<a href="https://kyzylorda-news.kz/">Kyzylorda-news.kz</a> Қазалы мәдени-демалыс кешенінде Ұлы Жеңіс күні мерекесіне орай «Жеңіс – бейбіт өмірдің бастауы» атты мерекелік салтанатты шара өтті.Мерекелік шара басталмас бұрын аудан әкімі Алмасбек Есмаханов, ауданның зиялы қауым өкілдері, құқық қорғау органдарының басшылары, аудандық мәслихат депутаттары, ел ағалары мен аудан тұрғындары алдымен қан майданда қаза тапқандар мен ардагерлердің рухына арнап құран бағыштап, тағзым етті. Сұрапыл соғыс жылдарындағы қанмайданның қаһармандарын 1 минут үнсіздікпен еске алып, «Тағзым» алаңындағы ескерткішке гүл шоқтарын қойды.Гүл шоқтарын қою рәсімінен кейін аудан әкімі мерекелік шараға қатысып, жиынға қатысушылар мен барша аудан тұрғындарын Ұлы Жеңіс күні мерекесімен құттықтады.<blockquote>-Жеңіс күні – төл тарихымыздағы орны ерекше, қасиетті күн! Ерлік пен елдіктің, батырлық пен бірліктің, отансүйгіштік пен қайсар рухтың мерекесі. Биыл адамзат тарихындағы ең ауыр сұрапыл соғыстың аяқталғанына 81 жыл толып отыр. Ұлы Отан соғысына ортақ Отанымызды қорғау үшін Қазалы ауданынан 11 мыңға жуық азамат майданға аттанса, 6 мыңнан астамы ғана аман-есен елге оралған. Бүгінде біздер сол бір сұрапыл соғыста өшпес ерлік көрсетіп, аттары аңызға айналған қасиетті Қазалы топырағынан шыққан батырлар - Үрмаш Түктібаев, Мақаш Балмағанбетов, В.М.Счастнов, Г.Ф.Шляпин, Я.Д.Михайлюк аталарымыздың есімдерін мақтанышпен айтып, ерліктеріне бас иеміз. Ұлы Жеңісті ұлықтау дегеніміз, бұл – ең алдымен, ержүрек батырларымызды жадымызда мәңгі сақтау деген сөз. Бүгінгі тыныш заман мен Тәуелсіз елдің жарқын болашағы – Ұлы Отан соғысында жанқиярлықпен ерлік көрсеткен ата-бабаларымыздың, тылда аянбай еңбек еткен ардагерлеріміздің маңдай тері мен өлшеусіз еңбегінің жемісі. Халқымыздың құрметке лайық қаһармандығы мен қайтпас қажыр-қайратының айнымас үлгісіне айналған Ұлы Жеңістің 81 жылдығы тағы да баршаңызға құтты болсын!&nbsp;Батыр бабаларымыз қорғап қалған қасиетті Отанымыз аман, еліміз тыныш, көк туымыз әрдайым биікте желбірей берсін, - деді аудан әкімі.</blockquote>Мерекелік шарада аудан өнерпаздары Ұлы Отан соғысының басталуы, Жеңіске қол жеткізген кезең мен сұрапыл соғыстағы ерлік көрсеткен қазақ батырлары жайында қойылымдар қойып, патриоттық әндер шырқап, жиылған көпшілікке мерекелік көңіл-күй сыйлады.

Қазалы ауданында Ұлы Жеңіс күніне орай мерекелік шара өтті

<a href="https://kyzylorda-news.kz/">Kyzylorda-news.kz</a> Бұқарбай батыр ауылында 9 мамыр - Ұлы Жеңістің 81 жылдығы және ауданның Құрметті атбегісі Әділбек Нұрмағанбетовтың 70 жасқа толуына орай ұлттық ат спорты түрлерінен облыстық облыстық деңгейдегі кең ауқымды жарыс ұйымдастырылды.Жарыс басында сөз алған Жалағаш ауданы әкімінің орынбасары Ғани Сүлейменов қатысушыларды 9 мамыр - Ұлы Жеңіс мерекесімен және мерейтой иесін құттықтап ел игілігі жолындағы еңбегін атап өтті.Додаға өңірдің әр ауданынан келген шабандоздар қатысып, жүйріктердің бабын, шабандоздардың шеберлігін көрсетті.&nbsp; «Құнан бәйге», «Тай бәйге», «Аламан бәйгелер» ұйымдастырылып, жүлдеге қаржылай сыйлықтар табысталды.Атшабарда ат майдан салған жүйріктердің барлығы дерлік бұған дейін де талай жүлдені еншілеп жүрген бәйге аттары. Бүгінгі ат жарыста осындай республикаға танымал жүйріктер бәйгеге қосылып, ұлан-асыр тойдың көркін қыздырды. 4, 8, 18 шақырымға дейін шауып келген бәйге аттары төрешілердің әділ төрелігімен жүлделерін еншіледі.&nbsp; Ұйымдастырушылар тарапынан бәйгенің түрлеріне қарай &nbsp;қаржылай сый-сияпат үлестірілді.Бұл жарыс – елдік пен ерлікті дәріптеген, ұлттық дәстүр мен атбегілік өнерді ұрпақ жадында жаңғыртқан тағылымды шара болды.

Жалағаш: Ұлттық ат спорты түрлерінен облыстық жарыс өтті

<a href="https://kyzylorda-news.kz/">Kyzylorda-news.kz</a> Ұлы Жеңіс күні мерекесіне орай Қазалы ауданы әкімі Алмасбек Есмаханов аудандық мәслихат төрағасы Ғазиз Әліш және құқық қорғау органдарының басшыларымен бірге аудандағы тыл ардагерлерінің шаңырағына арнайы барып, мерекемен құттықтады.Сұрапыл соғыс жылдарында тылда тынымсыз еңбек етіп, Жеңісті жақындатуға өлшеусіз үлес қосқан ардагерлерге құрмет көрсетіліп, сый-сияпат табысталды. Ел басына күн туған қиын кезеңде белі бекіп, буыны қатпай жатып еңбек майданына араласқан аға буынның ерлігі мен төзімі – бүгінгі ұрпақ үшін үлкен өнеге.Аудан басшысы алдымен Әйтеке би кентінде тұратын 90 жастағы тыл ардагері Қаным Құрманбаева мен Ұлы Отан соғысының ардагері Шамша Бисембаевтың жары, тыл ардагері Қанымкүл Оспанованың шаңырағына барып, мерекелік лебізін жеткізді. Сондай-ақ Жалаңтөс батыр ауылындағы тыл және еңбек ардагері Дәуіт Сайын ақсақал мен Қазалы қаласында тұратын ардагер Мәлік ақсақалға да арнайы сәлем беріп, құрмет көрсетті.Кездесу барысында аудан әкімі тыл еңбеккерлерінің Ұлы Жеңіс жолындағы ерен еңбегі ешқашан ұмытылмайтынын атап өтті. Майдан даласында жаумен арпалысқан жауынгерлерге азық-түлік, киім-кешек дайындап, күн-түн демей еңбек еткен тыл ардагерлерінің қажырлы еңбегі – бейбіт өмірдің берік негізі екенін атап өтті. Ел ағаларының өнегелі ғұмыры, ұрпақ тәрбиесіне қосқан үлесі мен ел бірлігін сақтаудағы ақыл-парасаты ерекше құрметке лайық екені жеткізді. Ақ жаулықты аналар мен ақсақалдардың ақ батасы мен тілегі – елдің берекесі мен ырысының бастауы екені айтты.Өз кезегінде ардагерлер көрсетілген құрметке ризашылықтарын білдіріп, ел амандығы мен жұрт тыныштығын тілеп, ақ баталарын берді.

Аудан әкімі тыл ардагерлерін мерекемен құттықтады

<a href="https://kyzylorda-news.kz/">Kyzylorda-news.kz</a> Арал аудандық мәдениет үйінде ақын, мәдениет жанашыры Сағынай Дәріғұлұлын еске алуға арналған «Сағындырған Сағынай» атты рухани-әдеби кеш өтті. Ақынның 75 жылдығына орай ұйымдастырылған тағылымды шараға аудан зиялылары, мәдениет және өнер саласының өкілдері, ақын-жазушылар, ардагерлер, туған-туыстары мен аудан тұрғындары қатысты.Кеште әсерлі прологпен ашылып, ақынның өмір жолы мен шығармашылық мұрасы туралы тағылымды ойлар айтылды. Жүргізушілер Сағынай Ешекеновтің туған жер руханиятына қосқан үлесі мен өнерге адал болмысын тебіреніспен жеткізді.Шара барысында Арал ауданы әкімінің орынбасары Нұрмұхаммед Омарұлы Бохаев сөз сөйлеп, ақынның ел мәдениеті мен руханиятындағы орнына тоқталды. Ол өз сөзінде Сағынай Ешекеновтің ақындық қырымен қатар, ұйымдастырушылық қабілеті мен елге деген жанашырлығы кейінгі ұрпаққа үлгі екенін атап өтті.<blockquote>— Сағынай Дәріғұлұлы — туған жерінің рухани дамуына өлшеусіз үлес қосқан азамат. Ол өнер мен мәдениетті өркендетуге, жастардың шығармашылыққа бет бұруына айрықша еңбек сіңірді. Оның артында қалған жырлары мен өнегелі істері халық жадында мәңгі сақталады. Осындай тұлғаның мерейтойын тағылымды кешпен атап өту — кейінгі буынның рухани сабақтастығын айқындайтын маңызды қадам, — деді аудан әкімінің орынбасары.</blockquote>Кеш аясында ақынның өмірі мен шығармашылығынан сыр шертетін «Отыз екі көктем» атты кітабының тұсаукесер рәсімі өтті. Бұл еңбек — ақынның терең сезімге толы жырларын, тағдырлы толғаныстарын бүгінгі оқырманмен қайта қауыштырған рухани мұра ретінде бағаланды.Сонымен қатар ақынның сөзіне жазылған әндер орындалып, көркем жырлары оқылды. Әсіресе, ақынның туған-туыстары мен немерелерінің қатысуымен орындалған шығармалар кештің мазмұнын тереңдете түсті.Кеш барысында ұйымдастырылған «Сағындырған Сағынай» атты облыстық жазба ақындар мүшайрасының жеңімпаздары марапатталып, сөз өнеріне құрмет көрсетілді.Тағылымды шарада ақынмен бірге қызмет еткен замандастары, зиялы қауым өкілдері мен ардагерлер естелік айтып, оның адамгершілік болмысы, өнерге деген адалдығы және елге сіңірген еңбегі туралы жылы лебіздерін білдірді.Кеш соңында ақын әулеті атынан кітаптың жарық көруіне қолдау білдірген азаматтарға алғыс айтылып, Сағынай Ешекеновтің рухани мұрасын ұлықтауға үлес қосқан жандарға ризашылық білдірілді.«Сағындырған Сағынай» кеші — ақын рухына тағзым етіп қана қоймай, ұлттық руханиятты дәріптеген, ұрпақ сабақтастығын айшықтаған мазмұнды мәдени шара ретінде көпшілік көңілінен шықты

Жырымен жүректе қалған Сағынай

<a href="https://kyzylorda-news.kz/">Kyzylorda-news.kz</a> Қызылорда облысы Полиция департаменті бастығының орынбасары полиция полковнигі Омаров Оралбек Тәубақабылұлы және Ардагерлер кеңесінің төрағасы Шаймағамбетов Әмірбек Бердібекұлы бастаған қызметкерлер тобы Ұлы Жеңіс күніне орай ішкі істер органдарының ардагерлеріне құрмет көрсетті.Сыр өңірінің тәртіп сақшылары ел тыныштығы жолында аянбай еңбек еткен ардагерлерді мереке қарсаңында арнайы құттықтап, олардың шаңырағына барып, ізгі тілектерін жеткізді. Тыл еңбеккерлері мен Ұлы Отан соғысы ардагерлерінің жесірлері де әрдайым назардан тыс қалған емес.Осыған орай полиция ведомствосының өкілдері мен департаменттің Ардагерлер кеңесінің мүшелері &nbsp;Әлиев Төлеш қарияға, Абсадирова Аманкүл және Жубаниязова Шаркуль апаларға барып, мерекелік сый-сияпаттарын табыстады. Қазіргі таңда ішкі істер органдары ардагерлерінің қатарында 5 тыл еңбеккері мен 6 ҰОС ардагерінің жесірі бар.Мереке аясында ішкі істер саласында ұзақ жылдар адал қызмет атқарып, бүгінде құрметті зейнет демалысына шыққан ардагерлердің үйлеріне арнайы барып, азық-түлік себеттері жеткізілді. Бұл – олардың ел қауіпсіздігі жолындағы ерен еңбегіне деген шынайы құрметтің белгісі.Иығына погон тағып, құқық қорғау саласының ауыр да жауапты жүгін абыроймен арқалаған ардагерлер саналы ғұмырын ел тыныштығына арнады. Қызметтің ыстығы мен суығына төтеп берген тәжірибелі мамандар бүгінде жас полицейлерге ақыл-кеңестерін айтып, кәсіби шеберліктің қыр-сырын үйретіп келеді.Ұрпаққа парасат пен адамгершіліктің өнегесін көрсеткен ардагерлер өздеріне көрсетілген құрмет үшін Департамент басшылығы мен Ардагерлер кеңесіне алғыстарын білдірді,— Бізді ұмытпай, мереке сайын арнайы келіп, құрмет көрсетіп жүрген азаматтарға ризашылығымыз шексіз. Ел тыныштығын күзетіп жүрген барша қызметкерлерге толағай табыс, мықты денсаулық және отбасыларына амандық тілейміз, — деп ақ баталарын берді.

Қызылорда облысы Полиция департаментінің қызметкерлері Ардагерлер кеңесімен бірлесіп ардагерлерді құттықтады

<a href="https://kyzylorda-news.kz/">Kyzylorda-news.kz</a> 9 мамыр – Жеңіс күніне орай «Тағзым алаңында» салтанатты шара өтті. Тағылымды жиынға тыл және еңбек ардагерлері, Ауған соғысының ардагерлері, мемлекеттік және құқық қорғау органдарының өкілдері, әскери бөлім қызметкерлері, аудан тұрғындары мен қонақтар қатысып, ел мен жер үшін жанын қиған боздақтардың рухына тағзым етті.Салтанатты шарада Шиелі ауданы әкімі Айтбай Жандарбеков жиналған қауымды Ұлы Жеңістің 81 жылдығымен құттықтап, бейбіт өмір сыйлаған ардагерлерге құрмет білдірді.<blockquote>—“ Жеңіс мерекесі – майдан даласында жанын қиған батырларымыздың ерлігіне, тылдағы тынымсыз еңбек иелерінің қажыр-қайратына тағзым ететін қасиетті күн. Батыр бабаларымыздың ерлігі мен елге деген адалдығы – кейінгі ұрпаққа мәңгілік өнеге. Біз олардың алдында әрдайым қарыздармыз,” — деді аудан басшысы.</blockquote>Аудан әкімі өз сөзінде Мемлекет басшысының Жарлығымен Нұрлыбек Машбекұлы Нәлібаевтың Қазақстан Республикасы Премьер-Министрінің бірінші орынбасары болып тағайындалуына тоқталып, бұл ел дамуына сүбелі үлес қосқан білікті басшыға берілген жоғары сенім екенін атап өтті. Сонымен қатар, Президент Жарлығымен Мұрат Нәлқожаұлы Ергешбаевтың Қызылорда облысының әкімі болып тағайындалуы Сыр өңірінің өсіп-өркендеу жолындағы сабақтастық пен сенімнің айқын көрінісі екенін жеткізіп, жаңа басшылықпен бірге аймақтың дамуы жаңа белеске көтерілетініне сенім білдірді.Жиын барысында аудан әкімі Мемлекет басшысы Қасым-Жомарт Кемелұлы Тоқаевтың :«Біз отандастарымыздың қайтпас қайсарлығы мен қажырлы еңбегін ешқашан ұмытпаймыз. Жанқиярлық пен ерліктің озық үлгісін көрсеткен батырларымыздың есімін әрдайым ұлықтаймыз. Ардагерлерімізге қамқорлық жасап, қолдау білдіреміз» деген сөзің атап өтті.Салтанатты шарада Ұлы Отан соғысында қаза тапқан боздақтар рухына бір минут үнсіздік жарияланып, Ұлы Отан соғысы құрбандарына арналған ескерткішке гүл шоқтары қойылып, тағзым еттілді. Шара соңында жергілікті өнерпаздар патриоттық әндер орындап, соғыс жылдарындағы тарихи әндерді шырқап, көпшілікке мерекелік көңіл-күй сыйлады.Еске салайық, Екінші дүниежүзілік соғыс жылдары ауданымыздан 6 мыңнан астам азамат майданға аттанып, олардың 4407-сі туған жерге оралмады. Бүгінде аудан көлемінде 137 майдангердің есімі көшелерге беріліп, ерлік рухы ел жадында мәңгілікке сақталуда. Бұл, батыр бабаларымызға көрсетілген құрмет пен кейінгі ұрпақтың тағзымының айқын көрінісі.Фото: Шиелі ауданы әкімінің баспасөз қызметі

Ерлік – елге мұра, ұрпаққа ұран

<a href="https://kyzylorda-news.kz/">Kyzylorda-news.kz</a> 9 мамыр – Ұлы Жеңіс мерекесі күні Арал ауданы әкімінің орынбасары Еркін Әбішев пен Нұрмұхамед Бохаев Арал қаласындағы бірнеше тыл ардагерлерінің шаңырағында болып, Жеңістің 81 жылдығымен құттықтады.Аудан әкімінің орынбасары Еркін Жұмаханұлы алдымен Ермекбай Досмамбетовтың отбасында болып тылда аянбай тер төккен ақсақалға құрмет көрсетті. Онан соң жастығын еңбекпен өткерген Кульжан Сержанова мен Канжан Елеусізоваларды Жеңіс күнімен құттықтап, ілтипат көрсетті.Тыл майдангерлеріне көрсетілген құрмет мұнымен шектелген жоқ. Аудан әкімінің орынбасары Нұрмұхамед Омарұлы аудандағы абыз кеуде, қазыналы қария, тыл ардагері, Арал ауданының құрметті азаматы Шәкірат Дәрмағамбетовтың шаңғырағында болып, қазына кеуде, шежіре сандық қарияны 9 мамыр Жеңіс күнімен құттықтады.Мұнан соң тыл ардагерлері Бибосын Тайлақбаев пен Үртай Мархабаевалардың шаңырағына барып, арнайы құрмет көрсетті.Ұлы Отан соғысы жылдарында балалықтың бал қызық кезеңдерін ауыр еңбекке айырбастаған тыл ардагерлерінің Жеңісті жақындатуға қосқан өлшеусіз үлесі өскелең ұрпаққа үлгі-өнеге. Оларға әрдайым көрсетілер құрмет пен алғыс та шексіз екендігі сөзсіз.Мереке қарсаңында ардагерлер өздеріне көрсетілген құрметке ризашылықтарын білдіріп, ел-жұрттың амандығын тілеп, ақ баталарын берді.

Тыл ардагерлеріне құрмет көрсетілді 

<a href="https://kyzylorda-news.kz/">Kyzylorda-news.kz</a> Ұлы Жеңіс күні – бейбіт өмір мен азат болашақ үшін жан аямай күрескен майдангерлердің ерлігіне тағзым ететін, батыр бабалардың рухын ұлықтайтын мереке. Ұрпаққа тыныш өмір сыйлаған ардагерлердің есімі мен жанқиярлық ерлігі әрдайым ел жадында сақталады.Осыған орай &nbsp;«Тағзым» алаңында 9 мамыр – Ұлы Жеңіс күніне арналған «Ұмытылмас ерлік, өшпес даңқ» атты еске алу шарасы өтті. Тағылымы мол шараға Қармақшы ауданы әкімі Жандос Еркінбек, ардагерлер, зиялы қауым өкілдері, жастар және аудан тұрғындары қатысты.Салтанатты жиын Ұлы Отан соғысында ерлікпен қаза тапқан боздақтарды еске алудан басталып, «Мәңгілік алау» маңында майдан даласында жанын қиған батырлардың рухына тағзым жасап, гүл шоқтарын қойды.Сондай-ақ майдангерлерді еске алу мақсатында бір минут үнсіздік жарияланып, тұрғындар ерліктерін еске алды.Шара барысында сөз сөйлеген аудан басшысы Ұлы Жеңістің тарихи маңызына тоқталып:<blockquote>-Біз Отан үшін от кешкен ерлердің рухына мәңгілік тағзым етіп, олардың алдында бас иеміз. Ұлы дала батырларының қайсар рухын халық болып ұлықтау –перзенттік парызымыз. Бірліктің бұл ұлы күші ұрыс даласында ғана емес, тылдағы қажырлы еңбек те Жеңістің басты негізіне айналды. Әкелеріміз бен аналарымыздың қызметі халқымыздың жадында мәңгі сақталады. Тәуелсіздігіміз берік болуы, еліміздің өркендеуі де осынау мерекенің жемісі. Сондықтан әрқашан аспанымыз ашық, еліміз аман болсын! Ұлы Жеңіс күні құтты болсын, – деп атап өтті.</blockquote>Айта кетсек, Ұлы Отан соғысына елімізден 1 миллионнан астам азамат аттанып, олардың жартысына жуығы майдан даласынан оралмаған. Осы жолда киелі Қармақшы ауданынан 5000-ға жуық батырларымыз сұрапыл соғыста ерлік көрсетіп, жеңіс туын желбіретуге үлестерін қосты.Фото: Қармақшы ауданы әкімінің баспасөз қызметі

«Ұмытылмас ерлік, өшпес даңқ»

<a href="https://kyzylorda-news.kz/">Kyzylorda-news.kz</a> «Өнер орталығында» даңқты қолбасшы Жалаңтөс Баһадүрдің 450 жылдығына арналған «Алты Алаштың арысы - Ер Жалаңтөс!» атты республикалық ақындар айтысының ашылу салтанаты өтті.Салтанатқа облыс әкімінің орынбасары Мейрамбек Шермағанбет қатысты.&nbsp; Республикалық айтысқа Қазақстанның еңбек сіңірген қайраткері, Айтыс ақындары мен жыршы-термешілердің халықаралық одағының төрағасы Жүрсін Ерман, ҚР Парламенті Сенатының депутаты Нұртөре Жүсіп, Қазақстанның еңбек сіңірген қайраткері, Қазақстан Жазушылар одағының төрағасы Мереке Құлкенов, айтыскер ақын, «Алтын домбыра», мемлекеттік «Дарын» сыйлығының иегері Бекарыс Шойбеков, Мәдениет қайраткері Кенжебай Жүсіп қазылық етті.Жыр додасы жасанды интеллект көмегімен жасалған Жалаңтөс Баһадүр образындағы тақырыптық монологпен басталды.Ашылу рәсімінде Мейрамбек Зинабдинұлы &nbsp;еліміздің әр өңірінен жиналған айтыскер ақындарға сәттілік тіледі.<blockquote>«Ұлы Жеңістің 81 жылдығы күні даңқты қолбасшы Жалаңтөс Баһадүрдің 450 жылдығына арналған республикалық ақындар айтысы басталды. Мемлекет басшысы Қасым-Жомарт Кемелұлы: «Тарихты білу дегеніміз – өткенмен өмір сүру емес. Біз тарихымызды терең білу және одан тағылым алу арқылы өткеннің қателігін қайталамайтын, Ұлы даланы мекендеген ұлы бабалар жолын лайықты жалғастыра алатын ұрпақ тәрбиелеуге тиіспіз», - деген болатын.Жалаңтөс Баһадүр - Қазақ хандығының сындарлы кезеңінде саясаткер әрі қолбасшы болған, ел есінде мәңгі сақталған бірегей тұлға. Аймағымызда батыр рухына арналған &nbsp;мәдени іс-шаралар ұйымдастырылуда.&nbsp;Соның ішінде бүгінгі республикалық &nbsp;айтыстың маңызы ерекше. Себебі қатысушылардың бәрі - бейбіт күнгі батырлар бейнесін өлеңмен өріп, ұрпаққа рухани тәрбие сіңірген тарландар.&nbsp;Сөз – қуатты құрал, ақын - сөз құдіретін кеудеден қорытып шығарып, ой-санаға құюшы. Сондықтан бүгін ерлік даңқы аспандайтын күн болмақ. Сөз жүйріктеріне батыр атын асқақтатып, ел рухын көтеріп, көмбеге сүрінбей жетіп, бәйгелі болыңыздар дейміз! Баршаңызға сәттілік тілеймін!», - деді Мейрамбек Зинабдинұлы.</blockquote>Айтыс аламанында 12 ақын бақ сынады. Қорытындысында Шығыстың ақын қызы Жұлдызай Маратбек бас жүлдені иеленсе, үш дүркін «Алтын домбыра» иегері, жерлесіміз Мұхтар Ниязов I орынды қанжығасына байлады. II орынды Қызылжардың құлагері Хавдолла Бейісхан алса, III орынды қыз бен жігіт айтысының жүйрігі Мақсат Ақанов пен Сырдың талантты перзенті Мейірбек Сұлтанхан өзара бөлісті. Ал Жалаңтөс Баһадүр атындағы арнайы жүлдемен белгілі айтыскер ақын Дидар Қами марапатталды.Фото: Қызылорда облысы әкімінің баспасөз қызметі

Сыр елінде даңқты қолбасшы Жалаңтөс Баһадүрдің 450 жылдығына арналған республикалық ақындар айтысы өтті

<a href="https://kyzylorda-news.kz/">Kyzylorda-news.kz</a> Ел үшін еңбек етіп, бейбіт күн орнауына үлес қосқан аға буын өкілдері әрдайым құрметке лайық. Осыған орай &nbsp;9 мамыр – Ұлы Жеңіс күніне байланысты Қармақшы аудан әкімі Жандос Еркінбек тыл ардагерлерінің шаңырағына арнайы барып, мерекемен құттықтады.Аудан басшысы алдымен тыл ардагері Зинеп Оқасованың үйіне барып, Ұлы Жеңіс мерекесіне арналған ізгі тілегін жеткізді. Балалық шағы сұрапыл соғыс жылдарымен қатар келген аяулы жан мектеп қабырғасында жүрген уақыттан тылдағы жұмыстарға белсене араласып, ел игілігі жолында еңбек етті. Көпжылдық еңбегі үшін “Еңбек ардагері” медалімен марапатталған ардақты ана бүгінде үлкен әулеттің алтын діңгегіне айналып отыр.Мұнан соң аудан әкімі Тәжіхан Бұхарбаевтың шаңырағына барып, құрмет көрсетті. Ақжар ауылында дүниеге келген Тәжіхан Кетеғұлұлы жастайынан еңбекке араласып, түрлі салада абыройлы қызмет атқарған. Өнегелі ұрпақ тәрбиелеп өсірген қария бүгінде немере-шөберелерінің ортасында бақытты ғұмыр кешуде.Сонымен қатар Жандос Еркінбек ауданымыздың Құрметті азаматы Иса Бисеновтің шаңырағына арнайы барды. Иса Бисенов саналы ғұмырын денсаулық сақтау саласына арнаған. Әскери борышын өтеу кезінде Вьетнам соғысы қимылдарына қатысты. Ел алдындағы ерен еңбегі мен азаматтық болмысы үшін көптеген медальдармен және халықаралық деңгейдегі марапаттармен наградталған.Кездесу барысында аудан әкімі ардагерлердің ел үшін жасаған қызметі әрдайым құрметке лайық екенін жеткізіп, мерекеге орай «Алғыс хат» табыстап, құрмет көрсетті.Фото: Қармақшы ауданы әкімінің баспасөз қызметі

Жеңіске қосылған тылдағы еңбек ел есінде

<a href="https://kyzylorda-news.kz/">Kyzylorda-news.kz</a> ҚР Премьер-министрінің бірінші орынбасары Нұрлыбек Нәлібаев, облыс әкімі Мұрат Ергешбаев Тереңөзек кентінде тұратын Ұлы Отан соғысының ардагері, Сырдария ауданының құрметі азаматы Яхия Тасыровты 9 мамыр – Жеңіс күнімен құттықтап, дәстүрге сай сый-сияпат көрсетті.Бүгінде жасы ғасырдан асқан қарт майдангер 1942 жылы соғысқа аттанып, Сталинградты, Курскіні, Польшаны азат етуге қатысқан. Бейбіт өмірде де белсенді еңбек етіп, ауыл шаруашылығы өндірісінің өркендеуіне үлес қосқан.Одан кейін қала және аудан әкімдері, құқық қорғау органдарының, аумақтық департаменттер мен басқармалардың басшылары қатысқан мәжіліс өтті. Жиында Нұрлыбек Нәлібаев бірге қызмет атқарған әріптестеріне ризашылығын білдіріп, өңірдің әлеуметтік-экономикалық дамуына қосқанүлестері үшін алғыс айтты.<blockquote>«Президентіміз Қасым-Жомарт Кемелұлының Жарлығымен Премьер-министрдің бірінші орынбасары қызметіне тағайындалдым. Бұл – маған жүктелген зор жауапкершілік. Сіздермен бірге 4 жылдан астам уақыт бойы туған жеріміздің өсіп-өркендеуі жолында еңбек еттік. Мемлекет басшысының және Үкіметтің тікелей қолдауының арқасында аймақта ауқымды жобалар жүзеге асып, халықтың тұрмыс сапасын жақсартуға бағытталған маңызды бастамалар қолға алынды. Қызылорда облысы әлеуметтік-экономикалық көрсеткіштер бойынша республикада үнемі алдыңғы қатардан көрініп келеді. Бұл – кәсіби біліктіліктің, ел бірлігінің және ортақ жұмыстың нәтижесі.Мемлекет басшысының бастамасымен елімізде жүзеге асырылып жатқан «Әділетті Қазақстан»реформалары мен «Таза Қазақстан» экологиялық бағдарламасының табысты орындалуы – барлығымыздың бірлескен еңбегімізге байланысты. Сондықтан алдағы уақытта да ел игілігі жолында жұмыла жұмыс істеуіміз қажет.Жаңадан тағайындалған облыс басшысы Мұрат Нәлқожаұлына қолдау көрсетіп, өңірдің дамуына бірге атсалысасыздар деп сенемін. Біз де Үкімет тарапынан жан-жақты қолдау көрсетеміз. Мұрат Нәлқожаұлына Президент жүктеген міндеттерді жүзеге асыруда табыс тілеймін. Өңіріміз өркендеп, дами берсін! Баршаңызға зор денсаулық, отбасыларыңызға амандық тілеймін», – деді Нұрлыбек Машбекұлы.</blockquote>Әрі қарай ҚР Премьер-министрінің бірінші орынбасары зиялы қауым өкілдерімен бірге Президент паркі аумағындағы 300 орындық балалар тынығу лагерінің құрылыс барысымен танысты.Президент тапсырмасына сәйкес, Нұрлыбек Машбекұлының бастамасымен салынып жатқан лагерьде жеткіншектердің демалысын ұйымдастыруға, денсаулығын нығайтуға барлық қолайлы жағдай жасалады. Онда спорт кешені, мәдени-көпшілік іс-шараларға арналған event-аймақ, заманауи үлгідегі 5 киіз үй, ашық бассейн, спорт түрлеріне арналған ойын алаңдары, амфитеатр, балалар мен тәрбиешілерге арналған тұрғын блоктар қамтылған. Жыл он екі ай қызмет көрсететін лагерь 1 маусым – Балаларды қорғау күніне орай пайдалануға беріледі.Бұдан бөлек, Нұрлыбек Нәлібаев коммуналдық сала қызметкерлерімен арнайы кездесіп, мамандар еңбегіне алғыс білдірді. Тәулік бойы үздіксіз еңбек етіп, тұрғындардың жайлы өмір сүруіне үлес қосқан бірқатар қызметкер Алғыс хатпен марапатталды.Сонымен қатар, Нұрлыбек Машбекұлы бұқаралық ақпарат құралдарының өкілдерімен кездесіп, өңірдің дамуы жолында атқарылған жұмыстарды халыққа жедел әрі сапалы жеткізген журналистер қауымына алғыс білдірді.Фото: Қызылорда облысы әкімінің баспасөз қызметі

Сыр өңірінде соғыс ардагерлеріне, коммуналдық сала мамандарына  қызмет көрсетілді

Бүгін Қызылорда қаласындағы бауырластар зиратында Ұлы Отан соғысында қаза тапқан жауынгерлерді еске алуға арналған тағзым митингі өтті. Іс-шараға әскери ұрыс қимылдары ардагерлері, облыстық Қазақстан халқы Ассамблеясының өкілдері, этно-мәдени бірлестіктер мүшелері, Қызылорда қалалық қорғаныс істері жөніндегі басқармасы,жастар ұйымдары мен бұқаралық ақпарат құралдарының өкілдері және оқушылар қатысты.Митинг Құрмет қарауылының сап түзеуімен басталды. Жиынды «Славяне» қоғамдық-мәдени орталығының төрайымы Галина Щербакова ашып, Жеңіс күнінің ел тарихындағы маңызына тоқталды.– Жеңіс күні – қайғы мен қуаныш қатар өрілген қасиетті мереке. Бұл – майдандағы ерлік пен тылдағы жанкешті еңбектің, миллиондаған адамның тағдыры мен құрбандығының символы. Бүгінгі ұрпақ бейбіт өмірдің қандай ауыр жолмен келгенін ұмытпауы керек, – деді ол.Шара барысында жүргізушілер Ұлы Жеңістің тарихи мәні туралы айтып, майдангерлердің ерлігі ешқашан ұмытылмайтынын атап өтті. Сондай-ақ, Қазақстанда құрылған даңқты Панфилов дивизиясының ерлігі мен оның бүгінгі жас ұрпақ тәрбиесіндегі орны ерекше аталды. №5 мектеп-лицейінің оқушылары әскери-патриоттық бағыттағы әдеби монтаж ұсынып, Отан қорғаушыларға арналған өлеңдер оқыды.<img src="https://knadmin.beoblood.kz/uploads/IMG_20260509_WA_0001_19c0a8cbe8.jpg" alt="IMG-20260509-WA0001.jpg">Митингте соғыс жылдарындағы медбикелердің жанқиярлық еңбегі де ерекше сөз болды. Қатысушылар майдан даласынан жараланған сарбаздарды құтқарған ақ халатты абзал жандардың ерлігіне тағзым етті.Сонымен қатар, Қызылорда қаласының соғыс жылдарында маңызды эвакуациялық госпиталь орталығы болғаны айтылды. Майданнан әкелінген мыңдаған жаралы сарбаз осында ем алған. Алайда олардың барлығын аман алып қалу мүмкін болмаған. Бүгінде бауырластар зиратында 81 жауынгер жерленген, олардың жетеуінің есімі белгісіз.Шара соңында жиналғандар қаза болған боздақтарды бір минут үнсіздікпен еске алып, гүл шоқтарын қойды. Әскери-патриоттық әндер орындалып, Жеңіс рухына тағзым жасалды.Митингтің негізгі мақсаты – жас ұрпаққа тарихи жадыны сақтау, бейбіт өмірдің қадірін ұғындыру және ерлік көрсеткен батырларға құрмет білдіру болды.<img src="https://knadmin.beoblood.kz/uploads/IMG_20260509_WA_0002_2e35629dad.jpg" alt="IMG-20260509-WA0002.jpg">

Қазақстан және Қызылорда облысының жаңалықтары: Қоғам