<a href="https://kyzylorda-news.kz/">Kyzylorda-news.kz</a>. Қызылордада 17 жасар қыз жоғалды. Қазіргі таңда тәртіп сақшылар іздеу жұмыстарын бастады, деп хабарлайды облыстық Полиция департаментінің баспасөз қызметі.
<blockquote>
 “4 тамыз күні кешкі уақыт 22.30 шамасында 17 жастағы Архабай Саламат Маратқызы белгісіз бағытқа қарай кетіп қайта оралмаған. Жасөспірім 3 топ мүгедегі”,- делінген хабарламада.
</blockquote>
Қазіргі таңда Қызылорда қалалық Полиция басқармасының жеке құрамы кәмелетке толмаған жасөспірімді іздеп табу мақсатында облыс орталығындағы көпқабатты үйлердің шатырларын, саяжайларды, тастанды үйлер мен құрылысы бітпеген ғимараттарды, ойын-сауық орталықтары мен жалдамалы пәтерлерді тексеруде. Оның фотосуреті көрсетіліп, сұрастыру жұмыстары жүргізілуде.
Бұл жұмыстар Полиция департаменті бастығының бақылауында.
Ерекше белгілері: бойы 140-150 см, шашы қызыл-қара. Киген киімдері: ақ футболка, джинсы шорты, кроссовка.
Жасөспірім қыз жөнінде қандай да бір ақпарат анықталған жағдайда Қызылорда қалалық Полиция басқармасының Кезекші бөлімі 29-75-20 телефонына немесе 102 арнасына шұғыл түрде хабарласуларыңызды сұраймыз.

Қызылордада 17 жасар қыз жоғалды

<a href="https://kyzylorda-news.kz/">Kyzylorda-news.kz</a>. Жаңақорған ауданның қазіргі таңда газдандыру үлесі 38,8 пайызды құрайды. Бұл туралы аудан әкімі Руслан Рүстем жыл басынан бері ауданда атқарылған жұмыстары мен алдағы міндеттері туралы баяндамасында хабарлады.
<blockquote>
 «Жаңақорған кентінде газ құбыры жүйелерінің ұзындығы 284,5 шақырым газ құбыры құрап, жүйеге 5&nbsp;700 тұрғын үй, 114 коммуналдық-тұрмыстық нысандар және 16 әлеуметтік-мәдени нысандар қосылған», – дейді Руслан Рүстемов.
</blockquote>
Сонымен қатар биыл аудандағы 12 елді мекенді табиғи газбен қамтамасыз ету үшін 108 млн. теңге бөлінді.

Жаңақорғанда 5700 тұрғын үй табиғи газға қосылды

<a href="https://kyzylorda-news.kz/">Kyzylorda-news.kz</a>.&nbsp;Қызылорда қалалық Полиция басқармасына 4 қала тұрғыны алаяқтың құрбаны болғанын айтып арызданды.
Олардың айтуынша, белгісіз біреу мамыр айында олардың&nbsp; сеніміне кіріп, «жұмысқа тұрғызамын» деп ақшаларын алдап алған. Күдікті жәбірленушілерден жұмыс ақысы үшін 2 млн 725 мың теңге қаражатын алған. Алайда, бүгінгі күнге дейін уәде етілген жұмыстары болмаған, не қаражаттарын кері қайтармаған.
Сол күні полицияға аудан тұрғынынан алаяққа алданып, осындай мазмұнда 800 мың теңгесін алып алдап кеткені туралы тағы да шағым түседі. Полицейлер зерделеу жұмыстарын жүргізе келе арызданушылар бір қала тұрғынына алданғаны мәлім болды.
Тәртіп сақшылары жедел іздестіру шаралары барысында 38 жастағы қала тұрғынын ұстады. Ол тұрғындардың әрқайсысынан&nbsp;500 мың-1 миллион теңге аралығында қаражат алған. Жалпы келтірілген шығын 3 млн 500 мың теңге.
Аталған дерек бойынша Қазақстан Республикасының Қылмыстық кодексінің 190 &nbsp;– бабының 3,4 – бөлігі (Алаяқтық) бойынша сотқа дейінгі тергеп-тексеру амалдары жүргізілуде. &nbsp;Қазіргі таңда күдікті азаматшаның басқа да &nbsp;деректерге қатыстылығы анықталуда.

Қызылордада 5 адамды алдаған алаяқ  әйел ұсталды

<a href="https://kyzylorda-news.kz/">Kyzylorda-news.kz</a>.&nbsp;Қызылорда облыстық жұқпалы аурулар ауруханасының материалдық базасы ағынды оттегі терапиясы аппаратының жаңа 10 данасымен толықты.
Бұл жолы жаңа аппараттарды «Петро Қазақстан Құмкөл Ресорсиз» компаниясы табыстауда. Бұл медициналық құрылғыларды Гонконг елінен алдыруға мекеме өз қаржысы есебінен 24,5 млн. теңге қаржы жұмсады.
Жаңа аппараттар коронавирус инфекциясымен күрес мақсатында облыстық денсаулық сақтау басқармасының сұранысына сәйкес жеткізілген. Қазіргі таңда «Ұлттық орталық кардиохирургия орталығы» АҚ мамандары аталған аппараттарды тыныс алу жеткіліксіздігі бар науқастарға қолдануды ұсынып отыр.
Айта кетейік, осыған дейін «Петро Қазақстан Құмкөл Ресорсиз» АҚ Қазалы ауданаралық ауруханасына оттегі станциясын орнатуға 58 миллион теңге бөлген болатын.

Қызылорда облыстық жұқпалы аурулар ауруханасына 10 дана оттегі аппараты сыйға тартылды

<a href="https://kyzylorda-news.kz/">Kyzylorda-news.kz</a>.&nbsp;Өңіріміздегі қуаңшылық қиындығын еңсеру мақсатында Жамбыл облысының ел-жұрты 13 вагон шөпті аралдық шаруаларға жөнелткен еді. Қиындықта қалған шаруаларға көмек ретінде жеткізілген мал азығы Арал қаласы, Сексеуіл кенті және Қамыстыбас ауылдарына жеткізіліп, тұрғындарға таратылуда.
Сонымен қатар жерлесіміз Болат Өтемұратов қорынан қомақты қаржының бөлінуі де аралдықтарға үлкен көмек болды. Бұл қаржы аймақтағы су ұңғымасын іске қосуға, жем-шөп қорын әзірлеуге, шөп бағасын тұрақтандыруға, басқа да жұмыстарға жұмсалады екен. Қай нәрсенің де есебі болатыны белгілі. Халықтың жағдайын жақсартуды назардан тыс қалдырмаған аталған қор өкілдері мен аудандық қоғамдық қор мүшелері қаржының мақсатты жұмсалуын қадағалауда.
Бақылау бар жерде қай іс те берекелі болары сөзсіз. Жан-жақтан келіп жатқан көмектің, осындай жанашыр жандардың қолдауының арқасында аралдықтар мал азығынан тапшылық көрмейді деген сенімдеміз.
Осындай қысылтаяң шақта жанашырлық танытып, көмек қолын созған жамбылдық бауырларға, осындай игілікті іске бастамашы болған ел азаматтарына Арал халқының алғысы шексіз.

Ақылбек Айтешов: Аралдықтардың алғысы шексіз

<a href="https://kyzylorda-news.kz/">Kyzylorda-news.kz</a>. Жыл басынан бері Төтенше жағдай департаментінің қызметкерлері су айдындарында және жағажайларда қайғылы оқиғаларды болдырмау мақсатында 955 рейдтік іс-шаралар жүргізді. Рейд барысында қауіпсіздік ережелерін бұзып, қоғамдық орында алкогольдік ішімдік ішкен 176 азаматқа әкімшілік шара қолданылған. Бұл туралы Өңірлік коммуникациялар қызметінің ақпарат алаңында өткен баспасөз конференциясында облыстық ТЖД бастығының орынбасары Саид Молдақараев мәлімдеді.
Дегенмен бұл рейдтік жұмыстар тұрғындарға тиым болмай тұр. Қауіпсіздік ережелерін ескермей, сақтыққа селқос қарап белгіленбеген әрі зерттелмеген жерлерден суға түсу, масаң күйде шомылу деректері көп. Ағымдағы жылы аймақтағы су айдындарында тіркелген 35 қайғылы оқиғаның негізгі себептерін аталған жайттар құрап отыр. Ал балаларды қараусыз қалдыру салдарынан 21 жасөспірім суға кеткен.
<blockquote>
 «Өкінішке орай суға кету дерегі бойынша республикада Қызылорда облысы алдыңғы қатарда тұр. Су айдындарында және жағажайларда күндізгі 14:00 ден түнгі 22:00-ге дейін арнайы қызметкерлер бақылау жасауда. Қосымша үн парақтар таратып, түсіндірме жұмыстары жүргізілуде. Суға шомылу маусымында төтенше жағдайлардың алдын алу жұмыстары алдағы уақытта өз жалғасын табады», – деді облыстық ТЖД бастығының орынбасары Саид Молдақараев.
</blockquote>

Қызылордада жыл басынан бері 21 жасөспірім суға кеткен

<a href="https://kyzylorda-news.kz/">Kyzylorda-news.kz</a>. Жаңақорған ауданында 35 елді мекеннің барлығы ауыз сумен қамтылған. Бұл туралы аудан әкімі Руслан Рүстемов мәлімдеді.
«Ақбұлақ» бағдарламасымен бастау алып «Нұрлы жол» бағдарламасымен жалғасын тауып, құрылысы жүргізіліп жатқан «Сырдария топтық су құбыры мен Талап топтық су құбырының&nbsp; құрылысы» жобасында Сырдария өзенінің шығыс беткейіндегі 12 елді мекеннің 19381 халқын және Сырдария өзенінің батыс беткейіндегі 15 елді мекеннің 23564 халқын таза ауыз сумен қамту қарастырылған. Бұл жұмыстар жоспар бойынша биылғы жылдың соңына дейін толық аяқталуы тиіс.
<blockquote>
 «Ауыл- Ел бесігі» арнайы жобасы аясында Жаңақорған кентінің тұрғын үйлеріне су құбырын жеткізу сервистік желісін салу&nbsp;жұмыстарын аяқтауға ҚР Ұлттық қорынан&nbsp;214 млн. 885 мың теңге бөлініп, тиісті жұмыстар жүргізілуде. Биылғы жылы аяқталады. Сонымен бірге осы жылы республикалық бюджеттен Төменарық, Сунақата, Екпінді елді мекендеріндегі сумен жабдықтау желісін қайта құру және кеңейту&nbsp; жұмыстарына 808 млн. 334 мың теңге қаржы бөлініп, мемлекеттік сатып алу шаралары жүргізілуде. Құрылыс биылғы жылы аяқтау жоспарланған», – дейді аудан әкімі.
</blockquote>
Сонымен қатар, Қожамберді, Сүттіқұдық, Жайылма елді мекендерін сумен жабдықтау желісін қайта құру және кеңейту&nbsp;жұмыстарына жоба-сметалық құжаттарын әзірлеп, мемлекеттік сараптамадан өткізуге 16 млн. 906 мың теңге қаржы бөлініп, жоба сметалық құжаттар әзірленуде. Осы жобалар іске асқан уақытта Жаңақорған ауданында орталықтандырылған ауыз су жүйесімен қамтылған тұрғындар үлесі 91,4 пайыздан 100 пайызға жеткізіледі.

Жаңақорғанның 35 елді мекені ауыз сумен қамтылды

<a href="https://kyzylorda-news.kz/">Kyzylorda-news.kz</a>. Токио олимпиадасында еркін күрестен 57 келіге дейінгі салмақ дәрежесінде қазақстандық Нұрислам Санаев қола медаль иеленді.
Кеше финал жолдамасы үшін таласта үндістандық Рави Кумарға жол берген Санаев жұбаныш белдесуіне шыққан.&nbsp;Ол кіші финалда болгариялық Георгий Вангеловті 5:1 есебімен ұтты. Қазақстандық балуан жартылай финалда Үндістан балуаны Рави Кумарға есе жіберген еді. Қола медаль үшін күресте Санаев намысты қолдан бермеді.
Айта кетейік, бұл қазақстандық балуандардың Токиодағы алғашқы медалі.

Токио-2020: Нұрислам Санаев еркін күрестен «қола» жеңіп алды

<a href="https://kyzylorda-news.kz/">Kyzylorda-news.kz</a>. Қызылорда облысы биылғы жылдың 6 айында өңдеу өнеркәсібі саласында 79,8 млрд. теңгенің өнімі өндірілген. Өткен жылдың есептік мерзімінде бұл көрсеткіш 69 млрд. теңгеге тең болды. Яғни биыл салада 14,6 пайызға өсім бар. Бұл туралы бүгін Өңірлік коммуникациялар қызметінде өткен баспасөз конференциясында облыстық индустриялық-инновациялық даму басқармасының басшысы Ринат Сұлтангереев мәлімдеді.
Жарты жылдықты қорытындылаған Ринат Қалдыбекұлы алдымен облыстағы индустрияландыру бағдарламасының ІІІ-ші бесжылдығы аясында жоспарға енген жобаларға тоқталды. Айтуынша аймақта жалпы құны 543 млрд. теңгені құрайтын 41 жобаны жүзеге асыру бағытында жұмыстар атқарылуда. Бұл жобалар іске қосылғанда 7 мыңнан аса жаңа жұмыс орны қалыптаспақ. Аталған жобалардың алғашқы легі өткен жылы өз жұмысын бастаған. 1,9 млрд.теңгені құрайтын 5 жобаның іске қосылуы нәтижесінде 188 қызылордалық жұмыспен қамтылған.
Ал индустрияландыру бағдарламасының бірінші және екінші бесжылдықтары аясында өңірде құны 150 млрд. теңгені құрайтын 26 жоба жүзеге асқан. Сол арқылы 1 мың 700 жұмыс орны ашылған болатын. Іске қосылған жобалар осы жылдың 6 айында 22,5 млрд. теңгенің өнімін өндіріп, цемент, тұз, балық, пропан-бутан, аммоний метаванадаты сынды 5 түрлі өнімді 12 елге экспорттаған.
Брифингте шыны зауытының құрылысы да сөз болды. Бүгінде зауыт құрылысы 85%-ға, монтаждау жұмыстары – 37%-ға орындалған. Зауытты іске қосу мерзімі 2021 жылдың II жартыжылдығына жоспарлануда.
<blockquote>
 «Біз өз тарапымыздан – зауыт үшін инженерлік инфрақұрылым тарту бойынша барлық жұмыстарды орындадық. Енді қалғаны – балқыту ваннасы мен күйдіру пешінің жабдығын монтаждау. Бұл жұмыстарды орындау елімізде жоқ, жоғары білікті мамандарды қажет етеді. Карантиндік шараларға байланысты жабдықтау монтаждау бойынша мамандар елге келе алмады. Дегенмен, Үкіметтің арнайы комиссиясының рұқсатымен осы жылдың сәуір айынан бастап шетел мамандары зауытқа келіп, пештің өру жұмыстарын бастады. Шыны зауытының іске қосылуымен біз кем дегенде 8 ілеспе өндіріс құруды көздеп отырмыз. Инвесторлармен бірлесіп шыны зауытының айналасында 2 жобаны іске асыру бойынша жұмыстар басталды. Барлық ілеспе өндірістердің айналасында жаңа кәсіптерді игере отырып, шамамен 400 жұмыс орны ашылмақ. Одан басқа жобалар да жоспарға сәйкес іске қосылатын болады», – деді Ринат Сұлтангереев.
</blockquote>
<img src="https://kyzylorda-news.kz/wp-content/uploads/2021/08/230371703_1344403259288516_8350536567217847179_n.jpg" alt="" />

Қызылордада өңдеу өнеркәсібі саласында өсім бар

<a href="https://kyzylorda-news.kz/">Kyzylorda-news.kz</a>. Қызылорда облысы Кәсіпкерлер палатасының кеңесшілері жыл басынан бері 5573 кеңес берген. Бұл туралы Қызылорда облысы кәсіпкерлер палатасының директоры Ғалымбек Жақсылықов айтты.
Осы жылдың 7 айында Кәсіпкерлер палатасының кеңесшілері 2875 облыс тұрғынына кәсіпкерлік саласына қатысты 5573 кеңес беріп, 465 кәсіпкерге 486 қызмет көрсеткен.
<blockquote>
 «Кәсіпкерлер палатасы 2015 жылдан бастап кәсіпкерлікпен айналысқысы келетін азаматтар үшін тегін кеңес беріп, сервистік қызметтерді көрсетіп келеді. Егер кәсіптеріңіз болса немесе өз істеріңізді ашуды жоспарлап отырсаңыздар, Палата мамандары мемлекеттік қолдау шаралары туралы айтып, қажет болған жағдайда мемлекеттік органдарға өтініштеріңізді жолдайды. Ақпараттық-сараптамалық қолдауға ие болу үшін g4b.kz. сайтына кіріңіздер. Порталдан сіздер қажет деректердің бәрін табасыздар, әрі маман кеңесіне де жүгіне аласыздар», – дейді Палата директоры.
</blockquote>
Мұнан өзге, бизнесі бар азаматтар төмендегідей сервистік қызметтерді де тегін ала алады:
– бухгалтерлік және салық есебін жүргізу, статистикалық есеп жасау;
– маркетинг;
– интернет-маркетинг;
– заң қызметтері;
– кедендік рәсімдер;
– мемлекеттік сатып алу, ұлттық компаниялар мен жер қойнауын пайдаланушылардың сатып алулары;
– отандық өндірушілердің өнімдерін өткізу;
– ақпараттық технологиялар.
Жалпы жоғарыдағы қызметтер мен кеңестерге қатысты сауалдар туындаған жағдайда Қызылорда қаласы, Қорқыт ата 123 мекен-жайындағы «Бизнеске арналған Үкімет» ғимаратында орналасқан Қызылорда облысы кәсіпкерлер палатасына келіп офлайн немесе 1432 жедел желі арқылы да байланысуға болады. Ал аудан, ауылдық елді мекен тұрғындары Кәсіпкерлер палатасының аудандық филиалдарына жүгіне алады.

Қызылорда: Кәсіпкерлер палатасы кеңесшілері 7 айда 5573 кеңес берген

<a href="https://kyzylorda-news.kz/">Kyzylorda-news.kz</a>. Токио Олимпиадасында қызылордалық Мөлдір Жаңбырбай каратэ-додан жартылай финалға шыға алмады
Алғашқы кездесуде мысырлық қарсыласын жеңген спортшы, екінші кездесуде аустралиялық Беттина Планкадан жеңілді. Ал үшінші кездесуде ол қарсыласымен 4-4 есебімен тең түскен болатын.
Төртінші кездесуінде Мөлдір Жаңбырбай жапониялық Михо Мияхарамен шеберлік байқасып, жекпе-жекте қарсыласынан 2:11 есебімен жеңілді.

Мөлдір Жаңбырбай жартылай финалға шыға алмады

<a href="https://kyzylorda-news.kz/">Kyzylorda-news.kz</a>. Биыл Қызылорда облысында мал шаруашылығы өнімдерінің өнімділігін, сапасын арттырып, асыл тұқымды мал шаруашылығын дамыту көзделуде. Несие алып не болмаса өз қаржысына асыл тұқымды мал сатып алған кәсіпкерлерге мемлекет тарапынан субсидия беріледі. Бұл мақсатта республикалық бюджеттен 2,5 млрд. теңге бөлінді. Қазіргі таңда 1 мың 179 шаруашылықтың өтінішіне сәйкес 1,6 млрд. төленді. Бұл туралы Өңірілік коммуникациялар қызметінде өткен баспасөз конференциясында облыстық ауыл шаруашылығы басқармасының басшысы Талғат Дүйсебаев мәлімдеді.
Мәселен, шетелден сатып алынған 1 бас ірі қараға 225 мың, отандық ірі қараның әр басына 150 мың теңгеден төленеді. Ал қой өсіруді қолға алған кәсіпкерлерге 1 қой үшін 15 теңгеден субсидия төлеу қарастырылған.
<blockquote>
 «Бұдан бірнеше жыл бұрын 200-300 ғана мал шаруашылықтары субсидия алуға ниет білдірсе, өткен жылы 1223 шаруашылыққа субсидия төленген. Бұл мемлекет тарапынан қолдау және шаруалар үшін қолжетімді мүмкіндік. 2019 жылдан бастап субсидиялаудың ақпараттық жүйесі арқылы электронды форматта тапсырыстар қабылданады. Негізгі мақсат сыбайлас жемқорлықтың жолын кесу. Бұндай жағдайда қызмет көрсетуші мен қызмет алушының арасында қарым қатынас болмайды», – деді Т. Дүйсебаев.
</blockquote>
Сонымен қатар, былтыр біраз шаруашылық басшылықтары жем-шөпке байланысты наразылығын білдірген болатын. Осыған орай, ауыл шаруашылығы Министрлігі шілде айында қаулы шығарды. Өткен жылдан қалып қойған 318 шаруашылыққа 376 млн. төленетін болды. Бүгінде құжаттары реттелуде.
Айта кету керек, облыста табиғи шөпті ору науқаны толықтай басталып кетті. Ол үшін барлық аудандарда штабтар құрылып, шабындықтардың көлемі айқындалды. Облыс бойынша қысқа түсетін малдарға қажетті 770 мың тонна шөптің 393 тоннасы дайындалып, барлық қажеттіліктің 51 % қамтып отыр.
Сондай-ақ, өңірде мал азығы бағасының қымбаттауына және оған деген қолжетімділігін арттырып, мал азығын алуға жұмсаған шығындарын ішінара арзандату үшін субсидиялауға республикалық бюджет резервінен 1,7 млрд. теңге бөлінді. Бүгінгі күні облыс әкімдігінің қаулы жобасы дайындалуда. Малдарға қажетті құрама жемдердің жетіспейтін көлемін солтүстік облыстардан сатып алу мақсатында ҚР АШМ-нің келісімі бойынша «Азық-түлік келісім шарт»ҰК» АҚ-мы арқылы жеңілдетілген бағада 7,4 мың тонна жем сатып алуға тапсырыс берілді.

Қазақстан және Қызылорда облысының жаңалықтары: Қоғам