<a href="https://kyzylorda-news.kz/">Kyzylorda-news.kz</a> Астанадағы ХҚКО тұрғындарға мемлекеттік қызмет көрсетумен қатар, цифрлық сауаттылықты арттыруға бағытталған оқыту алаңы ретінде жұмыс істей бастады. «Азаматтарға арналған үкімет» Мемлекеттік корпорациясы Астанада азаматтарға мемлекеттік қызметтерді онлайн рәсімдеуді үйрететін және цифрлық қызметтерді қолдану қабілетін дамытуға бағытталған тегін офлайн оқытуды іске қосты. &nbsp;Оқыту Мемлекеттік корпорацияның «Таным» оқу орталығы мен «Ұлттық ақпараттық технологиялар» АҚ-ның қатысуымен ұйымдастырылды және практикалық форматта өтеді. Мамандар азаматтарға «Электрондық үкімет» порталы мен мемлекеттік органдардың интернет-ресурстарының біріңғай платформасын, &nbsp;«ЦОН» және «eGov Mobile» қосымшаларын қалай қолдану керегін көрсетіп, қажетті қызметтерді онлайн алу жолдарын үйретеді. Оқыту бағдарламасы азаматтар тарапынан жиі түсетін сұрақтар мен сұраныстарға сәйкес әзірленеді.Бұл бастама Мемлекет басшысының Жолдауында белгіленген цифрландыру бастамалары аясында жүзеге асырылып жатыр. Сонымен қатар, оқыту халыққа қызмет көрсетудің жаңа форматы – «Цифрлық халық кеңсесі» үлгісін енгізуге бағытталған. «Apple Store» үлгісіндегі бұл формат азаматтарға қызметтерді жылдам алуға және оларды онлайн түрде өз бетінше рәсімдеуді меңгеруге көмектеседі.Айта кетейік, жоба әзірге пилоттық форматта жұмыс істейді: бірінші тоқсанда оқыту Астанада өтсе, екінші тоқсанда бұл тәжірибені өңірлерге кеңейту жоспарланған.Оқыту тегін әрі тұрақты түрде өткізіледі. Іс-шара әр сәрсенбі және жұма күндері Астана қаласындағы ХҚКО-ның «Нұра» ауданы бөлімінде (Керей мен Жәнібек хандар көшесі, 4) сағат 10:00-ден 12:00-ге дейін өтеді. Кіру тегін.

Астанада ХҚКО-да цифрлық сауаттылыққа арналған тегін оқыту жүріп жатыр

Мемлекет басшысы Қасым-Жомарт Тоқаевтың Үкіметтің кеңейтілген отырысында сөйлеген сөзі

<a href="https://kyzylorda-news.kz/">Kyzylorda-news.kz</a> Бүгін Үкіметтің кеңейтілген отырысында Мемлекет басшысы Қасым-Жомарт Тоқаев өңделетін мұнай көлемін арттыруды тапсырды, – деп хабарлайды<a href="https://kaz.inform.kz/news/elmzde-zhumis-step-turgan-munay-ondeu-zauittarin-zhangirtu-kerek-prezident-b24a05/">&nbsp;KAZINFORM</a><blockquote>— Еліміздің импортқа тәуелділігі туралы айтқанда мұнай саласындағы күрделі ахуалға тоқталмай кетуге болмайды. Қазақстанда жылына шамамен 100 миллион тонна мұнай өндіріледі, бірақ елімізде соның тек 18 миллион тоннасы ғана қайта өңделеді. Соның салдарынан біз мұнай өндіруші ел болсақ та, жыл өткен сайын дизель отыны бойынша тапшылық пайда болып жатыр, авиациялық керосин бойынша да импортқа тәуелді болып отырмыз, — деді Қасым-Жомарт Тоқаев.</blockquote>Президенттің сөзіне қарағанда, сондықтан отынға деген сұраныстың жоғары екенін ескере отырып, елімізде жұмыс істеп тұрған мұнай өңдеу зауыттарын жаңғырту керек. Бұл жұмысты жедел орындау қажет.&nbsp;<blockquote>— Аталған қадам бір жылда өңделетін мұнай көлемін 9 миллион тоннаға арттыруға мүмкіндік береді (18,4 миллион тоннадан 27,4 миллион тоннаға дейін). Бұл — министрліктің мәліметі. Үкімет жаңа мұнай өңдеу зауытының құрылысына қатысты байыпты шешім қабылдауы қажет. Ең алдымен, мұнай өңдеу зауытына шикізат қайдан жеткізілетінін, қандай өнімді және қанша көлемде өндіретінін дұрыс есептеу керек. Бұл жобаны іске асыруға жеке инвестор тарту керек болады. Бүгінде мұндай ірі жобаны тек мемлекет қаржысына салу өте тиімсіз, — деді Мемлекет басшысы.</blockquote>Фото: Павлодар мұнай өңдеу зауыты

Елімізде жұмыс істеп тұрған мұнай өңдеу зауыттарын жаңғырту керек — Президент

<a href="https://kyzylorda-news.kz/">Kyzylorda-news.kz</a> Цифрлық тәсілдер және жасанды интеллектінің көмегімен кедендік рәсімдерді оңтайландыру керек. Бұл туралы Үкіметтің кеңейтілген отырысында Мемлекет басшысы Қасым-Жомарт Тоқаев мәлім етті, – деп хабарлайды<a href="https://kaz.inform.kz/news/kazakstanda-avtokolk-kozgalisin-retteytn-tsifrlik-platforma-ske-kosiladi-5dfc6e/">&nbsp;KAZINFORM</a><blockquote>-Үкімет теміржолмен қатар автокөлік тасымалын дамытуға қатысты ірі жобаларды да жүзеге асыру барысын қатаң бақылауға алуы қажет. Мен «Қарағанды – Жезқазған», «Орталық – Батыс», «Ақтөбе – Ұлғайсын» бағытындағы жолдың және Қызылорда, Сарыағаш, Рудный қалаларының сыртындағы айналма жолдың құрылысы туралы айтып отырмын. Автокөлік тасымалын дамыту туралы айтқанда, ең алдымен, жолдың сапасы мен қауіпсіздігіне қатысты мәселелер шешімін табуға тиіс. Жаңа жылға дейін жасанды интеллектіні пайдалана отырып автокөлік қозғалысын реттейтін цифрлық платформаны іске қосу керек, – деді Қасым-Жомарт Тоқаев.</blockquote>Сонымен қатар Президент Қазақстан жүк және жолаушылар транзитін барынша тиімді ету үшін шекарадағы өткізу бекеттерін жаппай жаңғырта бастағанын еске салды. Былтыр тоғыз бекет іске қосылды. Келесі жылдың соңына дейін тағы 33 бекет толық жаңғыртылады.<blockquote>-Цифрлық тәсілдер және жасанды интеллектінің көмегімен кедендік рәсімдерді оңтайландыру керек. Бірақ бақылау да әлсіреп кетпеуге тиіс. Еліміздің және көрші мемлекеттердің ақпараттық жүйелерін өзара байланыстыру керек. Мен Жолдауымда жүк тасымалын басқаратын «Smart Cargo» цифрлық платформасын, сондай-ақ кеден рәсімдерін жасайтын «Keden» жүйесін енгізуді тапсырдым. Қазір осы жүйелер пилоттық режимде жұмыс істеп тұр. Барлық мекеменің ақпараттық жүйесін өзара кіріктіріп, бұл платформалардың толық іске қосылуын тездету керек. Осылайша, біртұтас интеллектуалды көлік экожүйесі қалыптасады, – деді Мемлекет басшысы.</blockquote>Фото: trtkazakh.com

Қазақстанда автокөлік қозғалысын реттейтін цифрлық платформа іске қосылады

<a href="https://kyzylorda-news.kz/">Kyzylorda-news.kz</a> Отандық қаржы жүйесіндегі сақтандыру секторының үлесі мардымсыз. Бұл туралы Үкіметтің кеңейтілген отырысында Мемлекет басшысы Қасым-Жомарт Тоқаев мәлім етті, – деп хабарлайды<a href="https://kaz.inform.kz/news/kazakstanda-saktandiru-zhane-kor-narigin-damitudin-2030-zhilga-deyng-bagdarlamasi-azrlened-87badf/"> KAZINFORM</a> — Әлемде банктермен қатар сақтандыру және құнды қағаздар нарығы ұзақ мерзімді капиталдың көзі саналады. Отандық қаржы жүйесіндегі сақтандыру секторының үлесі мардымсыз — 5 пайыз ғана. Мұндай жағдайды місе тұтуға болмайды. Әңгіме цифрлық технологияларды пайдалану арқылы сақтандыру өнімдерінің түрін көбейтіп, олардың қолжетімділігін арттыру жөнінде болып отыр. Сақтандыру нарығын мемлекеттің, азаматтар мен бизнестің ықтимал тәуекелдерге ортақ жауапкершілік мәдениетін қалыптастыратын маңызды институт ретінде қарастырған жөн, — деді Қасым-Жомарт Тоқаев. &nbsp;Президенттің айтуынша, мұндай тәсілге көшу үшін дамыған елдердің үлгісіне сай міндетті сақтандыру түрлерін көбейту қажет. Банктер мен сақтандыру компаниялары ұзақ мерзімді қор жинауды күшейтсе, бұл құнды қағаздар нарығының дамуына тың серпін береді. &nbsp;<blockquote>— Құнды қағаздардың дамыған нарығы — макроэкономикалық тұрақтылықтың маңызды көрсеткіші. Ал оның ауқымы инвесторлардың сенім деңгейі қандай екенін білдіреді. Қаржы нарығын реттеу және дамыту агенттігі мен Ұлттық банкке 1 қыркүйекке дейін сақтандыру және қор нарығын дамытудың 2030 жылға дейінгі бағдарламасын әзірлеуді тапсырамын. Оны тиімді іске асыру үшін сақтандыру және құнды қағаздар туралы жаңа заңдар қабылдау қажет деп санаймын, — деді Мемлекет басшысы.</blockquote>Фото: Ақорда

Қазақстанда сақтандыру және қор нарығын дамытудың 2030 жылға дейінгі бағдарламасы әзірленеді

<a href="https://kyzylorda-news.kz/">Kyzylorda-news.kz</a> Шикізат экспорттағаннан гөрі, одан дайын өнім өндіріп, сыртқа шығару әлдеқайда пайдалы. Бұл туралы Үкіметтің кеңейтілген отырысында Мемлекет басшысы Қасым-Жомарт Тоқаев айтты, – деп хабарлайды&nbsp;<a href="https://kaz.inform.kz/news/tokaev-dayin-onmd-baska-elderden-satip-alatinimiz-zhayinda-munday-tazhriben-dogaru-kerek-8621e8/">KAZINFORM</a><blockquote>-Жаңа инвестициялар ең алдымен еліміздегі заманауи өнеркәсіптің негізін қалыптастыруға бағытталуы керек. Бұл салада біраз жетістікке жеттік. Былтыр өңдеу өнеркәсібі тұрақты дамып, 6,4 пайызға өсті. Бірақ өңделген тауар экспорты 2,7 пайызға төмендеді. Бұған жалпы экспорттың 4,2 пайызға азайғаны да әсер етті. Өнеркәсіп саясатының басты кемшіліктері дәл осы тұста анық байқалды. Бұл салада шикізат өндірушілердің үлесі әлі де басым. Бірақ бұл оларға кедергі жасауға болады деген сөз емес, керісінше, оларға көмегімізді әлдеқайда күшейтуіміз қажет, – деді Президент.</blockquote>Сонымен қатар Мемлекет басшысы өңдеу өнеркәсібіне баса назар аудару керектігін айтты.<blockquote>-Өңдеу өнеркәсібіндегі өнімнің 40 пайыздан астамы металлургияға тиесілі. Ал металлургия секторында экспортқа шығарылатын тауардың жартысынан көбі – төмен деңгейде өңделген өнімдер. Соның салдарынан, шикізатты сыртқа шығарамыз да, одан жасалған дайын өнімді басқа елдерден сатып аламыз. Парадокс. Мұндай тәжірибені доғару керек, – деді Қасым-Жомарт Тоқаев.</blockquote>Президенттің айтуынша, шикізат экспорттағаннан гөрі, одан дайын өнім өндіріп, сыртқа шығару әлдеқайда пайдалы екенін баса атап өтті.<blockquote>-Әрине, бұл оңай міндет емес. Бірақ үлгілі кәсіпорындар бар, мысалы, Qarmet. Қанша қиындыққа тап болса да, ондағы өндірістік және әлеуметтік процестерде оң өзгерістер орын алып жатыр. Бұл мәселеде «артық қылам деп, тыртық қылуға да» болмайды. Өңдеу саласын дамытамыз деп, шикізат өндіру ісіне зиян келтірмеу жағын ойлау керек. Үкіметтің саясаты ақылға қонымды, байыпты болуға тиіс, – деді Мемлекет басшысы.</blockquote>Фото: Ақорда

Тоқаев дайын өнімді басқа елдерден сатып алатынымыз жайында: Мұндай тәжірибені доғару керек

<a href="https://kyzylorda-news.kz/">Kyzylorda-news.kz</a> Бүгін Президенттің төрағалығымен Үкіметтің кеңейтілген отырысы өтті. Отырыста Мемлекет басшысы Үкімет жоспарланған қуат көздерінің толық іске қосылуын қамтамасыз етуге тиіс екенін айтты, деп хабарлайды&nbsp;Egemen.kz.<blockquote>«Электр қуаты тұрақты әрі жеткілікті көлемде өндірілмесе, жасанды интеллектіні енгізу және жаппай цифрландыруды жүзеге асыру мүмкін болмайтыны анық. Бұл мәселе жөнінде мен Ұлттық құрылтай отырысында пікірімді анық айтып кеттім.Еліміз электр энергиясының ішкі тапшылығын жою үшін оны жыл сайын импорттауға мәжбүр. Былтыр 3,7 миллиард киловатт-сағат энергияны сырттан алдық. Қуат көздері мен электр желілерінің әбден ескіруі де бұл саладағы ахуалды ушықтырып тұр»,&nbsp;деді Мемлекет басшысы.Президентің айтуынша, өткен үш жылда «Тарифті инвестицияға айырбастау» бағдарламасы аясында энергетика саласына 1 трлн теңгеден астам қаржы салынды. Бұл қаражаттың негізгі бөлігі, яғни, 900 млрд теңгеден астам қаржы жөндеу жұмыстарына жұмсалды.«Жаңа қуат көздерін іске қосуға 140 миллиард теңге ғана бөлінген. Бұл ұзақ уақыт бойы тұрақты энергожүйені қамтамасыз етуге жетпейтіні анық. Электр қуаты жеткіліксіз болса, еліміз ойдағыдай дами алмайды. Осы маңызды мәселені ескермей жоспар құру – еш қисынға келмейтін шаруа.Энергетика министрлігінің бұрынғы басшылары тек мұнаймен шұғылданған сияқты, электр қуаты өндірісі екінші қатарда назардан тыс қалды. Енді бұл олқылықты тез арада түзетуіміз қажет», деді Қасым-Жомарт Тоқаев.</blockquote>Мемлекет басшысының сөзінше, қазіргі кезде Қазақстанда 123 миллиард киловатт-сағат электр энергиясы өндіріледі. Бұл еліміз үшін жеткіліксіз.<blockquote>«Үкімет 2029 жылдың соңына дейін 13,3 гигаваттық жаңа қуат көздерін іске қосамыз деп жоспарлап отыр. Оның 5,9 гигаваты жаңартылатын қуат көздерінен алынбақ.Сондай-ақ Үкімет келесі жылы электр қуатына деген сұранысты толық өтеуді көздеп отыр. Тіпті, 1,3 миллиард киловатт-сағат қуатты артық өндіре аламыз деген болжам бар. Бірақ бұл мақсатқа жету үшін міндеттеменің бәрі уақтылы орындалып, жеткілікті қаражат бөлінуге тиіс», деді Президент.</blockquote>Қасым-Жомарт Тоқаевтың айтуынша, бізде қуат көздерін іске қосу мерзімін қайта-қайта кейінге қалдыру әдетке айналды. Мысалы, Алматыдағы 2-ші және 3-ші жылу электр орталығын жаңғырту мерзімі бірнеше рет шегерілді. Жұмыс әлі күнге дейін жүргізіліп жатыр.<blockquote>«Сондықтан Үкімет жоспарланған қуат көздерінің толық іске қосылуын қамтамасыз етуге тиіс. Бұдан былай соза беруге болмайды.Менің ойымша, мәселе – нағыз энергетика мамандарының болмауында. Энергетика саласындағы мәселелермен «алып бара жатқан не бар дейсің?» деп, «азды-кем білімі бар, бірақ өзіне деген сенімі мол» кез келген адам айналысатын болды», деді Президент.</blockquote>

Мемлекет басшысы: Электр қуаты жеткіліксіз болса, еліміз ойдағыдай дами алмайды

<a href="https://kyzylorda-news.kz/">Kyzylorda-news.kz</a> Қазақстан ауыл шаруашылығы кооперациясын Нидерланд тәсілімен дамыту керек. Мемлекет басшысы Қасым-Жомарт Тоқаев Үкіметтің кеңейтілген отырысында осындай тапсырма берді, – деп хабарлайды<a href="https://kaz.inform.kz/news/tokaev-ukmetke-auil-sharuashiligi-kooperatsiyasi-turali-zhana-zan-dayindaudi-tapsirdi-5f782d/">&nbsp;KAZINFORM</a><blockquote>—&nbsp;Елімізде мал шаруашылығын дамытуға мол мүмкіндік&nbsp;бар. Бірақ біз осы әлеуетімізді дұрыс пайдаланбай отырмыз. Мал шаруашылығының даму стратегиясы да, қарқыны да&nbsp;мардымсыз, түсініксіз, кешенді жүйе жоқ. Бұл салада шешімін таппай тұрған мәселе көп. Өнімдердің басым бөлігі жеке қосалқы шаруашылықтарда және шаруа қожалықтарында өндіріледі. Еттің 60 пайызы, сүттің 80 пайызы&nbsp;— солардың еншісінде,&nbsp;— деді Мемлекет басшысы.</blockquote>Президенттің пайымдауынша, Бұл жағдай өнімділікті арттыруға кедергі болып отыр.<blockquote>— Елімізде жем-шөп қорын даярлаудан бастап, өнімді өңдеу, жеткізу, сату үдерісі біртұтас жүйе ретінде жолға қойылмаған. Басқаша айтсақ, осының бәрін басқарудың бірыңғай жүйесі жоқ. Өкінішке қарай, 2026 жылы осындай мәселелер туралы айтуға мәжбүр болып отырмыз. Биыл Мал шаруашылығын дамыту жоспары жасалды. Бұл құжат осы саладағы олқылықтарды жойып, оның дамуына жол ашуы тиіс. Енді ақыры не болатынын көреміз, — деді Қасым-Жомарт Тоқаев.</blockquote>Мемлекет басшысы «Turkistan» газетіне берген сұхбатын еске алды.<blockquote>— Бұл жерде шетелдік тәжірибені үлгі ретінде алуға болады. Мысалы, Нидерланд елінің жүйесін алсақ, онда шаруалар кооперациясының нақты әрі бірізді жүйесі бар. Соның арқасында олар құны 130 миллиард доллар болатын ауыл шаруашылығы өнімдерін экспорттап отыр. Шаруаларды жаңа үлгідегі кооператив құруға ынталандыру керек. Ол үшін Үкімет батыл шаралар қабылдауы тиіс. 1 қыркүйекке дейін Ауыл шаруашылығы кооперациясы туралы жаңа заң дайындауы қажет, — деді Президент.&nbsp;</blockquote>Фото: АШМ

Президент Үкіметке ауыл шаруашылығы кооперациясы туралы жаңа заң дайындауды тапсырды

<a href="https://kyzylorda-news.kz/">Kyzylorda-news.kz</a> Биыл 1 қыркүйекке дейін теміржол саласындағы жаңа тариф саясатына қатысты түпкілікті шешім қабылдау қажет. Бұл туралы Үкіметтің кеңейтілген отырысында Мемлекет басшысы Қасым-Жомарт Тоқаев айтты, – деп хабарлайды<a href="https://kaz.inform.kz/news/prezident-1-kirkuyekke-deyn-temrzhol-salasindagi-zhana-tarif-sayasatina-katisti-sheshm-kabildaudi-tapsirdi-60c509/">&nbsp;KAZINFORM</a><blockquote>— Үкімет биыл транзиттік тасымал көлемін шамамен 65 пайызға, яғни 55 миллион тоннаға дейін көбейтеміз деген ауқымды міндет қойып отыр. Ал «Қазақстан темір жолы» компаниясының басшысы өз ақпаратында бұл жоспарға күмән келтіріп отыр. Мәселе — бізде емес, іргелес мемлекеттердің жоспарлары мен мүмкіндіктерінде. Енді анықтау қажет. Осыған орай, «Самұрық-Қазына» қоры мен «Қазақстан темір жолы» компаниясы қажетті шараның бәрін қабылдауы тиіс. Соның ішінде цифрлық жаңғырту (яғни, трансформация) жұмыстарын аяқтауы қажет, — деді Қасым-Жомарт Тоқаев.</blockquote>Мемлекет басшысы жүк тасымалдаушылардың бәріне ашық және бірдей қолдау көрсетілуі тиіс екенін баса айтты.<blockquote>— Ол үшін ұлттық оператордың жүк вагондарын беру жұмысын толық цифрландырып, ретке келтіру керек. Теміржол саласындағы тариф саясатын реформалау — кезек күттірмейтін міндет. 1 қыркүйекке дейін жаңа тариф саясатының тұжырымдамасына қатысты түпкілікті шешім қабылдануы тиіс. Тариф саясаты, бұл — аса маңызды тақырып, көлік стратегиямыздың өзегі саналатын мәселе, — деді Президент.</blockquote>Фото: Rail-news.kz

Президент 1 қыркүйекке дейін теміржол саласындағы жаңа тариф саясатына қатысты шешім қабылдауды тапсырды

<a href="https://kyzylorda-news.kz/">Kyzylorda-news.kz</a> Қазақстан Республикасының Президенті Қасым-Жомарт Тоқаевтың төрағалығымен өткен Үкіметтің кеңейтілген отырысында Премьер-министр Олжас Бектенов экономиканың тұрақты дамуын қамтамасыз ету бойынша жүргізіліп жатқан жұмыстар туралы баяндады.Олжас Бектенов Мемлекет басшысының ел экономикасын одан әрі нығайту жөніндегі алға қойған міндеттеріне, Қазақстан халқына Жолдауында белгіленген стратегиялық мақсаттарға сәйкес Үкімет 2025 жылы жүйелі өзгерістерге бағытталған іс-шаралар қабылдағанын атап өтті.Салық, тариф және бюджет саясатында, цифрлық және құрылыс секторларында, сондай-ақ әлеуметтік салада қабылданған шешімдер экономиканы дамытуға тосқауыл болып отырған құрылымдық диспропорцияларды жоюға бағытталды.<blockquote>Салық және бюджет реформасы Ұлттық қордан нысаналы трансферттерді алмай-ақ, еліміздің үш жылдық бюджетін қалыптастыруға мүмкіндік берді. Ол 2028-ші жылға қарай бюджет тапшылығын жалпы ішкі өнімнің 0,9%-на дейін қысқартуға ықпал етеді. Жергілікті бюджеттердің республикалық бюджетке тәуелділігі 2025-ші жылғы 50%-дан 2028 жылы 34%-ға дейін төмендейді, — деді Олжас Бектенов.</blockquote>Жүзеге асырылған реформалар кезеңінде 2025 жылдың қорытындысы бойынша экономиканың орнықты өсімін сақтап қалуға қол жеткізілді. Құндық мәнде ЖІӨ-нің өсуі $20,1 млрд-ты құрады.Жалпы, 2025 жылы ЖІӨ өсімі 6,5% құрады. Экономикалық өсімді негізгі салалардың жедел дамуы қамтамасыз етті: Оның ішінде көлік – 17,8%-ға, құрылыс – 14,6%-ға, тау-кен өнеркәсібі – 17,4%-ға, өңдеу өнеркәсібі – 12,2%-ға, сауда – 26%-ға және ауыл шаруашылығы – 5,9%-ға өсті.KZgovernment

Олжас Бектенов Президентке ел экономикасын нығайту жөніндегі тапсырмалардың жүзеге асырылу барысы туралы баяндады

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимовтың төрағалығымен мәжіліс өтті. Жиынға ауылдық округ әкімдері селекторлық режимде қатысты.Мәжілісте аудан аумағындағы әлеуметтік нысандарды күтіп ұстау, сондай-ақ жылыту маусымын кедергісіз аяқтау бағытында атқарылып жатқан жұмыстар жан-жақты талқыланды.Әсіресе білім беру, денсаулық сақтау, мәдениет және спорт нысандарының техникалық жағдайы, күтіп ұстау мәселесіне қатысты жауапты сала басшылары мен ауылдық округ әкімдеріне бірқатар нақты тапсырмалар жүктелді.

Әлеуметтік нысандарға қатысты бірқатар мәселелер қаралды

<a href="https://kyzylorda-news.kz/">Kyzylorda-news.kz</a> «Достық» үйінің мәжіліс залында үкіметтік емес ұйым төрағалары облыстық басқарма басшыларымен кездесті. Іс-шараға Қызылорда облысының қоғамдық даму басқармасының басшысы Р.М. Каюпов, облыстық мәдениет, архивтер және құжаттама басқармасы басшысының орынбасары Қ.Қ. Жанұзақов, облыстық білім басқармасы басшысының орынбасары Ә. Ж. Ізімбетов, облыстық кәсіпкерлік және өнеркәсіп басқармасы басшысының орынбасары А.Б. Каюпов, облыстық дін істері басқармасының бөлім басшысы Н.М. Бердібек және үкіметтік емес ұйым төрағалары мен өкілдері қатысты.Кездесуге «Қызылорда облысының Үкіметтік емес ұйымдарының Альянсы Ассоциациясы» заңды тұлғалар бірлестігінің төрайымы Анар Ізден модераторлық етті.Модератор «27 ақпан – Дүниежүзілік үкіметтік емес ұйымдар күніне» орай өңірде 10 күндік іс-шаралар жоспары әзірленгенін атап өтіп, жоспар аясында облыс көлемінде мазмұнды кездесулер, пікір алмасу алаңдары және тәжірибе алмасу шаралары ұйымдастырылатынын жеткізді.Аталған жоспарға сәйкес, алдағы күндері аудандардағы үкіметтік емес ұйымдармен кездесулер өткізіліп, азаматтық сектор өкілдерінің ұсыныс-пікірлері жинақталып, өзекті мәселелерді бірлесе талқылауға басымдық берілетінін мәлімдеді.Іс-шара барысында облыстық қоғамдық даму басқармасының басшысы Руслан Мұхамедәліұлы аймақтағы үкіметтік емес ұйымдармен өзара іс-қимыл және ынтымақтастық аясында атқарылған жұмыстарға тоқталды.Кездесу барысында бірқатар ҮЕҰ жетекшілері басқарма басшыларына еркін форматта сұрақтарын қойып, тиісті жауаптарын алды.Кездесу аясында ҮЕҰ жетекшілері, ұрыс даласы оқиғаларының ардагерлеріне жергілікті атқарушы орган тарапынан қоғамдық көліктерде жеңілдікпен жүру, тұрғын-үй коммуналдық-шаруашылық шығыстарға жеңілдіктер қарастыру мәселесі көтерілді.Сондай-ақ, ұрыс даласы оқиғаларының ардагерлері жастарды әскери-патриоттық бағытта тәрбиелеу мақсатында білім беру ұйымдарындағы алағашқы әскери дайындық кабинеттерінің материалдық-техникалық базасын жаңарту мәселесін қолға алу туралы мәселе көтерді.

Қазақстан және Қызылорда облысының жаңалықтары: Қоғам