<a href="https://kyzylorda-news.kz/">Kyzylorda-news.kz</a> Әлем жұртшылығы жақсы білетін, кәсіби тұрғыда бейбітшілік мақсатқа ғана қызмет ететін екі-ақ мәртебелі мамандық бар. Оның бірі – білім саласының қызметкерлері болса, &nbsp;екіншісі – адам жанының арашасы атаннған ақ желеңді абзал жандар медицина саласының қызметкерлері. Кез келген адам тірлігінде тіпті бірер рет болса да жанына демеу, науқасына шипа іздейді. Сондай сәтте өмір мен өлім арпалысқа түсер сын сағаттарда сырқаттың қасынан табылатын медицина саласы мамандарының қоғамдағы алар орны айрықша, мамандықтары мәртебелі.&nbsp; &nbsp;Медицина саласында дәрігерлердің оң қолы атанған мейірбике мамандығы – алғашқы медициналық-санитарлық көмек көрсететін әлеуетті мүмкіндігі орасан қызметтің бірі.&nbsp;Медбикелер – шеберлік пен білімді ұштастырған, жан-жақты, күтім процесіне толығымен жауапты, мейірімділік көрсететін жандар. Бүгінгі медбикелерді тек дәрігер айтқанының орындаушысы ғана деп түсінуге болмайды. Олардың міндеті – адамдарды, отбасыларды, халықты психикалық, физикалық, әлеуметтік потенциалын жүзеге асыруға үйретіп, дағдыландыру.&nbsp; &nbsp;Мереке қарсаңында Байқоңыр қаласындағы «Академик С.Жиенқұлов атындағы Байқоңыр жоғары колледжі» білім беру мекемесінің медбикесі Мөлдір Пошанова туралы сөз етпекпіз.&nbsp; Мөлдір Жүсіпәліқызы 1984 жылы Түркістан облысы, Кентау қаласында &nbsp;дүниеге келген. 2001 жылы №24 Т.Рысқұлов атындағы орта мектепті бітіргеннен кейін, 2003 жылы Түркістан қаласындағы медицина колледжіне оқуға түседі. 2006 жылы аталған колледжді «Емдеу ісі» мамандығы бойынша бітіріп келіп, алғашқы еңбек жолын Кентау қаласындағы «Кентау Мед орталығы» жауапкершілігі шектеулі серіктестігінде ине егу бөлмесінде мейірбике қызметінен бастайды. Ол 2007 жылы өмірлік серігін жолықтырып, Байқоңыр қаласына қоныс аударады. Бүгінде Мөлдір берекелі шаңырақтың отанасы. Үлкен қызы – Айша 15 жаста, биыл 9-сыныпты бітіріп, мұғалім мамандығына оқуға түсуге талаптануда. Ұлы – Ернұр 14 жаста, кіші ұлы – Алинұр 10 жаста, ал Дина 7 жаста. Олар Байқоңыр қаласындағы №275 мектепте оқиды. Өмірлік жары Ерлан қазіргі таңда тіршілік қамымен Лондон қаласында жұмыс істеп жүр. Отбасында төрт баланың анасы атанған өз ісінің маманы Мөлдір өзінің жайдары мінезімен ұжымдастары арасында сыйлы жан. Ол күнделікті колледж қызметкерлерінің сұрауымен қан қысымын өлшеп, басы ауырып балтыры сыздаса дәрі-дәрмегін беріп, алғашқы көмегін көрсетеді. Колледж студенттеріне денсаулық сағаттарын өткізіп, ауырған сәтте көмек қолын созады.<blockquote>– Медицина саласы әрі қиын, әрі қызықты сала болғандықтан әрине әртүрлі жағдайлар болып тұрады. Адам тағдыры бей-жай қарайтын жайт емес, сондықтан әрқашан мұқият болуға міндеттіміз. Сабырлылық танытып, әр науқастың жағдайын жасауға тырысып бағамыз.&nbsp;Денсаулық – адам баласы үшін баға жетпес байлық. Сол баға жетпес байлықты сақтау үшін дұрыс тамақтанып, зиянды әрек еттерге бармай, салауатты өмір салтын сақтағанымыз жөн, – дейді медбике Мөлдір.</blockquote>&nbsp; Расымен де, медбике – денсаулық сақтау саласының негізгі қозғалтқыш күші. Емделушіге психологиялық тұрғыдан демеу көрсетіп, мейірімділік танытып, тезірек айығуына көмекші болады. Олар қызмет барысында ұйымдастырушылық, ғылыми-зерттеушілік, оқытушылық секілді қағидаларды басшылыққа ала отырып, жұмыс істейді.Арқалаған жүгі ауыр салада қалтқысыз қызмет етіп, мейірімділік пен жылылықтың символына айналып, игі қызмет жасап жүрген медбике ісі қашанда сый-құрметке лайықты деп білеміз. Себебі, әрбір жанға медициналық көмек көрсетуде дәрігермен қатар, медбикенің атқарар рөлі зор. Гиппократ антын қабылдап, міндетін мінсіз атқарушы медбикелердің мәртебесі әрдайым үстем болсын.

Міндетіне адал мейірбике

Бүгінде Сыр медицинасы серпінді дамып келеді. Жалпы күннен-күнге қарыштап, түрлі жаңа технологиялар жүзеге асып жатқан саланың өңірде де заманға сай бағыт алуы қуанарлық жайт. Бүгінде аймақта 150-ден астам медицина ұйымы бар екен. Ал дертіне дауа іздеп келген науқастарға үш мыңға тарта дәрігер, 11 мыңнан астам орта буынды медицина мамандары қызмет көрсетеді.Өңірде денсаулық саласындағы өзекті мәселелердің бірі – маман тапшылығы болатын. Бұл күнде аталған мәселе де өз шешімін тауып келеді. Мәселен, 2018 жылдан бастап бүгінгі күнге дейін сұранысқа ие мамандықтар бойынша 155 резидентке, 162 жалпытәжірибелік дәрігерді даярлауға облыс әкімінің арнайы гранты &nbsp;бөлінген. Сонымен қатар дәрігерлердің білімі мен біліктілігін арттыру мәселесі де аймақта оңтайлы көрініс тауып келеді. Бұл ретте денсаулық сақтау саласы мамандары арнайы оқудан өтеді. Оның ішінде өткен жылы 590 дәрігер, 738 орта буынды медицина қызметкерлері біліктіліктерін арттырған. Бұл үрдіс тұрақты түрде жүзеге асырылады. Себебі дәрігер маманы болу үнемі жетілдірілуді, дамуды, біліктілігіңді арттыруды талап ететіні анық. Осы орайда &nbsp;биылда мамандардың біліктілігін еліміздің алдыңғы қатарлы медицина орталықтарымен қатар озық тәжірибелі шетелдерде арттыру жоспарланып отыр. Мәселен биыл сәуір айында 10 реаниматолог, 5 кардиолог маман Түркияның Стамбул қаласындағы «Мемориал» клиникасында білімін жетілдірген. Сондай-ақ, жыл көлемінде республиканың 9 штаттан тыс бас мамандарын шақырту арқылы конференция, хирургиялық сала бойынша 14 шеберлік сағаттары, оның ішінде екі шеберлік сағаты шетел мамандарының &nbsp;қатысуымен өткізілген. Сонымен бірге 21 түрлі ота жаңадан енгізілген. Аймақтағы денсаулық саласының дамуының тағы бір көрінісі ретінде араға 9 жыл салып &nbsp;бүйрек трансплантациясы отасының қайта жасалуын айтуға болады.&nbsp;Өткен жылдан бастап аймақта денсаулық саласын дамытуда ауқымды жаңа жобалар жүзеге асырыла бастады. &nbsp;Атап айтсақ, 2023 жылы жалпы құны 48,6 миллиард теңгені құрайтын 21 денсаулық сақтау нысанының құрылысы жүргізілген еді. Оның ішінде жалпы құны 7,1 миллиард теңгені құрайтын 17 нысанның құрылысы аяқталған. Ал биылғы жылы 12,5 миллиард теңге қаржы бөлініп, 17 денсаулық сақтау нысанының құрылысы басталған.&nbsp;Сонымен қатар облыс орталығында 36 миллиард 400 миллион теңгеге бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы жүргiзiлуде. Одан бөлек қан орталығының құрылысы ашылуға дайын. Оған республикалық бюджеттен 2 миллиард 900 миллион теңге бөлінген. Жылына 5000-нан 10000 адамға дейін қызмет көрсетуге мүмкіндігі бар орталық соңғы үлгідегі заманауи құралдармен жабдықталған.Мемлекет басшысы Қасым-Жомарт Тоқаевтың бастамасымен қолға алынған «Ауылдық денсаулық сақтауды жаңғырту» ұлттық жобасы аясында өңірімізде жалпы құны 11 миллиард теңгені құрайтын 27 нысан салу жоспарланған. Өткен жылы Ұлттық жоба аясында елді мекендерде 15 жаңа дәрігерлік амбулатория, 1 медициналық бекет пайдалануға берілген. Қалған 11 нысан және Арал, Қазалы, Шиелі, Жаңақорған ауданаралық көпбейінді ауруханалары жанынан қосымша құрылыс салынып, халық игілігіне берілмек.&nbsp;Бұдан бөлек жақын күндері ұлттық жоба аясында 2 миллиард 300 миллион теңгеге Шиелі ауданында 30 төсектік инфекциялық бөлімше құрылысы басталады. Одан бөлек жергілікті бюджет есебінен 922,0 миллион теңгеге Жаңақорған ауданы, Төменарық дәрігерлік амбулаториясымен қоса, 15 төсекке арналған ауылдық аурухана құрылысы аяқталып, жыл соңына дейін пайдалануға беріледі.&nbsp; «Ауыл ел - бесігі» бағдарламасы шеңберінде Қызылорда қаласының Досан елді мекенінде 140 миллион теңгеге медициналық бекет, Баймұрат батыр елдімекенінде 418,2 миллион теңгеге дәрігерлік амбулатория пайдалануға берілген. Сонымен қатар көпбейінді облыстық аурухана базасында жаңа МРТ аппаратын іске қосып, 70 орындық перинаталдық бөлім ашылды. Алдағы уақытта Жаңақорған ауданындағы көпбейінді аудандық орталық аурухана базасында балаларға арнап «Қамқорлық» оңалту орталығы ашылмақ. Дәл осындай оңалту орталығы жыл соңында Арал ауданында берілмек.Облыстық денсаулық сақтау басқармасының берген мәліметіне сүйенсек, өткен жылы 3 миллиард 800 миллион теңге қаржыға 9 медициналық нысанға күрделі жөндеу жүргізіліп, 5 нысанның жылу жүйесі газға ауыстырылды. Биыл 4 миллиард теңге қаржыға 8 медициналық нысанға күрделі жөндеу жүргізіліп, 5 нысанның жылу жүйесі газға ауыстырылады деп жоспарлануда. Өткен жылы денсаулық сақтау ұйымдарын материалдық техникалық жабдықтармен қамтамасыз ету үшін 5,1 милилард теңге қаржы қаралған. Оның ішінде 4,4 миллиард теңгеге 560 дана медициналық &nbsp;құрал-жабдық сатып алынып, медицина ұйымдарының жабдықталу деңгейі 84 проценттен 87,10 процентке дейін көтерілген. Былтыр медицина ұйымдарына құны 512,5 миллион теңгеге жаңа 25 санитарлық автокөлік табысталған еді. Биыл өңірдегі барлық елді мекендердегі денсаулық сақтау ұйымдарына 200 санитарлық автокөліктер алынды. Соның нәтижесінде елді мекендердегі емдеу ұйымдарын санитарлық автокөлікпен қамту мәселесі түбегейлі шешіледі деп күтілуде. Аймақтың медицина дамытуда бюджет қаражатынан бөлек «Қазақстан халқына» қоғамдық қорының қолдауы да маңызды. Мәселен, аталған қор соңғы екі жыл көлемінде өңірдің денсаулық сақтау саласына 2 миллиард теңге қаржы бағыттаған. Бұл қаржыға облыстық балалар ауруханасы базасында «Қамқорлық» реабилитациялық орталығы ашылып, денсаулық сақтау саласына қажетті аса қымбат дәрі-дәрмектер алынған. Сондай-ақ, қор құны 1 миллиард 100 миллион теңге тұратын онкологиялық скрининг жүргізуге арналған жылжымалы медициналық кешенмен қамтамасыз еткен. Мұндай құрал-жабдық елімізде тек үш облыста ғана бар.&nbsp;Сыр өңірінің медицинасында серпінді даму бар. Себебі тұрғындар үшін қолайлы жағдай жасауда медицина мекемелері жаңа құрал-жабдықтармен қамтамасыз етіліп, заманауи үлгідегі медициналық емдеу мекемелері бой көтеруде. Мұның барлығы денсаулық саласын жақсарту мен ел игілігі жолында жасалынып жатқан жұмыстардың бір бөлігі.А. Әлім

Сыр медицинасы серпінді дамып келеді

<a href="https://kyzylorda-news.kz/">Kyzylorda-news.kz</a>&nbsp; "Қай жерің ауырса, жаның сол жерде" деген. Басыңыз ауырып, балтырыңыз сыздай қалса, дәрігерге жүгінеріміз хақ. Ақ халаттылар науқастың дертіне дауа боларлық ем-шара тағайындап, дәрі-дәрмек жазып берсе, әрі қарай диагнозына сай дәріхананың қызметін алып жатамыз.Осы салада ұзақ жылдар еңбек етіп келе жатқан маманның бірі – &nbsp; &nbsp; Гүлайым Жақсыбайқызы. Оның еңбек жолы сонау 1984 жылы Торғай облысы, Жангельдин ауданына қарасты Шилі кеңшарында дәріхана меңгерушісі болып бастаған. Кейін туған жерге оралып, өзіміздің аудандық ауруханада орналасқан №76 дәріханаға қызметке қабылданған. 1994 жылдан бастап бүгінге дейін осында жұмыс істеп келеді. 2022 жылдан бері меңгерушілік тізгінін қолға алған. Жақында білікті маманмен жүздесудің сәті түсіп, сөзге тартқанбыз. Ол да әп дегеннен қызметі жайында әңгімелей жөнелді.<blockquote>– Бізде бірнеше аптека қызметі жұмыс істейді. Оның бірі – емхана жағында, амбулаториялық тегін дәрімен қамтамасыз ету аптекасы десек, онда назологиялар бойынша белгілі науқастарды және Д есепте тұратын науқастарды тегін дәрі-дәрмектермен қамтамасыз етіледі. Бұл дәріханада фармацепт маман Закида Темірбаева, Ұлжан Исмаилова, есебін тиянақты жүргізіп отырушы Серік Тоқшылықовтар жұмыс жасайды. Аурухананың ішіндегі дәріхана аурухананы, елді мекендердегі амбулаторияларды және күндізгі емдеу стационарларын, бөлімдерді дәрі-дәрмекпен қамтамасыз етумен айналысады. Онда да тегін дәрі-дәрмек, медициналық бұйымдар босатылады. Мұндағы ерекшелік, &nbsp;стирилендірілген дәрі-дәрмектер фармацевт Меруерт Қосназарова, Айнұр Кәукеновалардың қолымен дайындалады. Ал қоймада (төменде) провизор Ержан Ешниязов, фармацевт Мұрат Алмағамбетов, кіші медициналық қызметкер Жанар Төрежановалар сапалы қызметтер көрсетеді, – дейді ол.</blockquote>Қайсыбір қызметкер де теориялық білімімен бірден маман болып кетпейді. Еңбек тәжірибесі арқылы жетіліп, қатарға қосылады. Г.Фаизова да алғашқы жұмысқа қосылған кездегі дәріхана қызметіне баулыған ұстаздарына әрдайым құрметпен қарайды.<blockquote>– Әлі диплом алмаған кезімде Ақшам Жұбантаева апайдың қарамағында мемлекеттік іс-тәжірибеден өттім. Ол кісіден алған тәжірибеммен басқа облыста абыройлы жұмыс істеп келдім. Апаймен кейін зейнет демалысына шыққанша да бірге қызмет еттік. Ол дәріхананың меңгерушісі болды. Одан соң Шолпан Омаровамен жұмыс істедім. Өкінішке орай Шолпан әріптесім өмірден ерте озды. Оларға алғысым шексіз. Осы қызметте істеп жатқан білімім мен тәжірибем Ақшам апамның үйретуінің арқасы. Оқу бір басқа да, жұмыс кезіндегі тәжірибе, еңбек ету, адамдармен қарым-қатынас орнату бір басқа ғой. Жастардың ортасында, ұжымдастарымның арасында үнемі &nbsp;Ақшам апайдың ұстазым болғанын марқая айтып отырамын. Шәкірті болғанымды мақтан тұтамын. Медицина күніне орай бас дәрігеріміз Бақытжан Сағилатұлына ерекше лебізімді білдіргім келеді. Ол өзінің үлкен жүректілігімен, біліктілігімен &nbsp;ұжымды басқарып отырған халық қалаулысы. Жүздеген адамы бар ұжымды басқару оңай шаруа деп айтпас едім. Медицина қызығы мен шыжығы бірге жүретін сала. Кейінгі келген жас дәрігерлерді де үлгі етіп айтуға болады. Олардың ішінде тегін дәрі-дәрмекпен қамтамасыз етуде біздің берілетін сұраныстарымызға ерекше үлесін қосып отырған дәрігеріміз Айдос Жаналиевке, Динара Жүсіповаға, Бауыржан Қәріқұловтарға да алғысымды айтамын, – дейді дәріхана меңгерушісі жылы кейіпте.</blockquote>Дәріхана ісінің шебері облыстық денсаулық сақтау басқармасының Құрмет грамотасы, Алғыс хатымен марапатталған. &nbsp;Еңбекпен өсіп-өнген Гүлайым Жақсыбайқызы отбасында ардақты ана, аяулы жар, асыл әже. Жолдасы Бақытқали Фаизовпен бірге 2 ұл, 2 қыз тәрбиелеп өсіріп отырған бақытты жан. 2 баласынан өрбіген 4 немере ата-әжесінің бүгінде көз қуанышы.

Қармақшы: дәріхана ісінің шебері

<a href="https://kyzylorda-news.kz/">Kyzylorda-news.kz</a> Жуырда Қармақшы аудандық мәдениет үйінде медицина қызметкерлерінің күніне орай мерекелік іс-шарасы өтті. Салтанатты шарада аудан әкімі Жандос Еркінбек медицина қызметкерлері мен ардагерлерін кәсіби мерекеімен құттықтады.<blockquote>– Бұл мерекеде ақ халатты абзал жандарға ерекше құрмет көрсетіледі. Себебі Сіздер халықтың денсаулығын жақсартып, ұлт сапасын арттыруға зор үлес қосып келесіздер. Баршаңызға аудан халқының денсаулығын нығайтуға және медицина саласының дамуына қосқан айрықша үлестеріңіз үшін алғысымды білдіремін!, – деді ол.</blockquote>Сонымен қатар аудан басшысы халық денсаулығын нығайту және медицина саласын дамыту бағытында атқарылған жұмыстарды тілге тиек етті.Айта кетейік, ауданымызда «Ауылдық денсаулық сақтауды жаңғырту» ұлттық жобасы аясында өткен жылдың желтоқсан айында Дауылкөл, Ақжар және Жаңажол ауылдық округтерінде дәрігерлік амбулаториялар салынып, халық игілігіне пайдалануға берілді. Сондай-ақ, өткен жылы «Ауыл Ел – бесігі» бағдарламасы аясында аудандық аурухана ғимаратының сыртқы келбетіне күрделі жөндеу жүргзілді. Мұнан өзге аудандық аурухананың «Шипагер» емханасы үшін 53,6 млн теңге қаржы қаралып, табиғиги газға қосылды. Биылғы жылы облыстық бюджет есебінен Қуаңдария және Қармақшы ауылдарында фельдшерлік-акушерлік бекеттердің құрылысы басталады. Аудандық аурухана ғимаратының ішкі бөліктері және жер төлелері күрделі жөндеу жұмыстарына жобалық-сметалық құжаттамасы әзірленуде. Сондай-ақ мереке қарсаңында облыс әкімдігінің қолдауымен алынған 50 жедел жәрдем көліктерінің 3-еуі ауданға қарасты медициналық мекемелерге табысталды.Мерекелшік іс-шара барысында медицина саласында қызмет етіп жүрген мамандар облыс және аудан әкімінің «Алғыс хаттарымен» марапатталып, құрмет төрінен көрінді. Кеш соңы концерттік бағдарламамен жалғасып, жиналған жұртшылыққа мерекелік көңіл-күй сыйлады.

Қармақшы: Марапат төрінде – медицина майталмандары

<a href="https://kyzylorda-news.kz/">Kyzylorda-news.kz</a>&nbsp; Дәрігер – кең ұғым, қастерлі мамандық. Бұл мамандық иелерінің жауапкершілігі де мол, атқаратын жұмыстары да ауқымды. Қызығы мен шыжығы қатар жүретін осынау маңызды сала мамандары қандай сый-құрмет, мадаққа да лайықты. Елімізде жыл сайын маусым айының əрбір үшінші жексенбісі – медицина қызметкерлерінің мерекесі ретінде тойланады. Жақында аталған мереке ауданымызда да жоғары деңгейде аталып өтті.Р.Бағланова атындағы мәдениет орталығында өткен мерекелік шара алдымен дәрігерлер қауымының ізгілікке толы, қиында қызықты жұмыстарының барысынан қойылыммен басталды.Мұнан соң Қазалы ауданы әкімі Мейрамбек Шермағанбет сахна төріне көтеріліп, ақ халатты абзал жандарды мерекемен құттықтады.<blockquote>– Бұл күн құрмет пен алғысқа бөленген, Гиппократ антына адал ақ халатты абзал жандардың мерекесі. Ауырып, сырқаттана қалған жағдайда кез келген жан шипа іздеп, дәрігерлердің алдына барып, ақыл-кеңестеріне жүгінетіні белгілі. Қаншама адамның жанына дауа, тәніне шипа болардай ем тауып, өміріне араша түсіп жүрген дәрігерлер қауымына біздің айтар алғысымыз шексіз. Сіздерге аудан тұрғындарының денсаулығын жақсарту жолындағы қажырлы еңбектеріңіз үшін шынайы алғысымды білдіремін, – деді аудан әкімі.</blockquote>Мерекелік кеште бірқатар сала мамандары марапат төрінен көрініп, облыс әкімі мен аудан әкімінің, «AMANAT» партиясы облыстық филиалы атқарушы хатшысының «Алғыс хаты» және Қазалы ауданының «Құрмет грамотасы» табысталды.Сонымен қатар, шарада мерейі үстем болған Қазалы аудандық емхананың хирург дәрігері Серік Айбасов пен аудандық аурухананың бас дәрігерінің орынбасары Раушан Қалуовал «Денсаулық сақтау саласына қосқан үлесі үшін» төсбелгісімен марапатталды. Ал дәріхана бөлімінің меңгерушісі Күләйм Балқиева «Еңбек ардагері» төсбелгісімен марапатталды.Мерекеге орай аудандық медициналық жедел жәрдем бөлімі мен Қожабақы және Ғани Мұратбаев ауылдық дәрігерлік амбулаторияларына жаңа жедел жәрдем автокөлігі табысталды. Сондай-ақ медицина саласының ардагерлері де назардан тыс қалмай, оларға аудан әкімінің мерекелік сый-сияпаттары тапсырылды.Шарада аудан өнерпаздарымен қатар өнерлі медицина саласының қызметкерлері де өнер көрсетіп, жиналған жұртқа ерекше көңіл-күй сыйлады.Кеш аяқталысымен қуанышында шегі болмаған Ғани Мұратбаев ауылы амбулаториясының маманы Мереке Бағдәулетқызы өз пікірін беріп, ауыл медицинасын қолдаған аудан әкімдігіне алғысын білдірді.<blockquote>– Ең алдымен барша әріптестерімізді мерекемен шын жүректен құттықтаймын. Осынау маңызы зор салада қызмет атқару асқан жауапкершілік пен төзімділікті қажет етеді. Міне, мереке қарсаңында ауылымздың амбулаториясына жедел жәрдем автокөлігі сыйға тартылып жатыр. Заман талабына сай, лайықты өмір сүру үшін ауылдықтарға ғана емес, жалпы жұртқа сапалы медициналық инфрақұрылым ауадай қажет екені белгілі. Мемлекет басшының өткен жылғы жолдауында осы мәселелер анық айтылған еді. Президентіміз берген уәдесінде 2024 жылы ауыл-аймақ тұрғындарына көптеген жағдайлар жасалады деген. Биыл бұған дейін де жасалып келе жатқан ілкімді іс одан әрі алға басты десек болады. Мемлекет басшысының миссиясын бұлжытпай орындап, аудан халқының алғысын алып жатқан М.Зинабдинұлына алғысымды білдіремін, – деді ол.</blockquote>

Медицина саласында өшпес із қалдырғандар құрметке бөленді

<a href="https://kyzylorda-news.kz/">Kyzylorda-news.kz</a>&nbsp; Байқоңыр қалалық мәдениет сарайында Медицина қызметкерлерінің кәсіби мерекесіне орай салтанатты шара өтті.Іс-шарада облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай және Байқоңыр қаласы әкімшілігі басшысы Константин Бусыгин денсаулық сақтау саласының қызметкерлерін мерекемен құттықтап, ізгі тілектерін жеткізді.Өз сөзінде Қайрат Нұртай Сыр өңірінде тұрғындардың медициналық қызметке қолжетімділігін арттыру, денсаулық сақтау инфрақұрылымын одан әрі жетілдіруде Мемлекет басшысының қолдауымен Үкімет және облыс әкімдігімен кешенді жұмыстар атқарылып жатқанына баса назар аударды.&nbsp;Қалалық көп бейінді аурухананың материалдық-техникалық базасының үстіміздегі жылы жаңартылатынын тілге тиек етті. Бұл шаралардың кешенді түрде қаламыздың денсаулық сақтау ұйымымен көрсетілетін қызметтердің сапасын арттыруда өз септігін тигізерін атап өтті.Шара барасында бірқатар сала қызметкеріне Денсаулық сақтау министрлігі мен облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілінің және қала әкімшілігі басшысының марапаттары табысталды.&nbsp;Мерекелік кеш концерттік бағдарламаға ұласты.

Байқоңырда медицина күніне орай салтанатты шара өтті

<a href="https://kyzylorda-news.kz/">Kyzylorda-news.kz</a> Ауыл медицинасының жұмысына тереңнен қаныққан Бахыткүл Қайбылда Шіркейлі ауылындағы емхана меңгерушісі ретінде жемісті еңбек етуде. Әрдайым қызметте табандылығымен танылған біліктілігі жоғары дәрігер 1968 жылы Нағи Ілиясов ауылында дүниеге келген. Іргелі елді мекендегі білім ошағында ұлағатты ұстаздардан тәлім алған Бахыткүл Ерлібекқызы Ақтөбе қаласындағы медициналық университеттен дәрігер мамандығы меңгереді.Негізінен, білікті дәрігер 1992-1993 жылдар аралығында аудан орталығында «Жедел жәрдем» меңгерушісі қызметін атқарады. Сондай-ақ 1993-1998 жылдар аралығында Нағи Ілиясов ауылындағы 35 орындық аурухананың меңгерушісі атанады. Кейіннен, Шіркейлі ауылындағы емхананың меңгерушісі қызметіне кіріседі. 26 жыл бойы ауылдағы ағайынмен етене араласып, денсаулық жағдайына барынша қанығады.Осыдан 30 жыл бұрын аяулы жан Жолдас Құрақбаймен отау құрып, 3 ұл, 1 қызды дүниеге келді. Білікті маманның әр жылдары мерейі тасып, «Денсаулық сақтаулық саласына қосқан үлесі үшін» төсбелгісі секілді бірнеше марапатқа қол жеткізген. Әрдайым сала маманы әріптестерімен бірге Шіркейлі ауылында денсаулық сақтау саласының өркендеуіне ықпал етуде.

Алтын жүректі дәрігер

<a href="https://kyzylorda-news.kz/">Kyzylorda-news.kz</a> Елімізде маусым айының үшінші жексенбісі медицина қызметкерлерінің күні. Адам өміріне араша түсетін дәрігер мамандығын таңдау үлкен жауапкершілікті жүктейді. Осы жауапты қызметті абыроймен атқарып жүрген ақ халатты абзал жандарды төл мерекесінде құрмет төрінен көрінді.Мерейлі мерекеге орай №3 қалалық емханасында «Рақмет, дәрігер!» тақырыбында мерекелік шара өтті.Емхананың бас дәрігері Жаннат Қожарипова ұжымды кәсіби мерекемен құттықтап, ізгі лебізін білдірді. Сонымен қатар, емханадағы бірқатар мамандарды марапаттады. Оның ішінде емханадағы алғашқы көмек көрсету кабинетінің өзіндік қабылдау мейіргері Майра Сүлейменова Денсаулық сақтау саласындағы жемісті еңбегі мен еліміздің денсаулық сақтау жүйесін дамытуға қосқан үлесі үшін ҚР Денсаулық сақтау министрі Ақмарал Әлназарованың «Алғыс хатымен» марапатталды. Бұдан бөлек, облыс әкімі Нұрлыбек Нәлібаевтың және аймақтың бас дәрігері Олжас Ысқақовтың алғыс хаты да табысталды. Сондай-ақ мереке қарсаңында 60, 50 жас мерейтой иелеріне де құрмет көрсетілді.Бағдарлама барысында әннен шашу шашылып, өнерпаз жастар би билеп мереке мерейін айшықтай түсті. Ар ожданын бәрінен биік қоятын дәрігерлерге қандай құрмет көрсетілсе де артық болмайды. Себебі ұлт саулығы – басты байлығымыз.

Қызылордада мерекеге орай  «Рақмет, дәрігер!» шарасы өтті

<a href="https://kyzylorda-news.kz/">Kyzylorda-news.kz</a> «Өскелең ұрпақ саулығы – ұлт болашағы» деп бекер айтылмаса керек. Дана халқымызда «жақсы дәрігер ауруды жазады, жаман дәрігер ауруға ауру қосады» деген даналық сөз бар. Медицинаның атасы Ибн Сина: «Дәрігердің үш қаруы бар: бірі – пышақ, екіншісі – шөп, үшіншісі – жылы сөз» деген. Міне, осындай игі қасиет дәрігердің бойынан табылса онда ол халықтың сүйіктісіне айналады.&nbsp;Біздің кейіпкеріміз аудандық емхананың дәрігері Салтанат Бакишева – жауапты мамандықтың өкілі. Үнемі білімін жетілдіріп, ізденіс үстінде болып, өз саласын жетік меңгерген, халықтың сүйіктісіне айналған дәрігер.&nbsp;Салтанат Карбозқызы 1983 жылы Қызылорда қаласында дүниеге келген. 2007 жылы Батыс Қазақстан мемлекеттік медицина академиясын емдеу ісі бойынша бітіріп, жас маман ретінде алғашқы еңбек жолын Сырдария аудандық емханада психиатр болып бастайды. 2010 жылдары терапевт, педиатр, аймақ дәрігерлерін жалпы дәрігерлер аймақтарына оңтайландыру жүргізілген кезде жалпы тәжірибелі бөлім меңгерушісі қызметін бірнеше жыл бойы атқарады. Бүгінде аудан тұрғындарының алғысына бөленген дәрігер жалпы дәрігерлік салада да тәжірибесі бар білікті маман. Емханадағы жемісті жылдар ішінде жақсы қырынан таныла білген дәрігер 2016 жылы функционалды диагностика бойынша білімін жетілдіреді. Алматы қаласындағы С.Асфендияров атындағы Қазақ ұлттық медицина университеті базасында 4 ай бойы білімін жетілдірген дәрігер медициналық аппараттарда жұмыс істеуге машықтанады.<blockquote>&nbsp; – Дәрігер үнемі білімін жетілдіріп, ізденіп, үйреніп жүрсе, тұрғындардың денсаулығын нығайтуға қосатын үлесі зор болады. Аудандық емхана пайдалануға берілген жылы жаңа медициналық аппараттар қоса берілген болатын. Арнайы маманның болмауынан аппараттар пайдаланылмаған. 2016 жылы сол кездегі бас дәрігер Манат Рүстемқызына ұсыныс айттым. Бас дәрігер ұсынысты қолдап, оқуға жіберді. Сөйтіп, холтер, смарт, спирография аппараты қызметін меңгеруге байланысты оқудан өттім. Қазір аудан халқына осы 3 аппаратпен қызмет көрсетіп келеміз. Шын мәнінде бұл науқастардың денсаулық жағдайын бақылауға, қандай да бір асқынуларды дер кезінде анықтауға мүмкіндік береді. Өте тиімді аппаратпен ай сайын 60-қа жуық науқасқа медициналық көмек көрсетеміз, – дейді білікті дәрігер.</blockquote>&nbsp; Бірінші санатты дәрігер Салтанат Карбозқызының негізгі қызметі психиатр болғандықтан емханада диспансерлік есепте тұрған 560 науқастың денсаулығын бақылап отырумен қатар, жоғарыда айтылған медициналық аппараттармен жұмыс істейді. Күн сайын кезекпен келетін науқастарға аса ыждағаттылықпен орнатып, бір тәулік өткенде аппаратты ажыратады. Маман тәулік бойы жұмыс істеген аппаратты алған соң, көрсеткіштерді оқып, қандай да бір ауытқу болса, ем алуға арнайы мамандарға жолдайды. Бұл дәрігердің негізгі жұмысымен қоса атқаратын қызметі.Ауданның медицина саласына психиатр болып үлес қосып келе жатқан дәрігер бұл маманның атауына тұрғындар үрпиіп қарайтынын айтады. Ал дәрігер алдына келгенде көбіне келушілер ол көзқарастан айниды. Себебі келушілерді өзінің жайдары мінезімен, салихалы да сабырлы қалпымен қарсы алатын дәрігерге көңілдері толып, ризашылықтарын білдіреді. Шын мәнінде көңілі жабырқаулы жанға ең алдымен жақсы қарым-қатынас жасау оның кәсіби шеберлігін көрсетсе керек. Науқаспен әңгімелесіп, жағдайын зерделеу арқылы дұрыс ем жүргізу ғана оң нәтиже беретінін ақ халатты абзал жан жақсы біледі.<blockquote>&nbsp; &nbsp;– Әріптесіммен бірнеше жылдан бері ауданның денсаулық саласында бірге қызмет етіп келемін. Салтанат Карбозқызы ауданда алғашқы психиаторлардың бірі. Функционалды диагностиканы да өте жақсы меңгерген. Біліктілігін үнемі арттыратындықтан, емханадағы көптеген маманның орнын кез келген уақытта ауыстыруға білімі де білігі де жетеді. Әріптесім бас дәрігердің аудит жөніндегі орынбасары, амбулаторлық оңалту бөлімшесінің меңгерушісі қызметін атқарды. Қазіргі уақытта тар буынды мамандандырылған бөлімнің меңгерушісі қызметін қоса атқарады, – дейді әріптесі Жанар Әшімқызы.</blockquote>&nbsp; Адамның жүрегіне жол таба білетін дәрігер психиатрия саласында кездесетін кедергілермен үнемі жұмыс жүргізеді. Өйткені психиатрдың қабылдауына келуге көп адам жүрексінеді. Одан қалды ел-жұрттың жағымсыз пікірлері де дертке шалдыққандарға дер кезінде медициналық көмек көрсетуге кедергісін келтіреді екен. Сондықтан білікті дәрігер әсіресе, баланың бойынан қандай да бір кеш дамушылықты, тілінің кеш шығуын байқаса, дереу учаскелік дәрігерге көрсету қажеттігін айтады. Өз кезегінде учаскелік дәрігер қажетті маманға жолдайды. Қазір балалардың арасында көп кездесетін сөйлемеу, дамуының кешеуілдеуі бұл психологиялық ауытқулардың алғашқы белгісі болуы мүмкін.<blockquote>&nbsp; &nbsp;– Медицина саласына келгенімде бізге жас маманға қолдау білдіріп, үнемі бағыт-бағдар беріп отырған ардақты дәрігер Тәжігүл Жорабекқызының еңбегін ерекше бағалаймын. Жас мамандарға тәлімгер бола білген дәрігерден білмегенімізді сұрап, көп нәрсені үйрендік. Жұмыс барысында туындаған сұрақтар бойынша ақыл-кеңесін аямайтын. Науқастармен қалай сөйлесу керектігін, дәрігер тек қана жақсы қырынан танылуы арқылы жақсы маман болып қалыптасатынын үнемі айтып отыратын. «Ерінбей, ізденіп, тәжірибе алмаса білу керек. Ең бастысы кішіпейіл, қарапайым, адами қасиетке ие болса, жақсы дәрігердің қатарынан көрінесің» дейтін тәлімгеріміз. Тәжігүл Жорабекқызының маман болып қалыптасуыма қосқан үлесі зор деп айта аламын. 17 жыл еңбек өтілімде халық денсаулығын қорғауға, жақсартуға бағытталған қызметімде қолымнан келгенше алғыс алуға тырысып келемін, – дейді Салтанат Карбозқызы.</blockquote>&nbsp; Антына адалдық танытқан дәрігердің еңбегі де бағаланған. Әр жылдары сала басшылығынан алған Алғыстары мен облыстық денсаулық сақтау басқармасынан алған марапаттары бір төбе. Ал «Денсаулық сақтау ісінің үздігі» республикалық байқауына белсене қатысып, ұсынған жұмыстары үздік деп танылғаны үшін арнайы номинациямен марапатталуы дәрігерге одан сайын жауапкершілікті арттырып, әрі қарай рухани жігер мен күш беретін сенім.&nbsp; &nbsp;Өз ісінің білгірі, алғыс арқалаған дәрігер Салтанат отбасында сүйікті жар, ардақты ана. Жұбайы Бақытжанмен Лашын мен Аршан есімді ұл қыз-тәрбиелеп отырған үлгілі отбасы. Қоғамға адал қызметімен үлес қосып отырған білікті маман жаңашылдыққа қадам жасауға батылдық таныта береді деген сенімдеміз.

Білікті дәрігер

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp;Жас пен жасамыстың денсаулығы мен жағдайына жіті көңіл бөлетін Айгүл Жакупова соңғы 20 жылда «Терапия» бөлімшесіне жетекшілік қызметін абыроймен атқарып келеді. Жезді өлке Ұлытау облысының Қарсақбай кентінде дүниеге келген ақ халатты абзал жан қашанда науқаспен емен-жарқын әңгімелесіп, дертінен сауығып кетуіне бар күш-жігерін салады. Әрдайым жайдарлы да жайсаң мінезінен таймайтын дәрігер бүгінде білгір маман ретінде көптің алғысына бөленіп келеді.&nbsp;Білікті маман Айгүл Қарсаңқызының есімі аудан жұртышылығына жақсы таныс деуге болады. Созылмалы дертімен ем қабылдайтын көпшілік әркез аяулы жанның көмегіне жүгінеді. Бірнеше жылдан бері тұрақты түрде емдеп келе жатқан науқастың жай-күйін зерттеп, жан-жақты ем-шара қолданады. Бүгінде білікті дәрігер бөлімше қызметін барынша үйлестіріп, жұмысына жауапкершілікпен қарайды.<blockquote>&nbsp;– Медициналық университетті бітірген жылы туған жерімдегі облыстық ауруханада қызмет еттім. Араға біршама уақыт салып, тереңөзектік Мұратбек Әбсадықовпен отау құрып, Қонысбек әкеміз бен Бибімариям анамыздың шаңырағына келін болып түстім. 1987-2004 жылдар аралығында аудандық емханада эндокринолог, учаскелік дәрігер ретінде еңбекке араластым. Алғаш мені жұмысқа тәжірибелі басшы Рүстем Садықов қабылдаған болатын. Осы кезге дейін 7 бас дәрігермен жұмыс жасай білдім. Өз уақытысында бас дәрігердің орынбасары қызметін атқарған Шынтас Ізетұлы бізді барлық жағынан тәрбиеледі. Қызмет барысында әрбір іске жауапкершілікпен қарауды үйретті. Нағыз әскери қатаң тәртіпті орната білді, – дейді тәжірибелі дәрігер.</blockquote>&nbsp;Эндокринология саласын жетік меңгерген Айгүл Қарсаңқызы Ресейде білімін жетілдірген. Бір бөлімшеде 15 жыл бойы әріптесі Гүлфарида Қайыпқызы екеуі аудан тұрғындарына медициналық көмек көрсетуді мақсат тұтты. Негізінен, дәрігердің жолдасы Мұратбек ағаның мамандығы инженер-құрылысшы. Үйдегі отағасының жолын кіші ұл Әлішер қуған. Ол – Назарбаев университетінде құрылыс және экологиялық инженерия саласы бойынша ғылыми қызметкер болып жұмыс атқарады. Биыл отбасының кенжесі аталған мамандық бойынша магистр дәрежесін алған. Ал үлкен ұл мен қыз медицина саласында. Тұңғыш ұл Әнуар Астана қаласында кардиохирург болса, келіні Гауһар – гинеколог. Арайлым косметолог-дәрігер ретінде көпшілікке кеңес береді.<blockquote>&nbsp;– Ата-анамыздың бабын тауып, жұмысты да үйлестіріп отыру мені барынша шынықтырды. Қай кезде де емделуші алғысы барынша қанаттандырады. Қазіргі уақытта қан тамыр, жүрек аурулары адамдар арасында көбейіп кетті. Эндокринология саласына қатысты дертпен ауыратын жандар қатары аз емес. Осыдан бірнеше жыл бұрын қант диабетімен ауыратын жандар сирек кездесетін. Бүгінде осы дертке байланысты шағым айтатын науқасты жиі кездестіреміз. Пандемия уақытынан бері пневмониямен ауыратын науқас саны азаяр емес. Анығын айтқанда, күн өткен сайын аурудың саны артуда, – дейді сала маманы.</blockquote>&nbsp; &nbsp;Осы күні аурухананың жас дәрігерлеріне ақыл-кеңесін айтатын дәрігер медицина саласында күн сайын орын алатын елеулі өзгеріске бей-жай қарамайды. Сала маманы 35 жылдық жұмыс өтілінде көптеген жоғарғы марапатқа қол жеткізген. Бұл ретте, Тереңөзек кентінің тұрғыны Ботакөз Жарықбасова дәрігерге өз алғысын жеткізді.<blockquote>&nbsp; – Жақында денсаулығым сыр беріп, «Терапия» бөлімшесіне ем қабылдауға жатқан болатынмын. Заматында Айгүл дәрігер өз бақылауына алып, ем-шара жасады. Қазіргі уақытта денсаулығым өте жақсы. Сала маманы біліктілігінің арқасында қаншама адамға қолғабыс етуде. Үнемі науқастың диагнозын дөп тауып, жанымызды жадыратуда. Сала маманына мереке қарсаңында шынайы алғысымды жеткіземін, – деді кент тұрғыны.</blockquote>

Адам өмірінің сақшысы

<a href="https://kyzylorda-news.kz/">Kyzylorda-news.kz</a> &nbsp;Қаншама сала мамандарының ішіндегі ең жауапты да қастерлі маман иесі – дәрігерлер қай уақытта да үлкен зор құрметке лайық. Бас ауырып, балтыр сыздаған сәтте жанға шипа іздеп &nbsp;ақ халатты абзал жандардың көмегіне зәру болып қалатынымыз белгілі. Міндеті мен жауапкершілігі мол медицина саласының қызметкерлеріне артылар жүк те, атқарар жұмысы да ауыр екені сөзсіз. Уақытпен санаспай адам өміріне араша түсіп, науқастың денсаулығына бей-жай қарамай, жазылып кетуіне күн демей түн демей бар көмегін аямайтын дәрігердің еңбегі өлшеусіз, әркез бағалы. Осы тұста медицина қызметкерлерінің кәсіби төл мерекесі аясында игі істің жаршысы болып жүрген ақ желеңді абзал жандарға құрмет көрсетіп, елеулі еңбегін дәріптеуді жөн көрдік.&nbsp; Өмірін медицина саласына арнап, бүгінде жемісті еңбек етіп, халық ықыласына бөленіп жүрген білікті маманның бірі – Сырдария аудандық ауруханасының перзентхана бөлімінің неонатолог дәрігері Алтынай Ижазова. Қызметіне адал маман 1989 жылы Сәкен Сейфуллин ауылында дүние есігін ашқан. Бала кезінен дәрігер болуды армандаған ол №137 қазақ орта мектебінде білім алып, 2006 жылы аяқтап, бұрыннан жоспарлап жүрген медицина саласын таңдауға бекінеді. Бала күнгі арманға қол созып, соған жетуге күні-түні оқудан бас алмай, медицина саласының қыр-сырын меңгеріп, 2012 жылы Ақтөбе қаласындағы М.Оспанов атындағы медициналық университетінің педиатрия факультетін үздік қызыл дипломмен бітіріп шығады. Бір орында тоқтап қалмай, білімін одан әрі жетілдіру мақсатында 2013 АГИУВ деп аталатын жоғарғы оқу орнында неонатология курсынанан өтеді. Осылайша мамандықтардың асылы дәрігер болуды армандаған Алтынай Шаншарқызы алғашқы еңбек жолын 2013 жылы облыстық периниталдық орталықтың нәрестелер жан сақтау бөлімінде реаниматолог-неонатолог маманы болып бастайды. Білікті маман үшін жауапкершілік пен жұмысқа деген адалдық үнемі бірінші орында. Тәжірибесі мен білімі толысқан маман 2020 жылдан бастап Сырдария аудандық ауруханасының перзентхана бөлімінде неонатолог дәрігер қызметіне ауысып, бүгінде халықпен тығыз байланыс орнатып жүйелі жұмыс жасап келеді. Денсаулық сақшысы атанған білікті дәрігер қызметімен қатар білдей бір отбасының отынын түтетіп отырған ибалы келін, аяулы жар.<blockquote>&nbsp; &nbsp;– Неонатология – қызығы мен қиындығы қатар жүретін саланың бірі. Жалпы неонотология – балалардың физиологиялық ерекшеліктері мен ауруларын туғаннан өмірінің 28 күніне дейін зерттейтін бөлім. Біздер, яғни неотанолог маман жаңа туған нәрестенің бірқатар потологияларын емдеумен және оның алдын алумен айланысамыз. Сәбилердің дамуы мен өсу ерекшеліктерін бірнеше айға жуық уақыт бойы мұқият бақылаймыз. Бізге жұмыс барысында мүлдем қателесуге болмайды. Бір ғана қателіктің салдары үлкен қайғылы жағдайға әкеліп соғуы мүмкін. Сондықтан шала туылған шақалақпен жұмыс істеу оңай емес. Адамның тәнін емдеумен қатар білікті дәрігер оның жанын да емдей білу керек және аурудан жазылатынына сенімділік ұялата білу қажет деп ойлаймын. «Дәрігер – арыстандай айбатты, қыздай икемді, анадай мейірімді болуы керек» деген екен Ұлы дәрігер Гиппократ. Расында бұл салада мейірімді жүрек, ептілік, шыдамдылық қажет. Өмірге келген өте ауыр жағдайда туылған сәбиді аман алып қалуға қолымыздан келгеннің барлығын жасап, тырысамыз, үмітімізді үзбейміз. Жұмыс барысында емдеген нәрестелердің ата-аналарымен әлі де байланысымды үзбей, хабарласып отырамын. Біз үшін әр сәбидің денсаулығы маңызды. Бұрын соңды емдеп жазған нәрестелерім бүгінде аттай шауып, балалық шақтың ең қызық сәттерін кешуде. Халықтың алғысы мен ризашылығын алу мен үшін үлкен жетістік, мәртебе. Дәрігер үшін осыдан асқан бақыт бар ма? Өз мамандығын шын сүйетін дәрігер үшін атақтың да, байлықтың да қажеті жоқ. Дәрігерге ең керегі және ең қымбат – адамның денсаулығы, оның өмірі. Аналарға үнемі саламатты өмір сүру қағидасы – дені сау ұрпақ әкелудің кепілі деп айтудан жалыққан емеспін, – дейді білікті маман.</blockquote>&nbsp; &nbsp; &nbsp; Адам денсаулығының сақшысы Алтынай Ижазова өзінің ақ адал еңбегімен-ақ көпшіліктің қошеметіне бөленіп, алғысын арқалап жүрген білікті дәрігер. Әріптестерінің арасында сыйлы Алтынай Ижазова өз ісіне тиянақты, сауатты, білікті, жауапкершілігі мен өзіне жүктелген міндетті абыроймен атқарып жүрген озық дәрігер.&nbsp; &nbsp;Адал еңбекті бағалай білген адамға медицина саласы мамандары тұғыры биік тұлға. Медицина саласының мамандары қандай мəртебе, марапат болсын əбден лайық. Соған сəйкес құрмет көрсету – қайқайсымыздың да азаматтық борышымыз. Қаншама адамның өміріне араша болып, дертіне шипа таба білетін маман иелеріне әрқашан үлкен сенім артамыз.

Неонаталогия саласының білікті маманы

<a href="https://kyzylorda-news.kz/">Kyzylorda-news.kz</a>&nbsp; Нарықтық уақытта медицинада тың өзгерістер орын алуда. Мәселен, технология дамыған тұста көптеген аппарат пайда болып, адам денсаулығындағы кінәратты анықтауға мүмкіндік молая түсті. Бұл ретте, ултрадыбыстық зерттеу аппаратын жетік меңгерген дәрігер Салтанат Қожахметова емдеуші мамандарға бағыт-бағдар беруден шаршамайды.&nbsp;Ақжарма ауылының тумасы Салтанат Асқарқызы елді мекендегі мектептеп түлеп ұшып, Алматы қаласындағы Ж.Асфендияров атындағы Қазақ ұлттық университетінде оқиды. Сүйікті мамандығының иесі атанған дәрігер алғашқы еңбек жолын Жалағаш ауданында бастаған. Ал 2014 жылы Сырдария аудандық ауруханасына профпатолог болып қызметке орналасады. Сонымен қатар 2017 жылы ултрадыбыстық зерттеу дыбыстық дәрігері қызметі ауысады.&nbsp;Осыдан 10 жыл бұрын Шырынхан Сәметовтің аяулы жары атанған дәрігер 3 перзентіне тәлім-тәрбие беруде.&nbsp;<blockquote>– Жалпы, медицинада ултрадыбыстық зерттеу жүргізу – маңызды рөл атқарады. Біз қашанда нақты диагноз қоюға ықпал жасаймыз. Шын мәнінде, жедел шақыртуларға келіп, әріптестер қатарынан табыламыз. Сонымен қатар емханада жолдамамен келген науқастардың денсаулығына тексеру жүргіземіз. Әркез біліктілікті арттырып, жұмысты жетілдіріп отырамыз, – деді дәрігер.</blockquote>

Қазақстан және Қызылорда облысының жаңалықтары: Денсаулық