<a href="https://kyzylorda-news.kz/">Kyzylorda-news.kz</a> Премьер-министр Олжас Бектенов елімізде екі атом электр станциясы салынатынын айтты, деп хабарлайды <a href="https://baq.kz/aes-salu-boyynsha-tiisti-kelisimderge-qol-qoyamyz-bektenov-200006424/">BAQ.KZ</a> тілшісі.<blockquote>Жақын арада Алматы облысында бірінші Атом электр станциясын салу бойынша тиісті келісімдерге қол қоямыз. Сондай-ақ екінші және үшінші Атом электр станциясы құрылысының ықтимал орындарын анықтау үшін өңірлерді талдау жұмыстары аяқталуға жақын - дейді Олжас Абайұлы Үкіметтің кеңейтілген отырысында.</blockquote>Фото: freepik.com

АЭС салу бойынша тиісті келісімдерге қол қоямыз - Премьер-Министр

<a href="https://kyzylorda-news.kz/">Kyzylorda-news.kz</a> Премьер-министр Олжас Бектенов Үкіметтің кеңейтілген отырысында биыл қолға алынатын өнеркәсіп саласындағы ірі инвестициялық жобаларды атады, – деп хабарлады <a href="https://kaz.inform.kz/news/biil-kuni-74mlrd-dollar-bolatin-polietilen-zauitinin-kurilisi-bastaladi-603e32/">Қазақпарат.</a><blockquote>— Биыл құны 7,4 млрд доллар болатын полиэтилен зауытының құрылысы басталады. Құны 1,3 млрд долларды құрайтын бутадиен зауытының жобалау-сметалық құжаттамасын әзірлеу қолға алынады. Қазақстан даму банкінің қолдауымен инвестор Павлодар облысында алкилат шығаратын зауыт салып бастағалы отыр. Qarmet компаниясы жылына 200 мың тонна көмір өндіретін іске асыруға кірісті, — деді ол.</blockquote>Үкімет басшысы жобаның құны 262 млн доллар болатынын, соның аясында көмір химиясы өнімдерінің 15-тен астам түрін шығару көзделіп отырғанын мәлім етті.<blockquote>— China Energy компаниясы елімізде көмір химиясы бойынша 4 млрд доллардың инвестициялық жобаларын іске асыруға қызығушылық білдіріп отыр. Қазіргі таңда оңтайлы көмір кенінің орнын таңдауда, — деді Олжас Бектенов.</blockquote>Фото: Мақсат Шағырбаев

Биыл құны 7,4 млрд доллар болатын полиэтилен зауытының құрылысы басталады

<a href="https://kyzylorda-news.kz/">Kyzylorda-news.kz</a> &nbsp;Өткен жылды оң көрсеткіштермен аяқтадық. Бұл туралы Үкіметтің кеңейтілген отырысында Президент Қасым-Жомарт Тоқаев мәлім<a href="https://kaz.inform.kz/news/biltirgi-natizhe-zhaman-emes-memleket-basshisi-f44942/"> етті.</a><blockquote>– Былтыр біраз қиындық болғаны рас. Экономиканың дамуына көптеген жағымсыз факторлар ықпал етті. Дегенмен, біз ахуалды ушықтырмай, бақылауда ұстай алдық. Жалпы нәтиже жаман емес деуге болады. Өткен жылды оң көрсеткіштермен аяқтадық. Алайда жайбарақат отыруға болмайды, шешімін табуы қажет түйткілдер әлі де көп. Мұны сарапшылар да, азаматтар да жақсы біледі, – деді Мемлекет басшысы.</blockquote>Президент еліміздің экономикасын әртараптандыру міндеті тиісті деңгейде орындалмағанын айтты.<blockquote>–&nbsp;Экономикамыз Ұлттық қордың қаржысына аса тәуелді болып тұр. Бірақ, осы жерде атап өтуіміз керек, Ұлттық қор&nbsp;– бұл мемлекеттік экономиканың ажырамас бөлігі. Бизнестің инвестициялық белсендігі әлі де&nbsp;болса төмен деңгейде. Бұл олқылықтарды биылдан қалдырмай дереу жою қажет. Үкімет нақты шаралар қабылдауы тиіс,&nbsp;– деді Қасым-Жомарт Тоқаев.</blockquote> Фото: Ақорда

Былтырғы нәтиже жаман емес – Мемлекет басшысы 

<a href="https://kyzylorda-news.kz/">Kyzylorda-news.kz</a> Еліміздің 2024 жылғы әлеуметтік-экономикалық дамуы қорытындыланып, алдағы кезеңге арналған негізгі міндеттер айқындалатын жиын басталды, деп хабарлады AqordaҚасым-Жомарт Тоқаев:<blockquote>«Бүгін біз Үкіметтің кеңейтілген отырысында өте өзекті мәселелерге тоқталамыз. Себеп – бәрімізге белгілі. Қазір дүние жүзі түбегейлі өзгеріске ұшырап жатыр. Жаһандық үдерістер, ең алдымен, еліміздің экономикалық ахуалына әсерін тигізетіні анық.Жаппай цифрландыру дәуірі, яғни жаңа технологиялық кезең басталды. Күллі әлем мүлдем басқа жағдайда өмір сүреді. Біз соған міндетті түрде дайын болуымыз керек. Жаңа технологиялық ахуалға сақадай сай тұруымыз қажет. Бұл – еліміздің бәсекеге қабілетін арттырып, тұрақты дамуына жол ашатын аса маңызды фактор.Үкімет пен әкімдердің жұмысы қаншалықты тиімді екенін алдымен экономиканың даму көрсеткіштері мен азаматтардың тұрмыс сапасына қарай бағалаймыз. Осы жұмыстың нәтижесі былтыр қандай болды? Негізгі міндеттер орындалды ма? Бүгін осы сұрақтарға тоқталамыз және жақын арада шешімін табуға тиіс өзекті мәселелерді талқылаймыз», – деді.</blockquote>Күн тәртібіне сәйкес, жиында Премьер-Министр Олжас Бектенов, Премьер-Министрдің орынбасары Серік Жұманғарин, Ұлттық банк төрағасы Тимур Сүлейменов, «Самұрық-Қазына» АҚ басқарма төрағасы Нұрлан Жақыпов, Астана қаласының әкімі Жеңіс Қасымбек, Шымкент қаласының әкімі Ғабит Сыздықбеков, Қызылорда облысының әкімі Нұрлыбек Нәлібаев баяндама жасайды.Фото: Aqorda

Бүгін Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы өтуде

<a href="https://kyzylorda-news.kz/">Kyzylorda-news.kz</a> Аудан орталығы – Әйтеке би кентінің батыс беткейінен ұлттық спорт түрлерін дамыту мақсатында жаңа ипподромның құрылысын бастау жұмыстары жоспарланып отыр. Бұл жоба жеке кәсіпкерлердің демеушілігімен жүзеге асырылмақ.Осыған сәйкес, бүгін аудан әкімі Мейрамбек Шермағанбет тиісті сала басшыларымен бірге ипподром құрылысын бастауға ниетті жеке кәсіпкерлермен кездесіп, құрылыс жобасын талқылады. Аудан әкімі ұлттық спортты дамытуға үлкен септігін тигізетін нысанды іске қосу үшін кәсіпкерлерге алдағы уақытта жан-жақты қолдау көрсетілетіндігін жеткізді.Аудан орталығында құрылысын жүргізу жоспарланып отырған ипподром ұлттық спорт түрлері ат спорты, көкпар, теңге ілу және бәйге секілді дәстүрлі ойындарды дамытуға бағытталмақ.Нысан аудан тұрғындары үшін ұлттық спорт жарыстары мен мәдени іс-шараларды өткізетін орталыққа айналып, жастарды ұлттық құндылықтарға тәрбиелеуге және салауатты өмір салтын насихаттауға ықпал ететін болады.<img src="https://knadmin.beoblood.kz/uploads/Zha_a_ippodrom_rylysy_c08dcd8f74.jpg" alt="Жаңа ипподром құрылысы.jpg">Фото: Қазалы ауданының әкімдігі

Қазалыда жаңа ипподром құрылысын бастау жоспарланып отыр

<a href="https://kyzylorda-news.kz/">Kyzylorda-news.kz</a> Соңғы жылдары Қызылорда құрылысы қарқынды қалаға айналды. Білім саласы бойынша “Жайлы мектептер” бой көтеріп, салаға лайықты көңіл бөлінуде. Бүгінде 4 мектептің құрылысы аяқталса, қалған 5 мектеп 2025 жылдың соңына дейін пайдалануға беріледі деп жоспарлануда. Құрылыс саласындағы қарқынды жұмыстар легін облыстық құрылыс, сәулет және қала құрылысы басқармасының басшысы Ерлан Төрәлиев тізбектеп берді.<blockquote>– Денсаулық саласы бойынша 22 құрылыс нысаны жүргізіліп, 15-і пайдалануға берілді. «Ауылда денсаулық сақтауды жаңғырту» ұлттық жобасы аясында республикада алғашқы болып 9 амбулатория мен 2 фельдшерлік-акушерлік бекет пайдалануға беріледі. Сондай-ақ, Қызылорда қаласында 300 орындық көпбейінді аурухананың құрылысы жүргізілуде. Бұған дейін, қаламыздағы Сырдария өзенінің сол жағалауында орналасқан Қан орталығы ел игілігіне табысталды. Сондай-ақ “Руханият жылы” аясында аудандарда 7 “Руханият орталығы” бой көтерді. Әзірге олардың екеуі халық игіліне жұмыс жасауда. Аймағымыздың ажарын айшықтай түскен ғимараттардың бірі - Өнер орталығы. Мәдениет саласына да лайықты көңіл бөлінуде. Облыс орталығында халықаралық стандарттарға сәйкес 11 мың орындық орталық стадион, жабық бассейні бар көп салалы дене шынықтыру-сауықтыру кешені салынуда. Жақын арада Қызылорда қаласында «Қызылорда Арена» көпбейінді спорт кешенінің құрылысы басталады.</blockquote><blockquote>Биыл бюджеттен тұрғын үй құрылысына және жеке салушылардан дайын пәтерлер сатып алуға қажетті қаржы бөлініп 2500-ден астам пәтер сатып алынды. Атап өтетін жайт, облысымыз халықтың әлеуметтік осал топтарына тұрғын үй сатып алу бойынша республикада 2-ші орында. Бүгінде тұрғын үй құрылысы бойынша барлығы 1910 пәтерден тұратын 33 көпқабатты тұрғын үйдің құрылысы жүргізілуде,- деді Ерлан Кәрімбекұлы.</blockquote><img src="https://knadmin.beoblood.kz/uploads/yzylorda_iri_rylys_zh_mystaryny_k_lemi_bojynsha_respublikada_birinshi_orynda_7e3bda55ad.jpg" alt="Қызылорда өңірі құрылыс жұмыстарының көлемі бойынша республикада бірінші орында.jpg">Фото: Нұрболат Нұржаубай

Қызылорда өңірі құрылыс жұмыстарының көлемі бойынша республикада бірінші орында

<a href="https://kyzylorda-news.kz/">Kyzylorda-news.kz</a> Облыс бойынша жылу беру маусымы белсенді жүруде. Қазірдің өзінде 1 067 әлеуметтік нысандар мен орталықтандырылған жылу жүйесіне қосылған 888 көп қабатты тұрғын үй толығымен жылумен қамтамасыз етілуде. Жалпы облыс бойынша көмір қоймаларына 138 мың тонна көмір жеткізілген. Бұл туралы облыстық энергетика және тұрғын-үй коммуналдық шаруашылық басқармасы басшысының міндетін атқарушы Бауыржан Ізбағамбетов мәлімдеді.<blockquote>- 2024-2025 жылғы жылумен қамту нысандарын жаңғыртуға тиісті қаржы қаралды. Аталған қаржыға Қызылорда жылу электр орталығының «Bono еnergy» маркалы үш бу қазандығын жаңғырту, 2 газотурбиналық қондырғы, 11 қазандыққа күрделі жөндеу және 1 турбина мен 15 қазандыққа жөндеу жұмыстары жүргізілді. Сонымен қатар, 9,3 шақырым жылу желілері жаңғыртылды. Нәтижесінде жылу желілерінің тозу деңгейі 3 пайызға төмендеді. Газдандыру бойынша айта кетсек, өткен жылы жоспарланған 11 елді мекеннің газдандыру жұмыстары толығымен аяқталып, табиғи газға қосылды. Осылайша 2024 жылдың қорытындысы бойынша облыстың газбен қамту деңгейін 78 пайызға, газдандырылған елді мекен саны 46-ға жеткізілді. 2025 жылдың басынан бері 4 елді мекен газ жүйесіне қосылды. Сонымен қатар, жыл соңына дейін 5 елді мекенді газдандырып, газбен қамту деңгейін 83 пайызға өсіру жоспарлануда, - деді Бауыржан Нұрланұлы.</blockquote>Фото: freepik.kz

Облысқа 138 мың тонна көмір жеткізілді

<a href="https://kyzylorda-news.kz/">Kyzylorda-news.kz</a>&nbsp;«Көлік-логистика секторын дамыту – стратегиялық мәні айрықша басымдық. Еліміз Еуразия құрлығының дәл ортасында орналасқан. Бұл – бізге әлемдік бәсекеде зор мүмкіндік беретін артықшылық. Біз кейінгі ұрпаққа жоғары сапалы авто және теміржолдарды қалдыруымыз керек» - деді &nbsp;ел Президенті Қасым-Жомарт Тоқаев.2024 жылы құрылыс, қайта жаңарту және жөндеу жұмыстарының жалпы көлемі 12 мың шақырым жолды құрады. Бұл – рекордтық көрсеткіш. Жол құрылысы маусымында республикалық маңызы бар автомобиль жолдарын қайта жаңғырту және жөндеу жобаларына 25 мыңнан астам адам мен 10 мыңнан астам арнайы техника жұмылдырылды.7 мың шақырым жолдың құрылысы аяқталды. Атап айтқанда, Қарағанды – Алматы, Талдықорған – Өскемен, Ақтөбе – Қандыағаш және Атырау – Астрахан күре жолдарында құрылыс жұмысы бітті. Жобаларды іске асыру көліктердің қауіпсіз өтуін қамтамасыз етуге, жол жүру уақытын едәуір қысқартуға, жолдың өткізу қабілетін арттыруға, ел аймақтары арасындағы көлік байланысын айтарлықтай жақсартуға мүмкіндік берді.Әкімдіктер жергілікті маңызы бар 3,6 мың шақырымнан астам жолды пайдалануға берді. Жөндеу жұмыстарының ең көп көлемі Қостанай, Солтүстік Қазақстан, Шығыс Қазақстан, Ақтөбе және Павлодар облыстарында орындалды. Қостанай облысында 655 шақырым жол, Солтүстік Қазақстан облысында 611 шақырым, Шығыс Қазақстан облысында 305 шақырым, Ақтөбе облысында 301 шақырым, Павлодар облысында 272 шақырым жұмыстары аяқталды.Жол-құрылыс маусымына 200-ден астам отандық компания қатысты. Жол-құрылысына пайдаланылған материалдардың ішінде отандық өнімнің үлесі шамамен 96%-ды құрады. Жүргізілген жұмыстардың арқасында жергілікті жолдардың нормативтік жағдайы ұлғайып, республика бойынша орта есеппен 89%-ға жетті. Салыстырамалы түрде 2019 жылы бұл көрсеткіш 68% құраған.Үш ірі инфрақұрылымдық жоба жүзеге асырылды. Олардың қатарында Орталық Азиядағы ең ұзын деп танылған &nbsp;Шығыс Қазақстан облысындағы Бұқтырма су қоймасы арқылы өтетін көпір, Түркістан облысындағы Шақпақ баба асуындағы қос жолды тоннел және Алматы облысындағы Шамалған станциясындағы теміржол өткелі бар.Әр нысанның өз артықшылығы бар. Шығыс Қазақстан облысындағы жалпы ұзындығы 1316 метрді құрайтын Бұқтырма су қоймасы арқылы өтетін көпір жеті ауданды байланыстырады. Көпірді көлікпен өту уақыты 4 минутты құрайды. Түркістан облысындағы жалпы ұзындығы 840 метр құрайтын Шақпақ баба асуы арқылы тоннел қолайсыз ауа райына қарамастан үздіксіз әрі қауіпсіз көлік қозғалысын қамтамасыз етеді. &nbsp;Жоба «Батыс Еуропа – Батыс Қытай» халықаралық көлік дәлізінің бір бөлігі. Алматы облысындағы Шамалған станциясындағы өткелдің ұзындығы 6 шақырымды құрайды, &nbsp;теміржол өткелі көліктердің қауіпсіз өтуіне мүмкіндік береді.2024 жылғы құрылыс маусымының қорытындысы бойынша Балқаш, Алакөл, Бөкей-Орда, Алтай, Баянауыл ұлттық паркі және т.б. туристік орындарға дейін көлік қозғалысы ашылды.Қазақстанда жалпы ұзындығы 1100 шақырым құрайтын үш ірі темір жол құрылысы жүзеге асырылуда: «Достық – Мойынты», «Алматы айналма темір жолы» және «Дарбаза – Мақтаарал» бар. Жобаларды жүзеге асыру қазақстандық өнімнің үздіксіз экспортты кеңейтуге мүмкіндік беріп, елдің транзиттік әлеуетін арттырады. Биыл Достықтан Мойынтыға дейін теміржолдың құрылысы аяқталады. Учаскенің өткізу қабілеті 5 есе артады. Сонымен қатар, биыл Алматыны айналып өтуге мүмкіндік беретін темір жолдың құрылысы аяқталады. Бұл аймақтағы теміржол желілеріне түсетін жүктемені азайтуға ықпал етеді. «Дарбаза-Мақтаарал» жобасы Оңтүстік Қазақстан өңірін халықаралық транзиттік дәліздерге жалғайтын болады.2024 жылы 1400 шақырым теміржол жөнделіп, 143 вагон &nbsp;сатып алынды. Бүгінгі таңда осы темір жол жобаларын салу шеңберінде шамамен 2,7 мың жұмыс орны ашылып, 1,4 мыңнан астам техника жұмылдырылды. Теміржол желісін салу және қайта құру ел экономикасының дамуына серпін береді. Жалпы ұзындығы 4,7 мың шақырымды құрайтын жаңа жол жобалар кезең-кезеңімен іске асырылады. Оның 3,7 мың шақырымы I санатты, ал қалған 1 мың шақырым II санатты жолдар болады. 2025 жылы құрылысы басталатын жобалар• «Ақтөбе – Ұлғайсын» (234 шақырым), • «Қарағанды – Жезқазған» (572 шақырым), • «Сарыағаш қаласының айналма жолы» (102 шақырым), • «Қызылорда қаласының айналма жолы» (20 шақырым), • «Атырау – Доссор» (86 шақырым), • «Рудный қаласының айналма жолы» (16,9 шақырым), • «Жаңаөзен – Кендірлі» (156 шақырым), • «Петропавл қаласының айналма жолы» (8 шақырым).Бұл бастамаларды жүзеге асыру арқылы жергілікті бизнес пен кәсіпорындар дамиды. 2025 жылы жаңа жол жобаларын іске асыру аясында 31 мың жұмыс орны ашылып, қосымша инвестиция тартылады. Көпжолақты жолдар жол-көлік оқиғаларының алдын алып, оларды азайтуға ықпал етеді.Теміржол және автомобиль жолдарын салу менқайта жаңарту іскерлік белсенділікті едәуір жақсартады, медициналық және білім беру мекемелеріне, азық-түлік дүкендеріне, мәдени орталықтарға және т.б. қолжетімділікті қамтамасыз ете отырып, азаматтардың жағдайын жақсартуға бағытталған.<img class="image_resized" style="width:65.12%;" src="https://knadmin.beoblood.kz/uploads/K_lik_logistika_3cf2144144.jpg" alt="Көлік-логистика.jpg">Фото: Нұрболат Нұржаубай

Елімізде республикалық маңызы бар 4,7 мың шақырым жол салынады

<a href="https://kyzylorda-news.kz/">Kyzylorda-news.kz</a> 2025 жылы әскери дайындыққа 3 мың әскери міндетті шақырылады. Қорғаныс министрі Руслан Жақсылықовтың тиісті бұйрығы "Ашық НҚА" порталында жарияланды. Құжат 7 ақпанға дейін талқылауға қолжетімді. Бұл туралы<a href="https://stan.kz/2025-zhili-askeri-dayindikka-3-min-kazakstandik-shakiri-412893/"> Stan.kz </a>ақпарат агенттігі хабарлайды.Әскери дайындық 2007 жылдан бастап жыл сайын өткізіледі және ұзақтығы 30 күнге дейін болады. Дайындыққа қатысудан жалтару 5 айлық есептік көрсеткіш (19 660 теңге) мөлшерінде айыппұл салуды қарастырады.Әскери дайындық кезінде әскери қызметшілердің жұмыс орындары мен лауазымдары сақталады. Оларға орташа жалақы төленеді, ал жұмыс істемейтіндерге – мемлекеттік бюджет есебінен ең төменгі жалақы беріледі.Әскери міндеттілерді жинақ орнына жеткізу және оларды кері қайтаратын көлік қызметі, сондай-ақ тамақтандыру Қорғаныс министрлігі есебінен жүзеге асырылады. Әскери міндеттілер казарма жағдайында ұсталады. Оларды бөлімнен босату ротаның командирлерімен жүзеге асырылады.Айта кетейік, әскери дайындықтың негізгі мақсаты – әскери бөлімшелердің жауынгерлік және мобилизациялық дайындығын арттыру, бейбіт уақытта қысқартылған құрамда ұсталып тұратын бөлімшелер үшін дайындалған және жинақталған әскери дайын ресурстарды қалыптастыру.2023 жылы қорғаныс министрлігі 1,5 мың қазақстандықты әскери дайындыққа шақырған болса, 2024 жылы – 3 мың адам шақырылды.Фото: Нұрболат Нұржаубай

2025 жылы әскери дайындыққа 3 мың қазақстандық шақырылады

<a href="https://kyzylorda-news.kz/">Kyzylorda-news.kz</a> Шиелі ауданындағы жаңадан ашылған «Руханият орталығында» Мемлекет басшысы жариялаған «Жұмысшы мамандықтар жылына» орай «Әлемнің әміршісі – еңбек» атты облыстық әйелдер форумы өтті.Форумға облыстық әйелдер кеңесінің төрайымы Райкүл Байназарова, іскер әйелдер кеңесінің төрайымы Манат Алмашева, зиялы қауым өкілдері, кәсіпкерлер және түрлі салада еңбек ететін жұмысшы әйелдер қатысты.Басқосуды жүргізген Шиелі ауданының әкімі Айтбай Жандарбеков Мемлекет басшысының Сыр өңірін ерекше қолдауының арқасында аймақта атқарылған жұмыстарға тоқталды. Сонымен қатар, облыс әкімінің бастамасымен соңғы жылдары салынған әлеуметтік нысандарды, қолға алынған ауқымды шараларды атап өтті.Атаулы жылға орай ұйымдастырылған іс-шараға «Хабар 24» республикалық телеарнасындағы «Дархан дала» бағдарламасының түсіру тобы арнайы келіп, Сыр елінде атқарылған жұмыстармен танысты.Еске салайық, өткен жылы өңірдегі «Руханият жылы» аясында барлық 7 ауданда ішінде неке қию залы, кітапхана, музей, архив, жастар сарайы, ардагерлер мен аналар үйі бар «Руханият орталықтары» бой көтеріп, бірқатары ел игілігіне табысталды.«Анаға тағзым», «Отбасы орталығы», 1000 орындық көпфункционалды «Өнер орталығы» салынып, жаңадан симфония оркестрі, инклюзивті театр, жастар театры, заманауи би, хор ұжымдары жасақталды. Сыр мәдениетінің негізгі бренді – жыраулық дәстүр өкілдерінің «Жыраулар үйі» ашылды. Облыстық тарихи-өлкетану музейі, «Шығармашылық академиясы» салынуда.«Анаға тағзым» орталығы – аймақ басшысының бастамасымен қала орталығында бой көтерген ұлттық және заманауи үлгідегі мәдени-әлеуметтік нысан, Сыр елінің арулары мен ақжаулықты аналары бас қосатын құтты мекен.Халқымыздың өткені мен бүгінін сабақтастыратын «Анаға тағзым» экспозициялық кешенінде «Қазақ елінің ұлы аналары» атты бірегей картина және ұлтымыздың тұрмыс-тіршілігінен сыр шертетін киіз үйдің инсталляциясы орналасқан. Сонымен қатар, «Мирас» әжелер, «Бойтұмар» қыздар, «Жас отау» жас отбасылар, «Ана тілі» дебат клубтары, психолог-медиатор кабинеті, «Береке» аспаздық, «Шамшырақ» фото-видео студиялары жұмыс жасайды. Музей, конференц, мәдени-концерттік залдары және коворкинг орталығы бар.Өнер мен мәдениетті қолдау мақсатында салынған 1000 орындық «Өнер орталығының» филармония ұжымына берілуі сырбойылық өнерпаздарға жаңа мүмкіндіктерге жол ашты. Филармония жанынан құрылған 10 өнер ұжымы бар. Облыстық симфония, Тұрмағамбет атындағы халық аспаптар оркестрлері, «Қорқыт сазы» қобызшылар, «Ақмешіт» фольклорлық, вокалды-аспаптық ансамбльдері, «Томирис» және «AI-ARU» би, хор ұжымдары, «Әдемі» балалар музыкалық театр студиясы өнердің түрлі бағытында жемісті еңбек етуде.Камералық оркестрге қосымша 30 штаттық бірлік қосып, симфония оркестрін ашу туралы ұсыныс оң шешімін тапты. Облыс әкімінің қолдауымен қайта құрылған симфония оркестрінде 50 қызметкер бар, 17 өнерпаз қызметтік үймен қамтылған. Алматы, Астана, Шымкент, Ақтөбе, Талдықорған, Байқоңыр қалаларынан 10-ға жуық өнерпаз арнайы шақыртумен келген.Айта кетейік, “Дархан дала” бағдарламасының біздің аймаққа арналған шығарылымын 26 қаңтар күні, сағат 15.35-те және 23.00-де “Хабар 24” телеарнасынан көре аласыздар.Фото: Қызылорда облысы әкімінің баспасөз қызметі

Облыстық әйелдер форумы өтті

<a href="https://kyzylorda-news.kz/">Kyzylorda-news.kz</a>&nbsp; Қызылорда қалалық ардагерлер кеңесінің ас беру мәдениеті мен жаназа рәсімдерін бірізділікке түсіру жөнінде кеңейтілген жиыны өтті. Ардагерлер кеңесінің бұл бастамасы халқымызды ысырапшылдықтан арылтып, жаназа рәсімдерінің түпкі мәнін сақтауға бағытталған. Оған ардагерлер кеңесінің төрағасы Шакизат Төребаев, қала әкімінің орынбасары Дархан Тұрсынбаев, қаланың бас имамы Берік Сүлейменов, ҚМДБ өкілдері мен қаланың, кент, ауылдық округтердің ардагерлері, зиялы қауым, БАҚ өкілдері және жастар қатысты.Жиында Қызылорда облысы ардагерлері кеңесінің, ҚМДБ Қызылорда облысы бойынша өкілдігінің ас беру мәдениетіне қатысты бірлескен Үндеуінен туындаған мәселелер жан-жақты айтылды.Қалалық ардагерлер кеңесінің төрағасы Шакизат Төребаев ас беру, жаназа шығару, зират салу, жалпы марқұм болған адамдарды жөн-жоралғыға сәйкес жерлеу мәдениетін халқымыздың дәстүрі мен Қазақстан мұсылмандары діни басқармасының әдістемелеріне негіздеп, бір ізге салу аса маңызды екенін жеткізіп, облыстық ардагерлер кеңесінің Үндеуін қолдауға шақырды.Фото: Қала әкімдігі

«Ас беру мәдениеті»: Қызылорда қалалық ардагерлер кеңесінің кеңейтілген мәжілісі өтті

<a href="https://kyzylorda-news.kz/">Kyzylorda-news.kz</a> Қалалық жұмыспен қамту және әлеуметтік бағдарламалар бөлімі басшысының орынбасары Алмас Орынбеков бұқаралық ақпарат құралдарының өкілдеріне өткен жылы салада атқарылған жұмыстар мен алдағы жоспарлар бойынша баспасөз конференциясын өткізді.Өткен жылы Қызылорда қаласында 13 438 жаңа жұмыс орны ашылды. Жыл көлемінде қалалық «Мансап» орталығына жұмыс іздеуші ретінде 26 494 тұрғын жүгінген болса, оның ішінде 13 368 азамат уақытша жұмысқа жолдама алды, 4 534 азамат тұрақты жұмысқа орналасты. Бұдан бөлек, Мемлекет басшысының 10 мың адамға 100 жаңа жұмыс орнын ашу жөніндегі тапсырмасы аясында қалада 5 838 жаңа жұмыс орны ашылды. Ал, бас бостандығынан айыру орындарынан босатылған және пробация қызметінің есебінде тұрған 131 адам жұмыспен қамтылды.«2021-2025 жылдарға арналған кәсіпкерлікті дамыту жөніндегі» Ұлттық жоба аясында қысқа мерзімді кәсіптік оқытуға 25 азамат жолданды. Бағдарламаның екінші бағыты – «Жаңа бизнес – идеяларды іске асыру» бойынша 520 азамат мемлекеттік грантқа ие болды. Сондай-ақ, бағдарламаның үшінші бағыты – «Халықты жұмыспен қамтуға жәрдемдесу шаралары» бойынша қоғамдық жұмыстарға 3682 адам, әлеуметтік жұмыс орындарына 120 адам, жастар тәжірибесіне 1234 жас маман, «Алғашқы жұмыс орны» жобасымен 72 жас маман, «Ұрпақтар келісімшарты» жобасымен 1 адам, «Күміс жас» жобасымен 686 зейнеталды жастағы азамат жұмысқа жолданды.Айта кету керек, 4591 адамға атаулы әлеуметтік көмек төленіп, 7415 балаға қосымша төлем, 7 200 балаға жолда жүру ақысы аударылды. 1966 адамға тұрғын үй көмегі көрсетілді. Жекелеген санаттағы әлеуметтік қолдауды қажет ететін 3346 адамға әлеуметтік төлем жүргізілді. 14 097 мүгедектігі бар адамдар мен балаларға біржолғы әлеуметтік көмек төленді. Сонымен қатар, демеушілер тарапынан 4465 отбасыға көмек көрсетілді.<blockquote>– Жыл көлемінде мүгедектігі бар тұлғаларды оңалту шараларын жүзеге асыру бойынша І топ мүгедектеріне 1198 жеке көмекші, есту кемістігі бар адамдарға 17 ымдау тілі маманы, 16 инватакси қызмет көрсетті. Үйде тәрбиеленіп және оқытылатын мүгедектігі бар 544 балаға әлеуметтік төлем жүргізіліп, 8356 мүгедектігі бар адамдарға гигиеналық құралдар мен техникалық-компенсаторлық құралдар сатып алынды, – деді Алмас Нұрболатұлы.</blockquote>Белгілі тұрғылықты жері жоқ адамдардың уақытша болуына арналған бейімдеу орталығымен 127 қызмет алушыға арнаулы әлеуметтік қызметтер көрсетілді. Зейнеткерлерге жартылай стационарлық жағдайда әлеуметтік қызмет көрсету орталығымен 491 қызмет алушы ардагерге күнделікті арнаулы әлеуметтік қызметтер көрсетілді. «Отбасын қолдау» орталығы мамандарымен 7682 адамға кеңес беру жұмыстары жүргізілді.<blockquote>– Биылдан бастап атаулы әлеуметтік көмекке үміткер отбасылардың материалдық жағдайына тексеру жүргізу үшін «FSM Social» мобильді қосымшасы енгізіліп, учаскелік комиссиялардың қызметі цифрландырылды. Бұл нақты мұқтаж азаматтардың жиынтық кірістері мен шығыстарын айқындауды ескере отырып, шешім шығару кезінде сыбайлас жемқорлық тәуекелдерін азайтуға, сондай-ақ өтініш берушінің геолокациясын айқындауға мүмкіндік береді, – деп қорытындылады Алмас Нұрболатұлы.</blockquote>Фото: Қала әкімдігі

Қазақстан және Қызылорда облысының жаңалықтары: Қоғам