<a href="https://kyzylorda-news.kz/">Kyzylorda-news.kz</a> Бүгін Қала күні қарсаңында облыс әкімі Нұрлыбек Нәлібаевтың қатысуымен Қызылорданың сол жағалауындағы №2 шағын ауданға салынған 470 пәтерлік 10 көпқабатты тұрғын үйді салтанатты табыстау рәсімі өтті.Іс-шараға жауапты салалардың, құқық қорғау органдарының басшылары, Халықаралық Қарттар күні қарсаңында аймақ басшысының арнайы шақыртуымен барлық ауданнан келген ардагерлер, зиялы қауым өкілдері қатысты.Облыс әкімі жаңа пәтер иелерін қоныстоймен құттықтап, аймақтың құрылыс саласындағы жаңалықтарға тоқталды.<blockquote>«Халықты баспанамен қамту – мемлекетіміздің стратегиялық басым бағыттарының бірі. Мемлекеттік қолдау мен ұлттық жобалар аясында соңғы 2 жылда 4 мыңға жуық пәтер табысталып, 17 мың тұрғынның баспана мәселесі шешілді.Өңірде жыл басынан бері 900-ден астам отбасы қоныс тойын тойлады. Биыл мемлекеттік бюджеттен бөлінген 34 млрд. 100 млн. теңгеге 2,5 мыңнан астам пәтер беріледі. Осылайша, тұрғын үй құрылысы көлемі 126 пайызға өсті. Алдағы уақытта бұл бағыттағы жұмыстар жалғасын табады.Әлеуметтік-экономикалық дамудың негізгі көрсеткіштерінде оң серпін сақталып, облысымыз республика бойынша алдыңғы қатарға тұрақтады. Екі жыл бұрын облыс бюджеті 364 млрд. теңге болса, бүгінде 744 млрд. теңгеден асты. Бұл ауқымды қаражат аймақтағы ең өзекті деген мәселелерді шешуге, тұрғындардың өмір сүру сапасын арттыруға және ауқымды инфрақұрылымдық жобаларды жүзеге асыруға жұмсалуда.Тұрғындарды электр энергиясымен үздіксіз қамту бағытында 11 млрд. теңгеге 38 жоба жүзеге асырылуда. Бұл желілердің тозу деңгейін 66 пайыздан 62 пайызға төмендетті.Қалада инженерлік-коммуналдық инфрақұрылымды дамыту бағытында ауқымды жұмыстар атқарылуда. Осы уақытқа дейін Қызылорданың ең басты коммуналдық проблемасы болып келген көпқабатты тұрғын үйлерді ыстық сумен қамтамасыз ету оң шешімін тапты. Мемлекет басшысының, Үкіметтің қолдауымен қаламыздағы 625 үйге ыстық су жеткізіледі. Жобаның жалпы құны 26 млрд. 200 млн теңге, бірінші кезеңде, яғни биыл 187 үйге, екінші кезең – алдағы жылы тағы 237 үйге ыстық су қосылады.Ерекше атап өту қажет, өткен жылдан бері қаламызда 7, 9, 12 қабатты тұрғын үйлер бой көтеруде. Бүгін өздеріңізбен бірге тағы 500-ге жуық отбасының қуанышын еселемекпіз. Қоныстарыңыз құтты болсын!» – деді Нұрлыбек Нәлібаев.</blockquote>Жиында сол жағалаудың сәулетін арттырған зәулім үйлерді салған құрылыс компанияларының қызметкерлері облыс әкімінің Алғыс хатымен марапатталды. Қоғам қайраткері Нажмадин Мұсабаев жаңа қоныс иелеріне ақ батасын берді. Бүгін пәтер кілтін алғандар қатарында ұстаздар, медицина, мәдениет және спорт салаларының қызметкерлері және өзге де сала мамандары бар.Кейінгі жылдары Қызылордадағы құрылыс қарқынды. Әсіресе, әлеуметтік нысандар көптеп салынуда.Елді мекендерді газдандыру бойынша 20 жоба іске асуда. Жыл соңына дейін өңірді газбен қамту көрсеткіші 78 пайызға жетеді. Орталықтандырылған ауыз сумен қамтуға бағытталған 13 жоба бар, 300 шақырымнан астам автомобиль жолдары жөндеуден өтуде. Осылайша облыс аумағындағы жақсы жағдайдағы жолдардың үлесі 92 пайыздан асады.«Жайлы мектеп» ұлттық жобасы аясында 10 мектеп, «Білімді қолдау қоры» есебінен физика-математика мектеп-интернаты, «Саутс ойл» компаниясының демеушілігімен музыкалық колледждің жаңа ғимараты, «Шығармашылық академиясы», емханасы және онкологиялық бөлімшесі бар көпбейінді аурухана, Орталық стадион, жабық бассейні бар көпсалалы денешынықтыру-сауықтыру кешені салынуда. Осындай игі істердің жалғасы ретінде «Қызылорда Арена» көпбейінді спорт кешенінің іргетасы жақын күндері қаланады.Өткен жылы «Ауылда денсаулық сақтауды жаңғырту» ұлттық жобасы аясында 16 дәрігерлік амбулатория пайдалануға берілді. Қалған 11 медициналық нысан жыл соңына дейін табысталады.<img src="https://knadmin.beoblood.kz/uploads/turgyn_uj_1_f706754c71.jpg" alt="тургын уй 1.jpg"><img src="https://knadmin.beoblood.kz/uploads/turgyn_uj_3_d7b5de6170.jpg" alt="тургын уй 3.jpg"><img src="https://knadmin.beoblood.kz/uploads/turgyn_uj_4_01c2fd4947.jpg" alt="тургын уй 4.jpg">Фото: Қызылорда облысы әкімінің баспасөз қызметі

 Қызылордада 470 отбасы қоныс тойын тойлады

<a href="https://kyzylorda-news.kz/">Kyzylorda-news.kz</a> Кез келген қоғамды алып қарайтын болсақ, сол қоғамда өзара қарым-қатынасты реттеуші факторлар негізінде рухани құндылық, ұлтқа деген жанашырлық және тәрбие мен білімнің алатын орны ерекше. Кез келген салада сауатты болу әрбір қоғам үшін маңызды. Осы орайда діни сауаттылықтың қаншалықты маңыздылығына тоқтағанды жөн көрдік.Еліміз бүгінгі таңда көп ұлтты және бірнеше конфессияаралық келісімдерді ұстана отырып өзара қарым-қатынасын айқындауда. Десек те, дін қоғам үшін қасиетті болғанымен, оның қасіретінің де бар екенін ұмытпаған абзал. Діни сауатсыздық – ол түрлі жат ағымдарға және олардың құрығына оп-оңай түсіре кететін бір жол іспетті. Жоғарыда көрсетілгендей, сауатты болудың негізгі қадамдарына тәрбие мен білімді жатқызамыз. Қазақ халқы «Ел болам десең, бесігіңді түзе» демекші, әуелгі тәрбие жас ұрпақтан басталады. Себебі білімді ұрпақ – ұлттың болашағы. Діннің қасиетін күйзеліске түсіріп жүрген түрлі радикалды ағымдардың басты мақсаты да жас ұрпақтың санасын улаудан бастау алуда. Ақпараттық технологиялар дамыған заманда білім аламын деп ғаламторды ұстаз етіп жүрген жастар аз емес.Алыстағыны жақындатып, жанымыздағыны ұзақтатып жіберетін бұл ғаламтор қазіргі қоғам үшін жылдам ақпарат пен білім алудың көзі болып отыр. Алаңдататын мәселе де осы «ғаламтордан діни сауатымды арттыруға мүмкіндігім жетерлік» дейтіндердің көптігі. Осы көпшіліктің арасында жастардың теріс ағымға түсуі әп-сәтте. Балаларымыз бен жақындарымыздың діни сауатты болуын қадағалау әрбіріміз үшін аса маңызды. Себебі баланың сауатты болуын уайымдайтын болсақ, әуелі ата-ана ретінде өзіміз қаншалықты сауаттымыз деген сұраққа мән бергеніміз жөн.Қазіргі таңда діни сауаттылық тек жастар үшін маңызды деп ойлау да қателік. Отбасыдағы бала өз ата-анасынан, оқушы өзінің ұстазынан, жастар үлкен аға буындардан қарай отырып тәрбие алатындықтан «діни сауаттылық» барлығымыз үшін маңызы ортақ болуы тиіс. Білім алу сауаттылыққа бастар жол екені мәлім. Алайда қалай және қайдан білім алып жүргенімізге назар аударуымыз қажет. Осы орайда біздің текті бабаларымыз керемет өсиеттерін біздерге мирас қылып қалдырған. Мұхтар Әуезов: «Халық пен халықты, адам мен адамды теңестіретін нәрсе – білім. Адамшылықты тез жүргізу үшін көп ой керек, ойлау үшін оқу керек...», - деген. Хәкім Абай атамыз: «Пайда ойлама, ар ойла, талап қыл артық білуге. Артық ғылым кітапта, ерінбей оқып көруге», - дей отырып білім алудың маңыздылығын ескеруде. Ахмет Иүгінеки бабамыз да өз шығармаларында: «Білімді бір тең келер мың кісіге, білімге сай пайдалы өзге не бар?», - деп білімді болудың маңыздылығын көркем сөзбен жеткізуде.Мінеки, еліміздің болашағы – білімді де сауатты жастардың көп болуымен өлшенбек. Ал, сол жастарға біз болып, сіз болып, қоғам болып лайықты дәрежеде тәрбие бере білсек, ертеңіміздің жарқын болуына үлес қосқан боламыз.&nbsp;Олжас Нарымбетов,Қызылорда облысының «Дін мәселелерін зерттеу орталығының» аға маманы,&nbsp;теолог-әлеуметтанушыФото: amin.kz

Сауатты болу – діннің талабы

<a href="https://kyzylorda-news.kz/">Kyzylorda-news.kz</a> Бүгін республикалық Халықтық штаб мүшесі Мұрат Әбенов «Қорқыт ата» атындағы Қызылорда университетінің ғалымдарымен кездесті.Тың жаңалықпен отандық оқу ағарту саласында сара жолын қалыптастырып, шетелдік жоғарғы оқу орындарының озық тәжірибелерін іске асырып жатырған оқу орынында талантты студенттер жетерлік.Бүгінде шетелдік оқытушылардан дәріс алып, өз білімдерін жетілдіріп келе жатырған жас буын өкілдері ІТ саласында жоғары жетістіктерге жеткен.Соның ішінде, оқу орнының Корея мемлекетінің университеттерімен үлгілі байланысын атап өту қажет. Бүгінде, жас ғалымдар халықаралық аренада бақ сынап, шетелдік сарапшылардың оң бағасын алып отыр.Кездесуде штаб мүшесі атом энергетикасының да ерекше сала екенін атап өтіп, еліміздегі ядро физикалық институттың жеткен жетістіктеріне тоқталды.Ядро физикалық институты өз жұмысын 1957 жылы бастаған. Әлемдегі атом станциялары мен реакторларының жұмысын бақылауда ұстайтын халықаралық «МАГАТЭ» ұйымы орталықта бірнеше мәрте тексеріс жұмыстарын жүргізіп, бірде бір рет ескерту бермеген екен. Бұл біздің отандық ғалымдарымыздың тиісті деңгейде қызмет етіп отырғанын көрсетеді. Негізі ғылыми-зерттеу ядролық реакторларының іске қосылуымен Қазақстанға ғылыми тәжірибелер жүргізуге, сондай-ақ ядролық физика әдістерін еліміздің ұлттық экономикасының әртүрлі салаларына енгізуге көп мүмкіндікке жол ашылады. Алдағы уақытта физика ядролық саласыда да өңіріміздің азаматтары жемісті еңбек ететіні сөзсіз деп пікір білдірген штаб мүшесі оқытушылармен жаһандағы атом энергетикасының қазіргі ахуалын талқылады.Кездесуде университет ғалымдары Қазақстанның ғылым саласындағы орталыққа айналғанын тілге тиек етіп, Мемлекет басшысының бастамасын қолдайтынын жеткізді.

АЭС құрылысы көп мүмкіндікке жол ашады – ғалымдар

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Сырдария ауданындағы «Бесарық» ауылына жұмыс сапарымен барып, жаңа өндіріс және сауда нысандарының ашылу салтанатына қатысты.&nbsp;«Бесарықта» «Абай-Дәулет» серіктестігінің бастамасымен фри зауыты, «Ауыл аманаты» жобасымен наубайхана, кондитерлік және жартылай дайын өнім цехтары, жұмыс қолғабы, шұлық, пластик ыдыстар, сабын, ағаш бұйымдары өндірістері өз жұмысын бастады. «Қызылорда» супермаркеті мен дәмхана да тұрғындарға жоғары сапалы қызмет көрсетуге дайын.Аймақ басшысы жиналған қауымды, ауыл тұрғындарын құттықтап, «Абай-Дәулет» серіктестігінің директоры Мұрат Абайұлына «Бесарықтағы» берекелі бастамалары үшін алғыс білдірді.«Халқымызда «Ауылын көріп, азаматын таны» деген қанатты сөз бар. Туған жерді дамытуға, оны көркейтуге салынған инвестиция еселеп қайтады. «Абай-Дәулет» серіктестігінің директоры Мұрат Абайұлына осы іске қосқан зор үлесі үшін ризашылығымызды білдіреміз. Өндіріс орындары өркендей берсін, кәсіптеріңізге береке, табыс тілейміз.&nbsp;Жерді өз игілігіне пайдаланған басқа шаруашылықтар да осы тәжірибені енгізіп, елді мекендерді қолдауға, халықтың әл-ауқатын арттыруға атсалысуы қажет. Бүгін аймағымыздың агробизнес өкілдерімен бірге «Бесарық» ауылындағы жұмыстарды көріп, тәжірибесін кеңінен тарату үшін арнайы жиналдық. Шағын өндірістік алаңдар құрып, осындай бизнес-инкубаторларды облысымыздың барлық ауылында салуға мүмкіндігіміз бар. Мемлекет қолдауын барынша пайдаланып, аудан басшылары кешенді жұмыс жүргізуі қажет. Табан тірейтін туған жерімізге қолдау жасауға, ауылдарымызды одан әрі дамыту үшін бірлесіп жұмыс істеуге шақырамын», – деді Нұрлыбек Нәлібаев.&nbsp;Іс-шарада Қызылорда облысының Құрметті азаматы, «Құрмет» орденінің иегері Ибрагим Әбибуллаев жерлестерін құттықтады. Сонымен қатар, Мемлекет басшысының бастамасымен қолға алынған «Ауыл аманаты» бағдарламасын Сыр өңірінде жүзеге асыруға атсалысқан «Абай-Дәулет» серіктестігінің қызметкерлері, «Бесарық» ауылының тұрғындары облыс әкімінің Алғыс хатымен марапатталды.Іс-шара соңында қатысушылар жаңартылған "Адал адам" мәдени орталығының жұмысымен танысып, көрермен залында концерт тамашалады.&nbsp;Айта кетейік, «Абай-Дәулет» серіктестігі «Бесарық» ауылын көркейту, көгалдандыру, күрделі жөндеу жұмыстарына соңғы жылдары 730 млн. теңгеден астам қаржы бөлді. Шаруашылық есебінен ауыл әкімдігі, мектеп, балабақша, мешіт ғимараттары күрделі жөндеуден өткізілді. Биыл 642 млн. теңгеге мәдениет үйіне күрделі жөндеу, орталық алаңға қайта жаңғырту жүргізіліп, жаңа өндіріс орталығы бой көтерді.&nbsp;«Ауыл аманаты» жобасы аясында да тұрғындарға қолдау көрсетілуде. Ауылдарда кепілдік мүлікке қатысты қиындықтар кезігетіні белгілі. Өткен жылы шаруашылықтың кепілдігімен «Сыр құсы» ауыл шаруашылығы өндірістік кооперативі құрылып, 27,6 млн. теңге несиеге қол жеткізді.Биыл ауылда 1 мың шаршы метрлік шағын өндіріс орталығы салынып, 13 кәсіпкер өз кәсібін бастауға мүмкіндік алды. Оның ішінде, «Ауыл аманаты» жобасы аясында 4 жоба, Өңірлік инвестициялық орталық арқылы 5 жоба және шаруашылықтың өз қаражаты есебінен 4 жоба бар, 25 жаңа жұмыс орны ашылды. Осы жобаларға 960 млн. теңге инвестиция тартылды.<img src="https://knadmin.beoblood.kz/uploads/Besaryk_bf8b7122fb.jpg" alt="Бесарык.jpg"><img src="https://knadmin.beoblood.kz/uploads/Besaryk_2_02c170de6f.jpg" alt="Бесарык 2.jpg">Фото: Қызылорда облысы әкімінің баспасөз қызметі

«Бесарық» ауылында жаңа өндіріс орындары ашылды

<a href="https://kyzylorda-news.kz/">Kyzylorda-news.kz</a>&nbsp; Қала күні қарсаңында Қызылордада қалаішілік көлік қатынасын одан әрі жетілдіру үшін «Қызылорда автобус паркі» ЖШС-не 52 жаңа электромобиль, яғни экотакси көлігі және денсаулық сақтау мекемелеріне 74 санитарлық автокөлік табысталды.Облыс әкімі Нұрлыбек Нәлібаев аймақ тұрғындарын заманауи техникалардың іске қосылуымен құттықтады.<blockquote>«Соңғы екі жылда біз барлық саланың материалдық-техникалық базасын нығайтуға басымдық бердік. Ең алдымен облыс орталығындағы қоғамдық көлік мәселесін түбегейлі шешу үшін 300 жаңа автобус алынды. Олар бүгінгі күні халыққа қызмет етуде.Биыл облыс тұрғындарының сұранысына сәйкес өңірдің денсаулық сақтау ұйымдарының барлығына 200 санитарлық автокөлік алынды. Оның 126-сы қолданыста, қалған 74-ін бүгін табыстаймыз. Осылайша өңір тұрғындарының медициналық қызметке қолжетімділігі арта түседі, яғни аймақтағы елді мекендер түгелдей санитарлық автокөлікпен қамтылады.Қаладағы қоғамдық көлік мәселесі шешілген соң, тұрғындарға бағасы мен қызметі қолайлы болатын такси қызметін де жолға қоюды ойластырдық. Биыл 1 млрд. 100 млн. теңгеге 100 электромобиль алынуда. Алғашқы 52-сі экотакси қызметін атқарады. Бұл бастама халыққа көрсетілетін қызмет сапасын арттыруға, такси қызметіне тиімді баға қалыптастыруға зор септігін тигізеді», – деді Нұрлыбек Машбекұлы.</blockquote>Іс-шарада Денсаулық сақтау ісінің үздігі, Қызылорда облысының Құрметті азаматы Тұрғанбай Маханов жерлестерін құттықтап, ізгі тілек білдірді.Жаңа автокөліктер әуежай, теміржол вокзалы, жаңа автовокзал аумағында жолаушыларға қызмет көрсететін болады.Өткен аптада жылу-электр орталығына 9 жаңа заманауи арнайы техника кілті табысталды. «Қызылорда су жүйесі», «Жасыл Қызылорда», «Қызылорда тазалығы» мекемелеріне 52 автокөлік берілді. Мұнан бөлек, «Үлгілі елді мекен» облыстық байқауының жеңімпаздарына күнделікті ел тұрмысына қажетті, заманауи үлгідегі 48 арнайы техника сыйға тартылды. Барлық автокөлік халықаралық және ұлттық стандарттарға сәйкес жан-жақты тексеруден өткізілген, арнайы сұраныспен жергілікті жердің климаттық жағдайына бейімделіп дайындалған.Айта кетейік, соңғы жылдары өңірде барлық саланың материалдық-техникалық базасын нығайтуға басымдық берілді. Мектеп оқушыларына 30 автобус, денсаулық сақтау саласына 70 жедел жәрдем көлігі, орманшыларға 95 арнайы техника, ветеринария саласына 59, құқық қорғау органдарына 92 қызметтік автокөлік алынды.Коммуналдық салаға да жан-жақты қолдау көрсетілуде. «Қызылорда тазалығы», КРЭК, «Қызылорда су жүйесі» мекемелеріне бұған дейін де 42 арнайы техника табысталып, қазір тұрғындар игілігіне қызмет етуде.<img src="https://knadmin.beoblood.kz/uploads/taksi_2_bcb989d06e.jpg" alt="такси 2.jpg"><img src="https://knadmin.beoblood.kz/uploads/taksi_3_c24fbfc05c.jpg" alt="такси 3.jpg"><img src="https://knadmin.beoblood.kz/uploads/taksi_4_bd75b7e781.jpg" alt="такси 4.jpg">Фото: Қызылорда облысы әкімінің баспасөз қызметі

Қызылордада экотакси көліктері қызмет көрсете бастады

<a href="https://kyzylorda-news.kz/">Kyzylorda-news.kz</a>&nbsp;Қорқыт ата атындағы Қызылорда университетінде&nbsp;«АЭС құрылысы: дамыған елдердің тәжірибесі және Қазақстан үшін перспективалары» атты дөңгелек үстел өтті.Жиында Әлеуметтік және тәрбие жұмыстары жөніндегі проректор Жандос Базартай сөз бастап, 6 қазанда өтетін референдумның маңыздылығын айтты.Баяндамашылар атом энергетикасының ел экономикасындағы орны, экологиялық және энергетикалық артықшылықтары талқылады. Студенттер мен оқытушыларға атом электр станцияларының тұрақты және қауіпсіз энергия көзі ретінде алатын рөлі туралы кеңінен ақпарат берілді.<blockquote>“Атомдық энергия қазіргі уақытта ең тиімді әдіс болып табылады. Өйткені оның қазіргі жұмыс істеп тұрған жылу электр станцияларымен салыстырғанда энергетикалық тиімділігі ондаған есе жоғары және қоршаған ортаға зиянды заттар бөлмейді. Соңғы 3 жылда технологиялар дамып, барлық қауіпсіздік ережелері қамтамасыз етілген”, – деді профессор Нұрбол Аппазов.</blockquote>&nbsp; &nbsp;Айта кетейік, мемлекет басшысы Жолдауда 6 қазан күні жалпыхалықтық рефендум өтетін айтқан. Осы ретте оқу орнында, Жолдау көрсетілген міндеттер талқыланып, өзара пікір алмасу іс-шаралары өтті.&nbsp;

Қорқыт ата атындағы Қызылорда университеті Президент Жолдауын талқылады

<a href="https://kyzylorda-news.kz/">Kyzylorda-news.kz</a>&nbsp; Республикалық референдумға 6 күн қалды. Қызылорда облысы саяси науқанды өткізуге дайын.Аймақта 380 референдум учаскесі бар. Оның 126-ы Қызылорда қаласында, қалғандары аудандарда.Барлық учаскелер мүгедектігі бар азаматтар үшін қолайлы яғни 1-қабатта орналасқан.Бүгінгі күні облыста Брайльқарпін қолдана алатын 72 учаскеде 100 көз мүгедегіне арнайы трафарет дайындалды. Қалған 308 учаскеде трафареттер таратылады.Дауыс берушілер үшін бюллетеньдер толтыру ережесі көрсетілген аудиоматериалдар ұсынылды.Өңірде қимыл-қозғалысы қиын мүгедектігі бар азаматтарды тасымалдау үшін 45 инватакси мен 329 учаскеде сурдоаудармашылар ымдау тілі қызметтерін көрсетеді.Дауыс беруге құқылы тұрғындардың 2637-і ерекше жағдайларды қажет ететін мүгедектегі бар азаматтар. Оның 1004-і кресло-арба қызметін қолданатындар, 1016-ы көру қабілеті төмен азаматтар, 617-і есту қабілеті төмен азаматтар.Дауыс беру күні аймақтағы 374 учаскеде мүгедектігі бар азаматтар үшін арнайы бұрыштар ұйымдастырылған. Мұнда дауыс беруге қажетті арнайы құрал-жабдықтар мен ақпараттық түсіндірмелер қамтылған.Денсаулық жағдайына және науқас адамға күтім жасауына байланысты учаскеге келіп дауыс беруге мүмкіндігі жоқ азаматтар үшін комиссияның 2 мүшесі тасымалданатын жәшік арқылы азаматтың үйіне барып дауыс беруді ұйымдастырады.Бұл ретте азаматтар 6 қазан сағат12:00-ге дейін өтініш қалдыруы тиіс.Дауыс беру күні референдум учаскелері таңғы сағат 7.00-ден 20.00-ге дейін жұмыс істейді.Айта кетейік, референдум күні облыс бойынша 492 381 азамат дауыс беруге құқылы.Фото: ашық дереккөз

Референдум: Қызылордада мүгедектігі бар азаматтар үшін 45 инватакси қызмет көрсетеді

<a href="https://kyzylorda-news.kz/">Kyzylorda-news.kz</a> Мәжіліс депутаты Дәулет Мұқаев депутаттарға берілетін үйде тұрмайтынын жасырмады. Бұл туралы Stan.kz ақпарат агенттігі хабарлайды.Халық қалаулысы үйінің интерьер-дизайнын да көрсетті.<blockquote>“Мен депутаттарға берілетін пәтерде тұрмаймын. Бас тартқанмын. Өз үйім – өлең төсегім. Үйімдегі шкафтан біршама оқырман ою байқап, ризашылығын білдіріп жатыр. Қазақтың үйі болған соң, қазақтың "исі" шығу керек. Аспашамды&nbsp;да әдейі шаңырақ етіп жасаттым. Балалар арасында орысша сөйлей бастаса, "әй, шаңыраққа қараңдар" деп отырамын. Байқадыңыз ба, тіпті ноутбуктың стикерлеріне дейін қазақша. Шынымды айтсам, тәуелсіздік жылдарында дүниеге келгеніме қуанамын. Егер мен 20 жылдардың басында дүниеге келсем, “қазақ қазақ” деп қудалауға ұшырар едім. Біз бақыттымыз. Бірақ көп нәрсенің қадірін түсіне бермейміз", – деп жазды депутат.</blockquote>Сонымен қатар депутат балаларының көп тіл меңгеруіне қарсы емес екенін жеткізді.<blockquote>"Біздің балалар таза қазақ тілінде сөйлейді, керісінше, орысша сөйлеуге қиналады. Көп тіл білгендері жақсы. Бірақ міндетті емес! Балаңызбен қай тілде сөйлесесіз, қай тілде білім бересіз, сол тілде сөйлейтін болады. Сол тілде ойлайтын болады. Ана тіліңіз қазақ болса, неге сіз өзге тілде шүлдірлеуіңіз керек? Ал балаңыз ше?! Сіз балаға айнасыз, "бала ұяда не көрсе, ұшқанда соны іледі" деген сөз бекер емес", – деп ойын білдірді халық қалаулысы.&nbsp;</blockquote><img src="https://knadmin.beoblood.kz/uploads/full_1727674303608594b09006be3a61a576e39215ea7c_webp_18c5a6cba3.webp" alt="full_1727674303608594b09006be3a61a576e39215ea7c_webp.webp">Фото:&nbsp;https://www.instagram.com/daulet_mukayev/

"Бас тарттым": Дәулет Мұқаев депутаттарға берілетін пәтерде тұрмайтынын айтты

<a href="https://kyzylorda-news.kz/">Kyzylorda-news.kz</a>&nbsp; Видеода әйел балаларын ешқашан ұрмағанын айтқан.Петропавлдағы ауруханалардың біріне 4 жасар бала дене жарақаттарымен түсті, деп <a href="https://sn.kz/">Skifnews.kz </a>ақпарат порталы СҚО ПД баспасөз қызметіне сілтеме жасап хабарлайды.&nbsp;Желіде көпшіліктен көмек сұраған Петропавл тұрғынының видеосы тарады. Ол жақында ұлы баспалдақтан құлап, жарақат алғанын және қолын сындырғанын айтты. Сөзінше, ауруханада хирургтар баланы ұрып-соққан деген шешімге келген. Одан бөлек, келіншек қамқоршылық органын баласын ұрлады деп айыптап отыр. Айтуынша, ол ауруханада жатқанда ұлын қамқоршылық органы өкілдері алып кеткен. Видеода әйел балаларын ешқашан ұрмағанын айтқан.Бейнежазба Солтүстік Қазақстан облысының барлық Instagram парақшаларында тарады.<blockquote>"23 қыркүйек күні қаладағы медициналық мекемелердің біріне 4 жасар бала дене жарақаттарымен түскені туралы қоңырау түсті. Қылмыстық кодекстің "Кәмелетке толмаған адамға қатысты жасалған денсаулыққа қасақана ауырлығы орташа зиян келтіру" бабы бойынша сотқа дейінгі тергеп-тексеру басталды. Тергеу жүргізілуде", - деді СҚО ПД баспасөз қызметінің <a href="https://kaz.nur.kz/">Nur.kz </a>тілшісіне берген мәліметінде.</blockquote>Фото: piхabay

Петропавлда 4 жасар баланы ұрып-соққан: Анасы видеоүндеу жолдады

<a href="https://kyzylorda-news.kz/">Kyzylorda-news.kz</a>&nbsp; Танымал тележүргізуші Руслан Өтепбай Түркістан облысында 17 жыл бойы туған ағасында құлдықта болған апалы-сіңлі Құндыз бен Назгүлдің қазіргі жағдайын көрсетті, – деп хабарлайды &nbsp;<a href="https://massaget.kz/">Massaget.kz</a> тілшісі.Журналист апалы-сіңлі қыздармен бірге фотосессия ұйымдастырған.<blockquote>«Бізге келгенде қыздар қандай еді? Бір жылда қалай өзгерді? Құндыз бен Назгүлдің өзгерісіне баға беріп жіберіңіздерші. Күтім мен жылықабақ болса, жайқалмайтын қыз жоқ бұл әлемде…» – деп жазды тележүргізуші.</blockquote>Еске салайық, былтыр Түркістан облысында апалы-сіңлі қыздар ұзақ уақыт бойы еңбек құлдығында болғаны хабарланған еді. Бұл жағдайды қыздардың сыныптастары «Көреміз» бағдарламасында айтқан.Фото: ашық дереккөз

Руслан Өтепбай 17 жыл бойы құлдықта болған апалы-сіңлінің қазіргі жағдайын көрсетті

<a href="https://kyzylorda-news.kz/">Kyzylorda-news.kz</a> Қызылорда тұрғыны мамандандырылған ауданаралық әкімшілік сотына аялдамалардағы ақпараттық стендтерде мемлекеттік тілдегі мәліметтер болмағанына арызданды.&nbsp;Бұл туралы&nbsp;<a href="https://stan.kz/">Stan.kz</a>&nbsp;ақпарат агенттігі хабарлайды.&nbsp;Талапкер өз арызында осы мәселе бойынша уәкілетті органдарға бірнеше рет жүгінгенін, бірақ нәтиже болмағанын көрсеткен.Сотта анықталғандай, мемлекеттік сатып алу туралы шарт негізінде тұрғын үй-коммуналдық шаруашылық, жолаушылар көлігі және автомобиль жолдары бөлімі жауапты серіктестікке аялдамаларға 26 ақпараттық стенд орнатуды тапсырған. Бірақ ақпараттық стендтің қазақ тіліндегі нұсқасы болмаған.Сот талапкердің мемлекеттік тілде ақпарат алу конституциялық құқығы бұзылғанын ескере отырып, талап арызды қанағаттандырып, жауапкерді аялдамаларға мемлекеттік тілде ақпарат ілуге ​​міндеттеді.Сондай-ақ тұрғын үй-коммуналдық шаруашылық, жолаушылар көлігі және автомобиль жолдары бөлімінің лауазымды тұлғалары тарапынан жіберілген заңбұзушылықтар көрсетілген жеке қаулы шығарылды.Фото: Stan.kz

Қызылордалық тұрғын аялдамада қазақ тілінде ақпарат болмағаны үшін соттасып, жеңіп шықты

<a href="https://kyzylorda-news.kz/">Kyzylorda-news.kz</a> &nbsp;Бірнеше ай бұрын FlyArystan әуе компаниясының қызметкерлері 12 жасар қызды&nbsp;бортқа жібермей Астанада жалғыз қалдырып кеткен. Осы іс бойынша әкімшілік сот шешім шығарды. Бұл туралы <a href="https://stan.kz/12-zhasar-kizdi-bortka-mingizbegen-flyarystan-aue-kompa-406933/">Stan.kz </a>ақпарат агенттігі хабарлайды.20 шілдеде Зере және Зәуре атты егіз қызы Америкадан елге қайтқан. Олар сенімді өкілмен, бір топ баламен саяхаттаған. Қайтарда&nbsp;Астана арқылы транзитпен Оралға ұшуы керек болған, бірақ Зерені компания бортқа кіргізбей, тастап кеткен.&nbsp;Соның салдарынан егіздің сыңары Астана әуежайында жалғыз қалып қойған. Ал сенімді өкіл басқа балалармен ұшып кеткен. Әуежайдағы бейнебақылау камераларына оның 3 сағат жылап тұрған жазбасы сақталған еді.Осы оқиғадан кейін FlyArystan басшысы баланың анасымен кездесіп, кешірім сұрап, өтемақы ретінде 4 миллион теңге ұсынған. Бірақ әйел одан бас тартып, сотқа жүгінген.26 қыркүйекте адвокат Данилхан Шағатаев сот "Эйр Астана" АҚ-на айыппұл салғанын хабарлады.<blockquote>"Эйр Астана" АҚ Әкімшілік кодекстің 567-бабының 2-бөлігі бойынша әкімшілік жауапкершілікке тартылды. 1000 АЕК (3 692 000 теңге) көлемінде айыппұл салынды. Компания кәмелетке толмаған баланы әуежайда қалдырып кеткені үшін айыппұл арқалаған", –&nbsp;деді ол.</blockquote> Фото: Depositphotos

Қазақстан және Қызылорда облысының жаңалықтары: Қоғам