<a href="https://kyzylorda-news.kz/">Kyzylorda-news.kz</a> Қазақстандық күріш өндіру және өңдеу саласының мамандары Германияның Ганновер қаласында өткен AGRITECHNICA 2025 әлемдік агротехникалық көрмесіне қатысты. Көрмеге 2 700-ден астам компания келген, бұл – агроөндірістің жаһандық деңгейде трансформацияланғанына айқын мысал.Бүгінгі негізгі бағыт – агросекторды цифрландыру, күріш индустриясын дамыту, су ресурстарын үнемдейтін және смарт-технологияларды енгізу. Осы сапарда күріш жинайтын, жер өңдейтін техникалық жабдықтарды, DJI T100 дрондарын (Қызылордада қарашаның соңында таныстырылады), күріш сақтау қоймаларын интеллектуалды басқару жүйелерін, алқапты тегістеу және ақылды дренаж жүйелерін қолдану технологияларын жеткізу туралы келісімдер жасалды.Бұл – инновациялық агроплатформаға бағытталған нақты қадам. Тұрақты даму, цифрлық трансформация және ресурстарды тиімді пайдалану өсімді қамтамасыз етеді.<img src="https://knadmin.beoblood.kz/uploads/Agrotehnikaly_k_rme_2_dbcc974231.jpg" alt="Агротехникалық көрме 2.jpg">

Күріш өндірушілер әлемдік агротехникалық көрмеге қатысты

<a href="https://kyzylorda-news.kz/">Kyzylorda-news.kz</a> Қызылорда облысы әкімдігі және Қорқыт ата атындағы Қызылорда университетінің ұйымдастыруымен «Мұстафа Шоқай мұраларын зерттеудің өзекті мәселелері: тарих, таным және тағылым» тақырыбында халықаралық ғылыми-теориялық конференция өтті.&nbsp;Конференция Мұстафа Шоқайдың өмірі мен мансабы туралы бейнероликпен басталды. Көрнекті мемлекет және қоғам қайраткері, Алаш қозғалысының ірі өкілі, түркі дүниесінің ұлы перзенті Мұстафа Шоқайдың туғанына 135 жыл аясында ұйымдастырылған халықаралық ғылыми-теориялық конференцияға Қазақстан, Түркия, Әзербайжан, Өзбекстан елдерінің ғалымдары мен зерттеушілері, БАҚ және қоғамдық ұйым өкілдері, магистранттар мен докторанттар қатысты. Конференция жұмысы пленарлық және секциялық отырыс түрінде өтті. Ғалымдар мен сарапшылар Мұстафа Шоқайдың өмір жолы, саяси-қоғамдық қызметі, публицистикалық және ағартушылық еңбектері сонымен бірге оның идеяларының қазіргі кезеңдегі өзектілігі жөнінде баяндама жасады.&nbsp;Конференцияның пленарлық мәжілісін Қызылорда облысы әкімінің орынбасары, педагогика ғылымдарының кандидаты Мейрамбек Шермағанбет алғы сөзімен ашты.<img src="https://knadmin.beoblood.kz/uploads/Whats_App_Image_2025_11_14_at_10_26_28_a1be8cb896.jpeg" alt="М.Шоқай конференция.jpeg"><blockquote>– Қызылорда – Мұстафа Шоқайдың кіндік қаны тамған, Сыр бойының қасиетті өлкесі. Бұл өлке – елдік пен ерліктің, руханият пен білімнің тоғысқан жері. Сондықтан аймағымызда Мұстафа Шоқай есімін дәріптеу, мұрасын насихаттау бағытында жүйелі жұмыстар жүргізіліп келеді. Бүгінде облыс пен қала көлемінде қайраткер есімі көшелер мен білім беру ұйымдарына берілді. Қаланың ортасында Мұстафа Шоқайдың еңселі ескерткіші бой көтерді. Университет қабырғасында дәстүрлі түрде «Мұстафа Шоқай оқулары» өткізіліп, жас ғалымдардың зерттеу көкжиегі кеңейіп келеді. Мектептер мен жоғары оқу орындарында қайраткердің өмірі мен қызметін танытатын ғылыми-танымдық және тәрбие бағытындағы іс-шаралар жүйелі жолға қойылған. Театр сахнасында қойылымдар ұсынылып, деректі фильмдер түсіріліп, еңбектері мен энциклопедиясы жарық көруде. Мұның барлығы өңірдің Мұстафатану іліміне қосқан нақты үлесі. Ұлттың ертеңі – білімді, елжанды, отансүйгіш жастардың қолында. Ал сол жастардың жүрегінде Мұстафа Шоқай сынды тұлғалардың өнегесі мен рухы мәңгі жасай береді, – деді Мейрамбек Зинабдинұлы.</blockquote>Пленарлық мәжілісте Түркия мемлекеті Мимар Синан көркем өнер университетінің профессоры, тарих ғылымдарының докторы – Әбдіуақап Қара, АҚШ, Мичиган университетінің құрметті профессоры, филология ғылымдарының докторы – Тимур Кожаұлы, Өзбекстан Республикасы Ғылым академиясының Тарих институтының бас ғылыми қызметкері, тарих ғылымдарының докторы, профессор – Қаһромон Раджабов, Азербайжан ҰҒА тарих және этнология институтының бөлім меңгерушісі, тарих ғылымдарының докторы, профессор – Гюллю Йологлу, ақын, Қазақстан Жазушылар одағы төрағасының орынбасары – Қасымхан Бегманов, Қазақстан мұсылмандары діни басқармасы жанындағы Ислам ғылыми-зерттеу институтының директоры, филология ғылымының кандидаты, доцент – Төрәлі Еділбайұлы, PhD, Қазақстан Жазушылар одағы балалар мен жасөспірімдер әдеби жанрлық кеңесінің төрағасы – Елдос Тоқтарбай, Мұстафа Шоқайтану ғылыми орталығының жетекшісі, саяси ғылымдарының докторы, профессор – Әбдіжәлел Бәкір баяндама жасады.Көп жылғы уақытын Мұстафа Шоқай өмірін зерттеуге арнаған ғалым Әбдіуақап Қара ел тәуелсіздігі жолында құрбан болған ұлы тұлғаларға тиісті баға берілмей келе жатқанын тілге тиек етті. Бұрынғы идеологиялық таным-түсініктен арылу қажет екенін және оларға саяси баға беруде тәуелсіз¬дік мұратын басшылыққа алу керегін ортаға салды. Шоқайдың саяси күресінің басты мақсаты – Түркістандағы кеңес билігінің орнына тәуелсіз ұлттық басқару жүйесін орнықтыру болғанын нақты деректермен дәлелдеп берді.Қорқыт ата атындағы Қызылорда университетінің профессоры Әбдіжәлел Бәкір Мұста¬фа Шоқайдың саяси қайраткер болып қалыптасуына ең алдымен оның өскен ортасы, отбасындағы тәрбиесі ықпал еткенін ортаға салды.&nbsp; Алаштанушы ғалым Елдос Тоқтарбай ХХ ғасырдың алғашқы ширегіндегі әдебиеттегі Түркістан мүддесі туралы айта келіп, Мұстафа Шоқай мұрасын тереңдете зерттеу қажеттігіне тоқталды.&nbsp;<blockquote>– Бүгінде ел бірлігі жолында қызмет еткен азаматтардың өз дәрежесінде ұлықталмай келе жатқаны шындық. Еліміздің тарихы Мұстафа Шоқайдың еңбектерінде айқын көрсетілген. Оның барлығы басқа тілде болғандықтан бүгінде көптеген еңбектерін түсіне алмай келеміз. Сол себепті оқу ордаларында қазақ, орыс, ағылшын тілдерінен бөлек басқа да тілдерді ресми түрде енгізіп, оқыту қажет деп ойлаймын. Мұның барлығы тарихты зерттеу үшін қажет. Сонда болашақ ұрпақтың ұлы тұлғаның өмірі мен шығармашылығына деген қызығушылығы артары сөзсіз. Мұстафа Шоқайдың еңбектері ұлт үшін қызмет ететін мың жылдық мұра. Оны атадан балаға аманат ретінде сақтауымыз қажет, – деді ол.</blockquote>Жазушылар одағы төрағасының орынбасары Қасымхан Бегманов Мұстафа Шоқайдың шығармаларына қатысты ұсынысын айтты.<blockquote>– Мұстафа Шоқай салған жол Санкт-Петербургтен бастап Ташкент, Тбилиси, Баку, Ыстанбұл, Берлин, Париж, Лондон, Варшава, Ригаға дейін созылады. Осы елдердің архивінде түпнұсқа материалдардың басым бөлігі орыс, француз, түрік, неміс тілдерінде сақтаулы тұр. Қазақ және өзбек тіліндегі аудармалар қысқартылып, контексті бұзылған. Осы баяндама аясында бірқатар ұсынысым бар. &nbsp;Біріншіден, бірлескен көптілді аударма-редакция кеңесін құрып, ғылыми аударманың бірыңғай стандарты мен глоссарийін бекіту керек деп ойламын. Сонда болашақ шоқайтанушылар таза ғылыми ізденіспен айналысар еді. Екінші – Мұстафа Шоқайдың Берлиндегі және Париждегі басылымдарының толық жиынтығы қолымызда емес. Кей сандар түрлі жеке қорларда сақтаулы тұр. Осы орайда «Мұстафа Шоқай мұрасы» атты жоба бастап, &nbsp;электронды каталог жасап, еңбектерінің бәрін қолжетімді етуге атсалыссақ нұр үстіне нұр. Үшінші – Мұстафа Шоқайдың қай кезеңде, қандай құжаттарға қол қойғанын және де оның позициясын айқын көрсетіп, ғылыми дәйектермен тайға таңба басқандай етіп көрсетуіміз керек. Оны нақты дәлел ретінде ғылыми айналымға енгізу керек. Ол үшін – хронологиялық карта, Мұстафа Шоқай қатысқан жиналыстар, кездесулер, хаттар тізбелері арқылы биобиблиографиялық профилін жасау міндетті. Төртінші ұсынысым – &nbsp;«Мұстафа Шоқай және түркішілдік» идеясы. Осы идеяны нақтылап, ғылыми тұжырымдап көрсету керек деп ойлаймын. Кей басылымдарда Мұстафа Шоқайдың көзқарасын үстірт көрсетеді. Оның тұлғасын «тарихи пантеон» форматына лайықтап, мультимедиялық көрме, цифрлық тур жасау қажет. Қателеспесем бұл Түркістан қаласында бастау алды. Мұстафа Шоқайдың болған әрбір мемлекеттерін көрсете отырып, құжаттарды да соған сай цифрландырып көрсету бүгінгі заман талабына сай болар еді, – деді ол.</blockquote><img src="https://knadmin.beoblood.kz/uploads/Whats_App_Image_2025_11_14_at_10_26_29_a68e64f2bb.jpeg" alt="М.Шоқай конференция.jpeg">Конференция Мұстафа Шоқайдың саяси-құқықтық, публицистикалық және ағартушылық мұрасын кешенді түрде зерттеу, оның мемлекетшілдік идеяларының қазіргі кезеңдегі өзектілігін айқындау және Мұстафатану ғылымының дамуына жаңадан серпін беруді мақсат етті.Конференцияға қатысушылар Мұстафа Шоқайдың еркіндік пен әділет жолындағы күресі қазіргі Қазақстанның тарихи жадын, рухани тәуелсіздігін және мемлекетшілдік дәстүрін қалыптастырудағы маңызды іргетас екенін атап өтті. Сонымен қатар, Қорқыт ата атындағы Қызылорда университеті жанынан тұрақты түрде жұмыс істейтін «Мұстафа Шоқай мұрасын зерттеу жөніндегі халықаралық ғылыми кеңес» құру, Мұстафа Шоқайдың шығармашылық және саяси мұрасын цифрландыру, оның еңбектерінің толық академиялық жинағын бірнеше тілде дайындау, ашық электрондық «Mustafashokay.kz» цифрлық платформасын іске қосу, Мұстафа Шоқайдың 135 жылдығына арналған халықаралық ғылыми еңбектер жинағын басып шығару және тарату туралы шешім қабылдады.Алаш қайраткерлерінің есімін мәңгі есте сақтау үшін Қызылорда қаласының сол жағалауында «Алаш қайраткерлері аллеясын» ашу, Шиелі ауданына «Мұстафа Шоқай» атауын беру, мектептер мен колледждерде жыл сайын оқушылардың ғылыми конференциясын, эссе байқауларын, дебаттурнирлерін дәстүрлі форматқа енгізу мен Қорқыт ата атындағы Қызылорда университетінде демеушілер есебінен жыл сайын конкурс негізінде білім алушыларға «Мұстафа Шоқай» атындағы білім грантын, «Мұстафа Шоқай» атындағы степендия тағайындау туралы ұсыныстар айтылды.Аталған іс-шара Алаш қайраткерінің мұрасын зерттеудегі жаңа кезеңнің басталғанын айқындайды. Қазақстан, Түркия, Әзербайжан, Өзбекстан сияқты елдерден келген ғалымдардың басын қосқан конференция, Мұстафа Шоқайдың өмірі мен қызметіне қатысты тың дерек пен жаңаша көзқарастарды ортаға салды. Бұл Мұстафа Шоқайдың мемлекетшілдік идеяларының бүгінгі Қазақстан үшін маңызын айқындап, оның мұрасын тереңірек зерттеуге жаңа серпін бергені сөзсіз.Аружан ЕРАЛЫ

Ұлы тұлға есімі дәріптелген күн

<a href="https://kyzylorda-news.kz/">Kyzylorda-news.kz</a> Бүгін облыс әкімнің бірінші орынбасары Данияр Жаналиновтың төрағалығымен Автожол саласы мен автомобиль көлігі жұмыскерлері күніне орай мәжіліс өтті. Оған басқарма басшылары, сала қызметкерлері қатысты.«Мемлекет басшысы Қасым-Жомарт Кемелұлы автомобиль жолдары мен авиахабтар желісін белсенді дамытудың маңызын атап өтті. Бұл мақсатта ауқымды жұмыс атқарылуда. 2021 жылдың қорытындысымен өңірімізде жақсы және қанағанаттарлық жағдайдағы жолдың үлесі 75 пайыз болған. 2022-2025 жылдар аралығында республикалық және жергілікті бюджеттен 147 млрд. 525 млн. теңге бөлініп, 485 жоба жүзеге асты. Бөлінген қаржыға 1600 шақырым жол, 30 көпір өткелінің құрылысы, қайта жаңғырту және реконструкциялау жұмыстары жүргізілді. Жол салу – бұл жай ғана инфрақұрылым жеткізу емес, &nbsp;сауда, туризм және халықтың әл-ауқатын арттырудың негізін қалау. Біздің міндетіміз – жол инфрақұрылымын одан әрі дамыту. Автожол қызметкерлерінің еңбегі көп жағдайда көзге көрінбегенімен, елдің тіршілігі мен дамуы осы сала еңбеккерлері салған нысандарға байланысты. Жолдар мен көшелерге олардың маңдай тері сіңген», – деді Данияр Еренғалиұлы.Басқосуда сала қызметкерлеріне «Еңбек ардагері», «Құрметті жолшы», «Үздік автокөлікші» төсбелгісі, &nbsp;Көлік министрінің, облыс әкімінің Құрмет грамотасы табысталды. Еңбек ардагері Жәнібек Нұрқышұлы құттықтау сөз сөйледі.Биыл жол инфрақұрылымын дамытуға республикалық, облыстық және аудандық бюджеттен 49 млрд 643 млн теңге бөлінді.Соның арқасында 329 шақырым автомобиль жолы, көшелер мен көпір өткелдері жөндеуден өтті. Жақсы және қанағаттанарлық жағдайдағы жолдың үлесі 95 пайызға жетеді.Республикалық маңызы бар «Қызылорда-Жезқазған» автомобиль жолын қайта жаңғырту 2022 жылы басталғаны белгілі.Бүгінде облыс аумағына тиесілі 191 шақырым жол &nbsp;толық аяқталып, жақын күндері пайдалануға беріледі.&nbsp;Мемлекет басшысының тапсырмасына сәйкес Қызылорда қаласынан Ақтөбе облысының шекарасына дейінгі 566 шақырым жолды І санатқа ауыстыру үшін «ҚазАвтоЖол» мекемесі жоба-сметалық құжаттама әзірледі. &nbsp;Жобаның жалпы құны 879 млрд 191 млн теңге, қазір «Ислам даму банкі» арқылы қаражат тарту және мердігерлерді анықтау жұмыстары жүргізілуде.<img src="https://knadmin.beoblood.kz/uploads/Zhol_salasyny_yzmetkerleri_marapattaldy_15435b8d69.jpg" alt="Жол саласының қызметкерлері марапатталды.jpg">

Жол саласының үздік қызметкерлері марапатталды

<a href="https://kyzylorda-news.kz/">Kyzylorda-news.kz</a> Ел дамуындағы маңызды сала – жол инфрақұрылымына айрықша үлес қосып келе жатқан автожол қызметкерлерінің кәсіби мерекесі және ауданның өркендеуіне өзіндік із қалдырған «Арал құрылысы» ЖШС-нің 20 жылдығына орай шаралар легі бастау алды.Мерекелік іс-шара қаладағы «Арал құрылысы» ЖШС мекемесінде өтті. Оған жол және құрылыс саласының ардагерлері, аудандық мәслихат төрағасы мен депутаттары, облыстық департамент басшылары, зиялы қауым өкілдері, құқық қорғау органдарының жетекшілері және еліміздің әр өңірінен келген қонақтар қатысты.Жиында Арал ауданының әкімі Аманжол Оңғарбаев сөз алып, сала қызметкерлерін кәсіби мерекемен және «Арал құрылысы» ЖШС-нің 20 жылдық мерейтойымен құттықтады.<blockquote>– Құрметті жерлестер, қадірлі автожол саласының қызметкерлері. Ел дамуындағы үлкен сала – жол инфрақұрылымына сүбелі үлес қосып келе жатқан Автожол қызметкерлерінің кәсіби мерекесі, сонымен қатар ауданымыздың өркендеуіне өз үлесін қосып келе жатқан «Арал құрылысы» ЖШС-нің құрылғанына 20 жылдығы баршаңызға құтты болсын! Халқымыз «Жол – өмірдің өзегі» дейді. Шынында да, жол – ел мен елді, ауыл мен қаланы, өзара байланыс пен ынтымаққа берік негіз болған алтын көпір. Жол бар жерде – даму бар, байланыс бар, тіршілік бар. Осындай сауапты жұмыстардың басы-қасында жүрген Сіздердің еңбектеріңіз – халық игілігіне бағытталған, қасиетті кәсіп. Ауданның игілігі жолындағы тынымсыз еңбектеріңіз үшін аудан халқының және жеке өз атымнан ерекше ризашылығымды білдіремін. Баршаңызға зор денсаулық, отбасыларыңызға амандық, еңбектеріңізге табыс тілеймін. Салған жолдарыңыз ұзақ жылдар ел игілігіне қызмет ете берсін, – деді аудан әкімі.</blockquote>Сонымен қатар, әкім аудан бойынша жол инфрақұрылымы саласында жүзеге асырылып жатқан жұмыстарға тоқталды.<img src="https://knadmin.beoblood.kz/uploads/1_Avtozhol_salasy_yzmetkerleri_rmet_t_rinde_811e7354fd.jpg" alt="1Автожол саласы қызметкерлері құрмет төрінде.jpg">Мерекелік сәтте «Арал құрылысы» ЖШС-нің негізін қалаушы, Қазақстанның Құрметті құрылысшысы, меценат, Арал ауданының Құрметті азаматы Оразғали Құлмырзаевқа Қызылорда облысының ең жоғарғы марапаты – «Құрмет грамотасы» табысталды. Сондай-ақ, автожол саласында табысты еңбек етіп жүрген бірқатар қызметкерлер облыс және аудан әкімдерінің, ҚР Көлік министрлігінің Алғыс хаттарымен марапатталды.Шара барысында құрылыс саласының ардагері, Қазақстанның Құрметті құрылысшысы, Арал ауданының Құрметті азаматы Д.Мадинов сөз сөйлеп, сала мамандарын және мерейтой иелерін құттықтады.Мерекенің жалғасында аудан әкімі бастаған қонақтар мекеме ауласында суыққа төзімді 30-дан астам жеміс ағаштары мен тал көшеттерін отырғызды. Сондай-ақ, Арал индустриалды-техникалық колледжі мен Арал көпсалалы колледжі студенттерінің құрылыс және ауыл шаруашылығы бағытындағы қолөнер бұйымдарымен танысты. Қонақтар сонымен қатар кәсіпорынның құрылым тарихынан сыр шертетін көрме жұмыстарымен танысты.Фото: Арал ауданының әкімінің баспасөз қызметі

Автожол саласы қызметкерлері құрмет төрінде

<a href="https://kyzylorda-news.kz/">Kyzylorda-news.kz</a>&nbsp; Маңғыстау облысында "Қазақтелеком" компаниясының бір топ қызметкері компания басшылығына және басқарма төрағасы Бағдат Мусинге видеоүндеу жолдап, жалақыларын көтеруді талап етті. Бұл туралы <a href="https://stan.kz/mangistaudakazaktelekom-kizmetkerleri-kompaniya-basshil-426208/">Stan.kz </a>ақпарат агенттігі хабарлады.Қызметкерлердің айтуынша, жалақыларының деңгейі қазіргі экономикалық жағдайға сәй&nbsp;емес.<blockquote>"Қазіргі инфляция жоғары деңгейде, қарапайым жұмысшыларға өз отбасыларын асырау өте қиын. Біздің жалақымыз барлық қажеттілігімізді өтеуге, азық-түлік сатып алуға және коммуналдық қызмет ақысын төлеуге жетпейді", – дейді қызметкерлер.</blockquote>Қызметкерлер өздеріне жеткен мәліметке сәйкес, компанияның жоғарғы басшылығы бір реттік төлем ретінде 10 айлық жалақы көлемінде сыйақы алғанын, ал қарапайым мамандарға тек 20 мың теңге ғана төленгенін алға тартты.<blockquote>“Бұл айқын әділетсіздік және біздің еңбегімізді бағаламаудың айқын көрінісі”, – дейді видеоүндеу авторлары.</blockquote>Қызметкерлер компания басшылығынан жағдайға назар аударуды және негізгі техникалық және өндірістік жұмыстарды атқаратын мамандардың жалақысын өсіру мүмкіндігін қарастыруды сұрайды."Қазақтелеком" компаниясы қызметкерлердің үндеуіне қатысты мәлімдеме жасады.<blockquote>"Қазір компаниядағы жағдай тұрақты. Аймақта омбудсмен және кәсіподақ өкілдерімен кездесу өткізілді, осы кездесулер барысында қызметкерлерден түскен барлық өтініштер мен ұсыныстар жан-жақты қаралып, алдағы жұмыста ескеріледі. Мұндай кездесулер компания тарапынан тұрақты түрде ұйымдастырылады", – делінген хабарламада.</blockquote>Компания кез келген тақырыпта, оның ішінде еңбекақы, мотивация және кәсіби даму мәселелерін талқылауға әрқашан ашық және конструктивті диалогқа дайын екенін атап өтті.Видеодан скрин

"Басшыларға қомақты сыйақы, жұмысшыларға 20 мың теңге": "Қазақтелеком" қызметкерлері жалақыларын көтеруді талап етті

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Нұрлыбек Нәлібаев мемлекет және қоғам қайраткері Мұхтар Құл-Мұхаммедке қала аумағындағы жаңадан салынған әлеуметтік, инфрақұрылымдық нысандарды таныстырды.Алдымен Президент саябағын қайта жаңғырту жұмыстарын көрді. Қазіргі таңда саябақ аумағында ауқымды абаттандыру жобалары қолға алынған. Бас мердігер Bi Global ЖШС жобаға сәйкес 3 аллея, 6 субұрқақ, 5 амфитеатр, 7 балалар ойын алаңын, 4 спорт және 4 workout, 7 демалыс аймағын, 4 фудкорт, теннис үстелдерін, биіктігі 50 метр болатын айналмалы дөңгелек аттракцион, би алаңын, стритбол, вело және жүгіру жолақтарын, сахна, сарқырама каналдары мен олардың үстінен өтетін көпірлер, шахмат, баскетбол және футбол алаңдарын, арқан саябағы мен модульдік-санитарлық нысандар орналастырмақ.<img src="https://knadmin.beoblood.kz/uploads/3_M_htar_l_M_hammed_yzylordada_y_zha_a_nysandarmen_tanysty_aa83d46934.jpg" alt="3Мұхтар Құл-Мұхаммед Қызылордадағы жаңа нысандармен танысты.jpg">Саябақта жылдың төрт мезгілінде үздіксіз жұмыс істейтін 300 орындық заманауи балалар тынығу лагері мен Ботаникалық білім беру орталығы (қысқы бақ) бой көтеріп келеді. Бұл нысандардың бас мердігері Alem Qurylys AQ ЖШС осы аумаққа спорт блогын, іс-шараларға арналған event-аймақ, тұрғын корпустар, қонақ үй үлгісіндегі шағын ғимараттар, дәстүрлі киіз үйлер, ашық бассейн, стадион, футбол алаңы және сахна салуды қарастырған.<img src="https://knadmin.beoblood.kz/uploads/4_M_htar_l_M_hammed_yzylordada_y_zha_a_nysandarmen_tanysty_7eeafe2881.jpg" alt="4Мұхтар Құл-Мұхаммед Қызылордадағы жаңа нысандармен танысты.jpg">Әрі қарай көпфункционалды Өнер орталығында болды. Қала сәулетіне ерекше сән берген ғимаратта бүгінде симфониялық, эстрадалық және ұлттық өнер бағытындағы концерттік бағдарламалар, шығармашылық кештер, түрлі форматтағы қоғамдық іс-шаралар өтеді.Келесі нысан – балалар мен жасөспірімдерге арналған «Сыр жұлдыздары» шығармашылық-инновациялық академиясы. Мұнда бір мезетте 500 оқушы, тәулігіне 3 мың оқушыға дейін қабылданады. Бассейн, топтық жаттығу бөлмесі, көркем гимнастика және фитнес залы, сондай-ақ үстел ойындарына арналған кабинет, жекпе-жек залдары бар. Барлық залда ұлдар мен қыздарға арналған жеке-жеке киім ауыстыру бөлмелері қарастырылған. Көркемдік-эстетикалық бағытта кескіндеме, сурет салу, резин арт бөлмесі, балалар шығармашылығы шеберханасы, сәндік-қолданбалы өнер, FabLab, дыбыс жазу студиясы, робототехника және жасанды интеллект, биотехнология, 3D модельдеу, киберспорт және математика кабинеттері жұмыс істейді.<img src="https://knadmin.beoblood.kz/uploads/2_M_htar_l_M_hammed_yzylordada_y_zha_a_nysandarmen_tanysty_256d10f8c4.jpg" alt="2Мұхтар Құл-Мұхаммед Қызылордадағы жаңа нысандармен танысты.jpg">Мұнан бөлек, «Анаға тағзым» орталығын, орталық алаңды, тарихи-өлкетану музейін, қалалық демалыс саябағын, «Қайсар арена» жаңа стадионын да көріп шықты.Аралаудан соң Мұхтар Құл-Мұхаммед Сыр өңіріндегі әлеуметтік және инфрақұрылымдық жобалардың ауқымын жоғары бағалап, өңірдің дамуына оң баға берді.<blockquote>"Қызылорда облысындағы халық санының өсімі - еліміздегі ең жақсы көрсеткіш. Аймақтың халқы ғана емес, бюджеті де еселеп артқан. Жыл сайын жаңа ғимараттар салынуда. 2008 жылы негізі қаланған Президент паркі Қазақстандағы ең ірі демалыс орнының біріне айналады.Сол жағалау ең алғаш рет сол 2008 жылы қаланың бас жоспарына енгізілген болатын. Бүгінде 30 мың тұрғыны бар жаңа қалаға айналды.Жаңадан салынған нысандар - Қызылорданың өсіп-өркендегенінің белгісі", - деді Мұхтар Абрарұлы.</blockquote><img src="https://knadmin.beoblood.kz/uploads/M_htar_l_M_hammed_yzylordada_y_zha_a_nysandarmen_tanysty_4ad26bf527.jpg" alt="Мұхтар Құл-Мұхаммед Қызылордадағы жаңа нысандармен танысты.jpg">Фото: Қызылорда облысы әкімінің баспасөз қызметі

Мұхтар Құл-Мұхаммед Қызылордадағы жаңа нысандармен танысты

<a href="https://kyzylorda-news.kz/">Kyzylorda-news.kz</a> Бүгін Қызылорда облысының қоғамдық даму басқармасының «Ерлік -елге мұра, ұрпаққа ұран» әлеуметтік жобасы аясында«Ерлік рухы – елдік жолы мен өмірлік ұстаным» тақырыбында республикалық ғылыми-танымдық конференция өтті.Конференцияның басты мақсаты – жастарға патриоттық тәрбие беру, азаматтық батылдық пен ерлік рухын дәріптеу, сондай-ақ қоғамға сіңірген еңбегі зор тұлғалардың өнегелі өмір жолын насихаттау.Конференцияға Зиялы қауым өкілдері, қоғам қайраткерлері, ғалымдар, ардагерлер, спортшылар, жастар, студенттер мен оқушылар, сондай-ақ БАҚ өкілдері қатысты.Жиында Қызылорда облысының қоғамдық даму басқармасының басшысы Р.Каюпов модератор болып, жастардың бойында патриотизм мен азаматтық жауапкершілікті қалыптастырудың маңыздылығын атап өтті.Шара барысында облыстық мәслихат депутаты Нәлібаев Мақсұт Ыбрайханұлы, тарих ғылымдарының кандидаты Оразбахов Айтжан Жұмабайұлы, теолог-ғалым Бақтияр Есенгелдіұлы Оспанов батыр тұлғалардың ерлік істері және олардың жастарға үлгі боларлық өмір жолдары туралы,&nbsp; ерлік пен азаматтық борыш, күнделікті өмірдегі ерліктің көріністері, имандылық пен мейірімділіктің құндылықтары туралы баяндамаларын оқыды.Сондай-ақ, «Қазақстан барысы – 2022» турнирі бас жүлдесінің жеңімпазы және «Әлем барысы» халықаралық турнирінің жүлдегері Исағабылов Мақсат спорттың патриоттық тәрбиедегі рөлі туралы және «Dauletten» қайырымдылық қорының директоры Қуандық Жасұлан табиғи апаттар кезінде ерлік көрсеткен азаматтардың жедел әрекеттерінайтып жеткізді.Шара барысында спикерлер отбасы құндылықтарының, ұрпақ тәрбиесіндегі ата-ана өнегесінің маңыздылығы мен отбасы әрбір азаматтың тұлға болып қалыптасуындағы ең алғашқы мектеп, ал ананың мейірімі мен әкенің қамқорлығы адамгершілік пен қайырымдылықтың бастауы екені айтылды.Шарада Астана қаласындағы көпқабатты үйлердің бірінен сәбиді құтқарып қалған жерлесіміз, ерлік пен батылдықтың жарқын үлгісін көрсеткен Сәбит Серікұлы Шонтақбаевтың ерлігі де ерекше құрметпен аталды. Ұлын ел намысына лайық азамат етіп тәрбиелеген анасына арнайы ақ жаулық тағылып, гүл шоқтары табысталды.Конференция барысында ерлік, патриоттық және азаматтық сана-сезім қалыптастыру мәселелері талқыланып, жастарды тәрбиелеуде маңызды рөл атқаратыны атап өтілді. Жиын ұлттық сана мен руханиятты дамытуға, өскелең ұрпаққа өнеге көрсетуге арналған тиімді платформаға айналды.

Ерлік рухы – елдік жолы мен өмірлік ұстаным

<a href="https://kyzylorda-news.kz/">Kyzylorda-news.kz</a>&nbsp; Қызылорда облыстық тарихи-өлкетану музейінің филиалы – С.Айтбаев атындағы көркемсурет галереясының ұйымдастыруымен Сыр өңірінің бас қаласы Қызылорданың Қазақ АКСР-інің астанасы болып жарияланғанына 100 жыл толуына орай ерекше көрме өтті.Атаулы дата аясында суретші Ерлен Дарханның «Қала келбеті: Қызылорда» атты жеке көрмесі көрермен назарына ұсынылды. Онда суретшінің қолымен жасалған қала ғимараттарының көркем макеттері қойылып, Қызылорданың сәулеттік және мәдени бейнесі паш етілді.Көрменің ашылу рәсімін Қызылорда облыстық тарихи-өлкетану музейі директорының орынбасары Жанат Ахметова жүргізіп, қала тарихын ұлықтаудың маңыздылығын атап өтті.Іс-шараға мәдениет және білім саласының қызметкерлері, өнер иелері, студенттер мен автордың туыстары қатысты.Көрменің басты мақсаты – Қызылорда қаласының тарихи келбетін сақтау, мәдени және сәулеттік мұрасын ұрпақ санасында жаңғырту, сондай-ақ туған жерге деген сүйіспеншілікті арттыру болып табылады.

«Қала келбеті: Қызылорда»атты жеке көрме өтті

<a href="https://kyzylorda-news.kz/">Kyzylorda-news.kz</a>&nbsp; Солтүстіктегі көршіміз геосаяси тұрғыдан күрделі ел. Бірақ осындай көршімен татулықта болу ұтымды шешім. Тек бұл қатынас тең әріптестік пен өзара құрметке негізделуі тиіс.Осы ұстаным аясында Тоқаев пен Путиннің кездесуі өтті. Кездесудің нәтижесінде екі ел арасындағы байланысты жан-жақты стратегиялық серіктестік деңгейіне көтеру жөніндегі декларацияға қол қойылды.Тараптар бірнеше маңызды бағыт бойынша уағдаластыққа келді. Ең алдымен, көлік-транзит саласы ерекше назарға алынды. «Солтүстік – Оңтүстік», Транскаспий дәлізі, «Аягөз – Бақты» және «Достық – Мойынты» теміржол жобалары арқылы жүк тасымалының жаңа мүмкіндіктері ашылады.Энергетика саласында «Росатом» компаниясымен алғашқы атом электр станциясын салу бойынша жұмыс жүріп жатыр. Сондай-ақ мұнай, көмір және электр энергиясын өндіру мен жеткізуде ынтымақтастық нығая түседі.Мәдени және гуманитарлық байланыстар да дамып келеді. Астанада «Мәңгілік достық аллеясы», Мәскеуде «Қазақстан–Ресей достығы сквері» ашылды. Енді Ресей астанасында Қазақ мәдени орталығын ашу жоспарланып отыр. Өнер адамдары өзара гастрольдер өткізіп, шығармашылық байланыс орнатуда.Білім саласында да ықпалдастық арта түсуде. Қазақстанда Ресейдің 9 жоғары оқу орнының филиалдары жұмыс істейді, ал биыл әл-Фараби атындағы ҚазҰУ-дың Омбыдағы филиалы ашылды. Енді елімізде Ресейдің медициналық университетінің өкілдігін ашу мәселесі қарастырылып жатыр.Бұдан бөлек, ғарышты игеру, IT және креативті индустрия салаларында жаңа жобалар іске аспақ.Жалпы, бұл кездесу екі ел арасындағы қатынасты жаңа деңгейге көтерген маңызды қадам болды.Елдос ЖҰМАҒҰЛОВ

Елдос ЖҰМАҒҰЛОВ: Бұл кездесу екі ел арасындағы қатынасты жаңа деңгейге көтерген маңызды қадам

<a href="https://kyzylorda-news.kz/">Kyzylorda-news.kz</a>&nbsp; Солтүстікке соққан жел. Қазақстан биылдыққа дипломатия пазлын құрап бітті«Көршімен татудың көңілі тыныш» дейді халқымыз. Бұл нақыл бүгінде Қазақстан мен Ресей арасындағы қатынастың дәл айнасы іспетті. Екі елдің байланысы жай ғана ресми әріптестік емес, ғасырлардан тамыр тартқан достық пен сенімге құрылған стратегиялық серіктестік. Қазір дүние дүрбелең, геосаяси ахуал күрделі. Осындай алмағайып кезеңде Қазақстан мен Ресей арасындағы өзара түсіністік пен сындарлы диалогтың сақталуы – тұтас өңірдің тұрақтылығы үшін маңызды тірек, көпке үлгі боларлық құбылыс.Кеше Мемлекет басшысы Қасым-Жомарт Тоқаев Ресейге мемлекеттік сапармен барды. Сапар аясында бірқатар маңызды кездесулер өткізіліп, Путинмен ынтымақтастықтың жаңа бағыттары талқыланды. Сапар аясында екі ел Президенттері Орал қаласында өтіп жатқан XXI Қазақстан–Ресей өңіраралық форумының пленарлық сессиясына бейнебайланыс арқылы қатысты.Форумда Мемлекет басшысы: «Сауда-экономикалық және инвестициялық ықпалдастық жыл сайын тұрақты түрде нығайып келеді», – деп атап өтті.Шынында да, Ресей бүгінгі таңда Қазақстанның ең ірі сауда және инвестициялық серіктесі. Екі ел арасындағы тауар айналымы қазірдің өзінде 28 миллиард доллардан асқан. Мақсат болашақта осы көрсеткішті 30 миллиард долларға жеткізу. Осы бағытта нақты және жүйелі жұмыс жүріп жатыр.2024 жылы Ресей инвестициясы рекордтық деңгейге жетіп, 4 миллиард долларға тең болды. Ал жалпы алғанда, Қазақстан экономикасына құйылған ресейлік инвестиция көлемі 27 миллиард доллардан асып түскен. Өз кезегінде, қазақстандық бизнес те көрші елге белсенді қаржы салып келеді, Ресейге салынған қазақстандық инвестиция көлемі 9 миллиард долларға жуықтады.Өнеркәсіптік кооперация – екіжақты серіктестіктің ең айқын көрінісі. Қазірдің өзінде жалпы құны 48,2 миллиард долларды құрайтын 171 бірлескен жоба жүзеге асырылуда. Бұл – 44 мыңнан астам адамды жұмыспен қамтып отырған орасан ауқымдағы серіктестік. Оның ішінде 105 жоба толық іске қосылған, 40-ы жұмыс үстінде, ал 31 жоба дайындық кезеңінде тұр.Президент Тоқаев: «Осы қомақты көрсеткіштер өзара ынтымақтастық деңгейінің қаншалықты жоғары екенін дәлелдейді. Бірақ біз мұнымен тоқтап қалмауымыз керек. Алға ұмтылып, сауда мен инвестиция көлемін ұлғайта беру – біздің ортақ міндетіміз» – деді.Шынында да, көршімен тату болу жай ғана саясат емес, халықтың болашағына салынған көпір. Ал Қазақстан мен Ресей арасындағы байланыс – осы көпірдің беріктігін нығайта түспек.Айбар ОЛЖАЕВ

Айбар ОЛЖАЕВ: Қазақстан биылдыққа дипломатия пазлын құрап бітті

<a href="https://kyzylorda-news.kz/">Kyzylorda-news.kz</a> Тоқаев Ресейді Қазақстанның “Құдай қосқан көршісі” деп атады. Бұл туралы <a href="https://stan.kz/tokaev-reseydi-kazakstannin-kyday-koskan-korshisi-dep-a-426162/">Stan.kz</a> ақпарат агенттігі хабарлайды. Қасым-Жомарт Тоқаевтың Ресейге сапарының құрметіне Путиннің атынан Кремльде мемлекеттік қабылдау өтті.<blockquote>“Қиын жылдарда біз бір-бірімізді қолдап, иық тіресіп қатар тұрдық. Бірге талай қиындықты жеңдік, бүгінде жадымызда сақтап, жүрегіміздің төрінде қастерлеп ұстайтын Ұлы Жеңіске бірлесіп жеттік. Ата-бабамыздан "Құдай қосқан көрші" деген сөз қалған. Ресей – Қазақстанның Құдай қосқан көршісі”, – деді Тоқаев.</blockquote>Владимир Путин де &nbsp;екі арасындағы достыққа ерекше тоқталды."Қазақстан – Ресейдің одақтасы, стратегиялық серіктесі және тату көршісі. Біз бұл елмен достыққа, өзара сенім мен құрметке негізделген көпжоспарлы және теңқұқылы қарым-қатынас құрып жатырмыз". Қасым-Жомарт Тоқаев пен Владимир Путин келіссөздер қорытындысы бойынша Қазақстан мен Ресей арасындағы мемлекетаралық қарым-қатынасын жан-жақты стратегиялық серіктестік және одақтастық деңгейіне дейін жеткізу жөніндегі декларацияға қол қойды.Мемлекеттер басшыларының қатысуымен бірқатар үкіметаралық және ведомствоаралық құжаттарды алмасу рәсімі өтті:- Қазақстан Республикасы Үкіметі мен Ресей Федерациясы Үкіметі арасындағы экономикалық ынтымақтастықтың 2026-2030 жылдарға арналған кешенді бағдарламасы;- Қазақстан Республикасы Үкіметі мен Ресей Федерациясы Үкіметі арасында үшінші елдерге экспортқа жеткізуге арналған ресейлік және қазақстандық жүктерді темір жол көлігімен транзиттік тасымалдау және ауыстырып тиеу саласындағы ынтымақтастықты ұйымдастыру туралы келісім;- Қазақстан Республикасы Үкіметі мен Ресей Федерациясы Үкіметі арасында көлік қауіпсіздігін қамтамасыз ету саласы бойынша өзара ықпалдастық жөніндегі келісім;- Қазақстан Республикасы Үкіметі мен Ресей Федерациясы Үкіметі арасындағы "Союз-5" және "Бәйтерек" ғарыш зымыран кешендеріне ұшу сынағын жүргізу үшін Қазақстан-Ресей мемлекетаралық комиссиясын құру туралы келісім;- Қазақстан Республикасы Үкіметі мен Ресей Федерациясы Үкіметі арасында Ақтау қаласында Ресей Федерациясының Бас консульдығын құру туралы ноталармен алмасу формасындағы келісім;- Қазақстан Республикасы Үкіметі мен Ресей Федерациясы Үкіметі арасында халықтың санитарлық-эпидемиологиялық жағдайын қамтамасыз ету саласындағы ынтымақтастық туралы келісім;- Қазақстан Республикасы Өнеркәсіп және құрылыс министрлігі мен Ресей Федерациясы Экономикалық даму министрлігі арасында ерекше экономикалық аймақтарды дамыту мәселелері бойынша өзара түсіністік туралы меморандум;- Қазақстан Республикасы Оқу-ағарту министрлігі мен Ресей Федерациясы Оқу-ағарту министрлігі арасында Қазақстан Республикасында қазақ-орыс жалпы білім беру ұйымдарын ашу және Ресей Федерациясында орыс-қазақ жалпы білім беру ұйымдарын ашу бойынша ниеттестік туралы меморандум;- Қазақстан Республикасы Экология және табиғи ресурстар министрлігі мен Ресей Федерациясы Табиғи ресурстар және экология министрлігі арасында Қазақстан Республикасына Ресей Федерациясынан Амур жолбарыстарын әкелуге әзірлік және жеткізілген жануарлардың бастапқы бейімдеуден өтуі бойынша бірлескен іс-шаралар жоспары;- Қазақстан Республикасы Атом энергиясы жөніндегі агенттігі мен Экологиялық, технологиялық және атомдық бақылау жөніндегі федеральдық қызметі (Ресей Федерациясы) арасында атом энергиясын бейбіт мақсатта пайдалануда ядролық және радиациялық қауіпсіздікті реттеу саласы бойынша ынтымақтастық жөніндегі өзара түсіністік туралы меморандум;- Қазақстан Республикасы Көлік министрлігі мен Ресей Федерациясы Көлік министрлігі арасында Қазақстан-Ресей мемлекеттік шекарасындағы автокөлік өткізу бекеттерін дамыту жөніндегі іс-шаралар жоспары;- "ҚТЖ" ҰК" АҚ мен "РТЖ" ААҚ арасындағы 2030 жылға дейінгі мемлекетаралық түйісу пункттерін дамыту туралы келісім;- "Қазпошта" АҚ мен "Ресей поштасы" АҚ арасындағы ынтымақтастық туралы меморандум.Артынша Қасым-Жомарт Тоқаев пен Владимир Путин Қазақстан өнерпаздарының гала-концертіне барды. Қазақстанның Ресейдегі мәдениет күндері аясында ұйымдастырылған мерекелік кеш Үлкен театрда өтті. Сахнада қазақтың музыкалық және хореографиялық өнерін насихаттап жүрген танымал әртістер мен шығармашылық ұжымдар өнер көрсетті.Фото: Ақорда

Тоқаев Ресейді Қазақстанның "Құдай қосқан көршісі” деп атады

<a href="https://kyzylorda-news.kz/">Kyzylorda-news.kz</a> Дзюдодан Семей облысында 10-13 қараша аралығында Қазақстан чемпионаты өтіп жатыр. Айтулы додада Олимпиада чемпионы Елдос Сметов құрметті қонақ ретінде қатысты. Бұл туралы <a href="https://stan.kz/berik-uali-olimpiada-chempioni-eldos-smetovka-10-millio-426159/">Stan.kz </a>ақпарат агенттігі хабарлайды.Аталмыш іс шараның ашылу салтанатында Абай облысының әкімі Берік Уәли даңқты спортшыға құрмет көрсетіп, 10 миллион теңгенің сертификатын табыс етті.Сонымен қатар Елдос Сметов облыс басшылығы мен жарысты ұйымдастырушыларға алғысын білдірді.Бұған қоса ол ел біріншілігіне қатысып жатқан барлық дзюдошыларға сәттілік тіледі.<blockquote>“Облыс басшылығына, спорт саласының өкілдеріне және чемпионатты жоғары деңгейде өткізуге үлес қосқан барлық адамдарға алғысымды білдіремін. Қатысушылар арасынан болашақ олимпиадалық чемпиондар өсетініне сенемін. Олар Қазақстанды әлемдік ареналарда танытып, туымызды көтереді. Барлық қатысушыларға сәттілік тілеймін!” – деді Олимпиада чемпионы.</blockquote>Айта кетейік, Елдос Сметов 2024 жылы Париж Олимпиадасында топ жарғаннан бері әлі ешқандай ірі додаларға қатысқан жоқ. Спортшының айтуы бойынша иығына ота жасалғаннан кейін қалпына келіп жатыр. Біз Елдос Сметовты 2026 жылы татамиде қайта көруіміз әбден мүмкін.Елдос Сметов ел тарихында дзюдодан тұңғыш Олимпиада чемпионы. 2016 жылғы Рио Олимпиадасының күміс жүлдегері, 2020 жылы Токио Олимпиадасында қола медаль еншілеген. Оның қоржынында Олимпиада ойындарының барлық жүлде қоры бар.

Қазақстан және Қызылорда облысының жаңалықтары: Қоғам