<a href="https://kyzylorda-news.kz/ru/obshestvo/">Kyzylorda-news.kz</a>. Биылғы жылы 750-ге жуық Сыр елінің азаматтары Отан алдындағы борышын өтеуге аттанады. Қазіргі таңда ҚР Қарулы күштері қатарына 145 азамат әскерге жолданды. Бұл туралы Өңірлік коммуникациялар қызметінде өткен баспасөз конференциясында Қызылорда облысының Қорғаныс істері жөніндегі департаментінің бастығы Айдын Сағынбеков мәлімдеді.
<blockquote>
 «Биыл шекара қызметіне 100-ге жуық азамат мерзімді әскери қызметке жолданды. Ал ҚР Ұлттық ұлан қызметіне 300 сарбаз аттанбақшы. Азаматтарды жөнелту жұмыстары барлық санитарлық талаптарға сәйкес жүргізілуде. Қалалық және аудандық шақыру пунктеріне санитарлық посттар қойылды. Сондай-ақ, облыс әкімінің қаулысы негізінде облыстық жиын пунктінде қоғамдық тәртіпті сақтау бойынша полиция патрулі және жол патрульдік полиция қызметкерлері қамтылды. Әскери бөлімдерге елімізді қорғауға қабілетті, денсаулығы мықты азаматтар жөнелтілетін болады», – деді Айдын Сағынбеков.
 «Қала және аудан әкімдерінің қаулыларына сәйкес медициналық комиссияларда тәжірибелі дәрігерлер қызмет етеді. Бүгінде азаматтарды әскерге жөнелту жұмыстары тиісті кестеге сәйкес өткізілуде. Сонымен қатар, әскер қатарына шақыру мәселелері бұқаралық ақпарат құралдарына жариялануда», – деді мерзімді әскери қызметке шақыру бөлімінің бастығы Нұржан Мелдебеков.
</blockquote>

Қызылордада биыл 750-ге жуық азамат әскерге аттанады

<a href="https://kyzylorda-news.kz/ru/obshestvo/">Kyzylorda-news.kz</a>. Биыл Қызылорда облысында 10 білім беру мекемесі ашылды. Оның ішінде мемлекеттік 4 мектеп пен жеке меншікке қарасты 6 мектеп оқушыларға білім беруде. Жалпы қала мектептерінің барлығы толықтай бейнебақылау және дабыл қағу жүйелеріне қосылған. Алдағы уақытта аудан орталықтарындағы білім ордалары қамтылмақ. Бұл жөнінде Өңірлік коммуникациялар қызметінде өткен баспасөз конференциясында облыстық білім басқармасының басшысы Ақзира Қасымова хабарлады.
<blockquote>
 «ҚР Білім және ғылым министрлігі тарапынан балалардың қауіпсіздігін қамтамасыз ету жөнінде 2021-2022 жылдарға арналған жол картасы әзірленді. Аталған жол картасында білім беру мекемелерінің күзет ұйымы лицензияланған қолданыстағы стандарттарға сәйкес қауіпсіздік құралдарымен қамту көзделген. Биыл облыстық бюджеттен білім беру ұйымдарын бейнекамералармен қамтамасыз етуге 252 млн. теңге қаржы қарастырылды. Қазіргі таңда қалаішілік 35 мектеп ұлттық бейнемониторинг жүйесіне қосылатын болады. Аймақ бойынша орта білім беру ұйымдарында 882 қарауыл мен 568 вахтер жұмыс жасайды. Ал облыстағы 30 колледжде 90 қарауыл мен 30 вахтер қызмет етуде. Аталған орта білім беру ұйымдары толықтай бейнебақылаумен жабдықталған. Сондай-ақ, өңірдегі 47 мектепке турникеттер орнатылып, дабыл түймелері және металл іздегіш құрылғылармен қамтамасыз етілді. Бүгінгі күні облыстың барлық деңгейдегі білім беру ұйымдарында 2021 жылғы терроризмге қарсы қорғалу паспорттары әзірленді. Тағы бір айта кететін жәйт, өткен жылы жергілікті бюджеттен арнайы қаржы бөлініп, 294 мектептің әжетханаларын ғимарат ішіне орнату бойынша жұмыстар атқарылған болатын. Бүгінде облыстағы 311 мектеп пен 30 колледж және 587 балабақша ішкі әжетханалармен қамтамасыз етілді», – деді басқарма басшысы Ақзира Бақтыбайқызы.
</blockquote>

Ақзира Қасымова: 35 мектеп ұлттық бейнемониторинг жүйесіне қосылатын болады

<a href="https://kyzylorda-news.kz/ru/obshestvo/">Kyzylorda-news.kz</a>. «Nur Otan» партиясының қолдауымен ҚР Ауыл шаруашылығы министрлігі, «ЕлАна» сайты және «Qazaqstan dauiri» газетінің ұйымдастыруымен өтетін жыл сайынғы дәстүрлі экспедиция Сыр өңіріндегі сапарын ағымдағы жылдың қазан айына жоспарлаған болатын.
<blockquote>
 «2012 жылдан бастап жүзеге асып келе жатқан экспедиция бұл жолы «Nur Otan» партиясының сайлауалды бағдарламасына қолдау білдіре отырып, еліміздің облыстары мен аудандардың, ауылдардың тұрғындарымен және мәслихат депутаттарымен кездесіп, өңірдегі ауыл шаруашылық, мәдениет пен өнер, спорт, денсаулық сақтау және т.б. салаларда жеткен жетістіктерді бұқаралық ақпарат құралдарында дәріптеуді, сонымен қатар өзекті мәселелерді анықтап, тиісті министрліктерге жеткізуді мақсат етіп отыр. Көздеген мақсат орындалды», – дейді экспедиция жетекшісі, «Qazaqstan dauiri» халықаралық қоғамдық-саяси газетінің бас редакторы Ертай Айғалиұлы.
</blockquote>
Жалпы атап өту керек, 4 күнге созылған іс – шара аясында экспедиция мүшелері облыстың барлық аудандарында болып, аудан әкімдері, жергілікті тұрғындар, халық қалаулылары, жаңадан сайланған ауыл әкімдерімен кездесіп, «Nur Otan» партиясының «Өзгерістер жолы: Әр азаматқа лайықты өмір» атты сайлауалды бағдарламасы аясында ауылшаруашылық, кәсіпкерлік салалары бойынша жүзеге асып жатқан жұмыстарға қанықты.
Ауыл тұрғындарымен өткен кездесулерде елдегі қордаланған проблеммалық мәселелерді анықтап, оларды қаңтар айында түрлі министрліктер өкілдері, қоғам белсенділері мен Сенат, Мәжіліс депуатттарының қатысуымен Нұр-Сұлтан қаласында өтетін дөңгелек үстел барысында ортақ талқыланып, БАҚ беттерінде жарық көретіндігін жеткізді.
<img src="https://kyzylorda-news.kz/wp-content/uploads/2021/10/246497568_1264542617291579_1779410710530674431_n.jpg" alt="" />
<img src="https://kyzylorda-news.kz/wp-content/uploads/2021/10/247858719_1264542627291578_385758433272988679_n.jpg" alt="" />

«Ауыл ел бесігі» экспедициясы Сыр өңірінде болды

<a href="https://kyzylorda-news.kz/ru/obshestvo/">Kyzylorda-news.kz</a>. Темір тордың ар жағында жұмыс жасау көпшілік үшін қиынырақ көрінетіні анық. Соның ішінде әйел затының қылмыскерлермен қатар жүруі әрине қауіптірек саналады. Бірақ, Қызылорда қаласындағы ЗК-169/1 тергеу изоляторындағы аспазшы Гүлжан өз ісімен батылдық танытып келеді.
<blockquote>
 «Бұл мекемеге, жұмыссыздарды тіркеу орталығының электронды еңбек биржасындағы жарнама арқылы келдім. Мұндағы жазасын өтеушілерге сотталған деп қарамаймын. Олар қате басып, шатасқан жандар. Үйлерінен жырақта. Іштей жабырқаулы бір-бір үйдің азаматтарының көңіл-күйінің болуы, күнделікті ас мәзірінің ерекшелігіне де байланысты деп ойлаймын. «Ас – адамның арқауы» деген, қамаудағы азаматтардың тамақтануына мұнда аса жауапкершілікпен қарайды. Күнделікті жұмыс жасауға, асхана ішінде барлық жағдай жасалған. Тыл бөлімі қажетті азық-түлікпен қамтамасыз етіп отырады», – дейді аспазшы.
</blockquote>
Күннің суытуына байланысты, енді жеңіл тағамдардан орнына, тойымды тағамдар беріледі. Ал, ағзаға пайдалы дәрумендерге бай, С, Е, РР, В дәрумен тобы, құрамында калий, кальций, натрий, магний, бал, цинк, темір, фосфордан тұратын алма мен лимон және жеміс шырындары жыл он екі ай үзілмейді. Сонымен қатар, балық, сүт тағамдары да жиі беріліп тұрады. Медицина бөлімінің арнайы есебінде тұратындарға арналған диеталық мәзір, тиімді тамақтанудың есебінен физиологиялық нормалардың негізінде құрылады. Қоймадағы азық-түлік тауарлары да, сапалы сертификаттармен келеді.
Сондықтан, тергеу мекемесіндегі сотталғандар күнделікті балғын көкөніс пен сапалы азық-түліктен жасалған, аспаздарының дәмді етіп дайындаған тағамдарына дән-риза.
<img src="https://kyzylorda-news.kz/wp-content/uploads/2021/10/collagemaker_20211021_160126318.jpg" alt="" />

Тергеу изоляторында аспазшы болу қиын ба?

<a href="https://kyzylorda-news.kz/ru/obshestvo/">Kyzylorda-news.kz</a>. Бүгінгі күні аймақта коронавирус індетін жұқтыру матрицасы бойынша “Сары” аймақтан бой көрсетіп тұр. Соңғы тәулікте өңірімізде коронавирус инфекциясымен 38 жағдай анықталды. Дегенмен, әлде де қауіпті кеселдің тырнағына іліккендердің қатары артуда. Осы орайда медицина мамандары сақтық шараларын қатаң сақтауға шақырады.
<blockquote>
 «Қазір жерлестеріміздің 75 пайыздан астамы вакцинаның алғашқы компонентін қабылдаған. Менде екпе алған мамандардың бірімін. Жұмыс барысымен көптеген адамдармен кездесіп, араласамыз. Коронавирус індетін жеңудің жалғыз жолы – вакцина салдыру. Сол себепті өзімізді қорғап, айналамызға қауіпсіз болуымыз керек. Осы орайда барлық жерлестерімді вакцина салдыруға шақырғым келеді»,- деді облыстық психикалық денсаулық орталығының аға мейірбикесі Динара Зауытбекова.
</blockquote>
Соңғы бір жарым жылдан бері әлем елдері коронавирус індетімен күресіп келе жатыр. Қолға алынған шараларға қарамастан, бұл дертті түбегейлі жою әлі де мүмкін болмай отыр. Сол себепті әр азамат өзінің денсаулығы мен өміріне жауапкершілікті сезініп, мамандар кеңесіне құлақ асуы тиіс.
<blockquote>
 «Бүгінде облыс тұрғындарының арасында ұжымдық иммунитет қалыптасып келеді. Әрине бұл қуантарлық жағдай. Дегенмен жасыл аймаққа еніп, бұрынғы өмірімізге қайта оралу өз қолымызда»,- деді №4 қалалық емхананың жалпы тәжірибелі дәрігері Ұлжан Болатова.
</blockquote>
<img src="https://kyzylorda-news.kz/wp-content/uploads/2021/10/247280497_1397090517353123_3546351379247778980_n.jpg" alt="" />

Қызылордалықтардың 75 пайыз вакцинаның алғашқы компонентін қабылдаған

<a href="https://kyzylorda-news.kz/ru/obshestvo/">Kyzylorda-news.kz</a>. Қаладағы мұнай компаниялардың жұмысшысы Сырдария аудандық полиция бөліміне қазан айының 20-на белгісіз біреулердің мұнай ұңғымасының 57 метр темір құбырларын ұрлап кеткені туралы арызданған.
Жүргізілген жедел-іздестіру жұмыстарының нәтижесінде осы қылмысқа қатысы бар екі күдікті азамат анықталып, ұсталды. Олар қала орталығының тұрғындары екені белгілі болды.
<blockquote>
 «Аталған дерек бойынша Қазақстан Республикасы Қылмысытқ кодекстің 188-бабының 2-бөлігінің 1-тармақшасына сәйкес тергеп-тексеру амалдары жүргізілуде», делінген полиция департаментінің хабарламасында.&nbsp;&nbsp;
</blockquote>
Қазіргі таңда күдіктілер уақытша ұстау изоляторына қамалды. Оқиғаның мән-жайы анықталуда.

Сырдарияда мұнай ұңғымаларының құбырларын ұрлаған күдіктілер ұсталды

<a href="https://kyzylorda-news.kz/ru/obshestvo/">Kyzylorda-news.kz</a>. Еңбек және халықты әлеуметтік қорғау министрлігі вакцина алмаған немесе ПТР-тест тапсырмаған адамдарды жұмысқа кіргізбеу мәселесін түсіндірді, деп хабарлайды&nbsp;<a href="https://sputnik.kz/">Sputnik Қазақстан</a>.
Бас мемлекеттік еңбек инспектор Төлеген Оспанқұловтың айтуынша, бүгінде осы мәселеге қатысты арыз-шағым көптеп түсіп жатыр. Бірақ жұмыс берушінің талабы заңға қайшы емес.
<blockquote>
 “Дүйсенбіден бастап денсаулық сақтау минстрлігінің тиісті нормасы күшіне енді. Оған сәйкес, жұмыс беруші вакцина алмаған немесе ПТР-тест тапсырмаған адамды жұмысқа кіргізбейді. Иә, заңнамада коронавируспен ауыратын адамды жұмысқа кіргізбеу туралы тікелей норма жоқ. Бірақ Еңбек кодексінің 48-бабы 1-тармағында заңнамалық актілер мен мемлекеттік органдар актілері негізінде тиісті шешім шығарылады деп жазылған”, – деп атап өтті Оспанқұлов.
</blockquote>
Оның сөзіне қарағанда, Денсаулық туралы кодекс бойынша санитарлық дәрігер қаулысы міндетті түрде орындауға жататын құжат болып саналады. Сол себепті жұмыс беруші адамды жұмыстан шеттете алады. Жұмыс беруші ақша төлемеуі де мүмкін. Алайда екі тарап келісімге келсе, жалақының жартысын немесе еңбекақының ең төменгі мөлшерін алуға мүмкіндік бар.
<h3 id="">Вакциналау паспортын тексеру шаралары</h3>
Денсаулық сақтау министрлігі 1 қыркүйектен бастап ұжымдарда вакциналау паспортын жаппай тексеру шаралары басталады деген ақпарат таратқан.
Ал қазан айында жұмысқа шығардың алдында міндетті вакциналаудан өтуді ресми түрде бекітті. Осыған байланысты денсаулық сақтау министрінің қосымша бұйрығы да шыққан. Ол құжат 17 қазанда күшіне енді. 
Сол кезде санитариялық-эпидемиологиялық бақылау комитетінің ресми өкілі Ержан Байтанаев та жұмысқа кіргізу тәртібін түсіндірді. Вакцина алмаған адам жеті күнде бір рет ПТР-тест тапсырады немесе вапкцина алуға болмайтынын растайтын анықтама көрсетеді. Ал КВИ-мен ауырып шыққандар үш ай бойы екпе салдырмаса да болады.

Жұмыс беруші вакцинасыз қызметкерлерді жұмыстан шеттете алады – министрлік

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін халық жазушысы, қазақ әдебиетінің классигі, Қазақстанның Еңбек Ері Әбдіжәміл Нұрпейісовтің туған күні. Саналы ғұмырын жазу-сызуға арнаған ағамыз 97 жасқа толып отыр, деп жазды Сенат төрағасы Мәулен Әшімбаев өзінің&nbsp;<a href="https://www.facebook.com/100024724328585/posts/1043404886493646/?d=n">Facebook</a>-тегі парақшасында.
Қаламгердің ғұмыр жолына қарап отырып, ұлт тарихының өткен ғасырдағы тұтас тарауларын көруге болады. Әбекең бала күнінде тәркілеу, ашаршылық сияқты зобалаңдарды басынан өткерді. Он сегізге толар-толмас шағында соғысқа аттанды. Осының бәрі кейін жазушының шығармашылығына арқау болды.
Шын мәнінде, суреткердің қаламынан туған дүниелер – қазақ әдебиетінің алтын қорына қосылған қымбат қазына. Оның ішінде «Қан мен тер» және «Соңғы парыз» романдарының шоқтығы биік, – деп жазды Мәулен Әшімбаев.
Бұл шығармалар қашанда әр буынның сүйіп оқитын туындылары болып қала береді.
<blockquote>
 «Ағамыз шығармаларының басым бөлігін кеңестік кезеңде жазғаны белгілі. Дегенмен, тәуелсіздік алған тұста да ұлттық әдебиеттің өрісін кеңейтуге зор еңбек сіңірді. Қазақ ПЕН-клубын құрып, оның жанынан «Таң-Шолпан» атты әдеби журнал ашты. Бұл егемендіктің елең-алаң шағында жаңа заманға бейімделе қоймаған қаламгерлер үшін үлкен қолдау болды. Осылайша Әбекең әдебиетке деген адалдықтың озық үлгісін көрсетті. Жалпы, Әбдіжәміл аға туралы айтқанда, оның табандылық, ірілік, өрлік қасиеттеріне тоқталмай кету мүмкін емес. Расымен, ағамыз бұралаңы көп өмір жолында ешқашан өз биігінен төмендеген емес. Қашанда асқақ, ақсүйек, кербез қалпын сақтай білді. Ардақты Әбе! Туған күніңізбен құттықтай отырып, Сізге зор денсаулық және амандық тілеймін! Елдің ықыласына бөленіп, ортамызда аман-есен жүре беріңіз», – деді ол.
</blockquote>
<img src="https://kyzylorda-news.kz/wp-content/uploads/2021/10/abe1.jpg" alt="" />
<img src="https://kyzylorda-news.kz/wp-content/uploads/2021/10/abe2.jpg" alt="" />
<a href="https://baq.kz/news/othernews/bugin-halyk-zhazushysy-abdizhamil-nurpeyisov-97-zhaska-keldi/">Baq.kz</a>

Бүгін халық жазушысы Әбдіжәміл Нұрпейісов 97 жасқа толды

<a href="https://kyzylorda-news.kz/ru/obshestvo/">Kyzylorda-news.kz</a>. Қазгидромет 23-25 қазандағы ауа райы болжамын жариялады.
Синоптиктер болжамына сәйкес, демалыс күндері ауа райы құбылмалы болады. Қазақстан аумағының басым бөлігіне Иран аудандарынан жылы ауа массалары келе бастайды, бұл ауа температурасының біртіндеп көтерілуіне әкеледі.
Тек Қазақстанның батыс өңірлеріне ғана ауа температурасы төмендейді. Елдің барлық аймағында жаңбыр мен қар түріндегі жауын-шашын болуы мүмкін.
Елордада 23 қазанда күн құбылмалы, жаңбыр жауады. Түнде +2°C, күндіз +9°C жылыны көрсетеді. 24 қазанда күн бұлтты, түнде +7°C, күндіз +11°C жылы болады. 25 қазанда күн ашық, түнде +4°C, күндіз +12°C жылы.
Алматыда 23 қазанда күн құбылмалы, қар аралас жаңбыр жауады. Ауа температурасы түнде 0°C, күндіз +7°C болады. 24-25 қазанда күн ашық, түнде 0…+1°C, күндіз +8…+12°C жылы болады.
Шымкентте 22 қазанда күн құбылмалы, түнде 0°C, күндіз +13°C жылы. 24-25 қазанда күн ашық, түнде +3°C, күндіз +17…+19°C жылы болады.
Қараша айының бірінші жартысы жылы болады деп болжанып отыр. Солтүстікте ауа температурасы түнде минус 3 градустан -8…-13°С дейін, күндіз +3…+10°С-тан -2+3°С дейін құбылады.
Бірінші онкүндіктің соңында республиканың солтүстігінде, солтүстік-батысында, шығысында және орталығында жел күшейіп, жауын-шашын (көбіне қар) түседі, айдың екінші жартысында бұл құбылыс жиілейді. Бір ай бойы көктайғақ пен тұман байқалады.
<blockquote>
 “Айдың екінші жартысында күн қатты суытады. Сынап бағанасы түнде -17…-25°С дейін, күндіз -8…-13°С дейін, ал еліміздің шығысында түнде -30°С дейін, күндіз -18°С дейін төмендейді”, – деп болжады синоптиктер.
</blockquote>
Қарашаның үшінші онкүндігінде аяздың беті қайтады. Батыста, оңтүстік пен оңтүстік-шығыста жабысқақ қар мен жаңбыр түрінде жауын-шашын жауады.
Ең жылы күндер айдың бірінші жартысында болады. Күндіз ауа температурасы +10…+18°C дейін жоғарылауы мүмкін, алайда қарашаның екінші жартысында температура фоны түнде -5…-17°C, күндіз -2…-7°C дейін төмендейді.
Үшінші онкүндікте күн қайтадан жылынады.

Демалыс күндері ауа райы қандай болады?

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін облыс әкімі Гүлшара Әбдіқалықова күзгі егін науқаны жұмыстарын қорытындылайтын «Алтын дән-2021» мерекелік шарасына қатысып, дала еңбеккерлеріне құрметін жеткізді.
Жиынға Қазақстан Респуликасы Парламенті Сенатының депутаты Мұрат Бахтиярұлы, ҚР АШМ Жер ресурстарын басқару комитеті төрағасының орынбасары Гүлжахан Бимендина, қала, аудан әкімдері, «Қазақстан Фермерлер Қауымдастығы» қоғамдық ұйымының Қызылорда филиалының төрағасы Өмірхан Пашкенов, сала үздіктері және онлайн форматта 250-ге жуық шаруашылық өкілдері қатысты.
Аймақ басшысы өтпелі қиындықтарға қарамастан ел қамбасын астыққа толтырып, мол өнім алуда қажырлы еңбек еткен шаруа қожалықтарының басшыларына алғысын жеткізіп, ізгі ілтипатын арнады.Елбасы Нұрсұлтан Әбішұлы Назарбаевтың «Ең сенімді валюта – азық-түлік» деген сөзі бар. Уақыт өткен сайын ауыл шаруашылығының ел экономикасындағы мәні мен маңызы артып келеді.
<blockquote>
 «Тәуелсіздігіміздің 30 жылдығы қарсаңында облыс диқандары биылғы жылғы вегетация кезінде су тапшылығына және басқа да қиындықтың бәрін еңсере отырып, аянбай еткен еңбектерінің арқасында 500 мың тоннаға жуық Сыр күріші ел қамбасына құйылды. Биылғы жылдың маусым – шілде айларындағы ауа райының ыстығына, суармалы судың тапшылығына қарамастан маңдай терін төгіп, адал еңбектің үлгісін көрсеткен диқандарымызға қандай мадақ айтсақ та жарасады. Өздеріңізге барша Сыр жұртшылығы – жерлестеріңіздің атынан алғысымды білдіремін», – деді Гүлшара Әбдіқалықова.
</blockquote>
Өткен жылы өңірде 143,6 млрд.теңгенің ауыл шаруашылық өнімі өндірілсе, ағымдағы жылғы 9 айда 118,5 млрд. теңгеге жетіп, өсім 2,4 пайызды құрады. Тамақ өнімдерін өңдеу көлемі 41,0 млрд.теңгеге жетіп, өткен жылдың осы кезеңімен салыстырғанда көрсеткіш 12,5 % құрады.
Соңғы жылдары егіс алқаптарын әртараптандыру бағытында жүйелі шаралар атқарылуда. Атап айтқанда, жалпы егіс көлемі 5 жылда 6,9 мың гектарға ұлғайып, әртараптандыру бағытында мал азығындық дақылдар 6,3 мың гектарға, картоп, көкөніс, бақша дақылдары 1,7 мың гектарға, ал, күріштен басқа дәнді дақылдар көлемі 6,4 мың гектарға көбейген.
Суды көп қажет ететін күріш көлемі өткен жылдан 6 мың гектарға азайтылды. Оның орнына әртараптандыру бағытындағы дақылдардың егіс көлемдері 9,8 мың гектарға дейін жетті.
Аймақ басшысы ауыл экономикасының негізгі резервінің бірі – мал шаруашылығы да тұрақты дамып келе жатқандығын айрықша атап өтті.
Есепті кезеңде мүйізді ірі қара 8,2%-ға, жылқы 14,2%-ға, түйе 8,1%-ға, уақ мал 6,6%-ға көбейіп, ет өндірісі 2,4%-ға, сүт өндірісі 2,3%-ға, жұмыртқа өндірісі 3,1%-ға артқан.
Бүгінгі күні құны 20,6 млн. АҚШ долларын (61,0 мың тонна) құрайтын өңірдің ауыл шаруашылығы тауарлары 15 мемлекеттің сұранысын қамтамасыз етіп отыр. Биылғы жылы облыстан Германия, Нидерланды мемлекеттеріне 886 тонна қамыс, Австрия, Литва, Польша, Грузия, Нидерланды, Украина, Германия мемлекеттеріне 1780 тонна балық, Әзірбайжан, Моңғолия, Тәжікстан, Украина, Өзбекстан, Ирак елдеріне 58 237 тонна күріш өнімі жөнелтілген.
Салтанатты жиында аймақ басшысы Сырдария өзенінің жағдайына арнайы тоқталып, суды кезектілікпен үнемдеп алған шаруа қожалықтарының қажырлы еңбектеріне тоқталды.
<blockquote>
 «Барлықтарыңызда, әсіресе шаруалардың көкейлерінде болашақтағы су мәселесі бар екенін жақсы білемін. Шардара су қоймасындағы судың аз болуына байланысты, Сырдария өзенінің төменгі ағысына жіберіліп жатқан су көлемі төмендеп, ағымдағы жылдың 8 қыркүйегінен 18 қазанына дейін төменге секундына 30 текше метр су жіберіліп келді. Ал, 18 қазаннан бастап төменге жіберілген су көлемі 20 текше метрге артып, қазір секундына 50 текше метр жіберілуде. Біз Үкіметпен тиісті жұмыстар жасаудамыз. Су нысандарының жағдайын жақсарту үшін «Жасыл Қазақстан» Ұлттық жобасына үлкен үміт артылуда. Ұлттық жобаға 122 млрд.теңгені құрайтын облыстың 237 жоба енгізілуде», – деді Гүлшара Әбдіқалықова.
</blockquote>
Бүгінде «Қызылорда», «Әйтек» су торабтарына жөндеу және «Ирригация және дренаж жүйелерін жетілдіру» жобасы аясында 2019 жылдан бері 15 мың гектар суармалы жерлерді қалпына келтіру жұмыстары жүргізілуде. 2023 жылға дейін коммуналдық меншіктегі 192 су шаруашылығы нысандарын тазалау және жөндеу жұмыстары кезең-кезеңмен атқарылатын болады. Сондай-ақ, Қызылорда облысы бойынша 775 млн.текше метр тасқын су жинайтын «Қараөзек арнасындағы су қоймасын» салу ісі де басталады.
Мерекелік шарада облыс әкімі мезгілдің сан құбылуына қарамастан аянбай еңбек етіп, тер төккен, ауыл шаруашылығын дамытуға ерекше үлес қосқан озаттарды марапаттады. Атап айтқанда, Жалағаш ауданы, «Мәдениет» ШҚ төрағасы Ахдильда Қыпшақбаев, Қызылорда қаласы, «Қызылорда Құрылыс НК» ЖШС егіс бригадирі Айдархан Қойшыбаев, Арал ауданы, «Алмат» ШҚ төрағасы Жетес Асанбаев, Қазалы ауданы, зейнеткер Берик Бейсембаев, Қармақшы ауданы, «Ертілеу» ШҚ маманы Рустембек Сәрсенбаев, Жалағаш ауданы, «Таң ЛТД» ЖШС директоры Имамзада Шағыртаев, Қармақшы ауданы, «Актөбе и К» ЖШС директоры Нұрлан Іздібаев, Сырдария ауданы, «Мәді Қажы» ЖШС директоры Сейткамал Сұлтанов және басқа да сала үздіктері марапатталды.
«Үздік аудан» номинациясымен Қармақшы ауданының әкімі Қайрат Нұртай құрметке бөленді. Ал, егін шаруашылығы бойынша «Озат аудан» номинациясымен Шиелі ауданының әкімі Нариман Мақұлбеков және мал шаруашылығы бойынша «Озат аудан» номинациясымен Жаңақорған ауданы әкімі Руслан Рүстемов, өндеу саласы бойынша «Озат аудан» номинациясын Қазалы ауданы әкімі Мұхтар Оразбаев марапат алды.
Салтанатты жиында ауылшаруашылық саласындағы серпінді жаңалықтарды халыққа ақпараттандыруда ерекше еңбек еткен «Қазақстан» РТРК» АҚ Қызылорда облыстық телеарнасының тілшісі Елжас Әбділда мен «Сыр бойы» газетінің тілшісі Ержан Қожас марапат биігінен көрінді.
<img src="https://kyzylorda-news.kz/wp-content/uploads/2021/10/akim-2.jpg" alt="" />
<img src="https://kyzylorda-news.kz/wp-content/uploads/2021/10/ak.jpg" alt="" />
<img src="https://kyzylorda-news.kz/wp-content/uploads/2021/10/ozat1.jpg" alt="" />
<img src="https://kyzylorda-news.kz/wp-content/uploads/2021/10/ozat2.jpg" alt="" />
<img src="https://kyzylorda-news.kz/wp-content/uploads/2021/10/ozat3.jpg" alt="" />
<img src="https://kyzylorda-news.kz/wp-content/uploads/2021/10/ozat4.jpg" alt="" />

Алтын дән &#8211; 2021: Қызылордада ауылшаруашылық саласының үздіктері марапатталды

Қызылорда: Әлеуметтік дүкендердегі азық-түлік бағасы

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылордада бір аптадан бері іздестірілген 18 жастағы бойжеткен ата-анасына тапсырылды.
Қызылорда қалалық Полиция басқармасының кезекші бөліміне 18 жастағы қыздың анасы арызданған болатын.
Полиция қызметкерлері 7 күннің ішінде жүргізген жедел-іздестіру жұмыстарының нәтижесінде жоғалған бойжеткен 23 қазан күні 8:00 де қала орталығының көшелерінің бірінен табылып, ата-анасына аман-есен тапсырылды. Полицейлер табылған бойжеткенмен және ата-анасымен профилактикалық бағытта әңгімелесу жұмыстарын жүргізді.
Полицейлердің дер кезінде ұйымдастырған іздестіру жұмыстарына риза болған ана, полицейлерге өз алғысын білдіріп, қызметтеріне тек қана жетістіктер тіледі.
Полиция қызметкерлері балаларыңызды бақылауды және жауапкершілікті күшейтіп, қауіпсіздігін қамтамасыз ету бағытындағы шараларды арттыру қажеттігін қатаң ескертеді.

Қазақстан және Қызылорда облысының жаңалықтары: Қоғам

Қызылордада биыл 750-ге жуық азамат әскерге аттанады

Ақзира Қасымова: 35 мектеп ұлттық бейнемониторинг жүйесіне қосылатын болады

«Ауыл ел бесігі» экспедициясы Сыр өңірінде болды

Тергеу изоляторында аспазшы болу қиын ба?

Қызылордалықтардың 75 пайыз вакцинаның алғашқы компонентін қабылдаған

Сырдарияда мұнай ұңғымаларының құбырларын ұрлаған күдіктілер ұсталды

Жұмыс беруші вакцинасыз қызметкерлерді жұмыстан шеттете алады – министрлік

Бүгін халық жазушысы Әбдіжәміл Нұрпейісов 97 жасқа толды

Демалыс күндері ауа райы қандай болады?

Алтын дән – 2021: Қызылордада ауылшаруашылық саласының үздіктері марапатталды

Қызылорда: Әлеуметтік дүкендердегі азық-түлік бағасы

Қызылордада жоғалған бойжеткен табылды

Қазақстан және Қызылорда облысының жаңалықтары: Қоғам

Қызылордада биыл 750-ге жуық азамат әскерге аттанады

Ақзира Қасымова: 35 мектеп ұлттық бейнемониторинг жүйесіне қосылатын болады

«Ауыл ел бесігі» экспедициясы Сыр өңірінде болды

Тергеу изоляторында аспазшы болу қиын ба?

Қызылордалықтардың 75 пайыз вакцинаның алғашқы компонентін қабылдаған

Сырдарияда мұнай ұңғымаларының құбырларын ұрлаған күдіктілер ұсталды

Жұмыс беруші вакцинасыз қызметкерлерді жұмыстан шеттете алады – министрлік

Бүгін халық жазушысы Әбдіжәміл Нұрпейісов 97 жасқа толды

Демалыс күндері ауа райы қандай болады?

Алтын дән &#8211; 2021: Қызылордада ауылшаруашылық саласының үздіктері марапатталды

Қызылорда: Әлеуметтік дүкендердегі азық-түлік бағасы

Қызылордада жоғалған бойжеткен табылды

Алтын дән – 2021: Қызылордада ауылшаруашылық саласының үздіктері марапатталды