<a href="https://kyzylorda-news.kz/">Kyzylorda-news.kz</a>. Қызылорда облыстық Қазақстан халқы Ассамблеясының ұйымдастыруымен Достық үйінде «Еңбегі жанған арулар» форумы өтті.
Форумға «Қоғамдық келісім» КММ-нің директоры Азамат Мукеев, Аналар кеңесінің төрайымы Нұрсәуле Мұсаева, Аналар кеңесінің мүшесі, «Бойтұмар Ханым» қоғамдық қорының төрайымы Рахима Ахметова, облыстық іскер әйелдер қауымдастығының төрайымы Манат Алмашева, облыстық Ассамблея жұмысын жетілдіруде елеулі үлесі бар белсенді қыз-келіншектер, әр салада еңбек етіп жүрген нәзік жандар, аудан орталықтарынан келген ақ жаулықты аналар, «Берекелі шаңырақ» отбасылық байқауының жеңімпаздары және БАҚ өкілдері қатысты.
Жылулық ескен шарада «Анамның бейнесі» суреттер галереясы және бейнесі мәңгілікке жүргемізде сақталған «Қазақ аруларының» портреттері қойылды. Сондай-ақ қазақ әйелінің ұлттық әшекей бұйымдарының көрмесі көпшіліктің назарына ұсынылды.
Форумда «Қоғамдық келісім» КММ-нің директоры Азамат Мукеев тұтастықтың құтты шаңырағына айналған Ассамблеяның жұмысын ілгерлетуге атсалысып жүрген нәзік жандыларға ризашылығын білдіре отырып, «Қазақстан халқы Ассамблеясына 25 жыл» мерекелік медалін «Қазақстан» РТРК» АҚ Қызылорда облыстық филиалы директорының орынбасары Айсұлу Қасымова, Қармақшы аудандық Аналар кеңесінің мүшесі Дильфура Байрактарова, «Жомарт» қоғамдық бірлестігінің жетекшісі, Аналар кеңесінің мүшесі Майя Наримова, Назарбаев Зияткерлік мектебінің баспасөз хатшысы, Журналистер мен сарапшылар клубының төрайымы Елена Рыбина және Ж.Нұрманов атындағы №198 орта мектебінің директоры, Аналар кеңесінің мүшесі Анжела Садықбековаға табыстады.
Мұнан соң форум жылдағы дәстүрлі түрде өткізілетін «Берекелі шаңырақ» байқауының жеңімпаздарын марапаттау рәсіміне ұласты. Жүлделі бірінші орынды Жалағаш ауданы Цой отбасы, екінші орынды Қазалы ауданы Жұмаевтар отбасы, үшінші орынды Қызылорда қаласы Есиндер отбасы иеленді. Жеңімпаздарды Аналар кеңесінің төрайымы Нұрсәуле Мұсаева құттықтап, облыстық Ассамблея тарапынан әзірленген диплом мен бағалы сыйлықтарын тарту етті.
Сонымен қатар «Ақ орамал» жобасының ұйымдастырушысы Рахима Ахметова қатысушыларға зор алғысын білдіріп, атқарылған ауқымды шараларға шолу жасады. Осы ретте облыс көлемінде өткізілген «Ақ орамал» жобасы туралы бейнекөрсетілім көрсетілді. Тағылымы мол шара соңында еңбегімен елді нұрландырып жүрген асыл жанды 10 анаға ерекше номинациялар берілді.
<img src="https://kyzylorda-news.kz/wp-content/uploads/2020/12/129679438_2811301592522336_3438618608037724293_o.jpg" alt="" />
<img src="https://kyzylorda-news.kz/wp-content/uploads/2020/12/129842991_2811316602520835_2134921729179762405_o.jpg" alt="" />

Қызылордада аруларға арналған форум өтті

<a href="https://kyzylorda-news.kz/">Kyzylorda-news.kz</a>. 3 желтоқсанда Ресейдің «Виктория» ұлттық музыка сыйлығы тапсырылады. Әнші Димаш Құдайберген байқаудың «Үздік поп әнші» аталымында Your love әнімен ұсынылған, деп хабарлайды <a href="https://lenta.inform.kz/kz/dimash-kudaybergen-viktoriya-muzyka-baykauynyn-finalyna-shykty_a3724340">ҚазАқпарат</a>.
«Виктория» сыйлығын тапсыру рәсімі Кремль сарайында өтеді. Биылғы байқауда көрермен болмайды. Алайда концерттің телевизия нұсқасы 18 қаңтарда «Россия-1» телеарнасы көрсетеді.
«Виктория» сыйлығын ақын, меценат Михаил Гуцериев, композитор, продюсер Игорь Крутой, жазушы, медиа-менеджер Юрий Костиндер ұйымдастырған.
Финалға шыққандар «Үздік жыл әні», «Үздік поп әнші», «Үздік хип-хоп орындаушы», «Үздік рок-группа немес рок әнші», «Жыл композиторы», «Жыл ақыны» секілді 14 номинацияда бақ сынайды. Онда қазіргі заманауи музыканың барлық бағыты қамтылған.
2020 жылы әртістердің көбі онлайн концерт қоюға мәжбүр болды. Сондықтан ұйымдастыру комитеті «Жылдың онлайн концерті» деген аталым ашты.
Байқау сахнасына Niletto, Филипп Киркоров пен Dava, Полина Гагарина, Artik&amp;Asti, «Виктория-2019» сыйлығының иегерлері Димаш Құдайберген мен Zivert; Николай Басков, Артем Качер, Polina және биыл әндері Ресейде хитке айналған өнерпаздар бар.

Димаш Құдайберген «Виктория» музыка байқауының финалына шықты

Kyzylorda-news.kz. Қорқыт ата атындағы Қызылорда университетінде «Мұстафа Шоқай – түркі халықтарының азаттығы мен бірлігі жолындағы қозғалыстың көшбасшысы» атты халықаралық ғылыми-тәжірибелік конференция өтті.&nbsp;
ZOOM платформасында өткізілген конференция ғылыми кітапхананың дәстүрлі және виртуалды көрмесімен сүйемелденді.
Конференцияға қатысқан спикерлер арасында Қызылорда облысы әкімінің орынбасары Н.Байқадамов, Қорқыт Ата атындағы Қызылорда университетінің ректоры Б.Кәрімова, ҚР ҰҒА академигі, Абай атындағы ҚазҰПУ профессоры М.Қойгелдиев, ҚР ҰҒА академигі, Л.Н.Гумилев атындағы Еуразия ұлттық университетінің профессоры, Д.Қамзабекұлы, Стамбул Мимар Синан университетінің профессоры Әбдіуақап Қара, Өзбекстан Ғылым академиясы тарих институтының аға ғылыми қызметкері, профессор Раджабов Кахрамон, Қорқыт ата атындағы Қызылорда университеті «Мұстафа Шоқай» ғылыми орталығының ғылыми жетекшісі, профессор Б.Әбдіжәлел, Қ.А.Ясауи атындағы Халықаралық қазақ-түрік университетінің профессоры, Т.Хазретәлі, Қорқыт Ата атындағы Қызылорда университеті «Қазақ тілі мен әдебиеті және журналистика» кафедрасының меңгерушісі, филология ғылымдарының кандидаты Ғ.Тұяқбаев болды.
Конференция барысында түркі халықтарының бірлігі мен азаттығы жолындағы күреске саналы ғұмырын арнаған Мұстафа Шоқайдың өмірлік жолына, саяси-қоғамдық еңбегіне жан-жақты шолу жасалды.
Атап айтқанда, Д.Қамзабекұлы Мұстафа Шоқай мен Смағұл Сәдуақасұлының сабақтастық тағылымы туралы баяндамасында ұлт жанашырларының еңбегі жан-жақты зерделенді.
&nbsp;Сонымен қатар Мұстафа Шоқай мен әулетіне кеңес үкіметі жасаған қиянат жайында талқыланып, оның Еуропадағы ел тәуелсіздігі жолындағы күресі туралы толыққанды ақпарат берілді.
Өзбекстандық ғалым К.Раджабов сөз барысында Шоқайдың еңбектеріндегі кеңестік жүйеге қарсы қарулы күрес мәселесіне қатысты ой толғап, тарихи деректерден мысалдар келтірді.
Әзірбайжандық ғалым Дилгам Ахмад баяндамасын Мұстафа Шоқайдың Әзірбайжанға саяси эмиграциясы кезеңіне арнады. Ғалым Шоқай мен өз елінің азаттық күрескерлері арасындағы тығыз саяси байланыс пен ұлт бостандығы жолындағы мүдделерінің үндесуі мен жақындығын ерекше атап өтті.
Шараға қатысушылар конференция барысында Шоқай мәселесіне қатысты өз пікірлерімен бөлісіп, ойларын ортаға салды.
Сонымен бірге, қатысушылар тарапынан берілген ұсынымдар арасынан Қызылорда облысы Шиелі ауданына Мұстафа Шоқай есімін беру мен аймақтағы жоғары оқу орындарының үздік оқитын студенттеріне «Мұстафа Шоқай» атындағы арнаулы стипендия тағайындау мәселелері көпшіліктің көңілінен шықты.
Университет ректоры Бейбіткүл Кәрімова шараны қорытындылай келе, бүгінгі қоғам өткен тарихтан сабақ алып, ұлтымыздың біртуар тарихи тұлғаларын танудың маңыздылығын баса айтты.
<img src="https://kyzylorda-news.kz/wp-content/uploads/2020/11/127889061_2115493595254722_4719926224791694633_o.jpg" alt="" />
<img src="https://kyzylorda-news.kz/wp-content/uploads/2020/11/128159508_2115493708588044_1597216597356206276_o.jpg" alt="" />
<img src="https://kyzylorda-news.kz/wp-content/uploads/2020/11/127643792_2115615508575864_3643459765732484542_n.jpg" alt="" />

Қызылордада халықаралық ғылыми-тәжірибелік конференция өтті

<a href="https://kyzylorda-news.kz/">Kyzylorda-news.kz</a>. Күнсұлу Түрікпеннің есімі бүгінде республикаға жақсы таныс. Ғасырлар бойы сақталған өнер қазынасын дәріптеп, жыршы-жыраулардың ізін жалғап жүрген&nbsp; дәстүрлі ән өнерінің дара қызы. Жас та болса атадан қалған ұлы өнердің туын жықпай, батырлар мен ақындардың жыр-дастандарын&nbsp; жатқа айтып, көпшілікке насихаттауда үлесін қосып келеді. Бұл еңбегі елеусіз қалмай жақында «Дарын» мемлекеттік жастар сыйлығын иемденді. Биылғы мемлекеттік сыйлықтың «Халық шығармашылығы» номинациясы Сырдың қызына бұйырды.
<blockquote>
 «Дарын» мемлекеттік сыйлығы өз саласында жетістікке жеткен жастарды мемлекеттің қолдауы мақсатында беріледі. Бұл қатардан өзімді көргеніме өте қуаныштымын. &nbsp;Аталған сыйлық өз саласының шебері атанған әр саладағы жастарға шабыт сыйлайды. Сонымен қатар зор жауапкершілікті жүктейді. &nbsp;Жоғары марапаттардың бастау болған жастар сыйлығы маған ғана емес Сыр мәдениетіне берілген баға, халық шығармашылығына көрсетілген құрмет деп білемін. &nbsp;Алдымыздағы аға буынның жолымен келе жатқан өнердегі жастарды ынталандыру. Мені қайда жүрсем де қолдап, қошеметін аямайтын туған жеріме және мені осы сыйлыққа ұсынған облыстық мәдениет басқармасы мен халық шығармашылығы орталығына алғысым шексіз. &nbsp;Осы талабымызбен жыраулық өнерді халыққа кең насихаттау жолында жұмысымызды жалғастыра беретін боламыз. «Қарлығаштың қанатымен су сепкендей» болса да қазақ мәдениетіне үлесімізді қоссақ мақсатымыздың орындалғаны», – дейді Күнсұлу Түрікпен.
</blockquote>
<img src="https://kyzylorda-news.kz/wp-content/uploads/2020/11/3053165e-32e9-492a-a5c2-4747c286f3fd-1.jpg" alt="" />
Күнсұлу бұған дейін халықаралық деңгейде ұлттық өнерді насихаттайтын «Men qazaqpyn» мегажобасының жеңімпазы атанғанды. Бүгінде Нұр-Сұлтан қаласында «Қазақконцерт» мемлекеттік концерттік ұйымында жыршы. Қазақ мәдениетінің киелі қара шаңырағы саналатын 60 жылдық тарихы бар өнер ордасына барғанына көп бола қойған жоқ. Десек те әріптестері оның өнерін жоғары бағалайды.&nbsp;
<blockquote>
 «Бүгінгі күні жыраулық дәстүрді насихаттап, жастарды халықтық өнерге қызығушылығын арттыру мақсатында авторлық онлайн курсымды аштым. Мені қуантқаны жыр-терме, домбыра үйренгісі келетін жастар қатарының көптігі. Шама-шарқымша жол сілтеп, алдыңғы буын ағаларымыздан алған білімімді замандастарыма үйретудемін. Алдағы уақытта бұл жобамның аясын кеңейтіп жыр мектебін ашуды ойлап жүрмін. Бұл енді уақыттың еншісінде», – дейді өнерпаз. &nbsp;
</blockquote>
Фариза ОМАРОВА

Күнсұлу Түрікпен: «Дарын» сыйлығы дәстүрлі өнерге көрсетілген құрмет

<a href="https://kyzylorda-news.kz/">Kyzylorda-news.kz</a> Қызылорда қаласындағы Назарбаев Зияткерлік мектебінің оқушылары белгілі жыршы-термеші, Қызылорда облыстық филармониясының&nbsp; өнерпазы Марат Сүгірбаймен кездесті.
«Замандастар жырлары» тәрбиелік жобасы аясында қашықтан ұйымдастырылған шарада жас зияткерлер қара қобызбен жыраулық өнерді кеңінен дәріптеп жүрген, республикалық байқаулардың жеңімпазы Марат Сүгірбайдың өмірі және шығармашылығымен танысты. Сондай-ақ, қазақ халқының төл өнері жайында тарихи деректерге толы тағылымды&nbsp; әңгімелерін тыңдап, білім көкжиегін кеңейтті.&nbsp;&nbsp;
<blockquote>
 «Аталмыш жоба тәуелсіздіктен бергі, әр өлкенің белді ақын-жазушылары мен өнерлі тұлғаларын танып-білуге және жастар арасында кеңінен насихаттау мақсатында өткізіледі», — дейді педагог-ұйымдастырушы-куратор Әділжан Абажанов.
</blockquote>
&nbsp;«Мен — қазақпын» атты дәстүрлі әнші-термешілер мен күйшілер телебайқауында тұңғыш қобызшы ретінде танылған Сыр мақтанышы оқушылармен сұхбат барысында&nbsp; Қадыр Мырзалиевтің «Күлтегін» жырын орындап, тыңдарманның ерекше қызығушылығын оятты.&nbsp;
<blockquote>
 «Жыраулық өнер ұлттың рухани, педагогикалық, ағартушылық қызметін атқарады. Терме толғаулар тұнып тұрған насихат. Олар білімге туыстыққа, ынтымақтастыққа, бейбітшілікке, бір біріне мейрімді болуға үндейді. Біз осындай рухани қазынамызды, ұлтымыздың бояуы мен иісі сақталған құндылықтарымызды дәріптеп, бойымызға сіңіруіміз қажет», – дейді Сырдың жас сүлейі.
</blockquote>
Бір сағатқа созылған кездесуге 500-ден аса көрермен қосылып, өздерін толғандырып жүрген сауалдарына жауап алды. Оқушылар ата-бабалардың қобыз арқылы жеткізілген жалынды жырларының өскелең ұрпаққа берер тәлім-тәрбиесін мол екенін терең ұғынды.

Қызылордалық оқушылар  жыршы Марат Сүгірбаймен кездесті

<a href="https://kyzylorda-news.kz/?doing_wp_cron=1605585327.3996119499206542968750">Kyzylorda-news.kz.</a> ҚР Үкіметінің&nbsp;қаулысына&nbsp;сәйкес 2020 жылғы «Дарын» мемлекеттік жастар сыйлығының иегерлері анықталды, деп хабарлайды <a href="https://lenta.inform.kz/kz/daryn-syylygynyn-biylgy-iegerleri-anyktaldy_a3722437">ҚазАқпарат</a>.
Аталған сыйлық жемісті ғылыми, шығармашылық, қоғамдық қызметі мен жоғары спорттық жетістіктері үшін беріледі.
«Эстрада» номинациясы бойынша сыйлық Т.Қ. Жүргенов атындағы Қазақ ұлттық өнер академиясының студенттері Дәрия Оңалғазықызы Болсанбек және Бексұлтан Талғатұлы Кенішқалиевке берілді.
«Классикалық музыка» аталымында Қазақ ұлттық өнер университетінің оқытушысы Қалқаман Бағдатұлы Дүйсембаев және аталған университет студенті Жібек Қанатқызы Мүсірғалиева үздік деп танылды.
«Халық шығармашылығы» номинациясы бойынша ҚР Мәдениет және спорт министрлігінің «Қазақконцерт» мемлекеттік концерттік ұйымы» РМК солисі Мұқият Асқар және Қызылорда облыстық филармониясы КМК әртісі Күнсұлу Түрікпенқызы Түрікпен марапатталды.
«Әдебиет» номинациясы бойынша «Әдебиет порталы» интернет жобасының қызметкері Арман Манарбекұлы Шеризатов озып шықты.
«Театр және кино» номинациясы бойынша Қ. Қуанышбаев атындағы Мемлекеттік академиялық қазақ музыкалық драма театрының актері Әбілмансұр Әбдінасырұлы Серіков және Хадиша Бөкеева атындағы облыстық қазақ драма театрының актері Жасқайрат Сәбитұлы Валиуллиев жеңімпаз атанды.
«Спорт» аталымында ҚР Ұлттық Олимпиада комитетінің фристайл бойынша нұсқаушы-спортшысы Юлия Евгеньевна Галышева және жеңіл атлетика және пауэрлифтинг бойынша паралимпиадалық спортшы, «TSG contruction» ЖШС өндірістік-техникалық бөлімі инженерінің көмекшісі Жігер Мәлікұлы Кенжеғалиев жүлде алды.
«Дизайн және бейнелеу өнері» номинациясы бойынша зергер, Қазақстан қолөнершілер одағының мүшесі Ардақ Отанғалиұлы Әбішев және «Zeken Moda» ЖШС бас дизайнері Ақбота Жолдасбекқызы Тоқтасынова марапатталды.
«Журналистика» номинациясы бойынша «Хабар» агенттігі« АҚ «Хабар 24« телеарнасының журналисі Рауан Ерұзақұлы Мыңбаев және «Қазақстан« республикалық телерадиокорпорациясы» АҚ Маңғыстау облыстық филиалының жетекші редакторы Әсем Бақытқызы Сартбаева топ жарды.
«Қоғамдық қызмет» номинациясы бойынша Қазақстан халқы Ассамблеясы «»Жаңғыру жолы» республикалық жастар қозғалысының төрағасы Споткай Максим Александрович және «Қазақстан жастарының конгресі» қауымдастығы ЗТБ атқарушы директоры Тоқтар Коммунарұлы Болысов марапат алды.
«Ғылым» номинациясы жүлдесін ҚР Білім және ғылым министрлігі «М.Ә. Айтқожин атындағы Молекулярлық биология және биохимия институты» ШЖҚ РМК ғылыми қызметкері Жүсіпбек Еркінұлы Мұқатаев және «Назарбаев Университеті» дербес білім беру ұйымының докторанты Әсем Нұржанқызы Әшімова иеленді.

Қызылордалық Күнсұлу Түрікпен «Дарын» сыйлығының иегері

<a href="https://kyzylorda-news.kz/">Kyzylorda-news.kz.</a> Биыл Қызылорда облысы республика бойынша осы жылдың басында алғашқылардың бірі болып 700-ге жуық еріктіні біріктіретін «Сыр еріктілері штабын» құрды. Өңірде Мемлекет басшысының қолдауымен мыңнан астам қайырымдылық шарасы ұйымдастырылған.
Бұл туралы Орталық коммуникациялар қызметіндегі брифингте облыс әкімі Гүлшара Әбдіқалықова мәлімдеді.
Оның айтуынша, еріктілер мен кәсіпкерлер тарапынан аз қамтылған, көмекке мұқтаж жандарға 11 баспана салынған. Мемлекет басшысының тапсырмасына сәйкес 42,5 мың теңге мөлшерінде 536 мыңнан астам әлеуметтік төлем жүргізілген.
Сондай-ақ, «Birgemiz Qyzylorda» қоры арқылы 24 мыңнан астам отбасына 50 мың теңге (1,2 млрд. теңге) көлемінде көмек көрсетілген.
<blockquote>
 «Бұдан бөлек, өңірімізде Шығыстың ғұлама ойшылы Әбу Насыр әл-Фарабидің 1150, «Ұлық ұлыс – Алтын орданың» 750, ұлы ақын Абай Құнанбайұлының 175, Ұлы Отан соғысының 75 жылдық мерейтойлары жоғары деңгейде аталып өтілуде», – деді облыс әкімі.
</blockquote>
Жалпы, Қызылорда облысында жыл басынан бері мерейтойлар аясында 2 мыңға жуық мәдени іс-шаралар ұйымдастырылған. Сондай-ақ, Сыр елінде тұңғыш рет «Абай» операсы сахналанып, «Рухани жаңғыру» бағдарламасы аясында ежелгі Бәбіш-Мола, Жанкент, Сығанаққала-шықтарында тарихи-археологиялық зерттеулер жүргізілген.

Қызылорда облысында жыл басынан бері 2 мыңға жуық мәдени іс-шаралар ұйымдастырылған

Kyzylorda-news.kz. Қазақстан Республикасы Мәдениет және спорт министрлігінің Тіл саясаты комитетінің ұйымдастыруымен 2020 жылғы 20 қарашада тіл саясатымен айналысатын басқарма, бөлімдердегі ономастика жұмыстарын күшейту, сала мамандарының атау беру, қайта атау жұмыстарын жетілдіру және дамытуға ынталандыру мақсатында жергілікті атқарушы органдарда қызмет істейтін мамандар арасында командалық «Ұлттық ономастика – Ел айнасы» республикалық онлайн конкурсы өтті.
Республикалық конкурсқа еліміздің 10 облысынан – Ақмола, Ақтөбе, Атырау, Батыс Қазақстан облысы, Қарағанды, Қостанай, Қызылорда, Павлодар, Солтүстік Қазақстан және Шығыс Қазақстан облыстары қатысты.
Қызылорда облысының атынан облыстық ішкі саясат басқармасы, Жалағаш, Қазалы аудандық мәдениет және тілдерді дамыту бөлімдерінің тіл мамандарынан құралған «Яксарт»командасы қатысты.
Конкурсқа қатысушылар «Таныстыру», «Атаулар – сыр шертеді», «Жер-судың аты-тарихтың хаты», «Ономастика» кезеңдері бойынша сынға түсті.
Конкурс қорытындысының нәтижесімен облысымыздың «Яксарт» командасы Бас жүлдені жеңіп алып, 600 мың ақшалай сыйлыққа ие болды.
<img src="https://kyzylorda-news.kz/wp-content/uploads/2020/11/fb_img_1606033091947.jpg" alt="" />

Қызылорда облысының мамандары үздіктер қатарында

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықова Еңбек ардагері, «Темірбек Қараұлы Жүргенов» қоғамдық қорының төрағасы Сәпен Аңсатовты 80 жасқа толу мерейтойымен құттықтады. Аймақ басшысы мерейтой иесініңғибратты ғұмыры өзгелерге үлгі, жастарға өнеге екенін айтып, ұзақ ғұмыр, шығармашылығына зор табыс тіледі.
<blockquote>
 “Аймағымыздың қоғамдық-саяси өміріне белсенді араласып жүрген құрметті азаматтарымыздың бірісіз. Түрлі басылым беттерінде адами қасиеттерді ұлықтайтын, ұрпақ тәрбиесіне байланысты эссе, очерк мақалалары, «Мәуелі мезгіл» ғұмырбаяндық және ата-бабалар ұстанымдары жайлы «Болмыс» атты кітабын жазып, құнды мұра қалдырдыңыз. Сіздің еңбек жолыңыз өскелең ұрпаққа өнеге болары анық. Бүгінгі мерейтойыңыз құтты болсын”, – деді облыс әкімі Г.Әбдіқалықова.
</blockquote>
Мұнан соң аймақ басшысы Еңбек ардагері Сәпен Аңсатовқа Қызылорда облысының «Құрмет» грамотасын табыстап, иығына шапан жапты. Кездесуде облыстық ардагерлер кеңесінің төрағасы Серік Дүйсенбаев пен облыстық мәслихаттың депутаты Шәкизада Әбдікәрімов мерейтой иесінің өмір жолынан естеліктер айтып, елге сіңірген еңбегінің орасан екенін жеткізді.
Өз кезегінде Сәпен Аңсатовқұрмет көрсетіп, еңбегін елеген аймақ басшысына алғысын жеткізді.
Еске салайық, Сәпен Аңсатов – 1940 жылы 21 қарашада Қызылорда облысы, Қармақшы ауданы, Жосалы кентінде дүниеге келген. 
1975 жылы Қызылорда қаласындағы «Комсомол» совхоз техникумын техник-механик мамандығы бойынша, 1984 жылы Жамбыл су шаруашылығы құрылысы институтын инженер-механик мамандығы бойынша сырттай оқып бітірген.
1958-1976 жылдары Жосалы механикалық зауытында токарь, слесарь, мастер, механикалық цех бастығы, комсомол, кәсіподақ ұйымдарының жетекшісі.
1977-2000 жылдары Қызылорда ағаш өңдеу, силикат қабырғалық материалдар зауыттарында, мұнай базасында директор, «Қызылорда мұнай өнімдері» акционерлік қоғамының вице-президенті, «Сырдария мұнай өнімдері» акционерлік қоғамының президенті қызметтерін атқарған.2000 жылдан бастап зейнетте. 
Қармақшы ауданының Құрметті азаматы. «Құрмет» орденінің иегері.
<img src="https://kyzylorda-news.kz/wp-content/uploads/2020/11/126130865_2911973862238997_1826317499084116919_o.jpg" alt="" />

Гүлшара Әбдіқалықова Еңбек ардагері Сәпен Аңсатовты мерейтойымен құттықтады

<a href="https://kyzylorda-news.kz/">Kyzylorda-news.kz.</a> Бүгін Қазақстан Республикасы Мәдениет және спорт министрлігінің «Сәлем, Елорда!» І республикалық өнер фестивалі салтанатты түрде бастау алды. Елімізде тұңғыш рет қолға алынған онлайн форматтағы фестиваль Мәңгілік елдің астанасы, Ұлы Даланың алтын қақпасы – Елордамызға арналып отыр.
Облыстар мен республикалық маңызы бар қалалардың өнері мен мәдениеті күндері үлгісіндегі телевизиялық форматта ұйымдастырылған бұл фестиваль өңірлердің өнері мен мәдени жетістіктерін кеңінен насихаттап, озық үлгідегі орындаушыларды дәріптейді. Сондай-ақ, бұл жоба «Рухани жаңғыру» бағдарламасының аясында ұлттық құндылықтарымызды ұлықтап, 2020 жылғы республикалық маңызға ие мерейтойлар мен жергілікті атаулы даталарды қамтитын болады.
Қазақстандықтарды рухани қолдау, отандық өнерпаздарды ортақ іске жұмылдырып, ел еңсесін көтеруге ықпал етуге бағытталған бұл өнер мерекесі Әбу-Насыр Әл-Фарабидің 1150, Алтын орданың 750, Ұлы Абайдың 175, Шәмші Қалдаяқовтың 90, Ұлы Жеңістің 75 жылдық мерейтойларының мәртебелерін асқақтатып, Қазақстан халқы Ассамблеясының ширек ғасырлық мерекесінің мерейін тасытатын болады.
Жобаны ҚР Мәдениет және спорт министрлігі тарапынан «Қазақконцерт» мемлекеттік концерттік ұйымы» жанындағы «Республикалық концерттік-гастрольдік қызмет орталығы» үйлестіруде.
Фестивальге ҚР Ақпарат және қоғамдық даму министрлігі ақпараттық қолдау көрсетіп, «Qazaqstan» ұлттық арнасының өңірлік филиалдары концерттердің түсірілімдерін ұйымдастырды. 
Барлық концерттік бағдарламалар алдымен Қазақстан Республикасы Мәдениет және спорт министрлігінің YouTube арнасынан көрсетіліп, кейіннен «Qazaqstan» ұлттық арнасының өңірлік филиалдарында жариялауға жолданады. Бұдан бөлек, қазіргі уақытта концерттерді республикалық телеарналардың бірінде ақпараттандыру мүмкіндіктері қарастырылуда. Осылайша, бүгіннен бастап алдын-ала бекітілген кестеге сәйкес республикамыздың барлық өңірлерінің концерттік бағдарламалары көрермендерге жол тартатын болады.
Ұйымдастырушылар аталмыш жобаны жыл сайын дәстүрлі түрде өткізілетін концерттер шеруіне айналдыруды көздеп отыр. 
Өңірлердің өнер өркениетін өрістететін «Сәлем, Елорда» І республикалық фестивалі» көрермендердің көңіл көгінде қалықтайды деп сенеміз.
Байланыс телефондары: 8 701 306 35 60, 8 747 610 75 23, 8 705 549 50 77, 8(7172) 705-286.

Қазақстанда «Сәлем, Елорда!» І республикалық өнер фестивалі басталды

<a href="https://kyzylorda-news.kz/">Kyzylorda-news.kz</a>. Ресейлік композитор Игорь Крутой Димаш Құдайбергенге жаңа ән жазды, деп хабарлайды <a href="https://lenta.inform.kz/kz/igor-krutoy-dimashka-arnap-zhana-an-zhazdy_a3718222">ҚазАқпарат</a>.
Әннің аты – «Мен сені сағынып жүрмін» (Я скучаю по тебе). Әннің сөзін Игорь Крутоймен бірге композитордың досы Игорь Николаев жазып шыққан.
<blockquote>
 «Игорьмен бірге бірлескен туындыны шығармағалы біраз уақыт болып қалды. Бірақ қазір тағы да шығармашылық қоңыраулар, түзетулер, уайым мен естегі ескі күндердің жаңғырығы… Димашпен де сол шаруа – дауыс ырғағын анықтау жұмыстары. Елдегі ең танымал (біздің елдегі ғана емес) дауыс иесі Димашты күту… Осы әннің тағдыры жарқын, ал оған сүйенген махаббат иелері бақытты болар деген сенімдемін», – деп жазады Игорь Крутой&nbsp;<a href="https://www.instagram.com/igorkrutoy65/?utm_source=ig_embed">instagram</a>&nbsp;парақшасында.
</blockquote>

Игорь Крутой Димашқа арнап жаңа ән жазды

<a href="https://kyzylorda-news.kz/">Kyzylorda-news.kz</a>. Қызылорда облыстық Қазақстан халқы Ассамблеясының ұйымдастыруымен Достық үйінде «Мың бала» республикалық мәдени-ағарту жобасының өңірлік байқауының қорытындысы өтті.
Маңызы жоғары жобаны іске асыруда жыл басынан бастап облыс көлемінде түрлі форматта іс-шаралар өткізілді. Онлайн форматта ұлттық және спорттық ойын түрлерінен жарыстар, байқаулар ұйымдастырылды. Жобаға тартылған 500-ден аса жастар қазақстандық бірегейлік пен бірлікті нығайтудағы мемлекеттік тілдің маңыздылығын жете түсінді.
«Асыл сөз» мектебі» бағдарламасы аясындағы облыстық «Тіл мерейі» байқауына 6 оқушы қатысып, бақ сынасты. Бірінші кезеңде оқушылар Отан, тіл, патриотизм тақырыптарында эссе жазды. Екінші кезеңде қойылымдық мәнерлеп оқу сайысында қатысушылар қазақ ақындарының шығармасынан үзінді оқыды. Ал, үшінші кезең «Ораторлық өнер» сайысында оқушылар берілген тақырып бойынша сөйлеу шеберлігін танытты.
Байқау барысында әділ-қазылар қатысушылардың сөйлеу мәнеріне, мәтіннің бейнелік жүйесі мен мазмұндық құрылымына, актерлік шеберлігіне, таңдап алынған шығарманың ерекшелігіне мән берді. Үш кезеңнің нәтижесі бойынша I дәрежелі дипломды №233 орта мектебінің оқушысы Алия Шарипаева, II дәрежелі дипломды №3 IT мектеп-лицейінің оқушысы Алина Ким, III дәрежелі дипломды №5 мектеп-лицейінің оқушысы Карина Черепанова қанжығасына байлап, облыстық Қазақстан халқы Ассамблеясы атынан бағалы сыйлықтармен марапатталды.
Ендігі кезекте әділ-қазылар алқасының шешімі бойынша іріктеуден өткен оқушылар Нұр-Сұлтан қаласында онлайн жүйеде өтетін «Мың бала» республикалық мәдени-ағартушылық жобасының қорытынды шарасына қатысады деп күтілуде.

Қазақстан және Қызылорда облысының жаңалықтары: Мәдениет