<a href="https://kyzylorda-news.kz/">Kyzylorda-news.kz.</a> &nbsp;Аудан әкімі Берік Сәрменбаев медицина саласының еңбек сіңірген дәрігері Бектас Ердәулетовті еске алуға арналған медицина қызметкерлері арасындағы аудандық спартакиаданың ашылуына қатысты.Аудан әкімі медицина саласын дамытуда Б.Ердәулетовтің еңбегі зор екенін атап өтті.<blockquote>– Арда азаматтың жүріп өткен жолы өскелең ұрпаққа үлгі-өнеге. Алтын қолды дәрігер жылдар бойы «Хирургия» бөлімшесіне жетекшіліп етіп, іргелі ұжымның жұмысына серпін берді. Ізетовтер әулетінің мақтанышына айналған ардақты жанның есімі нәтижелі істерімен ел жадында сақталады. Өйткені оның алдына көмек сұрап келген әрбір адам науқасқа деген ерекше мейірімін көрді, – деді Берік Әбдіғаппарұлы.</blockquote>Спорттық іс-шарада «Сенім» денсаулық сақтау жүйесі жұмыскерлерінің салалық кәсіптік одағының төрағасы Сәулебек Ысқақов, аудандық аурухана бас дәрігерінің емдеу ісі жөніндегі орынбасары Еркін Жаңабайұлы, Бектас Ізетұлының ағасы Шыңтас Ізетов өз естеліктерімен бөлісіп, медицина саласын дамытудағы еңбегін айтып өтті.Медицина қызметкерлер арасында бұқаралық спортты насихаттау мақсатында ұйымдастырылған жарысқа 7 команда, 150-ге жуық қызметкер спорттың 6 түрінен қатысуда.

Б.Ердәулетовті еске алуға арналған спартакиада өтуде

Тұрғанбай Маханов: Денсаулық сақтау саласындағы оң өзгерістерге куәмын

<a href="https://kyzylorda-news.kz/">Kyzylorda-news.kz.</a>&nbsp; Денсаулық сақтау саласында кезек күтірмейтін мәселелер жетерлік. Соның ішінде, Сыр медицинасын серпінді дамыту бағытындағы жұмыстар жүйелі жүргізілуде. Мәселен, Денсаулық сақтау саласында кезек күтірмейтін мәселелер жетерлік. Соның ішінде, Сыр медицинасын серпінді дамыту бағытындағы жұмыстар жүйелі жүргізілуде. Мәселен, биыл облыстың денсаулық сақтау саласына 138,6 млрд теңге қаржы бөлінді. Тиісінше, бұл өткен жылмен салыстырғанда 21 пайызға артып отыр. Сондай-ақ, былтыр өңірде 21 денсаулық сақтау нысанының құрылысы басталса, оның 17-сі мерзімінде аяқталып, ел игілігіне пайдалануға берілді. Биыл да өңірде бірнеше медициналық ұйымдардың іргетасы қаланып, тұрғындарға мерзімінде табыстау межеленуде.&nbsp;<blockquote>− Биыл жергілікті бюджет есебінен Жаңақорған ауданы, Төменарық елді мекенінде дәрігерлік амбулаториямен қатар, 15 төсекке арналған ауылдық аурухана құрылысы салынуда. Сонымен қатар, шалғай аудандардағы балаларға реабилитациялық емнің қолжетімділігін арттыру мақсатында Арал ауданында оңалту орталығын ашу жоспарлануда. Ал, бүгінде 20 денсаулық сақтау нысанының құрылысы бойынша жоба-сметалық құжаттар әзірленуде. Оның ішінде 4 аудандық көп бейінді аурухананың қосымша құрылысы, 2 қалалық емхана, 10 дәрігерлік амбулатория және 2 фельдшерлік-акушерлік бекет. Бұдан бөлек, қаланың сол жағалауында 500 келушіге арналған қалалық емхана мен Қарауылтөбе ауылындағы дәрігерлік амбулатория құрылысы салынатын болады. Өткен жылы да 9 медициналық нысанға күрделі жөндеу жүргізілді. Соның ішінде 5 нысанның жөндеу жұмыстары аяқталса, осы жылы 4 нысан пайдалануға берілмек. Ендігі кезекте, денсаулық сақтау нысандарын материалдық техникалық жабдықтармен қамтамасыз ету бойынша тоқталсам, былтыр осы бағытқа жалпы құны 5,3 млрд теңге қаржы бөлінді. Нәтижесінде, медицина ұйымдарының керекті құрал-жабдықтармен қамтылу деңгейі 86 пайызға ұлғайды,−деді облыстық денсаулық сақтау басқармасының басшысы Олжас Искаков.</blockquote>Сонымен қатар денсаулық сақтау саласына қажетті қызметтік көліктер алынып, заманауи құрал-жабдықтармен қамтамасыз етуде оң өзгерістер бар. Қызылорда облысында медицина саласында ауқымды жобалар жүзеге асуда.Жақында көпбейінді облыстық аурухана базасында жаңа МРТ аппараты іске қосылды. Бұл сала мамандарының жоғары деңгейде жұмыс атқаруына оң септігін тигізеді.<blockquote>«Мемлекет басшысы денсаулық сақтау саласын басым бағыттардың бірі ретінде белгілеп, халыққа арнаған Жолдауында нақты талаптар қойды. Осыған орай көпбейінді облыстық аурухана базасында жаңа МРТ аппараты іске қосылып, 70 орындық перинаталдық бөлім ашылды. Бұрынғы аппарат бұзылып, ауруханада 2016 жылдан бері мұндай құрал-жабдық болған жоқ. Мәселенің шешімін табу үшін бюджеттен қаржы бөліп, биыл бағасы 646 млн. теңге тұратын МРТ аппараты алынды. Жаңа құрал өңір халқының игілігіне, аурудың алдын алу, анықтау жұмыстарын ілгерілетуге қызмет етеді», – дейді сала мамандары.</blockquote>Осындай қамқорлықтың нәтижесінде облыстық көпбейінді ауруханада күрделі ота жасауға мүмкіндік жасалып отыр. Өткен жылдың желтоқсанында бүйрек ауыстыру отасын А. Сызғанов атындағы Ұлттық ғылыми хирургия орталығы басқарма төрағасы, медицина ғылымдарының докторы, профессор Болатбек Баймахановтың басшылығымен қызылордалық дәрігерлер сәтті атқарып шықты.<blockquote>«Елімізде 2011 жылдан бері бүйрек және бауыр трансплатациясы кең ауқымда жүргізіліп келеді. Бүгінге дейін 1 000-ға тарта ота жасалды. Оның 700-і бүйрекке қатысты болса, қалғанын бауыр трансплантациясы құрайды. Бұл – өте күрделі іс, оған әрбір дәрігер үлкен жауапкершілікпен қарайды. Тәжірибесі жоғары болуы ескеріледі. Біз облыстық көпбейінді аурухана дәрігерлерінің ұсынысын қабыл алдық. Аурухана оған қажетті медициналық құрал-жабдықтармен қамтамасыз етілген. Ота төрт сағаттан астам уақытқа созылды. Жалпы, бұл өте жіті назарда болады. Барлығы алдын-ала зерттеледі», - дейді Болатбек Баймаханов.</blockquote>Айта кетсек, өңірдің медицина саласында ауқымды жобалар жүзеге асуда. 2022 жылы 45 жедел жәрдем көлігі алынып, облыстық медициналық жедел жәрдем стансасы 100% автокөлікпен қамтамасыз етілді. Өткен жылы денсаулық сақтау ұйымдарына 512,5 млн. теңгеге 25 жаңа санитарлық автокөлік табысталды.&nbsp; Өткен жылы тамыз айында Қызылорда қаласының сол жағалауында құны 2 млрд 700 млн теңгені құрайтын Қан орталығының іргетасы қаланды. Нысан жылына 5000-10000 адамдға қызмет көрсете алады. Орталықтың салынуы – аймақтың денсаулық сақтау саласы үшін маңызды әрі ұтымды шешім. Бұл – облыс тұрғындарының денсаулығын сақтау және қорғау бағытындағы нақты іс-шараның бірі.Тұрғындар сұранысына сәйкес, биыл өңірдің барлық елді мекендеріндегі денсаулық сақтау мекемелеріне 200 санитарлық автокөлік сатып алынады Оған қоса 9 медициналық нысанға күрделі жөндеу жүргізіліп, 5 нысанның жылу жүйесі газға ауыстырылуда. Бұл жұмыстарға 3 млрд. 700 млн.теңге қаралды.Жақын күндері Жаңақорған ауданындағы көпбейінді аудандық орталық аурухана базасында «Қамқорлық» оңалту орталығы ашылады. «Қазақстан халқына» қоғамдық қоры соңғы екі жылда аймақтың денсаулық сақтау саласына 2 млрд. теңге қаржы бағыттады. Оған облыстық балалар ауруханасы базасында «Қамқорлық» реабилитациялық орталығы ашылып, аса қымбат дәрі-дәрмектер алынды. Сондай-ақ, қор республика бойынша 3 облыста ғана бар, құны 1 млрд. 100 млн теңге тұратын онкологиялық скрининг жүргізуге арналған жылжымалы медициналық кешенмен қамтамасыз етті.Өздеріңіз білетіндей Мемлекет басшысы Қасым-Жомарт Тоқаев 2020 жылы 1 қыркүйектегі «Жаңа жағдайдағы Қазақстан: іс-қимыл кезеңі» атты Жолдауында отбасылық-демографиялық ахуал &nbsp;зор алаңдаушылық тудырып отырған мәселе екенін айтып, нақты міндеттер жүктеген еді.<blockquote>«Өкінішке қарай, Қазақстанда әрбір алтыншы отбасы бала сүйе алмай отыр. Сауалнама көрсеткендей, отандастарымыздың 20 пайызға жуығы мұны ажырасуға негіз болатын елеулі себеп деп санайды. Біріккен Ұлттар Ұйымының еліміздегі халық санының өсіміне қатысты болжамы Орталық Азиядағы көршілес мемлекеттермен салыстырғанда көңіл көншітпейді. Үкіметке 2021 жылдан бастап «Аңсаған сәби» арнаулы бағдарламасын жүзеге асыруды тапсырамын. Экстракорпоральды ұрықтандыру бағдарламалары бойынша бөлінетін квота санын 7 мыңға дейін, яғни 7 есе көбейту қажет» деп нақты тапсырма берді.&nbsp;</blockquote>Осылайша 2021 жылдан бастап елімізде қосалқы репродуктивті технологиялардың көмегімен отбасылық-демографиялық проблемаларды шешуге жәрдемдесу мақсатында «Аңсаған сәби» арнаулы бағдарламасы іске қосылды. Облыстық денсаулық сақтау басқармасының мәліметіне сүйенсек, 2021 жылы аймаққа 281 квота бөлініп, толық игерілді. Сол жылы ЭКҰ арқылы 119 бала туып, 3 отбасында егіздер дүниеге келді. Ал 2022 жылы бағдарлама бойынша 277 квота бөлінсе, былтыр &nbsp;274 квота берілген. Биыл бөлінген квота саны – 270. Ал бағдарлама әзірленгенге дейін аймаққа бөлінетін квота саны тым төмен болған. Мәселен, &nbsp;2015 жылы &nbsp;34, 2016 жылы &nbsp;35, 2017 жылы 38, 2018 жылы 38, 2019 жылы &nbsp;36, 2020 жылы 44-ті құраған. Нақтырақ айтқанда, 2015 жылдан бері берілген квота саны &nbsp;8 есе өсіп отыр.Жоғарыда айтып өткеніміздей, былтыр 274 квота бөлініп, &nbsp;игерілген. Оның ішінде жүктілік 49,6%, яғни, 136 жағдайда тіркеліп, 11,6%-да &nbsp;түсікпен аяқталған. Өкінішке қарай 31 %-да &nbsp;жүктілік нәтиже бермеген. &nbsp;Есепті кезеңде ЭКҰ арқылы 86 бала туып, 1 отбасында егіз сәби дүниеге келген. Ал &nbsp;51 әйел қазіргі кезде жүкті. Биыл бөлінген 270 квота бойынша бүгінде &nbsp;76 әйел жолданып, орындалу үлесі &nbsp;28,1% құрады.Жалпы облыста ұрпақ өрбіту жасындағы әйелдер саны – &nbsp; 174 931. Қазіргі кезде &nbsp;6320 бедеу отбасы бар. Оларды бедеулігіне сәйкес саралағанда 60,4%-ын &nbsp;әйел (3819), 39,6%-ын ерлер (2501) құрап отыр. Бүгінгі күні &nbsp;750 отбасы квота кезегін күтуде.<blockquote>– Кезекте тұрған отбасылардың барлығы өңірлік комиссия арқылы қаралып, қолданыстағы бұйрықтарға сәйкес жолданады. «Аңсаған сәби» арнайы бағдарламасы шеңберінде жүргізілген ЭКҰ циклдеріне мониторингті, пациенттердің құжаттарын қабылдау және құрылған комиссияға ұсыну жұмыстарын басқарма жүргізеді. Облыстық денсаулық сақтау басқармасының &nbsp;бұйрығына сәйкес пациенттерді емдеу үшін квоталарды бөлуді талдау және ұрықтандыруға жолдама беруді шешу бойынша комиссия құрылған. Комиссия құрамында облыс әкімі жанындағы әйелдер істері және отбасылық-демографиялық саясат жөніндегі комиссия хатшысы, қоғамдық қорлардың үйлестірушілері, білікті акушер-гинеколог, уролог мамандар бекітілген, – дейді облыстық денсаулық сақтау басқармасы басшысының ана мен бала жөніндегі орынбасары Айгүл Асылбекқызы.</blockquote>Айта кету керек, &nbsp;бағдарлама МӘМС аясында қаржыландырылады. Әлеуметтік медициналық сақтандыру қоры 2018 жылдан бастап тегін медициналық көмектің кепілдік берілген көлемі шеңберінде ЭКҰ бағдарламасын қаржыландырады. ЭКҰ-ға жолдама алу үшін тіркелген жері бойынша емханаға жүгіну қажет. Мамандар пациентті бедеулігі бар диспансерлік пациенттердің электрондық тіркеліміне қосады және бірқатар тексерулер тағайындайды. 12 ай ішінде емхананың бейінді маманның қорытындысы негізінде пациенттің құжаттарын жоғары технологиялық медициналық қызметтер жөніндегі жергілікті комиссияға жібереді. Оң шешім қабылданған жағдайда, әйел «Емдеуге жатқызу бюросы» порталына тіркеліп, рәсімге дайындала бастайды. Пациент экстракорпоралдық ұрықтандыру үшін клиниканы өз бетінше таңдауға құқылы.ЭКҰ процедурасы терапевтік жолмен емдеуге келмейтін бедеулік диагнозы қойылғандарға арналған. &nbsp;Оған отбасылық жұптар да, жеке адам да қатыса алады. Міндетті түрде үміткердің ерікті жазбаша &nbsp;келісімі болуы керек. Сонымен қатар, Қазақстан азаматы болуы және Денсаулық сақтау министрлігі белгілеген медициналық параметрлерге сәйкес келуі қажет. Бұл – репродуктивті жас, яғни, 18-ден 42 жасқа дейін, қалыпты соматикалық және эндокриндік мәртебе, жоғары фолликулярлық резерв. МӘМС бойынша ЭКҰ процедурасынан жылына бір рет тегін өтуге болады. Талпынысы сәтсіз аяқталған жағдайда қайтадан кезекке тұра алады.Сыр медицинасында мамандардың біліктілігін арттыру мәселесі де назардан тыс қалған емес. Дәрігерлердің республикалық орталықтарда ғана емес, шет елдерде де біліктілігін арттыруға жергілікті бюджеттен 80 млн. теңге бөлінді. Сәуір айында Стамбул қаласындағы Қазақстанның бас консулының қолдауымен Түркиядағы «Мемориал» клиникасына 10 реаниматолог және 5 кардиолог біліктілік арттыруға барды. Бұл бағыттағы шаралар жыл көлемінде жалғасын табады.Мейрамгүл ДАУЫЛБАЙҚЫЗЫ&nbsp;

Сыр медицинасы – серпінді дамуда

<a href="https://kyzylorda-news.kz/">Kyzylorda-news.kz.</a> &nbsp;Халқы қарапайымдылығымен, еңбекқорлығымен дараланған Қазалы ауданына қарасты Ү.Түктібаев ауылы бар. Аталған ауыл өзіндік ерекшелігімен елге танымал десек артық айтқандық емес. Өзге өңір жұртшылығы бұл жерді құт қонған мекен санайды. Нақты мәліметке сәйкес, ауылда бүгінде 24 егіз тұрады екен. Оның ішінде екі рет егіз сәби мен үшем тәрбиелеп отырған отбасылар да бар. Қазір ауылдағы егіздердің алды – 50 жасты еңсерсе, ең кенжесі – 1 жасқа енді толады.Облыс орталығынан 450 шақырым қашықтықта қоныстанған елді мекеннің негізгі кәсібі егін және мал шаруашылығымен тікелей байланысты. Округ аумағы солтүстік батысында Ақжона, Майдакөл, Шығыс беткейінде Аранды ауылдық округтерімен, ал, батыс жағында «Барсакелмес» Ұлттық қорығымен шектеседі. Бүгінде елді мекенде – 1 800 тұрғын берекелі тұрмыс кешіп жатыр.«Батыр атындағы ауылымыздың негізгі ерекшелігі – егіздердің көптеп тууында болып тұр. Өзім әкім қызметіне кіріскен екі-үш жылдың ішінде, үш мәрте егіз сәби өмірге келді. Шаңырақтарына арнайы құттықтап барып, қуанышымен ортақтасып та қайттым. Негізінен, ауыл халқының жайлы тұрмыс кешуіне мемлекет тарапынан қамқорлық ортайған емес. Бұған дейін ауылда интернет желісі қиындық туғызып келген болатын, қазір ол мәселе шешілді. Сол сияқты 2,5 жылдың ішінде, 1 миллиардқа жуық теңге қаражатқа ауыл келешегіне бағытталған жоспарлы жұмыстар жүйелі жүргізілді. Атап айтқанда, егінге, мал суаруға бағытталған шлюзді каналдар қазылып, жаңадан спорт кешені салынды. Сондай-ақ, «Ауыл – ел бесігі» бағдарламасымен ауыл аумағына жаңадан 6 жол салынып, көркейту-көгалдандыру жұмыстары көңілдегідей атқарылды. Алдағы 2025 жылы ауылды газдандыру жұмыстары қарқын алатын болады. Айта берсек, ауылымызды дамытуға негізделген ауқымды жұмыстар атқарылып жатыр», – деп мәлімдеді ауыл әкімі Олжас Ахметов.Қазақта көп баланы дүниеге әкелген адамды аяулы жанға балайды. Ал, егіз бен үшемдер туған нәзікжандылар қашан да, құрмет төрінде. Құрсағына бір емес, бірнеше өмірді сыйдырған ардақтыларға күтім көрсетіп, перзенттердің аман-есен есік ашуына жауапкершілікпен қарайтын «кіндік шешенің» ісін жай күнде елей бермейміз.Ол ешқашан мақтау мен марапатқа ұмтылмаған адам. Солай бола тұра, биігінен аласармаған акушер. Арманы – әр сәбидің отбасымен қуанышта қауышуы, мақсаты саналы ұрпақ өрбітуде тұрғындарға тәжірибесі мен біліктілігін бөлісу.Қарапайымдылығымен көпке үлгі болған Әлия Айбергеннің есімін бүгінде бүкіл республика жұртшылығы біледі. Әсірелеу емес, анық ақпар. Осыдан бірнеше жыл бұрын Қазалы ауданынына қарасты Үрмаш Түктібаев ауылында егіздер көп тұратынын ақпараттандырғанымыз бар. Сол кезден бастап, жағымды жаңалық елімізге кеңінен танылып, танымалдығы арта түсті. Бүгінде басқалар батыр атымен аталатын мекенді «егіздер ауылы» деп біледі.Екі мыңға жуық адам тұратын мұнда төрт жүзге жуық отбасы түтін түтетіп отыр. Соңғы отыз жылда бала туу толастамаған. Қызығы, олардың бірнешесі егіз бен үшемдер. Танымал балалардың «кіндік шешелері» мақтаулы маман ғана емес, әрбір өскінге өз анасындай алаңдайтын жанашыр.Аталмыш ауылда дүниеге келген ару орта мектепті отбасының қоныс тебуіне байланысты, аудан орталығында тәмамдайды. Сол жылы Жезқазған медициналық училищесіне қабылданып, жалпы мейірбике ісі мамандығын алып шығады.Қолына диплом ұстаған жас маман Түктібаев ауылына оралып, еңбек жолын мейірбике болып бастайды. «Мейірбикелік адамнан көп қажыр-қайратты, үнемі ізденісті талап етеді. Тоқтауға, тоқмейілсуге болмайды. Өзгерістер мен жаңалықтарға ілесе жүріп, алға қарай адымдайсың. Өз басым сол жылдары көп нәрсе үйрендім. Қиналдым, кейде шаршаған уақытым да болды. Алайда, мені жетелеген арманым мен ата-ана, ізіме ерген бауырларымның үміті болды», – деп бастады әңгімесін ол.1992 жылдың соңында акушерлікке ауысады. Барлық ананың бала көтергендегі жағдайы, босанып келгеннен кейінгі күйіне жауапты жұмыста түрлі оқиғаларға тап болады. Екі кезеңнің тоғысқан тоқырау заманның өзінде Түктібаев топырағындағы аналар бала босану көрсеткішін кемітпеген. 1992-1997 жылдар аралығында ауылдағы аурухана жанындағы перзентхананың жұмысын да, дәл осы гинеколог пен акушер қоса атқарады. Мұның сырын сұрағанымызда, кейіпкеріміз жайбарақат қалпынан таймай: «Біздің штатымыз емханада болды. Әйел босанып жатса, түнде де, басқа уақытта да барамыз. «Неге қосымша ақы төленбейді?», «Менің құзіретіме кірмейді» демейміз, жақсы біткен іске қуанамыз», – дейді.1997 жылдан – 2007 жылға дейін жүкті келіншектер көршілес Бекарыстан би ауылында босанады. 2007 жылы ол аурхана да жұмысын тоқтатып, аудан, әйелдер облысқа тасымалданады. Олардың әрбірінің жанында акушер Әлия жүреді. Жоғарыда атап өткен ағайындылар туралы білмекке ұмтылдық. Акушер маман бәрінің аты-жөнін, туған күні мен уақытын күні бүгін болғандай айтып берді.Тәуелсіздіктің төл құрдастары – Жанарыс және Бекарыс Сапаевтар білім саласында жемісті жұмысымен танылып үлгергендер. Олардың құрдастары – Алмат пен Самат өз бағыттарын өнер жолынан іздепті.Аймақовтар отбасының кенжелері – Ержан – жоғары білімді азамат. Рудный педагогикалық институтының түлегі. Сыңары – Нұржан кәсіпкер. Егіздердің немере бауырлары – Еділ мен Жайық Абзалдар теміржолшы мамандығын алса да, бірі Алматы, бірі Астана қаласында түрлі салада еңбек етуде.«Алдыңғы егіздерде мен көмекші болдым. Ал, 1997 жылы туған Киікбай Нағызәлиев пен Айымгүл Алдамбергеновтің ұлдары – Ерқанат пен Нұрқанатты өзім босандырған тұңғыш егіздерім», – дейді жүзіне күлкі үйіріліп. Тағы бір айта кетерлігі, бұл отбасындағы тағы егіз бар. Қазір &nbsp;Бекзат пен Саят да тәрбиелі балалар. Нұрсұлтан мен Сара да осы ауылда дүниеге келген. Өздері таңдаған мамандық иесі болған олар да, жақсы қырынан танытып келеді.2006 жылы есік ашқан Айдана мен Айбек Игенберген, Еркемай мен Еркетай Асандар. бітіруші түлектер – Толғанай мен Толағай Аманжол, Ақтілек пен Ақниет Жақайым –оқушы. Айкөркем мен Айжұлдыз, Маржан мен Айжан да, айналасының көзқуанышына айналған. Егіздердің ең кішісі, Нұрәлиевтер отбасының ұлдары – Дияс пен Мирас алғашқы қадамдарын басуда.2015 жылы Жақсыкелдиевтер отбасына қосылған – Айғаным, Асылым, Айланнан кейінгі үшем Алтынбаевтар шаңырағында 2020 жылы жалғасады. Айғаным, Асылым, Айлан балабақша тәрбиеленушілері. Отбасында ардақы ана, абзал әже атанған Ә.Айберген 2010 жылы өмірден өткен жолдасы Байқадам Төлегенұлының шаңырағын тіктеп, ұл-қызын азамат қатарына қосқан. Қарашаңырақта қалған келін енесіне қызмет етіп, үлкен кісінің ақ батасын алған. Үлкені Жомарт анасының жолын қуған, аудандық жедел жәрдем мекемесінің қызметкері. Қызы Гүлнұр – математика пәнінің мұғалімі. Байдәулеті былтыр университет дипломын қолына алып, ауылдағы №88 мектепте «Жастар тәжірибесімен» жұмыс істеуде. Кіші ұлы Ернұр «Болашақ» университетінің студенті. Ауыл акушерінің айтуынша, жылына 38-45 нәресте тұрғындар қатарын толықтырады. Бұл аудан бойынша жоғары көрсеткіш. Әйелдердің үлкені 44-те болса, ең жасы 18-ге аяқ басқан.Естуімізше, құрсақ көтере алмай, перзент сүю бақытын аңсап жүрген аналар ауылға жиі атбасын бұратын көрінеді. Бұл қазақы ырымнан туған сенім болса керек-ті.«Көпбалалы ата-ана атану біздің ауыл үшін қалыпты жай саналады. Жағдайға еліміздегі ана мен балаға деген қамқорлықтың жыл сайын артуы да әсерін тигізсе керек. Алайда дені сау бала дені сау ата-анадан туылады. Бұл орайда жүктілікті жоспарлау, әйел күтімі туралы да жұмысты негізгі бағытымызға айналдырғанбыз», – дейді қоштасарда.

Қызылорда облысындағы елді мекенде 25 жұп егіз тұрады

Қатерлі ісік үкім емес

<a href="https://kyzylorda-news.kz/">Kyzylorda-news.kz.</a> Дәрігер – жан мен тән шипагері. Адамның тәнін ғана емес, жанын да емдейтін ақ халатты жандардың қоғамда алатын орны ерекше.&nbsp;Адамның өмірі мен денінің саулығына тікелей қатысы бар дәрігерлер қауымының алдына сырқат жандар емімен қоса қамқорлықты сезінгісі келіп, сеніммен барады. Осындай сенімді ақтайтын дәрігерлік жолды таңдау үшін үлкен жүрек, нұрлы ақыл керек. Мұндай асыл қасиеттер бойынан табылатын жанның бірі – №3 қалалық емхананың бас мейірбикесі Әбдіхалықова Гаухар Алтынбекқызы.Ол жұмысында кәсіби маман болса, отбасында ардақты ана, адал жар, бір әулеттің ибалы келіні. Кәсібіне адалдық танытып, абыройлы еңбек етіп жүрген кейіпкеріміз отбасына көп көңіл бөлуге тырысады екен.<blockquote>– Бақытты отбасы болудың құпиясы бір-бірін түсіну. Сенім – бұл отбасылық үйлесімділікті сақтауда маңызды рөл атқарады. Бақытты отбасына байланысты тағы бір құндылықтың бірі – жауапкершілік. Отбасында әркім өз рөлін тыңғылықты атқарса, бір-біріне деген сыйластығын арттырады, – дейді ол.</blockquote>Гаухар Алтынбекқызы Қызылорда медициналық колледжін 2001 жылы үздік дипломмен бітірген. 2004-2009 жылдары Қорқыт ата атындағы Қызылорда университетін бітіріп, «Педагог-психолог» біліктілігі бакалавр академиялық дәрежесін алып шыққан. Онан соң Қызылорда медициналық жоғарғы колледжінің «Мейіргер ісі» мамандығы бойынша қолданбалы бакалавр дәрежесін де алған. Ал 2023 жылы М.Оспанов атындағы Батыс Қазақстан медицина университетін «Мейіргер ісі» денсаулық сақтау бакалавр академиялық дәрежесі берілген.Еңбек жолын 2001 жылы №1 қалалық емхананың химизиатр-мейіргері болып бастап, 2004 жылы аталған емханада 2-ші терапия бөлімінің аға мейірбикесі қызметін атқарды. 2012 жылы Қызылорда қалалық №3 емханасында терапия бөлімінің аға мейірбикесі, 2023 жылдан осы күнге дейін қалалық емхананың бас мейіргері қызметін атқарып келеді. Адам жанына араша болған ақ халатты абзал жандар қашан да халық арасында үлкен бедел мен құрметке ие. Бірақ олар үшін осындай абыройға бөлену оңай емес. Ол үшін кәсіби жоғары біліктілік, өз мамандығына деген шексіз сүйіспеншілік қажет. Өйткені, олар адам тағдырына жауап береді.&nbsp;Гаухар Алтынбекқызы медицина мамандарының қызметіне мұқтаж болып келген жанды жылы жүзбен қарсы алып, тиісті ем-дом жасайды. Әрбір алдына келушінің денсаулығы мықты болуы үшін көмегін аямайды. Уақытпен санаспай жұмыс жасайды. Өз жұмысына аса жауапкершілікпен қарайды. Сондықтан да әрқашан кәсіби біліктілігін жетілдіріп отыруды ұмытпайды.Аружан Мырзалықызы &nbsp;

Гаухар Алтынбекқызы: Отбасының бақыты сенім мен жауапкершілікте

<a href="https://kyzylorda-news.kz/">Kyzylorda-news.kz</a> &nbsp;Адам өміріне араша болатын дәрігерлік мамандығы үлкен жауапкершілікті талап етеді. Сондықтан болар бұл мамандыққа кез келген адам бара бермейді. Тереңнен ойлап қарасақ жауапкершіліктің астарында көптеген қасиет жатыр. Ол – табандылық, білім мен білік, мейірімділік. Осы қасиеттер ұштасқанда ғана мықты дәрігер болары сөзсіз. Біздің өңірде де білімі мен білігі, талабы мен талпынысы бір бойынан табылатын, алтын қолды дәрігерлер жетерлік. Солардың бірі – Қызылорда облыстық көпбейінді ауруханасында хирург қызметін атқарып жүрген Әсет Әбутәліпұлы Жалмағанбетов.Сырқаты жанына батқан талай науқасты ажалдан арашалап алып қалған хирург бүгінде жауапкершілігі өте үлкен дәрігер мәртебесінің биік болуына үлкен үлес қосып, қаншама жанның алғаусыз алғысына бөленіп келеді.Әсет бұл салаға бала жасынан қызыққан. Мектепті жақсы оқып, биология, химия пәндерін тереңнен игеруге тырысады. Оның қалайда дәрігер боламын деген мақсаты арман қала Алматыға әкелді. Өзінің білімінің арқасында &nbsp; &nbsp;Асфендияров атындағы Қазақ ұлттық медицина университетіне грантқа оқуға түсіп, білікті мамандардан дәріс алады.&nbsp;<blockquote>− Бұл салаға бала жасымнан қызығатын едім. Теледидардан ақ халатты киіп, ота жасап жатқан дәрігерлерді көргенде олардың жұмысын ерекше қызығатынмын. Сол арман жетегімен медицина саласы маманы болуды алдыма мақсат етіп қойдым. Мектепте оқып жүргенде сабақты жақсы оқыдым. Әсіресе, биология, химия пәндеріне қызығушылығым ерекше еді. Сондықтан аталған пәндерді тереңдете оқуға ықыласым артты. Сол арманым аса жауапты хирургия саласын таңдауыма әкелді,−дейді ол.</blockquote>Әсет 2012 жылы Қазақ ҰМУ-нің «Емдеу ісі» мамандығын бітіреді. Одан кейін Қызылорда қаласындағы облыстық медицина орталығында «Жалпы хирург» мамандығы бойынша интернатураны тәмамдайды. Содан соң аталған орталықта қабылдау бөлімшесінде дәрігер-хирург болып еңбек жолын бастаған. 2023 жылдан бастап орталықта хирургия №1 бөлімшесінің меңгерушісі қызметін атқаруда. 2017 жылы Алматы қаласы А.Сызғанов атындағы ұлттық-ғылыми хирургия орталығында «УДЗ бақылауымен кіші инвазивті әдістер» тақырыбында маманданудан өткен.&nbsp;Бүгінде &nbsp;ол өзінің &nbsp;біліктілігін жетілдіруді тоқтатқан емес. Үнемі ізденісті қажет ететін маман иесі болғандықтан білімді бірінші орынға қояды. Әсіресе хирургия саласының дамуына өзіндік үлесін қосуды армандайды. Қазіргі таңда бұл саланың біздің өңірде де тың серпін алып келе жатқандығын айтады.<blockquote>− Еліміздің хирургия саласының даму деңгейі әлемдегі дамыған елдермен шамалас. Ол жақтарда да жасалып жатқан ота түрлері бізде де жасалуда. Облыстағы хирургия саласының даму деңгейін республикада алдыңғы орындарда деп санаймын. Қазір біздің ауруханада Сызғанов атындағы ҰХҒО-та қызмет атқарып, алыс-жақын шетелде білім алып, көптеген жаңа ота түрін меңгерген тәжірибелі мамандар басшылық қызмет атқарады. Осындай жұмыстардың нәтижесінде облыс хирургиясы тың серпін алды. Нәтижесінде жаңа ота түрлерін сатылы түрде енгізіп жатырмыз. Жергілікті дәрігерлер Алматы қаласы Сызғанов атындағы ҰХҒО, шетелдік ауруханалармен тығыз байланыста еңбек етіп келеді. Аталған әріптестермен тәжірибе алмасып, жан-жақты жасалған үлкен ашық ота, кіші инвазивті жолмен жасалатын ота түрлері ауруханаға енгізілуде.&nbsp; Еңбек жолымда алғашқы жасаған aппендэктомия отасы ерекше есімде қалыпты. Соқырішекке байланысты жасалған отаны облыстық медицина орталығында 2012 жылы жасадым. Бүгінде күніне орташа есеппен 4-5 ота жасалуда. Ол аптасына шашамен 10-15 отаға жетеді. Олардың 90 пайзы кіші инвазивті жасалады, яғни лапароскопиялық жолмен жасалды, − дейді.&nbsp;</blockquote>Қазақ халқында «Ауырып ем іздегенше, ауырмайтын жол ізде» деген сөз бар. Білікті хирург бұл ретте халықтың денсаулыққа немқұрайлық танытпаса екен дейді. Сондай-ақ &nbsp;бұл ретте дәрігер халыққа құнарлы тамақтану жолын ұсынады. Осы ретте хирургияның қыр-сырын тереңнен меңгеруді қолға алған Әсет жұмыс барысында түрлі жобаларға қатысып, отаның сәтті өтуіне атсалысып келеді.&nbsp;<blockquote>− Орталықта науқастарға кіші инвазивті технологияны пайдаланып, лапароскопиялық операциялар кеңінен орындалуда. Қазіргі таңда лапароскопиялық аппендэктомия, холецистэктомия, шап жарықтары кезінде лапароскопиялық герниопластика ТАРР, асқазан және 12 елі ішек тесілген ойық жарасын лапароскопиялық тігу, панкреонекроз кезінде лапароскопиялық кіші шарбы майды ашу секілді жаңашыл істерді қолға алып отырмыз. Оған қоса дренаждау, механикалық сарғаю кезінде лапароскопиялық бауыр арқылы холецистостома орнату және УДЗ және ИОХГ бақылауымен тері-бауыр арқылы холангиостомия, лапароскопиялық бауырдың эхинококэктомиясы, жатырдан тыс жүктілік кезіндегі лапароскопиялық тубэктомия және туботомия жасалады. Одан басқа да көптеген отаны орындаймын. Санитарлық авиация арқылы аудандық ауруханаларда жоспарлы және жедел ота жасаудамыз, − дейді дәрігер.&nbsp;</blockquote>Осындай еңбегінің арқасында Әсет түрлі марапат төрінен көрінуде. Бұл оның еңбегінің жемісі. Осындай жақсы дәрежеге жетуіне өзінің алдыңғы буын ағаларының, ұстаздарының арқасы деп біледі.&nbsp;<blockquote>− Еңбек жолымда көптеген білікті маманнан тәлім алдым. Сондықтан менің үлгі тұтатын ұстаздарым көп. Ол азаматтар менің жақсы маман болып қалыптасуыма жол сілтеді. Олардың қатарында облыс хирургиясын республикалық деңгейге көтерген білікті азаматтар көп. Мәселен, елімізде көптеген хирургия саласының профессорларын тәрбиелеген Абдулла Шүленбаев, облысқа танымал хирургтар Нуриддин Әмитов, Бекет Мантаев, Вероника Цой, Бауыржан Куанышбаев сынды мамандарды ерекше құрметпен атаймын. Сондай-ақ, Қазақстан хирургиясын әлемге танытқан Болатбек Баймахановқа алғыс айтамын, − дейді ол.</blockquote>Жақсы дәрігер ауруды жазады деген. Халықтың ықыласына бөленіп, жақсы дәрігер атану көп маманның қолынан келе бермейтін іс. Бұл ретте Әсет Әбутәліпұлы үдеден шығуда десек артық айтпағандығымыз болар.Мейрамгүл ДАУЫЛБАЙҚЫЗЫ &nbsp;

Адал қызмет алғысқа бөлейді

<a href="https://kyzylorda-news.kz/">Kyzylorda-news.kz.</a> Жүйе іске қосылған 2017 жылдың 1 шілдесінен 2024 жылдың 1 мамырға дейін Қызылорда облысының тұрғындары Әлеуметтік медициналық сақтандыру қорына 74,5 млрд. теңге аударды. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.&nbsp;Аударыдған қаржының 44,8 млрд. теңгесі жұмыс берушілердің аударымдары болса, қалған 29,7 млрд. теңге - жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі.Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.&nbsp; &nbsp;

Қызылордалықтар Әлеуметтік медициналық сақтандыру қорына 74,5 млрд теңге аударды

<a href="https://kyzylorda-news.kz/">Kyzylorda-news.kz.</a> Емханаға келген әрбір тұрғынға жылы шырай танытып қарсы алатын Шолпан Омар көпшілік арасында мінезінің жайдарлылығымен танылған. Кіндік қаны Тереңөзек топырығына тамғанымен, оның балалық шағы, студенттік кезеңі Атырау қаласында өрбіді.Атырау қаласындағы медициналық колледжді тәмамдаған Шолпан Сматқызының еңбек жолы Сырдария аудандық ауруханасының «Хирургия» бөлімшесінде бастау алады. Сонымен қатар тәжірибелі маман 1994-1997 жылдар аралығында «Айгөлек» балабақшасында жұмыс жасаған. Ал 15 жылдан бері аяулы жан аудандық емхананың «Тіркеу» бөлімшесінде мақтаулы маман ретінде жастарға жол көрсетуде.<blockquote>– Медицина саласында әрбір жұмыстың жауапкершілігі жоғары. Біз күнделікті емханаға келушіні арнайы базаға тіркеп, дәрігерге жол нұсқаймыз. Электронды жүйені күнделікті меңгере түсіп, цифрландыру бағдарламасына ден қоямыз. Базалық жүйенің бөге-шүгесіне қанығып, емханаға келушіге сапалы қызмет ұсынамыз. Көбіне аймақтық дәрігерлердің қабылдау кестесіне сай, жергілікті тұрғындар диагнозы бойынша тексеріліп жатады, – дейді өз ісінің білгірі.</blockquote>Ардақты ана үйдегі отағасы Бақтыбай Ілиясовпен бірге 3 перзент, 6 немеренің ортасында бақытты ғұмыр кешуде.

Өз ісінің білгірі атанған маман

<a href="https://kyzylorda-news.kz/">Kyzylorda-news.kz.</a> Бүгін Байқоңыр қаласында жылжымалы медициналық кешен екінші күн халыққа тегін қызмет көрсетуде. Жылжымалы медициналық кешеннің жетекшісі Құлмаганбетов Айдос Қалдыбекұлы, Байқоңыр қаласы көп бейінді ауруханасының бас дәрігері Кенжебаев Султанбек Айбасович және бас дәрігердің емдеу ісі жөніндегі орынбасары Игенбаев Ержан Куандықұлымен бірлесіп халыққа түсіндірме жұмыстарын жүргізді. Қатерлі ісіктің алдын алу, дер кезінде арнайы тексерулерден өту, салауатты өмір салтын қалыптастыру бағытында ақпарат беріліп, тұрғындардың сұрақтарына жауап берілді.Аудан орталықтарынан алыс ауылдардың тұрғындарына сапалы медициналық қызмет пен жәрдем ұсыну бүгінгі таңда да өзекті мәселе. Осы мәселені шешудің бір жолы ретінде жылжымалы медициналық кешенді атауға болады. Қазіргі таңда облыстық онкология орталығына "Қазақстан халқына" қоғамдық қоры арқылы алынған жылжымалы медициналық кешен Байқоңыр қаласынан бастап облысымыздың барлық аудандарына барып қызмет көрсететін болады. Екі көліктен тұратын жылжымалы медициналық кешен томосинтез функциясы бар сандық маммографиялық жабдықпен, сарапшылық деңгейдегі ультрадыбыстық жүйемен және жоғары дәлдікпен зерттейтін компьютерлік томографпен жабдықталған. Екі құрал да Жапонияда жасалған. Мұндай кластағы және конфигурациядағы медициналық жабдық Қазақстанда алғаш рет қолданысқа беріліп отыр. Осының арқасында елді мекен тұрғындары ауылдан алыстап шықпай-ақ, тегін КТ, маммографиялық зерттеу, УДЗ сынды өзгеде қызмет түрлеріне жүгіне алады.Бұл зерделеу жұмыстары МӘМС жүйесінде сақтандырылмаған мәртебесі бар тұрғындарға еш кедергісіз тексерілуге мүмкіндік береді. Сонымен қатар, мүмкіндігі шектеулі жандарғада барлық жағдай жасалынған. Мүмкіндігі шектеулі адамдар үшін пандус-лифті бар екенін айта кетуіміз керек. Яғни медицина қызметкерлері үшін де, пациенттер үшін де қолайлы жағдай жасалған.Бүгін онколог дәрігердің қабылдауында 34 тұрғын болды, оның ішінде 4 тұрғын МӘМС жүйесінде сақтандырылмаған. Сонымен қатар, УДЗ зерттеуінен 31 және 90 әйел маммографиялық зерделеуден өтті. Нәтижесінде 6 тұрғында қатерлі ісікке күмәнді ретінде тіркеліп, толық зерттеуден өту мақсатында облыстық онкология орталығына жолданды.

Байқоңыр қаласында жылжымалы медициналық кешен жұмысы жалғасын табуда

<a href="https://kyzylorda-news.kz/">Kyzylorda-news.kz.</a> Өмірде денсулықтан артық байлық жоқ. Оны ауырмағандар түсіне бермейді. Жаны ауырып, түрлі дертке ұшырағандар денсаулықтың қадірін әлдеқашан мойындап қойған.&nbsp;«Халқымыздың «басты байлық – денсаулық» деп бір ауыз сөзбен айта салған даналығына бас идім. Ұйқы тыныш, тәбетің жақсы боп, ертеңгісін еш жерің ауырмай оянудың өзі жарты бақыт екенін ұқтым», деді емес пе дерті жанына батқан тележүргізуші Бейсен Құранбек. Міне, біз сондай сынақ келгенде аурухана төсегіне таңылып, медицина мамандарының көмегіне мұқтаж боламыз. Әрине шықпас жанға себепші болып, түрлі диагноздар қою арқылы дертіңмен күресетін дәрігердің орны бөлек. Ал содан кейінгі күтім жасау мен дәрігердің нұсқаулықтарын орындауда қабағы мен көңілі арқылы науқастың дертінен айығуына себепші болатын медбикелердің медицина саласында маңызы зор.Иә, 12 мамыр – Халықаралық медбикелер күні. Бұл мереке 150 жылдан астам тойланып келеді, бірақ 1974 жылдан бастап ресми түрде атаулы күн болып белгіленді. Содан бері бұл ең қажетті және маңызды мамандықтардың өкілдеріне алғыс білдірудің тамаша мүмкіндігі саналып келеді. Осы орайда сол бір алғыс пен құрметтің лайықты иесіне айналған маман жайында сөз сабақтамақпыз. Ол аудандық аурухананың жансақтау бөлімінде күндізгі мейіргер болып қызмет атқаратын Ақгүл Жалмағанбетова. Өзі Аманөткелдің тумасы. Ауыл мектебін бітірген болашақ мейіргер Ақтөбе медициналық колледжін мейіргер ісі мамандығы бойынша 1998 жылы тәмамдайды. Содан кейін елге келіп, уақытша мейіргер, ауыл дәрігерінің көмекшісі қызметтерін атқарады.<blockquote>– 1998 жылы оқу бітіріп ауылға келдім. Ол кезде дайын тұрған жоқ болды. Еліміз енді еңсе тіктеп, жұмыс орындарының енді ашыла бастаған кезі ғой. Ол кезде ауылда көбі жұмыссыз болды. Оқу бітірген көптеген мамандар өзімсіз секілді жұмыссыздар санатында еді. Мен өз мамандығымнан қол үзбеу мақсатында ауылдағы дәрігредің көмекшісі қызметін уақытша атқарып жүрдім. Жалақы да мардымсыз еді. Тіпті жоқ десе де болады. Мен сондықтан ол жұмысты нақты жұмыс деп айта алмадым. Дей тұрғанмен сондағы жұмыс өтілім мені белгілі бір ортада жұмыс істеуге, жауапкершілік арқалауға үйретті. Уағыт өте 2006 жылы Арал қаласына келіп, осында өзімнің өмірлік жолдасымды кезіктірдім. Осылайша отбасылық өмір басталып кетті. Бала күтімі, үй шаруасы сынды жұмыстардан бас көтермей жүргенде 10 жылдай уақыт өте шығыпты. Нақтысы 2016 жылы қазіргі жұмысыма ресми кірісе бастадым, – дейді мейіргер маман А.Жалмағанбетова.</blockquote>Отбаслық өмірде өз орнын тауып, ибалы келін, аялуы ана атана білген кейіпкеріміз бүгінде өмірлік жары Қазыбекпен бірге үш перзентін мәпелеп өсірген ардақты жан. Шаңырақтың ұйытқысы болумен қатар, медицина саласының кәнігі маманына айналған Ақгүл талай нәрестенің жарық дүние есігін ашуға себепші, ана мен баланың күтіп-баптайтын бағбаншысы десек жарастындай. Ол көбіне кесір тілігі жасалатын аналардың қолдаушысы һәм күтушісі.&nbsp;<blockquote>– Сәтті жасалған ота біздің жұымысыздың лайықты бағасы. Отадан кейінгі жауапкершіліктің дені бізде болғандықтан әрбір науқастың өмірі біз үшін аса маңызды. Сол үшін ұйықтамаған, уақытпен санаспаған сәттер көп болды, – дейді мейіргер маман Ақгүл.</blockquote>Иә, «Әрбір науқас үйіне аман-есен оралса бізге сол бақыт» деген еді кейіпкеріміз. Расында өз ісін асқан жауапкершілікпен атқарған маман қай кезде де мақтаулы болады. Бұны уақыттың өзі дәлелдеп келеді. Қат-қабат тірлікпен қатар қызметті де абыройлы алып жүрген осындай жандардың қоғамға қосар үлесі ерекше десек біз тақырыпқа арқау еткен Ақгүл Жалмағанбетованың мақтаулы маман деуге әбден болатын шығар.

Ақгүл Жалмағанбетова: Сәтті жасалған ота біздің жұымысыздың лайықты бағасы

<a href="https://kyzylorda-news.kz/">Kyzylorda-news.kz.</a>&nbsp; МӘМС жүйесі туралы тұрғындардың өзекті сұрақтарына жауап беруді жалғастырамыз. Әлеуметтік медициналық сақтандыру қорының Қызылорда облысы бойынша филиалының бас сарапшысы Айгүл Аханова түсініктеме берді.Мен шетелде күндізгі оқуымды аяқтадым. Сақтандыру мәртебесін қалай алуға болады?МӘМС туралы Заңның 5-бабының 3-тармағына сәйкес Қорға аударымдар және (немесе) жарналар төленбеген тұлғалар МӘМС жүйесінде медициналық көмекке құқық алу үшін төленбеген кезең үшін, бірақ төлем күнінің алдындағы он екі айдан аспайтын мерзім үшін Қорға ең төменгі жалақы мөлшерінің 5 пайызы мөлшерінде жарналар төлеуге міндетті республикалық бюджет туралы заңмен ағымдағы қаржы жылына белгіленген төлемдер (дербес төлеуші, 2023 ж. – 3 500 теңге, 2024 ж. – 4 250 теңге). Егер сіз күндізгі бөлімде оқыған болсаңыз, қарызды жою үшін kanc@fms.kz немесе e-otinish веб-сайты арқылы хат жолдап, растайтын құжаттарды (өтініш, диплом қосымшасымен) қоса беру қажет.Емхана деңгейінде оңалтудың қандай түрін алуға болады?Медициналық оңалту қызметтерін алу үшін жергілікті дәрігерге хабарласу қажет. Анамнезді жинап, мәліметтерді нақтылағаннан кейін учаскелік дәрігер реабилитологқа жолдама береді немесе пациенттің құжаттарын мультидисциплинарлық топ (МДТ) мамандарына жібереді.&nbsp;Емханада тәулік бойы бақылау және емдеу қажет емес жағдайларда амбулаториялық негізде оңалту емін алуға болады. Бұл емхананың жабдықталуына, науқастың жағдайына және оның ауруына байланысты.Амбулаториялық деңгейде, егер пациенттің денсаулық жағдайы тұрақты болса, оңалтудың үшінші кезеңін ғана жүргізуге болады. Мұны тек дәрігер немесе МДТ анықтай алады. Медициналық оңалту қызметтерінің негізгі көлемін МӘМС пакетінде алуға болады. ТМККК-ға туберкулезбен ауыратын науқастарды оңалту бойынша медициналық қызметтер кіреді.Мен емханаға бардым, олар менің сақтандырылмағанымды айтты. Қаңтар айынан бастап МӘМС-ке аударымдар мен жарналар ресми түрде жұмыс орнынан аударылады, бірақ әлі күнге дейін мәртебе жоқ. Неліктен?Сақтандыру мәртебесі соңғы 12 айда міндетті әлеуметтік медициналық сақтандыру жүйесінде қарызы жоқ адамдарға тағайындалады. &nbsp;Егер сіз қаңтар айынан бастап МӘМС-ге аударымдар мен жарналарды аударып жүрсеңіз, алдыңғы айлардағы қарызды төлеуіңіз керек, ал Сізге сақтандыру мәртебесі 3 жұмыс күні ішінде беріледі.&nbsp;Қарызды дербес төлеуші ретінде кез-келген ыңғайлы тәсілмен банктің филиалында немесе олардың мобильді қосымшалары арқылы, «Қазпочта» филиалдарында немесе төлем терминалдарында төлей аласыз.фото: egemen.kz

Қазақстан және Қызылорда облысының жаңалықтары: Денсаулық