<a href="https://kyzylorda-news.kz/">Kyzylorda-news.kz</a> Ақын Мағжан Жұмабаев «Ойын – бала үшін өмірлік тәжірибе» деген. Асық – қазақтың ұлттық ойындарының ең алғашқы сатысы һәм халықтың салт-дәстүрі мен мәдениетінің ажырамас бөлігі. Асық малдың жіліктерін жалғастырып тұратын шағын сүйек ғана емес, ұрпақ тәрбиесінің аса қажетті құрайды. Ұлтық ойынның атасы ғана емес, көпшіліктің өткені мен бүгінгісінің көрінісі. Себебі ертеде қазақ баласы қолына ең алғаш асық ұстаған. Осындай ұлттық құндылықты дәріптеп жүрген ауданда жастар жетерлік. Солардың қатарына Шиелінің тұрғыны Әйгерім Ғалымжанқызын атап кеткен жөн. Кейіпкеріміз «Басында хоббиім ретінде бастаған ісім кәсіпке айналды» деп бастады әңгіменің әлқиссасын.<blockquote>– Асықты балабақшаларға көрнекілік ретінде жасап бастағанмын. Бір-бірінен көріп адамдар балаларына ойнауға алып жатыр. Әсіресе, балабақшадағы тәрбиешілер көп тапсырыс береді. Аудан тұрғындары да қалыс қалмайды. Үйде телефон көріп отырғаннан гөрі бір мезгіл ұлттық ойындарды үйреткен жақсы емес пе?! Менің де сол мақсатым – ұлттық құндылығымызды өскелең ұрпаққа насихаттау еді. Асықтарды мен Г16 гипсімен жасаймын. Жасалу жолын Инстаграм әлеуметтік желісі арқылы үйреніп алдым. Гипсті құрылыс заттарын сататын жерлерден аламын. Күніне 3 сағат уақытымды бөліп, 200-300 асық жасаймын. Кебу уақыты 1 сағатты алады. Байқаймын, асық балабақшада тәрбиеленіп жатқан балаларға қызықты. Баланың қол маторикасы дамиды. Түстерді тез тез жаттап алатын көрінеді. Шығармашылыққа, шыдамдылыққа бейімделеді, – дейді жас кәсіпкер.</blockquote>&nbsp;Әйгерімнің анасы Гауһар Байжанова балабақшада жұмыс істейді екен. Анасының жұмысына қажетті асықты жасап бастаған. Кейіпкеріміздің ісі осылай өрге домалай түседі. Ынта мен талабы биік Әйгерім қолөнерді жанына серік етіп жүр. Кәсіп демекші, асықпен қатар, ол тиын жинауға арналған түрлі пішіндегі дүниелерді де жасайды. Жұрт оларға көбіне тойбастар ретінде тапсырыс береді екен. Оның айтуынша, жеңіл әрі сапалы өнімдер – жиын-тойдың сәніне шырай келтіретін таптырмас сыйлық. Әйгерім Ая-София есімді 1 қыздың анасы. Өзі ағылшын тілі пәнінің маманы. Бала күтіміндегі демалыста отырса да, бос уақытын мүлдем зая кетірмейді. Ерекше хоббиі арқылы тыныштық тауып, шабыт алады. Расында, қазақ өнерін, мәдениетін дәріптейтін осындай жастар барына біз қуанамыз.Айнұр ИБРАШ

Әйгерім – қолдан асық жасаудың шебері

<a href="https://kyzylorda-news.kz/ru">Kyzylorda-news.kz</a> Орталық коммуникациялар қызметінің брифингінде Қызылорда облысының әкімі Нұрлыбек Нәлібаев осы туралы мәлім етті.«Биыл Сыр өңірінде «Руханият жылы» жарияланып, игі бастама халқымыздың жыл басы, жаңару кезеңі саналған Наурыз айынан басталды» – деді облыс әкімі.Мәдениет саласында 1000 орындық көпфункционалды «Өнер орталығы», «Отбасы орталығы» пайдалануға берілді. Сыр мәдениетінің негізгі бренді – жыраулық дәстүр өкілдері көптен күткен игілік «Жыраулар үйі» жұмысын бастады.Айта кетейік, биыл 11,5 млрд. теңге қаржы бөлініп, барлық ауданда неке қию залы, кітапхана, музей, архив, жастар сарайы, ардагерлер мен аналар үйі біріктірілген «Руханият» орталықтарының құрылысы басталды. Бұл орталықтарда ұлттық құндылықтар дәріптеліп, салт-дәстүр насихатталады.«Руханият жылы» аясында сол жағалаудан құны 2,3 млрд теңге болатын облыстық тарихи-өлкетану музейі ғимаратын салу жұмыстары басталды. Соңғы 2 жылда симфония оркестрі, инклюзивті театр, жастар театры, «Анаға тағзым»орталығының, заманауи би және хор ұжымы жаңадан жасақталды.Былтырдан бері мәдениет және өнер, әдебиет өкілдеріне жыл сайын «Тұран» арнайы сыйлығы табыстала бастады. Дәстүрлі сыйлық екі жылда 40 лайықты тұлғаға берілді.Жылдар бойы жүргізілген археологиялық қазба жұмыстарының нәтижесімен «Шірік Рабат сақ жауынгері», «Сығанақ ханшайымы» реконстуркциялары, «Түгіскен көсемі» және «Жетіасар ақсүйек әйелі» алтындатқан мүсіндері жасалып, облыстық музей қорына өткізілді.Халықаралық «Түрксой» ұйымының шешімімен мәдениет және руханият саласында атқарылған жұмыстар үшін Сыр өңіріне түркі дүниесінің «Ең үздік мәдени аймағы» номинациясы берілді.Балалар мен жасөспірімдердің шығармашылығын шыңдау мақсатында облыс орталығынан құны 11 млрд теңге болатын «Шығармашылық академиясы» салынуда. Мұнан бөлек, халықаралық стандарттарға сай келетін 11 мың орындық «Орталық стадион» және жабық бассейні бар көпсалалы денешынықтыру-сауықтыру кешенінің құрылысы басталды.Жуырда ғана сол жағалаудан «Үстел теннисі орталығы» ашылды. Жастар мен балаларды спорттық үйірмелермен қамтуға мүмкіндік беретін «Қызылорда Арена» көпбейінді спорт кешені салынады, тағы 10 кешеннің құрылысы басталды.<img src="https://knadmin.beoblood.kz/uploads/Syr_irinde_Ruhaniyat_zhyly_tude_1_b9f9512d01.jpg" alt="Сыр өңірінде «Руханият жылы» өтуде 1.jpg"><img src="https://knadmin.beoblood.kz/uploads/Syr_irinde_Ruhaniyat_zhyly_tude_2_241baa46f9.jpg" alt="Сыр өңірінде «Руханият жылы» өтуде 2.jpg">

Сыр өңірінде «Руханият жылы» өтуде

<a href="https://kyzylorda-news.kz/">Kyzylorda-news.kz</a> «Ел іші – өнер кеніші» дейміз, негізінен ауыл – нағыз таланттылардың ордасы. Кейіпкеріміз Аруназ Сағынтай – Жалағаш ауданы, Ақсу ауылындағы алтын ұяның 9-шы сынып оқушысы. Өнер десе ішкен асын жерге қоятын белсенді жаспен Ақсуға аялдаған сапарымызда сұхбаттасудың сәті түсті.Әкенің қанымен, ананың сүтімен бойына дарыған талантты тұншықтырмай ұштап жүрген Аруназ бала күнінен ән әлеміне жақын. Айтуынша, нағашы әжесі өнерлі кісі болыпты. Ауылдық клуб жанынан ашылған «Сырлы әуен» ән үйірмесіне 6 жасынан бастап қатысқан ол, үлкен байқауларда топ жаруына аталған үйірменің тигізген септігі мол екенін айтады.&nbsp;Кейіпкеріміз ең алғаш 2 сыныпта аудандық&nbsp;патриоттық әндер шырқау&nbsp; бойынша өткен байқауда ІІ орын иеленген. Мұнан бөлек «Бозторғай» халықаралық балалар шығармашылығына бірнеше мәрте қатысып, жүлделі орындарды иеленген. Ал 2022 жылы дәл осы балалар шығармашылығына арналған байқаудың республикалық кезеңінде дипломант атанған. Сондай-ақ «JasStar» халықаралық балалар мен жасөспірімдер және жастар фестивальінің республикалық кезеңінен де жүлделі І орын алған. Жақында «Жарқын болашақ» республикалық жарысында топ жарған кейіпкеріміз Астана төрінде «Қазағым-ай» әнін шырқап, ІІІ орын иеленген. Ол осы жарыста өзге ұлт өкілдерімен бірге бір сахнада өнер көрсеткен, әр жарыстың өзіндік қызығы мен ерекше естеліктерін еске алған озат оқушы жарыс жолы тоғыстырған достарымен әлі де хабарласып тұратынын жеткізді.&nbsp;<blockquote>– Мен 2022 жылы Таңшолпан облыстық телевизиялық байқауына қатыстым. Бұл жарыстан аудандағы қарсыластарымнан оза шауып, облыстық кезеңде өнер көрсеттім. Қызылордада өткен сайыста «Әлемдік әнді жақсы орындаушы» деген номинация иегері атанып, қосымша Канадада өтетін халықаралық «Торонто» фестивальіне сертификат жеңіп алдым. Канада сахнасында өтетін сайыс онлайн түрде өтетін болғандықтан мәдениет үйіне барып&nbsp; Дильнура Біржанованың «Мен қазақпын» әнін орындап, бейнежазбаға басып жібердік. Арада бір апта өткен соң Канададан Қазақстан Республикасы Қызылорда облысы Жалағаш ауданы Ақсу ауылының өнерпазы Сағынтай Аруназ Канада да өткен сайыста гран-при иегері атанды деген хабар келді, – дейді жас әнші.&nbsp;</blockquote>Үлкен жарыстарда қанша топ жарғанымен ол үшін ауылдағы үйірменің орны бөлек екен. Себебі ең алғаш өнерге баулыған осы үйірмедегі жетекшісі Жанар апай мен музыка пәнінің мұғалімі Гаухар апай алғаш өнер жолындағы тұсауын кескен. Сондай-ақ 3 сыныптан бастап Қызылордадағы Бағдагүл Есмұрзаева деген апайдың жетекшілігімен құрылған «Сыр сандуғаштары» деген топтың мүшесі де болған. Осыған дейін Бағдагүл апайының ұсынысымен Роза Рымбаеваның «Цветы земля» әнін бірнеше рет сахнада орындап, жетістікке жетті. Сондықтан ол үшін әр тәлімгердің өзіндік орны бар. Аруназ Зиятқызы «олардан әлі үйренерім көп» дейді.<blockquote>– Аруназ ең алғаш үйірмеге келген күннен сахнада өзін еркін ұстайтын. Өте алғыр, табиғи дауысы бар, бірде-бір жарыстан жүлдесіз қайтпаған өнерпаз. Ол көбіне «вокал» жанры бойынша байқауларға қатысып, үздіктер қатарынан көрініп жүр. Сондай-ақ патриоттық әндерді де өте жоғары деңгейде орындап, көрермен көзайымына айналған. Аруназ – тек ауылдың ғана емес, ауданымыздың да мақтанышы. Оны алда жарқын болашақ күтіп тұрғанына сенемін, – дейді «Сырлы әуен» үйірмесінің жетекшісі Жанар Құрманғазықызы.&nbsp;</blockquote>Кейіпкеріміздің бүгінде алдына қойған нақты жоспары да жоқ емес. Ақсудағы алтын ұяда 9-шы сынып оқитын жас өрен, биыл Қызылорда қаласындағы Қазанғап атындағы музыка колледжіне оқуға тапсырып, одан әрі Алматы қаласындағы Темірбек Жүргенов атындағы қазақ ұлттық өнер академиясының ән саласында білім алуды көздеп отыр. Себебі ол өнерін өрге жүздіріп, әнші болуды армандайды. Үлкен сахнада топ жарып, өнер адамы болуды мақсат еткен жас әншіге біз де сәттілік тіледік.&nbsp;Ақтоты ЕРЖАНҚЫЗЫ

Өнерлі өрге жүзеді

<a href="https://kyzylorda-news.kz/">Kyzylorda-news.kz</a> &nbsp;2024 жылғы 15-16 қараша күндері Өзбекстан Республикасы, Ташкент қаласында Өзбекстан Республикасы Министрлер Кабинетінің жанындағы Қуғын-сүргін құрбандарын еске алу Мемлекеттік мұражайының ұйымдастыруымен Орталық Азиядағы жәдиттік қозғалыстың көрнекті өкілі, педагог-ағартушы, саяси қайраткер Қоңырқожа Қожықовтың қоғамдық-саяси және ғылыми-педагогикалық шығармашылығына арналған «Орталық Азиядағы жәдитшілік феномені: тұлғалар мен тағдырлар» атты халықаралық ғылыми-тәжірибелік конференция және Самарқанд қаласында саяси қайраткер, заңгер, шығыстанушы Сералы Лапиннің өмірі мен қызметіне арналған ғылыми-танымдық дөңгелек үстел мен зиярат ету рәсімі өткізілді.Ұлтымыздың қатпарлы тарихында Алаштың астанасына Қызылорда атауын алғаш ойлап тапқан ағартушы-ғалым, жерлесіміз Қоңырқожа Қожықовтың және қазақтан шыққан алғашқы шығыстанушы, Сыр өңірінің біртуар перзенті Сералы Лапиннің еңбектері ұшан теңіз.Ұлт қайраткерлерінің мұрасын насихаттау мақсатында ұйымдастырылған халықаралық деңгейдегі тағылымды шараға еліміздің мемлекет және қоғам қайраткерлері, республикаға белгілі университеттердің тарих, филология, шығыстану, мәдениеттану салаларының профессор-ғалымдары, саяси қайраткерлердің туған-туыстары және Сыр елінен Қызылорда облысының қоғамдық даму басқармасының басшысы Р. Каюпов бастаған арнайы делегация қатысты.<blockquote>«Тарихи тұлғаларымыз Қоңырқожа Қожықов және Сералы Лапин қасиетті Сыр өңірінде дүниеге келіп, бүкіл ғұмырын қазақ мемлекеттілігін жаңғыртуға арнаған, қазақ халқының арасында әділдік пен заңдылықты күшейтудің жолында тер төккен қайраткерлер.Ұлт тарихының ақтаңдақ беттерін ашуда аталған халықаралық ғылыми-тәжірибелік конференцияның алатын орны ерекше деп сенемін.Алаштың анасы атанған киелі өңір – Сыр елі халқының және Қызылорда облысының әкімі Нәлібаев Нұрлыбек Машбекұлының атынан тағылымды ұлықтау шараларын ұйымдастырушыларға шынайы алғысымды білдіремін» - деді облыстық қоғамдық даму басқармасының басшысы Руслан Мұхамедәліұлы.</blockquote>Тағылымды шаралар барысында ұлт перзенттерінің тұлғалық бейнесі мен қоғамдық-саяси қызметі туралы тың деректер негізінде мазмұнды баяндамалар жасалып, еңбегі мен шығармашылық мұралары ұлықталды.<img src="https://knadmin.beoblood.kz/uploads/V_Uzbekistane_proshli_meropriyatiya_pamyati_Konyrkozhi_Kozhykova_i_Seraly_Lapina_1_adb8eaeaa5.jpg" alt="В Узбекистане прошли мероприятия памяти Коныркожи Кожыкова и Сералы Лапина 1.jpg">

Өзбекстанда Қоңырқожа Қожықов пен Сералы Лапинді еске алу шаралары өтті 

<a href="https://kyzylorda-news.kz/">Kyzylorda-news.kz</a> Бүгінде облыс бойынша 412 мәдениет, өнер және архив мекемесі жұмыс істейді. Соңғы үш жылда аймақта жаңа 21 нысан салуға қаражат бөлініп, 10 мәдени нысан пайдалануға берілсе, 11-і жыл соңына дейін қолданысқа берілетін болады. Облыстық мәдениет, архивтер және құжаттама басқармасының Өңірлік коммуникациялар қызметіне берген мәліметі бойынша, кейінгі 2 жылда сала бойынша 6 ұжым өз жұмысын бастап, 200-ден аса штат ашылған.&nbsp;Мәселен, 10 жылға жуық уақыт үйірме ретінде жұмыс істеп келген "Жастар театры" өз алдына жеке кәсіби ұжым болса, өнерде жүрген мүгедектігі бар өнерпаздардың шығармашылығын шыңдауға арналған "Инклюзивті театр" жобасы мақұлданып, қазір үйірме ретінде жұмыс істеуде. Сондай-ақ, көрерменге кәсіби әрі жанды дауыста өнер көрсету мақсатында 50 өнерпаздан жасақталған симфония оркестрі де құрылған.Мемлекет басшысының «Адал адам» тұжырымдамасына сәйкес ақпан айынан бастап 171 мәдениет үйі мен клуб 7 бағыт бойынша «Адал адам – мәдени-тәрбие орталығы» жобасын іске асыруда. Бұл жоба ауылдағы мәдениет ошақтарының жұмысын қайта жандандырып, түрлі мәдени-танымдық форматтағы шараларды жүзеге асыруға мүмкіндік берді. Одан бөлек, 1 маусымнан бастап облыстық және аудандық барлық кітапхана жұмысы ұжымдық шарт негізінде сағат түнгі 24.00-ге дейін жұмыс істеу режиміне көшті.Сыр өңірі – еліміздің даму тарихында өзіндік орны бар киелі мекен. Аймақтағы тарихи жәдігерлерге жылдар бойы жүргізілген археологиялық қазба жұмыстарының нәтижесімен «Шірік Рабат сақ жауынгері», «Сығанақ ханшайымы» реконструкциялары және «Түгіскен көсемі» мен «Жетіасар ақсүйек әйелі» мүсіндері жасалып, облыстық музей қорына табысталды. Ерекше айта кету керек, облыстағы мәдениет және руханият саласында атқарылған жұмыстарға Халықаралық Түрксой ұйымының шешімімен Сыр өңіріне түркі дүниесінің «Ең үздік мәдени аймағы» номинациясы берілді.Сонымен қатар, Алаштың анасы атанған өңірдің мәдениетін еліміздің басқа аймақтарына насихаттау мақсатында өткен жылы Астана қаласының 25 жылдығына арналған Қызылорда облысының Өнер күндері ұйымдастырылса, биыл Алматы қаласының туған күніне орай «Сұлу Сырдан – ару Алматыға» атты кеш өтті. Бұл жоба келер жылы да өңірлер арасында жалғасын табатын болады.Фото: Өңірлік коммуникациялар қызметі

Сыр өңірі Түркі дүниесінің «Ең үздік мәдени аймағы»

<a href="https://kyzylorda-news.kz/">Kyzylorda-news.kz</a>&nbsp;Бесік жыры&nbsp;халқымыздың ертеден келе жатқан мәдени мұрасы. Күні бүгінге дейін маңызын жоймаған рухани дүние бүгінде қайта жаңғыртылуда. Жақында өңірде бесік жырын жазушылар арасында «Әлди-ана» байқауы өткен еді. Байқау шартымен бұған дейін еш жерде жарияланбаған бесік жырының нұсқалары іріктелді. Ал ішінен ерекше шыққан үздік деп танылды.&nbsp; &nbsp; Аталған байқауда бесік жырының 15 нұсқасы қаралыпты. Соның ішінен әні мен сөзі, әрлеуі келіскен «Ана әлдиі» туындысы озық шықты. Бұл бесік жырының авторы Талғат Нағашыбаев. Сөзін жазған – Сағынғали Сейітов. Ал оны байқауда жүрекке жеткізе орындаған әнші Аягөз Райбекова болды.&nbsp; &nbsp;Сазгер Талғат Нағашыбаев 1964 жылы Қызылорда облысы, Арал ауданының Қаратерең ауылында дүниеге келген. Мектеп бітіргеннен кейін Қазанғап атындағы музыкалық колледжінің үрмелі аспаптар бөлімінде білім алып, Қорқыт ата атындағы Қызылорда педогогикалық университетінің музыка факультетінде оқыған.<blockquote>– Арал ауданында оқып жүрген кезде әнге құмарттым.&nbsp;Мектепте ән сабағында өлеңді тез жаттап, қайта айтып беретінмін. Бала кезде мынадай қызық болды. Туған күнімде әкем «ал, балам, туған күніңе қандай сыйлық әперейін?», – деп сұрады. Велосипед арманым болып жүрген. Соны әперіңізші, – дедім. Сөйтіп, әкем екеуміз дүкен аралауға шықтық. Бірақ велосипед таба алмадық. Ол кезде велосипедтің таптырмайтын шағы еді. Әкем «енді қандай сыйлық аласың?», – деді. Содан ойлана келе, тағы бір дүкенге келдік. Онда радио, музыкалық аспаптар сатады екен. Бір кезде сырнайға көзім түсті. Соны алып беруін қаладым. Үйге әкеле салып, сабаққа кетіп қалдым. Бірақ ойым сабақта емес, үйдегі аспапта. Содан үйге келісімен қолыма сырнайды алып, тартқым келді. Бір айдың көлемінде үйреніп алғаным есімде, – дейді бала күнгі естелігімен бөліскен кейіпкеріміз.</blockquote>Кейіпкерімізге танымалдық әкелген әнді студент кезде қойын дәптеріне жазып алған екен. Арада біраз уақыт өткен соң ән жазылып, байқауда жеңімпаз болған.<blockquote>– Осы әнмен республикалық байқауға қатысып, бас жүлдені алдық. Негізі әннің сөзін жазған ағамызды өзім танымаймын. Ол кісі 1917 жылы Батыс Қазақстан облысында дүниеге келген екен. Ақын, сыншы, әдебиет зерттеушісі болған.&nbsp;Студент кезімде әкемнің орнына күзетші болатынмын. Сол сәтте мекеме басқа ғимаратқа көшіп, кітаптарын жинастырып жатты. Сол кезде ішінен бірнеше кітапты оқуға алдым. Арасында осы Сағынғали ағамыздың кітабы бар. Соның ішінде «Ана әлдиі» өлеңі ұнаған еді . Бесік жырын өлең дәптеріме жазып қойдым. Реті келгенде бір ән шығарармын деген ой болды. Сөйтіп, арада бір-екі жыл өткенде ән шығардым. Бір мәрте әнші қызға орындаттым. Алайда ол кезде әніміз онша тарала қоймады. Әлі де музыкалық әрлеуді қажет етті. Оның үстіне туындыны жариялайтын бүгінгідей әлеуметтік желі жоқ. Солай бұл ән ұмытылып кетті. Жақында «Анаға тағзым» орталығы байқау жариялады. Сол кезде осы әннің қайта жарыққа шығу сәті келді. Содан әнді қайтадан өңдеп шығардым. Шыны керек, «Ана әлдиі» бесік жырының жұлдызды сәті енді туғандай әсерде болып жүрмін. Негізі қазақтың үйі баласымен бай-дәулетті келеді. Сондықтан бөбегі бар әр үйде бесік жыры айтылса керемет емес пе… Бұрындары бесік жырын көбіне әжелеріміз айтып отыратын. Сондай әдемі сәттің талай куәсі болдық, – дейді кейіпкеріміз.</blockquote>Сазгер өнерде елімізге белгілі сазгерлерді үлгі тұтатынын айтады. оның ішінде Қазақстанның халық әртісі, өнер қайраткерлері бар.<blockquote>– Ең алдымен Шәмші Қалдаяқов ағамыздың аты есіме түседі. Әсет Бейсеуов, Ескендір Хасанғалиев, Ілия Жақанов ағаларымызды үлгі тұтамын.&nbsp;Осындай майталмандардың әндерін тыңдап өскенмін. Әлі де жақсы көремін. Осы жақында ғана Ілия Жақанов ағамызбен әлеуметтік желі арқылы танысып, жақсы араласып кеттік. Әндеріме жоғары бағасын беріп, көңілім көтеріліп, төбем көкке жеткендей болды. Міне, осы кісілерді мен өнер жолында ұстаз көремін. Қарап отырсам, өнер жолында келе жатқаныма қырық жылдай уақыт болды.&nbsp;Соның ішінде екі жүзден аса ән шығарыппын. Алғашқы әнім «Анашым», «Ана әлдиі» әндерінен бастап тыңдаушылардың жүрегінен орын алды. Қазір балаларға және балабақша бүлдіршіндеріне арнап жазған әндерім баршылық.&nbsp;1993 жылы Алматы қаласы «Өнер» баспасынан шыққан «Сұлуым-ай, сұлуым» атты кітабына ақын Рза Қунақованың өлеңіне жазылған «Сағынбасаң» әнім енді. 2018 жылы республикалық «Зерек ботақан» балалар журналына «Сарбаздар», «Біз бақытты балдырған», «Балдәурен», «Астана» әндерім жарыққа шықты және дискіге басылып, республика бойынша мектептерге және балабақшаларға таратылды. 1993 жылы Алматыда «Тамаша» әзіл-сықақ отауында белгілі эстрада жұлдызы әнші Болат Құсайыновтың орындауында «Жүрегім саған», «Сәулешім» әндерім орындалды. Талай әншілер «Таңшолпан», «Әнші балапан», «Жас қанат» конкурсында әндерімді орындап жүр. Әндерім облысымыздың белгілі әншілері Қазақстанға еңбек сіңірген әнші К.Қалымбетова, Қазақстанның мәдениет қайраткері Ү.Медеуова, Эстонияда өткен 8-ші халықаралық балалар шығармашылығы фестивалінің бас жүлдегері – А.Ыбраева, «Азия дауысы» конкурсының лауреаты Г.Оразымбетова және Ш.Қалдаяқов атындағы ән конкурсының лауреаты С.Аққұлованың репертуарында орындалды. Сонымен қатар 2004 жылы М.Мәметова атындағы Қызылорда гуманитарлық колледжінің әнұранының әнін жаздым.&nbsp;Жалпы ән шығару оңай емес. Үлкен еңбекті қажет етеді. Құдай бізге осындай қабілетті берген соң оны дұрыс, ұтымды пайдалана білуіміз керек. Жасым алпыстан асса да әлі күнге дейін ізденіс үстіндемін. Себебі шығармашылық жолда ізденіс қажет. Қанша жетістікке жетсем де, енді ғана ән шығарып келе жатқан, қатарға жаңадан қосылған сазгер секілді еңбектенемін. Өйткені өмірде де, өнерде де «толдым, болдым» деген адам өспейді. Қайта кері кетеді. Қазақта «ағысын тоқтатқан өзен суы бұзылады» деген сөз бар ғой. Сол сияқты өнер де кіршіксіз тазалықты сүйеді, ізденесті жақсы көреді, – дейді сазгер.</blockquote>Кейіпкеріміз қазір балалар әніне басымдық беріп келеді.балаларға арналған әндер жазуды қолға алыпты.<blockquote>– Негізі бастапқыда шығарған әндерімнің ішінде балаларға арналғаны аздау екенін байқадым.&nbsp;Ал қазір балаларға ән шығарып жүрмін. Кішкентайларға ән шығару да оңай емес. Осы кезде «Ән шуақ» атты фестиваль өтуде. Жалпы әндерім мектептер мен балабақшаларда орындалып жүр. Оған қоса әлеуметтік желі арқылы да таралып жатқан жайы бар. Онда да қаралым жақсы, өз тыңдарманын тауып, көптің көңілінен шығуда. Жалпы бір көңіл қуантарлығы, әндерім республикаға таралуда. Бұл мен үшін бір жетістік. Енді алдағы уақытта осының есебін беріп алпыс жылдықтың құрметіне арнайы кеш өткізу де ойда бар. Жақында өнер мектебінен ұсыныс түсті. Балаларға арналған әндеріме авторлық кеш өткізгісі келеді екен. Қуанып қалдым. Сонымен бірге мектептер мен балабақшаларда конкурс өткізгім келеді, – дейді сазгер бізбен әңгімесінде.</blockquote>

Қызылордалық сазгердің бесік жыры үздік деп танылды

<a href="https://kyzylorda-news.kz/">Kyzylorda-news.kz</a> Премьер-министр Олжас Бектенов Қызылорда облысына жұмыс сапары кезінде «Бесарық» ауылының тыныс-тіршілігімен танысты.Облыс әкімінің орынбасары Шахмардан Байманов Президент бастамасымен жастарды отаншылдық, адамгершілік рухында тәрбиелеуге бағытталған «Адал адам» тұжырымдамасының іске асырылу барысын баяндады.«Мемлекет басшысының «Адал азамат» Тұжырымдамасына, облыс әкімінің тапсырмасына сәйкес елді мекендердегі халықтың мәдениет нысандарына қолжетімділігін арттыру мақсатында «Адал адам – мәдени-тәрбие беру орталығы» жобасы әзірленді.Жоба ақпан айынан бастап 171 мәдениет үйі мен клубтарда іске асырылуда.Әрбір мәдениет үйі мен клуб ғимаратының сыртқы фасадына «Адал адам мәдени-тәрбие орталығы» атауы ілінді.Мәдениет ошақтары 7 бағыт бойынша жұмыс жоспарын қайта әзірлеп, тоқсан сайынғы іс-шаралар жоспарын бекіттік.Апта сайын тәрбиелік мәні бар шаралар өтуде. Атап айтсақ, "Кино-тайм" бағыты аясында тәрбиелік мәні бар ұлттық фильмдер көрсетіледі. «Сұхбат time» бағытында елге сыйлы спикерлермен, үлгілі отбасылармен, еңбек адамдарымен сұхбаттар ұйымдастылады. «Әлем-BOOK» бағытында оқырмандар клубы құрылған, балаларға қызықты кітаптар таныстырылып, көркем әдебиеттегі қызықты шығармалар негізінде қойылымдар сахналанады. «ART уақыт» жобасы аясында балалардың шығармашылық үйірмелерге қызығушылығын арттырып, үйірмелердегі жанр түрін көбейтіп, музыкалық аспаптармен қамтылады. "Креативті хаб" жобасы аясында әр ауылдың ерекшелігіне қарай қолөнер шеберлерінің бұйымдарынан және әулеттің құнды жәдігерлері мен коллекцияларынан көрме-жәрмеңкелер ұйымдастырылады. «Жанұя шуағы» бұрышын ашу арқылы отбасылық рәсімдер өткізіледі. Еріктілер тобындағы жасөспірімдер мен жастарды еңбекке баулу, қайырымдылық істерге бейімдеу мақсатында маусымдық жұмыстарға тартылуда.<blockquote>"Бесарық" ауылында демеушілік қолдау есебінен осы жылы 150 адамға арналған Мәдениет үйі күрделі жөндеуден өтті. Мұнда балалар үйірмелері ашылып, музыкалық- шығармашылық ұжым құрылды. Сонымен қатар «Адал адам» мәдени орталығында подкаст-студия ашылған. Онда тікелей эфирде ауыл бизнесін дамытудың өзекті мәселелері талқыланады, көрермендерге жергілікті цехтарда өндірілген өнімдер таныстырылады», - деді Ш. Байманов.</blockquote>Еске салайық, биыл Сыр өңірінде «Руханият жылы» жарияланды. Барлық 7 ауданда ішінде неке қию залы, кітапхана, музей, архив, жастар сарайы, ардагерлер мен аналар үйі бар «Руханият» орталықтарының құрылысы басталды.Фото: gurk.kz.jpg

 Үкімет басшысы «Адал адам» тұжырымдамасы аясындағы жұмыстарды көрді

<a href="https://kyzylorda-news.kz/">Kyzylorda-news.kz</a> Сыбайлас жемқорлыққа қарсы қызметтің Қызылорда облысы бойынша департаменті, облыстық акімдік және Қорқыт ата атындағы Қызылорда университеті бірлесіп,&nbsp;«Сыбайлас жемқорлыққа қарсы мәдениет: құндылықтар мен этикалық қағидаттар» атты республикалық&nbsp;ғылыми-практикалық конференция өткізді.Конференцияға Департамент басшысы Қ.Ахметқалиев, Қызылорда облысы әкімінің бірінші орынбасары Д.Жаналинов, аумақтық кәсіподақтар бірлестігінің төрағасы М.Нәлібаев, Қорқыт Ата университеті ректорының кеңесшісі Басығараев Нұрмантай Асқарұлы,&nbsp;ISO 37001 Сыбайлас жемқорлықа қарсы басқару жүйесінің Жетекші аудиторы Б.Ниязов, сонымен қатар мемлекеттік және құқық қорғау органдарының басшылығы қатысты.Конференцияның мақсаты&nbsp;қоғам арасында сыбайлас жемқорлыққа қарсы мәдениетті, оның кез келген көрінісіне төзбеушілікті қалыптастыру, сыбайлас жемқорлыққа қарсы білім беру және тәрбиелеу жөніндегі қызметті жандандыру.<blockquote>«Сыбайлас жемқорлық – кез келген қоғамның дамуына кедергі келтіретін қауіпті құбылыс. Ол елдің экономикалық өсімін тежейді, әлеуметтік теңсіздік тудырады және халықтың мемлекетке деген сенімін әлсіретеді.Әрқайсымыз&nbsp;бұл індеттің көріністерінен азат қоғам құруға өз үлесімізді қосуға ат салысуымыз керек»,- деді Департамент басшысы Қуаныш Жұмағалиұлы конференцияның ашылуында.</blockquote>Облыс әкімінің бірінші орынбасары Данияр Еренғалиұлы&nbsp;құттықтау сөзінде «Әрбір азамат елінің патриоты болып, сыбайлас жемқорлықпен күресу қажет екенін» айтап өтті.Конференция барысында Х.Досмұхамедов атындағы Атырау &nbsp;университетінің &nbsp;профессоры, заң ғылымдарының кандидаты Ж.Шаяхметова «Сыбайлас жемқорлыққа қарсы мәдениетті қалыптастыру тетіктері» жөнінде айтып өтсе, Жетісу университетінің профессоры, PhD докторы Б.Айтимов &nbsp;«Жоғарғы оқу орындарында комплаенс қызметін енгізудің практикалық мәселелері» туралы баяндады.Іс-шара соңында қоғамға сыбайлас жемқорлыққа қарсы мәдениетті қалыптастыру жұмысына белсене атсалысқан бірқатар тұлғалар Департамент басшысының «Алғыс хаттарымен» марапатталды.<img src="https://knadmin.beoblood.kz/uploads/korkyt_15a8111188.jpeg" alt="коркыт.jpeg"><img src="https://knadmin.beoblood.kz/uploads/korkyt_2_a2d436b361.jpeg" alt="коркыт 2.jpeg">

Қызылордада республикалық ғылыми-практикалық конференция өтті

Аралдағы ағартушылық қашан басталды?

<a href="https://kyzylorda-news.kz/">Kyzylorda-news.kz</a> Жас ұрпақтың бойында ұлттық сананы қалыптастырып, тарих тармағын танытып, ата-баба мұрасынан сыр шерту жолында музейдің орны бөлек. Өткенге құрметпен қарап, бүгінімізді қадірлесек қана болашақ жарқын болмақ. &nbsp;Қазіргі кезде музейлердің алдында ескі мәдени мұраны сақтау және мәнді құндылықтарды замандастар үшін көрсету, насихаттау мәселелері тұр. Мәдени құнды көне заттарды көрсету, жалпы адамзаттық мәнін ашу арқылы музейге келушілердің адамгершілік, рухани өсуіне әсер ету де басты мақсаты. Бүгінгі кейіпкеріміздің үйі де ХХ ғасырдан бастап тұтас дәуірді көз алдыңа әкелетін музейге айналған.&nbsp;Нұржан Іздібаев 1992 жылы Тоқабай елді мекенінде туып-өскен. Жастайынан ата-әжесінің тәрбиесінде болған ол өзінің бұл қызығушылығы туралы кеңінен сыр шертіп:<blockquote>– Өзім кішкентай кезімнен ата-әжемнің ескі заттарына қызығатынмын. Көненің адамдары қолданған бұйымдарына өте ұқыпты болады ғой. Мен де сол кісілерден көріп ойыншықтарымды, кітаптарды, естелік сыйлықтарды сақтап жүретінмін. Кейін келе заттар көбейді. Оларды лақтыруға қимадым. Осылайша ескі үйдің бір бөлмесіне жинап бастадым, – дейді.&nbsp;</blockquote>Қазір қаладағы мұражай-үйде 800-ге жуық өткен дәуірдің естелігі бар. Олардың басым көпшілігі өткен жылдың сәуір айынан бастап жинақталған.<blockquote>– &nbsp;Негізі үйімнің бөлмесі мұражайға айналады деп ойламаған едім. Дегенмен жақындарым бұл қызығушылығымды білетін. Көбіне үйге келген қонақтар, жолдастарым оларды көріп, жастық шағына саяхат жасап, «ностальгия» алатын. Сөйтіп уақыт өте келе құнды, бағалы деген дүниені сыйлық ретінде ала бастадым. Әлеуметтік желіден көріп, арнайылап өзінің қолданған бұйымын салып жіберуші жандар да табылды. Кейбір көңілім кете қалаған дүниені сатып аламын. Осылайша бір жарым жылдың көлемінде бір бөлме толарлықтай зат жиналды. Олардың ішінде ескі рубльдер, қағаз ақшалардан бастап телефон-теледидарлар, кітап-журналдар, магнитофондар мен кассеталар, ойын түрлері және тіпті ата-әжем қолданған кебеже-сандығы, иінағаш, шапан мен бөрік сақталып тұр. Жалпы бөлмедегі заттарды арнайылап санатқа бөлмей, өзіме ыстық көрінгенін жинақтаймын, – дейді Нұржан Іздібаев.</blockquote>Ескінің көзіне лық толы бөлмеге кіргенде, расымен де, өзге әлемге түсіп кеткендей боласың. Мұнда сонау 1915 жылы шыққан рубльден бастап, осыдан бірнеше жыл бұрын қоғамда кеңінен пайдаланылған техникалар бар. Рубльді көзбен көріп, қолға ұстағанда фильмдегідей ескі көпестің сауда жасағаны еске түскені рас. Коллекционердің айтуынша, мен олай елестеткен алғашқы жан емес екенмін. Ал Нұржан мырзаның өзіне ең құнды дүние атасы тіккен қараша үйдің уығы мен әжесінің кебежесі болса, материалдық тұрғыда ең қымбат зат 1950 жылы пайдаланылған шахта телефоны екен.<blockquote>– &nbsp;Қазір бір-бірінен естіп, арнайылап келуші қонақтар саны артып келеді. Әлеуметтік желі арқылы да қызығушылық танытатын жандар жетерлік. Алдағы уақытта арнайы мекемелерден рұқсат алып, кеңейту жұмыстарын қолға алғым келеді. Оны әзірге уақыт еншісіне қойып отырмын, – деді ол сөз соңында.</blockquote>Нұржан Іздібаевтың рухани азық орнына айналған үйі – көпшіліктің көз қуанышы. Балалық балғын шағына саяхаттағысы келген немесе ата, аға буын өкілдерінің тұтынған заттарына қызыға қарайтын жандарға мол мүмкіндік сыйлап жүрген жер болашақта үлкен музейге айналатыны сөзсіз. Гүлмарал САҚТАПОВА

Үй-музей ашқан азамат

<a href="https://kyzylorda-news.kz/">Kyzylorda-news.kz</a> Тәуелсіздік жылдарында өсіп-өркендеудің өнегелі жолына түскен ауылдардың арасында Қызылорда қаласына қарасты Талсуат ауылдық округі де бар.Тоғыз жолдың торабында қоныс тепкен Қызылорда қаласына қарасты Талсуат ауылдық округі өзге ауылдар секілді өркениетке көш бастаған елдімекеннің бірі. Түтіні түзу, бірлігі жарасқан бұл ауылдың тыныс-тіршілігі қалыпты.Қала іргесіндегі «Талсуат» ауылдық клуб үйінің жұмысы жанданып келеді. Ұлт руханиятының, мәдениеттің шырағын жаққан мекеменің істері ауқымды.Бұрын ауылдардағы клуб үйі шағын, ескі ғимаратта орналасты. Концерт, кино көруге болатын. Күнделікті бас сұғатын адам жоқтың қасы еді. Кейде аудан орталығынан &nbsp;келген өнерпаздар концерт қойып кететін. Қазір жағдай өзгерген. Келушілер қатары артқан. Қайнаған тіршілік. Бірі кітапханаға, енді бірі үйірмеге, дайындық жұмыстарына келеді. Адам қарасы үзілмейді. Бюджет қаржысына мәдениет үйлері жаңғыртылып, кітапхана, қолөнер, отбасы бұрыштары жасақталды. Кейбірінде дыбыс жазу студиялары ашылған. Ауыл балаларының уақытын тиімді ұйымдастыру мақсатында үйірмелер жұмыс істейді. Текемет басу, тоқыма тоқу, ұршық иіру сынды &nbsp;ата-бабадан келе жатқан қолөнерді сақтап қалу үшін жұмыс атқарылуда. Нәтижелі істердің арқасында дарынды өнерпаздар байқауларда топ жарып, ауыл мерейін үстем етуде.Осы орайда «Талсуат» ауылдық клуб үйінің жеткен жетістіктері аз емес. Бұл жайында клуб үйінің директоры Айнагүл Жайдариева кеңінен айтып берді.<blockquote>– «Адал адам» мәдени-тәрбие беру орталығы жобасы мәдениет үйлері мен клубтардың жанынан ашылған. Жобаның мақсаты – елді мекендердегі халықтың мәдениет нысандарына қолжетімділігін арттыру, балалар мен жасөспірімдердің бос уақытында шығармашылықпен айналысуына &nbsp;мүмкіндік беру. Жобада «Кино time», «Әлем BOOK», «ART уақыт», «Отбасы шуағы», «Еріктілер тобы», «Сыр сұхбат», «Креативті хабар» және арнайы мамандардың қатысуымен медиация, кеңес беру бағыттары қарастырылған. Осы бағыттар бойынша жүйелі жұмыстар атқарылып жатыр. Талант та, дарын да ауылдан шығады. Өнерлі жастар өсіп келеді. Біз де өз кезегімізде осындай дарынды балалардың шығармашылығын шыңдау мақсатында аянбай еңбек етудеміз. Нәтижесі жаман емес. Жетістікке жеткен өнерпаздар көп, –деді клуб директоры.</blockquote>Жыл басынан бері «Адал адам» мәдени-тәрбие орталығы тұжырымдамасының 7 бағыты бойынша 83 іс-шара ұйымдастырылған. «АРТ уақыт» клубы бағыты бойынша 2 шығармашылық &nbsp;үйірме қосылды. Олар – «Ақкербез» би үйірмесі және «Алақай» балалар қуыршақ театры. Құрамына талантты жастар шоғырланған. Күләш Жанахметованың жетекшілігімен құрылған театр «Жеті лақ» ертегі-қойылымының премьерасын қойып, көпшілік көңілінен шықты. Қазір «Ит пен мысық» ертегісіне дайындық үстінде.<blockquote>– Клубта 6 үйірме жұмыс істейді. Оның ішінде «Жас дәурен» ән, «Әсем әуен» дәстүрлі ән, «Ақкербез» би, «Ана тілі – жүрек үні» көркемсөз оқу шеберлері, «Ісмер» қолөнер, «Ақ әже» әжелер ансамблі, «Талсуат еріктілері» еріктілер тобы бар. Үйірмеге қатысушылар – ауыл өнерпаздары. Олар мәдени іс-шараларға белсене қатысып келеді. Мәселен, «Жас дәурен» ән үйірмесінің өнерпаздары ХVІ республикалық «Tanm art» өнер байқауына қатысып, жас әнші Жәнібек Жақия бас жүлдені, Жайсаң Рамазан І орынды жеңіп алды. Республикалық «Жарқын болашақ» ғылыми-әдістемелік орталығының ұйымдастыруымен өткен VІІ республикалық «Жарқын жұлдыз» балалар өнер байқауында Жайсаң Рамазан ІІ орынды, «Айғаным» шығармашылық орталығының ұйымдастыруымен өткен І республикалық «Starmen» өнер байқауында Шынболат Жәнібеков І орын иегері атанды. Ал «Әсем әуен» дәстүрлі ән үйірмесінің өнерпаздары ХVІ республикалық «Tanm art» өнер байқауында бас жүлдені еншіледі. Сондай-ақ клубтың жас өнерпазы Аружан Болат пен Гүлназ Еділбаева XXVI облыстық «Бозторғай» конкурсына қатысып, дипломант атанды. «Ақкербез» би үйірмесі республикалық «Жұлдызды сәт» байқауына &nbsp;қатысып, олжалы оралды. Балалардың бәрі де дарынды. Олар клубта күнделікті дайындық жұмысын жүргізеді. Әлі де талай додаларда топ жаратынына сенім мол, – дейді А.Жайдариева.</blockquote>Клуб ішіндегі орталықтардың да жұмысы жүйеленген. «Креатив HUB» орталығы ай сайын жергілікті қолөнер иелерімен кездесу, мастер-кластар, жәрмеңкелер ұйымдастырады. Тоқымашы, қолөнерші, кәсіби тігінші, мүсінші, шеберлермен бірге мастер кластарға жастар қатысып, шеберлік сағаты жүргізіледі. «Жанұя шуағы» бұрышында тәрбиелік мәні бар «Келінге кеңес», «Әке – жауапты лауазым», «Зорлық-зомбылыққа жол жоқ», «Шаңырақ күні» сынды мәдени шара, дөңгелек үстелдер ұйымдастырылып, өнегелі құндылықтарды жаңғыртуға үлес қосып келеді. «СұхбатTIME» фото-видео подкаст бұрышында &nbsp;ауылға сыйлы еңбек адамдарымен &nbsp;сұхбат &nbsp;жүргізеді.&nbsp;Сондай-ақ, клуб жанынан тазалық, қайырымдылық жұмыстарына жұмылатын «Талсуат еріктілері» клубы құрылып, еңбек жасағына 10 адам тартылған. Еріктілер тобының қатысуымен тазалық шаралары, қайырымдылық акциялары ұйымдастырылуда. Ал «КиноTIME» &nbsp;көрерменге жас ерекшеліктеріне байланысты &nbsp;кино фильм және &nbsp;мульттоптама ұсынады. «Әлем BOOK» жобасы аясында ауылдық клубта оқырмандар клубы және ақын Ақжол Түменбайдың жетекшілігімен жұмыс жасайтын «Рух» жас қаламгерлер клубы құрылған. Бүгінге дейін жастар арасында «Жырлайды жүрек», «Абай даналығы жас ұрпаққа», «Сөнбес сәуле» және тағы да басқа қазақ жазушыларының шығармашылығына арналған әдеби-сазды кеш өткізіліп, саясаткер, өлкетанушы Сағат Жүсіптің «Талсуат» атты кітабының тұсауы кесілген. «Әлем book» атанған руханият ордасында 10 983 кітап қоры бар. Оның 7411-і &nbsp; қазақ тілінде.«Талсуат» ауылдық округі әкімі аппаратының қолдауымен ауыл мәдениеті мен өнерін дамыту, клубтардың жұмысын уақыт талабына сай түрлендіру, үйірме жұмысын жүйелі ету мақсатында «Жүйелі жұмыс – нәтижелі жетістік» атты қалалық мәдениет қызметкерлерінің тәжірибе алмасу семинары өтті. Клуб жұмысының озық тәжірибедегі жаңа бағыттарын игеру, мамандардың біліктілігін жоғарылату мақсатында &nbsp;тиімді шаралар &nbsp;атқарылуда.Халықаралық, республикалық, облыстық және қалалық байқаулардан ауыл өнерпаздары олжалы оралуда. Мәселен, жақында Қазақстанның еңбек сіңірген артисі Мәдина Ералиеваның 70 жылдығына арналған «Қазақтың Ақбаяны» атты облыстық және Республика күніне арналған «Қазақстан – туған елім, туған өлкем» атты қалалық патриоттық ән байқауына қатысқан Әйгерім Шүкірова 1-орынды жеңіп алды. Ал VIII &nbsp;Халықаралық балалар, жасөспірімдер және жастардың &nbsp;«Music art Festival» байқауынан «Әсем әуен» домбырамен ән айту үйірмесі 1-орын иемденді. Қызылорда қаласында өткен республикалық «Жұлдызды сәт» балалар байқауына қатысқан би үйірмелері топ жарып, Дубайға жолдама жеңіп алды. Бұл бағыттағы нәтижелі жұмыстар өз ретімен жалғаса бермек.Клуб үйінің директоры Айнагүл Жайдариеваның айтуынша алда әлі атқарылар іс көп. Соның бірі – этноауыл жобасы. Онда түрлі ұлт өкілдерінің мәдениеті мен дәстүрі дәріптеледі. Жоба тиісті мекемелерге ұсынылған. Қолдау тапса жарқын бастаманың бірі болары сөзсіз.&nbsp;

Мәдениеттің шырағын жаққан мекеменің істері ауқымды

<a href="https://kyzylorda-news.kz/">Kyzylorda-news.kz</a> Жанқожа батыр Нұрмұхамедұлының 250 жылдығына орай республикалық әдеби-мәдени, тарихи-танымдық «Әлімсақ» журналы мен Ә.Тәжібаев атындағы облыстық әмбебап кітапханасының ұйымдастыруымен Жанқожаның жеңімпаздық жолын жыр жолымен өрнектеу, елі мен жерін қорғауда ерен ерлік үлгісін көрсеткен батыр баба есімін насихаттау, жас ұрпақты отансүйгіштікке елжандылыққа тәрбиелеу мақсатында «Елдіктің туын желбіреткен қаһарман» атты жыр мүшәйрасы өтті.Жыр додасы алдында жанқожатанушы ғалым, филология ғылымдарының кандидаты Нұрлан Нұрмахановтың «Тарихи өлең-жырлар мен дастандардағы Жанқожа батыр тұлғасы» атты монографиясының таныстырылымы болды.Жанқожа – қазақтың тәуелсіздігі жолында күрескен батыры, ХІХ ғасырдың қаһарманы, Хиуа мен Қоқан хандықтарына, отаршыл Ресей империясына қарсы шыққан ұлттық-азаттық көтерілістің басшысы, 17 жасында батыр атанып, сексеннен асқанша қолынан қаруы түспей, ел тәуелсіздігі жолында күресіп өткен халық қаһарманы. Халқының бостандығы жолында бес қаруын асынып, қол бастап, жауымен текетіресіп, елінің тентіреп кетуінен сақтады. Жанқожа батыр сол ұрыстардың барлығына да қолбасшы әрі ұйымдастырушы ретінде қатысып, теңдессіз ерлік, көзсіз батырлық көрсеткен. Сонысымен, жанына ерген жауынгерлеріне үлгі болды, халқына қайрат, елім деген ерге ерік-жігер берген.Елдік дәстүрді, отаншылдық қасиетті, тарихи тұлғаларды насихаттауды, Жанқожаның болмысын, батырлығын жастарға үлгі етуді, есімін ұлықтауды мақсат тұтқан облыстық жыр мүшәйрасына бірінші кезеңнен іріктеліп келген 9 ақын батыр рухына арналған өлеңдерін оқыды. Жыр додасына ақын, Қазақстан Жазушылар одағының Қызылорда облысы бойынша өкілі Қаршыға Есімсейітова, ақын, бірнеше тарихи дастандар мен толғаулардың авторы Оңталап Базаралы және филология ғылымдарының кандидаты, жанқожатанушы ғалым Нұрлан Нұрмаханов қазылық етті. Тақырыптың терең ашылуын, өлеңнің ұйқасы және көркемдігіне және көрерменге жеткізе білуін назарға ұстаған қазылар алқасы жеңімпазарды анықтады. Бұл мүшәйраның ерекшелігі, додаға түскен ақындар жүлдесіз қайтқан жоқ. Жүлделі орындармен қатар Жанқожа батырдың үзеңкілес серіктері Мұсабай жырау, Төремұрат жырау, Бекмырза хан, Қызылбас палуан, Ақтан батыр, Дабыл батыр атындағы арнайы жүлделер батыр ұрпақтары атынан тағайындалды.Жыр мүшәйрасын елімізге белгілі жыршылар Марат Сүгірбаев пен Бексұлтан Орынбасаров отты жырмен, әуезді әнмен әрледі.Көрермендер «Баба ерлігі – ұрпаққа өнеге» атты кітап көрмесін тамашалады.Жыр додасында ІІІ орынға Нұркелді Өтепберген, ІІ орынға Бексұлтан Санақұл, жүлделі І орынға Айдар Сайлауов иеленді.<img src="https://knadmin.beoblood.kz/uploads/6305a615_ed38_45a4_85d7_003056b39d28_3081c62c29.jpg" alt="6305a615-ed38-45a4-85d7-003056b39d28.jpg"><img src="https://knadmin.beoblood.kz/uploads/1_a0f5a22eba.JPG" alt="1.JPG"><img src="https://knadmin.beoblood.kz/uploads/4_932074cdee.jpg" alt="4.jpg"><img src="https://knadmin.beoblood.kz/uploads/5_62c2ac2a4b.jpg" alt="5.jpg">Фото: Нұрболат НҰРЖАУБАЙ

Қазақстан және Қызылорда облысының жаңалықтары: Мәдениет