<a href="https://kyzylorda-news.kz/">Kyzylorda-news.kz</a> 18-20 сәуір аралығында Қызылордада Кеңес Одағының батыры Тәйімбет Көмекбаевты еске алуға арналған грек-рим күресінен ересектер арасындағы халықаралық турнир өтеді. Белді бәсекеге ел балуандарымен қатар, өзге елдерден 300-ге жуық спортшы қатысады деп жоспарлануда. Жарыстың өту барысы туралы бүгін Өңірлік коммуникациялар қызметінің ақпарат алаңында облыстық дене шынықтыру-спорт және туризм басқармасының басшысы Бахтияр Артаев айтты.<blockquote>–Бұл турнир – жай ғана жарыс емес. Бұл – Тәйімбет Көмекбаев сынды ержүрек батырдың ерлігін, оның отансүйгіштік рухын, ел қорғаудағы жанқиярлық еңбегін жас ұрпаққа үлгі ету мақсатында өткізіліп отырған тағылымды шара. Батыр атамыздың есімін жаңғыртып, ұрпақ жадында сақтау – біздің парызымыз. Аталған турнирге 11 мемлекеттің, атап айтқанда Бразилия, Қытай, Беларусь, Ресей, Қарақалпақстан, Түркия, Қырғызстан, Өзбекстан, Тәжікстан, Моңғолия елдерінің және Қазақстанның барлық облыстары мен қалаларынан 300-ге жуық спортшы қатысып, 10 салмақ дәрежесінде өзара бақ сынайтын болады. Бұл – турнирдің ауқымы мен беделін айқындайды. Бұл жарыс – ел ішіндегі ғана емес, халықаралық деңгейде де достықты, ынтымақтастықты нығайтуға бағытталған. Спорт – бейбітшіліктің, бірліктің, өзара түсіністіктің көрінісі. Сондықтан мұндай турнирлердің маңызы ерекше. Біз үшін мұндай халықаралық іс-шараларды өткізу – облысымыздың спорттық әлеуетін көтеріп қана қоймай, жас жеткіншектердің спортқа деген қызығушылығын арттыратын маңызды бастама,-деді Бақтияр Ғарифоллаұлы.</blockquote>Сондай-ақ, баспасөз конференциясына ҚР грек-рим, еркін және әйелдер күресі федерациясының вице-президенті Дәурен Жабасов ой-пікірін ортаға салды.<blockquote>Сыр өңірі қашанда балуандардың бесігі болған, жастайынан күреске бейімделген, білекті де жүректі ұлдарымен аты шыққан қасиетті топырақ. Бұл өлкеден шыққан талай балуан ел намысын абыроймен қорғап, байрақты бәсекелерде көк туымызды көкте желбіретті. Турнирге 10 салмақ дәрежесі бойынша мықты балуандар қатысқалы отыр. Бұл – халықаралық деңгейде ұйымдастырылған жоғары дәрежелі жарыс. Біз үшін ең басты мақсат – спортшыларға әділ, таза бәсекеге мүмкіндік жасау, әрі ел спортының беделін көтеру. Осы байрақты бәсекенің жоғары деңгейде өтуіне атсалысып жатқан барша ұйымдастырушыларға, төрешілер алқасына, бапкерлерге және демеушілерімізге ерекше алғысымды білдіремін. Бұл турнир халықаралық дәрежеде жылда жалғасын табатын болады,-деді Дәурен Еркінұлы.</blockquote>Грек-рим стиліндегі қырғыз балуаны, екі дүркін әлем чемпионы, үш дүркін Азия чемпионы, 2020 жылғы Олимпиада ойындарының күміс жүлдегері, 2024 жылғы Жазғы Олимпиада ойындарының қола жүлдегері, Қырғызстанның екі дүркін чемпионы Ақжол Махмудов аталған турнирдің жоғары деңгейде өтетініне сенім білдіретінін жеткізді.<blockquote>– Бізді осы жарысқа шақырып, сый-құрмет жасап жатқандарыңызға алғысымды білдіремін. Қазақ елінде грек-рим күресінен көптеген жарыстар жоғары дәрежеде өткізіледі. Менің өзіме де бұл жарысқа қатысқым келді. Бірақ белгілі себептерге байланысты қонақ ретінде келіп отырмын. Келесі жылғы жарыстарға міндетті түрде қатысамын деп ойлаймын. Қазақстандағы спорт деңгейінің жылдан жылға жоғарылап келе жатқанына өте қуаныштымын. Жарысқа қатысушыларға сәттілік тілеймін,- деді Ақжол Махамаджанұлы.</blockquote>Грек-римнен Әлем чемпионатының 2 дүркін қола жүлдегері, Азия чемпионы Айдос Сұлтанғали да өз ойымен бөлісті.– Бұл турнир жыл сайын дәстүрлі түрде өте жоғары деңгейде өткізіліп келеді. Ертең де солай боларына сенеміз. Ең бастысы сайыстан жарақатсыз, іліксіз шығу. Қатысушылардың бәрі іріктелген, мықты палуандар. Осал қарсылас жоқ. Шын мықты жеңіске жетсін,- деді Айдос Сұлтанғали.Фото: Қызылорда облысының өңірлік коммуникациялар қызметі

Кеңес одағының батырын еске алуға арналған халықаралық турнир өтеді

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев қазақтың көрнекті ақыны, қоғам қайраткері, Қазақстанның Еңбек Ері Мұхтар Шахановпен кездесті. Аймақ басшысы Сыр өңіріне арнайы сапармен келген ақынға алғыс білдіріп, руханият пен мәдениетке қосқан еңбегін ерекше атап өтті.<blockquote>«Ең алдымен, Мұхтар аға, Мемлекет басшысының Жарлығымен Қазақстанның Еңбек Ері атануыңызбен шын жүректен құттықтаймын. Бұл атақ егемен еліміздің рухани-мәдени дамуына қосқан өлшеусіз еңбегіңізге берілген лайықты баға деп білеміз. Сіздің қаламыңыздан туған «Жұбайлар жыры», «Туған күн кешінде», «Гүл дәурен», «Мен саған ғашық едім» секілді тағы да басқа көптеген туындыларыңыз қалың жұртшылыққа кеңінен тарап, жүректерден өшпестей орын алды. Шығармаларыңыз 50-ден астам тілге аударылып, республикамыздың, шет елдердің театрларында қойылып келеді. Ұлт руханиятына қосқан зор үлесіңіз үшін «Отан» ордені, Қазақстанның Халық жазушысы, Қырғыз Республикасының халық ақыны, тағы басқа атақ пен марапаттар иелендіңіз. Өзіңізге деген Сыр халқының құрметі, ілтипаты әрқашан да ерекше. Шығармашылық сапарыңызға құтты қадам, деніңізге саулық, отбасыңызға амандық тілеймін. Ғасыр жасаңыз!», – деді аймақ басшысы.</blockquote>Бүгін Сыр жұртшылығы ақынның «Танакөз» шығармасының желісімен қойылған спектакльді Әзербайжан Мәмбетов атындағы мемлекеттік драма және комедия театрының сахналауында тамашалайды.Кездесу соңында аймақ басшысы Мұхтар Шаханов пен жұбайы Ханшайым Көкенқызына Сыр елі атынан ілтипат білдіріп, құрмет көрсетті.Сондай-ақ, бүгін Жастар ресурстық орталығында &nbsp;Мұхтар Шахановтың жастармен тағылымды кездесуі өтті. Оған қатысушылар ақынның рухты, өміршең жырларын, өздерінің арнау өлеңдерін оқыды. &nbsp;Еркін сұқбат құрып, сұрақ-жауап форматында әңгіме өрбітті.Фото: Қызылорда облысы әкімінің баспасөз қызметі

Облыс әкімі Мұхтар Шахановпен кездесті

<a href="https://kyzylorda-news.kz/">Kyzylorda-news.kz</a> 2022 жылы Қазалы ауданындағы аудандық маңызы бар «Қазалы-Қожабақы-Бозкөл-Кәукей» автомобиль жолының 16 шақырымдағы Қарлан учаскесінен темір бетонды көпір құрылысы басталған болатын. Алайда мердігер мекеме «СтандартОйлКзо» ЖШС-інің жауапсыздығы салдарынан көпір құрылысы тоқтады.Мердігер мекеме өзіне жүктелген міндеттемелерін толық орындамау салдарынан өткен жылы сот процестері жүргізіліп, келісім шарт біржақты бұзылды. Сондай-ақ көпір құрылысы жұмыстарын аяқтау үшін қайта мемлекеттік сатып алу конкурсы жарияланып, жеңімпаз болып «НұрлыТау ЛТД» жауапкершлігі шектеулі серіктестігі анықталды.Бүгінгі таңда облыс әкімнің қолдауымен көпір құрылысы қайта басталып, жаңа мердігер мекеме тиісті жұмыстарды атқаруда. Осыған орай аудан әкімі Мейрамбек Шермағанбет Қарлаң учаскесіне барып, мердігер мекеменің жауапты өкілімен кездесті. Аудан басшысы Сырдария өзенінің арғы бетіндегі тұрғындар үшін бұл көпірдің маңыздылығы жоғары екенін айтып, құрылысшыларға ең бірінші кезекте құрылыстың сапасы мен мерзімінде аяқталуы керектігін жеткізді.Айта кетейік, Қарлаң көпірінің құрылысы тезірек аяқталса Өркендеу, Бірлік, Қожабақы, Аранды, Бозкөл, Тасөткел, Лақалы, Ажар, Тасарық және Кәукей елді мекеніндегі 12 мыңға жуық халықтың алыс-берісі артып, жол қатынасы жақсара түспек.<img src="https://knadmin.beoblood.kz/uploads/azaly_k_pir_rylysy_2_850aa4b8f1.jpg" alt="Қазалы көпір құрылысы 2.jpg">

Көпір құрылысы қайта басталды

<a href="https://kyzylorda-news.kz/">Kyzylorda-news.kz</a> Қызылорда қаласы Конго-Қырым геморрагиялық қызбасының табиғи ошағында орналасқан. Сондықтан жыл сайын эпидемиологиялық маусымда аурудың алдын алу, залалсыздандыру жұмыстары күшейтіледі.Бүгінгі ақпарат алаңында жауапты сала мамандары Конго-Қырым геморрагиялық қызбасына қарсы жүргізіліп жатқан негізгі шаралар туралы баяндады.<blockquote>- Өткен жылы алғашқы диагнозбен КҚГҚ-ның 6 жағдайы тіркелді. Оның 3 жағдайы клиникалық және зертханалық тұрғыда расталды. Биыл эпидемиялық мерзім басталғалы кенеден зардап шегіп, медициналық көмекке 45 адам жүгінді. Бұл өткен жылдың осы кезеңімен салыстырғанда 40 пайызға жоғары, - деді Қызылорда қалалық санитариялық - эпидемиологиялық бақылау басқармасы басшысының міндетін атқарушы Бейбіт Бидаш.</blockquote>Қолайсыз аймақтардың санитариялық-қорғаныш белдеулерінде, буферлік аймақтарды құру және ауылшаруашылығы мал бастары мен олардың қора-жайларында көктемгі кенеге қарсы дезинсекция жұмыстарының 1-ші кезеңі 9-21 сәуір аралығында, 2-ші кезеңі 18-30 сәуір аралығында бір мезетте жүргізіледі.<blockquote>- Жалпы, қала бойынша Конго-Қырым геморрагиялық қызбасынан 8 елдімекен қолайсыз деп танылды. Дегенмен, ол өткен жылмен салыстырған 4 елдімекенге азайған. Сәйкесінше көктемгі эпидмаусымда кенелерге қарсы залалсыздандыру жұмыстары 407 гектар аумаққа жүргізіледі, - деді ҚР ДСМ СЭБК «Ұлттық сараптама орталығы» Қызылорда облысы бойынша филиалының директоры Фарида Ыдырысқызы.</blockquote>Айта кету керек, инфекцияны жұқтыру көп жағдайда кене шағумен, мал күтімімен, ауыл шаруашылық жануарларын союмен, науқасқа күтім жасаумен байланысты болады. Сондықтан далалық аймақтарда жүргенде барынша сақтанған абзал. Кене малдың үстінде болатындығын ескере отырып, малды алдын ала кенеге қарсы егіп, қораларда кенеге қарсы улау жұмыстарын жүргізу керек және мал күтімімен айналысуда бөлек арнайы киім кию қажет.<blockquote>- Конго-Қырым геморрагиялық қызбасына күдікті немесе науқас анықталысымен инфекциялық төсекке оқшауландырылып, шұғыл індетке қарсы іс-шаралар жүргізіледі. Қазіргі таңда аурухана бойынша 40 инфекциялық станционар дайын, 32 төсектік провизор орындар жабдықталған, - деді облыстық жұқпалы аурулар ауруханасы бас дәрігерінің емдеу ісі жөніндегі орынбасары Шарипа Жақсылыққызы.</blockquote>

Залалсыздандыру жұмыстары күшейтіледі

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев Сеул ұлттық ғылым және технология университетінің президенті Дон Хван Киммен кездесіп, бірлесіп атқаратын жұмыстарды талқылады. Басқосуға облыс әкімінің орынбасары Ардақ Зебешев, Қорқыт Ата атындағы Қызылорда университетінің ректоры Бейбіткүл Кәрімова, университеттің халықаралық қатынастар бойынша вице-проректоры Тэхи Ким, ғылыми зерттеулер және жоспарлау бойынша вице-проректоры Сунуну Канг қатысты.Облыс әкімі еңбек нарығының сұранысына сай мамандар даярлаудың маңызын атап өтті.<blockquote>«Қазақстан мен Корея Республикасы бірнеше жылдан бері ашық және сенімді қарым-қатынас орнатқан стратегиялық серіктес екені белгілі. Екі ел арасындағы дипломатиялық қарым-қатынастың жолға қойылғанына 33 жыл толды. Кезінде Қызылорда облысына қоныстанған корейлер, олардың ұрпақтары өздерінің адал еңбегімен аймақтың мәдени-рухани, аграрлық және әлеуметтік-экономикалық дамуына зор үлес қосып келеді. Екіжақты ынтымақтастық аясында өнеркәсіп саласына да көңіл бөлінген. Корейлік “With You E&amp;C Kyzylorda” компаниясы тұрмыстық қатты қалдықтар өңдейтін зауыт құрылысын салуда. Құны 66,6 млн. АҚШ доллары болатын жоба екі кезеңде іске асырылады, 160 жұмыс орны ашылады. Тиісті жер телімі табысталып, мемлекеттік қолдау көрсетілуде. Арал маңында литийдің мол қоры бар. Бұл жөнінде Корея геоғылымдар және минералды ресурстар институты (KIGAM) президенті Пёнг-Ку Ли мырзамен кездескенде баяндадық. Аймақтың еңбек нарығына 28 бағыт бойынша маман даярлау қажет болады. Осы аталған салаларда бірлесіп жұмыс жасауға шақырамын. Іссапарларыңыз табысты әрі нәтижелі болатынына сенемін», – деді Н. Нәлібаев.</blockquote>Кездесуде Дон Хван Ким екіжақты ынтымақтастықты дамыту және одан әрі нығайту жолындағы бірлескен іс-қимыл бағытына тоқталды.Айта кетейік, 2023 жылы Қазақстандағы Корея Республикасы Бас Консулдығының ресми шақыртуымен аймақ басшысы бастаған делегация Оңтүстік Кореяға барып, екіжақты кездесулер мен іс-шаралар ұйымдастырылды. Сол сапарда СеулТех университетімен білім және ғылым саласында тиімді байланыстар орнатылды.Нәтижесінде 2023 жылы қараша айында Қорқыт Ата университетінде Қазақстандағы алғашқы Жасанды интеллект институты ашылып, қазіргі таңда 100 студент білім алуда.Өткен жылдың маусым айында екі елдің Мемлекет басшыларының қатысуымен өткен қазақ-корей форумында СеулТех және Қорқыт Ата атындағы Қызылорда университеті арасында қос диплом бағдарламасы бойынша кадр даярлау туралы келісімге қол қойылды. Биыл қос дипломды бағдарлама бойынша білім алушыларды қабылдау басталады.Фото: Қызылорда облысы әкімінің баспасөз қызметі

Облыс әкімі Сеул ұлттық ғылым және технология университетінің президентімен кездесті

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалының төрағасы Алмасбек Есмаханов Ұлы Жеңістің 80 жылдығына орай «Ардагерлерді ардақтайық» партиялық жоба аясында Ұлы Отан соғысының ардагері Яхия Тасыровқа құрмет көрсетті.Игі іс-шараға «AMANAT» партиясы Сырдария аудандық филиалының Атқарушы хатшысы, фракция жетекшісі Ақтөре Ибрагимұлы, аудандық мәслихат депутаты Болатбек Ұлтанбекұлы, «Жастар рухы» жастар қанаты Қызылорда облыстық филиалының төрағасы Әсетхан Баймұрза арнайы қатысты.«AMANAT» партиясы Қызылорда облыстық филиалының төрағасы Алмасбек Есмаханов майдангерді Ұлы Жеңістің 80 жылдығымен құттықтап, ізгі ниетін білдірді.<blockquote>"Сізді «AMANAT» партиясы Қызылорда облыстық филиалының атынан Ұлы Жеңістің 80 жылдық айтулы мерекесімен шын жүректен құттықтаймын. Жеңіс туын желбіретіп, ерліктің ерен үлгісін көрсеткен өзіңізге деген құрметіміз ерекше. Сіз сұрапыл соғыстың өрті мен отын көзбен көрген, қиын күндерді артқа тастап, елге жеңіспен оралған даңқты майденгерсіз. Бейбіт күнде еліміздің дамуына қосқан үлесіңіз, ерлік пен еңбекке толы өмір жолыңыз жас ұрпақ үшін үлгі-өнеге. Сізді Ұлы Отан соғысының ардагері, ғибратты ғұмыр иесі ретінде құрмет тұтамыз. Сізге зор денсаулық, отбасыңызға бақ-береке, ырыс-несібе тілеймін!", – деген Алмасбек Әбілқасымұлы 103 жастағы қарияға қазақы үрдіспен шапан жауып, құрмет көрсетті.</blockquote>Өз кезегінде Ұлы Отан соғысының ардагері Яхия Тасыров ризашылығын білдіріп, ақ батасын берді. Сондай-ақ соғыс жылдарындағы естеліктерімен бөлісіп, бейбіт заманда еткен еңбек жолы туралы сыр шертті.Майдангер соғыс жылдарында Сталинград, Курск, Баранов және Польшаны жаудан азат етуге қатысқан. Данциг портында аяғынан ауыр жараланып, соғысты Германияда аяқтап, 1945 жылы қыркүйек айында елге оралған.

Майдангерге құрмет көрсетті

<a href="https://kyzylorda-news.kz/">Kyzylorda-news.kz</a> Қызылордада «AMANAT» партиясы және «Жастар рухы» жастар қанаты өкілдері Ұлы Жеңістің 80 жылдығы қарсаңында «Тағзым» алаңына тазалық жұмыстарын жүргізді.&nbsp;Олар Ұлы Отан соғысы ардагерлеріне арналған ескерткіштерді жуып, саябақ ішін арам шөптермен қоқыстан тазартты.«AMANAT» партиясы мүшелері әр бейсенбі сайын «Таза бейсенбі» акциясы және әр сенбіде «Таза Қазақстан» экологиялық акциясы аясындағы жалпы облыстық сенбілікке қатысып, өңірдің тазалығына өз үлесін қосып келеді. Бүгін Ұлы Жеңістің 80 жылдығы қарсаңында &nbsp;арнайы «Тазым» алаңына тазалық жүргізіп отырмыз. Мақсат &nbsp;кейінгі ұрпаққа майдангерлеріміздің ерлігін ұлықтау, ұрпақ мұрасын күтіп ұстау, құрметтеуге дәріптеу»,- дейді партияның облыстық филиалының төрағасы Алмасбек Есмаханов. &nbsp;&nbsp;Атап өтейік, екінші дүниежүзілік соғысқа Қызылорда өңірінен 150 мың адам аттанса, олардың 60 мыңы ғана елге оралды. Бүгінде өңірде көзі тірі екі ардагер ғана бар.<img src="https://knadmin.beoblood.kz/uploads/Ta_zym_ala_y_2_507d8432a5.jpeg" alt="Тағзым алаңы 2.jpeg"><img src="https://knadmin.beoblood.kz/uploads/Ta_zym_ala_y_3_82bcd033f7.jpeg" alt="Тағзым алаңы 3.jpeg">

«Тағзым» алаңына тазалық жұмыстарын жүргізді

<a href="https://kyzylorda-news.kz/">Kyzylorda-news.kz</a> «АMANAT» партиясы облыстық филиалының төрағасы Алмасбек Есмаханов, партия филиалы жанындағы Сыбайлас жемқорлыққа қарсы іс-қимыл жөніндегі аймақтық кеңес төрағасы Мақсұт Налибаев және Партиялық бақылау комиссиясының төрағасы Нұркен Бақытбекұлымен бірге «Art Sport» бағдарламасының Қызылорда қаласында іске асырылу барысына мониторинг жүргізді.Мониторинг жұмысына облыстық мәслихаттағы «АMANAT» партиясы депутаттық фракциясының мүшелері, партияның қалалық филиалы жанындағы партиялық бақылау комиссиясы, Қазақстан Республикасындағы адам құқықтары жөніндегі уәкілдің Қызылорда облысы бойынша өкілі, Сыбайлас жемқорлыққа қарсы іс - қимыл агенттігі Қызылорда облысы бойынша департаменті мен жауапты басқарма өкілдері қатысты.&nbsp;Атап өту керек, балалар мен жасөспірімдерге арналған шығармашылық және спорттық тапсырыс аясында 2021-2025 жылдарға облыс бойынша 28,6 млрд.теңге қаржы қаралып, 12,1 млрд.теңге &nbsp;игерілген. 7,0 млрд.теңге бюджетке қайтарылған. Өткен жылы бұл мақсатқа 5,2 млрд.теңге &nbsp;жұмсалса, биыл &nbsp;жұмсалатын қаржы шығыны шамамен – 2,4 млрд.теңге. Яғни былтырғы жылмен салыстырғанда 2 есеге үнемделеді.<img src="https://knadmin.beoblood.kz/uploads/Whats_App_Image_2025_04_17_at_11_11_51_1_859b3f9752.jpeg" alt="Аманат партиясы 2.jpeg">Өңірде арнайы жұмысшы тобының зерделеу нәтижесінде 310 кәсіпкердің 215-мен келісім-шарттар біржақты бұзылған. Қазіргі уақытта облыста «Art Sport» бағдарламасы бойынша 52 кәсіпкер жұмыс істейді. Заңсыздықтардың алдын алу мақсатында барлық үйірмелер мен спорт секцияларына Face ID жүйесі орнатылған.Мониторинг барысында аманаттықтар кәсіпкерлік нысандардағы балаларға жасалған жағдай, бөлінген қаржының мақсатты игерілуі, санитарлық талаптар мен заңдылықтардың сақталуына басымдық берді.&nbsp;<blockquote>«Мемлекет балалардың тегін, қолайлы жерлерде бос уақытын тиімді өткізуі үшін яғни олардың спорт және түрлі шығармашылық үйірмелерде білім алуы үшін &nbsp;«Art Sport» бағдарламасы қолдап, қаржы бөліп отыр. Дегенмен көптеген жауапсыз кәсіпкерлер бағдарлама аясында өз қалтасы үшін заңсыздыққа барғандары бар. Алайда құзырлы органдардың артспорт үйірмелеріне мемлекеттен бөлінген қаржының заңды игерілуіне қатысты тексеруі нәтижесінде жымқырылған қаржы бюджетке қайтарылып, заңсыздыққа барған кәсіпкерлерге шара көріліп жатыр. &nbsp;Мұндай әрекетке жол бермеу керек. Еліміздің болашағына салынып отырған инвестиция мақсатты игерілуі керек. «AMANAT» партиясы &nbsp;бұған бей жәй қарамайды»,- деді мониторинг барысында &nbsp;кәсіп иелерімен кездескен партияның облыстық филиалының төрағасы Алмасбек Есмаханов.</blockquote><img src="https://knadmin.beoblood.kz/uploads/Whats_App_Image_2025_04_17_at_11_11_50_f98be8384e.jpeg" alt="Аманат партиясы 3.jpeg">

«ART SPORT» бағдарламасының орындалу барысына мониторинг жасалды

<a href="https://kyzylorda-news.kz/">Kyzylorda-news.kz</a> «АМАNАТ» партиясының сайлауалды бағдарламасында жастарды баспанамен қамтуға ерекше мән берілген. &nbsp;Осы мақсатта Сыр өңірінде аймақ басшысының қолдауымен бағдарлама аясында арнайы «Сыр жастары» жобасы жүзеге асты. Жоба аясында бірқатар жастар баспаналы болып та үлгерген болатын. Бүгін партияның облыстық филиалы жанындағы Жастарды қолдау жөніндегі аймақтық кеңес отырысында «Сыр жастары» тұрғын үй бағдарламасының жүзеге асырылу барысы көтеріліп, бағдарламаның тиімділігін арттыру, жастардың баспанаға қолжетімділігін жеңілдету жолдары талқыланды. Сонымен қатар, бағдарламаға қатысты туындаған сұрақтар мен ұсыныстар ортаға салынды.&nbsp;Кеңес жиынына &nbsp;«АМАNАТ» партиясы облыстық филиалының төрағасы Алмасбек Есмаханов, &nbsp;қалалық мәслихат депутаттары, атқарушы органдар мен БАҚ өкілдері және «Жастар Рухы» ЖҚ оқу орны бөлімшелерінің жетекшілері қатысты. Қызылорда облысының қоғамдық даму басқармасы басшысының орынбасары Уалихан Ибраев өңірдегі «Сыр жастары» мемлекеттік бағдарламасы жайындағы жасалып жатқан жұмыстар хабарлама жасады.<img src="https://knadmin.beoblood.kz/uploads/Whats_App_Image_2025_04_17_at_15_12_44_1_3009ade853.jpeg" alt="WhatsApp Image 2025-04-17 at 15.12.44 (1).jpeg"><blockquote>«Бағдарлама аясында мыңға жуық жастан құжат қабылданып, 60 жасқа 2024 жылдың мамыр айында қаламыздың Сол жағалауында орналасқан жаңа, үш бөлмелі пәтерлердің кілті табысталса, қалған 40 жасқа Бименді Баймаханов көшесіндегі жаңа үй пәтерлерінің кілті желтоқсан айында берілді. Бағдарламаның оңтайлы шарттары мен тиімді несиесі жастарға қолдау болып, қоғамда оң пікірге ие болып үлгерді. Осы орайда, бағдарламаны жүзеге асыру барысында келіп түскен ұсыныстар мен жүргізілген мониторингтік жұмыстардың нәтижесіне сәйкес, бағдарламаның 2025 жылғы ережесі мен шарттарына облыстық мәслихаттың 2024 жылдың 9 желтоқсанындағы №141 шешімімен бірқатар өзгерістер енгізілді. &nbsp;«Сыр жастары» бағдарламасын 2025 жылы жүзеге асыру үшін облыстық бюджеттен &nbsp;бюджеттік несие ретінде 1,2 млрд теңге бөлініп, «Отбасы банк» АҚ-ының банктің шотына аударылды» - деді Уәлихан Серікұлы.</blockquote>Отырыс қорытындысы бойынша «Сыр жастары» тұрғын үй бағдарламасын одан әрі жетілдіру және жастар арасында кеңінен ақпараттандыруға қатысты бірқатар нақты ұсыныстар қабылданды. &nbsp;Айтылған ұсыныстар арнайы хаттамаға енгізіліп, тиісті орыгандарға жолданатын болады.<img src="https://knadmin.beoblood.kz/uploads/Whats_App_Image_2025_04_17_at_15_12_44_1dd483b6d2.jpeg" alt="Аманат партиясы.jpeg">

«AMANAT»: Жастарды баспанамен қамту маңызды міндеттердің бірі

<a href="https://kyzylorda-news.kz/">Kyzylorda-news.kz</a> Мемлекет басшысы биылғы жылды «Жұмысшы мамандықтар жылы» деп жариялады. Бұл – қарапайым еңбек адамдарының қоғамдағы абырой-беделі мен әлеуетін көтеруге тікелей ықпал етері сөзсіз. Осы орайда «AMANAT» партиясының ұйытқы болуымен атаулы жылдың мәні мен мазмұнын арттыру бағытында көптеген ауқымды жұмыстар ұйымдастырылуда.Жақында Қызылордада «AMANAT» партиясы Сырдария аудандық филиалының ұйымдастыруымен Нағи Ілиясов ауылында күрішші-механизаторлармен кездесу өтті. Кездесуге Қазақстанның Еңбек Ері, «Қызылорда облысының Құрметті азаматы» Абзал Ералиев, «Мағжан және К» серіктестігі директорының орынбасары Еркебұлан Дарханұлы, Сырдария аудандық қоғамдық кеңесінің мүшесі Жадыра Бағдатқызы, сондай-ақ шаруашылықтың күрішші-механизаторлары мен БАҚ өкілдері қатысты.Кездесуде «AMANAT» партиясының Сырдария аудандық филиалының Атқарушы хатшысы, аудандық мәслихаттағы депутаттық фракция жетекшісі Ақтөре Ибрагимұлы мемлекет тарапынан қабылданып жатқан жұмыстар туралы айтты.«Үкіметтің кеңейтілген отырысында Мемлекет басшысы «Биыл – Жұмысшы мамандықтар жылы. Осыған орай, маңызды іс-шаралар мен жобалар жүзеге асырылмақ. Еңбек адамының абырой-беделін арттыру үшін нақты жұмыс жүргізіледі. Техникалық және кәсіптік білім беру жүйесін түбегейлі жаңғырту ісін бастау керек. Жауапты мекеменің бәрі және ең бастысы, жеке сектор бұл іске белсене араласуға тиіс», – деп нақты атап өтті. Оң бастаманың мақсаты біреу ол – нағыз еңбек адамдарын қоғамда дәріптей отырып, елдегі түрлі жұмысшы мамандардың мәртебесін арттыру, насихаттау. Енді әр салада тер төгіп жүрген азаматтарға, яғни құрылысшы, диқан, жүргізуші, шахтер, кенші және басқа да көптеген қарапайым жұмысшы өкіліне құрмет артар деген сенім бар. Бұл мақсатты жұмыс «AMANAT» партиясының да сайлауалды бағдарламасында көрініс тапқан, – деді Ақтөре Ибрагимұлы.Өз кезегінде Қазақстанның Еңбек Ері Абзал Ералиев жұмысшы мамандықтардың маңызын арттыру мен атқарылып жатқан жұмыстар төңірегінде ой бөлісті.<blockquote>«Мемлекет басшысы билғы жылды «Жұмысшы мамандықтар жылы» деп жариялағаннан кейін Премьер-министр Олжас Бектеновтің төрағалығымен өткен Үкімет отырысы өткізілді. Жиында мәлім болғандай, жұмысшы мамандықтардың маңызын арттыру, техникалық және кәсіптік білім беру жүйесін реформалауда Үкімет «Жұмысшы мамандықтарының жылын» ұйымдастыру жөніндегі республикалық жоспар бекіткен. 7 бағыт пен 70 қадамнан тұратын құжатта жаңа мамандықтар атласын әзірлеу, кәсіптік бағдар беру тұжырымдамасын жүзеге асыру, техникалық және кәсіптік білім беруді трансформациялау, кәсіби білікті кадрлар даярлау, сапалы жұмыс орындарын құру, жұмысшы кадрлардың құқығын қорғау және мәртебесін көтеру мәселесін қамтылғаны көңілге қуаныш ұялатты. Біліктілікті арттыруға басымдық беріп жатырмыз. Себебі қазіргі келіп жатқан техниканың барлығы цифрландырылған. Жұмыстың, өзіміз өндіріп жатқан өнімнің сапасын арттыруда жаңа техниканың рөлі зор. Сондықтан техника тілін меңгерген, білімі мол азаматтар қай кезде де сұранысқа ие, – деді Абзал Ералиев.</blockquote>Басқосуда Сырдария аудандық қоғамдық кеңесінің мүшесі Жадыра Бағдатқызы ауылда еңбек етіп, ауылшаруашылығын дамыту арқылы ауданның, аймақтың дамуына лайықты үлес қосып жүрген еңбек адамдарына шынайы алғысын жеткізді. Күн-түн демей еңбек етіп, ел қамбасын алтын дәнге толтырып жатқан күрішші-механизаторлардың жұмысына табыс тіледі. Ал күрішші-механизаторлар халқының аты да, даңқы да адал еңбекпен шыққан берекелі ауылда еңбек етуді зор мақтаныш санайтынын айтып, алдағы уақытта да ауылдың өсіп-өркендеуіне өз үлестерін қоса беретінін атап өтті.«Жұмысшы мамандықтар жылы» аясында ұйымдастырылған кездесуді қорытындылаған «AMANAT» партиясының Сырдария аудандық филиалының Атқарушы хатшысы Ақтөре Ибрагимұлы бірқатар күрішші-механизаторды партия филиалының атынан Алғыс хатпен марапатталды.<img src="https://knadmin.beoblood.kz/uploads/Whats_App_Image_2025_04_17_at_11_11_54_0784531413.jpeg" alt="Сырдария Аманат партиясы 2.jpeg">

"Жұмысшы мамандықтар жылы" аясында механизаторлармен кездесу өтті

<a href="https://kyzylorda-news.kz/">Kyzylorda-news.kz</a> Текей Батыр Қарпықұлы атындағы жоғары колледжде кездесу өтті. Қызылорда облыстық Қазақстан халқы Ассамблеясы жанындағы Этномедиация орталығының ұйымдастыруымен өткен шара студент жастарға этномедиацияның маңызын түсіндіруге арналды.Кездесу барысында облыстық ҚХА жанындағы этномедиация орталығының төрағасы, психолог-медиатор Жанна Мирамбекқызы мен этномедиация орталығының үйлестірушісі, «Қоғамдық келісім» КММ бөлім басшысы Шахизат Абдраманова студенттермен ашық әрі мазмұнды әңгіме жүргізіп, қоғамдағы татулық, өзара түсіністік, буллинг пен ойынқұмарлықтың алдын алу туралы кеңінен баяндады.Колледж директорының тәрбие ісі жөніндегі орынбасары Болатбек Айтбенбетов шараға ризашылығын білдіріп, жастар тәрбиесінде мұндай кездесулердің маңызы зор екенін атап өтті.Кездесу еркін форматта өтіп, студенттер көкейлеріндегі сауалдарын қойып, құнды жауаптар алды.<img src="https://knadmin.beoblood.kz/uploads/Assambleya_2_5745d4c7d9.jpg" alt="Ассамблея 2.jpg">

Студент жастармен кездесу өтті

<a href="https://kyzylorda-news.kz/">Kyzylorda-news.kz</a> Биыл Қызылорда қаласының Қазақ АКСР-нің астанасы болғанына және «Қазақ» атауының қайтарылғанына 100 жыл толды. Бұл айтулы дата Сыр өңірінің тарихи-экономикалық, қоғамдық-саяси қызметіне үлкен өзгеріс пен серпін берген кезеңнің көрінісі. Тарихи күнге орай бүгін Студенттер сарайында облыстық симфония оркестрінің концерті өтті.Оркестрдің көркемдік жетекшісі және бас дирижері — Қазақстанның еңбек сіңірген қайраткері, профессор Мүсілім ӘмзеМузыка кешінде орындалған әлемге әйгілі классиктердің танымал шығармаларын корермен қауым жылы қабылдап, саз кешінен ерекше әсер алды. Концерт тамашалаған мәдениет және өнер жанашырлары, қоғам белсенділері, білім және мәдениет өкілдері, зиялы қауым өкілдері және жастар кеш соңында өнер иелеріне шексіз ризашылық танытып, зор құрметпен қол соқты.<img src="https://knadmin.beoblood.kz/uploads/Simfoniya_orkestri_2jpeg_29dfe17b12.jpeg" alt="Симфония оркестрі 2jpeg">

Қазақстан және Қызылорда облысының жаңалықтары: Қоғам