<a href="https://kyzylorda-news.kz/">Kyzylorda-news.kz</a> Елімізде&nbsp;жол саласында маман тапшы. Бүгінде статистикалық&nbsp;деректерге&nbsp;сүйенсек, автомобиль жолдарын салу және жөндеу жұмыстарына 3 мыңдай&nbsp;кәсіби маман қажет.&nbsp;Кадр қат кезде жастардың қызығушылығын көптеп осы бағытқа бұру керек.&nbsp;Жол активтері сапасының ұлттық&nbsp;орталығы бірнеше жылдан бері республика көлемінде «2000 мектеп» жобасын қолға алып, мектеп оқушыларына кәсіби бағдар беріп келеді. Мәселен,&nbsp;қызылордалық&nbsp;жолшылар&nbsp;өткен оқу маусымында 25 білім ордасына арнайы барып, 9-11 сынып оқушыларына&nbsp;жол мамандығы туралы кеңінен мағлұмат берді. Мұнан бөлек, орталық ғимаратында 10 жуық «Ашық есік» күнін ұйымдастырып, 400 жуық мектеп оқушысы мен жоғары және арнаулы оқу орындарынан 200-ден аса студент жол зертханасының жұмысымен танысып, асфальт-бетон жабындыларынан сынамалар қалай алынатынын көзбен көрді. Бүгінде бұл процестердің барлығы заманауи автоматтандырылған қондырғылармен жүргізіледі. Сондықтан, біраз жастың қызығушылығы оянып, жол маманы болуға ниет білдірді.<blockquote>&nbsp;– Біздің мақсатымыз жастарға дұрыс бағыт-бағдар беріп, оларды қазір еңбек нарығында сұранысқа ие жол мамандығын таңдауға шақыру. Елімізде жол құрылысы бойынша оқытатын&nbsp;жоғары оқу орындары жетерлік. Тіпті, Көлік министрінің ұсынысымен жол мамандығына берілетін грант саны да ұлғайды. Мысалы, бізде асфальт төсейтін техника /укладчик/ басқаратын, каток айдайтын мамандар аз. Ал олардың жалқысы 400-500 мыңнан басталады. Басқа да бағыттар бойынша білікті кадрлар жетіспейді. Сондықтан, барша мектеп бітіруші түлектерді, колледж жастарын жолшы болуға шақырамыз»,- дейді «Жол активтері сапасының ұлттық орталығы» РМК ҚОФ директоры Мақсат Асхатұлы.</blockquote>Айта кетейік, биыл еліміздің Ғылым және жоғары білім министрлігі жол құрылысы мамандығына 7 мыңнан аса грант бөлген. Яғни, мектеп бітіруші түлектер үшін ақысыз негізде еңбек нарығында сұранысқа ие мамандықта оқуына&nbsp;үлкен мүмкіндікберіліп отыр.

Жол саласында кәсіби маман тапшы

<a href="https://kyzylorda-news.kz/">Kyzylorda-news.kz</a> Ақтауда рұқсатсыз ұйымдастырылған қайырымдылық акциясы қоғамдық тәртіп бұзуға әкеліп, кәсіпкерге айыппұл салынды, деп хабарлайды BAQ.KZ Ақтау қалалық әкімдігіне сілтеме жасап.1 маусым – Халықаралық балаларды қорғау күніне орай Ақтау қаласындағы 29-шағынауданда "Abu Baby" балалар киім дүкені азық-түлік пен сыйлықтарды тегін тарату бойынша іс-шара ұйымдастырды. Алайда бұл акция алдын ала ескертілмеген және жергілікті атқарушы органдармен келіспестен өткізілген.<blockquote>Нәтижесінде көптеген адам жиналып, қоғамдық тәртіп бұзылып, қала тұрғындары арасында шиеленіс туындады, – деп мәлімдеді әкімдік өкілдері.</blockquote>Акция аясында таратылған тегін балмұздақ пен сыйлықтар жұртты жаппай жинауға себеп болды. Куәгерлердің айтуынша, кей жерлерде тәртіпсіздік пен бейберекет кезек орын алған.Іс-шараны заңсыз өткізген кәсіпкерге ҚР Әкімшілік құқық бұзушылық туралы кодексінің 488-1-бабына сәйкес 20 АЕК (78 640 теңге) көлемінде әкімшілік айыппұл салынады. Бұл бап жария іс-шараны хабарламай немесе рұқсатсыз өткізгені үшін жауапкершілікті қарастырады.Ақтау қаласының әкімдігі азаматтардың жаппай қатысуымен өткізілетін барлық іс-шаралар – қайырымдылық акциялары, қоғамдық орындарда тегін өнім тарату және тағы басқалары – міндетті түрде жергілікті әкімдікпен алдын ала келісуі тиіс екенін ескертті.<blockquote>Мұндай іс-шаралар тек заң аясында ұйымдастырылуы тиіс. Әйтпесе, мұның соңы қоғамдық тәртіптің бұзылуына алып келуі мүмкін, – дейді шенеуніктер.</blockquote>Фото: Скриншот/baq.kz

Тегін балмұздақ таратқан кәсіпкер жазаланды

<a href="https://kyzylorda-news.kz/">Kyzylorda-news.kz</a> 1 маусым – Халықаралық балаларды қорғау күні мерекесінде Қазанғап атындағы Қызылорда музыкалық жоғары колледжінің жаңа ғимараты ел игілігіне табысталды. Салтанатты шараға ҚР Премьер-министрінің орынбасары Ермек Көшербаев, облыс әкімі Нұрлыбек Нәлібаев, Парламент Сенаты мен Мәжілісінің депутаттары Наурызбай Байқадамов, Руслан Рүстемов, Мархабат Жайымбетов, Мұрат Әбенов, Мұрат Ергешбаев, академик, жерлесіміз, Қазақстанның Еңбек Ері Асқар Жұмаділдаев пен «Саутс Ойл» мұнай компаниясының басшысы Серікжан Сейтжанов, зиялы қауым өкілдері қатысты.<img src="https://knadmin.beoblood.kz/uploads/Muzykaly_kolledzh_3_184ad9698b.jpg" alt="Музыкалық колледж 3.jpg">Премьер-министрдің орынбасары Ермек Көшербаев жаңа ғимаратта өнерлі жастар тәрбиелене беруіне тілек білдірді.Аймақ басшысы өнер қайраткерлерінің лайықты ізін жалғайтын өнер ордасының Сыр мәдениетінің қарашаңырағына айналғанын атап өтті.<img src="https://knadmin.beoblood.kz/uploads/Muzykaly_kolledzh_f36f3a8c97.jpg" alt="Музыкалық колледж.jpg"><blockquote>"Елу жылға жуық тарихы бар Қазанғап атындағы Қызылорда музыкалық жоғары колледжі Сыр топырағында ұрпақтан ұрпаққа жалғасқан мәдени мұраның, ұлттық өнердің кемелденуіне зор үлес қосып келеді. Бүгінге дейін оқу орны талапқа сай келмейтін ескі ғимаратта қиындықтарға қарамастан жастарға білім беріп, өнерге баулыды. Жаңа ғимаратта студенттерге барлық жағдай жасалған. Үлкен концерт, би залдары, хор бөлмесі бар. Кең музыкалық пәндік кабинеттер жаңа заманауи құрал-жабдықтармен қамтылған. Материалдық-техникалық базасы заман талабына сай келетін 200 орындық жатақхана шалғай елді мекеннен келген жас өрендерді қабылдауға дайын. Күн сайын жаңарып, жасарған Сыр өңірінің жаңа келбетіне көрік берген музыкалық колледждің ғимаратын салуға демеушілік жасап, қолдау көрсеткені үшін «Саутс-Ойл» компаниясының басшысы, елімізге белгілі меценат Серікжан Сейтжанұлына барша Сыр жұртшылығының, өзімнің атымнан шынайы ризашылығымды білдіремін. Бұл ұлтымыздың тарихи «Қазақ» атауының қайтарылғанының, Қызылорданың Қазақ елінің астанасы болғанының 100 жылдық мерейтойына үлкен тарту болды. Жаңа нысан баршамызға құтты болғай!", - деді Н.Нәлібаев.</blockquote><img src="https://knadmin.beoblood.kz/uploads/Muzykaly_kolledzh_6_70c2073929.jpg" alt="Музыкалық колледж 6.jpg">Салтанатты шарада Серікжан Сейтжанов пен Руслан Рүстемов жаңа ғимараттың ашылуымен құттықтап, ізгі тілектерін жеткізді.Айта кетейік, Президентіміздің «Туған жерді бірге түлетейік!» үндеуі аясында кәсіпкер-меценаттар, қоғамдық қорлар бұл бастаманы қолдап, Сыр өңірін көркейтуге өз үлестерін қосуда. Бүгінде аймағымызда демеушілікпен 55 млрд. теңгеден астам қаржыға жаңа жобалар жүзеге асып келеді. Мемлекет басшысының тікелей тапсырмасына сәйкес "Қорқыт Ата әуежайының" жаңа терминалы ашылды. Жобаны іске асыруға "Болат Өтемұратов қоры" 16 млрд.600 млн. теңге инвестиция салды.Жергілікті бюджеттен инженерлік-коммуникациялық инфрақұрылымға 4 млрд. 300 млн теңге қаржы бөлінді. «Самұрық Қазына Траст» қорымен бірге "Үстел теннисі орталығы", «ҚазМұнайГаз» компаниясының демеушілігімен 350 орындық заманауи үлгідегі "Оқушылар сарайы" салынып, ел игілігіне қызмет етуде. Жеке инвесторлардың, «Қазақстан темір жолы» Ұлттық компаниясының қолдауымен теміржол вокзалына күрделі жөндеу жүргізілді.<img src="https://knadmin.beoblood.kz/uploads/Muzykaly_kolledzh_5_392ab0089e.jpg" alt="Музыкалық колледж 5.jpg">Биыл "Қазақстан Темір Жолы" компаниясының қолдауымен барлық аудандағы теміржол вокзалдары күрделі жөндеуден өтуде. Белгілі кәсіпкер Марат Дүйсенбаевтың демеушілігімен «Анаға тағзым» орталығы салынып пайдалануға берілді.Президентіміз жариялаған «Балалар жылы» аясында жергілікті кәсіпкерлердің демеушілігімен облысымызда 80 спорт-ойын алаңы салынды. Демеушілердің қолдауымен 50-ден астам үйдің қасбеттері заманауи панельмен қапталды, аулалар абаттандырылып, заманауи спорт алаңдары, тротуарлар, жарық бағаналары жаңартылды.Қала тұрғындары мен қонақтарының сүйікті демалыс орнына айналған Орталық алаң жерлесіміз Асқар Әубәкіровтің демеушілігімен жаңғыртудан өтті. Демеушілікпен Жаңақорған ауданында заманауи демалыс паркі, Сырдария ауданы Нағи Ілиясов ауылында «Еңбекшілер паркі» бой көтерді.Осындай абаттандыру жұмыстары барлық аудан орталықтарында, ауылдарда да жергілікті кәсіпкерлердің қолдауымен жүргізілуде. Демеушілер есебінен Арал ауданы, Тоқабай ауылындағы апаттық мектептің орнына құны 500 млн. теңге болатын мектеп салынды.Қызылорданың Түркістан облысымен шекарасында кіреберіс қақпа ашылды. Жақында «Қазақстан халқына» қоғамдық қоры қолдауымен денешынықтыру- сауықтыру кешенінің құрылысы басталды. Биылғы Ассамблеяның 30 жылдығы аясында «Қазатомөнеркәсіп» ұлттық атом компаниясының» қолдауымен жаңадан «Достық үйі» бой көтеруде.<img src="https://knadmin.beoblood.kz/uploads/Muzykaly_kolledzh_4_10a8c0eb6a.jpg" alt="Музыкалық колледж 4.jpg">Фото: Қызылорда облысы әкімінің баспасөз қызметі

Қазанғап атындағы Қызылорда музыкалық жоғары колледжінің жаңа ғимараты табысталды

<a href="https://kyzylorda-news.kz/">Kyzylorda-news.kz</a>&nbsp;31 мамыр - ХХ ғасырдағы кеңестік биліктің тоталитарлық саясаты салдарынан саяси қуғын- сүргінге ұшыраған қайраткерлеріміз бен ашаршылық құрбандарын еске алатын тарихымыздағы қасіретті күн. Бірлігі кетіп, берекесі қашқан сол кезеңде халқымыздың жартысына жуығы құрбан болып, жарты миллионнан астамы бас сауғалап шет елдерге үдере көшуге мәжбүр болды.Қазақстан тәуелсіздік алғаннан кейін 1993 жылы 14 сәуірінде «Жаппай саяси қуғын-сүргін құрбандарын ақтау туралы» заң қабылданды. Осы мақсатта 1998 жылы Қызылорда қаласында да ашаршылық қуғын-сүргін құрбандарына арнап ескерткіш орнатылды.Кеше ашаршылық қуғын-сүргін құрбандарына арналған ескерткішіне Қызылорда облысы бойынша ҚАЖД-нің №60 мекемесінің қызметкерлері саяси қуғын-сүргін құрбандарын бір минут үнсіздікпен еске алып, гүл шоқтарын қойды.<blockquote>«Ата-бабаларымыздан дарыған қайсарлық пен төзімділіктің арқасында қатаң сыннан абыроймен өтіп, біртұтас ұлт ретінде бірігуге мүмкіндік алдық. Сол зұлмат заманда өмірден өткен ата-бабаларымызды еске алу, рухына тағзым ету- біздің перзенттік борышымыз»,- деді мекеме бастығының тәрбие ісі жөніндегі орынбасары әділет подполковнигі Алтынбек Тұрарбекұлы.</blockquote><img src="https://knadmin.beoblood.kz/uploads/Whats_App_Image_2025_06_02_at_09_14_16_618c5321cd.jpeg" alt="ҚАЖ.jpeg">

Саяси қуғын-сүргін құрбандарын еске алды

&nbsp;<a href="https://kyzylorda-news.kz/">Kyzylorda-news.kz</a> Балалардың құқығын қорғау күні мерекесіне орай “Ауыл” партиясы Қызылорда облыстық филиалы мен “Мүгедектендің құқығын қорғау” комиссиясының бірлесіп ұйымдастыруымен «Шуақты күндер шашуы» тақырыбында мерекелік құттықтау шарасы өтті.Ұйымдастырушылар үй-үйлерді аралап, балаларды мерекесімен құттықтап, тәттілер мен бағалы ойыншықтар табысталды.<img src="https://knadmin.beoblood.kz/uploads/1_Shua_ty_k_nder_shashuy_e60b41cd18.jpg" alt="1 Шуақты күндер шашуы.jpg">

Шуақты күндер шашуы

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда қалалық филиалының Саяси кеңесі бюросының отырысы өтті. Қалалық мәслихаттағы депутаттық фракциямен жыл басынан атқарған жұмыстар сараланған алқалы жиынға партияның облыстық филиалының төрағасы Алмасбек Есмаханов арнайы қатысты.Атап өтейік, Қызылорда қалалық мәслихатындағы 23 мандаттың 82,6 пайызын «AMANAT» партиясы мүшелері құрайды. Есепті кезеңде депутаттық фракцияның 1 отырысы өткізіліп, онда партияның Жол картасының 2025 жылы Қызылорда қаласында орындалуы тиіс шаралары мен сайлаушылар тарапынан түскен талап-тілектердің іске асуы талқыланған.<blockquote>«Жыл басынан Жол картасының биылға жоспарланған 72 іс-шараның 12,5% орындалса, 63 іс-шара орындалу үстінде. Сайлау науқаны кезінде тұрғындар тарапынан түскен 166 ұсыныс, талап-тілектің 96% жүзеге асты. Фракция мүшелерінің қатысуымен партиялық жобалар аясында 28 іс-шара ұйымдастырылды. Партия алаңында фракция мүшелерінің қатысуымен 37 қоғамдық қабылдау өткізіліп, азаматтардан түскен 185 өтініштің 87,5 пайызы оң шешілді. Бұл бағыттағы жұмыстар фракция мүшелерімен жалғаса беретін болады», – дейді жиында есеп берген депутаттық фракция жетекшісі Талғат Мақаш.</blockquote>Жиын барысында сөз алған партияның облыстық филиалының төрағасы Алмасбек Есмаханов фракция мүшелерінің жұмысына жүргізілген мониторинг қорытындысымен таныстырып, фракция мүшелерінің жұмысын жетілдіруге қатысты бірқатар ұсыныстарын жеткізді.<blockquote>«Депутат – халықтың талап-тілегін, күрделі мәселелерін жоғарыға жеткізіп, оның оң шешілуіне ықпал жасаушы тұлға. Депутаттық қызмет – мансап емес, ол үлкен жауапкершілік. Сондықтан әр депутат жұмыс жоспарына сәйкес жүйелі жұмыс жүргізуі қажет. Оның ішінде халық алдында есеп беріп, бастауыш партия ұйымдарында кездесулер өткізу, партияның сайлауалды бағдарламасының орындалуына бақылау жасау, жеке қабылдаулар өткізіп, сайлаушылар өтініштерінің оң шешілуіне ықпал ету, депутаттық сауалдар, атқарылған жұмыстарды БАҚ пен әлеуметтік желілерде кеңінен насихаттап отыру мәселелері күн тәртібінен түспеу керек. Сәйкесінше әр тоқсан сайын мәслихаттағы фракцияда, жарты жылда бір рет Саяси кеңес бюросында депутаттардың атқарған жұмыстарының есебі тыңдалуы керек», – деді Алмасбек Есмаханов.</blockquote>Жиын барысында айтылған ұсыныстар хаттамаланып, жұмыс барысында ескерілетін болды.Фото: «AMANAT» партиясы

Бюро отырысында фракция жұмысы сараланды

<a href="https://kyzylorda-news.kz/">Kyzylorda-news.kz</a> Қазақстанда жетім балалардың отбасында тәрбиеленуіне басымдық беріліп отыр. Бұл туралы Орталық коммуникациялар қызметінде өткен дөңгелек үстел барысында Оқу-ағарту вице-министрі Еділ Оспан мәлімдеді, – деп хабарлайды <a href="https://kaz.inform.kz/news/kazakstanda-zhetm-balalardin-otbasinda-tarbielenu-mumkndg-artip-keled-ministrlk-1124b9/">Қазақпарат.</a><blockquote>— Біздің міндеттеріміздің бірі — балаларымыздың отбасында өмір сүру және тәрбиелену құқығын қамтамасыз ету. Балалар интернат мекемелерін институционалсыздандыру саясатын жүргізу жалғасып жатыр, — деді вице-министр.</blockquote>Оның айтуынша, қазіргі уақытта еліміздегі 21 387 жетім баланың 17 660-ы қазақстандық отбасыларда тәрбиеленіп жатыр. Жыл сайын Қазақстан азаматтары 1000-нан астам жетім баланы өз қамқорлығына алады.2024 жылы елімізде балалар үйіне балама ретінде «кәсіби отбасы институты» енгізілді. Бұл&nbsp;— балаларды арнайы дайындықтан өткен отбасыларға уақытша орналастыруды көздейтін жаңа әлеуметтік тетік.<blockquote>— Жүргізілген шаралардың нәтижесінде балалар үйінде тәрбиеленетін балалардың саны соңғы он жылда екі есеге азайды, — деді Еділ Оспан.</blockquote>Сонымен қатар, вице-министрдің айтуынша, жетім балаларға әлеуметтік қолдау көрсету жұмыстары да жүйелі түрде жүргізіліп жатыр. Атап айтқанда, еліміздің барлық өңірінде балалар үйінің түлектеріне арналған «Мейірім» қайырымдылық акциясы жүзеге асып жатыр.<blockquote>— Жетім балаларды тұрғын үймен қамтамасыз етудің жаңа тетіктері енгізілді. Бұл шаралар олардың қоғамға толыққанды бейімделуіне және өздігінен өмір сүру дағдыларын қалыптастыруға мүмкіндік береді, — деді спикер.</blockquote>Фото: Нұрболат Нұржаубай

Қазақстанда жетім балалардың отбасында тәрбиелену мүмкіндігі артып келеді — министрлік

Елімізде 1 маусымнан бастап балаларға арналған спорт, өнер және қосымша білім беру бағыттары бойынша бірыңғай ваучер жүйесінің пилоттық жобасы іске қосылады. Бұл туралы Stan.kz ақпарат агенттігі хабарлайды.2025 жылдың 1 маусымынан бастап бірыңғай ваучер жүйесін енгізу бойынша пилоттық жоба іске қосылады. Бастама Астана, Шымкент, Қарағанды, Қызылорда, Атырау және Ақтөбе қалаларында жүзеге асырылады.Аталған жүйе мемлекеттік және жекеменшік спорттық секцияларын, шығармашылық үйірмелер мен қосымша білім беру курстарын бірыңғай цифрлық платформаға біріктіреді.Жүйенің басты қағидаты – ваучер білім беру ұйымына емес, тікелей балаға беріледі. Бұл баланың спорт, шығармашылық және білім беру бағыттары арасында еркін ауысуына мүмкіндік береді және бұрынғыдай қайта кезекке тұру немесе қаржыландырудан айырылып қалу жағдайларына жол бермейді.Платформаны әзірлеу барысында әр өңірдің ерекшелігі мен шығармашылық, спорттық және білім беру қызметтерініндегі айырмашылықтар ескерілетін болады. Бірыңғай ваучердің екі түрі қарастырылған:Нысаналы ваучер – мемлекеттік мекемелерге арналған және кезекке тұруды қажет етпейді.Әмбебап ваучер – баланың ата-анасы eGov.kz порталы арқылы жекеменшік немесе мемлекеттік емес ұйымды таңдай алады.<blockquote>“Мұндай ваучер бойынша кезек баланың жасы мен отбасының әлеуметтік мәртебесіне сәйкес қалыптасады және бұл ресурстарды әділетті бөлуге мүмкіндік береді. Жаңа ережелерге сәйкес, үйірмелер мен секцияларда балалардың сапалы дамуын қамтамасыз ету үшін қауіпсіз инфрақұрылым, санитарлық және өртке қарсы нормалардың сақталуы, бекітілген білім беру бағдарламалары мен білікті мамандар болуы қажет. Бюджеттік қаражат тек мақсатына сай пайдаланылуға тиіс. Қатысушылардың келуі күнделікті цифрлық форматта тіркеледі. Ал бірыңғай платформа қаражаттың жұмсалуын ашық көрсетуді, процестерді автоматтандыруды, сондай-ақ сыбайлас жемқорлық пен алаяқтық схемаларын азайтуды қамтамасыз етеді”, – делінген хабарламада.</blockquote>Жобаны келесі мемлекеттік органдар бірлесіп жүзеге асырады:<ul><li style="text-align:justify;">Мәдениет және ақпарат министрлігі – шығармашылық бағыт бойынша;</li><li style="text-align:justify;">Туризм және спорт министрлігі – спорттық секцияларды үйлестіру;</li><li style="text-align:justify;">Оқу-ағарту министрлігі – қосымша білім беру бойынша;</li><li style="text-align:justify;">Цифрлық даму министрлігі – техникалық сүйемелдеу және цифрлық инфрақұрылымды жүзеге асырады.</li></ul>Мемлекеттік органдар бюджеттік қаражатты мақсатты және тиімді пайдаланудың тетіктерін енгізу бойынша жүйелі саясатты жалғастырып жатыр. Пилоттық жоба тек балалар мүддесін, олардың қауіпсіздігін және көрсетілетін қызметтердің сапалы түрде қолжетімді болуын қамтамасыз етуге бағытталған.Фото: Freepik.com

Қазақстандық балалар 1 маусымнан бастап тегін үйірмелерге қатыса алады: Жоба қалай жұмыс істейді?

<a href="https://kyzylorda-news.kz/">Kyzylorda-news.kz</a> Шиелі ауданы әкімдігінің мәжіліс залында Қызылорда облысы әкімі аппаратының Әдеп жөніндегі уәкілі Әбдіқадыр Бағдат Нажмедденұлының қатысуымен мемлекеттік қызметшілерге арналған түсіндірме жиыны өтті.Жиынның басты мақсаты – мемлекеттік қызметшілердің Әдеп кодексінің талаптарын сақтау, сыбайлас жемқорлыққа қарсы шектеулерді түсіндіру және қызметтік әдепті қалыптастыру.Жиынға аудан әкімдігінің аппарат басшысы Ғалымжан Каримов және мемлекеттік қызметкерлер қатысты. Басқосу барысында қызметтік әдебі, мемлекеттік қызметшілердің қызметтен тыс уақыттағы мінез-құлқы және моральдық-этикалық нормаларға қатысты мәселелер кеңінен сөз болды.Әбдіқадыр Бағдат Нажмедденұлы мемлекеттік қызметшілердің қоғам алдындағы жауапкершілігі мен олардың әдебі – мемлекеттік органдарға деген сенімнің негізі екенін атап өтті.Сонымен қатар, Әдеп жөніндегі уәкіл «Amanat» партиясының Шиелі аудандық филиалы ғимаратында мемлекеттік қызметшілер мен тұрғындарға жеке қабылдау өткізді.Фото: Шиелі ауданы әкімдігінің баспасөз қызметі

Мемлекеттік қызметшілерге арналған әдептік жиыны өтті

<a href="https://kyzylorda-news.kz/">Kyzylorda-news.kz</a> Арал аудандық мәдениет үйінде 1 маусым – Халықаралық балаларды қорғау күніне орай «Үкідей үлпілдеген – ерекше еркем менің!» атты отбасылық өнер фестивалі өтті.Аталмыш шара мүгедектігі бар балалар мен олардың отбасыларының шығармашылығына қолдау көрсету, өнер мен мейірім арқылы инклюзивті қоғам құру мақсатында ұйымдастырылды.Фестиваль аясында мәдениет үйінің фойесінде балалардың өз қолдарынан жасаған түрлі қолөнер бұйымдарының көрмесі қойылды.Шараның шымылдығында «Сынық құмыра» атты бейнебаян көрсетіліп, «GN» өнер академиясының бишілер тобы заманауи биімен мерекелік көңіл-күй сыйлады.Фестивальдің ашылуында аудан әкімінің орынбасары Н.Бохаев сөз алып, қатысушылар мен ата-аналарды мерекемен құттықтады.<blockquote>«Қымбатты балалар, қадірлі ата- аналар! Баршаңызды 1 маусым – Халықаралық балаларды қорғау күнімен барлығыңызды шын жүректен құттықтаймын! Жарқыраған күндей күлкісі мен тәтті тілімен әлемді ғажап ете алатын балдырғандарымыздың қуанышы – баршамыздың ортақ бақытымыз. Адамзат қоғамы әрқашанда өз ұрпағын түрлі қауіп-қатерден қорғап, олардың жарқын болашағы үшін күресіп келеді. Ұрпағымызға қамқорлық жасау, балалардың денсаулығын сақтау мен оларға саналы тәрбие беру – аса маңызды міндет. Бүгінгі «Үкідей үлпілдеген ерекше еркем менің» атты отбасылық өнер фестивалі – балалардың талантын танытып, жүрегіндегі жарықты сыртқа шығаратын тамаша алаң. Жас өрендердің өнерге деген құштарлығын, өмірге деген құлшынысын көру – жүрекке жылу, көңілге медеу сыйлайды. Бүгінгі мереке әрбір отбасыға шаттық, жүректерге нұр сыйласын! Барша фестиваль қатысушыларына сәттілік тілеймін», - деді.</blockquote>Мұнан соң, ерекше балаларды тәрбиелеп отырған бірқатар ата-аналар мен қолөнер көрмесіне белсене қатысқан балалар аудан әкімінің «Алғысмен» марапатталды.Шара одан әрі балалардың және олардың отбасы мүшелерінің арнайы дайындаған концерттік бағдарламасына ұласты. Олар бірлесе ән шырқап, би билеп, түрлі жанрда өнер көрсетті. «Ана мен бала», «Аға мен қарындас», «Аққу-арман», «Қара жорға» сынды туындылар сахналанып, көрермендердің ыстық ықыласына бөленді.Фестиваль соңында барлық өнерпаздар арнайы дипломдармен және естелік сыйлықтармен марапатталды.Сондай-ақ, жергілікті кәсіпкерлердің демеушілігімен бүлдіршіндерге тәттілер үлестірілді.<img src="https://knadmin.beoblood.kz/uploads/Aral_balalar_k_ni_e36e0ea272.jpg" alt="Арал балалар күні.jpg">

Ерекше балаларға арналған өнер фестивалі өтті

<a href="https://kyzylorda-news.kz/">Kyzylorda-news.kz</a> Бүгін облыс әкімінің орынбасары Шахмардан Байманов өңіріміздің намысын республика көлемінде қорғап жүрген дарынды балалармен кездесу өткізді. Қабылдауға ғылым, өнер, спорт және білім салаларында үздік нәтиже көрсеткен оқушылар шақырылды.Кездесуге келген халықаралық, республикалық олимпиадалар мен ауыл мектептерінің оқушыларына арналған жалпы білім беретін пәндер бойынша олимпиадалар, ғылыми жобалар байқауы және түрлі мәдени шығармашылық байқаулардың жеңімпаздарына облыс әкімінің Алғыс хаты мен бағалы сыйлық табысталды.Сыр дарындары Венгрия, Грузия, Түркіменстан, Түркия елдерінде, Молдова Республикасы астанасы Кишиневте, Египет мемлекетінің Александрия қаласында, Ташкент, Баку, Өзбекстан мемлекетінің Бұхара қаласы және Астана, Алматы қалаларында өткізілген түрлі білім бәсекесі мен шығармашылық байқаулардың жеңімпаздары.Айта кетейік, облыс әкімінің қолдауымен Сыр дарындыларының олимпиадалар мен ғылыми жобалар конкурстарынан жоғары нәтиже көрсетуіне Жаңақорған ауданындағы «Талдысу» мен Арал ауданындағы «Қамбаш» олимпиадалар және қосымша білім беру орталықтарында “Сыр дарыны” оқу-жаттығу жиыны үш жыл қатарынан жұмыс жасап келеді.Оқу-жаттығу жиынына олимпиадалық резерв мектептерінің 7-10 сынып оқушылары аралығында үздік нәтиже көрсеткен 960 оқушы жыл бойы үзбей жаратылыстану-математикалық бағыттағы (математика, физика, химия, биология, география, информатика) пәндері бойынша дайындық сабақтарына қатысады. Шебер, педагог-зерттеуші мұғалімдер заманауи жабдықталған лагерь кабинеттерінде оқу- жаттығу сабақтарын жоғарғы деңгейде жүргізіп келеді.

Дарынды балалар марапатталды

<a href="https://kyzylorda-news.kz/">Kyzylorda-news.kz</a> Атырау облысында егде жастағы әйелдің өліміне байланысты қылмыстық іс қозғалды, деп хабарлайды <a href="https://el.kz/atyrau-oblysynda-kelini-enesin-oltirdi-degen-kudikke-ilindi_400025554/">El.kz </a>интернет порталы.Атырау облысы Қызылқоға ауданына қарасты Жасқайрат ауылында 1942 жылы туған әйелдің қайтыс болуына байланысты қылмыстық іс қозғалды.Полиция мәліметінше, күдікті ретінде 1986 жылы туған азаматша ұсталған. Ол – марқұмның келіні.Атырау облыстық Полиция департаменті қазіргі уақытта жан-жақты тергеу шаралары жүргізіліп жатқанын мәлімдеді.<blockquote>Оқиғаның мән-жайы нақтылануда, ал қылмыстың себептері анықталу үстінде. Тергеу мүддесіне байланысты өзге ақпарат жарияланбайды, – деп нақтылады департамент өкілдері.</blockquote>Ауыл тұрғындары болған жайтқа қатты таңғалған. Тергеу амалдары жалғасуда.Фото: Pixabay.com

Қазақстан және Қызылорда облысының жаңалықтары: Қоғам