<a href="https://kyzylorda-news.kz/">Kyzylorda-news.kz.</a> Бұл туралы ҚР Президенті жанындағы Орталық коммуникациялар қызметінде өтіп жатқан брифингте Қызылорда облысының әкімі Қуанышбек Ысқақов айтты.
<blockquote>
 «Тұтастай алғанда, Елбасының, Мемлекет басшысының саясатын жүйелі іске асыру нәтижесінде соңғы жылдың өзінде ғана өңдеуші өнеркәсіпте өндіру көлемі 5,4%-ға ұлғайды, жұмыспен қамтылғандар саны 71%-ға дерлік, ал, шикізаттық емес экспорт көлемі – 49%-дан астам өсті», – деді аймақ басшысы БАҚ өкілдері алдындағы брифингінде.
</blockquote>
Өңір басшысы Қуанышбек Досмайылұлының айтуынша, соңғы жылдары Сыр елінде тұрақты жұмыс орындары көбейіп отыр.

Қызылорда облысында жұмыспен қамтылғандар саны 71%-ға өскен

Kyzylorda-news.kz. Нұр-Сұлтан қаласында ҚР Президенті жанындағы Орталық коммуникациялар қызметінде Қызылорда облысының әкімі Қуанышбек Ысқақовтың қатысуымен брифинг басталды.
Брифингте аймақ басшысы өңірдің әлеуметтік-экономикалық дамуы, мемлекеттік және салалық бағдарламалардың іске асырылуы туралы баяндайтын болады.
Өңір басшысы БАҚ өкілдері алдындағы брифингінде Қызылорда облысы әкімінің қызметіндегі журналистермен елордадағы алғашқы жүздесуі екендігін атап өтті.
<blockquote>
 «Бұл – менің әкім қызметінде Сіздермен алғашқы кездесуім. Сұхбатымыз өнімді өрбуі үшін ең алдымен облыстың ағымдағы әлеуметтік-экономикалық ахуалы, өзекті мәселелері, қазіргі жұмыс барысы және алдағы жоспарлар жайында айтып өтсем деймін. Содан кейін сұрақтарыңызға жауап беруге дайынмын.
 Біздің өңіріміз жайында хабардар екендеріңізге сенімдімін. Бұл, әрине, тиімді болар еді, өйткені, бізге берілген азғантай уақыт ішінде аймақтың бүкіл тыныс-тіршілігін айтып шығу мүмкін емес. Сондықтан, облыс дамуының ең маңызды аспектілеріне тоқталсам деймін.
 Өздеріңіз білетіндей, облыс әкімі болып тағайындалғанға дейінгі соңғы 3,5 жылда мен Қызылорда облысы әкімінің экономика және қаржы мәселелері жөніндегі орынбасары қызметін атқардым.
 Сондықтан, жыл соңына дейінгі облыс дамуының жоспарлары түбегейлі өзгере қойған жоқ. Дегенмен, Мемлекет басшысы қойған міндеттер мен ағымдағы экономикалық жағдайды ескере отырып, жыл соңына дейінгі Іс-қимылдарымызға түзету енгіздік», – деді облыс әкімі Қуанышбек Досмайылұлы.
</blockquote>

Елордада Қызылорда облысының әкімі Қуанышбек Ысқақовтың брифингі басталды

<a href="https://kyzylorda-news.kz/">Kyzylorda-news.kz.</a> Қызылорда қаласында орын алған оқыс оқиғаға медициналық колледждің&nbsp;оқытушылары&nbsp;мен студенттері куә болған.
Олар осы оқиғадан соң өздері жиі баратын аялдамада тұруға қорқып қалған. &nbsp;
«Біз сабақта отырғанда айқай-шу, тежеуіш дауыстарын естідік. Терезеге қарасақ аялдаманың жартысы жоқ, адамдар жерде жатыр. Қандай қорқынышты, өйткені біз де бұл аялдамада жиі тұрамыз ғой», – деді студент Нұрсат Тілеуов.&nbsp;
Айта кетейік, оқиға орнында екі бала мен бір ер адам көз жұмды. Ауруханаға жеткізілген 10 жасар мектеп оқушысы да <a href="https://kyzylorda-news.kz/kogam/qyzylordadaghy-zhol-apaty-awrwhanagha-zhetkizilgen-bala-koez-zhumdy-33700/">өмірден озды</a>.

Қызылордадағы апаттың куәгерлері сұмдық оқиға туралы айтты

<a href="https://kyzylorda-news.kz/">Kyzylorda-news.kz.</a> Белгілі айтыскер ақын Балғынбек Имашев Қасым-Жомарт Тоқаевқа ашық хат жазды. Ақын хатты өзінің <a href="https://instagram.com/balgynbek_official?igshid=z84axo71wubb">Instagram</a>&nbsp;парақшасында жариялады.
Ақынның жазбасын толық жариялауды жөн көрдік.
«Екі-үш күннен бері пост жазам деп жүр ем. Мәселе де, тақырып та көп. Бірақ, жүрегімді ауыртқан Тараздағы жантүршігерлік оқиға…
Президент өз қызметіне кіріскеннен-ақ педофилияға қатысты жазаны қатайтуды тапсырған болатын. Біздің “халық қалаулылары” осы мәселе бойынша заңға өзгеріс енгізуді қашан қолға алар екен?
Сабақ уақытында, мектеп ауласында ұл-қыздарымызға зорлық жасалып жатуы не деген масқара?
Мектеп директоры, мұғалім, тағы бірнеше адамның жұмыстан шығып, сөгіс алып, тағы басқа жазаға тартылуымен немесе даладағы дәретхананы мектеп ішіне көшірумен мәселе шешіле ме? Ата-ананың уайым-қасіреті мен баланың санасына түскен жара, психологиялық соққы жазыла ма? Тағдыр күйреді ғой. Көгіміз солып, тұнығымыз лайланды ғой. Көңіліміз шытынап, сағымыз сынып, жігеріміз құм болды ғой.
Аса құрметті Президент мырза!
Мәртебелі министрлер мен депутаттар!
Басқа кезде пәрменді Бас Прокурор мен Жоғары Сот!
1. Кәмелетке толмағандарға қатысты қылмыс жасаған (ұрып-соғу, құлдыққа жегу, зорлық-зомбылық жасау, өлтіру т.б) қылмыскерлерге жазаны күшейтуді, өмірлік бас бостандығынан айыруды өлім жазасына ауыстыруды қарастырыңыздар.
2. Қылмыскердің аты-жөнін, суретін, руы мен тегін түгел жариялап, айдай әлемге жария ету керек. Ол қылмыскерге еш аяушылық болмау керек. Керісінше жапа шеккендердің аты-жөнін жасыру, жарияламау, құпия сақтау қажет. 
3. Қылмыстық істі ашық жүргізу. БАҚ құралдары халыққа әр қылмыстық істің қалай аяқталғаны жөнінде толық әрі ашық хабардар етіп отыруы тиіс. Кәмететке толмағандарға қатысты әрбір қылмыстық іс жіті қадағалауында болуы тиіс.
Әрқайсымыз ұл-қыз өсіріп отырмыз. Алла басқа салмасын! Жапа шеккендердің орнында кез-келгеніміздің қызымыз, қарындасымыз, немереміз болуы мүмкін ғой.
Кім кінәлі? Бізге салса үзілісте көпшілікпен бірге бармай, сабақ уақытында сұранып әжетханаға жалғыз барған қыздың өзін кінәлі қылуымыз мүмкін. Ақиқатында бәріміз кінәліміз. Қылмыс қандай қоғамда орын алады? Төресі әділетсіз, қарашасы имансыз, заңы әлсіз, биі парақор, сақшысы жігерсіз, әйелдері арсыз, еркегі намыссыз елде орын алады.
ТАРАЗ оқиғасынан соң әрқайсымыз өзімізді ТАРАЗЫ-ға тартып көрейік. Әйтпесе, Есеп күнінде Алланың Әділетті ТАРАЗЫ-сы бар!», – деп жазды ақын.

Айтыскер ақын Президентке педофилдің руын да жариялауды ұсынды

<a href="https://kyzylorda-news.kz/">Kyzylorda-news.kz.</a> Ұлына дүбірлетіп тұсаукесер той жасаған ата-ана мен қонақтар қызықты сәттің куәсі болды. Бүлдіршін өзінің тұсаукесер сәтінде ақ матаның үстінде ұйықтап қалған. Ал той үстіндегі қызық жағдай желіде лезде тарап кетті, деп хабарлайды&nbsp;<a href="https://kaz.nur.kz/1828282-zini-tsaukeserinde-jyktap-otyrgan-bala-eldi-isek-silesin-katyrdy-video.html">KAZ.NUR.KZ</a>.
Кадрдан сәбидің ақ матаның үстіне жайылған ақшалардың арасында көзі жұмулы күйінде отырғанын көруге болады.
Анасы болса жерде отырған ұлының қолына он мың теңгені ұстатып жатыр. Алайда тәтті ұйқыдағы бүлдіршін болса оған назар аударар емес.
Бейнежазбаны көрген желі қолданушылары видеоның ерекше көңіл-күй сыйлағанын жарыса жазуда. Тіпті баланың болашақта үлкен шенді азамат болатынын болжағандар да табылған.
<blockquote>
 “Депутат болатын бала ғой”, “Ақша өзі келе береді мына балаға”, “Тәп-тәтті балақай”, “Мына видеоны көре бергің келеді”, – деп жазды олар.
</blockquote>
Десе де, оқырмандар арасында ештеңеге қарамастан баланың тұсауын кесіп, “қинаған” үлкендерді сынағандар да болды.
<blockquote>
 “Баланы күні бойы ұйықтатпаған секілді”, “Бала шаршады, ол не істейді ақшаны”, – деп жазды желідегілер.
</blockquote>

Өзінің тұсаукесерінде ұйықтап отырған бала елдің ішек-сілесін қатырды (ВИДЕО)

<a href="https://kyzylorda-news.kz/">Kyzylorda-news.kz.</a> Министрдің айтуынша, көпбалалы отбасыларға қолдау көрсету республикалық бюджеттен мемлекеттік жәрдемақылар енгізу арқылы қамтамасыз етілетін болады, деп хабарлайды <a href="https://kaz.zakon.kz/4995950-1-a-tarynan-bastap-340-my-nan-astam-k.html">Zakon.kz</a>.
Қазақстан Республикасы Еңбек және халықты әлеуметтік қорғау министрлігі мамандарының болжамы бойынша 4 немесе одан көп баласы бар 346 мың отбасы көпбалалы болуына байланысты мемлекеттік жәрдемақыға үміткер бола алады. Айта кетерлігі, аталған жәрдемақы енгізілгеннен бастап Қазақстандағы көпбалалы отбасылар санының артуына байланысты алушылар саны да артуы мүмкін.
Аталған мемлекеттік жәрдемақыны енгізу Мемлекет басшысының ағымдағы жылғы 2 қыркүйектегі Қазақстан халқына Жолдауында айтылған тапсырмасы бойынша ҚР Еңбекмині әзірлеген атаулы әлеуметтік көмек көрсетудің жаңа тетіктерінде (бұдан әрі – АӘК) көзделген табысы аз және көпбалалы отбасыларды қолдаудың негізгі үш бағытының бірі болып табылады. Таяуда ҚР Еңбекмині тиісті заң жобасын Қазақстан Республикасы Парламентінің қарауына енгізуді жоспарлап отыр.
Жоғарыда аталған мемлекеттік жәрдемақы 4 немесе одан да көп кәмелетке толмаған немесе 23 жасқа дейінгі күндізгі бөлімде оқитын балалары бар барлық көпбалалы отбасыларға табысына қарамастан төленеді деп жоспарлануда. Мемлекеттік жәрдемақының мөлшері бала санына қарай сараланады. Яғни, 4 баласы бар отбасыларға 42 496 теңге, 5 балаға – 53 127 теңге, 6 балаға – 63 757 теңге, 7 және одан да көп балаларға 74 388 теңге төленеді.
Орта есеппен алғанда, жәрдемақы мөлшері әр балаға 10-11 мың теңгені құрайды, бұл 2018 жылдан бастап тағайындалмайтын осыған ұқсас жәрдемақыдан 4-7 есеге көп.
Бұдан бұрын хабарланғандай, ағымдағы жылғы 7 қазанда ҚР Үкіметі отырысында Еңбек және халықты әлеуметтік қорғау министрі Біржан Нұрымбетов Қазақстанда 2020 жылғы 1 қаңтардан бастап енгізу жоспарланып отырған АӘК көрсетудің жаңа тетіктерін таныстырған болатын.
<blockquote>
 «Ең басты принцип – мемлекет көмекке мұқтаж адамдарға, әсіресе балалар мен көпбалалы отбасыларға көмектеседі! Еңбекке қабілетті азаматтар жұмыс істеуі керек. Мемлекет жұмысқа орналасуға немесе шағын бизнеспен айналысуға көмектеседі. Мемлекеттік көмекке – көп балалы отбасыларды қолдау, табысы төмен отбасыларға атаулы әлеуметтік көмек көрсету, табысы аз отбасылардағы балаларға берілетін кепілдендірілген әлеуметтік пакет кіреді», – деді Біржан Нұрымбетов.
</blockquote>
Министрдің айтуынша, көпбалалы отбасыларға қолдау көрсету республикалық бюджеттен мемлекеттік жәрдемақылар енгізу арқылы қамтамасыз етілетін болады. Бұл мемлекеттік жәрдемақы барлық көпбалалы отбасыларға (4 немесе одан да көп кәмелетке толмаған баласы бар) табысына қарамастан төленеді.
АӘК табысы аз отбасыларға, соның ішінде көпбалалы отбасыларға төленетін болады. Ең төмен күнкөріс деңгейінің 70%-ы тағайындаудың шекті критерийі болып қала береді. Егер еңбекке қабілетті отбасы мүшесі ұсынылған жұмыстан және жұмыспен қамтуға жәрдемдесу шараларынан бас тартса, онда АӘК төлемі тек оған ғана емес, бүкіл отбасына да тоқтатылады
Табысы аз отбасылардан шыққан балалар үшін кепілдендірілген әлеуметтік пакетті енгізу ұсынылады. 1 жастан 6 жасқа дейінгі балаларды азық-түлік жиынтығымен және гигиеналық құралдармен, 6 жастан 18 жасқа дейінгі балаларды мектептерде ыстық тамақпен, оқу құралдарымен және мектеп киімімен қамтамасыз етеді, сондай-ақ оларға мектепке дейінгі жол жүру шығындары өтеледі. Медициналық, оның ішінде стоматологиялық көмек 18 жасқа дейінгі балаларға тегін медициналық көмектің кепілдік берілген көлемі және міндетті әлеуметтік медициналық сақтандыру шеңберінде көрсетілетін болады.

1 қаңтардан бастап 340 мыңнан астам көпбалалы отбасы жаңа жәрдемақы алады

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>2019 жылдың 20 қарашасында республикалық референдум өткізу туралы бастамашыл топ Орталық сайлау комиссиясына жүгінді.
Ысқалиев, Әбдіқалықова, Дәрібеков бастамашыл топтың өкілдері Орталық сайлау комиссиясының қарауына бастамашыл топты тіркеуге және референдумға ұсынатын мәселелер жиынтығын ұсынды, деп жазады&nbsp;<a href="https://stan.kz/kazakstanda-referendum-otkizu-ysinildi-324511/">Stan.kz</a>.
Бастамашыл топты тіркеу туралы мәлімдемеге жиналысқа қатысқан адамдардың тізімі мен мәліметтерін көрсетпестен республикалық референдум тағайындау туралы мәселе бойынша 62 адамнан тұратын бастамашыл топ құру туралы 10 қарашадағы отырыстың хаттамалары ұсынылды.
Сондай-ақ республикалық референдумның бастамашыл тобы 10 қарашадағы отырысының хаттамалары, бастамашыл топ мүшелерінің тізімі, олардың мәліметтері мен референдумға ұсынылған мәселелер көрсетілген:
1) «Қазақстан Республикасындағы сайлау туралы» Қазақстан Республикасының Конституциялық заңына, оның ішінде бір мүшелі округтерде сайлау жүйесін енгізуді және пропорционалды жүйемен дәл солай байланысты түзетулер енгізесіз бе?»;
2) «Саяси партиялар туралы» Қазақстан Республикасының Заңына, оның ішінде партияны мемлекеттік тіркеуден өткізу кезінде қырықтан мың адамға дейін азайтыла ма?
Бұл құжаттарды Қазақстан Республикасының Орталық сайлау комиссиясы «Республикалық референдум туралы» Конституциялық заңның талаптарын заңнамада белгіленген мерзімде қарастырады.

Қазақстанда референдум өткізу ұсынылды

<a href="https://kyzylorda-news.kz/">Kyzylorda-news.kz.</a> Кеше таңертең Қызылорда қаласындағы аялдаманың бірінде болған жол-көлік оқиғасы кезінде зардап шегіп, ауруханаға жатқызылған бала қайтыс болды.
Оқиға орнынан 2 адам жедел жәрдем бригадасымен ауруханаға жеткізілген болатын. Олардың бірі 10 жас шамасындағы бала.
<blockquote>
 «Бала көп жарақат алған. Бас сүйек-миы зақымдандан, оң жақ саны сынған, сол жақ жіліншігі сынған. Бала ауруханаға түскенде комада болды. Оны тыныс алу аппаратына қосқан болатынбыз», – деді денсаулық сақтау басқармасының өкілі Айбек Мырзағұлов.
</blockquote>
Ал екіншісі 31 жастағы әйел қалалық аурухананың жансақтау бөліміне жатқызылған. Ол – қаза болған баланың анасы. Қазір реанимация бөлімінде жатыр.
<blockquote>
 «Баланың анасының жағдайы тұрақты ауыр. Қазір реанимация бөлімінде ем қабылдап жатыр. Онда саны, ортан жілігінің сүйегі сынған. Келесі аптада ота жасауды жоспарлап отырмыз. Ауруханадан шығару жөнінде айту әлі ерте, – деді Қызылорда қалалық ауруханасының бас дәрігері Бауыржан Төлеген.
</blockquote>
Естеріңізге сала кетелік,&nbsp;жол апаты&nbsp;кеше сағат 09.15 шамасында Назарбаев даңғылы бойында болған. «Тойота Камри» маркалы автокөлігі «Mercedes-Benz» көлігін сол қапталынан келіп соққан. Салдарынан «Тойота Камри» жүргізушісі көлікті басқара алмай, автобус аялдамасында тұрған адамдарды басып кеткен.

Қызылордадағы жол апаты: Ауруханаға жеткізілген бала көз жұмды

<a href="https://kyzylorda-news.kz/">Kyzylorda-news.kz.</a> Қызылордада болған апатқа&nbsp;кінәлі азамат&nbsp; ұсталды. 21 қараша күні таңертең шетелдік көлік аялдамаға соғылып, қоғамдық көлікте күтіп тұрған адамдарды <a href="https://kyzylorda-news.kz/kogam/qyzylordada-zhol-koelik-oqighasynan-3-adam-qajtys-boldy-33498/">қағып кеткенін</a> осы уақытқа дейін хабарлаған болатынбыз.
Соқтығысу салдарынан үш адам алған жарақаттарынан&nbsp;оқиға орнында қайтыс болды. Тағы екеуі жақын маңдағы медициналық мекемеге жеткізілді.
Зардап шеккендер – ағасы мен әпкесі, №12 мектептің бесінші және үшінші сынып оқушылары екені белгілі болды. Олармен қатар 42 жастағы ер адам да қайтыс болған.
Оқиғадан зардап шеккен&nbsp;тағы екеуі – 1988 жылы туған қыз бен 2009 жылы туған жасөспірім Қызылорда медициналық орталығына жеткізілген. Қазір дәрігерлер олардың өмірлері үшін күресуде.
Полиция департаментінің хабарлауынша, апаттың кінәсі анықталып, уақытша ұстау изоляторына қамалды. Ол 20 жастағы қала тұрғыны екені белгілі болды. Қазір іс бойынша іс қозғалды. Сотқа дейінгі тергеу басталды, қажетті сараптамалар жүргізілуде.

Қызылордадағы аялдамада қайтыс болғандар бір үйдің ұлы мен қызы болып шықты

<a href="https://kyzylorda-news.kz/">Kyzylorda-news.kz.</a> Қызылорда қаласында «112» нөміріне О.Исаев көшесіндегі №18 үйден өрт шыққандығы жөнінде хабарлама&nbsp; түскен.
Оқиға орнына №5 өрт сөндіру бөлімінің жауынгерлік есебі барып, барлау жұмыстарын жүргізді. Тексеру кезінде тұрғын үйдің ағаштан салынған сарайы жанып, соның салдырынан көрші үйдің жалпы көлемі 30 шаршы метр болатын асхана мен бу қазандығы бөлмесінің төбесі &nbsp;жанғаны анықталды.
Өрт сөндірушілер өрттің үй ішіне таралуына тосқауыл қойылды. Тұрмыстық заттар сыртқа шығарылып, тез арада өрт сөндірілді. &nbsp;
Тілсіз жаудың салдарынан зардап шеккендер мен қаза болғандар жоқ. Қазіргі уақытта өрттің шығу себебі мен шығыны анықталуда.
<img src="https://kyzylorda-news.kz/wp-content/uploads/2019/11/22ort2.jpg" alt="" />
<img src="https://kyzylorda-news.kz/wp-content/uploads/2019/11/22ort3.jpg" alt="" />
<img src="https://kyzylorda-news.kz/wp-content/uploads/2019/11/22ort4.jpg" alt="" />
<img src="https://kyzylorda-news.kz/wp-content/uploads/2019/11/22ort5.jpg" alt="" />

Қызылордада тұрғын үйден шыққан өрттен көршісінің үйі де зардап шекті (ФОТО)

<a href="https://kyzylorda-news.kz/">Kyzylorda-news.kz.</a> Келесі жылы «Рухани жаңғыру» Қазақстан қоғамдық даму институты бастамасымен «Ерекше адамдар» жобасы басталмақ, деп хабарлайды <a href="https://www.inform.kz/kz/2020-zhyly-erekshe-adamdar-zhobasy-bastalady_a3587679">ҚазАқпарат</a>.
Жобаға өзінің қызмет саласына қарамастан кез-келген азамат қатыса алады. Қатысушылардың жас ерекшелігі бойынша шектеу жоқ. Ruh.kz республикалық порталында, өмірі қызықтырған, кішкентай, тіпті, үлкен сенсация жасаған кейіпкерлер туралы материалдар жарияланатын болады.
«Ерекше адамдар» айдарына қойылатын талаптар жоғарыда айтылған құндылықтарды дәріптейтін, Отаны үшін қызмет етіп жүрген адам болуы қажет. Сондай-ақ, өзінің ерекшелігін толық сипаттайтын нақты материалдар жіберілуі керек. Ақпараттың ішінде тұлғаның толық аты-жөні, туған жері мен мекенжайы, ерекшелігі көрсетіледі. Материал TimesNewRoman шрифтіндегі 14-өлшеммен жазылып, фотосуреттер JPEG форматында (20 данадан кем емес) берілуі тиіс. Бұл айдарды Ruh.kz порталында жариялау мерзімі қосымша хабарланады.
Айта кетерлігі, порталда үміткердің бірегейлігін тиісті түрде сипаттамайтын немесе талаптарға сәйкес келмейтін материалдар жарияланбайды. Қатысушылар өздері туралы немесе басқа адамдар туралы жиналған материалдарды жоба офисінің project_office_pvl@mail.ru электронды поштасына «Ерекше адам» тақырыбын жазып жібере алады.

2020 жылы «Ерекше адамдар» жобасы басталады

<a href="https://kyzylorda-news.kz/">Kyzylorda-news.kz.</a> “Атамекен” алаңында бизнес-қоғамдастық және ҚР Экология, геология және табиғи ресурстар министрлігі жаңа экологиялық кодекске енгізілетін түзетулерді қарастырды.
Жаңа заңнаманың негізгі принципі – “ластаушы төлейді”. Кешенді экологиялық рұқсатты, сондай-ақ салынып жатқан зауыттың табиғатқа әкелетін залалын міндетті бағалауды енгізу. 2021 жылы қандай механизмдер іске қосылмақ?
Қалпына келтіру, майсыздандыру және зиянды қалдықтарды жою саласында лицензиялауды енгізу
Осыған дейін: лицензиялау болмаған.
Күтілетіні: қайта өңдеу, майсыздандыру, зиян қалдықтарды утилизациялау (энергия алу мақсатында қалдықтарды инсинерациялау бөлігінде), жою бойынша жұмысты атқару үшін кәсіпкерлік субъектілерін лицензиялау.
І категориядағы жаңадан құрылған объектілерді пайдалануға беру үшін кешенді экологиялық рұқсаттары (КЭР) міндетті алу туралы талапты енгізу
Осыған дейін: КЭР міндетті емес сипатта болды.
Күтілетіні: І категориядағы жаңадан құрылған объектілерге КЭР-ды алу міндетті. Кодекс жобасы КЭР жаңадан құрылатын объектілер үшін ғана емес, қайта қалпына келтірілген объектілер үшін де міндеттелмек (шығарындылардың көлемі артқан жағдайда).
Тексеру және кәсіпорынға барып, профилактикалық бақылау жүргізу үшін мерзімдерді ұзарту
Осыған дейін: тексеруге 15 жұмыс күні берліген.
Күтілетіні: зертханалық зерттеулер нәтижесін алу қажет болған жағдайда тексеру мерзімін ұзарту мүмкіндігі (қоршаған ортаны қорғау саласындағы сынамаларды зертханалық зерттеу нәтижелерін алу қажет болған жағдайларда мерзімді мына мерзімге ұзартуды қарастыру: жоспардан тыс тексеру үшін – 10 жұмыс күннен артық емес; кәсіпорынға келумен профилактикалық бақылау үшін – 15 жұмыс күннен артық емес).
І категориядағы объектілер үшін қоршаған ортаға эмиссияларға автоматтандырылған мониторинг жүйесін енгізу
Осыған дейін: табиғатты арнайы пайдалануды жүзеге асыратын ластаушы – ірі кәсіпорындарға мониторингтің автоматтандырылған жүйесін енгізу ерікті сипатта болды.
Күтілетіні: өндірістік экоологиялық бақылау және мониторинг бойынша шынайы уақыт режиімінде (онлайн) алынған деректердің сенімділігін қамтамасыз ету мақсатында қоршаған ортаны қорғау саласындағы өкілетті органның ақпараттық онлайн-байланысы арқылы шынайы уақыт режимінде деректерді таратуды жүзеге асыратын І категориядағы объектілерде Мониторингтің автоматтандырылған жүйесін орнату бойынша міндеттемелерді енгізу.
Метеорологиялық мониторинг саласында қызметті жүзеге асыратын тұлғаларға ескертпе тәртібін енгізу
Осыған дейін: республикада осы жұмыстар мен қызметтердің жалғыз жеткізушісі ретінде ұлттық гидрометеорологиялық қызметтің құзыреті шегінде метеорологиялық мониторинг жүргізу функциялары сақталған.
Күтілетіні: метеорологиялық мониторинг саласында қызметті жүзеге асыратын тұлғаларға ескертпе тәртібін енгізу (метеорологиялық мониторинг саласын либерализациялау, яғни жеке тұлғаларға аталған қызмет түрін коммерциялық негізде жүргізуге құқық беру, осы ретте қызметтің басталуы немесе тоқтатылуы туралы тиісті мемлекеттік органдарға хабарлама жіберу қажеттілігі ескеріледі).
<a href="https://massaget.kz/men_kasipkermin/59779/">Massaget.kz</a>

Қазақстан және Қызылорда облысының жаңалықтары: Қоғам