<a href="https://kyzylorda-news.kz/">Kyzylorda-news.kz</a>. Жалағаш ауданында «Қарасора-2021» жедел профилактикалық іс-шарасы барысында 20 шілде күні өз үйінің ауласында 15 түп сора өсірген аудан тұрғыны ұсталды.
Полиция қызметкерлері оқиға орнынан сора және оны баптап өсіруге арналған құрал-саймандарды айғақ зат ретінде тәркіледі.&nbsp;&nbsp;
<blockquote>
 «Бұл дерек бойынша Қазақстан Республикасының Қылмыстық кодексінің 300-бабының 1-бөлігімен сотқа дейінгі тергеп-тексеру амалдары&nbsp; басталды. Оқиғаның мән-жайы анықталуда», – делінген полиция департаментінің хабарламасында.
</blockquote>

Есірткі өсірген Жалағаш ауданының тұрғыны ұсталды

<a href="https://kyzylorda-news.kz/">Kyzylorda-news.kz</a>. Биыл Жалағаш ауданында өнеркәсіп өнімі 5 млрд. теңгеге өндіріліп, өткен жылмен салыстырғанда 1,9 есеге өсті. Ал, өңдеу өнеркәсібі 3,9 млрд. теңгеге орындалып, 2,2 есеге артты. Бұл туралы бүгін Өңірлік коммуникациялар қызметінде өткен баспасөз конференциясында Жалағаш ауданының әкімі Асылбек Шәменов мәлімдеді.
<blockquote>
 «Қазіргі таңда аудан тұрғындары мемлекеттік бағдарламалар арқылы шағын және орта кәсіпкерлікті бастауға және дамытуға белсенділік танытуда. Ағымдағы жылдың басынан бері аудан бойынша 126 жоба 1 млрд. 557,8 млн. теңгеге қаржыландырылып, 171 адам жұмыспен қамтылды. Атап айтсақ, «Бизнестің жол картасы 2025» бағдарламасы аясында екінші деңгейлі банктердің облыстық филиалдары арқылы 21 жоба 253,4 млн. теңгеге қаржыландырылып, пайыздық мөлшерлемесі бағдарламаның шартына сәйкес субсидияланды. Оның ішінде 11 жоба 99,4 млн. теңгеге ішінара кепілдендірілді. «Еңбек» бағдарламасы аясында жыл басынан 36 жоба 146,7 млн. теңгеге қаржыландырылды. «Ауыл шаруашылығын қаржылай қолдау қоры» АҚ-ның облыстық филиалының жеке қаражаты есебінен 3 жоба 47,6 млн. теңгеге қаржыландырылды. Сондай-ақ, «Агробизнес» бағдарламасы аясында «Ауыл» несие серіктестігі арқылы 25 жоба, «Сырдария-1» несие серіктестігі арқылы 12 жоба қолдау тапты. «Қарапайым заттар экономикасы» бағдарламасы аясында 3 жоба егін егу жұмыстарын жүргізуге бағытталды», – деді Асылбек Өмірбекұлы.
</blockquote>
Жыл басынан бері ауданнан 3568,5 тонна күріш өнімі экспортқа шығарылды. Биылғы су тапшылығына орай, күріш көлемі өткен жылмен салыстырғанда 1800 га қысқартылды. Сыр маржанының орнына суды аз қажет ететін 93 га жаздық бидай, 147 гектар жүгері, 30 гектар арпа, 443 га мақсары, 445 га жаңа жоңышқа мал азықтық дақылдар орналастырылды.
Қазіргі уақытта шаруашылық құрылымдары егілген егінді сумен қамтамасыз ету үшін 53 дана әр түрлі қуаттағы су тартқыш насос қондырғыларын іске қосып, күрішті суға бастыру бағытында жұмыстарын жалғасытруда.

Жалағашта биыл 126 жоба қаржыландырылды

<a href="https://kyzylorda-news.kz/">Kyzylorda-news.kz</a>. Облыстық медициналық жедел жәрдем стансасына шілде айында 46 000 қоңырау келіп түсті. Яғни, орта есеппен мамандар тәулігіне 1500-ге жуық науқасқа алғашқы көмек көрсеткен. Бұл өткен жылдың мамыр-маусым айларымен салыстырғанда 8 мың шақырысқа көбейген. Бұл туралы облыстық медициналық жедел жәрдем стансасы бас дәрігерінің орынбасары Ғалия Нұрсейітова мәлімдеді.
<blockquote>
 «Коронавирус инфекциясының тарауы жиілеген тұста, жедел жәрдем қызметі өз жүктемесінен екі есе шақырыстарды қабылдап, орындап келеді. Жедел жәрдем стансасына түскен шақыртулардың күрт өсуін ауа райы температурасының жоғарылығымен және «Covid-19» инфекциясы мен жоғары тыныс жолы ауруларының артқандығымен байланыстырудамыз. Өткен аймен салыстырғанда жоғары тыныс жолы аурулары – 34%-ға, пневмония – 56,2%-ға, жедел респираторлы вирусты инфекция – 37,5%-ға, «Covid-19» инфекциясы – 52%-ға өсті», -деді Ғалия Нұрсейітова.
</blockquote>
Одан бөлек салқын тағамдар мен сусындардың көп пайдаланылуы әсерінен дене температурасының жоғарылауы, тонзилит, фарингит, трахеит диагноздарымен түскен науқастар саны өсті.
Соңғы уақытта пневмония, коронавирус инфекциясымен түскен шақырыстардың 10%-ын балалар құрап отыр. Мысалы, ағымдағы айда «Covid-19» инфекциясымен – 480 шақырыс орындалса, оның 47-сін балалар, пневмония диагнозымен 1296 шақырыс орындалып, 133-ін балалар құрап отыр.
<img src="https://kyzylorda-news.kz/wp-content/uploads/2021/07/225635694_1338416046553904_6973641181851646630_n.jpg" alt="" />

Жедел жәрдем стансасына шілде айында 46 000 қоңырау түсті

<a href="https://kyzylorda-news.kz/">Kyzylorda-news.kz</a>. Бүгінгі таңда әлем халықтары, оның ішінде біздің елімізде коронавируспен күрес жұмыстарын жалғастыруда. «Covid-19» вирустық инфекция қатарына жатады. Яғни, ауру ауа арқылы тарап, азаматтарға ауа арқылы жұғады.
Сондай-ақ, қазіргі таңда түрлі штамдар шығып жатыр. Яғни вирустың таралуы мен түрленуі күннен күнге күрделеніп барады. Әрине бұл ретте баршамыздың бойымызды қорқыныш билейтіні рас. Дегенмен әрбір аурудың емі де болатыны секілді, коронавирус инфекциясының да емі, яғни жояр жолы табылды. Ол – вакцина.
Өткен жылдан бері шетелдік және отандық ғалымдар бұл дертпен күресу үшін вакцина жасау жолында көп тер төкті. Ендігі кезекте, әрбір азамат екпе жұмыстарына жауапкершілікпен қарап, вакцина қабылдаса, бұрынғы күндеріміз қайта келер еді.
Сол себепті вакцина салдырып, ұжымдық иммунитет қалыптастыруға асығайық.
Шолпан Арғынбаева,
«Сенім» емханасы директорының пациенттерді қолдау және ішкі аудит қызметі бойынша орынбасары

Шолпан Арғынбаева: Вирустың таралуы  күннен күнге күрделеніп барады

<a href="https://kyzylorda-news.kz/">Kyzylorda-news.kz</a>. Қызылорда аймағы Конго-Қырым геморрагиялық қызбасының табиғи ошағында орналасқан. Өңірдегі 113 елді мекен қолайсыз аймаққа енген. Жыл басынан бері 288 тұрғын кене шағу бойынша медициналық көмекке жүгінген. Күдікті деп 18 жағдай есепке алынса, оның 11 жағдайы нақтыланды. Бұл туралы бүгін Өңірлік коммуникациялар қызметінде өткен баспасөз конференциясында облыстық санитариялық-эпидемиологиялық бақылау департаменті басшысының орынбасары Әлия Әбдіқайымова мәлімдеді.
Эпидмаусымның басталуына орай қолайсыз елді мекендерде аса қауіпті жұқпалы ауруға қарсы энтомолог мамандардан тұратын 3 арнайы жұмысшы топ зоологиялық барлау жұмыстарын жүргізді. Эпидемиологиялық жағдай әлі де тұрақсыз. Қызылорда қаласы, Қармақшы, Сырдария, Шиелі аудандары бойынша ошақтар белсенділігінің артуы байқалуда.
<blockquote>
 «Осы жылы 288 тұрғын кене шағу бойынша медициналық көмекке жүгінген, бұл былтырғы жылдың осы мерзімімен салыстырғанда 30 жағдайға көбейген. Конго-Қырым геморрагиялық қызбасының 11 фактісі тіркелді. Атап айтқанда, Қармакшыда – 1, Сырдария, Шиелі аудандарында-3 жағдайдан және Қызылорда қаласында 4 дерек», – деді Әлия Мүтәліпқызы.
</blockquote>
Айта кету керек, бүгінде облыстағы медициналық мекемелерде КҚГҚ-мен ауыратын науқастарды емдеу үшін вирусқа қарсы препараттар, иммундалған плазма және т.б. қажетті құрал-жабдықтар қоры жеткілікті.
Дегенмен, эпидмаусымның басталғанына қарамастан тұрғындар мал шаруашылығымен айналысқанда сақтық шараларына мән бермейді, кене шағу жағдайында дер кезінде меициналық көмекке жүгінбеу салдары аса ауыр жағдайға соқтыруы мүмкін. Әр адам өз денсаулығына барынша мұқият болуы тиіс.

Қызылордада 18 кене шағу фактісі тіркелді

<a href="https://kyzylorda-news.kz/">Kyzylorda-news.kz</a>. Ішкі істер министрлігінің бірқатар өкілеттігі еңбек және денсаулық сақтау министрліктеріне беріліп, олар қайта ұйымдастырылды.&nbsp;
Мемлекеттік басқару жүйесін одан әрі жетілдіру жөніндегі шаралар туралы жарлыққа Қазақстан президенті Қасым-Жомарт Тоқаев&nbsp;<a href="https://adilet.zan.kz/kaz/docs/U2100000622">қол қойды.</a>
Құжатқа сәйкес, ішкі істер министрлігінің халықтың көші-қоны саласындағы, сондай-ақ босқындар мәселелері жөніндегі функциялары мен өкілеттіктері 2022 жылғы 1 қаңтардан бастап еңбек және халықты әлеуметтік қорғау министрлігіне беріледі.
Бұл ретте заңсыз көшіп келудің жолын кесу, заңсыз көшіп келушілердің реадмиссиясы, Қазақстаннан кетуге және Қазақстанға келуге визалар беру, халықты және азаматтықты құжаттандыру жөніндегі функциялар мен өкілеттіктер сол күйі ішкі істер министрлігінде қалады.
Сондай-ақ ішкі істер министрлігінің медициналық қамтамасыз ету саласындағы мемлекеттік саясатты үйлестіру жөніндегі функциялары мен өкілеттіктері денсаулық сақтау министрлігіне өтті.
Атап айтқанда:
2022 жылдың 1 шілдесінен бастап қылмыстық-атқару жүйесінің тергеу изоляторларында ұсталатын адамдарға қатысты;
2023 жылдың 1 қаңтардан бастап қылмыстық-атқару жүйесінің мекемелерінде ұсталатын адамдарға қатысты.
Президент үкіметке қайта ұйымдастырылатын мемлекеттік органдар мен оларға бағынысты ұйымдар арасында штат санын қайта бөлуді тапсырды.
Жарлық қол қойылған күнінен бастап қолданысқа енгізіледі.
Бұған дейін ІІМ қылмыстық-атқару жүйесіндегі медициналық қамтамасыз ету денсаулық сақтау министрлігінің қарамағына берілетінін хабарлады.
Министрліктің мәлімдеуінше, бұл өзгеріс зерттеудің, диагностиканың және емдеудің қазіргі заманғы әдістеріне кеңінен қол жеткізуіне мүмкіндік береді. Сондай-ақ медицина қызметкерлері мекеменің әкімшілігіне тәуелді болмайды. Бұл заңсыз әрекеттерді жасыруға жол бермейді.

Қазақстанда екі министрлік қайта құрылды

<a href="https://kyzylorda-news.kz/">Kyzylorda-news.kz</a>. Қазақтың тұңғыш ғарышкері, ұшқыш,&nbsp;Кеңес Одағының Батыры, Қазақстан Республикасының&nbsp;Халық қаһарманы Тоқтар Әубәкіров 75 жасқа толды.
1991 жылдың 2 қазанында Байқоңыр ғарыш айлағынан тұңғыш қазақ ғарышкері Тоқтар Әубәкіров космосқа ұшты. Бұл Қазақстанның ғарышқа тұңғыш сапары.&nbsp;Дәл осы күні Президент&nbsp;Нұрсұлтан Назарбаев&nbsp;«Байқоңыр» ғарыш айлағында тұрып, республиканың Ұлттық аэроғарыш Агентігінің құрылғанын жариялаған еді.&nbsp;Бүгін ұлт батыры мерейлі жетпіс бес жасқа толып отыр.
Тоқтар Оңғарбайұлы Әубәкіров&nbsp;1946 жылы 27 шілдеде&nbsp;Қарағанды облысы,&nbsp;Қарқаралы ауданында дүниеге келген.

Қазақтың тұңғыш ғарышкері Тоқтар Әубәкіров 75 жасқа толды

<a href="https://kyzylorda-news.kz/">Kyzylorda-news.kz</a>. 2021 жылдың тамыз айында Қазақстан тұрғындары 10 күн демалады.
30 тамызда атап өтілетін Конституция күні дүйсенбіге келіп тұрғандықтан, бес күндік жұмыс аптасында жұмыс істейтін қазақстандықтар қатарынан үш күн — 28, 29 және 30 күндері демалады.

Қазақстандықтар тамызда неше күн демалады

<a href="https://kyzylorda-news.kz/">Kyzylorda-news.kz</a>. Ауыр атлетика бойынша әлемнің төрт дүркін чемпионы Илья Ильин Зульфия Чиншанлоның Токиодағы Олимпиадада&nbsp;қола медальді&nbsp;иеленуіне қатысты пікірін айтты. Сөзінше, қазылар алқасы сайыста әділдік танытпаған.&nbsp;
<blockquote>
 “Зульфияның үш мәрте көтерген зіл темірін әділқазылар санамай кетті. Оны қатты басып тастады. Бәлкім, Зульфияның үлкен спортқа оралғанын жақтырмағандар бар болса керек. Бұл –&nbsp;өте жиіркенішті. 123 келі көтергенін есептемей кетті. Тағы бір рет көтерді, басында санады да, кейіннен бұл шешімдерінен айнып қалды. Екінші рет күші жетпеді, жарайды. Бірақ үшінші рет көтеруін қайта ескермей&nbsp;кетті”, –&nbsp;деп жазады Илья Ильин.
</blockquote>
Айтуынша, әділқазылар Чиншанлоның&nbsp;бұған дейін допинг дауына ілінгендіктен қысым көрсетуі мүмкін.&nbsp;
“Егер 93-ті көтерсе, 95-ті де бағындырар еді”, –&nbsp;дейді Ильин.&nbsp;
Алайда қазылар оның бірінші мәрте зіл көтеруін есептмегендіктен, ол қайта осы салмақты иықтауына тура келген.&nbsp;
Айта кетсек, Зүлфия Чиншанло 123 келі зілтемір көтеріп,&nbsp;Қазақстанның қоржынына қола&nbsp;медаль әкелді. Оның филиппиндік және қытайлық қарсыластары салмағы 127 және 126 кг зілтемір&nbsp;көтеріп, қазақстандық спортшы қызды&nbsp;басып озды.&nbsp;
<a href="https://stan.kz/">Stan.kz</a>

Илья Ильин қазылар Чиншанлоны әділ бағаламағанын айтты

<a href="https://kyzylorda-news.kz/">Kyzylorda-news.kz</a>. Қызылорданың 40 ауылдық округінде ауыл әкімдерінің сайлауы өтті. Оған 122 үміткер қатысты. Бұл туралы Өңірлік коммуникациялар қызметінде өткен баспасөз конференциясында облыстық сайлау комиссиясының төрағасы Ғалым Баймырзаев мәлімдеді.
<blockquote>
 «Еліміздің тарихында алғаш рет өткізілген ауыл әкімдерінің сайлауына 122 кандидат тіркелді. Олардың 47-і саяси партиялардан ұсынылғандар: «Nur Otan» партиясынан – 32, «Ауыл» ХДСП – 4,«Ақ Жол» ҚДП – 4, «АDAL» саяси партиясынан – 3, ҚХП – 4, өзін-өзі ұсынған – 75 кандидат. Шиелі ауданындағы Ортақшыл және Жуантөбе ауылдық округтеріндегі сайлауға тек өзін-өзі ұсынған үміткерлер қатысты. Облыс бойынша ең көп кандидат Жаңақорған ауданының Кейден ауылдық округінде тіркелген – 6 кандидат», – деді Ғалым Қонақбайұлы.
 «Сайланған 40 әкімнің 10 мемлекеттік қызметші, 22 – сол ауылдық округтің қызмет атқарып жүрген әкімдері, 5 – бюджеттік сала қызметкерлері, 3 – уақытша жұмыссыз азаматтар, 1-і әйел. Ауылдық округ әкімдерінің сайлауларын жарамсыз деп тануға немесе қайта сайлау өткізуге негіз болған жоқ. Барлық сайлау учаскелерінде заң талаптары толықтай сақталды», – деді облыстық сайлау комиссиясы төрағасының орынбасары Болат Накипов.
</blockquote>
Айта кетейік, жаңадан сайланған әкімдердің орташа жасы 46,7 құрайды, ең жасы – 27 жаста. Ал сайлаушылардың ең көп дауысын жинағаны Сұлтанов Мейрбек Арал ауданы, Бекбауыл ауылдық округінен сайлауға түскен.
Сайланған әкімдердің 35-і саяси партиялардан. Яғни, олардың қатарында «Nur Otan», «Ауыл», «ADAL», «ҚХП» партиялары бар.Сонымен қатар, өзін өзі ұсынған 5 азамат жоғарғы нәтиже жинап, ауыл әкімі атанды.

Қызылордада ауыл әкімдері сайлауының нәтижесі жарияланды

<a href="https://kyzylorda-news.kz/">Kyzylorda-news.kz</a>.&nbsp;Қазақстанда өткен тәулікте 2625 адам коронавирустан жазылып шықты, деп хабарлайды &nbsp;<a href="https://www.coronavirus2020.kz/kz/kazakstanda-otken-taulikte-2625-adam-koronavirus-indetinen-emdelip-shykty_a3816669">coronavirus2020.kz</a>.
Аймақтар бойынша:
Нұр-Сұлтан қаласы – 423,
Алматы қаласы – 631,
Шымкент қаласы – 141,
Ақмола облысы – 140,
Алматы облысы – 68,
Атырау облысы – 60,
Шығыс Қазақстан облысы – 45,
Жамбыл облысы – 148,
Батыс Қазақстан облысы – 70,
Қарағанды облысы – 249,
Қостанай облысы – 190,
Қызылорда облысы – 17,
Маңғыстау облысы – 177,
Павлодар облысы – 182,
Түркістан облысы – 84.
Қазақстан бойынша жазылғандар саны – 452002.

COVID-19: Өткен тәулікте 17 қызылордалық жазылып шықты

<a href="https://kyzylorda-news.kz/">Kyzylorda-news.kz</a>. Қазгидромет 27 шілдеге арналған ауа райы болжамын жариялады.
Антициклон әсерінен Қазақстан аумағының басым бөлігінде жауын-шашынсыз ауа райы күтіледі. Тек еліміздің солтүстік-батыс, оңтүстік-батыс және шығысында атмосфералық ағындардың өтуімен жаңбыр жауады, найзағай, шығыста бұршақ және дауыл тұруы ықтимал.
Республика бойынша кей жерлерде желдің күшеюі, оңтүстік және оңтүстік-батыста шаңды дауыл, солтүстікте және орталықта түнде және таңертең тұман күтіледі.
Қызылорда облысының басым бөлігінде жоғары өрт қаупі бар.

Қазақстан және Қызылорда облысының жаңалықтары: Қоғам