**<a href="https://kyzylorda-news.kz/">Kyzylorda-news.kz.</a> Коронавирус мәселелері жөніндегі жедел штаб отырысында қай өңірлердің коронавируспен күресті әлсіретіп алғаны айтылды, деп хабарлайды <a href="https://lenta.inform.kz/kz/koronaviruspen-kureste-kay-onirlerde-tomen-korsetkish-kalyptasty_a3675729">ҚазАқпарат</a>. 
**
Айта кетейік, ҚР Премьер-Министрінің орынбасары Ералы Тоғжановтың төрағалығымен COVID-19 мәселелері жөніндегі жедел штабтың отырысы өтіп, онда мемлекеттік органдардың коронавируспен күресте атқарып жатқан жұмыстары тыңдалды. 
Жиында жедел штаб Батыс Қазақстан және Қызылорда облыстарының әкімдіктерінің жұмысы жеткіліксіз екенін атап өтті. Денсаулық сақтау министрлігінің COVID-19-бен күрес бойынша өңірлер рейтингісінде осы облыстарда ең төмен көрсеткіш тіркелген. 
Сондай-ақ, Премьер-Министрдің орынбасары Солтүстік Қазақстан әкімдігіне қолданыстағы төсек-орын қорының жүктемесін азайту бойынша жедел шара қабылдауды тапсырды.

Коронавируспен күресте қай өңірлерде төмен көрсеткіш қалыптасты?

<a href="https://kyzylorda-news.kz/date/2020/07/22/">Kyzylorda-news.kz.</a> Бүгінде Қазалы ауданының әкімдігіне қарасты 35 қызметтік көлік жергілікті медициналық мекемелерге қосымша көлік ретінде көмек көрсетіп жатыр.
<blockquote>
 “Қазіргі эпидимеологиялық ахуалды өздеріңіз көріп отырсыздар. Соған байланысты осындай қадамға барып отырмыз. Енді дәрігерлер шұғыл шақыртуларға жедел бара алады. Осылайша «басы ауырып, балтыры сыздаған» жандарға медициналық көмек көрсетеді”, – дейді Арықбалық ауылдық округінің әкімі Мәулен Қайруллаев.
</blockquote>
Ауылдық округ әкімдерінің қызметтік көліктері дәрігерлік амбулатория алдында жұмыс уақытында тұрса, Қазалы қаласындағы емхана мен Әйтеке би кентіндегі аудандық емхана мен «Болат жолы» ауылдық емханасына дербес бөлім басшылары мен Әйтеке би кенті мен Қазалы қаласы әкімдерінің көліктері тегін қызмет көрсетеді. Бұл медициналық мекемелерге 3 қызметтік автокөлік кезекшілікке қойылған. Тек дәрігерлерден хабар келсе, автокөліктер жедел көмекке жетіп барады.
<img src="https://kyzylorda-news.kz/wp-content/uploads/2020/07/116091030_2805338593020403_1450805701213630755_o.jpg" alt="" />

Қазалыда қызметтік көліктер жедел-жәрдем қызметін атқарып жатыр

<a href="https://kyzylorda-news.kz/date/2020/07/22/">Kyzylorda-news.kz.</a> Қызылорда облысы бойынша COVID-19 қарсы күреске қатысқан 2,4 мың медицина қызметкеріне маусым айы үшін үстеме ақы төленуде. Бұл туралы «ӘМСҚ» КЕАҚ Қызылорда облысы бойынша филиалының директоры Бақыт Исмаханбетов мәлемдеді.
Үстеме ақы төлеу үшін республикалық бюджеттен Медициналық сақтандыру қорының филиалына2,3 млрд теңге бөлінді. Қор қаржы операторы ретінде өңірдің медицина қызметкерлерінің&nbsp; наурыздан маусым айы аралығында жалақысына қосымша 1,11 млрд астам теңге төледі.
Бақыт Исмаханбетовтың айтуынша, Медициналық сақтандыру қоры&nbsp; қауіпті жағдайда жұмыс істейтін дәрігерлер мен медицина қызметкерлерінің саны ай сайын артып келе жатқанын хабарлады. Егер наурыз айында үстеме ақыны 4 мыңнан астам қызметкер алса, маусым айында олардың саны 6,4 мың адамға дейін өсті. Енді&nbsp; ӘМСҚ маусым айына төлем жасайды.
Естеріңізге сала кетейік, коронавирус бойынша эпидемияға қарсы іс-шараларға тартылған медицина қызметкерлерін ынталандыру және көтермелеу үшін жалақыға үстеме ақы қарастырылған. Денсаулық сақтау министрлігінің бұйрығымен тәуекел топтар, алушылардың тізімін қалыптастыру тәртібі және төлемдер мөлшері анықталды. Тәуекел тобына байланысты медицина қызметкерлеріне&nbsp; 212 мың теңгеден (5 АЕК) 850 мың теңгеге дейін (20 АЕК) қосымша ақы берілді.
Үстеме ақы алушылар тізімін жедел штаб жанынан құрылған өңірлік комиссия жасақтайды. Комиссия төрағасы әкімдердің орынбасарлары, сондай-ақ, оның&nbsp; құрамына Медициналық сақтандыру қоры филиалдарының қызметкерлері, өңірлік мемлекеттік бас санитарлық дәрігер, Денсаулық сақтау басқармаларының, үкіметтік емес ұйымдардың өкілдері кіреді.
Ал, Медициналық сақтандыру қоры тізім бойынша деректердің&nbsp; Денсаулық сақтау министрінің “COVID-19 коронавируспен күрес шеңберінде эпидемияға қарсы іс-шараларға тартылған денсаулық сақтау ұйымдарының қызметкерлерін қаржылық қолдаудағы&nbsp; кейбір мәселелер туралы” бұйрығына сәйкестігін тексереді.
Егер медициналық қызметкерлерінде үстеме ақыға қатысты сұрақтар туындаса,&nbsp; өңірлік комиссияға жүгінуі қажет.
Коронавируқа шалдыққан&nbsp; медицина қызметкерлеріне қосымша қаржыны&nbsp; Қазақстан Республикасы Еңбек және халықты әлеуметтік қорғау министрлігі&nbsp;&nbsp; өңірлік комиссия&nbsp; шешімі негізіндегі&nbsp;&nbsp; Денсаулық сақтау басқармаларының өтініші бойынша төлейді.

COVID-19: Қызылордада  2,4 мың медицина қызметкеріне қосымша ақы тағайындалды

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықованың төрағалығымен селекторлық режимде Қармақшы ауданы мен Байқоңыр қаласының эпидемиологиялық ахуалы бойынша мәжіліс өтті.
Аудан әкімі Мұса Қалдарбеков пен ҚР Президентінің «Байқоңыр» кешеніндегі арнаулы өкілінің қызметін қамтамасыз ету басқармасының басшысы Жасұлан Абатов атқарылып жатқан жұмыстарды баяндады. 
Коронавирус індеті бойынша осы уақытқа дейін Қармақшы ауданыныда 103 жағдай тіркелді. Оның ішінде 95 азамат емделіп шықты. Қалған 8 адамның 4-уі инфекциялық стационарда, 4-уі үй жағдайында емделуде.
Пневмония диагнозымен 349 науқас тіркелген. Оның ішінде 223 адам жазылды. Қалған 126 азаматтың 98 провизорлық стационарда ем қабылдаса, 28 жеңіл жағдайда болғандықтан үйде емделуде.
Қармақшы ауданы мен Байқоңыр қаласындағы медициналық ұйымдарда 5 рентген аппарат, 11 өкпені жасанды желдету аппараты (ИВЛ), 18 оттегі концентраты, 110 оттегі баллоны бар. Мұнымен қоса, Қармақшы ауданына демеушілік есебінен 5 оттегі концентраты, ал, Байқоңыр қаласына 2 өкпені жасанды желдету аппараты (ИВЛ) мен 5 оттегі концентраты жеткізіледі деп жоспарлануда.
Қармақшы ауданы мен Байқоңыр қаласында қазіргі күні 30 инфекциялық, 220 провизорлық стационар ұйымдастырылған. Алдағы уақытта қажеттілік туындаған жағдайда қосымша Қармақшы ауданында 50 орындық, Байқоңыр кешенінде 50 орындық провизорлық стационар ашылатын болады.
Жиында облыс әкімі ауданда провизорлық, инфекциялық стационарларды көбейтіп, індетке қарсы жұмыстарды күшейтуді тапсырды.
<blockquote>
 «Пневмания мен коронавирус індеті өршіп тұр. Тұрғындардың денсаулығын сақтау үшін дәрілік заттардың, аппараттардың жеткілікті болуын қатаң бақылауға алыңыздыр. Провизорлық, инфекциялық стационарлардың санын көбейту керек. Жергілікті дәрігерлердің Байқоңыр қаласындағы Ресей Федерациясының білікті мамандарымен тәжірибе алмасуына жағдай жасалсын. Медицина мекемелерін қажетті заттармен, қорғаныс құралдарымен қамтамасыз етіңіздер. Денсаулық сақтау басқармасы жалпы облыс бойынша қосымша дәрігерлердің резервтік тобын жасақтап қойсын. Сақтық шараларын сақтауға шақыратын ақпараттандыру жұмыстарын күшейту керек», – деді облыс әкімі Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2020/07/109763555_2578456632257390_5195686745646860282_o.jpg" alt="" />

Қармақшы ауданы мен Байқоңыр қаласындағы эпидемиологиялық ахуал талқыланды

<a href="https://kyzylorda-news.kz/">Kyzylorda-news.kz.</a> Аудандық «Жанқожа батыр» атындағы орталық мешіттің бас имамы Берік қажы Сүлейменов Қазалы ауданаралық ауруханасына 2 оттегі концентраторын табыстады. Бұл қуанышты жаңалықты өзінің әлеуметтік желідегі парақшасында бөлісті.
Берік Мәдиұлының айтуынша, 8 тыныс алу аппаратын сатып алу үшін ауданның тұрғындары біркісідей атсалысқан.
<blockquote>
 «Берекелі іске ұйытқы болған инстаграмдағы @kazaly_365 парақшасы екенін айта кеткен орынды.Ауданымыздың тұрғындары мен сыртта жүрген жерлестерімізден жиналған қаражатқа Түркиядан 2, Қытайдын 6 оттегі аппараты сатып алынды. Түркиядан алған аппараттарымыз келді. Ал,Қытайдан алған аппараттар 4-5 күндікте келеді. Бұдан бөлек, бір қарындасымыз 500 медициналық маска, бір азамат 50 арнайы кастюм берді. Бұларды да аудандағы медициналық мекемелерге таратамыз», – деді Берік қажы Сүлейменов.
</blockquote>
Сондай-ақ, бұл күні Қазалы теміржол ауруханасына 150 дана медициналық маска мен 15 қорғаныш кастюмдері табысталды.
Қазіргідей эпидимеологиялық ахуал күрделі кезеңде біз бір-бірімізге қолдау көрсетуіміз қажет. Қиындықты тек қана ұйымшылдықтың, ауызбіршіліктің арқасында, жақыныңына жанашырлық танытып қана жеңеміз.
Қазалы ауданының әкімдігі «Жанқожа батыр» атындағы орталық мешіттің бас имамы Берік қажы Сүлейменов бастаған жанашыр азаматтарға, еріктілерге, барша аудан тұрғындарына алғыс айтты. &nbsp;
<img src="https://kyzylorda-news.kz/wp-content/uploads/2020/07/3.jpg" alt="" />

Қазалылық еріктілер 8 оттегі концентраторын сатып алды

<a href="https://kyzylorda-news.kz/">Kyzylorda-news.kz.</a> Бұл қала әкімдігінің Шымкент және Алматы қалаларындағы дәрі-дәрмек өндіруші кәсіпкерлермен қажетті өнімдерді алу жөніндегі жасаған келісім негізінде жүзеге асырылып отыр.
&nbsp;Қаладағы дәрі тапшылығын болдырмау мақсатында жасалған келісім негізінде аймақ орталығындағы&nbsp; сұраныс білдірген 30 дәріханаға аптасына 3 мәрте фармацевтикалық өнімдер жеткізілуде. Оның ішінде эйфулин, дексаметазон, леовит, витамин С, глюкоза, цефазалин сынды өнімдер және басқа да дене қызуын түсіретін дәрілік препараттар бар.
Қала әкімі аппаратының қызметкерлері арқылы қала аумағында орналасқан&nbsp; барлық дәріханаларда дәрі тапшылығын жою мақсатында күнделікті мониторинг жүргізілуде. Мониторинг барысында әрбір дәріханада қандай қажеттіліктер бар екенін анықталып, сол арқылы&nbsp; барлық&nbsp; дәріханаларға дәрі-дәрмектерді жеткізеді.
Арнайы мобильді топ алдағы уақытта да қала аумағындағы&nbsp; дәріханалардың қызметіне&nbsp; мониторинг жұмысын жалғастыратын болады.
Қажетті препараттармен қамту шаралары ұдайы шаһар басшысының тікелей бақылауында.

Қызылордаға Шымкенттен  дәрі-дәрмек жеткізіліп жатыр

<a href="https://kyzylorda-news.kz/">Kyzylorda-news.kz.</a> Қызылорда облыстық көпбейінді балалар ауруханасының кеңес беру диагностикалық бөлімшесі бір ауысымда 300 баланы қабылдай алады. Бұл туралы Өңірлік коммуникациялар қызметінің ақпарат алаңында өткен брифингте Қызылорда облыстық денсаулық сақтау басқармасының басшысы Сабит Пазилов баяндады.
Сондай-ақ, індеттің алдын алу бағытында қосымша 100 провизорлық және 5 инфекциялық төсек орын ашылды. Қосымша 55 пульмонологиялық төсек орын бар.
<blockquote>
 «Жастардың арасында тыныс алу жүйесі және пневмония ауруына шалдыққандар өткен жылмен салыстырғанда көбеюде. Өңірде коронавирус инфекциясы тіркелгелі бері індет жұқтырған 14 жасқа дейінгі балалар сәуір-мамыр айларында жұқпалы аурулар ауруханаларында ем алған болатын. Ал маусым айында коронавирус инфекциясымен тіркелген балалар жоқ», – деді бас дәрігер.
</blockquote>
Қазіргі таңда, коронавирус инфекциясын жұқтырған 7 бала бар. Оның 3-еуі үй жағдайында, амбулаторлы ем алуға жолданса, 4-і стационарда емделуде.
<blockquote>
 «Балаларда коронавирус инфекциясы жеңіл түрде өтіп, айтарлықтай ауыр белгілер байқала бермейді. Дегенмен, ерекше қатер тобындағылар бұл жаңа туған сәбилер мен 1 жасқа толмаған балалар. Себебі, егде адамдар сияқты олар вирустық инфекциялардың ауыр түрлеріне бейім болып келеді. Сондықтан балалар ересектер мен бірдей деңгейде сақтық шаралары мен әлеуметтік оқшаулау ережелерін сақтауы керек», – деді Қызылорда облысының Бас мемлекеттік санитариялық дәрігері Әлия Мүтәліпқызы.
</blockquote>

Қызылордада коронавирус инфекциясын жұқтырған 7 бала бар

Kyzylorda-news.kz. Алматы қалалық балалар клиникалық инфекциялық аурухананың бас дәрігері Ержан Сералин балада коронавирус инфекциясының белгілері байқалған кезде не істеу керек екенін айтты, деп хабарлайды&nbsp;<a href="https://sputniknews.kz/">Sputnik Қазақстан</a>.
<blockquote>
 “Барлық ата-ана баланың тез жазылып шыққанын қалайды. Бұл да кез келген вирустық инфекция секілді өтеді. Ең бастысы ағзасына зиян келтіріп алмау керек. Балалар коронавирус инфекциясын жеңіл өткізетінін барлығы біледі. Ал балада дене қызуы болса, температураны түсіретін парацетамол беру қажет. Ешқайда шықпай, үйде оқшаулауда болып, жылы суды көп ішуі қажет”,– деді маман.
</blockquote>
Егер температурасы түспейтін болса, медициналық көмекке жүгіну қажет. Ол жерде кеуде тұсы рентгенге түсіріліп, пневмонияның бар-жоғы анықталады.
<blockquote>
 “Егер балада пневмония анықталса, баланы ауруханаға алып келу керек. Ауруханада әрі қарай қажетті ем жасалды. Балаларға вирусқа қарсы препараттар қолдануға болмайды. Клиникалық хаттамада да Covid-19 кезінде вирусқа қарсы дәрілер көрсетілмеген. Баланың дене қызуын түсіріп, сұйықтықты көп ішуі қажет. Одан басқа өзін-өзі емдеу ұсынылмайды”,– деп түсіндірді дәрігер.
</blockquote>
Егер үш күн бойы баланың температурасы түспейтін болса, дәрігер көмегіне жүгіну қажет.
Сондай-ақ, дәрігер дүниеге келгеніне он күн болған сәбидің коронавирустан жазылып шыққанын айтты.
<blockquote>
 “Сәби коронавирус инфекциясымен дүниеге келді. Ол перзентханадан бірден инфекциялық ауруханаға жеткізілді. Кеше анасы мен сәбиі ауруханадан шығарылды”,– деді Сералин.
</blockquote>

Балада коронавирус белгілері байқалса не істеу қажет?

Kyzylorda-news.kz. Коронавируспен және пневмониямен ауыратын науқастарды емдеу үшін наурыз-маусым айларында Әлеуметтік медициналық сақтандыру қоры аймақтың стационарларына 39 848 төсек-орынға &nbsp;601,9 млн теңге бөлді, деп хабарлады «ӘМСҚ» КЕАҚ Қызылорда облысы бойынша филиалының директоры Бақыт Исмаханбетов.
Б. Исмаханбетов атап өткендей, наурыз айымен салыстырғанда маусымда төсек-күннің жалпы саны 28 есеге артты. Осы кезеңде карантиндік стационарларға 28 556&nbsp; төсек-күн, жұқпалы аурулар үшін 6 573 төсек-күнге қаржы төленді.
Маусым айында наурыз айымен салыстырғанда провизиялық стационарларда төсек-күн саны айтарлықтай өсті: наурыз айында 82төсектен маусым айында 1 821 төсек-күнге дейін.
Төсек-күнге пациенттің стационарда орны, аурудың диагностикасы мен емі кіреді.
Қазір&nbsp; денсаулық сақтау жүйесінде төсек қорын ұлғайту қажет. Қазақстандықтарға медициналық көмек көрсету сапасын жақсарту үшін Қор шілде айында медициналық ұйымдарға тарифті көтерді .
Енді Қор&nbsp; провизорлық стационарға 1 төсек-күн үшін 21,9 мыңнан астам теңге төлейді; тәулік бойы стационарға&nbsp; – 32,2 мыңнан астам&nbsp; теңге; науқасты анестезиология, реанимация және қарқынды терапия бөлімшесінде емдеу үшін – 1 төсек-күн үшін 70 мың теңгеге жуық бөледі.
Қор филиалының директоры атап өткендей, Медициналық сақтандыру қорында аталған қызметтерге тарифтің артуы Қор жеткізушілерінің санын көбейтуге, коронавирус пен пневмонияға шалдыққан&nbsp; науқастарды емдеуге жеке ауруханаларды белсенді тартуға және стационарлардағы медициналық көмектің сапасын ынталандыруға мүмкіндік береді.
Кәзіргі уақытта, Әлеуметтік медициналық сақтандыру қоры Қызылорда облысы бойынша филиалы 10 инфекциялық/провизорлық стационармен орындау/бірлесіп орындау шарттарын жасасты.
Осы жылдың&nbsp; 30 маусымынан төсек саны 1 835-ден 2 410-ға дейін артты,&nbsp; 575 төсек (31,3%)&nbsp; қосылды. Төсек қорының&nbsp; 70% бос емес. Covid 19 емдеуге тартылған стационарлардағы орындарға күн сайын&nbsp; мониторинг жүргізіледі. Бұл көрсеткіш жергілікті атқарушы органдардың&nbsp; жұмысының индикаторы болып табылады. Өңірдегі кереует қорының 70 пайызы бос емес, резервтен қосымша кереует ашу бойынша шаралар қабылдануда.
Сонымен қатар, № 10 Клиникалық Хаттамаға, 2020 жылғы 4 шілдедегі № 104 басылымға сәйкес, аурудың асимптоматикалық және жеңіл түрі бар науқастарды тұрғылықты жері бойынша аумақтық емханалардың учаскелік дәрігерлері бақылайды.
Стационарлық емге Covid-19 шалдыққан орташа ауыр және&nbsp; ауыр жағдайдағы пациенттер ғана жатқызылады.
Сондай-ақ, амбулаториялық деңгейде медициналық көмекке қол жеткізу мақсатында емханалар жанында мобильді бригадалар құрылды, олар үйде медициналық қызметтер кешенін көрсетеді (дәрігерді қарау, ем тағайындау, рецепт жазу, манипуляциялар жүргізу және т.б.). Сондай-ақ, үйде стационарлық қызмет&nbsp; ұйымдастыру да қарастырылған.

МӘМСҚ Қызылордада коронавирустан емделіп жатқан науқастарға 601,9 млн теңге  бөлді

Kyzylorda-news.kz. Бүгін облыс әкімі Гүлшара Әбдіқалықованың төрағалығымен селекторлық режимде Арал ауданының эпидемиологиялық ахуалына қатысты мәжіліс өтті.
Жиында аудан әкімі Мұхатар Оразбаев індеттің алдын-алу және таралуын болдырмау мақсатында атқарылып жатқан жұмыстар туралы баяндады.
Қазіргі таңға дейін ауданнан 115 адам «COVID-19» ауруын жұқтырғаны анықталып, оның 105-і жазылып шықса, 10 адам жұқпалы аурулар бөлімшесінде ем алуда.
Жалпы 26 маусымнан бастап ауданда пневмониямен ауырғандар саны 746 адамды жетті. 
Оның ішінде үй жағдайында 532 адам ем алып, оның 338-і қазіргі таңда жазылып шықты. Қалған 194 адам әлі де үйден ем қабылдауда. Барлық науқастар дәрігерлік емханалармен қатаң бақылауға алынған.
Бұдан бөлек, осы кезге дейін пневмония сырқатымен провизорлық режимде 214 адам ем алып, оның ішінде 100 адам жазылып шықты. 
Сонымен қатар, тамыз айында Арал қаласынан қосымша А.Байтұрсынов ауылдық емханасынан 120 орындық, қыркүйек айында Жақсықылыш кенттік емхана ғимаратынан 25 орындық, қазан айында «Қамбаш» олимпиадалар және қосымша білім беру орталығы базасынан 120 орындық, қараша айында Арал қаласындағы аудандық мәдениет үйінен 35 орындық провизорлық орталықтар ашу жоспарлануда. Қазіргі күні, барлығы 300 орынға шақталған ғимараттарды жөндеу, бейімдеу жұмыстары жүргізілуде. 
Облыс әкімі күшейтілген режимде жұмыс жасауды және дәрі-дәрмек, қажетті аппараттардың жетіспеушілігін алдын-алуды тапсырды.
«Дәріханаларда дәрі-дәрмек тапшылығы бар. Облыс бойынша дәрі-дәрмек алуға 86 млн. тенгеге өтінім берілді. Оның ішінде әр ауданға 10 млн. қарастырылған. Бірақ бұнымен тоқтап қалуға болмайды. Дәрілік заттардың жетіспеушілігін алдын алуға жұмыс жасаңыздар. Арнайы құрылған мобильді бригадалардың әрі қарай жұмысын жандандыру қажет. Қосымша провизорлық орталықтарды жүйелі дайындықта ұстаңыз. Оттегі концентраторының саны да жеткілікті көлемде емес. Оттегі станциясын құруға әрекет жасаңыздар», – деді облыс әкімі Гүлашара Әбдіқалықова.
Ауданда барлығы 7 өкпені жасанды желдету құрылғысы (ИВЛ), 15 кислородты редуктор және күнделікті 15-20 кислородты баллондар пайдаланылуда.
Мұнымен бірге, алдағы уақытқа 200 койкіге төсек-жайма, қосымша 20 дана кислородты концентратор мен алғашқы керек заттарға «Аралтұз» акционерлік қоғамына демеушілік ретінде 54 млн. 500 мың теңге бөлуге тапсырыс берілді. 
Айта кетейік, Арал ауданы бойынша 20 мобильді топ жұмыс жасауда.
<img src="https://kyzylorda-news.kz/wp-content/uploads/2020/07/114453399_2575715972531456_78270323556583783_o.jpg" alt="" />

Облыс әкімі Арал ауданындағы эпидемиологиялық ахуалға қатысты жиын өткізді

<a href="https://kyzylorda-news.kz/date/2020/07/21/">Kyzylorda-news.kz</a>. Денсаулық сақтау вице-министрі Ажар Ғиният Қазақстанда науқастарды коронавирустан емдеу хаттамасына өзгерістер енгізілгенін мәлім етті, деп хабарлайды <a href="https://lenta.inform.kz/kz/kazakstanda-koronavirusty-emdeu-hattamasyna-ozgerister-engizildi_a3675083">ҚазАқпарат</a>.
<blockquote>
 «Емдеудің жаңа әрі тиімі әдістерін бүкіл әлем іздестіріп жатыр. Жалпы бұл вирусқа қарсы этиотропты емдеу әдісі жоқ екендігін білесіздер. Сол себепті біздің қазақстандық ғалымдар бүкіл халықаралық тәжірибені зерттеп, үздік әдіскерлер хаттамаларды барынша жаңартып, жақсартып жатыр. 15 шілдеде сапа бойынша бірлескен комиссия жетекші мамандармен бірлесе отырып, коронавирустан инфекциясынан емдеу хаттамасының 10-редакциясына өзгерістер мен толықтыруларды енгізді», – деді Ажар Ғиният ОКҚ-да өткен баспасөз мәслихатында.
</blockquote>
Вице-министр айтып өткендей, ең бірінші кезекте емдеу хаттамасынан «Лопинавир» мен «Гидроксихлорохин» алынып тасталған. ДДСҰ кеңесі бойынша бұл препараттар тиімсіз деп танылған. Сол себепті комиссиялық тұрғыда вирусқа қарсы осы препараттарды алып тастау туралы шешім қабылдады.
<blockquote>
 «Бүгінгі күні Ремдесевир мен Фавипиравир КВИ-дан ауыр түрін емдеуге тиімді деген мәлімет бар. Сондықтан клиникалық зерттеу мен КВИ-дың ауыр түрі кездескен жағдайда вирусқа қарсы препарат ретінде қолдану үшін клиникалық хаттамаға енгізілді. Сонымен бірге алғаш рет емдеудің амбулаториялық кезеңдері енгізілді. Амбулаториялық деңгейде ыстық түсіретін препараттар мен перораль антикоагулянттар енгізілді», – деді ол.
</blockquote>
Бұл препараттар емхана деңгейінде тегін берілуі керек.

Қазақстанда коронавирусты емдеу хаттамасына өзгерістер енгізілді

Kyzylorda-news.kz. Әлеуметтік медициналық сақтандыру қорының Қызылорда облысы бойынша филиалы наурыз-маусым аралығында коронавирус инфекциясын диагностикалау үшін 6 425 мың ПТР-зерттеуге 82,4млн теңге бөлді, 1 565 тест стационарларда және МСАК дәрігерлерінің жолдамасы бойынша 4 860 тест жүргізілді, деп хабарлады “ӘМСҚ” КЕАҚ Қызылорда облысы бойынша филиалының директоры Бақыт Исмаханбетов.
Филиал басшысының айтуынша, ПТР-тестілеу халыққа қолжетімді болу үшін Қор филиалы зертханасы бар 3 мекемемен келісім жасады.
Қызылорда облысында бойынша медициналық-санитарлық алғашқы көмек көрсету&nbsp; ұйымдары жанындағы 125&nbsp; астам мобильді бригада полимеразды тізбекті реакция (ПТР) әдісімен тестілеу жүргізу үшін СOVID-19 күдікті пациенттерден биологиялық материалдардың үлгілерін алады. Бұл&nbsp; халыққа қызмет көрсету мәселесін уақытылы шешуге және олардың қолжетімділігін арттыруға мүмкіндік береді.
Бақыт Исмаханбетов халықтың қай топтарында&nbsp; ТМККК және МӘМС қаражаты есебінен ПТР-тестілеуден тегін өтуге мүмкіндігі бар екенін еске салады.
<blockquote>
 «Біріншік езекте – инфекциялық стационарлар да жатқан пациенттер. Диагнозды растап, емдеу алгоритмін қолдану үшін олар шұғыл түрде тек серілуі керек. Келесі санат –&nbsp;&nbsp; провизорлық стационардағы COVID-ке күдікті пациенттер. Оларда белгілі бір симптомдар болады және&nbsp; диагноз қою керек. Содан кейін&nbsp; ЖРВИ және пневмония симптомдары бар азаматтар емдеуші учаскелік дәрігердің жолдамасымен. Аталған топты тестілеу үшін Қор емханалармен, отбасылық амбулаториялармен, ал олар өз кезегінде зертханалар меншарт жасасты. Сондай-ақ, тестілеу карантин изоляторына жатқызылған вирустың симптомсыз тасымалдаушыларға да жасалады. Бұдан басқа, жоспарлы емдеуге жатқызу кезінде пациенттер де ПТР-тест тапсырады, бұған жүкті әйелдер, шұғыл емге жатқызылатын пациенттер жатады. Қор жеткізушілердің алдында көрсетілген қызметтерге ақы төлеу бойынша өзінің барлық міндеттемелерін орындады. Қызметтерді төлеу медициналық ақпараттық жүйелердің көмегімен Денсаулық сақтау министрлігі бекіткен тарифтер бойынша жүргізіледі», – деп түйіндеді Б.Исмаханбетов.
</blockquote>

Қазақстан және Қызылорда облысының жаңалықтары: Денсаулық

Коронавируспен күресте қай өңірлерде төмен көрсеткіш қалыптасты?

Қазалыда қызметтік көліктер жедел-жәрдем қызметін атқарып жатыр

COVID-19: Қызылордада 2,4 мың медицина қызметкеріне қосымша ақы тағайындалды

Қармақшы ауданы мен Байқоңыр қаласындағы эпидемиологиялық ахуал талқыланды

Қазалылық еріктілер 8 оттегі концентраторын сатып алды

Қызылордаға Шымкенттен дәрі-дәрмек жеткізіліп жатыр

Қызылордада коронавирус инфекциясын жұқтырған 7 бала бар

Балада коронавирус белгілері байқалса не істеу қажет?

МӘМСҚ Қызылордада коронавирустан емделіп жатқан науқастарға 601,9 млн теңге бөлді

Облыс әкімі Арал ауданындағы эпидемиологиялық ахуалға қатысты жиын өткізді

Қазақстанда коронавирусты емдеу хаттамасына өзгерістер енгізілді

ПТР-тестілеу кімдерге тегін?