<a href="https://kyzylorda-news.kz/">Kyzylorda-news.kz.</a> Қармақшы ауданы Байқоңыр қаласында бүгінде кәсіп түрлері мен нысандар саны артып келеді. Соның бірі – «Болашақ» сауда орталығы. Ол қала тұрғындары мен қонақтарына үздіксіз қызмет көрсетумен қатар, тұтынушы талғамынан шығып келе жатқан дүкен. Онда сапасы жоғары және табиғи азық-түлік өнімдері сөрелерде самсап тұр. Жұмсақ нан, шелпек, самса, тұшпара, басқа да ұннан жасалған өнім түрлеріне қашан да сұраныс жоғары. Сапасынан бөлек, бағаның да тұрақты болуына да аса мән берген.Тағы бір айта кетерлігі, ондағы нан өнімдері сауда орталығының өз наубайханасында өндіріледі. Нанға сұраныстың көптігінен кейде сөреге қойылған өнім тұрғындарға жетпей қалып жататыны бар. Отбасылық кәсіп иелері Ерлан Жаппасбаев пен Меруерт Тоқтарбекқызы тұтынушының үздіксіз сұранысына сай кей сәтте мезгілге қарамай қайта нан пісіретінін айтады. Сонымен қатар кондитерлік өнімдер де орталыққа қарасты шағын цехта дайындалып, сатылымға шығарылады екен.&nbsp; Өнегелі отбасында өсіп-өніп, қала тұрғындарының алғысына бөленген кәсіпкерлер елдің өркендеуінде кәсіпкерлік саласының маңызды рөл атқаратынын алға тартады.Кәсіпкер 50-ден аса қала тұрғынын тұрақты жұмыспен қамтыған. Ұжымда еңбек ететіннің көпшілігі жастар. Сол себепті де ол қарамағындағылардың тұрмыс-тіршілігіне назар аударып, жұмыс істеуіне барынша жағдай жасап қойған. Кәсіп істеу оңай тірліктен емес. Әйтпесе елдің бәрі кәсіп ашып кетер еді-ау. Оған қаншама төзім, шыдам, сабыр керек. Адаммен жұмыс істеген соң түрлі жағдай болады. Осындай кедергілердің бәрін еңсеріп, бағытынан айнымай келе жатқан Меруертті осы адамгершілік қасиеті үшін байқоңырлықтар сыйлап, құрметтейді. Біреуге болсыншы дейтін қағиданы ұстанатын кәсіпкердің жұмысы сан-салалы болғанымен, ұжымды ұйымдастырып, ұйыстырып ұстауда тәжірибесі көпке үлгі.<blockquote>«Қазақ қашанда бір-біріне демеу болып, үйіне келген қонақ үшін қазан көтерген. Дастарқанын жайып, батасын алған. Жарым екеуміздің де бар арман-мақсатымыз халыққа адал қызмет етіп, батасын алу, ризашылығына бөлену. Адалынан жүріп-тұрсаңыз, кәсіп етсеңіз одан өрісіңізді кеңейтпесеңіз, жаман болмасыңыз анық. Атамыз Бердібек Жаппасбаев Байқоңырда алғашқылардың бірі болып кәсіп бастаған кісі. Ол 8 сауда желісі мен Ақай ауылында 4 шағын цех ашты. Алғашында атамыз қарамағына 300 адамды жұмыспен қамтып, тұтынушыны шұжық, ет, сүт, балық, макарон, тағы басқа тұрмысқа қажетті өнімдермен қамтамасыз етіп отырды», – дейді Меруерт Тоқтарбекқызы.</blockquote>Бала кезінен әкесінің әрбір істеген ісіне қарап, өзіне өнеге алған Меруерттің жары Ерлан да кәсіпкер болуға жастайынан-ақ бейім болды. Ол да кәсіптің бірнеше түрін ашып, дамытуда. Жалпы бұл әулетте кәсіп ету әкеден-балаға мирас болып келе жатқан дүние десек артық емес. Өйткені ерлі-зайыптылардың отбасындағы тұңғыш баласы Ермек те кәсіптің қыры мен сырына кішкентайынан қанық болып өсіп, ата-анадан үлгі алған жайы бар.Әрбір нәрсенің өз қайнар бұлағы болады. Әулеттегі отбасылық кәсіптің ұйымдастырушысы Ерлан Бердібекұлы 1998 жылы Байқоңырда сүзгіден өткен таза ауыз су шығаратын бірнеше аппарат сатып алып, онымен қала тұрғындарын қамтамасыз еткен. Сонымен қатар еліміздегі «Жасыл экономика» бағдарламасы аясында күннен қуат алатын электр стансалары құрылып жатқанын білеміз. Осы бастаманы жүзеге асыруға асыққан жаңалыққа құмар Ерлан бауырымыз өз шаруашылығында іске қосқан азамат. «Құс өсірсең, тауық өсір» демекші, шаруашылық ауласында жүрген бірнеше жылқы, сиыр, ешкімен қатар Қостанайдан 1200 голландиялық тауық әкелгенін және олардың саны бүгінде екі есеге артса, шаруашылық меншігіндегі басқа бірнеше жүздеген қазақы тауық тұқымы өсірілуде. Олардан алынған жұмыртқа дүкенге сатылымға қойылады. Шаруашылықтың асырап отырған бөденесі де сұранысқа ие өнім. Кәсіпкердің өсіріп отырған гидропоникалық цехы да бір жаңалық.Ерлі-зайыптылар шаруашылық жылыжайында дастарқанға қойылатын ас мәзірі – түрлі салаттың сәнін келтіретін айсберг, изумруд деген атауы бар дәруменді жапырақтар мен қызанақ, қияр, тағы басқа көкөністерді өндіруде.Қазіргі таңда 100-ге жуық өңір тұрғынын жұмыспен қамтып отырған Ерлан мен Меруерттің болашаққа жасаған жоспарлары жетерлік. Іскер жандар кәсіпте жұртшылыққа шеберлігімен танылса, олар отбасында 5 бала тәрбиелеп отырған бақытты ата-ана. &nbsp;<img src="https://knadmin.beoblood.kz/uploads/1666760757_bolashaktyn_bolashagy_bekem_629aa5c82b.jpg" alt="1666760757_bolashaktyn-bolashagy-bekem.jpg">

Отбасылық кәсіптің өрісі кеңеюде

<a href="https://kyzylorda-news.kz/">Kyzylorda-news.kz.</a>&nbsp;&nbsp; Қызылордада халықаралық мәртебеге ие жергілікті әуежайға жаңа ғимарат салынады жән бұл мақсатта бюджет қаражатын жұмсалмайды.<blockquote>"Болат Өтемұратов қоры "Қорқыт-ата" Қызылорда әуежайының жолаушыларға арналған жаңа терминалының жобасын таныстырды. Еске салсақ, өткен жылдың 26 ​​қазанында Қызылорда облысының әкімдігі, "Қорқыт-ата" әуежайы" АҚ және Болат Өтемұратов атындағы қор Қызылорда әуежайының жаңа жолаушылар терминалын салу бойынша ынтымақтастық туралы меморандумға қол қойды", - деп хабарлады Қызылорда облысының әкімдігі.</blockquote>Қор жобаны толығымен қаржыландыруды жоспарлап отыр – бұл өңірге меценаттық көмек болмақ.Терминалды жобалау жұмыстары 2021 жылы басталды, жобалаушы – Нидерланды, Ресей, Түркия және Парсы шығанағы елдеріндегі әуежайларды жобалауда 20 жылдық тәжірибесі бар GMW Mimarlik түрік компаниясы.Қор қаржыландыратын жобаның құны шамамен 25 миллион АҚШ долларын құрайды. Жүзеге асыру мерзімі – 2023 жылдың ақпаны мен 2024 жылдың қыркүйегі аралығын қамтиды. Жаңа әуежай ғимаратын салу кезінде 600 жұмыс орны ашылады деп жоспарланып отыр.Жоба IATA (халықаралық әуе көлігі қауымдастығы), ІСAO (халықаралық азаматтық авиация ұйымы) және EDGE (ресурс тиімділігіне бағытталған экологиялық ғимараттарды сертификаттау жүйесі) халықаралық стандарттарының талаптарына сәйкес жүзеге асырылады. Мұнда заманауи инженерлік жабдықтар мен архитектуралық шешімдер, экологиялық таза құрылыс материалдары қолданылады.Шыны витраждары бар екі қабатты терминалдың жалпы ауданы 7 500 шаршы метрді құрайды. Ғимарат сырты табиғи тас және қасбеттік панельдермен қапталады. Қасбеттердің әйнекті аумағында топсалы витраждар жүйесі орнатылып, қатты селективті жабыны бар қос камералы шыны терезелер қолданылады. Алюминий терезелер де қос камералы шыны терезелермен толтырылады.Жаңа терминалда ішкі және халықаралық рейстерге қызмет көрсету секторлары, транзиттік жолаушыларға арналған зал, CIP-залдар (белгілі бір санаттағы жолаушыларды қарсы алуға/ шығарып салуға арналған жайлылығы жоғары залдар) қарастырылады. Сондай-ақ, Duty Free аймақтары, дәмханалар, сауда нүктелері, намазханалар, жүк сақтау орындары және тағы басқа орындар қамтылады.Он паспорттық бақылау кабинасы, телескопиялық трап, 2 эскалатор, 2 лифт, жүк конвейерлік таспа қарастырылады. Шекара және кеден қызметтері, фитосанитария және ветеринария, санитарлық-эпидемиологиялық бақылау және желілік полиция бөлімшелері қызметкерлері үшін мамандандырылған орындар ескерілді.Модернизациядан кейін әуежай сағатына 300 жолаушыға қызмет көрсете алады және бұл қазіргі жолаушылар ағынынан екі есе көп.<blockquote>"Қазіргі таңда демеушілердің қаржыландыруы арқасында ескі ғимараттың ішкі-сыртқы безендіру жұмыстары жүргізіліп, 100 миллион теңгеге жуық қаражатқа аула қалпына келтірілді. "Қорқыт-ата" әуежайы арқылы аптасына 21 рейс орындалады, оның ішінде 8 рейс Астанаға және 13 рейс Алматыға Air Astana, Qazaq Air және Fly Arystan авиакомпанияларымен орындалып жатыр", - деді облыстық әкімдіктегілер.</blockquote>

Қызылордада әуежай терминалының жаңа ғимараты салынады

<a href="https://kyzylorda-news.kz/">Kyzylorda-news.kz.</a> Ұлттық мереке - Республика күнінде қызылордалықтарға айрықша тарту жасалды. Бір мезетте бірнеше әлеуметтік нысан пайдалануға беріліп, балаларға қуаныш сыйлайтын жаңа спорт-ойын алаңдары ашылды.Облыс әкімі Нұрлыбек Нәлібаев аймақ тұрғындарын ұлық мерекемен құттықтап, игі тілегін арнады.<blockquote>«Барша жерлестерімді қайта оралған ұлттық мерекеміз - Республика күнімен шын жүректен құттықтаймын!Араға 13 жыл салып, Президентіміздің Жарлығымен Республика күні Ұлттық мереке болып халықпен қайта қауышты.Бұл тарихи мәні жоғары, идеологиялық салмағы ерек айтулы күн еліміздің бүгіні мен ертеңіне адал қызмет ететін, ерен істер мен елеулі бастамаларды жалғастыратын барша азамат үшін маңызды»,-деді Н.Нәлібаев.</blockquote>Мерейлі мерекеде қоғамдық көліктер қатары жаңа 40 автобуспен толықты. Бұған дейін Қызылорда автобус паркіне «Өнеркәсіпті дамыту қоры» АҚ-ы арқылы жаңадан лизингке 150 дана автобус алуға 1,43 млрд. теңге қаржы бөлінген. Соның аясында өткен айда 21 жаңа автобус алынды. Ал, қараша айында қалған жаңа көліктер келетін болады.Өңірде облыс әкімінің бастамасымен "Балалар жылына" арналған демеушілердің қолдауымен құны 1,6 млрд.теңгені құрайтын қала, аудан ішінде 80 спорт-ойын алаңы бір мезетте тарту етілді.Ұлттық мереке - Республика күні қарсаңында туған жерге жанашыр меценаттың қаржысы есебінен Жаңақорған ауданында құны 790 млн. теңгені құрайтын заманауи демалыс паркі ашылды. Ал, Сырдария ауданының Нағи Ілиясов ауылында 350 млн.теңгеге "Еңбекшілер аллеясы" бой көтерді.Аймақта білім саласының дамуына тілеулес меценат азаматтардың мектеп, балабақша ашу ісіне ынтасы жоғары. Республика күнінде 300 орындық жаңа балабақша есігін айқара ашты. Жыл соңына дейін тағы 2 мемлекеттік балабақша пайдаланылуға беріледі.Соңғы 5-6 айдың ішінде жергілікті кәсіпкерлер 9 млрд.теңгеге қолдау көрсетіп, ауқымды жобалардың жүзеге асуына дәнекер болды.Мереке құрметіне Жалағаш ауданында құны 431 млн. теңгеге 200 орындық Оқушылар үйі мен 50 орындық Өнер мектебі, жаңа дәрігерлік амбулатория пайдалануға берілді. Теңізді өлке Арал ауданында 150 млн. теңгеге "Балықшылар монументі" мен аллея ел игілігіне берілуге дайын.Биыл өңірде 4 жаңа білім ошағы ашылды. Жыл соңына дейін 8 мектеп табысталады. Апатты деп танылған Тоқабай ауылындағы мектеп жеке инвестор есебінен 500 млн.теңге қаржыға салынуда. Оқушыларды тасымалдау үшін осы оқу жылында мектептерге 30 автобус беріледі.Облыста түрік компанияларымен бірлескен ынтымақтастық жаңа деңгейге көтерілді. Биыл қала аумағын жылу және электрмен толық қамтамасыз ететін қуаттылығы 240 мегаватты құрайтын жылу электр орталығының іргетасы қаланды. Құны 215 млрд. теңгеден асатын жоба 2025 жылы аяқталады. Тағы бір түрік компаниясымен жылына 24 мың тонна қызанақ пастасын шығаратын зауыт салу туралы келіссөздер жүргізілуде.Сыр елінде жаңа 1,6 млрд. теңгені құрайтын Неке сарайы, 3,7 млрд. теңгеге 1000 орындық Өнер орталығы, Сол жағалаудың бойынан 2,7 млрд. теңгеге Қан орталығының құрылысы жүруде. Белгілі кәсіпкер, меценат Марат Дүйсенбаевтың демеушілігімен құрылысы басталған құны 1,5 млрд. теңгені құрайтын «Анаға тағзым» орталығы шаһардың ажарын аша түседі.Өңірде салынған шыны зауытының күйдіру пеші қажетті температурасына жетіп, қазан айының 9 күні алғашқы сынама шыны өнімі өндірілді. Зауыт айналасынан 8 ілеспе өндіріс дамиды. Зауытта шыны-талшықты, композиттік материалдар және басқа да өнімдер шығарыла бастайды.Қаланың негізгі қақпасы әуежай да қайта жаңарады. Болат Өтемұратовтың тікелей қолдауымен құны 12 млрд. теңге болатын "Қорқыт ата" әуежайының жаңа терминалы салынуда. Қазірдің өзінде өзге де демеушілермен 100 млн.теңгеге бұрынғы терминалдың ішкі және сыртқы әрлеу жұмыстары жүргізілді.Балалар үшін тағы бір қомақты сый - Қызылорда қаласында заманауи үлгідегі «Оқушылар Сарайы» бой көтереді.Алдағы 3 жылда аймақта "Жайлы мектеп" жобасы аясында құны 70 млрд. теңгеге 15 мемлекеттік мектептің құрылысын салу жоспарланған. Оның ішінде 19,6 млрд. теңгеге келер жылы 9 білім ошағының құрылысы басталады.Денсаулық сақтау саласында 2 жыл ішінде 27 жаңа нысан халық игілігіне беріледі. Орталық атқарушы органдармен бірге жасалған орнықты жұмыстардың нәтижесінде 36,4 млрд. теңгеге Қызылорда қаласынан көпсалалы аурухана мен емхана тұрғындардың игілігіне қызмет ететін болады.Аймақта Республика күні салтанатты жиынмен қорытындыланады. Облыстың әлеуметтік-экономикалық дамуына ерекше үлес қосқан азаматтар мемлекеттік наградамен марапатталады.<figure class="image"><img src="https://knadmin.beoblood.kz/uploads/311616353_412427284411855_8459190422709568683_n_5ab2219fe5.jpg" alt="311616353_412427284411855_8459190422709568683_n.jpg"></figure><img src="https://knadmin.beoblood.kz/uploads/311686741_412427357745181_2192995874804547043_n_40ae7ac3f9.jpg" alt="311686741_412427357745181_2192995874804547043_n.jpg"><img src="https://knadmin.beoblood.kz/uploads/311613391_412427337745183_307088329549202560_n_0e40480c59.jpg" alt="311613391_412427337745183_307088329549202560_n.jpg">&nbsp;

Cыр елінде бір мезетте 80 cпорт-ойын алаңы, 40 автобус, оқушылар үйі мен жаңа балабақша берілді

<a href="https://kyzylorda-news.kz/">Kyzylorda-news.kz.</a>&nbsp; ҚР Сыбайлас жемқорлыққа қарсы іс-қимыл Агенттігінің Превенция қызметінің басшысы Саян Ахметжановтың Қызылорда облысына жұмыс сапары аясында өткен бизнес-қауымдастық өкілдерімен кездесуде Кәсіпкерлер палатасының директоры Пірмұхаммед Сыздықов кәсіпкерлердің құқығын шектеп жүрген үш саланы атады.Сыбайлас жемқорлыққа қарсы күрес мәселелері талқыланған жиынға облыс әкімінің орынбасары Мархабат Жайымбетов төрағалық етіп, кәсіпкерлер, мемлекеттік мекеме басшылары мен өзге де сала өкілдері қатысты.Шарада Қызылорда облысы кәсіпкерлер палатасының директоры Пірмұхаммед Сыздықов облыста 63 мыңнан астам шағын және орта кәсіпкерлік субъектілері тіркелгенін, өткен жылмен салыстырғанда көрсеткіш 11,8 пайызға артқанын атап өтті. Қазір өңірдегі шағын және орта бизнес субъектілерінде 104 мыңнан астам адам жұмыс істеп жатыр екен.<blockquote>«Бұл оң көрсеткіштер облыста бизнесті қолдауға бағытталған шаралардың нәтижесі деп білемін. Мемлект басшысы бизнес қауымдастықпен кездесулерінде кәсіпкерліктің дамуын тежеп тұрған проблемаларды ортаға салып, «Атамекен» мен Үкіметке, жергілікті атқарушы органдарға бизнесті тежейтін кедергілерді азайтуды тапсырды. Бұл бағытта Ұлттық кәсіпкерлер палатасы кәсіпкерлікті қорғаудың экожүйесі жобасын жүзеге асырып жатыр», – деді хабарламасында Пірмұхаммед Сыздықов.</blockquote>Палата директоры аталған жоба аясында Кәсіпкерлер палатасы Қызылорда облысының прокуратурасымен бірлескен бұйрық шығарып, жұмыс тобын құрғанын жеткізді. Жұмыс тобының құрамында Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Қызылорда облысы бойынша департаментінің өкілдері де бар.Бизнесті қорғаудың экожүйесі аясында кәсіпкерлік субъектілерінің қылмыстық қудалау органының сотқа дейінгі іс жүргізу барысында құқығын бұзу фактілерін және мемлекеттік реттеуді жүзеге асыру кезінде қажетсіз әкімшілік кедергілерді азайтуға бағытталған ұсыныстар әзірлеу көзделген.Бұл бағытта өңірімізіде тиісті шаралар жүргізіліп жатыр. Оған қыркүйекте облыс әкімінің, қазанда облыс прокурорының бизнес қауымдастықпен кездесуінде көтеріліп, шешіліп жатқан мәселелер дәлел.Пірмұхаммед Сыздықов Кәсіпкерлер палатасына құқығын қорғауды сұраған өтініштердің 20 пайызы мемлекеттік сатып алу, 12 пайызы ауыл шаруашылығы, 9 пайызы салық саласына тиесілі екенін атап өтті.<blockquote>«Кәсіпкерлер мемлекеттік сатып алу бойынша тапсырыс берушілердің келісім шарт бойынша актілерге қол қоймай, уақытылы төлем жүргізбейтініне шағымданып жатыр. Ауыл шаруашылығы саласындағы проблема субсидия заңдылықтарына байланысты болса, салық саласында мәмілелерді жарамсыз деп тану фактілерімен жиі кездесетініне наразы», – деді Палата директоры.</blockquote>Атап өту керек, соңғы 10 айда кәсіпкерлер Палатаға құқығын қорғауды сұрап, 420 өтініш берген. Бұл өтініштердің 119-ы оң шешілді. Нәтижесінде кәсіпкерлердің 167, 2 млн теңге қаржысы сақталған. &nbsp;<figure class="image"><img src="https://knadmin.beoblood.kz/uploads/311862304_5866830046700833_6831168981067794363_n_2e8c668f6d.jpg" alt="311862304_5866830046700833_6831168981067794363_n.jpg"></figure>

Кәсіпкерлер палатасының директоры Қызылордада бизнес өкілдерінің құқығын шектеп жүрген үш саланы атады

<a href="https://kyzylorda-news.kz/">Kyzylorda-news.kz.</a> Бұл туралы Қызылорда облысы кәсіпкерлер палатасының директоры Пірмұхаммед Сыздықов әлеуметтік желідегі парақшасында жазды.Естеріңізде болса, қыркүйек айында Кәсіпкерлер палатасының бастамасымен, бизнесті қорғаудың экожүйесі аясында облыс әкімі Нұрлыбек Нәлібаев аймақтың бизнес қауымдастығымен кездесіп, проблемасын тыңдап, шешу жолдарын бірге талқылаған болатын. &nbsp;Осы кездесуде аймақ басшысы бұдан кейін бизнестің мәселесін жедел әрі дер кезінде шешіп отыру үшін облыстық деңгейде жұмыс тобын құратынын жеткізген.<blockquote>«Міне сол жұмыс тобы осы қазан айында құрылды. Оған облыс әкімінің бірінші орынбасары Серік Қожаниязова жетекшілік етеді. Құрамына Қызылорда қаласы мен барлық аудан әкімдерінің кәсіпкерлікке жауапты орынбасарлары, облыстағы жауапты басқарма басшылары, сондай-ақ салалық қауымдастық жетекшілері мен кәсіпкерлер енді. Жұмыс тобының қызметін біз – Кәсіпкерлер палатасы толық жүргізіп отырамыз. Осы орайда, кәсіпкерлерге өзекті мәселелерін бізге жолдауды сұраймыз», – деген жазбада Палата директоры.</blockquote>Кәсіпкерлер палатасында бұл шараларды директордың орынбасары Гауһар Елеусінова үйлестіріп отырады.Аталған мәселеге қатысты сұрақтар туындаған жағдайда Кәсіпкерлер палатасына хабарласуға болады. Мекен-жайымыз: Қызылорда қаласы, Қорқыт ата 123, «Бизнеске арналған Үкімет» ғимаратының 3-қабаты. Байланыс телефоны: 8 /7242/ 40-09-81. &nbsp;

Қызылордада кәсіпкерлердің мәселелерін жедел шешуге арналған жұмыс тобы құрылды

<a href="https://kyzylorda-news.kz/">Kyzylorda-news.kz.</a> Сырдария ауданы әкімдігінің мәжіліс залында аудан әкімінің орынбасары Димаш Байдушевтың төрағалығымен аппарат мәжілісі өтті.Мәжіліске аудандық мәслихат хатшысы Ержан Әжікенов, аудан әкімінің орынбасарлары, дербес бөлім басшылары, меншік түріне қарамастан аудандағы мекеме басшылары қатысты. Мәжілістің күн тәртібінде 2 мәселе қаралды.&nbsp;Алғашқы мәселе аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің 2022 жылдың 9 айында атқарылған жұмыстары және ауданның 9 айдағы әлеуметтік – экономикалық көрсеткіштері туралы болды. Ең алдымен аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Қаратаев Мақсұт Амануллаұлы баяндама жасады.Мақсұт Амануллаұлы өз баяндамасында аудандағы жұмыссыздық деңгейі және жаңа жұмыс орындарының ашылуы туралы кеңінен мәлімет берді.&nbsp;Ауданда жаңадан жұмыс орындарын ашу жоспары бойынша 2156 жаңа жұмыс орнын ашу жоспарланса, бүгінгі күнге оның орындалуы 1515 яғни 70,3 пайыз, оның ішінде тұрақты жұмыс орындарының жоспары 1035 оның бүгінгі күнге орындалуы 502-сі, яғни, 48,5 пайызды құрап отыр.Күн тәртібіндегі екінші мәселе ауданның 9 айдағы әлеуметтік-экономикалық көрсеткіштері туралы хабарлама жасау үшін сөз, аудандық экономика және бюджеттік жоспарлау бөлімінің басшысы Ахетов Ерлан Дәуітбекұлына берілді. Биылғы жылдың 9 айындағы қорытындысы бойынша барлық макроэкономикалық көрсеткіштер орындалып, Сырдария ауданы облыста үздіктер қатарында.&nbsp;Мәжіліс соңында тиісті сала басшыларына нақты тапсырмалар беріліп, орындалуы бақылауға алынды.<figure class="image"><img src="https://knadmin.beoblood.kz/uploads/Syrdariya1_4aba52f325.jpg" alt="Сырдария1.jpg"></figure>

Сырдария ауданы облыста үздіктер қатарында

<a href="https://kyzylorda-news.kz/">Kyzylorda-news.kz.</a> «AMANAT» партиясының Қызылорда қалалық филиалының жанынан құрылған ақпараттық &nbsp;насихат тобының өкілдері &nbsp;Жорабек Нұрымбетов пен Шәріп Әбдірахманов Қызылорда облыстық Кәсіпкерлер палатасының қызметкерлерімен кездесті.Кездесуде Мемлекет басшысының Жолдауындағы кәсіпкерлікті &nbsp;жүйелі түрде дамыту мен қолдау &nbsp;мәселесі сөз болып, осы бағытта атқарылып жатқан жұмыстар ортаға салынды.Шарада сөз алған Шәріп Әбдірахманов кез-келген бизнес үшін инвестиция құюға болатын қолайлы жағдай, ашықтық пен кәсіпкердің мүддесін қорғайтын заңнаманың болуы өте маңызды екендігіне тоқталды.&nbsp;<blockquote>«Қазіргідей күрделі геосаяси жағдайда мемлекеттің ішкі саяси реформаларының орнықтылығы аса қажет мәселе. Жалпы, экономиканы дамыту, индустриалды-инновацияға бет бұру, шикізатқа тәуелділіктен арылу негізгі мақсаттар. Жолдауда баса айтылған дүниелердің бірі – елдегі еңбек өнімділігін көтеру. Бизнестің бәсекелестігін арттыра отырып, халықты жұмыспен қамтудың өзектілігі айтылды. Шикізатқа әлі де тәуелдіміз, еңбек өнімділігі төмендігі, инновация жеткіліксіздігін ескере отырып, оны шешудің нақты жолдарын көрсетті. Және де Мемлекет басшысы отандық бизнес үшін күрделі мәселелердің бірі – несие ресурстарының жетіспеушілігіне тоқталды. Ұлттық банк, Қаржыны реттеу агенттігі, Үкімет нақты секторды тұрақты және қолжетімді несиелеуді қамтамасыз ету үшін нақты шешімдер табуы керектігін атап өтті. Бұл жұмыстар алдағы уақытта отандық бизнесті дамытуға ықпал етеді»,- деді Шәріп Әбдірахманов.</blockquote>Ақпараттық насихат тобының мүшесі Жорабек Нұрымбетов Мемлекет басшысының әділетті Қазақстанды құру жолындағы көтерген негізгі бастамалары мен салмақты ойлары мемлекетіміздің өркендеп дамуына тың серпін беріп қана қоймай, жаңа мүмкіндіктер мен қоғамдық маңызды мақсаттарға жол ашатынын атап өтіп, салық төлемдерін арттырған кәсіпорындарға қолдау көрсету мемлекеттің негізгі талабы болатындығын жеткізді.Жиынға қатысушылар да өз пікірлерін білдіріп, мемлекеттің қазіргі қолдауларының арқасында отандық бизнес пен шағын кәсіпкерліктің жақсы дамып келе жатқандығын атап өтті. <img src="https://knadmin.beoblood.kz/uploads/c0abae0b_79e2_4691_b891_b06cd8cc5911_af502dc278.jpg" alt="c0abae0b-79e2-4691-b891-b06cd8cc5911.jpg"><img src="https://knadmin.beoblood.kz/uploads/b84a8d35_ed4f_4971_bdcf_1433ea2139d1_50e1c45c03.jpg" alt="b84a8d35-ed4f-4971-bdcf-1433ea2139d1.jpg">

«AMANAT»: Отандық бизнес өркендейді

<h4 style="margin-left:0px;"><a href="https://kyzylorda-news.kz/">Kyzylorda-news.kz.</a> Сыр өңірінің ауыл шаруашылығы саласы жыл сайын толағай табыстарға қол жеткізіп, ел қазынасының молаюына өз үлесін қосып келеді, деп хабарлайды облыстық ауыл шаруашылығы басқармасының баспасөз қызметі.</h4><h4 style="margin-left:0px;">Сыр өңірі қашаннан күріш өсірумен даңқы шыққан аймақ. Жалпы, өңірдің табиғи-климаттық және топырақ ерекшелігі күрішке өндірісіне бейімделгендіктен, күріштің отаны болып есептеледі.</h4>Биылғы жылдың шіліңгір ыстығына, тынымсыз соққан желіне және суармалы судың аздығына қарамастан, облыс күрішшілері 445 мың тоннадан астам өнімді қамбаға құйып, күріштің әр гектарынан 56,7 центнерден өнім алуды қамтамасыз етті.Бұл көрсеткішке диқандардың вегетация кезінде орын алған су тапшылығы жағдайындағы қиындықтарға мойымай көрсеткен қажырлы еңбектерінің арқасында қол жеткізіліп отыр.Аймақта экспорттық әлеуэтті арттыру және өткізу нарықтарын кеңейту бойынша нақты жұмыс жүргізіліп келеді. Облыста өндірілген күріш ішкі нарықты қамтып қана қоймай, ТМД және Европа, Америка елдеріне экспортталуда. Мемлекеттің ауыл шаруашылығын тікелей қолдауының арқасында өңірдің аграрлық саласы заман талабына сай бейімделіп, тиісті шаралар қабылданып келеді.<figure class="image"><img src="https://knadmin.beoblood.kz/uploads/46_8895b29e95.jpg" alt="46.jpg"></figure>

Қызылорда облысында ауыл шаруашылығы саласы қарқынды дамып келеді

<a href="https://kyzylorda-news.kz/">Kyzylorda-news.kz.</a> Қызылордада облыстық кәсіпкерлік және өнеркәсіп басқармасы мен «Оңтүстікқазжерқойнауы» РММ өңірлік инспекциясы өңіріміздің минералды-шикізат базасын дамыту мәселелері бойынша мәжіліс ұйымдастырды.Жиынға Қазақстан Республикасы экология, геология және табиғи ресурстар министрлігі Геология комитеті төрағасының орынбасары Ерлан Ғалиев, «Оңтүстікқазжерқойнауы» басшысының орынбасары Алексей Коротков, «Азимут геология» ЖШС бас директоры Дмитрий Инкин, мұнай өндіруші, уран өндіруші және тау-кен өндіруші компаниялардың басшылары мен өкілдері қатысты.Мәжіліс барысында жер қойнауының геологиялық зерттелуін арттыру және шикізат базасын толықтыру мәселелері талқыланды.Өз сөзінде Ерлан Ғалиев соңғы жылдары мұнай мен газ қорларының сарқылуы және қалыптасқан жағдайдан шығу үшін қабылданып жатқан шаралар бөлігіндегі өзекті проблемалық мәселелерді атап өтті. Өңірлік және іздестіру-бағалау жұмыстарын жүргізу жөніндегі мемлекеттік бағдарлама шеңберінде биыл облыс аумағында Арал бассейнінің "Шығыс" және "Батыс" учаскелері бойынша тығыздығы 20кмх20км геологиялық-геофизикалық зерттеу (2D сейсмикалық барлау) объектілері бойынша сейсмикалық барлау жұмыстары басталды. Айта кету керек, Шу-Сарысу бассейніндегі геологиялық зерттеулер ағымдағы жылдың соңында аяқталады.Жоғарыда аталған объектілер бойынша жүргізіліп жатқан жұмыстар туралы толығырақ «Азимут геология» ЖШС бас директоры Дмитрий Инкин таныстырды.Мәжіліс қорытындысы бойынша Е. Ғалиев жер қойнауын пайдаланушыларды өңірдің минералды-шикізат базасын толықтыру мәселелерін шешуге белсенді қатысуға шақырды.<figure class="image"><img src="https://knadmin.beoblood.kz/uploads/312337350_1290431465051381_6563360349656614057_n_c4770c8d59.jpg" alt="312337350_1290431465051381_6563360349656614057_n.jpg"></figure>

Облыстың минералды-шикізат базасының дамуы

<a href="https://kyzylorda-news.kz/">Kyzylorda-news.kz.</a> Бүгін аймақ басшысы Нұрлыбек Нәлібаевтың төрағалығымен облыс әкімдігі жанындағы Сыбайлас жемқорлыққа қарсы іс-қимыл мәселелері жөніндегі комиссияның кезекті отырысы өтті.Комиссия жұмысына Сыр еліне жұмыс бабымен келген ҚР Сыбайлас жемқорлыққа қарсы іс-қимыл Агенттігінің превенция қызметінің басшысы Саян Ахметжанов арнайы қатысты. Жиынға құқық қорғау және орталық атқарушы орган басшылары, үкіметтік емес ұйым өкілдері қатысты.Облыс әкімі сыбайлас жемқорлықпен күресу мемлекеттік саясаттағы негізгі басымдықтың бірі екенін алға тартып, өңірде оңтайлы жүргізілген жұмыстардың нәтижесінде көрсеткіштердің төмендегенін алға тартты.<blockquote>«Биылғы жылдың өзінде сыбайлас жемқорлық деректерін анықтап ғана қоймай, түрлі салаларда жүзеге асырылған жобаларда 77-ден аса сыбайлас жемқорлық тәуекелдерін белгілеп, оларды дер кезінде жоюға белсенді шаралар қабылдануда. Нәтижесінде өңірімізде өткен жылдың 9 ай көрсеткішімен салыстырғанда сыбайлас жемқорлық сипатындағы құқық бұзушылықтар деңгейі 8,2% азайған.Жемқорлықпен күрес - ортақ міндетіміз. Сондықтан әрбір қызметкердің тәртібі мен жауапкершілігі бірінші басшыға тікелей байланысты. Сіздер мемлекеттік қызметке жеке бас құндылығы ретінде қарайтын тұлғалардың қызметке келуіне қатаң тосқауыл қоюларыңыз қажет»,- деді Н.Нәлібаев.</blockquote>Сыбайлас жемқорлыққа қарсы іс-қимылдың ең тиімді әдісі – көрсетілетін мемлекеттік қызметтерді электрондық форматқа көшіру. Бүгінгі күні өңірімізде жергілікті атқарушы органдар тарапынан 296 мемлекеттік қызмет көрсетіледі, оның 142-сі электронды форматта жұмыс жасайды.Сондай-ақ, өңірде жүргізілген жобалық басқару аясында 2023 жылдың басынан бастап Қызылорда қаласы мен аудан әкімдіктері сыбайлас жемқорлық тәуекелдеріне ішкі талдау жүргізу, сыбайлас жемқорлыққа қарсы мәдениетті қалыптастыру және квазимемлекеттік сектор субъектілері институтын дамыту жұмыстарын атқаратын болады.Жиында Қызылорда облысының сыбайлас жемқорлыққа қарсы іс-қимыл бойынша ахуалы туралы Саян Ахметжанов жемқорлық тәуекелі жоғары салаларда ашықтық қағидатын енгізу мәселелеріне тоқталды. Ал, Сыбайлас жемқорлыққа қарсы іс-қимыл агенттігінің облыстық департаменті басшысының міндетін атқарушы Ұзынжас Бауыржан сыбайлас жемқорлық тәуекелдер картасы аясында атқарылған жұмыстар туралы баяндады.Комиссия отырысының соңында аймақ басшысы Нұрлыбек Нәлібаев жауапты сала басшыларына бірқатар тапсырма берді.<img src="https://knadmin.beoblood.kz/uploads/312265662_410833867904530_1738649488348857286_n_41a8b577c9.jpg" alt="312265662_410833867904530_1738649488348857286_n.jpg"><img src="https://knadmin.beoblood.kz/uploads/312315574_410833834571200_9082872789529711019_n_b52fbe36c6.jpg" alt="312315574_410833834571200_9082872789529711019_n.jpg">

Қызылорда өңірінде сыбайлас жемқорлық сипатындағы құқық бұзушылық деңгейі 8,2% азайған

<a href="https://kyzylorda-news.kz/">Kyzylorda-news.kz.</a> Сырдария ауданы әкімдігінің мәжіліс залында Мемлекет басшысының тұжырымдамасын жүзеге асыру бағытында және аймақ басшысы Нұрлыбек Нәлібаевтың тапсырмасына сәйкес облыс әкімінің орынбасары Мархабат Жайымбетов құқық қорғау органдарымен құқық бұзушылықтардың алдын алу мен қоғамдық тәртіпті қамтамасыз ету және тағы да басқа мәселелер бойынша аудан тұрғындарымен қабылдау өткізді.
Қоғамдық қабылдауға облыстық прокурордың орынбасары Бахытжан Мырзабаев, облыстық полиция департаменті бастығының орынбасары Даурен Ибраев, Ұлттық қауіпсіздік комитетінің Қызылорда облысы және Байқоңыр қаласы бойынша департаменті бастығының орынбасары Сабыр Түменбаев және Сыбайлас жемқорлыққа қарсы іс-қимыл агенттігінің облыстық департаменті бастығының бірінші орынбасары Асылхан Ашықов қатысты.
Қабылдау барысында тұрғындардың жеке әлеуметтік мәселелерімен қоса Аманкелді ауылы бойынша «Жетікөл жарма» каналын тазарту, Шіркейлі, С.Сейфуллин ауылдық округтеріндегі жер мәселесі және Қалжан ахун ауылында мал ұрлығы, Айдарлы ауылынан қылмыстық іс бойынша жеке мәселелерін жеткізді.
Облыс әкімінің орынбасары Мархабат Жайымбетов және аудан әкімі Мұрат Ергешбаев, құқық қорғау органдарының басшылары тарапынан тиісті қолданыстағы заңдылықтармен түсіндірме берілді. Көтерілген мәселелердің шешілу жолдарын ұсынып, құқықтық кеңестер айтылды. Әрбір мәселе бойынша жеке-жеке тоқталып, тиісті жазбаша жауап берілетіндігі жеткізілді.
Мұнан соң облыс әкімінің орынбасары Мархабат Жайымбетұлы Тереңөзек кентіндегі №210 орта мектебінің жылу беру маусымына дайындық барысын және бу қазандығын газға қайта жабдықтау жұмыстарын, А.Алиакбаров көшесіндегі демеушілік есебінен жаңадан салынған спорт алаңы жұмысымен сонымен қатар И.Тоқтыбаев көшесін орташа жөндеу және көшенің екі бетіне жаяу жүргіншілер жолын салу, темір бетонды латок орнату жұмыстарымен және Сырдария аудандық ауруханасын бу қазандығын газға қайта жабдықтау жұмыстарымен танысты.
Облыс әкімінің орынбасары іссапар барысында қамтылған барлық нысандар бойынша жауапты мердігерлер мен тиісті сала басшыларына құрылыстарды уақытында аяқтап, сапасына жауапкершілікпен қарауды жүктеді.
<img src="https://knadmin.beoblood.kz/uploads/311643109_406951838292733_8063678961295976190_n_786e8bef57.jpg" alt="311643109_406951838292733_8063678961295976190_n.jpg">
<img src="https://knadmin.beoblood.kz/uploads/311769272_406951901626060_7117819401541291692_n_e37b5184c1.jpg" alt="311769272_406951901626060_7117819401541291692_n.jpg">

Облыс әкімінің орынбасары Сырдарияда қоғамдық қабылдау өткізді

<a href="https://kyzylorda-news.kz/">Kyzylorda-news.kz.</a> Қызылорда облысында «Шабақ құтқару – 2022» акциясы аясында 7 млн 300 мың дана балық шабағы құтқарылды. Бұл туралы Өңірлік коммуникациялар қызметінің ақпараттық алаңында өткен брифингте облыстық табиғи ресурстар және табиғат пайдалануды реттеу басқармасының басшысы Марат Құрманбаев мәлімдеді.
- Облыс аумағында орналасқан күріш алқаптарында, каналдарда, бөлектенген су айдындарында шабақ құтқару жұмыстары жүргізілуде. Қазіргі таңда күріш алқаптарынан 4,1 млн дана балық шабағы құтқарылып, жақын маңдағы су айдындарына жіберілуде. Аталған жұмыстар 25 қазанға дейін жалғасады, - деді басқарма басшысы.
Атап өту қажет, ҚР Экология, геология және табиғи ресурстар министрлігі Балық шаруашылығы комитетінің «Қамыстыбас балық питомнигі» РМҚК-мен біржаздық балық шабақтары мен тұқым шабақтар өсіріліп, аталған шабақтардың 30-40%-ын Қамыстыбас көліне, ал 60-70%-ын Арал теңізіне жіберу жұмыстары жүргізілуде.
<blockquote>«Бүгінде Қызылорда облысы бойынша балық шаруашылығын дамытудың 2021-2030 жылдарға арналған өңірлік бағдарламасы аясында жұмыстар жалғасуда. Биыл 2030 жылға дейін жоспарланған балық өсіретін 55 көл-тауарлы су айдынының саны 69-ға жетті. 2022 жылы 409 тонна тауарлы балық өсіру межесін орындау жоспары белгіленсе, жыл басынан бері атқарылған жұмыстар нәтижесінде 360 тоннаға жеткізілді», - деп мәлімдеді Арал-Сырдария облысаралық бассейндік балық шаруашылығы инспекция басшысы Ж.Сапаров.</blockquote>
<img src="https://knadmin.beoblood.kz/uploads/311324057_1641214066274099_1495497714203238423_n_c30694c121.jpg" alt="311324057_1641214066274099_1495497714203238423_n.jpg">

Қазақстан және Қызылорда облысының жаңалықтары: Экономика