Kyzylorda-news.kz. Бүгін облыс әкімі Гүлшара Әбдіқалықова бизнес-қоғамдастық өкілдерімен, қаржы институттарының басшыларымен кездесу өткізіп, инвестициялық жобалармен танысты.
Аймақ басшысы пандемия кезінде экономикалық табыс көлемін сақтап қалу үшін бизнесті әртараптандыру, жаңа инвестициялық жобалар тарту арқылы кәсіпкерлермен бірлесіп жұмыс істеудің тиімділігін атап өтті.
<blockquote>
 “Шағын және орта бизнес иелері кәсібінің тоқтап қалуы, мұнай өндірісі көлемінің азаюы экономикаға әсер етеді. Бұл жағдайдан шығу үшін әртүрлі қадамдар жасауға тиіспіз. Биыл біз 270-ке жуық әртүрлі жобалар қамтылған арнайы экономикалық даму картасын жасадық. Инвесторларды тарту арқылы да әртүрлі жобаларға қаржы бөлінбек. “Байқоңыр “ӘКК” АҚ барлық қаржы институттары мен екінші деңгейдегі банктерге әлеуетті жобаларды ұсынады, сондай-ақ өңір кәсіпкерлерінің проблемалық мәселелерін шешуге ықпал ететін болады. Бұл ретте банктердің назарынан тыс қалған жобаларды қолдау мақсатында ауыл кәсіпкерлерін жеңілдікпен несиелендіруге бағытталған «Қызылорда» өңірлік инвестициялық орталығының қызметін 2025 жылға дейін ұзарттық. Аймақтың дамуына, жаңа жұмыс орындардың ашылуына ықпал жасайтын жобаларды қолдауға әрқашан дайынбыз”,-деді облыс әкімі Гүлшара Әбдіқалықова.
</blockquote>
Кездесуде облыс әкіміне өндіріс, ауыл және балық шаруашылығы, халыққа қызмет көрсету салаларын дамытуды көздейтін ірі және шағын 12 инвестициялық жоба таныстырылып, 2 жоба қайта толықтырылуға берілді. Жалпы сомасы 3 613 млн.теңгені құрайтын бұл жобалар 262 жаңа тұрақты жұмыс орнын құруды көздейді. 
Жиынға шақырылған әрбір кәсіпкерлер өз жобаларының маңыздылығын қорғап, банк арқылы қаржыландыру тетіктеріне тоқталып, облыс әкімінің назарына ұсынды. Мәселен, арнайы техника сатып алу, құрылыс дүкенін ашу, сантехникалық бұйымдар өндірісі, мектеп оқушылары арасында барлық пәндер бойынша турнирлер ұйымдастыру сынды жобалар қаралды.
Сонымен бірге өңірдің өндірістік әлеуетін көтеруге арналған теңдесі жоқ әйнек өндірісі мен мұнай қалдықтарын өңдеу, жиһаз цехын іске қосатын жобалар қолға алынбақ. Ауыл шаруашылығы саласында да бірқатар жобалар таныстырылды. Атап айтқанда, кәсіпкерлер түйе және ірі қара мал өсіру, жантақ балын өндіру, жылыжай салу, балық шаруашылығын дамыту жобаларына қаржылай қолдау сұрады. 
Кездесу барысында екінші деңгейдегі банктер мен “Байқоңыр “ӘКК” АҚ бизнес-жобаларды одан әрі қаржыландыру және іске асыру үшін инвестициялық жобаларды іріктеп алып, кәсіпкерлердің бірқатар жобаларын қолдады. 
Өңір басшысы Гүлшара Әбдіқалықова жиын соңында “Байқоңыр “ӘКК” АҚ барлық қаржы институттарының интеграторы және өңірдегі әлеуетті жобаларды қолдау жөніндегі оператор болатынын атап өтіп, бірқатар тапсырма берді.
Айту қажет, мұндай кездесу төртінші рет өткізілуде. Инвестициялық жобаларға қаржылай қолдау білдіретін жиын алдағы кезде бизнес құрылымдарының басшыларымен бірге ашық форматта ұйымдастырылады.

Облыс әкімі бизнес-қоғамдастық өкілдерімен кездесті

<a href="https://kyzylorda-news.kz/">Kyzylorda-news.kz</a>. Жуырда Қазақстан Ұлттық Банкі «Дала қазынасы» сериясымен «Жеті қазына» монеталарын айналымға шығарады. Сонымен қатар, алтын мен күмістен жасалған коллекциялық монеталар шығарады. 100 теңгелік биколорлы айналыстағы монеталар 7 түрде дайындалған. Олар – «ER JIGIT», «SULÝ ÁIEL», «QUMAI TAZY», «AQYL BILIM», «BEREN MYLTYQ», «JÚIRIK AT» және «QYRAN BÚRKIT». Техникалық сипаттамасы жағынан олар басқа айналыстағы номиналы 100 теңгелік монеталармен бірдей. Әр түрінен 500 000 дана дайындалды, жалпы таралымы – 3,5 млн. дана.
<blockquote>
 “Коллекциялық және инвестициялық монеталар өз құны бойынша заңды төлем құралы болып табылады. Алайда олардың негізгі мақсаты- мәдени-ағартушылық және инвестициялық. Сонымен қатар, Қазақстан Ұлттық Банкі халық үшін тазартылған алтынның өлшемдік құймаларын сату және кері сатып алу бағдарламасын 2017 жылы іске қосты. Алтын құймалар бес түрде ұсынылған: 5, 10, 20, 50 және 100 г. Барлығы 2017 жылдан бастап жалпы салмағы 1,25 т құрайтын 34 688 өлшеуіш құйма сатылды. Алтын құймаларын Halyk Bank-тен, Еуразиялық Банктен, Jýsan Bank-тен, Банк ЦентрКредиттен, банктік емес айырбастау пункттерінен сатып алуға және оларға кері сатуға болады”, – деді ҚР Ұлттық банкі» ММ Қызылорда облысы филиалы директоры Әсет Мұстафин.
</blockquote>
<img src="https://kyzylorda-news.kz/wp-content/uploads/2020/11/125256071_1166194257109418_8132011309424646795_o.jpg" alt="" />
Сондай-ақ, Ұлттық валютадағы депозиттер – 95,9 млрд. теңгені құрап, 11,9 пайызға өсті. Шетел валютасында – 16,6 пайызға өсіп 42,0 млрд. теңге болды. Бүгінде теңгедегі депозиттер үлесі 69,5% құрады.
<img src="https://kyzylorda-news.kz/wp-content/uploads/2020/11/125222477_1166194253776085_4196068105202548109_o.jpg" alt="" />

«Жеті қазына» монетасы айналымға шығады

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықова Корея Республикасының Қазақстандағы Төтенше және өкілетті елшісі Ку Хонг Сокпен кездесті. Кездесуде аймақ басшысы алдымен мейманды Корея Республикасының Қазақстандағы Төтенше және өкілетті елшісі қызметіне тағайындалуымен құттықтап, екі ел арасындағы дипломатиялық байланыстың нығая түскенін жеткізді. Сонымен қатар, қос мемлекеттің бауырластығы, достық қарым-қатынасы бүгінде берік ынтымақтастыққа ұласқандығын айтты.
<blockquote>
 “Қазақстан мен Корея Республикасы көптеген жылдар бойы ашық және сенімді қарым-қатынас орнатқан стратегиялық серіктестер екендігі белгілі. Екі ел арасындағы дипломатиялық қарым-қатынастардың орнағанына биыл 28 жыл толып отыр. Қазіргі таңдағы жоғары деңгейдегі тұрақты байланыстар, сауда-экономикалық қатынастардың қарқынды өсуі және бірлескен мәдени іс-шаралар өзара қарым-қатынастардың айқын дәлелі болып табылады. Тарихи деректерге сәйкес елімізге депортацияланған корейлер қазақ халқының бауырлас көмегіне сүйенді. Шиелі ауданында корей этносының 29 өкілі Социалистік Еңбек ері атанды. Облыс аумағында Хон Бом До, Ге Бон У, Цай Ден Хак, Ким Ман Сан сынды кәріс диаспорасының атақты өкілдері жемісті қызмет атқарған. Сол уақыттан бері елімізде, оның ішінде Қызылорда облысында корейлердің біршама ұрпақтары қоныстанып, бүгінгі күнге дейін тату-тәтті өмір сүріп келеді”, – деді облыс әкімі Г.Әбдіқалықова.
</blockquote>
Елші Ку Хонг Сок осы сапарында ауылшаруашылық саласында, оның ішінде күріш өсіруде Сыр өңірінің орасан жетістерге жеткеніне таңданысын білдірді. Қызылордалық диханшылардың күріш өсіру технологиясын меңгеру мақсатында екі ел шаруаларының тәжірибе алмасу шарасын өткізуге ұсыныс білдірді.
<blockquote>
 “Мен осы сапарымда Қызылорда облысының тыныс-тіршілігімен таныстым. Қорқыт ата атындағы университетте болдым, Хон Бом До атындағы мемориалын көрдім. Өздеріңіз білесіздер, Қазақстан Республикасының Президенті Қасым-Жомарт Кемелұлы Тоқаев Қызылордада жерленген генерал Хон Бом Доның сүйегін тарихи отанына қайтару туралы Корея Президенті Мун Чже Иннің сұранысына қатысты оң шешім қабылдады. Хон Бом До – Корея тәуелсіздігі үшін күрескен даңқты ұл. Сондықтан екі ел басшылары келіскен бұл істі атқаруға сіздің қолдау білдіруіңізді сұраймын. Сонымен, қатар бұл өңір мұнай-газ саласымен қатар, Байқоңыр ғарыш айлағымен де әйгілі. Ауылшаруашылық саласында, әсіресе, күріш өндіруде толағай табыстарға жетіп келесіздер. Біз жергілікті дихандардың күріш өсіру технологиясын меңгергіміз келеді. Осы бағытта екі ел шаруалары тәжірибе алмасса деген ұсынысым бар. Коронавирус инфекциясымен күресте де ынтымақтастығымызды арттыра береміз деп сенемін”, деді Корея Республикасының Қазақстандағы Төтенше және өкілетті елшісі Ку Хонг Сок.
</blockquote>
Кездесуде аймақ басшысы Гүлшара Әбдіқалықова Хон Бом Доның сүйегін тарихи отанына қайтару ісінде қолдау көрсететінін жеткізді. Пандемиямен күрес мәселесінде Корея Республикасымен ынтымақтастықты арттыруды маңызы зор екендігін айтты. Ауылшаруашылық саласында да әріптестікті арттырып, екі ел мамандарының тәжірибе алмасу ұсынысы іске асатынын білдірді.

Гүлшара Әбдіқалықова Корея Республикасының Қазақстандағы Төтенше және өкілетті елшісімен  кездесті

<a href="https://kyzylorda-news.kz/date/2020/11/10/?doing_wp_cron=1605006600.0146610736846923828125">Kyzylorda-news.kz.</a> Пандемия салдары қазіргі таңда әлемдік дәрежеде бірқатар салаларға кері әсерін тигізіп, оның ішінде туризм саласын да айтарлықтай дәрежеде зардап шектірді.
Дегенмен, бұл жағдайда әлемдік сыртқы туризм саласы деңгейінің төмендетіп, ішкі туризмнің дамуына мүмкіндік берді.
Осы орайда, туристік нысандарды зерттеу және оларды жандандыру мақсатында облыстық кәсіпкерлік және туризм басқармасы «Халықаралық Аралды құтқару қорының» Қазақстан Республикасындағы атқару дирекциясымен бірлесіп АРАЛ ауданына қарасты Қосаман ауылдық округі, «Ақеспе» елді-мекенінде орналасқан «Ыстық су» шипалы бұлағы, Қамыстыбас елді-мекеніне қарасты «Аспан асты мұражайы», «Қараусыз қалған кеме қалдықтары» («Возрождение» аралы) сынды бірқатар туристік нысандарды біріктіріп, бағдарлама әзірлеуде.
Тиісті туристік маршрут әзірленгеннен кейін, туристік фирма өкілдеріне ұсынылатын болады.
<blockquote>
 “Арал ауданы өзінің экологиялық жағдайына қарамастан, көз тартарлық табиғатқа ие болып табылатын өлке. Арал теңізінің тартылуы әлемдік деңгейдегі табиғи апатты алып келсе де, сол аймақта қалып қойған теңіздің табаны, таушықтар, қараусыз қалған кемелердің қалдықтары біршама туристерді қызықтырып, тартуда”, – дейді облыстық кәсіпкерлік және туризм басқармасының мамандары.
</blockquote>
Басқарма тарапымен әзірленген «Арал ауданының туристік әлеуеті» туралы қысқаша бейнероликті назарларыңызға ұсынамыз.
<img src="https://kyzylorda-news.kz/wp-content/uploads/2020/11/124329240_1079677785838752_3956135563280740001_o.jpg" alt="" />
<img src="https://kyzylorda-news.kz/wp-content/uploads/2020/11/124350351_1079677849172079_5745515385664198075_o.jpg" alt="" />
<img src="https://kyzylorda-news.kz/wp-content/uploads/2020/11/124415357_1079677952505402_5409868057804651411_o.jpg" alt="" />

Арал ауданы: Пандемия ішкі туризмнің дамуына мүмкіндік берді (ВИДЕО)

<a href="https://kyzylorda-news.kz/date/2020/11/09/">Kyzylorda-news.kz</a>. Жыл басынан бері облыстан 22,5 млн. долларды құрайтын 66,1 мың тонна ауыл шаруашылығы өнімдері (күріш, балық өнімдері, бидай қалдығы, бидай ұны, сабан, мақсары майы, қауын және қарбыз) өзге елдерге экспортталып, өткен жылдың сәйкесті кезеңімен салыстырғанда 11,8 пайызға артты. Бұл туралы облыс әкімінің баспасөз қызметі хабарлады.
Оның ішінде 97,8% өңделген өнімдерді шетке саудаланған. Өнімдер әлемнің 17 мемлекетіне жеткізілуде.
Барлық экспортталған өнімнің 91,0 пайызын құрайтын облыстың негізгі дақылы – күріш өнімі, Ресей, Қырғызстан, Беларусия, Әзірбайжан, Моңғол мемлекеті, Тәжікстан, Украина, Түркмения және Ирак мемлекеттеріне экспортталған.
Есепті кезеңге 60,2 мың тонна күріш өнімі экспортталып, былтырғы жылмен салыстырғанда 132,0 пайызға артып отыр.
Биылғы жылы алғаш рет облыстан Германия мемлекетіне 421,5 тонна қамыс және Өзбекстанға 136 тонна бидай ұны жөнелтілді. 
Сондай-ақ, Қытай және Ауғанстан мемлекеттеріне 391,5 тонна мақсары майы, Ресей мемлекетіне 1270 тонна қарбыз, 137 тонна қауын экспортталды.

Қызылорданың ауылшаруашылық өнімдері 17 мемлекетке экспортталуда

<a href="https://kyzylorda-news.kz/date/2020/11/09/?doing_wp_cron=1604900456.1962530612945556640625">Kyzylorda-news.kz.</a> Бүгінгі күні, облыста жалпы саны 128 тойхана бар. Өздеріңізге белгілі, пандемия жағдайына байланысты төтенше жағдай мен карантиндік шараларға сәйкес бас мемлекеттік санитариялық дәрігерінің қаулысымен КВИ-ның алдын алу және халықтың қауіпсіздігін қамтамасыз ету мақсатында кейбір кәсіпкерлік қызмет түрлеріне, оның ішінде тойханалардың қызметіне тыйым салынды.
Қызметіне тиым салынған кәсіпкерлік нысандарын қайта жандандыру және&nbsp;басқа салаларға бағыттау мақсатында облыс әкімдігімен «Қызылорда облысының 2023 жылға дейінгі экономикалық даму жоспары»әзірленді. 
Жоспар аясында 10-нан аса тойхана қызметтерін өзге салаларға бағыттады.
Мәселен, Арал ауданында орналасқан «Ақниет» тойханасы киім-кешек сататын сауда нысанына, Қармақшы ауданына орналасқан «Алтын Ғасыр» тойханасы отбасыға арналған киімдер сататын сауда орталығына және «Мәлике Ана» тойханасы балалар ойын алаңы мен кондитерлік өнімдер өндіретін цехына ауыстырылса, Қызылорда қаласында орналасқан «Ұлытау» тойханасы шырындар мен сусындар және «Orda» тойханасы автоматтандырылған лаваш шығару өндірістерін іске қосу бойынша жұмыстар жүргізуде.
Сонымен бірге, бірқатар тойханалар өз бағыттарын құс шаруашылығына, құрылыс материалдары дүкеніне,медицина орталығына қайта бағыттауда.
Бұл бағыттағы жұмыстар әрі қарай жалғасатын болады. 
Осы саладағы кәсіпкерлерге тойхана қызметін қайта бағыттау бойынша қызығушылық танытылған жағдайда облыстық кәсіпкерлік және туризм басқармасының 8(7242)40-10-57 байланыс нөмеріне хабарласуға болады.
<img src="https://kyzylorda-news.kz/wp-content/uploads/2020/11/124433150_1078619529277911_8540265071024051928_o.jpg" alt="" />
<img src="https://kyzylorda-news.kz/wp-content/uploads/2020/11/124101816_1078619692611228_9003958699381235239_o.jpg" alt="" />
<img src="https://kyzylorda-news.kz/wp-content/uploads/2020/11/124177932_1078619765944554_3521029880276440296_o.jpg" alt="" />

Қызылордада тойханалар басқа кәсіпкерлік нысандарына беріліп жатыр

<a href="https://kyzylorda-news.kz/date/2020/11/06/">Kyzylorda-news.kz.</a> Бүгін облыс әкімі Гүлшара Әбдіқалықова «Calamari&Braam» компаниясының бас директоры Мухамед Юссеф Хассан Яссир және «Марсель Петролиум» ЖШС бас директоры Махмут Нәлібаевпен кездесті. Бұл туралы облыс әкімінің баспасөз қызметі хабарлады.
Аймақ басшысы кездесу барысында Мысыр Араб республикасынан арнайы келген мейманға ілтипат білдіріп, қазіргі қысылтаяң шақта экономикалық табысты еселеудің жаңа жолдарын қарап, сауда-экономикалық ынтымақтастықты күшейтуге басымдық берілетініне айрықша тоқталды. Сондай-ақ, Қызылорда аймағы инвестиция тартуға қолайлы өңір екенін атап өтіп, іскерлік қарым-қатынас орнатуға мүдделі екенін жеткізді.
<blockquote>
 “Биыл Қазақстан Республикасы мен Мысыр Араб Республикасы арасындағы дипломатиялық қатынастардың орнағанына 28 жыл толып отыр. Біз сіздерді қонақжай Сыр елінде қарсы алғанымызға шын жүректен қуаныштымыз және біздің облысқа іскерлік мақсатта келген сапарларыңыз үшін алғысымды білдіремін. Қызылорда облысы инвестиция салу үшін тартымды аймақ. Біздің өңір ауыл шаруашылығы дамыған, минералды ресурстардың едәуір қорлары бар, тамаша туристік әлеуетке ие. Ең бастысы – тиімді логистикалық жағдайға ие”,-деді Гүлшара Әбдіқалықова.
</blockquote>
Кездесу барысында Мухамед Юссеф Хассан Яссир Қазақстанға, оның ішінде Қызылорда өңіріне алғаш рет сапарлап отырғанын және бірқатар жобалар арқылы ынтымақтасуға ниетті екенін білдірді. Екі ел арасындағы бизнес секторды дамытып, туризмді жаңа деңгейге шығаруды көздеп отырғанын тілге тиек етті. Сонымен бірге халық үшін туристік демалыс орнын жасайтын жаңа идеяларын ұсынды. Әсіресе, ауыл шаруашылығы бағытында өнім өндіру, балық шаруашылығын дамытатын бірқатар жобалары барын қаперге салды. 
Қабылдау барысында «Марсель Петролиум» ЖШС бас директоры Махмут Нәлібаев инвестиция тарту арқылы Сыр өңірінің перспективалық дамуын көздейтін жобаларды іске асыруда өзара әріптестік келісімдерге дәнекер болатынын жеткізді.
Қазір мемлекет шетелдік инвесторларға бірқатар жеңілдіктер ұсынып отыр. Бұл – кеден баж салығынан босату, мемлекеттік заттай гранттар, салықтар бойынша преференциялар, инвестициялық субсидиялар беру. Бұл ретте Сыр өңірінде жыл сайын инвестиция тарту жұмыстары жалғасып жатыр.
Жиын соңында облыс әкімі Гүлшара Әбдіқалықова инвесторлардың кез келген сындары ұсыныстарын құптайтынын айтып, өңірдің туристік әлеуетін көтеруге арналған оң бастамаларды қолдайтынын жеткізді.
<img src="https://kyzylorda-news.kz/wp-content/uploads/2020/11/123985428_2875592672543783_6238561043378947733_o.jpg" alt="" />

Облыс әкімі «Calamari&#038;Braam» компаниясының бас директоры Мухамед Юссеф Хассан Яссирмен кездесті

<a href="https://kyzylorda-news.kz/">Kyzylorda-news.kz</a>. Қызылорда облысы өзінің күрішімен ғана белгілі емес. Арал балығы Қазақстанда ғана емес, сонымен қатар, одан тыс жерлерде, тіпті Еуроодақ елдерінде де танымал, олардың ішіндегі ең құндысы – мұртты табан, сазан, ақмарқа, табан, жайын, көксерке, қаракөз, шортан, алабұға.
Елбасының бастамасымен Сырдария өзенінің арнасын реттеу және Арал теңізінің солтүстік бөлігін қалпына келтіру жөніндегі жобаның (САРАТС – 1) бірінші кезеңін іске асырудың арқасында Арал теңізіндегі балықтардың көптеген биологиялық түрлері қалпына келтірілді. Бұл балық шаруашылығының дамуына жаңа серпін берді. Осы уақыт ішінде өңірде балық аулау көлемі 20 есеге, 400-ден 8 мың тоннаға дейін ұлғайды.
Бүгінде өңірде 9 балық өңдеу зауыты жұмыс істейді, олардың 4-інде Еурокод бар. Соңғы 5 жылда балықты қайта өңдеу 14%-ға, ал, оның экспорты 2,5 есеге өсті. Балық өнімдері таяу және алыс шетелдің 14 еліне – Ресей, Грузия, Беларусь, Литва, Өзбекстан, Қырғызстан, Әзірбайжан, Германия, Польша, Қытай, Чехия, Нидерланды, Австрия, Данияға экспортталады.
Өңірдің балық саласының әлеуеті жоғары. Арал теңізі, Сырдария өзені, 207 балық шаруашылығы су айдыны – мұның бәрі аквамәдениет өсіруде пайдаланылады.
Жүзеге асуы үшін 28 млрд. теңгеден астам қаражат бағытталған Қызылорда облысының балық шаруашылығын дамытудың 2030 жылға дейінгі бағдарламасы тауарлық балық көлемін 34 есеге арттыруға мүмкіндік береді, ал, балық өнімдерінің экспорты бағдарламаның соңына қарай 4,2 мың тоннадан 8,5 мың тоннаға дейін өседі. 2030 жылға дейін облыста кем дегенде 55 көл-тауарлы балық шаруашылығы, 10 тоған және 4 торлы шаруашылық құрылады, 3 жабық сумен жабдықтау құрылғысы салынады.

Қызылорда облысында балық шаруашылығын дамыту бағдарламасы қолға алынды

<a href="https://kyzylorda-news.kz/date/2020/11/04/">Kyzylorda-news.kz.</a> Қаржы институты – «Қызылорда» Өңірлік инвестициялық орталығы арқылы беріліп жатқан жеңілдетілген несиелер туралы сауалдарға Орталық менеджері Асхат Темірбаев жауап берді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Жалпы «Қызылорда» Өңірлік инвестициялық орталығы құрылғанына 5-6 жыл уақыт болса да халық арасында кең танылған қаржы ұйымдарының бірі. Әсіресе кәсіппен айналысуға ниетті азаматтардың құжаттарын әзірлеуде, кепіл мүлкін бағалауда тиімді жолдарды ұсынып отырған мекеме. Бүгінгі таңда орталықпен қандай несилер берілуде?
&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Биылғы жылы «Қызылорда» Өңірлік инвестициялық орталығы арқылы «Еңбек» және «Бизнестің жол картасы» мемлекеттік бағдарламалары аясында жеңілдетілген несиелер берілді. «Еңбек» бағдарламасы арқылы біз «Аграрлы несие корпорациясы» АҚ-ның қаржысын кәсіпкерлерге несие ретінде бердік. Әлі де несие беру жалғасуда. Несие алушыға қойылатын талап: несие 5 жылға беріледі. Максимальды қаржы. 20 млн.теңге, 17,5 пайызбен. Егер кәсіпкер инвестициялық мақсатқа алса бастапқы 3 жылға, ал айналым қаражатына берілетін шағын несиенің бастапқы 2 жылға пайыздық мөлшерлемесін мемлекет тарапынан 11,5 %-ға субсидиялау қарастырылған. Яғни инвестициялық мақсатқа берілген несиелердің бастапқы үш жылында, ал&nbsp; айналым қаражатына берілетін несиенің&nbsp; бастапқы екі жылында кәсіпкер пайыздық мөлшерлемені 6 %-бен төлесе, мемлекет тарапынан 11,5 %-ы субсидияланады.
&nbsp;&nbsp;&nbsp;&nbsp;&nbsp;&nbsp;&nbsp;&nbsp; –&nbsp; Осы Сіз айтып отырған бағдарламаларға қатысушыларға қандай талап қойылады? Арнайы сертификаттар қажет пе?
&nbsp;&nbsp;&nbsp;&nbsp;&nbsp;&nbsp;&nbsp;&nbsp; – «Еңбек» бағдарламасы бойынша несие алғысы келетін азаматтарға қойылатын талаптар: Кәсіпкерлік палатасы арқылы «Бастау» жобасын оқығандығы жөнінде сертификаты мен жұмыссыз екендігін дәлелдейтін анықтамасы қажет. Ал жұмыс жасап тұрған азаматтар үшін «Бизнес-мектеп» оқыту курсынан алған сертификаты жарайды. Онан өзге кепіл мүлік талап етіледі. Кепіл мүлкі жетпеген жағдайда «ҚазАгроГарант» мекемесі арқылы кепілдендіруге болады.&nbsp; Ал «Бизнестің жол картасы» бағдарламасы арқылы «Даму» Қорынан бөлініп отырған қаражатты алу үшін кәсіпкерлік курстарынан өткендігін дәлелдейтін сертификаттар, жолдама талап етілмейді. Ондай шектеу жоқ. Несие алуға ниетті азамат 18 жастан асса болды. Жасына да қойылатын шектеу жоқ, яғни зейнет жасындағы кәсіпкерлерге де беріледі. Құжаттарға қатысты қойылатын талаптар: төлқұжаты болуы керек, несие тарихы таза болуы қажет, сондай-ақ кепіл мүлік керек. Кәсіпкердің кепіл мүлкі жетпеген жағдайда «Даму» Қоры арқылы 85 пайызға дейін кепілдендіре алады. &nbsp;
&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Осы жылы Орталық арқылы қанша жоба қаржыландырылды?
– Биыл Орталықпен жалпы құны 616 млн.теңгені құрайтын 170 жоба қаржыландырылды. Жаңадан 185 жұмыс орны ашылды. «Еңбек» бойынша жалпы құны 450 млн.теңгені құрайтын 149 жоба қаржыландырылды. Бағдарламаның биылғы жылға арналған қаржысын толық игеріп болдық. Қазір «Бизнестің жол картасы» бағдарламасы аясындағы «Даму» Қорының қаржысын игерудеміз. 1 млрд.теңгенің көлемінде қаржы бөлінді. Бүгінгі күнге дейін жалпы құны 113 млн.теңгені құрайтын 7 жобаны қаржыландырдық. Несие алуға ниетті азаматтар үшін біздің мекен-жайымыз: Қызылорда қаласы, Қорқыт ата көшесі, 123, 3-қабат, 306, 308-бөлмелер. Ауылдық елді мекендердің кәсіпкерлері облыс орталығына келіп уақыт жоғалтпай-ақ әр ауданда орналасқан Кәсіпкерлер палатасы филиалдарының мамандарына жүгіне алады.
<img src="https://kyzylorda-news.kz/wp-content/uploads/2020/11/ashat-ric.jpeg" alt="" />

«Қызылорда» өңірлік инвестициялық орталығы арқылы кәсіпкерлерге несие берілуде

<a href="https://kyzylorda-news.kz/date/2020/11/04/">Kyzylorda-news.kz.</a> Қызылорда облысының әкімі Гүлшара Әбдіхалықова облыс орталығында жүзеге асырылып жатқан “Түрлі өнімдерді консервілеу өнеркәсібі” жобасы туралы әлеуметтік желіде ойымен бөлісті.
Қымбатты жерлестер!
Биылғы пандемия кезі бәріміз үшін де сынау кезеңі болғаны рас. Өңірімізде, елімізде ғана емес, әлемде экономика дағдарысқа ұшырады. Осы кезеңде жұмысты дұрыс үйлестіре білмесек, одан шыққан уақытта тіпті дағдарып қалуымыз әбден мүмкін. 
Сондықтан, дәл қазіргі уақытта зардапқа ұшыраған шағын және орта бизнеске қолдау көрсету тиімді болмақ. 
Қауіпті індет кезеңінде облыс халқын дәрі-дәрмектен бөлек, бірінші кезекте азық-түлік өнімдерімен, тағаммен қамтамасыз етудің маңызы зор екені басымыздан өтті. 
Осы мақсатта бүгінгі күні облыс орталығында “Түрлі өнімдерді консервілеу өнеркәсібі” жобасы жүзеге асуда. Бұқтырылған қой, сиыр және жылқы еттері, сондай-ақ, күріш, қарақұмық, арпа ботқалары консервіленіп, дайын өнімдер күйінде шығарылуда. Бұл жоба бойынша алдағы уақытта алма повидлосы мен өрік қайнатпалары әзірленбек. Осы өнеркәсіптің пандемия кезінде бос тұрып қалған мейрамхана базасында жасалып отырғанын айта кету керек. 
Өзім дайын өнім консервілерінің дәмін татып көрдім, ұнады. Кейде жұмыста жүріп, тамақ пісіруге уақыттары бола бермейтін адамдар үшін өте қолайлы. Бағасы да халыққа қолжетімді болмақ. Осы бағыттағы шағын және орта бизнесті дамыту жұмыстарын қолдау жалғаса береді. 
“Бірлігі мықты елдің берекесі де мол”, – дейді дана халқымыз. 
Бірлікте еңбек етейік, ісіміздің нәтижесін бірге көрейік!

Гүлшара Әбдіқалықова: Қазіргі уақытта шағын және орта бизнеске қолдау көрсету тиімді

<a href="https://kyzylorda-news.kz/date/2020/11/04/">Kyzylorda-news.kz.</a> Пандемияның әсерінен туризм саласы шығынға батты. Қатерлі індеттің кесірінен Қызылордаға сырттан келушілердің саны өткен жылмен салыстырғанда 50 пайызға төмендеп кеткен. Бұл туралы өңірлік коммуникациялар қызметінде өткен баспасөз мәслихатында облыстық кәсіпкерлік және туризм басқармасының басшысы Фердоуси Қожабергенов мәлімдеді.
Басқарма басшысының айтуынша ішкі туризмге келушілердің саны 48,3 пайызға төмендеп және келушілердің жалпы саны 19441 адамды құраған. &nbsp;Өңірдегі қонақ үйлер де 254 млн теңге шығынға ұшыраған.
Өңірдің негізгі туристік нысандарын дамытуға қатысты 2019 жылы «Қазақстан Республикасының туристік саласын дамытудың 2019-2025 жылдарға арналған мемлекеттік бағдарламасы» бекітілген болатын.Бағдарлама аясындағы туристендіру картасына Қызылордадан 3 туристік нысан енгізілгені белгілі болды.
<blockquote>
 ««Қамыстыбас» демалыс аймағы, «Жаңақорған» шипажайы, «Байқоңыр» ойын-сауық туристік аймағы туристендіру картасына енді. Оның ішінде «Байқоңыр» ойын-сауық туристік аймағының жобасы туристендіру картасының ТОП-10 тізімінде. Бұдан бөлек еліміздегі ТОП-50 туристендіру картасына «Қамыстбас» демалыс аймағы мен «Жаңақорған» шипажайы енгізілді. Жаңақорғанда қосымша 88 орындық заманауи шипажайдың құрылысы аяқталуға жақын. Жыл аяғына дейін пайдалануға берілмек», – дейді басқарма басшысы.
</blockquote>
Сонымен қатар «Батыс Еуропа – Батыс Қытай» автокөлік дәлізінің бойында 30 кешен 700-ден астам адамды жұмыспен қамтып отыр. Жыл соңына дейін инвестиция көлемі 950 млн. теңге болатын 2 жол бойы кешені іске қосылмақ.
<blockquote>
 «Пандемия жағдайына байланысты биыл бөлінетін қаржы да қысқарды. Дегенмен басқарма тарапынан өңірдегі аз қамтылған отбасыларға «Байқоңыр», «Қорқыт ата» кешендері мен түрлі харихи орындарға бірнеше рет саяхат ұйымдастырылды», дейді Фердоуси Қожабергенов.
</blockquote>

Жаңақорғанда жаңа шипажай пайдалануға беріледі

<a href="https://kyzylorda-news.kz/">Kyzylorda-news.kz</a>. Елбасы Н.Ә. Назарбаевтың арқасында 2014 жылы “Бейнеу-Бозой-Шымкент” магистральдық газ құбырын салу жобасы іске асырылды, оның 846 шақырымы Қызылорда облысы арқылы өтеді.
Осындай ауқымды жобаны осы жылдар ішінде іске асыру Қызылорда, Байқоңыр қалаларын және облыстың 7 аудан орталығының 4-ін газдандыруға мүмкіндік берді.
Биыл газбен жабдықтау жобаларын іске асыру үшін бюджеттен 5,5 млрд.теңге бөлінді. Төтенше жағдай режимі мен шектеу шараларына қарамастан, ағымдағы жылғы шілдеде 5 мыңнан астам адам тұратын Арал ауданының Жақсықылыш кентіне газ берілді.
Жыл соңына дейін газдандырылмаған қалған 3 аудан орталығының (Жосалы, Жалағаш, Тереңөзек) тұрғындары мен тұрғындарының жалпы саны 50 мың адам болатын Жаңақазалы ауданындағы Ғани Мұратбаев, Шиелі ауданындағы Байсын елді мекендеріне газ беру жоспарлануда.
Нәтижесінде, ағымдағы жылдың соңына дейін халықтың 70%-ы табиғи газға қол жеткізе алады. 
Содан соң, екінші кезеңде өңір аудан орталықтары мен Қызылорда қаласына жақын ірі елді мекендерді газдандыру бойынша жобаларды кезең-кезеңмен іске асыруға кіріседі.
Ағымдағы жылдың қараша айында Қазалы қаласы мен Шиелі ауданының Бекежанов ауылын газбен жабдықтау жобалары іске асырыла бастайды, олар келесі жылы аяқталатын болады. 
2021 жылы Қызылорда қаласындағы Наурыз және Махамбет елді мекендерін, Қармақшы ауданының Төретам және Ақай, Алғабас, Ақмая елді мекендерін, Шиелі ауданының Қодаманов елді мекендерін газдандыру жоспарлануда.

Қазақстан және Қызылорда облысының жаңалықтары: Экономика

Облыс әкімі бизнес-қоғамдастық өкілдерімен кездесті

«Жеті қазына» монетасы айналымға шығады

Гүлшара Әбдіқалықова Корея Республикасының Қазақстандағы Төтенше және өкілетті елшісімен кездесті

Арал ауданы: Пандемия ішкі туризмнің дамуына мүмкіндік берді (ВИДЕО)

Қызылорданың ауылшаруашылық өнімдері 17 мемлекетке экспортталуда

Қызылордада тойханалар басқа кәсіпкерлік нысандарына беріліп жатыр

Облыс әкімі «Calamari&Braam» компаниясының бас директоры Мухамед Юссеф Хассан Яссирмен кездесті

Қызылорда облысында балық шаруашылығын дамыту бағдарламасы қолға алынды

«Қызылорда» өңірлік инвестициялық орталығы арқылы кәсіпкерлерге несие берілуде

Гүлшара Әбдіқалықова: Қазіргі уақытта шағын және орта бизнеске қолдау көрсету тиімді

Жаңақорғанда жаңа шипажай пайдалануға беріледі

2021 жылы Қызылорданың қай ауылдарына газ тартылады?

Қазақстан және Қызылорда облысының жаңалықтары: Экономика

Облыс әкімі бизнес-қоғамдастық өкілдерімен кездесті

«Жеті қазына» монетасы айналымға шығады

Гүлшара Әбдіқалықова Корея Республикасының Қазақстандағы Төтенше және өкілетті елшісімен кездесті

Арал ауданы: Пандемия ішкі туризмнің дамуына мүмкіндік берді (ВИДЕО)

Қызылорданың ауылшаруашылық өнімдері 17 мемлекетке экспортталуда

Қызылордада тойханалар басқа кәсіпкерлік нысандарына беріліп жатыр

Облыс әкімі «Calamari&#038;Braam» компаниясының бас директоры Мухамед Юссеф Хассан Яссирмен кездесті

Қызылорда облысында балық шаруашылығын дамыту бағдарламасы қолға алынды

«Қызылорда» өңірлік инвестициялық орталығы арқылы кәсіпкерлерге несие берілуде

Гүлшара Әбдіқалықова: Қазіргі уақытта шағын және орта бизнеске қолдау көрсету тиімді

Жаңақорғанда жаңа шипажай пайдалануға беріледі

2021 жылы Қызылорданың қай ауылдарына газ тартылады?

Облыс әкімі «Calamari&Braam» компаниясының бас директоры Мухамед Юссеф Хассан Яссирмен кездесті