<a href="https://kyzylorda-news.kz/">Kyzylorda-news.kz</a> Бүгін «AMANAT» партиясының «Таза бейсенбі» экологиялық акциясы аясында Сырдария ауданында тазалық іс-шарасы ұйымдастырылды.Қоғам тазалығын қамтамасыз етуде маңызы зор акцияға партияның аудандық филиалының атқарушы хатшысы, фракция жетекшісі Ақтөре Ибрагимұлы арнайы қатысып, қоғамдық орындар мен көлдердің жағалауында тазалық сақтау – мәдениеттіліктің белгісі екенін атап өтті.Экологиялық акция барысында партия белсенділері мен «Жастар» бастауыш партия ұйымының мүшелері Қалғандария, Әйтек және Майжарма каналдарының аумағын тазалады. Акцияға аудандық мәслихат депутаты, фракция мүшесі Алмас Есназар, «Жастар рухы» жастар қанатының аудандағы жетекшісі, «Жастар» бастауыш партия ұйымының төрағасы Нұржан Сейтжан да қатысып, қолдау білдірді.<blockquote>«Тазалық пен тәртіп – кез-келген аймақтың табысты дамуының кепілі ғана емес, тұрғындардың мәдениеттілігінің өлшемі. Мемлекет басшысы Қасым-Жомарт Кемелұлы «Қалалар мен ауылдардың сәулетті, саябақтар мен ауланың таза болуы, ең алдымен, басқа біреуге емес, өзімізге керек. Азаматтарымыз қоғамдық орындар мен қоршаған ортаға жанашыр көзбен қарауға тиіс» деген болатын. Біздің айналамыздағы игіліктер адамдар үшін жасалған. Тазалық біз үшін басты құндылық. «Ауылына қарап, азаматын таны» дегендей, әр елді мекеннің тазалығы, сәулетті көркі тұрғындардың жанашырлығына байланысты. Себебі әр көшенің, әр үйдің, әр ауланың тазалығы – тұтас қала мен ауылдың айнасы. Ұлы жол алғашқы қадамнан басталады. Осы ретте, «AMANAT» партиясының «Таза бейсенбі» акциясы аясында аудан халқы туған жерді түлетуге атсалысуда. Барша жерлестерімізді, еңбек ұжымдары мен кәсіпкерлерді игі бастаманы қолдауға, аулалар мен көшелерде, мөлтек аудандарда жүзеге асыруға, аудан мен ауылдарда тазалық жұмыстарына ұйытқы, жақсы істерге дәнекер болуға шақырамыз. Туған жерімізді бірге көркейтейік!», – деді партияның аудандық филиалының атқарушы хатшысы Ақтөре Ибрагимұлы.</blockquote>Атап өту керек, Сырдария ауданында «Таза бейсенбі» экологиялық акциясы аясында тазалық жұмыстары апта сайын жүргізілуде. Бұл жұмысқа тұрғындармен қатар БПҰ төрағалары, партия мүшелері, мәслихат депутаттары белсенді атсалысуда.<img src="https://knadmin.beoblood.kz/uploads/Taza_bejsenbi_Amanat_2_f52316ec30.jpg" alt="Таза бейсенбі Аманат 2.jpg">

"Таза бейсенбі": Сырдария ауданында тазалық іс-шарасы ұйымдастырылды

<a href="https://kyzylorda-news.kz/">Kyzylorda-news.kz</a> Қызылорда облысының Төтенше жағдайлар департаменті су айдындарындағы қауіпсіздік ережелерін және зардап шеккендерге алғашқы медициналық көмек көрсетуді үйрету мақсатында «Арай» қалалық аквапаркі базасында көрсетілім сабағын өткізді.Іс-шара барысында құтқарушылар мен медицина қызметкерлері судағы төтенше жағдайлардың алдын алу, шұғыл әрекет ету және алғашқы көмек көрсету тәсілдерін көрсетті. Мұндай іс-шаралар тұрғындардың қауіпсіздік мәдениетін арттыруға бағытталған.Мұнымен қоса мұндай сабақтар мектептердегі жазғы балалар лагерьлерінде де өтіп жатыр. &nbsp;Аталған жұмыстар лагерьлердің жұмысы аяқталғанға дейін жалғасады.&nbsp;<blockquote>- Сырдария өзені мен облыс аумағындағы басқа да су айдындарында азаматтардың суға кету фактілері көбіне қауіпсіздік ережелерін өрескел бұзу салдарынан орын алуда. Атап айтқанда, тұрғындардың өзендер мен каналдардың кез келген, зерттелмеген тұстарында суға түсуі, спирттік ішімдік ішіп суға шомылуы, балалардың ересектердің қарауынсыз су жағасына баруы мен жүзе алмауы - қайғылы жағдайларға басты себеп болып отыр. Сондай-ақ, соңғы жылдары ұжымдар мен оқу орындарына қарасты жастардың жаз мезгілінде табиғат аясында, өзен-көл жағасында демалыс ұйымдастыруы жиілеген. Алайда мұндай демалыстардың кейбірі өкінішке қарай қайғылы оқиғалармен аяқталып жатады. Қазіргі таңда облыс аумағында суға шомылуға тыйым салынған 63 қауіпті аймақ тіркеліп, аталған учаскелерге 149 ескерту тақтайшалары мен билбордтар орнатылған. Айта кету керек, жазғы маусымда облыс бойынша 8 балалар лагері жұмыс істейді. Осы ретте барлық ата-аналар мен демалыс ұйымдастырушыларды балалардың судағы қауіпсіздігін қамтамасыз етуге және барлық сақтық шараларын қатаң сақтауға шақырамыз,- деді Нұржігіт Бердібекұлы.</blockquote>

Бала қауіпсіздігі – басты міндет

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимов Бұқарбай батыр ауылындағы көше жөндеу жұмыстарының барысымен танысты.Ауылдағы 11 көшені жөндеу жобасы аясында 2024 жылы республикалық бюджеттен 50,0 млн теңге бөлініп, аталған қаражатқа 2 көшеге асфальт төселді.Жоба 2025 жылға өтпелі. Биыл жобаны толық аяқтау мақсатында республикалық бюджеттен – 294,4 млн теңге, аудандық бюджеттен – 15,0 млн теңге қаржы қаралды.Қазіргі уақытта «Қыран» ЖШС мердігер мекеме арқылы құм аралас тас төсеу жұмыстары қарқынды жүргізілуде.«Мемлекет басшысының, Үкіметтің және облыс әкімінің қолдауымен ауылдардың инфрақұрылымын жақсарту бағытындағы ауқымды жұмыстар жалғаса беретін болады. Бұл халық игілігі үшін жасалып жатқан іс. Сондықтан әр жұмыс сапалы әрі белгіленген мерзімде аяқталуы тиіс», – деді Ардақ Ибраимов.Аудан әкімі жобаның орындалу барысын тұрақты бақылауда ұстайтынын айтып, жауапты сала басшыларына, ауылдық округ әкіміне және мердігерге нақты тапсырмалар жүктеді.Сондай-ақ, құрылыс жұмыстары барысында қауіпсіздік талаптарының қатаң сақталуын және жоба уақытында аяқталып, ел игілігіне берілуін тапсырды.

Ел игілігі үшін басталған жоба сапалы әрі уақтылы аяқталуы керек

<a href="https://kyzylorda-news.kz/">Kyzylorda-news.kz</a>&nbsp; Мәжіліс&nbsp;депутаты Асылбек Нұралин&nbsp;орталық атқарушы органдар, ұлттық компаниялар және оларға қарасты ұйымдардың қызметкерлері үшін жұмыс күнінің басталу уақытын жылжытуды ұсынды. Оның&nbsp;пікірінше, бұл шара Астана мен басқа да ірі қалалардағы көлік кептелістерін азайтуға көмектеседі. Бұл туралы <a href="https://stan.kz/tangi-zhetiden-zhymiska-mazhiliste-zhymis-kestesine-ozg-419168/">Stan.kz </a>ақпарат агенттігі хабарлайды.Мәжілісмен Асылбек Нұралин премьер-министр Олжас Бектеновтің атына депутаттық сауал жолдады. Ол Астана мен еліміздің басқа да ірі қалаларындағы көлік инфрақұрылымының&nbsp;шамадан тыс жүктемесіне алаңдаушылық білдірді. Оның айтуынша, мегаполистер жүйелі түрде кептелістерге, қоғамдық көліктер қозғалысындағы іркілістерге&nbsp;тап болып жатыр&nbsp;және жол-көше желісіне түсетін жүктеме артып барады. Бұл жағдай халықтың күнделікті өміріне және қала&nbsp;инфрақұрылымының дамуына кері әсер етеді.<blockquote>"Астана мен Алматының ерекшелігі – агломерациялық өсімнің жоғары қарқыны,&nbsp;маятникті көші-қон мен өздігінен жүретін урбанизация қатар жүреді. Бағалаулар бойынша, жақын жылдары Астананың халқы екі миллион адамға жетуі мүмкін. Жұмыс орындарының және әлеуметтік инфрақұрылым нысандарының басым бөлігі қаланың орталығында шоғырланған. Қарбалас уақыттарда&nbsp;қала маңынан келетін тұрғындар легімен бірге көлік коллапсы пайда болады", – деп атап өтті депутат.</blockquote>Нұралин келтірген мәліметке сүйенсек, елордада жұмыспен қамтылған халықтың жартысынан астамы мемлекеттік органдарда жұмыс істейді. Осыған байланысты ол орталық атқарушы органдардың, ұлттық компаниялар мен оларға қарасты ұйымдардың қызметкерлері үшін жұмыс күнінің басталу уақытын өзгерту арқылы көлік ағынын қайта реттеу мүмкіндігін қарастыруды ұсынды.<blockquote>"Зерттеулерге сәйкес, таңғы уақыт еңбек өнімділігі тұрғысынан анағұрлым тиімді. Жұмыс кестесін 09:00-ден 07:00 немесе 08:00-ге жылжыту ұсынылып отырған шараларға сай келеді", – деді Нұралин.</blockquote>Депутат сондай-ақ көлік саясатын әзірлеу кезінде халықаралық озық тәжірибелерді ескеруді ұсынды: қоғамдық көлікке басымдық беру, велосипед және жаяу жүргінші инфрақұрылымын дамыту, автотұрақтарды шектеу, бағдаршамсыз магистральдар, көпдеңгейлі жол айырықтары және қаланың кіреберісіне орналастырылатын&nbsp;тұрақтар.Мәжілісмен көлік саясаты саласында шаралар әзірлеу үшін ведомствоаралық жұмыс тобын құруды, көлік инфрақұрылымын жаңғыртуға қосымша бюджет қаражатын қарастыруды, сондай-ақ көлік ағынын, жаяу жүргінші өткелдері мен жол айырықтарын жоспарлау, салу және басқару кезінде орталық және өңірлік құрылымдар арасындағы үйлестіруді күшейтуді қажет деп санайды.Фото:freepik.com

Мәжілісте мемлекеттік қызметкерлердің жұмысын таңғы 7-де бастау ұсынылды

<a href="https://kyzylorda-news.kz/">Kyzylorda-news.kz</a> Елордадағы автобус апатында 8 жастағы Алуа Бекен зардап шегіп, дәрігерлер оның екі аяғын кескен болатын, деп жазады&nbsp;<a href="https://turkystan.kz/">turkystan.kz</a>.Алуаның анасының бауыры автопарк басшылығымен кездескендерін, олар Алуаның отбасын өмір бойы қамтамасыз етуге уәде бергендерін мәлімдеді.<blockquote>«Бүгін №1 автопарктің басқарма төрағасы Мадияр Тұқпатовпен эмоционалды әрі күрделі әңгімелесу өтті. Біздің отбасылық қайғымызға, Алуаға адамшылықпен қарағандарын көрдік. Автопарк басшылығы жол-көлік апатына жауапкершілік алып, Алуаның да, Махаббаттың басқа төрт баласының да лайықты өмір сүруін автопарк ӨМІР БОЙЫ қамтамасыз ететін болды. Шығындарды төлеуге кепілдік берді. Қазір біз Алуа мен Махаббаттың отбасының өмір бойғы шығындарын инфляцияны ескере отырып есептеу үшін заңгерлер мен экономистерге жүгіндік. Біздің келісім заң тұрғысынан қалай бекітілетінін, Әкімдік оны қалай орындайтынын хабарлап отыратын боламыз», – деп жазды help.aluabeken парақшасындағы жазба авторы.</blockquote>фото: inbusiness.kz

Астанадағы автопарк аяғын кесуге мәжбүр болған 8 жастағы қызға өмір бойына қаражат төлейді

<a href="https://kyzylorda-news.kz/">Kyzylorda-news.kz</a>&nbsp; Мемлекет басшысы Қасым-Жомарт Кемелұлы Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында: «Ұлт саулығын нығайту үшін кешенді шараларды қолға алып, халықты әлеуметтік қолдау жүйесін жаңғырту керек» - деген болатын. Сапалы денсаулық сақтау қызметінің қолжетімділігін арттыру партияның Сайлауалды бағдарламасында кеңінен көзделген.Кеше «AMANAT» партиясы Қызылорда облыстық филиалы жанындағы партиялық бақылау комиссиясының отырысы өтіп, онда, осы және Сырдария және Шиелі аудандық филиалдарының партиялық бақылау бекеттерінің жұмысы, жалпы партиялық бақылауды ұйымдастыру және ішкі партиялық тәртіпті нығайту жұмыстары талқыланды.Комиссия отырысына партияның облыстық филиалының төрағасы Алмасбек Есмаханов, Партиялық бақылау комиссиясының төрағасы Нұркен Бақытбекұлы, күн тәртібіндегі сұраққа жауапты облыстық басқарма мен мекеме басшылары, сонымен қатар Сырдария және Шиелі аудандық филиалдарының атқарушы хатшылары мен Партиялық бақылау комиссиялары жетекшілері онлайн және оффлайн режимде қатысты.Жиында ұлт саулығын нығайту бағытында атқарылып жатқан жұмыстар төңірегінде облыстық денсаулық сақтау басқармасы басшысының орынбасары Ерділда Нұртазаұлы хабарлама жасады.Өңірде денсаулық сақтау саласында атқарылған жұмыстар нәтижесінде негізгі медициналық-демографиялық көрсеткіштердің оң үрдісі байқалады. Атап айтқанда, халықтың медициналық мекемелер ұсынатын медициналық қызметтердің сапасы мен қолжетімділігіне қанағаттану деңгейі 2024 жылы 2023 жылмен салыстырғанда 3,6% жоғарылап, 60,4-ті құраса, күтілетін өмір сүрудің орташа көрсеткіші 74,58-ден 75,15 жасқа артып отыр. Қазіргі таңда жүзеге асырылып жатқан кешенді шараларға қарамастан денсаулық сақтау саласында дәрігерлер тапшылығы сақталуда.<blockquote>Ерділда Нұртазаұлы облыста 104 дәрігер мамандығына тапшылық бар. Оның 45,2 пайызы аудандарға тиесілі. Бұл аудандық ауруханалардың көпсалалы аурухана ретінде қайта құрымдалуына және сәйкесінше аудан орталықтарында мамандандырылған бөлімдердің ашылуына байланысты қалыптасып отыр. Алайда облыс әкімдігінің қолдауымен жүргізіліп жатырған кешенді іс-шаралардың нәтижесінде тапшылық жылдан жылға азаюда»,- дейді.</blockquote>Атап өту керек, бүгінде облыс тұрғындарына 29 стационарлық, 25 амбулаториялық-емханалық, 101 дәрігерлік амбулатория, 27 фельдшерлік акушерлік бекет, 93 медициналық бекет медициналық қызмет көрсетуде.Комиссия отырысында міндетті әлеуметтік медициналық сақтандыру жүйесінің халыққа тиімділігін арттыру мәселесі де сөз болып, бұл бағытта «Әлеуметтік медициналық сақтандыру қоры» КЕАҚ Қызылорда облыстық филиалы директоры Жақсылық Абдусаметов толық ақпарат берді.Күн тәртібіндегі екінші мәселеге орай Сырдария және Шиелі аудандық филиалдары жанындағы партиялық бақылау комиссиялары төрағалары баяндап, комиссия мүшелері тарапынан қойылған сауалдарға жауап берді.Жиында арнайы сөз алған партияның облыстық филиалының төрағасы Алмасбек Есмаханов партияның сайлауалды бағдарламасы аясында денсаулық саласына қатысты жасалып жатқан жұмыстарды тілге тиек етті.<blockquote>«Партия өзінің 2023-2027 жылдарға арналған сайлауалды бағдарламасында Қызылорда қаласында ауысымына 100 келушіге арналған емханасы бар 300 төсекке арналған көпбейінді аурухана салу, облыстық қан орталығы құрылысын жүргізу, 24 дәрігерлік амбулатория, 2 фельдшерлік-акушерлік пункт және 1 медициналық пункт құрылысын жүргізу, медициналық ұйымдардың жоғары технологиялық құралдармен жабдықталуына ықпал ету, халықтың скринингтік зерттеулермен қамтылуын қадағалау, медицина кадрларының жетіспеушілігін төмендету мақсатында жыл сайын облыс әкімінің гранты бойынша 20 мектеп бітірушісін еліміздің медициналық жоғары оқу орындарында, 20 түлекті аса тапшы мамандықтар бойынша резидентурада оқытуға және жыл сайын мыңнан астам медицина қызметкерлерінің біліктілігін арттыруға қаржы қарастыру мәселелерін көздеген болатын. Бұл жұмыстардың басым көпшілігі жүзеге асты. Орындалу сатысындағы жұмыстарға өздеріңіз куәсіздер. Бүгінгі күн тәртібіндегі мәселе тиісті басқарма мен құзіретті органның қатаң бақылауында болып, елдің денсаулық сақтау бойынша сұранысын толық қанағаттандыруға бірлесіп, жұмыс жасауымыз керек», - деді Алмасбек Есмаханов.</blockquote>Отырыс соңында кеңес мүшелері тарапынан көтерілген ұсыныстар ортаға салынып, жұмысты жетілдіру мақсатында хаттамаға енгізілді.

Ұлт саулығын нығайтудағы кешенді шаралар партиялық бақылау комиссиясы отырысында талқыланды

<a href="https://kyzylorda-news.kz/">Kyzylorda-news.kz</a> Қазақстан Республикасының Сауда және интеграция министрлігінің Сауда комитетінің төрағасы Әбілдабеков Айдар Ахметбекұлы Қызылорда облысына жұмыс сапарымен келді.Сапар барысында Айдар Ахметбекұлы облыс орталығындағы әмбебап және мамандандырылған сауда базарларының жай-күйімен танысып, жұмыс барысын бақылады.Облыста тіркелген 25 сауда базары тіркелген, оның төртеуі әмбебап сауда базары болып табылады.Үкіметпен бекітілген жол картасына сәйкес 2025 жылдың соңына дейін барлық әмбебап сауда базарлары жаңғыртылуы тиіс.Тапсырмаға сәйкес комитет төрағасы сауда базарлары басшылары, тиісті мемлекеттік орган өкілдерінің қатысуымен жиын өткізіп, сауда базарларын жаңғыртуда сауда инфрақұрылымын заманауи талаптарға сәйкестендіру, санитарлық және өрт қауіпсіздігі нормалары туралы мәселелерді талқылады.Сонымен қатар, кездесу барысында кәсіпкерлер мен қаржы институттарының тарапынан мемлекеттік бағдарлама аясында қаржыландыруды жалғастыру, сауда қызметін реттеу және салық заңнамалары аясында жеңілдіктерді қарастыру жөнінде ұсыныстар берілді. Бұл ұсыныстар шешімін табатын болады.&nbsp;<img src="https://knadmin.beoblood.kz/uploads/Predsedatel_Komiteta_torgovli_pribyl_v_Kyzylordinskuyu_oblast_1_4db2e7f1e9.jpg" alt="Председатель Комитета торговли прибыл в Кызылординскую область 1.jpg">

Сауда комитетінің төрағасы облысқа жұмыс сапарымен келді

<a href="https://kyzylorda-news.kz/">Kyzylorda-news.kz</a> &nbsp;Кеше Арал ауданы әкімдігінің мәжіліс залында аудан әкімі Аманжол Оңғарбаевтың төрағалығымен еңбек қауіпсіздігін сақтау және еңбек саласын цифрландыру, туристерге қолайлы жағдай жасау мәселелері төңірегінде мәжіліс өтті.Бұл мәселе Үкімет отырысының күн тәртібінде қаралып, аймақ басшысының төрағалығымен өткен мәжіліске арқау болған-ды.&nbsp;Еңбек саласындағы қауіпсіздік мәселесі, оның ішінде жұмыскерлердің құқықтарының және олардың әлеуметтік қорғалуы мен еңбек қауіпсіздігін арттыру – мемлекетіміздің басты бағыттарының бірі.Қазіргі таңда ауданда әлеуметтік әріптестік және еңбек қатынастарын реттеу жөніндегі үш жақты комиссия жұмыс жасайды. Аудан басшысы Мемлекеттік еңбек инспекциясы және Халықты әлеуметтік қорғау саласындағы реттеу және бақылау комитеттерінің өкілдері ауданға арнайы келіп, еңбек жағдайлары туралы түсіндірме жұмыстарын жүргізгенін, мұндай жиындардың қарапайым еңбеккерлер үшін маңызы зор екенін атап өтті.Даулы мәселе аудан аумағанда да әлсін-әлсін кездесіп тұратынын, жауаптылар осындай келеңсіздіктердің алдын алуда жан-жақты жұмыс жүргізу керектігін айтып, мәселені тұрақты бақылауда ұстауды тапсырды.Жиындағы екінші мәселе елімізге туристердің келуіне қолайлы жағдай жасау туралы аудандық дене тәрбиесі, спорт және туризм бөлімінің басшысы Т.Әлжанов хабарлама жасады.Мәселе ауқымды. Ауданда туризм саласын дамыту Қызылорда облысының даму жоспары аясында жүзеге асырылуда. Аудан көлемінде туризм обьектілері ретінде 10 нысан бекітілген. Бұл бағыттағы жұмыстардың ең негізгісі – Халықаралық Аралды құтқару қорымен бірлесе отырып, «ARAL GEOPARK» жобасының Юнеско көлемінде құрылуы.Аудан әкімі бұл мәселеге қатысты жүргізіліп жатқан жұмыстардың мардымсыз екенін айтып, аудан аумағында туризм объектісі болып белгіленген аймақтардың әлеуетін арттыру бойынша жұмысты жандандыру керектігін жеткізді.&nbsp;«Аққұмшық» демалыс аймағының қазіргі әлеуеті жайлы Қамыстыбас ауылдық округінің әкімі А.Балмырзаева қысқаша хабаралама жасап, берілген тапсырмалардың орындалуы төңірегінде айтып өтті.Жиын соңында аудан әкімі Аманжол Сақыпұлы туристер көп аялдайтын Қамыстыбас елді мекеніндегі «Аққұмшық» жағажайының санитарлық талаптарын әлі де қатаң бақылауға алып, балалар қауіпсіздігі мен құқық бұзушылықтың алдын алу бағытындағы жұмыстарды жандандыру жөнінде жауапты тұлғаларға тапсырма жүктеді.Фото: Аудан әкімдігінің баспасөз қызметі

Өзекті мәселелер мәжіліс мінберінде қаралды

<a href="https://kyzylorda-news.kz/">Kyzylorda-news.kz</a> 2025 жылдың 10 маусымында Қызылорда облысының тілдерді оқыту орталығының жанындағы ғылыми кеңестің ІІ мәжілісі өтті.Кеңестің алғысөзін ашқан Орталық директоры – Ғылыми кеңес төрағасының орынбасары М.Дәулетбаева кеңес мүшелерін күн тәртібінде қаралатын мәселелермен таныстырды.Бүгінгі ғылыми кеңестің ең басты жаңалығы – Орталықтың орыс тілі оқытушыларының бірлескен авторлығымен «Русский язык в деловой сфере» В1 деңгейіне арналған оқу құралының жарыққа шығуы. Оқу құралының тұсаукесер рәсімін Қорқыт ата атындағы Қызылорда университетінің доценті, филология ғылымдарының кандидаты, Ғылыми кеңес төрағасы Алдажар Әбілов жасап, жаңа оқу құралының қолданбалы маңызы, тілдің іскерлік қарым-қатынасты меңгертудегі рөлі мен практикалық бағытын түсіндірді.Орталық директорының орынбасары, кеңес мүшесі Жаныгүл Ерекешова 2025 жылы республикалық сараптамалық комиссияға ұсынылған «Қазақтілді кәсіпкер» С1 деңгейіне арналған оқу құралының хабаршы нұсқасына енгізілген өзгерістер жайлы баяндады. Аталмыш оқу құралының мазмұны бойынша кеңес мүшелері ұсыныстарын жеткізіп, оның құрылымына, тақырыптық жүйеленуіне және практикалық маңыздылығына байланысты өз ой-пікірлерін ортаға салды.Одан кейін А.Байтұрсынұлы атындағы «Үздік оқытушы – 2025» облыстық байқауында көрсетілген сабақтардың жоба нұсқасын таныстырды. Кеңес мүшелері жинақтың құрылымы мен әдістемелік тиімділігіне қатысты ұсыныстарын білдірді.Ғылыми кеңес аясында филология ғылымының докторы, профессор Шора Сарыбаевтың туғанына 100 жыл толуына орай ғалымның ғылыми мұрасы туралы ғылыми мақаланың жобасы талқыланды. Мақаланың жалпы мазмұнын, құрылымын Орталықтың мемлекеттік тіл оқытушысы Гүлназ Ыбраева таныстырды. Кеңес мүшелері тарапынан мақаланың құрылымдық мазмұны, ғылыми жаңалығы және практикалық құндылығы тұрғысынан нақты ұсыныстар айтылды.Кеңесте қаралған мәселелер бойынша филология ғылымдарының кандидаты Алдажар Әбдірасуллеұлы Орталық ұжымының ізденісінің нәтижесінде қол жеткізіп отырған еңбегінің құндылығын, оның тіл үйретудегі маңыздылығын атап өтті.<blockquote>- Бүгінгі ғылыми мәжілісте қаралған мәселелердің барлығы да орынды және өзекті. Бұған дейін де бірнеше мәрте республикалық семинарға қатысып, өз ұсынысымызды айттық. Бүгінде Орталық қызметкерлері әзірлеген әдістемелік құралдарды республиканың әр өңіріндегі тіл оқыту орталықтары оқыту процесіне қолданып отыр. Алдағы уақытта да тұшымды дүниелер дайындап, көпшілікке ұсыну бағытында тынымсыз жұмыс жасалып жатқаны қуантады, - деді ғылыми мәжіліске қатысқан Қызылорда облысының қоғамдық даму басқармасы басшысының орынбасары У.Ибраев.</blockquote>Сондай-ақ, Орталықтың ғылыми-әдістемелік бөлімінің аға сарапшысы Н.Құдайбергеноваға ҚР Ғылым және жоғары білім министрлігінің Алғыс хатын табыстады.Кеңеске ұсынылған жобалардың өзектілігін, қазіргі заман талаптарына сай бейімделгендігін ерекше бағалап, олардың тәжірибелік қолданысын арттыру бойынша кеңес мүшелері Қорқыт ата атындағы Қызылорда университетінің қауымдастырылған профессоры Аман Абасилов, «Өрлеу» БАҰО» АҚ филиалы Қызылорда облысы бойынша кәсіби даму институтының қоғамдық-гуманитарлық бағыттағы кафедра меңгерушісі, филология ғылымдарының кандидаты Жанар Исаева өз ұсыныстарын жеткізді.Мәжіліс қорытындысы бойынша нақты шешімдер қабылданып, жобалардың әрі қарай жетілдірілу жолдары мен бағыттары бекітілді.

Ғылыми кеңестің мәжілісі өтті

<a href="https://kyzylorda-news.kz/">Kyzylorda-news.kz</a> Қазақстан Республикасы Еңбек және халықты әлеуметтік қорғау вице-министрі Асқар Биахметов Қызылорда облысына жұмыс сапарымен келді.Вице-министр жұмыс сапарын облыс әкімдігінде еңбек нарығының жағдайы туралы мәжіліс өткізуден бастады.Мәжілісті облыс әкімінің бірінші орынбасары Данияр Жаналинов ашып, жүргізді.Мәжіліске Қызылорда қаласы мен аудан әкімдері, орталық атқарушы органдардың аумақтық департаменттері, облыстық басқарма басшылары және өңірдегі әлеуметтік сала қызметкерлері қатысты.Өңіріміздегі жұмыспен қамту саласында 2024 жыл қорытындысы және 2025 жылдың 5 айындағы атқарылған жұмыстар мен алдағы міндеттер туралы облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жұмабекұлы баяндады.Вице-министр 2024 жылдың қорытындысымен Қызылорда облысы бойынша Өңірлік жұмыспен қамту картасы шеңберінде белгіленген барлық индикаторлардың артығымен орындалғандығын және республика бойынша алғашқы үштікте екендігін атап көрсетті.Одан бөлек, Асқар Биахметов еңбек нарығындағы жаңалықтар ретінде мемлекеттік инвестициялардың тиімділігін арттыру мақсатында енгізілген «Инновациялық жобалардың навигаторы» (ИЖН) цифрлық платформасымен және Еңбек тәуекелдері картасымен таныстырды.Мәжіліс қорытындысымен вице -министр тиісті басқармалар мен аудан, қала әкімдеріне еңбек қатынастарын заңдастыру, көлеңкелі экономикадан шығару арқылы халықтың әлеуметтік тұрғыда қорғалуын ұйымдастыру бағытындағы жұмыстарды жандандыру, электронды еңбек биржасы арқылы жұмысқа орналасқан азаматтардың еңбек шарттарының уақытылы жасалуын, міндетті зейнетақы жарналарының мерзімінде аударылуын қамтамасыз етуді, жұмыс берушілер тарапынан жалған жұмысқа орналастыру әрекеттерінің болу деректеріне талдау жүргізіп, тиісті шаралар қабылдауды тапсырды.Сондай-ақ, вице-министрі аймақтың әлеуметтік-еңбек қатынастары мен өндірістік саласының дамуына қатысты бірқатар маңызды нысандарды аралады.Атап айтқанда, А.С. Биахметов Қызылорда шыны зауытына, «Қызылорда Саз-М» ЖШС заманауи кірпіш зауытына және Қызылорда қаласындағы жаңа жылу электр орталығына барды.Айта кету керек, қазіргі таңда Қызылорда шыны зауыты 318 адамды тұрақты жұмыспен қамтыса, жергілікті тұрғындар үшін «Қызылорда Саз-М» ЖШС заманауи кірпіш зауыты іске қосылғасын 70 орын, Жылу электр орталығында 200-ге жуық тұрақты жұмыс орындары құрылады деп жоспарлануда.Кездесу барысында вице-министр кәсіпорын ұжымдарымен кездесіп, еңбек жағдайлары, өндірістік қауіпсіздік, жұмысшылардың әлеуметтік құқықтарын қорғау мәселелеріне назар аударды. Сонымен қатар, жаңа жұмыс орындарын ашу мәселелерін талқылап, еңбек қатынастарын жетілдірудің өзекті бағыттарын атап өтті.

ҚР Еңбек және халықты әлеуметтік қорғау вице-министрі Сыр елінде

<a href="https://kyzylorda-news.kz/">Kyzylorda-news.kz</a> Шерзат Болат ісі бойынша сотты болғандар жаңа заң қабылданса, рақымшылыққа ілінуі мүмкін бе? Бұл сұраққа Мәжіліс депутаты Абзал Құспан жауап берді, деп хабарлайды <a href="https://baq.kz/sherzat-bolat-isi-boyynsha-sottalgandar-raqymshylyqqa-iline-me-200015220/">BAQ.KZ </a>тілшісі.Бұған дейін хабарлағанымыздай, 2025 жылғы 5 маусым күні Шерзат Болат ісі бойынша 9 сотталушыға үкім шықты. Ал мемлекеттік айыптаушы Дана Сәрсенбай марқұм Шерзат Болатты тірі болуға лайық еді деп мәлімдеді. Сондай-ақ ол Шерзат ісі бойынша қоғамда үрей бар екенін айтты.Адвокат Жұмат Әбенов резонансты мәлімдеме жасап, халықты сабырға шақырды. Бүгінгі сот отырысының соңында ол айыпталушы Абзал Шынасылдың шынайы болғанын, бірақ бір сәттік сенгіштігі өзіне кері әсер етіп, істі мойнына ала салғанын айтты.Белгілі болғандай, Шерзаттың өліміне тікелей себеп болған соққыны Абзал Шынасыл жасаған.9 маусымда Шерзат Болат ісі бойынша сотталғандардың мерзімінен бұрын шартты босауы туралы сұраққа жәбірленуші тараптың құқығын қорғаған адвокат Мейірман Шекеев жауап бергенін хабарладық.Жоғарғы сот Шерзат Болат ісінің трансляциясына нүкте қойды. Шерзат Болаттың өліміне қатысты сот процесінің үкімі 5 маусым күні оқылып, үлкен қоғамдық резонанс тудырды. Процесс басталғаннан бері Жоғарғы соттың тікелей эфирін ұйымдастырған түсірілім тобы үшін бұл күн ерекше ауыр және эмоцияға толы болды. Бұл туралы Жоғарғы соттың баспасөз хатшысы Перизат Сәдуақас-Хайруллина мәлімдеген болатын.Фото: Гүлжан Раманқұлова

Шерзат Болат ісі бойынша сотталғандар рақымшылыққа іліне ме?

<a href="https://kyzylorda-news.kz/">Kyzylorda-news.kz</a> Жуырда Қызылордада корей киносы фестивалі аясында Оңтүстік Кореяның танымал «Бақытты кілт» («Luck Key») фильмінің көрсетілімі өтті.&nbsp;Көрермендердің жүрегін жаулаған бұл туынды алғаш жарыққа шыққан сәтінен бастап 7 миллионнан астам көрермен жинап үлгерген еді. Енді қызылордалық көрермендер де бұл қызықты комедиялық боевикті тамашалау мүмкіндігіне ие болды. Фильм режиссер Ли Ге Бёктің қолынан шыққан, ал басты рөлде танымал актер Ю Хэ Чжин ойнайды.Сюжеті қарапайым, тіпті классикалық деуге болады. Басты кейіпкер – жолы болмаған, сәтсіздікке ұшыраған жас актер. Ол өмірден түңіліп, өз-өзіне қол жұмсауға бел буады. Алайда тағдыр оған тосын сый дайындайды: қоғамдық моншада ол өзге бір келушімен — сәнді киінген, ауқатты ер адаммен — абайсызда шкафтың кілттерін ауыстырып алады. Осылайша, сәтсіз актер Чэ Сон есін жоғалтқан элиталық жалдамалы киллер Хён Уктың орнына түсіп, оның өмірін иемденеді. Мұндай есін жоғалту мен тұлға алмасу тақырыптары кинода жиі кездескенімен, корей режиссерлері бұл сюжетке өзіндік ерекшелік пен сүйкімділік қоса білді. Сондықтан фильмді көру көрермен үшін қызықты әрі көңілді әсер сыйлайды.Өмірден түңілген жас актер киллердің өмірін пайдаланып, біраз «шығынсыз» өмір сүргісі келеді. Әрине, бәрі жоспарлағандай бола бермейді. Оқиғалар шиеленісіп, бірінен соң бірі күлкілі жағдайлар орын алып жатады. Бұл фильм – жеңіл, позитивті, сәтті әзілдерге толы, корей комедияларына тән сәл «ақылға қонымсыз», бірақ тартымды сюжетті картина. Актерлік шеберлік те жоғары деңгейде екенін атап өткен жөн. Кейбір актерлерді бұған дейін басқа фильмдер мен дорамалардағы қосалқы рөлдерден көргенмін, бірақ «Бақытты кілтте» олар өзін жаңа қырынан көрсете білді. Фильм аяқталған соң Қызылорда облысының корей жастары ұйымының мүшелері бірауыздан пікір білдірді.&nbsp;<blockquote>– Фильм өте ұнады. Актерлер де, сюжеттің өзі де керемет. Көтеріңкі көңіл күй сыйлайтын, өмірге шабыт беретін оқиға. Бұл фильм өмірде кез келген сәтте бәрі өзгеруі мүмкін екенін, ал адамда ішкі қайсарлық болса, ол қандай қиындық болса да жеңіп шығатынын көрсетеді. Осындай туындылар жиі өткізілсе екен дейміз, – деді олар.</blockquote>«Бақытты кілт» — бұл жай ғана жеңіл комедия емес. Бұл – ең күрделі, шым-шытырық өмірдің өзінде жаңа мүмкіндік бар екенін еске салатын туынды. Ол үшін тек батыл қадам жасап, кілтті тауып, оны дұрыс бағытта бұру керек.

Қазақстан және Қызылорда облысының жаңалықтары: Қоғам