<a href="https://kyzylorda-news.kz/">Kyzylorda-news.kz.</a> Түркістан облысы Үлкен Қаратаудағы Шоқпақ учаскесінде палеозой жыныстарынан мұнай белгілері анықталды, деп хабарлайды&nbsp;<a href="https://kaz.nur.kz/1827842-kazakstanny-otstiginen-mnaj-tabyldy.html">KAZ.NUR.KZ</a>.
Бұл туралы экология, геология және табиғи ресурстар министрлігі мәлімдеді.
Арнаулы экспедиция боксит, онымен қоса қорғасын, мырыш және сирек кездесетін басқа да заттарды табу үшін Үлкен Қаратаудың Леонтьев ойысындағы геофизикалық түзілімдерді зерттеген.
Ол үшін 300 метрге дейінгі ұңғымалар қазылғаны белгілі болды.
Ведомство дерегінше, бұрғыланған 39 ұңғыманың он бірінен қоңыр түсті сұйық мұнай табылыпты.
Бұдан тыс, бұрғылау кезінде табиғи байлықтың қабыршақтары бөлініп шыққан.
Түркістан облысындағы “қара алтын” белгілері еліміздің тауларынан табылған алғашқы мұнай болып табылады.
Бұл Сырдария, Шу-Сарысу ойпаттарынан мұнай және газды іздеу үшін аса маңызды қадам болды.
Айта кетейік, осыған дейін Шу-Сарысу ойпатында бірнеше ұсақ газ кені табылған болатын.
Олардың ең ірілері – Амангелді және Придорожное кендері.
Енді Сырдария, Шу-Сарысу ойпаттарынан “қара алтын” іздеудің өзектілігі арта түсті. Учаскелерді барлау және бұрғылау жалғасады.

Қазақстанның оңтүстігінен мұнай табылды

<a href="https://kyzylorda-news.kz/">Kyzylorda-news.kz.</a> Қазақстанда көппәтерлі үйлердің иелері үшін жер салығы алынып тастау туралы ҚР Қаржы министрлігі мемлекеттік кірістер комитеті салықтық әдіснама департаментінің директоры Дәулет Жарылғасынов айтты, деп хабарлайды <a href="https://stan.kz/kazakstanda-koppaterli-uylerdin-ieleri-ushin-zher-salig-324356/">Stan.kz</a>.
<blockquote>
 «Бұл салық сомасының мардымсыздығына және әкімшілік шығындардың көптігіне, нысандардың көптігіне және есептеудің күрделілігіне байланысты», – деп түсіндірді Дәулет Жарылғасынов.
</blockquote>
Оның айтуынша, мұндай жаңашылдықтар «Қазақстан Республикасының кейбір заңнамалық актілеріне салық салу мәселелері бойынша өзгерістер мен толықтырулар енгізу туралы» Қазақстан Республикасының заң жобасында қарастырылған.
Бұған дейін Қазақстан жеке тұлғалардан көлік құралдарына салық төлеуді кейінге қалдыруға ниетті екендігі туралы хабарланған болатын.

Қазақстанда көппәтерлі үйлердің иелері үшін жер салығын алып тасталады

<a href="https://kyzylorda-news.kz/"></a><a href="https://kyzylorda-news.kz/">Kyzylorda-news.kz.</a> Қызылорда облыстық статистика департаменті таратқан алдын-ала деректер бойынша 2019 жылдың қаңтар-қыркүйегінде Қызылорда облысының ЕАЭО елдерімен өзара саудасы 76621,3 мың АҚШ долларын құраған.
2018 жылғы қаңтар-қыркүйекпен салыстырғанда 0,8%-ға кем, соның ішінде экспорт – 38609,6 мың АҚШ доллары (1,9 есе көп), импорт – 38011,7 мың АҚШ доллары (32,9%-ға кем).
Қызылорда облысының экспорты құрылымында көпшілігін бейорганикалық химия өнімдері (ЕАЭО елдерінің барлық экспортының көлеміне 47,2%), минералды өнімдер – 43,6% (тұз – 38,1%, табиғи құмдар – 4,4%, мұнай өнiмдерi – 1,1%), малдан шығатын, өсімдік тектес өнімдер және дайын азық-түлік тауарлар – 9% (күріш – 5,5%, жас немесе мұздатылған балық 1,8%) құрады.
ЕАЭО елдерінен үлкен дәрежеде машиналар және жабдықтар, транспорттық құралдар және аппараттар (ЕАЭО елдерінің импорты жалпы көлеміне 47,4%), химиялық өнеркәсіп өнімдері – 15,5%, мал және, өсімдіктер өнімдері, дайын азық-түлік тауарлар – 12,9%, металлдар және олардан жасалған бұйымдар – 9,8%, тастан, гипстен, цементтен жасалған бұйымдар, шыны және одан жасалған бұйымдары – 4,2%, ағаш материалдар және целлюлозды қағаз бұйымдары – 4,2%, минералды өнімдер – 2,4% әкелінді.

Қызылорда облысының ЕАЭО елдерімен өзара тауарлар саудасы артты

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Елордада құрылыс қарқынының төмендеуі салдарынан республика бойынша жылдық жоспар орындалмауы мүмкін. Бұл туралы бүгін Үкімет отырысында ҚР Индустрия және инфрақұрылымдық даму министрі Бейбіт Атамқұлов айтты, деп хабарлайды <a href="http://lenta.inform.kz/kz/turgyn-uy-kurylysy-kanday-onirler-karazhatty-igere-almady_a3586200">ҚазАқпарат</a>.
<blockquote>
 «Республика бойынша жылдық жоспар 13 млн шаршы метрді құрайды. Дегенмен, 10 айдың қорытындысында Нұр-Сұлтан қаласында тұрғын үйді пайдалануға беру қарқыны 35,8 пайызға төменуіне байланысты жоспарланған көлемге жете алмай қалуымыз мүмкін», – деді Бейбіт Атамқұлов.
</blockquote>
Оның айтуынша, биыл тұрғын үйлерді уақытылы пайдалануға беру үшін құрылыс алаңдарына инженерлік-коммуникациялар өткізуге 77,3 млрд теңге бөлінді. 10 айдың қорытындысы бойынша, қаржыландыру жоспарына сәйкес өңірлерге 59,3 млрд теңге аударылды. Оның 56,3 млрд теңгесі немесе 96 пайызы игерілді.
<blockquote>
 «Түркістан, Батыс Қазақстан, Қарағанды облыстарында қаражаттың игерілу көрсеткіші төмен. Сот процестері мен жобалау-сметалық құжаттаманың түзетілуіне байланысты бірқатар өңір бөлінген қаражатты жылдың соңына дейін қайтаруды жоспарлап отыр. Сатып алусыз жалға берілетін баспана бойынша жобаларды іске асыру кезінде Павлодар, Маңғыстау, Атырау облыстарының әкімдіктері бөлінген қаражатты толық игермеді», – деді министр.
</blockquote>

Тұрғын үй құрылысы бойынша қай өңірлер қаражатты игере алмады?

<a href="https://kyzylorda-news.kz/">Kyzylorda-news.kz.</a> 2019 жылғы қазанда күнкөрістің ең төменгі деңгейінің шамасы 29 384 теңгені құрады.
Негізгі тамақ өнімдерін тұтынудың ең төменгі нормаларынан есептелген орта есеппен халықтың жан басына шаққандағы күнкөрістің ең төменгі деңгейінің шамасы 2019 жылғы қазанды өткен аймен салыстырғанда 2,2%-ға жоғарылады. Оның құрылымында ет және ет өнімдерін сатып алуға жұмсалған шығыстардың үлесі 18,1%,жемістер мен көкөністерге – 12,7%, сүт өнімдері мен жұмыртқаға – 9,4%, нан және жарма өнімдеріне – 7,4%,май және тоң май өнімдеріне–3,5%, қант, шай және дәмдеуіштерге –2,1%, балыққа – 1,8%-ды құрады.
Ең төменгі күнкөріс деңгейі – мөлшері бойынша ең төменгі тұтыну қоржынының құнына тең, бір адамға қажетті ең төменгі ақшалай табыс. Ең төменгі тұтыну қоржыны адам тіршілігін қамтамасыз етуге қажетті тамақ өнімдерінің, тауарлар мен көрсетілетін қызметтердің заттай және құндық көріністегі ең төменгі жиынтығы болып табылады. Ол азық-түлік қоржынынан және азық-түлік емес тауарлар мен ақылы қызметтерге жұмсалатын шығыстардың бекітілген үлесінен тұрады. Күнкөрістің ең төменгі деңгейін есептеуге арналған аз тұтынылатын азық-түлік емес тауарлар мен көрсетілетін қызметтерге жұмсалатын шығыстардың үлесі ең төменгі тұтыну қоржыны құнының 45 пайыздық мөлшерінде белгіленген.

Статистика департаменті Қызылорда облысындағы күнкөрістің ең төменгі деңгейінің жаңа көрсеткішін атады

<a href="https://kyzylorda-news.kz/"></a><a href="https://kyzylorda-news.kz/">Kyzylorda-news.kz.</a> 2019 жылғы қаңтар-қазанға бөлшек сауда айналымы 227855,3млн. теңгені құрады немесе 2018 жылғы тиісті кезеңіне 101,2 пайыз. 2019 жылғықаңтар-қазанда сауда кәсіпорындары арқылы тауарларды өткізу көлемі 61312,1 млн. теңгені құрады немесе 2018 жылғы қаңтар-қазанға қарағанда нақты мәні 8,8%-ға түскен.
Бөлшек сауда құрылымында азық-түлік тауарлары бөлшек сауданың жалпы көлеміне 32,2% кұрады. Азық-түлік тауарлардың бөлшек саудада өткізу көлемі 73448,8млн. теңгені құрады, ал азық-түлік емес тауарлары 154406,5млн. теңгені құрады.
2019 жылғы 1 қарашаға бөлшек саудадағы саудамен айналысатын кәсіпорындардың тауарлық қорларының көлемі 9226,9 млн. теңгені құрады, саудадағы күндері 50 күн.
2019 жылғы қаңтар- қазанға облыс бойынша бөлшек сауданың жалпы көлеміндегі аса жоғары үлес салмақты Қызылорда қаласы болып келеді.
2019 жылғы қаңтар-қазанға аудандар бойынша бөлшек сауданың нақты көлем индексі
<img src="https://kyzylorda-news.kz/wp-content/uploads/2019/11/15tabkaz1.jpg" alt="" />

Бөлшек сауданың  жалпы көлемінен Қызылорда мен Арал ауданы алда келеді

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Бүгін Қазақстанның ұлттық валютасы – теңгенің туған күні. 1993 жылғы 15 қарашада елміз үшін тарихи оқиға орын алып, ұлттық валютамыз – теңге айналымға енді. Бұл жаңалықты сол кездері отандық БАҚ өкілдері қалай баяндады?
Елбасы Нұрсұлтан Назарбаев 12 қарашада Ұлттық валютаны енгізу туралы жарлыққа қол қойды. Сол күні кешке телевидение арқылы осы мәселемен Қазақстан халқына үндеу жолдады. Президенттің үндеуі мен сәйкес жарлықтар, қаулылар мен теңгені айналымға енгізу туралы нұсқаулар ресми баспасөз құралдарында 13 қарашада жарық көрді.
Назарбаев өз үнеуінде бұндай оқиғаның әр елдің тарихында бір-ақ рет болатынын мәлімдеді.
<blockquote>
 “Ұлттық валютаны енгізу қажеттілігін барлығымыз түсінуіміз қажет. Біз үшін бұл оқиғаның тек экономикалық емес, сондай-ақ саяси мәні де теңдессіз”, – деді ол.
</blockquote>
Ары қарай Елбасы жеке ұлттық валютаны енгізу себебінің мән-жайын айтып берді. Төменде оның мәлімдемесінен үзінді келтіреміз.
<blockquote>
 “Біз жағдайды мұқият таразылап, жеке валютамызды енгізу туралы шешім қабылдадық. Бұл экономикалық одақ жөніндегі келісімшарттың негізгі ережелеріне қайшы келмейді. Біз ашықтық қағидаларын басшылыққа ала отырып, Ресей мен өзге де Достастық мемлекеттерін бұндай қадам жөнінде уақытында ескерттік.
 Өкінішке орай, бүгінде стратегиялық мүдделер екінші орынға түсіп қалды, және қалыптасқан жағдайларға байланысты барлығымызға міндетті межелеу мен жеке валюталарымызды енгізу кезеңі арқылы интеграцияға беттеуімізге тура келеді.
 Сондықтан да ұлттық валютаны енгізу туралы қабылдаған шешімім – қалыпртасқан жағдайдан шығудың жалғыз жолы”, – деді Назарбаев.
</blockquote>
Осылайша, 1993 жылдың 15 қарашасында таңғы сағат 8:00-де Қазақстан аумағында өз ұлттық валютасы – теңге айналымға шығарылды. Валюта бағамы да белгіленді: 4,75 теңге = 1 доллар немесе 1 теңге = 500 рубль.
<a href="https://kaz.nur.kz/1827366-nazarbaev-kazakstanda-lttyk-valutany-kalaj-engizdi-foto-video.html">Nur.kz</a>
<img src="https://kyzylorda-news.kz/wp-content/uploads/2019/11/15nazarbayevvaluta2.jpg" alt="" />
<img src="https://kyzylorda-news.kz/wp-content/uploads/2019/11/15nazarbayevvaluta3.jpg" alt="" />
<img src="https://kyzylorda-news.kz/wp-content/uploads/2019/11/15nazarbayevvaluta4.jpg" alt="" />

Назарбаев Қазақстанда ұлттық валютаны қалай енгізді? (ФОТО, ВИДЕО)

<a href="https://kyzylorda-news.kz/">Kyzylorda-news.kz.</a> Қазақстанда 15 қарашада Ұлттық валюта күні аталып өтеді. Дәл осы күн қаржыгерлердің кәсіби мерекесі саналады, деп хабарлайды <a href="http://lenta.inform.kz/kz/26-zhylda-tenge-kalay-ozgerdi_a3585572">ҚазАқпарат</a>.
Бүгін Ұлттық валютамыз теңгеге 26 жыл толды. 1993 жылы 12 қарашада ҚР Президентінің 15 қарашадан бастап Қазақстан Республикасының ұлттық валютасы – теңгені айналымға шығару туралы Жарлығы жарық көрді. Дәл осы күні Президент халыққа үндеу жариялады.
<blockquote>
 «Осы уақыттан бастап Қазақстанның шынайы тәуелсіздігінің маңызды кезеңі басталады. Бұндай тарихи сәттер ел өмірінде бір-ақ рет болатын ірі оқиға», – деді Н.Назарбаев.
</blockquote>
26 жылда теңгенің 4 сериясы шықты. Бірінші ақшамыз Ұлыбританияда басылып шықты. 1995 жылы өз банкнот фабрикамыз ашылды.
Ұлттық валютаның алғашқы легінде «Портреттік серия» қолданылған. Авторлар банкнот беттерінде қазақтың ұлы тұлғаларының суреттерін жариялады.
Осылайша тұңғыш рет ақша бетінде әл-Фараби, Сүйінбай, Құрманғазы, Шоқан Уәлиханов, Абай, Әбілқайыр хан, Абылай хан бейнелері жарық көрді.
<img src="https://kyzylorda-news.kz/wp-content/uploads/2019/11/15tenge2.jpg" alt="" />
Ұлттық валютаның екінші легі Қазақстанда басылып шықты. Жаңа серия «Әл-фараби» деп аталды.
Шығыс ойшылының бейнесі 200-10000 теңгеге дейінгі банкноттарға басылды. Бұл ақша айналымда көп болған жоқ. Адам бейнесі салынған банкноттар тез жыртылып, мыжылатындықтан суретшілер портреттік суреттерден бас тарта бастады.
<img src="https://kyzylorda-news.kz/wp-content/uploads/2019/11/15tenge3.jpg" alt="" />
Ұлттық валютамыздың үшінші буыны 2006 жылы Бәйтерек бейнесімен жарық көрді.
Бұл жолы дизайнерлер ақша бетінде тек Қазақстанның тарихын ғана емес, сәулеті мен табиғатын да сыйғызуға тырысты. Теңгенің бетінде ашық алақан, Тұңғыш Президенттің қолы, әнұранның ноталары басылды.
«2011 жылдан бастап қазақстандықтардың қолында жаңа валюта айналымға шыға бастады. «Самұрық» сериясындағы номиналы 500, 1 000, 2 000, 5 000, 10 000 және 20 000 теңге болатын ақша пайда болды. Бір жақ бетінде «Қазақ Елі» монументі мен ұшып бара жатқан кептерлер жарияланды. Екінші жақ бетіне суретшілер Алматы қаласының, Ертіс өзенінің,Үстірт жазығының панорамасын бейнеледі» – деді Ұлттық банктен.
<img src="https://kyzylorda-news.kz/wp-content/uploads/2019/11/15tenge5.jpg" alt="" />
Монеталардың бірінші партиясы Германияда басылды. Ал қазір монеталар Қазақстан монета сарайында шығарылады. Монета сарайында инвестициялық, коллекциялық шақалар шығарылды.
<img src="https://kyzylorda-news.kz/wp-content/uploads/2019/11/15tenge6.jpg" alt="" />
Қазір айналымда номиналы 1, 2, 5, 10, 20, 50 және 100 теңге болатын монеталар бар. Келер жылы номиналы 200 теңге болатын монета шығады. ҚР Ұлттық банкі Коллекциялық монеталарды шығаруды 1995 жылдан бастап жолға қойған. Инвестициялық монеталар – Аu 999,9 бағалы металдардан соғылған.
<img src="https://kyzylorda-news.kz/wp-content/uploads/2019/11/15tenge7.jpg" alt="" />
Теңге өз тарихында 3 рет девальвацияға ұшырады. 1993 жылдың қарашасында $1 құны 4,7 теңге болатын. 1994 жылдың қарашасында $1 құны 50 теңгеден асты.
1999 жылы тұңғыш рет теңге әлсіреді. Жыл соңында $1 құны 138 теңгеге жетті.
Екінші девальвация салқыны 2009 жылдың соңында соқты. $1 құны 148 теңгеге жетті.
2014 жылдың қаңтарында үшінші құнсыздану толқыны келіп, $1 құны 181 теңгеге жетті.
2015 жылдың тамызында Қазақстан теңге бағамының еркін тербелісіне көшті. Бүгінде теңгенің ресми бағамы $1 – 388 теңге.

26 жылда теңге қалай өзгерді? (ФОТО)

<a href="https://kyzylorda-news.kz/">Kyzylorda-news.kz.</a> Қаржы министрлігі қазақстандықтардың ақша аударымдарын тексеруді жоспарлап отырған жоқ. Бұл туралы бүгін бірінші вице-премьер – қаржы министрі Әлихан Смайылов айтты, деп хабарлайды&nbsp;<a href="https://sputniknews.kz/economy/20191114/12028934/Kaspi-aqsha.html">Sputnik Қазақстан</a>.
<blockquote>
 “Қаржы министрлігі жеке тұлғалардың ақша аударымдарын тексеруді, аударымдардан қандай да бір қосымша төлем немесе салық алуды жоспарлап отырған жоқ”, – деп атап өтті Смайылов.
</blockquote>
Айтуынша, ведомство банктермен бірігіп, қолма-қол ақшасыз төлемдерді іске асыру бойынша ыңғайлы және заманауи инфрақұрылымды дамыту бағытында жұмыс істейді. &nbsp;
Кәсіпкерлік қызметке тоқталған министр оның ашық болуы тиіс екенін атап өтті. Атап айтқанда, кәсіпкерлер заңнамаға сәйкес, фискалды чек беруге, ал 2020 жылдың 1 қаңтарынан бастап онлайн бақылау-касса машиналарын қолдануға міндетті.
<blockquote>
 “Кәсіпкерлік мақсатта Kaspi-ді пайдалану кәсіпкерлерді бұл міндеттемелерден босатпайды. Чек тұтунышылардың құқығын қорғау үшін өте маңызды”, – деді ол.
</blockquote>
Вице-премьердің сөзінше, министрлік жедел аударым жасау жүйесін пайдаланатын кәсіпкерлердің табысын әкімшілеу мәселесін пысықтап жатыр. Мәселен, бұл онлайн-касса машиналары мен автоматты түрде толтыру және салық есебін жіберу функционалы бар POS-терминалдарды біріктіру арқылы жүргізіледі. &nbsp;Мұндай пилот келесі жылы Kaspi банкпен бірге өткізілмек.
<blockquote>
 “Осыған байланысты халыққа алаңдауға еш негіз жоқ”, – деп сендірді Смайылов.
</blockquote>
Сондай-ақ, ведомство 2020 жылдың 1 қаңтарынан арнайы салық режимдерін қолданатын микро және шағын бизнес 3 жылға салық пен тексерістен босатылатынын еске салды.

Kaspi арқылы ақша аудару: қаржы министрлігі шешім қабылдады

<a href="https://kyzylorda-news.kz/">Kyzylorda-news.kz.</a> «Nur Otan» партиясы Қызылорда облыстық филиалының төрағасы, облыс әкімі Қуанышбек Ысқақовтың төрағалығымен «Индустриалды даму» бағытында партиялық тыңдау өтті. Аталмыш бағдарлама аясында Қызылорда, Қармақшы, Шиелі, Жаңақорған аудандарында атқарылған жұмыстар туралы баяндалды.
Қармақшы ауданында бағдарламаның бірінші бесжылдығында «Қорқыт ата зиярат ету орталығы» жобасы жүзеге асқан. Аталмыш жоба 2013 жылы пайдалануға берілген. Орталықтың жылына 1500 туристті қабылдауға мүмкіндігі бар. Ал, индустрияландыру бағдарламасының екінші бесжылдығы аясында «Қуаттылығы жылына 1500 тонна құс етін өндіретін құс фабрикасын ашу» жобасы іске асырылуда.
<blockquote>
 «І және ІІ бесжылдықтарда индустрияландыру картасына ауданнан 1 жобадан енгізілген, көрсеткіш төмен. Сонда 10 жылда екі ғана жоба. Биылғы жылдың басында «Дорстрой» серіктестігі «Қорқыт ата» кешенін жеке кәсіпкерге жалға берген. Бұл кәсіпорында жоспарға сәйкес 15 жұмыс орны құрылу керек болса, қазіргі таңда кірістер департаментінің мәліметіне сәйкес 3 адам жұмыс істеуде. Сонымен қатар, екінші жоба бойынша кәсіпорынның 6 жыл бұрын ашылғанын, жобалық қауаттылықты игергенін ескере отырып, қалған жұмыс орнының ашылуын бақылауға алыңыз»,- деп нақты тапсырма берді аймақ басшысы.
</blockquote>
Шиелідегі индустрияландыру бағытындағы атқарылған жұмыстар турасында аудан әкімі Әшім Оразбекұлы баяндама жасады. Бағдарламаның бірінші бесжылдығы аясында картаға 2 жоба енгізілген. ЖК «Палжанов» – кірпіш өндірісі, 2012 жылы іске қосылған, кәсіпорын тұрақты жұмыс істейді. Ал, екінші жоба «Алтын бала-08» ЖШС – қамыс тақтайлар өндірісі. Құрылтайшылар арасындағы дау дамайға байланысты жұмыс уақытша тоқтатылып, өңірлік үйлестіру кеңесінің шешімімен индустрияландыру картасынан шығарылған. Бағдарламаның екінші бесжылдығы аясында ауданда құны 149,2 млрд.теңгені құрайтын 5 жоба жүзеге асырылады деп жоспарлануда.
<blockquote>
 «Неліктен бағдарлама аясында екі ғана жоба мақұлданған, басқа жобалар неге ұзақ қаралуда? Жеңіл және жиһаз өнеркәсіптері саласында мүлдем жоба қамтылмаған. Биыл 9 айдың қорытындысымен ауданда жеңіл өнеркәсібі саласында төмендеу байқалған. Осы кемшілікті жою үшін неге бағдарлама аясында жеңіл өнеркәсіп жобаларының қаржыландырылуы қамтамасыз етілмеген? Аудан әкімі бұл мәселені басты назарға алуыңызды тапсырамын»,- деді облыс әкімі Қуанышбек Ысқақов.
</blockquote>
Жаңақорған ауданы бойынша бірінші бесжылдықта картаға 2 жоба енгізілген.Біріншісі «СКЗ-U» ЖШС – күкірт қышқылы зауыты. Кәсіпорын тұрақты жұмыс істеуде. Екінші «Тату Агро» ШҚ – томат шығару, топырақтың құнарлы болмауына байланысты биылғы жылы қызанақ дақылы егілмей, бүгінде 80 га жерге жүгері егілген.
Ал, екінші бесжылдығы аясында 4 жоба жүзеге асырылуда. Олар «Премиум Класс-Строй» ЖШС-нің әк шығару зауыты, «Қызылорда AGROPlus» ЖШС-нің Томат пастасын шығару зауыты.Сонымен қатар, республикалық индустрияландыру картасы аясында «Шалқия Цинк ЛТД» АҚ-ның «Шалқия» қорғасын-мырыш кен орнында қуаттылығы жылына 4 млн. тонналық кен байыту комбинаты», «Казахстанская Евразийская Логистическая Сервисная Компания» ЖШС-нің «Ауыл шаруашылығы өнімдерін қайта өңдеу жөніндегі кешен құрылысы» жобалар жүзеге асырылуда.
Аймақ басшысы ««Қарапайым заттар экономикасы» бағдарламасы аясында бірде-бір жоба мақұлданбағанын айтып, тиісті жұмыстарды дер кезінде жүзеге асыруды тапсырды. Жыл аяқталуына аз уақыт қалса да, әлі бірде бір жобаның өтінімі мақұлданбаған, қаржыландырылуы ұзақ уақыт шешілетінін білесіздер. Ауданға бекітілген меже – 2 млрд. теңгені қалай игересіздер? Ауданда үстіміздегі жылдың 9 ай қорытындысымен жеңіл өнеркәсібі 1,3%-ға және құрылыс саласы 42,1%-ға төмендеген. Аталған сала аясындағы жобалармен жұмыс күшейтілуі қажет» деп,- тапсырма берді өңір басшысы.
Қызылорда қаласы бойынша индустриаландыру бағдарламасының бірінші бесжылдығында 4 жоба ал, екінші бес жылдығында 10 жоба жүзеге асырылуда. 
Қала әкімі Н.Нәлібаев бұл бағыттағы атқарылған жұмыстарды баяндап, алдағы уақытта жүзеге асырылатын жобалар туралы айтты.
Жүзеге асырылуы тиіс жобалар белгіленген мерзімінде іске қосылуы тиіс. Ал нәтижесіз жобалардың жер телімдері мемлекетке қайтарылатын болады.
<blockquote>
 «Индустриялық аймақта орналастырылған жобалардың уақытында іске қосылуын қамтамасыз етіп, мүлдем жұмыс жүргізілмеген жобалардың жер телімдерін тиісті облыстық басқармалармен мемлекет меншігіне қайтару жұмыстарын ұйымдастыру» қажет деді аймақ басшысы Қуанышбек Ысқақов.
</blockquote>
<img src="https://kyzylorda-news.kz/wp-content/uploads/2019/11/14akimat2.jpg" alt="" />
<img src="https://kyzylorda-news.kz/wp-content/uploads/2019/11/14akimat3.jpg" alt="" />
<img src="https://kyzylorda-news.kz/wp-content/uploads/2019/11/14akimat4.jpg" alt="" />
<img src="https://kyzylorda-news.kz/wp-content/uploads/2019/11/14akimat5.jpg" alt="" />

Мерзімінде жүзеге асырылмаған индустриялық жобалардың жерлері мемлекет меншігіне қайтарылады

<a href="https://kyzylorda-news.kz/">Kyzylorda-news.kz.</a> ЕАЭО-ға мүше мемлекеттердің қаржы нарығы саласындағы заңнамасын үйлестіру туралы келісімді ратификациялау Қазақстанда қызмет көрсететін банктердің проценттік мөлшерлемесін төмендетуге алып келеді. Бұл туралы ҚР Ұлттық банк төрағасы Ерболат Досаев мәлім етті, деп хабарлайды <a href="http://lenta.inform.kz/kz/kazakstandagy-bankter-payyzdyk-stavkasyn-kashan-tomendetedi_a3584780">ҚазАқпарат</a>.
<blockquote>
 «Бүгін талқылаған келісім аясында нарықтағы кедергілерді жою туралы қадамдар қарастырылған. Бұл өз кезегінде бәсекелестікті дамытуға және банктік сектор тарапынан сервисті жақсартуға жағдай жасайды. Нарықтағы қатысушылар алаңының кеңеюі алдағы уақытта тарифтердің, комиссия талаптарының және проценттік ставкалардың төмендеуін білдіреді», – деді Ерболат Досаев Мәжілісте тілшілер сауалына жауап бере отырып.
</blockquote>
Бұдан бұрын хабарланғандай, Парламент Мәжілісінің жалпы отырысында «Еуразиялық экономикалық одаққа мүше мемлекеттердің қаржы нарығы саласындағы заңнамасын үйлестіру туралы келісімді ратификациялау туралы» заң жобасы&nbsp;мақұлданды.
<blockquote>
 «Ортақ қаржы нарығын құру банк, сақтандыру секторында және бағалы қағаздар нарығындағы қызмет көрсету секторында лицензияларды өзара тануды, қаржы нарықтарына кемсітушіліксіз кіруді қамтамасыз етуді, мемлекеттік реттеуді жетілдіруді және қаржы нарықтарында бақылау мен қадағалауды жүзеге асыруды көздейді», – деді ҚР Ұлттық банк төрағасы.
</blockquote>

Қазақстандағы банктер пайыздық ставкасын қашан төмендетеді?

<a href="https://kyzylorda-news.kz/">Kyzylorda-news.kz.</a> 2020 жылдың 16 желтоқсанынан бастап шетелдік банктер Қазақстанда өз филиалдарын аша алады, ал бұл кредиттің пайыздық мөлшерлемесін төмендетуге ықпал етпек, деп хабарлайды <a href="https://sputniknews.kz/economy/20191113/12020624/ulttyq-bank-kredit.html">Sputnik Қазақстан</a>.&nbsp;
Қазақстан нарығына ірі халықаралық банктер келгеннен кейін кредит бойынша пайыздық мөлшерлеме төмендеуі мүмкін. Бұл туралы бүгін ұлттық банк төрағасы Ерболат Досаев мәлімдеді.
<blockquote>
 “2020 жылдың желтоқсанынан шетелдік банктерге тікелей филиалдарын ашуға рұқсат етіледі. Бұл банк секторы мен сақтандыруды қадағалауға қатысты, ал құнды қағаздар нарығы бойынша тікелей филиал ашуға тыйым салынған. Олар еншілес ұйым құру арқылы жұмыс істеуі тиіс. Нарыққа қатысушылар алаңының кеңеюі тариф пен комиссиялардың азаюын, шарттардың жақсаруын, болашақта пайыздық мөлшерлеменің төмендеуін білдіреді, әрине”, – деді Досаев.
</blockquote>
Оның пікірінше, қазақстандық банктер шетелдік қаржы ұйымдарымен бәсекеге дайын. Досаев көрші Ресей мен Қытайдың ірі банктерінің филиалдары елімізде бұрыннан жұмыс істейтінін атап өтті.
Бүгін мәжіліс “Еуразиялық экономикалық одаққа мүше мемлекеттердің қаржы нарығы саласындағы заңнамасын үйлестіру туралы келісімді ратификациялау туралы” заң жобасын мақұлдады.
Ортақ қаржы нарығын құру банк, сақтандыру секторында және бағалы қағаздар нарығындағы қызмет көрсету секторында лицензияларды өзара тануды, қаржы нарықтарына кемсітушіліксіз кіруді қамтамасыз етуді, мемлекеттік реттеуді жетілдіруді және қаржы нарықтарында бақылау мен қадағалауды жүзеге асыруды көздейді.

Қазақстан және Қызылорда облысының жаңалықтары: Экономика