<a href="https://kyzylorda-news.kz/date/2020/08/13/">Kyzylorda-news.kz.</a> «Ұлттық аударма бюросы» қоғамдық қорының атқарушы директоры Рауан Кенжеханұлы «Рухани жаңғыру» бағдарламасы аясында қазақ тіліне аударылған 30 кітапты таныстырды, деп хабарлайды <a href="https://lenta.inform.kz/kz/ruhani-zhangyru-kazak-tiline-audarylgan-30-zhana-okulyk-tanystyryldy_a3683031">ҚазАқпарат</a>.
Кітаптар «Рухани жаңғыру» бағдарламасының «Жаңа гуманитарлық білім. Қазақ тіліндегі 100 жаңа оқулық» жобасы шеңберінде жарық көрді.
<blockquote>
 «2017 жылдан бері жалпы саны 77 оқулық аударылып, оқу орындарына таратылды. Оқулықтардың әрқайсысы 10 мың данамен басылып, Қазақстандағы 132 жоғары оқу орнының кітапхана қорларына жеткізілді. ЖОО кітап қорларында жалпы ереже бойынша екі студентке бір оқулық болуы тиіс деген талап бар. Соны толық орындау үшін қазіргі басылып отырған таралым 25 есе көбеюі керек. Бірақ, қазіргі бар технологияларды қолдана отырып, электронды нұсқаларына да рұқсат алдық. Сондықтан бұл кітаптардың қағазға басылған нұсқаларынан бөлек, электронды нұсқалары да Қазақстанның ашық университеті порталына тегін орналастырылған. Қазіргі таңда осы 77 оқулықтың барлығының электронды нұсқалары және осы кітаптардың негізінде құрастырылған онлайн-курстар, видеодәрістер барлық қазақстандық қолданушыларға тегін», – деді Рауан Кенжеханұлы Орталық коммуникациялар қызметіндегі баспасөз мәслихаты барысында.
</blockquote>
Осы ретте, ол биыл қазақ тілінде жарық көрген 30 жаңа оқулық кинотану, театртану, өнер, этика, эстетика, медиа, тарих, микро және макроэкономика мен бизнес, жеке қаражат, саясаттану, сондай-ақ азаматтық іс-жүргізу құқығы мен интеллектуалдық меншік құқығы, педагогика және статистика секілді салаларды қамтитындығын айтты.
Атап айтсақ, француз философы Жил Делөздің «Кино 1. Қозғалыс-бейне» және «Кино 2. Уақыт-бейне» атты екі томдық, киноны философиялық шығарма тұрғысынан таныстыратын классикалық туындысы тұңғыш рет қазақ тілінде жарық көрді. Сондай-ақ, жаңадан аударылған оқулықтардың ішінде кино мен телевизия мамандары үшін аса құнды болар «Киносценарий. Сценарий жазу негіздері» деп аталатын оқу құралы бар. Классикалық негіздегі бұл оқу құралы концептіден дайын сценарий шығаруға дейінгі сатылы нұсқаулық ұсынады. Оқулық 30 рет қайта басылып, әлемнің 20-дан аса тіліне аударылған. Ал кино өнерінің белгілі теоретигі Семен Фрейлихтің «Кино теориясы: Эйзенштейннен Тарковскийге дейін» еңбегінің зерттеу аясы аса ауқымды. Ол классикалық кинодан бастап, заманауи кино теориясына дейінгі негізгі ұғымдарды толық қамтып, сала туралы жан-жақты түсінік қалыптастырады. Тағы бір ерекше атап өту керек оқулықтардың бірі – Д.Бордуэлл бастаған авторлардың қырық жылдық ізденісінен туған «Кино өнеріне кіріспе» туындысы. Сондай-ақ, Томас Эльзессер мен Мальте Хагенердің «Кино теориясы. Сезім тұрғысынан кіріспе» деп аталатын еңбегі кино табиғатын көрермен мен экран арасындағы байланыстың түрлі ерекшеліктері арқылы зерттейді.
Музыкатану бағытында Кембридж университетінің баспасы дайындаған «Музыка тарихы» деп аталатын екі томдық жинақ қайта өрлеу кезеңінен постмодернге дейінгі музыка тарихын жан-жақты қарастырып, түрлі халықтардың музыка тарихынан хабар береді. Ал кейінгі жылдары жеке гуманитарлық пәнге айналған Кристофер Балмның «Театртану» оқулығы театр өнерін түрлі мәдени және тарихи астар арқылы түсіндіруге арналады. Театрдың аса күрделі табиғаты мен оны түрлі көзқараста зерттеу мүмкіндігін көрсетуге ден қойылған.
Белгілі ғалым, жазушы, ұзақ жылдар Ресей ғылым академиясы Әлем әдебиеті институтының теория бөлімін меңгерген Юрий Боревтің «Эстетика» еңбегі заманауи эстетиканың негізгі мәселелерін жан-жақты талдайды.
Медиаға арналған мәтін жазу қағидаларымен таныстыратын «Телевизия, радио және жаңа медиаға мәтін жазу» оқулығы да алғаш рет қазақ тіліне аударылды. Бұл еңбек оқырманға телевизия, радиомен қоса, онлайн медиаға мәтін жазудың өзіндік тәртібі мен ережелерін қарапайым әрі жүйелі түрде түсіндіреді.
Тарихи білім саласы бойынша бірқатар үздік еңбектер қамтылды. Тарихи білімнің кәсібилену процесін кешенді түрде зерттеген «Тарих білімінің тарихы», тарихи-антропологиялық бағыттағы ізденістерді топтастырған «Тарихи антропология», әлемнің этностық бет-бейнесімен таныстыратын «Тарихи этнология» оқулықтары жарық көрді.
Заң және құқықтану салаларын қамтитын бірқатар маңызды оқу құралдары да бар. Танымал ағылшын заңгері, құқықтанушы Нил Эндрюстің 2 томнан тұратын «Азаматтық іс-жүргізу: Сот өндірісі», «Азаматтық іс-жүргізу: Медиация және арбитраж» оқу құралдары, ағылшын келісімшарт құқығы тақырыбына арналған «Келісімшарт ережелері» атты оқулығы азаматтық іс жүргізу, медиация, арбитраж, ағылшын келісімшарт құқығы туралы жан-жақты ақпарат береді. Оксфорд университеті баспасынан шыққан 3 томдық «Интеллектуалдық меншік құқығы» оқу құралы авторлық құқық, патент, тауар белгісі тақырыптарына шолу жасайды. Бұл – зияткерлік меншікті қорғау тәртібі мен қазіргі халықаралық тәжірибеге арналған қазақ тіліндегі тұңғыш кешенді оқу құралы.
Этика саласы бойынша курс оқып жүрген студенттерге, сондай-ақ, жаһандық мәселелердің этикалық негізін танып-білуге қызыққан оқырманға арналған «Этика теориясы мен қазіргі мәселелері» оқулығының 9-басылымы, танымал философ ғалым Джонатан Уолфтың «Саясат философиясына кіріспе», Оксфорд баспасынан шыққан «Әлемдік саясаттың жаһандануы: халықаралық қатынастарға кіріспе» туындыларын студенттер жаңа оқу жылынан бастап қазақ тіліне оқиды.
Аударылған еңбектердің ішінде өте жылдам өзгеріп жатқан білім саласының соңғы жаңалықтарымен таныстыратын «Білім берудегі зерттеулер», бұған дейін қазақ тіліне аударыла қоймаған «Статистика негіздері», «Зерттеу жобасын жүргізу» оқулықтары да бар.
Экономика және жеке қаражат бағытында білім беруге қажетті оқулықтар қатарына Майкл Паркиннің «Макроэкономика», «Микроэкономика» еңбектері қосылды. Сондай-ақ, Е.Томас Гарман мен Рэймонд Е.Форгтың әрбір адамға жеке бюджетін жоспарлап, оны тиімді басқаруды үйрететін «Жеке қаражат» оқулығының 13-басылымын ерекше атап өту керек. Бұл еңбек Қазақстан жағдайына арнайы бейімделіп, біздің заңдар, қазақстандық қаржы және несие жүйесі, зейнетақы, сақтандыру, инвестициялар тәжірибесіне сәйкес қайта құрастырылды.

Рухани жаңғыру: Қазақ тіліне аударылған 30 жаңа оқулық таныстырылды

<a href="https://kyzylorda-news.kz/date/2020/08/12/">Kyzylorda-news.kz.</a> Тәуелсіз ел болып, іргеміз нығая бастаған шақта халқымыздың болашағы үшін ұлттық тұтастығымызды сақтап қалу мәселесі туындады. Қазақстанның кең байтақ территориясы ежелгі Тұран даласын мекендеген түркі халықтары IX-ғасырдың басында ислам дінін қабылдады.
&nbsp;&nbsp;&nbsp;&nbsp;&nbsp; Қазақ даласына ислам діні келгенге дейін де ата-бабаларымыз яғни көнедегі түркілердің діни дүниетанымы монотейстік (бірқұдайлық) бағытта болды. Тәңір ұғымы сонау Күлтегін жырынан (684-731) бастау алады.
«Биікте көк тәңірі,
Төменде қара жер жаралғанда,
Екеуінің ортасында адам баласы жаралған»
деген жолдары түркілердің бір Аллаға сиынғандығын білдіреді. Исламның қазақ жерінде тез таралуының басты себебі де жалғыз Тәңір мен Алла ұғымдарының ұқсастығынан болса керек. Ислам дінінің келуімен Аллаға құлшылық ететін мешіттер мен қатар бала оқытатын медреселер салына бастады. Одан сауат ашқан шәкірттер арасынан кейіннен елге танымал болған атақты сопы, имам, ишан, ахун&nbsp; сонымен қатар елге белгілі ақын, шайыр, жырау-термешілерде көптеп шықты. Олар Алланың сөзі құран мен пайғамбар хадистерін, шариғаттың амалдарын жырға қосып, халықтың жүрегіне көркем сөзбен жыр жеткізе білді. Мысал келтірсек Қарахан дәуірінде өмір сүрген Жүсіп Баласағұн (XI-ғ) 6 мың 520 жолдан тұратын &nbsp;«Құтты білік» еңбегін:
«Алла атымен бастадым сөз әлібін,
Жарылқаған жаратқан бір тәңірім» деп бастайды. Сол кезеңнің ойшыл кемеңгері Махмуд Қашқари болса өзінің «Диуани-лұғат-ат-Турк» еңбегін: «Иа, Алла көп мінәжат етем саған.
Рахметіңді үміт етіп мен аңсағам.
Дәріптеуге өзіңді тіл жете ме,&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
Тіл өнерін төгейін, жар бол маған.
&nbsp;Ұшқан құс жүгірген аң барлығы да,
&nbsp;Паш етер сені «бар» деп жөн бар соған!»деп бастайды. Одан берідегі бүкіл түркі жұртына әйгілі Қожа Ахмет Яссауи бабамыз да «Диуани хикмет» еңбегінде:
«Менің хикметтерім&nbsp; Алладан пәрмен,
Оқып ұққанға мағынасы бар құран.
Сүндет емес кәпір болса да, берме азар,
Көңілі қатты діл азардан Құдай безер
Ондай Құлға Құдайдың жазасы даяр,
Даналардан бұл сөзді естіп айттым міне.»-деген. Сүлеймен Бақырғани бұл дүниенің барлық бақ-дәулетінен де, атақ дәрежесінен де, ең жоғары киелі нәрсе – Алла жаратқан адамның ішкі жан дүниесі, «Құдайдың құлы болған» пенделердің биік мәртебесі деп біледі:
«Нәпсім айтты : бұл бес күндік өмірде,
Бәрін істе, не ой келсе көңілге.
Гүлстанның аралап қал бағын да,
Жеміс жинап пісіп тұрған шағында.
Рухым айтты: шариғаттың жолын бақ,
Ілімменен тариқаттың жолын тап.
Таңсәріде оянуды ұғынғын,
Он бесіңде жайнамазға жығылып.»
Қазақтың ұлы ағартушысы Ыбырай Алтынсарин де:
&nbsp;«Бір Аллаға сыйынып,&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
Кел балар оқылық!» деп қазақ балаларын білімге шақырған еді. Қазақтың ұлы ақыны Абай Құнанбайұлының да имандылыққа шақырған өсиет өлеңдері ұшан теңіз.
«Кеше бала ең&nbsp; келдің ғой талай жасқа,
Көз жетті бір қалыпта тұра алмасқа.
Адамды сүй, Алланың&nbsp; хикметін сез,
Не қызық бар өмірде бұдан басқа?»-деп көкірегінде&nbsp; сәулесі бар&nbsp; жанға ой тастайды. Тіпті кешегі қылышынан&nbsp; қан&nbsp; тамған, «Құдай жоқ, дін апиын» деп ұрандатқан кеңестік дәуірде де&nbsp; Мұқағали атамыз:
«Дін&nbsp; ғылымның атасы,
Ғылым діннің баласы.
Қол қусырып Құдайға,
Ғылым мен дін бірге бар» &nbsp;
деп жасқанбай&nbsp; айтып кетті. Мұндай мысалдарды тізе берсек көптеп келтіруге болады. Иә, егемендік алғаннан бері қазақ&nbsp; халқының сана-сезімі, шынайы тарихы, діні мен ділі туралы зерттеулер қайта жаңғыртылуда. Кеңес кезеңінде репресияға ұшыраған әдебиетіміз қайта&nbsp; оралып&nbsp; жаңаша&nbsp; зерттеуді&nbsp; қажет етеді. Бүгінде «қазақта дін болмаған» деп ел ішіне ылаң салып жүрген деструктивті діни ағымдардың өкілдеріне ұлы ақындарымыздың осы жырлары бұлтартпас дәлел екені сөзсіз. Осы орайда ғасырлар қойнауынан бастау&nbsp; алатын&nbsp; рухани, әдеби, мәдени&nbsp; мұраларымызды&nbsp; дәріптеп, жас ұрпақтың санасына сәуле құя алсақ, онда олардың адаспасы анық.
Арыстанбек БАЙҚАБЫЛОВ,
Облыстық ішкі саясат басқармасының
Дін мәселелерін зерттеу орталығының маманы

Қазақ әдебиетіндегі ислам діні

<a href="https://kyzylorda-news.kz/date/2020/08/10/">Kyzylorda-news.kz.</a> Бүгін Ә.Тәжібаев атындағы Қызылорда облыстық әмбебап ғылыми кітапханасының ұйымдастыруымен «Абай мұрасының ұлттық әдебиет пен мәдениеттегі маңыздылығы» тақырыбында республикалық онлайн конференция өтті.
Конференция тарих ғылымдарының кандидаты, шараның модераторы Н.Мыңжастың кіріспе сөзінен басталды. 
Республикалық басқосуда М.Әуезов атындағы «Әдебиет және өнер» институтының бас ғылыми қызметкері, филология ғылымының докторы Гүлжахан Орда, Қазақ ұлттық педагогикалық университетінің доценті, филология ғылымдарының кандидаты, абайтанушы Марат Бекбосынов, Шәкәрім университетінің кафедра меңгерушісі, филология ғылымдарының кандидаты, абайтанушы Айман Ақтанова, «Өрлеу» ұлттық орталығының кафедра меңгерушісі, философия ғылымдарының докторы Баймырза Қожамберліұлы, Қорқыт ата атындағы мемлекеттік университетінің доценті, филология ғылымдарының кандидаты Айман Айтбаева, профессор, экономика ғылымдарының кандидаты Қазыбай Құдайберген, филология ғылымдарының кандидаты Серікбай Қосанов сынды белгілі ғалымдар ақын мұрасы жайлы тың деректерге негізделген баяндамалар жасады.
<blockquote>
 “Абай – қазақтың ғана емес, адамзаттың ақыны. Ұлы ойшылдың шығармашылық мұрасы, теңдессіз дана ойлары мен шығармалары бүкіл әлемдік қазынаға қосылған алтын қор екені талассыз. 
 Абайға арналған бүгінгі республикалық дәрежедегі ғылыми конференция ақын мұрасын жас ұрпаққа үлгі етуді көздейді. Абай шығармашылығы арқылы біз адамтануға, адами капитал идеясына түбегейлі бет бұрып жатырмыз”, – дейді Нұрлыбек Мыңжас.
</blockquote>
<img src="https://kyzylorda-news.kz/wp-content/uploads/2020/08/3af7cc38-f964-463e-83d9-0df031a1c2c9.jpg" alt="" />

«Абай мұрасының ұлттық әдебиет пен мәдениеттегі маңыздылығы» тақырыбында республикалық онлайн конференция өтті

Kyzylorda-news.kz. «Жанкент қалашығындағы аспан асты музейі және далалық зерттеу жұмыстарының нәтижелері» тақырыбында ортағасырлық Жанкент қалашығында далалық семинар ұйымдастырылды. &nbsp;
Жанкент қалашығы – Қазақстанның ортағасырлық тарихын, соның ішінде түркі-оғыз тайпаларының тарихын зеттеуде тірек ескерткіш болып табылады. Бұл ескерткіш 2005 жылдан «Халықаралық Жанкент археологиялық экспедициясымен» зерттеліп келеді. Археолог, тарихшы, остеолог, топырақтанушы, архитектор, геофизик, т.б. ғалымдардан құралған экспедиция кешенді археологиялық және пәнаралық зерттеу әдістерін пайдаланып келеді.
Биылғы қазба маусымында археологиялық зерттеулермен қатар, архитектуралық құрылыстарды тұмшалау, қайта қалпына келтіру жұмыстары да қолға алынған. Мысалы, ескерткіш цитаделінің солтүстік қорған қабырғасында 5 мұнарасы аршылып, мезгілді жауын-шашыннан қорғау мақсатында сырты саман жабындымен жабылды.
№1 қазбада орналасқан үйдің орны қалпына келтірілді. Жалпы бұл қазбаның аумағы көлемі 400 шаршы метрге жуық болатын темір жабындымен жабылған. Үйдің үш тұрғын бөлмесінің қабырғалары жергілікті халықтың құрылыс әдісіне айналған «каркасты» әдіспен көтерілді. Бөлмелердің төбесі пашынмен жабылып, бөлме ортасына терезесі орнатылды. Бөлмелердің ішіне ер және әйел адамның, баланың мүсіндері дайындалып қойылды. Осылайша Жанкентті зертеушілер қалашық ішіндегі тұрғын үйдің ежелгі қалпын қайта жандандырды.
Аталған жұмыстардың нәтижесінде, ескерткіш аумағындағы үй-жайлардың, бөлмелердің жақсы сақталғандығын байқаймыз. Жанкентті зерттеуші ғалымдардың пікірінше, келешекте осы бағыттағы жұмыстар Жанкент қалашығының аумағында археологиялық паркті қалыптастыруға мүмкіндік береді.
Айта кетейік, облыстық бюджет есебінен Жанкент қалашығындағы қазба жұмыстары 2014 жылдан бастап Қызылорда облысының мәдениет, архивтер және құжаттама басқармасының ұйымдастыруымен Қорқыт Ата атындағы Қызылорда мемлекеттік университетінің «Археология және этнография» ғылыми-зерттеу орталығы тарапынан жүргізілуде.
<img src="https://kyzylorda-news.kz/wp-content/uploads/2020/08/339a6218-scaled.jpg" alt="" />
<img src="https://kyzylorda-news.kz/wp-content/uploads/2020/08/339a6157-1-scaled.jpg" alt="" />

Қызылордада республикалық далалық семинар өтті

«Одан асқан бұрын-соңғы заманда қазақ баласында біз білетін ақын болған жоқ».
Ахмет Байтұрсынұлы
1.Абайдың шын есімі –&nbsp;Ибраһим.&nbsp;«Абай»&nbsp;деп әжесі еркелеткен. Анасының есімі – Ұлжан. Ұлжан – Құнанбайдың екінші әйелі;
2. Абай:&nbsp;«Атадан алтау, анадан төртеу едім».&nbsp;Құнанбай қажының 4 әйелі болған. Бәйбішесі Күңкеден – Кұдайберді. Ұлжаннан – Тәңірберді (Тәкежан), Ибраһим, Ысқақ, Оспан. Үшінші әйелі Айғыздан – Халиулла, Ысмағұл туады. Төртіншісі – Нұрғаным. Одан ұрпақ&nbsp;жоқ;
3. Хәкімнің ақын, жазушылықтан бөлек, композиторлық қабілеті де болған. Ол бірқатар өлеңіне әнді өзі жазған. Соның бірегейі –&nbsp;«Көзімнің қарасы»;
4. Ақындық жолына&nbsp;10 жасында&nbsp;түсе бастайды. Ең алғашқы өлеңдерін Көкбайдың&nbsp;атынан жариялаған;
5. Жазба қазақ әдебиетінің, қазақ әдеби тілінің негізін қалаушы ұлы Абай қазақ, араб, парсы, орыс тілдерін білген. Иран, шағатай (ескі өзбек) тілдерінде жазылған дастан-қиссаларды, ертегілерді оқыған;
6.&nbsp;Ел басқару ісіне&nbsp;13 жасында араласқан;
7. Абайдың алғашқы махаббаты –&nbsp;Тоғжан;
8. Бірінші жары Ділдәға 1860 жылы 15 жасында, екінші әйелі&nbsp;Әйгерімге 30 жасында үйленген. Әмеңгерлік жолмен алған әйелінің есімі – Еркежан. Ол Абайдың інісі – Оспанның қалыңдығы;
9. Ұлы ағартушының 10 баласы болған. Ол небәрі&nbsp;16 жасында&nbsp;әке атанып,&nbsp;36 жасында алғашқы немересін қолына алады. Оның аты – Әубәкір;&nbsp;
10. Саяси қайраткер 21 жасында&nbsp;болыс болып сайланады;
11. Ақынның саяси көзқарасының қалыптасуына ықпал еткен орыс зиялы қауым өкілдері:&nbsp;Е. Михаэлис, А. Леонтьев, С. Гросс, А. Блек, П. Лобановский, Н. Коншин, Н. Долгополов және т.б;
12. Ақын өмірінде&nbsp;176 өлең,&nbsp;«Ескендір», «Масғұт»&nbsp;және&nbsp;«Әзім әңгімесі»&nbsp;поэмалары мен&nbsp;45 қара сөз&nbsp;жазып қалдырған. Сондай-ақ ол&nbsp;шебер аудармашы&nbsp;да болған. М. Лермонтовтың өлеңдерін, А.С. Пушкиннің дастандарын және И.А. Крыловтың мысалдарын қазақ тіліне аударған.
13. Жазушының&nbsp;ғақлиялары (қара сөздері)&nbsp;әлемнің көптеген тілдеріне аударылған. Атап айтсақ, қытай, француз, орыс және т.б. Ал өлеңдері грузин, қарақалпақ, қырғыз, татар, француз, ағылшын, түркмен, ұйғыр тілдеріне аударылған;
14. Ұлы данышпан туралы көптеген мақала, кітаптар жазылып, фильмдер түсірілді. Биыл ақынның туғанына 175 жыл толуына орай арнайы&nbsp;«Abai tv»&nbsp;телеарнасы ашылды;
15. Абай мұрасын алғаш зерттеп бастаған ағартушы ғалымдар мен қайраткерлер:&nbsp;Ә. Бөкейханов, А. Байтұрсынұлы, М. Дулатұлы, М. Әуезов, С. Мұқанов, І. Жансүгіров және т.б.
<a href="https://kyzylorda-news.kz/">Ruh.kz</a>

Абай Құнанбайұлы туралы 15 дерек

Kyzylorda-news.kz. Құрметті жерлестер, өздеріңізге белгілі биыл Абай Құнанбайұлының туғанына 175 жыл. Елімізде, тіпті халықаралық деңгейде хәкім Абайдың мерейтойын лайықты атап өту үшін ауқымды шаралар ұйымдастырылды.
ҚР Тұңғыш Президенті-Елбасы Нұрсұлтан Әбішұлы Назарбаевтың: «Заманалар ауысып, дүние дидары өзгерсе де, халқымыздың Абайға көңілі айнымайды, қайта уақыт өткен сайын оның ұлылығының тың қырларын ашып, жаңа сырларына қаныға түседі. Абай өзінің туған халқымен мәңгі-бақи бірге жасайды, ғасырлар бойы Қазақ елін, қазағын биіктерге, асқар асуларға шақыра береді», – деген өнегелі сөзі ақын мұрасының мәңгілік өсиет ретінде бағаланатынын айқын аңғартады.
Міне, 10 тамыз дербес «Абай күні» ретінде еліміздегі мерекелік күндердің тізбесіне енуі той тойлау үшін емес, ой-өрісімізді кеңейтіп, рухани тұрғыдан дамуымыз бен оның асқақ мұрасын дәріптеу, ұрпақ жадына мәңгі ұялату мақсатында Үкімет тарапынан қолға алынып отырған ізгілікті шараның бірі деп есептеймін. Тарихта өшпес із қалдырған ғұлама, ойшыл, ұлы ағартушы Абай Құнанбайұлына деген құрмет ұрпақтан-ұрпаққа толастамасын деп тілейміз.
Ләйлә ТӨРЕШОВА,
«Nur Otan»партиясы Қызылорда облыстық филиалы төрағасының бірінші орынбасары

Ләйлә Төрешова: Хәкім Абайға деген құрмет ұрпақтан-ұрпаққа толастамасын деп тілейміз

Kyzylorda-news.kz. Бүгін ұлы Абайдың туылған күні.
Абайды тану, білу үлкен ғылымның тармағы. Әрбір айтқан қара сөздерінің, өлең шумақтарының түп – тамыры қазақ қоғамының сол кездегі саяси бет-пердесін ашып көрсеткен, ұлтымыздың ұрпақтарының алдына келелі міндеттер жүктеген, Ар-намысты ту етіп, болашақ ұрпақ кәдесіне жаратар ой – талғамдарын боямасыз жеткізген данышпан тұлға ретінде әрбір саналы қазақтың ой – санасының өлшемі ретінде қалыптастырған ұлы даланың перзенті екені даусыз.
Бүгінгі Абай тойын өткізудің терең мазмұны Ұлы ойшылдың әрбір айтқан ойларын әрбір қазақ терең түсіністікпен қабылдап, болашағымыз үшін білімнің қайнар көзі ретінде ойға түйсек екен дейміз. Осы ретте ұрпақтарымыздың нағыз ақыл – ойдың қайнар көзі Ұлы Абайдың өлең жолдарынан сусындап білім нәрін бойымызға сіңірсек, ұлтымыздың биік тұлғасын мәңгілікке қалыптастыруда дархан ойдың қас шебері Ұлы Абайдың халқының перзенттеріне арнап жазған қара сөздерінің мазмұны мен мағынасына терең талдау жасап, ой – бөліссек: біз кәзір кімбіз, халықаралық қауымдастықтың ортасындағы тұлғалы елдің перзенттеріне лайықтымыз ба, өз орнымызды тапқан, жұрт мойындаған ұлт өкілдеріміз бе, ел бірлігін сақтап, мәңгілік елдің ірге тасын қалауға бір кісідей ат салысқан Абай атамыз арман тұтқан халықтың өкіліміз бе деген сұрақтар туындап отырғанын әрбір азамат, ел сенімін арқалаған ардагерлер қандай деңгейде, қазіргі таңда осыған жауап іздеудеміз.
Ұлы Абай қазақ халқымен бірге мәңгілік жасайды. Мерекелеріңіз құтты болсын!
<img src="https://kyzylorda-news.kz/wp-content/uploads/2020/08/img-20200810-wa0002.jpg" alt="" />
Сайлаубай ӘБІШЕВ,
Қызылорда қалалық ардагерлер Кеңесінің төрағасы

Сайлаубай Әбішев: Абай &#8211; ұлы ойшыл, ұлы дала перзенті

<a href="https://kyzylorda-news.kz/">Kyzylorda-news.kz.</a> 10 тамызда ұл­­ты­­мыздың ұлы ақы­ны, ойшыл тұл­­ғасы Абай Құнан­­бай­­ұлы­ның ту­ға­нына 175 жыл тол­ды. Бұ­дан ши­рек ға­сыр уақыт бұ­рын Тұңғыш Прези­дентіміз – Елбасы Нұрсұлтан Назарбаев­тың бастамасымен Абайдың 150 жыл­дығы ЮНЕСКО деңгейінде өткі­зіл­ген еді. Бұл торқалы той – сол тама­ша дәстүрдің жалғасы.
Биылғы мерейтойға орай бірқатар іс-шара жоспарланған болатын. Бірақ әлемді жайлаған індетке байланысты со­ның көпшілігін онлайн форматқа ауыс­тырдық. Әрине сан сынақтан сү­рін­беген халқымыз бұл дертті де жеңе­ді. Қиындық&nbsp; өтпелі, ал Абай мұрасы мәң­гілік.
Менің тапсырмам бойынша Үкімет оныншы тамызды «Абай күні» деп бел­гілеп, мерекелер тізбесіне енгізді (бірақ жұмыс күні болып қала береді). Ұлы ақынның мұрасын ұлықтауға арналған іс-шаралар жыл сайын өткі­зіліп тұратын болады. Мәселе мерейтойда емес – тұғырлы тұлғаның туын­ды­ларынан терең тәлім алуда. Абай­дың рухына тағзым ету – оның қағи­датын ұстану, аманатына адал болу. Сонда ғана жас ұрпақтың сана­сына қастерлі құндылықтарды сіңі­реміз.
Біз ұлы ойшылдың өнегелі өмірі мен тағылымы туралы айтудан жа­лық­­паймыз. Әсіресе қазіргі Қазақстан қоға­мын Абайдың рухани ұстанымына сай дамыту аса маңызды. Мен бұл жөнінде «Абай және ХХІ ғасырдағы Қазақстан» атты мақаламда кеңінен айттым.
Биылғы жыл халықаралық «Абай жылына» айналды. Әлемнің көптеген елдері оның шығармашылығына назар аударуда. Қазақстанның бастамасымен және ЮНЕСКО-ның қолдауымен ұлы ақынымыздың 175 жылдық мерей­тойы жаһандық деңгейде аталып өтуде.
Ақынның баға жетпес мұрасын ұғын­дыру және дәріптеу – азаматтық пары­­зымыз. Өйткені Абай – әлем­дік дең­гей­дегі кемеңгер тұлға. Абай­тану­дың тұ­ғыр­намалық негізі де осы болуға тиіс.
Қазір ақынның еңбектерін халық­ара­лық ғылыми айналымға енгізу үшін нақты және мақсатты жұмыс­тар қол­ға алынуда. Оның шығарма­ла­ры әлем­нің он тіліне аударылып, бас­паға әзірленді. Бұл кітаптар жүз­ден астам елдің кітапханалары мен мәде­ни орта­лықтарына жіберіледі. Бірқа­тар шетел­дік аудармашыларға, Абай­дың шығар­машылық мұрасын зерттеу­ші­лер мен насихаттаушыларға менің Жар­лығыммен мемлекеттік награда берілді.
Абай рухын ұлықтау шарала­ры жалғасуда. Шетелдегі елшілік­тері­міздің жанынан Абай орталықтары ашыла бас­тады. Ақынның шығар­ма­шылығын жүйелі зерттеу үшін Л.Н.Гумилев атындағы Еуразия ұлттық университеті жанынан Абай академия­сы құрылды.
Біз бәсекеге қабілетті мемлекет болу үшін Абай мұрасын естен шығармауымыз керек. Себебі ұлт ретіндегі жаңару идея­сы да оның көзқарасымен үндесіп жат­қаны анық.
Келесі жылы Қазақстан Тәуел­сіз­дігі­нің 30 жылдығын атап өтеміз. Бірақ ке­зінде ұлы ойшылды қатты толған­дырған кейбір келеңсіздіктер қоғамда әлі де кездеседі. Өкінішке қарай Абай айт­қан «бес дұшпаннан» толық арылып болған жоқпыз.
Азаматтарымыздың арасында жал­қаулық пен сөзуарлық жиі кездесетіні қынжылтады. Бұлар бұрынғыша той­құмарлықтан тартынбай, күнделікті тынымсыз тірлікті дәріптеудің орнына, әрбір қоғамдық оқиғадан саяси астар іздейді де отырады.
Абай халықты той тойлауға емес, еңбек етуге, рухани кемелденуге шақырды. Абайдың ұлағаты әлі күнге дейін маңызын да, құндылығын да жоғалтқан жоқ. Сондықтан біз оның терең ойларына, келешектің келбетіне үңілген көрегендігіне таңырқаудан жалыққан емеспіз. Абай ілімі бүгінгі бірқатар бағыттарға орайлас келеді.&nbsp;&nbsp;
Ең алдымен, білім игеру. Біз бү­кіл әлемді ақыл-ой мен парасатты пайым арқылы ғана мойындата аламыз. За­ман талабына сай білім алу интел­лек­туалды ұлт қалыптастыруға жол ашады.
Екінші, тәрбие мәселесі. Сон­дықтан, өскелең ұрпаққа дұрыс бағыт берген жөн. Ақынның «Пайда ойлама, ар ойла, талап қыл артық білуге» деген өсиетін әрдайым санаға сіңіру қажет.
Үшінші, жаңа кәсіп игеру. Ақын әр қазақ өз ісінің шебері болса деп ар­­ман­дады. Әсіресе бәсекелестікке толы ал­мағайып заманда мұның мәні зор. Абай: «Мал керек болса, қол­өнер үй­ренбек керек. Мал жұтай­ды, өнер жұта­майды» дейді. Біз ең­бекке, жаңа өнер иге­руге деген көзқа­расымызды түбе­гейлі өзгертуге тиіспіз. Байлықтың да, бақыттың да кілті – өзің сүйген кәсіпте.
Төртінші, ынтымақ мәселесі. Абай әрдайым қоғамның береке-бірлі­гін арттыруға ден қойды. Ол «Біріңді, қазақ, бірің дос, көрмесең істің – бәрі бос» деп, елді татулыққа шақырды.
Біз аса күрделі кезеңді бастан өткеру­деміз. Осындай сәтте бір-бірімізге қол ұшын беріп, өзара мәміле мен ынты­мағымызды арттыра түсу аса маңызды. Кемеңгердің де жан-жүре­гімен тілегені жұртының амандығы мен ұлтының тұтастығы еді. Сон­дық­тан бүгінгідей қиын шақта Абай мұ­расына жүгіну өте өзекті&nbsp; болып отыр.
Абай өнегесінің құны дәуір алмасқан сайын артпаса, кемімейді. Ол баршаға түсінікті әрі күллі адамзатқа ортақ. Оның қара өлең болып өрілген және қара сөз болып төгілген оралымды ойлары әлі күнге дейін өмірлік бағдар болып келеді.
Ұлтының болашағы үшін қам жеген ұлы ойшыл күллі жұртшылықты да махаббат пен мейірімге үндеді. Ақынның осындай адамгершілік қағидаттары еліміздің бүгінгі ұрпақтары үшін де аса қажет.
Мемлекет тәуелсіздік жағдайында ұлттық сананы қайта жаңғыртуға және жаһандану өзгерістеріне бейімдеуге жалпыұлттық&nbsp; тұрғыдан басымдық беріп отыр.
Ұлы данышпан елдік мүддені әрдайым жоғары қоюға, алған білім мен тәжірибені халық игілігіне жұмсауға шақырды. Бүкіл адамзат үшін даму үрдісін осындай ұстаным арқылы ұғыну әрдайым маңызды болмақ.
Абай – біздің ұлтымыз бен жұрты­мыз­ды танудың төте жолы. Ұлы ақын бізге мазмұндық тұрғыдан өлшеу­сіз, ха­­лық­тың рухани азығына айнал­ған мұра қалдырды. ХХІ ғасырға қадам бас­сақ та, Абайдың көзқарасы заман­ауи із­гі­лік қағидаттарына және Қа­зақ­стан қо­ғамының басты құндылық­тарына, оның бірлігі мен берекесіне толықтай сай ке­летіндігіне тағы да бір мәрте көз жеткі­земіз.
Ұлы данышпан ұлттың рухани мә­дени, адами бет-бейнесін асқан көре­гендікпен сипаттаған. Оның ұлылығы да осында.
Абайдың даналық сөздері қазақ халқының алтын тұғыры, түп негізімізге үңіліп, ұлттық ұстынымызды іздеген көп­теген ұрпақтың басын біріктіретін мәң­гілік рухани тірек болып қала бермек.
Елбасы Нұрсұлтан Назарбаев&nbsp; «Абай сөзі – қазақтың бойтұмары» деген бо­латын. Бұл тұжырым бізді ақын әлеміне терең бойлауға, жаңаша ойлауға мін­деттейді.
Қазір елімізде абайтанумен айна­лы­сатын бірнеше ғылыми-зерттеу орталығы бар. Осылардың жұмы­сын жүйелеп, елордамыздағы Абай акаде­миясының төңірегіне топтастырған жөн. Академия барлық зерттеу меке­мелерінің жұмысын ғылыми тұрғыдан үйлестіруші міндетін атқара алады.
Алдағы уақытта гуманитарлық пән­дер­дің бөлінбес бөлшегі ретінде «Абай­тану» курсын оқыту мәселесін қолға алу керек. Жаңа философиялық және саяси ұстаным тұрғысынан «Абай­та­ну» оқулығы мен хрестоматиясын әзір­леу қажет. Сондай-ақ Абайдың «толық адам» ілімі жан-жақты әрі терең зерттелуге тиіс.
Біз Абайды ХІХ ғасырда өмір сүріп, ХХІ ғасырдың сөзін сөйлеген данышпан ретінде әлемге танытуымыз керек. Сонымен қатар оны ұлттық сананы жаңғыртуға зор ықпал еткен рухани реформатор ретінде дәріптеуге міндеттіміз.
Түптеп келгенде, әрбір қазақ Абай­мен мақтануға тиіс! Халқымыздың ұлы перзентінің торқалы тойы құтты болсын!
[Egemen.kz](https://egemen.kz/article/244790-qasym-zhomart-toqaev-abay-%E2%80%93-rukhani-reformator© egemen.kz)

Қасым-Жомарт Тоқаев: Абай – рухани реформатор

Kyzylorda-news.kz. Бүгін елімізде тұңғыш рет Абай күні аталып өтеді.
Үкімет қаулысымен биыл Қазақстанда 10 тамыз – Абай күні деп белгіленіп отыр. Яғни жыл сайын осы күнді біз ұлы баба рухын ұлықтап, арнайы мереке ретінде атап өтетін боламыз.
Қазақтың ұлы ақыны, ұлттық жазба әдебиетінің және әдеби тілінің негізін салушы, ағартушы Абай (Ибраһим) Құнанбайұлы 1845 жылы қазіргі Шығыс Қазақстан облысы Абай ауданында дүниеге келген. Абай Тобықты руының Ырғызбай тобынан тарайды. Ауыл молдасынан оқып жүрген кезінен-ақ зеректігімен көзге түскен ол Семей қаласында 3 жылдық медреседе тәрбие алады. Әжесі Зере, шешесі Ұлжанның тәлімімен жетіледі.
Абайдың әкесі Құнанбай ел басқарған кісі. Оның ұлын оқудан ерте шығарып алуы да – сол ел ісіне араластыру мақсаты еді. Абай тез есейіп, балалықтан да ерте өтіп, жастайынан ел ішіндегі әңгіме, сөз өнерін, билердің шешендік өнеріне құлақ салып, оларды өзінің ерекше талантымен бойына сіңіре білді.
Абай жас кезінен-ақ оқудан қол үзген емес. Бос уақытында қазақтың мәдениетін, араб, парсы, шағатай тілдерін үйренеді. Шығыс әдебиетінің алыптары Низами, Хожа Хафиз, Науаи, Физули секілді ақындарының өлеңін жаттап өседі. Кейін ол орыс әдебиеті мен тілін өздігінен үйреніп, орыстың ұлы ойшылдары Пушкин, Гоголь, Лермонтов, Щедрин, Некрасов шығармаларымен танысады. Сонымен бірге Шекспирдің шығармаларын да оқиды. Соның арқасында дүниетанымын кеңейтіп, білімін шыңдай түседі.
Жасы отыздан асқанда Абай орыс тіліндегі кітаптарды оқуға мықтап кіріседі. Сол тұста Семейге айдалып келген орыс демократтарымен танысады. Ол демократтардың бірі – Михаэлис еді. Сонымен қатар 1880 жылдары айдалып келген Долгополов, Леонтьевтермен да танысып, өзі олардан үйрене жүріп, өзі де оларды халқының салт-дәстүрімен таныстырып, қол ұшын берді. Ақынның шығармашылықпен еркін араласуы 1860 жылдарға сай келеді. Ол кезде Абай өлеңдерін басқа аттармен жариялаған. Тек 1886 жылы «Жаз» деген өлеңінен бастап өз атын қоя бастайды. Ақынның «Жаз», «Күз», «Қыс», «Жазғұтыры» өлеңдерінен бөлек, «Жасымда ғылым бар деп ескермедім», «Ғылым таппай мақтанба», «Интернатта оқып жүр», «Сегіз аяқ» өлеңдері сол кездегі әлеуметтік жағдайдан молынан хабар береді.
Абайтанудың білгірі, әйгілі «Абай жолы» роман-эпопеясының авторы Мұхтар Әуезов атап көрсеткендей, Абай мұрасының нәр алған рухани үш арнасы: өз халқының мәдени мұрасы мен Шығыс, Батыс елдерінің рухани қазынасы болды. Өсе келе Абай елдегі пайдасыз дау-шардан жерініп, қазақтың жылдар бойы қалыптасып қалған қоғамдық және әлеуметтік мәселелеріне жіті үңіле бастайды. Қазақтың азаттығынан айырылып, итше ырылдасып көрген күніне налиды. «Өздеріңді түзелер дей алмаймын, өз қолыңнан кеткен соң енді өз ырқың» деп басыбайлы бодандыққа байланған халқының мұңын жоқтайды.
Абай өлеңдері бай философиялық, күрескерлік қасиетке ие. Ол ең алдымен қазақтың телегей-теңіз ауыз әдебиетінен сусындап, батырлар жыры мен ғашықтық жырларының үрдісіне мұрагерлік етті. «Ескендір», «Масғұт», «Әзім әңгімесі» – Абайдың шығармашылық мұрасындағы поэмалары да зерттеушілердің назарында. Абай қазақтың өлең үлгісін жаңаша тұрғыдан байыта түсті. Сондықтан Абайды қазақ жазба әдебиетінің негізін қалаушы деп атауға болады.
Абайдың ақындық дәстүрін ақынның көзі тірісінде тікелей дамытып, жалғастырған ақын шәкірттері болған. Солардың ішінде ерекше орын алатыны – Абайдың өз балалары. Бұл ретте Абай мектебі жайлы тірісінде тоталитарлық жүйемен тіресіп өткен ғалым Қайым Мұхамедханұлының еңбегін ерекше атап өту керек. Совет заманы орнаған кезде Абайды жоққа шығаруға талпынған сұрқия саясат шеңгелі ұлтты ұлы ақынынан да айыруға күш салған болатын. Алайда Мұхтар Әуезовтың ерлігі мен Қайым Мұхамедханұлының қайсарлығы ұлтың ұлы мұраларын саясаттың қиянатынан сақтап қалды.
Абайдың өз заманында ел ісіне бір кісідей араласқанын 1885 жылы мамыр айында Шар өзенінің бойындағы Карамола деген жерде Семей генерал-губернаторы Цеклинскийдің басқаруымен Семей губерниясына қарайтын 5 уездің 100-ден астам би-болысы бас қосқан төтенше съезінің тарихынан байқаймыз. Осы съезде төбе би болып сайланған Абайға «Семей қазақтары үшін қылмыстық істерге қарсы заң ережесін» әзірлеу міндеті тапсырылды. Абай бастаған комиссия барлығы 93-баптан тұратын ережені 3 күн, 3 түнде әзір етті. Бұл қазақ қауымындағы әдет заңдарына да, патша өкіметінің халықты канаушылыққа, зорлық-зомбылыққа негізделген заңына да ұқсамайтын, өзгеше кұжат еді. Оның, әсіресе, ұрлық, қылмыс пен әйел мәселелеріне арналған баптары ерекше құнды. Бірақ Абайдың беделін өсірген Қарамола съезінен кейін оның қарсыластары көбейіп кетеді. 1890 жылы Байғұлақ, Күнту деген кісілер бастаған 16 атқамінер Жиренше қыстауының шетіндегі Ши деген жерде Абайға қарсы дұшпандық әрекетке сөз байласады. 1891 жылы Оразбай бастаған дау 1897 жылға дейін созылады. Бұл шиеленістің аяғы 1898 жылғы Мұқыр сайлауындағы жанжалға, Абай өміріне қастандық жасауға әкеп соқтырады. Ақын бұл жанжалдың барша жиренішті сырын, өзінің ақ екендігін Сенатқа жазған хатында айғақты деректермен дәлелдеп береді. Ақын ел басқару қызметінде барынша әділ болып, халық қамын ойлаған, «тура биде туған жоқ» қағидатын ұстанған. Ғұмырының соңына қарай пенделік шаруалардан бойын аулақ салып, уақытының көбін шығармашылыққа арнаған.
Абай тек ақын емес, сонымен бірге сазгер екенін де атап өту керек. Абайдың ән шығармашылығы қазақтың халық музыкасында ерекше орын алады. «Сегіз аяқ», «Айттым сәлем, Қаламқас», «Желсіз түнде жарық ай» әндері әлі күнге халық жүрегінде. Одан бөлек Абай өзінің шығармашылығында қара сөзге ерекше мән берген. Абай поэзиясының арқауы ғылым, білім, еңбек – осы қара сөздерде жалғасып дамиды.
Ақын 1904 жылы туған жерінде қайтыс болды. Сүйегі Жидебайда қойылды. Қазір сол Жидебайда ақынның өзі тұрған үйде әдеби-мемориалдық мұражайы бар.
Ақынның өз кіндігінен он бала тараған. Бәйбішесі Ділдәдән: Ақылбай, Әкімбай, Әбдірахман, Райхан, Күлбадан, кенже баласы Мағауия. Екінші әйелі Әйгерімнен (Шүкіман) – Тұрағұл, Мекайыл, Ізкәйіл, Кенже. Абайдың үміт күткен талантты балалары: Әбдірахман, Мағауия, Тұрағұл, Мекайыл. Әкелерінің өлеңдерін жатқа айтып, халық арасына таратқан, әнші, домбырашы болған.
Абайдың ақыл-ойынан туған мұрасы – айналып келгенде Алашқа үндес қазақтың ұлттық идеясы еді. Ақынның ұлы жүрегі тоқтағаннан кейін де Әлихан Бөкейханұлының ақын шығармаларын жинақтап, басып шығаруға күш салуы, Ахмет Байтұрсынұлының «Қазақтың бас ақыны» деп баға беруі де сондықтан.
<a href="https://www.inform.kz/kz/bugin-kazakstanda-tungysh-ret-abay-kuni-atalyp-otedi_a3681488">ҚазАқпарат</a>

Бүгін тұңғыш рет Абай күні аталып өтеді

Kyzylorda-news.kz. Қызылордада «Мұрагер» мектебіне Абай Құнанбайұлының есімі беріледі. Бұл туралы Өңірлік коммуникациялар қызметінің ақпарат алаңында өткен брифингте Қызылорда облысы әкімінің орынбасары Серік Ахмет мәлімдеді.
<blockquote>
 «Абай күнін атап өтудің облыстық іс-шаралар жоспары бекітілді. Жоспар аясында «Абай мұрасының ұлттық әдебиет пен мәдениеттегі маңыздылығы» атты республикалық онлайн конференциясы, «Абай – адамзат тарихындағы ұлы тұлға» тақырыптарында Абай оқулары, Қазақстанның халық артисі Ерсайын Төлеубайдың «Абай» спектаклінің онлайн көрсетілімі және тағы басқа шаралар өткізіледі. Сондай-ақ, әлеуметтік желілерде ұлы Абайдың шығармаларын жатқа оқудан «Абай күні» челленджі #ABAI175 #ABAIKUNY хештегтерімен насихатталады. Қазақтың дара ақыны, ғұлама, ойшыл, ағартушы Абай есімін ұлықтау мақсатында облыс бойынша 3 елді мекенге, 4 мектепке және 86 көшеге есімі берілген. Сонымен қатар, Нұрсұлтан Назарбаев даңғылының бойында орналасқан аллеяға Абай есімі беріліп, оның қара сөздері тасқа қашалып жазылды. Абайдың мұра­сын, оның асқақ тұлғасын биікке шығару бір күн­ге байланып қалмайтыны белгілі», – деді Серік Әбжәліұлы.
</blockquote>
<img src="https://kyzylorda-news.kz/wp-content/uploads/2020/08/fb_img_1596877912828-1.jpg" alt="" />

Қызылордада «Мұрагер» мектебіне Абай есімі беріледі

<a href="https://kyzylorda-news.kz/">Kyzylorda-news.kz.</a> Жыл сайын кітап дүкендерінде арнайы бір сөре танымал кітаптарға арналады. Бүгінде біз оны бестселлер кітаптар деп атаймыз. Тираж саны мен сатылым көрсеткіші бойынша жыл сайын бестселлер кітаптар анықталады. 1950-2019 жыл аралығында ең жиі сатылған кітаптар тізімін ұсынамыз.
1950 — “Арыстан, дуагер және сиқырлы сөре” / “Лев, колдунья и волшебный шкаф”, Клайв Стейплз Льюис&nbsp;
1951 — “Қара бидай арасындағы құрдым” / “Над пропастью во ржи”, Джером Сэлинджер
1952 — “Шал мен теңіз” / “Старик и море”,&nbsp;&nbsp;Эрнест Хемингуэй
1953 — “Фаренгейт бойынша 451 градус” /&nbsp; “451 градус по Фаренгейту”,&nbsp; Рэй Брэдбери
1954 — “Сақиналар әміршісі” / “Властелин Колец”, Джон Р.Р. Толкин
1955 — “Лолита”, Владимир Набоков
1956 — “Құрдым” / “Падение”, Альбер Камю
1957 — “Гринч Рождествоны қалай ұрлады?” /&nbsp; “Как Гринч Рождество украл”, Доктор Сьюз
1958 — “Тиффанимен таңғы ас” / “Завтрак у Тиффани”, Трумен Капоте
1959 — “Қаңылтыр дабыл” / “Жестяной барабан”, Гюнтер Грасс
1960 — “Қылжақбасты өлтіру” /&nbsp; “Убить пересмешника”,&nbsp; Харпер Ли
1961 — “Өзгенің еліндегі бөтен” / “Чужак в стране чужой”, Роберт Хайнлайн
1962 — “Уақыт сынығы” / “Излом времени”, Мадлен Л’Энгл
1963 — “Шыны қалпақ астында” / “Под стеклянным колпаком”, Сильвия Плат
1964 — “Чарли және шоколад фабрикасы” / “Чарли и шоколадная фабрика”, Роальд Даль
1965 — “Ариэль”, Сильвия Плат
1966 — “Элджернонға арналған гүлдер” / “Цветы для Элджернона”, Дэниел Киз
1967 — “Жалғыздықтың жүз жылы” / “Сто лет одиночества”, Габриэль Гарсия Маркес
1968 — “Андроидтар электр қойларын армандай ма?” / “Мечтают ли андроиды об электроовцах?”, Филип К. Дик
1969 —&nbsp;“Нөмір бесінші қырғын немесе балалардың крес жорығы” / “Бойня номер пять, или Крестовый поход детей”, Курт Воннегут
1970 — “Джонатан Ливингстон атты шағала” / “Чайка по имени Джонатан Ливингстон”, Ричард Бах
1971 — “Лас Вегастағы қорқыныш пен жиіркеніш” / “Страх и отвращение в Лас-Вегасе”, Хантер С. Томпсон
1972 — “Дөң мекендеушілері”&nbsp;/&nbsp; “Обитатели холмов”, Ричард Адамс
1973 — “Қалыңдық ханшайым” / “Принцесса невеста”, Уильям Голдман
1974 — “Тыңшы, шық әрі” / “Шпион, выйди вон!”, Джон Ле Карре
1975 — “Сегун”, Джеймс Клавелл
1976 — “Перн әуендері” / “Песни Перна”, Энн Маккефри
1977 — “Сәуле” / “Сияние”, Стивен Кинг
1978 — “Әлем Гарп көзімен” / “Мир глазами Гарпа”, Джон Ирвинг
1979 — “Соңы жоқ хикая” / “История, конца которой нет”, Михаэль Энде
1980 — “Раушан гүлдер есімі” / “Имя розы”, Умберто Эко
1981 — “Түн баласы” / “Дети полуночи”, Салман Рушди
1982 — “Рухтар үйі” / “Дом духов”, Исабель Альенде
1983 — “Сиқыр түсі” / “Цвет волшебства”, Терри Пратчетт
1984 — “Тұрмыстың төзгісіз жеңілі” / “Невыносимая легкость бытия”, Милан Кундера
1985 — “Парфюмер”, Патрик Зюскинд
1986 — “Ол” / “Оно”, Стивен Кинг
1987 — “Сақтаушы”/ “Хранители”, Алан Мур
1988 — “Алхимик”, Паоло Коэльо
1989 — “Қуаныш пен сәттілік клубы” / “Клуб радости и удачи”, Эми Тан
1990 — “Юра дәуірі саябағы” / “Парк юрского периода”, Майкл Кричтон
1991 — “Софияның әлемі” / “Мир Софии”, Юстейн Гордер
1992 — “Тылсым оқиға” /&nbsp; “Тайная история”, Донна Тартт
1993 — “Пәк-өзін-өзі өлтірушілер” / “Девственницы-самоубийцы” ,Евгенидис Джеффри
1994 — “Бұрамалы құстар таризы” / “Хроники Заводной Птицы”, Харуки Мураками
1995 — “Соқырлық” / “Слепота”, Жозе Сарамаго
1996 — “Тақтар ойыны” /&nbsp; “Игра престолов”, Джордж Р.Р. Мартин
1997 — “Гарри Поттер және пәлсапа тас” /”Гарри Поттер и философский камень”, Дж.К. Роулинг
1998 — “Сағаттар” / “Часы”, Майкл Каннингем
1999 — “Үнсіз болған жақсы” / “Хорошо быть тихоней”, Стивен Чбоски
2000 — “Пидің өмірі” / “Жизнь Пи”, Янн Мартел
2001 — “Аралардың жұмбақ өмірі” / “Тайная жизнь пчел”, Сью Монк Кидд
2002 — “Сүйкімді сүйектер” / “Милые кости”, Элис Сиболд
2003 — “Уақыт саяхатшысының жары” / “Жена путешественника во времени”, Одри Ниффенеггер
2004 — “Бұлт атласы”/ “Облачный атлас”, Дэвид Митчелл
2005 — “Кітап ұрысы” / “Книжный вор”, Маркус Зусак
2006 —”Марли және мен. Әлемдегі ең нашар итпен бірге махаббат пен өмір жайлы таңғажайып оқиға” / “Марли и я. Удивительная история о любви и о жизни с самой ужасной в мире собакой”, Джон Грогэн
2007 — “Гарри Поттер және өлім сыйы” / “Гарри Поттер и Дары смерти”, Дж.К. Роулинг
2008 — “Дьюма-Ки”, Стивен Кинг
2009 — “Жоғалған белгі” / “Утраченный символ”, Дэн Браун
2010 — “Ауа құлпын бұзған бойжеткен” / “Девушка которая взрывала воздушные замки”, Стиг Ларсон
2011 — “Стив Джобс”, Вальтер Айзаксон
2012 — “Сұрдың елу реңі” / “Пятьдесят оттенков серого”, Э. Л. Джеймс&nbsp;
2013 —&nbsp; “Strengthsfinder 2.0”, Том Рат
2014 —&nbsp; “Strengthsfinder 2.0”, Том Рат
2015 — “Таңғажайып жинастыру. Үй мен өмірдің ретке келтірудегі жапон өнері” / “Магическая уборка. Японское искусство наведения порядка дома и в жизни”, Мари Кондо
2016 — “Гарри Поттер және қарғыс алған балалар” / “Гарри Поттер и Проклятое дитя”, Дж.К. Роулинг
2017 — “Ғажайып” / “Чудо”, Р. Дж. Паласио.
2018 — “Becoming. Менің хикаям” / “Becoming. Моя история”, Мишель Обама
2019 — “Шаяндар ән салатын жерде” / “Там, где раки поют”, Д. Оуэнс
<a href="https://massaget.kz/layfstayl/bilim/gumanitarly-ylymdar/62859/">Massaget.kz</a>

Сіз туған жылы қай кітап көп сатылған?

<a href="https://kyzylorda-news.kz/">Kyzylorda-news.kz.</a> Ауданның басты мәдениет ошағы саналатын аудандық мәдениет үйі биыл аудандық бюджеттің есебінен ағымдағы жөндеуден өткізіліп жатыр. Осы жұмыстардың атқарылу барысымен аудан әкімі Руслан Рүстемов танысты.
Құрылыс жұмыстарымен аудандық мәдениет және тілдерді дамыту бөлімінің басшысы Ж.Төрәлиев таныстырды. Бөлім басшысы биылғы жылы «Жұмыспен қамту жол картасы» бағдарламасы аясында облыстық бюджеттен Тереңөзек кент клубы мен А.Тоқмағамбетов ауылындағы мәдениет үйі күрделі жөндеуден өткізіліп жатқандығын айтты. Ал жергілікті бюджет есебінен аудандық мәдениет үйі және Қалжан ахун ауылдық мәдениет үйі ағымдағы жөндеуден өтуде екенін жеткізді.
<img src="https://kyzylorda-news.kz/wp-content/uploads/2020/07/img-20200715-wa0022.jpg" alt="" />
Аудандық мәдениет үйі 1973 жылы салынған. Бұған дейін 2013 жылы күрделі жөндеуден өткізілді. Ал биыл аудандық бюджеттен 12 млн 320 мың теңге бөлініп, мердігер компания «Ремстрой» ЖШС ағымдағы жөндеу жұмыстарын жүргізуде. Мердігер мекеме директоры А.Бейісов ағымдағы жөндеуді бекітілген мерзімде бітіруге жұмыстар жасалып жатқандығын атады. Қазіргі таңда мәдениет үйінің шатыры жаңартылуда және іші жөнделуде.
Аудандық мәдениет үйін аралап көрген аудан басшысы құрылыс жұмыстары сапалы жүргізілу керектігін атап өтті.
<blockquote>
 “Мәдениет – адамзат әлемінің айнасы. Адамның мәдениеттілігі оның бүкіл болмысын көрсетіп тұрады. Осындай рухани құндылықтарды дәріптейтін мәдени ошақтардың жаңарып, жаңғыртылуына үнемі көңіл бөліп келеміз. Аудандық мәдениет үйінің ағымдағы жөндеу жұмыстары ауданның мәдениет саласының дамуына септігін тигізеді деп санаймын. Сол себепті құрылыс жұмыстарының сапалы әрі уақытылы жүргізілуі үнемі бақылауда болуы қажет”, – деді аудан басшысы.
</blockquote>
Ағымдағы жөндеу жұмыстарын көрген аудан әкімі сала басшыларына тиісті тапсырмалар берді.
<img src="https://kyzylorda-news.kz/wp-content/uploads/2020/07/img-20200715-wa0023-1.jpg" alt="" />

Қазақстан және Қызылорда облысының жаңалықтары: Мәдениет

Рухани жаңғыру: Қазақ тіліне аударылған 30 жаңа оқулық таныстырылды

Қазақ әдебиетіндегі ислам діні

«Абай мұрасының ұлттық әдебиет пен мәдениеттегі маңыздылығы» тақырыбында республикалық онлайн конференция өтті

Қызылордада республикалық далалық семинар өтті

Абай Құнанбайұлы туралы 15 дерек

Ләйлә Төрешова: Хәкім Абайға деген құрмет ұрпақтан-ұрпаққа толастамасын деп тілейміз

Сайлаубай Әбішев: Абай – ұлы ойшыл, ұлы дала перзенті

Қасым-Жомарт Тоқаев: Абай – рухани реформатор

Бүгін тұңғыш рет Абай күні аталып өтеді

Қызылордада «Мұрагер» мектебіне Абай есімі беріледі

Сіз туған жылы қай кітап көп сатылған?

Сырдариядағы мәдениет үйі жөндеуден өтуде

Қазақстан және Қызылорда облысының жаңалықтары: Мәдениет

Рухани жаңғыру: Қазақ тіліне аударылған 30 жаңа оқулық таныстырылды

Қазақ әдебиетіндегі ислам діні

«Абай мұрасының ұлттық әдебиет пен мәдениеттегі маңыздылығы» тақырыбында республикалық онлайн конференция өтті

Қызылордада республикалық далалық семинар өтті

Абай Құнанбайұлы туралы 15 дерек

Ләйлә Төрешова: Хәкім Абайға деген құрмет ұрпақтан-ұрпаққа толастамасын деп тілейміз

Сайлаубай Әбішев: Абай &#8211; ұлы ойшыл, ұлы дала перзенті

Қасым-Жомарт Тоқаев: Абай – рухани реформатор

Бүгін тұңғыш рет Абай күні аталып өтеді

Қызылордада «Мұрагер» мектебіне Абай есімі беріледі

Сіз туған жылы қай кітап көп сатылған?

Сырдариядағы мәдениет үйі жөндеуден өтуде

Сайлаубай Әбішев: Абай – ұлы ойшыл, ұлы дала перзенті