nbsp; Қармақшыдағы аудандық кітапханаға барған сайын кітапханашылардың ауызбіршілігіне, ұйымшылдығына тәнті болып қайтатынбыз. Ал мұндағы өткізілетін іс-шараның басы-қасында аудандық кітапханалар жүйесінің директоры Гүлшара Қаниева жүретінін жиі аңғарамыз. Еліміздегі мәдениет және өнер қызметкерлерінің кәсіби мерекесіне орай білікті басшымен тілдесудің сәті түскен еді.Кітапқа, әдебиетке бала күнінен қызыққан кейіпкеріміз мектеп бітірген соң &nbsp;Алматыдағы Қыздар педагогикалық институтының «кітапхана ісі» факультетіне оқуға түседі. Институтты тәмамдаған соң Майлыөзек ауылдық кітапханасына жұмысқа орналасады. Араға бір жыл салып, аудандық кітапханаға библиограф болып ауысады. 1989-2003 жылдар аралығында кітапханашы библиограф, әдіскер, әдістеме-библиография бөлімінің меңгерушісі қызметтерін атқарады. 2003 жылдан аудандық орталықтандырылған кітапханалар жүйесінің директоры қызметін абыроймен атқарып келеді.<blockquote>– Өмірдегі бар ұстанымым – адам болу, адал болу. Қайсыбір істе болсын сабырлық таныту. Ал ұжымда ең бірінші талап ететінім – тәртіп. Себебі қандай да бір істе болмасын ұқыптылықты жақсы көремін. Одан кейінгісі өтірік айтпау. Өтіріктің өрге баспайтыны бесенеден белгілі ғой, – дейді кейіпкеріміз сөз арасында.</blockquote>Иә, кітапхана – білімнің мөлдір бұлағынан шәкірттерді сусындатып, олардың рухани дүниесін молайтатын тағылымы мол тәрбие ошағы. Ал кітапханашы сол ошақтың ұйытқысы. Заманға сай кітапханашы жан-жақты болуы қажет. Ол іскер ұйымдастырушы, бағдарламашы, сценарист сынды бірнеше қызметті қоса атқаруға тиіс.Кітаптың ортасында жүрген соң оны жиі қолға алатын шығар деген сұрағымызды да қойған едік.<blockquote>– Қазір кітап оқуға деген қызығушылық қоғамда бар. &nbsp;Әрине, қолымыз қалт етсе кітап оқимыз. Оны жан-жақты талдаймыз. Түсінген, қадірін білген адамға бар байлық кітапта жатыр. Осы орайда оқырмандармен де жиі кездесу ұйымдастырып отырамыз. Әрине қолым қалт ете қалса кітап оқимын, – дейді ол.</blockquote>Кітапхана саласында ұзақ жыл еңбек еткен Гүлшара Қаниеваның еңбегі елеусіз қалған емес. Айталық, 2018 жылы Қазақстан&nbsp;Республикасы мәдениет және спорт министрінің Құрмет грамотасы, Қазақстан&nbsp;Республикасы Ұлттық Академиялық кітапхананың,&nbsp;«Кітапхана саласының шебері» төсбелгісі және әр жылдары облыс, аудан әкімінің Алғыс хаттарымен марапатталған. &nbsp; &nbsp;Жақында Күлшара Қаниева Қазақстан Республикасы «Мәдениет саласының үздігі» төсбелгісін тағынды.Гүлшара Бөгенбайқызы отбасының берекесін ұйытып, балаларын өсіріп, жарының да қас-қабағын бағып отырған ардақты жан, аяулы әже. Отағасы Әскербек Ысқақов Ауған соғысының ардагері. Бүгінде екеуі екі ұл, бір қызды тәрбиелеп, олардан алты немере сүйген бақытты отбасылардың қатарында. Балаларының үлкені Самат мұнай саласында жұмыс істесе, келіні Индира – заңгер, Мұраты – мал дәрігері, келіні Алтынай – агроном болса, ал сүткенжесі Әйгерім Алматы қаласындағы Қазақ-Ресей медициналық университетінің 3 курс студенті.Білікті басшы баршаның тілін табады. Кейіпкеріміз де дәл сондай жанның бірі. Қызметкерлерін үнемі ұйымшылдыққа, бірлікке үндеп отырады. Ал оқырмандарға деген ықыласы тым бөлек.

Қармақшылық Гүлшара Қаниева Мәдениет саласының үздгі атанды

<a href="https://kyzylorda-news.kz/">Kyzylorda-news.kz</a> Кеңес одағының Батыры, Тәуелсіз Қазақстан армиясының тұңғыш қорғаныс министрі және тұңғыш генералы, Халық қаһарманы Сағадат Нұрмағамбетовтың туғанына 100 жыл толуына орай «Ерлікке толы ғибратты ғұмыр» тақырыбында тарихи-танымдық кеш ұйымдастырылды.Сағадат Нұрмағамбетов – Ұлы Отан соғысында ерлігімен көзге түскен даңқты батыр. Ол&nbsp;1942 жылдың шiлде айында 18 жаста кеңес әскер қатарына қабылданып, Түрікменстанда пулеметшiлер дайындайтын училищенi үздiк аяқтайды. Кейін взвод командирi ретiнде майдан шебiне аттанады. Кубань, Дон, Молдавия жерлерiнде, Одер, Шпрее өзендерiнiң бойында жан алысып, жан беріскен шайқастарға қатысады.&nbsp;Майданда Краснодар өлкесін, Украинаны, Молдованы, Беларусь пен Польшаны азат етуге қатысты.&nbsp;Бүгінде оның есімі Қазақстан қалаларының көшелеріне және әскери оқу орындарына берілген, батырдың құрметіне ескерткіштер, мемориалдық тақталар орнатылып, мұражайлар ашылды. Сағадат Қожахметұлының бюсті Мәскеудегі Ұлы Отан соғысының Орталық музейі Қасіретке тағзымға қойылған.Кешке доцент, т.ғ.д. Сәтбай Дастан Яхияұлы, педагогика ғылымдарының магистрі, тарих және қоғамдық ғылымдар академиясының академигі Ахметбек Бақытжан Мұқарамұлы, Қызылорда облысының қорғаныс істері жөніндегі департаменті бастығының орынбасары Жақыпов Алмат Алмасұлы, №1 мектеп-гимназияның тарих пәнінің мұғалімі Тұрымбетова Әлия Мұхамедханқызы қатысып С.Нұрмағамбетовтың халықаралық әскери ынтымақтастықты дамытуға сіңірген еңбегі, бейбіт кезеңдегі белсенді қоғамдық қызметі, БҰҰ-ның мінберінен айтқан бейбітшілікті сақтау жөніндегі ұсыныстарын кеңінен баяндады.&nbsp;«Тарих. Тағдыр. Тұлға» тақырыбында ұйымдастырылған кітап көрмесі оқырман назарына ұсынылды.&nbsp;Қорлан САРЫ

Сағадат Нұрмағамбетовтың туғанына 100 жыл

<a href="https://kyzylorda-news.kz/">Kyzylorda-news.kz</a> Композитор, Мемлекеттік сыйлықтың лауреаты, КСРО халық әртісі Сыдық Мұхамеджановтың туғанына 100 жыл толуына арналған М.Мәметова атындағы жоғары педагогикалық колледжінде «Сазгер мұрасы» атты әдеби-музыкалық кеш болып өтті.&nbsp;Сыдық Мұхамеджанов – талантты композиторлардың бірі, оның тамаша әуендері әр қырлы шығармашылығы, аға буын композиторлар мектебінің негізін қалаушылар мен 60-шы жылдары шыққан композиторлардың арасындағы байланыс дәнекері болып табылады.Әйгілі сазгер ерен еңбегі үшін 1967 жылы Қазақстанның халық әртісі, 1974 жылы Мемлекеттік сыйлықтың лауреаты, 1990 жылы КСРО халық әртісі атағын алды. «Октябрь революциясы», «Халықтар достығы», «Құрмет белгісі» ордендерімен марапатталды.Кешке М.Мәметова атындағы Қызылорда жоғары педагогикалық колледждің оқытушылары мен студенттері қатысты. Шараның негізгі мақсаты - аға буын композиторлардың негізін қалаушы, скрипка мен фортепианоға арналған көптеген шығармалардың авторы Сыдық Мұхамеджановтың талантына тағзым ету, өмірі мен асыл мұрасын жастарға жақын таныстыру.Оның скрипка мен фортепьяноға арналған сонаталары, халық аспаптар оркестріне жазылған пьесалары, күйлері, камералық оркестрге жазылған поэмалары қазақтың аспаптық, оркестрлік, камералық шығармаларының жан-жақты дамығандығын, оның биік көркемдік дәрежесін көрсетеді. Ол «Алдар көсе», «Ботагөз», «Рәбиға», «Беу,қыздар-ай!», «Сәуле»,тағы басқа спектакльдерге, «Ана мен бала», «Біз Жетісуденбіз», «Партизан қызы» кинофильмдеріне музыка жазған.30 жылдан астам шығармашылығы барлық негізгі жанрларды қамтыған тума дарын 4 опера, 4 симфония, симфониялық поэмалар, оратория, концерттер, спектакльдер мен кинофильмдерге музыка жазды.Кеш барысында жастарға композитор жайында толық мәлімет беріліп, бірнеше шығармаларының тарихы таныстырылып, орындалды.&nbsp;Тақырыпқа сай кітап көрмесі дайындалып, әдебиеттерге шолу жасалды.&nbsp;Қорлан САРЫ

"Сазгер мұрасы" атты әдеби-музыкалық кеш өтті

<a href="https://kyzylorda-news.kz/">Kyzylorda-news.kz</a> Бүгін аудан әкімі Жандос Еркінбек Мәдениет және өнер қызметкерлері мен сала ардагерлерін қабылдап, кәсіби мерекемен құттықтады.<blockquote>— Қармақшы ауданы - жүз шайыр шыққан, ақындық пен жыраулық өнердің туын тіккен, бүгінде жүз жырауы жыр көшін жалғаған дарынды тұлғалардың мекені. Сонау сыр сүлейі Тұрмағамбет, кешегі өткен күміс көмей Көшеней, жампоз жырау Қуандық, бүгінде жауhарлы жырдың тұлғасы Алмас Алматов бастаған саңлақтар көтерген өнердің тұғыры әрқашан биікте. Ауданнан шыққан талантты жас өнерпаздарымыз да халықаралық, республикалық, облыстық байқауларда топ жарып, аудан абыройын асқақтатып келеді. Күні кеше ғана облыс әкімі өнер иелеріне Қызылорда облысының «Құрмет грамотасы», «Тұран» сыйлығы, Қазақстан&nbsp;Республикасы Мәдениет және спорт министрлігінің марапаттарын табыстап, өнер ұжымдарына домбыра тарту етті. Бұл осы салада қажырлы еңбек етіп жүрген мәдениет саласы қызметкерлерінің ерен еңбегі деп білемін, — деді аудан әкімі.</blockquote>Одан соң аудан басшысы мәдениет және өнер саласында жемісті еңбек етіп жүрген сала қызметкерлерінеҚазақстан&nbsp;Республикасы Мәдениет және спорт министрлігінің алғыс хатын, «Еңбек даңқы» төсбелгісін және облыс әкімінің алғыс хаттарын табыстады.Сондай-ақ, шара барысында Қармақшы ауданының Құрметті азаматы, мәдениет саласының ардагері Махамбетова Үрзахия Болтайқызын 70 жас мерейтойымен құттықтап, сый-сияпат жасады.

Қармақшы аудан әкімі мәдениет және өнер қызметкерлерін құттықтады

<a href="https://kyzylorda-news.kz/">Kyzylorda-news.kz</a> Қармақшы ауданы, Тұрмағамбет аулы, Қ.Бүрлібаев атындағы мәдениет үйінде №29 Т.Ізтілеуов атындағы орта мектеп және аталған мектепті 2004 жылы бітірген түлектердің 20 жылдығына орай «Тұрмағамбет оқулары» &nbsp; байқауы өткізілді.&nbsp;Мақсат – Сыр сүлейлерінің шоқтығы биік тұлғаларының бірі, назым сөздің шебері, атақты ақын, аудармашы Тұрмағамбет Ізтілеуұлының мол мұрасын өскелең ұрпаққа насихаттау, оқушыларды сөз өнеріне, шешендікке тәрбиелеу. Қазақ тілінің көркемдік ерекшелігін, бай сөздік қорын, Тұрмағамбет шығармашылығын насихаттау арқылы қазақтың тілі мен әдебиетіне, мәдениетіне деген жас ұрпақтың ықыласын арттыру, туған жеріміздің рухани бірлігін, ауыл жастарының танымдық - шығармашылық қабілетін нығайту. Мемлекет басшысы Қасым-Жомарт Тоқаев Ұлттық құрылтайдың үшінші отырысында сөйлеген сөзінде: «...Аға буын жас ұрпаққа жол нұсқап, бағыт-бағдар беруі керек. Елімізде көзі ашық, көкірегі ояу, ойы ұшқыр, білімді жастар көп. Біз олардың бойына асыл қасиеттерді сіңіруіміз қажет. Өзара жанашыр болу, түптеп келгенде, елге жанашыр болу деген сөз.Біз болашаққа сеніммен қадам басу үшін төл тарихымыздың ауқымы кең екенін толық сезініп, мәдени мұрамызды сақтап, оны дәріптеуіміз қажет» – деген болатын.&nbsp; Байқаудың ашылу салтанаты &nbsp;Тұрмағамбет ақынның мұражайынан басталып, мектеп оқушыларынан құралған домбырашылардың жыр сәлемімен жалғасты.&nbsp;Байқау қатысушыларына ҚР Білім беру саласының көшбасшысы, ҚР Білім және ғылым министрлігі «Білім беру ісінің &nbsp;майталманы» медалінің &nbsp;иегері, ардагер-ұстаз &nbsp;Зарипа Тасымова сәттілік тілеп, ұйымдастырушылардың ақын шығармашылығына құрметін ерекше бағалады.&nbsp; «Тұрмағамбет оқуы» байқауына жырау Қуаңбаев Әділхан, &nbsp;Қармақшы аудандық кітапханалар жүйесінің Тұрмағамбет ауылдық кітапханасының меңгерушісі Құндызай Далдабаева, &nbsp;№ 29 Т.Ізтілеуов атындағы орта мектептің қазақ тілі мен әдебиеті пәні мұғалімі &nbsp;Роза Алламұратовалар әділқазылық жасады.&nbsp;Байқауға қатысушы талапкерлер Тұрмағамбет ақынның шығармаларын (өлең, мысал, дастан) өз мүмкіндігіне қарай мәнерлеп жатқа оқыды. Талапкер өзі оқитын шығармалар тізімін ұсынып, ұсынған тізім бойынша қазылар алқасы шығарманың кез келген жерінен сұрап, дарынды қатысушыларды анықтады.«Тұрмағамбет оқуы» байқауын Дауылкөл ауылдық округінің әкімі Мұрат &nbsp;Алдамұратов &nbsp;қорытындылап, &nbsp;қазақ мәдениеті мен өнеріне жанашырлық танытып, өнегелі іс-шара ұйытқысы болып, &nbsp;ақын мұраларын &nbsp;насихаттауға ерекше қызығушылық білдірген &nbsp;2004 жылғы мектеп бітіруші түлектерге алғысын білдірді. Алдағы уақытта жүз шайырдың отаны атанған Тұрмағамбет ауылын, жыр өнерін &nbsp;өркендетуге &nbsp;бірге &nbsp;атсалысып, жұмыла &nbsp;іс атқаруға шақырды.Байқау нәтижесінде бас жүлде алған жеңімпаз Айгерім Сырлыбай ұйымдастырушылар тарапынан &nbsp;жазғы тынығу &nbsp;лагеріне жолдама берілді. І орынды Мархабатова Бақыт, ІІ орын Бұхарбаева Шахназ, ІІ орын Мархабатова Фатима, ІІІ орын Оңалбай Гүлжауһар, ІІІ орын Ұланбек Айдана, ІІІ орын Ерболқызы Әлияларға &nbsp;Диплом, ақшалай сыйлық &nbsp;берілсе, қалған қатысушыларға Алғыс хат &nbsp;пен ынталандыру сыйлығы ретінде ақынның кітаптары берілді.Өз кезегінде көрермендер мен қатысушылар алдағы уақытта &nbsp;да &nbsp;ауылда &nbsp;«Тұрмағамбет оқуы» байқауы республикалық, облыстық &nbsp;деңгейде өткізілсе деген ұсыныстарын білдірді.<img src="https://knadmin.beoblood.kz/uploads/71a9946f_69c6_479e_91a5_a88ad6088ecb_53e50c66f9.jpg" alt="71a9946f-69c6-479e-91a5-a88ad6088ecb.jpg"><img src="https://knadmin.beoblood.kz/uploads/0f59de2f_54f2_4f00_828a_ebe904b75410_5a457d5385.jpg" alt="0f59de2f-54f2-4f00-828a-ebe904b75410.jpg">

 Қармақшыда «Тұрмағамбет оқулары» байқауы өтті 

<a href="https://kyzylorda-news.kz/">Kyzylorda-news.kz</a> Ресейлік музыкант Максим Фадеев Қуандық Бишімбаевтың қолынан мерт болған Салтанат Нүкеноваға арнап ән шығарды. Бұл туралы Stan.kz ақпарат агенттігі хабарлайды.Ол 23 мамырда Instagram желісінде Salta деп аталатын әннің үзіндісін бөлісті. Ән 31 мамырда жарық көреді екен.<blockquote>"Салта 31 мамыр. Оның ғұмыры жалғасын тапсын. Музыкада.", – деп жазды Максим Фадеев.</blockquote>Марқұмның ағасы мен әпкесі туынды үшін алғыс айтты.“Салта, Салта, үнсіздік айқайдан да қаттырақ” делінген әннің үзіндісінде.Қазақстандықтар бұл әнге өз пікірлерін білдірді.<blockquote>"Максим, мен барлық қазақ әйелдерінің атынан рахмет!”, &nbsp;"Бұл ән Бишімбаевқа тағы бір соққы жасады”, "Рахмет, Максим! Қазақстан әннің не туралы екенін бірден түсінді!", "Салтанат бүкіл әйелдер үшін еркіндіктің символына айналды" деді желідегілер.</blockquote>Еске салайық, бұрынғы ұлттық экономика министрі Қуандық Бишімбаев әйелі Салтанат Нүкенованы өлтірді деген күдікпен 2023 жылы 9 қарашада ұсталған еді. Кейіннен қылмысты жасырды деген айыппен Салтанат Нүкенова көз жұмған мейрамхананың директоры Бақытжан Байжанов та тұтқындалды. Олардың сот отырысы 2024 жылы 27 наурыздан басталып 10 мамырға дейін жалғасып, ашық түрде өтті.Сондай-ақ экс-министр Қуандық Бишімбаевқа Қылмыстық кодекстің 110-бабы 2-бөлігі ("Азаптау"), Қылмыстық кодекстің 99-бабы 2-бөлігі 5-тармағы ("Аса қатыгездікпен адам өлтіру") бойынша жаңа айыптар тағылған еді. Ал оның туысы Бақытжан Байжанов қылмысты жасырғаны үшін айыпталған.<div class="raw-html-embed"><blockquote class="instagram-media" data-instgrm-captioned="" data-instgrm-permalink="https://www.instagram.com/reel/C7UJCzmo2as/?utm_source=ig_embed&amp;utm_campaign=loading" data-instgrm-version="14" style=" background:#FFF; border:0; border-radius:3px; box-shadow:0 0 1px 0 rgba(0,0,0,0.5),0 1px 10px 0 rgba(0,0,0,0.15); margin: 1px; max-width:540px; min-width:326px; padding:0; width:99.375%; width:-webkit-calc(100% - 2px); width:calc(100% - 2px);"><div style="padding:16px;"> <a href="https://www.instagram.com/reel/C7UJCzmo2as/?utm_source=ig_embed&amp;utm_campaign=loading" style=" background:#FFFFFF; line-height:0; padding:0 0; text-align:center; text-decoration:none; width:100%;" target="_blank"> <div style=" display: flex; flex-direction: row; align-items: center;"> <div style="background-color: #F4F4F4; border-radius: 50%; flex-grow: 0; height: 40px; margin-right: 14px; width: 40px;"></div> <div style="display: flex; flex-direction: column; flex-grow: 1; justify-content: center;"> <div style=" background-color: #F4F4F4; border-radius: 4px; flex-grow: 0; height: 14px; margin-bottom: 6px; width: 100px;"></div> <div style=" background-color: #F4F4F4; border-radius: 4px; flex-grow: 0; height: 14px; width: 60px;"></div></div></div><div style="padding: 19% 0;"></div> <div style="display:block; height:50px; margin:0 auto 12px; width:50px;"><svg width="50px" height="50px" viewBox="0 0 60 60" version="1.1" xmlns="https://www.w3.org/2000/svg" xmlns:xlink="https://www.w3.org/1999/xlink"><g stroke="none" stroke-width="1" fill="none" fill-rule="evenodd"><g transform="translate(-511.000000, -20.000000)" fill="#000000"><g><path d="M556.869,30.41 C554.814,30.41 553.148,32.076 553.148,34.131 C553.148,36.186 554.814,37.852 556.869,37.852 C558.924,37.852 560.59,36.186 560.59,34.131 C560.59,32.076 558.924,30.41 556.869,30.41 M541,60.657 C535.114,60.657 530.342,55.887 530.342,50 C530.342,44.114 535.114,39.342 541,39.342 C546.887,39.342 551.658,44.114 551.658,50 C551.658,55.887 546.887,60.657 541,60.657 M541,33.886 C532.1,33.886 524.886,41.1 524.886,50 C524.886,58.899 532.1,66.113 541,66.113 C549.9,66.113 557.115,58.899 557.115,50 C557.115,41.1 549.9,33.886 541,33.886 M565.378,62.101 C565.244,65.022 564.756,66.606 564.346,67.663 C563.803,69.06 563.154,70.057 562.106,71.106 C561.058,72.155 560.06,72.803 558.662,73.347 C557.607,73.757 556.021,74.244 553.102,74.378 C549.944,74.521 548.997,74.552 541,74.552 C533.003,74.552 532.056,74.521 528.898,74.378 C525.979,74.244 524.393,73.757 523.338,73.347 C521.94,72.803 520.942,72.155 519.894,71.106 C518.846,70.057 518.197,69.06 517.654,67.663 C517.244,66.606 516.755,65.022 516.623,62.101 C516.479,58.943 516.448,57.996 516.448,50 C516.448,42.003 516.479,41.056 516.623,37.899 C516.755,34.978 517.244,33.391 517.654,32.338 C518.197,30.938 518.846,29.942 519.894,28.894 C520.942,27.846 521.94,27.196 523.338,26.654 C524.393,26.244 525.979,25.756 528.898,25.623 C532.057,25.479 533.004,25.448 541,25.448 C548.997,25.448 549.943,25.479 553.102,25.623 C556.021,25.756 557.607,26.244 558.662,26.654 C560.06,27.196 561.058,27.846 562.106,28.894 C563.154,29.942 563.803,30.938 564.346,32.338 C564.756,33.391 565.244,34.978 565.378,37.899 C565.522,41.056 565.552,42.003 565.552,50 C565.552,57.996 565.522,58.943 565.378,62.101 M570.82,37.631 C570.674,34.438 570.167,32.258 569.425,30.349 C568.659,28.377 567.633,26.702 565.965,25.035 C564.297,23.368 562.623,22.342 560.652,21.575 C558.743,20.834 556.562,20.326 553.369,20.18 C550.169,20.033 549.148,20 541,20 C532.853,20 531.831,20.033 528.631,20.18 C525.438,20.326 523.257,20.834 521.349,21.575 C519.376,22.342 517.703,23.368 516.035,25.035 C514.368,26.702 513.342,28.377 512.574,30.349 C511.834,32.258 511.326,34.438 511.181,37.631 C511.035,40.831 511,41.851 511,50 C511,58.147 511.035,59.17 511.181,62.369 C511.326,65.562 511.834,67.743 512.574,69.651 C513.342,71.625 514.368,73.296 516.035,74.965 C517.703,76.634 519.376,77.658 521.349,78.425 C523.257,79.167 525.438,79.673 528.631,79.82 C531.831,79.965 532.853,80.001 541,80.001 C549.148,80.001 550.169,79.965 553.369,79.82 C556.562,79.673 558.743,79.167 560.652,78.425 C562.623,77.658 564.297,76.634 565.965,74.965 C567.633,73.296 568.659,71.625 569.425,69.651 C570.167,67.743 570.674,65.562 570.82,62.369 C570.966,59.17 571,58.147 571,50 C571,41.851 570.966,40.831 570.82,37.631"></path></g></g></g></svg></div><div style="padding-top: 8px;"> <div style=" color:#3897f0; font-family:Arial,sans-serif; font-size:14px; font-style:normal; font-weight:550; line-height:18px;">Посмотреть эту публикацию в Instagram</div></div><div style="padding: 12.5% 0;"></div> <div style="display: flex; flex-direction: row; margin-bottom: 14px; align-items: center;"><div> <div style="background-color: #F4F4F4; border-radius: 50%; height: 12.5px; width: 12.5px; transform: translateX(0px) translateY(7px);"></div> <div style="background-color: #F4F4F4; height: 12.5px; transform: rotate(-45deg) translateX(3px) translateY(1px); width: 12.5px; flex-grow: 0; margin-right: 14px; margin-left: 2px;"></div> <div style="background-color: #F4F4F4; border-radius: 50%; height: 12.5px; width: 12.5px; transform: translateX(9px) translateY(-18px);"></div></div><div style="margin-left: 8px;"> <div style=" background-color: #F4F4F4; border-radius: 50%; flex-grow: 0; height: 20px; width: 20px;"></div> <div style=" width: 0; height: 0; border-top: 2px solid transparent; border-left: 6px solid #f4f4f4; border-bottom: 2px solid transparent; transform: translateX(16px) translateY(-4px) rotate(30deg)"></div></div><div style="margin-left: auto;"> <div style=" width: 0px; border-top: 8px solid #F4F4F4; border-right: 8px solid transparent; transform: translateY(16px);"></div> <div style=" background-color: #F4F4F4; flex-grow: 0; height: 12px; width: 16px; transform: translateY(-4px);"></div> <div style=" width: 0; height: 0; border-top: 8px solid #F4F4F4; border-left: 8px solid transparent; transform: translateY(-4px) translateX(8px);"></div></div></div> <div style="display: flex; flex-direction: column; flex-grow: 1; justify-content: center; margin-bottom: 24px;"> <div style=" background-color: #F4F4F4; border-radius: 4px; flex-grow: 0; height: 14px; margin-bottom: 6px; width: 224px;"></div> <div style=" background-color: #F4F4F4; border-radius: 4px; flex-grow: 0; height: 14px; width: 144px;"></div></div></a><p style=" color:#c9c8cd; font-family:Arial,sans-serif; font-size:14px; line-height:17px; margin-bottom:0; margin-top:8px; overflow:hidden; padding:8px 0 7px; text-align:center; text-overflow:ellipsis; white-space:nowrap;"><a href="https://www.instagram.com/reel/C7UJCzmo2as/?utm_source=ig_embed&amp;utm_campaign=loading" style=" color:#c9c8cd; font-family:Arial,sans-serif; font-size:14px; font-style:normal; font-weight:normal; line-height:17px; text-decoration:none;" target="_blank">Публикация от Максим Фадеев “MALFA” (@fadeevmaxim)</a></div></blockquote> <script async="" src="//www.instagram.com/embed.js"></script></div>

Ресейлік музыкант Салтанат Нүкеноваға ән арнады

<a href="https://kyzylorda-news.kz/">Kyzylorda-news.kz</a> Мәдениет пен өнер – қоғамның айнасы, асыл қазынасы және рухани мұрасы. «Мәдениет – ұлт мәйегі» деп те текке айтылмаса керек. Олай дейтініміз, мәдениет пен өнердің еліміздің жан-жақты дамуы мен өсіп-өркендеуіне қосар үлесі зор. Ал бұл жолда мәдениет саласы мамандарының, оның ішінде мәдениет үйінің, ауылдық клуб және шығармашылық орталық қызқметкерлерінің орны әркез ерекше. Жүгі ауыр, жауапкершілігі мол салада аянбай еңбек етіп, ғасырлар бойы ұрпақтан-ұрпаққа жеткізу жолында игілікті іс атқарып жүрген білікті қызметкерлер қаншама? Ал Шиелі ауданының мәдениет саласы күннен-күнге қанатын кеңге жайып, өркендеп келеді деп айтуға толық негіз бар.Б.Қабылұлы атындағы Шиелі аудандық мәдениет үйінің бүгінгі ғимараты 1961 жылы типтік жобада салынып, сол кезден бастап халыққа қалтқысыз қызмет көрсетіп келеді. Десе де, әр кезең өзіндік ерекшелігімен, жаңашылдығымен тарихта қалуда. Былай қарасақ, мәдени іс-шаралары сырттан тамашалап, әдемі көрініске куә болып жүрген көрермендер сахнаның сыртында қаншама еңбек, қандай жұмыс жатқанын біле бермейді.Мәдениет саласының әрбір қызметкеріне қажырлы күш керек. Тіпті ауқымды іс-шараларды қатарынан абыроймен өткізіп, халық алдына әдемі қалпында шығып, еш шаршамай, күліп жүргенін көргенде бір жағынан тәнті болатынымыз рас. Бұл сала мамандарының өз ісіне деген асқан сүйіспеншілігі мен махаббатын көрсетсе керек.&nbsp;Айта кетейік, мекемені басқарып отырған басшы өз ісінің білгір маманы. Шиелі аудандық мәдениет және спорт бөлімінің Б.Қабылұлы атындағы аудандық мәдени-шығармашылық орталығының директоры Зульфия Шалабаева 2013 жылдан бастап басшылық қызметін атқарып келеді. Бірлігі бекем ұжымда 54 қызметкер оның ішінде 31 шығармашылық маман, 23 шаруашылық қызметкер жұмыс істейді.Айта кетейік, 2023 жылдың 29 маусымындағы №36 келісім шарты бойынша мәдениет үйінің ғимаратына күрделі жөндеу жұмыстары жүргізілген. Сондай-ақ қазан айында сахнаға арналған LED экраны толық жабдығымен 15 990 990 млн теңгеге алынды. Барлық жағдай қамтамасыз етілген Орталық жылу жүйесі жеке бу қазандығы арқылы газбен жылытылады. Қазіргі уақытта мәдениет үйінде 10 үйірме бар. Оған қатысушылар саны – 138. Атап айтсақ, «Жадыра» драма, «Ғажаби» ВИА, Халықтық ұлт аспаптар оркестрі, «Барабан», «Саксафон», «Жас дәурен» ән-би ансамблі, «Ноғайбаевтар» отбасылық ансамблі, «Балауса», «Айшуақ», «Сыр маржаны» мәдени үгіт бригадасы үйірмелері жұмыс істейді.

Шиелі ауданындағы мәдениет саласының дамуы

<a href="https://kyzylorda-news.kz/">Kyzylorda-news.kz</a> Асқар Тоқмағанбетов атындағы қалалық мәдениет үйінде композитор, ҚР еңбек сіңірген қайраткері, «Құрмет» орденінің иегері, Қазақстан Композиторлар одағының мүшесі, Қызылорда облысының Құрметті азаматы Рамазан Таймановтың шығармашылығын насихаттау мақсатында І республикалық «Сыр ана» әншілер конкурсының ашылу салтанаты және І кезеңі өтті.Конкурстың ашылуында Қызылорда облысының мәдениет, архивтер және құжаттама басқармасының басшысы Мира Қазбекова сөз сөйлеп, облыс әкімінің құттықтауын жеткізді.<blockquote>– Рамазан Сағындықұлы – мәдениет саласына кірпішін қалаған өнер адамы. Ол кісінің бағындырған биік шыңдары ізінен ерген шәкірттеріне және де өзі секілді өнер әлеміне өркен жаямын деген өнерпаз жастарға үлгі. Бүгінгі конкурс арқылы да біраз өнерлі, талантты жастардың бағы жанатынына сенімдімін. Барлығыңызға сәттілік тілеймін, – деді басқарма басшысы Мира Қазбекова.</blockquote>Сыр даласын әсем әнге бөлейтін конкурсқа республикамыздың түкпір-түкпірінен және Сыр өңірінен арнайы іріктелген 17 талапкер қатысты.Конкурс ережесіне сәйкес талапкер әншілер алғашқы кезеңде Рамазан Сағындықұлының әндерін орындаса, екінші кезеңде еркін тақырыпта конкурстық әндер орындайды.Екінші кезең ертең Нартай Бекежанов атындағы қазақ академиялық музыкалық драма театрында сағат 11.00-де, Рамазан Сағындықұлының 70 жас мерейтойына арналған шығармашылық кеш сағат 17.00-де өтеді.&nbsp;

Қазақстан және Қызылорда облысының жаңалықтары: Мәдениет

Серік Жақсығұлов: Сыр өңірі қашаннан да өнерге оң көзқараста